ཞིང་ལས་དང་གྲོང་གསེབ་ཐིང་གིས་ཉེ་ཆར《ཐེན་ཧྥུའུ་འབྲུ་མཛོད། རྫོང་བརྒྱའི་ཁུལ་སྟོང་ཞེས་པའི་འཛུགས་སྐྲུན་བྱེད་སྒོའི་ཇུས་གཞི(2024-2026)》བཟོས་ནས་ཞིང་ཆེན་ཡོངས་ཀྱི་རྫོང་(གྲོང་ཁྱེར་དང་ཁུལ)100ཡན་ལ་ཚད་གཞི་མཐོ་བ་དང་། ཆུ་ཚད་མཐོ་བ། སྤུས་ཚད་མཐོ་བ་བཅས་ཀྱི་གཅིག་སྡུད་འབྲེལ་མཐུད་ཁུལ་གྱི་འབྲུ་སྣུམ་མུའུ་སྟོང་གི་ཐོན་ཚད་མཐོ་བའི་ཁུལ་1000འཛུགས་སྐྲུན་བྱ་རྒྱུར་སྐུལ་འདེད་གཏོང་དགོས་ཞེས་བཏོན།
《ཇུས་གཞི།》ཡི་ནང་འཛུགས་སྐྲུན་གྱི་དམིགས་ཚད་ཁ་གསལ་བཟོས་ཏེ། 2024ལོ་ནས་2026ལོའི་བར། མུའུ་སྟོང་གི་ཐོན་ཚད་མཐོ་བའི་ལོ་ཏོག་མུའུ་རེའི་ཆ་སྙོམས་ཐོན་ཚད་ལོ་ལྟར་རྫོང་(གྲོང་ཁྱེར་དང་ཁུལ)དེ་གའི་ཆ་སྙོམས་ཆུ་ཚད་ལས་10%ཡན་མཐོ་བ་ཡོང་བར་བརྩོན་ལེན་བྱེད་པ་དང་། དེའི་ནང་གྲོ་དང་ཞོག་ཁོག་15%ཡན་ཟིན་པ་དང་། ཞིང་ཆེན་ཡོངས་ཀྱི་འབྲུ་རིགས་མུའུ་རེའི་ཆ་སྙོམས་ཐོན་ཚད་ལོ་རེར་སྤྱི་རྒྱ་3ཡན་འཕར་བར་སྐུལ་ཁྲིད་དང་། སྤྱིའི་ཐོན་ཚད་ལོ་རེར་རྒྱ་མ་དུང་ཕྱུར་5ཡན་འཕར་བར་བྱ་དགོས། པད་ཁའི་ཆ་སྙོམས་མུའུ་རེའི་ཐོན་ཚད་རྫོང་(གྲོང་ཁྱེར་དང་ཆུས)དེ་གའི་ཆ་སྙོམས་ཆུ་ཚད་ལས་5%ཡན་མཐོ་བ་ཡོད་པས་ཞིང་ཆེན་ཡོངས་ཀྱི་པད་ཁའི་ཐོན་ཚད་བརྟན་པོའི་ངང་འཕར་རྒྱུར་སྐུལ་ཁྲིད་བྱེད་དགོས།
འཛུགས་སྐྲུན་བཀོད་སྒྲིག་ཐད་ཞིང་ཆེན་ཡོངས་སུ་ཁྲེང་ཏུའུ་བདེ་ཐང་ཁུལ་དང་། གཤོང་སའི་རི་མ་ཐང་ཁུལ། གཤོང་སའི་མཐའ་འཁོར་གྱི་རི་ཁུལ། ཕན་ཞི་དང་ཁྲོན་ནུབ། དེ་མིན་སི་ཁྲོན་ནུབ་བྱང་མཐོ་སྒང་བཅས་ས་ཁུལ་ཆེན་པོ་བཞི་རུ་དབྱེ་ཡོད་པར་མ་ཟད། ས་ཁུལ་རེ་རེའི་འབྲུ་སྣུམ་མུའུ་སྟོང་གི་ཐོན་ཚད་མཐོ་བའི་ས་ཁུལ་འཛུགས་སྐྲུན་བྱེད་པའི་སྤྱིའི་གྲངས་འབོར་དང་ལོ་ཏོག་མི་འདྲ་བའི་འཛུགས་སྐྲུན་གྲངས་འབོར་གཏན་འཁེལ་བྱས་ཡོད། །