སྐྱེ་ཁམས་དཔལ་ཡོན་འཛུགས་སྐྲུན་བྱེད་པར་སྐུལ་འདེད་གཏོང་དགོས་ན་འབྲེལ་བ་གལ་ཆེན་འགའ་ཞིག་ཐག་གཅོད་ཡག་པོ་བྱེད་དགོས།

དུས་རབས་གསར་པའི་སྐྱེ་ཁམས་དཔལ་ཡོན་འཛུགས་སྐྲུན་ལག་ལེན་བྱེད་པར་སྐུལ་འདེད་གཏིང་ཟབ་གཏོང་བ་དང་བསྟུན་ནས། ང་ཚོས་སྐྱེ་ཁམས་དཔལ་ཡོན་འཛུགས་སྐྲུན་གྱི་ཆོས་ཉིད་རང་བཞིན་ལ་ངོས་འཛིན་བྱེད་ཚད་རྒྱུན་ཆད་མེད་པར་གཏིང་ཟབ་ཏུ་འགྲོ་གི་ཡོད། དུས་རབས་གསར་པའི་ལོ་ངོ་10ཡི་རིང་གི་ལག་ལེན་གྱི་ཉམས་མྱོང་ཕྱོགས་བསྡོམས་དང་། མིག་སྔར་མདུན་དུ་ལྷགས་པའི་གནས་ཚུལ་གསར་པ་དང་གནད་དོན་གསར་པར་དབྱེ་ཞིབ། སྐྱེ་ཁམས་དཔལ་ཡོན་འཛུགས་སྐྲུན་ལ་མུ་མཐུད་སྐུལ་འདེད་བཅས་བྱེད་དགོས་ན། ངེས་པར་དུ་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་སྐྱེ་ཁམས་དཔལ་ཡོན་གྱི་དགོངས་པས་མཛུབ་སྟོན་བྱས་ཏེ། འབྲེལ་བ་གལ་ཆེན་འགའ་ཞིག་ཐག་གཅོད་ཡང་དག་བྱེད་དགོས།

གཅིག་ནི་སྤུས་ཚད་མཐོ་བའི་འཕེལ་རྒྱས་དང་ཆུ་ཚད་མཐོ་བའི་སྲུང་སྐྱོབ་བར་གྱི་འབྲེལ་བ་ཡིན། འཕེལ་རྒྱས་དང་སྲུང་སྐྱོབ་བར་གྱི་འབྲེལ་བ་ཐག་གཅོད་ཡག་པོ་བྱ་རྒྱུ་ནི་འཛམ་གླིང་རང་བཞིན་གྱི་དཀའ་གནད་ཅིག་ཡིན་ལ། མིའི་རིགས་ཀྱི་སྤྱི་ཚོགས་འཕེལ་རྒྱས་གཏོང་བར་འཕྲད་པའི་རྟག་བརྟན་གྱི་ཞིབ་འཇུག་བྱ་གཞི་ཞིག་ཀྱང་ཡིན། ཏང་གི་ཚོགས་ཆེན་ཉི་ཤུ་པའི་ཐོག་བཏོན་དོན། དཔལ་འབྱོར་དང་སྤྱི་ཚོགས་འཕེལ་རྒྱས་ལྗང་མདོག་ཅན་དང་ཐཱན་ཉུང་ཅན་དུ་འགྱུར་བར་སྐུལ་འདེད་གཏོང་རྒྱུ་ནི་སྤུས་ཚད་མཐོ་བའི་འཕེལ་རྒྱས་མངོན་འགྱུར་ཡོང་བའི་འགག་རྩའི་ལྷུ་ཚིགས་ཡིན། དེས་སྤུས་ཚད་མཐོ་བའི་འཕེལ་རྒྱས་དང་ཆུ་ཚད་མཐོ་བའི་སྲུང་སྐྱོབ་ནི་གཅིག་ལ་གཅིག་བརྟེན་དང་ཆར་པ་ཆུ་གྲོགས་ལྟ་བུའི་འབྲེལ་བ་ཡིན་པ་གསལ་བཤད་བྱས་ཡོད། ཆུ་ཚད་མཐོ་བའི་སྲུང་སྐྱོབ་ནི་སྤུས་ཚད་མཐོ་བའི་འཕེལ་རྒྱས་ཀྱི་འདེགས་སྐྱོར་གལ་ཆེན་ཞིག་ཡིན། སྐྱེ་ཁམས་སྔོན་ལ་འཇོག་པ་དང་ལྗང་མདོག་ཐཱན་ཉུང་གི་སྤུས་ཚད་མཐོ་བའི་འཕེལ་རྒྱས་ཆུ་ཚད་མཐོ་བའི་སྲུང་སྐྱོབ་ལ་བརྟེན་ན་ད་གཟོད་མངོན་འགྱུར་བྱེད་ཐུབ། ཀྲུང་གོའི་ལུགས་ཀྱི་དེང་རབས་ཅན་འཛུགས་སྐྲུན་བྱེད་པའི་བརྒྱུད་རིམ་ཧྲིལ་པོའི་ནང་ང་ཚོས་སྤུས་ཚད་མཐོ་བའི་འཕེལ་རྒྱས་དང་ཆུ་ཚད་མཐོ་བའི་སྲུང་སྐྱོབ་བར་གྱི་རྩོད་སྒྲུབ་གཅིག་གྱུར་གྱི་འབྲེལ་བ་ཁོང་དུ་ཡག་པོ་ཆུད་དགོས།

མི་དང་རང་བྱུང་ཁམས་ཞི་མཐུན་མཉམ་གནས་ཀྱི་མཐོ་ཚད་ཐོག་ནས་འཕེལ་རྒྱས་ལ་ཇུས་འགོད་བྱེད་པ་དང་། ཐོན་ཁུངས་ཁོར་ཡུག་གི་ཐེག་ནུས་དེ་སྔོན་འགྲོའི་ཆ་རྐྱེན་དང་རྨང་གཞིར་བྱས་ཏེ། དཔལ་འབྱོར་བྱེད་སྒོ་དང་མིའི་བྱ་སྤྱོད་དེ་རང་བྱུང་ཐོན་ཁུངས་དང་སྐྱེ་ཁམས་ཁོར་ཡུག་གིས་ཐེག་ཚད་ནང་ཚོད་འཛིན་བྱེད་པ་དང་། ལྗང་མདོག་རིགས་བསྒྱུར་ཁྲོད་འཕེལ་རྒྱས་ཀྱི་སྤུས་ཚད་མཐོར་འདེགས་ཆེན་པོ་དང་གྲངས་ཚད་ལུགས་མཐུན་ངང་འཕར་བར་སྐུལ་འདེད་གཏོང་དགོས། ཆུ་ཚད་མཐོ་བའི་སྲུང་སྐྱོབ་བརྒྱུད་འཕེལ་རྒྱས་ཀྱི་སྒུལ་ནུས་གསར་པ་དང་དགེ་མཚན་གསར་པ་རྒྱུན་ཆད་མེད་པར་གཏོད་པ་དང་། ལྗང་མདོག་ཐཱན་ཉུང་འཁོར་རྒྱུག་བཅས་ཀྱི་དཔལ་འབྱོར་མ་ལག་ཧུར་ཐག་འཛུགས་པ། ཚན་རྩལ་འདུས་ཚད་མཐོ་བ་དང་། ཐོན་ཁུངས་ཟད་གྲོན་ཆུང་བ། ཁོར་ཡུག་སྦགས་བཙོག་ཉུང་བ་བཅས་ཀྱི་ཐོན་ལས་གྲུབ་ཚུལ་མགྱོགས་མྱུར་ཆགས་པར་བྱེད་པ། དཔལ་འབྱོར་ལྗང་མདོག་ཅན་གྱི་ཆུ་ཚད་མཐོར་འདེགས་ཤུགས་ཆེན་གཏོང་བ། འཕེལ་རྒྱས་ཀྱི་ཐོན་ཁུངས་ཁོར་ཡུག་གི་རིན་དོད་ནུས་ལྡན་ངང་དམའ་རུ་གཏོང་བ། འཕེལ་རྒྱས་ཀྱི་བག་ཉལ་སྟོབས་ཤུགས་དང་གཏིང་ཤུགས་རྒྱུན་མཐུད་ངང་ཆེ་རུ་གཏོང་བ་བཅས་བྱེད་དགོས།

གཉིས་ནི་གཙོ་གནད་འགག་སྒྲོལ་དང་མཉམ་སྡེབ་བཅོས་སྐྱོང་བར་གྱི་འབྲེལ་བ་ཡིན། སྐྱེ་ཁམས་ཁོར་ཡུག་བཅོས་སྐྱོང་ནི་མ་ལག་ལྡན་པའི་ལས་གྲྭ་ཞིག་ཡིན་པས། ཁོར་ཡུག་གི་རྒྱུ་རྐྱེན་གཙོ་བོའི་རྙོག་འཛིང་རང་བཞིན་དང་། སྐྱེ་ཁམས་མ་ལག་གི་ཆ་ཚང་རང་བཞིན། རང་བྱུང་ས་གཤིས་སྡེ་ཚན་གྱི་རྒྱུན་མཐུད་རང་བཞིན། དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་རྒྱུན་མཐུད་རང་བཞིན་བཅས་ལ་གཅིག་འདོམས་ཀྱིས་བསམ་བློ་གཏོང་དགོས། དེས་ང་ཚོས་ཁྱོན་ཡོངས་ལ་གཞི་ཚུགས་པ་དང་། མ་ལག་གི་འདུ་ཤེས་རྒྱུན་འཁྱོངས་བྱེད་ཅིང་། གཏན་འཁེལ་བྱས་རྗེས་ད་གཟོད་ལག་བསྟར་བྱེད་དགོས་པའི་བླང་བྱ་བཏོན་ཡོད། གཙོ་གནད་འགག་སྒྲོལ་རྒྱུན་འཁྱོངས་བྱས་ཤིང་། འགལ་ཟླ་གཙོ་བོ་དང་འགལ་ཟླའི་ཕྱོགས་གཙོ་བོ་དམ་འཛིན་བྱས་ཏེ་མངོན་གསལ་དོད་པའི་སྐྱེ་ཁམས་ཁོར་ཡུག་གི་གནད་དོན་ལ་བྱེད་ཐབས་ནུས་ལྡན་སྤྱད་དེ། གཙོ་གནད་ཐོད་བརྒལ་ལ་བརྟེན་ནས་ཁྱོན་ཡོངས་ཀྱི་ལས་དོན་ཆུ་ཚད་མཐོ་རུ་གཏོང་བར་སྐུལ་ཁྲིད་བྱེད་དགོས། དུས་མཚུངས་སུ། དམིགས་འབེན་མཐུན་སྦྱོར་དང་། སྦགས་བཙོག་ཆེ་བའི་དངོས་པོ་ཚོད་འཛིན་དང་མཐུན་སྦྱོར། སྡེ་ཁག་བར་མཐུན་སྦྱོར། ས་ཁོངས་ཁག་བར་མཐུན་སྦྱོར། སྲིད་ཇུས་ཐད་མཐུན་སྦྱོར་བཅས་བྱེད་ཤུགས་ཆེ་རུ་བཏང་སྟེ། ལས་དོན་ཁག་གི་མ་ལག་རང་བཞིན་དང་། སྤྱི་ཡོངས་རང་བཞིན། མཐུན་སྦྱོར་རང་བཞིན་བཅས་རྒྱུན་ཆད་མེད་པར་ཆེ་རུ་གཏོང་དགོས། གཅིག་གྱུར་གྱིས་འཆར་འགོད་དང་ཕྱོགས་ཡོངས་ལ་ལྟ་རྟོག་བྱས་ནས་ཆ་ཤས་དང་ཁྱོན་ཡོངས་ཕན་ཚུན་མཐུན་སྦྱོར་དང་། རྩ་ལག་མཉམ་བཅོས་འབྲེལ་མཐུད། མིག་སྔར་དང་རྒྱང་རིང་ཕན་ཚུན་ཟུང་འབྲེལ་བཅས་བྱེད་པར་སྐུལ་འདེད་གཏོང་དགོས།

མིག་སྔར། ངེས་པར་དུ་འཐབ་ཇུས་ཀྱི་བརྟན་ཤུགས་སྲུང་འཛིན་བྱེད་པ་དང་། སྙིང་རུས་ལྷོད་མེད་དང་སྙིང་རུས་གཏན་འཁྱོངས་བྱེད་ཅིང་། སྦགས་བཙོག་འགོག་བཅོས་ཀྱི་འགག་སྒྲོལ་དམག་འཐབ་རྒྱུན་མཐུད་གཏིང་ཟབ་བརྒྱབ་སྟེ། རྒྱལ་ཁ་མ་ཐོབ་བར་དུ་མཚམས་གཏན་ནས་འཇོག་མི་རུང་བ་དང་། གཙོ་གནད་ས་ཁོངས་དང་། གཙོ་གནད་ཁྱབ་ཁོངས། འགག་རྩའི་ལྷུ་ཚིགས་བཅས་མངོན་གསལ་དོད་པོ་ཡོང་བར་བྱས་ནས་དཀའ་ངལ་ལ་མི་འཛེམ་པར་མདུན་དུ་སྐྱོད་པ་དང་མུ་མཐུད་འགག་སྒྲོལ་བྱས་ཏེ་ཚད་གཞི་སྔར་ལས་མཐོ་བའི་མཚོན་རྟགས་རང་བཞིན་གྱི་དམག་འཐབ་ཡག་པོ་འགའ་རྒྱག་དགོས། གཅིག་འདོམས་དང་མཐུན་སྦྱོར་གྱི་ལས་དོན་ཡག་པོ་བསྒྲུབ་དགོས་པ་སྟེ། ཐོན་ལས་གྲུབ་ཚུལ་ལེགས་སྒྱུར་དང་། སྦགས་བཙོག་བཅོས་སྐྱོང་། སྐྱེ་ཁམས་སྲུང་སྐྱོབ། གནམ་གཤིས་འགྱུར་ལྡོག་ལ་ཁ་གཏད་འཇལ་བ་བཅས་གཅིག་འདོམས་བྱས་པ་དང་། ཐཱན་ཉུང་གཏོང་དང་། སྦགས་བཙོག་ཉུང་གཏོང་། ལྗང་མདོག་རྒྱ་སྐྱེད། འཕར་སྣོན་ཡོང་བ་བཅས་ལ་མཐུན་སྦྱོར་ངང་སྐུལ་འདེད་བཏང་སྟེ་ཕྱོགས་མཐའ་ཀུན་དང་། ས་ཁོངས་ཡོངས། བརྒྱུད་རིམ་ཧྲིལ་པོ་བཅས་སུ་སྐྱེ་ཁམས་དཔལ་ཡོན་འཛུགས་སྐྲུན་བྱེད་དགོས།

གསུམ་ནི་རང་བྱུང་སླར་གསོ་དང་མིས་བཟོས་ཉམས་གསོ་བར་གྱི་འབྲེལ་བ་ཡིན། རང་བྱུང་སྐྱེ་ཁམས་མ་ལག་ནི་སྐྱེ་ལྡན་ཚེ་སྲོག་གི་ཕུང་པོ་ཞིག་ཡིན་པས། དེ་ལ་རང་ངོས་འཕེལ་རྒྱས་དང་འཕོ་འགྱུར་གྱི་ཕྱི་རོལ་ཡུལ་གྱི་ཆོས་ཉིད་ལྡན་ལ། རང་ངོས་སྙོམ་སྒྲིག་དང་། རང་ངོས་གཙང་སྒྱུར། རང་ངོས་སླར་གསོ་བཅས་ཀྱི་ནུས་པ་ལྡན། མིའི་རིགས་ཀྱིས་རང་བྱུང་ཁམས་ལ་བཟོས་པའི་གནོད་སྐྱོན་སེལ་དགོས་ན། ཐོག་མར་རང་བྱུང་ཁམས་ལ་བརྩི་འཇོག་ལེགས་པོ་དང་དེ་དང་བསྟུན་ནས་རང་བྱུང་ཁམས་ལ་ངལ་གསོ་འདང་ངེས་རྒྱག་པའི་དུས་ཚོད་དང་བར་སྟོང་སྤྲད་དེ་རང་བྱུང་ནུས་ཤུགས་ལ་བརྟེན་ནས་སྐྱེ་ཁམས་མ་ལག་དོ་མཉམ་ཡོང་བར་བྱེད་དགོས། འདི་ནི་ང་ཚོས་རང་བྱུང་སླར་གསོ་བྱ་རྒྱུ་གཙོ་བོར་འཛིན་པའི་བྱེད་ཕྱོགས་རྒྱུན་འཁྱོངས་བྱེད་དགོས་ཞེས་ནན་བཤད་ཡང་ཡང་བྱས་པའི་རྒྱུ་མཚན་དེ་རེད། དེ་དང་མཉམ་དུ། རང་བྱུང་སླར་གསོའི་བཀག་རྒྱ་དང་མཐར་ཐུག་ཚད་ཀྱིས་མིས་བཟོས་ཉམས་གསོ་ལ་སྔར་ལས་མཐོ་བའི་བླང་བྱ་བཏོན་ཡོད་ལ། ཧུར་ཐག་གིས་སྒྲུབ་པའི་བར་སྟོང་རྒྱ་ཆེ་ཡང་བཞག་ཡོད། ང་ཚོས་རང་བྱུང་སླར་གསོ་དང་མིས་བཟོས་ཉམས་གསོ་གཉིས་གཅིག་གྱུར་དམ་ཚགས་བྱས་ཏེ། ཡུལ་དུས་ཀྱི་གནས་བབ་ལ་གཞིགས་ནས་ཁུལ་འབྱེད་རིགས་འབྱེད་ཀྱི་སྒོ་ནས་སྲིད་ཇུས་ལག་ལེན་བསྟར་བ་དང་། སྐྱེ་ཁམས་སྲུང་སྐྱོབ་དང་ཉམས་གསོའི་ཐག་གཅོད་བྱེད་ཐབས་ལེགས་ཤོས་ཧུར་ཐག་གིས་འཚོལ་དགོས།

རི་ཆུ་ནགས་ཞིང་དང་མཚེའུ་རྩྭ་བྱེ་བཅས་གཞི་གཅིག་ཅན་གྱི་སྲུང་སྐྱོབ་དང་མ་ལག་ལྡན་པའི་བཅོས་སྐྱོང་བྱ་རྒྱུ་རྒྱུན་འཁྱོངས་བྱེད་པ་དང་། རི་རྩེ་ནས་རྒྱ་མཚོའི་བར་གྱི་སྲུང་སྐྱོབ་བཅོས་སྐྱོང་གི་རྣམ་པ་ཆེན་པོ་ཞིག་བཏོད་དེ་རང་བྱུང་སླར་གསོ་དང་མིས་བཟོས་ཉམས་གསོའི་ཐབས་ཤེས་གཉིས་ཕྱོགས་བསྡུས་ཐོག་སྤྱད་དེ་སྐྱེ་ཁམས་འཛུགས་སྐྲུན་ལ་རྒྱུན་སྲིང་ལྷོད་མེད་ངང་སྐུལ་འདེད་གཏོང་དགོས། རྩྭ་ཐང་དང་། ནགས་ཚལ། ཆུ་བོ། མཚེའུ། འདམ་ར། ས་ཞིང་སོགས་སྐྱེ་ཁམས་མ་ལག་བེད་སྤྱོད་བྱས་དྲགས་སར་ཕྱུགས་བཀག་རྩྭ་གསོ་དང་། ཤིང་གཅོད་ཚོད་འཛིན། ཉ་མི་འཛིན་པ། འདེབས་འཇོག་རེས་མོས་བཅས་བྱ་རྒྱུ་ཁྱབ་གདལ་ནན་པོ་གཏོང་དགོས། ས་ཆུ་ཤོར་བ་དང་། མྱ་ངམ་ཐང་དུ་འགྱུར་བ། བྱེ་རྡོ་ཅན་དུ་འགྱུར་བ་སོགས་སྐྱེ་ཁམས་ཞན་འགྱུར་གྱི་གནད་དོན་མངོན་གསལ་ཐད་རང་བྱུང་སླར་གསོ་གཙོ་བོར་འཛིན་པ་དང་། དགོས་ངེས་ཀྱི་མིས་བཟོས་ཉམས་གསོ་ཡིས་རམ་འདེགས་བྱ་རྒྱུ་རྒྱུན་འཁྱོངས་བྱས་ཏེ། ནགས་ལས་འཕྲོད་སར་ནགས་ལས་དང་། རྩྭ་ལས་འཕྲོད་སར་རྩ་ལས། བྱེ་ལས་འཕྲོད་སར་བྱེ་ལས། ས་རྒོད་འཕྲོད་སར་ས་རྒོད་བཅས་བྱེད་དགོས། སྐྱེ་ཁམས་མ་ལག་ལ་གནོད་འཚེ་ཚབས་ཆེན་ཕོག་པ་དང་རང་ངོས་ལ་བརྟེན་ནས་སླར་གསོ་བྱེད་དཀའ་བའི་ས་ཁོངས་ལ་རང་འགུལ་ངང་ཚན་རིག་དང་མཐུན་པའི་མིས་བཟོས་ཉམས་གསོ་བྱེད་ཐབས་སྤྱད་དེ་སྐྱེ་ཁམས་མ་ལག་སླར་གསོ་བྱེད་པའི་འཕེལ་རིམ་མགྱོགས་སུ་གཏོང་དགོས། གྲོང་ཁྱེར་དང་ལྷག་པར་དུ་གྲོང་ཁྱེར་ཆེ་ཤོས་དང་གྲོང་ཁྱེར་ཁྱུ་ཚོགས་ཀྱིས་རང་བྱུང་སླར་གསོ་དང་མིས་བཟོས་ཉམས་གསོའི་མཉམ་འདྲེས་གཏིང་ཟབ་བྱེད་པའི་ལམ་བུ་གསར་པ་འཚོལ་ཞིབ་ཧུར་ཐག་བྱས་ཏེ། གྲོང་ཁྱེར་སྔར་བས་མཛེས་སྡུག་ལྡན་ལ་སྡོད་ས་སྐྱིད་པོ་ཞིག་ཡོང་བ་བྱེད་དགོས།

བཞི་ནི་ཕྱི་རོལ་གྱི་བཀག་རྒྱ་དང་ནང་སྐྱེས་ཀྱི་སྒུལ་ཤུགས་བར་གྱི་འབྲེལ་བ་ཡིན། སྐྱེ་ཁམས་ཁོར་ཡུག་བཟང་པོ་ནི་དྲང་སྙོམས་ཆེ་ཤོས་ཀྱི་སྤྱི་པའི་ཐོན་རྫས་དང་ཀུན་ལ་ཕན་པ་ཆེ་ཤོས་ཀྱི་དམངས་འཚོའི་བདེ་སྐྱིད་ཅིག་རེད། སྤྱི་པའི་ཐོན་རྫས་འདིའི་ཕན་ནུས་ཆེ་ཤོས་འདོན་སྤེལ་བྱས་ཏེ་མི་དམངས་མང་ཚོགས་ལ་མཛེས་སྡུག་ལྡན་པའི་ཁྱིམ་གཞིས་ནང་རང་བྱུང་ཁམས་ཀྱི་མཛེས་སྡུག་དང་། ཚེ་སྲོག་གི་མཛེས་སྡུག །འཚོ་བའི་མཛེས་སྡུག་བཅས་མཉམ་སྤྱོད་བྱེད་དུ་འཇུག་པ་དང་། ཚད་བརྒལ་བསྡུ་ལེན་དང་རང་སྣང་གང་ཤར་གྱིས་གཏོར་བཤིག་གཏོང་བར་སྔོན་འགོག་གི་མཐའ་མཚམས་གསལ་པོ་དང་ལམ་ལུགས་ནན་པོ་ཡོད་དགོས་པ་དང་། བཀོལ་སྤྱོད་ལ་ཚད་ཡོད་པ་དང་བྱ་སྤྱོད་ལ་ཚད་ཡོད་པ་བྱེད་དགོས། དེ་ནི་ཕྱི་རོལ་ཡུལ་གྱི་བཀག་རྒྱ་ནུས་ལྡན་དང་ཁ་འབྲལ་ཐབས་མེད་པ་ཞིག་རེད། སྐྱེ་ཁམས་ཁོར་ཡུག་ལ་ཚབ་བྱེད་དངོས་པོ་མེད་པས་སྤྱོད་དུས་ཚོར་རྒྱུ་མེད་ལ་ཤོར་དུས་འཚོ་ཐབས་བྲལ། དེ་ནི་དཔལ་འབྱོར་འཕེལ་རྒྱས་ཀྱི་སྤུས་ཚད་དང་འབྲེལ་བ་ཡོད་པ་མ་ཟད། མི་ཚང་མའི་འཚོ་བའི་སྤུས་ཚད་དང་ཡང་འབྲེལ་བ་ཡོད། མི་ཚང་མས་ལག་པ་འགུལ་བ་དང་། མི་ཚང་མས་རང་འགན་གཙང་སྒྲུབ་དང་། སྤྱི་ཚོགས་ཡོངས་ཀྱིས་ཐུན་མོང་ཐོག་སྐྱེ་ཁམས་ཁོར་ཡུག་ལ་སྲུང་སྐྱོབ་བྱེད་པའི་ནང་སྐྱེས་སྒུལ་ཤུགས་འཕེལ་བ་བཅས་བྱས་ན། ད་གཟོད་ཀྲུང་ཧྭའི་ས་གཞི་ཆེན་མོའི་སྟེང་གནམ་དྭངས་མོ་དང་། རི་སྔོན་པོ། ཆུ་གཙང་མ་བཅས་རྒྱུན་ཆད་མེད་པ་ཡོང་ཐུབ།

ལམ་ལུགས་ནན་ཤོས་དང་ཁྲིམས་སྐྱོང་ནན་ཤོས་ཀྱི་ཐོག་ནས་སྐྱེ་ཁམས་ཁོར་ཡུག་སྲུང་སྐྱོབ་བྱ་རྒྱུ་དེ་ངེས་པར་དུ་ཐོག་མཐའ་བར་གསུམ་དུ་རྒྱུན་འཁྱོངས་བྱས་ཏེ་རྒྱུན་རྣམ་ཅན་གྱི་ཕྱི་ཕྱོགས་གནོན་ཤུགས་མཐའ་འཁྱོངས་བྱེད་དགོས། སྐྱེ་ཁམས་ཁོར་ཡུག་གི་ཁྲིམས་སྲོལ་དང་ལམ་ལུགས་གོམ་གང་མདུན་སྤོས་ཀྱིས་འཛུགས་པ་དང་འཐུས་ཚང་དུ་གཏོང་བ་དང་། ལྟ་ཞིབ་ཤུགས་ཆེན་དང་། ཁྲིམས་བསྟར་ནན་པོ། འགན་འཁྲི་བདའ་འདེད་ནན་པོ་སོགས་ཀྱི་བྱེད་ཐབས་དང་ཉམས་མྱོང་བེད་སྤྱོད་ཡག་པོ་དང་། སྲ་བརྟན་དང་རྒྱ་སྐྱེད་ཡག་པོ་གཏོང་རྒྱུ་རྒྱུན་འཁྱོངས་བྱེད་དགོས། རིམ་ཁག་ཏང་ཨུ་དང་སྲིད་གཞུང་གི་སྐྱེ་ཁམས་ཁོར་ཡུག་སྲུང་སྐྱོབ་ཀྱི་ཆབ་སྲིད་འགན་འཁྲི་སྔར་བས་དམ་པོ་དང་ནན་པོ་ཡོང་བར་བྱེད་པ་དང་། ཀྲུང་དབྱང་གི་སྐྱེ་ཁམས་ཁོར་ཡུག་སྲུང་སྐྱོབ་ལྟ་ཞིབ་ལ་སྐུལ་འདེད་གཏིང་ཟབ་གཏོང་བ། ཁྲིམས་བསྟར་ལྟ་སྐུལ་དོ་དམ་ལ་ཤུགས་རྒྱག་པ་བཅས་བྱས་ཏེ་འགན་འཁྲི་གསལ་རྟོགས་དང་འགན་འཁྲི་གཙང་སྒྲུབ་ཏན་ཏིག་བྱེད་དགོས། ལྗང་མདོག་འཕེལ་རྒྱས་ཁྲིད་ཕྱོགས་སུ་འཛིན་པའི་ཚན་རིག་དང་མཐུན་པའི་དཔྱད་ཞིབ་གདེང་འཇོག་མ་ལག་འཛུགས་པ་དང་འཐུས་ཚང་དུ་གཏོང་བ་དང་། སྐྱེ་ཁམས་སྲུང་སྐྱོབ་ཁ་གསབ་ལམ་ལུགས་དང་སྐྱེ་ཁམས་ཐོན་རྫས་ཀྱི་རིན་ཐང་མངོན་འགྱུར་ལམ་སྲོལ་འཐུས་ཚང་དུ་བཏང་སྟེ། སྲུང་སྐྱོབ་བྱེད་མཁན་དང་ལེགས་སྐྱེས་འབུལ་མཁན་ལ་ཕན་འབྲས་ངོ་མ་འཐོབ་པར་བྱེད་དགོས། ཐོན་ཁུངས་ཁོར་ཡུག་གི་བདག་རྐྱེན་ཚོང་ར་ཅན་དུ་བགོ་སྒྲིག་བྱེད་པའི་མ་ལག་སྔར་ལས་འཐུས་ཚང་དུ་གཏོང་བ་དང་། ལྗང་མདོག་གི་ནོར་སྲིད་དཔྱ་ཁྲལ་དང་དངུལ་རྩའི་སྲིད་ཇུས་བེད་སྤྱོད་ལེགས་པོ་བྱས་ཏེ། གཉེར་སྐྱོང་བྱེད་པོ་ལ་སྐྱེ་ཁམས་ཁོར་ཡུག་སྲུང་སྐྱོབ་བྱེད་པའི་ཁྲོད་དུ་ལུགས་མཐུན་གྱི་ཐོབ་ཆ་རག་ཏུ་འཇུག་དགོས། སྐྱེ་ཁམས་དཔལ་ཡོན་གྱི་འདུ་ཤེས་དར་སྤེལ་དང་སྐྱེ་ཁམས་རིག་གནས་སྐྱེད་སྲིང་བྱས་ཏེ་ལྗང་མདོག་ཐཱན་ཉུང་གི་འཚོ་བ་སྐྱེལ་སྟངས་གོམས་སྲོལ་དུ་ཆགས་པར་བྱེད་དགོས།

ལྔ་ནི་“ཐཱན་ཟུང་”གི་ཁས་ལེན་དང་རང་བརྟེན་བྱ་སྤྱོད་བར་གྱི་འབྲེལ་བ་ཡིན། ཐཱན་རྩེར་སོན་དང་ཐཱན་སྙོམ་སྦྱོར་ལ་སྐུལ་འདེད་གཏོང་རྒྱུ་ནི་ཏང་ཀྲུང་དབྱང་གིས་བསམ་བློ་བཞི་གསུམ་བཅུ་གཉིས་བཏང་རྗེས་གཏན་ལ་ཕབ་པའི་འཐབ་ཇུས་ཀྱི་ཇུས་གཅོད་གལ་ཆེན་ཞིག་ཡིན་པ་དང་། ང་ཚོས་རྒྱལ་སྤྱིའི་སྤྱི་ཚོགས་ལ་བཞག་པའི་བརྗིད་ཉམས་ལྡན་པའི་དམ་བཅའ་ཞིག་ཀྱང་ཡིན་ལ། དཔལ་འབྱོར་གྲུབ་ཚུལ་ཕྱོགས་བསྒྱུར་རིམ་སྤོར་ལ་སྐུལ་འདེད་གཏོང་བ་དང་། ལྗང་མདོག་ཐཱན་ཉུང་གི་ཐོན་ལས་ཀྱི་འགྲན་རྩོད་དགེ་མཚན་ཆགས་པར་བརྟེན་ནས་སྤུས་ཚད་མཐོ་བའི་འཕེལ་རྒྱས་མངོན་འགྱུར་བྱེད་པའི་ནང་སྐྱེས་ཀྱི་བླང་བྱ་ཞིག་ཀྱང་ཡིན། དེ་ནི་གཞན་གྱིས་ང་ཚོར་སྒྲུབ་ཏུ་བཅུག་པ་མ་ཡིན་པར་ང་ཚོ་རང་ཉིད་ཀྱིས་ངེས་པར་དུ་བསྒྲུབ་དགོས་པ་ཞིག་རེད། ང་ཚོས་ཁས་བླངས་པའི་“ཐཱན་ཟུང་”གི་དམིགས་འབེན་ནི་འགྱུར་བ་མེད་པ་གཏན་འཁེལ་བྱས་ཡོད་མོད། འོན་ཀྱང་དམིགས་འབེན་འདི་འགྲུབ་པར་བྱེད་པའི་ཐབས་ལམ་དང་བྱེད་སྟངས། མྱུར་ཚད། ཤུགས་ཚད་བཅས་ནི་ང་ཚོ་རང་ཉིད་ཀྱིས་ཐག་གཅོད་བྱེད་དགོས་ལ་ངེས་པར་དུ་བྱེད་ཐུབ་ཀྱང་དགོས་པ་ལས་གཞན་དབང་དུ་འགྱུར་མི་རུང་།

ཐཱན་རྩེར་སོན་དང་ཐཱན་སྙོམ་སྦྱོར་མངོན་འགྱུར་བྱ་རྒྱུ་ནི་སྒུག་མི་རུང་ལ་བྲེལ་བ་ཡང་འཚུབ་མི་རུང་བ་ཞིག་ཡིན་ལ། འཐབ་ཐེངས་གཅིག་གིས་རྣམ་པར་རྒྱལ་བ་ཡོང་མི་སྲིད་པས། ངེས་པར་དུ་བརྟན་ཐོག་ཡར་འཕེལ་དང་རིམ་གྱིས་མངོན་འགྱུར་ཡོང་རྒྱུ་རྒྱུན་འཁྱོངས་བྱེད་དགོས་པ་ལས། “ཐཱན་གདོང་མཆོང་”དང་“འགུལ་སྐྱོད་རྣམ་པའི་ཐཱན་ཉུང་གཏོང་”སོགས་གཏན་ནས་བྱེད་མི་རུང་། རྒྱལ་ཁབ་ཀྱི་གནས་ཚུལ་ལ་གཞི་ཚུགས་པ་དང་སྔོན་འཛུགས་རྗེས་གཏོར་རྒྱུན་འཁྱོངས་བྱས་ཏེ་ནུས་རྒྱུའི་མ་ལག་གསར་པ་མགྱོགས་མྱུར་འཆར་འགོད་དང་འཛུགས་སྐྲུན་བྱས་ནས་ནུས་རྒྱུའི་བདེ་འཇགས་ཁག་ཐེག་བྱེད་དགོས། ཐོན་ལས་ཀྱི་གྲུབ་ཚུལ་ལེགས་སྒྱུར་དང་། ལྗང་མདོག་ཐཱན་ཉུང་གི་ཐོན་ལས་འཕེལ་རྒྱས་ཤུགས་ཆེན་བཏང་སྟེ། འཕེལ་རྒྱས་དེ་ཐོན་ཁུངས་བེད་སྤྱོད་གོ་འཕེར་དང་། སྐྱེ་ཁམས་ཁོར་ཡུག་སྲུང་སྐྱོབ་ནན་པོ། དྲོད་ཁང་རླངས་གཟུགས་འབུད་ཚད་ཚོད་འཛིན་ནུས་ལྡན་བཅས་བྱེད་པའི་རྨང་གཞིའི་ཐོག་འཛུགས་དགོས། སྲོལ་རྒྱུན་ལས་རིགས་དེ་སྟབས་བདེའི་ངང་“དམའ་རིམ་ཐོན་ལས་”ཤིག་ཏུ་བརྩིས་ནས་ཁ་ཡ་མི་བྱེད་མི་རུང་བར། བཟོ་རྩལ་དང་། ལག་རྩལ། སྒྲིག་ཆས་སོགས་རིམ་སྤོར་བྱེད་པར་སྐུལ་འདེད་བཏང་ནས་ལྗང་མདོག་ཐཱན་ཉུང་གི་རིགས་བསྒྱུར་མངོན་འགྱུར་ཡོང་བ་བྱེད་དགོས། སྔར་ལས་དགེ་མཚན་ལྡན་པའི་སྤྱོད་ཚུལ་ཐོག་ནས་གོ་ལ་ཧྲིལ་པོའི་གནམ་གཤིས་བཅོས་སྐྱོང་ནང་ཞུགས་ཏེ་སྔར་བས་རང་འགུལ་དང་ཕན་ནུས་ལྡན་པའི་རྣམ་པ་གསར་པ་ཞིག་ཆགས་པ་བྱེད་དགོས།

གནམ་ལྷ་རྒྱལ་གྱིས་བསྒྱུར།