སྲིད་པ་རྒན་པོའི་གཏམ་དཔེ་ལ་ལོ་རྒྱུས་ཀྱི་ཚིག་གསུམ་མ་ཤེས་ན། ཕ་ཨ་ཁུ་ཡིན་ཡང་ངོ་མི་ཤེས་ཞེས་དང་། ཡང་《རླངས་ཀྱི་པོ་ཏི་བསེ་རུ》ལས། ལར་སྐྱེས་པའི་མིས་རང་གི་སྐྱེ་རྒྱུད་མ་ཤེས་ན། ནགས་ཁུང་གི་སྤྲེའུ་དང་འདྲ། མི་རང་གི་ཆོ་འབྲང་མ་ཤེས་ན། གཡུ་འབྲུག་ཟོལ་མ་དང་འདྲ། ཡབ་མེས་ཀྱི་ཆེ་དགུ་ཡིག་ཚང་མ་ཤེས་ན། མོན་ཕྲུག་ཡལ་བོར་དང་འདྲ་ཞེས་བཀོད་ཡོད་པ་ལྟར། རང་མི་རིགས་ནི་སྔོན་དུས་རུས་རྒྱུད་ཡོད་པའི་མི་རིགས་ཤིག་ཡིན་ཡང་། དེང་སྐབས་མི་མང་པོ་ཞིག་གིས་རང་གི་རུས་གང་ཡིན་པ་ཤེས་ཀྱང་། རང་གི་རུས་རྒྱུད་དེ་ཇི་ལྟར་བྱུང་བ་དང་དེའི་མགོ་ཁུངས་གང་ཡིན་སོགས་རྟོགས་མཁན་དང་དེར་ཞིབ་འཇུག་བྱེད་མཁན་ནི་དེ་ཙམ་ཉུང་བར་སྣང་བས། རང་གི་རུས་རྒྱུད་དང་ཁྱིམ་རྒྱུད་ཀྱི་ལོ་རྒྱུས་དེའང་ཤེས་རྒྱུ་གལ་ཆེ་སྙམ།
དེ་ཡང་སྟུག་རྒྱ་ཞེས་པའི་རུས་འདི་ནི་ཨ་འཚོ་ལས་ཆད་པའི་མི་རྒྱུད་ཅིག་ཡིན་ལ། ཨ་འཚོ་ནི་བོད་ཀྱི་རྩ་བའི་རུས་ཆེན་བཞིའི་ནང་གསེས་ཨ་སྤོ་ལྡོང་ལས་ཆད་པའི་མི་རྒྱུད་ཅིག་ཡིན་པའི་བཤད་སྲོལ་ཡོད། འདི་ནི་ངག་རྒྱུན་ཙམ་མ་ཡིན་ཏེ། རྡོ་གྲུབ་ཆེན་འཇིགས་མེད་འཕྲིན་ལས་འོད་ཟེར་རམ་རྡོ་གྲུབ་རྒན་བྱང་ཆུབ་རྡོ་རྗེའི་རྣམ་ཐར་ལས་ཨ་སྤོ་ལྡོང་དེ་ལ་ཨ་རིག་ཚོ་པ་བཅོ་བརྒྱད་དང་། ཨ་འཚོ་ཚོ་པ་དྲུག་ཡོད་ཅེས་དངོས་སུ་བཀོད་ཡོད། ཨ་འཚོ་ཞེས་པའི་རུས་རྒྱུད་ཚོ་པ་དེ་དབུས་གཙང་ཕྱོགས་ཀྱི་བོད་སྡེ་པ་གཞུང་གི་ཁྲིམས་དང་འགལ་ནས་ཨ་རིག་ར་རྒྱ་ཞེས་པའི་གནས་དེར་སྤྱུགས་པ་ཡིན། ཨ་འཚོ་རིག་མཆོག་ཟེར་བའི་མི་ཕོ་རྩལ་སྣ་དགུ་ལུས་ལ་ལྡན་པ་ཞིག་འཛི་རྐའི་ཕྱོགས་སུ་སོང་སྟེ། ར་བཟའ་དུག་མཚོ་ཟེར་བ་དང་ལྷན་དུ་བསྡད་ནས་དེ་གཉིས་ལ་བུ་དྲུག་བྱུང་། དེ་ལས་བུ་ཆེ་བ་ལ་ཨ་འཚོ་དང་། འབྲིང་བ་ལ་སྟུག་རྒྱ། ཀོ་ཚོང་། ཤ་ཚང་། ཡོས་བུ། ཐ་མ་ལ་བུ་ཆུང་ཞེས་འབོད། སྤུན་དྲུག་ནར་སོན་ནས་སོ་སོ་འཛི་རྐའི་འབངས་ཞབས་དང་། ལུང་ཏིག་གམ་ཏིག་ལུང་གོང་མ་དང་འོག་མ། མུན་མདའི་མཁར་ནག་མ་སོགས་སུ་བསྡད་ནས་ཚོ་པ་དྲུག་ཆགས། དེ་ལ་ཨ་འཚོ་རྒྱ་འཕན་ཚོ་དྲུག་ཀྱང་ཟེར། དེའི་ནང་གི་རྒྱ་ནི་ཏིག་རྒྱ་སྟེ། ཏིག་རྒྱ་ཨ་སྒ་ལྷ་གསུམ་དང་། འཕན་ནི་འཕན་ཤེས་ཏེ་རྟ་ཡག་ཆོབ་གསུམ་འཕན་དང་བཞི་ཞེས་བུ་ཆུང་གི་རྒྱུད་ཡིན། དེ་ལས་ཨ་འཚོ་ཞེས་པ་ནི་ཨ་སྤོ་ལྡོང་ལས་ཆད་པའི་རུས་རྒྱུད་ཚོ་ཆེན་ཞིག་ཡིན་པས་ཨ་འཚོ་དང་། ཏིག་རྒྱ་ནི་ཏིག་ལུང་ངམ་ལུང་ཏིག་ཏུ་གནས་སྡོད་བྱས་ནས་ཏིག་དང་། ར་རྒྱ་ཆུ་ཁ་ནས་འཛི་རྐའི་ཕྱོགས་སུ་ཡོང་བ་ཡིན་པས་རྒྱ་ཞེས་ཏིག་རྒྱ་ཐོགས། ད་ལྟ་བྱིངས་ཀྱིས་ཏིག་རྒྱ་ལ་སྟུག་རྒྱ་ཞེས་འབོད་པ་ནི་རྗེས་ནས་ཟུར་ཆགས་པ་ཞིག་ཡིན་སྙམ། ཀོ་ཚོང་ནི་ཀོ་བ་ཉོ་ཚོང་མཁན་ཞིག་ཡིན་པས་ན་ཀོ་ཚོང་། ཤ་ཚང་ནི་སྤུན་དྲུག་པོ་རི་དྭགས་རྔོན་དུ་སོང་ནས་ཤ་བཙོས་ཏེ་བགོས་རྗེས། ཀུན་ལ་ཤ་ཚང་ངམ་ཞེས་དྲིས་པས། སྤུན་གཅིག་གིས་ཚང་འདུག་ཟེར་ནས་དེར་ཤ་ཚང་དང་། ཡོས་བུ་ནི་ཡོས་བུ་ལོ་ལ་སྐྱེས་པ་ཡིན་པས་དེ་ལྟར་བཏགས། སྤུན་དྲུག་པོའི་ནང་གི་ཆུང་བ་དེ་བུ་ཆུང་ཡིན་པས་བུ་ཆུང་ངོ་། །དེ་ཡང་འཛི་རྐ་ན་ཆོས་རྗེ་དགོན་ཞེས་པའི་དགོན་པ་ཞིག་ཡོད། སྤུན་དྲུག་པོའི་གྲྭ་ཚང་ནི་ཆོས་རྗེ་དགོན་ཡིན་ལ། སྐབས་དེར་གྲྭ་ཚང་དེ་ནི་བོན་དགོན་ཞིག་ཡིན་ཞིང་། པོ་སྟུག་ལྷ་གསུམ་ཆོས་རྗེའི་རྒྱན་ཟེར་བའི་དཔེ་ལྟར་དགོན་པའི་ནང་དུ་མཁས་གྲུབ་གཉིས་ལྡན་གྱི་སྐྱེས་ཆེན་དུ་མ་བྱོན་མྱོང་། ད་ལྟ་དགོན་པ་དེ་ཇོ་ནང་པའི་དགོན་པ་ཞིག་ཡིན། མངའ་ཐང་ཡང་རྒྱས་ལ་བཙན་ཕྱུག་འཛོམས་པའི་སྐབས་དེར་འཛི་རྐ་ཚང་དང་གྱོད་ལ་ཐུག །སྟུག་རྒྱ་ཀརྨ་འབུམ་ཟེར་བའི་དཔོན་ཞིག་ཡོད་པ་དེས་འཛི་རྐ་ཚང་དང་འཐབ་ནས་མི་སུམ་ཅུ་ལྷག་ཅིག་བསད་དེ། བུ་རྟག་རྒྱལ་ཆོས་འབུམ་དང་ཆུང་མ་བཅས་ཁྲིད་ནས་ལྷ་སའི་ཕྱོགས་སུ་སོང་བ་དང་། དུས་དེ་ནས་ཚོ་པ་དྲུག་པོ་དེའང་ཕྱོགས་སོ་སོར་འཐོར།
དེ་ཡང་སྟུག་རྒྱ་ཀརྨ་འབུམ་གྱི་བུ་སྟག་རྒྱལ་ཆོས་འབུམ་མདོ་སྨད་ཀྱི་ཕྱོགས་སུ་སོང་ནས་ཡུལ་གསེར་རྟའི་གསེར་ཁོག་གི་ལྗགས་སམ་རྫོང་གནས་ཞེས་པའི་གནས་དེར་སླེབས་ནས་གཞིས་ཆགས། གནས་དེར་ནམ་རྒྱུན་རྟག་རྒྱལ་ཆོས་འབུམ་གྱི་རྨི་ལམ་དུ་བུད་མེད་ཞིག་གིས་སྟག་རྒྱལ་ཆོས་འབུམ་ལ་ཁྱོད་ལ་ངས་བྱ་བ་གང་དག་བསྒྲུབ་རོགས་བྱེད་དགོས་སོགས་རྨིས་པར་བཤད། ཉིན་ཞིག་རྟག་རྒྱལ་ཆོས་འབུམ་བཟའ་ཟླ་གཉིས་ལྗགས་ཀྱི་རྫ་ཁ་ན་གནས་སྐོར་ལ་འགྲོ་བའི་ལམ་བར་དུ་རྨི་ལམ་ནང་གི་བུད་མེད་དེར་དངོས་སུ་འཕྲད་པས། རྟག་རྒྱལ་ཆོས་འབུམ་ཡ་མཚར་ནས་རེ་ཞིག་ཧོན་འཐོར་དུ་སོང་། དུས་དེར་རྟག་རྒྱལ་ཆོས་འབུམ་གྱི་བཟའ་རོགས་ཀྱིས་ཅི་རེད་ཟེར་ནས་ཁོས་བུད་མེད་གན་ངའི་རྨི་ལམ་དུ་རྨིས་པའི་བུད་མེད་དེ་རེད་ཅེས་བཤད་སྐབས་བུད་མེད་དེ་གར་སོང་ཆ་མེད་དུ་གྱུར། རྗེས་ནས་རྟག་རྒྱལ་ཆོས་འབུམ་གྱི་བཟའ་རོགས་ཀྱིས་རང་གི་ཁྱོ་བོའི་གམ་དུ་བུད་མེད་གཞན་པ་རེ་ཡོད་པར་སྣང་ནས་མོ་ས་མཐའ་རུ་འཁྱམས། དེ་ནས་རྟག་རྒྱལ་ཆོས་འབུམ་དང་བྱིས་པ་རྣམས་ཨ་མ་འཚོལ་དུ་སོང་བ་དང་ཨ་མ་རྫ་ལུང་ཞིག་ཏུ་ཡོད་པ་རྙེད་དེ། རྫ་ལུང་དེ་ལའང་ཨ་མ་རྙེད་སའི་རྫ་ལུང་ཡིན་པས་མ་རྒན་རྫ་ལུང་ཐོགས། ད་ལྟའང་རྫ་ལུང་དེ་ལ་མ་རྒན་རྫ་ལུང་ཟེར། ངག་རྒྱུན་དུ་རྟག་རྒྱལ་ཆོས་འབུམ་གྱི་རྨི་ལམ་ནང་གི་བུད་མེད་དེ་ནི་སྟུག་རྒྱའི་གཞི་བདག་ཨ་ནེ་འུག་ར་ཁྲ་མོའི་སྤྲུལ་པ་ཡིན་པ་དང་། དེས་རྟག་རྒྱལ་ཆོས་འབུམ་ལ་རོགས་བྱས་པ་སོགས་བཤད་སྲོལ་འདུག་གོ། དེ་ནས་རྟག་རྒྱལ་ཆོས་འབུམ་བཟའ་ཟླ་གཉིས་ཀྱིས་དཀའ་སྡུག་གང་མང་ཞིག་བརྒྱུད་དེ་རྟ་ནོར་ལུག་གསུམ་སོགས་འཛོམས་ཤིང་འཚོ་བ་ཇེ་བཟང་ནས་ཇེ་ལེགས་སུ་ཕྱིན། ཁོང་གཉིས་ལ་བུ་བཞི་ཡོད་དེ། ཆེ་བ་སྒ་བཞག་མཁན་ཞིག་ཡིན་པས་སྒ་སྐོར་དང་། འབྲིང་བ་ལྷ་བཟོ་ཞིག་ཡིན་པས་ལྷ་སྐོར། ཆུང་བ་གཉིས་ཀྱིས་འབྲོང་ཨར་ལེ་ཞིག་ཁུ་ཚུར་གྱིས་བརྒྱབ་ནས་བསད་པས་ཨ་སྦོན་ཐོག་ལ་ཨ་སྦོན་གྱིས་འབྲོག་པ་བྱས་ཤིང་། ཨ་འཚོས་རོང་པ་བྱས་ནས་ཨ་སྒ་ལྷ་གསུམ་ཞེས་ཚོ་ཆེན་ཞིག་གྲུབ། དེ་ལས་ཨ་ནི་ཨ་འཚོ་དང་ཨ་སྦོན་ཡིན་ཞིང་འདི་གཉིས་ཁྱིམ་ཚང་གཅིག་ཡིན། སྒ་ནི་སྒ་སྐོར་དང་ལྷ་ནི་ལྷ་སྐོར་ཡིན་ལ། དེ་ཡང་སྟུག་རྒྱའི་སྒ་སྐོར་ལ་ཆོས་འབུམ་དང་། དཔའ་སྐོར། གླུ་སྐོར། ཁྱི་སྐོར་སྟེ་བཞི་ཡོད་དོ། །
སྤྱིར་རུས་འདིའི་སྐོར་ཁུངས་བཙུན་ལ་ཆ་ཚང་བ་ཞིག་སྨྲ་བར་འདོད་པ་ནི་ཧ་ཅང་དཀའ་བའི་གནས་སུ་གྱུར་ཡོད་དེ། འདིའི་སྐོར་ལ་ལོ་རྒྱུས་ཀྱི་ཡིག་ཆ་ཉུང་བས། ཕལ་ཆེ་བ་མི་རྣམས་ཀྱི་ངག་རྒྱུན་ལ་བརྟེན་ནས་འབྲི་དགོས་པས་ཁུངས་དག་མིན་ནི་བཤད་ཁག་པོ་ཡིན་མོད། ཡིན་ཡང་། ངག་རྒྱུན་མཐའ་དག་ནི་བདེན་དུ་མི་གྲུབ་ཅེས་སྨྲས་ན་དེ་ཡང་ཐལ་དྲགས་པས། བརྟག་དཔྱད་ཞིབ་མོའི་ལུང་རིགས་ཀྱི་གོ་ཆ་དེ་ཅིས་ཀྱང་ལུས་ལ་བགོ་དགོས། འདིར་བྲིས་པའི་རུས་སྟུག་རྒྱའི་སྐོར་ཡང་གཞན་གྱིས་བཤད་པ་ཙམ་མ་ཡིན་ཏེ། བརྟག་པ་དང་ཞིབ་དཔྱོད་སོགས་བྱས་ནས་བྲིས་པ་ཞིག་ཡིན་གྱི། འཆལ་གཏམ་དང་ལོག་བཤད། རང་མོས་སོགས་ཀྱི་འདམ་རྫབ་ཏུ་ལྷུང་བ་ཞིག་མ་ཡིན་ནོ། །
རུས་སྟུག་རྒྱ་ཞེས་པ་དེ་ནི་རུས་རྒྱུད་ཚོ་ཆེན་ཞིག་ཡིན་པ་དང་། ཚོ་པའི་གནས་སྡོད་དེ་ཡང་གཏན་ཆགས་ཤིག་མེད་པར་ཚོ་པ་དང་ཚོ་པའི་བར་ལ་འགལ་བ་བྱུང་ནས་གང་སར་སྤོ་དགོས་པ་ཞིག་ཡིན་པས། སྐབས་དེའི་སྤྱི་ཚོགས་དེའང་ཞི་འཇགས་ཤིག་མ་ཡིན་པར་ཟིང་འཁྲུག་ཆེ་བའི་དུས་སྐབས་ཞིག་ཡིན་པར་སྣང་། དེ་ཡང་འཛི་རྐའི་ཕྱོགས་སུ་གནས་སྡོད་བྱེད་པའི་དུས་ནི་བོད་ལ་བོན་ཆོས་ཤུགས་ཆེར་དར་བའི་དུས་སྐབས་ཤིག་ཡིན་སྙམ། རྒྱུ་མཚན་དེའི་སྐབས་སུ་སྟུག་རྒྱ་དང་དེ་མ་ཡིན་པའི་རུས་རྒྱུད་ཚོ་པ་གཞན་རྣམས་ཀྱི་དགོན་པ་ནི་ཆོས་རྗེ་དགོན་ཞེས་པའི་བོན་དགོན་དེ་ཡིན་མོད། ཡིན་ཡང་། དེང་སྐབས་དགོན་པ་དེ་ཇོ་ནང་གི་དགོན་པ་ཞིག་ཡིན་ལ། དགོན་པ་དེ་ཇོ་ནང་དགོན་དུ་བསྒྱུར་ནས་ལོ་ངོ་དྲུག་བརྒྱ་ལྷག་གི་ལོ་རྒྱུས་ཡོད་པར་བཤད། ངས་འདིར་ཞིབ་ཕྲའི་སྒོ་ནས་སྟུག་རྒྱའི་ལོ་རྒྱུས་སྐོར་འབྲི་མ་ཐུབ་རུང་། ཡབ་མེས་ཚོའི་བཤད་རྒྱུན་ལྟར་སྟུག་རྒྱ་ལའང་ལོ་ངོ་སྟོང་ཡས་མས་གྱི་ལོ་རྒྱུས་ཡོད་སྙམ། སྟུག་རྒྱལ་ཆོས་འབུམ་གྱི་རྨི་ལམ་ནང་གི་བུད་མེད་དེ་ཡང་ཨ་ནེ་འུག་ར་ཁྲ་མོ་ཡིན་པ་ཁ་ཚོན་གཅོད་མི་ནུས་མོད། ཡིན་ཡང་ངག་རྒྱུན་དེའི་ཁྲོད་ནས་རུས་རྒྱུད་སོ་སོ་ལ་དད་སའི་གཞི་བདག་རེ་ཡོད་པར་རྟོགས་ཐུབ་སྙམ། །