ཁྱད་ཆོས་འབུར་དུ་ཐོན་པའི་འདན་མའི་དམངས་ཁྲོད་རིག་གནས།

འདན་མ་ལ་བོད་ཀྱི་ས་གནས་གཞན་དང་འདྲ་བར་ས་གནས་རང་ཉིད་ཀྱི་ཁྱད་ཆོས་མཚོན་པའི་བ་གླུ་དང་དམངས་ཁྲོད་གཏམ་དཔེ། ཁེད། བཤད་པ། སྒྲུང་། དམངས་ཁྲོད་ལག་རྩལ་སོགས་དར་སལ་ཆེ། ལྷག་པར་དུ་ལོ་བརྒྱ་ཕྲག་མང་པོའི་ལོ་རྒྱུས་དང་ལྡན། ༢༠༠༨ལོར་ནས་བཟུང་འདན་མ་ནས་ཀྱི་རིག་གནས་སྒྱུ་རྩལ་དུས་ཆེན་གསར་དུ་བཙུགས་ནས་ལོ་ལྟར་ཉིན་གསུམ་ནས་ལྔའི་བར་དུ་གླིང་ཕུ་ནུའི་གར་འཆམ་དང་འདན་མའི་གནའ་བ། འདན་མའི་སྐོར་བ། གླིང་སྒྲུང་དང་གླུ་དབྱངས་སོགས་ངག་དང་ལུས་ཀྱི་སྒྱུ་རྩལ་མི་འདྲ་བ་སྣ་ཚོགས་བལྟས་ན་མིག་གི་ལོངས་སྤྱོད་དང་ཉན་ན་རྣ་བའི་བུ་རམ་དུ་གྱུར་ཡོད་ཅིང་། དེ་དུས་ཡུལ་མི་རྣམས་ཀྱང་གནའ་རབས་ཀྱི་ཆས་གོས་རྒྱན་ཆ་མི་འདྲ་བ་སྣ་ཚོགས་འདོགས་ཤིང་གནའ་མི་གསར་དུ་ཐོན་པ་ལྟ་བུའི་ངོ་མཚར་བའི་ལྟད་མོ་དུ་མ་ཡོད་དོ། །