བཀྲ་ཤིས་དོན་གྲུབ།

མཚམས་སྦྱོར་མདོར་བསྡུས།

བཀྲ་ཤིས་དོན་གྲུབ་ནི་1988ལོར་སི་ཁྲོན་ཞིང་ཆེན་དཀར་མཛེས་བོད་རིགས་རང་སྐྱོང་ཁུལ་འབའ་ཐང་རྫོང་དུ་སྐྱེས་ཤིང་། ཐུ་བྷོད་ཚན་སྡེབ་ཀྱི་ཁོངས་མི་ཡིན། ད་ལྟ་སི་ཁྲོན་མི་རིགས་གླུ་གར་ཁང་གི་འགོ་གཙོ་གཞོན་པ་དང་དཀར་མཛེས་ཁུལ་གློག་བརྙན་མཐུན་ཚོགས་ཀྱི་ཀྲུའུ་ཞི་གཞོན་པའི་འགན་བཞེས་ཡོད། གླུ་གཞས་བརྩམས་ཆོས་ལ《སྡུག་དང་བྲལ་བ》《ལས་མཐུན་སྤུན་ཟླ》《སུ་དྲན་པ》《གནམ་མཚོའི་ཕོ་ཉ》《ཁྱིམ་གཞིས་གསར་པ》སོགས་ཡོད་ལ། ཁམས་པའི་སྒྱུ་རྩལ་དུས་ཆེན་སྐབས་བཞི་པའི་ཁམས་པའི་ཕོ་རྒོད་ཀྱི་མཚན་སྙན་ཐོབ་པ་དང་། 《ཤུགས་རྒྱོབ། ཕོ་རྒོད་ལགས》ཁྲེང་ཏུའུ་འགྲན་ཁུལ་གྱི་ཨང་བཅུ་པའི་ནང་ཚུད། དེར་སྔོན་སི་ཁྲོན་ཞིང་ཆེན་མི་རིགས་གླུ་གར་ཚོགས་པའི《གནམ་ས་བཀྲ་ཤིས》ཡི་མགྲིན་ཚབ་པའི་འགན་ཁུར་ལ། ཁམས་པའི་ཕོ་རྒོད་ཚན་སྡེབ་ཀྱི་ཁོངས་མི་དང་གཙོ་འཁྲབ་པ་ཡིན། 2014ལོར་ཐུ་བྷོད་ཚན་སྡེབ་ལ་ཀྲུང་དབྱང་བརྙན་འཕྲིན་ཁང་གི《སྐར་འོད་ལམ་ཆེན》གྱི་གཟའ་རེའི་ཨང་དང་པོ་དང་། ཟླ་རེའི་ཨང་དང་པོ། ལོ་རེའི་ཡན་ལག་འགྲན་རའི་ཨང་དང་པོ་བཅས་ཐོབ། དེ་མིན་ཨ་མདོ་བརྙན་འཕྲིན་ཁང་དང་ཁམས་པའི་བརྙན་འཕྲིན་ཁང་སོགས་ཀྱི་འཁྲབ་སྟོན་དགོང་ཚོགས་མང་པོར་ཞུགས་མྱོང་ཡོད་པར་མ་ཟད། ཞོར་དུ་གློག་བརྙན་འཁྲབ་སྟོན་གྱི་ལས་ལའང་འབད་འབུངས་བྱེད་མུས་ཡིན། སྔ་གཞུག་ཏུ་གློག་བརྙན《ཁམས་པའི་ཕོ་གསར》དང་། 《ཉིང་པའོ་ཡི་དམར་འཛིང་》《ཐང་ཆེན་མོའི་ཕོ་ཉ》《ཕུགས་ལམ》《ལྟ་སྲུང་པ》《འཕྲེད་བརྒྱུད་རི་བོའི་བརྩེ་གླུ》《རི་དྭགས་རྔོན་པ》སོགས་ཀྱི་ནང་དུ་འཁྲབ་སྟོན་པ་གཙོ་བོ་དང་ཟུར་པ་སོགས་ནས་འཁྲབ་ཞུགས་བྱས་ཡོད་ལ། རྒྱ་ཆེའི་ལྟད་མོ་བའི་དགའ་བསུ་ཆེན་མོ་ཐོབ།

བཅར་འདྲིའི་ལེའུ།

གསར་འགོད་པ། ཁྱེད་རང་གླུ་གཞས་སྒྱུ་རྩལ་གྱི་ལམ་བུར་ཇི་ལྟར་ཞུགས་པ་དང་ཚབ་མཚོན་རང་བཞིན་གྱི་གླུ་གཞས་སྒྱུ་རྩལ་འཁྲབ་སྟོན་གང་དག་ལ་ཞུགས་པ་ཡིན་ནམ།

བཀྲ་ཤིས་དོན་འགྲུབ། ང་རང་ཆུང་དུས་ནས་གླུ་ལེན་གར་འཁྲབ་བྱེད་པར་ཧ་ཅང་དགའ། གླུ་པ་ཞིག་བྱ་རྒྱུ་ནི་ངའི་ཕུགས་བསམ་ཡིན། ང་རང་གཟུགས་གཞི་སྟོབས་ཆེ་ཞིང་སྐྱེས་གཟུགས་ཅུང་ལེགས་པས་ན། སློབ་འབྲིང་འགྲིམ་སྐབས་སློབ་གྲྭས་བདམས་ནས་འཁྲབ་སྟོན་སྦྱོང་བརྡར་བྱེད་དུ་སོང་། ལོ་བཅོ་ལྔའི་སྟེང་ས་གནས་ཀྱི་སྒྱུ་རྩལ་ཚོགས་པ་ཞིག་གིས་འཁྲབ་སྟོན་མི་སྣ་བསྡུ་བཞིན་འདུག་པས། ངས་གྲོགས་པོ་དང་མཉམ་དུ་མིང་ཐོ་བཀོད་ནས་འགྲན་སྡུར་དུ་ཞུགས། འགྲན་བསྡུར་ཁྲོད་དཔྱད་འདེམས་པ་རྣམ་པས་ང་ལ་ལྷན་སྐྱེས་ཀྱི་འཁྲབ་སྟོན་ནུས་པ་ལྡན་ལ། རང་གི་ཁྱད་ནུས་བསྐྱེད་སྲིང་བྱས་ན་མ་འོངས་པར་མདུན་ལམ་ལྡན་ཁོ་ཐག་རེད་ཅེས་པའི་གདེང་འཇོག་གལ་ཆེན་གནང་ཞིང་། སྔར་ཡོད་མ་མྱོང་བའི་སེམས་ཤུགས་ཆེན་པོ་ཞིག་བསྩལ་བྱུང་། ཡང་མཐའ་མཇུག་གི་སྐར་རིམ་ཨང་དང་པོ་ཡིན་པས་ན། ང་རང་བདེ་བླག་ངང་སྒྱུ་རྩལ་ཚོགས་པ་དེ་ནས་ཆེད་ལས་ཀྱི་འཁྲབ་སྟོན་སྒྱུ་རྩལ་གྱི་ལམ་བུར་ཞུགས་འགོ་བརྩམས། དེ་ནས་བཟུང་། ངས་རང་ཉིད་ཀྱི་ཕུགས་འདུན་གྱི་ཆེད་འབད་བརྩོན་ལྷོད་མེད་བྱས་པ་ཡིན། སྐབས་དེར་ཕྱོགས་གང་ཐད་ནས་དཀའ་ཁག་ཡོད་ནའང་། ད་སྐབས་ཕྱིར་འདང་རེ་བརྒྱབ་ན་དེ་ནི་ཧ་ཅང་མཛེས་སྡུག་ལྡན་པའི་མྱོང་རིམ་ཞིག་རེད། གླུ་པ་གསར་པ་ཡིན་པས་གོ་སྐབས་མང་པོ་མེད་མོད། ཡིན་ཡང་རང་གི་རྒྱུད་དུ་ཕམ་ཁར་མགོ་མི་སྒུར་བའི་ངར་ཤུགས་ཤིག་ཡོད་པས། ངས་ནམ་རྒྱུན་ནངས་སྔ་ལངས་དང་དགོང་ཕྱི་ཉལ་གྱིས་སྐད་གདངས་སོགས་ལ་སྦྱངས་པ་བྱས་པ་ཡིན་ལ། ནམ་ཞིག་གི་ཚེ་ན་རང་ཉིད་ཀྱི་སྙན་པའི་ངག་གིས་གར་སྟེགས་དབང་དུ་བསྒྱུར་ཐུབ་པ་དང་ཁ་བཏགས་ཀྱི་འབུལ་བ་དང་ཐལ་མོའི་རྡེབ་སྒྲའང་གྲངས་མེད་ཐོབ་ཐུབ་པའི་ཡིད་ཆེས་ཀྱིས་ཁེངས་ཡོད། 2008ལོར་ང་རང་སི་ཁྲོན་ཞིང་ཆེན་མི་རིགས་གླུ་གར་ཚོགས་པའི་ཁོངས་མི་ཡིན་པའི་ངོས་ནས་པེ་ཅིང་ཨོ་རྩལ་འགྲན་ཚོགས་དང་དབང་པོ་སྐྱོན་ཅན་ཨོ་རྩལ་འགྲན་ཚོགས་ཀྱི་མཇུག་སྒྲིལ་མཛད་སྒོའི་འཁྲབ་སྟོན་ཁྲོད་ཞུགས་པ་དང་། ཀྲུང་དབྱང་བརྙན་འཕྲིན་ཁང་གི《བོད་ལྗོངས་བཅིངས་འགྲོལ་བཏང་ནས་ལོ་ངོ་60འཁོར་བ》ཞེས་པའི་རིག་རྩལ་དགོང་ཚོགས་ནང་ཞུགས། 2009ལོར་ཀྲུང་དབྱང་བརྙན་འཕྲིན་ཁང་གི་དཔྱིད་གསར་དུས་ཆེན་གྱི་དགོང་ཚོགས་ཀྱི་འཁྲབ་ཚན《གནམ་ས་བཀྲ་ཤིས་པ》དང་《མེས་རྒྱལ་ཁྲི་ལོར་བརྟན་པར་ཤོག》སོགས་སུ་ཞུགས། 2010ལོར་ཀྲུང་གོའི་གྲངས་ཉུང་མི་རིགས་ཀྱི་ཚབ་བྱས་ནས་དབྱིན་ཇིའི་མི་རིགས་ཀྱི་རིག་གནས་དྲིལ་བསྒྲགས་འཁྲབ་སྟོན་དང་། ཐའེ་ཝན་གྱི་མཚོ་འགག་ངོགས་གཉིས་ཀྱི་མི་རིགས་རིག་གནས་སྤེལ་རེས་འཁྲབ་སྟོན། སི་ཁྲོན་གྱི་སྐབས་དྲུག་པའི་གྲངས་ཉུང་མི་རིགས་སྒྱུ་རྩལ་དུས་ཆེན་གྱི་འགོ་ཚུགས་མཛད་སྒོའི་འཁྲབ་སྟོན་བཅས་སུ་ཞུགས། 2012ལོར་ཧྲན་ཞི་བརྙན་འཕྲིན་ཁང་གི《རྨ་འགྲམ་ནས་གླུ་དབྱངས་ལེན》ཞེས་པའི་ནང་ཞུགས་ནས་གཟའ་རེའི་ཨང་དང་པོ་བླངས། 2012ལོར་ཀྲུང་དབྱང་བརྙན་འཕྲིན་ཁང་གི《ཀྲུང་གོའི་སྣེ་ཁྲིད་པ》དང《མཛེས་སྡུག་ལྡན་པའི་ཁྱིམ་གཞིས》ཞེས་པའི་ནང་ཞུགས་ནས་ཏང་གི་ཚོགས་ཆེན་བཅོ་བརྒྱད་པ་རྒྱལ་ཁའི་ངང་བསུ་བའི་གཟིགས་འབུལ་འཁྲབ་སྟོན་བྱས་པ་ཡིན། རྟག་ཏུ་བརྩོན་པ་མ་བཏང་ན། མི་འགྲུབ་བྱ་བ་ཅི་ཡང་མེད། ཅེས་པའི་དཔེ་ལྟར། ད་སྐབས་ང་རང་གིས་རང་གི་འདུན་པ་ལྟར་གླུ་གཞས་བརྩམས་ཆོས་གང་མང་བཏོན་པ་དང་དགོང་ཚོགས་མང་པོར་ཡང་ཞུགས་བཞིན་ཡོད་པས། ཚང་མས་དགའ་བསུའང་ཐོབ་བཞིན་ཡོད་ལ། དེ་ནི་ཤིན་ཏུ་དགའ་འོས་པ་ཞིག་རེད།

གསར་འགོད་པ། ཁྱེད་རང་གླུ་པ་ཞིག་ནས་འཁྲབ་སྟོན་སྒྱུ་རྩལ་གྱི་ལམ་བུར་གོ་སྐབས་ཅི་འདྲ་ཞིག་གིས་ཞུགས་པ་དང་། འཁྲབ་སྟོན་སྒྱུ་རྩལ་གྱིས་ཁྱེད་ལ་ཤུགས་རྐྱེན་ཅི་ཞིག་ཐེབས་ཡོད་དམ།

བཀྲ་ཤིས་དོན་འགྲུབ། དང་ཐོག་ང་རང་འཁྲབ་སྟོན་སྒྱུ་རྩལ་གྱི་ལམ་བུར་ཞུགས་རྒྱུ་བློ་ལའང་ཤར་མྱོང་མེད། ལས་དབང་ནི་ཇི་འདྲའི་ཁྱད་དུ་མཚར་བ་ཞིག་རེད་ཨང་། ད་སྐབས་ང་རང་འཁྲབ་སྟོན་པ་ཞིག་ཏུ་གྱུར་བར་མ་ཟད། འཁྲབ་སྟོན་གྱི་བྱ་གཞག་ལ་དགའ་ཞེན་ཧ་ཅང་ཆེ། འཁྲབ་སྟོན་གྱི་འགོ་རྩོམ་ས་ནི་ལོ་ཆུང་ཡིན་དུས་རིག་རྩལ་ཚོགས་པའི་འཁྲབ་སྟོན་གྱི་བརྒྱུད་རིམ་དེ་ཡིན། ངས་འཁྲབ་སྟོན་བྱས་པའི་གློག་བརྙན་ཁྲོད་ཆེས་བརྗོད་རིན་ཡོད་པ་ཞིག་ལ《ལྟ་སྲུང་པ》ཞེས་པའི་གློག་བརྙན་ཁྲོད་ངས་འཁྲབ་སྟོན་བྱས་པའི་འཁྲབ་སྟོན་པ་གཙོ་བོ་བཀྲ་ཤིས་ལ་གདེང་འཇོག་ཚད་མེད་ཐོབ་ཡོད། གློག་བརྙན་དེར་སྐབས་28པའི་གསེར་བྱའི་མེ་ཏོག་བརྒྱ་འདུས་གློག་བརྙན་དུས་ཆེན་གྱི་མི་རིགས་གློག་བརྙན་ཆེས་ལེགས་ཤོས་དང་དེ་བཞིན་ཨའོ་མོན་རྒྱལ་སྤྱིའི་གློག་བརྙན་དུས་ཆེན་གྱི་གྲངས་ཉུང་མི་རིགས་གློག་བརྙན་ཆེས་ལེགས་ཤོས་སུ་བདམས་པར་མ་ཟད། སྐབས་59པའི་ཨེ་ཤ་ཡ་དང་ཞི་བདེ་རྒྱ་མཚོ་ཆེན་མོའི་ཁུལ་གྱི་གློག་བརྙན་འགྲེམས་སྟོན་ཐོག་ཆེས་ལེགས་ཤོས་ཀྱི་འཁྲབ་སྟོན་པ་གསར་པའི་བྱ་དགའ་དཔྱད་འདེམས་ཨུ་ལྷན་གྱི་གདན་ཞུས་སྐུ་མགྲོན་ལྟར་འགྲེམ་སྟོན་ལ་ཞུགས་པ་ཡིན། དེའང་འཁྲབ་སྟོན་སྒྱུ་རྩལ་གྱི་ཤུགས་རྐྱེན་ཕྱོགས་གསུམ་ནས་གླེང་བར་བྱ། གཅིག་ནི་བོད་རིགས་ས་ཁུལ་གྱི་ཐུན་མོང་མ་ཡིན་པའི་རང་བྱུང་གི་རི་ཆུ་ཡིས་ང་ལ་ནང་སེམས་ཀྱི་རྒྱབ་རྟེན་བསྩལ་བྱུང་། ས་ཕྱོགས་རེ་ལ་ཆ་ལུགས་རེ། ཕ་ཡུལ་གྱི་རི་ཆུ་ཡིས་ང་ལ་སྒྱུ་རྩལ་གྱི་ཉམས་ཤུགས་བསྐྱེད་པར་བཅུག །གཉིས་ནི་ཕ་ཡུལ་གྱི་གླུ་གར་རིག་གནས་ཀྱི་མཁའ་དབུགས་སྟུག་པོས་ང་ལ་ཤུགས་རྐྱེན་ཟབ་མོ་ཐེབས་པ་ནི་སྨོས་མ་དགོས་པ་ཞིག་རེད། རི་མཐོ་ས་གཙང་གི་ཕ་ཁྱིམ་དེས་ངའི་འཁྲབ་སྟོན་གྱི་རྨི་ལམ་ལ་རེ་བའི་གཤོག་ཟུང་བསྩལ་བྱུང་། གསུམ་ནི་ས་གནས་ཀྱི་རྫོང་རིག་རྩལ་ཚོགས་པས་ང་ལ་གར་སྟེགས་བསྐྲུན་ནས་གླུ་གར་གྱི་འགྱུར་ཁུགས་དང་སྟངས་སྟབས་ངོམས་པའི་གོ་སྐབས་ཤིག་བྱིན་བྱུང་། ངས་ཀྱང་ནུས་ཤུགས་ཡོད་རྒུས་འཁྲབ་སྟོན་བྱས་ལ། འཁྲབ་སྟོན་བྱེད་ཐེངས་རེ་རེར་གཅེས་མཐོང་དང་དམ་འཛིན་བྱས། གར་སྟེགས་སྟེང་གི་འཁྲབ་སྟོན་ཐེངས་རེ་རེས་ང་ལ་སྔར་བས་ཀྱང་བརྟན་པའི་ཡིད་ཆེས་བསྩལ་བྱུང་།

གསར་འགོད་པ། ཁྱེད་ཀྱིས་སྒྱུ་རྩལ་ལམ་བུའི་ཁྲོད་བསགས་པའི་མྱོང་ཚོར་ཐད་ནས་ཅུང་ཙམ་གླེང་བར་བྱ།

བཀྲ་ཤིས་དོན་འགྲུབ། རང་ཉིད་ཀྱི་ནུས་རྩལ་མཐོར་འདེགས་བཏང་ནས། གཟིགས་མོ་བའི་སྤྱན་ལམ་དུ་ཆེས་ལེགས་པའི་སྒྱུ་རྩལ་བརྩམས་ཆོས་འབུལ་རྒྱུ་ཡིན། སྙན་པའི་གཞས་གཏོང་བ་དང་། འཁྲབ་བྱའི་མི་སྣ་གསོན་ཉམས་དོད་པའི་སྒོ་ནས་འཁྲབ་པ། སྤྱི་ཕན་བྱ་གཞག་ལ་བརྩོན་པའི་མི་བུ་ཞིག་བྱ་རྒྱུ་ནི་ངའི་སྒྱུ་རྩལ་ལམ་བུ་ལས་བསྐྱེད་པའི་མི་ཚེའི་ཕུགས་འདུན་ཡིན། ངས་ཀྱང་རང་ནུས་ཅི་ལྕོགས་ཀྱིས་བོད་ཀྱི་རིག་གནས་དང་། བྱམས་སེམས་དང་སྤྱི་ཕན་བྱ་གཞག་རང་ཉིད་ཀྱི་རྒྱུད་དུ་ནམ་ཡང་ཞུགས་པར་བྱ་རྒྱུ་ཡིན། ཕྱི་ཚུལ་ནས་བལྟས་ན་ང་རང་གཟུགས་སྟོབས་ཆེ་ནའང་། ནང་སེམས་ཞི་ལྷོད་དང་ལྡན་པས་ན། དཔེ་ཀློག་བྱེད་པར་ཧ་ཅང་དགའ། ཡང་བྱམས་སེམས་ལྡན་པའི་མི་སྣ་དང་འབྲེལ་འདྲིས་བྱ་རྒྱུ་དང་ལས་ཀ་བསྒྲུབ་རྒྱུར་དགའ། དཔེ་ཀློག་བྱས་ན་ཤེས་རབ་བསྐྱེད་ཐུབ་པར་མ་ཟད། ཚོར་སྣང་གསར་པ་མང་པོ་སྐྱེ་ཐུབ། ངས་བལྟས་ན་འཁྲབ་སྟོན་པའི་ཆེས་ཆེ་བའི་རང་གཟུགས་ནི་རིག་གནས་ཀྱི་རྨང་གཞི་ལྡན་པ་དེའོ། །ཤེས་རྟོགས་ཙམ་དང་རང་ཉིད་ཀྱིས་དངོས་སུ་མྱོང་བ་ནི་དོན་ཁ་ཁ་རེད། འཚོ་བའི་ཁྲོད་དུ་དངོས་སུ་ཟབ་ཞུགས་བྱས་ནས་འཁྲབ་བྱའི་མི་སྣ་ཅི་ནུས་ཀྱིས་མངོན་པར་བྱས་ན། འཁྲབ་བྱའི་མི་སྣ་ལ་ལྷག་ཏུ་གསོན་ཉམས་དོད་ལ། ལྟད་མོ་བར་སེམས་འགུལ་ཐེབས་ངེས། ཡང་ང་རང་འཚར་ལོངས་བྱུང་སའི་ཁོར་ཡུག་གིས་འཁྲབ་སྟོན་གྱི་ལས་ཀར་ཤུགས་རྐྱེན་ཐེབས་ཡོད། ལྷག་པར་དུ་བོད་ཀྱི་རིག་གནས་ཁྲོད་ཀྱི་ལྷག་བསམ་ཟོལ་མེད་ཀྱིས་འཁྲབ་སྟོན་གྱི་ལས་ཀར་ཤུགས་རྐྱེན་ཟབ་མོ་ཐེབས་ཡོད། སྒྱུ་རྩལ་བྱ་གཞག་སྒྲུབ་མཁན་ཞིག་ཡིན་ན། སེམས་ཁམས་རྙོག་འཛིང་ཆེ་མི་རུང་ལ། སེམས་རྣལ་དུ་ཕབ་ནས་འཁྲབ་སྟོན་བྱེད་དགོས་པ་དང་། ལྷག་བསམ་རྣམ་དག་གིས་གཟིགས་མོ་བར་རང་ཉིད་ཀྱི་འཁྲབ་རྩལ་མངོན་པར་བྱ་རྒྱུ་ཧ་ཅང་གལ་ཆེན་པོ་ཡིན།

གསར་འགོད་པ། ཁྱེད་ཀྱིས་ལས་རིགས་ཀྱི་འགྲན་རྩོད་དང་འཕེལ་ཕྱོགས་ཐད་ནས་ཅུང་གླེང་རོགས་བྱ།

བཀྲ་ཤིས་དོན་འགྲུབ། འགྲན་སློང་ནི་རྟག་ཏུ་གོ་སྐབས་དང་མཉམ་དུ་གནས་ཡོད། འགྲན་སློང་གི་སྐོར་ལ་རྒྱལ་ཡོངས་ཀྱི་ཁྲོམ་རར་སྐྱོད་སྐབས་ང་ཚོས་སྔར་བཞིན་འབད་བརྩོན་བྱེད་དགོས། གང་ལྟར་རིག་གནས་རོལ་རྩེད་ཐོན་ལས་དང་སྨྱན་སྦྱོར་ལས་རིགས་ནི་ཤར་རྒྱུད་མཚོ་འགྲམ་ས་ཁུལ་དུ་དར་ཁྱབ་ཆེ་བས་རོལ་རྩེད་ཐོན་ལས་ཀྱི་མ་ལག་ཆ་ཚང་ཞིང་སྟོབས་ལྡན་ཡོད། འཁྲབ་སྟོན་པ་གསོ་སྐྱོང་གི་ངོས་ནས་བརྗོད་ན། བོད་རིགས་ས་ཁུལ་གྱི་གློག་བརྙན་འཁྲབ་སྟོན་པ་གསོ་སྐྱོང་བྱེད་པར་ཤུགས་སྣོན་རྒྱག་དགོས་པར་འདོད། དེ་ལྟར་བྱས་ཚེ་གཞི་ནས་བོད་རིགས་ས་ཁུལ་གྱི་རིག་གནས་རོལ་རྩེད་ཐོན་ལས་ཀྱི་འཇོན་ཐང་ལྡན་པའི་མི་སྣ་གང་མང་གསོ་སྐྱོང་བྱེད་ཐུབ་པ་དང་། བོད་རིགས་ཀྱི་ཕུལ་བྱུང་གློག་བརྙན་འཁྲབ་སྟོན་པ་དང་གཞས་པ་སྔར་བས་མང་བ་རྒྱལ་ཡོངས་ཀྱི་ཁྲོམ་རར་བསྐྱོད་ཐུབ། ཡང་ཅིག་བཤད་ན་བོད་རིགས་གཞས་པ་དང་འཁྲབ་སྟོན་པར་རང་གི་ཐུན་མིན་གྱི་ཁྱད་ཆོས་ལྡན་ལ། རྒྱ་ཆེའི་ལྟད་མོ་བའི་དགའ་བསུ་ཡང་ཐོབ་བཞིན་ཡོད། དེ་ནི་ང་ཚོ་བོད་རིགས་སྒྱུ་རྩལ་པའི་ལེགས་ཆ་ཞིག་རེད། དཔེར་ན། ས་གདན་དམར་པོའི་སྟེང་ང་ཚོས་བོད་ལྭ་གྱོན་ནས་ཤོམ་འགྲོ་བྱས་ན་ལྟད་མོ་བའི་མིག་དབང་ཅི་ནུས་ཀྱང་འཕྲོག་ཐུབ། ད་དུང་ང་ཚོ་དང་མཉམ་དུ་པར་རྒྱག་རྒྱུ་དགའ། དེ་ནི་ང་ཚོ་བོད་རིགས་ཀྱི་མཚོན་རྟགས་ཀྱིས་ལྟད་མོ་བར་བསྐྲུན་པའི་ཚོར་ཤེས་ཤིག་ཡིན། ལས་རིགས་ཀྱི་འཕེལ་ཕྱོགས་ཐད་ནས་བལྟས་ན། བོད་རིགས་ཀྱི་སྒྱུ་རྩལ་པར་འཕེལ་རྒྱས་དེ་བས་ཆེ་བ་ཡོང་ངེས་རེད། འོན་ཀྱང་ང་ཚོས་བསྒྲུབ་དགོས་པ་ནི་རང་ཉིད་ལ་སྦྱོང་བརྡར་ཡག་པོ་དང་གོ་སྐབས་སྒུག་རྒྱུ་དེ་རེད། སྤྱི་ཚོགས་དང་དཔལ་འབྱོར་འཕེལ་རྒྱས་འགྲོ་བཞིན་ཡོད་པ་དང་། མི་རྣམས་ཀྱི་འཚོ་བ་ཇེ་ལེགས་ཇེ་རྒྱས་སུ་འགྲོ་བཞིན་པ་དང་བསྟུན་བསམ་པའི་ལོངས་སྤྱོད་ལ་ལྷག་ཏུ་བསྙེགས་ངེས། དེར་བརྟེན་རིག་གནས་རོལ་རྩེད་ཐོན་ལས་སྔར་བས་དར་རྒྱས་དང་ཇེ་ལེགས་སུ་འགྲོ་ངེས། གཞན་དྲ་སྦྲེལ་གྱི་འཕེལ་རྒྱས་ཆེ་བ་དང་དེ་བཞིན་སྨྱན་སྦྱོར་ལས་རིགས་དར་ཁྱབ་ཆེ་བས་ཁྱབ་བསྒྲགས་ཀྱི་འགོག་རྐྱེན་སེལ་བཞིན་ཡོད་པས། གསེར་ས་འོག །འོད་ནམ་མཁའ་ལྟར་འདོན་ཐུབ་ངེས་པས། བོད་རིགས་ཀྱི་སྒྱུ་རྩལ་པ་དེ་བས་མང་བ་དྲིལ་བསྒྲགས་བྱེད་ཐུབ། །