ལུགས་རྙིང་གི་ཟླ་གསུམ་པའི་ཚེས་གསུམ་ནི་ཀྲུང་གོའི་མི་རིགས་མང་པོའི་སྲོལ་རྒྱུན་དུས་ཆེན་ཡིན་ལ། 2014ལོའི་ཟླ་དང་པོར། ཀོང་ཞི་ཡིས་ཀྲོང་རིགས་ཀྱི་གསུམ་པའི་ཚེས་གསུམ་དེ་ས་གནས་རང་བཞིན་གྱི་ཁྲིམས་བཀོད་དུས་ཆེན་དུ་གཏན་འཁེལ་བྱས། ཀོང་ཞི་ཀྲོང་རིགས་རང་སྐྱོང་ལྗོངས་མི་དམངས་སྲིད་གཞུང་གཞུང་ལས་ཐིང་གིས་ཁྱབ་བསྒྲགས་བྱས་པའི་གུང་གསེང་བརྡ་ཐོ་ལྟར་ན། 2024ལོའི་ཀྲོང་རིགས་ཀྱི་གསུམ་པའི་ཚེས་གསུམ་ལ་སྤྱི་ཟླ་4པའི་ཚེས་11ཉིན་ནས་ཚེས་12ཉིན་བར་གུང་གསེང་གཏང་རྒྱུ་དང་། གཟའ་མཇུག་དང་བསྟུད་མར་ངལ་གསོ་བྱས་ཏེ་ཁྱོན་བསྡོམས་ཉིན་4ཡོད། ཤེས་རྟོགས་བྱུང་བར་གཞིགས་ན། ཀོང་ཞི་ཀྲོང་རིགས་རང་སྐྱོང་ལྗོངས་རིག་གནས་ཡུལ་སྐོར་ཐིང་གིས་སྤྱི་ཟླ་4པའི་ཚེས་1ནས་ཚེས་30ཉིན་བར་ཀོང་ཞི་རུ་ཡུལ་སྐོར་དུ་ཡོང་བར་ཚོགས་སྒྲིག་བྱེད་པའི་ཡུལ་སྐོར་ལས་དོན་ཁང་ལ་ཁ་གསབ་རོགས་དངུལ་སྤྲད་པ་རེད། ཀོང་ཞིའི་མཛེས་ལྗོངས་ཁུལ་མང་པོ་ཞིག་གིས་རྒྱལ་ཡོངས་ཀྱི་ཡུལ་སྐོར་པར་སྒོ་འཛིན་གཟིགས་སྐྱོང་བྱས་པ་དང་མགྲོན་ཁང་ཁག་གཅིག་གིས་ཁང་གླ་གོང་བཅག་གི་གཟིགས་སྐྱོང་སོགས་ཀྱི་བྱ་ཐབས་བཏོན་ཡོད།
གསུམ་པའི་ཚེས་གསུམ་གྱི་གུང་གསེང་རིང་།
ཀོང་ཞིའི་ས་གནས་ཁག་གིས་རྣམ་པ་སྣ་ཚོགས་ཀྱི་རིག་གནས་བྱེད་སྒོ་སྤེལ་ནས་གསུམ་པའི་ཚེས་གསུམ་གྱི་སྲོལ་རྒྱུན་དུས་ཆེན་ལ་རྟེན་འབྲེལ་ཞུས། གཙག་དྲུབ་ལྒང་ལི་འཕེན་པ། ཇ་དྲི་ཞིམ་འཐུལ་བ། ཟངས་རྔ་རྡུང་བ། ལ་གླུ་ལེན་པ་སོགས་མི་རིགས་རིག་གནས་ཀྱི་སྟོན་མོ་གཟབ་རྒྱས་དང་མི་རིགས་ཁག་གི་ཁྱད་ལྡན་ཟས་མཆོག་ལོངས་སུ་སྤྱོད་པ་དང་། པ་ཀུའེ་ས་གཞི་ཆེན་མོར་གླུ་གར་དང་དགའ་སྤྲོས་ཁེངས་ཤིང་། ཞིམ་མངར་ཟས་མཆོག་གི་དྲི་ཞིམ་འཐུལ།
“ཀོང་ཞིའི་གསུམ་པའི་ཚེས་གསུམ། པ་ཀུའེ་ཡི་ཅ་ལང་ཚོ”ཞེས་པའི་རིག་གནས་ཡུལ་སྐོར་ཚོང་རྟགས་བྱེད་སྒོའི་ཚོགས་ར་གཙོ་བོར་ཀྲོང་རིགས་ཀྱི་སྨྱུག་དབྱུག་ཞབས་བྲོ་དང་། ཡའོ་རིགས་ཀྱི་རྔ་རིང་ཞབས་བྲོ། ཏུང་ལན་གྱི་ཟངས་རྔའི་ཞབས་བྲོ་སོགས་ཀོང་ཞིའི་སྲོལ་རྒྱུན་རིག་གནས་འགྲེམས་སྟོན་བྱས་པར་མ་ཟད། ཉིང་ཞ་དང་ཤིན་ཅང་། ནང་སོག །བོད་ལྗོངས། ཀྲེ་ཅང་། ཧྲན་ཞི་སོགས་ཞིང་ཆེན་གཞན་དག་གི་མཚོན་བྱེད་རང་བཞིན་གྱི་དངོས་མིན་རིག་གནས་ཤུལ་བཞག་རྣམ་གྲངས་གདན་དྲངས་ནས་ད་ཐེངས་ཀྱི་སྤྲོ་ཚོགས་སུ་ཞུགས།
ལོ་མང་རིང་གསོག་འཇོག་དང་སྙིགས་འབྱེད་བྱས་པ་བརྒྱུད། ཀྲོང་རིགས་ཀྱི་གསུམ་པའི་ཚེས་གསུམ་དེ་ཀོང་ཞིའི་ས་གནས་རིག་གནས་ཀྱི་མཚོན་རྟགས་ཤིག་དང་། ཕུལ་བྱུང་གི་སྲོལ་རྒྱུན་རིག་གནས་དང་མི་རིགས་ཁྱད་ལྡན་རིག་གནས་ཐོན་ཁུངས་འགྲེམས་སྟོན་གྱི་སྒེའུ་ཁུང་ཞིག་ཏུ་གྱུར་བ་དང་། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོ་འཛུགས་པ་དང་མི་རིགས་མཐུན་སྒྲིལ་ཁྱིམ་ཚང་གཅིག་ལྟར་བརྩེ་བའི་རྣམ་པ་ཟབ་མོ་གཏོད་པའི་སྟེགས་བུ་ཞིག་ཏུ་གྱུར་ནས། ཀྲུང་ཧྭའི་རིག་གནས་ཀྱི་གོང་བུ་འགྲིལ་ཤུགས་དང་ཤུགས་རྐྱེན་ཐེབས་ཤུགས་ཆེ་རུ་གཏང་རྒྱུར་ཕན་ནུས་ལྡན་པ་རེད། །