རྫ་དཔལ་སྤྲུལ་གྱིས་གཏམ་པདྨའི་ཚལ་གྱི་ཟློས་གར་བརྩམས་ཚུལ་དང་བརྩམས་སའི་ས་ཆ།

ལྷ་ཆོས་དང་མཐུན་པའི་གཏམ་པདྨའི་ཚལ་གྱི་ཟློས་གར་ཞེས་བྱ་བའི་རྩོམ་པ་པོ་རྫ་དཔལ་དགེ་སྤྲུལ་སྐུའམ་རྫོགས་ཆེན་དཔལ་སྤྲུལ་རིན་པོ་ཆེ་མཆོག་ནི་བོད་རབ་བྱུང་བཅུ་བཞི་པའི་ས་འབྲུག་ལོར(༡༨༠༨—༡༨༨༧)ཁམས་བྱང་འབྲོག་དགེ་རྩེ་རྫ་ཆུ་ཁའི་སྡེར་གཏོགས་རྒྱལ་ཐོག་ཅེས་པའི་ཡབ་རྒྱལ་ཏོག་ལྷ་དབང་ཟེར་བ་དང་ཡུམ་ཁྲོམ་ཟ་རྗེས་དངོས་བུ་མོ་སྒྲོལ་མ་ཟེར་བའི་སྲས་སུ་སྐུ་འཁྲུངས། རྡོ་གྲུབ་ཆེན་འཇིགས་མེད་ཕྲིན་ལས་འོད་ཟེར་གྱིས་དཔལ་དགེ་བསམ་གཏན་ཕུན་ཚོགས་ཀྱི་སྤྲུལ་སྐུར་ངོས་བཟུང་། ཨོ་རྒྱན་འཇིགས་མེད་ཆོས་ཀྱི་དབང་པོ་ཞེས་སུ་མཚན་གསོལ།①ཆུང་དུས་ནས་མཚན་ལྡན་གྱི་དགེ་བའི་བཤེས་གཉེན་རབ་དང་རིམ་པར་བསྟེན་ཏེ། མདོ་སྔགས་གཞུང་ལུགས་ཐམས་ཅད་ལ་སྦྱངས་པ་དཔྱིས་ཕྱིན་པ་མཛད་དེ་གྲུབ་མཐའ་རིས་མེད་ཀྱི་མཁས་པའི་དབང་པོའི་མཚན་སྙན་གྱི་བ་དན་ཕྱོགས་བཞིར་ཁྱབ།

དཔལ་སྤྲུལ་ཨོ་རྒྱན་འཇིགས་མེད་ཆོས་ཀྱི་དབང་པོས་མཛད་པའི 《 གཏམ་པདྨའི་ཚལ་གྱི་ཟློས་གར།》དུ།“བྱང་ཐང་མེ་ཏོག་སྐྱེད་ཚལ་ནས་འོང་བའི་བྲམ་ཟེའི་ཁྱེའུ་པདྨ་དགྱེས་པ་ཞེས་བྱ་བ། ཅི་ཡང་ཤེས་པ། གར་ཡང་འགྲོ་བ། གང་དུ་ཡང་གནས་པ། སུ་དང་ཡང་མཐུན་པ་ཞིག་གནས་བཅས་ཏེ། སྐྱོན་མེད་པདྨ་ལྟ་བུ་ཞེས་བྱ་བའི་བྱང་ཆུབ་ཀྱི་སེམས་ལ་མཉམ་པར་འཇོག་གོ”ཞེས་འབྱུང་བ་དེས་ཁོང་གི་སྐུ་ཚེ་ཧྲིལ་པོར་བཀའ་གདམས་གོང་མ་རྣམས་ཀྱི་མཛད་བཟང་ལྷུར་བཞེས་མཛད་པ་ཚུལ་བཞིན་དུ་མངོན་ཐུབ་ལ། ཉིད་ནི་དཔོན་ཆེན་གྱི་ཁ་ལ་མི་རྩི་བ་དང་། རྒྱུ་ཆེན་གྱི་ངོ་ལ་མི་ལྟ། བླ་ཆེན་གྱི་ལད་མོ་མི་ལེན། ཟང་ཟིང་གི་འདུ་འགོད་མི་གནང་། བླ་བྲང་གི་སྤྲོས་པ་མི་མཛད། གྲྭ་སློབ་ཀྱི་འཁོར་ཚོགས་མི་སྐྱོང་བར། ཀུན་སྤངས་བྱ་བྲལ་གྱི་སྤྱོད་པས་རྒྱལ་ཁམས་ཕྱོགས་མེད་དུ་འགྲིམས། དེང་སྐབས་མིག་གི་བདུད་རྩིར་གྱུར་པའི་གསུང་རྩོམ་གྱི་ཁྲོད་དུ་བྱམས་ཆོས་དང་། སྤྱོད་འཇུག་ཡོན་ཏན་མཛོད་སོགས་ཀྱི་གཞུང་འགྲེལ་དང་ས་བཅད་ཡོད་ལ། 《 སྔོན་འགྲོའི་ཁྲིད་ཡིག་ཀུན་བཟང་བླ་མའི་ཞལ་ལུང་།》དང་། 《 གཏམ་པདྨའི་ཚལ་གྱི་ཟློས་གར།》 《 སྙན་ངག་གི་དཔེར་བརྗོད།》

《 སྡེབ་སྦྱོར་གྱི་སྡོམ་ཚིག》 《 མགུར་མ་སྣ་ཚོགས།》སོགས་ཀྱི་བཀའ་རྩོམ་ཧ་ཅང་མང་པོར་བཞུགས། དཔལ་སྤྲུལ་རིན་པོ་ཆེའི་གསུང་གི་ཐུན་མོང་མ་ཡིན་པའི་ཁྱད་ཆོས་ནི་རྡོ་གྲུབ་ཆེན་གྱིས་མཛད་པའི་དཔལ་སྤྲུལ་རིན་པོ་ཆེའི་རྣམ་ཐར་ལས།“མཁས་པས་བརྟགས་ན་དོན་བཟང་བ། བླུན་པོས་ཉན་ཡང་གོ་སླ་བ། གནད་འདུས་ལ་འཛིན་བདེ་བ། རན་ལ་འབྲེལ་ཆགས་པ། སྙན་ལ་རོ་ཉམས་དང་ལྡན་པ། འཇམ་རྩུབ་ཇི་ལྟར་བཤད་ཀྱང་གདམས་ངག་གི་རོ་གཅིག་ཏུ་མཐུན་པར་འབྱུང་བས་མཁས་རྨོངས་བར་མའི་སྐྱེ་བོ་མཐའ་དག་གི་ཡིད་འཕྲོག་པ་ཡོད་”ཅེས་གསུངས་པར་ལྟར་རོ། །

གཏམ་པདྨའི་ཚལ་གྱི་ཟློས་གར་གྱི་ནང་དོན་གཙོ་བོ།

རྫ་དཔལ་སྤྲུལ་འཇིགས་མེད་ཆོས་ཀྱི་དབང་པོས་རང་གི་སློབ་མ་བཀྲ་ཤིས་དགེ་ལེགས་ཀྱི་ཆུང་མ་ནད་ཡམས་ཀྱིས་མནར་བའི་དོན་རྐྱེན་དེ་གཞིར་བཞག་ནས། བཀྲ་ཤིས་དགེ་ལེགས་དང་རིག་འཛིན་སྒྲོལ་མ་གཉིས་བུང་བ་ཁྱོ་ཤུག་གཉིས་ཀྱི་གཟུགས་སུ་བཀོད་ནས་བརྩམས་པའི་རབ་རྟོག་གི་སྒྲུང་གཏམ་ཞིག་སྟེ། ཁམས་བྱང་འབྲོག་དགེ་རྩེ་རྫ་ཆུ་ཁའི་རྩེ་མཐོར་པདྨའི་རི་བོ་ངོས་ཡངས་ཤིང་རྒྱ་ཆེ་བའི་ཡུལ་ལྗོངས་སུ་ལྷ་རྣམས་ཀྱིས་བྱིན་གྱིས་བརླབས་པའི་གནས་ཤེལ་དཀར་པདྨའི་ཕུག་པ་ན་བྱ་བྲལ་གྱི་འཚོ་བར་རོལ་བའི་བྲམ་ཟེ་ཁྱེའུ་པདྨ་དགྱེས་པ་ཞེས་བྱ་བ་དང་། གནས་དེ་དང་ཧ་ཅང་མི་རིང་བ་ན་པདྨ་སྤུངས་པའི་ཚལ་ལྗོན་ཤིང་གི་ར་བས་བསྐོར་བའི་སྤང་ལྗོངས་མེ་ལོང་གི་ངོས་ལྟར་མཉམ་པ་ན་པདྨ་རྒྱས་པའི་ཚལ་ཡོད་པ་སྟེ། པདྨའི་མེ་ཏོག་རྣམ་པ་སྣ་ཚོགས་བཞད་ཡོད་པ་དང་། སྐྱེད་མོས་ཚལ་དེ་ཡི་ནང་བུང་བའི་ཚོགས་དུ་མ་འཕུར་ལྡིང་གཡོ་ཞིང་རྩེ་བ། ཁྱད་པར་དུ་གསེར་གྱི་སྦྲང་མ་འདབ་ཡངས་དང་། གཡུའི་སྦྲང་ཆུང་ངག་སྙན་ཞེས་བྱ་བའི་ཕན་ཚུན་མཛའ་བརྩེའི་ཡིད་ཀྱིས་ལྷག་པར་གཅུགས་པའི་ཁྱོ་ཤུག་གཉིས་ཀྱང་གནས་ཏེ། དེ་གཉིས་ཀྱིས་དལ་འབྱོར་རྙེད་དཀའ་བའི་མི་ལུས་རིན་པོ་ཆེ་ཐོབ་པར་བསགས་པའི་ནོར་དང་། བསྐྱངས་པའི་འཁོར། བརྩེགས་པའི་མཁར། རྨོས་པའི་ཞིང་སོགས་འཇིག་རྟེན་པའི་ཕུན་ཚོགས་མཐའ་དག་ལ་རྨོངས་ནས་བསྡད་ན་སྙིང་པོ་མེད་པའམ་ཐམས་ཅད་མི་རྟག་པའི་རང་བཞིན་ཡིན་པར་ཤེས་ཏེ། ལྗོངས་ཀྱི་དྲང་སྲོང་དོན་ཀུན་གྲུབ་པ་ཞེས་བྱ་བ། བརྩེ་བའི་ཐུགས་དང་ལྡན་པ་དང་། ཞི་བའི་སྤྱོད་ལམ་དང་ལྡན་པ། འགྲོ་དོན་ལ་ལྷག་པར་དགྱེས་པ་ཞིག་ཡོད་པ་དེའི་དྲུང་དུ་བུང་བ་གཉིས་ཕྱིན་ནས་གུས་པའི་ཕྱག་གིས་བཏུད། སྦྲང་རྩིའི་རོ་མངར་གྱིས་མཆོད། སྙན་པའི་གཏམ་གྱིས་མདུན་བསུས་ནས་གསོལ་བ་བཏབ་པ་བཞིན།①

དྲང་སྲོང་ཆེན་པོས་ཀྱང་སྦྲང་བུ་ཁྱོ་ཤུག་གཉིས་ལ་དལ་འབྱོར་གྱི་མི་ལུས་རྙེད་པར་དཀའ་ལ་ཟད་པར་སླ་བ་དང་། དངོས་པོ་གནས་ལུགས་ཐམས་ཅད་མི་རྟག་པ་ཡིན་པ། འཁོར་བའི་ཉེས་དམིགས། ཐར་པའི་ཕན་ཡོན། སྐྱབས་འགྲོའི་ཕན་ཡོན་སོགས་གསུངས་ཏེ་བྱིན་རླབས་དང་སྨོན་ལམ་རྒྱ་ཆེར་མཛད། དེ་ནས་བུང་བ་གཉིས་ཀྱང་སྤྱོད་ལམ་ཕལ་ཆེར་དྲང་སྲོང་ཆེན་པོས་གསུངས་པར་བཞིན་དུ་བསྒྲུབས་ལ། སྐབས་རེར་བག་མེད་ཀྱི་རྩེད་མོ་དང་འདོད་པའི་ཡུལ་ལ་ཆགས་ཏེ་དུས་ཡུན་རིང་འདས་ཏེ་བསྡད་དོ། །

ཉིན་ཞིག་ངག་སྙན་གྱིས་མེ་ཏོག་གི་ཟིལ་མངར་བཏུས་ཤིང་། འདབ་ཡངས་ཀྱིས་ནམ་མཁའ་ལ་འཕུར་ལྡིང་གཡོ་བའི་སྐབས་ཤིག་ཉི་མའི་མདངས་འོད་གློ་བུར་ཉམས་ནས། སྤྲིན་ནག་གི་གྲིབ་མ་ས་ལ་ལྷུང་སྟེ་པདྨ་རྣམས་ཅིག་ཅར་དུ་ཁ་ཟུམ་པས་ངག་སྙན་པདྨའི་སྦུབས་སུ་འཐུམས་ནས་འཇིགས་ཤིང་སྐྲག་པའི་གནས་སྟངས་ཤིག་ཏུ་ལྷུངས་སྐབས། བུང་བ་ཁྱོ་ཤུག་གཉིས་ཀྱི་སྔར་དྲང་སྲོང་ཆེན་པོ་དོན་ཀུན་གྲུབ་པས་གསུངས་པའི་གདམས་ངག་ཟབ་མོ་འཆི་རྐྱེན་མང་བ། གསོན་རྐྱེན་ཉུང་བ། འདུས་བྱས་ཐམས་ཅད་མི་རྟག་པ་ཡིན་པ་སོགས་མིག་མཐོང་ལག་ཟིན་གྱིས་ར་འཕྲོད་བྱུང་ནས་ཞེ་འགྱོད་སེམས་གཏིང་ནས་སྐྱེས་ཏེ་སྡུག་བསྔལ་གྱི་གཏམ་སྣ་ཚོགས་སྨྲས། མདོར་དོན་འདབ་ཡངས་ལ་འཕྲལ་དུ་དམ་པའི་ཆོས་ལ་སློབ་སྦྱོང་དང་ཉམས་ལེན་བྱེད་དགོས་པའི་སྐུལ་མ་ནན་ཏན་བྱས།

དེ་ནས་འདབ་ཡངས་ཀྱིས་ངག་སྙན་པད་མའི་སྦུབས་ནས་སྐྱོབ་པའི་ཅི་དགའ་གང་དྲག་གིས་ཐབས་བརྒྱར་འབད་དེ་བླ་མ་དང་མོ་པ། སྨན་པ་དག་གི་གསང་མིང་དུ་བྱ་རོག་དང་། མཆིལ་པ། སྦལ་པ། སྦྲུལ། འཕྱི་བ། ཁུ་བྱུག །རྐྱང་། སྡོམ་ནག །འོལ་པ་སོགས་ཀྱི་གནས་སུ་གསོལ་བ་ཞབས་ཏོག་ཞུས་ནས་ངག་སྙན་སྡུག་བསྔལ་ལས་ཐར་བའི་གྲོགས་བགྱི་པའི་ལས་ལ་བྲེལ།

རེ་ཞིག་འདབ་ཡངས་ནས་ཀྱང་ཡོངས་ལ་གྲགས་པའི་སྲོག་ཆགས་ཆེ་རྒུ་དེ་དག་གི་གསུང་ཚུལ་ལ་བལྟས་ན་ནམ་ཕུགས་སྤྲིན་ནག་དྭངས་ནས་ངག་སྙན་ཡང་ཐར་ཐུབ་པ་ཞིག་འོང་བ་ཡིན་ནམ་སྙམ་ནས་བློ་བག་ཕབ་སྟེ་ཅུང་ཞིག་གནས་པའི་ཚེ། ནམ་མཁའ་ལ་སྤྲིན་ནག་ལྷོག་ལྷོག་ཁོལ་ཞིང་ཕྱོགས་ཐམས་ཅད་ཀྱང་ངམ་ནག་འཁོར་འཁོར་བྱེད་ལ། ལྷོ་ཕྱོགས་ནས་འབྲུག་སྒྲ་ལྡིར་རི་རི་བྱེད་པ་དང་ཆབས་ཅིག་རླུང་དྲག་པོ་འུ་རུ་རུ་གཡོ་བ་དང་མཉམ་དུ་པདྨའི་འདབ་མ་རྣམས་ཀྱང་ལྷག་པར་ཡང་བཅུམ་ཞིང་སྡུད་དུ་བྱུང་བས་ངག་སྙན་ཡང་པདྨའི་སྦུབས་སུ་འཐུམས་ནས་རྐང་ལག་རྣམས་བརྐྱང་བསྐུམ་མི་ནུས་ཤིང་། དབུགས་ཀྱང་འཚུབས་ཏེ་སྐད་འདོན་དཀའ་བར་གྱུར།①

དེ་ནས་ཅུང་མ་འགོར་བར་རླུང་དྲག་པོ་ལྡང་བའི་གསེབ་ནས་སེར་བ་ཐར་ར་ར་འབབ་ཅིང་། གློག་དམར་གྱིས་ཞགས་པ་བར་སྣང་ལ་ཚབ་ཚུབ་འཁྱུགས་ཤིང་བྱུང་བས། འདབ་ཡངས་ཀྱང་ཅི་བྱ་གཏོལ་མེད་པར་གྱུར་ནས་གད་ཁུང་ཞིག་ཏུ་འཛུལ་ནས་སྨྲེ་སྔགས་འདོན་ནས་བསྡད། སེར་བས་རྩྭའི་རྩེ་ཤིང་དང་མེ་ཏོག་ཐམས་ཅད་ཀྱང་ཆེ་བ་རྣམས་བསྙིལ། ཆུང་བ་རྣམས་བརྡལ། རིང་བ་རྣམས་བཅག །ཐུང་བ་རྣམས་མནན། ཕྲ་མོ་རྣམས་རྗེས་ཤུལ་ཙམ་ཡང་མེད་པར་བྱས། ངག་སྙན་གནས་པའི་མེ་ཏོག་ཀྱང་སེར་བས་མ་བཅོམ་པར་འདུག་རུང་མེ་ཏོག་ཆུ་གཏིང་དུ་བྱིངས་པས་ངག་སྙན་སྦུབས་སུ་འཐུམས་ནས་ཤི་སྟེ་རོ་ཡང་གུམ་གུམ་པོར་བྱས་ནས་གེ་སར་ལ་འབྱར་འདུག །འདབ་ཡངས་ཤིན་ཏུ་མྱ་ངན་གྱིས་ནོན་ནས་སྙིང་ཁར་འཚངས་ཤིང་མིག་མཆི་མས་གང་ནས་འདུག་དུས། ཉི་འོད་གསལ་བ་དང་པད་འདབ་བྱེ་བ། བུང་བ་གཞན་གྱི་རྩེ་དགའི་རྣམ་འགྱུར་སོགས་སྔར་སེམས་ལ་དགའ་བ་སྐྱེད་པ་ཐམས་ཅད་ཀྱང་སྡུག་བསྔལ་གྱི་སྣོན་པར་གྱུར་ནས་ངེས་འབྱུང་སྐྱེས་ཏེ་དབེན་པར་བསྟེན་པའི་འདུན་པ་དྲག་པོ་འཁྲུངས་ཏེ་བྲམ་ཟེའི་ཁྱེའུ་པདྨ་དགྱེས་པའི་དྲུང་དུ་ཕྱིན། ཁ་ཞེ་གཉིས་མེད་ཀྱིས་ནང་ཆོས་ལ་བསྒྲུབས་པ་ཉམས་ལེན་བྱས། བྲམ་ཟེའི་ཁྱེའུ་པདྨ་དགྱེས་པས་ཀྱང་གསེར་གྱི་སྦྲང་ཆུང་འདབ་ཡངས་ལ་བརྟག་དཔྱད་བརྒྱུད། མཐར་རྗེས་སུ་བཟུང་ནས་སྐྱབས་ཡུལ་གྱི་ཁྱད་པར་དང་། དཀོན་མཆོག་གི་ཡོན་ཏན། བྱམས་སྙིང་རྗེ་བྱང་ཆུབ་ཀྱི་སེམས། བློ་ལྡོག་རྣམ་བཞི་སོགས་འདྲ་མིན་ལྔ་བཅུ་རྩ་ལྔ་དང་གདམས་པ་གནད་ཀྱི་མདོ་དྲུག་གི་ཞལ་རྒྱུན་དྲི་མ་མེད་པར་གསུངས་པ་འདབ་ཡངས་ཀྱི་ཡིད་ལ་ལྷག་པར་འཐད་དེ་བློ་གྲོས་མཐར་ཕྱིན་པའི་ཚུལ་ནི《 གཏམ་པདྨའི་ཚལ་གྱི་ཟློས་གར།》 གྱི་བརྗོད་བྱའི་ནང་དོན་གཙོ་བོ་ལགས་སོ། །

《 གཏམ་པདྨའི་ཚལ་གྱི་ཟློས་གར།》གྱི་སྲོག་ཆགས་ཀྱི་གསང་མིང་སྐོར།

《 གཏམ་པདྨའི་ཚལ་གྱི་ཟློས་གར།》ཞེས་པའི་རབ་རྟོག་སྒྲུང་གཏམ་འདི་ནི། སྤྱི་ལོའི་དུས་རབས་བཅུ་དགུ་པའི་དུས་དཀྱིལ་ཙམ་དུ་རྫ་དཔལ་སྤྲུལ་ཨོ་རྒྱན་འཇིགས་མེད་ཆོས་ཀྱི་དབང་པོ་སྡེ་དགེའི་འདན་ཁོག་པདྨ་ཤེལ་ཕུག་ན་སྐུ་མཚམས་བཞུགས་སྐབས། འདན་གཟིམ་དཔོན་བུ་བཀྲ་ཤིས་དགེ་ལེགས་དང་། འཇུ་ཚང་མགོན་པོ་དར་རྒྱས་ཀྱི་བུ་མོ་ལོ་ཉེར་ལྔ་ལོན་པ་དེ་གཉིས་ཁྱིམ་ཐབ་བཟུང་ནས་ཅུང་མ་འགོར་པའི་སྐབས་དེར་འདན་ཁོག་ལ་སོགས་ཡུལ་སྤྱི་ལ་ཡམས་ནད་སྐེ་སྐྲང་བྱུང་སྟེ་མི་མང་པོ་ཞིག་འཆི་རྐྱེན་སོང་བའི་སྐབས་དེར་གཟིམ་དཔོན་བུ་བཀྲ་ཤིས་དགེ་ལེགས་ཀྱི་ཆུང་མ་ཡང་རིམས་ནད་ཀྱིས་གྲོངས། གཟིམ་དཔོན་གྱི་བུ་བཀྲ་ཤིས་དགེ་ལེགས་དེ་ལ་བརྟེན་ནས་དཔལ་སྤྲུལ་རིན་པོ་ཆེའི་མདུན་ནས་རབ་ཏུ་བྱུང་། ཁོ་རང་གི་ལོ་རྒྱུས་དོན་རྐྱེན་རྣམས་རྩོམ་གཞིར་ཕུལ་ནས་འདུས་བྱས་མི་རྟག་པར་སྟོན་པའི་གདམས་ངག་ཅིག་འབྲི་བར་སྐུལ་བར་བརྟེན། དཔལ་སྤྲུལ་རིན་པོ་ཆེས་དོན་དེ་རྩོམ་གཞིར་བཟུང་ནས་བརྗོད་དོན་གཙོ་བོར་བློ་ལྡོག་རྣམ་བཞི་བྱས་པའི་སྒྲུང་《གཏམ་པདྨའི་ཚལ་གྱི་ཟློས་གར།》འདི་བརྩམས་པ་རེད།

དེར་བརྟེན《གཏམ་པདྨའི་ཚལ་གྱི་ཟློས་གར།》ནི་དངོས་ཡོད་འཚོ་བའི་གཏམ་རྒྱུད་ཅིག་གཞིར་བཟུང་ནས་བརྩམས་ཡོད་སྟབས། སྒྲུང་གཏམ་ནང་གི་རབ་རྟོག་རྒྱན་གྱིས་བརྒྱན་པའི་སྲོག་ཆགས་རྣམས་ཀྱི་མཚོན་བྱེད་མི་སྣ་ནི་ལོ་རྒྱུས་དངོས་དང་འབྲེལ་ནས་གསལ་ཐག་ཆོད་པ་ཞིག་གསུང་རྒྱུར་ཡོད་རུང་། འོན་ཀྱང་དེང་སང་ཞལ་རྒྱུན་ཕལ་ཆེར་ནུབ་ཅིང་དགོངས་པ་བཞེད་ཚུལ་མི་མཐུན་པ་ཁ་ཤས་བྱུང་།

རྩོམ་རིག་ནང་དུ་སྐབས་དེའི་གཟིམ་དཔོན་ཚང་གི་བུ་གསེར་སྦྲང་འདབ་ཡངས་དང་། འཇུ་ཚར་མགོན་པོ་དར་རྒྱས་ཀྱི་བུ་མོ་གཡུ་སྦྲང་ངག་སྙན། རྒྱས་པའི་པད་མ་ནི་འདན་ཆུ་རྡོ་ཚང་དང་། གཟིམ་དཔོན་ཚང་གཉིས་ནི་མངའ་ཁོངས་ཆེ་ཞིང་སྟོབས་འབྱོར་ལྡན་པ་མཚོན། ལྷག་པར་ཁེངས་ཤིང་བཀོད་པའི་པདྨ་ནི་འདན་ཨ་ཐུབ་ཚང་། ལྗོངས་ཀྱི་དྲང་སྲོང་དོན་ཀུན་གྲུབ་པ་ནི་འཇིགས་མེད་རྒྱལ་བའི་མྱུ་གུ། བྲམ་ཟེའི་ཁྱེའུ་པདྨ་དགྱེས་པ་ནི་དཔལ་སྤྲུལ་རིན་པོ་ཆེ་རང་ཉིད་དང་། མཆིལ་པའི་ཚོགས་ནི་འདན་ཆོས་འཁོར་དགོན་གྱི་གྲྭ་ཚང་། ཕོ་རོག་ནག་ཆུང་ནི་རག་མདོ་བླ་མ། སྦལ་པ་ནི་རག་ཆབ་གཅོད་པ། སྦྲུལ་ནི་སྨན་པ་ཚེ་དཔག །འཕྱི་བ་ནི་བླ་མ་ཆོས་དར། ཁུ་བྱུག་ནི་མོ་མ་བཀྲ་ཤིས། རྐྱང་ནི་སྨན་པ་ཕན་བདེ་རྒྱ་མཚོ། སྡོམ་ནག་ནི་གདོས་པ་སངས་རྒྱས་སྐྱབས། འོལ་པ་ནི་འདན་ཤུགས་རིའི་གཅོད་པ་རྣམས་ཡིན།

བཀྲ་ཤིས་རྒྱལ་མཚན་གྱི་དཔྱད་རྩོམ་ལས། གཡུའི་སྦྲང་ཆུང་ངག་སྙན་ཞེས་པ་ནི་འཇུ་ཚང་མགོན་པོ་དར་རྒྱས་ཀྱི་བུ་མོ་རིག་འཛིན་སྒྲོལ་མ། དྲང་སྲོང་དོན་ཀུན་གྲུབ་པ་ནི་བླ་མ་མཚམས་པའི་སློབ་མ་རྫ་རྒྱལ་བླ་མ་ཚེ་མུག་ཨ་བཀྲ་ཞེས་པ་ཡིན། མཆིལ་པའི་ཚོགས་དཔོན་ནི་འདན་ཆོས་འཁོར་དགོན་པའི་དབུ་མཛད། སྦལ་བ་ནི་ར་རྒྱལ་ཨ་མྱེས་གྲགས་པ། སྦྲུལ་ནི་ར་གྲོ་ཨ་མྱེ་ཚེ་དཔག །འཕྱི་བ་ནི་ཕྱག་འཚལ་དགོན་པའི་བླ་མ་ཨ་ཆོས། ཁུ་བྱུག་ནི་རོང་རྒྱབ་བོན་པོ་སྤངས་སེར་ཞེས་པའི་མཐུ་པ་ཞིག་ཡིན། རྐྱང་ནི་སེར་ཤུལ་གསེར་སྟོན། སྡོམ་ནག་ནི་དུས་མགོ་ཨ་མྱེ་ཞེས་པ་དེ་ཡིན། འོལ་པ་ནི་ཕྱག་འཚལ་དགོན་པའི་ཀོ་ལེ་བླ་མ་ཡིན་ཞེས་གསལ།

ཞོ་འོང་སངས་རྒྱས་མཁར་གྱིས་བརྩམས་པའི《 གཏམ་པདྨའི་ཚལ་གྱི་ཟློས་གར་ལ་དཔྱད་པ་བློ་གསལ་གཞོན་ནུའི་མགུལ་རྒྱན་ལས་ཁྲིད་རྒྱུན།》དང་བསོད་ནམས་རྒྱ་མཚོའི《 གཏམ་པདྨའི་ཚལ་གྱི་ཟློས་གར་ཞེས་བྱ་བའི་གྲགས་པ་འབར་བའི་གསུང་རྩོམ་དེའི་བསམ་བློ་ལ་ཅུང་ཞིག་དཔྱད་པ།》 ངག་དབང་ཚེ་རིང་གི《 རྫ་དཔལ་སྤྲུལ་དང་གཏམ་པདྨའི་ཚལ་གྱི་ཟློས་གར།》 མཆོག་སྤྲུལ་ཉི་མ་རྒྱལ་མཚན་གྱི《 ཉན་ཤུལ་མཁྱེན་རབ་འོད་གསལ་གྱིས་མཛད་པའི་གཏམ་པདྨའི་ཚལ་གྱི་ཟློས་གར་གྱི་མཆན་ཆུང་ལ་དཔྱད་པ།》 ཁམས་སྨྱོན་བྱམས་བློའི《 གཏམ་པདྨའི་ཚལ་གྱི་ཟློས་གར་གྱི་དགོངས་དོན་ལ་དཔྱད་པ་སྐལ་ལྡན་དགྱེས་པའི་གཟིགས་མོ།》 ① ཞེས་པ་བཅས་ཀྱི་དཔྱད་རྩོམ་དཔྱད་སྡུར་ལས་གཟིགས་བདེ་བའི་ཆེད་དུ་རེའུ་མིག་ཅིག་ཀྱང་བཀོད་འདུག

དེས་ན་པིར་འཛིན་པས་ཀྱང་འབྲེལ་ཡོད་ཡིག་ཆ་དང་དཔྱད་རྩོམ། ཁྲིད་རྒྱུན་བཅས་ཕྱོགས་གཅིག་ཏུ་བསྡུས་ནས་ཁ་གསབ་བྱས་པ་གཤམ་གསལ་གྱི་རེའུ་མིག་ཏུ་གསལ།

མིག་སྔར《གཏམ་པདྨའི་ཚལ་གྱི་ཟློས་གར།》གྱི་མཚོན་བྱེད་སྲོག་ཆགས་རྣམས་མཚོན་བྱ་སོ་སོ་ཡིན་མིན་ཐད་ལ་ཁྲིད་རྒྱུན་དང་ཞལ་རྒྱུན་མི་འདྲ་ཁ་ཤས་སྣང་བས། མཐའ་གཅིག་ཏུ་ཁ་ཚོན་གཅོད་དཀའ་མོད། འབྲེལ་ཡོད་ཀྱི་ཡིག་ཆ་ཁག་དག་གཤིབ་བསྡུར་བྱས་རྗེས་ལ། བཞེད་པ་མི་མཐུན་པའི་མཚོན་བྱ་དེ་དག་འདྲ་ས་དང་མི་འདྲ་ས་རྣམས་རེ་ཞིག་རིགས་སུ་བཀར་ནས་བཞག་པ་ལས་གཞན་པའི་བྱེད་ཐབས་དབེན་ནོ། །

《 གཏམ་པདྨའི་ཚལ་གྱི་ཟློས་གར།》གྱི་སྤྱི་ཚོགས་རྒྱབ་ལྗོངས།

《 གཏམ་པདྨའི་ཚལ་གྱི་ཟློས་གར།》འདི་འདྲའི་སྙན་རྩོམ་ཕུལ་དུ་བྱུང་བ་ཞིག་བྱུང་བ་དེ་སྤྱི་ཚོགས་ཀྱི་རིག་གནས་ཁོར་ཡུག་བཟང་པོ་ཞིག་དང་ཁ་བྲལ་ཐབས་དབེན་པ་ཞིག་ཡིན་པ་ནི་དངོས་ཡོད་གནས་ཚུལ་རེད། སྐབས་དེའི་ཚེ་ཁམས་སྡེ་དགེ་ན་ཆོས་རྒྱལ་བསྟན་པ་ཚེ་རིང་① ནི་སྡེ་དགེའི་རྒྱལ་རབས་གཞན་རྣམས་དང་མི་འདྲ་བའི་མདོ་སྔགས་རིག་གནས་དང་བཅས་པ་ཐམས་ཅད་ཀྱི་ཡིག་ཆ་རྣམས་པར་ཤིང་བརྐོས་ནས་སྲུང་སྐྱོབ་དར་སྤེལ་གཏོང་བ་ལ་བརྟེན་ནས། བོད་ཀྱི་ཚན་རིག་ལག་རྩལ་དང་། སློབ་གསོ་དར་སྤེལ་གཏོང་བ་ལ་མཛད་རྗེས་ཆེན་པོ་བཞག་ཡོད་པ་རེད།“རྒྱལ་པོ་འདིས་བོད་ཀྱི་རིག་གནས་ལ་ཐུགས་ཁུར་ཆེན་པོར་གནང་བའི་སྟབས་ཀྱིས་སྡེ་དགེའི་ཡུལ་འདིར་དགོན་པའི་ནང་དུ་ཆོས་ཀྱི་རིག་གཞུང་ལ་སློབ་གཉེར་གནང་བར་མ་ཟད། རིག་གནས་སྦྱོང་ཡུལ་གྱི་སློབ་གྲྭ་མང་པོ་བྱུང་ཡོད་པ་ནི། དཔལ་སྤུངས་ལྔ་རིག་སློབ་གླིང་དང་། རྫོང་གསར་བཤད་གྲྭ། ཀཿཐོག་བཤད་གྲྭ། དཔལ་ཡུལ་བཤད་གྲྭ། རྫོགས་ཆེན་བཤད་གྲྭ། ཞེ་ཆེན་བཤད་གྲྭ། དབོན་སྟོད་བཤད་གྲྭ་ལ་སོགས་པ་རྣམས་ནི་སུམ་རྟགས་དག་གསུམ་ནས་འགོ་བཙུགས་ཏེ། བཟོ། གསོ། སྒྲ་ཚད་སོགས་རིག་གནས་ཐམས་ཅད་སློབ་གཉེར་བྱེད་ཆོག་བཞིན་ཡོད་པ་རེད། དེས་ན་སྡེ་དགེའི་ཡུལ་འདིར་སྐབས་དེར་བོད་ཡུལ་གཞན་དང་མ་འདྲ་བའི་ལོ་རྒྱུས་ཐོག་མཁས་པ་མང་པོ་བྱུང་ཡོད་པར་རེད།”② ཅེས་གསལ།

རིག་གནས་ཀྱི་ཐད་ལ། སི་ཏུ་ཆོས་ཀྱི་འབྱུང་གནས་③ ཀྱིས་ཆོས་རྒྱལ་བསྟན་པ་ཚེ་རིང་གིས་རྒྱལ་བའི་བཀའ་འགྱུར་ཆེན་མོ་པར་དུ་བརྐོ་བའི་སྔོན་འགྲོའི་མཐུན་རྐྱེན་དུ་དབུས་གཙང་ཁམས་གསུམ་གྱི་བྲིས་པ་མང་པོ་གདན་དྲངས་ནས་ཡིག་གཟུགས་ལེགས་བཅོས་བྱས་པ་དང་། བཀའ་འགྱུར་ཞུ་དག་གནང་སྟེ་དཀར་ཆག་ཀྱང་མཛད་པས་ཞབས་ཞུ་བླ་ན་མེད་པ་བསྒྲུབས། བོད་དུ་མི་དབང་ཕོ་ལྷ་བའི་བདག་རྐྱེན་ཐོབ་ཅིང་། མདོ་མཁར་ཞབས་དྲུང་ཚེ་རིང་དབང་རྒྱས་ཀྱིས་སུམ་རྟགས་དང་སྙན་ངག་གི་དགེ་རྒན་དུ་བཀུར། སེར་འབྲས་གཉིས་ལ་སུམ་རྟགས་ཁྲིད་སྤེལ་བྱེད་པ་སོགས་བརྡ་སྤྲོད་རིག་པའི་འཆད་སྲོལ་གཅིག་གྱུར་གཟིགས་བཟོས་ཐོབ་པ④ སོགས་མཛད་རྗེས་ཆེ། དེ་ནས་ཀོང་སྤྲུལ་ཡོན་ཏན་རྒྱ་མཚོ⑤། འཇམ་དབྱངས་མཁྱེན་བརྩེའི་དབང་པོ།⑥ འཇུ་མི་ཕམ་འཇམ་དབྱངས་རྣམ་རྒྱལ་རྒྱ་མཚོ⑦ ་སོགས་མཚན་ལྡན་གྱི་སྐྱེས་བུ་དམ་པ་མང་པོར་བྱུང་བ་དང་ཆབས་ཅིག །ཐུན་མོང་དང་ཐུན་མོང་མ་ཡིན་པའི་རིག་པའི་གནས་མཐའ་དག་ཀློང་ནས་བརྡོལ་བའི་དུས་སྐབས་ཤིག་ཡིན་པར་མ་ཟད། གྲུབ་མཐའ་རིས་མེད་ཀྱི་བསྟན་པའི་སྲོལ་དེ་ནས་ཕྱེས་ཏེ་མཁས་བརྒྱ་འགྲན་གླེང་དང་། མེ་ཏོག་མཉམ་བཞད་ཀྱི་རྣམ་པ་བཟང་པོ་ཞིག་དེ་ནས་བྱུང་།

རྩོམ་རིག་གི་ཐད་ལ། སྐབས་དེར་ཕུལ་བྱུང་སྙན་གཞུང་དང་སྙན་འགྲེལ་ཡང་མང་པོར་བྱུང་། དཔེར་ན་སི་ཏུ་ཆོས་ཀྱི་འབྱུང་གནས་ཀྱི《 སམ་བོད་སྙན་ངག་མེ་ལོང་མ་ཤན་སྦྱར།》དང་། འབྲུག་ཁམས་སྤྲུལ་གྱི་སྙན་འགྲེལ《དབྱངས་ཅན་ངག་གི་རོལ་མཚོ།》 དང་འཇུ་མི་ཕམ་འཇམ་དབྱངས་རྣམ་རྒྱལ་རྒྱ་མཚོའི《 སྙན་འགྲེལ་དགྱེས་པའི་རོལ་མཚོ།》 མདོ་མཁར་ཞབས་དྲུང་ཚེ་རིང་དབང་རྒྱལ་གྱི《 མི་དབང་རྟོགས་བརྗོད།》སོགས་བྱུང་།

མདོར་ན་ལོ་རྒྱུས་ཀྱི་རྒྱབ་ལྗོངས་དང་ཆབ་སྲིད་ཁོར་ཡུག་གང་ཅིའི་ཆར་བཤད་ན་སྡེ་དགེ་རྒྱལ་པོ་བསྟན་པ་ཚེ་རིང་ནས་མར་བརྒྱུད་པའི་གྲུབ་མཐའ་དང་རིག་གནས་ལ་གུ་ཡངས་ཀྱི་རྣམ་པ་ཞིག་ཡོད་པ་དང་། རིག་གནས་སློབ་སྦྱོང་ལ་རྒྱབ་སྐྱོར། སྒོས་སུ་མཁས་བཙུན་བཟང་གསུམ་འཛོམས་པའི་མཚན་ལྡན་གྱི་སྐྱེས་བུ་དམ་པ་མང་པོར་བྱུང་བར་མ་ཟད། སྐབས་དེར་སྡེ་དགེ་ལ་དམིགས་བསལ་གྲུབ་མཐའ་རིས་མེད་ཀྱི་ཤིང་རྟའི་སྲོལ་འབྱེད་ཀོང་སྤྲུལ་ཡོན་ཏན་རྒྱ་མཚོ་གཙོ་བོར་གྱུར་པའི་སྐྱེས་ཆེན་དམ་པས་སྲོལ་འབྱེད་གནང་མུར། ཆོས་ལུགས་གྲུབ་མཐའ་ཐམས་ཅད་མེ་ཏོག་མཉམ་བཞད་ཀྱི་རྣམ་པས་ཀློང་ནས་བརྡོལ་བའི་དུས་སྐབས་ཤིག་ཡིན། འདི་ནི《 གཏམ་པདྨའི་ཚལ་གྱི་ཟློས་གར།》ལྟ་བུའི་ཕུལ་བྱུང་གི་བརྩམས་ཆོས་འབྱུང་བའི་སྔོན་འགྲོའི་ཆ་རྐྱེན་བཟང་པོ་ཞིག་རེད།

བོད་ཀྱི་སྒྱུ་རྩལ་རྩོམ་རིག་ཁྲོད་དུ་སྨིན་པའི་ལེགས་འབྲས།

《 གཏམ་པདྨའི་ཚལ་གྱི་ཟློས་གར།》ནི་རབ་རྟོག་གི་སྒྲུང་རྩོམ་ཕུལ་དུ་བྱུང་བ་ཞིག་སྟེ། བོད་ཀྱི་སྒྱུ་རྩལ་རྩོམ་རིགས་ཀྱི་ནང་དུ་གོ་གནས་ངེས་ཅན་ཞིག་བཟུང་ཡོད་པ་ནི་དངོས་འབྲས་ལགས་སོ། །བཅད་ལྷུག་སྤེལ་མའི་རྣམ་པས་མཚོན་པའི་སྙན་ངག་ཆེན་པོའི་རིགས་དང་། གྲོལ་བ། མཛོད། འདུས་པ་བཅས་ཀྱི་ལམ་ནས་བྲིས་པ་ཞིག་མ་ཡིན་རུང་། དོན་ལ་སྙན་ངག་ཆེན་མོའི་དཔེར་བརྗོད་ཆ་ཚང་འཚོལ་རྙེད་ཐུབ་པ་ཞིག་རེད། གཞན་ཡང་རྩོམ་འབྲིའི་ཐབས་རྩལ་གྱི་ཆ་ནས་བཤད་ན། རྩོམ་པ་པོས་བཀྲ་ཤིས་དགེ་ལེགས་ཀྱི་འཚོ་བར་རྒྱུས་ལོན་དང་ཞིབ་དཔྱོད་བྱས་ཏེ། པད་མའི་ཚལ་གྱི་ལྟ་ན་སྡུག་པའི་མཛེས་ལྗོངས་དང་། སེམས་ཅན་རྣམས་སྐྱིད་སྡུག་འདྲ་མིན་གྱི་ཡིད་ཀྱི་འགྱུར་བ། དུད་འགྲོའི་ཁྱད་ཆོས་སོགས་འཕྱུར་འབྲི་བྱས་པ་ལ་ཐུན་མིན་གྱི་ཁྱད་ཆོས་ལྡན་པར་མ་ཟད། ཞིབ་ཏུ་དཔྱད་ཚེ་ཚིག་རྐང་ཐོག་མཐའ་བར་གསུམ་དུ་བཅིངས་པའི་ཟུང་ལྡན་གྱི་ཚིག་རྒྱན་བསྟུད་མར་སྦྱར་ཡང་བསྐྱར་བཟློས་ཀྱི་སྐྱོན་དུ་མི་འགྱུར་བ། དེ་ལས་ལྡོག་ཏེ་སྙན་ངག་གི་ཉམས་ཕུན་སུམ་ཚོགས་པའི་རྒྱུར་གྱུར་པ་ནི་ངོ་མཚར་རྨད་བྱུང་གི་སྒྱུ་རྩལ་གྱི་ཁྱད་ཆོས་ཤིག་ཀྱང་རེད།

དུས་རབས་བཅུ་དགུ་པ་ནས་བཟུང་སྲོག་ཆགས་ལ་སྦྱར་བའི་རབ་རྟོག་གི་སྒྲུང་རྩོམ་མང་དུ་བྱུང་ཡོད་དེ། དཔེར་ན《གཏམ་པདྨའི་ཚལ་གྱི་ཟློས་གར།》དང་། 《 བྱ་སྤྲེལ་གཏམ་རྒྱུད།》དང་། 《 ཇ་ཆང་ལྷ་མོའི་བསྟན་བཅོས།》 《 གཡག་ལུག་ར་ཕག་གི་གཏམ་རྒྱུད།》 《 བསམ་ཡས་བྱ་ཕོ་དཀར་པོ།》 ①སོགས་བྱུང་ཡོད། 《 གཏམ་པདྨའི་ཚལ་གྱི་ཟློས་གར།》 གྱི་ནང་ལ་སྲོག་ཆགས་རྣམས་ཀྱི་མཚོན་བྱའི་བླ་མ་དང་། སྨན་པ། གཅོད་པ། གྲྭ་མང་སོགས་ལ་རྫ་དཔལ་སྤྲུལ་གྱིས་མཚང་བྲུས་ནས་ངོ་གདོང་དམར་རྗེན་དེའང་ཕྱིར་མངོན་པ་དེར་ནུབ་ཕྱོགས་པའི་བརྗོད་འདོད་རང་བཞིན་གྱི་བསམ་བློ་དེ་ཤུགས་སུ་སླེབས་བཞིན་འདུག་པ་དེའང་ཁྱད་ཆོས་ཤིག་ཏུ་འཁུམ། དེང་སང་རྒྱ་ཡིག་དང་དབྱིན་ཡིག་སོགས་རྒྱལ་ཁབ་གཞན་པའི་སྐད་ཡིག་ཏུ་བསྒྱུར་ནས་འཛམ་བུ་གླིང་དུ་དར་སྤེལ་ཆེ་བར་གྱུར་བཞིན་ཡོད། །