དེ་ཡང་འབྲི་ཆུ་ཤར་ནུབ་གཉིས་སུ་ཆགས་པའི་སྒ་འབྲུ་འདན་གསུམ་མམ། སྒ་སྐྱུ་ལྡན་གསུམ་གྱི་ནང་ཚན། ཁམས་ལྡན་མའམ་འདན་མའི་ཡུལ་ལ་འདན་སྟོད་སྨད་བར་གསུམ་དང་། འདན་ཆུ་ཉིན་སྲིབ་གཉིས་སུ་དབྱེ་བ་ལས་ལྡན་གྱི་ལྟེ་བ་འདན་ཁོག་གམ་ལོ་ཆེན་ལོ་ཆུང་ལོ་མ་བདུན་ཟེར་བ། ཡང་ན་ལོ་ཕྱུག་ཟེར་བ་མདོ་ཁམས་གནས་ཆེན་ཉེར་ལྔའི་ཡ་གྱལ་རྩེ་མཐོ་པདྨ་ཤེལ་གྱི་རི་བོ་དང་། རྟེན་གྱི་ཆ་ནས་མཚོན་ན་ཆོས་རྒྱལ་སྲོང་བཙན་ཡབ་ཡུམ་གཉིས་ཀྱི་ཐུགས་དམ་གྱི་རྟེན་རུ་གནོན་གྱི་གཙུག་ལག་ཁང་བཞིའི་ནང་གི་ཁམས་ཀློང་ཐང་སྒྲོལ་མ་ལྷ་ཁང་། ཆོས་ལ་མཚོན་ན་ཆོས་ཐམས་ཅད་ཀྱི་མ་མོར་མངོན་པ་འོག་མའི་བསྟན་པ་གཞི་བཞེངས་ས། བར་སྐབས་ཤིག་མདོ་ཁམས་རིག་གནས་ཀྱི་ལྟེ་བ་འདན་མའི་ཡུལ་དུ་བྱུང་བའི་འཛམ་གླིང་ཀུན་ཏུ་གྲགས་པའི་ལོ་རྒྱུས་མི་སྣ་གྲགས་ཅན་མང་པོ་ཞིག་བྱུང་ཡོད་ནའང་། དེའི་ནང་རྒྱ་བོད་མི་རིགས་གཉིས་ཀྱི་ལོ་རྒྱུས་ཀྱི་འཕེལ་ཕྱོགས་དང་མཐུན་པའི་མཛའ་འབྲེལ་གྱི་དོན་སྙིང་ལྡན་ཞིང་། བོད་མི་དམངས་ཀྱིས་ནམ་ཡང་བརྗེད་ཐབས་མེད་པའི་མི་སྣ་གྲགས་ཅན་རྒྱ་བཟའ་ཝུན་ཤིང་ཀོང་ཇོ(༦༢༥—༦༨༠)དང་འདན་མའི་རིག་གནས་བར་གྱི་བྱུང་བ་ལས་འགའ་ཟུར་ཙམ་འགོད་པ་སྟེ།
བོད་ཀྱི་ལོ་རྒྱུས་ཡིག་ཆ་ཁག་ཏུ་རྒྱ་བཟའི་མིང་རྒྱ་སྐད་སྒྲ་བསྒྱུར་ལས། རྒྱ་བཟའ་ཀོང་ཇོ། ལྷ་གཅིག་ཀོང་ཇོ། ལྷ་གཅིག་ཨོང་ཅོང་། འུན་ཤིང་ཀོང་ཇོ། ཝུན་ཤིང་ཀོང་ཇོ་སོགས་གདགས་གཞི་གཅིག་ལ་མིང་མི་འདྲ་བ་སྣ་ཚོགས་འདུག །བོད་རྒྱལ་སྲོང་བཙན་སྒམ་པོའི་མཆོག་ཏུ་གྱུར་པའི་བཙུན་མོ་གསུམ་གྱི་ཡ་གྱལ། ལྷ་གཅིག་ཀོང་ཇོ་ནི་རྒྱ་རྗེ་ཐང་ཐེ་ཙུང་གི་སྲས་མོ་ཞེས་པ་ནི་ཀུན་གྱི་མཐོང་སྣང་གཅིག་ཏུ་གྱུར། བོད་ལྕགས་གླང་སྤྱི་ལོ་སྟེ་སྤྱི་ལོ༦༤༡ལོར་ཐང་ཐེ་ཙུང་གིས་ཝུན་ཁྲེང་ཀོང་ཇོ་བོད་ཀྱི་རྒྱལ་པོའི་བཙུན་མོར་གནང་། བོད་དུ་ཕེབས་སྐབས་ཀྱི་གནས་ཚུལ《ཆོས་འབྱུང་མཁས་པའི་དགའ་སྟོན།》ལས།“དེ་ནས་ཀོང་ཇོ་དཔོན་གཡོག་གིས་ཁམས་སུ་ཕེབས་ནས་མགར་སྒུག་པའི་ཕྱིར་བྲག་ལོགས་ལ་རྒྱས་པའི་དབུ་དུམ་དང་བཟང་སྤྱོད་བརྐོས། རྡོ་སྐུ་ཁྲུ་བརྒྱད་ཅུ་པ་བརྐོས། ཤྭ་བ་བཟུང་ནས་ཞིང་རྨོས། ཆུ་སྐོར་བཙུགས།”ཞེས་དང་། 《 མདོ་སྨད་ཆོས་འབྱུང་།》ལས།“ཀོང་ཇོ་བོད་དུ་ཕེབས་སྐབས་དཔོན་གཡོག་མདོ་ཁམས་ཀྱི་ཕྱོགས་འདིར་བྱོན། བློན་པོ་འགར་རྒྱས་མི་ཚབ་ཏུ་བཀག་པ་ལ་སྒུག་ཕྱིར་བྲག་ལ་རྒྱས་པའི་དབུ་དུམ་དང་བཟང་སྤྱོད། རྡོ་སྐུ་ཁྲུ་བརྒྱད་ཅུ་པ་རྣམས་བརྐོས། རྫུ་འཕྲུལ་གྱིས་ཤ་བ་བཟུང་ནས་ཞིང་རྨོས། ཆུ་འཁོར་བཙུགས། ནགས་ཁྲོད་ལ་བརྟུགས་པ་ལྟར་བྱས། རྒྱལ་མོ་ཕྲེད་ལམ་བཅོས་ཤིང་སེ་བ་སོགས་ལ་བལྟ་འགྲོ་ཟེར་ནས་ཀོང་ཇོས་ཡུལ་ཁམས་ཐམས་ཅད་དུ་བྱོན་པས་བློན་པོ་མ་དག་པ་ལ་ལས་ལམ་དུ་ཅི་འགོར་བྱས་པ་མཐོང་། མཐའ་མ་པ་རྣམས་ཀྱིས་ཤིང་སེ་བ་སོགས་བལྟ་བར་མཐོང་། བྱང་ཆུབ་སེམས་དཔའ་རྣམས་ཀྱིས་སྒྲོལ་མ་དང་ཐུབ་པའི་སྐུས་བོད་ཐམས་ཅད་ཞབས་ཀྱིས་བཅགས་ཏེ་བྱིན་གྱིས་རློབ་པར་གཟིགས་སོ། །”ཞེས་དང་། ཡང་《རྒྱལ་རབས་གསལ་བའི་མེ་ལོང་།》ལས།“དེའི་བར་ལ་རྒྱ་མོ་བཟའ་ལ་སོགས་པའི་བོད་བློན་རྣམས་ཀྱིས་ལྡན་མ་བྲག་རྩར་ཕེབས་ནས། བྲག་ལ་བྱམས་པ་ཁྲུ་བདུན་པ་ཅིག་དང་། བཟང་སྤྱོད་གཉིས་བརྐོས་མར་བཞེངས། དེར་ཟླ་བ་གཅིག་བསྒུག་དེར་ཡང་བློན་པོ་མ་བྱོན། ཕུང་པོ་རི་ལ་ཆགས་ཕེབས། ལ་ལ་འཕྲེད་ལམ་བཅོས། རི་དྭགས་བཟུང་ནས་འོ་མ་བཞོས། དེར་ཡང་བློན་པོ་མ་བྱོན། ཁམས་ཀྱི་པདྨ་ཤང་དུ་ཆག་ཕེབས། ཞིང་བཏབ། རང་ཐག་ཆུ་བསྐོར་བཙུགས། དེར་ཟླ་བ་གཉིས་བསྒུག །དེར་ཡང་བློན་པོ་མ་བྱོན། དེ་ནས་སྒོ་དོང་སྒོ་མོའི་རྩར་ཕེབས། རྒྱ་ནག་གི་ཕྱྭ་གཡང་ཉམས་པས། རྒྱ་ནག་གི་ལྷ་སྲུང་རྣམས་ཀྱིས་མཐུས་སྒོ་མོ་འགགས་པས་དེར་ཟླ་བ་གཉིས་ལུས། དེར་བློན་པོ་སླེབས་སོ། །”ཞེས་དང་། གཞན་ཡང་ལ《བཀའ་ཆེམས་ཀ་ཁོལ་མ།》ལས།“ཁམས་སུ་ལྡན་མའི་བྲག་སྔོན་རྩི་དཀར་ཅན་ལ་རྒྱས་པའི་དབུ་དུམ་དང་། བཟང་པོ་སྤྱོད་པའི་སྨོན་ལམ་འབུར་དུ་བཏོད་པ་བརྐོས་ནས་བྲིས། བྱ་དུར་གླང་སྣར་ཐུབ་པའི་སྐུ་ཁྲུ་བརྒྱད་ཅུ་པ་གཅིག་བཞེངས། ཤ་བ་བཟུང་ནས་རྨོས་བྱས། བླང་གྲུ་དུས་ཐང་དུ་རང་ཐག་ཆུ་སྐོར་བཅོས། ནགས་ཤོད་དུ་ལམ་ནོར་དུ་བཅུག་པ་ལ་སོགས་པ་ལ་སྙད་བྱས་ནས་འགོར་རོ། །དེའི་དུས་བྱང་ཆུབ་སེམས་དཔའ་རྣམས་ཀྱི་སྣང་བ་ལ། ཁ་བ་ཅན་གྱི་རྒྱལ་ཁམས་འདི་ཤཱཀྱ་མུ་ནེས་ཞབས་ཀྱིས་བཅགས་པ་དེས་ཤིན་ཏུ་བཀྲ་ཤིས་པའི་སྣང་བ་བྱུང་ངོ་། །”ཞེས་སོ། །དེ་ཡང་འདན་སྒྲོལ་མ་ལྷ་ཁང་གི་སྐོར་ལ“སྒྲོལ་མའི་སྤྲུལ་པ་རྒྱ་བཟའ་ཀོང་ཇོ་ཡིས་རྩིས་ལ་བོད་སྲིན་མོ་གན་རྐྱལ་དུ་ཉལ་བ་ལྟ་བུའི་ས་དཔྱད་ལ་བཙན་པོས་སྤྲུལ་པ་བཀྱེས་ཏེ་མི་འགྱུར་བའི་གཟེར་གྱི་གཙུག་ལག་ཁང་བཅུ་གཉིས་བརྩིགས།” ཞེས་གསུངས་པ་ལ། དཔའ་བོ་གཙུག་ལག་ཕྲེང་བས་ཀྱང་།“ཡན་ལག་མཐིལ་བཞི་གནོན་པའི་རུ་གནོན་བཞི། ལག་མཐིལ་གཡས་གནོན་པར་མི་ཉག་གི་ལག་དཔོན་བྱས་ཏེ་ཁམས་གླང་ཐང་སྒྲོལ་མ་ལྷ་ཁང་ནི་བདུད་འདུལ་བའི་དཀྱིལ་འཁོར་དུ་བཞེངས་སོ། །”ཞེས་གསུངས་པ་ལྟར་བོད་ཀྱི་དེབ་ཐེར་ཆོས་འབྱུང་ཆེ་ཁག་ལས་གསུངས་ཚུལ་གཅིག་མཐུན་ཡིན་པས་འདིར་ཙམ་གྱིས་ཆོག་རྒྱུ་བྱས། དེ་ལྟར་ཡིད་ཆེས་བྱེད་ཆོག་པའི་ཁུངས་བཙན་གྱི་ཡིག་ཆ་རྙིང་པ་གཞིར་བཟུང་ནས་བྲིས་པ་ཡིན་པས་འདན་མའི་ཡུལ་དུ་རྒྱ་བཟའི་བྲག་བརྐོས་རི་མོ་དང་། ཆུ་འཐག་འཛུགས་པ། གླང་ལ་ཞིང་རྨོས་པ་སོགས་སླར་ཡང་བརྟག་དཔྱད་བྱ་རྒྱུའི་དཔྱད་གཞིར་བཀོད་པའོ། །