ཧུང་ཡོན་རྫོང་གི་འདུ་ཐང་རིག་གནས་། བྲོ་ར་ཁྲ་མོ།

ཆེད་ལས་སྒྱུ་རྩལ་དང་བསྡུར་ན་མང་ཚོགས་སྒྱུ་རྩལ་ལ་ཁྱད་ཆོས་རང་མཚན་པ་འགའ་ཞིག་ཡོད་པ་སྟེ། མང་ཚོགས་རང་བཞིན་དང་རོལ་རྩེད་རང་བཞིན། རྒྱུན་འཛིན་རང་བཞིན་བཅས་ཡིན་ཞིང་།

མང་ཚོགས་སྒྱུ་རྩལ་དུ་གཏོགས་པའི་འདུ་ཐང་རིག་གནས་ནི་དེའི་དཔེ་མཚོན་ཞིག་ཡིན། འདུ་ཐང་རིག་གནས་ཟེར་བ་ནི་གྲོང་དང་གྲོང་རྡལ་གྱི་མི་ཚོགས་རུབ་འཛོམས་ཆེ་བའི་འདུ་རའམ་འདུ་ཐང་དུ་གཞུང་སྒེར་གང་རུང་གིས་རྩ་འཛུགས་བྱས་ཤིང་། མི་རྣམས་རང་མོས་ལྟར་ཞུགས་ཆོག་པའི་རིག་གནས་སྒྱུ་རྩལ་གྱི་བྱེད་སྒོ་སྣ་ཚོགས་ལ་གོ །

ཕ་ཡུལ་འབྲོག་དམངས་ཀྱི་འཚོ་བའི་ཆུ་ཚད་ཇེ་མཐོ་དང་བསམ་པའི་དགོས་མཁོ་ཇེ་ཆེར་སོང་བའི་དེང་གི་ལོ་ཟླའི་ནང་རྔ་བ་ཁུལ་ཧུང་ཡོན་རྫོང་མཁར་གྱི་འདུ་ཐང་རིག་གནས་ལའང་སྐྱེས་སྟོབས་ཀྱི་དཔལ་དང་ལྡན་པར་གྱུར། གནས་འདིའི་མི་རྣམས་ཀྱིས་ནུབ་ཟས་ལ་རོལ་རྗེས་རྫོང་མཁར་གྱི་འདུ་ཐང་སོ་སོ་ནས་དབྱངས་སྙན་ལྷང་ལྷང་དང་གར་སྟབས་ལྡེམ་ལྡེམ་གྱི་བྲོ་གར་ལ་རོལ་འགོ་རྩོམ་ཞིང་། སྐོར་བྲོའི་དཀྱིལ་འཁོར་ན་སྤྲོ་དགས་མྱོས་པའི་མི་ཚོགས་ཀྱི་གདོང་ལ་འཛུམ་མདངས་ཀྱི་མེ་ཏོག་བཞད་ཅིང་འཆམ་མཐུན་གྱི་ལག་གདང་སྦྲེལ་ཏེ་ཧུང་ཡོན་གྱི་མཚན་ལྗོངས་མཛེས་པར་བརྒྱན། སྐོར་བྲོ་ནི་ལུས་ཕུང་སྦྱོང་བརྡར་དང་སེམས་ཁམས་ངལ་གསོའི་ལོངས་སྤྱོད་ཅིག་ཡིན་ཕྱིར། ཧུང་ཡོན་རྫོང་མཁར་གྱི་འདུ་ཐང་མི་འདྲ་བ་ལྔ་དྲུག་གཅིག་ན་ཁྱད་ཆོས་མི་གཅིག་པའི་བྲོ་ར་བཙུགས་ནས་དབྱངས་སྒར་བརྒྱབ་ཡོད་ལ། མི་རྣམས་ཀྱིས་རང་རང་གི་དགའ་ཁ་འཁྱེར་ཕྱོགས་ལྟར་བྲོ་ར་བདམས་ཏེ་གར་སྟབས་ལིང་ལིང་བྱེད། ཧུང་ཡོན་གྱི་མཁའ་དབྱིངས་ན་དབྱར་དགུན་སྟོན་དཔྱིད་དུས་བཞི་དབྱེར་མེད་དུ་སྐོར་བྲོའི་དབྱངས་སྙན་ལ་ཆད་པ་མེད་ཅིང་། དགུན་རྟ་ཟླའི་ཙག་རླུང་ཁྲོད་དུའང་སྐོར་བྲོའི་ལག་གདང་ལ་འཐོར་བ་མི་འདུག་གོ །

གཅིག །གླིང་བྲོའི་བྲོ་ར།

འདི་ནི་འཇུ་མི་ཕམ་འཇམ་དབྱངས་རྣམ་རྒྱལ་རྒྱ་མཚོས་མཛད་ཅིང་གླིང་གེ་སར་རྒྱལ་པོའི་སྒྲུང་དང་འབྲེལ་བའི་ཟློས་གར་བསྟན་བཅོས་ཞིག་སྟེ་མཚན་བྱང་ལ《གླིང་བྲོ་བདེ་ཆེན་རོལ་མོ།》 ཞེས་སུ་འབོད། བྲོ་འདིའི་ནང་དོན་ཆ་ཚང་ལ་བྲོ་ཡི་བྱིན་འབེབས་དང་མཆོད་བསྟོད་ཀྱི་གླུ། སྣ་ཚོགས་འཕྲིན་ལས་བྲོ། བཀྲ་ཤིས་དབྱངས་སྙན་བཅས་ཡོད། དེའི་རྗེས་སུ་མཁན་ཆེན་འཇིགས་མེད་ཕུན་ཚོགས་ཀྱི་ཐུགས་བཀོད་ལྟར་རྡུང་ལེན་པ་གྲགས་ཅན་གངས་ལྗོངས་ཁུ་བྱུག་སྔོན་མོ་བདུད་བྷེས་དབྱངས་སྦྱར་ཏེ་སྒྲ་བླངས་ཤིང་། རིམ་གྱིས་ཁམས་ཕྱོགས་གཙོ་བོ་ཡིན་པའི་དགོན་སྡེ་དང་ཡུལ་གྲོང་དག་གི་མཛད་སྒོ་སྣ་ཚོགས་ལ་གླིང་བྲོ་འདི་འཁྲབ་པའི་སྲོལ་བྱུང་། བརྗོད་བྱ་གླིང་སྒྲུང་དང་འབྲེལ་ཞིང་སྐྱེས་ཆེན་དམ་པ་དུ་མའི་ཐུགས་སྨོན་ལས་བྱུང་བའི་རྒྱུ་མཚན་གྱིས་གླིང་བྲོ་འདི་ཉིད་དད་ལྡན་དང་བ་འདྲེན་པའི་ཞིང་སའམ་བྱིན་རླབས་ཚན་ཁ་འབར་བའི་རྟེན་བཟང་ཞིག་ཏུ་གྱུར་འདུག

དེ་བས་ཧུང་ཡོན་རྫོང་མཁར་གྱི་བྲོ་ར་གཅིག་ནི་གླིང་བྲོའི་བྲོ་ར་ཡིན་ཞིང་འདིར་ཞུགས་མཁན་ཕལ་མོ་ཆེ་ནི་བོད་རིགས་དད་ལྡན་ཕོ་མོ་རེད། སྒྱུ་རྩལ། ལུས་སྦྱོང་། མཆོད་འབུལ་བཅས་གཞི་གཅིག་ཏུ་གྱུར་པའི་བྲོ་གར་འདི་ཉེ་བའི་ལོ་ཤས་ནང་ཧུང་ཡོན་གྱི་འདུ་ཐང་རིག་གནས་ཀྱི་མཛེས་རྒྱན་དུ་གྱུར་ཅིང་།

ཧུང་ཡོན་རྫོང་གླིང་བྲོ་དར་སྤེལ་ཚོགས་པའི་རྒྱུན་ཆགས་ཀྱི་སྣེ་ཁྲིད་འོག་བྲོ་ར་འདིར་ཞུགས་མཁན་ཡང་ཇེ་མང་ནས་ཇེ་མང་དུ་འགྱུར་བཞིན་ཡོད། སྔོན་ཆད་སྤྱི་ཚོགས་གོམས་སྲོལ་གྱི་དབང་གིས་འབྲོག་ཁུལ་གྱི་ལོ་ལོན་རྣམས་བྲོ་གར་རྩེད་མོར་ཞུགས་ཚད་ཆེས་ཤིན་ཏུ་ཉུང་ཡང་། ད་ལྟ་རྒན་གཞོན་ཕོ་མོ་ཁྱད་མེད་དུ་བྲོ་ལ་ཆས་ཤིང་གར་ལ་རོལ་ཐུབ་བཞིན་ཡོད། དེར་བརྟེན་དད་མོས་ཀྱི་རྟེན་དུ་འཁྲུངས་ཤིང་སྒྱུ་རྩལ་གྱི་བཅུད་དུ་སྨིན་པའི་གླིང་བྲོ་འདི་བོད་འབྲེལ་ས་ཁུལ་དུ་ཧ་ཅང་འཚམ་པའི་སྐོར་བྲོའི་རྣམ་པ་ཕུན་སུམ་ཚོགས་པ་ཞིག་ཀྱང་ལགས་སོ། །

གཉིས། གུང་ཐང་ཞབས་བྲོའི་བྲོ་ར།

ཀུན་མཁྱེན་འཇམ་དབྱངས་བཞད་པ་སྐུ་ཕྲེང་རིམ་བྱོན་གྱིས་མདོ་སྨད་བསྟན་པའི་འབྱུང་གནས་བླ་བྲང་བཀྲ་ཤིས་འཁྱིལ་དུ་རོལ་མོའི་རིག་བྱེད་དར་སྤེལ་མཛད་ཅིང་། གླིང་ཚང་ལེགས་བཤད་རྒྱ་མཚོ་དང་གུང་ཐང་བསྟན་པའི་དབང་ཕྱུག་རྣམ་གཉིས་ཀྱིས་མཛད་པའི་མགུར་གླུ་སོགས་ཀྱང་མང་པོ་བཞུགས། དེར་བརྟེན་བླ་བྲང་དགོན་པ་ནི་ཨ་མདོའི་རིག་རྩལ་དང་ལྷག་པར་དུ་ཨ་མདོའི་རྡུང་ལེན་སྒྱུ་རྩལ་གྱི་ཆུ་འགོ་ལྟ་བུར་གྱུར་ཡོད། གུང་ཐང་རིན་པོ་ཆེ་མཆོག་སྔ་གཞུག་ཐེངས་མང་པོར་ཧོང་ཡོན་རྫོང་དུ་བྱོན་ནས་སྐ་ཁོག་གི་འགྲོ་རྣམས་བརྩེ་བ་ཆེན་པོས་བསྐྱངས་ཤིང་། ཁོང་དང་ཁོང་གི་སྐུ་འཁོར་ཞབས་ཕྱི་བའི་ཁྲོད་ཀྱི་རིག་རྩལ་མི་སྣ་རྣམ་པས་བླ་བྲང་དམངས་ཁྲོད་ཞབས་བྲོ་སྟེ། 《དགའ་ལྡན་ཁང་གསར།》དང་《ཙན་ཏན་བྲོ།》《སྐལ་བཟང་མེ་ཏོག》《ཨ་ཅེ་བྱང་ཆུབ་སྒྲོལ་མ།》《ལམ་ཁྲ་མོ།》སོགས་སྐ་ཁོག་ཏུ་དར་སྤེལ་གནང་བ་དང་། གུང་ཐང་རིན་པོ་ཆེ་སྐུ་དངོས་ཀྱིས་ཚིག་དང་དབྱངས་མཛད་པའི《དཔུང་བཞིའི་དམག་གི་སྒྲ་དབྱངས།》ལ་གར་སྟབས་དང་རྡོག་བྲོ་སྦྱར་ཏེ་སྐབས་དེའི་རྣམ་ཐར་ཟློས་གར《སྲོང་བཙན་སྒམ་པོ།》སོགས་ཀྱི་བར་བཅུག་ཞབས་བྲོར་སྤྱད་ཅིང་། རིམ་གྱིས་སློབ་གྲྭ་དང་དམངས་ཁྲོད་དུ་དར་ཁྱབ་ཆེན་པོ་བྱུང་བ་དེ་ལ་གུང་ཐང་ཞབས་བྲོ་ཞེས་ཀྱང་འབོད།

ཧུང་ཡོན་རྫོང་མཁར་འདུ་ཐང་རིག་གནས་ཀྱི་བྲོ་ར་གཞན་ཞིག་ནི་གུང་ཐང་ཞབས་བྲོ་སྟེ་དཔུང་བཞིའི་དམག་གི་སྒྲ་དབྱངས་ཀྱི་བྲོ་ར་ཡིན་ཞིང་།

དབྱངས་དང་ཚིག །གར་སྟབས་བཅས་ཕུན་ཚོགས་སུམ་འཛོམས་ཡིན་པའི་ཞབས་བྲོ་འདི་རིགས་ལ་མང་ཚོགས་ཀྱིས་དགའ་བསུ་ཚད་མེད་བྱེད་བཞིན་ཡོད། འདིའང་དད་པ་དང་སྒྱུ་རྩལ། ལུས་སྦྱོང་བཅས་ཀྱི་གཞི་རྟེན་དུ་གྱུར་པའི་རིག་རྩལ་ནོར་བུ་རིན་ཐང་བྲལ་བ་ཞིག་ཡིན་ཕྱིར། ཧུང་ཡོན་གྱི་འདུ་ཐང་རིག་གནས་ཀྱི་གཟི་བྱིན་ཉམས་པ་མེད་པའི་ཕྲ་རྒྱན་ལྟ་བུར་གྱུར་ནས་ཡོད་དོ། །

གསུམ། རྨེ་བྲོའི་བྲོ་ར།

ཧུང་ཡོན་རྫོང་ཁོངས་ཀྱི་དབལ་ཤུལ་རྨེ་བའི་སྡེ་ཤོག་ཆེན་པོ་འདི་ཁམས་ཉག་རོང་ནས་མཆེད་པས་ན་རྨེ་གླུ་དང་རྨེ་བྲོ། རྨེ་བའི་གཏམ་དཔེ་སོགས་རྨེ་བའི་དམངས་སྲོལ་ཁྱབ་ཁོངས་སུ་ཁམས་པའི་རིག་གནས་སྒྱུ་རྩལ་གྱི་ཐུན་མོང་མ་ཡིན་པའི་ཁྱད་ཆོས་མངོན་པར་གསལ།

རྨེ་བྲོའི་འགོ་ཁུངས་ནི་ལོ་རྒྱུས་དུས་ཡུན་རིང་བའི་ཉག་བྲོ་སྟེ་རིགས་དང་རྣམ་གྲངས་མང་ཞིང་བྲོ་ཚན་རེ་རེར་དབྱངས་ཚིག་གར་སྟབས་ཆ་ཚང་ཡིན། རྨེ་བྲོ་ནི་བྲོ་འགོ་རྩོམ་པ་དང་དངོས་གཞི། བཀྲ་ཤིས་འཇོག་པ་སོགས་སྒྲིག་གཞི་ཆ་ཚང་བའི་གནའ་བྲོའི་ཉམས་དང་ལྡན་པ་ཞིག་ཡིན་ཞིང་ལྷན་འཛོམས་ཀྱི་སྟོན་མོ་དང་རྟེན་འབྲེལ་གྱི་མཛད་སྒོ་སོགས་སུ་འཁྲབ་སྲོལ་ཆགས་ཡོད། བྲོ་ཚིག་ལ་བླ་མ་དཔོན་པོ་དང་ཕ་མ་སྤུན་མཆེད་ལ་བསྟོད་པ། རང་བྱུང་ཁམས་ཀྱི་མཚར་སྡུག་གི་སྣོད་བཅུད་ལ་བསྟོད་པ། རྟེན་འབྲེལ་གྱི་སྨོན་ཚིག་བརྗོད་པ་སོགས་ཡོད་ཅིང་། ཞི་རྒྱས་དབང་དྲག་མཚོན་པའི་གར་སྟབས་མི་འདྲ་བ་དག་གིས་བྲོ་ཚན་རེ་རེའི་ཉམས་འགྱུར་ཐུན་མོང་མ་ཡིན་པ་སྟོན་ལ་བརྗོད་དོན་མི་འདྲ་བ་མཚོན་ནོ། །བྲོ་ཡི་ནང་དོན་ལྟར་བྲོ་པ་ཕོ་མོ་དག་གིས་རེས་མོས་སུ་འཁྲབ་ལེན་བྱེད་པ་དང་མཉམ་དུ་འཁྲབ་ལེན་བྱེད་པ་སྣ་ཚོགས་སུ་ངེས་ཤིང་། སྟག་ཤར་རྣམས་ཀྱིས་ནི་ཐང་དཀར་རྒོད་པོའི་འཁོར་ཚུལ་དང་འབྲོང་གཡག་དར་མའི་འགྱིང་ཚུལ་གྱིས་འཁྲབ་པར་མ་ཟད་དབྱངས་རྟའང་མཐོ་ཞིང་བརྗིད་ལ་རྔམ་ཟིལ་ལྡན་པ་འབའ་ཞིག་ཡིན། སྨན་ཤར་རྣམས་ཀྱིས་རྨ་བྱ་སྔོན་མོའི་འཕྱོར་འགྲོས་དང་གཙང་ཆབ་ཕྱུག་མོའི་སྒེག་འགྲོས་ལྟར་འཇམ་མཉེན་ཞི་ལྷོད་ཀྱི་ཉམས་དང་ལྡན་པར་འཁྲབ་ཅིང་། དབྱངས་རྟའང་འགྱུར་ཁུགས་སྙན་འཇེབས་ལྡན་ལ་རིང་ཞིང་ལྷུན་ཆགས་པ་འབའ་ཞིག་ཡིན་པར་མ་ཟད་འཁྲབ་སྐབས་སུ་མགོ་བོ་ཅུང་ཟད་དུད་དེ་མངོན་ཆུང་དང་གུས་ཞབས་ཀྱི་རྣམ་པ་སྟོན་དགོས། དེ་ལྟར་རྨེ་བྲོ་ནི་ཧུང་ཡོན་རྫོང་གི་ཁུལ་རིམ་པའི་དངོས་མིན་ཤུལ་བཞག་རིག་གནས་ཀྱི་རྣམ་གྲངས་སུ་ཚུད་ཡོད་ལ་རྒྱུན་འཛིན་དང་དར་སྤེལ་གྱི་རིན་ཐང་བླ་ན་མེད།

ཧུང་ཡོན་རྫོང་ན་རྨེ་བྲོ་རྒྱུན་འཛིན་བྱེད་པའི་ཚོགས་པ་དུ་མ་ཡོད་པར་མ་ཟད། ཚོགས་པ་ལ་ལས་མ་བསྐུལ་དང་བླངས་ངང་ལོ་རྒྱུས་ཀྱི་འགན་འཁྲི་ཕྲག་ཏུ་བླངས་ཏེ་རྫོང་མཁར་གྱི་འདུ་ཐང་ནས་རྨེ་བྲོའི་བྲོ་ར་བཙུགས་ཤིང་ནུབ་ལྟར་རྨེ་བྲོ་འཁྲབ་བཞིན་འདུག །བྲོ་ར་འདིར་ཞུགས་མཁན་མང་ཆེ་བ་རྒན་པ་དང་དར་མ་ཡིན་ཞིང་ཁོང་ཚོས་གནའ་ཉམས་ཀྱི་མཚར་སྡུག་ཀློང་ན་ལོ་རྒྱུས་ཀྱི་རིན་ཐང་ལྡན་པའི་རྨེ་བྲོའི་སྒྱུ་རྩལ་ལ་ལོངས་སུ་སྤྱོད་བཞིན་ཡོད། །

བཞི། བོད་གཞས་གསར་པའི་བྲོ་ར།

རྫོང་མཁར་འདིའི་འདུ་ཐང་རིག་གནས་ཀྱི་བྲོ་ར་གཞན་པ་གཅིག་ནི་བོད་གཞས་གསར་པའི་བྲོ་ར་རེད། དབྱངས་ཚིག་བཟང་པོས་སྲོག་བཟུང་ཞིང་རོལ་མོ་ཡག་པོས་ལུས་བརྒྱན་པ། སྐད་ངག་སྙན་པའི་གླུ་པ་གླུ་མ་ཚོས་མགྲིན་པར་དྲངས་བའི་དུས་བསྟུན་གྱི་བོད་གཞས་གསར་པ་རྣམས་ནི་སྙན་འཇེབས་ཡིད་དབང་འཕྲོག་པ་སྟེ་མིག་ཡིད་རྣ་བའི་དགའ་སྟོན་ཁོ་ན་རེད། དགའ་བསུ་ཆེན་པོ་ཐོབ་པའི་ཕུལ་བྱུང་བརྩམས་ཆོས་རྣམས་ཕྱོགས་གཅིག་ཏུ་བསྒྲིགས་ཏེ་སྐོར་བྲོ་གསར་པའི་རོལ་མོར་སྤྱོད་བཞིན་ཡོད་ཅིང་། བྲོ་ལ་དགའ་ཞིང་བྲོ་ལ་བྱང་བའི་མི་སྣ་ལྷག་བསམ་ཅན་དག་གིས་གཞས་གསར་རྣམས་ལ་ཉམས་འགྱུར་འཛོམས་པའི་གར་སྟབས་དང་རྡོག་བྲོ་སྦྱར་བ་ནས་བཟུང་སྐོར་བྲོ་གསར་པ་ཞིག་གི་དབུ་བརྙེས་པ་རེད། མཚམས་ལན་རེར་དགའ་བསུ་ཐོབ་པའི་དྲྭ་ལམ་གྱི་སྐོར་བྲོ་ལ་ཐད་ཀར་སློབ་སྦྱོང་དང་ལད་ཟློས་བྱས་ནས་འཁྲབ་པའང་འདུག །ཤེར་བསྟན་དང་ཀུན་དགའ། མགར་བསམ་འགྲུབ་ཚེ་རིང་། ཚེ་དབང་ལྷ་མོ། ལྷ་སྐྱིད། ཀླུ་མོ་མཚོ་སོགས་གླུ་པ་གླུ་མ་སྐད་གྲགས་ཅན་དག་གི་སྐད་ངག་སྙན་མོ་དང་འགྲོགས་པའི་གར་སྟབས་ཀྱིས་ཧུང་ཡོན་གྱི་མཚན་ལྗོངས་ལ་མཛེས་སྡུག་གི་ཚེ་སྲོག་གསར་པ་སྟེར་བཞིན་ཡོད། བོད་གཞས་གསར་པའི་བྲོ་ར་འདིར་ཞུགས་མཁན་མང་ཕྱོགས་ནི་ལང་ཚོའི་མེ་ཏོག་བཞད་པའི་ན་གཞོན་དག་ཡིན་ཕྱིར་འདི་ནི་སྐྱེ་སྟོབས་ཀྱི་དཔལ་འབར་ཞིང་ལང་ཚོའི་ཉམས་འགྱུར་རྫོགས་པའི་བྲོ་ར་དེའོ། །

ཧུང་ཡོན་གྱི་བྲོ་ར་ཁྲ་མོའི་འཁྲབ་བྱའི་ཞབས་བྲོ་གཙོ་བོ་དག་ནི་གླིང་བྲོ་དང་གུང་ཐང་ཞབས་བྲོ། རྨེ་བྲོ། བོད་གཞས་གསར་པའི་ཞབས་བྲོ་བཅས་ཡིན་ཞིང་། སྐབས་འགར་མཚོ་ལྷོའི་སྐོར་བྲོ་དང་རྒྱལ་རོང་སྐོར་བྲོ། ནག་ཆུའི་སྐོར་བྲོ། རྒྱ་བྲོ་སོགས་ཀྱང་ཞུགས་མཁན་ཚོའི་དགའ་ཕྱོགས་ལྟར་འཁྲབ་བཞིན་ཡོད། ཧུང་ཡོན་གྱི་བུ་དང་བུ་མོ་རྣམས་རང་རང་དགའ་སའི་བྲོ་ར་ཁྲ་མོར་ཞུགས་ཏེ་འབྲེལ་འདྲིས་ཀྱི་ལམ་ནས་འཆམ་མཐུན་ལ་འཇུག་ཅིང་སྒྱུ་རྩལ་གྱི་ལམ་ནས་ཚེ་སྲོག་གི་མཚར་སྡུག་འཚོལ་བ། མཆོད་འབུལ་གྱི་ལམ་ནས་དད་འདུན་ལ་གནས་ཤིང་རྩེད་འཇོའི་ལམ་ནས་ངལ་གསོའི་དབུགས་དབྱུང་ཐོབ་བཞིན་ཡོད། དེ་ལྟར་ཧུང་ཡོན་གྱི་བྲོ་ར་ཁྲ་མོ་ནི་ཧུང་ཡོན་གྱི་འདུ་ཐང་རིག་གནས་ཀྱི་སྲོག་ཏུ་སྦྲུམས་ཤིང་བཅུད་དུ་སྨིན་པའི་དམངས་སྲོལ་ནོར་བུ་རྩ་ཆེན་ཞིག་རེད།

མཚན་མོ་རེ་རེར། ཧུང་ཡོན་རྫོང་མཁར་གྱི་གྲོང་དཀྱིལ་བརྒྱུད་ནས་དལ་གྱིས་བཞུར་བའི་དྭངས་གཙང་གི་ལུང་རིང་ཆུ་བོ་ནི་སྒྱུ་འཕྲུལ་གྱི་འཇིག་རྟེན་ཞིག་སྟེ། ཁྲ་ཆིལ་དགུ་ཆིལ་གྱི་གློག་འོད་སྣ་ཚོགས་ལམ་ལམ་བཀྲ་ཞིང་འཕྱོ་འཇགས་གཡོ་ལྡེམ་གྱི་སྟངས་སྟབས་དུ་མ་གར་དུ་རྩེན་པའི་ཆུ་ཡི་མཆོད་ཀ །ཆུ་འགྲམ་འདུ་ཐང་དག་ན་བྲོ་གར་གྱི་ཉམས་འགྱུར་སྣ་ཚོགས་མཛེས་སྡུག་གིས་ངོམ་པའི་དབྱངས་ཀྱི་སྒར་ཁ། འདི་ནི་དུས་རབས་ཉེར་གཅིག་པའི་ཧུང་ཡོན་གྱི་བུ་རབས་ཚ་རྒྱུད་རྣམས་རྫོགས་ལྡན་གྱི་སྤྱི་ཚོགས་དང་བདེ་སྐྱིད་ཀྱི་ཞིང་ཁམས་སུ་བགྲོད་པའི་ལམ་གྱི་སྒྲ་དབྱངས་དེ་ཡིན་ན། རང་ཅག་གིས་དེའི་རྒྱབ་རྫོང་ན་བྱིན་ཆགས་ཤིང་ལྷུན་གྱིས་གྲུབ་པའི་རིག་གནས་ཀྱི་ཕ་དང་མ་སྟེ། ཆོས་ལུགས་རིག་གནས་དང་སྐད་ཡིག་རིག་གནས། ཡུལ་སྲོལ་རིག་གནས་དག་གི་རིན་ཐང་ཤེས་དགོས་པ་མ་ཡིན་ནམ། རིག་གནས་གང་དང་གང་གིས་བསྐྱེད་པའི་ལོངས་སྤྱོད་གང་དང་གང་གི་དྲིན་ཀྱང་ཤེས་དགོས་པ་མ་ཡིན་ནམ། །