འདན་མ་དྲན་གསོ་ཁང་གི་རིག་དངོས་།

སྤྱི་ལོ་༢༠༠༤ལོར་འདན་ཤུག་ར་དགོན་པའི་བླ་མ་ངག་དབང་སྦྱིན་པས་འདན་མ་དྲན་གསོ་ཁང་འདི་ཉིད་བཞེངས་པའི་མགོ་བཙུགས་ཤིང་། ༢༠༠༦ལོར་དྲན་གསོ་ཁང་འདིའི་རིག་དངོས་གཙོ་གྲས་རྣམས་ལེགས་པར་གྲུབ། དེ་ལ་གནའ་རྫས་བཤམས་སྟོན་ཁང་། ཐང་གའི་སྒྱུ་རྩལ་འགྲེམ་སྟོན་ཁང་། དམངས་ཁྲོད་རིག་དངོས་འགྲེམ་སྟོན་ཁང་། དཔེ་མཛོད་ཁང་། རིག་གནས་གསོ་སྦྱོང་ཁང་། ལོ་རྒྱུས་མི་སྣའི་བཤམས་སྟོན་ཁང་། ཁྱད་པར་དུ་ཚ་ཞང་འདན་མ་བྱང་ཁྲའི་དབུ་རྨོག་དང་ཐང་སྐུ་དང་འདྲ་སྐུ་མཐོང་གྲོལ་ཆེན་མོ་སོགས་ཡུལ་སྐོར་པའི་སྤྱན་ལམ་དུ་འགྲེམ་སྟོན་བྱེད་བཞིན་ཡོད། རིག་དངོས་འདི་དག་ལས་གནའ་རྫས་རྟོག་ཞིབ་པས་བརྟག་དཔྱད་བྱས་པར་གཞིགས་ན་རིག་དངོས་ཁ་ཤས་ཀྲེན་གོ་དང་ཐང་སུང་དུས་སྐབས་ཀྱི་གནའ་རྫས་ཡིན་པའི་ར་སྤོད་བྱུང་ཡོད།

  ཚ་ཞང་འདན་མ་བྱང་ཁྲའི་ཐང་ག་དང་ཞལ་འབག །ཁྱད་པར་དུ་འདན་མའི་འདྲ་སྐུ་མཐོང་གྲོལ་ཆེན་མོ་ནི། རྫོགས་སྤྲུལ་ལྔ་པ་ཐུབ་བསྟན་ཆོས་ཀྱི་རྡོ་རྗེས་གླིང་རྗེ་བློན་རྣམས་ཀྱི་ཞལ་རས་དང་སྐུ་ཡི་སྟངས་སྟབས་ཆ་ཚང་ཉམས་སྣང་དུ་ཤར་བ་ལྟར་ཞལ་བཀོད་མཛད་པའི་འདན་མའི་ཞལ་འབག་ལ་གཞིར་བཟུང་བ་དང་། རྒྱན་དང་ཕྱག་མཚན་གྱི་བཀོད་པ་ནི་འཇམ་མགོན་མི་ཕམ་རིན་པོ་ཆེ་དང་མཁྱེན་བརྩེ་སྐུ་ཕྲེང་གོང་འོག་སོགས་ཀྱིས་མཛད་པའི་འདན་མའི་བསང་མཆོད་ནང་དུ་གསུངས་པ་དང་། ཁྱད་པར་དུ་གླིང་སྒྲུང་དང་གླིང་ཚང་རྒྱལ་རབས་ལ་རྒྱུས་མངའ་ཤིན་ཏུ་ཆེ་བའི་འགུ་ཟི་དགོན་གྱི་མཁན་པོ་ཚུལ་ཁྲིམས་རྡོ་རྗེའི་ཞལ་བཀོད་ལྟར་བོད་ཀྱི་བཟོ་རིག་ཆེད་མཁས་ལྷ་བཟོ་རྣམས་དང་། བལ་པོའི་སྒྱུ་རྩལ་ཕུལ་བྱུང་ཅན། རྒྱ་ནག་གི་བཟོ་རྩལ་མཁས་པ་རྣམས་ཀྱིས་མཉམ་དུ་བསྐྲུན་པའི་བཞེངས་སྐུ་མཐོ་ཚད་ལ་སྨི་༡༧.༨༠ཅན་གྱི་རྒྱུ་ཟངས་དམར་ལས་གྲུབ་པ་སྤུས་ཚད་དང་ལྡན་པ། སྐུ་ལུས་ཀྱི་བརྗིད་ཉམས་ཕྱག་ཞབས་ཀྱི་སྟངས་སྟབས་ཚུལ་དང་མཐུན་པ། སྒྱུ་རྩལ་གྱི་ཉམས་འགྱུར་འབུམ་གྱིས་ཕྱུག་པའི་ཁྱད་ཆོས་དང་ལྡན་པ་ཡིན་ནོ། །

འདན་མའི་འདྲ་སྐུ།

གནའ་རྫས་འགྲེམ་སྟོན་ཁང་།

འདན་མ་དྲན་གསོ་ཁང་འདིར་གནའ་རྫས་རྟོག་ཞིབ་པ་ཚོས་གདེང་འཇོག་བྱེད་ཡུལ་དུ་གྱུར་པའི་གནའ་རྫས་རིགས་གཙོ་བོ་ནི་ཚ་ཞང་འདན་མ་བྱང་ཁྲའི་རྨོག །དུས་རབས་བཅོ་བརྒྱད་པར་ཀརྨ་སྒར་བྲིས་ཀྱི་ལུགས་སུ་བྲིས་པའི་གེ་སར་གྱི་ཐང་ག་སྤུས་ལེགས། མདོ་སྡེ་སྐལ་བཟང་དངུལ་བྲིས་མ། གཏེར་སྟོན་མཆོག་གྱུར་གླིང་པའི་སྒྲུབ་ཕུར། གནམ་ལྕགས་ཀྱི་ཐོད་དབྱུག རྡོ་ཡི་ཡང་གསང་རྟ་མགྲིན་རང་བྱོན། གཞན་ཡང་རྨོག་ཆེ་ཆུང་མང་པོ་དང་། ཁྲབ་གོས་དང་ཁྲབ་ཀྱི་བྱང་བུའི་རིགས། མཚོན་ཆ་འགོག་བྱེད་དཔུང་དཀྲིས་ཀྱི་རིགས་དང་། མདའ་མདུང་གྲི་སོགས་མཚོན་ཆའི་རིགས་སྣ་ཚོགས་པའི་གནའ་རྫས་འགྲེམས་སྟོན་བྱས་ཡོད།

ཁྲོ་རྐང་གསུམ་པ།

རྟ་མགྲིན་རང་བྱོན།

དམངས་ཁྲོད་རིག་དངོས་འགྲེམ་སན་ཁང་།

སྐུད་པ་འཁེལ་བྱེད་ཀྱི་འཕྲུལ།

ལག་མཆིག་དང་སྣོད་སྤྱད་རིགས། 

གཞོང་པ་སོགས་འཚོ་བའི་མཁོ་སྤྱད་ཀྱི་རིགས།

སྒྲོ་བ

རྟ་སྒ་ཆས།

རླུང་འཁོར། 

ཤིང་སྒམ་དང་པ་རུའི་རིགས།

ཅོག་ཙེ་དང་དེམ། བུམ་པ་སོགས་ཀྱི་རིགས།

ལོ་རྒྱུས་མི་སྣ་འགྲེམ་སྟོན་ཁང་།

ལོ་རྒྱུས་ནང་ཡོངས་སུ་གྲགས་པའི་མི་སྣ་མང་པོ་འདན་མ་ལུང་དུ་སྐུ་འཁྲུངས་པ་ནི། དཔེར་ན་ལྡན་མ་རྩེ་མང་། ཨ་རོ་ཡེ་ཤེས་འབྱུང་གནས། འབྲོམ་སྟོན་པའི་བླ་མ་སེ་བཙུན། འབྲོམ་སྟོན་པའི་སློབ་མ་དགེ་བཤེས་དགོན་པ་བ། སྐྱུ་ར་ཨ་སྐྱབས། ལོ་ཙཱ་བ་འདན་མ་ཚུལ་ཁྲིམས་སེང་གེ །སྐྱུ་ར་ཨ་སེང་། ས་ཆེན་སློབ་མ་གྲུབ་ཐོབ་རྡོ་རྒྱལ། སྒ་ཨ་མཉན་དམ་པ། ངོར་མཁན་ཆེན་སངས་རྒྱས་དཔལ་བཟང་། གྲུབ་དབང་ཀུན་དགའ་དཔལ་འབྱོར། ཞུ་ཆེན་ཚུལ་ཁྲིམས་རིན་ཆེན། ངོར་ཨེ་ཝཾ་པའི་རྡོ་རྗེ་སློབ་དཔོན་འཇམ་དབྱངས་ངག་དབང་ལེགས་གྲུབ། ཤུག་རའི་གཅོད་སྨྱོན་མ། ཀརྨ་པ་བཅུ་དྲུག་རང་བྱུང་རིག་པའི་རྡོ་རྗེ། རྫོགས་སྤྲུལ་བཞི་པ་མི་འགྱུར་ནམ་མཁའ་རྡོ་རྗེ། དིལ་མགོ་མཁྱེན་བརྩེ་རབ་གསལ་ཟླ་བ། ཞྭ་དམར་སྐུ་ཕྲེང་བཅུ་བཞི་པ། འབྲི་གུང་སྐྱོབ་པ་འཇིག་རྟེན་གསུམ་མགོན། སྤྱན་སྔ་ཆོས་ཀྱི་གྲགས་པ། གྲུབ་ཐོབ་བཀྲ་ཤིས་དཔལ་འབྱོར། འབྲུ་མཁན་ཆེན་འཇམ་དབྱངས་གྲགས་པ། ཏཱ་ལའི་བླ་མ་སྐུ་ཕྲེང་དགུ་པ་ངག་དབང་ལུང་རྟོགས་རྒྱ་མཚོ། ཁྲི་ཆེན་ཡེ་ཤེས་བཟང་པོ་སོགས་འཁྲུངས་པ་དང་། གཞན་ཡང་རྒྱ་བཟའ་ཀོང་ཇོ་སྔོན་རྗེས་གཉིས། ཞང་ཡེ་ཤེས་སྡེ། སྨྲི་ཏི་ཛྙཱ་ན། ཁུ་རྔོག་འབྲོམ་གསུམ། དམར་གཡོ་གཙང་གསུམ། ལྷ་ལུང་དཔལ་རྡོར། བླ་ཆེན་དགོངས་པ་རབ་གསལ། འགྲོ་མགོན་ཆོས་རྒྱལ་འཕགས་པ། བདག་ཆེན་རིན་ཆེན་རྒྱལ་མཚན། འཇམ་དབྱངས་ཀུན་དགའ་བློ་གྲོས། འཇམ་དབྱངས་ཀུན་དགའ་བསོད་ནམས་ཐུབ་སྟོབས་དབང་ཕྱུག །མཁན་ཆེན་དཔལ་ལྡན་ཆོས་སྐྱོང་། ངོར་མཁན་ཆེན་ཤར་པ་མི་འགྱུར་རྒྱལ་མཚན། ངོར་མཁན་ཆེན་ཤར་པ་འཇམ་དབྱངས་བསྟན་པའི་ཉི་མ། ངོར་མཁན་ཆེན་འཇམ་དབྱངས་བསྟན་པའི་རྒྱལ་མཚན། ངོར་མཁན་ཆེན་ངག་དབང་བསོད་ནམས་དབང་པོ། རྫོང་སར་འཇམ་དབྱངས་མཁྱེན་བརྩེའི་དབང་པོ། སྒ་ངག་དབང་ལེགས་པ། ཀརྨ་པཀྵི། ཉེ་གནས་རིན་ཆེན་དཔལ། ཀརྨ་པ་སྐུ་ཕྲེང་བདུན་པ་ཆོས་གྲགས་རྒྱ་མཚོ། བརྒྱད་པ་མི་བསྐྱོད་རྡོ་རྗེ། བཅུ་གཉིས་པ་བྱང་ཆུབ་རྡོ་རྗེ། ཞྭ་དམར་ཆོས་གྲགས་རྒྱལ་མཚན། ཀོང་སྤྲུལ་ཡོན་ཏན་རྒྱ་མཚོ། སི་ཏུ་ཆོས་ཀྱི་འབྱུང་གནས། རྗེ་ཙོང་ཁ་པ་བློ་བཟང་གྲགས་པ། རྒྱལ་དབང་བསོད་ནམས་རྒྱ་མཚོ། དཔལ་སྤྲུལ་ཨོ་རྒྱན་འཇིགས་མེད་ཆོས་ཀྱི་དབང་ཕྱུག །འཇུ་མི་ཕམ་རྣམ་རྒྱལ་རྒྱ་མཚོ། རིག་འཛིན་ཉི་མ་གྲགས་པ། མདོ་མང་གཏེར་ཆེན་རྡོ་རྗེ་བདེ་ཆེན་གླིང་པ། གཏེར་ཆེན་ལས་རབ་གླིང་པ། མདོ་མཁྱེན་ཡེ་ཤེས་རྡོ་རྗེ་སོགས་ཡོངས་གྲགས་ཀྱི་མི་སྣ་མང་པོ་ཕེབས་ནས་བྱ་བ་དང་མཛད་པ་སྐྱོང་བའི་ལོ་རྒྱུས་ལྡན་པས། འགྲེམ་སྟོན་ཁང་ནང་མི་སྣ་གྲགས་ཅན་དེ་དག་གི་འདྲ་སྐུ་དང་ཐང་ག་སོགས་བཞེངས་ཡོད།

ཐང་ག་འགྲེམ་སྟོན་ཁང་།

ཐང་གའི་སྒྱུ་རྩལ་ནི་མི་རིགས་སྲོལ་རྒྱུན་རིག་གནས་ཀྱི་གྲུབ་ཆ་གལ་ཆེ་ཞིག་ཡིན་པར་མ་ཟད་ལོ་ངོ་སྟོང་ཕྲག་མང་པོའི་ལོ་རྒྱུས་ཀྱི་རིན་ཐང་ལྡན་པའི་གནའ་བོའི་བཟོ་རྩལ་ཕུན་སུམ་ཚོགས་པ་ཞིག་ཀྱང་ཡིན་པས། རིག་གནས་ཀྱི་དཔལ་ཡོན་ལྡན་པ་དང་། དད་ལྡན་མང་ཚོགས་ཀྱི་མཆོད་འོས་བླ་ན་མ་མཆིས་པ། འཛམ་གླིང་ཤར་ནུབ་ཀྱི་མི་རིགས་མང་པོས་མཐོང་ཆེན་གནང་ཞིང་། གནའ་དེང་རིག་གནས་ཀྱི་བླ་སྲོག་ལྟ་བུ་གྱུར་ཡོད་སྟབས། དེ་ལ་སྲུང་སྐྱོབ་དང་རྒྱུན་སྤེལ་བྱ་བ་ནི་རང་རེ་ཕྱི་རབས་པ་ཡོངས་ཀྱི་ཕྲག་ཏུ་བབས་པའི་འོས་འགན་ཞིག་ཏུ་བརྩིས་ནས་འདིར་དེང་རབས་ཀྱི་ལྷ་བཟོ་ཆེད་མཁས་པ་མང་པོས་བྲིས་པའི་ཐང་ག་བྱིའུ་ལྒང་ལུགས་དང་། སྨན་ཐང་ལུགས། མཁྱེན་བརྩེ་ཆེན་མོའི་ལུགས། ཀརྨ་སྒར་བྲིས་ཀྱི་ལུགས། སྨན་སར་ལུགས་སོགས་ཐང་གའི་བྲིས་རྒྱུན་ཆེན་མོ་རྣམས་དང་། ད་རུང་ཁམས་པའི་སྨན་གསར་དང་དབུས་གཙང་གི་སྨན་གསར། ཨ་མདོ་རེབ་གོང་གི་སྨན་གསར་སོགས་ལུགས་གང་འཛོམས་ཀྱིས་བྲིས་པའི་ཐང་ག་མང་པོ་ཞིག་འགྲེམས་སྟོན་ཞུས་ཡོད། ། 

གནས་བརྟན་ཞལ་ཐང་།

གནས་བརྟན་ཞལ་ཐང་། 

གུ་རུ་པདྨ་སཾ་བྷ།