འབྲི་ཀླུང་གསེར་ལྡན།

   མདོ་ཁམས་ཆུ་དྲུག་ཏུ་གྲགས་པའི་རྒྱལ་མོ་རྔུལ་ཆུ་དང་། རྫ་ཆུ། འབྲི་ཆུ། ཉག་ཆུ། རྒྱལ་རོང་རྒྱལ་མོ་རྔུལ་ཆུ། རྨ་ཆུ་བཅས་ཀྱི་ཡ་གྱལ་འབྲི་ཆུ་ནི། རང་རྒྱལ་དང་། གླིང་ཆེན་ཨེ་ཤ་ཡ་ལ་ཨང་དང་པོ་དང་། འཛམ་གླིང་གི་ཨང་གསུམ་པར་སླེབས་པའི་སྐད་གྲགས་ཆེ་བའི་ཆུ་རྒྱུན་ཆེས་རིང་བ་ཞིག་ཡིན་ལ། རང་རྒྱལ་དང་། གླིང་ཆེན་ཨེ་ཤ་ཡ་ཡི་ཆུ་མཛོད་ཆེན་མོ་དང་། ཀྲུང་ཧྭ་མི་རིགས་ཀྱི་རླབས་ཆེན་གྱི་མ་ཡུམ་གཙང་པོའང་ཡིན། འབྲི་ཆུའི་ཆུ་མགོ་མཚོ་སྔོན་ཞིང་ཆེན་གྱི་ལྷོ་ངོས་བ་ཡན་ཧ་རིའི་ལྷོ་ཕྱོགས་དགེ་ལ་བསྟན་སྟོང་ནས་བྱུང་སྟེ་རིམ་བཞིན་མཚོ་སྔོན་དང་། བོད་ལྗོངས། སི་ཁྲོན། ཡུན་ནན། ཁྲུང་ཆིང་། ཧུའུ་པེ། ཧུའུ་ནན། ཅང་སུའུ། ཅང་ཤིས། ཨན་ཧུའེ། ཧྲང་ཧའེ་བཅས་ཞིང་ཆེན་༡༡བརྒྱུད་ནས་མཐར་ཧྲང་ཧའེ་གྲོང་ཁྱེར་ནས་ཤར་གྱི་རྒྱ་མཚོར་འབབ་ཅིང་། སྤྱིའི་རིང་ཚད་ལ་སྤྱི་ལེ་༦༣༨༧ཡོད་པ་དང་། འབབ་རྒྱུད་ཀྱི་རྒྱ་ཁྱོན་སྤྱི་ལེ་གྲུ་བཞི་མ་ཁྲི་༡༨༠ཡིན་པ་དེས་རྒྱལ་ཡོངས་ཀྱི་སྐམ་སའི་སྤྱིའི་རྒྱ་ཁྱོན་གྱི་༡༩ཙམ་ཟིན་གྱི་ཡོད།

འབྲི་ཆུའི་ཆུ་འགོ་དགེ་ལ་བསྟན་སྟོང་རྒྱ་སྐད་དུ་ཐོ་ཐོ་ཧོ་ནས་མཚོ་སྔོན་ཞིང་ཆེན་ཁྲི་འདུ་རྫོང་གི་ཞེ་འུ་གྲོང་བརྡའི་རྒྱ་སྐད་དུ་དྲི་མེད་མདའ་（直门达）གྲོང་སྡེ་ཞེས་པའི་ཡན་ལ་རྒྱ་སྐད་དུ་ཐོང་ཐོན་ཧོ་（通天河）ཟེར། དྲི་མེད་མདའ་གྲོང་སྡེ་ནི་འབྲི་ཆུ་རྒྱུད་ཀྱི་མཚོ་སྔོན་དང་སི་ཁྲོན་བར་གྱི་ས་མཚམས་ཡིན་ལ། ས་མཚམས་དབྱེ་འབྱེད་ཀྱི་རྡོ་རིང་གི་བྱང་ངོས་སུ་མཚོ་སྔོན། ལྷོ་ངོས་སུ་སི་ཁྲོན། ཕྱོགས་ངོས་གཉིས་ལ་རྒྱལ་སྲིད་སྤྱི་ཁྱབ་ཁང་ནས་སྤྱི་ལོ་༢༠༢༡ལོར་བརྐོས་ཞེས་པ་དང་། དྲི་མེད་མདའ་མན་ནས་སི་ཁྲོན་ཞིང་ཆེན་གྱི་ཡིའི་པིང་（宜宾）བར་ལ་རྒྱལ་སྐད་དུ་ཅིན་ཧྲ་ཅང་（金沙江）ཟེར། ཡིའི་པིང་ནས་བཟུང་རྒྱ་སྐད་དུ་ཁྲང་ཅང་（长江）ཟེར། བོད་སྐད་དུ་འབྲི་ཆུ་ཞེས་པ་ལས་མིང་གཞན་འདོགས་སྲོལ་མེད།

དེ་ལྟར་རང་རེའི་སེར་ཤུལ་རྫོང་གི་འདན་ཁོག་ནི་འབྲི་ཆུའི་སྟོད་རྒྱུད་དུ་གནས་ཡོད། འབྲི་ཆུ་ནུབ་བྱང་ནས་ཤར་ལྷོའི་ཕྱོགས་སུ་འདན་ཁོག་གི་བཙན་མདའ་དང་། བེ་མདའ། དྲན་འཁོར། ལོ་ཆུང་། འབའ་གྷ་སོགས་ཡུལ་ཤོག་ལྔ་ལ་རྒྱུགས་ཀྱི་ཡོད། སྤྱིའི་རིང་ཚད་ལ་སྤྱི་ལེ་༡༣༠ལྷག་ཡོད་པ་དང་། འབབ་རྒྱུད་ཀྱི་རྒྱ་ཁྱོན་སྤྱི་ལེ་ངོས་གྲུ་བཞི་མ་ཁྲི་༢༢༤༠ཙམ་ཟིན་གྱི་ཡོད། འདན་ཁོག་ནི་འབྲི་ཆུ་དང་འབྲི་ཆུའི་ཆུ་ལག་གི་རྒྱུད་དུ་ཆགས་ཡོད་པས། ཆུ་ཡི་འབབ་ཁུངས་ཕུན་སུམ་ཚོགས་པ་དང་ཆུ་རྒྱུན་བཟང་ཞིང་། ཆུ་ལག་མང་པོའི་ཆུ་མགོ་འདི་རུ་ཡོད་ཅིང་། ལོ་ངོ་ཁྲི་ཕྲག་མང་པོའི་རིང་དུ་ང་ཚོའི་ཚེ་སྲོག་གི་འཚོ་བཅུད་སྟེར་མྱོང་ལ། ད་དུང་ཡང་ཆུ་ཡི་སྤྱོད་སྒོ་ལ་མ་བརྟེན་པའི་འཕེལ་རྒྱས་ཤིག་རྩ་བ་ནས་ཡོད་མི་སྲིད། ཆུ་བེད་ཐོན་ཁུངས་ཕུན་སུམ་ཚོགས་པོ་ཡོད་པས། ཆུ་ནང་དུ་ཉ་ཁྲ། ཉ་ཁྲབ། ཉ་སེར། སྲམ་སོགས་ཉ་རིགས་སྣ་ཚོགས་འཁྱུག་བཞིན་ཡོད། འདན་ལོ་ཚུལ་ཁྲིམས་རིན་ཆེན་གྱི་རྣམ་ཐར་ལས“སྨད་མདོ་ཁམས་འབྲི་ཟླ་ཟལ་མོ་སྒང་གི་སའི་ཆར་གཏོགས་འབྲི་ཀླུང་གསེར་ལྡན་དལ་གྱིས་འབབ་པའི་ཉེ་འགྲམ”ཞེས་གསུངས་པ་ལྟར་འབྲི་ཆུའི་ནང་ལ་བྱེ་གསེར་དང་ཟངས་གཏེར་སོགས་གཏེར་ཁ་མང་པོ་ཡོད་པས། ཅིན་ཧྲ་ཅང་（金沙江）ཞེས་པའི་མིང་དོན་ཡང་དེ་བཞིན་ནོ། །འབྲི་ཆུ་ལ་བརྟེན་ནས་འདན་མའི་ནས་རྫོང་ཕབ་པས། ད་བར་དུ་ཞིང་ཕྱེད་འབྲོག་ཕྱེད་ཅེས་པའི་ཐོན་སྐྱེད་གཉེར་སའི་ཡུལ་མཆོག་ཅིག་ཆགས་ཏེ། ཞིང་ལས་ལ་ནས་དང་། བྲོ། སྲན་མ། ཡུང་། ཡ་ཡུང་། ཚོད་དཀར་སོགས་རྨོད་འདེབས་བྱས་ཞིང་ཆུ་འདྲེན་པ་དང་། ཕྱུགས་རིགས་ལ་རྟ་དང་། ཟོག ། ར། ལུག ། ཕག་སོགས་ཚགས་བྱས། འབྲི་ཆུའི་འབབ་རྒྱུད་དུ་ཡངས་ཤིང་ཁོད་སྙོམས་པ་དང་མཚོ་འཕགས་ཆ་སྙོམས་སྨི་༣༤༠༠ཙམ་ལས་མེད་པས་གནམ་གཤིས་དྲོ་གྲང་སྙོམ་པས་འགྲོ་བ་མིའི་འཚོ་གནས་ཀྱི་ཡུལ་མཆོག་ཏུ་གྱུར་པས། དཔེར་ན། དབུས་གཙང་དུ་ཆོས་ལུགས་ལ་ཉམས་ཆག་ཆེན་པོ་བྱུང་བའི་སྐབས་ལའང་འདན་མའི་ལུང་པ་འདི་སློབ་སྦྱོང་གི་ལྟེ་བ་ཞིག་ཆགས་ཡོད་པ་དང་། ཆོས་དང་རིག་གཞུང་གི་འཆད་ཉན་ཤུགས་ཆེན་པོ་དར་ཡོད་པ་དང་། སྐབས་དེ་དུས་ལ་ཧ་ཅང་གི་མི་སྣ་གྲགས་ཅན་བླ་མ་སེ་བཙུན་དང་། དེའི་སློབ་མ་ཁུ་རྔོག་འབྲོམ་གསུམ་ལྟ་བུ་དང་། ཇོ་བོ་་ཏི་ཛྙཱན། རྒྱ་བཟའ་ཀོང་ཇོ། འགྲོ་མགོན་འཕགས་པ་སོགས་འདན་ཁོག་གི་ལུང་པར་ཕེབས་ནས་ཐོས་བསམ་སྒོམ་གསུམ་དང་། འཆད་རྩོད་རྩོམ་གསུམ། བྱ་བ་ལས་ཀྱི་འཁོར་ལོ་སོགས་མཛད་པ་གང་ལ་བལྟས་ན་རང་བྱུང་གི་མཐུན་རྐྱེན་ཕུན་སུམ་ཚོགས་པ་ཡོད་པ་ངང་ངམ་ཤུགས་ཀྱིས་ཤེས་ཐུབ་པ་རེད།

དེ་ལྟར་ཀྲུང་གོའི་ལོ་རྒྱུས་མི་སྣ་གྲགས་ཅན་མང་པོས་འབྲི་ཆུ་ལ་བསྟོད་པའི་ཕུལ་བྱུང་གི་སྙན་རྩོམ་མང་པོ་མཛད་པ་རྣམས་རང་རེའི་སློབ་གྲྭ་ཆུང་འབྲིང་གི་བསླབ་གཞིའི་སློབ་ཚན་དུ་བཀོད་ཡོད་པ་དང་། སྒོར་བཅུ་ཅན་གྱི་མི་དམངས་ཤོག་སྒོར་གྱི་རྒྱབ་ལྗོངས་རི་མོའང་འབྲི་ཆུ་དང་འབྲེལ་བ་སོགས་ནི་ཀྲུང་ཧྭའི་ལོ་ངོ་སྟོང་གི་རིག་གནས་རྒྱུན་འཛིན་དང་སྲུང་སྐྱོང་བྱས་པ་རེད། །