ཉེས་ཆད་ནི་ཉེས་ཁྲིམས་ནང་གཏན་འབེབས་བྱས་པ་ཞིག་ཡིན་ཞིང་། དེ་ནི་རྒྱལ་ཁབ་ཀྱི་འདྲི་གཅོད་ལས་ཁུངས་ཀྱིས་ཁྲིམས་ལྟར་ཉེས་ཅན་ལ་དམིགས་ནས་སྤྱད་འཐུས་བྱེད་ཅིང་དེའི་ཁེ་དབང་གང་རུང་ཞིག་ལ་ཚོད་འཛིན་ནམ་བཙན་འཕྲོག་བྱེད་པའི་བཙན་ཤེད་རང་བཞིན་གྱི་ཁྲིམས་གཅོད་བྱེད་ཐབས་ཤིག་ཡིན། སྤྱི་ཚོགས་ཡར་རྒྱས་འགྲོ་བ་དང་ཆབས་ཅིག་ཏུ་རྒྱལ་ཁབ་ཀྱི་བཅའ་ཁྲིམས་དང་ཁྲིམས་སྲོལ་ཡང་ཇེ་ནན་དུ་འགྲོ་བ་དང་། དེ་བཞིན་བཅའ་ཁྲིམས་དང་ཁྲིམས་སྲོལ་གྱི་ནང་དོན་ཡང་འཐུས་སྒོ་ཇེ་ཚང་དུ་འགྲོ་བཞིན་ཡོད། ཉེས་ཆད་ཕོག་མྱོང་མཁན་ཞིག་ལ་མཚོན་ན། དེས་སྤྱི་ཚོགས་ཐོག་ལས་རིགས་གཉེར་བའི་སྐབས་སུ་ལས་རིགས་མང་པོ་ཞིག་གིས་དེ་དང་ལེན་མི་བྱེད་ལ། ཁོ་ཚོའི་བུ་ཕྲུག་ལའང་ཚད་རིམ་མི་འདྲ་བའི་གནོད་ཤུགས་ཕོག་སྲིད། དེ་ནི་མི་དེ་རིགས་ལ་མཐོང་ཆུང་བྱས་པ་ཞིག་མིན་པར། ཁོ་ཚོས་རང་ཉིད་ཀྱི་ནོར་འཁྲུལ་ལ་བབ་མཐུན་གྱི་རིན་དོད་གཏོང་དགོས་པའི་རྒྱུ་འབྲས་ཀྱི་ཆད་པ་ཞིག་དང་ཁྲིམས་ཀྱི་ཉེན་བརྡ་ཞིག་ཡིན།
ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ཉེས་ཁྲིམས་ཀྱི་དོན་ཚན་སོ་བདུན་པའི་ནང“ལས་རིགས་ཀྱི་སྟབས་བདེར་བརྟེན་ནས་བྱས་ཉེས་བསགས་པའམ་ཡང་ན་ལས་རིགས་ཀྱི་དམིགས་བསལ་གྱི་འོས་འགན་བསྒྲུབ་དགོས་པའི་བླང་བྱ་དང་འགལ་ནས་བྱས་ཉེས་བསགས་པའི་རྐྱེན་གྱིས་ཉེས་ཆད་བཅད་རིགས་ལ། མི་དམངས་ཁྲིམས་ཁང་གིས་དེའི་བྱས་ཉེས་བསགས་ཚུལ་དང་བྱས་ཉེས་ཡང་བསྐྱར་གསོག་པར་སྔོན་འགོག་བྱེད་པའི་དགོས་མཁོར་གཞིགས་ནས། ཉེས་ཆད་ལག་བསྟར་བྱས་ཚར་བའི་ཉིན་ནས་ཡང་ན་དངོས་མི་བཙོན་འགྲོལ་བཏང་བའི་ཉིན་ནས་བཟུང་འབྲེལ་ཡོད་ཀྱི་ལས་རིགས་ལ་ཞུགས་པར་དུས་བཀག་ལོ་གསུམ་ནས་ལྔའི་བར་གཏན་འགོག་བྱས་ཆོག”པའི་ནང་དོན་གཏན་འབེབ་བྱས་ཡོད་ལ། དེ་མིན་ཉེས་ཆད་འཁུར་མྱོང་མཁན་ལ་མཚོན་ན་རང་ཉིད་ཀྱིས་ལས་ཀ་མང་པོ་བྱེད་མི་ཐུབ་པ་ཕུད། རྒྱལ་ཁབ་ཀྱི་བཅའ་ཁྲིམས་ཀྱིས་དེའི་བུ་ཕྲུག་ལའང་བཀག་སྡོམ་མང་པོ་བྱས་ཡོད། དཔེར་ན་བུ་ཕྲུག་དམག་ལ་ཞུགས་རྒྱུའི་མིང་ཐོ་འགོད་སྐབས་དེའི་ཆབ་སྲིད་ཀྱི་ཞིབ་བཤེར་ལ་གཞུང་ཕྱོགས་ནས་ཁས་ལེན་དང་མོས་མཐུན་ཡོང་མི་སྲིད་ལ། གཞན་ཡང་བུ་ཕྲུག་མཐོ་རྒྱུགས་ལ་ཞུགས་ནས་ཉེན་རྟོག་སློབ་གྲྭར་ཐོ་འགོད་བྱེད་སྐབས། དེའི་ཐད་ཀའི་གཉེན་ཚན་ཁྲོད་རྒྱལ་ཁབ་ཀྱི་བདེ་འཇགས་ལ་གནོད་འཚེ་གཏོང་བའམ་ཡང་ན་རྒྱུ་རྐྱེན་གཞན་པའི་དབང་གིས་ཉེས་ཆད་འཁུར་ཟིན་མཁན་ཡོད་ཚེ། ཆབ་སྲིད་ཀྱི་ཞིབ་བཤེར་ལ་སྔར་བཞིན་གཞུང་ཕྱོགས་ནས་ཁས་ལེན་དང་མོས་མཐུན་ཡོང་མི་སྲིད། དེ་བས་ཉེས་ཆད་འཁུར་མྱོང་བའི་མི་དེ་རིགས་ལ་རྒྱལ་ཁབ་ཀྱི་བཅའ་ཁྲིམས་ནང་རིམ་པ་མི་འདྲ་བའི་ཚོད་འཛིན་མང་པོ་བྱས་ཡོད་པས། མི་སུ་ཡིན་རུང་རང་ཉིད་ཀྱི་ཆེད་དུ་ཡང་ན་རང་གི་ཁྱིམ་མིའི་དོན་དུ་རྒྱལ་ཁབ་ཀྱི་བཅའ་ཁྲིམས་དང་ཁྲིམས་སྲོལ་ལ་བརྩི་སྲུང་ནན་མོ་བྱས་ནས་རང་གི་བྱ་སྤྱོད་མཐའ་དག་རྟག་ཏུ་དྲང་པོ་བྱ་རྒྱུ་ནི་གལ་འགངས་ཆེའོ། །
དང་པོ། ཉེས་ཆད་ཕོག་མཁན་གྱིས་ལས་གཉེར་བྱས་མི་ཆོག་པའི་ལས་རིགས།
ཁྲིམས་དཔོན་དང་མི་དམངས་འདྲི་གཅོད་ལས་རོགས་པ། ཞིབ་དཔྱོད་དཔོན། གཞུང་ཞབས་པ། ཁྲིམས་རྩོད་པ། དག་འབུད་བྱེད་མཁན། ཁྲིམས་འཛིན་གསལ་འབྱེད། གཞུང་དཔང་བ། ཉེན་རྟོག་པ། ཕྱི་འབྲེལ་མི་སྣ། གྲོང་མིའི་ཨུ་ཡོན་ལྷན་ཁང་གི་ཁོངས་མི། ཧབ་ཚོང་པ། ཀུང་སིའི་ལས་འཛིན་པ། ལྟ་ཞིབ་པ། མཐོ་རིམ་དོ་དམ་མི་སྣ། རྒྱལ་ཁབ་ལ་དབང་བའི་མ་དངུལ་ཁེར་འཇོག་ཁེ་ལས། རྒྱལ་ཁབ་ལ་དབང་བའི་མ་དངུལ་ཁེར་འཇོག་ཀུང་སི། རྒྱལ་ཁབ་ལ་དབང་བའི་མ་རྩའི་མ་རྐང་ཚོད་འཛིན་ཀུང་སི་བཅས་ཀྱི་ལས་འཛིན་པ་དང་ལྟ་ཞིབ་པ། མཐོ་རིམ་དོ་དམ་མི་སྣ། དངུལ་འཛིན་ལས་སྒྲུབ་མི་སྣ་དང་ཉེན་འགོག་འགན་ལེན་ལས་རིགས་ཀྱི་དམིགས་བསལ་ལས་སྒྲུབ་མི་སྣ། བུན་སྟོངས་དོ་དམ་པ། གསར་འཛུགས་ཁེ་ལས་ཀྱི་ཁྲིམས་བཀོད་འཐུས་ཚབ་པ། མཐོ་རིམ་དོ་དམ་མི་སྣ། ཐོན་སྐྱེད་གཉེར་སྐྱོང་ལས་ཁུངས་ཀྱི་འགན་འཁུར་པ། ཟས་རིགས་ལས་རིགས་ཀྱི་དམིགས་བསལ་ལས་སྒྲུབ་མི་སྣ་བཅས་སོ། །
1.ཁྲིམས་དཔོན།
《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ཁྲིམས་དཔོན་བཅའ་ཁྲིམས།》ཀྱི་དོན་ཚན་བཅུ་པ། གཤམ་གསལ་གྱི་མི་སྣས་ཁྲིམས་དཔོན་གྱི་འགན་ཁུར་མི་ཆོག་པ་སྟེ།（གཅིག）བྱས་ཉེས་བསགས་པའི་རྐྱེན་གྱིས་ཉེས་དོན་གྱི་ཁྲིམས་ཆད་ཕོག་མྱོང་བ།（གཉིས།）གཞུང་གི་ལས་གནས་ནས་ཕྱིར་འབུད་བྱེད་མྱོང་བ།
2.མི་དམངས་འདྲི་གཅོད་ལས་རོགས་པ།
《རྒྱལ་ཡོངས་མི་དམངས་འཐུས་མིའི་ཚོགས་ཆེན་གྱི་རྒྱུན་ལས་ཨུ་ཡོན་ལྷན་ཁང་གི་མི་དམངས་འདྲི་གཅོད་ལས་རོགས་པའི་ལམ་ལུགས་འཐུས་ཚང་དུ་གཏང་རྒྱུའི་སྐོར་གྱི་ཆོད་དོན།》གྱི་དོན་ཚན་དྲུག་པའི་ནང་འཁོད་པ་ལྟར་གཤམ་གསལ་མི་སྣས་མི་དམངས་འདྲི་གཅོད་ལས་རོགས་པའི་འགན་འཁུར་མི་ཆོག་པ་སྟེ། （གཅིག）བྱས་ཉེས་བསགས་པའི་རྐྱེན་གྱིས་ཉེས་དོན་གྱི་ཉེས་ཆད་ཕོག་མྱོང་བ།
3.ཞིབ་དཔྱོད་དཔོན།
《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ཞིབ་དཔྱོད་དཔོན་གྱི་བཅའ་ཁྲིམས།》ཀྱི་དོན་ཚན་བཅུ་གཅིག་པའི་ནང་འཁོད་ལྟར་གཤམ་གསལ་མི་སྣས་ཞིབ་དཔྱོད་དཔོན་གྱི་འགན་ཁུར་མི་ཆོག་པ་སྟེ། （གཅིག）བྱས་ཉེས་བསགས་པའི་རྐྱེན་གྱིས་ཉེས་དོན་གྱི་ཁྲིམས་ཆད་ཕོག་མྱོང་བ།（གཉིས།）གཞུང་གི་ལས་གནས་ནས་ཕྱིར་འབུད་བྱེད་མྱོང་བ།
4.གཞུང་ཞབས་པ།
《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་གཞུང་ཞབས་པའི་བཅའ་ཁྲིམས།》ཀྱི་དོན་ཚན་ཉེར་བཞི་པའི་ནང་གཤམ་གསལ་མི་སྣ་གཞུང་ཞབས་པར་བསྡུ་མི་ཆོག་པ་སྟེ།（གཅིག）བྱས་ཉེས་བསགས་པའི་རྐྱེན་གྱིས་ཉེས་དོན་གྱི་ཉེས་ཆད་ཕོག་མྱོང་བ། （གཉིས།）གཞུང་གི་ལས་གནས་ནས་ཕྱིར་ཕུད་བྱས་མྱོང་བ།（གསུམ།）བཅའ་ཁྲིམས་ཀྱི་གཏན་འབེབས་ལྟར་གཞུང་ལས་པར་བསྡུ་མི་ཆོག་པའི་གནས་ཚུལ་གཞན་དག
5.ཁྲིམས་རྩོད་པ།
《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ཁྲིམས་རྩོད་པའི་བཅའ་ཁྲིམས།》ཀྱི་དོན་ཚན་བདུན་པར་རེ་ཞུ་བྱེད་མཁན་ལ་གཤམ་གསལ་གྱི་གནས་ཚུལ་ལས་རིགས་གཅིག་ཡོད་ན། ཁྲིམས་རྩོད་པའི་ལས་གཉེར་དཔང་ཡིག་མི་སྤྲོད་རྒྱུ་སྟེ།（གཅིག）དམངས་དོན་གྱི་བྱ་སྤྱོད་སྤེལ་ནུས་མེད་པའམ་དམངས་དོན་གྱི་བྱ་སྤྱོད་སྤེལ་ནུས་ཚོད་འཛིན་བྱས་རིགས། （གཉིས།）ཉེས་དོན་གྱི་ཉེས་ཆད་ཕོག་མྱོང་ཡང་ལས་འཛོལ་གྱི་བྱས་ཉེས་ཤོར་རིགས་འདིའི་ཁོངས་སུ་མི་གཏོགས།（གསུམ།）གཞུང་གི་ལས་གནས་ནས་ཕྱིར་ཕུད་བྱས་པའམ་ཁྲིམས་རྩོད་པའི་དཔང་ཡིག་རྩིས་མེད་དུ་བཏང་བ། དོན་ཚན་ཞེ་དགུ་པར། ཁྲིམས་རྩོད་པས་ཤེས་བཞིན་དུ་བྱས་ཉེས་བསགས་པའི་དབང་གིས་ཉེས་དོན་གྱི་ཆད་པ་ཕོག་ན་ཞིང་ཆེན་དང་རང་སྐྱོང་ལྗོངས། ཐད་གཏོགས་གྲོང་ཁྱེར་བཅས་ཀྱི་མི་དམངས་སྲིད་གཞུང་གི་ཁྲིམས་འཛིན་སྲིད་འཛིན་སྡེ་ཁག་གིས་དེའི་ཁྲིམས་རྩོད་པའི་ལས་གཉེར་དཔང་ཡིག་རྩིས་མེད་དུ་གཏང་རྒྱུ།
6.དག་འབུད་བྱེད་མཁན།
《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ཉེས་དོན་གཏུག་བཤེར་བཅའ་ཁྲིམས།》（2012ལོར་དག་བཅོས་བྱས།）དོན་ཚན་སོ་གཉིས་པ། ཉེས་ཆད་ལག་བསྟར་བྱེད་བཞིན་པའམ་ཁྲིམས་ལྟར་རང་ལུས་རང་དབང་བཙན་འཕྲོག་དང་ཚོད་འཛིན་བྱས་ཡོད་པའི་མི་དེས་དག་འབུད་བྱེད་མཁན་གྱི་འགན་འཁུར་མི་ཆོག
7. ཉེན་རྟོག་པ།
《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་མི་དམངས་ཉེན་རྟོག་པའི་བཅའ་ཁྲིམས།》ཀྱི་དོན་ཚན་ཉེར་དྲུག་པའི་ནང་གཤམ་གསལ་གནས་ཚུལ་ལས་རིགས་གཅིག་ཡོད་ན། མི་དམངས་ཉེན་རྟོག་པའི་འགན་འཁུར་མི་ཆོག་པ་སྟེ། （གཅིག）བྱས་ཉེས་བསགས་པའི་རྐྱེན་གྱིས་ཉེས་དོན་གྱི་ཉེས་ཆད་ཕོག་མྱོང་བ།（གཉིས།）གཞུང་གི་ལས་གནས་ནས་ཕྱིར་ཕུད་བྱས་མྱོང་བ།
8.གྲོང་མིའི་ཨུ་ཡོན་ལྷན་ཁང་གི་ཁོངས་མི།
《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་གྲོང་མིའི་ཨུ་ཡོན་ལྷན་ཁང་གི་རྩ་འཛུགས་བཅའ་ཁྲིམས།》（2010བཟོ་བཅོས་རྒྱག་པ།）ཀྱི་དོན་ཚན་བཅོ་བརྒྱད་པ་སྟེ། གྲོང་མིའི་ཨུ་ཡོན་ལྷན་ཁང་གི་ཁོངས་མིའི་བྱ་སྤྱོད་སྤེལ་ནུས་ཤོར་བའམ་ཡང་ན་དེར་ཉེས་ཆད་བཅད་ཚེ། དེའི་འགན་གནས་རང་འགུལ་གྱིས་མཚམས་འཇོག་བྱ་རྒྱུ།
གཉིས་པ། འབྲེལ་ཡོད་གཉེན་ཚན་གྱི་ཁྲིམས་འགལ་བྱ་སྤྱོད་ཀྱིས་བུ་ཕྲུག་ལ་གནོད་ཤུགས་ཐེབས་པའི་དོན་ཚན་གཏན་འབེབ།
1.ཐད་ཀའི་གཉེན་ཚན་དག་གི་བྱ་སྤྱོད་ཀྱིས་བུ་ཕྲུག་གིས་གཞུང་ཞབས་པར་རྒྱུགས་སྤྲོད་པར་ཤུགས་རྐྱེན་ཐེབས་སྲིད་པའི་སྐོར།
(གཅིག) སྒལ་རལ་པ་ཡང་ན་བུན་བྱོལ་མཁན། དེ་ནི་བུ་ལོན་འཇལ་བའི་ནུས་པ་ཡོད་ཀྱང་བུ་ལོན་འཇལ་རྒྱུ་ཁས་མི་ལེན་པའི་མི་ལ་ཟེར།
(གཉིས།)ཐད་ཀའི་གཉེན་ཚན་ལ་གལ་ཏེ་སྲོག་ཁྲིམས་བཅད་པའི་གནས་ཚུལ་ཡོད་པའམ་ཡང་ན་ཁྲིམས་ཆད་འཁུར་བཞིན་པ(ཉེས་ཆད་གང་ཞིག་ཡིན་རུང་)དང་། རྒྱལ་ཁབ་ཀྱི་བདེ་འཇགས་ལ་གནོད་འཚེ་གཏོང་བའི་བྱས་ཉེས་བསགས་ནས་མིག་སྔར་གྱོད་དོན་ཐོ་འགོད་ཞིབ་བཤེར་བྱེད་བཞིན་ཡོད་པའི་རིགས།
(གསུམ།) ཕ་མར་ཆང་འཐུང་ནས་རླངས་འཁོར་བསྐོར་བའི་ཁྲིམས་ཆད་ཕོག་མྱོང་བའི་རིགས།
2.ཉེན་རྟོག་སློབ་གྲྭར་རྒྱུགས་སྤྲོད་པའི་སློབ་མར་གཤམ་གསལ་གྱི་གནས་ཚུལ་ལས་རིགས་གཅིག་ཡོད་ན་ཆབ་སྲིད་ཞིབ་བཤེར་ཚད་མ་ལོན་པར་བརྩི་རྒྱུ་སྟེ།
(གཅིག) ཉེས་ཆད་དང་ངལ་རྩོལ་སློབ་གཅུན། ལོ་ཆུང་དོ་དམ་སློབ་གཅུན་བཅས་ཕོག་མྱོང་བའམ་ཡང་ན་ཉེ་བའི་ལོ་ལྔའི་རིང་བདེ་སྲུང་ཆད་པ་ཕོག་མྱོང་བའི་རིགས།
(གཉིས།) ཁྲིམས་འགལ་ཉེས་གསོག་གི་དོགས་གཞི་ཡོད་པས་སྲིད་ཁྲིམས་ལས་ཁུངས་ཀྱིས་མྱུལ་ཞིབ་དང་ཚོད་འཛིན་བྱེད་བཞིན་པའི་རིགས།
(གསུམ།) སློབ་ཁུངས་ནས་ཕྱིར་ཕུད་པ་དང་གུང་གཞོན་ཚོགས་པ་ནས་ཕྱིར་ཕུད་པ། ཡང་ན་ཏང་གི་སྒྲིག་ཁྲིམས་ཀྱི་ཆད་པ་ཕོག་མཁན། དེ་མིན་ལོ་གསུམ་གྱི་ནང་སྐྱོན་ཆ་ཐོ་འགོད་ཡན་གྱི་སྒྲིག་ཁྲིམས་ཆད་པ་ཕོག་མཁན།
(བཞི།)ལོག་ཆོས་དང་ཁྲིམས་འགལ་གྱི་རྩ་འཛུགས་གཞན་དག་ནང་ཞུགས་མྱོང་བའམ་ཡང་ན་ནག་ཚོགས་ཀྱི་ངོ་བོ་ལྡན་པའི་རྩ་འཛུགས་ནང་ཞུགས་མྱོང་མཁན།
(ལྔ།) དུག་འཐེན་པའི་ལོ་རྒྱུས་ཡོད་མཁན།
(དྲུག)ཐད་ཀའི་གཉེན་ཚན་དང་འབྲེལ་བ་དམ་ཟབ་ཡོད་པའི་ཟུར་གཏོགས་གཉེན་ཚན་ནང་སྲོག་ཁྲིམས་བཅད་པའམ་ཡང་ན་རྒྱལ་ཁབ་ཀྱི་བདེ་འཇགས་ལ་གནོད་འཚེ་བཏང་བའི་བྱས་ཉེས་བསགས་པའི་རྐྱེན་གྱིས་ཁྲིམས་ཆད་བཅད་པའམ་ཡང་ན་བྱས་ཉེས་གཞན་དག་བསགས་པའི་རྐྱེན་གྱིས་ཁྲིམས་ཆད་འཁུར་བཞིན་ཡོད་པའི་རིགས།
(བདུན།)ཐད་ཀའི་གཉེན་ཚན་དང་འབྲེལ་བ་དམ་ཟབ་ཡོད་པའི་ཟུར་གཏོགས་གཉེན་ཚན་ནང་དུ་སྲིད་ཁྲིམས་ལས་ཁུངས་ཀྱིས་མྱུལ་ཞིབ་དང་ཚོད་འཛིན་བྱེད་བཞིན་པའི་ཉེས་བསགས་དོགས་གནད་ཆེ་བའི་མི་ཡོད་པ་དང་། ཡང་ན་ལོག་ཆོས་དང་ཁྲིམས་འགལ་རྩ་འཛུགས་གཞན་དག་གི་རྐང་འཛིན་པ་ཡིན་པའམ་ངན་རེངས་བྱས་ནས་མུ་མཐུད་དུ་ནོར་འཁྲུལ་གྱི་ལངས་ཕྱོགས་མཁྲེགས་འཛིན་བྱེད་པའི་མི་ཡོད་པའི་རིགས།
(བརྒྱད།)བསྡུ་ལེན་བྱེད་མི་འོས་པའི་གནས་ཚུལ་གཞན་དག
3.སྤྱི་དམངས་ལ་གཤམ་གསལ་གྱི་གནས་ཚུལ་ལས་རིགས་གཅིག་ཡོད་ཚེ་དངོས་ཞབས་དམག་མིར་བསྡུས་མི་ཆོག་པ་སྟེ།
(གཅིག)ཆབ་སྲིད་རང་བཞིན་ལྡན་པའི་ནོར་འཁྲུལ་གྱི་གཏམ་བརྗོད་སྤེལ་བ་དང་། ཆབ་སྲིད་ཀྱི་རང་བཞིན་ལྡན་པའི་རྩོམ་ཡིག་དང་གསུང་རྩོམ་འབྲི་བ་དང་རྩོམ་སྒྲིག་འགྲེམས་སྤེལ། པར་སྐྲུན་བཅས་བྱས་པའི་རིགས།
(གཉིས།)སྔོན་ཆད་ཉེས་དོན་གྱི་ཆད་པ་ཕོག་པ་དང་ངལ་རྩོལ་སློབ་གཅུན་དུ་ཚུད་པ། བསྡུ་ཉར་སློབ་གསོ་བྱས་པ། སྲིད་འཛིན་བཀག་ཉར་བཅས་བྱས་པའི་རིགས།
(གསུམ།)སྒྲིག་འགལ་དང་ཁྲིམས་འགལ་གྱི་དོགས་གཞི་ཡོད་པའི་རྐྱེན་གྱིས་བརྟག་དཔྱད་དང་ཐག་གཅོད་བྱེད་བཞིན་པའམ་ཡང་ན་མྱུལ་ཞིབ་དང་། གཏུག་ཞུ། འདྲི་གཅོད་བཅས་བྱེད་བཞིན་པའི་རིགས།
(བཞི།)ནོར་འཁྲུལ་ཚབས་ཆེན་ཤོར་བའི་རྐྱེན་གྱིས་གཞུང་གི་ལས་གནས་ནས་ཕྱིར་ཕུད་པ་དང་། ལས་ཁུར་དགོངས་ཞུ་དགོས་པའི་བཀའ་ཕབ་པ། སློབ་ཁོངས་ནས་ཕྱིར་ཕུད་པའམ་ཡང་ན་ཏང་ནས་ཕྱིར་ཕུད་པ། ཏང་ནང་བཞག་ནས་ལྟ་ཞིབ་བྱེད་པ། གུང་གཞོན་ཚོགས་པ་ནས་ཕྱིར་ཕུད་པ་བཅས་བྱས་པའི་རིགས།
(ལྔ།)ནག་ཚོགས་ཀྱི་ངོ་བོ་ལྡན་པའི་རྩ་འཛུགས་སམ་ཉེས་གསོག་ཚོགས་པའི་མཚོན་རྟགས་ཡོད་པ། ཡང་ན་རྒྱལ་ཁབ་ཀྱི་སྣང་བརྙན་ལ་གནོད་པ་དང་སྤྱི་ཚོགས་ཀྱི་ཀུན་སྤྱོད་ལ་གནོད་པའི་ལུས་རིས་བརྐོས་ཡོད་པའི་རིགས།
(དྲུག)ཕྱི་རྒྱལ་དང་ཕྱི་ཁོངས་ཀྱི་ཆབ་སྲིད་རྒྱབ་ལྗོངས་རྙོག་འཛིང་ཆེ་བའི་མི་སྣ་དང་འབྲེལ་བ་དམ་ཟབ་ཡོད་པ་དང་ཆབ་སྲིད་ཐད་དོགས་སྣང་ཡོད་པའི་རིགས།
(བདུན།)ལོག་ཆོས་རྩ་འཛུགས་སུ་ཞུགས་མྱོང་བའམ་བྱེད་སྒོ་སྤེལ་མྱོང་རིགས་དང་། གནོད་ལྡན་གྱི་ཆོས་ལུགས་རྩ་འཛུགས་སུ་ཞུགས་མྱོང་བའམ་བྱེད་སྒོ་སྤེལ་མྱོང་བའི་རིགས།
ཁྱིམ་ཚང་གི་ཁོངས་མི་གཙོ་བོ་དང་ཐད་ཀར་གསོ་སྐྱོང་བྱེད་མཁན། སྤྱི་ཚོགས་ཀྱི་འབྲེལ་བ་གཙོ་བོའི་ཁོངས་མིའམ་ཡང་ན་རང་ཉིད་ལ་ཤུགས་རྐྱེན་ཅུང་ཆེ་བའི་གཉེན་ཉེ་གཞན་དག་ནི་ལོག་ཆོས་སམ་ཡང་ན་གནོད་ལྡན་གྱི་ཆོས་ལུགས་རྩ་འཛུགས་ཀྱི་རྐང་འཛིན་མི་སྣ་བཅས་ཡིན་པ།
(བརྒྱད།)རང་ཉིད་དམ་ཡང་ན་ཁྱིམ་ཚང་གི་ཁོངས་མི་གཙོ་བོ་དང་ཐད་ཀར་གསོ་སྐྱོང་བྱེད་མཁན་གྱིས་མི་རིགས་ཁ་བྲལ་དང་། དྲག་ཤུགས་འཇིགས་སྐུལ། ཆོས་ལུགས་ཐལ་སྐྱོད་སོགས་ཁྲིམས་འགལ་གྱི་རྩ་འཛུགས་དང་། ནག་ཚོགས་ཀྱི་ངོ་བོ་ལྡན་པའི་ཉེས་གསོག་ཚོགས་པར་ཞུགས་པའམ་ཡང་ན་བྱེད་སྒོ་སྤེལ་མྱོང་བའི་རིགས། སྤྱི་ཚོགས་ཀྱི་འབྲེལ་བ་གཙོ་བོའི་ཁོངས་མིའམ་ཡང་ན་རང་ཉིད་ལ་ཤུགས་རྐྱེན་ཅུང་ཆེ་བའི་གཉེན་ཉེ་གཞན་དག་ནི་གོང་གསལ་ཁྲིམས་འགལ་རྩ་འཛུགས་ཀྱི་རྐང་འཛིན་མི་སྣ་ཡིན་པ།
(དགུ།)ཁྱིམ་ཚང་གི་ཁོངས་མི་གཙོ་བོ་དང་། ཐད་ཀར་གསོ་སྐྱོང་བྱེད་མཁན། སྤྱི་ཚོགས་ཀྱི་འབྲེལ་བའི་ཁོངས་མི་གཙོ་བོ་བཅས་སམ་ཡང་ན་རང་ཉིད་ལ་ཤུགས་རྐྱེན་ཅུང་ཆེ་བའི་གཉེན་ཉེ་གཞན་དག་བཅས་ལ་ཉེས་དོན་གྱི་ཆད་པ་བཅད་པ་དང་། ཏང་ནང་ནས་ཕྱིར་ཕུད་པ། གཞུང་གི་ལས་གནས་ནས་ཕྱིར་ཕུད་པའམ་ཡང་ན་ཁྲིམས་འགལ་གྱི་གནད་དོན་ཚབས་ཆེན་ཡོད་པ་བཅས་ཞིབ་བཤེར་གསལ་པོ་མ་བྱུང་བར་དེ་དག་ལ་འགེབས་སྲུང་དང་འཁོན་ལན་སློག་པའི་གཏམ་སྤྱོད་ཡོད་པའི་རིགས།
(བཅུ།)ཁྱིམ་ཚང་གི་ཁོངས་མི་གཙོ་བོར་རྒྱལ་ཁབ་ཀྱི་བདེ་འཇགས་ལ་གནོད་འཚེ་གཏོང་བའི་ཉེས་གསོག་བྱ་སྤྱོད་ཡོད་པའམ་ཡང་ན་ཆབ་སྲིད་རང་བཞིན་གྱི་གནད་དོན་ཚབས་ཆེན་ཡོད་པ་ལ་རང་ཉིད་ཀྱིས་དབྱེ་མཚམས་གསལ་པོ་འབྱེད་མི་ཐུབ་པའི་རིགས།
(བཅུ་གཅིག)དངོས་ཞབས་དམག་མིར་ཞུགས་པའི་ཆབ་སྲིད་ཆ་རྐྱེན་དང་མི་མཐུན་པའི་གནས་ཚུལ་གཞན་དག་བཅས་ཡིན།
སྤྱི་ཚོགས་རིང་ལུགས་ཀྱི་ཁྲིམས་སྐྱོང་རྒྱལ་ཁབ་འཛུགས་སྐྱོང་བྱེད་པའི་བྱ་གཞག་རྒྱུན་ཆད་མེད་པར་གོང་དུ་སྤེལ་བ་དང་ཆབས་ཅིག །ཁྲིམས་ཀྱིས་སྤྱི་ཚོགས་ཀྱི་འཚོ་བ་ལེགས་སྒྲིག་བྱེད་པའི་ཁྱབ་ཁོངས་ཇེ་ཆེར་འགྲོ་བ་དང་། མི་རྣམས་ཀྱི་མདུན་དུ་ལྷགས་པའི་ཁྲིམས་ལུགས་སྐོར་གྱི་གནད་དོན་ཀྱང་ཇེ་མང་དུ་འགྲོ་བ་རེད། སྤྱི་དམངས་ཀྱིས་ཁྲིམས་ལུགས་ཤེས་བྱ་སློབ་སྦྱོང་དང་ཁྲིམས་ཀྱི་བྱེད་ཐབས་ཁོང་དུ་ཆུད་པ། ཁྲིམས་ཀྱི་ལག་ལེན་ནང་ཞུགས་པ་སོགས་ཀྱི་ཐབས་ལམ་ལ་བརྒྱུད་ནས་རྒྱུན་ལྡན་གྱི་འཚོ་བའི་ནང་ཁྲིམས་ཀྱི་ཟུར་ནས་བསམ་གཞིགས་དང་དབྱེ་ཞིབ། གནད་དོན་ཐག་གཅོད་བཅས་བྱེད་པའི་གོམས་གཤིས་རིམ་བཞིན་ཆགས་པར་བྱས་ན། རང་ཉིད་ཀྱི་ཁྲིམས་མཐུན་ཁེ་དབང་སྲུང་སྐྱོང་དང་ཁྱིམ་མི་གཉེན་ཉེར་གནོད་ཤུགས་མི་ཐེབས་པ། དེ་མིན་སྤྱི་ཚོགས་འཆམ་མཐུན་ཡོང་བའི་ཕྱོགས་ལ་ཕན་ཐོགས་ཡོད་ངེས་ཡིན། །