སྤྱིར་བྲག་རིས་དང་བྲག་བརྐོས་རི་མོ་ནི་མིའི་རིགས་ཀྱི་རིག་གནས་འཕེལ་རྒྱས་དང་བཟོ་རིག་སྒྱུ་རྩལ་དར་རྒྱས་བྱུང་སྟངས་ཀྱི་བདེན་དཔང་གལ་ཆེན་ཞིག་ཏུ་གྱུར་ཡོད། གནའ་རྫས་རྟོག་ཞིབ་པ་ཚོས་འབྲི་ཆུའི་ཆུ་བརྒྱུད་ནས་རྙེད་པའི་རྡོ་ཆས་དང་བྲག་རིས་སོགས་ལ་བརྟག་དཔྱད་བྱས་རྗེས་མ་མཐའ་ལོ་༨༡༠༠སྔོན་ནས་འབྲི་ཆུའི་ཆུ་བརྒྱུད་དུ་མིའི་འགྲོ་བ་ཡོད་པ་དང་། དུར་སྒམ་སོགས་ཀྱི་དངོས་པོར་བརྟག་ན་ལོ་༢༠༠༠ནས་༢༥༠༠སྔོན་ནས་ཞིང་ལས་ཀྱི་འཚོ་བ་སྐྱེལ་བཞིན་ཡོད་ཚུལ་ཤེས་ཡོད།
འདན་ཁོག་གི་བྲག་ལྷ་མོ་ཞེས་པའི་བོད་བཙན་པོའི་དུས་ཀྱི་བྲག་བརྐོས་རི་མོ།
འདན་ཁོག་གི་བྲག་ལྷ་མོ་ཞེས་པའི་བོད་བཙན་པོའི་དུས་ཀྱི་བྲག་བརྐོས་རི་མོ།
འབྲི་ཆུའི་ཆུ་བརྒྱུད་དུ་མཚོ་བོད་མཐོ་སྒང་གི་སྔ་ཕྱི་བར་གསུམ་གྱི་བྲག་རིས་མང་དག་ཐོན་པ་དང་། ད་དུང་ཐང་དང་ཡོན། མིང་། ཆིང་སོགས་དུས་རབས་སོ་སོའི་རྡོ་བརྐོས་ཀྱི་རི་མོ་མང་པོ་བྱུང་ཡོད་པར་བལྟས་ན་གནའ་ནས་འདན་མའི་ས་ཆར་རིག་གནས་དར་རྒྱས་ཆེན་པོ་བྱུང་ཡོད་པ་མཚོན་ཡོད།
བྲག་བརྐོས་རི་མོ་ལས་གུ་རུ་པདྨ་འབྱུང་གནས།
༢༠༡༣ལོར་སི་ཁྲོན་ཞིང་ཆེན་གནའ་རྫས་ཞིབ་འཇུག་ཁང་དང་པེ་ཅིང་གནའ་བོའི་ཕོ་བྲང་དངོས་མང་བཤམས་སྟོན་ཁང་། ད་དུང་ཁུལ་དང་རྫོང་རིམ་པའི་རིག་གནས་སྡེ་ཁག་གིས་མཉམ་དུ་སེར་ཤུལ་རྫོང་གི་ཁོངས་གཏོགས་ཀྱི་འདན་མའི་ལོ་ཆུང་དང་ཁྲོམ་རྫ་འགབ་མ། ཤུག་པ་སོགས་སུ་རྟོག་ཞིབ་གནང་རྗེས་བོད་བཙན་པོའི་དུས་ཀྱི་རྡོ་བརྐོས་ཚོ་གསུམ་དང་རྡོ་ལྷ་༡༧གསར་རྙེད་བྱུང་ཡོད། དེ་དག་ལས་འདན་གྱི་བྲག་ལྷ་མོའི་རྡོ་བརྐོས་རི་མོ་ནི། སེར་ཤུལ་རྫོང་ལོ་ཆུང་གྲོང་རྡལ་གྱི་ཁམས་ཀློང་ཐང་སྒྲོལ་མ་ལྷ་ཁང་གི་བྱང་ཕྱོགས་སྤྱི་ལེ་༡༥ཡི་ཀློང་རོང་(གླང་ཡང་བྲིས་འདུག)ལུང་པའི་གོ་བ་སྡེ་པའི་ཀློང་ཆུའི་འགྲམ་དུ་གནས་ཡོད་ཅིང་། འདི་ནི་བོད་བཙན་པོའི་སྐབས་ཀྱི་རྡོ་བརྐོས་རི་མོ་དངོས་ཡིན་ལ། ལོ་ངོ་ཆིག་སྟོང་ཉིས་བརྒྱ་ལྷག་གི་ལོ་རྒྱུས་ཡོད། ས་གནས་དེ་གས་རྡོ་བརྐོས་རི་མོ་འདི་ལ་བྲག་ལྷ་མོ་ཞེས་པའི་མིང་འབོད་སྲོལ་ཡོད། རྡོ་བརྐོས་ངོས་ནི་ལྷོ་ནུབ་ཏུ་འཁོར་ཡོད་པ་དང་། མཐོ་ཚད་ལ་སྨི་༢༥་༦ཙམ་ཡོད། ཞེང་ཚད་ལ་སྨི་༨་༣ཙམ་ཡོད། བྲག་ངོས་ཀྱི་གཙོ་སྐུ་རྣམ་པར་སྣང་མཛད་དང་། འཁོར་ནི་གཡས་སུ་སྤྱན་རས་གཟིགས། གཡོན་དུ་ཕྱག་ན་རྡོ་རྗེ་བཅས་ཡིན། རྡོ་བརྐོས་རི་མོའི་ནང་བོད་ཡིག་གི་ཁ་བྱང་དང་། རྒྱའི་ཡི་གེ་བཅས་བརྐོས་ཡོད།
སྤྱན་རས་གཟིགས་བཅུ་གཅིག་ཞལ་གྱི་བྲག་བརྐོས།
འདན་ཁོག་གི་འབའ་གྷའི་དབེན་མགུ་（གཡེར་འགུལ།）གྲོང་གི་རྣམ་པར་སྣང་མཛད་ཀྱི་རྡོ་བརྐོས་རི་མོ་དང་། པདྨ་རིའི་འདབས་ཀྱི་རྟ་མདའི་རྡོ་བརྐོས་རི་མོ་ཡང་ཆེད་མཁས་པ་ཚོས་བོད་བཙན་པོའི་དུས་ཀྱི་རྡོ་བརྐོས་ཡིན་པའི་ངོས་འཛིན་གནང་ཡོད།
ཚེ་དཔག་མེད་ཀྱི་བྲག་བརྐོས་རི་མོ།
གཞན་ཡང་། འདན་ཁོག་གི་ཉིན་རྫོང་དགོན་པའི་རྒྱབ་ཕྱོགས་སུ་བྲག་སྣ་གནས་པོ་ཞེས་པའི་བྲག་ངོས་སུ་སྤྱན་རས་གཟིགས་བཅུ་གཅིག་ཞལ་གྱི་རྡོ་བརྐོས་རི་མོ་དང་། སྒ་ལྡན་འགྱུར་ལ་རྩ་སྡེ་པ་རུ་སྤྱན་རས་གཟིགས་བཅུ་གཅིག་ཞལ་གྱི་རྡོ་བརྐོས་ལ་དེ་སྔར་དུས་ཚོད་གཏན་འཁེལ་བྱས་མེད་ཀྱང་དེ་དག་ནི་ཡོན་རྒྱལ་རབས་དུས་ཙམ་ཨེ་ཡིན་སྙམ། ད་དུང་གདན་ཁོག་ཡུལ་དུ་མ་ཎི་ཡིག་དྲུག་དང་ཨ་རང་བྱོན་སོགས་ཀྱང་མང་པོ་འདུག །དེ་དག་ལ་ཀོང་ཇོའི་གཏམ་རྒྱུད་དང་གླིང་གི་ལོ་རྒྱུས་ཀྱང་མང་པོ་བཤད་རྒྱུ་འདུག །
མགོན་པོ་འོད་དཔག་མེད་ཀྱི་བྲག་བརྐོས་རི་མོ་དང་མཚན་གཟུངས།
