མི་ཚེའི་འཕོ་འགྱུར།

དུས་རབས་གོང་མའི་ལོ་རབས་བརྒྱད་ཅུ་བའི་སྐབས་སུ་སྤྱིར་རྒྱལ་ཡོངས་ཀྱི་སྤྱི་ཚོགས་སོ་སོར་འཚོ་བའི་དཀའ་ངལ་ཆེན་པོར་འཕྲད་ཡོད་ལ། དེ་ལས་ཀྱང་མཐོ་སྒང་གི་ཞིང་འབྲོག་མི་སེར་ནི་ཤིན་ཏུ་དབུལ་ཕོངས་ཀྱི་འཚོ་བ་ཞིག་ལ་རོལ་བཞིན་ཡོད་པ་ད་ལྟ་ཕྱིར་འདང་བརྒྱབ་པ་ཙམ་གྱིས་ཀྱང་གསལ་པོར་རྟོགས་ཐུབ།

ངེད་ཚང་ཡང་སྐབས་དེའི་ཁྱིམ་ཚང་ཕལ་མོ་ཆེ་དང་འདྲ་བར་བཟའ་མི་མང་བའི་ཁར་ཐོན་སྐྱེད་དང་ཡོང་སྒོ་ཉུང་བའི་ཁྱིམ་ཚང་ཕལ་པ་ཞིག་ཡིན། འོན་ཀྱང་། ང་རང་ནི་ལས་དང་སྨོན་ལམ་བཟང་པོ་ཞིག་གིས་ཆུང་དུས་ནས་ཀ་ཁ་གཙོ་བོར་གྱུར་པའི་འབྲི་ཀློག་གི་རྒྱུན་མ་ཆད་པར་སློབ་གྲྭ་ཆུང་འབྲིང་ཆེ་གསུམ་རིམ་གྱིས་འགྲིམས་པའི་སྐལ་བཟང་ཚེས། དེ་ཡང་དྲིན་ཆེན་ཕ་མ་ཟུང་གིས་དཀའ་སྤྱད་སྡུག་རུས་ཀྱིས་བསགས་པའི་སྒོར་རྡོག་འགའ་ནི་ང་ཚོ་མིང་སྲིང་རྣམས་ཀྱི་སློབ་རིན་དུ་སྤྲད་ཡོད་པ་ངའི་ཡ་ཆུང་སེམས་སུ་ནམ་ཡང་ཉར་ཡོད། 

འོ་རེད། སྐབས་དེར་ང་ལ་རང་གྲོལ་ཞེས་པའི་སློབ་གྲོགས་ཤིག་ཡོད། སློབ་གྲོགས་ཁོང་ནི་ང་དང་མི་འདྲ་བར་རྒྱུ་འབྱོར་གྱི་འཁོས་ཀ་བཟང་བའི་ཁྱིམ་ཚང་ཞིག་གི་བྱིས་པ་ཡིན་ལ། ནམ་རྒྱུན་ང་ཚོ་སློབ་གྲོགས་བྱིངས་དང་མི་འདྲ་བར་ཞིམ་ཟས་ཀྱི་རིགས་འདྲ་མིན་ཉོས་ནས་སློབ་གྲྭའི་ནང་དུ་ཁྱེར་ཡོང་ལ། སེམས་ཁམས་སྐྱིད་དུས་ང་དང་ང་འདྲ་བའི་སློབ་གྲོགས་རྣམས་ལ་ཅུང་ཙམ་རེ་སྦྱིན་སྲིད་ལ། ཁྱད་པར་དུ་ང་ལ་དམིགས་བསལ་གྱིས་མང་ཙམ་སྤྲོད་ངེས། ངས་ནི་ཁྱིམ་ཚང་ཧྲིལ་པོའི་རྔུལ་ཆུའི་ཐིགས་པ་དང་བརྗེས་པའི་སྒོར་རྡོག་ཉུང་ཉུང་དེ་སློབ་རིན་དང་ཟས་རིན་ལ་སྤྲད་ནས་ཚར་འགྲོ་བས། ནམ་རྒྱུན་སློབ་གྲོགས་རང་གྲོལ་ལ་འཛུམ་ཆུང་སྟོན་བཞིན་འགྲོ་དགོས།

སྐབས་དེར་ང་ལ་གོམས་གཤིས་ཤིག་ཡོད་པ་ནི། ཉིན་བཞིན་ཞོགས་པའི་ཆུ་ཚོད་བརྒྱད་པ་ཙམ་ལ་ཁྱིམ་ནས་བུད་དེ་སློབ་གྲོགས་རང་གྲོལ་ཚང་གི་སྒོ་ཁར་ཕྱིན་ཏེ་ཁོ་ལ་ངོ་འཛུམ་པ་དང་ངག་འཇམ་པོའི་སྒོ་ནས་བསུ་མ་བྱེད་བཞིན་ཉིན་གཅིག་གི་སློབ་སྦྱོང་གི་མགོ་རྩོམ་པར་འགྲོ་བ་རེད། ངས་ལམ་བར་ནས་ཆེས་རེ་སྒུག་བྱེད་ས་ནི་སློབ་གྲོགས་རང་གྲོལ་གྱི་རྒྱབ་ཁུག་ནས་དམ་འབི་དང་ཟོག་འོ་ལས་བཟོས་པའི་བུ་རམ་མདོག་སྔོ་སྐྱ་ཅན་ཕུད་ཡོང་བ་དེ་ཡིན་ལ། སྐབས་སྐབས་སུ་ཀུ་ཤུ་དང་ཉི་འབྲུ་སོགས་ཀྱང་འཁུར་ཡོང་ངེས།  མདོར་ན། ངས་ནམ་རྒྱུན་ཁོ་རང་ངའི་སློབ་གྲོགས་དང་ཁྱིམ་མཚེས་ཡིན་པ་དེ་དཀོན་མཆོག་གིས་ང་ལ་ཐུགས་རྗེས་གནང་བ་རེད་བསམ་ནས་དགའ་བ་སྒོམ་བཞིན་ཡོད།

སློབ་གྲོགས་རང་གྲོལ་གྱི་ཨ་ཕ་ནི་སྲིད་གཞུང་གི་ལས་བྱེད་པ་དང་། ཨ་མ་ནི་སློབ་གྲྭའི་དགེ་རྒན་ཡིན་པས། ང་ཚོའི་གྲོང་པ་ནང་གི་ཆེས་ཡིད་སྨོན་བྱེད་སའི་ཁྱིམ་ཚང་ཕྱུག་པོ་ཞིག་ཡིན། ཉིན་ཞིག་སློབ་གྲོགས་རང་གྲོལ་ཚང་གི་སྒོ་ཁ་ནས་ཅི་ཡིན་མི་ཤེས་པའི་སྐད་སྒྲ་ཆེན་པོ་ཞིག་གྲགས་སོང་། ང་རང་ཡ་མཚན་སྐྱེས་ནས་དེའི་ཕྱོགས་ལ་ལྟ་དུས། དེ་ན་སྔོན་ཆད་གཏན་ནས་མཐོང་མ་མྱོང་པའི་དངོས་པོ་སྒྲ་ཆེན་པོ་ཞིག་འདུག་ལ། ཁོས་ངོ་སྤྲོད་བྱས་པ་ལྟར་ན་དེ་ནི་རྟ་དང་འདྲ་བར་བཞོན་ནས་འགྲོ་ཆོག་པ། མིང་ལ་མོའོ་ཐོའམ་དེང་གི་འཕྲུལ་རྟ་ཟེར་བ་དེ་ཡིན་པ་ཐེངས་དང་པོར་ཤེས་པ་ཡིན། གསེར་མདོག་གི་མོའོ་ཐོ་གཅིག་བཞི་ལྔ་རྟགས་ཅན་འདི་སྡེ་དགེ་རྫོང་ཧྲིལ་པོར་གཉིས་མ་གཏོགས་མེད་པའི་ལོ་རྒྱུས་དང་རྒྱུ་མཚན་ཁོའི་ཨ་ཕས་དེར་འདུས་པའི་སྡེ་མི་རྣམས་ལ་གསལ་པོར་བཤད་པས། ཉིན་དེ་དག་གི་རིང་ལ་སྡེ་པའི་ནང་གི་གསར་འགྱུར་ཚ་ཤོས་ནི་སློབ་གྲོགས་རང་གྲོལ་ཚང་གི་འཕྲུལ་རྟ་དེ་ཡིན་སོང་།

ང་རང་སྔར་བཞིན་ཁོ་ལ་བསུ་མ་བྱེད་པར་འགྲོ་དགོས་ཤིང་། ཁོས་ཀྱང་ང་ལ་བུ་རམ་དང་ཀུ་ཤུ་སོགས་བྱིན་ནས་ཉི་མ་རེ་རེ་བཞིན་ཕར་འདས་ཏེ་སློབ་ཆུང་གི་མི་ལོ་ཧྲིལ་པོ་དྲུག་ལ་རྫོགས་ཚིག་བཀོད།

སློབ་འབྲིང་ནི་རང་ཡུལ་དང་ཁ་བྲལ་ནས་ཕྱོགས་སོ་སོ་ལ་འགྲོ་དགོས་པ་སྨོས་ཅི་དགོས། སྐབས་དེའི་ང་ལ་མཚོན་ན། སློབ་གྲོགས་རང་གྲོལ་དང་ཁ་བྲལ་ནས་འགྲོ་དགོས་པ་དེ་ནི་ཕ་མ་མིང་སྲིང་དང་ཁ་བྲལ་བ་ལས་ཀྱང་སེམས་ཕམ་སྐྱེས་པོ་འདུག་ལ། དུས་དེ་ནས་བཟུང་སྙིང་ཉེ་བའི་ཁོ་ལ་བསུ་མ་དང་ཞབས་ཞུ་བྱ་རྒྱུའི་གོ་སྐབས་གང་ན་ཡོད་དེ་གཞར་ཡང་ཡོད་མི་སྲིད་པས། ངས་ཀྱང་བུ་རམ་སྔོ་སྐྱ་དང་ཀུ་ཤུ། ཉི་འབྲུ་དང་ཁོའི་འཕྲུལ་རྟ་གསེར་མདོག་ཅན་སོགས་བདེ་མོ་མི་འཇོག་ག་མེད་བྱུང་། སྐབས་དེར་ང་ཚོས་མིག་མཐའ་ལ་མཆི་མས་བཀང་ནས་རང་རང་གི་ལམ་ལ་ཆས་ཡོད། 

སློབ་འབྲིང་གི་འཚོ་བ་ནི་བྲེལ་འཚུབ་ཀྱིས་ཁེངས་པ་ཞིག་རེད་ཅེས་ངས་སློབ་གྲོགས་རང་གྲོལ་ལ་ཡང་ཡང་ཞུས་མྱངས། དུས་ཚོད་ཀྱི་འགྲོས་དང་བསྟུན་ནས་སློབ་གྲོགས་རང་གྲོལ་དང་ཁོའི་རྒྱབ་ཁུག་ནང་གི་མངར་ཟས་སོགས་སྐབས་ཤིག་ལ་བརྗེད་སོང་མོད། ལོ་ངོ་གཉིས་ཙམ་གྱི་རྗེས་ཀྱི་དགོང་མོ་ཞིག་ལ་སློབ་གྲོགས་རང་གྲོལ་ཚང་ནས་སྔར་བཞིན་སྐད་སྒྲ་ཆེན་པོ་ཞིག་གྲག་བྱུང་། དེ་ནི་སྔོན་དང་མི་འདྲ་བའི་སྐྱོ་བའི་ངུ་སྐད་ཆེན་པོ་ཞིག་སྟེ་ཟང་ཟིང་ལང་ལོང་བྱེད་བཞིན་འདུག །དེ་ནི་ཁོའི་ཨ་ཕར་འཁོར་བགེགས་བྱུང་ནས་ཚེ་ལས་འདས་སོང་བ་ཡིན་འདུག །ལོ་གཅིག་ཙམ་གྱི་རྗེས་སུ་ཁོའི་ཨ་མའང་སེམས་སྡུག་གིས་མནར་ནས་དབང་པོ་སྐྱོན་ཅན་དུ་གྱུར་སོང་། སྐབས་དེ་དུས་སློབ་གྲོགས་རང་གྲོལ་ནི་ཕལ་ཆེར་རང་ལོ་བཅོ་ལྔ་ཙམ་ལ་ཐོན་ཡོད།

དེ་ནས་མི་ལོ་འགའ་ཞིག་ཕྱིན་རྗེས། ཁོ་ནི་མུ་མཐུད་དུ་སློབ་གྲྭར་འགྲིམས་མ་ཐུབ་པ་དང་། ཁོ་ཚང་གི་འཚོ་བའང་དཀའ་ངལ་ཆེན་པོར་ཕྲད་ཡོད་པ་ཧ་གོ་སོང། སྤྱིར་འཇིག་རྟེན་གྱི་ཆོས་ཐམས་ཅད་རྟག་བརྟན་འགྱུར་མེད་ཅིག་མིན་པ་བཤད་མ་དགོས་ཏེ། སློབ་གྲོགས་རང་གྲོལ་གྱི་མི་ཚེ་དང་ཁོའི་ཁྱིམ་ཚང་གི་འཕོ་འགྱུར་ནི་སྡེ་མི་ཡོངས་ཀྱི་བསམ་ཡུལ་ལས་འདས་པ་ཞིག་ཏུ་གྱུར་སོང་།

དེ་རིང་ནི་ཕ་ཡུལ་གྱི་དབྱར་གཞུང་གི་རྟ་རྒྱུག་དང་གར་རྩེད་ལ་ཁེལ་ཡོད། ང་ནི་ལོ་ངོ་མང་པོར་ཕ་ཡུལ་དང་ཁ་བྲལ་ནས་འཁྱམ་ཉུལ་དུ་ལུས་མོད། སླར་ཡང་སློབ་གྲོགས་རང་གྲོལ་དང་ཐེངས་གཅིག་འཕྲད་པ་ཅི་འདྲའི་དགའ་འོས་པ་ཞིག་རེད་ཨང་། ཁ་སང་གི་འཕོ་འགྱུར་ལ་མགོ་མ་བསྒུར་ནས་དེ་རིང་གི་མཚར་སྡུག་ལོངས་སུ་སྤྱོད་པའི་སློབ་གྲོགས་རང་གྲོལ་ལགས། ཁྱེད་ཀྱིས་དཀའ་སྡུག་གི་རི་བོ་རྒྱབ་ལ་གཡུག་ནས་བདེ་སྐྱིད་ཀྱི་དྲོད་ཐིགས་ལ་འབད་བརྩོན་གྱི་རྔུལ་ཆུ་ཕུད་པ་ནི་ཅི་འདྲའི་གཟི་བརྗིད་ཆེ་བ་ལ་ཨང་།

དེ་རིང་སླར་ཡང་ངའི་སློབ་གྲོགས་རང་གྲོལ་ནི་སྡེ་མི་ཡོངས་ཀྱི་བསམ་ཡུལ་ལས་འདས་པའི་རླབས་ཆེན་གྱི་མི་སྣ་ཞིག་ཏུ་གྱུར་ཡོད་ཅེས་ཕ་ཡུལ་ལ་སྐྱོད་པའི་ལམ་བར་ནས་ཡང་ཡང་གོ་སོང་། །