དམངས་འཚོའི་འདབ་ལག་མཐོ་སྒང་ཡུལ་ལ་རྒྱས།

ཁྱེད་བདེ་མོ། ཞིང་སྨན་འདི་དག་མ་ཞིག་ཡིན་མིན་ལྟ་རོགས་བྱས་ན་ཆོག་གམ། ལྡུམ་བུ་འགོག་བྱེད་ཀྱི་སྨན་འདི་འདྲ་ཉོ་རྒྱུ་ཨེ་འདུག །དག་རྫུན་དབྱེ་རྟགས་ལ་ཡག་པོ་བལྟས་ནས། ས་བོན་རྫུན་མ་དང་ངན་པའི་རིགས་ལ་གཟབ་དགོས། ཞེས་ཉིན་ཤས་བསྟུད་མར་དཀར་མཛེས་ཁུལ་འབའ་ཐང་དང་རོང་བྲག །དཔལ་ཡུལ། བརྒྱད་ཟིལ། སྡེ་དགེ་སོགས་ས་ཁུལ་གྱིས་དཔྱིད་དུས་ཀྱི་ཞིང་ཁའི་དོ་དམ་དང་དཔྱིད་རྨོ་སྟ་གོན་སོགས་ཞིང་ལས་རྒྱུ་ཆ་ཉོ་ཚོང་བྲིན་པའི་དུས་ཚིགས་ལ་དམིགས་ནས། གྲོང་གསེབ་དང་གྲོང་ཁྱེར། གྲོང་གསེབ་འབྲེལ་མཚམས་དང་ཞིང་ལས་རྒྱུ་ཆ་གཉེར་སྐྱོང་བསྡུ་འགྲེམས་ལྟེ་གནས། འདེབས་འཛུགས་གསོ་སྤེལ་ཐོན་སྐྱེད་རྟེན་གཞི། དེང་རབས་ཞིང་ལས་གླིང་ཁུལ་སོགས་གཙོ་གནད་དུ་བཟུང་སྟེ། མངའ་ཁུལ་གྱི་ཞིང་ལས་རྒྱུ་ཆ་ཐོན་སྐྱེད་ཁེ་ལས་དང་གཉེར་སྐྱོང་སྡེ་ཚན་ཡོངས་ལ་སྐོར་ཞིབ་གྲལ་བཤེར་བྱས་པ་དང་། ཞིང་ལས་ཐོན་རྫས་གལ་ཆེན་མཁོ་སྤྲོད་བདེ་འཇགས་དང་ཞིང་ལས་ཐོན་བརྟན་འབབ་འཕར་ཡོང་བར་ནུས་ཤུགས་ཡོད་རྒུས་འགན་སྲུང་བྱེད་བཞིན་ཡོད།

དཔྱིད་ཀྱི་དུས་སུ་ལས་ལ་བྲེལ་ཞིང་། དཔྱིད་རྨོད་དཔྱིད་འདེབས་དང་། གེགས་འགོག་ཕྱུགས་སྲུང་། སྡོང་འཛུགས་ནགས་བསྐྲུན། བདེ་ཐང་བརྟག་དཔྱད། སློབ་གསོ་གཤམ་སྐྱེལ། སོན་བཟང་གསོ་སྐྱོང་། འབབ་འཕར་ལ་སྐུལ་འདེད། འབྲུ་རིགས་ཉེན་མེད་འགན་ལེན་བཅས་ཀྱི་ལས་ཀ་སྒྲུབ་ནས། དཔྱིད་ཀའི་གངས་ལྗོངས་ས་མཐོར་བྲེལ་འཚུབ་ཀྱི་རྣམ་པས་ཁེངས།

དཔྱིད་ཀྱི་དུས་སུ་ཕྱུག་འགྱུར་རེ་བས་ཁེངས།

ཀུ་ཤུའི་སྡོང་ཕྲུག་སྤྲོད་བཞིན་འདུག་ཅེས་དགའ་སྤྲོའི་སྐད་སྒྲ་སྒྲོག་སར་ཕྱིན་དུས། རྔ་བ་ཁུལ་ལི་རྫོང་ཞ་མོང་ཡུལ་ཚོ་ཧྲ་ཅི་གྲོང་ཚོའི་ཅན་ཝུའེ་དམག་དཔོན་ཐང་ཆེན་དུ་གྲོང་མིར་རིན་མེད་ངང་ཀུ་ཤུའི་སྡོང་ཕྲུག་སྤྲོད་བཞིན་འདུག །གྲོང་ཚོར་བཅའ་སྡོད་ལས་དོན་རུ་ཁག་དང་ཧྲ་ཅི་གྲོང་ཚོའི་ཨུ་ལྷན་གཉིས་ཀྱི་ལས་བྱེད་པས་གྲོང་མིར་སྡོང་ཕྲུག་ཐོ་འགོད་བྱས་ཏེ་མང་ཚོགས་ཀྱི་ལག་ཏུ་སྤྲོད་པ་དང་། དོ་སྣང་བྱེད་དགོས་པ་འགྲེལ་བཤད་རྒྱགས་བཞིན་ཡོད་ལ། གྲོང་མི་དུད་ཚང་སོ་སོས་རིན་མེད་ངང་སྡོང་ཕྲུག་10རག་གི་ཡོད་པས། ཚང་མའི་ངོ་གདོང་ནས་དགའ་སྤྲོའི་འཛུམ་མདངས་ཀྱིས་ཁེངས།

ཞ་མོང་ཡུལ་ཚོ་ཧྲ་ཅི་གྲོང་ཚོ་ནི་རི་འགོར་གནས་པའི་རྒྱལ་རོང་བོད་པའི་འདུས་སྡོད་གྲོང་ཚོ་ཞིག་ཡིན་པ་དང་། གྲོང་མིའི་དཔལ་འབྱོར་ཡོང་འབབ་གཙོ་བོ་ནི་གླ་རྒྱགས་པ་དང་ཞིང་ལས་ཐོན་རྫས་འདེབས་འཛུགས་བྲིན་ཚོང་ལ་བརྟེན་ནས་ཡོད། ཁྲོམ་རར་འགྱུར་ལྡོག་བྱུང་བ་དང་ཐོན་ལས་གྲུབ་ཆ་ལེགས་སྒྲིག་བྱས་པ་དང་ཆབས་ཅིག །རི་འགོ་གནས་པར་གནད་དོན་གསར་པ་ཞིག་དང་འཕྲད་ཡོད་པས། མིག་སྔའི་དཀའ་ཁག་སེལ་ནས་ཁྱད་ལྡན་ལེགས་ཆའི་ཐོན་ལས་ཇི་ལྟར་འཕེལ་རྒྱས་གཏང་རྒྱུ་ཁ་ཚ་དགོས་གཏུག་ཏུ་གྱུར་འདུག །ཞ་མོང་ཡུལ་ཚོའི་ལས་བྱེད་པ་ཚོས་རང་འགུལ་ངང་ཞིང་ནང་དང་མུ་ཁར་བསྐྱོད་དེ་ས་རྒྱུ་དང་གནམ་གཤིས། མཚོ་འཕགས་སོགས་ཐོན་ཁུངས་ལེགས་ཆ་བརྟག་ཞིབ་བྱས་པ་དང་། ཡུལ་བབ་དང་བསྟུན་ནས་རུའེ་ཞུའེ་ཀུ་ཤུ་འདེབས་འཛུགས་འཕེལ་རྒྱས་གཏོང་རྒྱུ་གཏན་འཁེལ་བྱས་པར་མ་ཟད། ད་དུང་རྫོང་ཞིང་ལས་ལག་རྩལ་རིགས་གཅིག་མཁས་ཅན་གདན་འདྲེན་ཞུས་ནས། ས་གནས་ས་ཐོག་ཏུ་གྲོང་མིར་སྡོང་ཕྲུག་འདེབས་འཛུགས་དང་ལུད་ཆུ་དོ་དམ་སོགས་ཀྱི་ལག་རྩལ་གནད་འགག་འགྲེལ་བཤད་ཞིབ་ཕྲ་བརྒྱབ་པ་རེད། མང་ཚོགས་དུད་ཚང་70ལ་རིན་མི་དགོས་པའི་རུའེ་ཞུའེ་ཀུ་ཤུའི་སྡོང་ཕྲུག་རག་རྗེས། གཅིག་རྗེས་གཉིས་མཐུད་ངང་བཏབ་ཟིན་པའི་ཀུ་ཤུའི་སྡོང་ཕྲུག་ལ་ལྟ་བཞིན་འབབ་འཕར་ཕྱུག་འགྱུར་གྱི་རེ་བས་ཁེངས་འདུག

དཔྱིད་ཀ་འདིར། རྔ་བ་རྫོང་གི་འབྲོག་པ་མང་ཚོགས་ཚོས་གྲོ་མ་བརྐོ་བར་བྲེལ་བ་དང་། བཙན་ལྷ་རྫོང་གིས་ཀུ་ཤུའི་མེ་ཏོག་བཙོངས་ནས་འབབ་འཕར་བྱུང་བ་དང་། འདབ་པ་རྫོང་གིས་སྐྱེ་ཁམས་འདབ་པའི་མཁའ་ལམ་བཏོད། བརྒྱད་ཟིལ་རྫོང་གིས་གྲོང་གསེབ་ཀྱི་མི་སྡོད་ཁོར་ཡུག་བཅོས་སྒྲིག་རིམ་སྤོར་དང་ཚོགས་འདུ་གསུམ་དང་སློབ་ཚན་གཅིག །བརྗོད་དོན་གཙོ་བོའི་ཏང་གི་ཉིན་མོ་སོགས་ཏང་ནང་གི་བྱེད་སྒོ་ཟུང་འབྲེལ་བྱས་ཡོད། ཐོན་ལས་རིམ་སྤར་དང་གཞི་ཁྱོན་ཆེ་རུ་གཏོང་བ། སྤུས་ཚད་དང་ཕན་འབྲས་ཆེ་རུ་གཏོང་བ། ཚོང་ར་རྒྱ་སྐྱེད་གཏོང་བ་བཅས་ནི་བྲེལ་འཚུབ་ཆེ་བའི་གནད་ཚིག་གཙོ་བོ་ཡིན་ཞིང་། ཉིན་རེའི་བྲེལ་འཚུབ་ཁྲོད་ལོ་ལེགས་ཡོང་བར་རེ་སྒུག་བྱེད་བཞིན་ཡོད།

སྲིད་ཇུས་ནང་ན་དམངས་འཚོའི་གཏམ་བཟང་ཡོད།

སྤྱི་ཟླ་4པའི་ཚེས་9ཉིན། 《དཀར་མཛེས་ཁུལ་གྱི་2024ལོའི་དམངས་འཚོའི་དོན་དངོས་ལག་བསྟར་ཇུས་གཞི།》པར་འགྲེམས་བྱས་ནས། གྲོང་གསེབ་ཀྱི་གློག་དྲ་སྒྱུར་བཀོད་རིམ་སྤོར་ལས་གྲྭ་ལག་བསྟར་དང་། དཀའ་ངལ་ཡོད་པའི་སློབ་ཆེན་སློབ་མར་རོགས་དངུལ་སྤྲོད་པའི་བྱ་སྤྱོད་ལག་བསྟར། གྲངས་ཉུང་མི་རིགས་ཀྱི་ཁྱད་ཆོས་ལྡན་པའི་གྲོང་སྡེ་གཏོད་པ། རྩྭ་ཐང་གི་སྐྱེ་ཁམས་སྲུང་སྐྱོང་ལས་གྲྭ་ལག་བསྟར། སྨན་བཅོས་རོགས་སྐྱོབ་དམངས་ཕན་ལས་གྲྭ་ལག་བསྟར། སྤྱི་ཕན་རང་བཞིན་གྱི་ལས་གནས་བབ་བསྟུན་གསར་སྤེལ་སོགས་དམངས་འཚོའི་དོན་དངོས་30ཡོངས་བསྒྲགས་བྱས་ནས། མ་དངུལ་སྒོར་ཁྲི་224706.20བཏང་ནས་ནུས་ཤུགས་ཡོད་རྒུས་བྱ་བ་དེ་དག་ཡག་པོ་བསྒྲུབ་རྒྱུའི་འཆར་གཞི་བཏོན་པ་རེད། འཆར་གཞིའི་ནང་འགན་འཁྲིའི་ལས་ཁུངས་དང་གྲངས་འབོར་དམིགས་ཚད། མ་དངུལ་ཡོང་ཁུངས་སོགས་ཁ་གསལ་བཟོས་ཡོད། འདི་ནི་དཀར་མཛེས་ཁུལ་ཨུ་དང་ཁུལ་སྲིད་གཞུང་གིས་ཁུལ་ཡོངས་ཀྱི་མི་དམངས་མང་ཚོགས་ཀྱིས་ཆེས་སེམས་ཁུར་བྱེད་པ་དང་ཆེས་ཐད་ཀར་དང་ཆེས་དངོས་ཡོད་ཀྱི་དམངས་འཚོའི་གནད་དོན་ཁོ་ནར་དམིགས་ཏེ། མང་ཚོགས་ཀྱི་ཐུན་མོང་གི་རེ་འདུན་དང་དོན་དངོས་ཀྱི་དགོས་མཁོ། ནོར་སྲིད་འགན་སྲུང་ནུས་པ་བཅས་ལ་གཅིག་གྱུར་གྱིས་བསམ་གཞིགས་བྱས་ནས་གཏན་འབེབས་བྱས་པའི་དམིགས་འབེན་ཡིན། མང་ཚོགས་མི་ཉུང་བ་ཞིག་གིས་ཁ་པར་བརྒྱུད་ཆ་འཕྲིན་དེ་ཤེས་རྟོགས་བྱུང་བས། དེ་ནི་མང་ཚོགས་ཀྱིས་དོ་ཁུར་བྱེད་པའི་མིག་མཐོང་ལག་ཟིན་དང་དམངས་འཚོའི་དྲོད་ཚད་རེག་ཐུབ་པའི་བྱ་ཐབས་དངོས་ཤིག་རེད་ཅེས་བསྔགས་བརྗོད་ཡང་ཡང་བྱེད་བཞིན་འདུག

སྤྱི་ཟླ་4པའི་ཚེས་10ཉིན། རྔ་བ་ཁུལ་གྱིས་ཆེད་དུ་2024ལོའི་རྔ་བ་ཁུལ་གྱི་དམངས་འཚོའི་དོན་དངོས་ཆེན་པོ་བཅུའི་གསར་འགྱུར་ཡོངས་བསྒྲགས་ཚོགས་འདུ་འཚོགས་པ་རེད། ཚོགས་འདུའི་ཐོག་རྔ་བ་ཁུལ་ཨུའི་རྒྱུན་ཨུ། རྒྱུན་ལས་ཁུལ་དཔོན་གཞོན་པ་ཞུས་ལུའེ་ཡིས། ད་ལོ་ཁུལ་ཡོངས་ཀྱིས་མ་དངུལ་སྒོར་དུང་ཕྱུར་7.1གཅིག་གྱུར་བཀོད་སྒྲིག་བྱས་ནས། དམངས་འཚོའི་དོན་དངོས་ཆེན་པོ་བཅུའི་ཐད་སྤྱད་དེ། ལོ་འདིའི་ནང་རིམ་དབྱེ་ལག་བསྟར་དང་ལོ་མཇུག་ཏུ་ཚང་མ་ལེགས་གྲུབ་ཡོང་བ་བྱ་རྒྱུ་ཡིན་ཞེས་བཤད། ཁུལ་ཡོངས་ཀྱི་ལོ་80ཡན་གྱི་རྒན་རྒོན་ཁྲི་2ལྷག་ལ་ལོ་ན་མཐོ་བའི་ཕོགས་སྣོན་སྤྲོད་པ་དང་། ཁུལ་ཡོངས་ཀྱི་མཚོ་འཕགས་སྨི་2500ཡན་གྱི་ས་ཁུལ་གྱི་སློབ་ཞུགས་གོང་དང་མཐོ་འབྲིང་དཀྱུས་མའི་སློབ་གྲྭར་ཡོད་མུས་ཀྱི་སློབ་མ་ཁྲི་2.39ལ་དྲོད་ལེན་ཁ་གསབ་སྤྲོད་པ། ཁུལ་ཡོངས་ཀྱི་རྫོང་དང་གྲོང་ཁྱེར་13གྱི་གྲོང་གསེབ་ཀྱི་འཐུང་ཆུའི་ལས་གྲྭ་212ཀྱི་ཆུའི་སྤུས་ཚད་ལེགས་སུ་དང་མཐོ་རུ་གཏོང་བ། རྔ་བ་ཁུལ་གྱི་2024ལོའི་དམངས་འཚོའི་དོན་དངོས་ཆེན་པོ་བཅུའི་ཐོག་ནས་དམངས་ཀྱི་འབོད་སྒྲ་དང་དམངས་ཀྱི་འདོད་བློར་དེ་བས་མཐོང་ཆེན་དང་། མིག་མཐོང་ལག་ཟིན་དང་སྤྱི་ཚོགས་འདྲ་མཉམ་ལ་མཐོང་ཆེན་ཚད་མཐོར་གནང་བཞིན་ཡོད་པ་རེད།

ལེའང་ཧྲན་ཁུལ་མུ་ལི་རྫོང་གིས་མང་ཚོགས་ཀྱི་འཚོ་བའི་དགོས་མཁོ་གཞི་འཛིན་སར་བྱས་ཏེ། རྨང་གཞིའི་སྒྲིག་བཀོད་མི་འདང་ས་ཁ་གསབ་བྱེད་པར་བརྒྱུད་མང་ཚོགས་ཀྱི་བདེ་སྐྱིད་སྟོན་གྲངས་མཐོ་རུ་བཏང་། ད་དུང་གྲོང་ཚོ་བཅུའི་དཔེ་སྟོན་གྲོང་ཚོ་བརྒྱར་བཅོས་སྒྲིག་བྱེད་པའི་བྱ་སྤྱོད་ལག་བསྟར་བྱ་རྒྱུ་དམ་འཛིན་བྱ་གཞིར་བྱས་ཏེ། དཔལ་འབྱོར་འཕེལ་རྒྱས་ཀྱི་ད་ལྟའི་གནས་ཚུལ་དང་གྲོང་གསེབ་འཕེལ་རྒྱས་ཀྱི་ཧེ་བག་ལ་བསམ་གཞིག་གང་ལེགས་བྱེད་པ་དང་། མང་ཚོགས་ཀྱི་འདོད་བློར་བརྩི་འཇོག་བྱས་ཏེ་དོན་དངོས་དང་མཐུན་པ་དང་ཐུན་མོང་མ་ཡིན་པའི་ཁྱད་ཆོས་ལྡན་པའི་གྲོང་གསེབ་འཕེལ་རྒྱས་ཀྱི་ཐབས་ལམ་འཚོལ་ཞིབ་བྱེད་བཞིན་ཡོད་པ་རེད།

དཔྱིད་ཀ་ནི་སྐྱེས་མ་ཐག་གི་ཕྲུ་གུ་དམར་འབྱར་ཞིག་དང་འདྲ་བར་སྐྱེ་སྟོབས་ཀྱིས་དཔལ་འབར་ཡོད་ལ། ལས་རིགས་སོ་སོས་བྲེལ་བ་ཆེན་པོས་དཔྱིད་ཀྱི་དཔལ་ཡོན་ལ་བརྟེན་ནས་རྫོགས་ལྡན་མ་འོངས་རེ་བས་བསུ་བཞིན་ཡོད། །