བོད་ཀྱི་ན་གཞོན་སྒྲུང་པ་སྲི་ཐར་རྡོ་རྗེར་བཅར་འདྲི་ཞུས་པའི་གནས་ཚུལ་རགས་བཀོད།

སྔོན་འགྲོའི་ཞུ་མཆིད།

《གེ་སར་རྒྱལ་པོའི་རྟོགས་བརྗོད》ནི་འཛམ་གླིང་གི་དཔའ་བོའི་ལོ་རྒྱུས་སྙན་རྩོམ་རིང་ཤོས་དང་འཛམ་གླིང་རིག་གནས་བང་མཛོད་ཀྱི་འོད་སྟོང་འཕྲོ་བའི་མུ་ཏིག་རྡོག་ཅིག་ཡིན། 2024ལོར་བོད་ཀྱི་སྒྲུང་པས་ཀྲུང་དབྱང་བརྙན་འཕྲིན་ཁང་གི་ལོ་སར་དགོང་ཚོགས་སུ་ཐེངས་དང་པོར་གེ་སར་འཁྲབ་སྟོན་བྱས་པས། སྔར་ལས་ལྷག་པའི་སྒོས་རྒྱལ་ཕྱི་ནང་གི་གྲོགས་པོ་ཚོས་གེ་སར་རིག་གནས་ངོ་ཤེས་པར་གྱུར། དེ་ཡང་ཀྲུང་དབྱང་བརྙན་འཕྲིན་ཁང་གི་ལོ་སར་དགོང་ཚོགས་སུ་ཞུགས་པའི་སྒྲུང་པ་ནི་སྲི་ཐར་རྡོ་རྗེ་ཡིན་ཞིང་། ཁོང་གིས་ཆབ་མདོའི་ཁམས་པ་སྒྱུ་རྩལ་ཁང་གི་འཁྲབ་སྟོན་པ་དང་ལྷན་དུ་བོད་ཀྱི་གནའ་བོའི་རོལ་ཆས་ཀྱི་རམ་འདེགས་འོག་གེ་སར་སྒྲུང་དེ་རྒྱལ་ནང་གི་གར་སྟེགས་ཆེ་ཤོས་སུ་འཁྲབ་སྟོན་བྱས་པས། གུས་པས་ཁོང་གར་སྟེགས་ཆེན་པོ་དེར་ཞུགས་པའི་མྱོང་ཚོར་དང་གེ་སར་རིག་གནས་རྒྱུན་འཛིན་དར་སྤེལ་ཐད་བཅར་འདྲི་བྱས་པར་གཤམ་གསལ་ལྟར་རོ། །

དྲི་བ་དྲིས་ལན།

གསར་འགོད་པ། ད་ལོ་ཁྱེད་ཀྱིས་བོད་ཀྱི་སྒྲུང་པ་ཡོངས་ཀྱི་ཚབ་བྱས་ནས་ཀྲུང་དབྱང་བརྙན་འཕྲིན་ཁང་གི་ལོ་སར་དགོང་ཚོགས་ལ་ཞུགས་པ་དང་། འདིའང་བོད་ཀྱི་སྒྲུང་པ་ཀྲུང་དབྱང་བརྙན་འཕྲིན་ཁང་གི་ལོ་སར་དགོང་ཚོགས་ལ་ཐེངས་དང་པོ་ཞུགས་ནས་འཁྲབ་སྟོན་བྱས་པ་ཡིན་པས། དེ་ལ་མྱོང་ཚོར་གང་འདྲ་འདུག །

སྲི་ཐར་རྡོ་རྗེ། ད་ལོ་བོད་རང་སྐྱོང་ལྗོངས་ཆབ་མདོ་གྲོང་ཁྱེར་ཁམས་པ་སྒྱུ་རྩལ་ཁང་གི་འཁྲབ་སྟོན་པ་ཁག་ཅིག་དང་ལྷན་དུ་བོད་ཀྱི་སྲོལ་རྒྱུན་རོལ་ཆས་ཀྱིས་གེ་སར་སྒྲུང་གི་ངག་རྟ་བརྒྱན་ནས་ཀྲུང་དབྱང་བརྙན་འཕྲིན་ཁང་གི་ལོ་སར་དགོང་ཚོགས་སུ་འཁྲབ་སྟོན་བྱེད་པའི་གོ་སྐབས་ཐོབ་ཅིང་། གཅིག་ནས་འདི་ནི་ཀྲུང་དབྱང་བརྙན་འཕྲིན་ཁང་གི་ལོ་སར་དགོང་ཚོགས་ལ་ཞུགས་པའི་ལོ་རྒྱུས་ཐོག་ཐེངས་དང་པོ་ཡིན་པས། དོན་སྙིང་བརྗོད་ཀྱིས་མི་ལང་བར་འདུག་སྙམ། གཉིས་ནས་ངས་བོད་ཀྱི་སྒྲུང་པ་ཡོངས་ཀྱི་ཚབ་བྱས་ནས་གར་སྟེགས་ཆེན་མོ་དེར་གེ་སར་སྒྲུང་འཁྲབ་སྟོན་བྱེད་པའི་གོ་སྐབས་ཐོབ་པ་ནི་བླ་ན་མེད་པའི་གཟི་བརྗིད་དང་ཕྲག་ཏུ་འགན་འཁྲི་ལྕི་མོ་ཞིག་འདུག་སྙམ། གསུམ་ནས་ཁོ་བོས་སྔོན་ཆད་ངག་ཐོག་ནས་གེ་སར་སྒྲུང་བཤད་པ་ལས་གར་སྟེགས་ཆེན་པོ་འདི་ལྟ་བུའི་ཐོག་ཏུ་འཁྲབ་སྟོན་བྱེད་མ་མྱོང་བ་དང་། འཁྲབ་སྟོན་བྱེད་སྐབས་བརྗོད་བྱའི་ནང་དོན་དང་ངག་གི་འགྱུར་ཁུག །ལུས་ཀྱི་ཆ་བྱད། གདོང་གི་རྣམ་འགྱུར་སོགས་ཕྱོགས་ཡོངས་ལ་དོ་སྣང་ཆེན་པོ་བྱེད་དགོས་པས། རང་ལ་མཚོན་ན་འགྲན་སློང་དང་ཐོད་རྒལ་ཞིག་ཡིན་པར་མ་ཟད། ང་ཚོ་སྒྲུང་པ་ཚོས་ཀྱང་གར་སྟེགས་ཀྱི་འཁྲབ་སྟོན་ལ་དོ་སྣང་བྱེད་དགོས་པའི་བློ་བསྐྱེད་བྱུང་།

གསར་འགོད་པ། ཁྱེད་རང་ཆུང་དུས་ནས་སྒྲུང་བབ་པ་རེད་དམ། གནས་ཚུལ་ག་འདྲ་ཞིག་གི་འོག་ནས་སྒྲུང་བབ་འགོ་བརྩམས་པ་དང་སྒྲུང་བབ་པའི་རྒྱུད་རིམ་རགས་བསྡུས་ཤིག་གསུང་རོགས།

སྲི་ཐར་རྡོ་རྗེ། ལོ་དགུའི་སྐབས་སྒྲུང་བབ་འགོ་བརྩམས་པ་རེད། དེ་ཡང་ཉིན་ཞིག་གི་དགོང་མོ་སློབ་གྲྭའི་ཉལ་ཁང་དུ་རྨི་ལམ་ཡ་མཚན་ཆེ་བ་ཞིག་རྨིས་བྱུང་། རྨི་ལམ་དུ་ང་རང་མཛེས་ཤིང་ལྟ་ན་སྡུག་ཅིང་། རྟ་ནོར་ལུག་གསུམ་གྱིས་ཕྱུག་པའི་རྩྭ་ཐང་ཡངས་མོ་ཞིག་ཏུ་སླེབས་སོང་། དེར་སླེབས་རྗེས་མི་གཉིས་ངའི་ཟུར་དུ་བཅར་བྱུང་བས། ང་རང་དངངས་སྐྲག་ཅུང་སྐྱེས་ཙ་ན། ཁོང་གཉིས་ཀྱིས་གཅིག་ནི་འདན་མ་དང་ཅིག་ཤོས་ནི་ཤན་པ་ཡིན། མི་ཡུལ་ནས་ཁྲིད་ཤོག་ཟེར་བའི་མི་དེ་འདི་རེད་ཟེར་ནས་ང་རང་མཉམ་པོར་ཁྲིད་སོང་། དེ་ནས་དམག་སྒར་ཞིག་ཏུ་སླེབས་པའི་སྣང་བ་སྐྱེས་ཏེ། མི་ཞིག་གིས་ཁྱོད་དེ་རིང་འདིར་སླེབས་པར་རྟེན་འབྲེལ་ཆེན་པོ་ཡོད་ཟེར་ནས་ཡི་གེ་པོ་ཏི་མང་པོ་ཞིག་སྤྲད་དེ་ད་ཁྱོས་འདི་ཚང་མ་ཟ་དགོས་ཞེས་ཟེར། ངས་འདི་ཟ་ཐུབ་རྒྱུ་མ་རེད་དྲན་ནས་སེམས་སུ་དངངས་སྐྲག་ཆེན་པོ་ཞིག་སྐྱེས་ཀྱང་། ཤན་པ་དང་འདན་པ་གཉིས་ཀྱིས་ངེས་པར་དུ་ཟ་དགོས་ཟེར་ནས་ཁ་ནང་དུ་ཨུ་ཚུགས་ཀྱིས་བརྫངས་བྱུང་། དེ་ནས་ཡི་གེ་པོ་ཏི་མང་པོ་ཞིག་བཟས་རྗེས་དེ་རིང་རྟེན་འབྲེལ་ཤིན་ཏུ་ཡག་སོང་། ད་ཕར་ཕྱོགས་ནས་སོང་ཟེར་བ་ན། ཕར་ཕྱོགས་སུ་རྒྱང་ནས་བལྟས་ན་འཇའ་ཞིག་དང་ཉེ་ནས་བལྟས་ན་ལམ་ཞིག་འདུག་པ་དེར་རྐང་པ་ཡ་གཅིག་བཀྱགས་ནས་འགྲོ་གྲབས་བྱེད་སྐབས། སློབ་གྲྭའི་དགེ་རྒན་གྱིས་ཡར་ལངས་ཟེར་བའི་སྐད་གཏོང་ནས་ང་རང་གཉིད་ལས་སད་བྱུང་། དེ་ནས་ཡར་ལངས་རྗེས་གཟུགས་པོའི་ནང་དུ་གཅིག་ཞུགས་ཡོད་པ་ལྟར། སེམས་སུ་མདང་དགོང་གི་རྨི་ལམ་གྱི་རྣམ་པ་དེ་ཡང་ཡང་དུ་འཁོར་ཞིང་། མིག་མདུན་དུ་ཡི་གེ་འདྲ་མིན་དང་། རྟ་རྒྱུག་པ་སོགས་འཆར་ནས་རང་ཉིད་སྔར་དང་མ་འདྲ་བ་ཞིག་ཆགས་འདུག །དེ་ནས་སློབ་ཁྲིད་ཚོགས་སྐབས། གློ་བུར་དུ་མགོ་ནང་དུ་ཅི་ཞིག་འཛུལ་བ་དང་ཁ་ནས་ཅི་ཞིག་ཐོན་པའི་ཟོར་གྱིས་ཐེངས་དང་པོ་ཆུ་ཚོད་གཉིས་ཙམ་གྱི་རིང་ལ་སློབ་གྲྭའི་སློབ་ཁང་དུ་གེ་སར་སྒྲུང་བཤད་འགོ་བརྩམས་པ་རེད། དེ་ནས་རིམ་བཞིན་སློབ་གྲྭ་དང་ཕ་ཡུལ། གཉེན་སྒྲིག་བྱེད་ས་དང་དགའ་སྟོན་དུས་ཆེན་སྐབས། ལྷག་པར་དུ་མང་ཚོགས་འདུ་འཛོམས་ཆེ་ས་སོགས་སུ་སྒྲུང་བཤད་པ་ཡིན་ལ། ཚང་པས་དགའ་མོས་ཆེན་པོ་བྱེད་བཞིན་འདུག་པས། རང་གི་སེམས་ཡང་སྤྲོ་བས་ཁེངས་སོང་། དེ་ནས་དཔལ་འབར་རྫོང་དྲིལ་བསྒྲགས་ཁང་དང་རིག་གནས་ཁང་། ལྷག་པར་དུ་ཆབ་མདོ་གྲོང་ཁྱེར་དྲིལ་བསྒྲགས་ཁང་དང་རིག་གནས་ཁང་། དེ་བཞིན་བོད་རང་སྐྱོང་ལྗོངས་དང་བོད་ལྗོངས་སློབ་ཆེན་སོགས་འབྲེལ་ཡོད་སྡེ་ཁག་གིས་ཐུགས་ཁུར་དང་རྒྱབ་སྐྱོར་ཆེན་པོ་བྱས་ནས་ང་ལ་སྒྲུང་བཤད་རྒྱུའི་གོ་སྐབས་དང་། དེ་ལ་སྲུང་སྐྱོབ་བྱས་པར་བརྒྱུད། གེ་སར་སྒྲུང་རྒྱུན་འཛིན་དར་སྤེལ་གཏོང་བའི་མི་སྣ་ཞིག་ཏུ་ཆགས་སོང་།

གསར་འགོད་པ། ཁྱེད་ཀྱིས་ད་བར་དུ་སྒྲུང་ཚན་དུ་ཙམ་ཕབ་ཡོད་པ་དང་དེ་དག་ལས་ཆེས་མཚོན་བྱེད་རང་བཞིན་ལྡན་པ་ཞིག་ངོ་སྤྲོད་གནང་རོགས།

སྲི་ཐར་རྡོ་རྗེ། ངས་ལོ་དགུ་ནས་ད་ལྟའི་བར་དུ་བོད་ལྗོངས་སློབ་གྲྭ་ཆེན་མོའི་ནང་སྒྲུང་ཚན་སུམ་ཅུ་བརྙན་ཕབ་བྱས་ཡོད་པ་དང་དེའི་ཐོག་ཆབ་མདོའི་བརྙན་འཕྲིན་ལས་ཁུངས་སོགས་སུ་ཕབ་པ་རྣམས་ཡར་བསྡོམས་ན་སྒྲུང་ཚན་དྲུག་ཅུ་ལྷག་བཤད་ཡོད། དེ་དག་ལས《འབྱུང་བཞི་བདེ་བཀོད》ཅེས་པ་འབྱུང་བ་བཞིའི་ཐོག་ནས་སྲིད་པ་ཆགས་པའི་སྐོར་གྱི་སྒྲུང་ཞིག་བཤད་ཡོད་དེ། སྤྱིར་གེ་སར་སྒྲུང་དུ་སྲིད་པ་ཆགས་པའི་ལོ་རྒྱུས་ཀྱི་སྐོར་ཤིན་ཏུ་ཉུང་ཡང་། ངས་བཤད་པ་དེར་སྲིད་པ་ཆགས་ལུགས་ཆགས་སྟངས་སྐོར་ཞིབ་ཅིང་ཕྲ་བ་དང་ནང་དོན་ཕུན་སུམ་ཚོགས་པས། གེ་སར་སྒྲུང་ལ་ཁ་གསབ་དང་འཐུས་སྒོ་ཇེ་ཚང་དུ་བཏང་བར་མ་ཟད། གེ་སར་གྱི་སྒྲུང་ཚན་ཀུན་ལས་ཆེས་འགོ་མའི་གྲས་སུ་བཞག་ཆོག་སྙམ།

གསར་འགོད་པ། མིག་སྔར་ཁྱེད་ནི་རིག་གནས་ཆུ་ཚད་ཆེས་མཐོ་བའི་བོད་ཀྱི་སྒྲུང་པ་ཞིག་ཡིན་པས། ཁྱེད་ལ་གེ་སར་རིག་གནས་འཕེལ་རྒྱས་གཏོང་བའི་ཐད་སྒྲུང་པ་གཞན་དང་མི་འདྲ་བའི་ནུས་པ་དང་འགན་ཁུར་ག་འདྲ་ཡོད།

སྲི་ཐར་རྡོ་རྗེ། ང་རང་སློབ་གྲྭ་ཆེ་འབྲིང་ཆུང་གསུམ་དང་ཞིབ་འཇུག་སློབ་མ་སོགས་འགྲིམས་པར་མ་ཟད། རྒྱལ་ནང་གི་ས་གནས་མང་པོ་ལ་སློབ་སྦྱོང་འགྲོ་རྒྱུའི་གོ་སྐབས་རྙེད་པས། སྒྲུང་པ་གཞན་དག་ལས་གེ་སར་རིག་གནས་དྲིལ་བསྒྲགས་དང་ཁྱབ་སྤེལ་གཏང་རྒྱུའི་འགན་ཁུར་ལྕི་བ་དང་། སྒྲུང་པ་ཞིག་གི་ངོས་ནས་རྒྱལ་ཕྱི་ནང་གི་མི་རིགས་གཞན་དག་ལ་རང་གི་ལྟ་བ་དང་སྒྲུང་གི་ནང་དོན་རྣམས་རྒྱུས་མངའ་ཡོད་པའི་སྒོ་ནས་ངོ་སྤྲོད་དང་ཁྱབ་བསྒྲགས་བྱེད་པ་སོགས་ལ་རིག་གནས་སྦྱོང་པ་དེས་ཕན་པ་ཆེན་པོ་འདུག་སྙམ། ངའི་རེ་བ་ལ་བོད་ཀྱི་ན་ཆུང་སྒྲུང་པ་ཚོས་ངེས་པར་དུ་རིག་གནས་ཡག་པོ་སྦྱོང་དགོས་འདུག་སྟེ། རིག་གནས་སྣ་མང་སྦྱོང་ན། གཅིག་ནས་གེ་སར་སྒྲུང་ཞིབ་འཇུག་བྱེད་པར་རིག་ཚན་མང་པོའི་རྒྱབ་བརྟེན་ཡོད་པ་དང་།

གཉིས་ནས་ཚན་རིག་དང་མཐུན་པའི་སྒོ་ནས་གེ་སར་སྒྲུང་རྒྱུན་འཛིན་དང་ཁྱབ་བསྒྲགས་བྱེད་ཐུབ། གསུམ་ནས་རྒྱལ་ཕྱི་ནང་གི་གྲོགས་པོ་མང་པོ་ཞིག་ལ་གེ་སར་སྒྲུང་གི་ནང་དོན་དང་ཁྱད་ཆོས་སོགས་ངོ་སྤྲོད་བྱེད་ཐུབ།

གསར་འགོད་པ། མིག་སྔར་གེ་སར་རིག་གནས་རྒྱུན་འཛིན་དར་སྤེལ་གྱི་གནས་བབ་ག་འདྲ་ཡིན་པ་དང་ཁྱེད་ལ་གེ་སར་རིག་གནས་རྒྱུན་འཛིན་དར་སྤེལ་གཏོང་བའི་ཐད་བསམ་ཚུལ་གང་འདྲ་ཡོད།

སྲི་ཐར་རྡོ་རྗེ། ད་ལྟ་གེ་སར་སྒྲུང་འཕེལ་རྒྱས་འགྲོ་བའི་གོ་སྐབས་བཟང་པོ་ཞིག་ལ་སླེབས་ཡོད་རེད། གཅིག་ནས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་གེ་སར་སྒྲུང་ལ་ཞིབ་འཇུག་དང་མྱུར་སྐྱོབ་བྱེད་དགོས་པའི་ཐད་གསུང་བཤད་གལ་ཆེན་ཐེངས་མང་གནང་ཡོད་རེད། གཉིས་ནས་དེང་རབས་ཀྱི་རིག་གཞུང་དང་ལག་རྩལ་གསར་པའི་འཕེལ་རྒྱས་ཆེན་པོའི་འོག །གེ་སར་སྒྲུང་ལ་ཞིབ་འཇུག་དང་མྱུར་སྐྱོབ་བྱེད་པར་སྔ་དང་མི་འདྲ་བར་འཕེལ་རྒྱས་བྱུང་ཡོད་རེད། ངའི་བསམ་པར་གེ་སར་སྒྲུང་མྱུར་སྐྱོབ་དང་རྒྱུན་འཛིན་དགོས་ན་གཙོ་བོ་གེ་སར་སྒྲུང་པ་ལ་ཐུག་ཡོད་པས། གེ་སར་སྒྲུང་པ་ལ་སྲུང་སྐྱོབ་བྱ་རྒྱུ་དེ་ལས་ཀ་གལ་འགངས་ཆེ་བ་ཞིག་རེད་སྙམ།

གསར་འགོད་པ། མ་འོངས་པར་གེ་སར་རིག་གནས་རྒྱུན་འཛིན་དར་སྤེལ་ཐད་ཕྱག་ལས་གང་འདྲ་གནང་འཆར་ཡོད།

སྲི་ཐར་རྡོ་རྗེ། མ་འོངས་པར་གེ་སར་སྒྲུང་འདི་དེང་རབས་ཀྱི་ཚན་རྩལ་དང་ལག་རྩལ། གསར་གཏོད་བཅས་ལ་བརྟེན་ནས་གར་སྟེགས་སུ་འཁྲབ་པ་དང་གློག་བརྙན་དུ་ཕབ་པར་བརྒྱུད། ཁ་པར་སོགས་གློག་རྡུལ་འཕྲུལ་ཆས་སོགས་ཀྱིས་རྒྱལ་ཕྱི་ནང་ཀུན་ལ་ལྟད་མོ་སྟོན་རྒྱུར་འབད་པ་བྱ་རྒྱུ་དང་། རང་གིས་བཤད་ཐུབ་པའི་སྒྲུང་དེ་སྒྲ་ཐག་དང་བརྙན་ལམ། དེབ་ཏུ་ཕབ་ནས་རྒྱུན་འཛིན་དང་མྱུར་སྐྱོབ་ལ་འབད་བརྩོན་བྱ་རྒྱུ་ཡིན།

མི་སྣའི་ངོ་སྤྲོད་རགས་བསྡུས།

སྲི་ཐར་རྡོ་རྗེ་ནི་1989ལོར་བོད་རང་སྐྱོང་ལྗོངས་ཆབ་མདོ་གྲོང་ཁྱེར་དཔལ་འབར་རྫོང་ས་དམ་ཡུལ་ཚོ་དཔྲི་པ་སྡེ་པར་སྐྱེས། ཁོང་ནི་བོད་རང་སྐྱོང་ལྗོངས་རིམ་པའི་མངོན་མིན་རིག་གནས་ཤུལ་བཞག་གི་རྒྱུན་འཛིན་པ་དང་རང་རྒྱལ་གྱི་རབ་འབྱམས་ཞིབ་འཇུག་སློབ་མའི་ཡོན་གནས་ཐོབ་པའི་གེ་སར་སྒྲུང་པ་ཐོག་མ་ཡིན། 2013ལོ་ནས་ད་བར་དུ་བོད་ལྗོངས་སློབ་ཆེན་བོད་རིག་པའི་ཞིབ་འཇུག་ཁང་དུ་གེ་སར་སྒྲུང་ཕབ་སྐྲུན་དང་སྒྲིག་སྦྱོར། ཞིབ་འཇུག་སོགས་ཀྱི་ལས་དོན་སྒྲུབ་ཀྱི་ཡོད། ལོ་དགུ་ཐོག་གེ་སར་སྒྲུང་བབས་པ་ནས་ད་བར་དུ་སྒྲུང་ཚན་དྲུག་ཅུ་ཙམ་བབས་ཡོད།

སྤྱིར་སྒྲུང་པ་ལ་རིགས་མི་འདྲ་བ་མང་པོ་ཡོད་པའི་ནང་སྒྲུང་པ་སྲི་ཐར་རྡོ་རྗེ་ནི་བབས་སྒྲུང་གི་ཁོངས་སུ་གཏོགས་པའི་སྒྲུང་པའི་རིགས་རེད། ཁོང་གིས་སྒྲུང་འཆར་གྱེར་སྐབས་སྒྲུང་པ་གཞན་དང་མི་འདྲ་བའི་ཁྱད་ཆོས་འགའ་ཡོད་པ་སྟེ། གཅིག །སྤྱིར་བབ་སྒྲུང་གི་སྒྲུང་པའི་རིགས་མང་ཆེ་བས་སྒྲུང་བཤད་ཀྱི་འགོ་ཚུགས་དུས་བསང་མཆོད་ཀྱི་ཆོ་ག་བྱེད་པ་དང་། གེ་སར་རྒྱལ་པོའི་ཐང་གའམ་སྐུ་པར་བཤམས་པ། སྒྲུང་ཞྭ་གྱོན་པ་སོགས་བྱེད་ཀྱི་ཡོད། ཡིན་ནའང་སྒྲུང་པ་སྲི་ཐར་རྡོ་རྗེ་ལ་མཚོན་ན་གོ་རིམ་འདི་དག་གཅིག་ཀྱང་བརྒྱུད་མི་དགོས། གཉིས། ཁོང་གི་སྒྲུང་བཤད་ལུགས་དང་ནང་དོན་ནི་སྒྲུང་པ་གཞན་དང་མི་འདྲ། དཔེར་ན། བཤད་ལུགས་ལ་མཚོན་ན་མདའ་གྲི་མདུང་གསུམ་ལག་ཏུ་བཟུང་མི་དགོས་པར་ཉམས་འགྱུར་ངང་གིས་ཐོན་ཐུབ་པ་དང་། སྒྲུང་གི་ནང་དོན་ལ་མཚོན་ན་སྒྲུང་པ་གཞན་དང་མི་མཚུངས་པ་མང་པོ་ཡོད། གསུམ། ཁོང་གིས་སྒྲུང་བཤད་པའི་དུས་སུ་མི་སྣ་རེ་རེ་ལ་གཏམ་གླེང་དང་གྲོས་མོལ་སོགས་བྱེད་སྐབས་སྒྲུང་པ་ཁོ་རང་གེ་སར་རྒྱལ་པོ་དངོས་སུ་གྱུར་པའི་ཉམས་འགྱུར་ཞིག་ཉན་མཁན་ལ་སྟེར་ཐུབ་པ་དེའོ། །

ཁོང་གིས་ལོ་ངོ་26ཙམ་གྱི་འབད་བརྩོན་བརྒྱུད། 《གཟི་མ་རྟ་རྫོང་》《མེ་རུ་ཐོག་རྫོང་》《གནམ་གླིང་ལུག་རྫོང་》《མངའ་རིས་གཡུ་རྫོང་》《ཚྭ་ཡི་གཏེར་རྫོང་》《སྲིད་པ་མཐའ་རྫོང་》《ཞང་ཞུང་མདའ་རྫོང་》《ཤིང་རྩ་གོ་བོ་གཤོག་རྫོང་》《བེར་གླིང་གཡུལ་འགྱེད》《འབྱུང་བཞི་བདེ་བཀོད》《འབས་འབར་སྣ་རྫོང་》《དམར་རི་གནས་རྫོང་》《ཐེའུ་རང་ར་རྫོང་》《ཀླུ་འབུམ་གཏེར་རྫོང་》《གངས་འབྲུག་ཤོར་རྫོང་》《རྒྱ་སྲིན་མོ་རོ་རོའི་རོ་རྫོང་》སོགས་སྒྲུང་གང་མང་ཞིག་བཤད་དང་ཤོད་མུས་སུ་མཆིས། །