ཚེ་རིང་མེ་ཏོག

ལོ་འདི་དག་ཏུ་ངས་ལས་ཀ་ཅི་རིགས་ལ་རྒྱུགས་མང་པོ་ཞིག་སྤྲད་ནའང་། ང་ལ་གཡབ་མོ་གཏོང་བའི་ལས་དོན་ཞིག་ད་དུང་ལག་ཏུ་མ་སོན། ཉིན་འདི་ཚོར་ང་རང་སླར་ཡང་གྲོང་ཁྱེར་འདི་ནས་གསབ་སྦྱོང་ཞིག་ལ་ཞུགས་པའི་ཚུལ་གྱིས་ལག་ཁུག་ཏུ་ཡིག་ཆ་འདྲ་མིན་མང་པོ་ཞིག་བཅུག་སྟེ་འགྲོ་བཞིན་ཡོད། ད་ནི་རྒྱུགས་ལ་ཞུགས་ཚེ་དང་ཐོག་ལྟ་བུའི་དངངས་འཚབ་དེ་འདྲ་ལྟ་ཅི། རེ་དོགས་ཀྱི་སེམས་ཁམས་ཤིག་ཀྱང་མེད་པར་ཆགས་འདུག སྐད་ཆ་བདེ་མོ་ཞིག་སྤྱད་ན། ད་ནི་ངོ་མ་ལོབས་ཚར་འདུག

ད་ལྟ་ང་ངོ་མ་ཐམ་མེ་ཐོམ་མེ་ཞིག་ཆགས་ཟིན་འདུག མ་འོངས་པར་ཇི་ལྟར་འདང་བརྒྱབ་ན་དེ་ལྟར་ཐམ་ཐོམ་གྱི་མུན་པའི་ནང་བྱིང་སྟེ། གསལ་ཆ་ཅི་ཡང་མེད་པའི་འཇིག་རྟེན་ཞིག་གི་ཁ་གཏད་དུ་རང་ཉིད་འགྲེང་འདུག་པའི་ཉམས་སྣང་ཞིག་བསྟབས་འོངས།

དེ་ལྟ་བུའི་མག་མོག་གི་བར་མཚམས་འདི་ནས། ངར་འདི་དང་དེ་ཞེས་པའི་དམིགས་ཡུལ་ངེས་གཏན་ཅི་ཡང་མེད་པར། ཚོད་ཚོད་དུ། གསབ་སྦྱོང་ཞིག་ལ་ཞུགས་ནས་ཡིག་ཚགས་མང་པོ་བཞག་པའི་ལག་ཁུག་ཅིག་བཟུང་སྟེ། གྲོང་ཁྱེར་འདི་ནས་གོམ་པ་སྤོ་བཞིན་ཡོད། ངོས་གཞན་ཞིག་ནས་བལྟས་ན་ངང་ཚུལ་འདི་ནི་རེ་བས་ཁེངས་པའི་མི་ཞིག་དང་ཤིན་ཏུ་འདྲ་ཡང་སྲིད།

ཕྱི་དྲོ་འདིར་གསབ་སྦྱོང་གྲོལ་རྗེས། ང་རང་ཡང་སྔོན་མ་དང་། དེའི་སྔོན་མའི་སྔོན་མ་ལྟར་དམིགས་ཡུལ་དང་ཁ་ཕྱོགས་ཅི་ཡང་མེད་པར། མི་ཚོགས་ལང་ལོང་འཕྱོ་བའི་རྒྱ་སྲང་འདི་ནས་ང་རང་གཅིག་པུ་ཉོབ་མདངས་ཤིག་གིས་ཀུན་ནས་མནན་ཏེ་འགྲོ་བཞིན་ཡོད། དབྱར་གྱི་ཚ་གདུག་དང་གྲོང་ཁྱེར་གྱི་དྲོད་ཚད་འདིའི་ཁྲོད་ང་ནི་སླ་ངའི་ནང་གི་གྲོག་མ་ཞིག་ལྟར་གང་ཞིག་ཏུ་སྡོད་མི་ཚུགས་པར་ཡར་མར་འདུར་བཞིན་ཡོད།

སོང་གིན་སོང་གིན་གྲོང་ཁྱེར་འདིའི་གྲུ་ཟུར་ཞིག་ཏུ་རང་གིས་གླས་ཡོད་པའི་སྡོད་ཁང་དེར་ལོག་འདོད་ཅིག་སྐྱེས། སྐད་ཅིག་མ་འདིར་དེ་སྔོན་གྱི་ཉོབ་མདངས་དེའི་ཕྱེད་ཙམ་ཞིག་ནི་རྒྱབ་ཀྱི་རྡོག་ཁྲེས་ལྗིད་པོ་གང་ཞིག་གི་ཕྱེད་ཀ་འཕྲལ་དུ་ཕོག་ཐུབ་སོང་བ་ལྟ་བུའི་བདེ་ཉམས་ཤིག་ཤར་བྱུང་། ད་ནི་ང་ལ་ཁ་ཕྱོགས་ངེས་གཏན་ཞིག་ཡོད་པར་གྱུར་པས། གོམ་པའང་དེ་སྔོན་ལས་ཀྱང་ལྡབ་འགའ་ཡིས་ཇེ་མགྱོགས་སུ་བཏང་ཟིན་འདུག

“རིན་ཆེན་ཟླ་བ། རིན་ཆེན་ཟླ་བ།”འབོད་སྐད་དེས་གློ་བུར་དུ་ངའི་ཉོབ་མདངས་ནི་ཕྱོགས་ཕྱོགས་སུ་གཏོར་བ་ནང་བཞིན་ང་ནི་གཟབ་ནན་དུ་ལོག་སོང་།

ང་རྒྱབ་ལོགས་སུ་འཁོར་བ་ན། ཁ་གཏད་དུ་ཡོང་བཞིན་པ་ནི་མ་གཞི་བུད་མེད་ཅིག་ཡིན་འདུག ངོ་གདོང་དུ་རྒྱུགས་ཆེ་བའི་ཁ་རས་སྔོན་པོ་ཞིག་རྒྱབ་འདུག་པས། ངས་སུ་ཡིན་པ་ལ་མཉམ་འཇོག་གཏན་ནས་མ་བྱུང་། མཉམ་འཇོག་གཏན་ནས་མ་བྱུང་བས་རེ་ཞིག་ལ་མོར་ཅེར་ཏེ་ལུས་སོང་། མོ་ངའི་ཉེ་སར་བཅར་བཞིན་ཁ་རས་ཕུད་བྱུང་བས། ང་ད་གཟོད་གཉིད་ལས་སད་པ་བཞིན་མོ་རང་ཡིན་པ་ཤེས་སོང་། ཡུན་རིང་བརྗེད་སོང་བའི་མཐོ་འབྲིང་གི་སློབ་གྲོགས་མོ་རང་ཡིན་པ་གཞི་ནས་ཤེས་སོང་།

ཏག་ཏག་སྐབས་ཐོག་འདིར་ངས་མོའི་མིང་ནས་འབོད་གྲབས་བྱས་པ་ན་བག་ཆགས་སྲབ་མོ་ཙམ་ལས་མོའི་མིང་ཆ་ཚང་བ་ཞིག་གཏན་ནས་དྲན་མ་ཐུབ།

ང་ནི་རེ་ཞིག་ལ་དེ་གར་འཚེར་སྣང་དང་བཅས་གཡོ་བ་མེད་པར་ཏན་སེར་ལུས་སོང་། སྐབས་འདིར་མོ་ནི་འཛེམ་དོགས་ཅི་ཡང་མེད་པར་ངར་ཅེར་ཏེ“རིན་ཆེན་ཟླ་བ། ཁྱོད་ཀྱི་ལུས་ཕུང་མི་བདེའམ། ངོ་མདོག་ཅི་འདྲའི་སྐྱ་བ་ལ་ཨང”ཟེར་བ་དང་མཐུད་ནས“སྔོན་ཆད་ཁྱོད་ཀྱི་ངོ་གདོང་ལ་བཀྲག་མདངས་གཞན་ཞིག་ཡོད་ཡ”ཟེར།

ངས་ནི་ཐག་ཐག་ཏུ་ལན་ཅི་ཞིག་སྟེར་དགོས་པ་ཡང་མ་ཤེས་པར། “ཅི་ན་མི་འདུག”ཅེས་པའི་ལན་དེ་སྐད་ཆུང་ངུས་ཇི་ལྟར་བཏབ་པ་རང་གིས་ཀྱང་མ་ཚོར།

“ཁྱོད་ཀྱིས་ཟི་ལིང་ན་བྱ་བ་སྒྲུབ་བཞིན་ཡོད་དམ།”དེ་མ་ཐག་ངའི་རྣ་སྒོ་རུ་སླར་ཡང་སྐད་ཆ་འདི་ལྷུང་འོང་།

སྐད་ཆ་འདིས་ང་ངོ་མ་ཅི་བྱ་གཏོལ་བྲལ་དུ་བཏང་སོང་། གལ་ཏེ་གྲོང་ཁྱེར་འདིར་ལས་ཀ་མེད་ཅེས་བཤད་ན་ནི་ལག་ཏུ་ཁུག་མ་ཞིག་བཟུང་ཡོད་པ་དེས་ལས་བྱེད་ཀྱི་ཚུགས་ཀ་དོད་ཡོད་པ་དང་། ཡོད་ཅེས་རྫུན་ལབ་ན་ནི་ཕྱིས་སུ་ངོ་ཚ་ཉོ་སྲིད་པ་མ་ཡིན་ནམ།

བར་གླགས་འདིར་ངས་ང་འཚོ་སྡོད་བྱེད་སའི་གྲོང་ཁྱེར་འདིའི་མི་དག་དྲན་བྱུང་། གྲོང་ཁྱེར་འདིའི་མི་དག་གིས་རྣམ་ཀུན་རང་ལ་ཕན་ཐོགས་ཤིག་སྲོ་ཙམ་ཡོད་པ་དང་། ཡང་ན་ངོ་སོ་ཕྲན་ཚེགས་དང་གདེང་འཇོག་ཟུར་ཙམ་གྱི་དོན་དུའང་རྫུན་ལབ་ཅི་ཐུབ་བྱེད་ཀྱིན་ཡོད་པ་མ་ཡིན་ནམ། མི་དེ་དག་དྲན་ཡོང་བས་ཁོ་ཚོའི་རྫུན་ནི་ངེས་དོན་གྱི་རྫུན་ཡིན་པ་དང་། རང་གི་རྫུན་ནི་མི་སྒེར་གྱི་ལ་རྒྱ་སྲུང་སྤྱད་ཉག་གཅིག་ཡིན་པས་རྫུན་དུ་ག་ལ་འགྲོ་ཨང་སྙམ་བྱུང་། དེ་དག་དྲན་མ་ཐག ངས་ཡོད་པའི་བརྡ་ལ་མགོ་བོ་གུག་ཙམ་བྱས་པ་ཡིན།

“ཁྱོད”མཚམས་ཚིགས་འདིར་ངས་མགོ་རྔ་མེད་པའི་སྐད་ཆ་འདི་འདྲ་ཞིག་ཤོར་ཟིན་འདུག

མོ་ལ་དངོས་འབྲེལ་གཡོ་ཟོལ་གྱི་ཆ་ཅི་ཡང་མི་འདུག མོས་ལམ་སང་དུ“ང་རྫོང་སྨན་ཁང་གི་སྨན་ཞབས་པ་ཡིན། ཐེངས་འདིར་ཨ་ཁུ་སྨན་བཅོས་བྱེད་སར་རོགས་པར་ཡོང་བ་ཡིན”ཞེས་དོགས་མི་བདེ་བའི་ཚུགས་ཀ་ཅི་ཡང་མེད་པར་རྔ་རྡུང་རྡུང་དུ་ཤར་མར་བཤད་བྱུང་།

“རིན་ཟླ། ཟ་མ་ཟ་ཞོར་སྐད་ཆ་སྐྱིད་པོ་བཤད”ཟེར་ཞོར་ངའི་ལྭ་བ་ནས་འཐེན་བྱུང་། མོའི་སྔར་གྱི་གཤིས་ཀ་དེར་དངོས་འབྲེལ་འགྱུར་བ་ཅི་ཡང་བྱུང་མི་འདུག གྲོང་ཁྱེར་འདིའི་བུ་མོ་གཞན་དག་དང་མི་འདྲ་བའི་ཉམས་སྣང་ཞིག་དང་ནམ་ཟླའི་དྲོད་ཚད་མ་ཡིན་པའི་དྲོད་ཁོལ་གཞན་ཞིག ངའི་འཁྱག་རེངས་སུ་གྱུར་པའི་ཅི་ཞིག་གི་ཐོག་ཏུ་ཐོལ་ཐོལ་དུ་ཕོ་བྱུང་།

ངས་ཀྱང་བཅོས་འཛུམ་ཡིན་མིན་བཤད་དཀའ་བའི་འཛུམ་པ་ཞིག་དང་བཅས“རེད”ཅེས་བཤད་པ་ཡིན།

ཟ་ཁང་དུ་འགྲོ་བའི་ལམ་བར་ནས་ངས་གློ་བུར་དུ་མོའི་མིང་ལ་བསམ་བློ་ནན་གྱིས་གཏོང་དགོས་བྱུང་། ཇི་ལྟར་ནན་གྱིས་བསམ་བློ་བཏང་ན་དེ་ལྟར་མོའི་མིང་ལ་ཆ་འཇོག་ཅི་ཡང་མེད་པ་ཆགས་འགྲོ།

“རིན་ཟླ། ཟ་མ་གང་ཟ་བར་དགའ” མོའི་སྐད་ཆ་འདི་ལ་ངས་མཉམ་འཇོག་བྱུང་དུས་ངེད་གཉིས་ཅུང་རྒྱས་སྤྲོས་ཅན་གྱི་ཟ་ཁང་ཞིག་ཏུ་སྔར་ནས་སླེབས་ཟིན་འདུག་ལ། ཚོད་ཐོ་ཆེན་པོ་དེའང་ངའི་མདུན་དུ་སྲིང་བཞིན་འདུག  གློ་བུར་ང་ཅུང་འཚབ་འཚུབ་ཞིག་ཏུ་བཏང་སོང་། “ང་ལ་ཁྱད་པར་མེད། ཁྱོད་གང་དགའ་ན་དེ་བོས་ཤོག”ཅེས་ལབ་ཞོར་ཚོད་ཐོ་མོའི་མདུན་དུ་ཕར་སྣུར་བ་ན། མོས་སྣང་དོགས་ཅི་ཡང་མེད་པར་ཟས་མིང་ཁ་ཤས་ཤིག་འབྲི་མགོ་བརྩམས་སོང་། དེ་ནི་དངོས་འབྲེལ་གྲོང་ཁྱེར་འདིའི་བུ་མོ་དེ་ཚོར་ཡོད་མི་སྲིད་པའི་ཕྱི་གསལ་ནང་གསལ་གྱི་ཆ་ཞིག་རེད། ངས་གྲོང་ཁྱེར་འདི་ནས་ཡུན་རིང་བོར་སོང་བའི་ཕྱི་གསལ་ནང་གསལ་གྱི་ཆ་ཞིག་རེད།

“ཁྱོད་ལོ་ངོ་གསུམ་གྱི་འཛིན་གྲྭའི་འདུ་འཛོམས་གཅིག་ལའང་མ་ཡོང་བ་ཅི་ཡིན”ཟ་མ་དག་གི་མིང་བྲིས་ཚར་རྗེས་མོས་ང་ལ་ཁ་ཕྱོགས་ཏེ་དེ་ལྟར་དྲིས་འོང་། སྐད་ཆ་དེས་ང་ནི་སླར་ཡང་རྫུན་ཞིག་གི་མགོ་རྐང་མ་བསྒྲིག་ན་ཐབས་མེད་པའི་གནས་སུ་བསྐྱལ་སོང་། ད་ནི་ང་རྫུན་ཐུང་ཐུང་ཙམ་ཞིག་ལ་ཐོགས་པ་མེད་པའི་མི་ཞིག་ཏུ་གྱུར་ཡོད་པས། “ཏག་ཏག་དུས་ཚིགས་དེར་ང་ཚོའི་ལས་ཁུངས་བྲེལ་བ་ཤིན་ཏུ་ཆེ་སྟབས། མགོ་ཁྲིད་ཀྱིས་གནང་བ་རྩ་ནས་སྟེར་གྱིན་མི་འདུག ངའང་འགྲོ་འདོད་ཆེན་པོ་ལངས་སོང” ཞེས་ལེ་བདའ་འདྲེས་མའི་སྐད་གདངས་དང་བཅས་ཆུ་བཞུར་བཞུར་དུ་བཤད་པ་ན། མོས་ཀྱང་ཅི་ཁག་སྙམ་པའི་མིག་མདངས་ཤིག་དང་བཅས“གྲོང་ཁྱེར་ཆེ་ས་ནས་ལས་ཀ་མང་རྒྱུ་རེད”ཟེར།

མོས་ང་ལ་འཛིན་གྲྭའི་འདུ་འཛོམས་སྐབས་ཀྱི་འདྲ་པར་མང་པོ་ཞིག་སྟོན་ཞོར་འགྲེལ་བཤད་ཀྱང་གང་ལ་གང་འཚམ་རེ་བརྒྱབ་ཡོང་། ངོ་མ་བཤད་ན། མཐར་ཕྱིན་པའི་ཉིན་དེ་ནས་བཟུང་ངས་གཏིང་བརྗེད་དུ་གྱུར་སོང་བའི་སློབ་གྲོགས་མང་པོ་ཞིག་གིས་ང་ལ་འདྲ་པར་ལས་ཅེ་རེར་བལྟས་འདུག

འོན་ཏེ། ང་ལ་མཚོན་ན་དེ་དག་ནི་གཙོ་བོ་མ་ཡིན་པར། ཁ་གཏད་ཀྱི་བུ་མོ་འདིའི་མིང་ཐག་ཐག་ཏུ་འབོད་ཐུབ་རྒྱུ་ནི་ཅི་འདྲའི་གལ་ཆེ་ཨང་།

ངས་ཁ་གཏད་ཀྱི་བུ་མོ་འདིའི་མིང་དྲན་ཐུབ་པའི་ཆེད་དུ་མོའི་སྐད་ཆ་ཐམས་ཅད་ལ་དེ་འདྲའི་ཡ་ལན་སྟབས་བདེ་རེ་མ་གཏོགས་མ་བྱིན་པར་རིག་པ་རྩི་སྐུད་ལྟར་བསྒྲིམས་ཏེ་མོའི་མིང་ལ་འདང་བརྒྱབ་པ་ཡིན། བག་ཆགས་ཟུར་ཙམ་བདོག་ནའང་དངོས་འབྲེལ་མི་དྲན་པ་འདུག

ད་ནི་ངས་གཞི་ནས་ཐབས་མཆོག་ཅིག་རྙེད་སོང་། ཐབས་མཆོག་འདིས་ང་ལ་རོགས་ཤིག་བྱ་ཐུབ་པར་ཆ་འཇོག་ཤིན་ཏུ་ཆེན་པོ་བཅངས་ཡོད། ངས་བུད་མེད་ཅིག་ལ་བཏགས་འོས་ཤིང་རྒྱུག་ཆེ་བའི་མིང་མང་པོ་ཞིག་ཀླད་པའི་ནང་ནས་གོ་རིམ་སྒྲིག་པ་ཡིན། མོའི་མིང་ལ་ཚིག་འབྲུ་བཞི་ཡོད་པར་གཏན་ཁེལ་བྱ་ཆོག་ལ་འདིའི་ཕྱོགས་ནས་ང་ལའང་བག་ཆགས་ཡིད་རྟོན་ཕེར་བ་ཞིག་ཡོད་པ་མ་ཚད། ང་ཚོའི་ཕ་ཡུལ་གྱི་མི་ཕལ་ཆེ་བའི་མིང་ནི་ཚིག་འབྲུ་བཞི་ཡིས་གྲུབ་པ་ཏག་ཏག་རེད།

བདེ་སྐྱིད་ལྷ་མཛེས། སྒྲོལ་མ་མཚོ་མོ། དབྱངས་ཅན་ལྷ་མཛེས། སྒྲོལ་མ་ལྷ་མོ། ལྷ་མོ་སྒྲོལ་མ། གཡུ་སྒྲོན་དཔལ་མོ། བསམ་གཏན་དབང་མོ། རིག་འཛིན་ཚེ་མཚོ། པདྨ་མཁའ་འགྲོ། ཚེ་རིང་སྒྲོལ་མ… …

དེ་ལྟར་ངས་བུད་མེད་ཀྱི་མིང་མང་པོ་ཞིག་གི་མགོ་རྐང་སྒྲིག་པ་ན་དཀར་ཡོལ་ཆག་པོ་ཞིག་སླར་ཡང་དང་མའི་རྣམ་པ་ལྟར་བསྒྲིག་རྒྱུ་མེད་པ་བཞིན་འདི་སྙམ་པ་ཞིག་གཏན་ནས་འགྲིག་ཐབས་མ་བྱུང་། ད་ནི་ང་ཡོངས་སུ་ཉོག་སོང་། དེ་སྔའི་བག་ཆགས་སྲབ་མོ་དེའང་ད་ནི་དྲན་པའི་བྲག་མགོ་ནས་གླ་བ་ཞིག་ལྟར་གར་སོང་ཆ་མེད་དུ་ཞོགས་སོང་།

“ཏང་ཏང་ཏང་། ཏང་ཏང་ཏང་།” ཏག་ཏག་བར་མཚམས་འདིར་ཁ་པར་གྱི་སྒྲ་གྲག་བྱུང་།

མོས་ང་གང་ཞིག་ཏུ་གཡེང་ཡོད་པ་མཐོང་བ་ན། “རིན་ཟླ། ཁ་པར་ཐོན་འདུག”ཟེར། ངས་སྐད་ཅིག་མ་དེར་ཁ་པར་བླངས་པ་ན། དོན་འགྲུབ་དགེ་ལེགས་ཏེ་མཐོ་འབྲིང་གི་སློབ་གྲོགས་རྣམས་ལས་ད་ལྟའང་འབྲེལ་འདྲིས་བོར་མེད་པའི་སློབ་གྲོགས་གཅིག་ཁོ་ན་ཡོད་པ་དེ་རེད།

“ཁྱོད་གང་ན་ཡོད།”

“ང་ཟ་ཁང་ཞིག་ཏུ་ཡོད།”

“རོགས་ལ་སུ་ཡོད།”

མཚམས་ཚིགས་འདིར་ང་ངོ་མ་ཅི་བཤད་འདི་བཤད་མེད་པའི་དོང་ནང་དུ་འཕངས་སོང་།

ངས“ཨ”ཞེས་པ་ཞིག་ཤོར་སོང་།

“རོགས་པ་སུ་ཡོད་བརྫས།”

ཁོའི་སྐད་ཆ་ལ་སླར་ཡང་འགྱུར་བ་ཅི་ཡང་མི་འདུག ད་སྔོན་ལས་ཀྱང་ཁ་ཇེ་གསལ་དུ་བཏང་སོང་། བར་གླགས་འདིར་ངས་བློ་ཐབས་གཞན་ཞིག་དྲན་བྱུང་།

“ངས་གཟུགས་འཆར་རྒྱག་ཡོང”ཞེས་བཤད་དེ་ཁ་པར་གྱི་སྒོ་གཏན་པ་ཡིན། ང་ལ་ངོ་མ་ཚ་དྲོད་ཅིག་བརྒྱབ་འདུག ད་སྔོན་ངས་ཅུང་ཙམ་མིན་ན་ཁ་པར་གྱི་སྒྲ་ཆེ་རུ་བཏང་གྲབས་བྱས། གལ་ཏེ་དེ་ལྟར་བྱས་ན་ངས་ངོ་མ་ཅི་ཞིག་བྱ་དགོས་ཨང་། མོས་ཁོའི་སྐད་ཆ་དེ་གོ་ངེས་རེད། དེ་དུས་ངས་ང་ཚོའི་མཐོ་འབྲིང་གི་སློབ་གྲོགས་ཤིག་ཡོད་ཟེར་རྒྱུ་ན་ཁོས་ང་ལ་ནན་གྱིས་འདྲི་ངེས་རེད། སྐབས་དེར་སླེབས་ན་ངས་མོའི་མིང་ལ་ཅི་ཞིག་འདོགས་འོས་སམ། དེ་ལྟར་བསམ་བློ་བཏང་ཚེ་ངའི་ལུས་ཡོངས་ལ་ཚ་དྲོད་ཅིག་བརྒྱབ་པ་དང་ལྷན་དུ་བློ་བདེ་མོ་ཞིག་ཀྱང་རང་ཤུགས་སུ་ཆགས་སོང་།

གཟུགས་འཆར་བརྒྱབ་མ་ཐག་སླར་ཡང་ཁོས་“རོགས་ལ་སུ་ཡོད”ཅེས་དྲིས་སོང་བ་ན། སྐབས་ཐོག་འདིར་ང་ནི་ད་སྔོན་བཞིན་ཅི་བྱ་གཏོལ་མེད་དུ་ལུས་མེད་པར། ཐད་ཀར་པར་མིག་མོའི་ཐོག་ཏུ་སྐོར་བ་ཡིན། ཁོ་གཉིས་དགོད་འཛུམ་འཛུམ་ངང་ཅི་ཞིག་སྐར་མ་འགར་བཤད་རྗེས། མོས་ང་ལ་ཁ་པར་ཚུར་སྤྲད་སོང་། ངས་ཁ་པར་ལག་ཏུ་ལེན་ཞོར“ད་ལྟ་ཅི་བཤད་རྒྱུ་མེད”ཅེས་སྒོ་རྒྱག་བྱེད་ཀྱི་དམར་ཐིག་སྟེང་ཁོའི་སྐད་ཆ་ལ་མ་བསྒུག་པར་མནན་པ་ཡིན།

སྲོད་དུས་ཀྱི་ཉི་འོད་གཉོམ་པོ་ཞིག་སྒེའུ་ཁུང་གི་དྲ་ཡོལ་སྲབ་མོ་དེ་བརྟོལ་ཏེ་མདུན་ཅོག་ཐོག་ཏུ་འཕྲོས་འདུག ཉི་ཟེར་འདིའི་ཀློང་ནས་ངས་མོའི་ངོ་གདོང་ངོ་མ་དེ་མཐོང་བྱུང་། དྭངས་ཤིང་གསལ་ལ་ཁྲ་རིལ་རིལ་དུ་གཡོ་བའི་མིག་ཟུང་དང་རང་བྱུང་གིས་བབས་པའི་ཀྲི་ག གཟེངས་ཅུང་མཐོ་བའི་སྣ་དབང་། པིར་གྱིས་མ་བྲིས་པའི་སྨིན་མ། དབྱེས་རན་པའི་དཔྲལ་བ། སྲབ་ཅིང་མཛེས་པའི་རྣ་གཤོག ལྷེམ་ལྷེམ་དུ་འགུལ་བའི་མཆུ་ཡི་འདབ་མ། གནག་ལ་སྣུམ་པའི་སྐྲ་ལོ། རྩི་ཁྲ་ཁྲ་མ་བྱུག་པའི་གདོང་བ་སོགས་ཕྱི་གསལ་ནང་གསལ་གྱི་ཆ་དེ་དག་མངོན་ལྐོག་ཅི་ཡང་མེད་པར་མཐོང་བྱུང་། འོན་ཏེ། མོའི་མིང་ནི་ཅིས་ཀྱང་དྲན་ཐུབ་མ་བྱུང་།

ཟ་མ་ཞིམ་པོ་འགའ་མདུན་དུ་བཤམས་སོང་། ཟ་མ་ཟ་ཞོར་མོས་མཐོ་འབྲིང་སྐབས་ཀྱི་ང་ཚོའི་འཚོ་བ་གླེང་བྱུང་། སྐད་ཆ་དེ་དག་གི་ཉིང་ཁུ་ལས་ངས་མོ་ནི་རང་གི་སྔོན་དུ་མི་ལོ་གསུམ་དུ་བསྡད་མྱོང་བ་གཞི་ནས་དྲན་སོས་བྱུང་། ད་དུང་མོས་ང་ཚོས་སློབ་ཐུན་གྲོལ་སྐབས་ཞོར་ཟས་མང་པོ་མཉམ་དུ་ཟོས་མྱོང་བ་དང་། སློབ་ཐུན་སྐབས་ངས་མོའི་རྒྱབ་ཏུ་ཅི་ཞིག་འབྲི་ཁུལ་གྱིས་སློབ་ཁྲིད་ལ་རྣམ་རིག་བསྒྲིམ་དུ་མ་བཅུག་པ་སོགས་གླེང་སོང་བས། ངས་སྐབས་དེ་དུས་ཀྱི་ཁོ་མོའི་ཟོལ་གྱིས་མ་བཅོས་པའི་གཞུང་དྲང་དང་ལྷོད་ཉམས་ལྡན་པའི་ངང་རྒྱུད་སོགས་ཡིད་ལ་ལྷང་ངེར་དྲན་འོང་། ང་ལ་དངོས་འབྲེལ་ས་གནས་དེ་དང་ལོ་ཚོད་དེ། དུས་ཚོད་དེ་རུ་སྐད་ཅིག་ཏུ་སླེབས་སོང་བ་ལྟ་བུའི་ཉམས་སྣང་ཞིག་བསྟབས་བྱུང་། ཞིབ་ཏུ་འདང་རེ་བརྒྱབ་ན་མི་ཚེ་འདིར་སླར་ཡང་དེ་ལྟར་ང་ཚོ་འཛོམ་མི་ཐུབ་ཨང་སྙམ་བྱུང་ལ། རྒྱང་ནས་རྒྱང་དུ་བཞུད་སོང་བའི་ལོ་ཟླ་དེར་འཁང་ར་དང་དངན་པ་ཞིག་ཀྱང་དབང་མེད་དུ་ཤོར་བྱུང་།

དེ་ལྟར་བསམ་བློ་རེ་བཏང་ན། ང་ནི་ངོ་མ་མི་ཁྲེལ་མེད་ཅིག་རེད་ཨང་། མི་ལོ་གསུམ་གྱི་རིང་དུ་སྐབས་རེར་ཅུང་ཙམ་ཁྲོས་ནའང་དེ་མ་ཐག་མཐུན་འགྲོ་བའི་སློབ་གྲྭའི་འཚོ་བ་དེ་དང་མི་ཚེ་འདིར་འཁོན་འཛིན་ཞེ་ནད་དང་འགྱོད་གདུང་ཅི་ཡང་མེད་པའི་འདས་དོན་དེ་དག གང་ལྟར་ད་ལྟ་ཕྱིར་དྲན་ཐམས་ཅད་མཛེས་སྡུག་ཏུ་གྱུར་ཅིང་མི་ཚེ་འདིའི་ནང་གི་ཕྱིར་ཡོང་གཞི་ནས་མེད་ཅིང་གསེར་སྲང་སྟོང་གིས་ཀྱང་ཁུག་ཐབས་བྲལ་བའི་ལོ་ཟླ་དེ་དག་བརྗེད་ཟིན་པ་མ་ཟད། ཁ་གཏད་དུ་ཡོད་པའི་བུ་མོ་འདིའི་མིང་ཡང་རྩ་བ་ནས་བརྗེད་ཟིན་འདུག ཏག་ཏག་སྐབས་འདིར་རང་གིས་རང་ལ་ཞེ་སྡང་ལྷག་མ་ཞིག་སྐྱེས་བྱུང་།

ང་སླར་ཡང་དྲན་པའི་སྨུག་པ་རུ་འཛུལ་ཏེ་མོའི་མིང་གི་རི་བོ་དེ་བཙལ་བ་ཡིན། ཇི་ལྟར་བཙལ་ན་དེ་ལྟར་དུ་སྨུག་པ་ཇེ་སྟུག་ཏུ་གྱུར་པ་བཞིན། མོའི་མིང་ལ་འདིའོ་སྙམ་པའི་ཆ་འཇོག་ཅི་ཡང་མེད་པར་གྱུར་སོང་། 

“རིན་ཟླ། དུས་ཚོད་ཀྱང་རིང་ཙམ་འགོར་སོང་། ང་ཨ་ཁུས་སྒུག་ཡོད་ངེས། རྗེས་མ་ཁྱོད་ཕ་ཡུལ་དུ་ཡོང་དུས་ང་ཚོ་མཉམ་འཛོམ་བྱ”ཟེར། གློ་བུར་བའི་སྐད་ཆ་དེས་ང་ལ་ནམ་ཟླའི་གྲང་འདར་མ་ཡིན་པའི་གྲང་འདར་གཞན་ཞིག་རྒྱག་ཏུ་བཅུག་སོང་། སྐབས་འདིར་ང་ལ་དངོས་འབྲེལ་མོ་དང་ཁ་འབྲལ་འདོད་ཅིག་གཏན་ནས་མ་བྱུང་ལ། དུས་ཚོད་ཀྱང་རིང་པོ་འགོར་སོང་བའི་ཚོར་བ་ཅི་ཡང་མི་འདུག ངོ་མ་བཤད་ན་སེམས་ཀྱི་གཏིང་འཁྱག་རེངས་སུ་འགྱུར་བཞིན་པའི་ང་ལ། ཁོ་མོས་དྲོད་ཁོལ་ཁྱད་པར་བ་ཞིག་བསྟབས་བྱུང་བས་མ་ཡིན་ནམ།

“རེད”གང་ལྟར་ངའང་སྐྱེས་པ་ཕོ་ཞིག་ཡིན་པས། ངས་བུད་མེད་ཅིག་གི་མདུན་དུ་སྡུག་ཡུས་འདོན་མི་ཉན་ཨང་སྙམ་པའི་མུར། ངས་སྐད་ཆ་དེ་འདྲ་ཞིག་ཤོར་སོང་།

དེ་ལྟར་ངེད་གཉིས་མཐོ་འབྲིང་ནས་མཐར་ཕྱིན་པའི་ལོ་དེར་ཁ་གྱེས་པ་བཞིན། ནམ་ཞིག་ལ་འཕྲད་སྲིད་པའི་གདེང་ཚོད་ཅི་ཡང་མེད་པར་གྲོང་ཁྱེར་འདིའི་སྲང་ལམ་རེ་རེ་དེད་དེ་མདུན་ནས་མདུན་དུ་སོང་བ་ཡིན།

ང་མདུན་དུ་སོང་གིན་སོང་གིན། སླར་ཡང་མོའི་མིང་ལ་འདང་རྒྱག་གི་སྨུག་སྤྲིན་འཐིབས་པའི་ཁྲོན་པ་རུ་ལྷུང་མགོ་བརྩམས་སོང་། དངོས་འབྲེལ་ཕྱོགས་ཕྱོགས་ཙམ་ཡང་དྲན་རྒྱུ་མི་འདུག ཏག་ཏག་མཚམས་ཚིགས་འདིར་ངས་དོན་འགྲུབ་དགེ་ལེགས་དྲན་བྱུང་། ངས་དེ་མ་ཐག་ཁོར་ཁ་པར་བཏང་བ་ཡིན།

“ཁོ་རེ”ངས་ཐད་ཀར་ཁོའི་མིང་མ་བོས་པར་གུས་ཞབས་མེད་པའི་འབོད་སྒྲ་ཞིག་དེ་ལྟར་ཤོར་བྱུང་།

“ཨ”ཟེར།

“མོའི་མིང་ལ་ཅི་ཟེར་རམ།” ཞེས་བཤད་དུས་ང་ལ་ངོ་མ་དོགས་མི་བདེ་བའི་ཉམས་སྣང་ཞིག་ཤར་བྱུང་།

“ཨ”ཁོས་སླར་ཡང་ཧ་མ་གོ་བའི་ཚུལ་དུ་དེ་ལྟར་ཟེར།

“ད་སྔོན་ང་དང་མཉམ་དུ་ཟ་མ་ཟོས་པའི་སློབ་གྲོགས་དེའི་མིང་ལ་ཅི་ཟེར་བ་ཡིན་ནམ།”ཞེས་ཞིབ་ཏུ་བཤད་པ་ཡིན།

སྐབས་ཐོག་འདིར་ཁོས་ང་ལ་ཨ་མི་ཟེར་བར། ཧབ་དགོད་ཡིད་ཚིམ་པ་ཞིག་བྱས་སོང་། ང་ཧབ་དགོད་དེར་ཉན་རྒྱུ་ལས་ཐབས་གཞན་ཅི་ཡང་མི་འདུག ངའང་བཅོས་མའི་ངང་ཁོ་དང་མཉམ་དུ་དགོད་ཙམ་མི་བྱེད་ཀ་མེད་བྱུང་།

ཁོ་ཡིད་ཚིམ་པ་ཞིག་བགད་རྗེས་ད་གཟོད་ཁ་གྲག་བྱུང་། “མཐོ་འབྲིང་སྐབས་སུ་ཁོ་མོ་ཁྱོད་ཀྱི་སྔོན་དུ་ལོ་གསུམ་ལ་བསྡད་པ་རེད།” མོའི་མིང་མི་བཤད་པར་ང་ལ་དེ་ལྟར་མཚང་འབྲུ་ལྟ་བུ་ཞིག་བྱས་སོང་། སྐབས་འདིར་ང་ཁོ་ལ་ཅུང་ཙམ་ཁྲོས་སོང་བས།

“དེ་དག་ཁྱོད་དང་འབྲེལ་བ་ཅི་མེད། མིང་མི་བཤད་ན་ཁ་པར་སྒོ་རྒྱག་རྒྱུ་ཡིན”ཞེས་སྐད་ཇེ་རྩུབ་ཏུ་བཏང་སྟེ་བཤད་པ་ན།

ཁོས་ཀྱང་ང་ཁྲོས་ཡོད་པ་ཤེས་པ་ལྟར། སྐད་རན་པོས“ཚེ་རིང་མེ་ཏོག”ཟེར།

བར་གླགས་འདིར་ངས་ཁ་པར་གྱི་སྒོ་ཇི་ལྟར་གཏན་པའང་དྲན་སོས་རྒྱུ་མི་འདུག མདུན་ཕྱོགས་སུ་མུན་པ་སྟུག་པོ་ཞིག་འཁྲིགས་འདུག མུན་པའི་ལྟག་རྒྱབ་ཏུ་མུན་པ་ལས་ཅི་ཡང་མཐོང་ཐབས་མི་འདུག

མཚན་མོ་འདིར་ངས་ཁ་ནས་ཚམ་ཚོམ་ཅི་ཡང་མེད་པར་སྐད་གསེང་མཐོན་པོས“ཚེ་རིང་མེ་ཏོག”ཅེས་ཐེངས་ཤིག་ཤོར་སོང་བ་དང་། འགྲོས་མགྱོགས་པའི་དུས་རབས་འདི་ནས་ངས་མང་པོ་མང་པོ་ཞིག་རྨང་ནས་འབོར་བཞིན་ཡོད་པ་ཚོར་བྱུང་།།