སྐབས་ཉི་ཤུ་པའི་ཀྲུང་དབྱང་སྒྲིག་གཞིའི་སྒྲིག་ཁོངས་ཨུ་ཡོན་ལྷན་ཁང་གི་གྲོས་ཚོགས་ཐེངས་དང་པོའི་ཐོག་གི་གསུང་བཤད།

དེ་རིང་ང་ཚོས་སྐབས་ཉི་ཤུ་པའི་ཀྲུང་དབྱང་སྒྲིག་གཞིའི་སྒྲིག་ཁོངས་ཨུ་ཡོན་ལྷན་ཁང་གི་གྲོས་ཚོགས་ཐེངས་དང་པོ་འཚོག་རྒྱུ་ཡིན། གཤམ་ལ་ངས་བསམ་འཆར་གཉིས་འདོན་རྒྱུ་ཡིན།

གཅིག །སྐབས་གསར་པའི་ཀྲུང་དབྱང་སྒྲིག་ཨུའི་ལས་ཀ་ཡག་པོར་སྒྲུབ་དགོས།

སྒྲིག་གཞིའི་སྒྲིག་ཁོངས་ནི་ཆབ་སྲིད་ཀྱི་ཐོན་ཁུངས་དང་སྲིད་སྐྱོང་གི་ཐོན་ཁུངས་གལ་ཆེན་ཞིག་ཡིན་པ་དང་། སྒྲིག་གཞིའི་སྒྲིག་ཁོངས་ལས་ཀ་ནི་ཏང་གི་ཡུན་རིང་སྲིད་སྐྱོང་ནུས་པ་དང་རྒྱལ་ཁབ་སྲིད་དབང་འཛུགས་སྐྲུན་ལ་ཤུགས་རྒྱག་པའི་ལས་དོན་གལ་ཆེན་ཞིག་ཡིན་པས། ང་ཚོའི་ཏང་གིས་ཐོག་མཐའ་བར་གསུམ་དུ་ཚད་མཐོའི་མཐོང་ཆེན་བྱེད་ཀྱི་ཡོད།

ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། སྒྲིག་གཞིའི་སྒྲིག་ཁོངས་ལས་ཀ་དེ་“ཕྱོགས་ལྔ་གཞི་གཅིག་”གི་སྤྱིའི་བཀོད་པར་གཅིག་འདོམས་ཀྱིས་སྐུལ་འདེད་གཏོང་བ་དང་། “ཕྱོགས་ཡོངས་བཞི་”ཡི་འཐབ་ཇུས་ཀྱི་བཀོད་པར་མཐུན་སྦྱོར་ངང་སྐུལ་འདེད་གཏོང་བའི་དགོས་མཁོ་དང་འཚམ་པོ་ཡོང་ཕྱིར། རྒྱལ་ཁབ་བཅོས་སྐྱོང་མ་ལག་དང་བཅོས་སྐྱོང་ནུས་པ་དེང་རབས་ཅན་དུ་འགྱུར་བར་རྩེ་གཅིག་ཏུ་དམིགས་ཏེ། ཏང་གིས་སྤྱི་ཚོགས་རིང་ལུགས་དེང་རབས་ཅན་གྱི་འཛུགས་སྐྲུན་ལ་འགོ་ཁྲིད་བྱེད་པ་དེ་སྒྲིག་གཞིའི་འཛུགས་སྟངས་ཐོག་དེ་བས་ཚན་རིག་དང་མཐུན་པ་དང་། འགན་ནུས་བཀོད་སྒྲིག་ཐོག་དེ་བས་ལེགས་འགྱུར་བྱུང་བ། སྒྲིག་སྲོལ་ལམ་སྲོལ་ཐོག་དེ་བས་འཐུས་སྒོ་ཚང་བ། འཁོར་སྐྱོད་དང་དོ་དམ་ཐོག་དེ་བས་གོ་འཕེར་ཡོང་བ་བཅས་ལ་སྐུལ་འདེད་བཏང་ཡོད། ལྷག་པར་དུ་ཏང་གི་ཚོགས་ཆེན་བཅུ་དགུ་པ་འཚོགས་ཚུན། ང་ཚོས་རིམ་པ་ཁག་གི་སྒྲིག་ཨུའི་འགོ་ཁྲིད་སྒྲིག་སྲོལ་དང་སྒྲིག་ཨུ་གཞུང་ལས་ཁང་གི་དོ་དམ་སྒྲིག་སྲོལ་ལེགས་སྒྲིག་དང་ལེགས་སྒྱུར་བྱས་ཏེ། ཏང་ཀྲུང་དབྱང་གིས་སྒྲིག་གཞིའི་སྒྲིག་ཁོངས་ལས་ཀར་གཅིག་སྡུད་གཅིག་གྱུར་གྱིས་འགོ་ཁྲིད་བྱེད་པར་རྩ་བའི་ཐོག་ནས་ཤུགས་བརྒྱབ་ཡོད། ང་ཚོས་ཏང་གིས་གནས་ཆེའི་ལས་ཀར་འགོ་ཁྲིད་བྱེད་པའི་སྒྲིག་སྲོལ་དང་ལམ་སྲོལ་མུ་མཐུད་འཐུས་ཚང་བཟོས་ཏེ། ཏང་གི་ཕྱོགས་ཡོངས་ཀྱི་འགོ་ཁྲིད་སྟོབས་དང་ལྡན་ལ་དོན་ཐོག་ཏུ་འཁྱོལ་བར་སྐུལ་འདེད་བཏང་ཡོད་པ་དང་། ཏང་དང་རྒྱལ་ཁབ་ཀྱི་སྒྲིག་གཞིའི་བསྒྱུར་བཅོས་མུ་མཐུད་ཟབ་སྤེལ་བྱས་ཏེ། སྒྲིག་གཞིའི་འགན་ནུས་མ་ལག་ཅན་དང་སྤྱི་ཡོངས་ཅན་དུ་བསྐྱར་སྒྲིག་ཡོང་བར་སྐུལ་འདེད་བཏང་ཡོད་པ། གཙོ་གནད་ཁྱབ་ཁོངས་ཀྱི་ཆེད་དམིགས་སྒྲིག་སྲོལ་བསྒྱུར་བཅོས་ལ་སྐུལ་འདེད་གཏིང་ཟབ་བྱས་ཏེ། སྤུས་ཚད་མཐོ་བའི་འཕེལ་རྒྱས་ཡོང་བར་འགོག་རྐྱེན་བཟོ་བའི་སྒྲིག་སྲོལ་དང་ལམ་སྲོལ་གྱི་བཀག་ཆ་སྔར་ལས་ལྷག་པར་སེལ་ཡོད་པ། སྒྲིག་གཞིའི་སྒྲིག་ཁོངས་ཀྱི་ཐོན་ཁུངས་བགོ་སྒྲིག་མུ་མཐུད་ལེགས་སྒྱུར་བྱས་ཏེ། རྒྱལ་ཁབ་ཀྱི་གནད་ཆེའི་འཐབ་ཇུས་དགོས་མཁོ་འགན་སྲུང་ནུས་ལྡན་བྱས་ཡོད་པ། སྒྲིག་གཞིའི་སྒྲིག་ཁོངས་ཀྱི་ཁྲིམས་སྐྱོང་འཛུགས་སྐྲུན་ལ་སྐུལ་འདེད་མགྱོགས་པོར་བཏང་སྟེ། ལས་ཀའི་ཚན་རིག་ཅན་དང་ཚད་ལྡན་ཅན་དང་ཁྲིམས་སྐྱོང་ཅན་གྱི་ཆུ་ཚད་སྔར་བས་མཐོར་འདེགས་བཏང་ཡོད་པ་བཅས་རེད།

ལག་ལེན་གྱིས་ར་སྤྲོད་བྱས་ཡོད་པ་ནི། ཏང་གི་ཚོགས་ཆེན་བཅུ་དགུ་པ་འཚོགས་ཚུན་དུ་ཀྲུང་དབྱང་སྒྲིག་ཨུས་བསྒྲུབས་པའི་ལས་འགན་ནི་དོན་ལ་གནས་པ་དང་། ལས་ཀ་ནི་ནུས་ལྡན་དང་གོ་ཆོད་ཡིན་ལ། སྒྲིག་གཞིའི་སྒྲིག་ཁོངས་ལས་ཀའི་དབང་གྲགས་རང་བཞིན་དང་། ཚན་རིག་རང་བཞིན། གཟབ་ནན་རང་བཞིན་བཅས་མུ་མཐུད་ཆེ་རུ་ཕྱིན་ཡོད། ལས་ཀའི་ནང་དུ་ཉམས་མྱོང་རྩ་ཆེན་བསགས་ཡོད་པ་དང་། ཆོས་ཉིད་རང་བཞིན་གྱི་ངོས་ཟིན་ཆགས་ཡོད་དེ། དེ་ནི་ངེས་པར་དུ་ཏང་ཀྲུང་དབྱང་གིས་སྒྲིག་གཞིའི་སྒྲིག་ཁོངས་ལས་ཀར་གཅིག་སྡུད་གཅིག་གྱུར་གྱིས་འགོ་ཁྲིད་བྱ་རྒྱུ་རྒྱུན་འཁྱོངས་བྱེད་དགོས་པ་དང་གཅིག །ངེས་པར་དུ་ཏང་གི་ཕྱོགས་ཡོངས་ཀྱི་འགོ་ཁྲིད་ལ་ཤུགས་རྒྱག་རྒྱུ་དེ་ཆབ་སྲིད་ཀྱི་ལས་འགན་ཨང་དང་པོར་བརྩི་རྒྱུ་རྒྱུན་འཁྱོངས་བྱེད་དགོས་པ་དང་གཉིས། ངེས་པར་དུ་མི་དམངས་ལྟེ་བར་འཛིན་པའི་ལས་ཀའི་ཁྲིད་ཕྱོགས་རྒྱུན་འཁྱོངས་བྱེད་དགོས་པ་དང་གསུམ། ངེས་པར་དུ་ལེགས་སྒྱུར་མཉམ་སྡེབ་གོ་འཕེར་བཅས་ཀྱི་རྩ་དོན་རྒྱུན་འཁྱོངས་བྱེད་དགོས་པ་དང་བཞི། ངེས་པར་དུ་སྒྲིག་གཞིའི་བསྒྱུར་བཅོས་གཙོ་གནད་དུ་འཛིན་རྒྱུ་རྒྱུན་འཁྱོངས་བྱེད་དགོས་པ་དང་ལྔ། ངེས་པར་དུ་“ཧྲག་བསྡུས་”དང་“སྐྱོན་བྲལ་”ཟུང་འབྲེལ་བྱ་རྒྱུ་རྒྱུན་འཁྱོངས་བྱེད་དགོས་པ་དང་དྲུག །ངེས་པར་དུ་ཀྲུང་དབྱང་དང་ས་གནས་ཀྱི་ཧུར་བརྩོན་རང་བཞིན་གཉིས་འདོན་རྒྱུ་རྒྱུན་འཁྱོངས་བྱེད་དགོས་པ་དང་བདུན། ངེས་པར་དུ་སྒྲིག་གཞིའི་སྒྲིག་ཁོངས་ཁྲིམས་བཀོད་ཅན་དུ་འགྱུར་བར་སྐུལ་འདེད་གཏོང་རྒྱུ་རྒྱུན་འཁྱོངས་བྱེད་དགོས་པ་དང་བརྒྱད་བཅས་སོ། །ཉམས་མྱོང་འདི་དག་དུས་ཡུན་རིང་པོར་རྒྱུན་འཁྱོངས་བྱེད་དགོས་པ་མ་ཟད། ལག་ལེན་གྱི་ནང་དུ་མུ་མཐུད་འཐུས་ཚང་དང་འཕེལ་རྒྱས་གཏོང་དགོས།

ཀྲུང་དབྱང་སྒྲིག་ཨུས་ཏང་དང་རྒྱལ་ཁབ་ཀྱི་སྒྲིག་གཞིའི་འགན་ནུས་མ་ལག་འཛུགས་སྐྲུན་ལ་ཤུགས་རྒྱག་པ་དང་། སྒྲིག་གཞིའི་བསྒྱུར་བཅོས་ཟབ་སྤེལ། ཏང་གི་སྲིད་སྐྱོང་ཐོན་ཁུངས་བགོ་སྒྲིག་བཅས་ཀྱི་ལས་འགན་དང་འགན་འཁྲི་གལ་ཆེན་འཁུར་ཡོད། སྒྲིག་གཞིའི་སྒྲིག་ཁོངས་ལས་ཀའི་བྱེད་ཕྱོགས་སྲིད་ཇུས་དང་། ཏང་དང་རྒྱལ་ཁབ་ཀྱི་སྒྲིག་གཞིའི་བསྒྱུར་བཅོས་ཇུས་གཞི། གལ་ཆེའི་སྒྲིག་སྲོལ་ལམ་སྲོལ་ལེགས་སྒྲིག །སྒྲིག་གཞིའི་སྒྲིག་ཁོངས་ཐད་ཀྱི་དོན་ཆེན་བཅས་ཚང་མ་ཀྲུང་དབྱང་སྒྲིག་ཨུས་དམ་འཛིན་བྱེད་ཀྱི་ཡོད། ཀྲུང་དབྱང་སྒྲིག་ཨུའི་ཁོངས་མིས་འཁུར་སེམས་ཆེར་སྐྱེད་ཀྱིས་དངོས་གནས་རང་འགན་ལྷུར་ལེན་བྱེད་དགོས། ལས་ཀའི་ནང་དུ་གནད་3ཡག་པོར་ཟིན་དགོས།

གཅིག་ནི་ཏང་ཀྲུང་དབྱང་གིས་སྒྲིག་གཞིའི་སྒྲིག་ཁོངས་ལས་ཀར་གཅིག་སྡུད་གཅིག་གྱུར་གྱིས་འགོ་ཁྲིད་བྱ་རྒྱུ་རྒྱུན་འཁྱོངས་བྱེད་དགོས། སྒྲིག་གཞིའི་སྒྲིག་ཁོངས་ལས་ཀའི་ཆབ་སྲིད་ཀྱི་ངོ་བོ་གསལ་པོ་ཁོང་དུ་གཏིང་ཟབ་ཆུད་དགོས་པ་དང་། ཏང་ཀྲུང་དབྱང་གིས་སྒྲིག་གཞིའི་སྒྲིག་ཁོངས་ལས་ཀར་གཅིག་སྡུད་གཅིག་གྱུར་གྱིས་འགོ་ཁྲིད་བྱེད་པའི་ཆབ་སྲིད་བླང་བྱ་མཐའ་གཅིག་ཏུ་དོན་འཁྱོལ་བྱེད་དགོས་ལ། སྒྲིག་གཞིའི་སྒྲིག་ཁོངས་དང་སྒྲིག་གཞི་བསྒྱུར་བཅོས་ཐད་ཀྱི་དོན་དག་ཆེ་རིགས་ངེས་པར་དུ་ཏང་ཀྲུང་དབྱང་ལ་ཆོག་མཆན་ཞུ་དགོས།

གཉིས་ནི་ཏང་གི་ཕྱོགས་ཡོངས་ཀྱི་འགོ་ཁྲིད་ལ་ཤུགས་རྒྱག་རྒྱུ་དེ་དུས་རབས་གསར་པའི་སྒྲིག་གཞིའི་སྒྲིག་ཁོངས་ལས་ཀའི་བརྗོད་དོན་གཙོ་བོ་དང་གཙོ་ཐིག་ཏུ་འཛིན་རྒྱུ་རྒྱུན་འཁྱོངས་བྱེད་དགོས། སྒྲིག་གཞིའི་བསྒྱུར་བཅོས་ལ་སྐུལ་འདེད་གཏོང་བའམ་ཡང་ན་སྒྲིག་གཞིའི་སྒྲིག་ཁོངས་ཀྱི་ཐོན་ཁུངས་བགོ་སྒྲིག་ལེགས་སྒྱུར་བྱེད་པ་གང་ཡིན་རུང་། ཚང་མས་ཐོག་མར་ཏང་གི་འགོ་ཁྲིད་ལ་ཤུགས་རྒྱག་པར་ཕན་ཐོགས་ཡོད་མེད་དང་། ཏང་གི་ཡུན་རིང་སྲིད་སྐྱོང་གོ་གནས་སྲ་བརྟན་གཏོང་བར་ཕན་ཐོགས་ཡོད་མེད། ཏང་གིས་ཁ་ཕྱོགས་འཛིན་པ་དང་། ཁྱོན་ཡོངས་འཆར་འགོད། སྲིད་ཇུས་གཏན་འབེབས། བསྒྱུར་བཅོས་སྐུལ་སྤེལ་བཅས་བྱེད་པའི་ནུས་པ་མཐོར་འདེགས་ཡོང་བར་ཕན་ཐོགས་ཡོད་མེད་བཅས་ལ་བསམ་གཞིགས་བྱེད་དགོས་པ་དང་། རྒྱུན་འཁྱོངས་ལྷོད་མེད་ཀྱིས་འགོ་ཁྲིད་སྒྲིག་སྲོལ་དང་། སྒྲིག་གཞིའི་ལས་འགན། ཐོན་ཁུངས་བགོ་སྒྲིག །འཁོར་སྐྱོད་ལམ་སྲོལ་བཅས་ཀྱི་ཐོག་ནས་ཏང་གི་ཕྱོགས་ཡོངས་ཀྱི་འགོ་ཁྲིད་ལ་ཤུགས་རྒྱག་རྒྱུ་དེ་ཁྱབ་ཁོངས་སོ་སོ་དང་ཕྱོགས་སོ་སོ་དང་ལྷུ་ཚིགས་སོ་སོར་དོན་འཁྱོལ་བྱེད་དགོས།

གསུམ་ནི་ཀྲུང་གོའི་ལུགས་ཀྱི་དེང་རབས་ཅན་དང་འཚམ་པའི་སྒྲིག་གཞིའི་འགན་ནུས་མ་ལག་དང་སྒྲིག་སྲོལ་ལམ་སྲོལ་འཐུས་ཚང་དུ་གཏོང་རྒྱུ་དེ་དུས་རབས་གསར་པའི་སྒྲིག་གཞིའི་སྒྲིག་ཁོངས་ལས་ཀའི་ལྟེ་བའི་ལས་འགན་དུ་བརྩི་རྒྱུ་རྒྱུན་འཁྱོངས་བྱེད་དགོས། ཀྲུང་གོའི་ལུགས་ཀྱི་དེང་རབས་ཅན་ལ་སྐུལ་འདེད་གཏོང་བའི་འཕེལ་རིམ་རླབས་པོ་ཆེའི་ནང་དུ། འཕེལ་རྒྱས་ཀྱི་བཀོད་པ་གསར་པ་སྐྲུན་པའི་བཀག་ཆ་སེལ་བ་དང་། སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བའི་འགག་རྩ་དང་དཀའ་གནད། ཆད་སྐྱོན་དང་ཞན་ཆ་སོགས་སེལ་བར་རྩེ་གཅིག་ཏུ་དམིགས་པ་དང་། མཉམ་དུ་ཕྱུག་འགྱུར་ལ་སྐུལ་འདེད་གཏོང་བ་དང་དམངས་འཚོའི་བདེ་རྩ་ཆེ་རུ་གཏོང་བ་སོགས་གནད་དོན་ཆེན་པོ་རབ་དང་རིམ་པར་དམིགས་ཏེ། མུ་མཐུད་དེ་ཏང་གིས་གནད་ཆེའི་ལས་ཀར་འགོ་ཁྲིད་བྱེད་པའི་སྒྲིག་སྲོལ་ལམ་སྲོལ་འཐུས་ཚང་དུ་གཏོང་བ་དང་། ཏང་སྲིད་སྒྲིག་གཞིའི་ཚན་རིག་དང་མཐུན་པའི་བཀོད་སྒྲིག་དང་འགན་ནུས་ལེགས་སྒྱུར་བགོ་སྒྲིག་ལ་ཤུགས་རྒྱག་པ། སྡེ་ཁག་གི་རང་འགན་སྒྲུབ་ནུས་ཆེ་རུ་གཏོང་བ། ཀྲུང་དབྱང་དང་ས་གནས་ཀྱི་ཧུར་བརྩོན་རང་བཞིན་གཉིས་སྔར་ལས་ལྷག་པར་འདོན་སྤེལ་བྱེད་པ་སོགས་ཀྱི་ཐད་ནས་སྒྲིག་གཞིའི་འགན་ནུས་མ་ལག་འཐུས་ཚང་གཏོང་བ་དང་། གཏིང་རིམ་གྱི་སྒྲིག་སྲོལ་དང་ལམ་སྲོལ་གྱི་བཀག་ཆ་སེལ་བའི་བྱེད་ཐབས་དང་ཐབས་ཤེས་ཞིབ་འཇུག་བྱས་ཏེ་བཏོན་ནས། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་ལམ་ལུགས་ཀྱི་དགེ་མཚན་མུ་མཐུད་དེ་མངོན་དགོས་པ་དང་། ཀྲུང་གོའི་ལུགས་ཀྱི་དེང་རབས་ཅན་འཛུགས་སྐྲུན་གྱི་སྒུལ་ཤུགས་དང་གསོན་ཤུགས་མུ་མཐུད་དེ་ཆེ་རུ་གཏོང་དགོས།

ད་ལྟ་དང་ཕྱིན་ཆད་དུས་སྐབས་ཤིག་རིང་གི་སྒྲིག་གཞིའི་སྒྲིག་ཁོངས་ལས་ཀ་ཡག་པོར་སྒྲུབ་དགོས་ན། གཤམ་གསལ་གྱི་གནད་དོན་འགར་དོ་སྣང་བྱེད་དགོས།

དང་པོ། རྩེ་རིམ་ཇུས་འགོད་དང་སྤྱི་ཡོངས་འཆར་འགོད་ལ་ཤུགས་རྒྱག་པ། ཏང་གི་ཚོགས་ཆེན་ཉི་ཤུ་པའི་དགོངས་དོན་ཕྱོགས་ཡོངས་ནས་ལག་བསྟར་དང་། ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན་གྱི་སྒྲིག་གཞིའི་སྒྲིག་ཁོངས་ལས་ཀའི་གནད་ཆེའི་གྲུབ་འབྲས་དང་ལག་ལེན་གྱི་ཉམས་མྱོང་མ་ལག་ཚང་བར་ཕྱོགས་བསྡོམས། བདེན་སྲུང་གསར་གཏོད་རྒྱུན་འཁྱོངས། གནད་དོན་ཁྲིད་ཕྱོགས་སུ་འཛིན་རྒྱུ་འབུར་འདོན་བཅས་བྱས་ཐོག །ཁྱོན་ཡོངས་དང་འབྲེལ་བ་ཡོད་པ་དང་། སྐྲ་ཉག་གཅིག་འཐེན་ན་ལུས་ཧྲིལ་པོ་སྒུལ་བ་ལྟ་བུའི་འགོ་ཁྲིད་སྒྲིག་སྲོལ་དང་། སྒྲིག་གཞིའི་བཀོད་སྒྲིག །སྒྲིག་སྲོལ་ལམ་སྲོལ་སོགས་ལ་དམིགས་ཏེ། མ་ལག་ཚང་བར་བསམ་གཞིགས་དང་། རྩེ་རིམ་ཇུས་འགོད། ཚན་རིག་དང་མཐུན་པར་འཆར་འགོད་བཅས་བྱས་ཏེ། ལས་ཀའི་མཛུབ་སྟོན་བསམ་འཆར་དང་བྱེ་བྲག་གི་ལས་ཀའི་འཆར་ཟིན་ཞིབ་འཇུག་བྱས་ནས་གཏན་འབེབས་བྱེད་དགོས།

གཉིས་པ། རྒྱལ་ཁབ་ཀྱི་གནད་ཆེའི་འཐབ་ཇུས་དང་གཙོ་གནད་ལས་ཀར་ཞབས་ཞུ་དང་འགན་སྲུང་བྱ་རྒྱུ་དེ་གོ་གནས་གལ་ཆེ་སར་འཇོག་པ། ཏང་གི་ཚོགས་ཆེན་ཉི་ཤུ་པས་ཁྱོན་ཡོངས་དང་འབྲེལ་བ་ཡོད་པའི་གནད་ཆེའི་ཐབས་ཇུས་བཀོད་སྒྲིག་རབ་དང་རིམ་པ་བྱས་ཡོད་པ་དང་། སྒྲིག་གཞིའི་སྒྲིག་ཁོངས་ལས་ཀ་དེ་སྒྲིག་སྲོལ་ལམ་སྲོལ་དང་སྒྲིག་གཞིའི་སྒྲིག་ཁོངས་ཀྱི་ཐོག་ནས་ནུས་ཤུགས་གང་ཡོད་ཀྱིས་འདེགས་སྐྱོར་དང་འགན་སྲུང་ཡག་པོ་བྱེད་དགོས། རྒྱལ་ཁབ་གསར་གཏོད་མ་ལག་འཛུགས་སྐྲུན་ལ་ཞབས་ཞུ་དང་འགན་སྲུང་བྱེད་དགོས། རྒྱལ་ཁབ་གསར་གཏོད་མ་ལག་ནི་མ་ལག་ཅན་གྱི་ལས་གྲྭ་ཆེན་པོ་ཞིག་ཡིན་པས། སྒྲིག་གཞིའི་སྒྲིག་ཁོངས་ཐད་ནས་གཟིགས་སྐྱོང་དང་འགན་སྲུང་བྱེད་དགོས་པ་མ་ཟད། བསྒྱུར་བཅོས་ལ་བརྟེན་ནས་སྒྲིག་སྲོལ་ལམ་སྲོལ་ཐོག་ནས་གནད་དོན་འབུར་ཐོན་ཅན་ཐག་གཅོད་བྱེད་པར་སྐུལ་འདེད་དང་། སྔར་བས་གོ་འཕེར་བའི་རྩ་འཛུགས་མ་ལག་དང་འཁོར་སྐྱོད་དོ་དམ་མ་ལག་སྐྲུན་པ། སྲིད་གཞུང་དང་ཚོང་ར་དང་སྤྱི་ཚོགས་སོགས་ཕྱོགས་སོ་སོའི་སྟོབས་ཤུགས་གཅིག་སྒྲིལ། སྤྱི་ཚོགས་རིང་ལུགས་ཀྱི་ཚོང་རའི་དཔལ་འབྱོར་གྱི་ཆ་རྐྱེན་འོག་འགག་རྩ་དང་སྲོག་ཤིང་ལག་རྩལ་འགག་སྒྲོལ་བྱེད་པའི་རྒྱལ་ཡོངས་སྟོབས་ཤུགས་གཅིག་སྒྲིལ་གྱི་སྒྲིག་སྲོལ་གསར་པ་འཐུས་ཚང་གཏོང་བར་སྐུལ་འདེད་བཅས་བྱེད་དགོས། ནུས་ཤུགས་བཏོན་ནས་ཆད་སྐྱོན་སེལ་བ་དང་ཞན་ཆ་གསབ་པ་དང་། གཙོ་གནད་ཁྱབ་ཁོངས་དང་གནས་ས་གལ་ཆེའི་བདེ་འཇགས་མ་ལག་དང་ནུས་པའི་འཛུགས་སྐྲུན་ལ་ཤུགས་རྒྱག་དགོས། དམངས་འཚོའི་ཁྱབ་ཁོངས་ཀྱི་འཛུགས་སྐྲུན་ལ་ཞབས་ཞུ་དང་འགན་སྲུང་བྱེད་དགོས། མི་དམངས་མང་ཚོགས་ཀྱིས་ཡོངས་ཁྱབ་ཏུ་དོ་ཁུར་བྱེད་པའི་ལས་ཞུགས་དང་། སློབ་གསོ། སྨན་བཅོས། སྤྱི་ཚོགས་འགན་སྲུང་སོགས་དམངས་འཚོའི་གནད་དོན་རྒྱབ་ཀྱི་སྒྲིག་སྲོལ་ལམ་སྲོལ་གྱི་གནད་དོན་ལ་ཞིབ་འཇུག་དང་ཐག་གཅོད་བྱེད་པར་མཐོང་ཆེན་བྱེད་དགོས། སློབ་གྲྭ་ཆུང་འབྲིང་གི་དགེ་རྒན་དང་ལས་བཟོ་པའི་སྒྲིག་ཁོངས་ཚད་ལོན་གྲུབ་འབྲས་སྲ་བརྟན་གཏོང་བ་དང་། གྲོང་གསེབ་སྨན་པའི་དཔུང་སྡེ་རྒྱ་ཆེར་བཏང་བ་མི་ཚད་བརྟན་པོ་ཡོང་བ་བྱེད་དགོས། བྱ་ལས་སྡེ་ཚན་གྱི་བསྒྱུར་བཅོས་བྱེད་ཤུགས་ཆེ་རུ་བཏང་སྟེ། བཀོད་པ་དང་གྲུབ་ཚུལ་ལེགས་སྒྱུར་དང་། ད་ཡོད་ཀྱི་ཐོན་ཁུངས་འཁྲུག་གཏོང་བྱས་ཏེ། ཁུ་བསྡུ་བྱས་པའི་བྱ་ལས་ཀྱི་སྒྲིག་ཁོངས་དེ་དམངས་འཚོའི་དགོས་གལ་ཆེ་སར་སྤྱོད་དགོས།

གསུམ་པ། སྒྲིག་གཞིའི་སྒྲིག་ཁོངས་ལས་ཀར་གཞི་རིམ་གྱི་ཁྲིད་ཕྱོགས་གསལ་པོ་འཛིན་པ། ཞང་དང་གྲོང་རྡལ་（ཁྲོམ་ལམ་）གྱི་སྒྲིག་གཞིའི་བཀོད་སྒྲིག་མུ་མཐུད་ལེགས་སྒྱུར་བྱེད་དགོས། གཞི་རིམ་གྱི་ཏང་གི་འཛུགས་སྐྲུན་དང་། བདེ་འཇགས་ཁྲིམས་སྐྱོང་། དམངས་འཚོའི་ཞབས་ཞུ། དཔལ་འབྱོར་འཕེལ་རྒྱས་སོགས་འགན་ནུས་གཙོ་བོ་གལ་ཆེ་སར་འཇོག་པ་དང་། གཞི་རིམ་གྱི་མངོན་སུམ་གནས་ཚུལ་དང་གཞི་རིམ་ལས་དོན་གྱི་ཁྱད་ཆོས་དང་བསྟུན་པ། སྲིད་འཛིན་སྒྲིག་གཞི་དང་བྱ་ལས་སྡེ་ཚན་གཅིག་འདོམས་ཀྱིས་སྒྲིག་འཛུགས་བཅས་བྱས་ཏེ། བབས་ཆགས་གོ་འཕེར་སྟབས་བདེ་གསུམ་དངོས་འབྲེལ་ཡོང་ཐུབ་པ་བྱེད་དགོས། ཐོན་ཁུངས་ཞབས་ཞུ་དོ་དམ་གསུམ་གཞི་རིམ་དུ་འབྱོར་བར་མུ་མཐུད་སྐུལ་འདེད་གཏོང་དགོས། གཞི་རིམ་དོ་དམ་ཐད་ཉེ་བར་མཁོ་ལ་དང་ལེན་ནུས་ལྡན་ཡང་བྱེད་ཐུབ་པའི་འགན་དབང་ཁྲིམས་ལྟར་ཞང་དང་གྲོང་རྡལ་（ཁྲོམ་ལམ་）ལ་སྤྲོད་དགོས་པ་དང་། དེ་དང་སྦྲགས་ནས་འབྲེལ་ཡོད་ཐོན་ཁུངས་གཞི་རིམ་ལ་སྤྲོད་པ་དང་། མི་སྣའི་སྒྲིག་ཁོངས་མུ་མཐུད་གཞི་རིམ་ལ་འབྱོར་བ། གཞི་རིམ་གྱི་དོན་དག་གཞི་རིམ་ནས་སྒྲུབ་པ་དང་། གཞི་རིམ་གྱི་དབང་ཆ་གཞི་རིམ་ལ་སྤྲོད་པ། གཞི་རིམ་གྱི་དོན་དག་སྒྲུབ་མཁན་ཡོད་པ་བཅས་འགན་ལེན་བྱེད་དགོས། ཞིབ་འཇུག་བྱས་ནས་ལག་ལེན་དུ་འཁྱོལ་ཐུབ་པའི་ཐབས་ལམ་དང་བྱེད་ཐབས་འདོན་དགོས་པ་དང་། གཞི་རིམ་གྱི་སྒྲིག་གཞིའི་སྒྲིག་ཁོངས་ཀྱི་རིགས་སྣ་དང་། མི་སྣའི་ཐོབ་ཐང་། ངར་སྐུལ་འགན་སྲུང་སོགས་ཕྱོགས་ཀྱི་བཀག་ཆ་ཤུགས་བཏོན་ནས་སེལ་ཏེ། རིགས་ཁག་གི་ཤེས་ལྡན་མི་སྣ་འགུག་སྡུད་བྱས་ཏེ་གཞི་རིམ་དུ་ལས་སྒྲུབ་ལས་གཏོད་བྱེད་པའི་སྲིད་ཇུས་ཀྱི་ཁྲིད་ཕྱོགས་དང་ལམ་ལུགས་ཀྱི་ཁོར་ཡུག་བཟང་པོ་ཆགས་པར་བྱེད་དགོས།

བཞི་པ། ཚན་རིག་དང་མཐུན་ལ་ཚད་ལྡན་ངང་དོ་དམ་ནན་པོ་བྱ་རྒྱུ་རྒྱུན་འཁྱོངས་བྱེད་པ། བསྡོམས་འབོར་ཚོད་འཛིན་ནན་པོ་བྱེད་དགོས། རང་རྒྱལ་གྱི་སྲིད་འཛིན་སྒྲིག་ཁོངས་དང་བྱ་ལས་སྒྲིག་ཁོངས་ཀྱི་བསྡོམས་འབོར་དེ་ལུགས་མཐུན་དང་རྒྱུན་མཐུད་ཐུབ་པའི་ཁྱབ་ཁོངས་སུ་ཚོད་འཛིན་བྱེད་དགོས། 《ཀྲུང་གོའི་གུང་ཁྲན་ཏང་གི་སྒྲིག་གཞིའི་སྒྲིག་ཁོངས་སྐོར་གྱི་ལས་དོན་སྲོལ་ཡིག་》སོགས་ཁྲིམས་སྲོལ་དང་ལམ་ལུགས་ཀྱི་བཙན་པོའི་ངོ་བོ་ཅན་གྱི་བཀག་སྡོམ་བྱེད་ཤུགས་ཆེ་རུ་གཏོང་དགོས། བརྟན་བརླིང་དང་རིམ་ལྡན་དང་ཚད་ལྡན་ངང་སྒྲིག་ཁོངས་ཕྱིའི་མི་སྣ་བཀོལ་སྤྱོད་དོ་དམ་བྱེད་དགོས། འགྲོ་གྲོན་དགོས་གཏུག་ཆེ་སར་སྤྱོད་དགོས། སྒྲིག་གཞིའི་སྒྲིག་ཁོངས་ལས་ཀར་གྲངས་ཀའི་རྩིས་དང་དཔལ་འབྱོར་གྱི་རྩིས་རྒྱག་དགོས་པ་མ་ཟད། ཆབ་སྲིད་ཀྱི་རྩིས་དང་ཕུགས་རིང་གི་རྩིས་དེ་བས་ཀྱང་བརྒྱབ་སྟེ། ཚད་ཡོད་པའི་སྒྲིག་གཞིའི་སྒྲིག་ཁོངས་ཀྱི་ཐོན་ཁུངས་གནད་ལ་འཁེལ་བའི་སྒོ་ནས་དམངས་འཚོའི་བདེ་སྐྱིད་དང་རྨང་གཞི་བརྟན་གཏོང་གི་ཉམས་ཞན་གྱི་ལྷུ་ཚིགས་སུ་གཏོང་འཇོག་བྱེད་དགོས། ཐེངས་འདིར་སྒྲིག་གཞི་བསྒྱུར་བཅོས་ལས་ཁུ་བསྡུ་བྱས་པའི་སྒྲིག་ཁོངས་གཅིག་འདོམས་ཀྱིས་བཀོལ་སྤྱོད་ཡག་པོ་བྱེད་དགོས་པ་དང་། གཙོ་གནད་ཁྱབ་ཁོངས་དང་གལ་ཆེའི་ལས་ཀར་ཤུགས་བརྒྱབ་སྟེ། བེད་སྤྱོད་ཀྱི་ཕན་འབྲས་ཆེ་ཤོས་ཐོན་པ་བྱེད་དགོས། དེ་དང་ཆབས་ཅིག་ཏུ། སྲིད་གཞུང་སྡེ་ཁག་གི་འགན་དབང་གསལ་ཐོ་སྟེང་གི་སྒྲིག་ཁོངས་ལས་ཀ་ལེགས་སྒྲུབ་བྱས་པའི་རྨང་གཞིའི་ཐོག །སྡེ་ཁག་གི་ལྟེ་བའི་འགན་ནུས་སྒྲུབ་ཚུལ་ལ་ཚན་རིག་དང་མཐུན་པར་དཔྱད་འཇོག་བྱས་ཏེ། གནད་དོན་འབུར་ཐོན་ཅན་ལ་ཁ་གཏད་ནས་དེ་ལེགས་བཅོས་དང་འཐུས་ཚང་བཟོ་བའི་བྱེད་ཐབས་ཞིབ་འཇུག་བྱས་ནས་འདོན་དགོས་པ་དང་། འགན་ནུས་ཀྱི་བཀོད་སྒྲིག་དེ་དག་ཚན་རིག་དང་མཐུན་ལ་ཚད་ལྡན་ཡིན་པ་དང་། སྟོང་ཆར་མི་ལུས་ཤིང་གོ་འཕེར་ཐོགས་མེད་ངང་འཁོར་སྐྱོད་ཐུབ་པ་འགན་ལེན་བྱེད་དགོས།

གཉིས། ཏང་དང་རྒྱལ་ཁབ་ཀྱི་སྒྲིག་གཞིའི་བསྒྱུར་བཅོས་རྩ་འཛུགས་དང་ལག་བསྟར་བྱེད་པའི་ལས་ཀ་ཡག་པོར་སྒྲུབ་དགོས།

སྒྲིག་གཞི་བསྒྱུར་བཅོས་ལས་ཀ་ཡག་པོར་སྒྲུབ་རྒྱུ་ནི་ཀྲུང་དབྱང་སྒྲིག་ཨུའི་ལས་འགན་གལ་ཆེན་ཞིག་ཡིན། ཏང་གི་སྐབས་ཉི་ཤུ་པའི་ཚང་འཛོམས་གྲོས་ཚོགས་ཐེངས་གཉིས་པས་ཏང་དང་རྒྱལ་ཁབ་ཀྱི་སྒྲིག་གཞི་བསྒྱུར་བཅོས་ཐད་ཕྱོགས་ཡོངས་ནས་བཀོད་སྒྲིག་བྱས་ཡོད་པས། བརྟན་རླིང་དང་གོ་རིམ་ལྡན་པའི་ངང་སྒྲིག་གཞིའི་བསྒྱུར་བཅོས་རྩ་འཛུགས་དང་ལག་བསྟར་བྱེད་པའི་ལས་འགན་ཁག་དོན་འཁྱོལ་གནད་ལ་འཁེལ་བ་བྱེད་དགོས།

ཀྲུང་དབྱང་རིམ་པའི་སྒྲིག་གཞིའི་བསྒྱུར་བཅོས་ནན་ཏན་གྱིས་རྩ་འཛུགས་དང་ལག་བསྟར་ཡག་པོ་བྱེད་དགོས། ཉེ་དུས་འབྲེལ་ཡོད་སྡེ་ཁག་དག་མགྱོགས་མྱུར་འགུལ་སྐྱོད་བྱས་ཏེ། སྒྲིག་འཛུགས་བྱས་པའི་སྡེ་ཁག་ལ་བསྟུད་མར་སྒོ་བྱང་བཀལ་བ་དང་། འགོ་ཁྲིད་ཚན་པ་རིམ་གྱིས་སྐོང་སྒྲིག་བྱེད་པ་དང་། སྡེབ་སྒྲིག་དང་སྒྲིག་འཛུགས་བྱེད་པ་དང་། སྡེ་ཁག་གི་“གཏན་འཁེལ་གསུམ་”གྱི་གཏན་འབེབས་གཏན་འཁེལ་དང་དག་བཅོས་བྱེད་པ་སོགས་ལས་ཀ་གོ་རིམ་ལྡན་པར་སྤེལ་ཏེ། སྡེ་ཁག་ཕན་ཚུན་བར་གཞི་རྩའི་ཆ་ནས་མཐུན་སྦྱོར་གཅིག་གྱུར་བྱུང་ཡོད་པ་དང་། ཀྲུང་དབྱང་དང་རྒྱལ་ཁབ་ལས་ཁུངས་ཀྱི་སྡེ་ཁག་ཁག་གི་སྒྲིག་ཁོངས་ཁུ་བསྡུ་བྱེད་པའི་ལས་འགན་ལེགས་འགྲུབ་བྱུང་ལ། ལས་ཀ་ཁག་སྤྱིའི་ཆ་ནས་ལམ་ལྷོང་བྱུང་ཡོད། རྗེས་སོར་“གཏན་འཁེལ་གསུམ་”ཞེས་པའི་ལྟེ་བའི་ལྷུ་ཚིགས་འདི་དམ་འཛིན་ཡག་པོ་བྱས་ཏེ། ལས་འགན་ལ་ཞིབ་འཇུག་གནད་འཁེལ་དང་། དབྱེ་མཚམས་གསལ་འབྱེད། འོས་འགན་ཁ་གསལ་བཅས་བྱེད་དགོས། ནང་ཁུལ་དུ་བཙུགས་པའི་སྒྲིག་གཞི་ཚན་རིག་དང་མཐུན་པར་བཀོད་སྒྲིག་བྱེད་དགོས་པ་དང་། གསར་དུ་བཙུགས་པ་དང་ལས་འགན་ལེགས་སྒྲིག་བྱས་པའི་སྡེ་ཁག་གི་སྒྲིག་གཞི་དང་སྒྲིག་ཁོངས་དང་ལས་གནས་ཀྱི་གྲངས་འབོར་ཚོད་འཛིན་ནན་མོ་བྱེད་དགོས། ལས་ཀའི་སྒྲུབ་ཚད་མགྱོགས་སུ་བཏང་ནས་ཀྲུང་དབྱང་རིམ་པའི་བསྒྱུར་བཅོས་ཀྱི་འགན་འཁྲི་གཏན་འཁེལ་བྱས་པའི་དུས་ཚད་ནང་སྤུས་ཚད་མཐོ་བའི་ངང་ལེགས་འགྲུབ་ཡོང་རྒྱུ་འགན་ལེན་བྱེད་དགོས།

ས་གནས་སྒྲིག་གཞིའི་བསྒྱུར་བཅོས་རྩ་འཛུགས་དང་ལག་བསྟར་བྱེད་པར་ཚད་མཐོའི་མཐོང་ཆེན་བྱེད་པ་མ་ཟད་དེ་ཡག་པོར་སྒྲུབ་དགོས། ས་གནས་ཀྱི་སྒྲིག་གཞིའི་བསྒྱུར་བཅོས་དེ་ཀྲུང་དབྱང་རིམ་པའི་བསྒྱུར་བཅོས་དང་གཅིག་འདོམས་ཀྱིས་སྦྲེལ་མཐུད་བྱས་ཏེ་སྐུལ་འདེད་ཏན་ཏིག་བྱེད་དགོས། ས་གནས་ཀྱི་དངུལ་རྩ་དང་། ཚན་རྩལ། སྤྱི་ཚོགས་ལས་ཀ །ཞིང་ལས་དང་གྲོང་གསེབ། གཞི་གྲངས་དོ་དམ། བགྲེས་སོང་ལས་ཀ་སོགས་ཁྱབ་ཁོངས་ཀྱི་འགན་ནུས་སྒྲིག་གཞི་ལེགས་སྒྲིག་དང་ལེགས་སྒྱུར་བྱེད་པ་དང་། དེ་བཞིན་དོན་གྲོས་མཐུན་སྦྱོར་སྒྲིག་གཞི་ཁུ་བསྡུ་དང་ཚད་ལྡན་དུ་གཏོང་བ་སོགས་ནི་ས་གནས་ཀྱིས་དོན་འཁྱོལ་བྱ་ཡུལ་ཡིན་པ་ཏང་དང་རྒྱལ་ཁབ་ཀྱི་སྒྲིག་གཞིའི་བསྒྱུར་བཅོས་ཇུས་གཞི་ནང་བླང་བྱ་གསལ་པོ་བཏོན་ཡོད་པས་ཇི་མ་ཇི་བཞིན་ནན་ཏན་གྱིས་དོན་འཁྱོལ་བྱེད་དགོས། ནན་བཤད་བྱེད་དགོས་པ་ཞིག་ནི། ཞིང་ཆེན་（རང་སྐྱོང་ལྗོངས་དང་ཐད་སྐྱོང་གྲོང་ཁྱེར་）ཏང་ཨུས་དངུལ་རྩ་ཨུ་ལྷན་དང་དེའི་གཞུང་ལས་ཁང་དང་དངུལ་རྩའི་ལས་དོན་ཨུ་ལྷན་སྒྲིག་འཛུགས་བྱེད་པར། ས་གནས་ཀྱི་ད་ཡོད་དངུལ་རྩའི་ལས་ཀའི་སྒྲིག་གཞིའི་རྨང་གཞིའི་ཐོག་གཅིག་འདོམས་ཀྱིས་བཀོད་སྒྲིག་བྱས་ཏེ། སྒྲིག་གཞི་གཅིག་གིས་ལྟ་སྐུལ་དོ་དམ་དང་ཉམས་ཉེན་འགོག་སེལ་བྱེད་པ་གཙོ་བོར་འཛིན་ཞིང་། དངུལ་རྩའི་སྒྲིག་གཞིའི་ཏང་འཛུགས་ལས་ཀར་ཤུགས་རྒྱག་པ་དེ་ཡིན། ཚན་རྩལ་སྡེ་ཁག་གི་ལས་འགན་དང་སྒྲིག་གཞི་ལེགས་སྒྲིག་བྱེད་པའི་ཐད། ས་གནས་ཀྱི་གནས་ཚུལ་ཀྲུང་དབྱང་དང་མི་འདྲ་ལ་ཐག་གཅོད་བྱེད་དགོས་པའི་འབུར་ཐོན་གནད་དོན་ཡང་མི་འདྲ་བ་ཡིན། ཀྲུང་དབྱང་གིས་ཚན་རྩལ་ཨུ་ལྷན་བཙུགས་དོན་ནི་གཙོ་བོ་ཕྱོགས་སོ་སོའི་ཐོན་ཁུངས་གཅིག་འདོམས་བྱས་ཏེ། སྟོབས་ཤུགས་གཅིག་སྒྲིལ་གྱིས་དོན་ཆེན་སྒྲུབ་རྒྱུ་དེ་ཡིན་པ་དང་། ཞིང་ཆེན་རིམ་པར་མི་འདྲ་ལ་གྲོང་ཁྱེར་དང་རྫོང་རིམ་པར་དེ་བས་ཀྱང་མི་འདྲ་བ་དང་། ས་ཁུལ་མི་འདྲ་བའི་བར་གྱི་གནས་ཚུལ་ཡང་འདྲ་མིན་སྣ་ཚོགས་ཡིན་པས། མཐའ་གཅིག་ཏུ་ཀྲུང་དབྱང་རིམ་པ་དང་ཟླ་མཚུངས་ཡོང་བའི་ངེས་པ་མེད། ཚན་རྩལ་དོ་དམ་གྱི་ལས་འགན་གཅིག་སྡུད་བྱེད་དགོས་རིགས་འོས་འཚམ་གྱིས་གཅིག་སྡུད་བྱེད་དགོས་པ་ལས་ཚད་ཡོད་པའི་ཚན་རྩལ་ཐོན་ཁུངས་“གྲོ་ཕྱེ་རླུང་སྤུར་”ལྟར་བྱེད་མི་རུང་། གྲོང་ཁྱེར་དང་རྫོང་གི་ཚན་རྩལ་སྒྲིག་གཞིའི་ཐད་སྤྱི་ཡོངས་ནས་ཤུགས་རྒྱག་དགོས་པ་མ་ཟད། བལྟོས་བཅས་ཀྱིས་བརྟན་འཇགས་ཡོང་བ་རྒྱུན་འཁྱོངས་བྱེད་དགོས། ས་གནས་ཀྱིས་དོན་གྲོས་མཐུན་སྦྱོར་སྒྲིག་གཞི་མང་དྲགས་པའི་བསམ་འཆར་བཏོན་འདུག །གནད་དོན་དེ་ངེས་པར་དུ་ནན་ཏན་གྱིས་ཐག་གཅོད་བྱེད་དགོས།

ས་གནས་ཀྱི་སྒྲིག་གཞིའི་བསྒྱུར་བཅོས་མཛུབ་སྟོན་ཡིག་ཆའི་མ་ཟིན་གྱིས་ས་གནས་ལ་བསམ་འཆར་ཆེ་ཞིང་སྒྲིག་གཞིའི་བསྒྱུར་བཅོས་དང་ཟུང་འབྲེལ་བྱས་ཏེ་གཅིག་འདོམས་ཀྱིས་སྐུལ་འདེད་གཏོང་དགོས་པའི་སྲིད་འཛིན་དང་ཁྲིམས་བསྟར་སྒྲིག་གཞིའི་བསྒྱུར་བཅོས་དང་། གཞི་རིམ་དོ་དམ་སྒྲིག་གཞིའི་བསྒྱུར་བཅོས། མི་སྣའི་སྒྲིག་ཁོངས་ལེགས་སྒྱུར་བགོ་སྒྲིག་བྱེད་པ་དང་འགོ་ཁྲིད་ཀྱི་གྲངས་ཚད་དོ་དམ་གྱི་བླང་བྱ་དོན་འཁྱོལ་བྱེད་པ་སོགས་ཀྱི་ཐད་བཀོད་སྒྲིག་བྱེད་དགོས་པ་དང་། ས་གནས་ཁག་ལ་མཛུབ་སྟོན་བྱས་ཏེ་དོན་དངོས་དང་ཟུང་འབྲེལ་གྱིས་ལག་བསྟར་དོན་འཁྱོལ་ཡག་པོ་བྱེད་དགོས། ཏང་གི་ཚོགས་ཆེན་ཉི་ཤུ་པའི་ཐབས་ཇུས་བཀོད་སྒྲིག་ལྟར། སྲིད་འཛིན་དང་ཁྲིམས་བསྟར་སྒྲིག་གཞིའི་བསྒྱུར་བཅོས་ཟབ་སྤེལ་སྔར་ལས་ལྷག་པར་བྱེད་པ་དང་། སྲིད་གཞུང་སྡེ་ཁག་གི་ཁྲིམས་བསྟར་བྱེད་པོའི་འགན་འཁྲི་ནན་དཀྲིས། ལས་ཁུངས་ཀྱིས་ཁྲིམས་བསྟར་འཐུས་རིགས་ཡིན་ཚེ་ཁྲིམས་བསྟར་དཔུང་སྡེ་ལོགས་སུ་མི་འཛུགས་པ། ད་ཡོད་ཀྱི་ཁྲིམས་བསྟར་དཔུང་སྡེ་ཉུང་འཕྲི་དང་ཟླ་སྒྲིལ་གཏོང་བ། གཞི་རིམ་གྱི་ཕྱོགས་བསྡུས་ཁྲིམས་བསྟར་སྒྲིག་སྲོལ་དང་ལམ་སྲོལ་འཐུས་ཚང་གཏོང་བ་བཅས་བྱེད་དགོས།

ནན་བཤད་བྱེད་དགོས་པ་ཞིག་ནི། སྒྲིག་གཞིའི་བསྒྱུར་བཅོས་རྩ་འཛུགས་དང་ལག་བསྟར་བྱེད་པའི་ལག་ཀ་ཡག་པོར་སྒྲུབ་དགོས་ན། ངེས་པར་དུ་ལྕགས་ལྟ་བུའི་སྒྲིག་ཁྲིམས་ཀྱིས་གཞོགས་འདེགས་བྱེད་དགོས། ངེས་པར་དུ་ཏང་ཀྲུང་དབྱང་གི་སྒྲིག་གཞི་བསྒྱུར་བཅོས་སྐོར་གྱི་སྒྲིག་ཁྲིམས་བླང་བྱ་བརྩི་སྲུང་ནན་མོ་བྱེད་དགོས་པ་དང་། རིམ་པ་ཁག་གི་བསྒྱུར་བཅོས་དང་འབྲེལ་བའི་སྡེ་ཁག་གིས་མི་སྣ་འཕྲལ་དགོས་ཀྱིས་བསྡུ་བ་དང་། ལས་བྱེད་པ་འཕྲལ་དགོས་ཀྱིས་བསྐོ་གཞག་ལེགས་སྒྲིག་སྤེལ་རེས་བྱེད་པ། ཆེད་ལས་ལག་རྩལ་གོ་མིང་འཕྲལ་དགོས་ཀྱིས་དཔྱད་འཇོག་གཏན་འབེབས་བྱེད་པ་སོགས་གཏན་འགོག་བྱེད་དགོས། དགོངས་སྐོར་སྙན་སེང་ཞུ་བའི་ལམ་ལུགས་ལག་བསྟར་ནན་མོ་བྱས་ཏེ། བསྒྱུར་བཅོས་ཀྱི་དོན་དག་ཆེ་རིགས་ངེས་པར་དུ་ཏང་ཀྲུང་དབྱང་ལ་ཆོག་མཆན་ཞུ་དགོས། བསྒྱུར་བཅོས་བྱེད་པར་ཏང་ཀྲུང་དབྱང་གི་གཏན་འབེབས་དང་ལེན་བྱེད་དགོས་ལ། ངེས་པར་དུ་བཀའ་སྒྲུབ་བཀག་སྲུང་བྱེད་དགོས།

ལོ་མང་རིང་། རིམ་པ་ཁག་གི་སྒྲིག་ཁོངས་གཞུང་ལས་ཁང་གིས་ལྟེ་བར་དམིགས་པ་དང་སྤྱི་ཡོངས་ལ་ཞབས་འདེགས་ཞུས་ཏེ། ཕན་འབྲས་ལྡན་པའི་ལས་ཀ་མང་པོ་བསྒྲུབས་པ་དང་། སྒྲིག་གཞིའི་སྒྲིག་ཁོངས་བྱ་གཞག་འཕེལ་རྒྱས་འགྲོ་བར་སྐུལ་སྤེལ་ནུས་ལྡན་བྱས། ཆབ་སྲིད་ལས་ཁུངས་འཛུགས་སྐྲུན་ལ་མུ་མཐུད་ཤུགས་རྒྱག་པ་དང་། བརྗོད་དོན་གཙོ་བོའི་སློབ་གསོ་དམ་འཛིན་ཏན་ཏིག །བརྟག་དཔྱད་ཞིབ་འཇུག་གི་སྤྱོད་ཚུལ་དར་སྤེལ། ཐབས་ཤེས་ངོ་མ་འདོན་པ་དང་དོན་འབྲས་བརྩོན་ལེན། སྒྲིག་ཨུའི་བློ་འདོན་དང་ལག་རོགས་ཡག་པོ་བཅས་བྱེད་དགོས། འགོ་ཁྲིད་ཚན་པའི་འཛུགས་སྐྲུན་ལ་མུ་མཐུད་ཤུགས་རྒྱག་པ་དང་། ཆེད་ལས་ནུས་པའི་འཛུགས་སྐྲུན་ལ་ཤུགས་བརྒྱབ་སྟེ། ཆབ་སྲིད་བཟང་བ་དང་། ལས་སྒོར་བྱང་བ། སྤྱོད་ཚུལ་ལེགས་པ་བཅས་ཀྱི་བྱང་ཚད་མཐོ་བའི་ཆེད་ལས་ཅན་གྱི་སྒྲིག་གཞིའི་སྒྲིག་ཁོངས་ཀྱི་ལས་བྱེད་པའི་དཔུང་སྡེ་ཞིག་ཤུགས་བཏོན་ནས་འཛུགས་སྐྲུན་བྱེད་དགོས། རིམ་པ་ཁག་གི་ཏང་ཨུས་སྒྲིག་གཞིའི་སྒྲིག་ཁོངས་ལས་ཀར་ཚད་མཐོའི་མཐོང་ཆེན་བྱེད་དགོས་པ་དང་། རིམ་པ་ཁག་གི་རྩ་འཛུགས་སྡེ་ཁག་གིས་གཏོགས་ཁོངས་དོ་དམ་བླང་བྱ་ནན་ཏན་གྱིས་དོན་འཁྱོལ་བྱས་ཏེ། ཏང་གིས་སྒྲིག་གཞིའི་སྒྲིག་ཁོངས་ལ་དོ་དམ་བྱེད་པའི་ཆབ་སྲིད་ཀྱི་དགེ་མཚན་དང་། རྩ་འཛུགས་ཀྱི་དགེ་མཚན། ལམ་ལུགས་ཀྱི་དགེ་མཚན་བཅས་སྒོ་ཀུན་ནས་འདོན་སྤེལ་བྱེད་དགོས། སྒྲིག་ཨུའི་ཁོངས་གཏོགས་སྡེ་ཚན་ཁག་གིས་ཕན་ཚུན་རོགས་རེས་དང་གཞོགས་འདེགས་ལ་ཤུགས་བརྒྱབ་སྟེ་ཐུན་མོང་ཐོག་སྒྲིག་གཞིའི་སྒྲིག་ཁོངས་ལས་ཀ་ཡག་པོར་སྒྲུབ་དགོས།

བསོད་ནམས་དབང་རྒྱལ་གྱིས་བསྒྱུར།