ཤུག་ར་དགོན་པའི་ཉེ་འཁོར་གྱི་འདན་མའི་གནའ་ཤུལ་དང་གཏམ་རྒྱུད།

དེ་ཡང་སྤྱིར་འདན་ལྗོངས་སྐྱིད་པའི་དགའ་ཚལ་འདི་རིག་གནས་ཀྱི་དཔང་མཐོ་ཞིང་ལོ་རྒྱུས་ཀྱི་ཆུ་རྒྱུན་རིང་བས་མདོ་ཁམས་ས་ཡི་ལྟེ་བར་ལྟ་བུ་གྱུར་པས་ན་ལོ་རྒྱུས་ཧ་ཅང་རྒྱ་ཆེན་པོ་དང་གྲངས་མང་བ་ཡོད་ཀྱང་དེའི་ནང་ནས་སྐབས་འདིར་འདན་ཤུག་ར་དགོན་དུ་ཡོད་པའི་འདན་མའི་མཁར་ཤུལ་གྱི་ལོ་རྒྱུས་རགས་བསྡུས་ཤིག་བརྗོད་ན།

འདན་ཤུག་རའི་ལྷ་མཁར་རིང་མོའམ་འདན་གྱི་གཡུ་རྫོང་རིང་མོ་འདི་ཉིད། མིང་གཞན་ཆོས་རའི་ལྷ་མཁར་རིང་མོ་ཡང་ཟེར་ཏེ། འདན་མའི་ནས་རྫོང་གི་སྒྲུང་རྙིང་རྣམས་ལས། བློན་ཆེན་འདན་མ་ལྷུམས་སུ་ཞུགས་པའི་ལོ་རྒྱུས་ཀྱི་ཐད་དུ། 《 འདན་མའི་ནས་རྫོང་། 》ལས།“དེ་དུས་འོག་མིན་ཞིང་ཁམས་ནས། རིག་འཛིན་ཚོགས་གྲལ་གོང་མ་ནས། ལྷ་ས་ར་ཧ་པའི་ཐུགས་ཀ་ནས། འཇའ་དཀར་པོ་རྣོ་དཀར་ཙམ་གཅིག་དབུས། འོད་དཀར་པོ་རྨ་བྱའི་སྒོ་ང་ཙམ། ཐིག་ལེ་ཡུངས་དཀར་འབྲུ་ཙམ་ལ། ཏྲི་ཡིག་སྤུ་ཤད་ཀྱིས་བྲིས་པ་ཙམ། འདན་ཆོས་རའི་ལྷ་མཁར་རིང་མོར་བབ། འཇའ་འོད་ཐིག་ལེ་ཡིག་འབྲུ་བཅས། འདན་བཟའ་ཨ་སྨན་གྱི་ལྷུམས་སུ་ཞུགས།” ཞེས་གསུངས་པ་ལྟར་དང་། ཡུལ་འདིའི་རྒན་རབས་པ་རྣམས་ཀྱིས་ལྷ་མཁར་རིང་མོའི་རྒྱབ་ཕྱོགས་སུ་ཆོས་རའི་རྒྱབ་ཅེས་ཟེར་སྲོལ་ཡོད་པར་གྲགས། མཁར་འདི་ནི་ཟ་ཧོར་རྒྱལ་རབས་དོན་གཉིས་པ་འདན་རྗེ་གཡུ་རྩེ་རུ་བཙན་གྱི་དུས་སུ་བཞེངས་པ་དང་། དུས་རབས་བཅུ་གཅིག་པའི་ནང་ཚུན་ལ་གླིང་སེང་ཆེན་ནོར་བུའི་དགྲ་འདུལ་གྱི་བཀའ་ཡི་དབང་བསྒྱུར་བ་ཚ་ཞང་འདན་མ་བྱང་ཁྲ་ཡང་གནས་འདིར་འཁྲུངས་ཤིང་། དེའི་སྐབས་སྐུ་མཁར་འདི་བཞེངས་ནས་རྒྱལ་རབས་བཅོ་བརྒྱད་སོང་ཚུལ་ཚད་ལྡན་གྱི་ཡིག་རྙིང་དག་ལས་འདི་ལྟར་གསུངས་ཏེ། 《 འདན་མའི་ནས་རྫོང་། 》 ལས།“མཁར་མི་འགྱུར་གཡུ་རྫོང་རིང་མོ་འདི། །འདན་རྒྱལ་རབས་བཅོ་བརྒྱད་གོང་ནས་བཞེངས། །”ཞེས་སོགས་འབྱུང་བ་དང་། དེ་ལྟར་ཡིག་རྙིང་དེ་ཉིད་ལས་བཤད་པ་ལྟར་ན། ༢༠༢༣ལོའི་སྐབས་འདིར་མཁར་འདི་བཟོ་བསྐྲུན་བྱས་ནས་ལོ་ངོ་ཉིས་སྟོང་ཡས་མས་ཤིག་སོང་བས་ངོ་མཚར་བའི་ལོ་རྒྱུས་ཀྱི་རིན་ཐང་དང་ལྡན་ཞིང་། འདན་མའི་མཁར་ཤུལ་དེ་ལ་བརྟག་ན་མཁར་རྫོང་ཕྱི་ནང་གཉིས་ཡོད་པ་རྟོགས་ཐུབ་པ་དང་། མཁར་ཤུལ་དེའི་ཕྱོགས་གཅིག་གི་གྱང་ར་ད་ལྟ་ཡང་མཐོང་རྒྱུ་ཡོད། ད་ལྟ་དགོན་པས་མཁར་ཤུལ་ལ་ར་བ་ཚད་ལྡན་ཞིག་བསྐོར་ཡོད་པ་དང་ཆར་ཆུ་སོགས་འགོག་ཆེད་གསེར་ཁེབས་ཚད་ལྡན་ཞིག་ཡང་ལས་ཡོད། གཞན་ཡང་མཁར་ཤུལ་དེ་ནས་ཁྲབ་ཐོར་བུ་དང་མདེའུ། ཤོག་ནག་ལ་གསེར་བྲིས་བྱས་པའི་ཡི་གེ་སོགས་གནའ་རྫས་འདྲ་མིན་མང་པོ་རྙེད་བཞིན་ཡོད། མཁར་འདི་ནི་དེང་སང་ལོ་རྒྱུས་སྨྲ་བ་དང་ཞིབ་འཇུག་པ་མཆོད་མཇལ་བ་སུས་བལྟས་ན་ལོ་རྒྱུས་ཀྱི་རིན་ཐང་ལྡན་ཞིང་གནའ་ཤུལ་གྱི་ཉམས་དོད་པའི་མཁར་ཤུལ་ངོ་མཚར་ཅན་ཞིག་ཏུ་ངོས་འཛིན་བཞིན་ཡོད། མཁར་ཤུལ་འདི་ནི་འདན་ཤུག་ར་དགོན་པའི་རྩར་ཡོད་ཅིང་ད་ལྟའི་བར་དགོན་འདིས་བདག་སྐྱོང་ཡང་བྱེད་བཞིན་ཡོད། སྔོན་ས་འགུལ་གྱིས་གནོད་སྐྱོན་ཐེབས་རྐྱེན། ནང་རྟེན་མང་པོ་བོར་བརླགས་ཐེབས། ཡིན་ཡང་འདན་མའི་རྨོག་དང་ཡོངས་གྲགས་ལ་འདན་མའི་འབུམ་ནག་མ་དང་། འདན་མའི་ཆོས་དུང་དཀར་པོ། འཁོར་གསུམ་ལ་སོགས་ཕྲན་བུ་ཡོད་པ་རྣམས་དགོན་པའི་ནང་དུ་ཉར་ཚགས་བྱས། རྗེས་སུ་དགོན་པར་འཕོ་འགྱུར་བྱུང་ནས་ད་ལྟར་འདན་མའི་རྨོག་དང་འདན་མའི་ཆོས་དུང་དཀར་པོ་སོགས་གནའ་རྫས་འགའ་ཡོད།

རྗེས་སུ་ཤུག་ར་བླ་མ་ངག་དབང་སྦྱིན་པས་འདན་མ་དྲན་གསོ་ཁང་ཞིག་བཞེངས་ཡོད་ཅིང་འདན་མའི་རྨོག་ཡང་དེར་བཤམས་སྟོན་བྱས་ཡོད།

མཁར་འདིའི་ལོ་རྒྱུས་ནི་གནའ་བོའི་སྒྲུང་དང་གནའ་མི་རྒན་པོའི་ངག་ལས་ཤེས་ཏེ། 《 ཤན་འདན་སྟག་སེང་ཁ་སྤྲོད།》ཅེས་པའི་སྒྲུང་ཡིག་ལས།“ང་མི་སྡོད་ཡུལ་ཁམས་གཞན་ལ་འགྲོ། །འདན་ཤུག་ར་སྐྱིད་ཀྱི་ལུང་པར་འགྲོ། །ལུང་ཆུང་ནང་གི་དཔོན་ཆུང་བྱེད།”ཅེས་དང་། ཡང་ཐོག་རི་ཐོག་རྫོང་ཟེར་བའི་སྒྲུང་ཡིག་ལས།“འདན་ཁ་ར་སེར་ར་ཤུག་ར་གསུམ། །འདན་སྡེ་ཁྲི་སྐོར་བཅུ་གཉིས་དཔོན། ། འདན་ཤུག་རའི་ལྷ་མཁར་རིང་མོ་ནས། །བཀའ་བློན་འདན་མ་བྱང་ཁྲ་ཟེར། །”ཞེས་དང་། ཡང་《གོ་ར་ཚྭ་རྫོང་།》ཞེས་པའི་སྒྲུང་ཡིག་ལས།“ང་འདྲ་མཁྱེན་པ་མི་འདུག་ན། །འདན་ཡུལ་འདན་གྱི་ཡར་ཐ་ན། །འདན་ཡུལ་འདན་གྱི་མར་ཐ་ན། །ཤུག་ར་སྐྱིད་པའི་གཡང་ར་ན། །ལྷ་མཁར་རིང་མོའི་ནང་རྫོང་དེ། །འདན་ཟ་ཧོར་རྒྱལ་པོའི་གདུང་རྒྱུད་ལ། །ཁྲི་གཅེས་འདན་མ་བསམ་འགྲུབ་ཟེར། །”ཞེས་སོགས་འབྱུང་བ་དང་། ཀརྨ་པ་བཅུ་དྲུག་རིག་པའི་རྡོ་རྗེའི་མགུར་གླུ་ལས།“ཤུག་ར་སྐྱིད་ཀི་ཡར་ནང་ནས། །ཤུག་ར་སྐྱིད་ཀི་མར་ནང་ནས། །ཤུག་ར་གཉིས་ཀྱི་བར་མཚམས་ནས། །ཚྭ་ཞང་འདན་མའི་རིགས་རྒྱུད་ལ། །མིང་བོས་ན་ཐུབ་བསྟན་དགེ་ལེགས་ཟེར། །”ཞེས་གསུངས་པ་དང་། མཁར་འདིའི་ཉེ་འཁོར་དུ་འདན་མའི་ལྟེ་ཁྲག་འཕོ་སར་གྲགས་པའི་ཤུག་པ་བཀྲ་ཤིས་ཟེར་བ་ཞིག་ཡོད་པ་དང་། ཤུག་པ་དེ་ནི་གཞན་དང་མི་འདྲ་བའི་ཤུག་པའི་ཚོགས་སྨྱུག་མ་དང་འདྲ་བ་ཞིག་ཡིན་ལ། ད་དུང་འདན་མའི་ཆིབས་སྟེགས་ཡང་མཁར་གྱི་ཉེ་འགྲམ་དུ་མཇལ་རྒྱུ་ཡོད། གཞན་ཡང་མཁར་དང་ཉེ་བའི་གནས་སུ་རྟ་བབས་སྒང་ཞེས་པ་ལ་འདན་མའི་མཆོད་རྟེན་ཟེར་བ་ཁང་བརྩེགས་མཆོད་རྟེན་ཉམས་དགའ་བ་ཞིག་ཡོད།

དེ་བཞིན་དུ་མདའ་གང་ཐང་ཞེས་པའི་སྤང་ཐང་དེ་ནི་བློན་ཆེན་འདན་མའི་མདའ་རྩལ་སྦྱོང་སར་གྲགས། ཐང་དེ་ན་སྔ་མོ་ནས་ལུང་པ་དེའི་ཡུལ་མི་རྣམས་ཀྱིས་དབྱར་ཀའི་དབྱར་སྐྱིད་གཏོང་ཞིང་རྟ་རྒྱུག་མདའ་འཕེན་དང་། བྲོ་གླུ་གཞས་སོགས་རྩེད་མོའི་རིགས་སྣ་ཚོགས་པར་རོལ་བའི་ལུགས་སྲོལ་ད་ལྟའི་བར་ཆགས་ཡོད།

གཞན་ད་དུང་ཐང་དེར་འདན་མའི་བསང་ཁྲི་ཟེར་བ་ཞིག་ཡོད་ཅིང་ནམ་རྒྱུན་ཡུལ་མི་རྣམས་ཀྱིས་བསང་མཆོད་བྱེད་སྲོལ་ཡོད། ཐང་དེའི་གཡོན་ཕྱོགས་སུ་མདོ་ཁམས་གནས་ཆེན་ཉེར་ལྔའི་ཡ་གྱལ་གནས་མཆོག་པདྨ་རིའི་གནས་སྒོ་འབྱེད་པའི་རྡོ་ཕ་བོང་ལྡེ་མིག་འདྲ་བ་ཞིག་ཡོད། དེ་དང་ཉེ་བའི་གནས་ཀྱི་བྲག་ཧྲུལ་ནང་ཟེར་ས་དེ་ནི་ངག་རྒྱུན་ལ་འབུམ་དུམ་པ་བཅུ་གཉིས་གཏེར་དུ་སྦས་ཡོད་པའི་ལོ་རྒྱུས་ཡོད་པ་དང་། ད་དུང་འབྲུག་མོའི་སྐྲ་གཞོང་ཟེར་བའི་རྡོ་ཕ་བོང་ཞིག་ལ་ཡིག་འབྲུ་ཨ་མ་རང་བྱོན་དང་ཨ་ཁུ་ཁྲོ་ཐུང་རྒྱལ་པོའི་ཞབས་རྗེས་ཀྱང་ཡོད། དེ་དང་ཉེ་སར་རྡོ་ཕ་བོང་ཞིག་གི་སྟེང་དུ་སྲིན་པོའི་ཁྲག་རྗེས་ཀྱི་རི་མོ་ཞིག་ཡོད་ལ། དེ་ནས་ཡར་འགྲོ་སར་མཁའ་འགྲོའི་བྲོ་ར་ཟེར་བའི་སྤང་འཁྱིལ་བྲོ་རའི་རྣམ་པ་ཅན་ཞིག་ཀྱང་ཡོད། དེའི་གོང་ན་ཨ་རང་བྱོན་ཁ་ཟེར་ས་ཨ་དཀར་པོ་ཞིག་གི་རང་བྱོན་ཡོད་ལ་དེ་ལ་སྔོན་གྱི་རྒན་རབས་དག་གིས་སྨུག་པོ་ལྡོང་དང་ཡི་གེ་ཨ་ཞེས་སྨུག་པོ་ལྡོང་གི་རུས་མ་འགྱུར་བ་མཚོན་བྱེད་ཡིན་པའི་བཤད་སྲོལ་ཡོད། མདའ་གང་ཐང་གི་གཡས་ཕྱོགས་སུ་ཀ་ཆུང་ནང་ཟེར་བའི་འདན་མའི་སྒྲུབ་ཕུག་ཡག་པོ་ཞིག་ཀྱང་ཡོད། ཡང་སྒང་སྨད་ཟེར་བའི་གནས་དེར་འདན་མའི་མདའ་རྟགས་འཇོག་ས་སྟེ་བྲག་ཕ་བོང་མདས་བཤགས་པ་ལྟ་བུ་ཞིག་ཡོད་པ་དང་། དེ་དང་ཉེ་སར་མ་ཎི་རང་བྱོན་ཧ་ཅང་ཡག་པོ་ཡང་ཡོད། ཡང་ལྷ་མཁར་རིང་མོའི་ཤར་ཕྱོགས་ཀྱི་ལེ་བར་གཅིག་ལྷག་གི་མཚམས་སུ་སྒ་སྡེ་ནང་ཟེར་བའི་ས་ཞིག་ཡོད། དེར་སྤྱན་རས་གཟིགས་བཅུ་གཅིག་ཞལ་གཙོ་འཁོར་བཅས་ཀྱི་རྡོ་བརྐོས་ཡོད་ལ། ལོ་རྒྱུས་ཞིབ་འཇུག་པས་བཞེད་པ་ལྟར་ན་རྡོ་བརྐོས་དེ་ལ་རིན་ཐང་ལྡན་ཞིང་དུས་ཚོད་ཀྱང་ཡུན་རིང་སོང་ཡོད་པར་བཤད།

གླིང་གི་གཏམ་རྒྱུད་དང་འབྲེལ་བ་ཡོད་པའི་སྐོར་ནི་སྒ་སྡེ་བྲག་ཅན་ཟེར་བའི་རྡོ་ཕ་བོང་ཆེན་པོ་ཞིག་ཡོད་པ་དང་། དེ་ནི་འབྲུ་སྒ་སྡེས་འཕངས་པའི་སྒྱོགས་རྡོ་རེད་ཟེར་སྲོལ་ཡོད། ཡང་དེར་རྡོ་ཕ་བོང་གྲིས་གཤགས་པ་ལྟ་བུ་ཁག་གཉིས་སུ་ཕྱེས་བཞག་པ་ཞིག་ཡོད་པ་དེ་ནི་འདན་མའི་རལ་གྲིས་གཤགས་པ་རེད་ཟེར་བ་དང་། ཡང་འདན་མའི་མདའ་ཡིས་ཕུག་པར་གྲགས་པའི་བྲག་བུ་ག་ཅན་ཞིག་དང་འབྲུག་མོ་དང་གེ་སར་གཉིས་ཀྱི་རྟ་འདོགས་སར་གྲགས་པའི་བྲག་ཁུང་བུ་གཉིས་ཅན་ཞིག་ཀྱང་འདུག །དེ་བཞིན་དུ་ལུང་པ་དེའི་ཁར་ད་ལྟར་སྒ་སྡེའི་གད་དམར་ཁར་གྲགས་པའི་གད་པ་ཧ་ཅང་དོག་པོ་ཡོད་ལ། དེ་ནི་རྒན་རབས་པ་དག་གིས། འདན་མའི་ནས་རྫོང་ལས་བྱུང་བའི་ལ་ཆུང་གད་པ་སྟག་ཡག་ཟེར་བ་དེ་རེད་ཟེར་སྲོལ་འདུག །མཁར་འདིའི་ཉེ་འཁོར་རྣམས་སུ་སྔོན་གྱི་སྒྲུང་རྙིང་《འདན་མའི་ནས་རྫོང་།》 དག་ལས་བྱུང་བའི་རི་ཆུ་ས་གསུམ་ངོས་བཟུང་རྒྱུ་ཡང་མང་དུ་ཡོད་དེ། དཔེ་མཚོན་ཙམ་ཞིག་ཞུས་ན་འདི་ལྟར་ཏེ། འདན་མའི་ནས་རྫོང་ལས། འདན་གྱི་བཀའ་བློན་ཞིག་གི་བུ་སྣང་རྒྱན་དུང་ཟླ་རིག་ཡག་ཟེར་བའི་གླུ་ལས།“ས་འདིའི་ས་ངོ་མ་ཤེས་ན། །འདན་སྟོད་འབྲོང་བུའི་རྫ་ལམ་ནས། །རྫ་ཕོ་རྫ་གྲི་ལས་རྣོ་ས་ནས། །རྫ་མོ་རྫ་མདུང་ལས་རྣོ་ས་ནས། །”ཞེས་སོགས་ཀྱི་སྐབས་ནས་བསྟན་པའི་འབྲོང་བུའི་རྫ་ལམ་ཞེས་པ་དེ་ཤུག་རའི་ལྷ་མཁར་རིང་མོ་ནས་བར་ཐག་ལེ་བར་བཅུ་ཡས་མས་ཀྱི་ས་ན་ཉི་ལུང་ཡང་མཛོད་ཟེར་བའི་རི་མཐོན་པོ་རྩེ་ན་རྫ་རི་མཐོ་ལེ། སྨད་ན་སྤང་རི་མཛེས་པའི་རི་ཞིག་ཡོད་པས་དེའི་རྫ་སྤང་འདྲེས་པའི་མཚམས་ན་ལམ་ཞིག་ཡོད་པ་དེ་ལ་འབྲོང་བུ་རྫ་ལམ་ཞེས་པ་དང་། དེ་བཞིན་དུ་ས་བཙན་པོ་ཐུག་རེ་ར་འགག་ཟེར་བ་དང་། འདན་སྨད་ཆུ་རླུང་རབ་སོ། འདན་གྱི་གཡུ་མཚོ་ན་ཐང་ཟེར་བ་སོགས་སྒྲུང་རྙིང་དག་ལས་བྱུང་བའི་ས་ཆུ་རི་གསུམ་སོགས་མང་པོ་ཞིག་ངོས་འཛིན་རྒྱུ་ཡོད་ལ། མཁར་གྱི་ཉེ་འདབས་ན་ཚ་ཞང་འདན་མ་བྱང་ཁྲས་བཞེངས་པའི་ཁང་བརྩེགས་མཆོད་རྟེན་ཡོངས་གྲགས་སུ་འདན་མའི་ཚ་ཁང་ཞེས་པ་དེ་ཡང་ཡོད། མདོར་ན་ཡུལ་འདི་བློན་ཆེན་འདན་མའི་ཕ་ཡུལ་དང་། གླིང་གེ་སར་རྒྱལ་པོས་སྔོན་མོ་ནས་ཀྱི་གཏེར་ཁ་ཕབ་ས་ཡིན་པ་དང་སྤྱིར་གླིང་དང་ཁྱད་པར་བློན་ཆེན་འདན་མའི་རྗེས་ཤུལ་རིག་དངོས་ཤིན་ཏུ་མང་པོ་ཡོད་པས་འདིར་མདོ་ཙམ་བཀོད་པའོ། །