ལོ་ལྡན་སྒྲུབ་ཕུག་གི་སྐོར་ཅུང་ཟད་བཤད་པ།

ལོ་རྒྱུས་རིང་མོ་མངར་སྐྱུར་འདྲེས་མའི་ཆང་། །

དུས་ཀྱི་རྒན་པོའི་བགྲང་བྱ་སྟོང་བསྙལ་ཡང་། །

དཔྱོད་ཤེས་རིག་པའི་ཁྱེའུས་སློང་བའི་མོད། །

བསྐལ་པའི་མཐའ་ཡང་སྐད་ཅིག་འཇལ་འདི་རྨད། །

ལོ་ལྡན་སྒྲུབ་ཕུག་ནི་དཀར་མཛེས་ཁུལ་དར་མདོ་ནས་སྤྱི་ལེ་༦༡༡གི་རྒྱང་ཐག་བསྲིངས་པའི་སེར་ཤུལ་རྫོང་གི་ཁོངས་གཏོགས་འདན་ཁོག་ལོ་ཆུང་གྲོང་རྡལ་དྲན་འཁོར་ཡུལ་ཤོག་གི་མངའ་ཁོངས་སུ་རྒྱ་མཚོའི་ངོས་ནས་སྨི་༣༩༤༠གྱེན་དུ་འཕགས་པའི་གསེར་ལྡན་ཡངས་པའི་ཁྱོན་དེར་འབྲི་ཀླུང་དལ་འབབ་ཀྱིས་འབྱམས་སུ་ཀླས་ཤིང་རིག་གནས་དང་ལོ་རྒྱུས་ཀྱི་རླབས་ཕྲེང་འཐོར་བའི་ཡུལ་ལྗོངས་མཛེས་ཤིང་ཉམས་དགའ་བའི་གནས་མཆོག་འདན་ཁོག་གི་སའི་ཆར་གཏོགས། དེའང་དྭངས་གསལ་མཐོན་མཐིང་བཻཌུརྱའི་གནམ་སྔོན་གྱི་མཐོངས་སུ་བལ་ལྡན་སྤྲིན་དཀར་གྱི་འདབ་མས་བླ་བྲེ་བྲེས་ཤིང་། ས་གཞིར་ཡངས་པའི་ཁྱོན་ཐམས་ཅད་མནྜལ་གྱི་ཚོམ་བུ་ཐང་མར་བརྡལ་བ་ལྟར་གངས་རི་དང་རྫ་རི་སྤང་རི་ནགས་རི་སོགས་སྣོད་བཅུད་ཀྱི་བཀོད་པ་ཕུན་སུམ་ཚོགས་པའི་དཔལ་དང་ལྡན་པའི། འདན་ཆོས་སྡེ་འོད་གསལ་དགོན་གྱི་གཡས་རི་ཨ་མྱེ་འབུམ་རྫོང་གི་མདུན་ཐད་ཡོད་ལ། མཁས་གྲུབ་གཉིས་ལྡན་གྱི་སྐྱེས་ཆེན་དུ་མས་ཞབས་ཀྱིས་བཅགས་པ་དང་བྱིན་གྱིས་རློབས་པའི་གདན་ས་ཁྱད་པར་ཅན་ཤར་ཕྱེས་ལྷོ་སྤུངས་ནུབ་འདན་བྱང་སྐྱོབ་པ་སོགས། སའི་སྐལ་ཆེན་བཞི་དང་ལྡན་པའི་ཁོར་ཡུག་ཐམས་ཅད་རྟགས་བརྒྱད་དང་རྫས་བརྒྱད་སོགས་བཀྲ་ཤིས་པའི་རེ་ཁས་མཚོན་པའི་གནས་མཆོག་དམ་པ་དེ་ཉིད་དུ། སྤྱི་ལོའི་དུས་རབས་བརྒྱད་པའི་དུས་དཀྱིལ་ཙམ་དུ་རི་བོ་སྒང་དྲུག་ལས་མདོ་ཁམས་འབྲི་ཟླ་ཟལ་མོ་སྒང་གི་ཆར་གཏོགས་འདན་ཁོག་ཏུ་གཟུགས་སྐུ་མེ་ཏོག་བཞད་ཅིང་རྗེ་འབངས་ཉེར་ལྔའི་ཡ་གྱལ་དུ་གྱུར་པ་མི་བརྗེད་པའི་གཟུངས་དང་སྤོབས་པའི་གཏེར་ཆེན་བརྒྱད་དུས་གཅིག་ཏུ་གྲོལ་ཞིང་མཁས་དང་གྲུབ་པའི་ས་མཐོར་གཤེགས་པའི་ཁམས་ཀྱི་ལྡན་མ་རྩེ་མང་ཞེས་དེང་དུས་ཀྱང་བསྟོད་བསྔགས་ཀྱི་མེ་ཏོག་ཕྱོགས་བརྒྱར་འཐོར་ཞིང་གྲགས་སྙན་གྱི་དྲི་བསུང་བར་མེད་དུ་ཁྱབ་པ་དེ་ཉིད་ཀྱི་སྒྲུབ་གནས། མ་བཅོས་རང་བཞིན་ལྷུན་གྱིས་གྲུབ་པའི་རང་བྱུང་ཁམས་ཆེན་པོའི་མཛེས་སྡུག་གི་སྙིང་པོ་གཅིག་ཏུ་སྤུངས་པ་ལྟར་སྐྱེ་ཁམས་དང་ཁོར་ཡུག་ལ་གསོན་ཉམས་ཀྱི་གཟི་མདངས་མངོན་ཞིང་། ལོ་རྒྱུས་དང་རིག་གནས་ཀྱི་ཁོར་ཡུག་ཁྱབ་གདལ་དུ་ཕྱིན་པའི་བྲག་རིའི་ཁང་བཟང་ཉམས་དགའ་ཞིང་ཡིད་དབང་འཕྲོག་པའི་ལོ་ལྡན་སྒྲུབ་ཕུག་ཅེས། ཀུན་གྱིས་སྙན་ལམ་དུ་གྲགས་པ་དོན་ལྡན་གྱི་ལོ་རྒྱུས་རིང་མོའི་གཏམ་དུ་སྙད་པ་བྱ་བའོ། །

དོན་དང་ཤེས་པ་སྣང་རྟགས་གཅིག་འཁྲུལ་གྱིས། །

ཡུལ་ལ་ཞེན་ནས་རང་མཚན་ཐོབ་པ་འདིར། །

ཐ་སྙད་ཚད་མའི་གྲུབ་དོན་མ་ནོར་བའི། །

མིང་དུ་འབོད་པར་དོན་གྱི་འཇུག་སྒོ་སྣང་། །

ཞེས་པ་ནི་བར་སྐབས་ཀྱི་ཚིགས་སུ་བཅད་པའོ། །

སྒྲུབ་ཕུག་དེའི་མིང་དུ་འབོད་པར་ཇི་ལྟར་བྱུང་བ། །

དེའང་ཐོག་མར་ཇི་ལྟར་འབོད་པའི་མིང་གིས་གྲུབ་དོན་དང་འབྲེལ་བའི་དོན་གྱི་ཁྱད་པར་སྟོན་པ་ལ། 《 མདོ་སྡེ་ལངྐར་གཤེགས་པ།》 ལས།“མིང་དུ་གདགས་པ་མ་མཛད་ན། །འཇིག་རྟེན་ཐམས་ཅད་རྨོངས་པར་འགྱུར། །དེ་བས་མགོན་པོ་ཐབས་མཁས་ཀྱིས། །ཆོས་རྣམས་མིང་དུ་བཏགས་པར་མཛད། །”ཅེས་གསུངས་པ་ལྟར། སྤྱིར་ཐོག་མར་བརྡ་མི་རྒད་པོ་རྣམས་ཀྱིས་ཡུལ་དུས་རང་བཞིན་སོགས་ཆོས་ཅན་ཤེས་བྱའི་སྣང་བ་ཇི་སྙེད་ཅིག་ཡོད་པ་རྣམས་ཕན་ཚུན་མ་འདྲེས་པ་དང་མི་འཁྲུལ་བའི་ཕྱིར་མིང་རེ་བཏགས་ཏེ་དེ་ལ་འཇུག་ལྡོག་སྐྱེན་པོ་བྱེད་པ་ནི་ལས་ལ་འཇུག་པའི་ཐབས་དམ་པ་སྟེ། དེ་ཡང་ས་སྐྱ་པཎྜི་ཏས།“ཐོག་མ་བཏགས་པ་བརྡ་ཡིན་ཏེ། །ཕྱིས་ནས་འཇུག་པ་ཐ་སྙད་ཡིན། །”ཞེས་གསུངས་པ་ལྟར་རོ། །བྱེ་བྲག་མིང་ལ་འདོགས་ཚུལ་གྱི་སྒོ་ནས་དབྱེ་ན་ཡང་འདོད་རྒྱལ་ཐོག་མའི་མིང་དང་རྗེས་གྲུབ་དོན་ལྡན་གྱི་མིང་། དངོས་མིང་དང་བཏགས་མིང་། གཞན་ཡང་ཡུལ་གྱི་སྒོ་ནས་བཏགས་པ་དང་དུས་ཀྱི་སྒོ་ནས་བཏགས་པ། བརྗོད་བྱའི་སྒོ་ནས་བཏགས་པ་སོགས་ཀྱི་ཁྱད་པར་ཡོད་ནའང་སྐབས་འདིར་ལོ་ལྡན་སྒྲུབ་ཕུག་ཅེས་འབོད་པ་ནི་ལོ་ཙཱ་བ་ལྡན་མ་རྩེ་མང་གི་སྒྲུབ་པ་དང་ཉམས་ལེན་བྱེད་སའི་མིང་དང་འབྲེལ་ཏེ་གང་ཟག་གི་མིང་ཡུལ་ལ་ཐོགས་སོང་བ་ནི་སྒྲུབ་བྱེད་ཡང་དག་གི་རྟགས་མིང་ཐོག་ནས་གྲུབ་པར་སུས་ཀྱང་སྙོན་དུ་མེད་ལ། ཡང་ཁ་ཅིག་གི་ཧོར་ཟླ་བཅུ་གཅིག་པའི་ཚེས་བཅུའི་ཉིན་ཉི་ཟེར་རི་རྩེར་འཕྲོས་པ་དང་བསྟུན་ཡུལ་ཁྱད་པར་ཅན་གྱི་གནས་དེར་གློ་བུར་དུ་མེ་ཏོག་སྣ་ཚོགས་བཞད་པ་དང་། རྩི་ཤིང་དང་ནགས་ཚལ་སོགས་ཀྱི་ཁ་འབུས་པའི་རྟགས་ལ་ལྟོས་ནས་ཡུལ་དེའི་ལོ་གཅིག་གིས་ཆར་ཞོད་དང་ལོ་ལེགས་སོགས་ལེགས་ཉེས་བརྟག་ཐུབ་པས་རྒྱུ་མཚན་དེ་ལ་བརྟེན་ནས་ལོ་བལྟས་སྒྲུབ་ཕུག་ཅེས་བཏགས་པ་སོགས་བཤད་སྲོལ་འདུག་ཀྱང་། དེ་ནི་སྒྲུབ་ཕུག་དེའི་ལོ་རྒྱུས་ཀྱི་རྒྱབ་ལྗོངས་ལ་གཞིགས་ནས་རྒྱུ་མཚན་གྱི་དཔྱད་གཞི་འོས་པ་ཞིག་ཡོང་དཀའ་བ་ནི་སྒྲུབ་པ་པོ་དང་སྒྲུབ་ཕུག་བར་སྒྲུབ་བྱེད་མིང་གི་འབྲེལ་བ་གྲུབ་པར་དངོས་བསྟན་དུ་ཡོད་བཞིན་དེ་ལས་གཞན་པའི་མིང་ཞིག་བསྒྱུར་ནས་དོན་ལྡན་གྱི་འབྲེལ་བ་ཞིག་རྟགས་སུ་བཀོད་པ་ནི་རྟ་ལས་བབ་ནས་བོང་བུ་ཞོན་པའི་དཔེས་མཚོན་པར་འགྱུར་ངེས་སོ། །གང་ལྟར་ཡང་ཡུལ་དེར་འཚར་ལོངས་བྱུང་བའི་མཁས་གྲུབ་གཉིས་ལྡན་གྱི་སྐྱེས་ཆེན་དམ་པ་དེ་ཉིད་སྒྲུབ་གནས་དེར་བསམ་གཏན་ལ་ཐུགས་གཞོལ་ཞིང་ཉམས་ལེན་གྱིས་གཏིང་ཚུགས་ནས་གྲུབ་པའི་ས་མཐོར་གཤེགས་ཏེ་ཕྱི་རབས་པ་ལ་མཐོང་ཐོས་མྱོང་གསུམ་གྱི་སྒོ་ནས་སེམས་འགུལ་ཐེབས་ཤིང་གཞལ་དུ་མེད་པའི་ཤུལ་བཞག་རིག་དངོས་ཀྱི་རིན་ཐང་མཚོན་པའི་མཛད་རྗེས་ཞིག་བཞག་ཡོད་པ་ནི་མངོན་སུམ་ཚད་མའི་མཐོང་སྣང་དུ་གྲུབ་པར་སུས་ཀྱང་རྩོད་མེད་ཡོངས་གྲགས་ཀྱི་ལོ་རྒྱུས་རིང་མོའི་གཏམ་ཡིན་པས། དམ་པའི་སྐྱེས་བུ་འདིའི་རྣམ་ཐར་དང་འབྲེལ་བའི་མཚན་ལའང་འགྲེལ་བཤད་རྒྱག་སྟངས་སོགས་མི་འདྲ་བའི་ཚུལ་སྣ་ཚོགས་སུ་སྣང་མོད་ད་ལན་སྐབས་སུ་མ་བབ་པས་མི་སྣའི་སྣང་བརྙན་ལོ་རྒྱུས་བཞེངས་བསྐྲུན་གྱི་རྩོམ་ཡིག་ཏུ་གསལ་ངེས་པས་འདིར་མ་སྤྲོས་སོ། །

མངོན་སུམ་ཚད་མས་འཇལ་བའི་མངོན་འགྱུར་དང་། །

རྗེས་དཔག་བློ་ལ་སྣང་བའི་ལྐོག་འགྱུར་གཉིས། །

ཚད་མས་དྲངས་པར་ཁྱད་པར་མེད་ན་ཡང་། །

གཞལ་བྱའི་ཡུལ་ལ་འཇལ་ཚུལ་ཐ་དད་ཡིན། །

ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །

ལོ་ལྡན་སྒྲུབ་ཕུག་གི་གནས་ཀྱི་ཁྱད་པར་བཤད་པ།

དེ་ཡང་སྒྲུབ་གནས་དེའི་ཉེ་འཁོར་གྱི་རྒྱ་ཁྱོན་ལ་སྤྱི་ལེ་གྲུ་བཞི་མ་ཉེར་བརྒྱད་ཡས་མས་སུ་ཕྱོགས་ཐམས་ཅད་ནས་དྭངས་བསིལ་ཡན་ལག་བརྒྱད་ལྡན་གྱི་ཆུ་མིག་བརྡོལ་ཞིང་། བྲག་རི་ཁང་བརྩེགས་གཉིས་ཙམ་གྱི་ངོས་ནས་ཤིང་སྐས་ཀྱི་སྡོང་བུར་འཛེག་ནས་རང་བྱུང་སྒྲུབ་ཕུག་གི་སྒོ་ཁར་ཕྱིན་པ་དང་། ཕུག་པའི་སྒོ་ནུབ་ཏུ་ཁ་ཕྱོགས་པར་དེའི་ནང་དུ་ཞུགས་པ་ན་བྲག་རིའི་ཁང་བཟང་ཉམས་དགའ་བ། རང་བྱུང་ཁམས་ལས་གྲུབ་པའི་རྡོ་ཀ་མ་རུ་པའི་ཀ་བས་གཞུང་ནས་བཏེགས་པས་སྔོན་སློབ་དཔོན་པདྨས་སློབ་མ་རྣམས་ལ་ཚེ་དབང་བསྐུར་སྐབས་དབང་རྫས་བྱིན་རླབས་ཀྱིས་ཚུལ་དུ་སྒྲུབ་ཕུག་འོག་གི་ཆུ་མིག་བཏོན་པའི་གཏེར་ཆུ་འཆི་མེད་བདུད་རྩིའི་རྒྱུན་གཞུང་སྟའི་ཀ་མ་རུ་པའི་ཀ་བ་ལས་གྱེན་དུ་དྲངས་པའི་ལོ་རྒྱུས་ཡུལ་དེར་ཡོངས་གྲགས་ཀྱི་གཏམ་དུ་སྣང་བས་ཁོ་བོས་ཀྱང་བསྐྱར་ཟློས་ཙམ་དུ་ཟད་དོ། །དེ་ཡང་《གསོལ་འདེབས་བར་ཆད་ལམ་སེལ།》 ལས།“དྲི་བསུང་སྤོས་ངད་ལྡན་པའི་རི། །མེ་ཏོག་པདྨ་དགུན་ཡང་སྐྱེས། །ཆུ་མིག་བདུད་རྩིའི་བྱང་ཆུབ་ཆུ། །”ཞེས་པའི་གནས་ལོ་ལྡན་སྒྲུབ་ཕུག་འདིར་ངོས་འཛིན་དགོས་ཞེས་བཤད་སྲོལ་འདུག །སྒྲུབ་ཕུག་དེ་ལན་གཅིག་མཇལ་སྐོར་དུ་ཕྱིན་པས་ཀྱང་འཇིག་རྟེན་སོ་སྐྱེས་ཕལ་པ་ཞིག་ཡིན་ནའང་རྣམ་རྟོག་གིས་འདུ་འཕྲོ་དལ་ཅིག་འགག་ནས་ཞི་ལྷག་གི་ཏིང་ངེ་འཛིན་ཁྱད་པར་ཅན་སྐྱེ་བར་བཤད་པ་སོགས་ཡོད་མོད། སྒྲུང་གཏམ་དང་དངོས་ཡོད་གནས་ཚུལ་གཉིས་གཅིག་ཏུ་མི་བསྲེ་བར་ཇི་ལྟར་སྣང་བར་དེ་ལྟར་ཐད་ཀར་སྒྲོ་བཀུར་དང་བྲལ་བའི་སྒོ་ནས་རྒྱུ་མཚན་དང་གནས་ལུགས་ཚུལ་བཞིན་བརྗོད་པར་ནི་དོན་དམ་པའི་གནས་ལགས་སོ། །དེ་ཡང་སྒྲུབ་ཕུག་དེའི་མདུན་ངོས་ཀྱི་ས་གཞིར་ཐམས་ཅད་རྫིང་བུ་དང་ཆུ་མིག་སོགས་ཀྱི་བར་དབྱར་དུས་སུ་སྤང་ཆུང་གི་གཡུ་ལོ་བཀོད་པའི་སྟེང་ན་ཁ་དོག་དང་རྣམ་པ་ཐ་དད་པའི་མེ་ཏོག་སྣ་ཚོགས་ཀྱིས་ཚོམ་བུ་བཀྲ་བ། ཁོར་ཡུག་ཀུན་ཏུ་དབྱི་མོང་དང་ཁནྜ་སེ་འབྲུ་མཛོ་མོ་ནུ་ཤིང་སོགས་ཀྱི་ཡལ་ག་ལ་དཔྱིད་གསུམ་གཡུ་ལོ་ཐགས་སུ་བྲེས་ཤིང་། དབྱར་གསུམ་མེ་ཏོག་འཛུམ་དཀར་འཕྲོ་བ། སྟོན་གསུམ་འབྲས་བུའི་ཁུར་གྱིས་དུད་ཅིང་། དེ་དག་གི་རྩ་བ་དང་རྩེ་མོར་འཁོར་བའི་མཇུག་ཁྲ་འཇོལ་མོ་དང་དུང་འཛིན་ཁུ་བྱུག་སྔོན་མོ་སོགས་ཀྱིས་མགྲིན་པ་ནས་ཟག་པའི་སྙན་འགྱུར་སྟོང་གིས་ཟེག་མ་ཐོས་འཛིན་གྱི་བུ་གར་ལྷུང་བས་སུམ་རྩེན་མཐོ་རིས་ཀྱི་བདེ་དགའ་དུས་གཅིག་ཏུ་རྫོགས་པའི་དཔལ་དང་ལྡན་པ། གཞན་ཡང་སྒྲུབ་ཕུག་གི་གཡོན་ངོས་སུ་མཐོ་རིས་བརྒྱ་བྱིན་ལྷ་ཡིས་ཕྱག་ནས་ཕུལ་བ་ལྟ་བུའི་དུང་དཀར་རང་བྱོན་གྱི་སྣང་བརྙན་དང་།

སྐྱེ་མེད་ཆོས་སྐུའི་རང་བཞིན་གྱི་བརྡ་དོན་རྟགས་སུ་ཤར་བའི་ཨ་ཡིག་རང་བྱོན། མདུན་ཐད་དུ་རང་བྱུང་བྲག་གི་དེའུ་འབུར་རི་དྭགས་ཀྱི་རྒྱལ་པོ་སེངྒེ་རལ་པ་ཅན་ཙོག་པུར་སྡོད་པ་ལྟ་བུའི་རང་གཟུགས་སུ་གྲུབ་པ་དང་། དེ་དང་ཉེ་བར་གནས་པའི་བྲག་རི་ཟླུམ་པོ་ཚོགས་ཀྱི་མཆོད་གཏོར་བཤམས་པ་ལྟ་བུ་སོགས་བཞུགས་ཡོད་ལ། སྒྲུབ་གནས་དེའི་གཤམ་དུ་རྡོ་ཀ་མ་རུ་པས་བཞེངས་པའི་གུ་རུའི་འདྲ་སྐུ་བྱིན་རླབས་ཀྱི་ཚན་ཁ་མ་ཡལ་བར་བཟོ་རིག་མཁས་པའི་རྩེ་མོར་ཕྱིན་པའི་ཕུལ་བྱུང་བི་ཤྭ་ཀརྨའི་ཕྱག་སོར་ལས་གྲོལ་བ་ལྟ་བུའི་ངོ་མཚར་སྟོང་གིས་སྒྱུ་རྩལ་གྱིས་ཁྱད་ཆོས་ལྡན་པ། དེའི་མདུན་ཐད་དུ་མཆོད་ཡོན་དང་ཞབས་བསིལ་མེ་ཏོག་བདུག་སྤོས་མར་མེ་དྲི་ཆབ་ཞལ་ཟས་རོལ་མོ་སོགས་འདོད་པའི་ཡོན་ཏན་མ་ཚང་བ་མེད་པས་ཉིན་མཚན་རྟག་ཏུ་མཆོད་པར་བྱས་ཡོད་པ་དང་། གཞན་ཡང་སྒྲུབ་གནས་དེའི་ཉེ་འཁོར་དུ་རང་བྱུང་ཁམས་ལས་གྲུབ་པའི་རྡོ་དང་ལྡེའུ་ཡན་ཆད་ལ་རྟགས་དང་མཚན་མ་མངོན་པའི་རིག་དངོས་ཀྱི་རང་བཞིན་ལྡན་པ་ཤ་སྟག་ཡོད་ལ། ཐག་རིང་ནས་ཡོང་བའི་ཡུལ་སྐོར་དང་ལྗོངས་རྒྱུ་བ་རྣམས་ཀྱིས་གནས་འདིར་དོ་སྣང་ཆེན་པོའི་གཟིགས་ཞིབ་དང་མཇལ་བསྐོར་ཕེབས་པར་ཆུད་ཟོས་སུ་མི་འགྲོ་བར་མ་ཟད་ལོ་རྒྱུས་ཀྱི་རང་བཞིན་ལྡན་པས་ཡིད་ཆེས་རྙེད་པ་དང་། རིག་གནས་ཀྱི་དངོས་པོ་མི་འདྲ་བ་མང་པོ་མཐོང་ཐུབ་པས་དགེ་མཚན་དཔག་ཏུ་མེད་པར་ལྡན་པ་སོགས་དངོས་ཡོད་གནས་ཚུལ་དང་འབྲེལ་ཏེ་ཁོ་བོས་ཅུང་ཟད་ཕན་དུ་རེ་ནས་བྲིས་པ་ལགས་སོ། །

སླར་སྨྲས་པ།

ཀུན་རྫོབ་དངོས་སྣང་སྒྱུ་མའི་ཆོས་འདི་ཀུན། །

རྒྱུ་འབྲས་བསླུ་མེད་རྟེན་འབྲེལ་རྟོགས་ནས་སུ། །

རིག་པའི་དབྱིངས་སུ་ཞི་བའི་བརྟུལ་ཞུགས་ཀྱིས། །

གྲུབ་པའི་ས་མཐོར་གཤེགས་དེར་ཅིས་མི་གུས། །

གང་གིས་ཐུགས་བསྐྱེད་གོ་ལ་ཡངས་པོའི་ཁྱོན། །

ལྷ་བཅས་འགྲོ་བའི་བསོད་ནམས་ཚོགས་ཀྱི་དཔལ། །

དག་པའི་ཞིང་སྦྱངས་སྒྲུབ་གནས་དམ་པ་འདི། །

རིན་ཆེན་རིག་དངོས་གཞལ་མེད་ཁང་བཟང་ཡིན། །

སྣོད་བཅུད་སྲིད་པའི་འཇིག་རྟེན་རྒྱན་བཀོད་པའི། །

རང་བྱུང་ཁམས་ཀྱིས་མཛེས་སྡུག་རྣམ་བཀྲ་བར། །

གསལ་འཚེར་པིར་གྱིས་བྲིས་པའི་སྙིང་པོ་ཀུན། །

གཅིག་བསྡུས་འདན་ཡུལ་ལོ་ལྡན་སྒྲུབ་ཕུག་གྲགས། །

དེ་སྐད་རང་བྱུང་རིག་པའི་ཁྱེའུ་ཡིས། །

རང་གསལ་རྗེས་མེད་ཕ་རོལ་མ་ཕྱིན་བར། །

བསླུ་མེད་རྟེན་འབྱུང་སྒྱུ་མའི་ཡོ་ལང་ལ། །

ང་དང་ཁྱོད་ཅེས་འཇུག་པ་ལས་གཞན་ཅི། །