འདི་འདྲའི་མི་ཚོ་གཅིག་ཡོད་དེ། ཁོ་ཚོ་དབྱི་པིན་གྱི་ས་གནས་ཁག་གི་སློབ་གྲྭ་ནས་དཀར་མཛེས་ཁུལ་ཉག་རོང་རྫོང་གི་ཤང་གྲོང་ཁག་གི་སློབ་གྲྭར་བསྐྱོད་དེ་མཚོ་འཕགས་མཐོ་བ་དང་དྲོད་ཚད་ཧེ་བག་ཆེ་བ། སྨུག་ཕྱིའི་འོད་ཤུགས་ཆེ་བ། བཟའ་བཏུང་གོམས་གཤིས་མི་འདྲ་བའི་དཀའ་ངལ་མང་པོ་ཁྱད་བསད་བྱས་ནས། མཐོ་སྒང་ལ་གཞི་ཚུགས་པ་དང་གཞི་རིམ་ལ་ཞབས་འདེགས་ཞུ་བའི་ལས་དོན་གྱི་འདུ་ཤེས་མཐའ་འཁྱོངས་བྱས་ཏེ། རང་ངོས་ཀྱི་ལོ་མང་རིང་གི་སློབ་ཁྲིད་ཉམས་མྱོང་དང་ཟུང་འབྲེལ་གྱིས་དམིགས་ས་ཡོད་པའི་སྒོ་ནས་རིག་ཚན་སློབ་ཁྲིད་ཀྱི་འཆར་གཞི་བཟོས་ཏེ། སློབ་མ་རྣམས་ཀྱི་སྦྱངས་འབྲས་མཐོར་འདེགས་མངོན་གསལ་བཏང་ཡོད།
ཁོ་ཚོ་ནི་དབྱི་པིན་གྲོང་ཁྱེར་ནས་ཡོང་བའི་སློབ་སྐྱོར་དགེ་རྒན་ཁག་དྲུག་པའི་དགེ་རྒན་ཉེར་གཉིས་ཡིན་ལ། 2022ལོའི་ཟླ་དགུ་པར་ཉག་རོང་རྫོང་དུ་ཕེབས་ནས་ལོ་གཉིས་རིང་གི་སློབ་སྐྱོར་ལས་ཀ་འགོ་ཚུགས།
སློབ་གསོའི་རོགས་སྐྱོར་སྟོབས་ཤུགས་འདོན་སྤེལ་བྱས།
དཔྱིད་ཀའི་ཉག་རོང་ལ་མཚོན་ན་མཐོ་སྒང་གི་ས་ཆ་གཞན་དག་དང་འདྲ་བར་སྔར་བཞིན་གྲང་ངར་ཆེ། ཡིན་ཡང་གྲང་ངར་དེ་ཡིས་སློབ་སྐྱོར་དགེ་རྒན་རྣམས་ཀྱི་འདུན་པ་འགོག་ཐབས་མི་འདུག
རི་ནང་སློབ་ཆུང་གི་སྐད་ཡིག་སློབ་སྐྱོར་དགེ་རྒན་དབྱང་ཏའེ་ཕུང་གིས་ཉག་རོང་རྫོང་སློབ་གསོ་དང་ལུས་རྩལ་ཅུས་སློབ་དཔྱོད་ཁང་གི་ཀྲུའུ་རེན་གཞོན་པའི་འགན་འཁུར་བཞིན་ཡོད་ལ། ཁོང་གིས་སློབ་སྐབས་གསར་པའི་སློབ་གྲྭ་ཁག་གི་སློབ་ཁྲིད་ལས་དོན་སེམས་ནང་བཅངས་ནས། ཉག་རོང་རྫོང་མ་རི་སློབ་ཆུང་དུ་བསྐྱོད་དེ་སློབ་གྲྭའི་ལས་སྒོའི་སློབ་གཙོ་གཞོན་པ་དབྱང་ཧྥན་དང་སློབ་སྟོན་ཀྲུའུ་རེན་ཀྲང་ཧུང་པིན། དེ་བཞིན་སྐད་ཡིག་རྐང་འཛིན་དགེ་རྒན་རྣམས་དང་མཉམ་དུ་སློབ་ཁྲིད་ཀྱི་མྱོང་ཚོར་སྤེལ་རེས་བྱས་པ་དང་། དབྱི་པིན་གུང་རྫོང་གུང་ཆོན་གྲོང་རྡལ་གྱི་ཉམས་མྱོང་སྦ་གསང་མེད་པར་མཉམ་སྤྱོད་བྱས།
གྲང་རླུང་ལྡང་བའི་མཚན་མོ་ཞིག་ལ། ལྷ་རི་མ་གྲོང་རྡལ་སློབ་ཆུང་གི་དབྱི་པིན་གྱི་སློབ་སྐྱོར་དགེ་རྒན་ཐའོ་ཡུན་ཧྥེ་ཡིས་ཁྱིམ་དུ་འཚམས་འདྲི་བྱ་རྒྱུ་མཐའ་འཁྱོངས་བྱས་ཏེ། སློབ་མའི་ཕ་མ་དང་མཉམ་དུ་ཕྲུ་གུར་སློབ་སྦྱོང་གི་གོམས་གཤིས་བཟང་པོ་འཇགས་པའི་ཐབས་ཤེས་གྲོས་བསྡུར་བྱས་པ་རེད། ཁོང་གིས་དེ་སྔ་གཟབ་གཟབ་མ་བྱས་པར་ཐང་ལ་འགྱེལ་བས་ངོ་གདོང་དང་རྣ་བ་སོགས་ལ་རྨས་སྐྱོན་ཚབས་ཆེན་ཕོག་ཡོད་ཀྱང་། ཁོང་གིས་སྔར་བཞིན་གསོ་རླུང་མི་འདང་ཡང་སྙིང་སྟོབས་མི་ཉམས་པ་དང་དཀའ་སྡུག་ལ་མི་སྐྲག་པར་ས་བབ་མཐོ་ལ་འཐབ་སེམས་དེ་བས་ཆེ་བའི་སྤྱོད་ཚུལ་བཟང་པོ་དར་སྤེལ་ཧུར་ཐག་བཏང་ནས། མུ་མཐུད་དུ་ལས་གནས་བརྟན་སྲུང་དང་གཞི་རིམ་ནས་འབད་འཐབ་བྱས་པ་རེད།
འདི་ལྟ་བུའི་གཏམ་རྒྱུད་ཁོ་ཚོའི་ལས་དོན་བརྒྱུད་རིམ་ཧྲིལ་པོར་གང་ཡོད། ཁོ་ཚོས་བཤད་རྒྱུར། དཔྱིད་འགོ་གསར་པ་བཙུགས་དུས། དྲོད་ཁོལ་སློབ་སྐྱོར་སློབ་གྲྭ་དང་སློབ་མར་བརྒྱུད་སྤྲོད་བྱེད་དགོས་ཟེར། ལོ་གཅིག་ལྷག་རིང་། སློབ་སྐྱོར་དགེ་རྒན་ལས་དོན་ཚོ་ཆུང་གིས་སློབ་གྲྭའི་སློབ་ཁྲིད་ལས་གནས་ཀྱི་དངོས་ཡོད་གནས་ཚུལ་ལ་གཞི་ཚུགས་ཏེ། དཔེ་སྟོན་སློབ་ཚན་ཁྲིད་པ་དང་ཆེད་དོན་སློབ་ཁྲིད་བྱས་པར་མ་ཟད། སློབ་གསོའི་དོ་དམ་དང་སློབ་དཔྱོད་ཚན་ཞིབ། འཕེལ་རྒྱས་འཆར་འགོད། དཔུང་ཁག་འཛུགས་སྐྱོང་། སློབ་མའི་བྱེད་སྒོ་སོགས་ཀྱི་ཐད་ཉམས་མྱོང་ཡང་མཉམ་སྤྱོད་བྱས་ཏེ། ཉག་རོང་སློབ་གསོའི་སློབ་ཁྲིད་ལས་དོན་དཔེ་དབྱིབས་རྒྱུན་ཆད་མེད་པར་འཚོལ་ཞིབ་བྱས་ནས། སློབ་སྐྱོར་བྱ་གཞག་ཉག་རོང་གི་ཡུལ་ཤོག་དང་གྲོང་རྡལ་16དང་། སློབ་གྲྭ་30ལྷག་གི་དགེ་རྒན་600དང་སློབ་མ་8000ལྷག་ལ་ཕན་ཐོགས་ཡོད།
བརྩེ་བའི་ས་བོན་བཏབ།
སློབ་སྐྱོར་དགེ་རྒན་ཀྲང་ཆང་དང་ཧོང་ཝེ། དབྱང་ཏའེ་ཕེང་། ལིའུ་ཅན། དབྱང་ཧྲའོ། ཝང་ཅ་ཧྥུའུ། ཏེ་ལི། ཀྲོའུ་ཧྲའོ་ཧུའེ། སུན་ལི། ཁྲང་ཞུས་ཁྲེང་། དབྱང་པིན་བཅས་དགེ་རྒན་11གི་ལོ་འཁོར་དཔྱད་ཞིབ་ཕུལ་བྱུང་ཡིན་པས། ཉག་རོང་རྫོང་ཨུ་དང་རྫོང་མི་དམངས་སྲིད་གཞུང་གིས་ཕུལ་བྱུང་བོད་སྐྱོར་དགེ་རྒན་གྱི་མཚན་སྙན་སྤྲད་པ་རེད། ལོ་ཕྱེད་ཙམ་སོང་ཡང་། ཉག་རོང་རྫོང་ཨུ་དང་རྫོང་མི་དམངས་སྲིད་གཞུང་གིས་ཕུལ་བྱུང་བོད་སྐྱོར་དགེ་རྒན་གྱི་མཚན་སྙན་གནང་བའི་སྐོར་གླེང་སྐབས། དབྱང་ཧྲའོ་སྔར་བཞིན་དགའ་ཚོར་ཆེན་པོ་བྱུང་བ་དང་གྲུབ་འབྲས་ཐོབ་པའི་ཚོར་སྣང་བྱུང་། ཁོང་གིས་ཉག་རོང་རྫོང་གི་གདེང་འཇོག་གནང་བས་དུས་དང་རྣམ་པ་ཀུན་ཏུ་ཁོང་ལ་སྐུལ་མ་གཏོང་བཞིན་ཡོད་ལ། ཁོང་གིས་ཀྱང་མུ་མཐུད་སློབ་སྐྱོར་བྱ་གཞག་ཡག་པོ་བསྒྲུབ་རྒྱུར་འབད་བརྩོན་བྱ་རྒྱུ་ཡིན་ཞེས་བཤད།
དབྱང་ཧྲའོ་དང་སློབ་སྐྱོར་དགེ་རྒན་གཞན་དག་དང་མཉམ་དུ་སློབ་གྲྭའི་མི་རིགས་རིག་གནས་བྱེད་སྒོའི་ནང་ཧུར་ཐག་ཞུགས་པ་དང་། བོད་ཀྱི་རིག་གནས་རྒྱུས་ལོན་དང་སློབ་སྦྱོང་གཏིང་ཟབ་བྱེད་པ་དང་། དབང་པོ་སྐྱོན་ཅན་གསུམ་གྱི་བྱིས་པ་སློབ་ཁྲིད་སྒོ་རྩར་སྐྱེལ་བའི་བྱེད་སྒོ་ཧུར་ཐག་སྤེལ་བ་དང་། ཡུལ་ཤོག་དང་གྲོང་རྡལ་གྱི་སློབ་གྲྭར་བསྐྱོད་དེ་ཕྲུ་གུ་ཚོར་དཔེ་ཁུག་དང་སློབ་དེབ། སློབ་སྦྱོང་མཁོ་ཆས། ལེགས་སྐྱེས་ཆུང་ཆུང་སོགས་གནང་བ་རེད། ཁོ་ཚོས་སློབ་མ་ཚོ་དང་སྤྲོ་སེམས་འཁོལ་བའི་ཁ་བརྡ་བྱས་པར་བརྒྱུད། ཁྱོན་ཡོངས་ནས་བྱིས་པའི་ཁྱིམ་ཚང་དང་འཚོ་བ། སློབ་སྦྱོང་གི་གནས་ཚུལ་རྒྱུས་ལོན་བྱས། དེས་མ་ཟད་བྱིས་པ་ཚོའི་དགོས་མཁོ་ཅི་ཡོད་དྲིས་ནས། བྱིས་པ་ཚོའི་སེམས་གཏམ་ལ་ཉན་པ་དང་བྱིས་པ་ཚོའི་ཁྱིམ་ཚང་གི་འཚོ་བར་མཛུབ་སྟོན་དང་། སློབ་སྦྱོང་དང་སེམས་ཁམས་ལ་ཁྲིད་སྟོན་བྱས། དབྱི་པིན་སློབ་གསོའི་རོགས་སྐྱོར་ཚོགས་པའི་ཐོན་ཁུངས་བེད་སྤྱོད་གང་ལེགས་བྱས་ཏེ། དབྱི་པིན་ས་ཁུལ་ཁག་དང་རྫོང་ཁག་གི་སློབ་གྲྭ་དང་ཉག་རོང་གི་སློབ་གྲྭ་ཁག་གི་སློབ་གྲྭས་སློབ་གྲྭར་ཁ་གཏད་རོགས་སྐྱོར་བྱེད་པའི་སློབ་སྐྱོར་སྤེལ་རེས་དང་དཔྱད་བསྡུར་ལ་ཤུགས་སྣོན་བརྒྱབ་ནས། ཉག་རོང་གི་དགེ་རྒན་དབྱི་པིན་དུ་གནས་སྦྱར་ལས་གནས་ཐོག་གསོ་སྐྱོང་དང་ལག་ལེན་རྟོག་ཞིབ་བྱེད་པར་འོས་སྦྱོར་བྱས་པ་རེད། ཁོང་ཚོས་ཁྲིད་སྟེགས་བརྟན་སྲུང་བྱས་ཏེ་སློབ་གསོའི་སྤྲོ་སེམས་རབ་ཏུ་འཁོལ་བའི་ངང་བརྩེ་སེམས་ཆེན་པོའི་ས་བོན་བཏབ་པ་དང་འཕེལ་རྒྱས་ཀྱི་རེ་བ་བརྒྱུད་སྤྲོད་བྱས་ནས། ཉག་རོང་སློབ་གསོའི་ཉམས་འགྱུར་ཡག་པོ་ངོམ་བཞིན་ཡོད།
ཟླ་7པར། ཁོ་ཚོས་ཉག་རོང་གི་རོགས་སྐྱོར་ལས་དོན་མཇུག་བསྒྲིལ་རྒྱུ་རེད། ཁོ་ཚོས་ཉག་རོང་ལ་བཅངས་པའི་སྨོན་འདུན་དང་བརྩེ་བ་ཁྱེར་ནས་དབྱི་པིན་ལ་ལོག་རྒྱུ་ཡིན་ཟེར། དེ་མིན་རྒྱུན་དུ་ཉག་རོང་ལ་བལྟ་རུ་འགྲོ་ནས་མུ་མཐུད་དུ་ཉག་རོང་གི་སློབ་གསོ་ལ་དོ་སྣང་བྱེད་རྒྱུ་ཡིན་ཞེས་ཟེར། །