ཁྱོད་ཚོས་ཟ་མ་ཨེ་བཟས། ཁྱིམ་ལ་ཤོག ། སྔོན་ལ་བསྲུབས་ཇ་འཐུང་། ཞེས་དཀར་མཛེས་ཁུལ་སྡེ་རོང་རྫོང་ཛིའུ་ཡུལ་ཤོག་རོང་འདུ་སྒང་སྡེ་པའི་རྒད་པོ་རྒྱལ་མཚན་གྱི་ཆུང་མས་སྨན་པ་ཁྱིམ་དུ་ཐོན་ཐེངས་རེ་རེར་དེ་ལྟར་བྱམས་བརྩེའི་ངང་འཚམས་འདྲི་དང་མགྲོན་བསུ་བྱེད་ངེས།
ཁྱིམ་དུ་སྨན་བཅོས་ལ་ཡོང་བའི་སྨན་པ་ནི་གན་ཆིངས་བཞག་པའི་ཁྱིམ་ཚང་སྨན་པ་ཡིན་ཞིང་། ཁོ་ཚོ་སྡེ་པའི་རྒན་རྒོན་ཡོད་པའི་ཁྱིམ་ཚང་དུ་སོང་ནས་རྒན་རྒོན་ནད་པར་ནད་རྟགས་འདྲི་བ་དང་ཁ་བརྡ་བྱེད་པ་ཡིན།
ཆིངས་བཞག་སྨན་པས་རྒན་རྒོན་ནད་པར་འཐུས་ཚང་བའི་སྨན་བཅོས་ཞབས་ཞུ་མཁོ་འདོན་བྱས།
རྒྱལ་མཚན་ལ་ཁྲག་ཤེད་མཐོ་བའི་ནད་བྱུང་ཡོད། ལོ་དྲུག་གི་སྔོན་དུ་གློ་བུར་དུ་ཀླད་རྩ་འགགས་ནས་ཞ་འཁུམས་ཤིང་མལ་སར་ལྷུང་བ་དང་། སྐད་ཆའང་བཤད་མི་ཐུབ་པར་གྱུར། ཁྱིམ་ཚང་ཆིངས་བཞག་སྨན་པས་ཕྱོགས་གཅིག་ནས་རྒྱལ་མཚན་གྱི་ཁྲག་ཤེད་དང་ཁྲག་མངར་སོགས་ལ་བརྟག་པ་དང་། ཕྱོགས་གཅིག་ནས་ཉེ་ལམ་རྒན་རྒོན་གྱི་བདེ་ཐང་དང་སྨན་བསྟེན་པའི་གནས་ཚུལ། རྒྱུན་ལྡན་གྱི་འཚོ་བར་རང་རྐྱ་ཐུབ་མིན་བཅས་ལ་རྒྱུས་ལོན་ཞིབ་མོ་བྱས་པའི་རྨང་གཞིའི་སྟེང་ཕྱོགས་ཡོངས་ནས་དཔྱད་འཇོག་བྱས་པ་དང་། དེ་ནས་ཁྱིམ་མི་ལ་དཔྱད་འཇོག་མཇུག་འབྲས་གསལ་པོར་བཤད་ཅིང་། རྒད་པོ་རྒྱལ་མཚན་གྱི་ནད་ལ་མཚོན་ན་རྒྱུན་དུ་ལུས་པོའི་སྟེང་འོག་བརྗེ་རོགས་དང་། རྐང་ལག་ལ་འཕུར་མཉེད་བྱེད་པ། ལུས་པོའི་འཕྲོད་བསྟེན་ལ་དོ་སྣང་། དུས་རྒྱུན་ནང་གོས་བརྗེ་བ་སོགས་ལ་དོ་སྣང་བྱ་དགོས་པར་གདམས་པ་དང་།
གཞན་གནས་ཚུལ་ཚབས་ཆེན་བྱུང་ན་དུས་ཐོག་ཏུ་ཁྱིམ་ཚང་སྨན་པར་ཁ་པར་བཏང་ན། སྨན་པ་དུས་ཐོག་ཏུ་ཁྱིམ་ལ་ཐོན་ནས་སྨན་བཅོས་བྱེད་པ་སོགས་དུས་རྒྱུན་དོ་སྣང་བྱ་ཡུལ་དག་ཞིབ་ཏུ་བཤད།
འདི་ནི་དཀར་མཛེས་ཁུལ་སྡེ་རོང་རྫོང་གི་ཁྱིམ་ཚང་སྨན་པའི་ཆིངས་བཞག་ཞབས་ཞུའི་བསྡུས་གཟུགས་ཤིག་ལགས།
ལོ་དྲུག་ཅུ་ཡན་གྱི་རྒན་རྒོན་ཚོའི་བདེ་ཐང་ལས་ཀ་དོན་འཁྱོལ་ལེགས་པོ་བྱེད་པ་དང་། འཚོ་བར་རང་རྐྱ་མི་ཐུབ་པའི་རྒན་རྒོན་དང་ལོ་65ཡན་གྱི་རྒན་རྒོན་གྱི་བདེ་ཐང་ཞབས་ཞུའི་དགོས་མཁོ་བསྐང་ཆེད། རྒྱལ་ཁབ་ཀྱི་གཞི་རྩའི་སྤྱི་པའི་འཕྲོད་བསྟེན་ཞབས་ཞུ་ལས་རྒན་རྒོན་གྱི་བདེ་ཐང་དང་སྨན་བཅོས་ཟུང་དུ་སྦྲེལ་བའི་ཞབས་ཞུའི་དོ་དམ་ལས་ཀ་ཚད་ལྡན་དུ་གཏོང་བ་དང་། རྒན་རྒོན་གྱི་འཚོ་བའི་སྤུས་ཚད་དང་བདེ་ཐང་ཆུ་ཚད་ལེགས་བཅོས་བྱ་ཆེད། སྡེ་རོང་རྫོང་འཕྲོད་བསྟེན་ཅུས་ཀྱིས་2024ལོའི་ཟླ་3པ་ནས་བཟུང་འཚོ་བར་རང་རྐྱ་མི་ཐུབ་པའི་རྒན་རྒོན་ལ་ཁྱིམ་དུ་སྨན་བཅོས་བྱེད་པའི་ལས་ཀ་དངོས་སུ་འགོ་ཚུགས། ཡུལ་ཤོག་དང་གྲོང་རྡལ་10ཡི་འཕྲོད་བསྟེན་ཁང་གིས་ཁྱིམ་ཚང་ཆིངས་བཞག་སྨན་པའི་ཚོགས་པ་རྩ་འཛུགས་བྱས་ཤིང་སྡེ་པའི་ཁྱིམ་ཚང་དུ་སོང་ནས་འཚོ་བར་རང་རྐྱ་མི་ཐུབ་པའི་རྒན་རྒོན་ལ“གཅིག་གསུམ”རིན་མེད་བདེ་ཐང་ཞབས་ཞུ་མཁོ་འདོན་ཏེ། རྒན་རྒོན་གྱི་ཁྱིམ་དུ་སོང་ནས་བདེ་ཐང་དོ་དམ་དང་། བདེ་ཐང་ཞབས་ཞུ། བདེ་ཐང་མཛུབ་སྟོན་བཅས་ཀྱི་ལས་ཀ་སྤེལ།
སྡེ་རོང་རྫོང་གི་ཁྱིམ་ཚང་སྨན་པའི་ཆིངས་བཞག་སྨན་བཅོས་ཞབས་ཞུ་ཡིས་གཞི་རྩའི་སྨན་བཅོས་དང་གཞི་རྩའི་སྤྱི་པའི་འཕྲོད་བསྟེན་ཞབས་ཞུ་ཟུང་དུ་སྦྲེལ་ཞིང་། ནད་པ་མི་འདྲ་བར་དམིགས་ནས་ཁྱད་ཆོས་ཅན་གྱི་བདེ་ཐང་ཞབས་ཞུ་མཁོ་འདོན་བྱས་པ་དེས་མང་ཚོགས་ཀྱི་བདེ་ཐང་ཐད་ཀྱི་ཞབས་ཞུའི་སྤུས་ཚད་མཐོར་འདེགས་གཏོང་ཐུབ་པ་བྱུང་།
རྒན་རྒོན་གྱི་སེམས་ཁམས་བདེ་ཐང་ལ་དོ་སྣང་བྱས་པ།
སྡེ་རོང་རྫོང་ཞོལ་ལུང་ཡུལ་ཤོག་འཕྲོད་བསྟེན་ཁང་གི་ཁྱིམ་ཚང་སྨན་པའི་ཆིངས་བཞག་ཚོགས་པ་སྨན་སྟེང་སྡེ་པའི་རྒད་པོ་བཀྲ་ཤིས་ཚང་ལ་ཐོན་པ་ན། རྒད་པོ་སེམས་འགུལ་ཐེབས་ནས་སྨན་པའི་ལག་པར་འཇུས་ཏེ། ཁྱོད་ཚོས་ལམ་ཐག་རིང་པོར་མ་འཛེམ་པར་འདི་ཐོན་པ་རེད། དེ་ནས་སྡོད། ཏང་དང་རྒྱལ་ཁབ་ཀྱི་སྲིད་ཇུས་ངོ་མ་བཟང་པོ་འདུག །ཁ་དྲོ། ཁ་དྲོ། ཞེས་བཤད། བྱམས་དང་སྙིང་རྗེ་ལྡན་པའི་རྒད་པོས་རྒྱུན་དུ་ལྷག་བསམ་རྣམ་དག་གིས་ཁོ་ཚོར་དེ་ལྟར་བཀའ་དྲིན་ཞུ་ངེས། སྨན་པས། ཉེ་ལམ་ལུས་ཁམས་ཀྱི་གནས་ཚུལ་ཅི་འདྲ་རེད། ལུས་པོར་ན་ཟུག་སྐྱེས་བཞིན་འདུག་གམ། ཞེས་ལུས་པོར་བརྟག་དཔྱད་བྱེད་ཞོར་དུ་རྒད་པོ་དང་བག་ལྷོད་པོས་ཁ་བརྡ་བྱས་ནས་རྒད་པོའི་སེམས་ཁམས་ལ་བརྟགས།
མིག་སྔར་སེམས་ཁམས་བདེ་ཐང་གི་གནད་དོན་ནི་མི་འབོར་རྒན་ཁོག་ཅན་དུ་འགྱུར་བའི་གོ་རིམ་ཁྲོད་འབུར་དུ་ཐོན་པའི་གནད་དོན་ཞིག་ཡིན་ཞིང་། རྒན་རྒོན་གྱི་སེམས་ཁམས་བདེ་ཐང་ལ་དོ་སྣང་བྱེད་པ་དེའང་རྒན་རྒོན་གྱི་འཚོ་བའི་སྤུས་ཚད་མཐོར་འདེགས་གཏོང་བའི་གནད་འགག་ཏུ་གྱུར་འདུག །ཁྱིམ་ཚང་སྨན་པ་ལྷ་མོས། ང་ཚོས་འཚོ་བར་རང་རྐྱ་མི་ཐུབ་པའི་རྒན་རྒོན་གྱི་ལུས་པོར་བརྟག་དཔྱད་དང་བདེ་ཐང་འཚོ་བར་མཛུབ་སྟོན་གྱི་ལས་ཀ་རྒྱུན་འཁྱོངས་དགོས་པར་མ་ཟད། རྒན་རྒོན་གྱི་སེམས་ཁམས་བདེ་ཐང་ལའང་དོ་སྣང་བྱ་དགོས། ང་ཚོས་ཁྱིམ་བདག་ཚོར་རྒན་རྒོན་གྱི་སེམས་ཁམས་འགྱུར་ལྡོག་ལ་དོ་སྣང་དང་། རྒན་རྒོན་དང་ཁ་བརྡ་བྱེད་དགོས་པར་ནན་གྱིས་བསྐུལ་ངེས། ཞེས་བཤད་པ་དང་། སེམས་ཁམས་འཁྲུགས་པའི་རྒན་རྒོན་ལ་འཕྲད་ཚེ་སྨན་པས་ཁྱིམ་བདག་ལ་རྒན་རྒོན་གྱིས་ཚེགས་ཆུང་བའི་ལག་ཤེས་ལས་ཀར་བརྟེན་ནས་སེམས་གཡེང་ན་གནོན་ཤུགས་ཇེ་ཡང་དུ་འགྱུར་བར་ཕན་ཞེས་བསྐུལ་བ་ཡིན།
སྡེ་རོང་རྫོང་གི“བདེ་ཐང་ཁྱིམ་དུ་བསྐྱལ་བའི་ལས་ཀ”ནི་གནས་ཚུལ་མི་འདྲ་བའི་རྒན་རྒོན་ལ་དམིགས་ནས་ཡིག་ཚགས་བསྒྲིགས་ཤིང་། བདེ་ཐང་མཛུབ་སྟོན་དང་ཀྲུང་ལུགས་གསོ་རིག་གི་མཛུབ་སྟོན། ནད་གཡོག་མཛུབ་སྟོན། སྐོར་བཅོས་སོགས་ཀྱི་ཕྱོགས་ནས་ཞབས་ཞུ་མཁོ་འདོན་བྱས་ནས་འཚོ་བར་རང་རྐྱ་མི་ཐུབ་པའི་རྒན་རྒོན་གྱི་བདེ་ཐང་རྒྱུན་འཁྱོངས་དང་འཚོ་བ་ལེགས་བཅོས་ལ་བརྩོན་པ་ཡིན།
མིག་སྔའི་བར་སྡེ་རོང་རྫོང་གིས་རྫོང་དང་ཡུལ་ཤོག །སྡེ་པ་བཅས་རིམ་པ་གསུམ་གྱི་སྨན་བཅོས་སྟོབས་ཤུགས་གཅིག་ཏུ་བསྒྲིལ་ནས་ཁྱིམ་ཚང་སྨན་པའི་ཆིངས་བཞག་ཞབས་ཞུའི་ཚོགས་པ་10རྩ་འཛུགས་བྱས་ཤིང་། ཆིངས་བཞག་གི་ཚད་100%ལ་སླེབས། 2024ལོར་བདེ་ཐང་ཁྱིམ་དུ་བསྐྱལ་བའི་ལས་ཀ་འགོ་བརྩམས་པ་ནས་བཟུང་། ལོ་65ཡན་གྱི་རྒན་རྒོན་དང་འཚོ་བར་རང་རྐྱ་མི་ཐུབ་པའི་རྒན་རྒོན་132ལ་ཁྱིམ་དུ་སོང་ནས“གསུམ་གཅིག”བདེ་ཐང་ཞབས་ཞུ་མཁོ་འདོན་བྱས། སྡེ་རོང་རྫོང་གིས“བདེ་ཐང་ཁྱིམ་དུ་བསྐྱལ་བའི་ལས་ཀ”ཇེ་མགྱོགས་སུ་བཏང་ཞིང་། མུ་མཐུད་དུ་སྨན་བཅོས་བྱས་ཟིན་པའི་རང་རྐྱ་མི་ཐུབ་པའི་རྒན་རྒོན་གྱི་བདེ་ཐང་ལ་དོ་སྣང་བྱས་ཏེ་བསྐྱར་བཅོས་བསྐྱར་བརྟག་གི་ལས་ཀར་འབད་ཅིང་། རྒྱུན་ཆད་མེད་པར་རྒན་རྒོན་གྱི་ཐོབ་ཚོར་དང་། བདེ་སྐྱིད་ཚོར་སེམས། བདེ་འཇགས་ཚོར་སེམས་བཅས་ཇེ་མཐོར་གཏོང་བར་འབད་རྒྱུའོ། །