འདན་ཟ་ཧོར་རྒྱལ་པོའི་མཁར་ཤུལ་ལས་འཕྲོས་པའི་བསམ་གཞིགས།

སེང་གེ་གནམ་རྫོང་དུ་ཆགས་པའི་འདན་ཟ་ཧོར་རྒྱལ་པོའི་མཁར་ཤུལ་སྐོར།

འདན་མའི་ས་གནས་ཀྱི་ས་ཁད་ཆེས་མཐོ་སའི་སེང་གེ་གནམ་རྫོང་གི་ཐོག་ཏུ་མཁར་ཤུལ་རྙིང་པའི་གྱང་མལ་ཞིག་འདུག །དེའི་སྐོར《འདན་མའི་ནས་རྫོང་།》དང་། ས་གནས་དེ་གའི་རྒན་རབས་པ་ཚོའི་བཤད་སྲོལ་ལྟར་ན་དེ་ནི་འདན་ཟ་ཧོར་རྒྱལ་པོའི་ཕོ་བྲང་གི་ཤུལ་རེད་ཟེར། 《 སེངྒེ་གནམ་རྫོང་གི་གནས་ཡིག》ཅིག་ལས།“རིའི་སྤྱི་གཙུག་ཏུ་འདན་ཟ་ཧོར་རྒྱལ་པོའི་ཕོ་བྲང་སྣང་བ་འོད་ལྡན་གྱི་མཁར་ཤུལ་དང་མཐའ་རྟེན་ལྕགས་རི་དང་བཅས་པའི་ལོ་རྒྱུས་ཡོད་”ཅེས་འཁོད་ཡོད་པ་དང་། 《 འདན་མའི་ནས་རྫོང་།》ལས་ཀྱང་དེ་བཞིན་དུ་འཁོད་ཡོད་པ་ལ་གཞིགས་ནས། ན་ནིང་ཟླ་བ་བཅུ་པར་འདན་མའི་རིག་གནས་རྟོག་ཞིབ་ཚོ་ཆུང་འདན་ཁོག་ཏུ་འགྲོ་སྐབས་ཆེད་དུ་མཁར་ཤུལ་དེར་བལྟ་སར་སོང་།

མཁར་ཤུལ་ལ་གྱང་རལ་ཕྱི་ནང་གཉིས་འདུག་ཅིང་གྱང་རལ་ནང་མ་ནི་ཧ་ལམ་རྒྱ་ཁྱོན་སྨི་གྲུ་བཞི་མ་༢༠༠ཙམ་གྱི་ཕོ་བྲང་གི་ཤུལ་དང་། ཕྱི་མ་ནི་མཐའ་སྐོར་ལྕགས་རིའི་ཚུལ་དུ་རྒྱ་ཅུང་ཆེ་བ་འདུག །མཁར་ཤུལ་ནང་མ་ནི་སེང་གེ་གནམ་རྫོང་གི་ཆེས་ཡང་རྩེ་རུ་ཆགས་ཡོད་པས་མཐོང་སྣང་ཧ་ཅང་ཡངས་ཤིང་། འདན་གྱི་གསེར་ལ་ཁྲ་མོ་མན་ཆོད་ནས་དིལ་མགོ་བྱེ་ཐང་ཡན་ཆོད་བར་གྱི་འདན་མའི་ཆུ་ཉིན་སྲིབ་ཀྱི་གྲོང་སྡེ་ཕལ་ཆེར་མིག་ལམ་དུ་མཐོང་ཐུབ་ལ། མདུན་ཞོལ་ནས་གསེར་ལྡན་འབྲི་ཆུ་དལ་གྱིས་འབབ་ཅིང་། རྒྱབ་ཕྱོགས་ནི་ས་མཐོ་པདྨ་རི་ཆགས་ཡོད། མཁར་རྫོང་ཆགས་སའི་གནས་ནི་མཐོ་བ་ཙམ་གྱིས་མ་ཚད་པར་ཤར་ལྷོ་ནུབ་གསུམ་གྱི་ཕྱོགས་སུ་བྲག་རི་གཡང་གཟར་གྱིས་བསྐོར་བའི་བཙན་རྫོང་ལྟ་བུ་གྱུར་པས་གནའ་དུས་དགྲ་སོགས་བྱུང་ན་གནོད་སྐྱོན་ཐེབས་མི་ཐུབ་པའི་དགེ་མཚན་ལྡན་ནོ། །

  སྤྱིར་གནའ་དུས་སུ་རྒྱལ་པོའི་ཕོ་བྲང་ནི་ཆེས་ས་མཐོ་ས་དང་ཆེས་བཙན་སར་རྒྱག་པ་ནི་རྒྱུན་ལྡན་དུ་མཐོང་རྒྱུ་མང་ཞིང་། དཔེར་ན་ཕོ་བྲང་ཡུམ་བུ་བརླ་མཁར་དང་། མངའ་རིས་རྩ་མདའི་གུ་གེའི་ཕོ་བྲང་། རྫོང་མགོའི་གླིང་ཚང་རྒྱལ་པོའི་ཕོ་བྲང་། རྒྱལ་རོང་རྒྱལ་པོ་ཚོའི་ཕོ་བྲང་བཅས་ཆགས་སའི་ས་དཔྱད་མཚུངས་ཤིང་། ཆེས་མཐོ་སའི་རི་འབུར་དུ་ཆགས་ཡོད། ཕྱིས་སུ་ཞིང་ལས་དར་བའི་དུས་སུ་ཕོ་བྲང་དེ་དག་ལུང་འདབས་ཀྱི་ས་ཆ་དམའ་སར་སྤོས་ཡོད་པ་ནི་བོད་ཀྱི་ལོ་རྒྱུས་ཡིག་ཚང་དང་གནའ་རྫས་དང་གནའ་ཤུལ་དེ་དག་གིས་ར་སྤྲོད་བྱེད་ཐུབ་པ་ཞིག་རེད།

ཟ་ཧོར་རྒྱལ་པོས་ཀྱང་དེ་བཞིན་ཕོ་བྲང་སྔར་ཤོས་དེ་ས་ཆེས་མཐོ་ས་དང་བཙན་ས་རྒྱག་པ་ནི་སྐབས་དེའི་སྤྱི་ཚོགས་ཀྱི་གནས་སྟངས་དང་ལོ་རྒྱུས་ཀྱི་འཕེལ་འགྲོས་དང་མཐུན་པ་ཞིག་རེད་སྙམ། དེ་རྗེས་བོད་བཙན་པོའི་དུས་སུ་སྲོང་བཙན་སྒམ་པོས་རུ་གནོན་གྱི་གཙུག་ལག་ཁང་སྟེ་ཀློང་ཐང་སྒྲོལ་མ་ལྷ་ཁང་བཞེངས་ས་ནི་དེ་ལས་ས་ཁད་ཅུང་དམའ་བའི་སེང་གེ་གནམ་རྫོང་གི་རི་རྐེད་དེ་ཡིན། ལྷ་ཁང་དེ་ས་འགུལ་འོག་ཏུ་ཤོར་བའི་རྗེས་སུ་དེ་ལས་ས་ཁད་དམའ་ཤོས་དང་བདེ་ཤོས་ཀྱི་ད་ལྟའི་པདྨ་མཎྜལ་ཐང་དུ་སྒྲོལ་མ་ལྷ་ཁང་སྤོས་པ་སོགས་ཀྱིས་ཀྱང་ཕོ་བྲང་དང་ལྷ་ཁང་བཞེངས་སའི་ས་གནས་དེ་དག་དུས་རབས་ཀྱི་འགྲོས་བཞིན་འགྱུར་འགྲོ་བ་མཚོན་ཡོད། 

འདན་མའི་ནས་རྫོང་དུ་འཁོད་པའི་འདན་ཟ་ཧོར་རྒྱལ་པོའི་སྐོར།

 འོ་ན་ལོ་རྒྱུས་ཐོག་འདན་ཟ་ཧོར་རྒྱལ་པོ་ཞེས་པ་ཞིག་དངོས་སུ་བྱུང་མྱོང་ངམ་ཞེ་ན། དོན་དེ་ནི་ད་དུང་ང་ཚོས་མུ་མཐུད་བརྟག་དཔྱད་བྱ་དགོས་པ་ཞིག་རེད། ཡོངས་གྲགས་ཀྱི་བོད་ཀྱི་ལོ་རྒྱུས་ཡིག་ཚང་ནང་དུ་ཟ་ཧོར་རྒྱལ་པོའི་སྐོར་འཁོད་མེད་པ་ཙམ་གྱིས་ཟ་ཧོར་རྒྱལ་པོ་ཞེས་པ་ཞིག་བྱུང་མ་མྱོང་ཞེས་ཀྱང་ཁ་ཚོན་ག་ལ་གཅད་ཕོད།

དེ་ཡང་《 འདན་མའི་ནས་རྫོང་།》དེབ་གྲངས་༧༨ནང་།“ཕོ་ང་འདྲ་ང་ངོ་མ་ཤེས་ན། །འདན་ཟ་ཧོར་རྒྱལ་རབས་དགུ་བཅུ་ལ། བློན་ས་རི་བློན་རབས་དགུ་བཅུ་ཡིན། གནམ་ཨ་སྔོན་ཆགས་ནས་ཟ་ཧོར་ཆགས། །དབུ་འཕང་མཐོ་དོན་དེ་ནས་ཡིན། །ས་དང་མོ་ཆགས་ནས་ཟ་ཧོར་ཆགས། །གཞི་གླིང་ཆེ་དོན་དེ་ནས་ཡིན། །”ཞེས་དང་། ཡང་དེབ་གྲངས་༩༥ཐོག །“ས་འདི་ས་ངོ་མ་ཤེས་ན། །འདན་གྱི་གཡུ་རྫོང་རིང་མོ་ཡིན། །ཕྱི་ལ་གཡུ་ཡི་བརྩིགས་པ་ཡོད། །ནང་དུ་བེཻཌྱའི་ཞུན་གྱིས་བྱུག །གཡུ་རྫོང་རིང་མོ་དེ་ནས་ཐོག །ཕོ་ང་འདྲ་ང་ངོ་མ་ཤེས་ན། །ཕ་ཡབ་རྒྱུད་ཟ་ཧོར་རྒྱལ་གྱི་སྲས། །ཟ་ཧོར་ས་དང་མཉམ་ཆགས་ཡིན། །མ་ཡུམ་རྒྱུད་རོང་རྗེའི་ཚ་མོ་ཡིན། །རོང་དཔའ་བོ་ཁྲོམ་པའི་འཕྲུལ་སྲས་ཡིན། །འདན་ཟ་ཧོར་ཡུལ་གྱི་མངའ་བདག་ཡིན། །”ནང་འཁོད་པ་ལྟར་ན་འདན་ཟ་ཧོར་རྒྱལ་རབས་དགུ་བཅུ་བྱུང་ཡོད་ཚུལ་བཀོད་ཅིང་། དེ་ལྟར་རིམ་བཞིན་བརྩིས་ན་མི་རབས་དོན་གཉིས་པ་འདན་རྗེ་གཡུ་རྩེ་རུ་བཙན་གྱི་དུས་སུ་གཡུ་རྫོང་རིང་པོ་བཞེངས་པ་གྲགས། དེ་ནས་མི་རབས་བཅོ་བརྒྱད་རྗེས་སུ་ཚ་ཞང་འདན་མ་བྱང་ཁྲ་འཁྲུངས། ས་གནས་ཀྱི་རྒན་རབས་པ་མང་པོས་ཀྱང་འདན་ཟ་ཧོར་རྒྱལ་པོའི་སྐོར་གྱི་གཏམ་རྒྱུད་མི་རབས་ནས་མི་རབས་བརྒྱུད་དེ་ད་བར་འདན་མའི་དམངས་ཁྲོད་དུ་ཁྱབ་ཡོད། མ་གཞི་སྒྲུང་དང་དམངས་ཁྲོད་ཀྱི་བཤད་སྲོལ་དེ་ལོ་རྒྱུས་དངོས་སུ་འཛིན་མི་ནུས་ཀྱང་། དེ་རིགས་ལ་མཐོང་ཆེན་དང་དཔྱད་གཞི་རུ་འཛིན་པ་དང་། ད་དུང་ཡུལ་དངོས་སུ་རྟོག་ཞིབ་བྱེད་པ་སོགས་ཟུང་དུ་འབྲེལ་ནས་མུ་མཐུད་ཞིབ་འཇུག་བྱེད་པ་དང་། མ་འོངས་པར་ཆ་རྐྱེན་འཛོམས་དུས་ཡུལ་དངོས་སུ་གནའ་རྫས་རྟོག་ཞིབ་འཕྲུལ་ཆས་ཀྱིས་ཚན་རིག་དང་མཐུན་པའི་དཔྱད་ཞིབ་བྱས་ན་ནམ་ཞིག་འདན་ཟ་ཧོར་རྒྱལ་པོའི་གསང་བ་ཕྱི་རུ་མངོན་མི་སྲིད་པའང་ག་ལ་ཡིན།

སྤྱིར་མཐོ་སྒང་གི་མིའི་འགྲོ་བའི་འཕེལ་འགྱུར་དང་གཡས་གཡོན་གྱི་ས་གནས་དང་མི་རིགས་གཞན་དག་གི་ལོ་རྒྱུས་ལ་བལྟས་ན་མ་མཐའ་མི་ལོ་བཞི་སྟོང་གཡས་གཡོན་ནས་ས་གནས་ཀྱི་རྒྱལ་པོ་དང་ཡང་ན་ས་གནས་ཀྱི་དཔོན་པོའི་ལམ་ལུགས་དར་ཡོད། དེས་ན་མི་ལོ་ཉིས་སྟོང་དང་སུམ་སྟོང་སྔོན་གྱི་འདན་མ་ལའང་ས་གནས་ཀྱི་རྒྱལ་པོའམ་དཔོན་པོ་ཞིག་ཡོད་པ་ནི་ཁོ་ཐག་ཆོད། ས་གནས་ཀྱི་བཤད་སྲོལ་ལྟར་ན་དེ་སྐབས་འདན་ཟ་ཧོར་རྒྱལ་པོ་ཞེས་པ་ཞིག་བྱུང་ཡོད་ནའང་ཆོག་ཆོག་ཅིག་རེད་སྙམ།

རྒྱ་ཡིག་ཡིག་ཚང་ནང་འཁོད་པའི་འདན་མའི་སྐོར།

སྤྱིར་བཏང་རྒྱ་ཡིག་གི་ལོ་རྒྱུས་ཡིག་ཚང་ནང་ཐང་རྒྱལ་རབས་ཡན་དུ་བོད་ཀྱི་ལོ་རྒྱུས་འཁོད་པ་ཧ་ཅང་དཀོན། འོན་ཀྱང་《 ཀྲུང་གོའི་ལོ་རྒྱུས་ས་ཁྲ་ཕྱོགས་བསྡུས།》དེབ་གསུམ་པའི་ནང་དུ་རྒྱལ་ཁབ་གསུམ་དང་ཞི་ཅིན་དུས་སྐབས་སུ（三国·西晋时期）ལྡན་མ（邓麻）ཞེས་ས་མིང་ཁ་གསལ་པོ་འཁོད་ཡོད་པར་གཞིགས་ན་མི་ལོ་༡༧༠༠སྔོན་ནས་ལྡན་མའམ་འདན་མ་ཞེས་པའི་མིང་ཡོད་པས་མ་ཚད་ས་གནས་དེ་ཁམས་ཕྱོགས་སུ་སྐད་གྲགས་ཆེ་བའང་མཚོན་ཡོད། ད་དུང་ས་ཁྲ་དེའི་ནང་དུས་རབས་སོ་སོའི་ནང་འདན་མའི་མིང་ཡོད་པས་མ་ཚད་འདན་མའི་རྒྱ་ཡིག་གི་མིང་གི་འབྲི་ཚུལ་ལའང་བོད་སྐད་ཀྱི་འགྱུར་བ་བཞིན་འགྱུར་ལྡོག་ཅུང་བྱུང་ཡོད་པ་ཤེས་ཐུབ། དཔེར་ན། སྤྱི་ལོ་༢༦༢ལོའི་རྒྱལ་རབས་གསུམ（三国时期）དང་སྤྱི་ལོ་༢༨༡ལོའི་ཞི་ཅིན（西晋时期）དུས་དང་། སྤྱི་ལོ་༨༢༠ལོའི་བོད་བཙན་པོའི་དུས་སུ་ལྡན་མ（邓麻）བྲིས་འདུག །སྤྱི་ལོ་༡༠༣༨ལོ་ནས་སྤྱི་ལོ་༡༠༦༥ལོའི་སུང་རྒྱལ་རབས་དུས་སུ་འདན་མ（邓麻）ཟེར། བོད་སྐད་ལྟར་ན་ལྡན་མའི་སྒྲ་ཡིན་པ་འདྲ། སྤྱི་ལོ་༡༢༨༨ལོའི་ཡོན་རྒྱལ་རབས་དུས་སུ（旦麻）ཞེས་རྒྱ་ཡིག་ཡི་གེ་འགྱུར་འདུག །བོད་ཡིག་ཏུ་འདན་མ་ཨེ་ཡིན་སྙམ། སྤྱི་ལོ་༡༤༣༣ལོའི་མིང་རྒྱལ་རབས་དུས་སུ་ཡང་（邓玛）ཟེར། སྤྱི་ལོ་༡༨༢༠ལོའི་ཆིང་རྒྱལ་རབས་དུས་སུ་འདན་ཁོག་ཅེས（登科）བྲིས་འདུག །དེ་བཞིན་ཀློང་ཐང་ལའང་ཐང་རྒྱལ་རབས་དུས་སུ་གླང་ཐང་（弄塘）དང་ཡོན་རྒྱལ་རབས་དུས་སུ་ལོ་ཐང་（洛塘）ཞེས་བྲིས་འདུག །གང་ལྟར་ས་མིང་དེ་དག་སྐབས་དེའི་བོད་སྐད་ཀྱི་སྒྲ་གདངས་ལྟར་རྒྱ་ཡིག་ཏུ་བཀོད་པ་ཡིན་པས་བོད་སྐད་ཀློག་སྟངས་ལའང་འགྱུར་བ་ཅུང་སོང་ཡོད་པ་ཤེས་སླའོ། །

སྤྱིར་སྔོན་གྱི་གླིང་གི་དཔའ་ཐུལ་དེ་དག་ལའང་དབྱར་དགུན་དུ་འདུག་སའི་མཁར་མི་འདྲ་བ་ཁ་ཤས་རེ་ཡོད་པ་ད་ལྟའི་མཁར་ཤུལ་ལས་ཤེས་སླ། དེ་ལྟར་འདན་ཟ་ཧོར་རྒྱལ་པོ་ལའང་མཁར་གཅིག་གིས་མི་ཚད་པ་འདྲ། མཁར་ཆགས་སའི་ས་གནས་ལ་དཔྱད་ན་སེང་གེ་གནམ་རྫོང་ནི་འདན་ཟ་ཧོར་རྒྱལ་པོའི་ཆེས་ཐོག་མའི་མཁར་དང་། མཁར་མིང་ལའང་སེང་གེ་གནམ་རྫོང་ངམ་ཕོ་བྲང་སྣང་བ་འོད་ལྡན་ཟེར་བ་བལྟས་ན་བཙན་ཞིང་མཐོང་ལམ་རིང་བའི་ཁྱད་ཆོས་མཐོང་ཐུབ། རྗེས་སུ་མཁར་གྱི་མིང་དེ་རི་ལ་ཐོགས་ནས་མཐའ་མ་གནས་རིར་ཆགས་པ་འདྲ་སྙམ། 《 འདན་མའི་ནས་རྫོང་།》ལྟར་ན་གླིང་གི་དུས་སུ་ཟ་ཧོར་རྒྱལ་པོའི་མཁར་མིང་ལ་འདན་གྱི་གཡུ་རྫོང་རིང་མོ་ཞེས་བྲིས་འདུག་པ་དེ་ད་ལྟའི་ཤུག་ར་དགོན་པའི་ཟུར་དུ་ཡོད་པ་ལ་ཟེར་བས་རྗེས་སུ་ཟ་ཧོར་རྒྱལ་པོ་དེ་སྤོས་པའམ་ཡང་ན་ཟ་ཧོར་རྒྱལ་པོའི་མཁར་གཞན་ཞིག་ཨེ་ཡིན་སྙམ། མཁར་དེ་ནི་ཆེས་མཇུག་མའི་ཟ་ཧོར་རྒྱལ་པོའི་ཕོ་བྲང་ཡིན་ལ་འདན་མ་འཁྲུངས་ས་ཡང་ཡིན་ཟེར། ཚ་ཞང་འདན་མ་བྱང་ཁྲས་འདན་མའི་རྒྱལ་པོ་བྱས་རྗེས་མཁར་གཉིས་ཡོད་ཅིང་། གཡུ་རྫོང་རིང་མོའམ་ལྷ་མཁར་རིང་མོ་ལ་འདན་མའི་མཁར་དམར་དང་། ཤར་ལུང་རི་དྲུག་མཁར་ལ་འདན་མའི་མཁར་དཀར་ཟེར།

གང་ལྟར་ཟ་ཧོར་རྒྱལ་པོ་ཞེས་པ་འདི《 འདན་མའི་ནས་རྫོང་།》ནང་དུ་གཙོ་བོའི་བརྗོད་བྱ་ཞིག་ཏུ་འཛིན་ཏེ་འཁོད་ཡོད་ནའང་། དེང་སང་གི་གེ་རིག་ཞིབ་འཇུག་པ་ཚོས་དེ་ཙམ་དོ་སྣང་བྱས་མེད་པ་འདྲ། ཡང་མཁས་དབང་དགེ་འདུན་ཆོས་འཕེལ་གྱིས་མཛད་པའི《 རྒྱ་གར་གནས་ཆེན་ཁག་གི་ལམ་ཡིག》ནང་། ཟ་ཧོར་གྱི་ཡུལ་དེར་དེང་སང་བྷང་གལ་པུར་ཞེས་འབོད་པ་དང་། སྔར་སངས་རྒྱས་སྐུ་བཞུགས་པའི་སྐབས་ཡུལ་ཙམ་པ་ཞེས་པ་དེ་ཡིན་ཞེས་གསུངས་འདུག །སྔར་གྱི་བོད་ཡིག་ལོ་རྒྱུས་སུ་སྐབས་རེ་ཟ་ཧོར་རྒྱལ་པོ་དང་། སྐབས་རེ་བྷངྒ་ལའི་རྒྱལ་པོ་ཞེས་མིང་འདོགས་ཚུལ་མི་འདྲ་བ་གཉིས་བྱུང་། དོན་དུ་དེང་སང་གི་མོང་ཅ་ལའི་རྒྱལ་ཁབ་ཀྱི་རྒྱལ་པོ་ལ་ཟེར། དེ་ལྟར་འདན་ཟ་ཧོར་རྒྱལ་པོ་དང་བོད་ཡིག་ལོ་རྒྱུས་སུ་འཁོད་པའི་ཟ་ཧོར་རྒྱལ་པོ་གཉིས་འབྲེལ་བ་ཡོད་མེད་མུ་མཐུད་ནས་ཞིབ་འཇུག་བྱ་དགོས་ལ། ང་ཚོས་ནི《 འདན་མའི་ནས་རྫོང་།》ནང་དུ་འཁོད་པའི་ཟ་ཧོར་རྒྱལ་པོའི་མཁར་ཤུལ་ཞེས་དངོས་ཡོད་ལ་གཞིགས་ཏེ་གླེང་བ་ཙམ་ཡིན།

མདོར་ན། གོང་གི་དམངས་ཁྲོད་ཀྱི་བཤད་སྲོལ་དང་《འདན་མའི་ནས་རྫོང་།》ནང་གི་བརྗོད་བྱ། ཡུལ་དངོས་གྱི་གནའ་ཤུལ། གནའ་བོའི་བྲག་རིས། བོད་བཙན་པོའི་དུས་ཀྱི་ལོ་རྒྱུས་ཡིག་ཆ་དང་བྲག་བརྐོས་རི་མོ་སོགས་ལ་གཞིགས་ན་འདན་མའི་ས་ཆ་ནི་ལོ་རྒྱུས་ཡུན་རིང་ཞིང་ཁམས་ཀྱི་ལྟེ་བར་གྱུར་ཅིང་རིག་གནས་ཆེས་དར་ས་དང་། ལོ་རྒྱུས་མི་སྣ་མང་པོ་འཁྲུངས་སའི་ས་ཆ་ཞིག་ཀྱང་ཡིན་ཞིང་། ལྷག་པར་དུ་རྒྱ་ཡིག་གི་ས་ཁྲའི་ནང་འདན་མའི་ས་མིང་འཁོད་པ་ཁོ་ནས་ཀྱང་མི་ལོ་༡༧༠༠ལྷག་གི་གོང་རོལ་དུ་འདན་མ་ཞེས་པའི་ས་གནས་དེ་མདོ་དབུས་མཐོ་སྒང་ཙམ་དུ་མ་ཟད་ཀྲུང་ཡོན་ས་ཁུལ་ལའང་གོ་རྒྱུ་རིག་རྒྱུ་ཡོད་པའི་ས་གནས་ཤིག་ཡིན་པ་མཚོན་ཡོད།

དེ་མིན་འདན་ཁོག་ཏུ་གདོང་གསེར་པའི་ཉི་འབུམ་དར་ཡག་གི་མཁར་ཤུལ་དང་། སེང་སྟག་ཨ་དོམ་གྱི་མཁར་ཤུལ། འབྲུ་དགའ་སྡེའི་མཁར་ཤུལ། །འདན་སྲས་ཀྱི་མཁར་ཤུལ། ཁྱི་ཤི་བུ་ཡི་སྒུ་རུའི་མཁར་ཤུལ། སྟོང་དཔོན་ཡ་མི་སོ་ཁྲའི་མཁར་ཤུལ་སོགས་ཀྱང་དེང་དུས་དངོས་སུ་མཐོང་རྒྱུ་ཡོད་པས་ཕྱོགས་ཙམ་ཞུས་པ་ཡིན། འགྲིག་མིན་ལ་དཔྱད་པར་འཚལ་ལོ། །