ཡིད་ཆེས་དང་གཏིང་ཤུགས་ཇེ་བརྟན་དུ་བཏང་ནས་དཔལ་འབྱོར་བསྐྱར་འཕར་ལེགས་འགྱུར་ཡོང་བར་སྔར་བས་སྐུལ་འདེད་གཏོང་དགོས།

རྒྱལ་ཁབ་ཕྱི་ནང་གིས་དོ་ཁུར་ཆེན་པོ་བྱེད་པའི་ཀྲུང་དབྱང་གི་དཔལ་འབྱོར་ལས་དོན་ཚོགས་འདུ་ཟླ་12ཚེས་11ཉིན་ནས་ཚེས་12ཉིན་བར་པེ་ཅིན་དུ་འཚོགས། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཚོགས་འདུའི་ཐོག་གསུང་བཤད་གལ་ཆེན་གནང་སྟེ། ཕྱོགས་ཡོངས་ནས་2023ལོའི་དཔལ་འབྱོར་ལས་དོན་ལ་ཕྱོགས་བསྡོམས་དང་མིག་སྔའི་དཔལ་འབྱོར་དུས་བབ་ལ་དབྱེ་ཞིབ་གཏིང་ཟབ་གནང་བ་དང་། 2024ལོའི་དཔལ་འབྱོར་ལས་དོན་ལ་མ་ལག་ལྡན་པར་བཀོད་སྒྲིག་གནང་། ང་ཚོས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་གྱི་དགོངས་དོན་སློབ་སྦྱོང་དང་གོ་བ་གཏིང་ཟབ་ལེན་པ་དང་། ཕྱོགས་ཡོངས་ནས་ཏང་གི་ཚོགས་ཆེན་ཉི་ཤུ་པའི་དགོངས་དོན་དང་ཀྲུང་དབྱང་གི་དཔལ་འབྱོར་ལས་དོན་ཚོགས་འདུའི་དགོངས་དོན་ལག་བསྟར་དོན་འཁྱོལ་བྱེད་ཅིང་། ཡིད་ཆེས་བརྟན་པོ་དང་གསར་གཏོད་ཡར་བརྩོན་བྱས་ཏེ། དཔལ་འབྱོར་དང་སྤྱི་ཚོགས་འཕེལ་རྒྱས་གཏོང་བའི་དམིགས་འབེན་ལས་འགན་ཁག་མངོན་འགྱུར་གང་ཐུབ་བྱེད་དགོས་པ་དང་། སྤུས་ཚད་མཐོ་བའི་འཕེལ་རྒྱས་ཀྱི་བྱ་སྤྱོད་དངོས་དང་ཕན་འབྲས་ཀྱི་ཐོག་ནས་ཀྲུང་གོའི་ལུགས་ཀྱི་དེང་རབས་ཅན་ལ་བརྟེན་ནས་ཕྱོགས་ཡོངས་ནས་རྒྱལ་ཁབ་སྟོབས་ལྡན་འཛུགས་སྐྲུན་དང་མི་རིགས་བསྐྱར་དར་གྱི་བྱ་གཞག་རླབས་པོ་ཆེ་ཡོང་བར་སྐུལ་འདེད་གཏོང་ཆེད་ལེགས་སྐྱེས་གསར་པ་སྔར་ལས་ཆེ་བ་འབུལ་དགོས།

2023ལོར་རྙོག་འཛིང་ཆེ་བའི་རྒྱལ་ནང་དང་རྒྱལ་སྤྱིའི་དུས་བབ་ཀྱི་མདུན་དུ་རང་རྒྱལ་གྱི་དཔལ་འབྱོར་དེ་རླབས་ཕྲེང་རྣམ་པའི་འཕེལ་རྒྱས་དང་ཀྱག་ཀྱོག་རྣམ་པའི་མདུན་སྐྱོད་ཁྲོད་བསྟོད་རིན་བསྔགས་རིན་ཡོད་པའི་གྲུབ་འབྲས་གསར་པ་ཐོབ་ཡོད། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གིས་ཏང་ཡོངས་དང་རྒྱལ་ཡོངས་མི་རིགས་ཁག་གི་མི་དམངས་ལ་མཐུན་སྒྲིལ་དང་སྣེ་ཁྲིད་བྱས་ཏེ། ཕྱི་ཕྱོགས་ཀྱི་གནོན་ཤུགས་འགོག་པ་དང་ནང་ཁུལ་གྱི་དཀའ་ངལ་སེལ་བ། ཕྱོགས་ཡོངས་ནས་བསྒྱུར་བཅོས་སྒོ་འབྱེད་གཏིང་ཟབ་ཏུ་གཏོང་བ། སྤྱི་ཁོག་སྙོམ་སྒྲིག་བྱེད་ཤུགས་ཆེ་རུ་གཏོང་བ། ནང་མཁོ་རྒྱ་སྐྱེད་དང་གྲུབ་ཚུལ་ལེགས་སྒྱུར། ཡིད་ཆེས་བརྟན་གཏོང་། ཉེན་ཁ་འགོག་སེལ་བཅས་ལ་གཞོལ་བས། རང་རྒྱལ་གྱི་དཔལ་འབྱོར་བསྐྱར་འཕར་ལེགས་འགྱུར་དང་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་ཏན་ཏིག་བཏང་ཡོད། དེང་རབས་ཅན་གྱི་ཐོན་ལས་མ་ལག་འཛུགས་སྐྲུན་ལ་གྲུབ་འབྲས་གལ་ཆེན་ཐོབ་པ་དང་། ཚན་རྩལ་གསར་གཏོད་ལ་འགག་སྒྲོལ་གསར་པ་བྱུང་བ། བསྒྱུར་བཅོས་སྒོ་འབྱེད་གཏིང་ཟབ་ཏུ་གཏོང་བ། བདེ་འཇགས་འཕེལ་རྒྱས་ཀྱི་རྨང་གཞི་སྲ་བརྟན་དུ་གཏོང་བ། དམངས་འཚོ་འགན་སྲུང་ནུས་ཤུགས་ལྡན་པ་དང་ཕན་འབྲས་ཐོན་པ་བཅས་བྱས་ཏེ། ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་འཛུགས་སྐྲུན་བྱེད་པའི་གོམ་སྟབས་བརྟན་པོ་སྤོས་བ་རེད། གྲུབ་འབྲས་དེ་དག་ཐོབ་པའི་ཆེས་རྩ་བ་ནི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ལམ་སྣེ་འཁྲིད་པ་དང་། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པས་ཚན་རིག་དང་མཐུན་པའི་མཛུབ་ཁྲིད་གནང་སྟེ། “གཏན་འཁེལ་གཉིས་”ནི་ང་ཚོས་དཀའ་ངལ་དང་ཉེན་ཁ་མཐའ་དག་ལས་རྣམ་པར་རྒྱལ་བ་དང་ངེས་གཏན་མེད་པའི་ཆ་མཐའ་དག་ལ་ཁ་གཏད་གཅོག་པའི་གཏན་འཁེལ་རང་བཞིན་ཆེ་ཤོས་དང་། གཏིང་ཤུགས་ཆེ་ཤོས། འགན་ལེན་ཆེ་ཤོས་བཅས་ཡིན་པ་ར་སྤྲོད་གང་ལེགས་བྱས་ཡོད།

2023ལོའི་དཔལ་འབྱོར་ལས་དོན་གྱི་གྲུབ་འབྲས་ནི་ལས་སླ་པོར་ཐོབ་པ་ཞིག་མ་ཡིན་ཞིང་། མི་སེམས་ལ་སྐུལ་མ་ཐེབས་པ་ཞིག་ཡིན་པས་ང་ཚོས་དཔལ་འབྱོར་ལས་དོན་ཡག་པོ་སྒྲུབ་པའི་ཡིད་ཆེས་དང་གཏིང་ཤུགས་སྔར་བས་ཇེ་ཆེ་རུ་ཕྱིན་ཡོད། དུས་རབས་གསར་པའི་ལོ་བཅུའི་ནང་རང་རྒྱལ་གྱི་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ཀྱི་བགྲོད་ལམ་ཐོག་བརྟན་པོའི་ངང་མདུན་དུ་སྐྱོད་པ་དང་། རྒྱལ་ནང་གི་ཐོན་སྐྱེད་རིན་ཐང་བསྡོམས་འབོར་ལོ་རེར་ཆ་སྙོམས་6%ཡན་འཕར་བ། དཔལ་འབྱོར་བསྡོམས་འབོར་གྱིས་འཛམ་གླིང་གི་དཔལ་འབྱོར་ཁྲོད་ཟིན་པའི་བསྡུར་ཚད་12.3%ནས་18%ཡན་དུ་འཕར་བ། འཛམ་གླིང་གི་དཔལ་འབྱོར་འཕར་བར་ལོ་རེར་ཆ་སྙོམས་ལེགས་སྐྱེས་འབུལ་ཚད་30%ལས་བརྒལ་བ་བཅས་རེད། རིམས་ནད་འགོག་པའི་ལོ་གསུམ་ནང་རང་རྒྱལ་གྱི་དཔལ་འབྱོར་ཐད་དཀའ་ངལ་སྣ་ཚོགས་ཁྱད་བསད་བྱས་ནས་ལོ་རེར་ཆ་སྙོམས་འཕར་ཚད་4.5%ཟིན་ནས་འཛམ་གླིང་གི་ཆ་སྙོམས་འཕར་ཚད་ལས་བརྒྱ་ཆའི་གྲངས་ཐིག་2.5ཡས་མས་མཐོ་ཡོད་པ་དང་དཔལ་འབྱོར་དངོས་ཚན་གཙོ་བོའི་ཁྲོད་མདུན་གྲལ་དུ་སླེབས་ཡོད། 2023ལོ་ནི་ལོ་གསུམ་རིང་གི་རིམས་ནད་སྔོན་འགོག་ཚོད་འཛིན་གྱི་དུས་མཚམས་བསྒྱུར་རྗེས་ཀྱི་དཔལ་འབྱོར་སླར་གསོ་འཕེལ་རྒྱས་ཀྱི་ལོ་ཞིག་ཡིན་པ་དང་། འཛམ་གླིང་གི་དཔལ་འབྱོར་བསྟུད་མར་འཕར་མི་ཐུབ་པའི་གནས་ཚུལ་འོག་རང་རྒྱལ་གྱི་དཔལ་འབྱོར་སྤྱིའི་ཆ་ནས་བསྐྱར་འཕར་ལེགས་འགྱུར་བྱུང་ཡོད། དུས་ཚིགས་དང་པོ་ནས་གསུམ་པའི་བར་རང་རྒྱལ་གྱི་དཔལ་འབྱོར་འཕར་ཚད་5.2%ཟིན་པ་དང་འཕར་ཚད་དེ་གོ་ལ་ཧྲིལ་པོའི་དཔལ་འབྱོར་དངོས་ཚན་གཙོ་བོའི་ཁྲོད་སྔོན་གྲལ་དུ་ཚུད་པ་མཐའ་འཁྱོངས་བྱས་ཐུབ་ཡོད། སྔོན་དཔག་བྱས་ན་ལོ་ཧྲིལ་པོའི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་སྔོན་དཔག་དམིགས་ཚད་གཙོ་བོ་ལེགས་འགྲུབ་ཡོང་རྒྱུ་དང་རང་རྒྱལ་གྱིས་གོ་ལ་ཧྲིལ་པོའི་དཔལ་འབྱོར་འཕར་རྒྱུར་ལེགས་སྐྱེས་འབུལ་ཚད་གསུམ་ཆ་གཅིག་ཟིན་རྒྱུ་རེད། གོ་ལ་ཧྲིལ་པོར་བལྟས་ཚེ། སྔར་བཞིན་“ཡུལ་ལྗོངས་འདི་གར་ལྷག་པར་མཛེས་པ་”ཞིག་རེད།

དཔལ་འབྱོར་གྱི་ཆོས་ཉིད་ངོས་འཛིན་དང་། ཁོང་ཆུད། བེད་སྤྱོད་བཅས་ཡང་དག་བྱ་རྒྱུ་ནི་དཔལ་འབྱོར་གྱི་ལས་དོན་ཡག་པོ་སྒྲུབ་པའི་རྩ་དོན་གལ་ཆེན་ཞིག་ཡིན། ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གིས་དུས་རབས་གསར་པར་རང་རྒྱལ་གྱི་དཔལ་འབྱོར་འཕེལ་རྒྱས་ལ་འགོ་ཁྲིད་བྱེད་པའི་ལེགས་འགྲུབ་བྱུང་བའི་ལག་ལེན་ཁྲོད་འདུ་ཤེས་གསར་པ་དང་། བསམ་བློ་གསར་པ། འཐབ་ཇུས་གསར་པ་རབ་དང་རིམ་པ་བཏོན་ནས་ཞི་ཅིན་ཕིང་གི་དཔལ་འབྱོར་དགོངས་པ་གྲུབ་པ་དང་འཕེལ་རྒྱས་བཏང་བ་རེད། དཔལ་འབྱོར་དུས་བབ་ལ་ལྟ་སྟངས་ཅི་འདྲ་འཛིན་རྒྱུ་དང་དཔལ་འབྱོར་ལས་དོན་ཅི་ལྟར་སྒྲུབ་རྒྱུའི་གནད་དོན་གལ་ཆེན་ལ་ཚན་རིག་དང་མཐུན་པར་ལན་བཏབ་པ་དང་། དེའི་ཐོག་ནས་ང་ཚོའི་ཏང་གིས་དཔལ་འབྱོར་འཕེལ་རྒྱས་ཀྱི་ཆོས་ཉིད་དང་ལྷག་པར་དུ་སྤྱི་ཚོགས་རིང་ལུགས་དཔལ་འབྱོར་འཛུགས་སྐྲུན་གྱི་ཆོས་ཉིད་ཀྱི་ལྟ་བ་ཟབ་མོ་གཅིག་སྡུད་དུ་མཚོན་ཡོད། ཞི་ཅིན་ཕིང་གི་དཔལ་འབྱོར་དགོངས་པའི་ཚན་རིག་དང་མཐུན་པའི་མཛུབ་ཁྲིད་འོག་རང་རྒྱལ་གྱི་དཔལ་འབྱོར་འཕེལ་རྒྱས་དེ་སྔར་བས་སྤུས་ཚད་མཐོ་བ་དང་། སྔར་བས་ལས་ཕྱོད་ཆེ་བ། སྔར་བས་དྲང་སྙོམས་ཡིན་པ། སྔར་བས་རྒྱུན་མཐུད་ཐུབ་པ། སྔར་བས་བདེ་འཇགས་ཡིན་པ་བཅས་ཀྱི་འཕེལ་རྒྱས་ལམ་བུའི་ཐོག་བསྐྱོད་ནས་ཀྲུང་གོའི་དཔལ་འབྱོར་གྱི་ངོ་མཚར་ཆེ་བའི་ལེའུ་གསར་པ་ཞིག་བརྩམས་ཡོད། ཉེ་བའི་ལོ་ཤས་རིང་། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་འགྱུར་མེད་སྟོབས་ལྡན་གྱི་འགོ་ཁྲིད་འོག་ང་ཚོས་ཕན་ནུས་ལྡན་པའི་སྒོ་ནས་རྒྱལ་ནང་དང་རྒྱལ་སྤྱིའི་སྤྱི་ཡོངས་གཉིས་གཅིག་འདོམས་དང་། རིམས་ནད་སྔོན་འགོག་ཚོད་འཛིན་དང་དཔལ་འབྱོར་དང་སྤྱི་ཚོགས་འཕེལ་རྒྱས་གཅིག་འདོམས། འཕེལ་རྒྱས་དང་བདེ་འཇགས་གཅིག་འདོམས་བཅས་བྱས་ནས་དུས་རབས་གསར་པར་དཔལ་འབྱོར་ལས་དོན་ཡག་པོ་སྒྲུབ་པའི་ཆོས་ཉིད་ཀྱི་རང་བཞིན་ལྡན་པའི་ངོས་འཛིན་གཏིང་ཟབ་ཏུ་བཏང་ཡོད་དེ། ངེས་པར་དུ་སྤུས་ཚད་མཐོ་བའི་འཕེལ་རྒྱས་རྒྱུན་འཁྱོངས་བྱ་རྒྱུ་དེ་དུས་རབས་གསར་པའི་གནས་ལུགས་འགྱུར་མེད་དུ་བརྩིས་ནས་འཕེལ་རྒྱས་ཀྱི་འདུ་ཤེས་གསར་པ་ཆ་ཚང་དང་། ཡང་དག །ཕྱོགས་ཡོངས་བཅས་ཀྱི་སྒོ་ནས་ལག་བསྟར་བྱས་ཏེ་དཔལ་འབྱོར་གྱི་སྤུས་ཚད་མཐོར་འདེགས་ཆེན་པོ་དང་གྲངས་འབོར་ལུགས་མཐུན་ངང་འཕར་བར་སྐུལ་འདེད་གཏོང་དགོས་པ། ངེས་པར་དུ་འདོན་ཕྱོགས་ཀྱི་གྲུབ་ཚུལ་རང་བཞིན་གྱི་བསྒྱུར་བཅོས་གཏིང་ཟབ་ཏུ་གཏོང་རྒྱུ་དང་ནུས་ལྡན་གྱི་དགོས་མཁོ་ནུས་ཤུགས་ཆེན་པོས་རྒྱ་སྐྱེད་གཏོང་རྒྱུ་སྟོབས་ཤུགས་མཉམ་འདོན་རྒྱུན་འཁྱོངས་བྱས་པ་དང་། གཞི་ཁྱོན་ཤིན་ཏུ་ཆེ་བའི་ཚོང་ར་དང་ཐོན་སྐྱེད་ནུས་ཤུགས་ཆེན་པོའི་དགེ་མཚན་འདོན་སྤེལ་བྱས་ཏེ། རྒྱལ་ནང་གི་འཁོར་སྐྱོད་ཆེན་པོ་དེ་ནང་མཁོའི་རང་འགུལ་ནུས་ཤུགས་ཀྱི་རྨང་གཞིའི་ཐོག་བཙུགས་ནས་རྒྱལ་སྤྱིའི་འཁོར་སྐྱོད་ཀྱི་སྤུས་ཚད་དང་ཆུ་ཚད་མཐོ་རུ་གཏོང་དགོས་པ། ངེས་པར་དུ་བསྒྱུར་བཅོས་སྒོ་འབྱེད་ལ་བརྟེན་ནས་འཕེལ་རྒྱས་ཀྱི་ནང་སྐྱེས་སྒུལ་ཤུགས་ཆེ་རུ་གཏོང་རྒྱུ་རྒྱུན་འཁྱོངས་བྱས་པ་དང་། གཏིང་ཟབ་པའི་བསྒྱུར་བཅོས་དང་ཆུ་ཚད་མཐོ་བའི་སྒོ་འབྱེད་གཅིག་འདོམས་ཀྱིས་སྐུལ་འདེད་བཏང་སྟེ། སྤྱི་ཚོགས་ཀྱི་ཐོན་སྐྱེད་ནུས་ཤུགས་རྒྱུན་ཆད་མེད་པར་བཅིངས་འགྲོལ་དང་འཕེལ་རྒྱས་གཏོང་ཞིང་། སྤྱི་ཚོགས་ཀྱི་གསོན་ཤུགས་སློང་བ་དང་འཕེལ་བར་བྱེད་དགོས་པ། ངེས་པར་དུ་སྤུས་ཚད་མཐོ་བའི་འཕེལ་རྒྱས་དང་ཆུ་ཚད་མཐོ་བའི་བདེ་འཇགས་མཉམ་འགུལ་ཡག་པོ་ཡོང་རྒྱུ་རྒྱུན་འཁྱོངས་བྱས་ཏེ་སྤུས་ཚད་མཐོ་བའི་འཕེལ་རྒྱས་ལ་བརྟེན་ནས་ཆུ་ཚད་མཐོ་བའི་བདེ་འཇགས་ལ་སྐུལ་འདེད་དང་། ཆུ་ཚད་མཐོ་བའི་བདེ་འཇགས་ལ་བརྟེན་ནས་སྤུས་ཚད་མཐོ་བའི་འཕེལ་རྒྱས་འགན་སྲུང་། འཕེལ་རྒྱས་དང་བདེ་འཇགས་གཉིས་འགུལ་རྣམ་དོ་མཉམ་དང་ཕན་ཚུན་སྤེལ་རེས་བཅས་བྱེད་དགོས་པ། ངེས་པར་དུ་ཀྲུང་གོའི་ལུགས་ཀྱི་དེང་རབས་ཅན་ལ་སྐུལ་འདེད་གཏོང་རྒྱུ་དེ་ཆབ་སྲིད་ཆེ་ཤོས་སུ་བརྩིས་ཏེ། ཏང་གི་གཅིག་གྱུར་གྱི་འགོ་ཁྲིད་འོག །ཆེས་རྒྱ་ཆེ་བའི་མི་དམངས་ལ་མཐུན་སྒྲིལ་དང་། དཔལ་འབྱོར་འཛུགས་སྐྲུན་ཞེས་པའི་ལྟེ་བའི་ལས་དོན་དང་སྤུས་ཚད་མཐོ་བའི་འཕེལ་རྒྱས་ཞེས་པའི་ལས་འགན་ཨང་དང་པོ་འདིར་དམིགས་ཏེ། ཀྲུང་གོའི་ལུགས་ཀྱི་དེང་རབས་ཅན་གྱི་བརྗིད་ཉམས་ཆེ་བའི་འཆར་འགོད་དེ་གོམ་པ་རེ་རེ་བཞིན་མཛེས་སྡུག་ལྡན་པའི་དོན་དངོས་སུ་འགྱུར་བར་བྱེད་དགོས་པ་བཅས་སོ། །“བྱེད་དགོས་ངེས་ལྔ་པོ་”འདིས་ཞི་ཅིན་ཕིང་གི་དཔལ་འབྱོར་དགོངས་པ་སྔར་ལས་གྲ་རྒྱས་དང་གོང་འཕེལ་བཏང་བས། སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བ་དང་ཀྲུང་གོའི་ལུགས་ཀྱི་དེང་རབས་ཅན་འཛུགས་སྐྲུན་མགྱོགས་སུ་གཏོང་བར་སློབ་སྟོན་གྱི་དོན་སྙིང་གལ་འགངས་ཆེ་ལ་གཏིང་ཟབ་ལྡན་པ་རེད།

2024ལོ་ནི་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་དབུ་བརྙེས་ནས་ལོ་ངོ་75འཁོར་བ་དང་། “ལོ་ལྔ་ཚན་བཅུ་བཞི་པའི་”འཆར་འགོད་ལག་བསྟར་བྱེད་པའི་འགག་རྩའི་ལོ་ཞིག་ཡིན་པས་དཔལ་འབྱོར་ལས་དོན་ཡག་པོ་སྒྲུབ་རྒྱུ་ནི་གལ་འགངས་ཤིན་ཏུ་ཆེ་བ་ཞིག་རེད། ང་ཚོས་ངེས་པར་དུ་ཏང་ཀྲུང་དབྱང་གིས་དཔལ་འབྱོར་གྱི་གནས་བབ་ལ་ཚན་རིག་དང་མཐུན་པའི་སྒོ་ནས་བརྡར་ཤ་གཅོད་པར་གོ་བ་གཏིང་ཟབ་བླངས་ནས་དཔལ་འབྱོར་ལས་དོན་ཡག་པོ་སྒྲུབ་པའི་འགན་འཁྲིའི་བསམ་པ་དང་ལས་འགན་འཁུར་སེམས་ཆེ་རུ་ཏན་ཏིག་གཏོང་བ་དང་། ཕྱོགས་ཡོངས་ནས་དཔལ་འབྱོར་ལས་དོན་གྱི་སྤྱིའི་བླང་བྱ་ལག་ལེན་བསྟར་བ། དཔལ་འབྱོར་ལས་དོན་གྱི་སྲིད་ཇུས་བྱེད་ཕྱོགས་ཡང་དག་པ་ཁོང་དུ་ཆུད་པ། ལས་དོན་ལ་སྐུལ་འདེད་གཏོང་བའི་ཐབས་ཤེས་དང་བྱེད་ཐབས་ལ་དང་དོད་བྱེད་པ། འབད་འབུངས་ཡར་བརྩོན་གྱི་བསམ་པའི་འཁྱེར་ཕྱོགས་བཅས་ལ་བརྟེན་ནས་2024ལོའི་དཔལ་འབྱོར་ལས་དོན་གྱི་གཙོ་གནད་ལས་འགན་དོན་འཁྱོལ་ཐུབ་རྒྱུའི་འགན་ལེན་བྱེད་དགོས།

དཔལ་འབྱོར་གྱི་གནས་བབ་ལ་ཚན་རིག་དང་མཐུན་པའི་སྒོ་ནས་བརྡར་ཤ་གཅོད་པ། མིག་སྔའི་གནས་བབ་ལ་ཚན་རིག་དང་མཐུན་པའི་སྒོ་ནས་ངོས་འཛིན་དང་། འབྱུང་འགྱུར་གྱི་འཕེལ་ཕྱོགས་ལ་ཞིབ་འཇུག་དང་བརྡར་ཤ་གཅོད་པ་ནི་དཔལ་འབྱོར་ལས་དོན་ཡག་པོ་སྒྲུབ་པའི་གཞི་རྩའི་སྔོན་འགྲོའི་ཆ་རྐྱེན་ཡིན། ང་ཚོས་ཕྱོགས་ཡོངས་དང་རྩོད་སྒྲུབ་ཀྱི་མིག་རྒྱང་རིང་པོའི་སྒོ་ནས་མིག་སྔའི་དཔལ་འབྱོར་གྱི་དུས་བབ་ལ་གལ་ཆེན་འཛིན་པ་དང་རང་རྒྱལ་ལ་འཕྲད་པའི་གོ་སྐབས་གསར་པ་དང་འགྲན་སློང་གསར་པར་གལ་ཆེན་འཛིན་རྒྱུ་རྒྱུན་འཁྱོངས་བྱེད་དགོས། དཔལ་འབྱོར་བསྐྱར་འཕར་ལེགས་འགྱུར་ཡོང་བར་སྔར་བས་སྐུལ་འདེད་གཏོང་དགོས་ན་དཀའ་ངལ་དང་འགྲན་སློང་འགའ་ཞིག་སེལ་ཐབས་བྱེད་དགོས་པ་སྟེ། གཙོ་བོ་ནི་ཕན་ནུས་ལྡན་པའི་དགོས་མཁོ་མི་འདང་བ་དང་། ལས་རིགས་ཁག་ཅིག་གི་ཐོན་སྐྱེད་བྱེད་ནུས་ཆེ་དྲགས་པ། སྤྱི་ཚོགས་ཀྱི་སྔོན་དཔག་ཅུང་ཞན་པ། ཉེན་ཁ་དང་མངོན་མེད་རྐྱེན་ངན་སྔར་བཞིན་ཅུང་མང་བ་བཅས་དང་། རྒྱལ་ནང་གི་འཁོར་སྐྱོད་ཆེན་པོར་འགག་མདོ་གནས་པ། ཕྱི་ཕྱོགས་ཁོར་ཡུག་གི་རྙོག་འཛིང་རང་བཞིན་དང་། ཛ་དྲག་རང་བཞིན། གཏན་འཁེལ་རང་བཞིན་ཆེ་རུ་འགྲོ་བ་བཅས་རེད། སེམས་ཁྲལ་གྱི་འདུ་ཤེས་ཆེ་རུ་སྐྱེད་ནས་གནད་དོན་དེ་དག་ལ་ནུས་ལྡན་ངང་ཁ་གཏད་གཅོག་པ་དང་ཐག་གཅོད་བྱེད་དགོས། དུས་མཚུངས་སུ། རང་རྒྱལ་གྱི་འཕེལ་རྒྱས་ལ་སྔར་བཞིན་དགེ་མཚན་ལྡན་པའི་ཆ་རྐྱེན་མང་པོ་ཡོད་པ་སྟེ། རང་རྒྱལ་ལ་སྤྱི་ཚོགས་རིང་ལུགས་ཀྱི་ཚོང་རའི་དཔལ་འབྱོར་གྱི་སྒྲིག་སྲོལ་དགེ་མཚན་དང་། གཞི་ཁྱོན་ཤིན་ཏུ་ཆེ་བའི་ཚོང་རའི་དགོས་མཁོའི་དགེ་མཚན། ཐོན་ལས་མ་ལག་ཆ་ཚང་བའི་མཁོ་སྤྲོད་དགེ་མཚན། བྱང་ཚད་མཐོ་བའི་ངལ་རྩོལ་པ་དང་ཁེ་ལས་པ་འབོར་ཆེན་གྱི་ཤེས་ལྡན་མི་སྣའི་དགེ་མཚན་བཅས་ལྡན་པས། དཔལ་འབྱོར་འཕེལ་རྒྱས་གཏོང་བར་ནང་སྐྱེས་ཀྱི་སྒུལ་ཤུགས་དང་། མཉེན་ཤུགས། བག་ཉལ་སྟོབས་ཤུགས་བཅས་ཆེན་པོ་ལྡན་ཡོད་པ་དང་། སྤུས་ཚད་མཐོ་བའི་འཕེལ་རྒྱས་ལ་འདེགས་སྐྱོར་བྱེད་པའི་བདག་རྐྱེན་རྒྱུན་ཆད་མེད་པར་གཅིག་སྡུད་དང་མང་དུ་ཕྱིན་ཡོད་པ་ཆབས་ཅིག་ཏུ་མཐོང་ཐུབ་དགོས། ཕྱོགས་བསྡུས་བྱས་ནས་བལྟས་ན། རང་རྒྱལ་གྱི་འཕེལ་རྒྱས་ལ་འཕྲད་པའི་མཐུན་རྐྱེན་དེ་འགལ་རྐྱེན་ལས་དྲག་པ་དང་། དཔལ་འབྱོར་བསྐྱར་འཕར་ལེགས་འགྱུར་དང་ཡུན་རིང་ལེགས་འགྱུར་ཡོང་བའི་གཞི་རྩའི་འཕེལ་ཕྱོགས་ལ་འགྱུར་ལྡོག་བྱུང་མེད། ང་ཚོའི་མདུན་དུ་ལྷགས་པ་ནི་མདུན་སྐྱོད་ཁྲོད་ཀྱི་གནད་དོན་དང་འཕེལ་རྒྱས་ཁྲོད་ཀྱི་སུན་སྣང་ཡིན་ལ། ཀྲུང་གོའི་དཔལ་འབྱོར་འཕེལ་རྒྱས་ཀྱི་མདུན་ལམ་སྔར་བཞིན་འོད་སྟོང་ལྡན།

སྤྱི་ཡོངས་ཀྱི་བླང་བྱ་ཕྱོགས་ཡོངས་ནས་ལག་ལེན་མཐར་ཕྱིན་བསྟར་བ། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་མཛུབ་སྟོན་དུ་བཟུང་ནས་ཕྱོགས་ཡོངས་ནས་ཏང་གི་ཚོགས་ཆེན་ཉི་ཤུ་པ་དང་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གཉིས་པའི་དགོངས་དོན་ལག་བསྟར་དོན་འཁྱོལ་བྱེད་པ་དང་། བརྟན་ཐོག་ཡར་འཕེལ་གྱི་ལས་ཀའི་དགོངས་གཞི་རྒྱུན་འཁྱོངས་བྱེད་པ། འཕེལ་རྒྱས་ཀྱི་འདུ་ཤེས་གསར་པ་ཆ་ཚང་དང་། ཡང་དག །ཕྱོགས་ཡོངས་བཅས་ཀྱི་སྒོ་ནས་ལག་བསྟར་བྱེད་པ། འཕེལ་རྒྱས་ཀྱི་བཀོད་པ་གསར་པ་གང་མགྱོགས་སྐྲུན་པ། སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་ཤུགས་ཆེར་གཏོང་བ། ཕྱོགས་ཡོངས་ནས་བསྒྱུར་བཅོས་སྒོ་འབྱེད་གཏིང་ཟབ་ཏུ་གཏོང་བ། ཆུ་ཚད་མཐོ་བའི་ཚན་རྩལ་རང་ཚུགས་རང་དར་ཡོང་བར་སྐུལ་འདེད་གཏོང་བ་བཅས་བྱེད་དགོས། སྤྱི་ཁོག་སྙོམ་སྒྲིག་བྱེད་ཚད་ཆེ་རུ་གཏོང་བ་དང་། ནང་མཁོ་རྒྱ་སྐྱེད་དང་འདོན་ཕྱོགས་ཀྱི་གྲུབ་ཚུལ་རང་བཞིན་གྱི་བསྒྱུར་བཅོས་ཟབ་སྤེལ་གཅིག་འདོམས། གྲོང་ཁྱེར་དང་གྲོང་རྡལ་ཅན་གསར་པ་དང་གྲོང་གསེབ་ཕྱོགས་ཡོངས་ནས་དར་རྒྱས་གཏོང་བར་གཅིག་འདོམས། སྤུས་ཚད་མཐོ་བའི་འཕེལ་རྒྱས་དང་ཆུ་ཚད་མཐོ་བའི་བདེ་འཇགས་གཅིག་འདོམས་བཅས་བྱེད་དགོས། དཔལ་འབྱོར་གྱི་སྐྱེ་སྟོབས་ཆེ་རུ་ཏན་ཏིག་གཏོང་བ་དང་། ཉེན་ཁ་སྔོན་འགོག་དང་སེལ་ཐབས་བྱེད་པ། སྤྱི་ཚོགས་ཀྱི་སྔོན་དཔག་ལེགས་སུ་གཏོང་བ་བཅས་ཀྱིས་དཔལ་འབྱོར་བསྐྱར་འཕར་ལེགས་འགྱུར་ཡོང་བའི་རྣམ་པ་ཇེ་བརྟན་དང་ཇེ་བཟང་དུ་བཏང་སྟེ། དཔལ་འབྱོར་གྱི་སྤུས་ཚད་མཐོར་འདེགས་ཆེན་པོ་དང་གྲངས་འབོར་ལུགས་མཐུན་ངང་འཕར་བར་རྒྱུན་མཐུད་དུ་སྐུལ་འདེད་གཏོང་དགོས། དམངས་འཚོའི་བདེ་རྩ་ཆེ་རུ་གཏོང་བ་དང་། སྤྱི་ཚོགས་བརྟན་བརླིང་མཐའ་འཁྱོངས་བྱེད་ཅིང་། ཕྱོགས་ཡོངས་ནས་ཀྲུང་གོའི་ལུགས་ཀྱི་དེང་རབས་ཅན་ལ་བརྟེན་ནས་རྒྱལ་ཁབ་སྟོབས་ལྡན་འཛུགས་སྐྲུན་དང་མི་རིགས་བསྐྱར་དར་གྱི་བྱ་གཞག་རླབས་པོ་ཆེ་ཡོང་བར་སྐུལ་འདེད་གཏོང་དགོས།

སྲིད་ཇུས་ཀྱི་ཁྲིད་ཕྱོགས་ཁོང་དུ་ཡང་དག་པར་ཆུད་པ། བརྟན་ཐོག་ཡར་འཕེལ་དང་། ཡར་སྐུལ་བརྟན་གཏོང་། སྔོན་འཛུགས་རྗེས་གཏོར་བཅས་རྒྱུན་འཁྱོངས་བྱས་ཏེ་སྔོན་དཔག་བརྟན་པོ་དང་། འཕར་སྣོན་བརྟན་པོ། ལས་ཞུགས་བརྟན་པོ་བཅས་ལ་ཕན་པའི་སྲིད་ཇུས་མང་ཙམ་འདོན་པ་དང་། སྤེལ་སྟངས་བསྒྱུར་བ་དང་། གྲུབ་ཚུལ་ལེགས་སྒྲིག །སྤུས་ཚད་མཐོར་འདེགས། ཕན་འབྲས་མཐོར་འདེགས་བཅས་ཀྱི་ཐད་ཡར་རྒྱས་བརྩོན་ལེན་ཧུར་ཐག་བྱས་ནས་བརྟན་ཐོག་ལེགས་འཕེལ་གྱི་རྨང་གཞི་ཟམ་མི་འཆད་པར་བརྟན་དུ་གཏོང་དགོས། སྤྱི་ཁོག་སྲིད་ཇུས་ཀྱི་ལྡོག་པའི་འཁོར་ཡུན་དང་འཁོར་ཡུན་བརྒལ་བའི་སྙོམ་སྒྲིག་ལ་ཤུགས་རྒྱག་པ་དང་། དགེ་མཚན་ལྡན་པའི་ནོར་སྲིད་སྲིད་ཇུས་དང་བརྟན་བརླིང་གི་དངུལ་ལོར་སྲིད་ཇུས་མུ་མཐུད་ལག་ལེན་བསྟར་བ། སྲིད་ཇུས་ཀྱི་བྱེད་ཐབས་གསར་གཏོད་དང་མཐུན་སྦྱོར་གཞོགས་འདེགས་ལ་ཤུགས་རྒྱག་པ་བཅས་བྱེད་དགོས། དགེ་མཚན་ལྡན་པའི་ནོར་སྲིད་སྲིད་ཇུས་ལ་ཤུགས་འོས་འཚམ་རྒྱག་པ་དང་། སྤུས་ཚད་དང་ཕན་འབྲས་ཆེ་རུ་གཏོང་བ། ནོར་སྲིད་སྲིད་ཇུས་ཀྱི་བར་སྟོང་བེད་སྤྱོད་ཡག་པོ་བྱེད་པ། ནོར་སྲིད་ཀྱི་གཏོང་སྒོའི་གྲུབ་ཚུལ་ལེགས་སྒྱུར་བྱེད་པ། གྲུབ་ཚུལ་རང་བཞིན་གྱི་དཔྱ་ཁྲལ་གཅོག་པ་དང་གྲོན་དངུལ་གཅོག་པའི་སྲིད་ཇུས་དོན་འཁྱོལ་ཡག་པོ་བྱེད་པ། ནོར་སྲིད་ཀྱི་རྒྱུན་མཐུད་རང་བཞིན་ཆེ་རུ་གཏོང་བ། གཞི་རིམ་གྱི་“འགན་ལེན་གསུམ་”གྱི་མཐའ་ཚད་བརྟན་པོ་སྲུང་བ་བཅས་བྱེད་དགོས། བརྟན་བརླིང་གི་དངུལ་ལོར་སྲིད་ཇུས་བབ་བསྟུན་འཚམ་པོ་དང་། གནད་འཁེལ་གོ་ཆོད། འཁོར་རྒྱུག་རང་བཞིན་ལུགས་མཐུན་དང་འདང་ངེས་ཡོང་བ་མཐའ་འཁྱོངས། དངུལ་ལོར་སྲིད་ཇུས་ཐབས་བཀོད་བསྡོམས་འབོར་དང་གྲུབ་ཚུལ་ཉིས་བརྩེགས་ཀྱི་བྱེད་ནུས་འདོན་སྤེལ་གང་ལེགས། སྤྱི་ཚོགས་ཀྱི་ཕྱོགས་བསྡུས་མ་དངུལ་བསྡུ་སྒྲིལ་གྱི་མ་གནས་བརྟན་པོའི་ངང་མར་ཆག་པར་སྐུལ་འདེད། མི་དམངས་ཤོག་སྒོར་གྱི་དངུལ་བརྗེས་འཛའ་ཐང་ལུགས་མཐུན་དང་དོ་མཉམ་གྱི་ཆུ་ཚད་ཐོག་རྩ་བའི་ཆ་ནས་བརྟན་པོ་ཡོང་བ་མཐའ་འཁྱོངས་བཅས་བྱེད་དགོས། སྤྱི་ཁོག་སྲིད་ཇུས་ཀྱི་ཁ་ཕྱོགས་གཅིག་མཐུན་རང་བཞིན་ལ་ཤུགས་རྒྱག་པ་དང་། ནོར་སྲིད་དང་། དངུལ་ལོར། ལས་ཞུགས། ཐོན་ལས། ས་ཁོངས། ཚན་རྩལ། ཁོར་ཡུག་སྲུང་སྐྱོབ་སོགས་ཀྱི་སྲིད་ཇུས་མཐུན་སྦྱོར་དང་གཞོགས་འདེགས་བྱ་རྒྱུར་ཤུགས་རྒྱག་པ། དཔལ་འབྱོར་རང་བཞིན་མིན་པའི་སྲིད་ཇུས་དེ་སྤྱི་ཁོག་སྲིད་ཇུས་ཀྱི་ཁ་ཕྱོགས་གཅིག་མཐུན་རང་བཞིན་གྱི་དཔྱད་དཔོག་ནང་བཅུག་ནས་སྲིད་ཇུས་གཅིག་འདོམས་ལ་ཤུགས་རྒྱག་པ་བཅས་བྱས་ཏེ་ཕྱོགས་གཅིག་ཏུ་ཤུགས་འདོན་པ་དང་བསྒྲིལ་ཤུགས་ཆགས་པར་འགན་ལེན་བྱེད་དགོས། དཔལ་འབྱོར་གྱི་དྲིལ་བསྒྲགས་དང་གླེང་ཕྱོགས་ཀྱི་ཁྲིད་སྟོན་བྱེད་ཤུགས་ཆེ་རུ་བཏང་ནས་ཀྲུང་གོའི་དཔལ་འབྱོར་གྱི་འོད་གསལ་སྨྲ་བ་དར་སྤེལ་གཏོང་དགོས།

གཙོ་གནད་ལས་འགན་དོན་འཁྱོལ་ཡོང་བར་བྱེད་པ། སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བར་དམིགས་ནས་གཙོ་གནད་མངོན་གསལ་དོད་པོ་ཡོང་བ་དང་། འགག་རྩ་ཁོང་དུ་ཆུད་པ། ལས་དོན་ཁག་ཏན་ཏིག་སྒྲུབ་པ་བཅས་བྱེད་དགོས། ཚན་རྩལ་གསར་གཏོད་ལ་བརྟེན་ནས་དེང་རབས་ཅན་གྱི་ཐོན་ལས་མ་ལག་འཛུགས་སྐྲུན་ལ་སྣེ་ཁྲིད་དང་། ཚན་རྩལ་གསར་གཏོད་ལ་བརྟེན་ནས་ཐོན་ལས་གསར་གཏོད་ལ་སྐུལ་འདེད། ཐོན་སྐྱེད་ནུས་ཤུགས་གསར་པ་འཕེལ་རྒྱས་གཏོང་བ། ཐོན་ལས་མུ་ཕྲེང་དང་མཁོ་སྤྲོད་མུ་ཕྲེང་གི་མཉེན་གཤིས་དང་བདེ་འཇགས་ཆུ་ཚད་མཐོ་རུ་གཏོང་བ་བཅས་བྱེད་དགོས། རྒྱལ་ནང་གི་དགོས་མཁོ་རྒྱ་སྐྱེད་གཏོང་བར་ཤུགས་རྒྱག་པ་དང་། བག་ཉལ་གྱི་སྟོབས་ཤུགས་ལྡན་པའི་འཛད་སྤྱོད་ལ་སྐུལ་སྤེལ་གཏོང་བ། ཕན་འབྲས་ལྡན་པའི་མ་དངུལ་འཇོག་རྒྱ་ཆེ་རུ་གཏོང་བ་བཅས་བྱས་ཏེ་འཛད་སྤྱོད་དང་མ་དངུལ་འཇོག་རེས་ཕན་ཚུན་སྐུལ་སྤེལ་བྱེད་པའི་འཁོར་སྐྱོད་བཟང་པོ་ཆགས་པར་བྱེད་དགོས། གཙོ་གནད་ཁྱབ་ཁོངས་ཀྱི་བསྒྱུར་བཅོས་གཏིང་ཟབ་ཏུ་བཏང་ནས་ཕྱོགས་ཡོངས་ནས་བསྒྱུར་བཅོས་གཏིང་ཟབ་ཏུ་གཏོང་བའི་བྱེད་ཐབས་གལ་ཆེན་ཇུས་འགོད་བྱས་ཏེ་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བ་དང་ཀྲུང་གོའི་ལུགས་ཀྱི་དེང་རབས་ཅན་འཛུགས་སྐྲུན་མགྱོགས་སུ་གཏོང་ཆེད་རྒྱུན་མཐུད་ངང་སྒུལ་ཤུགས་ཆེན་པོ་བསྣན་དགོས། ཆུ་ཚད་མཐོ་བའི་ཕྱི་ཕྱོགས་སུ་སྒོ་མོ་འབྱེད་རྒྱ་ཆེ་རུ་གཏོང་བ་དང་། ཕྱི་ཕྱོགས་ཉོ་ཚོང་གི་སྒུལ་ནུས་གསར་པ་སྐྱེད་སྲིང་མགྱོགས་སུ་གཏོང་བ། ཕྱི་ཕྱོགས་ཉོ་ཚོང་གི་ཕྱི་དངུལ་གྱི་གཞི་རྩ་སྲ་བརྟན་དུ་གཏོང་བ་བཅས་བྱེད་དགོས། གཙོ་གནད་ཁྱབ་ཁོངས་ཀྱི་ཉེན་ཁ་རྒྱུན་མཐུད་དང་ཕན་ནུས་ལྡན་པའི་སྒོ་ནས་འགོག་སེལ་བྱེད་པ་དང་། ས་ཁང་བདག་ཁོངས་དང་། ས་གནས་ཀྱི་བུ་ལོན། དངུལ་རྩའི་སྒྲིག་གཞི་འབྲིང་ཆུང་སོགས་ཀྱི་ཉེན་ཁ་གཅིག་འདོམས་སྒོས་སེལ་བ། ཁྲིམས་འགལ་གྱི་དངུལ་རྩའི་བྱེད་སྒོ་ལ་རྡུང་རྡེག་ཚ་ནན་གཏོང་བ་བཅས་བྱས་ཏེ། མ་ལག་རང་བཞིན་གྱི་ཉེན་ཁ་མི་འབྱུང་བའི་མཐའ་ཚད་མཐའ་གཅིག་ཏུ་བསྲུང་དགོས། རྒྱུན་འཁྱོངས་ལྷོད་མེད་ཀྱིས་“ཞིང་གསུམ་”ལས་དོན་དམ་འཛིན་ལེགས་པོ་དང་། ཞིང་ལས་ཀྱི་སྟོབས་ལྡན་རྒྱལ་ཁབ་འཛུགས་སྐྲུན་བྱེད་པའི་དམིགས་འབེན་གཏན་འཁེལ་བྱས་ཏེ། གྲོང་གསེབ་ཕྱོགས་ཡོངས་ནས་དར་རྒྱས་ཡོང་བར་སྐུལ་འདེད་ནུས་ལྡན་དང་ཕན་ལྡན་གཏོང་དགོས། གྲོང་ཁྱེར་དང་གྲོང་གསེབ་མཉམ་འདྲེས་དང་ས་ཁོངས་ཁག་བར་མཐུན་སྦྱོར་ངང་འཕེལ་རྒྱས་ཡོང་བར་སྐུལ་འདེད་གཏོང་བ་དང་། གྲོང་ཁྱེར་དང་གྲོང་རྡལ་ཅན་གསར་པ་དང་གྲོང་གསེབ་ཕྱོགས་ཡོངས་ནས་དར་རྒྱས་ཡོང་བར་སྐུལ་འདེད་གཏོང་རྒྱུ་གཉིས་ཟུང་འབྲེལ་དམ་ཚགས་བྱས་ཏེ་གྲོང་ཁྱེར་དང་གྲོང་གསེབ་མཉམ་འདྲེས་ཀྱིས་འཕེལ་རྒྱས་གཏོང་བའི་བཀོད་པ་གསར་པ་ཆགས་པར་བྱེད་དགོས། སྐྱེ་ཁམས་དཔལ་ཡོན་འཛུགས་སྐྲུན་དང་ལྗང་མདོག་ཐཱན་ཉུང་འཕེལ་རྒྱས་ལ་སྐུལ་འདེད་གཏིང་ཟབ་གཏོང་བ་དང་། ཐཱན་རྩེར་སོན་དང་ཐཱན་སྙོམ་སྦྱོར་ཡོང་བར་ཧུར་བརྩོན་དང་བརྟན་པོའི་ངང་སྐུལ་འདེད་བཏང་སྟེ། ནུས་ཁུངས་དང་ཐོན་ཁུངས་ཀྱི་བདེ་འཇགས་འགན་སྲུང་ནུས་པ་ཆེ་རུ་གཏོང་དགོས། དམངས་འཚོ་འགན་སྲུང་དང་ལེགས་བཅོས་ཏན་ཏིག་བཏང་སྟེ། གང་ཐུབ་ཅི་ཐུབ་དང་འཁོས་དཔག་ལས་སྒྲུབ་ཀྱིས་དམངས་འཚོའི་མཐའ་ཚད་སྲུང་ཐུབ་པ་དང་། ཡང་དག་སྲུང་བ། བརྟན་པོ་སྲུང་བ་བཅས་རྒྱུན་འཁྱོངས་བྱས་ཏེ། གཙོ་གནད་ཚོགས་སྤྱིའི་ལས་ཞུགས་བརྟན་པོ་ཡོང་བར་འགན་ལེན་ཏན་ཏིག་དང་། སྤྱི་ཚོགས་འགན་སྲུང་དྲ་བ་དམ་ཚགས་ཡོང་བ། བུ་བཙའ་ལ་རྒྱབ་སྐྱོར་བྱེད་པའི་སྲིད་ཇུས་མ་ལག་གང་མགྱོགས་འཐུས་ཚང་དུ་གཏོང་བ། མི་འབོར་སྤུས་ཚད་མཐོ་བའི་འཕེལ་རྒྱས་ཡོང་བར་སྐུལ་འདེད་གཏོང་བ་བཅས་བྱེད་དགོས།

བཀོད་སྒྲིག་གཅིག་ལ་དོན་འཁྱོལ་དགུ་ཟེར་བ་ལྟར། 2024ལོའི་དཔལ་འབྱོར་ལས་དོན་གྱི་དམིགས་ཚད་ལས་འགན་ལེགས་འགྲུབ་ཡོང་བར་ངེས་པར་དུ་ཏང་གི་ཕྱོགས་ཡོངས་ནས་འགོ་ཁྲིད་བྱ་རྒྱུ་དང་དེར་ཤུགས་རྒྱག་པ་རྒྱུན་འཁྱོངས་དང་། དཔལ་འབྱོར་ལས་དོན་སྐོར་གྱི་ཏང་ཀྲུང་དབྱང་གི་ཐབས་ཇུས་བཀོད་སྒྲིག་ལག་བསྟར་དོན་འཁྱོལ་གཏིང་ཟབ་བྱེད་པ། “དོན་འཁྱོལ་དམ་འཛིན་”བཞིའི་ཐད་ཤུགས་རྒྱག་པ་སྟེ། ཆད་ལུས་མེད་པའི་སྒོ་ནས་དོན་འཁྱོལ་དམ་འཛིན་བྱས་ཏེ་མཐའ་མའི་གྲུབ་འབྲས་དེ་ཏང་ཀྲུང་དབྱང་གི་ཐབས་ཇུས་དགོངས་པ་དང་མཐུན་པ་འགན་ལེན་བྱེད་དགོས། ཐོག་ལྟར་དྲག་ལ་རླུང་ལྟར་མྱུར་བའི་སྒོ་ནས་དོན་འཁྱོལ་དམ་འཛིན་བྱས་ཏེ། དུས་ཚད་ནུས་གསུམ་གཅིག་འདོམས་ཀྱིས་སྟངས་འཛིན་བྱེད་དགོས། བདེན་འཚོལ་དང་དོན་གཉེར་གྱི་སྒོ་ནས་དོན་འཁྱོལ་དམ་འཛིན་བྱས་ཏེ། ཕྱི་ཚུལ་རིང་ལུགས་དང་དཔོན་ཉམས་རིང་ལུགས་མཐའ་གཅིག་ཏུ་ཡོ་བསྲང་བྱེད་དགོས། སྒྲུབ་ཕོད་པ་དང་ལེགས་པར་སྒྲུབ་པའི་སྒོ་ནས་དོན་འཁྱོལ་དམ་འཛིན་བྱས་ཏེ། མི་བཀོལ་སྤྱོད་ཀྱི་ཁྲིད་ཕྱོགས་ཡང་དག་པ་རྒྱུན་འཁྱོངས་དང་། རིམ་པ་ཁག་གི་འགོ་ཁྲིད་ལས་བྱེད་པའི་ཧུར་བརྩོན་རང་བཞིན་དང་རང་འགུལ་རང་བཞིན། གསར་གཏོད་རང་བཞིན་བཅས་འདོན་སྤེལ་གང་ལེགས་བྱེད་དགོས།

ལམ་ཐག་རིང་ཡང་ངལ་བར་མི་འཛེམ་ཞིང་། །ཆར་རླུང་ལྡང་ཡང་ཕུགས་བསམ་མི་བསྒྱུར་བར། །སྔོན་ཆད་ཀྲུང་གོས་རྒྱུན་ཆད་མེད་པར་ཉེན་ཁ་དང་འགྲན་སློང་ལས་རྣམ་པར་རྒྱལ་བའི་ཁྲོད་དཀའ་གནད་ལས་བསྒྲོལ་ཏེ་ལོ་རྒྱུས་རང་བཞིན་གྱི་གྲུབ་འབྲས་ཐོབ་ཡོད། སྔར་བས་མཐོ་བའི་འཕེལ་རྒྱས་ཀྱི་འགོ་འཛུགས་ས་གསར་པའི་ཐོག་ལངས་ཏེ་ཕྱོགས་ཡོངས་ནས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་ལག་བསྟར་དང་། ཕྱོགས་ཡོངས་ནས་ཀྲུང་དབྱང་གི་དཔལ་འབྱོར་ལས་དོན་ཚོགས་འདུའི་ཐབས་ཇུས་བཀོད་སྒྲིག་ཁག་དོན་འཁྱོལ། ཡིད་ཆེས་བརྟན་གཏོང་དང་། གསར་གཏོད་ཡར་བརྩོན། དངོས་འཛིན་དངོས་སྒྲུབ། བདེན་འཚོལ་དོན་གཉེར་བཅས་བྱས་ནས། ཆར་རླུང་གི་ཁྲོད་དུ་རྒྱུན་ཆད་མེད་པར་འཕེལ་རྒྱས་དང་སྟོབས་ཆེར་འགྲོ་བའི་ཀྲུང་གོའི་དཔལ་འབྱོར་གྱིས་རླུང་བརྟེན་རླབས་གཤགས་བྱས་ནས་མུ་མཐུད་མདུན་དུ་བསྐྱོད་པ་དང་སྔར་བས་འོད་སྟོང་འབར་བའི་འཕེལ་རྒྱས་ཀྱི་མདུན་ལམ་ཐོག་བསྐྱོད་ངེས་རེད།

སྐར་མ་མཁའ་འགྲོས་བསྒྱུར།