《 སྨྲ་སྒོ་མཚོན་ཆ།》ནི། དུས་རབས་བཅུ་གཅིག་པའི་དུས་འགོ་སྟེ་སྤྱི་ལོ་༡༠༢༤ལོར་དྲན་པ་ཡེ་ཤེས་སམ་པཎྜི་ཏ་ཏི་ཛྙཱ་ནས་བརྩམས། བོད་ཀྱི་བརྡ་སྤྲོད་པའི་གཞུང་རྙིང་པ་ཞིག་སྟེ་བོད་ཀྱི་སྐད་ལ་ཉེ་བར་མཁོ་བ་སྟེ། ཚིག་གིས་དོན་སྟོན་པ་ལ་ཚིག་ཕན་ཚུན་སྦྱོར་དགོས་ཤིང་། དོན་གསལ་བར་སྟོན་པ་ལ་ཕྲད་དང་། ཕྲད་འདུས། ཚིག་རྒྱན་རྣམས་མེད་དུ་མི་རུང་བའི་ཡན་ལག་ཡིན་པ་སྟོན་པའི་གཞུང་། ཕྱིས་བྱུང་གི་མཁས་པ་རྣམས་ཀྱིས་བརྩམས་པའི་སུམ་རྟགས་སོགས་བརྡ་སྤྲོད་རིག་པའི་གཞུང་ལུགས་ཁག་ནང་《སྨྲ་སྒོ་མཚོན་ཆ།》ནས་ལུང་མ་དྲངས་པ་མེད་པ་ལྟ་བུར་གྱུར། བུ་སྟོན་ཆོས་འབྱུང་དུ་སྨྀ་ཏི་ཁམས་སུ་བྱོན་ནས་བོད་སྐད་མཁས་པར་གྱུར་ཏེ། ཕྱིས་སུ་ལིང་ཆུ་གསེར་ཁང་དུ་བྱོན་ཏེ་སྨྲ་སྒོ་བརྩམས། ཞེས་འཁོད་ཡོད་ནའང་ས་གནས་དེ་ལུང་པའི་བྱེ་བྲག་གི་མིང་ཞིག་ཡིན་པས་སུས་ཀྱང་དེ་ལ་ཡིད་གཟབ་བྱས་མེད་པ་སྙམ། འདི་རྒན་པོའི་ངག་རྒྱུན་དང་བུ་སྟོན་ཆོས་འབྱུང་སོགས་ཀྱི་ལོ་རྒྱུས་ཡིག་ཆ་དང་མཐུན་པས། ་ཏིས་སྨྲ་སྒོ་མཚོན་ཆ་མཛད་ས་དེ་ད་ལྟའི་དྲན་འཁོར་ཡུལ་ཤོག་རྒྱ་ཚང་སྡེ་པའི་ཁོངས་གཏོགས་རེ་ཆུ་མདའ་ཞེས་པ། དྲན་ཐང་དགོན་པའི་བྱང་རྒྱུད་བར་ཐག་སྤྱི་ལེ་༡༥ཡོད་པ་དེར་ལིང་ཆུ་གསེར་ཁང་ཞེས་པའི་ཁང་ཤུལ་ཞིག་ཡོད་པ་དེ་དཔྱད་གཞི་གསར་པ་ཞིག་བཞག་ཡོད།
སྨྀ་ཏི་བཞུགས་གནས་ཀྱི་རྗེས་ཤུལ་རྫ་གྱོ།
ཁང་ཤུལ་དེ་ནས་ཕྱིས་སུ་ས་བརྐོས་རྡོ་སློག་བྱེད་སྐབས་མཆོད་པའི་ཡོ་བྱད་ཕུད་རྐང་སོགས་རྙེད་རྒྱུ་ཡོད་པ་དང་། ལྷག་པར་དུ་ལོ་རྒྱུས་གྱི་རིན་ཐང་ཆེས་ཆེ་ལྡན་པའི་གྱོ་དང་རྫ་གཡམ་སེར་རྩི་ཅན་པདྨ་གདན་གཞི་སྟེང་དུ་མཆོད་རྟེན་གྱི་འབུར་གཟུགས་ཡོད་པ་ཅན་གསར་རྙེད་བྱུང་ཡོད་པ་དང་། དེ་བཞིན་དུ་ཡུལ་མིའི་རྒྱུན་ཆགས་སུ་བཤད་སྲོལ་དུའང་པཎ་ཆེན་སྨྀ་ཏི་ལྷ་ཁང་ས་ཡོམ་ཆེན་པོ་ཞིག་གི་སྐབས་སུ་འཇིག་པར་གྲགས། སྨྀ་ཏི་ཁམས་སུ་བྱོན་ཏེ་བཞུགས་ཤིང་བོད་སྐད་མཁས་པར་གྱུར་ནས་རྒྱ་དཔེ་མང་པོ་བོད་ཡིག་ཏུ་བསྒྱུར་ཞེས་གསུངས་པའི་རྒྱ་དཔེ་བོད་ཡིག་ཏུ་བསྒྱུར་སའང་འདིར་ཨེ་ཡིན་སྙམ།
ཁོང་གི་འགྱུར་རྩོམ་སྡེ་དགེའི་བཀའ་འགྱུར་དཀར་ཆག་ལས། རྒྱུད་ཕྱི་མ་བརྟག་པ་བདུན་པ་དང་། རྒྱུད་ཕྱི་མའི་ཕྱི་མ་བརྟག་པ་ལྔ་པ། དཔལ་གདན་བཞི་པའི་རྣམ་པར་བཤད་པའི་རྒྱུད་ཀྱི་རྒྱལ་པོ་རྣལ་འབྱོར་མ་ཐམས་ཅད་གསང་བ་ཞེས་བྱ་བ་ལེའུ་བརྒྱ་ལྷག་པ། རྣལ་འབྱོར་ཆེན་པོའི་རྒྱུད་ཐམས་ཅད་ཀྱི་སྙིང་པོ་གསང་བ་འདུས་པའི་བཤད་རྒྱུད་རྡོ་རྗེ་ཕྲེང་བ་ལྷ་མོ་བཞིས་ཡོངས་སུ་ཞུས་པའི་ལེའུ་བཞི།ཞེས་སོགས་དང་།སྡེ་དགེའི་བསྟན་འགྱུར་དཀར་ཆག་ལས། འཕགས་པ་གདན་བཞིའི་རྣམ་པར་བཤད་པ་སྨད་ཆ་དང་། གདན་བཞིའི་ཡུམ་སྐོར་ལ་ཡེ་ཤེས་དབང་ཕྱུག་མའི་སྒྲུབ་ཐབས། དཔལ་རྡོ་རྗེ་བདུད་རྩིའི་དཀའ་འགྲེལ། རྡོ་རྗེ་བདུད་རྩིའི་སྙིང་པོ། རྟོག་པ་ཐམས་ཅད་རྒྱུད་ཀྱི་བཤད་པ། རྒྱུད་ཕྱི་མའི་ཕྱི་མ་རྣམ་པར་བཤད་པ་ཤློ་ཀ་དྲུག་སྟོང་ལྔ་བརྒྱ་བདུན་ཅུ་པ། བྱང་ཆུབ་སེམས་ཀྱི་འགྲེལ་པའི་རྣམ་པར་བཤད་པ། སྦྱོར་བ་ཡན་ལག་དྲུག་པ་ཞེས་བྱ་བའི་འགྲེལ་པ་རྒྱུད་ཀྱི་རྒྱལ་པོ་དཔལ་གསང་བ་འདུས་པའི་འགྲེལ་པ་རྩ་བའི་རྒྱུད་དང་རྒྱུད་ཕྱི་མ་གཉིས། ལྷ་མོ་བཞིས་ཡོངས་སུ་ཞུས་པའི་རྣམ་པར་བཤད་པ་མན་ངག་རྒྱས་པ། ལྷ་མོ་བཞིས་ཡོངས་སུ་ཞུས་པའི་རྣམ་པར་བཤད་པ། ཞེས་བྱ་བ་མང་ངོ་། །དེ་བཞིན་མཚན་བྱང་དེ་དག་ཁོ་བོས་སྡེ་དགེའི་པར་མའི་བཀའ་བསྟན་འགྱུར་གྱི་བཞུགས་བྱང་དཀར་ཆག་ལས་ཕྱོགས་རེ་ཙམ་ཇི་ལྟར་དེ་བཞིན་དུ་མཚན་བཤུས་བྱས་ཏེ་ཕྱོགས་གཅིག་ཏུ་བསྡེབས་པ་ཡིན་པས། ཞིབ་གསལ་གཟིགས་འདོད་རྣམས་ཀྱིས་གོང་ཞུས་དཀར་ཆག་ལ་གཟིགས་རོགས་གནང་།
མདོར་ན། ལོ་བརྒྱ་ཐུབ་པའི་ཚེ་མེད་ན་ཡང་། བསྐལ་པར་གནས་པའི་ཚིག་ཡོད་ཅེས་ཟེར་བའི་དཔེ་ལྟར། ་ཏི་ཛྙཱ་ནའི་མཛད་འཕྲིན་འོད་སྟོང་འབར་བ་འདན་ཁོག་གི་ལོ་རྒྱུས་ཙམ་མ་ཡིན་པ་བོད་གངས་ཅན་གྱི་ཡུལ་ཁམས་ཆེན་པོ་ལ་བཀའ་དྲིན་གཞལ་མཐའ་མེད་ཅིང་ཆེས་གནད་འགག་ཆེ་བའི་མི་སྣ་ཞིག་ཡིན་ནོ། །