སྨྀ་ཏི་ཛྙ་ནའི་འཇིམ་སྐུ་ང་འདྲ་མ།
དྲན་ཐང་དགོན་པ་ལ་མཚན་གཞན་འདན་བཀའ་བརྒྱུད་དྲན་ཐང་ཆོས་འཁོར་གླིང་ཞེས་ཞུ་ཞིང་། མཉམ་མེད་འགྲོ་མགོན་དྭགས་པོ་བཀའ་བརྒྱུད་ཀྱི་ཡ་གྱལ་སྒྲུབ་བརྒྱུད་ཀརྨ་ཀཾ་ཚང་གི་ཆོས་བརྒྱུད་འཛིན་པའི་དགོན་པ་ཞིག་ཡིན། དེའི་ས་བབ་ནི་མཚོ་འཕགས་སྨི་༣༨༠༠ཙམ་ཡོད། དཀར་མཛེས་བོད་རིགས་རང་སྐྱོང་ཁུལ་སེར་ཤུལ་རྫོང་དྲན་འཁོར་ཡུལ་ཤོག་དྲན་ཐང་གྲོང་སྡེ་འབྲི་ཆུའི་ཤར་རྒྱུད་ཀྱི་འགྲམ་ངོགས་སུ་ཆགས་ཡོད། རྒྱལ་ཁབ་ལམ་ཆེན་༢༡༥པའི་ཟུར་དུ་ཡོད་པས་འགྲིམ་འགྲུལ་གྱི་འགྲོ་ལམ་ཡངས་ཤིང་སྟབས་ཧ་ཅང་བདེ། སེར་ཤུལ་རྫོང་གི་ལྟེ་བ་འཇུ་སྒར་གྲོང་རྡལ་དང་བར་ཐག་སྤྱི་ལེ་༡༡༦ཙམ་དང་། དྲན་འཁོར་ཡུལ་ཤོག་དང་བར་ཐག་སྤྱི་ལེ་༡༣ཙམ་ཡོད། སྤྱི་ལོ་༡༩༨༣ལོར་སེར་ཤུལ་རྫོང་མི་དམངས་སྲིད་གཞུང་གིས་ཆོག་མཆན་གནང་སྟེ་དགོན་སྒོ་ཕྱེས་པའི་གྲས་ཤིག་ཡིན།
སྨྀ་ཏི་ཛྙ་ནའི་མཆོད་རྟེན།
དྲན་ཐང་དགོན་པ་དྲན་ཁོག་ཡུལ་ཚོའི་དཀྱིལ་ལ་ཆགས་ཏེ་གྲོང་མི་དེ་ཚོས་ཞིང་འདེབས་པ་དང་། སྒོ་ཕྱུགས་འཚོ་སྐྱོང་བྱེད་པ་བཅས་ཞིང་མ་འབྲོག་གི་འཚོ་གནས་སུ་མཆིས། གྲོང་མིའི་ཡུལ་སྲོལ་གོམས་གཤིས་སོགས་ཕལ་ཆེར་འདན་ཁོག་ལུང་པ་སྤྱི་དང་འདྲ་ཡང་། རྒྱ་ཚང་སྡེ་པའི་སྐད་ནི་འཇོ་མདའི་ལྷོ་པའི་སྐད་དང་འདྲ། བོད་ལ་མེ་ཏོག་ཕོག་པའི་ལྷ་སྐལ་ཞེས་ཟེར་སྲོལ་ཡོད་པ་ལྟར་དྲན་འཁོར་དཔོན་གྱི་ཡུལ་འབྲོག་གླིང་གསུམ་གྱི་ལྷ་སྡེ་མི་སྡེ་ཐམས་ཅད་ཀྱིས་ཆོས་འཇིག་རྟེན་གང་ལའང་མི་འགལ་བའི་ཁྲིམས་མཐུན་ལུགས་མཐུན་གྱི་ཆོས་སྒོ་སྤེལ་བཞིན་གནས།
དྲན་ཐང་དགོན་པ་དེ་འདན་ཁོག་གི་དགོན་པ་ཁག་ལས་སྔ་ཤོས་སུ་ཕྱག་བཏབ་པ་ཡིན་ཏེ། དུས་རབས་བཅུ་གཅིག་པའི་སྟོད་ཙམ་སྟེ་སྤྱི་ལོ་༡༠༣༠ལོར། རྒྱ་གར་གྱི་པཎྜི་ཏ་་ཏི་ཛྙཱ་ནས་ཕྱག་བཏབ་ཅིང་མཛད་པ་བསྐྱངས་བ་དང་། སི་ཏུ་ཆོས་ཀྱི་འབྱུང་གནས་ཀྱིས་ཕྱི་གཙུག་ལག་ཁང་ཞིག་གསོ་དང་། ལྷ་ཁང་ལ་རབ་གནས་དང་། རབ་བྱུང་དང་བསྙེན་རྫོགས་བརྒྱ་ཕྲག་བསྒྲུབས་ཏེ། ལོ་རེ་བཞིན་བླ་བསྐོས་མངགས་པ་དང་། ཆོས་རྗེ་མཁན་སློབ་དུ་མ་དྲན་ཐང་དགོན་དུ་ཕེབས་ཏེ་སྨིན་བྱེད་ཀྱི་དབང་། བརྒྱུད་པའི་ལུང་། གྲོལ་བྱེད་ཀྱི་ཁྲིད་གནང་བས་ངག་རྒྱུན་དུ་དྲན་ཐང་དགོན་པའི་དཔོན་ལ་སྡེ་དགེ་ཚང་དང་། བླ་མ་ལ་དཔལ་སྤུངས་ཆོས་རྗེ་ཞེས་ཟེར་སྲོལ་ཡོད། དྲན་ཐང་རི་ཁྲོད་མཆོག་སྤྲུལ་སྐུ་ཕྲེང་རིམ་བྱོན་ནས་དགོན་པའི་ལས་འཛིན་ཡོངས་ཀྱིས་ཕྱར་བ་གྲུ་བཏེགས་ཀྱི་དཔེར་ལྟར། མདོ་སྔགས་རིག་གནས་དང་བཅས་འཆད་ཉན་སྒོམ་སྒྲུབ་དང་། དགོན་པའི་ལོ་རེའི་དུས་མཆོད་དང་། ཆོ་ག་ཆོས་སྤྱོད། འདོན་རྟ་དབྱངས། འཆམ་གར་སྟབས་བཅས་ཀཾ་ཚང་ཡབ་སྲས་ནས་བྱུང་བའི་མཐོང་བ་བརྒྱུད་པའི་ཕྱག་ལེན་ལྟར། འཛིན་སྐྱོང་སྤེལ་གསུམ་གྱིས་བསྟན་འགྲོའི་དོན་རྒྱ་ཆེན་པོ་མཛད་པ་དང་། སྒྲུབ་བརྒྱུད་ཤིང་རྟ་ཆེ་བརྒྱད་ཀྱི་སྐྱེས་ཆེན་དམ་པ་དུ་མ་དྲན་ཐང་དགོན་དུ་ཞབས་ཀྱིས་བཅགས་ཏེ་དགོན་པའི་རིག་དངོས་རྩ་ཆེན་ལ་མངོན་པར་བཏུད་དེ་པཎྜི་ཏ་་ཏི་ཛྙཱ་ནའི་སྐུ་འབུམ་མཆོད་རྟེན་མདུན་ལ་ཕྱག་མཆོད་བཀུར་བསྟི་དང་བསྟན་འགྲོའི་བདེ་སྐྱིད་འཕེལ་བའི་སྨོན་ལམ་རྒྱ་ཆེར་བཏབ། ལྷག་པར་དུ་དྲན་ཐང་རི་ཁྲོད་སྐུ་ཕྲེང་བདུན་པ་མཆོག་སྤྲུལ་ཀུན་བཟང་འགྱུར་མེད་དགུང་ལོ་དགུ་པར་དྲན་ཐང་དགོན་པའི་གསེར་ཁྲིར་མངའ་གསོལ་ནས་དགུང་ལོ་༢༢བར་ཚབ་ཚ་སྒྲུབ་རྒན་ཀརྨ་སེངྒེ་དང་། འདམ་དཀར་དུལ་མོ་ཆོས་རྗེ། འདན་རྣམ་རྒྱལ་གླིང་གི་སྒྲུབ་དཔོན་བླ་མ་རྡོར་རྒྱལ་སོགས་ལས་བཀའ་མདོ་རྒྱུད་ལུང་མན་ངག་དང་བཅས་པར་གསན་བསམ་སྒོམ་པར་མཛད། དེ་ནས་ད་བར་ཁོང་ཉིད་ཀྱིས་དྲན་ཐང་དགོན་པའི་རྟེན་བཞེངས་མཆོད་འབུལ་དགེ་འདུན་སྤྱིའི་འཚོ་རྟེན་བཅས་འགན་བཞེས་གནང་བ་དང་། ལྷག་པར་དུ་རིག་དངོས་སྲུང་སྐྱོང་ཨང་དང་པོར་མཛད་དེ། སྲུང་སྐྱོང་ཁྲོད་འཕེལ་རྒྱས་དང་འཕེལ་རྒྱས་ཁྲོད་སྲུང་སྐྱོང་བྱས་དང་བྱེད་བཞིན་པའོ། །
གླིང་གེ་སར་གྱིས་སྨྀ་ཏི་ལ་ཕུལ་བའི་རྨོག །
ཨ་ཕྱི་ཆོས་སྒྲོན་གྱི་ཞལ་འབག
ཀརྨ་པ་བདུན་པ་ཆོས་གྲགས་རྒྱ་མཚོའི་དུང་དཀར།
སི་ཏུ་ཆོས་འབྱུང་གི་ཕྱག་བཟོའི་ཞལ་གཟིགས་སྤྲིན་མཇལ་མ།