སེར་ཤུལ་གྱི་ལོ་ངོ་སྟོང་གི་ཐང་བོད་གནའ་ལམ་།

ཉེ་བའི་ལོ་འགའི་ནང་སེར་ཤུལ་རྫོང་རྫོང་མི་དམངས་སྲིད་གཞུང་གིས་རྫོང་ཡོངས་ཀྱི་ཆབ་དཔལ་རིག་གསུམ་ཡར་རྒྱས་གོང་འཕེལ་གཏོང་ཆེད། སྐྱེ་ཁམས་དང་རིག་གནས་སོགས་ཁྱབ་བསྒྲགས་བྱེད་པའི་ཐབས་ལམ་བརྒྱུད་ནས། ཡུལ་སྐོར་ཕྱག་ལས་རབ་དང་རིམ་པ་ཞིག་སྤེལ་བཞིན་ཡོད། མ་ཟད་རྒྱ་ཆེ་བའི་ཡུལ་སྐོར་བ་རྣམས་ལ་སེར་ཤུལ་རྫོང་གི་ཡུལ་དངོས་གནས་ཚུལ་དེ་ཐད་ཀར་རྒྱུས་ལོན་ལེགས་པོ་ཞིག་ཡོང་ཆེད། དོན་དང་མཐུན་པའི་མཚན་གྱི་རྣམ་གྲངས་འགའ་བཀོད་ཡོད་དེ། དང་པོ་ནི་འཛམ་གླིང་གི་ཆེས་མཛེས་པའི་བརླན་ས། གཉིས་པ་ལོ་སྟོང་གི་ཐང་བོད་གནའ་ལམ། གསུམ་པ་རྡོ་བརྐོས་རིག་གནས་སྒྱུ་རྩལ་གྱི་ཕ་ས། བཞི་པ་བཀྲ་ཤིས་པའི་བྱང་སྡེ་ཉི་མ་བཅས་ཡིན། མཚན་དོན་དེ་དག་ཀྱང་ས་གནས་འདིའི་དོན་དངོས་གནས་ཚུལ་ངོ་སྤྲོད་ཀྱི་ཆེད་དུ་བཟོས་པའི་སྙན་ཚིག་ཡིན་པ་ལས། རྟོག་བཏགས་སྟོང་པའི་རྫུན་ཚིག་ཞིག་ག་ལ་ཡིན།

དེ་དག་ལས་ཐེངས་འདིར་ཆེད་དུ་བརྗོད་འདོད་བྱུང་བ་ནི་ལོ་སྟོང་གི་ཐང་བོད་གནའ་ལམ་འདི་ཡིན་ལ། དེ་ཡང་ང་ཚོ་ཚང་མས་ཤེས་བཞིན་གསལ་བཞིན་པ་ནི། ཆེན་པོ་ཐང་དང་བཙན་པོ་བོད་ཀྱི་སྐབས། ཐང་བོད་བར་ལ་ཆབ་དཔལ་རིག་གསུམ་གྱི་འབྲེལ་ལམ་གལ་ཆེན་འགའ་ཡོད་པ་དེ་རེད། ལམ་ཁ་དེ་དག་ལ་ང་ཚོའི་ཕ་ཡུལ་ནས་དབུས་ལམ་གོང་འགབ་བར་གསུམ་ཞེས་རྗོད་བཞིན་འདུག ། དེ་དག་ལས་རྨ་རྫ་འབྲི་གསུམ་བརྒྱུད་དེ་འགྲོ་སའི་ལམ་ཁ་འདི་ནི་དབུས་ལམ་བར་མར་བརྩི་བཞིན་ཡོད། དབུས་ལམ་བར་མའི་ལམ་ཁ་འདི་ནི་བོད་བཙན་པོའི་དམག་གི་བརྒྱུད་ལམ་གལ་ཆེན་ཞིག་ཡིན་པར་མ་ཟད། རྒྱ་བཟའ་བོད་ལ་གདན་འདྲེན་ཞུ་སའི་ལམ་ཁ་ཡང་རེད། བཤད་སྲོལ་དུ་ཚོང་དཔོན་ནོར་བུ་བཟང་པོའི་ཚོང་ལམ་བར་མ་ཡང་འདི་ཡིན་པ་དང་། གླིང་གེ་སར་གྱི་སྐབས་དང་སྡེ་དགེ་རྒྱལ་པོས་དབང་བསྒྱུར་བའི་སྐབས་སུ་ཡང་ལམ་ཁ་འདི་ནི་མདོ་ཁམས་བར་གྱི་བརྒྱུད་ལམ་ཆེས་གལ་ཆེན་ཞིག་ཏུ་གྱུར་ཡོད།

དེང་གི་དུས་སུ་དཔྱད་བརྗོད་བྱེད་མཁན་མང་པོ་ཞིག་ལ་རྒྱ་བཟའ་ཉི་ཟླ་ལ་ནས་ཐོན་རྗེས། ལམ་ཁ་གང་བརྒྱུད་ནས་སོང་ཡོད་པ་ལ་གསལ་ཁ་མེད་པ་དང་། ཡུས་ཧྲུའུ་ཡི་འབིས་རྣམ་པར་སྣང་མཛད་དུ་རྒྱ་བཟའི་སྐོར་གྱི་ལོ་རྒྱུས་ལེགས་པོ་བཤད་རྒྱུ་ཡོད་པ་དེ་རྒྱུ་མཚན་དུ་བྱས་ནས། མཚོ་སྔོན་ཉི་ཟླ་ལ་ནས་ཆབ་ཆ་དང་། དེ་ནས་རྨ་སྟོད། མཐར་ཡུས་ཧྲུའུ་ཡི་འབིས་རྣམ་སྣང་བརྒྱུད་ནས་སོང་བ་རེད་ཅེས་པ་ཙམ་ལས། ཉི་ཟླ་ལ་ནས་འབིས་རྣམ་སྣང་བར་གྱི་བརྒྱུད་ལམ་དང་ཡུལ་གྲུ་དག་ལ་དཔྱད་བརྗོད་ལེགས་པོ་ཞིག་བྱས་མི་འདུག །དེ་བས་གཞན་ཡུལ་ལ་དཔྱད་བརྗོད་བྱེད་པའི་ནུས་པ་མེད་རུང་། རང་གི་ཕ་ས་ཕ་ཡུལ་དུ་ཡོད་པའི་རིག་གནས་ཤུལ་བཞག་འདི་དག་ཀུན་ལ་ངོ་སྤྲོད་མདོར་བསྡུས་བྱ་རྒྱུ་དེ་དགོས་གལ་དུ་མཐོང་། དེ་ཡང་བོད་བཙན་པོའི་སྐབས་ཀྱི་ཁམས་ལྡན་མའམ་འདན་མ་ཞེས་པ་ནི་སྒ་སྐྱུ་འདན་གསུམ་ལས་གྲུབ་པའི་ཁམས་འདན་མའི་ཡུལ་གྲུ་ལ་ཟེར་བ་ཡིན་པ་དང་། དེའི་སྐབས་སུ་འདན་གྱི་ཆབ་དཔལ་རིག་གསུམ་གྱི་ལྟེ་གནས་ནི་འདན་པདྨ་རིའི་རི་འདབས། ཀློང་ཐང་སྒྲོལ་མ་ལྷ་ཁང་ཡོད་ས་འདི་ཡིན་པ་དང་། དེང་གི་སེར་ཤུལ་རྫོང་ཁོངས་སུ་རྒྱ་བཟའ་གདན་དྲངས་པའི་སྐོར་གྱི་གནའ་སྒྲུང་གང་མང་ཞིག་དང་ཤུལ་བཞག་རིག་དངོས་གསོན་པོ། ལོ་རྒྱུས་ཡིག་ཆ་སོགས་ཡོད་པ་གཞིར་བཞག་ནས། ཐང་བོད་གནའ་ལམ་གྱི་བརྒྱུད་ལམ་བར་མ་འདི་ལ་དོ་སྣང་དང་རྒྱུས་ལོན་བྱེད་འདོད་ཡོད་པའི་མི་བུ་དག་ལ་ཞིབ་འཇུག་གི་རྒྱུ་ཆ་ཙམ་དུ་ས་ཚིགས་དེ་དག་གོང་བསྒྲིགས་ནས་ཐོ་འགོད་དང་དེའི་སྐོར་གྱི་ལོ་རྒྱུས། ངག་རྒྱུན་སོགས་ངོ་སྤྲོད་མདོར་བསྡུས་ཞིག་བྱེད་འདོད་བྱུང་།

དམག་འབུད་ལ།

ཐོག་མར་མཚོ་སྔོན་ཞིང་ཆེན་དར་ལག་རྫོང་གསང་རུ་མ་ནས་སི་ཁྲོན་ཞིང་ཆེན་སེར་ཤུལ་རྫོང་ཨ་རིག་རྫ་ཡུལ་ཤོག་ལ་འགྲོ་སྐབས་དམག་འབུད་ལ་ཞེས་པའི་གནའ་བོའི་ལམ་ཁ་ཞིག་ཡོད། ལོ་བཅུའི་སྔ་རོལ་དུ་ལམ་ཁ་དེར་སྣུམ་ལམ་ཕར་ཞོག་གཞུང་ལམ་གྱི་ཚུགས་ཀ་ཙམ་ཡང་མེད། ཡིན་ན་ཡང་ལམ་ཁ་དེ་ནི་གནའ་བོའི་མགྲོན་ལམ་གལ་ཆེན་ཞིག་ཡིན་པས། དབྱར་གཞུང་ཆར་ཆུ་ཆེ་དུས་དང་དགུན་དུས་ཁ་བ་ཆེན་པོ་འབབ་དུས་མ་གཏོགས། འབྲོག་པ་ཚོས་འཕྲུལ་རྟ་དང་རླངས་འཁོར་བསྐོར་ནས་བདེ་བླག་ངང་འགྲུལ་བཞུད་བྱེད་བཞིན་ཡོད། འོན་ཏེ་དེང་གི་དུས་སུ་ལམ་ཁ་དེ་རྒྱལ་ཁབ་ཀྱི་གཞུང་ལམ་(G༣༤༥)ལ་བསྒྱུར་བའི་བཀའ་དྲིན་གྱིས། དར་ལག་ནས་སེར་ཤུལ་རྫོང་ཐོག་བར་ལ་དུས་ཚོད་གཉིས་ཡས་མས་ཙམ་ལས་མི་དགོས་པར་གྱུར་ཡོད།

དེ་ལྟར་དམག་འབུད་ལ་ཞེས་པའི་མིང་ཐོགས་དོན་ནི་བོད་བཙན་པོའི་སྐབས་སུ་དམག་འགྲོ་སའི་འབུད་ལམ་ཡིན་པས་རེད་ཟེར་སྲོལ་འདུག །ཕྱིས་སུ་རྒྱ་བཟའ་ཀོང་ཇོ་ཡང་ལམ་ཁ་དེ་བརྒྱུད་ནས་འོང་བ་རེད་ཅེས་ཡུལ་མི་ཚོའི་ངག་རྒྱུན་ནས་ཐོས། དེ་ལ་ངག་རྒྱུན་ཙམ་ལས་བདེན་དཔང་ཆེར་མེད་རུང་། དམག་འབུད་ལའི་ཉིན་ཕྱོགས་ནི་རྫ་ཆུའི་ཡན་ལག་སྒོ་ཆུ་ཡིན་ལ། སྒོ་ཆུ་བཞུར་བཞིན་པའི་ལུང་པ་ལ་སྒོ་ཁོག་ཟེར། སྒོ་ཁོག་འདི་དེ་འདྲའི་ལུང་ཆེན་ཞིག་མིན་རུང་། དེར་ལོ་རྒྱུས་ཀྱི་ཤུལ་བཞག་ཕུན་སུམ་ཚོགས་པ་ཞིག་ཡོད། དཔེར་ན་ལོ་ངོ་སྟོང་ཁ་ཤས་ཀྱི་ཡར་སྔོན་ནས་ཡིན་པར་གྲགས་པའི་གནའ་བོའི་བྲག་རིས་དང་། སྒོའི་རི་དམར་དབང་ཞུ་དང་སྒོ་རྒྱལ་བཙུན་མོ་ལྟ་བུའི་གནས་རི་དང་གཞི་བདག །གསང་གི་མ་ཎི་ཞེས་པའི་གླིང་གེ་འབྲུག་སྐབས་ཀྱི་མ་ཎི་རྡོ་འབུམ་དང་དེའི་སྐོར་གྱི་གླིང་སྒྲུང་སྙན་ལ་རིང་མོ་སོགས། དེ་ལས་ཀྱང་སྐབས་སུ་བབ་པའི་ཆ་འཕྲིན་གལ་ཆེན་ཞིག་ཡོད་པ་ནི་སྒོ་མདོའི་ཤུག་པ་གནས་རི་དེ་རེད།

སྒོ་མདོའི་ཤུག་པ་གནས་རི།

སྒོ་མདོའི་ཤུག་པ་གནས་རི་ལ་རྒྱ་བཟའི་སྐོར་གྱི་ངག་རྒྱུན་མང་པོ་ཡོད་པར་མ་ཟད། དེར་བོད་བཙན་པོའི་སྐབས་ཀྱི་རྡོ་བརྐོས་ཡི་གེ་དང་རི་མོ་སོགས་ཡོད་པ་ནི་ཤུལ་བཞག་རིག་དངོས་གསོན་པོ་རེད། ཡུལ་དངོས་སུ་རྟོག་ཞིབ་བྱེད་སྐབས། དེར་རི་མོའི་རིགས་བདུན་དང་ཡི་གེའི་རིགས་བཞི་བཅས་འདུག །ཡི་གེའི་ནང་དོན་མང་ཤོས་ཁྲི་སྲོང་ལྡེའུ་བཙན་གྱི་སྐུ་དུས་ཡིན་པར་མངོན་ལ། རི་མོའི་ནང་ལ་རྣམ་སྣང་གི་སྐུ་ཡོད་པས་མ་ཚད། བོན་སྐུ་ཡང་འདུག །

དེ་ལས་ཀྱང་སྐབས་བབ་དཔྱད་བརྗོད་ཀྱི་ནང་དོན་མཚོན་པའི་བོད་བཙན་པོའི་སྐུ་ཆས་ཅན། ཕྱག་དུ་པདྨ་ཞིག་ཐོགས་པ་དེའི་ནང་ལ་ཐུབ་པའི་སྐུ་ཞིག་བཞུགས་ཡོད་པ་དང་། རྒྱ་ནག་ཐང་གི་བུ་མོའི་ཆས་ཅན་དབུ་ལ་འོད་འཁོར་ལྡན་པ། གཤམ་དུ་ཕྱག་གཡོག་དང་བཅས་པ་ཞིག་འདུག་པ་ནི་ཆེས་དཀོན་པའི་རིག་དངོས་སུ་སྣང་། ཡུལ་མི་ཚོའི་ངག་རྒྱུན་དུ་སྒོ་མདོའི་ས་ཆ་དེར་རྒྱ་ཚའི་སྐུ་ཐང་ཞེས་པའི་བཤད་སྲོལ་ཞིག་ཡོད་དོན་ནི། དེར་རྡོ་སྐུ་འབུར་མ་དབུ་མེད་པ་ཞིག་བཞུགས་པས་རེད་འདུག །ཡུལ་མི་ཚོས་དབུ་མེད་རྡོ་སྐུ་དེ་དང་གླིང་གེ་སར་གྱི་ཕུ་བོ་རྒྱ་ཚ་ཞལ་དཀར་ཤན་པས་བཀྲོངས་པའི་སྐོར་གྱི་ལོ་རྒྱུས་དང་སྦྲགས་ནས་རྗོད་བཞིན་འདུག །ཡིན་ན་ཡང་། བདག་རང་ངོས་ནས་དེ་ནི་བཙན་པོའི་སྐུ་དུས་ཀྱི་ལོ་རྒྱུས་དང་འབྲེལ་བ་ཡོད་པར་འདོད། གང་ཡིན་ཟེར་ན། སྐུ་དེ་རྣམ་སྣང་གི་སྐུ་ཞིག་ཡིན་པ་ལས་ཕུ་བོ་རྒྱ་ཚ་ཞལ་དཀར་གྱི་སྐུ་མིན་པ་དཔྱད་པ་ཆེར་མི་དགོས་པས་སོ། །མ་ཟད་རྣམ་སྣང་གི་འགྲམ་ཟུར་ཉེ་ས་ན་བྲག་ཆེན་པོ་ཞིག་ཡོད་པ་དེའི་ངོས་སུ་ཡི་གེ་མང་པོ་བྲིས་འདུག་རུང་གནས་སྐབས་དཔྱད་བྱའི་ལག་ཆ་ཞན་པས་ནང་དོན་གསལ་ཁ་མ་ཐོན། དེ་ལས་ཀྱང་གལ་ཆེ་བ་ནི་མགར་སྟོང་བཙན་གྱིས་རྒྱ་བཟའི་རྗེས་ཟིན་ས་སྒོ་གདོང་སྒོ་མོའི་འགྲམ་ཞེས་པ་དེ་རེད། བོད་ཀྱི་དེབ་ཐེར《དཔྱིད་ཀྱི་རྒྱལ་མོའི་གླུ་དབྱངས།》ལས། P༣༦“སྒོ་གདོང་སྒོ་མོའི་རྩར་ཀོང་ཇོ་དཔོན་གཡོག་གི་རྗེས་ཟིན་སྐད་དོ། །”ཞེས་གསལ་པོར་འཁོད་འདུག །སྒོ་གདོང་ནས་མར་ལེ་བར་གཅིག་ཙམ་གྱི་ས་ཆར་ཁྲོམ་གཟའ་འགབ་མ་ཡུལ་ཤོག་མི་དམངས་སྲིད་གཞུང་ཆགས་ཡོད། དེའི་མར་ཙམ་ན་ཤྭ་བ་བརྒྱ་རྫོང་འཕྲང་ཞེས་པའི་གནའ་བོའི་འཕྲང་ལམ་གལ་ཆེན་ཞིག་ཡོད། ཤྭ་བ་བརྒྱ་རྫོང་ཞེས་པའི་མིང་ཐོགས་དོན་ཡང་དེར་ལོ་ངོ་སྟོང་འགའི་ཡར་སྔོན་ནས་ཡིན་པའི་བྲག་རིས་ཤྭ་གཟུགས་ཤིག་ཡོད་པས་རེད་འདུག །དེ་ནས་མར་ཙམ་སོང་དུས་དབོན་པོ་ཡུལ་ཚོའི་རྫ་ཆུའི་གྲུ་ཁ་རེད།

དྲེལ་ཁོག

རྫ་ཆུ་བརྒལ་རྗེས་དྲེལ་ཁོག་བརྒྱུད་ནས་འདན་གླང་(ཀློང་)རོང་ཁོག་ལ་འགྲོ་དགོས། སྤྱིར་གནའ་དུས་སུ་འབྲི་ཆུའི་འགྲམ་གྱི་སྒ་སྐྱུ་འདན་གསུམ་ལ་ཁམས་འདན་མའི་ཡུལ་གྲུ་དང་། རྫ་ཆུ་སྟོད་སྨད་བར་གསུམ་འདི་གླིང་གི་ཕ་ས་མ་མཚེར་དུ་བརྩིས་སྲོལ་འདུག །ལྡན་ཡུལ་ཟེར་དོན་ཡང་འབྲི་ཆུ་གསེར་ལྡན་དགའ་མ་ཞེས་པ་ལས་བྱུང་རབས་ཤིག་ཤོད་སྲོལ་འདུག །དེང་གི་དུས་སུ་ཡུལ་ལུང་དེར་འདན་མ་ཟེར་དོན་ནི་བློན་འདན་མ་བྱང་ཁྲ་སྐད་གྲགས་ཆེ་བས་མིའི་མིང་ཡུལ་ལ་ཐོགས་ནས་འདན་ཡུལ་ཞེས་འབོད་པ་རེད། གང་ལྟར་དྲེལ་ཁོག་འདི་ལ་མིང་གི་རྣམ་གྲངས་འགའ་འདུག །གཅིག་ནི་དེང་སྐབས་ཡོངས་གྲགས་ཀྱི་མིང་ནུ་ཤུལ་ཟེར། ནུ་ཤུལ་ཟེར་དོན་ནི་ན་འོར་ཞེས་པའི་སྒྲ་འགྱུར་ནས་ཐོགས་པ་རེད། ན་འོར་ཟེར་དོན་ནི་དྲེལ་ཆུ་རྫ་ཆུ་ལ་འདྲེས་མཚམས་དེར་ན་གོར་གོར་གཉིས་ཡོད་པ་དེ་རྒྱུ་མཚན་དུ་བྱས་ནས་མིང་བཏགས། ལུང་པ་དེ་ནས་བཞུར་བཞིན་པའི་ཆུ་ལ་དྲེལ་ཆུ་ཟེར། དྲེལ་ཆུའི་མིང་འདི་ལ་དཔྱད་སྐབས་ལུང་པ་འདིའི་མིང་ཡང་དང་ཐོག་དྲེལ་ཁོག་རྗོད་བཞིན་ཡོད་དམ་སྙམ། མ་ཚད་རྒྱ་བཟའ་ཀོང་ཇོ་བོད་ལ་དྲངས་སྐབས་དྲེལ་དཀར་པོ་ཞིག་ཡོད་རབས་འདུག་པ་དེ་གཉིས་འབྲེལ་བ་ཡོད་དམ་སྙམ། དེ་དག་ནི་སོ་སོའི་བསམ་ཚུལ་ཙམ་ལས་ངག་རྒྱུན་མི་འདུག་ལ་ལོ་རྒྱུས་ཀྱི་བདེན་དཔང་ཡང་མ་རྙེད། མདོར་ན་ནུ་ཤུལ་ལུང་པའི་སྟོད་ན་དྲེལ་ཁོག་དང་ཁུ་ཡོག་ལུང་པ་ཞེས་ལུང་པ་གཉིས་ཡོད། དྲེལ་ཁོག་ནས་དྲེལ་ལ་རྒྱབ་ན་འཇུའི་ས་ཆར་ཐོན་འགྲོ་བ་དང་དེ་ནི་གནའ་ལམ་གལ་ཆེན་ཞིག་ཡིན། འོན་ཀྱང་ངག་རྒྱུན་ལྟར་ན་རྒྱ་བཟའ་བརྒྱུད་སའི་ལམ་ཁ་དེ་ཁུ་ཡོག་ལུང་པ་རེད་ཟེར། ཁུ་ཡོག་ལུང་པ་ཟེར་དོན་ནི་ལུང་པ་དེར་རྩྭ་ཁུ་ཡོག་སྐྱེ་ཡོད་པས་རེད་འདུག །ཁུ་ཡོག་ལ་བརྒལ་རྗེས་འདན་གླང་རོང་ཁོག་ལ་འགྲོ་བདེ་བར་མ་ཟད། དེར་གནའ་ལམ་གསལ་ལ་དོད་པོ་ཞིག་ཀྱང་འདུག

གླང་རོང་ཁོག

ཁུ་ཡོག་ལ་བརྒལ་ནས་འདན་གླང་(ཀློང་)རོང་ཁོག་ལ་ཐོན་འགྲོ། གླང་རོང་ཁོག་ནས་བཞུར་བཞིན་པའི་ཆུ་ལ་གླང་ཆུ་ཟེར། ལུང་པ་འདི་ནི་བོད་བཙན་པོའི་སྐུ་དུས་ནས་བཟུང་ལོ་རྒྱུས་མཚམས་ཆད་མ་མྱོང་པའི་ལུང་པ་ཞིག་རེད། དཔེར་ན། ཐོག་མར་ཀློང་ཐང་སྒྲོལ་མ་ལྷ་ཁང་ནས་བཟུང་། རྒྱ་བཟའི་ལོ་རྒྱུས། འདན་ཟ་ཧོར་རྒྱལ་པོའི་ལོ་རྒྱུས། གླིང་འདན་མའི་ལོ་རྒྱུས། ཀ་བཞི་དཔོན་གྱི་ལོ་རྒྱུས། བེ་རུ་རྒྱལ་པོའི་ལོ་རྒྱུས། འདན་མའི་གཟིམ་ཁག་བདུན་གྱི་ལོ་རྒྱུས་སོགས་སྙན་མོ་སྲིད་པའི་སྒྲུང་འདྲ་བཤད་རྒྱུ་འདུག །དེ་ལས་ཐོག་མར་ཀློང་ཐང་གི་སྒྲོལ་མ་ལྷ་ཁང་འདི་བོད་རྒྱལ་སྲོང་བཙན་སྒམ་པོས་ཡང་འདུལ་ས་ཡི་རུ་ནོན་དུ་བཞེངས་པ་དང་། དེའི་སྐབས་སུ་རྒྱ་བཟའ་ཀོང་ཇོ་ཡང་བོད་དུ་མནའ་མར་བསུས། ཀློང་ཐང་སྒྲོལ་མ་ལྷ་ཁང་གི་སྒྲོལ་སྐུ་གསུང་འབྱོན་མ་ཡང་རྒྱ་བཟའ་ཀོང་ཇོས་གནང་བར་གྲགས། རྒྱ་བཟའ་འདན་ནས་དུས་ཡུན་རིང་ཙམ་བསྡད་པའི་ངག་རྒྱུན་དང་ལོ་རྒྱུས་སོགས་ཡོད་པ་ནི། 《 རྒྱལ་རབས་གསལ་བའི་མེ་ལོང་།》ལས། P༡༢༢“དེའི་བར་ལ་རྒྱ་མོ་བཟའ་ལ་སོགས་པའི་བོད་བློན་རྣམས་ཀྱིས་ལྡན་མ་བྲག་རྩར་ཕེབས་ནས། བྲག་ལ་བྱམས་པ་ཁྲུ་བདུན་པ་ཅིག་དང་། བཟང་སྤྱོད་གཉིས་བརྐོས་མར་བཞེངས། དེར་ཟླ་བ་གཅིག་བསྒུག་དེར་ཡང་བློན་པོ་མ་བྱོན། ཕུང་པོ་རི་ལ་ཆག་ཕེབས། ལ་ལ་འཕྲེད་ལམ་བཅོས། རི་དྭགས་བཟུང་ནས་འོ་མ་བཞོས། དེར་ཡང་བློན་པོ་མ་བྱོན། ཁམས་ཀྱི་པདྨ་ཤང་དུ་ཆག་ཕེབས། ཞིང་བཏབ། རང་ཐག་ཆུ་བརྐོར་བཙུགས། །དེར་ཟླ་བ་གཉིས་བསྒུག །དེར་ཡང་བློན་པོ་མ་བྱོན། དེ་ནས་སྒོ་དོང་སྒོ་མོའི་རྩར་ཕེབས། རྒྱ་ནག་གི་ཕྱྭ་གཡང་ཉམས་པས། རྒྱ་ནག་གི་ལྷ་སྲུང་རྣམས་ཀྱི་མཐུས་སྒོ་མོ་འགགས་པས་དེར་ཟླ་གཉིས་ལུས། དེར་བློན་པོ་སླེབས་སོ། །”ཞེས་འཁོད་ཡོད། དེ་དག་ལས་ལོ་རྒྱུས་མང་ཙམ་ཞིག་ད་ལྟའི་བར་དུ་ངག་རྒྱུན་དང་ཤུལ་བཞག་རིག་དངོས་སོགས་དངོས་སུ་ལྷག་ཡོད། གླང་རོང་ཁོག་ནས་མར་ཡོང་དུས་ཐོག་མར་སྐད་གྲགས་ཅན་གྱི་འདན་གྱི་བྲག་ལྷ་མོ་ཞེས་པའི་བྲག་བརྐོས་གལ་ཆེན་དེར་ཐོན་འགྲོ། བྲག་བརྐོས་དེ་རྒྱ་བཟས་བཞེངས་ཞེས་ཀུན་ལ་གྲགས་ནས་ཡོད། བྲག་བརྐོས་དེ་ལ་དཔྱད་པ་གཏོང་མཁན་མང་པོ་ཞིག་བྱུང་བས་སོ་སོའི་རྟོག་ཚོད་ཀྱི་དཔྱད་བརྗོད་ཡང་རབ་དང་རིམ་པ་ཞིག་བྱས་འདུག །

རྒྱ་བཟའི་སྒར་ཤུལ།

གླང་རོང་བྲག་ལྷ་མོ་བརྒལ་ནས་མར་ཙམ་ན་འཇའ་ག་ཟེར་བའི་ས་ཆ་ཞིག་ཡོད། ས་ཆ་དེར་རྒྱ་བཟའི་སྒར་ཤུལ་ཟེར་བ་དང་དེའི་བྲག་ངོས་སུ་གནའ་རྒྱ་བཟའ་ཀོང་ཇོའི་ན་བཟའ་བསྐོན་ས་རེད་ཟེར་ནས་ཙནྡན་གྱི་ཤིང་སྡོང་ཞིག་ཡོད་རབས་སོགས་བཤད་སྲོལ་འདུག །འོན་ཀྱང་དེང་སྐབས་སྦྲ་ཤུལ་ཙམ་ལས་ཙནྡན་གང་ཡང་མཐོང་རྒྱུ་མི་འདུག

རྟ་མདའི་གུ་རུའི་བྲག་བརྐོས།

རྟ་མདའ་རུ་བའི་ས་ཐོག་ཏུ་གུ་རུའི་བྲག་བརྐོས་ཆེན་པོ་ཞིག་ཡོད་པ་དེ་རེད། ངག་རྒྱུན་དུ་གུ་རུའི་བྲག་བརྐོས་དེ་ཡང་རྒྱ་བཟས་རྟ་ལྕག་གིས་བྲིས་པ་རེད་ཅེས་བཤད་སྲོལ་འདུག །རྒྱ་བཟའ་བོད་དུ་ཕེབས་སྐབས་གུ་རུ་རིན་པོ་ཆེ་བྱོན་མེད་པས་གུ་རུའི་སྐུ་དེ་རྒྱ་བཟས་བརྐོས་པ་ཡིན་མི་འོས་རུང་། ངག་རྒྱུན་ནི་ངག་རྒྱུན་རེད། བདེན་པ་ཡིན་རུང་མིན་རུང་། བཤད་སྲོལ་འདིས་ཡུལ་མི་ཚོས་རྒྱ་བཟའི་ཕྱོགས་ཀྱི་དད་འདུན་དེ་ལེགས་པོ་ཞིག་མཚོན་འདུག་བསམ།

གླང་རོང་མདོའི་རྒྱ་བཟའི་རྗེས་ཤུལ།

གླང་རོང་མདོར་ཐོན་དུས་གོང་གི《 རྒྱལ་རབས་གསལ་བའི་མེ་ལོང་།》 གི་ནང་དོན་ལྟར།“ཁམས་ཀྱི་པདྨ་ཤང་དུ་ཆག་ཕེབས། ཞིང་བཏབ། རང་ཐག་ཆུ་མཆིག་བཙུགས། དེར་ཟླ་བ་གཉིས་བསྒུག་དེར་ཡང་བློན་པོ་མ་བྱོན།”ཞེས་འཁོད་ཡོད་པ་ལྟར་ད་ལྟའི་བར་དུ་རྒྱ་བཟའི་སྐུ་དུས་ནས་ཡིན་ཟེར་བའི་རང་ཐག་ཆུ་མཆིག་རྙིང་པ་ཞིག་དང་མ་ཚད་ཆུ་ཐག་ཚང་ཟེར་བའི་དུད་རྙིང་། ཆུ་མཁན་ཚང་ཟེར་བའི་དུད་རྙིང་སོགས་ཡོད། ཁོ་རང་ཚོས་ཁོ་ཚོ་ནི་རྒྱ་བཟའི་སྐབས་ནས་ཡོད་པའི་དུད་རྙིང་ཡིན་ཞེས་རྗོད་བཞིན་འདུག །མ་ཚད་ས་ཆ་དེར་ལྕང་སྡོང་ཆེན་མོ་ཞིག་ཡོད་པ་དེ་ཡང་ངག་རྒྱུན་དུ། དང་ཐོག་རྒྱ་བཟས་ས་ཆ་དེར་ལྕང་སྡོང་གསུམ་བཙུགས་པ་རེད་ཟེར། འོན་ཀྱང་ད་སྐབས་ལྕང་སྡོང་གཅིག་ལས་ལྷག་མི་འདུག །དེས་ཀྱང་མ་ཚད་པར་གླང་རོང་མདོར་རྒྱ་མོ་རྒྱ་ཞིང་མ་ཟེར་བའི་རྒྱ་བཟའ་ཀོང་ཇོའི་ཞིང་ཤུལ་ཡོད། གླང་རོང་མདོའི་འབྲི་ཆུའི་ཕ་རོལ་དུ་བྲག་དམར་ཆོས་རྫོང་ངམ་བྲག་དམར་འོག་བརྐོས། འགའ་རེས་སྒྲོལ་མ་བྲག་རྩ་དང་འདན་མ་བྲག་རྩ་སོགས་མཚན་གྱི་རྣམ་གྲངས་གང་མང་ཞིག་ཡོད་པ་དེ་ཡང་རྒྱ་བཟས་བཞེངས་པ་རེད་ཟེར། བྲག་བརྐོས་དེ་དགུན་དུས་འབྲི་ཆུ་ཇེ་ཆུང་འགྲོ་སྐབས་གསལ་པོར་མཐོང་ཐུབ། གང་ལྟར། འདན་གླང་རོང་གི་ས་ཆ་འདིར་རྒྱ་བཟའི་སྐོར་གྱི་བཤད་སྲོལ་དང་ཤུལ་བཞག་རིག་གནས་ཕུན་སུམ་ཚོགས་པ་ཞིག་ཡོད་པ་ལ་བསམ་ཚེ་དེ་ནི་ལོ་རྒྱུས་ལྟར་རྒྱ་བཟའ་ཀོང་ཇོ་འདན་ལུང་ཁོག་ཏུ་དུས་ཡུན་རིང་ཙམ་བསྡད་ཡོད་པ་དང་ཧ་ཅང་འབྲེལ་ཆགས་པོ་རེད་འདུག་བསམ།

དབེན་མགུའི་རྒྱ་བཟའི་སྒྲུབ་ཕུག

གླང་རོང་ཁོག་གི་མར་ཙམ་ན་དབེན་མགུ་(གཡེར་འགུལ།)ཞེས་པའི་ས་ཆ་དབེན་ལ་ཉམས་དགའ་བ་ཞིག་ཡོད། ས་ཆ་དེར་རྒྱ་བཟའི་སྒྲུབ་ཕུག་ཞེས་པ་དང་། རྣམ་སྣང་གི་རྡོ་སྐུ་ཆེན་པོ་སོགས་ཡོད་པ་ལས་དེ་དག་ཀྱང་རྒྱ་བཟའ་འདན་ལུང་དུ་བཞུགས་སྐབས་བཞེངས་གྲུབ་པ་རེད་ཅེས་ཡུལ་མི་ཚོས་ངག་རྒྱུན་དུ་རླུང་ལྟར་གྲགས་ནས་འདུག

རྒྱ་བཟའ་ཀོང་ཇོས་བཞེངས་པའི་ཆུ་ཁུ་ཐོག་མཆོད་རྟེན་དཀར་ཆུང་།

ཀ་ཕུའི་མར་ཙམ་ན་འབའ་གྷ་ཟེར་བའི་ས་ཆ་ཞིག་ཡོད། ས་ཆ་དེར་ཆུ་ཁུ་ཐོག་མཆོད་རྟེན་དཀར་ཆུང་ཞེས་པའི་མཆོད་རྟེན་སྐད་གྲགས་ཅན་ཞིག་གི་ཤུལ་ཡོད། དེང་སྐབས་མཆོད་རྟེན་དེ་ངག་རྒྱུན་ཙམ་དུ་གནས་རུང་ལོ་རྒྱུས་ཐོག་དེ་ནི་འདན་ལུང་ཁོག་གི་ས་ཆ་གལ་ཆེན་ཞིག་རེད། མཆོད་རྟེན་དེ་ཡང་རྒྱ་བཟའ་ཀོང་ཇོས་བཞེངས་པ་རེད་ཟེར། ངའི་སེམས་ལ་མཆོད་རྟེན་དེ་རྒྱ་བཟའ་ཀོང་ཇོས་བཞེངས་པ་ཡིན་ཚེ་ཕལ་ཆེར་ཅིན་ཤིང་ཀོང་ཇོ་ཡིན་ནམ་བསམ་པའི་དོགས་པ་བྱུང་། དེ་ཡང་གོང་དུ་བཤད་པ་ལྟར་རྣམ་རྒྱལ་གླིང་དགོན་ནས་ཀློང་ཐང་སྒྲོལ་མའི་བར་གྱི་བརྒྱུད་ལམ་ཐོག་ལ་ཡོད་པས་སོ། །

ཆོས་སྡེའི་མདུན་གྱི་རྒྱ་དེའུ་བུ་མོ་སྤུན་གསུམ།

ཆོས་སྡེ་དེ་ནི་ལོ་རྒྱུས་རིང་པོ་ཡོད་པའི་སྡེ་པ་ཞིག་རེད་ལ། ས་ཆ་དེར་བཙན་པོའི་སྐབས་དང་གླིང་གེ་འབྲུག་གི་སྐབས། བེ་རུའི་སྐབས། སྡེ་དགེ་རྒྱལ་པོའི་སྐབས། འདན་མའི་གཟིམ་ཁག་གི་སྐབས་སོགས་དུས་སྐབས་མང་པོའི་ལོ་རྒྱུས་སྙན་ལ་རིང་པ་བཤད་རྒྱུ་ཡོད། དེ་དག་ལས་རག་ཆོས་དགོན་པའི་ཐད་ཀྱི་འབྲི་ཆུའི་འགྲམ་ཟུར་དེར་དེའུ་ཆུང་གསུམ་ཡོད། ཡུལ་མི་ཚོའི་ངག་རྒྱུན་དུ་རྒྱ་བཟའ་ཀོང་ཇོ་ལམ་ཁ་འདི་བརྒྱུད་ནས་འགྲོ་སྐབས་གཡོག་མོ་གསུམ་ས་ཆ་དེ་ནས་ཚེ་ལས་འདས་པ་རེད་ཟེར། གཡོག་མོ་གསུམ་དུར་དུ་སྦས་ཤུལ་དེ་ཕྱིས་སུ་དེའུ་ཆུང་གསུམ་ལ་གྱུར། དེ་ཡིན་མིན་གྱི་ཁ་ཚོན་གཅོད་དཀའ་ནའང་། མང་ཚོགས་ཀྱི་ངག་རྒྱུན་དང་དེའུ་མིང་ལ་དཔྱད་ན་རྒྱུ་མཚན་གང་ལ་གང་འཚམས་རེ་ཡོད་དོ་སྙམ། དེང་གི་དུས་སུ་དེའུ་ཆུང་དེ་གསུམ་གནས་རི་ལ་བརྩིས་ནས་དགོན་པའི་དབྱར་གནས་པའི་དགེ་འདུན་པ་རྣམས་ལྗོངས་རྒྱུ་བྱེད་ས་ཡིན།

ངེད་ཐང་ལྷ་ཁང་ཆེན་མོའི་མཆོད་རྟེན།

དྲན་འཁོར་ཡུལ་ཤོག་གི་ངེད་ཐང་ལྷ་ཁང་ཆེན་མོའི་གདན་སར་མཆོད་རྟེན་གྱི་ཤུལ་ཞིག་ཡོད། བཤད་སྲོལ་དུ་མཆོད་རྟེན་དེ་ཡང་རྒྱ་བཟས་བཞེངས་པ་རེད་ཟེར། དེང་སྐབས་ས་ཆ་དེར་གྲོང་ཤུལ་ཙམ་ལས་མཐའ་ན་ངག་རྒྱུན་དེ་བཤད་ཤེས་མཁན་ཡང་ཕལ་ཆེར་མེད་པའི་ཚད་ལ་ཐོན་ཡོད།

དུང་ལུང་བཟང་སྤྱོད་རྡོ་བརྐོས།

དྲན་འཁོར་ཡུལ་ཤོག་ཏུ་དུང་ལུང་བཟང་སྤྱོད་རྡོ་བརྐོས་ཡོད། དུང་ལུང་ཁོག་ཟེར་དོན་ནི་ལུང་པ་དེའི་དབྱིབས་དུང་ཞིག་དང་འདྲ་བས་མིང་དེ་ལྟར་ཐོགས། དུང་ལུང་དང་ངེད་ཁོག་འདི་གཉིས་ལ་འབྲི་གུང་སྐྱོབས་པ་འཇིག་རྟེན་གསུམ་མགོན་སྐུ་དུས་ཀྱི་འབྲི་གུང་སྒྲུབ་གནས་མང་པོ་ཡོད་ལ། ཁྱད་པར་དུ་གྲུབ་པའི་རྒྱལ་མོ་ཞེས་པའི་མཁའ་འགྲོ་མ་ཞིག་གི་སྒྲུབ་གནས་ཁྱད་པར་ཅན་ཞིག་ཀྱང་འདུག ། གང་ལྟར་ལུང་པ་དེར་རྒྱ་བཟའ་ཀོང་ཇོའི་ལོ་རྒྱུས་ཡང་གང་མང་ཞིག་ཡོད་པ་ནི། དུང་ལུང་གི་དཀྱིལ་ཙམ་ལ་ཐོན་དུས་ཆུ་འགྲམ་གཡས་ཕྱོགས་སུ་རྡོ་ཕ་བོང་ཆེན་པོ་ཞིག་ཡོད། ཕ་བོང་དེའི་ཐོག་ལ་ཡི་གེ་བརྐོས་ཡོད། རྡོ་ཕ་བོང་དེའི་ཕྱེད་ཀ་ས་འོག་ཏུ་སོང་ཡོད་པས་ཡི་གེ་ཡང་ཕྱེད་ཀ་ས་འོག་ཏུ་སོང་འདུག །ཡུལ་མི་ཚོའི་ངག་རྒྱུན་དུ་རྡོ་ཕ་བོང་ངོས་ཀྱི་ཡི་གེ་རྒྱ་བཟའ་ཀོང་ཇོས་བརྐོས་པ་རེད་ཟེར། ཡི་གེའི་ནང་དོན་བཟང་སྤྱོད་ཡིན་པར་བཤད།

གྲུ་པ་ཚང་།

དུང་ལུང་ཁོག་ནས་ཡར་ཙམ་སོང་རྗེས་ཁ་ཕྱིར་འཁོར་ནས་ལེ་སེ་ལ་ཞེས་པ་ཞིག་བརྒལ་དགོས། ལེ་སེ་ལ་བརྒལ་རྗེས་ལུང་པ་གོང་མའི་དགེ་རོང་གྲོང་ལ་ཐོན་འགྲོ། དགེ་རོང་ནས་ཅུང་ཙམ་སོང་རྗེས་འདམ་ཐོག་གྲུ་ཁར་ཐོན་འགྲོ། ཡུལ་མི་ཚོའི་ངག་རྒྱུན་དུ་ལེ་སེ་ལ་ཞེས་པའི་འབུད་ལམ་དེ་གནའ་ནས་ཡོད་རུང་རྒྱ་བཟའ་ཕེབས་སྐབས་ཡང་བསྐྱར་རྒྱ་བསྐྱེད་ནས་གསར་བཟོ་བྱས་པ་རེད་ཟེར། འདམ་ཐོག་གྲུ་ཁ་ལ་གྲུ་པ་ཚང་ཟེར་བའི་དུད་རྙིང་ཞིག་ཡོད་པ་དེ་ཡང་བོད་བཙན་པོའི་དུས་ནས་ཡོད་ཟེར། གྲུ་པ་ཚང་གི་མི་རབས་མི་རྒྱུད་ཚང་མས་འབྲི་ཆུ་ལ་གྲུ་གཏོང་བཞིན་པས། དུད་མིང་ལའང་གྲུ་པ་ཚང་ཞེས་ཐོགས་པ་རེད་ཟེར། འབྲི་ཆུའི་ཕ་རོལ་ནི་ཡུས་ཧྲུའུ་འདམ་ཐོག་རེད། འདམ་ཐོག་ནས་ཡུས་ཧྲུའུ་ཁུལ་གྱི་འབིས་རྣམ་པར་སྣང་མཛད་བར་གནའ་བོའི་འགྲུལ་ལམ་བརྒྱུད་ནས་སོང་ན་མགྱོགས་པོར་ཐོན་འགྲོ།

དཔེ་མདའི་རྒྱ་བཟའི་མཆོད་རྟེན།

སྤྱིར་ན་དཔེ་མདའ་ཡུལ་ཤོག་ལ་དཔེ་མདའ་མི་ཟེར་བ་མདའ་ཟེར། གང་ཡིན་ཟེར་ན་དཔེ་མདའ་ཐོགས་པའི་ལུང་པ་དེའི་མིང་ལ་བ་ཁོག་ཟེར་ལ། ལུང་པ་དེ་བ་གླང་དང་འབྲེལ་བ་ཡོད་པའི་སྒྲུང་སྙན་མོ་ཞིག་བཤད་སྲོལ་ཡོད་རུང་འདིར་བཀྲོལ་བའི་དགོས་པ་ཆུང་། གང་ལྟར་བ་ཁོག་ནས་བཞུར་བཞིན་པའི་ཆུ་ལ་བ་ཆུ་དང་། བ་ཁོག་གི་སྟོད་ལ་ཇོ་བོ་བ་སུ་ཟེར་བའི་ཡུལ་དེའི་གཞི་བདག་གལ་ཆེན་ཞིག་ཀྱང་ཡོད། དེ་ལྟར་ཟེར་ཡོང་དུས་སྡེ་པ་འདིའི་མིང་ལ་དོན་ཐོག་བ་མདའ་ཟེར། ཡིན་ནའང་དེང་གི་དུས་སུ་མི་ཚང་མས་དཔེ་མདའ་ཡུལ་ཤོག་ཅེས་རྗོད་བཞིན་འདུག །དཔེ་མདའ་ཡུལ་ཤོག་གི་གྲོང་ཐོག་ལ་བདུད་འདུལ་མཆོད་རྟེན་གསར་པ་ཞིག་ཡོད། མཆོད་རྟེན་དེ་ནི་ལོ་རྒྱུས་ཡུན་རིང་ལྡན་པའི་མཆོད་རྟེན་ཞིག་ཡིན་པ་དང་ཡུལ་མི་ཚོའི་ངག་རྒྱུན་དུ་སྔར་གྱི་མཆོད་རྟེན་དེ་ནི་རྒྱ་བཟའ་ཀོང་ཇོས་བཞེངས་པ་རེད་ཟེར། མཆོད་རྟེན་དེའི་ཆེ་ཆུང་དང་དབྱིབས་སོགས་ཚང་མ་འབྲི་ཆུ་ཕ་རོལ་གྱི་འདམ་ཐོག་མཆོད་རྟེན་དང་གཅིག་མཚུངས་ཡིན་ཟེར། འདམ་ཐོག་མཆོད་རྟེན་ཡང་རྒྱ་བཟའ་ཀོང་ཇོས་བཞེངས་པར་གྲགས་ལ་ད་ལྟའི་བར་མ་ཉམས་པར་ལྷག་ཡོད། དཔེ་མདའི་མཆོད་རྟེན་ནི་དུས་འགྱུར་སྐབས་བརླགས་ཤོར་བས་ཕྱིས་སུ་སྔར་གྱི་ཤུལ་ཐོག་ཏུ་མཆོད་རྟེན་གསར་པ་འདི་བཞེངས་པ་རེད་ཟེར།

ག་བྷའི་བྲག་ཐོག་མཆོད་རྟེན།

ག་བྷའི་བྲག་ཐོག་མཆོད་རྟེན་དེ་ནི་རྒྱ་བཟས་རྟ་ལྕག་གིས་བྲིས་པ་རེད་ཟེར་སྲོལ་འདུག །མ་ཟད་ག་བྷ་ལ་མཛེ་ནད་བཅོས་པའི་མཆོད་རྟེན་ཞིག་ཡོད་པ་དེ་ཡང་རྒྱ་བཟས་བཞེངས་པ་རེད་ཟེར། གནའ་ལུང་པ་འདིའི་མི་རྣམས་མཛེ་ནད་ཀྱིས་མནར་ནས་ཡོད་སྐབས། རྒྱ་བཟའ་ཀོང་ཇོ་ལམ་ཁ་འདི་ནས་བརྒྱུད་སྐབས་སེམས་ཅན་མཛེ་ནད་ཀྱིས་མནར་བཞིན་པ་མཐོང་བས་དེ་དག་མཛེ་ནད་ཀྱི་སྡུག་བསྔལ་ལས་གྲོལ་ཆེད་མཆོད་རྟེན་དེ་བཞེངས་པ་རེད་ཟེར། མཆོད་རྟེན་བཞེངས་རྗེས་ལུང་པ་དེའི་མཛེ་ནད་ཀྱི་རྒྱུན་ཀྱང་ཆད་པ་རེད་ཅེས་ཡུལ་མི་ཚོའི་ངག་རྒྱུན་འདུག

སྒྲོལ་སྐུ་རང་བྱོན།

འབུར་ལེགས་དགོན་པའི་འོག་གི་སྒྲོལ་སྐུ་རང་བྱོན་དེ་ནི་རྒྱ་བཟའ་ཕེབས་སྐབས་བྲག་ལ་མཛུབ་མོས་གྲུབ་རྟགས་ཀྱིས་བརྐོས་གནང་བ་རེད་ཟེར་སྲོལ་འདུག

གང་ལྟར་གོང་གི་བཤད་སྲོལ་དེ་དག་གོ་རིམ་ལྟར་འབྲེལ་བ་ཡོད་ན། ང་ཚོ་ལ་ཧ་ཅང་གསལ་བའི་རྒྱ་བཟའ་ཀོང་ཇོ་སེར་ཤུལ་རྫོང་གི་ས་ཐོག་ནས་འགྲུལ་བཞུད་བྱས་ཡོད་པའི་བརྒྱུད་ལམ་ཞིག་མངོན་ཡོད་ལ། ཡང་འདུལ་རུ་ནོན་གྱི་ཀློང་ཐང་སྒྲོལ་མ་ལྷ་ཁང་རིག་གནས་ཀྱི་ལྟེ་བར་གྱུར་པའི་ཁམས་འདན་མའི་རིག་གནས་ཀྱི་གྲུབ་ཆའི་ཡན་ལག་ལྟ་བུ། ལོ་སྟོང་གི་ཐང་བོད་གནའ་ལམ་འདིའང་ལམ་ཁ་ཙམ་དུ་མ་ཚད་པར། ལམ་ཁ་འདི་བརྒྱུད་ནས་གནའ་དེང་གི་ཁམས་པའི་ལོ་རྒྱུས་དང་རིག་གནས། ཆབ་སྲིད་དང་དཔལ་འབྱོར་སོགས་ཕྱོགས་ཡོངས་ནས་འཕྲོས་དོན་རེ་བརྗོད་བཞིན་འདུག་བསམ།

གཤམ་དུ་ཐང་བོད་གནའ་ལམ་གྱི་ས་ཁྲ་རགས་ཙམ་ཞིག་བཟོས་ཡོད་པ་དེས་ཉིད་ལ་ཚོར་སྣང་གསར་པ་རེ་ཡོང་བར་སྨོན། །

དེ་ལྟར་ལོ་སྟོང་གི་ཐང་བོད་གནའ་ལམ་ལས་དཀར་མཛེས་ཁུལ་སེར་ཤུལ་རྫོང་གི་བརྒྱུད་ལམ་ངོ་སྤྲོད་མདོར་བསྡུས་ཤིག་བྱས་པ་འདི་རང་ངོས་ནས་བརྒྱུད་ལམ་འདིའི་སྐོར་ལ་དོ་སྣང་ཡུན་རིང་ཙམ་བྱས་ནས་དགོས་གལ་ཆེན་པོར་མཐོང་བས་དཔྱད་ལྡན་པ་དག་ལ་རྒྱུ་ཆ་ཞིག་གི་ཚབ་ཏུ་བཀོད་པ་ཡིན། །