གནས་འདི་ནི་དེང་དཀར་མཛེས་ཁུལ་དཔལ་ཡུལ་རྫོང་ཧོར་སྤོ་ཆུས་གཏེར་ལུང་ཡུལ་ཤོག་དཔལ་འབར་གྲོང་ཚོར་ཆགས་ཡོད། དེའི་མཚོ་འཕགས་སྨི་3670ཙམ་ཡོད། དཔལ་ཡུལ་རྫོང་སྲིད་གཞུང་གི་གནས་ཡུལ་མར་ཐང་ནས་དེ་བར་ཐག་སྤྱི་ལེ་70ཙམ་ཡོད། གཏེར་ལུང་ཡུལ་ཤོག་སྲིད་གཞུང་གི་གནས་ཡུལ་དབུ་ས་གྲོང་ནས་བར་ཐག་སྤྱི་ལེ་7ཙམ་ཡོད། གནས་དེ་རྙིང་མའི་ཆོས་བརྒྱུད་འཛིན་པའི་ཁང་དམར་དགོན་དང་རྟིང་ཆུའི་ཕར་ཚུར་རོལ་ཁ་གཏད་དུ་ཆགས་ཡོད་པ་དང་། ཟེར་སྲོལ་ལྟར་ཆུ་ཕྲན་གཡོན་ངོས་ལམ་འགྲམ་གྱི་བྲག་ངོས་སུ་རྒྱ་བཟའ་ཀོང་ཇོ་ལྷ་སར་བྱོན་སྐབས་སུ་ལྕག་གིས་བྲིས་པའི་རྒྱལ་བ་རིག་ལྔའི་སྐུ་དང་། ཀོང་ཇོའི་ཆིབས་པ་དྲེལ་མོའི་རང་བྱོན་འབུར་དུ་དོད་པ་སོགས་མཇལ་རྒྱུ་འདུག །ནུབ་ཕྱོགས་ནས་སྡེ་དགེ་རྫོང་ཁོངས་ཀྱི་ཧྱོ་པ་ཡུལ་ཤོག་དང་། མདའ་མ་ཡུལ་ཤོག་གཉིས་དང་འབྲེལ་ནས་ཡོད་ལ། དེར་འཇམ་མགོན་བློ་གྲོས་མཐའ་ཡས་ཀྱི་སྒྲུབ་ཆེན་བཅུ་གསུམ་ལས་རྟ་མགྲིན་དྲེགས་པ་ཀུན་སྒྲོལ་གྱི་སྒྲུབ་གནས་མུ་ནང་རྡོ་རྗེ་བྲག་དང་། རྒྱ་སྟོན་བླ་མ་བདེ་མཆོག་འཁོར་ལོའི་སྒྲུབ་གནས་རྔ་མོང་སྣ་འཛུམ་རྩང་དཀར། གནས་དེའི་ནུབ་བྱང་སྤྱི་ལེ་5ཙམ་གྱི་འཚམས་གདོང་ཐོག་གྲོང་གི་ཡར་ངོས་སུ་འཆི་མེད་འཕགས་པའི་ཐུགས་ཐིག་གི་སྒྲུབ་གནས་ཟླ་གམ་དབང་ཕུག །ཤར་ཕྱོགས་བ་ཡ་ལའི་རྒྱབ་ཀྱི་གཉིས་ལུང་ཁོག་ཏུ་དྲི་མེད་བླ་སྒྲུབ་འོད་ཀྱི་སྙིང་པོའི་སྒྲུབ་གནས་འཛིང་ཁྲོ་བོ་གནས་སོགས་སྒྲུབ་གནས་དང་། སྒྲུབ་ཕུག །རང་བྱོན། ཕྱག་ཞབས་རྗེས་སོགས་གནའ་ཤུལ་གྲགས་ཅན་མང་པོ་ཡོད་པ་རེད།
གནས་ཡིག་རྙིང་པ་ཨོ་རྒྱན་པདྨ་འབྱུང་གནས་ཀྱིས་བཀོད་པའི་མདོ་བྱང་ལས། གསུང་གི་གནས་མཆོག་བསྟན་པ་ནི༔ ལོ་ཧི་ཏ་ཡི་ཆུ་ཡི་མདོ་དག་ཏུ༔ སྦས་པའི་གནས་མཆོག་པདྨ་ཤེལ་གྱི་རི༔ འདི་ཡི་དཀར་ཆག་རུ་དམ་ནག་པོར་སྦས༔ ཞེས་པ་དང་། ཀོང་སྤྲུལ་ཡོན་ཏན་རྒྱ་མཚོས་མཛད་པའི་མདོ་བྱང་གསལ་བྱེད་ལས། གསུང་གི་གསུང་གནས་པདྨ་ཤེལ་རི་ནི། དངོས་དེ་ད་རུང་ཞལ་མ་འབྱེད། ཡན་ལག་རྟིང་ལྷུང་ཁང་མདོ་བྲག་དམར་ཟངས་ཡག་ནམ་མཁའ་རྫོང་དང་ཉེ་བའི་ཚུར་རི་ལ་ཡོད། ཅེས་འཁོད་ཡོད་པ་དང་ཅུང་རྒྱས་པ་ནི་གཏེར་ཆེན་མཆོག་གྱུར་གླིང་པས་མཛད་པའི་གནས་ཡིག་སྟེ། འཆི་མེད་པདྨ་ཤེལ་རིའི་གནས་ཀྱི་མདོ་བྱང་ཉི་མ་སྙིང་པོ་བཞུགས་སོ༔
རྩ་གསུམ་ཡོངས་རྫོགས་ལྷ་ལ་འདུད༔ ཀུན་བཟང་པདྨ་འབྱུང་གནས་ཀྱི༔ ཡོན་ཏན་རིན་ཆེན་འདོད་རྒུའི་གཏེར༔ མཉམ་པ་ཉིད་ཀྱི་ཡེ་ཤེས་རྩལ༔ མི་ཟད་རྒྱན་གྱི་འཁོར་ལོའི་ཚུལ༔ བདེ་གཤེགས་འདུས་པའི་རྫོང་ཆེན་པོའི༔ ལྷོ་ཕྱོགས་ངོ་མཚར་བཀོད་པའི་ཡུལ༔ ཁྲོ་བོ་འཆོལ་བའི་ཕོ་བྲང་གི༔ སྙིང་པོ་ཡེ་ཤེས་འོད་ལྔའི་ཞིང༔ འཆི་མེད་པདྨ་ཤེལ་གྱི་རི༔ ངོ་མཚར་མཐོང་བས་གྲོལ་བ་ཡོད༔ དེ་ན་རང་བྱུང་པདྨ་དང༔ ལོ་ཙཱ་ཆེན་པོ་རྣམ་སྣང་མཛད༔ གཟུངས་མ་ཡཱེ་ཤེས་མཚོ་རྒྱལ་ཆེ༔ ཆོས་ཀྱི་རྒྱལ་པོ་ཡབ་སྲས་བཅས༔ སྟོན་འཁོར་མཆོག་གི་ཚོམ་བུ་ཡིས༔ བྱིན་བརླབས་རང་བྱུང་བཀོད་པའི་རྒྱན༔ རྡོ་རྗེ་སེམས་དཔའི་མེ་ལོང་གི༔ འོད་གསལ་ཡེ་ཤེས་གཞལ་མེད་ལྔ༔ མཐོང་བས་ཉམས་ཀྱི་བབས་འབྱུང་ཞིང༔ ཐོས་པས་བདེ་ཆེན་ཡེ་ཤེས་སྐྱེ༔ ཡིད་ལ་དྲན་ཅིང་གསོལ་བཏབ་ན༔ ཀ་དག་ལྷུན་གྲུབ་དབྱེར་མེད་པའི༔ ཟབ་མོའི་དགོངས་པ་ལྷུག་པར་འཆར༔ ཉིན་མཚན་བྱེད་བཅིངས་རྣལ་འབྱོར་གྱིས༔ ཟླ་དྲུག་རྩེ་གཅིག་བསྒོམ་ནུས་ན༔ འཇའ་ལུས་རྡོ་རྗེའི་གོ་འཕང་འགྲུབ༔ ཁྱད་པར་ཚེ་ཡི་བསྙེན་སྒྲུབ་དང༔ རྡོ་རྗེ་ལུས་ཀྱི་བཅུད་བླངས་ན༔ གནས་སྐབས་ཚེ་ཡི་བར་ཆད་ཞི༔ མཐར་ཐུག་འཆི་མེད་རིག་འཛིན་འགྲུབ༔ གཞན་ཡང་འདུས་པ་ཕྱི་མ་ཡི༔ རྗེ་འབངས་ཚོམ་བུ་ཉེར་སུམ་གྱིས༔ བྱིན་གྱིས་བརླབས་པའི་ཕུག་པ་དང༔ ཐབས་དང་ཤེས་རབ་རང་བྱུང་རྟེན༔ ཨེ་ཝཾ་ཟུང་འཇུག་རྟགས་ཀྱི་རྒྱ༔ སྐུ་གསུང་ཐུགས་རྟེན་རང་བྱོན་དང༔ རྡོ་རྗེའི་ཕྱག་ཞབས་རྗེས་ལ་སོགས༔ དབང་པོ་བསྐལ་པའི་ཁྱད་པར་བཞིན༔ གྲངས་མེད་ཆུ་ཟླའི་གཟུགས་བཞིན་སྣང༔ དུས་རྣམས་ཀུན་དང་ཁྱད་པར་དུ༔ ཡར་མར་ཚེས་བཅུའི་ཉིན་དང་མཚན༔ ཨོ་རྒྱན་ཆེན་པོས་བྱིན་འབེབས་ཤིང༔ དཔའ་བོ་ཌཱཀྐི་དངོས་སུ་འདུ༔ རབ་ལ་ཉེ་རྒྱུའི་དབུགས་འབྱིན་མཛད༔ འབྲིང་ལ་བདེ་སྟོང་རྗེས་མཐུན་སྐྱེད༔ དད་དང་མོས་གུས་ལྡན་གྱུར་ན༔ དབང་པོ་ཐ་མ་ཡིན་ཡང་རུང༔ དངོས་གྲུབ་སྣ་རེ་ངེས་པར་འབྱུང༔ དེ་ཕྱིར་མ་འོངས་དད་ལྡན་རྣམས༔ ཕྱག་དང་བསྐོར་བ་གནས་འདིར་མཛོད༔ ལུས་ཀྱི་སྒྲིབ་པ་ངེས་པར་འདག༔ གསོལ་འདེབས་བཟླས་བརྗོད་གནས་འདིར་འབུངས༔ ངག་ལ་ནུས་པ་རྩོལ་མེད་འབར༔ ཏིང་འཛིན་རྩེ་གཅིག་གནས་འདིར་སྒོམས༔ སྤྱན་དང་མངོན་ཤེས་འཕྲལ་དུ་འབྱུང༔ ཁྱད་པར་འོད་གསལ་རྫོགས་པ་ཆེ༔ དབྱིངས་རིག་དབྱེར་མེད་ཉམས་བླངས་ན༔ ཚེ་གཅིག་སྣང་བཞི་མཐར་ཕྱིན་ནས༔ བསྟན་པའི་བཙས་ཆེན་དེ་ཡིས་བྱེད༔ ཚོགས་དང་གཏོར་མའི་ལོངས་སྤྱོད་ཀྱིས༔ འདོད་རྒུའི་འབྱོར་པ་སྤྲིན་ལྟར་གཏིབས༔ མཆོག་ཏུ་ཚེ་ཡི་སྒྲུབ་པ་ལ༔ བརྩོན་ན་འཆི་མེད་ངེས་འགྲུབ་བོ༔ ས་མ་ཡཱ༔ དེ་ལྟར་གྲོལ་བ་བཞི་ལྡན་གྱི༔ སྒྲུབ་ཕུག་ཀུན་གྱི་རྒྱལ་པོ་ནི༔ འཆི་མེད་པདྨ་ཤེལ་གྱི་རི༔ ལྷ་མི་ཀུན་གྱི་མཆོད་སྡོང་ཆེའི༔ དཀར་ཆག་ངེས་པའི་མདོ་བྱང་སྟེ༔ རྗེ་བཙུན་མ་ཧཱ་གུ་རུ་ཡིས༔ རྡོ་རྗེའི་རང་སྒྲར་བསྟན་པའི་ཚིག༔ རྗེ་འབངས་གྲོགས་ཀྱིས་བཟུང་བའི་བཅུད༔ འཕེལ་འགྲིབ་བྲལ་བའི་ཡི་གེ་འདི༔ བསྐལ་བཟང་རྣམས་ཀྱི་དཔལ་དུ་ཤོག༔ རྒྱ་རྒྱ་རྒྱ༔ ཞེས་སྤྲུལ་པའི་གཏེར་སྟོན་མཆོག་གྱུར་བདེ་ཆེན་གླིང་པ་དང་། པདྨ་འོད་གསལ་མདོ་སྔགས་གླིང་པ་ཟུང་གིས་གཏན་ལ་ཕབ་ཅིང་། མངྨ་གར་གྱི་དབང་ཕྱུག་གཡུང་དྲུང་གླིང་པ་རྩལ་གྱིས་ཡི་གེར་བྲིས་པ་འབྲེལ་ཚད་དོན་དང་ལྡན་པའི་ཕྲིན་ལས་མཁའ་ཁྱབ་ཏུ་འཕེལ་ཞིང་རྟག་པའི་རྒྱུར་གྱུར་ཅིག
ཞོར་བྱུང་པདྨ་ཤེལ་རིའི་གནས་ཀྱི་ངོ་སྤྲོད་མདོར་བསྡུས་འདི་ནི། མདོ་ཁམས་གནས་ཆེན་ཉེར་ལྔའི་ནང་ན་གསུང་གི་གསུང་གནས་ཡིན་ཞིང་། ཕྱི་ནས་བལྟས་ན་བྲག་རི་ངོས་འཇམ་པ་དེའི་རྩ་བ་ནས་ཐོག་རྩེགས་གཉིས་གསུམ་གྱི་མཚམས་སུ་བུ་ག་ཆུང་ཆུང་མི་གཟུགས་བོང་ཆེ་བ་ཆུད་དཀའ་བ་དང་། ནང་དུ་ཕྱིན་པ་ན་ཤིན་ཏུ་ཡངས་ཤིང་སྦུག་རིང་བ། དེ་ཡི་སྟེང་འོག་བར་གསུམ་ཐམས་ཅད་རང་བྱུང་ཤེལ་གྱིས་ཁེངས་པ་རྣམས་ཁ་ཤས་མཆོད་རྟེན་དབྱིབས་དང་རལ་གྲི་ནོར་བུའི་དབྱིབས་ཅན་དང་། འོག་ནས་ཡར་འབུར་དུ་དོད་པ་ལ་རི་དྭགས་དང་གཅན་གཟན་གྱི་གཟུགས་བཀོད་ལྟ་བུ། གཡས་གཡོན་རྣམས་སུ་ཤེལ་གྱི་རིགས་མི་འདྲ་བ་རྣམས་ལ་རི་མོ་སྣ་ཚོགས་དུ་མས་བརྒྱན་པ། དེའི་སྦུག་ན་ས་སིནྡྷུ་ར་དམར་སེར་ལི་ཁྲིའི་མདངས་ཀྱང་འཕྲོག་པར་ནུས་ཤིང་གི་ཝཾ་གི་དྲི་ངད་དང་ལྡན་པ་སོགས་ཡ་མཚན་པ་དུ་མ་དང་ལྡན་པའོ། །
གནས་འདིར་སྔོན་གྱི་དུས་སུ་ཨོ་རྒྱན་ཡབ་ཡུམ་རྗེ་འབངས་འཁོར་ཚོགས་ཞབས་ཀྱིས་བཅག་ཅིང་ལྷ་ཚོགས་ཀྱི་དཀྱིལ་འཁོར་ཏུ་བྱིན་གྱིས་རླབས་ཤིང་གུ་རུ་ཡབ་ཡུམ་དཔལ་བོ་དཔལ་མོ་རྗེ་འབངས་རིག་འཛིན་རྣམས་ཀྱི་ཕྱག་ཞབས་ཀྱི་རྗེས་དང་ཡི་གེ་རང་བྱོན་སོགས་གྲངས་མེད་བྱུང་བ་དུས་ད་ལྟའི་བར་དུ་ཡོད། དུས་ཕྱིས་སུ་མཁྱེན་ཀོང་མཆོག་གསུམ་མཉམ་དུ་ཞལ་འཛོམས་ནས་གཏེར་ཁ་བཞེས་ཤིང་། ས་ལ་གནས་པའི་སྐྱེས་བུ་གྲངས་ཀྱིས་མི་ལངས་པ་ཞིག་གིས་ཞབས་ཀྱི་བཅག་ཅིང་བྱིན་གྱིས་བརླབས་པར་མཛད་དེ། ཡོས་ལོ་ནམ་ཤར་གྱི་གནས་འདུས་སྐབས་སུ་མཐའ་བསྐོར་དང་། བར་བསྐོར། རྩེ་བསྐོར། ནང་བསྐོར་སོགས་དགེ་བའི་ལས་ལམ་བཟང་པོར་བརྩོན་ན་རྟེན་འབྲེལ་སྨན་དུ་འགྱུར་ངེས་སོ། །
བོད་དུ་གནའ་ནས་དར་བའི་གནས་དང་གནས་བསྐོར་ཞེས་པའི་རིག་གནས་ནི་ཆོས་སྒྲུབ་པ་ཙམ་མ་ཡིན་པ། རང་བྱུང་ཁམས་ཀྱིས་ང་ཚོ་ལ་བསྐྲུན་པའི་རིན་ཐང་གཞལ་བ་དཀའ་བའི་ས་ཆུའི་ཐོན་ཁུངས་ཕུན་སུམ་ཚོགས་པ་དེ་མི་རབས་སྔ་མའི་སྲོལ་བཟང་པོ་མི་རབས་ཕྱི་མས་འཛིན་སྐྱོང་སྤེལ་གསུམ་བྱ་སྟེ། རྒྱལ་ཁབ་དང་མི་རིགས་ཀྱི་ཆེས་ཕུལ་དུ་བྱུང་བའི་རི་ཆུའི་མཛེས་ལྗོངས་ལ་དད་མོས་དྲག་པོའི་འདུ་ཤེས་ཀྱིས་སྤྲོ་དགའ་བསྐྱེད་ལ་རྟག་གུས་ཀྱིས་རྒྱུན་སྐྱོང་ལ་བརྩོན་པ་ལྷུར་ལེན་བྱས་ཏེ་ལྷ་ཡུལ་ལས་མཛེས་པའི་ཕ་ཡུལ་འཛུགས་བསྐྲུན་བྱ་བ་ནི་ཉིང་དགོས་སོ། །
གཏེར་ལྷུང་ཞེས་པའི་ས་མིང་ལ་འབྲི་སྲོལ་མི་འདྲ་བ་སྟེ་རྟིང་ལྷུང་དང་། གཏེར་ལྷུང་། གཏེར་ལུང་སོགས་ལས། ཡིག་རྙིང་དག་ལས་རྟིང་ལྷུང་དང་། དེ་ནས་རྟིང་གཏེར་ལ་བསྒྱུར་བ་དང་། ལྷུང་ལུང་ལ་བསྒྱུར་བ་སོགས་ནི་ཕྱིས་སུ་ངེས་ཚིག་འདྲེན་པའི་མིང་དུ་བསྒྱུར་བ་སྙམ།
མཁྱེན་ཀོང་མཆོག་གསུམ་ནི། རྫོང་སར་འཇམ་དབྱངས་མཁྱེན་བརྩིའི་དབང་པོ་དང་། ཀོང་སྤྲུལ་ཡོན་ཏན་རྒྱ་མཚོ། མཆོག་གྱུར་བདེ་ཆེན་གླིང་པ་གསུམ་གྱི་མཚན་བསྡུས་པ་ཡིན་ནོ། །