ངོ་མཚར་འདན་མའི་རིག་གནས་ཀྱི་རྒྱུན་འཛིན་དང་གསར་གཏོད།

སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས། ཀྲུང་ཧྭའི་ཤེས་རིག་ནི་ཐུན་མིན་མཉམ་གནས་ཀྱི་མི་རིགས་མང་བའི་རིག་གནས་ཀྱི་ས་རྒྱུ་གཤིན་པོར་རྩ་བ་ཚུགས་པ་དང་། ལོ་རྒྱུས་ཡུན་རིང་ལྡན་པས། འཛམ་གླིང་ཐོག་བར་མཚམས་ཆད་མྱོང་མེད་པ་དང་ད་བར་འཕེལ་རྒྱས་ཕྱིན་པའི་ཤེས་རིག་ཅིག་ཡིན། གྲངས་ཉུང་མི་རིགས་ཀྱི་རིག་གནས་འཛིན་སྐྱོང་སྤེལ་གསུམ་ལ་མཐོང་ཆེན་བྱས་ཏེ། 《 གེ་སར།》སོགས་དངོས་མིན་རིག་གནས་ཤུལ་བཞག་ལ་རྒྱབ་སྐྱོར་དང་རོགས་སྐྱོར་བྱས་ནས། རྒྱུན་འཛིན་པ་གསོ་སྐྱོང་ཡག་པོ་བྱས་ཏེ་མི་རབས་ནས་མི་རབས་བར་རྒྱུན་འཛིན་བྱེད་དགོས་ཞེས་གསུངས། འདིས་རླབས་ཆེ་བའི་ཀྲུང་ཧྭའི་ཤེས་རིག་གི་ཡིད་ཆེས་ཚད་མེད་དང་མི་རིགས་རིག་གནས་ལ་ཚད་མཐོའི་མཐོང་ཆེན་བྱེད་པ་མཚོན་ཡོད། སེར་ཤུལ་རྫོང་གི་ལོ་ངོ་སྟོང་རིང་བརྒྱུད་པའི་ནམ་མཁའི་སྐར་ཚོགས་ནང་བཞིན་ངོ་མཚར་བའི་མི་རིགས་རིག་གནས་ལ་ལོ་རྒྱུས་ཡུན་རིང་ལྡན། དེའི་ནང་ནས་འདན་མའི་རིག་གནས་ནི་མཐོ་སྒང་གི་རིག་གནས་དང་མི་རིགས་རིག་གནས་ཀྱི་ཕུལ་བྱུང་ཚབ་མཚོན་དུ་གྱུར་ཡོད། དུས་རབས་གསར་པར་འདན་མའི་རིག་གནས་གསར་གཏོད་དང་རྒྱུན་འཛིན་བྱ་རྒྱུ་ནི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་གྱི་དགོངས་དོན་སློབ་སྦྱོང་དང་ལག་བསྟར་བྱེད་པའི་ཞིབ་ཕྲའི་མཚོན་ཚུལ་ཞིག་རེད།

དང་པོ། བཀའ་གསུང་ཡིད་ལ་བཅངས།  འགན་འཁྲི་ཕྲག་ཏུ་ལེན།

རིག་གནས་ཀྱི་གདེང་ཚོད་ལ་བརྟེན་ནས། གངས་ལྗོངས་ཀྱི་རྣམ་པ་གསར་པ་གཏོད། ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་ནི་ཀྲུང་ཧྭའི་ཤེས་རིག་གི་བློ་གྲོས་ཀྱི་ཉིང་བཅུད་དང་རྩ་བ་ཚུགས་ས་ཡིན་པ་དང་། ཀྲུང་ཧྭ་མི་རིགས་ཀྱི་རྩ་བ་དང་བླ་སྲོག་ཡིན་ལ། འཛམ་གླིང་གི་རིག་གནས་འཕེལ་འགྱུར་ཁྲོད་བརྟན་པོར་གནས་ཐུབ་པའི་རྨང་གཞི་ཡིན་ཞེས་ནན་གསུངས་གནང་ཡོད། བོད་ཀྱི་རིག་གནས་ནི་ཀྲུང་ཧྭའི་རིག་གནས་ཀྱི་གྲུབ་ཆ་གལ་ཆེན་ཞིག་ཡིན་པས། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས། བོད་ཀྱི་རིག་གནས་ལ་དུས་རབས་དང་གསར་གཏོད་བྱེད་པར་ཐུགས་རེ་ཆེན་པོ་བཅངས་ཡོད། ཐེངས་དྲུག་ལ་《གེ་སར།》རྒྱུན་འཛིན་དང་སྲུང་སྐྱོང་གི་གནད་དོན་སྐོར་གླེང་བ་དེས་ཀྱང་བོད་ཀྱི་ཁྱད་ཆོས་ལྡན་པའི་འདན་མའི་རིག་གནས་ལ་འཕེལ་རྒྱས་ཀྱི་བླང་བྱ་གསར་པ་བཏོན་ཡོད།

དཀར་མཛེས་ཁུལ་ཨུའི་ཧྲུའུ་ཅི་ཧྲེན་དབྱང་སེར་ཤུལ་རྫོང་གི་དམག་སྡེ་བཅོ་བརྒྱད་པའི་བཤམས་སྟོན་ཁང་སྒོ་འབྱེད་མཛད་སྒོའི་ནང་ཞུགས་བཞིན་པ།

འདན་མའི་རིག་གནས་ནི་སྔོག་འདོན་བྱེད་ལ་རེ་བའི་གཏེར་ཁ་ཞིག་དང་འདྲ་བར་ཁྲོན་ནུབ་ཀྱི་ས་གཞི་ཆེན་པོའི་སྟེང་ན་ཁྱབ་ཡོད། སེར་ཤུལ་ནི་འདན་མའི་ཕ་ཡུལ་རེད། 《 ཀྲུང་གོའི་ལོ་རྒྱུས་ས་ཁྲ་གཅེས་བསྡུས།》ཞེས་པའི་དེབ་དེའི་ནང་དུ། སྤྱི་ལོ་༢༦༢ལོར་འདན་མ་ཞེས་པའི་ཐ་སྙད་ལོ་རྒྱུས་ཤོག་དཀར་ངོས་སུ་བཀོད་ཡོད། ལོ་དང་ཟླ་བའི་འཁོར་འགྲོས་བར་ནས་ལོ་རྒྱུས་གཏིང་ཇེ་ཟབ་དང་རྒྱུན་ཇེ་རིང་སོང་ཡོད། སེར་ཤུལ་རྫོང་དུ་ཡིག་བཀོད་ལོ་རྒྱུས་མ་བྱུང་གོང་གི་ལྐོག་གྱུར་གྱི་བྲག་རིས་ཡོད་ལ། བསྐལ་པ་ཡ་ཐོག་གི་བྲག་བརྐོས། གླིང་གེ་སར་རྒྱལ་པོའི་དཔའ་རྟུལ་སུམ་ཅུའི་ཡ་གྱལ་ནང་བློན་ཚ་ཞང་འདན་མ་བྱང་ཁྲའི་ལོ་རྒྱུས་ཀྱི་ངག་རྒྱུན་ཡོད་ལ། བསྟན་པ་ཕྱི་དར་སྐབས་ཀྱི་བསྟན་པའི་མེ་རོ་གསོ་སའང་ཡིན། དེས་མ་ཚད་པར། སེར་ཤུལ་རྫོང་ནི་གསར་བརྗེའི་ལོ་རྒྱུས་ཀྱིས་ཕྱུག་པའི་གནས་མཆོག་ཅིག་ཡིན་ལ། ༡༩༥༠ལོར། ཀྲུང་གོ་མི་དམངས་བཅིངས་འགྲོལ་དམག་གི་དམག་སྡེ་བཅོ་བརྒྱད་པས་འབྲི་ཆུ་བརྒལ་ཏེ། སེར་ཤུལ་ནས་བོད་བཅིངས་འགྲོལ་གཏོང་བའི་མེ་མདའ་དང་པོ་འཕངས།

དཀར་མཛེས་ཁུལ་ཨུའི་ཧྲུའུ་ཅི་གཞོན་པ། ཁུལ་དཔོན་ཧྥུང་ཧྥ་ཀུའེ་སེར་ཤུལ་རྫོང་དུ་ཕེབས་ནས་གཞི་རིམ་དུ་རྟོག་ཞིབ་གནང་བཞིན་པ།

ལོ་རྒྱུས་རིག་གནས་ཀྱིས་ཕྱུག་ཅིང་གསར་བརྗེ་རིག་གནས་ཀྱི་གཟི་བྱིན་འབར་བའི་སེར་ཤུལ་རྫོང་གིས་དུས་རབས་ཀྱི་འགན་འཁྲི་གསར་པ་ཕྲག་ཏུ་བླངས་ཡོད། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་རྒྱུན་འཛིན་དང་འཕེལ་རྒྱས་གཏང་རྒྱུའི་སྐོར་གྱི་མཛུབ་སྟོན་དགོངས་དོན་ལག་བསྟར་ནན་མོ་བྱ་ཆེད། ཀྲུང་གུང་སེར་ཤུལ་རྫོང་ཨུ་དང་སེར་ཤུལ་རྫོང་མི་དམངས་སྲིད་གཞུང་། སི་ཁྲོན་ཉིན་རེའི་ཚགས་པར་ལས་རིགས་ཚོགས་པའི་སི་ཁྲོན་ཏང་གི་འཛུགས་སྐྲུན་དུས་དེབ་ཁང་གིས་ནུས་ཤུགས་ཡོད་རྒུས་མཉམ་ལས་བྱས་ཏེ། འདན་མའི་རིག་གནས་ཐོན་ཁུངས་ཕྱོགས་ཡོངས་ནས་གསེད་བཀྲོལ་དང་སྔོག་འདོན་བྱས་ནས། དུས་རབས་གསར་པའི་འདན་མའི་རིག་གནས་དེ་སེར་ཤུལ་རྫོང་གི་རྣམ་པ་གསར་པ་མཚོན་པའི་སྤུས་རྟགས་མིང་བྱང་དུ་བསྒྱུར་ཡོད། དཀའ་སྡུག་ཁྲི་སྟོང་མང་པོ་མྱངས་རུང་། བྱེ་མ་གསེར་ཚགས་བྱས་ཏེ་འབྲས་བུ་མི་དམན་པ་བླངས་ཡོད། 《 གནས་མཆོག་འདན་མའི་རིག་གནས།》བཏོད་པ་དེ་ཡིས་སེར་ཤུལ་མི་དམངས་ཀྱིས་ཀྲུང་ཧྭའི་སྲོལ་རྒྱུན་རིག་གནས་རྒྱུན་འཛིན་དང་རིག་གནས་གསར་གཏོད་ཀྱི་ལྷུར་ལེན་འདུན་པ་དྲག་པོ་མཚོན་ཡོད།

སེར་ཤུལ་རྫོང་ཨུའི་ཧྲུའུ་ཅི་ཁྲེན་ཀྲི་ཡུང་གིས་གཞི་རིམ་དུ་རྟོག་ཞིབ་གནང་བཞིན་པ།

སེར་ཤུལ་རྫོང་ཨུའི་ཧྲུའུ་ཅི་གཞོན་པ། རྫོང་དཔོན་ལིའུ་ཙེ་ཡིས་སེར་ཤུལ་རྫོང་གི་སྐྱེ་དངོས་ཁོར་ཡུག་སྐོར་རྟོག་ཞིབ་གནང་བཞིན་པ།

གཉིས་པ། འཆམ་མཐུན་གྱི་རིག་གནས།  འབུར་ཐོན་གྱི་བརྩམས་ཆོས།

ལོ་ངོ་སྟོང་གི་བསྲེག་བཅད་བརྡར་གསུམ་ལས། དུས་དང་བསྐལ་བའི་གདངས་དབྱངས་སྙན་མོ་གྱེར།

རྫ་ཆུ་ཁའི་དབྱར་གྱི་དུས་སྟོན། 

ཀྲུང་ཧྭའི་སྲོལ་རྒྱུན་རིག་གནས་ཀྱི་གྲུབ་ཆ་གལ་ཆེན་དུ་གྱུར་བའི་འདན་མའི་རིག་གནས་ཁྲོད། ཀྲུང་ཧྭ་མི་རིགས་ཀྱི་གཏིང་ཟབ་པའི་བསམ་པའི་དོན་གཉེར་འདུས་ཡོད་ལ། སེར་ཤུལ་མི་དམངས་ཀྱི་ཐུན་མོང་མ་ཡིན་པའི་བསམ་པའི་རིག་གནས་མངོན་ཡོད། མི་རབས་ནས་མི་རབས་བར་རྒྱུད་འཛིན་དར་སྤེལ་དང་རྙིང་འབུད་གསར་འདོན་བྱས་ཤིང་། ཕྱོགས་མང་པོའི་དཀའ་སྤྱད་འབད་བརྩོན་འོག 《 གནས་མཆོག་འདན་མའི་རིག་གནས།》 ཞེས་པའི་ཆེད་དེབ་འདི་དཀའ་བ་བརྒྱ་ཕྲག་དང་ཉམས་སད་གང་མང་བརྒྱུད། གཞི་ནས་ལེགས་པར་གྲུབ་སྟེ། ཁྱོན་ཡོངས་ནས་འདན་མའི་རིག་གནས་མཚམས་སྦྱོར་གྱི་བརྩམས་ཆོས་འཐུས་སྒོ་ཚང་བ་ཞིག་ཏུ་གྱུར་ཡོད། འདི་པར་དུ་བསྐྲུན་པ་དེ་སེར་ཤུལ་མ་ཟད་ཁྲོན་ནུབ་རིག་གནས་ཀྱི་འཕེལ་རྒྱས་ལོ་རྒྱུས་ལ་ལམ་ཚད་རྡོ་རིང་ལྟ་བུའི་དོན་སྙིང་ལྡན།

《 གནས་མཆོག་འདན་མའི་རིག་གནས།》ཞེས་པ་འདི་ནི་འདན་མའི་རིག་གནས་དང་འབྲེལ་བའི་ཤེས་བྱ་ཀུན་བཏུས་ཀྱི་དེབ་ཅིག་ཡིན་ལ། དུས་དེབ་འདིའི་ནང་དོན་སྔོག་འདོན་གཏིང་ཟབ་ཅིང་ཁྱོན་ཡོངས་ནས་རིག་གནས་གསེད་བཀྲོལ་བྱས་པ་དང་། འདན་མའི་རིག་གནས་ཀྱི་ཉིང་བཅུད་དང་དེང་རབས་ལག་ལེན་ཕྱོགས་ཡོངས་ནས་མངོན་པར་བརྒྱུད། ཀློག་པ་པོར་ལོ་རྒྱུས་དང་མིག་སྔའི་རིག་གནས་སྐོར་གྱི་འགྲུལ་བཞུད་ཅིག་ཉམས་སུ་མྱོང་དུ་འཇུག་གང་ཐུབ་བྱས་ཡོད། ཆེད་དེབ་ཀྱི་ནང་དོན་ཁྱབ་རྒྱ་ཆེ་བ་དང་ལོ་ཟླའི་འཕེལ་འགྱུར་མཚོན་པའི་ལོ་རྒྱུས་རྗེས་ཤུལ་ཀྱང་འདུས་ཡོད་ལ། དཔེར་ན། འདན་མའི་བྲག་བརྐོས་དང་སྒྲོལ་མ་ལྷ་ཁང་གི་རྗེས་ཤུལ། གླིང་རྗེ་གེ་སར་རྒྱལ་པོའི་བློན་ཆེན་འདན་མའི་རྗེས་ཤུལ་བཅས་འདུས་ཡོད། དུས་མཚུངས་སུ་ཁྱབ་རྒྱ་ཕུན་སུམ་ཚོགས་པ་དང་རིག་གནས་ཀྱི་རྒྱུན་རིང་པོ་བཀོད་ཡོད་པ་དང་། འདན་མའི་དུས་སྐབས་ཁག་གི་ལོ་རྒྱུས་མི་སྣ་གྲགས་ཅན་དང་། ཆོས་ལུགས་དམངས་སྲོལ། རི་ཆུའི་རིག་གནས་བཅས་ཀྱང་བཀོད་ཡོད་པར་མ་ཟད། གསར་བརྗེའི་ལོ་རྒྱུས་བརྒྱུད་རིམ་དང་དེང་རབས་རིག་གནས་ཡུལ་སྐོར་ལག་ལེན་གྱི་དུས་རབས་མཚོན་ཚུལ་དེ་བས་ཀྱང་འདུས་ཡོད། དེ་བས། 《 གནས་མཆོག་འདན་མའི་རིག་གནས།》ཞེས་པ་འདི་རྒྱལ་ནང་གི་འདན་མའི་རིག་གནས་སྐོར་གྱི་ཤེས་བྱ་ཀུན་བཏུས་རེད་ཅེས་བཤད་ཆོག་ཆོག་ཡིན།

སེར་ཤུལ་རྫོང་མཁར་གྱི་རྣམ་པ་གསར་པ། 

《 གནས་མཆོག་འདན་མའི་རིག་གནས།》ཞེས་པའི་དེབ་འདི་སེར་ཤུལ་གྱི་སྙིང་སྟོབས་སྐོར་གྱི་ཟིན་ཐོ་ཞིག་ཡིན་པ་དང་དུས་རབས་ཀྱི་སྙིང་སྟོབས་ནི་དེབ་འདིའི་སྲོག་རྩ་ཡིན། ལོ་ཟླ་རིང་མོར་བསྲེག་བརྡར་བརྒྱུད་པའི་རྡོ་བརྐོས་ཁྱམས་རིང་དང་ཚོན་མདངས་རྣམ་པར་བཀྲ་བའི་ཐང་གའི་སྒྱུ་རྩལ། དཔའ་དང་སྤོབས་པས་ཁེངས་པའི་མཐོ་སྒང་གླུ་གར་ལས་སེར་ཤུལ་ས་ཆེན་ནས་མཆེད་པའི་འདན་མའི་རིག་གནས་དེ་ཀྲུང་ཧྭའི་རིག་གནས་ཁྱམས་རིང་ཁྲོད་འོད་མདངས་བཀྲ་བའི་སྐར་མ་དང་འདྲ་བར་འཚོལ་ཞིབ་མཁན་བགྲང་ལས་འདས་པའི་ཡིད་དབང་བཀུག་ཡོད། དུས་དེབ་ཧྲིལ་པོར་འདན་མའི་རིག་གནས་ལྟེ་བར་བྱས་ཏེ། པར་རིས་དང་ཡི་གེ་མཉམ་འདྲེས་དང་རྒྱ་བོད་ཡིག་མཉམ་འདྲེས་བྱས་ནས། དུས་རབས་ཀྱི་ཁྱད་ཆོས་ཆེན་པོ་ལྡན་པའི་འཕྲིན་སྦྱོར་ཀུན་འདུས་ཀྱི་ལམ་ནས་མི་སེམས་འགུལ་བའི་སེར་ཤུལ་རིག་གནས་ཡུལ་སྐོར་འཕེལ་རྒྱས་ཀྱི་ལག་ལེན་གསར་པ་ཕྱོགས་ཡོངས་ནས་མངོན་པར་བྱས་ཡོད། དཔེ་ཆའི་ནང་གི་ཡིག་འབྲུ་རེ་རེ་དང་པར་རིས་རེ་རེས་སེར་ཤུལ་གྱི་རྔམ་མཐུག་ལྡན་པའི་ལོ་རྒྱུས་མཚོན་ཡོད་ལ། སེར་ཤུལ་མི་དམངས་ཀྱི་དུས་རབས་ཀྱི་འདུན་པ་མཚོན་ཡོད། ཡིག་འབྲུ་རེ་རེ་དང་པར་རིས་རེ་རེ་ནི་སེར་ཤུལ་གྱི་སྙིང་སྟོབས་ཡིན་པས། ས་གཞི་འདིའི་སྟེང་གི་ངོ་མཚར་བའི་ལོ་རྒྱུས་དང་ཕུགས་འདུན་མཚོན་ཡོད།

གསུམ་པ། དུས་རབས་ཀྱི་དཔང་པོ། མི་དམངས་ཀྱི་བློ་གྲོས།

ཆེད་བསྒྲིགས《གནས་མཆོག་འདན་མའི་རིག་གནས།》ཁྲོད་འབད་བརྩོན་དང་སེམས་ནུས་མང་པོ་འདུས་ཡོད། སྨྱུ་གུས་འབྲི་མཚམས་མི་འཇོག་པ་ནི་འདན་མའི་རིག་གནས་ཀྱི་ཐོག་མའི་བསམ་འདུན་ཡིན་པར་མ་ཟད། དེ་བས་ཀྱང་ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་ལ་དུས་རབས་རྒྱུན་འཛིན་བྱེད་པའི་བསམ་གཞིག་གཏིང་ཟབ་ཅིག་ཡིན། དུས་དེབ་ཡོངས་སུ་འདན་མའི་རིག་གནས་ཀྱི་ལོ་རྒྱུས་འབྱུང་ཁུངས་དང་སྒྱུ་རྩལ་གྱི་མཚོན་ཚུལ། སྲོལ་རྒྱུན་གྱི་གོམས་སྲོལ། རྒྱུན་འཛིན་དང་འཕེལ་རྒྱས་སོགས་ཀྱི་ནང་དོན་འདུས་ཡོད་ལ། གཟབ་ནན་གྱི་རིག་གཞུང་རྣམ་འགྱུར་དང་བབ་ཆགས་ཀྱི་རྩོམ་ལུགས་ལས་འདན་མའི་རིག་གནས་ཀྱི་ངོ་མཚར་ཀློག་པ་པོ་ཀུན་གྱི་སྤྱན་སྔར་འབུལ་ཡོད། ཤོག་དཀར་ངོས་ཀྱི་ཡིག་རིས་དེ་སྲོལ་རྒྱུན་རིག་གནས་ཀྱི་རྒྱུན་འཛིན་དང་གསར་གཏོད་ཡིན་པར་མ་ཟད། མི་དམངས་ཀྱི་བསྐལ་པ་བཟང་པོ་རིས་སུ་ཕབ་པའང་ཡིན།

ཆེད་བསྒྲིགས《གནས་མཆོག་འདན་མའི་རིག་གནས།》ནི་སེར་ཤུལ་གྱི་སྒོ་མོ་འབྱེད་པའི་ལྡེ་མིག་ཅིག་དང་འདྲ་བར། གླེགས་བམ་གྱི་ཁ་ཕྱེ་མ་ཐག །སེར་ཤུལ་གྱི་འདས་མ་ད་གསུམ་མཐོང་ཐུབ། དུས་དེབ་འདི་པར་སྐྲུན་བྱས་པ་དེས་སྲོལ་རྒྱུན་རིག་གནས་དར་སྤེལ་དང་རིག་གནས་ཡུལ་སྐོར་གསར་སྤེལ། རིག་གནས་སྤེལ་རེས་ལ་སྐུལ་འདེད། དེ་བཞིན་སེར་ཤུལ་རིག་གཞུང་ཞིབ་འཇུག་རྒྱ་སྐྱེད་སོགས་ཀྱི་ཐད་དོན་སྙིང་གལ་ཆེན་ལྡན། 《 གནས་མཆོག་འདན་མའི་རིག་གནས།》འགྲེམས་སྤེལ་བྱས་པ་དེས། མི་དེ་བས་མང་པས་འདན་མའི་རིག་གནས་འཕེལ་རྒྱས་ཤེས་རྟོགས་དང་དོ་ཁུར་ཐུབ་པ་དང་། མི་རིགས་ཁག་གི་རིག་གནས་སྤེལ་རེས་སྐུལ་འདེད་བཏང་ནས། ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་དུས་རབས་ཀྱི་རྒྱུན་འཛིན་བྱེད་པའི་མཛེས་པའི་སྣང་བརྙན་བཞེངས་ཐུབ་པར་སྨོན།

སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་ལྟར། ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་ནི་ཀྲུང་ཧྭ་མི་རིགས་ཀྱི་བསམ་པའི་སྲོག་རྩ་ཡིན་ལ། སྤྱི་ཚོགས་རིང་ལུགས་ཀྱི་ལྟེ་བའི་རིན་ཐང་ལྟ་བ་གསོ་སྐྱོང་བྱེད་པའི་འབྱུང་ཁུངས་གལ་ཆེན་ཡིན་པར་མ་ཟད། ང་ཚོ་འཛམ་གླིང་གི་རིག་གནས་གཡོ་འགུལ་ཁྲོད་བརྟན་པོར་གནས་ཐུབ་པའི་རྨང་གཞི་བརྟན་པོའང་ཡིན། རིག་གནས་ཀྱི་རང་རྟོགས་དང་རིག་གནས་ཀྱི་གདེང་ཚོད་ཆེ་རུ་གཏང་རྒྱུ་ནི་འགྲོ་ལམ་གྱི་གདེང་ཚོད་དང་། རིགས་པའི་གཞུང་ལུགས་ཀྱི་གདེང་ཚོད། ལམ་ལུགས་ཀྱི་གདེང་ཚོད་བཅས་བརྟན་དུ་གཏོང་བའི་བརྗོད་གཞིའི་ནང་འདུ་བའི་དོན་སྙིང་རེད། 《 གནས་མཆོག་འདན་མའི་རིག་གནས།》 ཞེས་པ་པར་སྐྲུན་བྱས་པ་དེས། སེར་ཤུལ་གྱི་འཕེལ་རྒྱས་ལ་ཡུལ་བབ་དང་བསྟུན་པ་དང་རིག་གནས་ཀྱི་གཏིང་ཤུགས་ལྡན་པ། སྐྱེ་སྟོབས་རྒྱས་སུ་འཇུག་ཐུབ་པ་དང་། སེར་ཤུལ་གྱིས་ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་བྱ་གཞག་རྒྱུན་འཛིན་དང་གསར་གཏོད་བྱེད་པའི་ཁྲོད་བྱ་གཞག་གསར་པ་གཏོད་པར་ཡིད་ཆེས་ཡོད། །