ཡི་གེའི་སྒྱུ་འཕྲུལ་ལས་སྐྱེས་པའི་སྣང་བ།

ཉི་འོད་ཀྱིས་ཁྱེར་ནས་ཡོང་བའི་ལྷིང་འཇགས་ལ།

རྣམ་ཤེས་ཁེན་ནས་བསྡད་ཚེ་དྲོད་ལམ་ལམ་བྱེད།

མི་ཚེའི་གྲིབ་སོའི་ཁ་ན།

སྐར་ཆ་རེ་རེས་ཕར་ཕར་འདེད་པ་སུས་ཀྱང་ལོས་ཤེས།

ཤེས་བཞིན་འདུར་བའི་འཚོ་བའི་ཁ་རྒྱབ་ནས།

ཉི་མ་རེ་རེ་གཞུག་ལ་སྣུར་བར་སུ་ཡང་ལོས་གོམས།

ཕ་ལགས་བུད་སོང་། ཞྭ་མོ་ཤུལ་དུ་ལུས།

ཞོགས་པའི་ཞྭ་མོ་གྱོན་དབང་མ་བྱིན།

ཐ་ན་མཇུག་མཐའི་ལག་འཇུ་ཡང་བྱེད་ཁོམ་མ་བྱུང་ལ།

བྲེལ་བའི་འཚུབ་ཆའི་བར་ནས་སྙིང་གི་ཚིག་གཅིག་ཀྱང་ཞུ་ལོངས་བྲལ།

ཟླ་བས་སླར་ཡང་འཛུམ་ཆུང་སྟོན་པ་བུ་ཆུང་གཅེས་ལངས་སྟེགས་སམ་ཅི།

སང་ཞོགས་ཐོ་རངས་སྤྲིན་པས་འབྱེད་དམ་ཆར་དང་ཁ་བ་ཅི་ཆའང་།

ལོ་ཟླ་དུ་མའི་རྗེས་ཀྱི་བུ་ལོན་ད་དུང་ཁོག་རྩིས་འདེད་དགོས་སོ།།

ཁང་པ་རླངས་འཁོར་ལྭ་དང་རྐང་སྣམ་ཙག་ཙིག་ཉོ་རྒྱུ་མང་པོ་འདུག

ཟླ་བ་རྗེས་མའི་གླ་ཕོགས་དག་ཀྱང་སྔར་ནས་གཙང་སེལ་བྱས་ནའང་།

སང་ལོའི་དབུལ་ཐར་ད་ལོ་བྱས་ནས་ནད་ཡམས་དག་གི་འགོག་སྲུང་བཞིན།

གློ་བུར་གློད་ལ་གློ་བུར་སྡོམ་བཞིན་མི་ཚེའི་རི་མོ་ཀྱག་ཀྱོག་དག

ལག་པ་འདར་འདར་རྐང་པ་ལྕུག་ལྕུག་མ་བྲིས་བསམས་པ་ག་ལ་ཡོད།

ག་ལ་ག་ལ་ད་ནི་ངལ་ཙམ་གསོ་བར་བྱེད།

ག་ལ་ག་ལ་ངལ་གསོ་བྱེད་ཁོམ་གང་ན་ཡོད།

སང་ཞོགས་ད་དུང་ལས་ཀ་མང་པོ་ཁ་སང་བཞིན་དུ་འཛིང་མེད་དམ།

ཡི་གེ་འདི་དག་གཏག་གིན་གཏག་གིན་ཚེར་མ་འཛིངས་ནས་སྐྱེ་བཞིན་འདུག

འབུ་དང་དུག་སྦྲུལ་ཨ་ང་ཙི་དག་དུས་ཚིགས་མེད་པར་འཁོར་ནས་འཚོ།

ཆུ་ལ་སྦངས་པའི་སྟབས་ཐུག་ཕྱེད་དེ་མ་འཁྱེར་ང་ལ་འཇོག་རོགས་ཀྱེ།

སང་ཞོགས་ཉི་མས་ངུ་འབོད་བྱེད་དུས་རྒྱུ་མའི་ཁ་ལེབ་དེ་ག་ཡིན།

སང་ཉིན་ཉི་མ་འཆར་བའི་དུས་ལ་ད་དུང་གཉིད་ནས་འདུག་དགོས་ཏེ།

རུ་སྐོར་ཚང་གིས་གཡོས་སྦྱོར་བྱེད་པའི་སྒྲ་དག་ད་དུང་ཐག་ཐག་ཐག

ང་ཡིས་ཕབ་གཞོང་ལྷོད་ཀྱིས་བརྡུངས་པའི་སྒྲ་དང་འདྲེས་པས་མཚམས་མི་ཆད།

ཡི་གེ་འདི་དག་སྔོ་ཚོད་ཅིག་གམ་སུར་པན་རྡོག་ཅིག་ཅི་ཆ་མོད།

དྲི་མ་ཆིལ་ཆིལ་སྣ་ལ་ཐུལ་བས་ཡི་ག་ཆེ་ནས་ཆེ་རུ་སོང་།

གཉིད་ཐབས་མེད་པའི་རྨི་ལམ་དག་ཀྱང་གཏན་ནས་སད་དེ་གླུ་དབྱངས་ལེན།

ཁ་སང་བྲིས་པའི་གླུ་ཚིག་དེ་ནི་ཡིད་དུ་འབབ་པ་ཆུ་ཕྲན་འདྲ།

སང་ཞོགས་གྱེར་ཚེ་སྙན་ངག་ཡིན་ནམ་ཟས་ཐོའི་ཐིག་ཕྲེང་འགའ།

ཡང་ན་ཤོག་བུ་སྟོང་བ་ཞིག་ལ་སྨྱོན་པའི་ལབ་རོ་སྐྱུགས་པའོ།།

མེ་སྟག་ལམ་ལམ་ཁ་སང་ཞི་ཞིང་པདྨའི་མདངས་ཀྱང་མདང་དགོང་རྙིད།

བྱིས་པ་མང་པོའི་རྨི་ལམ་ནང་ན་ཡི་གེ་ཁྲ་ཁྲ་འཕུར་གྱིན་འདུག

ང་ཡིས་ཕབ་གཞོང་གཏགས་ཉེས་ཤིག་གིས་ཡི་གེ་གཅིག་གི་གཤོག་པ་བཅག

སྙན་ངག་མཁན་པོས་མིག་ཆུ་ཤག་ཤག་ལག་པ་བསྲིངས་ནས་ཆུང་མར་འཐམ།

ང་ཡི་ངག་གི་རྩ་ལམ་དག་ནི་ཆུ་སྒོ་བརྒྱབ་བཞིན་ཏན་སེ་བསྡད།

ང་ཡི་སྙན་ངག་མཁན་པོ་ཁོང་གི་རྨི་ལམ་དཀྲོགས་ལ་ཤིན་ཏུ་འགྱོད།

ཡི་གེའི་གཤོག་པ་དུམ་སེ་ཆག་ལ་སྙན་ངག་པ་ཡིས་སྡང་མིག་འགྱེད།

སྨྲ་བ་མེད་པར་ཞོགས་པའི་ཉི་མ་ཡང་དང་འོར་དུ་མིག་ལ་བཤར།

ཉི་མ་ཁོ་ན་ཁ་སང་བཞིན་དུ་མིག་ལ་གཙེ་བ་ངོ་མ་བདེན།

ཁོང་ལ་ཅི་ཁག་མིག་ཤེལ་ནང་གི་ཡི་གེ་དག་ཀྱང་འོད་ལ་གྲུབ།

དགོངས་དག དགོངས་དག

ང་ཡིས་བཅགས་པའི་ཡི་གེ་དག་གི་ཤེལ་ཆག་གིས།

ཁྱོད་ཀྱི་ཞལ་དང་སྤྱན་གྱི་ཟུར་ལ་རྨ་ཁ་ཨེན་ཙམ་མེད་པར་ཤོག

མེ་སྟག་གློ་བུར་ངུ་ངག་དང་བཅས་མངལ་སྒོའི་ཁ་ནས་ལྟིགས་སེ་ལྷུང་།

ཁོང་གིས་བྲིས་པའི་ཐ་སྙད་དག་གིས་ངུ་སྐད་ཐར་ཐར་བརྒྱུགས་ནའང་།

ཆང་གི་དྲི་མ་བེར་བེར་ཙམ་ཞིག་སྣ་ལ་འཐུལ་བར་མོས་མ་བྱུང་།

ཡི་གེ་དག་ཀྱང་ཤར་ལ་གཡུགས་ཞོར་ལག་པ་གང་ལ་སྟོན་བཞིན་འདུག

ཚེར་མའི་སིལ་གྱི་མེ་ཏོག་དག་གིས་ཁོ་ལ་ཞེ་སྡང་བསླང་བ་འདྲ།

གླང་རྒན་ཞོན་པའི་རྫི་བོ་དག་ཀྱང་མིག་ལ་ཐོགས་ན་སུན་བཞིན་འདུག

ཅི་ཁག་ཅི་ཁག གསུང་ལ་ཅི་འཁྲུལ་སྤོས་ཀྱིས་བདུག་པའི་ཡི་གེ་དག

མཆོད་ཁྲི་ལས་བབས་གད་སྙིགས་ནང་ན་ཡར་ལ་སྒྲིག་མཁན་མེད་པར་འདུག

བཟོད་པ་མེད་པའི་ཐ་སྙད་དག་ཀྱང་གཏགས་ན་སྙིང་ལ་ན་ཟུག་སྟེར།

གཏག་གིན་གཏག་གིན་བསུབས་ནས་འོང་བའི་ཚོར་བ་དེའང་སྐྱུག་མེར་མེར།

ང་ཡི་ཐ་སྙད་ཤི་རོ་དག་གིས་རལ་གྲི་འཕྱར་ནས་སྒོ་ལ་ལྡིང་།

ཁྱིམ་མཚེས་ཚང་གི་སྟ་རེ་འཕྱར་ནས་ང་ལ་གཟས་ནས་མཆེ་བ་གཙིགས།

ཡི་གེ་འདི་དག་སྒོ་ལ་སོང་ནས་རང་ལ་སྡང་བར་གོམས་སོང་བས།

ད་ནི་ཕབ་གཞོང་འགུལ་ཙམ་གྱིས་ཀྱང་སྙིང་ལ་སྙོབ་པར་ཐེ་ཚོམ་མེད།

ཡི་གེ་དག་ནི་ཨ་ལས་སྐྱེས་པ་མ་ཡིན་ནམ།

ཨ་ནི་བྱམས་བརྩེའི་སེམས་ཀྱིས་མགར་བ་མ་ཡིན་ནམ།

ཨ་ཙི་ཨ་ཙི། ཞེ་སྡང་ཆེ་བའི་ཡི་གེ་དག

སྦྲུལ་བཞིན་ནུར་ནས་ནུར་ནས་ཐོན་པས་གཞོན་ནུ་དག་ནི་རྒྱང་ལ་འབྲོ།

སོ་སོའི་བུ་ཆུང་པང་དུ་བཟུང་ནས་འཁོར་བར་གད་མོ་དགོད་བཞིན་འབྲོ།

ལས་ཀྱིས་འཐུས་པའི་ཐ་སྙད་རེ་རེ་རྒྱང་དུ་ཤོར།

རྒྱང་ལ་སོང་ནས་ང་ལ་གྲི་དང་མདུང་ཡང་གསོར།

ལས་འབྲས་བོར་བའི་ཡི་གེ་ང་དང་ང་ཡང་ལས་འབྲས་བོར་བའི་ཡི་གེ་དག

མེ་ལྕེ་འབར་བའི་མཚན་མོ་ཞིག་ལ་ལག་པའི་ཕྱི་ནང་བརྗེས་ནས་འགྲིག

ད་ནི་ཡི་གེ་ཆག་རོ་དག་གི་གྲོད་པ་ལྟོགས་ལ་དབུགས་ཀྱང་ཆད།

མིག་ཟུང་ཀེམ་ཀེམ་ང་ལ་ལྟ་མོད་ང་ཡང་ཨ་ཐང་ཆད་ནས་ཡོད།

ཁྱོད་ལ་བདག་པོ་མཐེ་བོང་ཙམ་ཞིག་རྒྱང་ན་ཡོད་དམ་ངས་ཅི་ཤེས།

ཕབ་གཞོང་ཟད་པའི་གློག་ཀླད་ངོས་ལ་ད་དུང་ཡི་གེ་འགའ་གཏགས་འཇོག

དུས་རབས་རྗེས་མའི་རྗེས་མ་ཞིག་ལ་སུ་ཞིག་ཐོལ་གྱིས་ཡར་ལངས་ནས།

དུར་སའི་ནང་གི་ཡི་གེ་དག་ཀྱང་རོ་ལངས་རྒྱག་མིན་སུས་དཔག་ཐུབ།

ཞོགས་པའི་ཉི་འོད་མཚན་མོའི་ཟླ་བས་དེད་དེ་སོང་ཤུལ་གྱི།

ལྷིང་འཇགས་ངོས་ལ་ཡི་གེ་འབྲི་བ་བུད་མེད་དག་གི་མཆུ་སྒྲོས་ལ།

ཞོགས་པར་རྩི་བྱུགས་མཚན་ལ་འོ་ཡིས་རྗེས་ཤུལ་མེད་པར་བྱས་པ་བཞིན།

ཡི་གེ་དག་གིས་སྡུག་བསྔལ་མཚོན་ན་མེ་ལྕེ་བཞིན་དུ་སྙིང་ལ་ཚ།

ཡི་གེ་དག་གིས་བདེ་སྐྱིད་བྲེས་ན་འཇའ་ཚོན་ཇི་ལྟར་མིག་ལ་འཕྱོར།

ཡི་གེ་དག་གི་ཡ་ཆུང་ནང་དུ་དུད་ནག་སྒམ་གང་སྤུངས་བཞག་སྟེ།

ཚོར་བའི་གཏིང་གི་རྨ་ཁ་གསོ་དུས་ཡང་ཡང་རྔུབ་ན་སྐྱིད་པ་འདྲ།