བསམ་ཡས་སྒྲ་སྒྱུར་གླིང་གི་སྒྲ་སྒྱུར་སྒྲིག་གཞི།

ལོ་ཙཱ་བྱེད་པར་ཐོག་མར་མི་རིགས་དེར་རང་ལ་དབང་བའི་སྐད་ཅིག་ཡོད་དགོས་པ་དང་དེ་ནས་སྐད་དེ་ལ་བརྟེན་ནས་བྱུང་བའི་ཡི་གེ་ཞིག དེ་ནས་ད་གཟོད་ཡི་གེ་དེར་བརྟེན་ནས་མཚུངས་མིན་གྱི་སྐད་གཉིས་ཕན་ཚུན་སྒྲ་སྒྱུར་བྱ་རྒྱུ་དེའོ། །བཙན་པོའི་རྒྱལ་རབས་སྐབས་མཁས་གྲུབ་མང་པོ་བོད་དུ་འོང་བ་དང་བོད་རང་ཡུལ་ནས་ལོ་ཙཱ་བ་མང་པོ་གསོ་སྐྱོང་བྱས་པས་སྔོན་ན་མེད་ལ་རྗེས་སུའང་འགྲན་པར་དཀའ་བའི་ཆོས་གཞུང་མང་པོ་ལོ་ཙཱ་བྱས་ཏེ་འཆད་ཉན་གྱི་རྒྱུན་ཡང་མ་ཉམས་པར་སྤེལ། བོད་དུ་སངས་རྒྱས་བསྟན་པའི་གཞུང་ལུགས་ཀྱི་ལོ་ཙཱ་དེ་སྲོང་བཙན་སྒམ་པོའི་དུས་ནས་བྱུང་སྟེ་རྒྱལ་རབས་ལྔ་བརྒྱུད་ནས་མེས་ཨག་ཚོམ་སྐབས་བར་གྱི་ལོ་ཙཱའི་སྒྲིག་གཞི་དེ་དེ་འདྲའི་འཐུས་ཚང་ཞིག་མིན། དེའི་སྐབས་སུ་ལོ་ཙཱའི་བྱེད་སྒོ་ཡོད་པ་ལས་སྒྲིག་གཞི་མེད་སྙམ། རྒྱུ་མཚན་ནི་སྔོན་གྱི་ཡིག་ཆ་དག་ལས་མཐོང་རྒྱུ་མེད་པ་དང་རྒྱལ་རབས་ལྔའི་རིང་གི་སྤྱི་ཚོགས་ཀྱི་རྒྱབ་ལྗོངས་ལ་གཞིགས་ན་ལོ་ཙཱའང་དེ་འདྲའི་བདེ་ལེགས་ངང་བྱེད་ཐུབ་མིན་མི་ཤེས་ལ་དེར་སྒྲིག་གཞི་ཞིག་ནི་དེ་བས་ཡོད་པ་དཀའ་བ་རིགས་པས་སྒྲུབ་ཐུབ། སམ་བོད་ལོ་ཙཱ་བྱེད་པར་སྲོང་བཙན་སྒམ་པོ་ནས་འགོ་ཚུགས་ཤིང་བསམ་ཡས་དགོན་པ་ལེགས་གྲུབ་བྱུང་རྗེས་ད་གཟོད་གཞི་རྒྱ་ཆེ་བའི་སྒོ་ནས་ལོ་ཙཱ་བྱེད་རྒྱུ་དར་བ་རེད། མི་རིགས་གཞན་པས་ཆེས་ཐོག་མར་སངས་རྒྱས་ཀྱི་ཆོས་གཞུང་རང་སྐད་དུ་བསྒྱུར་དུས་མ་ཡིག་མེད་ལ། ལོ་ཙཱ་བས་ཆོས་གཞུང་བློར་འཛིན་བྱས་ཏེ་ལོ་ཙཱ་བྱས་པས་གྱེར་ཀློག་བྱེད་པའི་ཆོས་གཞུང་དེ་འགྲིག་མིན་སུས་ཀྱང་ཐག་གཅོད་དཀའ་བའི་ལོ་རྒྱུས་བྱུང་མྱོང་ཡོད། དེར་མ་ཟད་ལོ་ཙཱ་ཐོག་མ་དར་བའི་དུས་འགོར་དམངས་ཁྲོད་དུ་མི་སྒེར་གྱི་འདོད་མོས་ལྟར་ལོ་ཙཱ་བྱས་པ་ལས་གཞུང་ཕྱོགས་ནས་དེར་ཐད་ཀར་ཞུགས་མེད། འོན་ཀྱང་ལོ་ཙཱ་བྱེད་སྐབས་མ་ཡིག་མེད་པའི་ལོ་རྒྱུས་ནི་བོད་ཀྱི་ནང་བསྟན་རིག་གཞུང་ལོ་ཙཱའི་ལོ་རྒྱུས་སྟེང་བྱུང་མ་མྱོང་ལ་ཆེས་ཐོག་མའི་ལོ་ཙཱའང་བཙན་པོའི་ཁབ་ནས་ཐད་ཀར་རྒྱབ་སྐྱོར་བྱས་ནས་ལོ་ཙཱ་བྱས་པ་ཡིན། མི་ལོ་ཉིས་བརྒྱ་ལྷག་གི་སྒྲ་སྒྱུར་བརྒྱུད་རིམ་ཁྲོད་བོད་ཀྱི་ལོ་ཙཱའི་སྒྲིག་གཞི་ཚགས་དམ་ལ་ལམ་སྲོལ་འཐུས་ཚང་དུ་གྲུབ།

སྤྱིར་རྒྱ་གར་གྱི་པཎྚི་ཏ་དང་བོད་ཀྱི་ལོ་ཙཱ་བ་གཉིས་རེ་ཆ་རུ་བསྡེབས་ནས་རྒྱ་དཔེ་བོད་ཡིག་ཏུ་བསྒྱུར་གནང་མཛད་སྐབས་ཞུས་ཆེན། ཞུས་ཆུང་། བར་ཞུས་སོགས་ལོ་ཙཱ་བ་སོ་སོའི་གཙོ་བོ་ཡོན་ཚད་རིམ་པ་གསུམ་དུ་ཕྱེ་ནས་བསྒྱུར་ཞུས་ཀྱི་ལས་བགོས་མཛད་ཡོད། དེ་ལས་ཞུས་ཆེན་ལོ་ཙཱ་བ་ནི་ལོ་ཙཱ་བ་གཞན་པས་ཐེངས་གཅིག་བསྒྱུར་ཚར་བ་དང་ཞུས་དག་ཀྱང་བྱས་ཟིན་པའི་མ་ཡིག་རྣམས་ཚིག་དོན་གཉིས་ཀའི་ཐད་ནས་ཞུས་དག་ཐ་མ་དེ་གནང་ནས་འགྲེམ་སྤེལ་དངོས་སུ་བྱེད་ཆོག་པའི་གཏན་འབེབས་གནང་མཁན་དེ་ཡིན། བར་ཞུས་ལོ་ཙཱ་བ་ནི་ལོ་ཙཱ་བ་ཞིག་གིས་ཐེངས་དང་པོར་བསྒྱུར་ཟིན་པའི་མ་ཡིག་ཁག་ལ་ཞུས་དག་གཉིས་པ་མཛད་མཁན་དེ་ཡིན། ལོ་ཆུང་ངམ་མཆན་བུ་ལོ་ཙཱ་བ་ནི་བསྒྱུར་བྱའི་མ་ཡིག་ཁག་བོད་ཡིག་ཏུ་ཐེངས་དང་པོར་སྒྱུར་མཁན་གྱི་ལོ་ཙཱ་བ་དེ་ཡིན། 《བཙན་པོའི་རྒྱལ་རབས་སྐབས་ཀྱི་དཔོན་རིགས་ཞིབ་འཇུག》ཅེས་པ་ལས“རྒྱ་གར་གྱི་པཎྜི་ཏ་དང་བོད་ཀྱི་ལོ་ཙཱ་བ་གཉིས་ཆ་རུ་བསྡེབས་ནས་རྒྱ་དཔེ་བོད་བསྒྱུར་གནང་ཁར་ཞུས་ཆེན་དང་། ཞུས་ཆུང་། ཡང་ཞུས། སུམ་ཞུས། བཞི་ཞུས། ལྔ་ཞུས་སོགས་ཞུས་དག་ལྟ་བསྡུར་ནན་ཏན་བགྱིས་པའི་ཆོས་བསྒྱུར་གྱི་སྒྲིག་གཞི་འཐུས་ཚང་ཞིག་ཆགས་གྲུབ་བྱུང་ཡོད་ལ། སྲོང་བཙན་སྒམ་པོ་ནས་གླང་དར་མའི་སྐབས་བྱུང་བའི་ཆོས་བསྣུབས་བྱ་འགུལ་མ་ཐོན་པའི་བར་སྔ་ཕྱི་ལོ་ཙཱ་བ་མང་དག་ཅིག་ཐོན་ཡོད”ཅེས་པ་ལས་ལོ་ཆེན་གྱི་ཞུ་དག་མ་མཛད་སྔོན་དུ་ལོ་ཆུང་དང་བར་ཞུས་ལོ་ཙཱ་བ་མ་ཟད་ཡང་ཞུས། གསུམ་ཞུས། བཞི་ཞུས་སོགས་ཡོད་སྲིད་ཀྱང་ཆེས་མཐའ་མར་ཞུ་དག་མཛད་མཁན་ནི་ལོ་ཆེན་ཡིན་ཞིང་ལོ་ཆེན་དེའི་ཡོན་ཚད་ལོ་ཙཱ་བ་ཡོངས་ལས་འཕགས་དགོས་པ་གདོན་མི་ཟ། དུང་དཀར་བློ་བཟང་འཕྲིན་ལས་ཀྱིས“ལོ་ཙཱ་བར་ལོ་ཙཱ་བ་ཆེན་པོ་དང་། མཆན་བུའི་ལོ་ཙཱ་བ་གཉིས་སྟེ་ལོ་ཆུང་གཉིས་ཡོད། ལོ་ཙཱ་བ་ཆེན་པོ་ནི་མི་རིགས་གཞན་གྱི་སྐད་ཡིག་ནས་རང་གི་མི་རིགས་ཀྱི་སྐད་ཡིག་ཐོག་བསྒྱུར་ཐུབ་པར་མ་ཟད། གཞན་དག་གིས་བསྒྱུར་བའི་ཡི་གེ་ལ་འགྱུར་བཅོས་དང་ཞུས་དག་མཛད་ཐུབ་པ་ཞིག་ཡིན”ཞེས་པ་ལས་ལོ་ཆེན་ལོ་ཆུང་གཉིས་ཀྱི་ཁྱད་པར་དང་ལོ་ཙཱ་བར་ལོ་ཆེན་ལོ་ཆུང་བར་ཞུས་སམ་རབ་འབྲིང་ཐ་གསུམ་དུ་ཕྱེས་ཏེ་ལོ་ཙཱ་བའི་མཚན་དང་བཅས་པ་དབྱེ་ནས་ཡོད་མོད། འོན་ཀྱང་སྐ་ཅོག་ཞང་གསུམ་ལ་མཚོན་ན་ཁོང་ཚོ་ཁྲི་སྲོང་ལྡེ་བཙན་སྐབས་སུ་མཆན་བུའི་ལོ་ཙཱ་བ་ཡིན་ལ་སོ་སོ་ཁྲི་ལྡེ་སྲོང་བཙན་དང་ཁྲི་རལ་བ་ཅན་གྱི་སྐབས་སུ་རང་གི་ཉམས་མྱོང་དང་སྙིང་རུས། ཡོན་ཚད་སོགས་བརྟེན་ནས་ལོ་ཆེན་ཏུ་འཕར། དེ་ལས་ལོ་ཙཱ་བ་སོ་སོ་བཙན་པོ་གཅིག་གི་སྲིད་སྐྱོང་དུས་སམ་ལོ་རབས་གཅིག་ཏུ་བྱུང་བའི་མི་སྣ་མ་ཡིན་པའི་རྐྱེན་གྱིས་སྔོན་དུ་བྱུང་བའི་ལོ་ཙཱ་བ་དག་ལ་རྒན་པ་དང་ཕྱི་མར་བྱུང་བའི་ལོ་ཙཱ་བ་རྣམས་ལ་དར་བའམ་གཞོན་གསུམ་ཞེས་པ་ངེས་མོད། འོན་ཀྱང་དུས་རབས་སམ་བཙན་པོའི་སྲིད་སྐྱོང་དུས་མི་འདྲ་བའི་ལོ་ཙཱ་བ་དག་ལ་རབ་འབྲིང་ཐ་གསུམ་སོགས་དབྱེ་བར་མི་སྣང་ངོ་། །ལོ་ཙཱ་ལག་ལེན་བྱེད་སར་སྒྲ་སྒྱུར་གླིང་ཡིན་པ་དང་དེ་རུ་རྒྱ་གར་འཕགས་པའི་ཡུལ་ནས་ཡོང་བའི་མཁན་པོས་ཆོས་གཞུང་ཁྲིད་པ་དང་ཞང་ཡེ་ཤེས་སྡེ་སོགས་ལོ་ཙཱ་བ་དུ་མས་ལོ་ཙཱ་བྱས། ལོ་ཙཱ་བྱེད་སྟངས་སམ་དེའི་བརྒྱུད་རིམ་ནི་བསམ་ཡས་དགོན་པའི་ལྡེབས་རིས་སུ་ལོ་ཙཱ་བ་རྣམས་ཁ་གཏད་ནས་སྐྱིལ་གྲུང་དུ་སྡོད་པ་དང་། ཐོག་མར་མི་གཅིག་གིས་སྐད་གདངས་མཐོན་པོའི་སྒོ་ནས་ཆོས་གཞུང་གྱེར་འདོན་བྱས་ཏེ་མི་གཞན་ཞིག་གིས་ངག་ཐོག་ནས་ལོ་ཙཱ་བྱས་པ་དང་། ཡང་ལོ་ན་ཅུང་བགྲེས་པའི་བན་དེ་ཞིག་གིས་ཞུས་དག་བྱས་ཏེ། དེ་ནས་ལོ་ན་ཅུང་ཆུང་བའི་ཡིག་མཁན་ཞིག་གིས་ཡི་གེར་བཀོད་པའི་ཚུལ་ལྡེབས་རིས་སུ་གསོན་ཉམས་དོད་པོའི་སྒོ་ནས་བཀོད་ཡོད། ལོ་ཙཱའི་བརྒྱུད་རིམ་ཁྲོད་བཙན་པོས་ཐད་ཀར་ལོ་ཙཱའི་སྒྲིག་གཞི་དེར་དོ་དམ་བྱས་ལ་རྒྱལ་པོས་རང་དགར་ལོ་ཙཱ་བྱེད་མི་ཆོག་པའི་བཀའ་ཕབ། དེའི་སྐབས་ཀྱི་ལོ་ཙཱ་ནི་ཡིག་རིགས་མི་འདྲ་བ་ཕན་ཚུན་ཕབ་སྒྱུར་བྱེད་པ་ལས་འདས་པའི་ལོ་ཙཱའི་རྣམ་པ་ཞིག་ཡིན། དེ་ནི་ཐོག་མཐའ་བར་གསུམ་དུ་ཕྱིར་འོང་པཎྚི་ཏས་ཆོས་གཞུང་ཟབ་ཁྲིད་དམ་སློབ་ཁྲིད་བྱས་ཏེ་བོད་ཀྱི་ལོ་ཙཱ་བས་གཞུང་དེའི་ནང་དོན་དང་རྣམ་པ་སོགས་རྨང་ནས་རྟོགས་རྗེས་ད་གཟོད་ལོ་ཙཱ་བྱས་པའི་རྣམ་གཞག་ཅིག་ཡིན། གནད་དོན་རེ་རེ་མཐའ་ན་ཆོས་གཞུང་ཁྲོད་ཀྱི་མིང་ཚིག་རེ་རེ་མཁས་གྲུབ་མང་པོས་མཉམ་དུ་ཞིབ་ཅིང་ཕྲ་བའི་སྒོ་ནས་ཞིབ་དཔྱད་བྱས་ཏེ་མ་ཡིག་གི་མིང་ཚིག་དེ་བོད་ཡིག་ཏུ་བཀོལ་སྟངས་དང་བོད་ཡིག་ཏུ་ཕབ་རྗེས་འོས་འཚམ་གྱི་མིང་ཚིག་ཇི་འདྲ་ཞིག་གིས་ཚབ་མཚོན་བྱེད་ཐུབ་མིན་དེར་ཞིབ་གཅོད་བྱས་ཤིང་ཟིན་ཐོ་ཡང་བཀོད་ནས་ཟུར་ལྟའི་དེབ་ཆུང་ཞིག་ཏུ་གྲུབ་སྟེ་རྗེས་ཀྱི་སྒྲ་སྦྱོར་བམ་གཉིས་གྲུབ་པར་རྨང་གཞི་བཏང་ཡོད། གཞུང་ལུགས་དེའང་གློ་བུར་དུ་བྱུང་བ་ཞིག་མིན་ཏེ་དུས་ཡུན་ངེས་ཅན་གྱི་ནང་དུ་ལོ་ཙཱ་བ་དུ་མས་ཉམས་མྱོང་དང་ལོ་ཙཱའི་སྒྲིག་གཞི་ལས་བྱུང་བའི་འབྲས་བུ་ཡིན་པར་སྙམ། སམ་བོད་གཞུང་ལུགས་སྒྲ་སྦྱོར་བམ་གཉིས་འགྲེམ་སྤེལ་བྱས་པ་ནས་བཟུང་དེ་ལས་བོད་བཙན་པོའི་སྐབས་ཀྱི་ལོ་ཙཱའི་སྒྲིག་གཞི་ཚགས་དམ་པ་ཤེས་ཐུབ། དེར་མ་ཟད་སྒྲ་སྦྱོར་བམ་གཉིས་ལས་བསྒྱུར་གྱི་རྩ་དོན་དང་ཚད་གཞི། བསྒྱུར་བའི་ཐབས་སོགས་སྤྱི་དང་བྱེ་བྲག་གི་སྒོ་ནས་རེ་རེ་བཞིན་བསྟན་ཡོད། སྒྲ་སྦྱོར་བམ་གཉིས་ནི་སྔོན་གྱི་ལོ་ཙཱའི་ཉམས་མྱོང་ཕྱོགས་བསྡོམས་དང་ཉམས་མྱོང་དེ་ལས་བྱུང་བའི་གྲུབ་འབྲས་ཡིན་ལ་བོད་ཀྱི་ལོ་ཙཱའི་སྒྲིག་གཞི་འཐུས་ཚང་དུ་ཕྱིན་པའི་མཚོན་རྟགས་གལ་ཆེན་ཞིག་ཀྱང་ཡིན། 《ཆོས་འབྱུང་མེ་ཏོག་སྙིང་པོའི་སྦྲང་རྩི་བཅུད》སོགས་བོད་ཀྱི་ལོ་རྒྱུས་ཡིག་ཆའི་ཁྲོད་དུ་ཞུ་ཆེན་ལོ་ཙཱ་བས་བོད་དཔེ་བཀླགས། རྒྱ་དཔེ་པཎྚི་ཏས་ཞུ་ཏིག་བྱས། ལོ་ཙཱ་བས་ཚེག་བར་བདུན་ལ་ཚིག་རྐང་གཅིག ཤོ་ལོ་ཀ་སུམ་བརྒྱ་ལ་བམ་པོ་གཅིག །བམ་པོ་ཞེས་པའི་ཚད་ནི་ཤོ་ལོ་ཀ་སུམ་བརྒྱ་དང་སུམ་ཅུ་རྩ་གཅིག །

ཚིག་རྐང་སྟོང་གཅིག་གི་སུམ་ཆ་ལ་བམ་པོ་གཅིག་ཏུ་བཤད་ཅེས་ཚིག་རྐང་དང་བམ་པོ་སོགས་ཀྱི་ཚད་གཏན་འཁེལ་བྱས་ཡོད།

ལོ་ཙཱ་བྱ་བའི་བརྒྱུད་རིམ་ཁྲོད་དུ་མེད་དུ་མི་རུང་བའི་དཔུང་སྡེ་ཞིག་ཡོད་ལ་དེ་ནི་ཡིག་མཁན་བྱ་བ་དེ་ཡིན། ཡིག་མཁན་ནི་འདིར་ལོ་པཎ་རིམ་བྱོན་རྣམས་ཀྱིས་བསྒྱུར་ཅིང་གཏན་ལ་ཕབ་པའི་ཆོས་གཞུང་རྣམས་ཤོག་བུ་སོགས་ཀྱི་ཐོག་ཏུ་བཤུ་འབྲི་བྱེད་མཁན་ལ་ཟེར། ཏུན་ཧོང་ནས་ཐོན་པའི་ཆོས་གཞུང་ཤོག་དྲིལ་ཁ་ཤས་ནང་ཆོས་དཔེ་བྲིས་བཤུས་མཁན་མང་པོ་ཞིག་འཁོད་ཡོད་ལ། ཁམས་མཚོ་སྐྱིད་ཅེས་པས་ས་ཆ་མི་འདྲ་བ་སོ་སོ་ན་ཉར་ཚགས་བྱས་ཡོད་པའི་ཏུན་ཧོང་ཡིག་ཆ་ལས་ཆོས་དཔེའི་བྲིས་བཤུས་མཁན་ལ་སོགས་ལ་ཞིབ་བརྩིས་བྱས་པ་ལྟར་ན“ཆོས་དཔེ་འབྲི་མཁན་540ལྷག་དང་ཞུས་དག་མཁན་266བཅས་བསྡོམས་ན་806བྱུང་ཡོད། དེའི་ནང་ནས་མི་78ནི་འབྲི་མཁན་ཡིན་ལ་ཞུས་དག་མཁན་ཡང་ཡིན། དེས་ན་བྲིས་ཞུས་གཉིས་ཀའི་ལས་འཛིན་བསྐྱར་བཟློས་མ་བྱས་ན་ཡིག་མཁན་691གིས་ཆོས་དཔེ་བྲིས་ཞུས་ཀྱི་ལས་ཀར་དངོས་སུ་ཞུགས་ཡོད་པ་རེད”ཅེས་གསུངས་པ་བཞིན་དེའི་སྐབས་སུ་ཡིག་མཁན་ཤིན་ཏུ་མང་པོ་བྱུང་ཡོད། རྒྱལ་རབས་རིམ་བྱོན་སྐབས་ཀྱི་ཆོས་དཔེ་བྲིས་བཤུས་མཛད་མཁན་དེ་ཚོ་ཡང་ཡིག་མཁན་དང་ཞུས་དག་མཁན་ལས་གྲུབ་ཅིང་། ཞུས་དག་མཁན་ལ་རིམ་བཞིན་ཡང་ཞུས། སུམ་ཞུས། བཞི་ཞུས་སོགས་ཀྱི་མང་ཉུང་ཅི་རིགས་བྱུང་ཡོད། བཙན་པོའི་རྒྱལ་རབས་སྐབས་ཀྱི་ཡིག་མཁན་རྣམས་ལ་བྱ་དགའ་ཆད་གཅོད་ཀྱི་ལམ་སྲོལ་ཡོད་པས་དེའི་སྐབས་ཀྱི་སྒྲིག་གཞི་དེ་ཧ་ཅང་ཚགས་དམ་པའི་ཚུལ་དུ་སྣང་། ལོ་པཎ་མཁས་གྲུབ་རྣམས་ཀྱིས་ཆོས་འཆད་པ་དང་དེ་ནས་རིམ་བཞིན་ལོ་ཙཱ་བྱས་ཏེ་ཞུ་དག་མཛད་པའི་བརྒྱུད་རིམ་ནི་རྙོག་འཛིང་ལྡན་ཞིང་ཚེགས་ཆེ་བ་ཡིན་པས། དབང་སྒྱུར་བའམ་རྒྱལ་པོས་དངོས་སུ་ཞུ་དག་དང་ཆོག་མཆན་སོགས་གནང་པ་ལས་གོང་རིམ་དབང་སྒྱུར་གྲལ་རིམ་གྱིས་ལོ་ཙཱའི་ལས་ལ་མཐོང་ཆེན་མཛད་པ་མངོན། སྒྲ་སྒྱུར་གླིང་གི་སྒྲིག་གཞི་ཚགས་དམ་པ་དང་ལོ་ཙཱ་བ་རྣམས་ཀྱིས་སྐོམ་པ་ཆུ་འདོད་བཞིན་རིག་གནས་བརྩོན་ཞིབ་བྱས་པས་བསམ་ཡས་སྒྲ་སྒྱུར་གླིང་བཙུགས་པ་ནས་བཟུང་ལོ་ཙཱའི་སྒྲིག་གཞི་དེ་ནི་དེ་བས་ཚད་ལྡན་དང་གོ་རིམ་ལྡན་པ་ཞིག་ཏུ་གྱུར་ཡོད། བསྟན་པ་སྔ་དར་སྐབས་སུ་ལོ་ཙཱ་བྱེད་པ་ནི་ལོ་ཙཱ་བ་མི་སྒེར་གྱི་ལས་དོན་གཏན་ནས་མིན་ལ་དེ་ནི་རྩ་འཛུགས་ཡོད་པ་དང་འཆར་གཞི་ཡོད་པ། སྒྲིག་གཞི་ཡོད་པའི་རྒྱལ་ཁབ་ཀྱི་སྤྱི་དོན་ཞིག་གི་ཚུལ་དུ་མངོན་ཡོད་དོ། །