ཞིང་ཆེན་སློབ་གསོ་ཐིང་གི་གནས་ཚུལ་ལྟར་ན། ཉེ་ཆར། སི་ཁྲོན་ཞིང་ཆེན་གྱི་སྐད་ཡིག་ལས་དོན་ལོ་གསུམ་གྱི་བྱ་སྤྱོད་འཆར་གཞི་(2023ལོ་ནས་2025ལོའི་བར།)ལས་དོན་ལས་འགན་ཁག་དོན་འཁྱོལ་ཞིབ་ཚགས་ཡོང་བར་སྐུལ་འདེད་གཏོང་ཆེད། རང་རེའི་ཞིང་ཆེན་གྱིས་རྒྱལ་ཁབ་ཀྱི་སྤྱི་སྤྱོད་སྐད་ཡིག་ཁྱབ་གདལ་གཏོང་ཤུགས་ཆེ་རུ་གཏོང་བའི་བྱ་སྤྱོད་ཆེན་པོ་ལྔ་ལག་བསྟར་བྱ་རྒྱུ་རེད།
ས་གནས་གཅིག་ལ་ཐབས་ཇུས་གཅིག་ལག་བསྟར་བྱས་ནས་སྤྱི་སྐད་ཁྱབ་གདལ་མཐོར་འདེགས་གཏོང་བའི་བྱ་སྤྱོད་སྤེལ་བ། གཙོ་གནད་ལ་དམིགས་པ་དང་ཡུལ་བབ་དང་བསྟུན་ནས་ཞིང་ཆེན་ཡོངས་ཀྱི་ས་གནས་ཁག་གི་ཞན་ཆ་ཁ་གསབ་དང་། ནང་སྙིང་རྒྱ་བསྐྱེད་པའི་རིགས་དབྱེ་མཛུབ་སྟོན་བྱས་ཏེ། ས་གནས་གཅིག་ལ་ཐབས་ཇུས་གཅིག་གིས་སྤྱི་སྐད་ཁྱབ་ཚད་དང་སྤྱི་སྐད་ཆུ་ཚད་ཕྱོགས་ཡོངས་ནས་མཐོར་འདེགས་སུ་གཏོང་དགོས་ཤིང་། ཞིང་ཆེན་ཡོངས་ཀྱི་སྤྱི་སྐད་ཁྱབ་གདལ་གཏོང་ཚད་བརྟག་དཔྱད་རྩ་འཛུགས་བྱེད་དགོས།
མི་རིགས་ས་ཁུལ་དུ་རྒྱལ་ཁབ་ཀྱི་སྤྱི་སྐད་ཁྱབ་གདལ་དུ་གཏོང་བའི་འགག་སྒྲོལ་བྱ་སྤྱོད་ལག་བསྟར་བྱེད་པ། མི་རིགས་ས་ཁུལ་གྱི་ཁྱབ་ཁོངས་གཙོ་བོ་དང་མི་ཚོགས་གཙོ་བོར་རྒྱལ་ཁབ་ཀྱི་སྤྱི་སྐད་སློབ་གསོ་དང་གསོ་སྦྱོང་ལས་དོན་ཕྱོགས་ཡོངས་ནས་ཤུགས་སྣོན་བྱེད་པ། ལིའང་ཧྲན་ཁུལ་གྱིས་མུ་མཐུད་དུ་ལོ་45མན་གྱི་ཞིང་གྲོང་གི་གཞིས་སྲུང་བུད་མེད་གཙོ་གནད་དུ་བཟུང་བའི་ཆེད་དོན་གསོ་སྦྱོང་སྤེལ་དགོས།
སྤྱི་སྐད་ཁྱབ་གདལ་གྱིས་གྲོང་གསེབ་དར་རྒྱས་ལ་རོགས་རམ་བྱེད་པའི་བྱ་སྤྱོད་ལག་བསྟར་བྱེད་པ། ལས་རིགས་ནུས་རྩལ+སྤྱི་སྐད་རྣམ་པའི་མཉམ་འདྲེས་གསོ་སྦྱོང་གི་སྡེ་ཁག་མང་པོའི་མཉམ་འབྲེལ་ལམ་སྲོལ་འཛུགས་པར་འཚོལ་ཞིབ་བྱས་ཏེ། སྤྱི་སྐད་གསོ་སྦྱོང་དེ་ལས་རིགས་སྡེ་ཁག་གི་གསོ་སྦྱོང་རྣམ་གྲངས་སུ་འཇོག་པར་སྐུལ་འདེད་གཏོང་དགོས། སློབ་གསོ་པུའུའི་གཅིག་གྱུར་བཀོད་སྒྲིག་གཞིར་བཟུང་། ཁྲེང་ཏུའུ་གྲོང་ཁྱེར་གྱིས་གྲོང་གསེབ་ཀྱི་སྐད་ཡིག་སྤུས་ཚད་མཐོ་བའི་འཕེལ་རྒྱས་སྔོན་སྐྱོད་ཚོད་ལྟའི་ལྟེ་གནས་འཛུགས་སྐྲུན་ལ་མཛུབ་ཁྲིད་བྱས་ཏེ། ཚོད་ལྟའི་ལས་དོན་ཉམས་མྱོང་ཕྱོགས་བསྡོམས་དང་ཁྱབ་གདལ་བཏང་ནས་ཞིང་ཆེན་ཡོངས་ཀྱི་ཁྱབ་ཁོངས་སུ་ལས་དོན་གསར་གཏོད་བྱེད་འགོ་འཛུགས་དགོས། རྒྱལ་ཁབ་ཀྱི་སྐད་ཡིག་ཁྱབ་གདལ་རྟེན་གཞི་དང་མཐོ་རིམ་སློབ་གྲྭ་རྩ་འཛུགས་བྱས་ནས་གྲོང་གསེབ་དར་རྒྱས་ལ་རོགས་སྐྱོར་བྱེད་པའི་ཁ་གཏད་རོགས་སྐྱོར་དང་། སློབ་ཆེན་སློབ་མའི་སྤྱི་ཚོགས་ལག་ལེན་གྱི་དང་བླངས་ཞབས་ཞུ་སོགས་ཀྱི་བྱེད་སྒོ་སྤེལ་དགོས།
སློབ་གྲྭའི་རྒྱལ་ཁབ་ཀྱི་སྤྱི་སྐད་སྤུས་ཚད་མཐོ་བའི་ཁྱབ་གདལ་བྱ་སྤྱོད་ལག་བསྟར་བྱེད་པ། སློབ་གྲྭའི་སྐད་ཡིག་ལས་དོན་ཚད་ལོན་འཛུགས་སྐྲུན་ལ་མུ་མཐུད་དུ་སྐུལ་འདེད་གཏོང་བ་དང་། སློབ་སྔོན་བྱིས་པའི་སྤྱི་སྐད་སློབ་གསོའི་འཆར་གཞི་ལག་བསྟར་དང་། སྲོལ་རྒྱུན་གྱི་ཡིག་གཟུགས་སློབ་གསོ་དང་གྲངས་འཛིན་ཆ་འཕྲིན་ཅན་མཉམ་འདྲེས་དམ་ཚགས་ཡོང་བར་སྐུལ་འདེད། སློབ་གྲྭ་འབྲིང་ཆུང་གི་དགེ་རྒན་དང་སློབ་མའི་ཚད་ལྡན་རྒྱ་ཡིག་འབྲི་བའི་གསོ་སྦྱོང་སློབ་གསོར་ཤུགས་སྣོན་རྒྱག་དགོས། མཐོ་རིམ་སློབ་གྲྭའི་སྐད་ཡིག་ལས་དོན་གསོ་སྦྱོང་སྤེལ་ནས་མཐོ་རིམ་སློབ་གྲྭའི་རྒྱལ་ཁབ་ཀྱི་སྤྱི་སྐད་ཁྱབ་གདལ་དང་སྤྱི་ཚོགས་ཞབས་ཞུའི་ནུས་པ་མཐོར་འདེགས་སུ་གཏོང་དགོས།
རྒྱལ་དམངས་ཀྱི་སྐད་ཡིག་ཉེར་སྤྱོད་ནུས་པ་མཐོར་འདེགས་སུ་གཏོང་བའི་བྱ་སྤྱོད་ལག་བསྟར་བྱེད་པ། རྒྱལ་ཁབ་ཀྱི་སྤྱི་སྐད་ཀྱི་སྤྱི་ཚོགས་ཉེར་སྤྱོད་ལྟ་ཞིབ་ཚད་ལེན་ལམ་ལུགས་འཐུས་ཚང་དུ་གཏོང་བ་དང་། རྒྱུན་རྣམ་ཅན་གྱིས་སྤྱི་པའི་ཞབས་ཞུའི་འབྲེལ་ཡོད་ལས་ཞུགས་མི་སྣའི་སྤྱི་སྐད་ཉེར་སྤྱོད་གནས་ཚུལ་ལ་བརྟག་དཔྱད་དང་། དྲ་རྒྱའི་སྐད་ཡིག་ཉེར་སྤྱོད་ལ་ལྟ་སྐུལ་ཞིབ་བཤེར་བྱ་རྒྱུ་འཚོལ་ཞིབ་བྱེད་པ། ཏང་སྲིད་ལས་ཁུངས་སོགས་ཀྱིས་སྤྱི་སྐད་ལས་དོན་ཁྱབ་གདལ་དང་བཀོལ་སྤྱོད་གནས་ཚུལ་ལ་ལྟ་ཞིབ་བྱེད་དགོས། །