རྨོ་ཞིང་སྲུང་སྐྱོབ་ལ་ཤུགས་ཏན་ཏིག་བརྒྱབ་ནས་ས་ཞིང་བ་ཚྭ་ཅན་ཕྱོགས་བསྡུས་བསྒྱུར་བཀོད་བེད་སྤྱོད་གཏོང་རྒྱུ་དམ་འཛིན་ཡག་པོ་བྱེད་དགོས།

དེ་རིང་ཀྲུང་དབྱང་ནོར་སྲིད་དཔལ་འབྱོར་ཨུ་ཡོན་ལྷན་ཁང་གིས་རྨོ་ཞིང་སྲུང་སྐྱོབ་དང་ས་ཞིང་བ་ཚྭ་ཅན་ཕྱོགས་བསྡུས་བསྒྱུར་བཀོད་བེད་སྤྱོད་ཤུགས་ཆེར་གཏོང་བའི་གནད་དོན་ལ་ཞིབ་འཇུག་བྱ་རྒྱུ་རེད། གཤམ་ལ་ངས་བསམ་འཆར་འགའ་འདོན་རྒྱུ་ཡིན།

དང་པོ། རྨོ་ཞིང་སྲུང་སྐྱོབ་བྱེད་ཤུགས་ཆེ་རུ་གཏོང་བའི་གལ་ཆེའི་རང་བཞིན་དང་མྱུར་མཁོའི་རང་བཞིན་ལ་ངོས་འཛིན་གཏིང་ཟབ་བྱེད་དགོས།

འབྲུ་རིགས་བདེ་འཇགས་ནི་“རྒྱལ་ཁབ་ཀྱི་དོན་ཆེན་”ཡིན་པ་དང་། རྨོ་ཞིང་ནི་འབྲུ་རིགས་ཐོན་སྐྱེད་ཀྱི་སྲོག་རྩ་ལྟ་བུ་ཡིན། ང་ཚོའི་ཏང་གིས་ཐོག་མཐའ་བར་གསུམ་དུ་རྨོ་ཞིང་སྲུང་སྐྱོབ་གནད་དོན་ལ་ཚད་མཐོའི་མཐོང་ཆེན་བྱེད་ཀྱི་ཡོད། ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། ཏང་ཀྲུང་དབྱང་གིས་སྔ་རྗེས་སུ་ཞིང་ཁའི་ཆུ་བེད་ལས་གྲྭ་གཙོ་བོ་དང་། ཚད་གཞི་མཐོ་བའི་ཞིང་ཁའི་འཛུགས་སྐྲུན་ལས་གྲྭ། ཞིང་ས་ནག་པོ་སྲུང་སྐྱོབ་ལས་གྲྭ། རྨོ་ཞིང་གི་སྦགས་བཙོག་བཅོས་སྐྱོང་དང་ཉམས་གསོའི་ལས་གྲྭ་སོགས་ལག་བསྟར་བྱས་པ་དང་། རྨོ་ཞིང་དང་ཡུན་གཏན་གྱི་གཞི་རྩའི་ས་ཞིང་གཉིས་ཀྱི་སྲུང་སྐྱོབ་དམར་ཐིག་གཏན་འཁེལ་བྱས་ཤིང་། ཞིང་ཆེན་རིམ་པའི་ཏང་ཨུ་དང་སྲིད་གཞུང་གིས་རྨོ་ཞིང་སྲུང་སྐྱོབ་དོན་འཁྱོལ་བྱེད་པའི་འགན་འཁྲིའི་ལམ་ལུགས་བཙུགས། བྱེད་ཐབས་བརྟན་པོ་རབ་དང་རིམ་པ་དེ་དག་གིས་རྨོ་ཞིང་གི་དམར་ཐིག་བརྟན་སྲུང་ཐུབ་པ་དང་རྨོ་ཞིང་གི་སྤྱི་འབོར་རྒྱུན་མཐུད་མར་ཆག་པའི་འགྲོ་ཕྱོགས་བཀག་འགོག་བྱས་ཐུབ་ཡོད།

དུས་མཚུངས་སུ་ངོས་འཛིན་གསལ་པོ་བྱེད་དགོས་པ་ཞིག་སྟེ། རང་རྒྱལ་གྱི་མི་འབོར་མང་ལ་ས་ཞིང་ཉུང་བའི་རྒྱལ་ཁབ་ཀྱི་གནས་ཚུལ་ལ་འགྱུར་ལྡོག་བྱུང་མེད་པ་དང་། རྨོ་ཞིང་“ཞིང་ལས་མིན་པར་སྒྱུར་བ་”དང་“འབྲུ་རིགས་མིན་པར་སྒྱུར་བའི་”གནད་དོན་སྔར་བཞིན་འབུར་ཐོན་ཡིན་པ། རྨོ་ཞིང་བེད་མེད་དུ་འཇོག་གྲངས་མང་དུ་སོང་བ། རྨོ་ཞིང་བདག་བཟུང་དང་ཁ་གསབ་ཀྱི་དོ་མཉམ་ཚད་མི་འདང་བ་དང་སྤུས་ཚད་མི་མཐོ་བའི་གནད་དོན་ལྡན་པ། རྨོ་ཞིང་གི་དམར་ཐིག་སྲུང་བའི་རྨང་གཞི་ད་དུང་བརྟན་པོ་ཞིག་བཏིང་མེད་པ་བཅས་རེད། ཞིང་ཁའི་ཆུ་བེད་ཐད་ད་དུང་བུ་ལོན་མང་པོ་ཡོད་པ་དང་། ས་ཆ་འགའ་ཞིག་ཏུ་ས་ཆུ་ཤོར་བ་དང་། ས་འོག་གི་ཆུ་སྔོག་འདོན་ཚད་ལས་བརྒལ་བ། ས་རྒྱུ་ཞན་དུ་སོང་བ། ཞིང་ལས་ཀྱི་ངོས་འབྱུང་སྦགས་བཙོག་ཚབས་ཆེར་སོང་བ་བཅས་རེད། དུས་རབས་གསར་པ་དང་འཐབ་ལམ་གསར་པའི་ཐོག་རྨོ་ཞིང་སྲུང་སྐྱོབ་ལས་འགན་ཇེ་ཡང་དུ་ཕྱིན་མེད་པར་སྔར་བས་ཇེ་ལྗིད་དུ་ཕྱིན་ཡོད།

གཉིས་པ། རྨོ་ཞིང་སྲུང་སྐྱོབ་བྱེད་ཤུགས་ཆེ་རུ་གཏོང་བའི་སྤྱིའི་བསམ་བཀོད་དང་འགག་རྩའི་བྱེད་ཐབས།

རྨོ་ཞིང་སྲུང་སྐྱོབ་བྱ་རྒྱུ་ནི་མ་ལག་ལྡན་པའི་ལས་དོན་ཞིག་ཡིན། མིག་སྔར། གྲངས་འབོར་དང་སྤུས་ཚད་གལ་ཆེ་མཉམ་འཛིན་དང་། ཁྲིམས་བསྟར་ནན་མོ། མ་ལག་ལྡན་པར་སྐུལ་འདེད། རྒྱུན་མཐུད་བེད་སྤྱོད་སོགས་ཀྱི་བླང་བྱ་གལ་ཆེན་མངོན་གསལ་དོད་པོས་ཁོང་དུ་ཆུད་པ་བྱེད་དགོས།

——གྲངས་འབོར་དང་སྤུས་ཚད་གལ་ཆེ་མཉམ་འཛིན་ཞེས་པ་ནི་རྨོ་ཞིང་སྲུང་སྐྱོབ་བྱེད་པར་གྲངས་འབོར་འགན་ལེན་བྱེད་དགོས་ལ་སྤུས་ཚད་ཀྱང་མཐོ་རུ་གཏོང་དགོས། ཡུན་གཏན་གྱི་གཞི་རྩའི་ས་ཞིང་མིང་དོན་མཚུངས་དགོས་ལ་ངེས་པར་དུ་ཐོན་འབབ་བརྟན་པོ་དང་ཐོན་འབབ་འབེལ་པོའི་ས་ཞིང་ལེགས་པོ་ཡིན་དགོས། རྨོ་ཞིང་བདག་བཟུང་དང་ཁ་གསབ་དོ་མཉམ་ཡོང་བ་བྱ་རྒྱུ་དེ་སྟབས་བདེའི་གྲངས་འབོར་དོ་མཉམ་ཡོང་རྒྱུར་བརྩི་མི་རུང་བར། ངེས་པར་དུ་སྤུས་ཚད་དོ་མཉམ་དང་ཐོན་ནུས་དོ་མཉམ་ཡོང་བ་བྱེད་དགོས་པ་ལས་“གསེར་དང་རག་བརྗེ་རེས་བྱེད་པ་”ལྟ་བུའི་གཡོ་ཐབས་སྤྱོད་མི་རུང་།

——ཁྲིམས་བསྟར་ནན་མོ་ཞེས་པ་ནི་རྨོ་ཞིང་སྲུང་སྐྱོབ་ལམ་ལུགས་ནན་ཤོས་ལག་ལེན་བསྟར་ནས་“སོ་སྐྱེས་ཡོད་པ་”ལྟ་བུའི་བྱེད་ཐབས་སྤྱད་དེ་རྨོ་ཞིང་སྲུང་སྐྱོབ་བྱེད་དགོས། རིམ་པ་བགོས་ཏེ་ཏང་ཨུ་དང་སྲིད་གཞུང་རིམ་པ་ཁག་གི་འགན་འཁྲི་དོན་འཁྱོལ་དང་། ལྟ་སྐུལ་དོ་དམ་གྱི་ཁྲིམས་བསྟར་སྟོབས་ཤུགས་བསྡུ་སྒྲིལ་བྱས་ནས་བསྒྲིལ་ཤུགས་ཆགས་པར་བྱེད་དགོས།

——མ་ལག་ལྡན་པར་སྐུལ་འདེད་ཅེས་པ་ནི་རྨོ་ཞིང་སྲུང་སྐྱོབ་བྱ་རྒྱུ་དེ་མི་དང་རང་བྱུང་ཁམས་ཞི་མཐུན་མཉམ་གནས་ཀྱི་ཀྲུང་གོའི་ལུགས་ཀྱི་དེང་རབས་ཅན་གྱི་ཁྲོད་དུ་བཞག་ནས་བསམ་བློ་གཏོང་བ་དང་། གཙོ་ནུས་ཐོན་ཁུལ་འཐབ་ཇུས་དོན་འཁྱོལ་ཡག་པོ། རི་ཆུ་ནགས་ཞིང་དང་མཚེའུ་རྩྭ་བྱེ་བཅས་གཞི་གཅིག་ཅན་གྱི་སྲུང་སྐྱོབ་དང་མ་ལག་ལྡན་པར་བཅོས་སྐྱོང་བྱ་རྒྱུ་རྒྱུན་འཁྱོངས་བཅས་བྱེད་དགོས།

——རྒྱུན་མཐུད་བེད་སྤྱོད་ཅེས་པ་ནི་མིག་སྔར་དང་ཡུན་རིང་གི་འབྲེལ་བ་ཐག་གཅོད་ཡག་པོ་བྱས་ནས་དེང་རབས་ཀྱི་མིར་བསམ་བློ་གཏོང་དགོས་པ་མ་ཟད། མི་རབས་རྗེས་མ་ལ་ཡང་འགན་འཁུར་ཏེ་མི་རབས་ནས་མི་རབས་བར་རྨོ་འདེབས་བྱེད་པའི་ས་ཞིང་སྲུང་སྐྱོབ་ལེགས་པོ་དང་མཐོར་འདེགས་ལེགས་པོ་བཏང་སྟེ། མི་རབས་རྗེས་མར་འཕེལ་རྒྱས་ཀྱི་བར་སྟོང་སྔར་ལས་མང་བ་འཇོག་དགོས།

རྨོ་ཞིང་ཞེས་པའི་སྲོག་རྩ་འདི་སྲུང་དགོས་ན་ངེས་པར་དུ་འགག་རྩའི་བྱེད་ཐབས་འགའ་སྤྱོད་དགོས།

གཅིག་ནི་རྨོ་ཞིང་སྲུང་སྐྱོབ་ཀྱི་འགན་འཁྲི་ནན་དུ་གཏོང་དགོས། རེས་སྐོར་གསར་པའི་རྒྱལ་ཁོངས་བར་སྟོང་འཆར་འགོད་ནང་ས་གནས་ཁག་གི་རྨོ་ཞིང་དང་ཡུན་གཏན་གྱི་གཞི་རྩའི་ས་ཞིང་སྲུང་སྐྱོབ་ཀྱི་ལས་འགན་ཁ་གསལ་བཟོས་པ་མ་ཟད། དོན་འཁྱོལ་ཡང་བྱས་ཐུབ་ཡོད། ཞིང་ཆེན་རིམ་པའི་ཏང་ཨུ་དང་སྲིད་གཞུང་གིས་འགན་འཁྲི་ཕྲག་ཐོག་ཏུ་འཁུར་ནས་རྨོ་ཞིང་མུའུ་དུང་ཕྱུར་18ཀྱི་དམར་ཐིག་ལས་མི་བརྒལ་བའི་འགན་ལེན་བྱས། འབྲེལ་ཡོད་སྡེ་ཁག་གིས་དཔྱད་ཞིབ་དང་འགན་འཁྲི་བདའ་འདེད་ནན་པོ་བྱེད་དགོས་པ་ལས་ཟ་ཟིར་བྱེད་མི་རུང་།

གཉིས་ནི་རྨོ་ཞིང་གི་སྤུས་ཚད་ནུས་ཤུགས་ཡོད་རྒུས་མཐོ་རུ་གཏོང་དགོས། ཏང་གི་ཚོགས་ཆེན་ཉི་ཤུ་པའི་ཐོག་ཡུན་གཏན་གྱི་གཞི་རྩའི་ས་ཞིང་ཡོངས་རྫོགས་རིམ་པ་བཞིན་དུ་ཚད་གཞི་མཐོ་བའི་ས་ཞིང་སྐྲུན་དགོས་ཞེས་བཏོན་ཡོད། བྱེ་བྲག་གི་ལག་བསྟར་ཇུས་གཞི་མགྱོགས་སུ་བཏོན་ནས་འཛུགས་སྐྲུན་གྱི་ནང་དོན་དང་འཇོག་བྱའི་ཚད་གཞི་ཁ་གསལ་བཟོས་ཏེ་ཡུན་གཏན་གྱི་གཞི་རྩའི་ས་ཞིང་མུའུ་དུང་ཕྱུར་15.46དེ་རྨོ་འདེབས་བྱེད་པར་འཚམ་པ་དང་། ཐན་ཞོད་གང་བྱུང་ཡང་ལོ་ཏོག་བསྡུ་རྒྱུ་ཡོད་པ། ཐོན་འབབ་འབེལ་པོ་དང་ཐོན་འབབ་བརྟན་པོ་ཡིན་པའི་དེང་རབས་ཅན་གྱི་ཞིང་ས་བཟང་པོར་དངོས་སུ་སྐྲུན་དགོས། རྨོ་ཞིང་གི་སྤུས་ཚད་སྲུང་སྐྱོབ་ཀྱི་ཁྲིམས་འཛུགས་མགྱོགས་སུ་གཏོང་བ་དང་། ས་ནག་པོ་སྲུང་སྐྱོབ་ལས་གྲྭ་ལག་བསྟར་བྱེད་པ། སྐྱུར་འགྱུར་སོགས་ཞན་འགྱུར་རྨོ་ཞིང་བཅོས་སྐྱོང་ལ་ཤུགས་རྒྱག་པ། རྨོ་ཞིང་གི་སྐྱེ་ལྡན་བཅུད་རྫས་མཐོ་རུ་གཏོང་བའི་བྱ་སྤྱོད་ལག་བསྟར་བཅས་བྱེད་དགོས། ཀྲུང་དབྱང་དང་ས་གནས་ནོར་སྲིད་ཀྱིས་རྨོ་ཞིང་གི་སྤུས་ཚད་མཐོ་རུ་གཏོང་བར་མ་དངུལ་གྱི་འགན་ལེན་བྱེད་པ་དང་ཆབས་ཅིག་ལྟ་སྐུལ་དོ་དམ་ལ་ཤུགས་བརྒྱབ་ནས་དངུལ་རྨོ་ཞིང་ཐོག་ཏུ་སྤྱོད་རྒྱུའི་འགན་ལེན་བྱེད་དགོས།

གསུམ་ནི་རྨོ་ཞིང་བདག་བཟུང་དང་ཁ་གསབ་དོ་མཉམ་བྱེད་པའི་ལམ་ལུགས་བསྒྱུར་བཅོས་དང་འཐུས་ཚང་དུ་གཏོང་དགོས། རྨོ་ཞིང་བདག་བཟུང་དང་ཁ་གསབ་དོ་མཉམ་ནང་རྨོ་ཞིང་གི་གྲངས་འབོར་དང་སྤུས་ཚད་ཁ་གསབ་གནད་འཁེལ་མ་བྱུང་བའི་རྩ་བ་ནི་ལམ་ལུགས་ཀྱི་སྐྱོན་ཆ་རེད། ཞིང་ལས་མ་ཡིན་པའི་འཛུགས་སྐྲུན་དང་། ཞིང་ལས་ཀྱི་གྲུབ་ཚུལ་ལེགས་སྒྲིག ། ནགས་ཚལ་དང་ལྗོན་ཤིང་འཛུགས་པ་སོགས་རྨོ་ཞིང་བེད་སྤྱད་པ་སྣ་ཚོགས་གཅིག་གྱུར་ཐོག་བདག་བཟུང་དང་ཁ་གསབ་དོ་མཉམ་གྱི་དོ་དམ་ནང་འཇུག་དགོས། “ཁ་གསབ་ལ་བརྟེན་ནས་བདག་བཟུང་གཏན་འཁེལ་བྱ་རྒྱུ་”རྒྱུན་འཁྱོངས་བྱས་ཏེ། ལོ་གོང་མའི་ནང་གསར་འཕར་བྱུང་བའི་རྨོ་ཞིང་གི་གྲངས་འབོར་དེ་ལོ་རྗེས་མར་རྨོ་ཞིང་བཟུང་བའི་ཆོག་མཆན་གྱི་སྔོན་འགྲོའི་ཆ་རྐྱེན་དུ་བརྩི་དགོས། ས་ཞིང་གཤིན་པོ་མུའུ་1བཟུང་ནས་ས་ཞིང་ཞན་པ་མུའུ་1ཁ་གསབ་བྱེད་མི་ཆོག་པ་དང་། ས་ཞིང་ཧྲིལ་པོ་མུའུ་1བཟུང་ནས་ས་ཞིང་ཐ་ཐོར་མུའུ་1ཁ་གསབ་བྱེད་མི་རུང་། རྨོ་ཞིང་ཁ་གསབ་བྱེད་པའི་སྤུས་ཚད་ཞིབ་བཤེར་རྩིས་ལེན་ལམ་ལུགས་འཐུས་ཚང་དུ་གཏོང་བ་དང་། བཙན་པོའི་ངོ་བོ་ཅན་གྱི་བཀག་སྡོམ་བྱེད་ཤུགས་ཆེ་རུ་བཏང་སྟེ། རྗེས་མཐུད་ཀྱི་དོ་དམ་སྲུང་སྐྱོབ་དང་ཡང་བསྐྱར་གདེང་འཇོག་བྱེད་པ་སོགས་ཀྱི་ལམ་སྲོལ་འཐུས་ཚང་དུ་གཏོང་དགོས།

བཞི་ནི་ཞིང་པ་དང་ས་གནས་སྲིད་གཞུང་གིས་རྨོ་ཞིང་སྲུང་སྐྱོབ་དང་། འབྲུ་རིགས་འདེབས་པ་དང་འབྲུ་རིགས་དམ་འཛིན་བྱེད་པའི་ཧུར་སེམས་སྐུལ་སློང་བྱེད་དགོས། རྨོ་ཞིང་“ཞིང་ལས་མིན་པར་སྒྱུར་བ་”དང་“འབྲུ་རིགས་མིན་པར་སྒྱུར་བའི་”རྒྱུ་རྐྱེན་གཙོ་བོ་ཞིག་ནི་ཞིང་ལས་སྤྱི་དང་ལྷག་པར་དུ་འབྲུ་རིགས་འདེབས་འཛུགས་ཀྱི་ཞིབ་བསྡུར་ཡོང་འབབ་ཅུང་ཉུང་བ་དེ་རེད། འབྲུ་འདེབས་ཞིང་པའི་ཡོང་འབབ་འགན་སྲུང་ལམ་སྲོལ་འཐུས་ཚང་དུ་གཏོང་དགོས། དེང་རབས་ཅན་དང་ཞིབ་བསྡུས་ཅན་གྱི་ཞིང་ལས་འཕེལ་རྒྱས་ལ་སྐུལ་འདེད་གཏོང་བ་དང་། རྣམ་པ་མང་བའི་གཞི་ཁྱོན་འོས་འཚམ་གྱི་གཉེར་སྐྱོང་འཕེལ་རྒྱས་གཏོང་བ། ཐོན་སྐྱེད་ཀྱི་ལས་ཕྱོད་ཆེ་རུ་གཏོང་བ། འབྲུ་རིགས་འདེབས་འཛུགས་ཀྱི་ཞིབ་བསྡུར་ཡོང་འབབ་ཆེ་རུ་གཏོང་བ་བཅས་བྱས་ཏེ། ཞིང་པའི་རྨོ་ཞིང་སྲུང་སྐྱོབ་དང་འབྲུ་རིགས་འདེབས་པའི་ཧུར་སེམས་སྐུལ་སློང་བྱེད་དགོས། འབྲུ་རིགས་གཙོ་ཐོན་ཁུལ་གྱི་ཁེ་ཕན་ཁ་གསབ་ལམ་སྲོལ་འཐུས་ཚང་དུ་གཏོང་བ་དང་། ས་གནས་སྲིད་གཞུང་གིས་རྨོ་ཞིང་སྲུང་སྐྱོབ་དང་འབྲུ་རིགས་ཐོན་སྐྱེད་ལ་དམ་འཛིན་བྱེད་པའི་ཧུར་སེམས་སྐུལ་སློང་བྱས་ཏེ། འབྲུ་རིགས་གཙོ་ཐོན་ཁུལ་དང་། གཙོ་ཚོང་ཁུལ། ཐོན་ཚོང་དོ་མཉམ་ཁུལ་བཅས་ཀྱི་རྨོ་ཞིང་སྲུང་སྐྱོབ་བྱེད་པའི་བསྒྲིལ་ཤུགས་ཆགས་པར་བྱེད་དགོས།

ད་རུང་ས་རྒོད་བཅོས་སྐྱོང་གི་གནད་དོན་ཐད་ལ་ནན་བཤད་བྱེད་དགོས། མ་གྲངས་གསལ་རྟོགས་བྱས་ཏེ་ས་རྒོད་བེད་སྤྱོད་བྱ་རྒྱུར་རིགས་བགོས་ནས་སྐུལ་འདེད་གཏོང་དགོས། རྨོ་འདེབས་བྱེད་མཁན་མེད་རིགས་རྣམས་ལ་ས་ཞིང་ཚབ་གཉེར་དང་ཚབ་འདེབས་ཚབ་རྨོ་སོགས་ཀྱི་བྱེད་ཐབས་བཀོལ་ནས་ས་ཞིང་འདེབས་མཁན་ཡོད་པ་འགན་ལེན་བྱེད་དགོས། ལོ་ཏོག་ལེགས་པོ་འདེབས་མི་ཐུབ་པའི་ས་ཞིང་རིགས་ལ་ཆུ་བེད་སྒྲིག་བཀོད་འཛུགས་སྐྲུན་དང་། ས་ཞིང་ཟླ་སྒྲིལ་ལེགས་སྒྲིག །ས་རྒྱུའི་གཤིན་ཚད་ལེགས་གསོ་སོགས་ཀྱི་བྱེད་ཐབས་བཀོལ་ནས་རྨོ་འདེབས་ཀྱི་ཆ་རྐྱེན་ལེགས་སུ་བཏང་སྟེ་ཐོན་སྐྱེད་སླར་གསོ་གང་མགྱོགས་བྱེད་དགོས། དངོས་གནས་རྨོ་འདེབས་བྱེད་མི་འོས་པའི་རིགས་ཡིན་ན་ཆ་རྐྱེན་ལ་གཞིགས་ཏེ། འབྲུ་རིགས་ལ་འཚམ་ན་འབྲུ་རིགས་དང་དཔལ་འབྱོར་ལོ་ཏོག་ལ་འཚམ་ན་དཔལ་འབྱོར་ལོ་ཏོག་འདེབས་འཛུགས་བྱས་ནས་སྣ་མང་ཅན་གྱི་བཟའ་ཆས་མཁོ་སྤྲོད་བྱེད་རྒྱ་ཆེ་རུ་གཏོང་དགོས། གྲོང་ཚོ་ཐུན་མོང་གི་བར་འདུམ་ཞབས་ཞུ་དང་གཅིག་གྱུར་གྱིས་གཉེར་སྐྱོང་བྱེད་པའི་ནུས་པ་འདོན་སྤེལ་བྱེད་པར་མཐོང་ཆེན་བྱས་ཏེ། ཡུལ་བབ་དང་མཐུན་པའི་སྒོ་ནས་ས་རྒོད་བསྐྱུར་བའི་ས་ཞིང་ཡག་པོ་འཛུགས་པ་དང་བེད་སྤྱོད་ཡག་པོ་བྱེད་དགོས།

ལྔ་ནི་སྲོལ་རྒྱུན་མ་ཡིན་པའི་རྨོ་ཞིང་ཐོན་ཁུངས་སྣ་ཚོགས་གསར་སྤེལ་ཧུར་ཐག་བྱེད་དགོས། ཚན་རྩལ་ཟམ་མི་འཆད་པར་འཕེལ་རྒྱས་འགྲོ་བ་དང་ཆབས་ཅིག་ཏུ་ཞིང་ལས་ཐོན་སྐྱེད་དང་ས་ཞིང་བར་གྱི་འབྲེལ་བར་འགྱུར་ལྡོག་གཏིང་ཟབ་འབྱུང་གི་ཡོད། རྣམ་པ་ངེས་ཅན་གྱི་ལག་རྩལ་བསྒྱུར་བཀོད་དང་སྒྲིག་བཀོད་འཛུགས་སྐྲུན་བྱས་པ་བརྒྱུད། སྔོན་ཆད་ཞིང་ལས་ཐོན་སྐྱེད་ལ་སྤྱོད་མི་ཐུབ་པའི་ས་ཆ་མང་པོ་ཞིག་ཀྱང་ཞིང་ལས་ཐོན་སྐྱེད་ལ་སྤྱད་ཐུབ་ཚེ། རང་རྒྱལ་གྱི་སྲོལ་རྒྱུན་རྨོ་ཞིང་དཀོན་པའི་རང་བྱུང་ཆ་རྐྱེན་གྱི་ཚད་བཀག་ལས་བརྒལ་ཐུབ། དཔེར་ན། ས་ཞིང་བ་ཚྭ་ཅན་བསྒྱུར་བཀོད་བྱས་ཏེ་བེད་སྤྱོད་བྱ་རྒྱུ་ལྟ་བུ་དང་། ཡང་དཔེར་ན། སྒྲིག་བཀོད་གསར་པའི་ཞིང་ལས་འཕེལ་རྒྱས་དང་། བཟོ་གྲྭ་ཅན་གྱི་ཞིང་ལས་ཐོན་སྐྱེད་སྤེལ་བ། གྲོང་ཁྱེར་དུ་སྔོ་ཚལ་རྨོ་ཆོག་ལ་ཐང་རྒོད་དང་བྱེ་ཐང་ཡང་བཀོལ་སྤྱོད་བྱེད་ཆོག །དེའི་ཐད་ཞིན་ཅང་དང་ཀན་སུའུ་སོགས་ཀྱི་ས་ཆར་ལེགས་འགྲུབ་བྱུང་བའི་དཔེ་མཚོན་ཡོད། ཚན་རྩལ་ཞིབ་འཇུག་གསར་སྤེལ་དང་ཐོན་སྐྱེད་མ་འཇོག་ལ་ཤུགས་རྒྱག་པ་དང་། འཕེལ་རྒྱས་གཏོང་སྟངས་ནུས་ལྡན་འཚོལ་ཞིབ་བྱས་ཏེ། “འབྲུ་རིགས་ས་ཞིང་ལ་བརྟེན་རྒྱུ་”དེ་“འབྲུ་རིགས་ལག་རྩལ་ལ་བརྟེན་རྒྱུ་”དང་ཟུང་འབྲེལ་བྱས་ཏེ། སྲོལ་རྒྱུན་མ་ཡིན་པའི་རྨོ་ཞིང་ཐོན་ཁུངས་སྣ་ཚོགས་སྤྱད་དེ་ཞིང་ལས་ཐོན་སྐྱེད་བྱེད་དགོས།

ཉེ་བའི་དུས་སྐབས་ཤིག་གི་རིང་ལ་ཕྱོགས་གང་ཅིའི་ཐད་ནས་རྨོ་ཞིང་སྲུང་སྐྱོབ་དམ་འཛིན་བྱེད་པའི་ཧུར་སེམས་མངོན་གསལ་དོད་པོས་ཆེ་རུ་ཕྱིན་ཡོད་མོད། འོན་ཀྱང་འཕྲལ་མར་འགྲུབ་རེ་བྱེད་པའི་ཕྱོགས་ལྷུང་འགའ་ཞིག་ཀྱང་བྱུང་ཡོད། རྨོ་ཞིང་སྲུང་སྐྱོབ་བྱེད་པར་ཁྲིམས་བསྟར་ནན་པོ་བྱས་ནས་ཁྲིམས་འགལ་སྒྲིག་འགལ་ངང་རྨོ་ཞིང་བཟུང་སྤྱོད་བྱེད་པའི་བྱ་སྤྱོད་ལ་རྡུང་རྡེག་ཚ་ནན་གཏོང་དགོས་མོད། འོན་ཀྱང་དཀར་ནག་དབྱེ་བ་མི་འབྱེད་པར་ཕར་ཚུར་“འཐེན་རེས་”བྱེད་མི་རུང་། དངོས་ཐོག་བདེན་འཚོལ་དང་། ཆོས་ཉིད་ལ་བརྩི་འཇོག །ཞིང་པའི་ཁེ་ཕན་སྲུང་སྐྱོབ། དྲིལ་བསྒྲགས་འགྲེལ་བཤད་ལ་ཤུགས་རྒྱག་པ། བར་བརྒལ་དུས་སྐབས་འོས་འཚམ་འཇོག་པ། གོམ་པ་རིམ་བགྲོད་ཀྱིས་སྐུལ་འདེད་གཏོང་བ་བཅས་བྱེད་དགོས།

གསུམ་པ། ས་ཞིང་བ་ཚྭ་ཅན་ཕྱོགས་བསྡུས་བསྒྱུར་བཀོད་བེད་སྤྱོད་གཏོང་རྒྱུ་དམ་འཛིན་ཡག་པོ་བྱེད་དགོས།

ས་ཞིང་བ་ཚྭ་ཅན་ཕྱོགས་བསྡུས་བསྒྱུར་བཀོད་བེད་སྤྱོད་གཏོང་རྒྱུ་ནི་རྨོ་ཞིང་སྲུང་སྐྱོབ་དང་ལེགས་བཅོས་བྱེད་པའི་ཕྱོགས་གལ་ཆེན་ཞིག་ཡིན། དུས་ཡུན་རིང་པོའི་ནང་ས་ཞིང་བ་ཚྭ་ཅན་ཕྱོགས་བསྡུས་བསྒྱུར་བཀོད་བེད་སྤྱོད་ཐད་ང་ཚོའི་ཏང་གིས་མི་དམངས་ཀྱི་སྣེ་ཁྲིད་དེ་འོད་སྟོང་ལྡན་པའི་ལེའུ་ཞིག་བརྩམས་ཡོད། 1949ལོའི་དགུན་ཁར། ཀྲུང་གོ་གསར་པ་དབུ་བརྙེས་ནས་ཡུན་རིང་མ་འགོར་བར་ཏང་ཀྲུང་དབྱང་གིས་རྨ་ཆུའི་གནོད་འཚེ་ཕོག་ཁུལ་གྱི་ས་ཞིང་བ་ཚྭ་ཅན་ལ་ཕྱོགས་བསྡུས་བཅོས་སྐྱོང་བྱེད་རྒྱུ་ཐག་བཅད། ལོ་ངོ་བཅུ་ཕྲག་འགའི་རིང་གི་བསྒྱུར་བཀོད་དང་མི་རབས་འགའི་རིང་གི་འབད་བརྩོན་བརྒྱུད་རྨ་ཆུའི་གནོད་འཚེ་ཕོག་ཁུལ་ནི་མིང་དོན་མཚུངས་པའི་འབྲུ་མཛོད་ཆེན་པོ་ཞིག་ཏུ་གྱུར་ཡོད། ཧྲན་ཏུང་ཏུང་ཡིང་དང་ཧོ་པེ་ཚང་ཀྲོའུ་ནི་མཚོ་འགྲམ་གྱི་ས་ཞིང་བ་ཚྭ་ཅན་གྱི་དཔེ་མཚོན་ས་ཁོངས་ཤིག་ཡིན་ལ། སྔོན་ཆད་“དཔྱིད་ཀར་སྐྱ་ཐིང་ཐིང་། །དབྱར་ཁར་ཆུ་འཁྱིལ་འཁྱིལ། །ལོ་བཅུར་ལོ་ཏོག་འདེབས། །ལོ་དགུར་འབྲས་བུ་མེད། །འབྲས་ཤུན་ཚོད་མ་གཉིས། །བཟས་ནས་ལོ་ཕྱེད་བསྐྱལ། །”ཞེས་པའི་ངག་རྒྱུན་ཡོད་ལ། ས་ཞིང་བ་ཚྭ་ཅན་དུ་འགྱུར་ཚད་ཧ་ཅང་ཚབས་ཆེ་བ་ཡིན། ཉེ་བའི་ལོ་གཉིས་རིང་། ང་སྔ་རྗེས་སུ་ས་ཆ་དེ་གཉིས་ལ་རྟོག་ཞིབ་ཏུ་ཕྱིན་ནས་ཁོང་ཚོས་དོན་དངོས་དང་ཟུང་འབྲེལ་བྱས་ཏེ་ས་ཞིང་བ་ཚྭ་ཅན་ཕྱོགས་བསྡུས་བསྒྱུར་བཀོད་བེད་སྤྱོད་གཏོང་བའི་ཐབས་ལམ་ནུས་ལྡན་འཚོལ་ཞིབ་བྱས་པ་ཤེས་བྱུང་།

རང་རྒྱལ་དུ་ས་ཞིང་བ་ཚྭ་ཅན་མང་པོ་ཡོད་པ་དང་། ས་ཁུལ་འགའ་ཞིག་གི་རྨོ་ཞིང་བ་ཚྭ་ཅན་དུ་འགྱུར་ཤུགས་ཆེ་རུ་ཕྱིན་པས། ས་ཞིང་བ་ཚྭ་ཅན་ལ་ཕྱོགས་བསྡུས་བསྒྱུར་བཀོད་བེད་སྤྱོད་བྱ་རྒྱུར་དོན་སྙིང་གལ་ཆེན་ལྡན་ཡོད། ད་ཡོད་ཀྱི་གཞི་ཁྱོན་ཆེ་བའི་རྨོ་ཞིང་བ་ཚྭ་ཅན་ལ་བསྒྱུར་བཀོད་རིམ་སྤོར་བྱས་ན་མུའུ་རེའི་ཐོན་ཚད་ཀྱི་གཏིང་ཤུགས་སྔོག་འདོན་ནུས་ལྡན་བྱེད་ཐུབ། ས་ཞིང་བ་ཚྭ་ཅན་འགའ་ཞིག་ཏུ་གཟན་རྩྭ་དང་དེང་རབས་ཀྱི་འབྲོག་ལས་འཕེལ་རྒྱས་བཏང་ན། ཟས་རིགས་ཡོང་ཁོངས་སྣ་མང་རྒྱ་སྐྱེད་གཏོང་ཐུབ་པས་ཚང་མས་འབྲུ་རིགས་འདེབས་དགོས་པའི་ངེས་པ་མེད། ས་ཞིང་བ་ཚྭ་ཅན་སོགས་རྨོ་ཞིང་གི་རྗེས་གྲབས་ཐོན་ཁུངས་གསར་སྤེལ་འོས་འཚམ་བྱས་ན་རྨོ་ཞིང་གི་རྒྱ་ཁྱོན་ཁ་གསབ་བྱས་ཆོག །ཡུན་རིང་མ་འགོར་བའི་སྔོན། ང་ནང་སོག་གི་པ་ཡན་ནོའར་ལ་བརྟག་ཞིབ་བྱེད་པར་འགྲོ་བ་ཡིན། “བྱང་གསུམ་”ས་ཁུལ་གྱི་ས་ཞིང་བ་ཚྭ་ཅན་མང་པོ་ཞིག་གི་ཐོག་ཏུ་སྔོ་ཁེབས་ཐར་ཐོར་ཡིན་པ་དང་རླུང་འགོག་བྱེ་འཇགས་ཀྱི་ནུས་པ་ཞན། གལ་སྲིད་མགྱོགས་མྱུར་བཅོས་སྐྱོང་མ་བྱས་ན་བྱེ་ཐང་ཅན་དུ་འགྱུར་བའི་ཉེན་ཁ་ཆེ་རུ་འགྲོ་རྒྱུ་རེད། ཕྱོགས་འདིའི་ཐད་ནས་བལྟས་ན། ས་ཞིང་བ་ཚྭ་ཅན་བཅོས་སྐྱོང་བྱེད་པའི་སྐྱེ་ཁམས་ཀྱི་དོན་སྙིང་ཡང་ཧ་ཅང་ཆེན་པོ་ཡོད།

ས་ཞིང་བ་ཚྭ་ཅན་ཕྱོགས་བསྡུས་བསྒྱུར་བཀོད་བེད་སྤྱོད་བྱེད་སྐབས། ས་ཞིང་བ་ཚྭ་ཅན་གྱི་གསར་སྤེལ་བེད་སྤྱོད་གཏོང་བའི་བག་ཉལ་སྟོབས་ཤུགས་སྔོག་འདོན་གང་ལེགས་བྱེད་པ་དང་། ད་ཡོད་ཀྱི་རྨོ་ཞིང་བ་ཚྭ་ཅན་བསྒྱུར་བཀོད་རིམ་སྤོར་བྱེད་པར་ཤུགས་རྒྱག་པ། རྨོ་ཞིང་བ་ཚྭ་ཅན་དུ་འགྱུར་བའི་འགྲོ་ཕྱོགས་བཀག་འགོག་ནུས་ལྡན་བྱེད་པ། ཞིང་ལས་ཐོན་སྐྱེད་ཀྱི་བར་སྟོང་བརྟན་པོའི་ངང་རྒྱ་སྐྱེད་གཏོང་བ། ཞིང་ལས་ཀྱི་ཕྱོགས་བསྡུས་ཐོན་སྐྱེད་བྱེད་ནུས་ཆེ་རུ་གཏོང་བ། ས་ཞིང་བ་ཚྭ་ཅན་གྱི་ཁྱད་ལྡན་ཞིང་ལས་ཀྱི་ལས་དོན་ཡག་པོ་སྒྲུབ་པ་བཅས་བྱེད་དགོས། ལས་དོན་ཁག་ཅིག་གཙོ་གནད་དུ་དམ་འཛིན་ཡག་པོ་བྱེད་དགོས་པ་སྟེ། གཅིག་ནི་ཕྱོགས་ཡོངས་ནས་ས་ཞིང་བ་ཚྭ་ཅན་གྱི་ཐོན་ཁུངས་གནས་ཚུལ་གསལ་རྟོགས་བྱས་ཏེ་རྨང་གཞིའི་ལས་དོན་བརྟན་པོ་ཡོང་བ་བྱེད་དགོས། གཉིས་ནི་རྩེ་རིམ་ཇུས་འགོད་ཡག་པོ་བྱས་ཏེ་ས་ཞིང་བ་ཚྭ་ཅན་ཕྱོགས་བསྡུས་བེད་སྤྱོད་ཀྱི་སྤྱིའི་འཆར་འགོད་དང་ཆེད་དོན་ལག་བསྟར་ཇུས་གཞིར་ཞིབ་འཇུག་བྱས་ནས་གཏན་འཁེལ་བཟོ་བ་དང་། ཆུའི་ཐོན་ཁུངས་སོགས་ཐད་ཀྱི་ཆ་རྐྱེན་ལ་གཞིགས་ཏེ་མ་གནས་དང་ཕན་འབྲས་ལ་ཕྱོགས་བསྡུས་དཔྱད་དཔོག་བྱེད་ཅིང་། གལ་ཆེ་ཆུང་དང་བྲེལ་བ་ཆེ་ཆུང་དབྱེ་བ་འབྱེད་དེ་ངོས་འཛིན་གཟབ་ནན་དང་ཞིབ་བཤེར་ཆོག་མཆན་འགོད་རྗེས་ལག་བསྟར་བྱེད་དགོས། གསུམ་ནི་རིགས་བགོས་ནས་སྲིད་ཇུས་ལག་བསྟར་བྱེད་པ་སྟེ། ཁུལ་བགོས་དང་རིགས་འབྱེད་བྱས་ནས་རྨོ་ཞིང་བ་ཚྭ་ཅན་བཅོས་སྐྱོང་ལེགས་བཅོས་བྱེད་པ་དང་། ས་ཞིང་བ་ཚྭ་ཅན་སོགས་རྨོ་ཞིང་རྗེས་གྲབས་ཐོན་ཁུངས་གསར་སྤེལ་ལ་རིམ་པ་བཞིན་དུ་སྐུལ་འདེད་གཏོང་བ། རྨོ་ཞིང་བ་ཚྭ་ཅན་དུ་འགྱུར་ཚུལ་འགོག་བཅོས་ལ་ཤུགས་རྒྱག་པ་བཅས་བྱེད་དགོས། བཞི་ནི་འབྲུ་རིགས་དང་། དཔལ་འབྱོར། གཟན་ཆག་བཅས་གཅིག་འདོམས་བྱ་རྒྱུ་རྒྱུན་འཁྱོངས་བྱས་ཏེ། ཡུལ་བབ་དང་བསྟུན་ནས་ས་ཞིང་བ་ཚྭ་ཅན་བེད་སྤྱོད་བྱས་ཏེ་ས་ཞིང་བ་ཚྭ་ཅན་གྱི་ཐོན་ཁུངས་སྣ་ཚོགས་ལས་བཟའ་བཅའ་ལེན་དགོས། ལྔ་ནི་“ས་ལ་འཚམ་པའི་སོན་”དང་“སོན་ལ་འཚམ་པའི་ས་”ཕན་ཚུན་ཟུང་འབྲེལ་བྱས་ཏེ། བ་ཚྭར་བཟོད་པའི་ཁྱད་ལྡན་ས་བོན་མགྱོགས་མྱུར་འདེམས་གསོ་བྱས་ཏེ་ས་ཞིང་བ་ཚྭ་ཅན་གྱི་ས་ཞིང་བཅོས་སྐྱོང་དང་ལེགས་སུ་གཏོང་བའི་བྱེད་ཐབས་ནུས་ལྡན་ཁྱབ་གདལ་ཤུགས་ཆེན་གཏོང་དགོས། དྲུག་ནི་ས་ཞིང་བ་ཚྭ་ཅན་ཕྱོགས་བསྡུས་བེད་སྤྱོད་ལ་རྒྱབ་སྐྱོར་བྱེད་པའི་ནོར་སྲིད་དངུལ་རྩའི་སྲིད་ཇུས་གཏན་འཁེལ་དང་། མ་དངུལ་སོགས་བདག་རྐྱེན་གྱི་འགན་སྲུང་ཤུགས་ཆེར་གཏོང་བ། སྤྱི་ཚོགས་ཀྱི་མ་དངུལ་གཏོང་རྒྱུར་ཁྲིད་སྟོན་དང་སྐུལ་ལྕག་གཏོང་བ་བཅས་བྱེད་དགོས།

ལྷག་པ་ཚེ་རིང་གིས་བསྒྱུར།