རྫ་ཆུ་ཁ་ནས་འཚར་ལོངས་བྱུང་བའི་ཚེ་རིང་རྡོ་རྗེས་མི་ལོ་ཉི་ཤུ་ལྷག་ཙམ་རིང་དུ་སེར་ཤུལ་རྫོང་སོགས་ཀྱི་རྒྱབ་སྐྱོར་འོག་བོད་ཀྱི་རྩ་ཆེའི་གནའ་དཔེ་འཚོལ་སྡུད་དང་སྲུང་སྐྱོང་བྱས་ཏེ་ཁོང་གིས་སྣེ་ཁྲིད་གནང་བའི་ཧི་མ་ལ་ཡའི་རིག་མཛོད་ཁང་གིས་སྔོན་རྗེས་སུ་དཔེ་རྙིང་པོད་སྟོང་ལྷག་བསྡུ་སྒྲིག་གནང་སྟེ་པར་དུ་བསྐྲུན་ནས་བོད་ཀྱི་གནའ་དཔེ་འཚོལ་བསྡུ་དང་མྱུར་སྐྱོབ་ཐད་མཛད་རྗེས་བླ་ན་ཆེ་བ་བཞག་ཡོད།
སེར་ཤུལ་རྫོང་སྲིད་གྲོས་ཀྱི་ཨུ་ཡོན་ཁག་ཅིག་ཧི་མ་ལ་ཡ་རིག་མཛོད་ཁང་དུ་ལྟ་སྐོར་རྟོག་ཞིབ་ཕེབས་པ།
ཁོང་གིས་༢༠༠༦ལོ་ནས་ཕ་ཡུལ་རྫ་ཆུ་ཁའི་དཔལ་དགེ་མ་ཎི་རྡོ་འབུམ་ལ་བོད་རང་སའི་རྡོ་བརྐོས་ལག་རྩལ་སྤྱད་ནས་རྒྱལ་བའི་བཀའ་འགྱུར་ཆེན་མོ་དང་ཞི་ཁྲོ་དམ་པ་རིགས་བརྒྱ་སོགས་ལོ་ངོ་གསུམ་གྱི་རིང་ལ་བརྐོ་བཞེངས་མཛད་ནས་རྡོ་མཁར་གྱི་གཞི་རྒྱ་བསྐྱེད་པར་མཛད། ༢༠༠༨ལོར་ཁོང་གིས་གུ་རུའི་རྣམ་ཐར་སྟོང་ཐང་ཆེན་མོའི་ཞལ་ཐང་༡༣༠༠གསར་འབྲི་གནང་ནས་སེར་ཤུལ་རྫོང་དུ་བཤམས་སྟོན་བྱས། ༢༠༠༩ལོར་དབུས་ལྷ་ལྡན་གཙུག་ལག་ཁང་གི་རྟེན་གྱི་གཙོ་བོ་ཇོ་བོ་ཤཱཀྱ་མུ་ནེ་ལ་རིན་པོ་ཆེ་སྣ་ཚོགས་ཀྱིས་དབུ་བརྒྱན་གསོལ། ༢༠༡༡ལོར་རྫ་ཆུ་ཁ་རུ་གངས་ལྗོངས་མཁས་པའི་བགྲོ་གླེང་འཚོགས་ཏེ་ཧི་མ་ལ་ཡའི་རིག་མཛོད་ཆེན་མོ་བསྡུ་སྒྲིག་དང་འཆར་འགོད་སྐོར་ལ་བགྲོ་གླེང་མཛད་དེ་དཔེ་རྙིང་འཚོལ་སྡུད་ཕྱག་ལས་ཀྱི་འགོ་ཚུགས། ༢༠༡༢ལོར་ཁོང་གིས་ཧི་མ་ལ་ཡའི་རིག་མཛོད་ཁང་དངོས་སུ་བཙུགས། ད་དུང་ཧི་མ་ལ་ཡའི་དཔེ་མཛོད་ཁང་དང་། ཧི་མ་ལ་ཡའི་གསེར་བྲིས་ཁང་། ཧི་མ་ལ་ཡའི་དྲྭ་མཛོད་ཁང་། ཧི་མ་ལ་ཡའི་སྒྲ་བསྒྱུར་ཁང་སོགས་བཙུགས། ༢༠༡༧ལོར་མདོ་དབུས་ཁམས་གསུམ་གྱི་ཆེད་མཁས་པ་བརྒྱ་ཕྲག་གདན་འདྲེན་ཞུས་ཏེ་བོད་ཀྱི་རིག་གཞུང་སྤྱིའི་རིག་ཚན་གྱི་དབྱེ་སྟངས་ལ་ཇུས་འགོད་གྲོས་བསྡུར་བྱས་མཐར་མཁས་དབང་དག་གིས་རིག་ཚན་བཅོ་བརྒྱད་དུ་གཏན་འབེབས་བྱས་རྗེས་ཁོང་གིས་ཧི་མ་ལ་ཡའི་རིག་མཛོད་ཆེན་མོའི་སྤྱིའི་གཙོ་སྒྲིག་པའི་འགན་བཞེས་གནང་ཏེ་སྔོན་རྗེས་སུ་པོད་ ༩༥ཅན་གྱི《 བོ་དོང་པཎ་ཆེན་གྱི་གསུང་འབུམ།》 དང་། པོད་༣༠༠ཅན་གྱི《 བོད་ཀྱི་གླིང་སྒྲུང་ཀུན་འདུས་ཆེན་མོ།》 པོད་༡༩༣ཅན་གྱི་བོད་ཀྱི་རིག་གནས་ཆུང་བ་ལྔ་དང་བརྡ་སྤྲོད་ཀུན་འདུས་ཆེན་མོ་སྟེ《 བོད་ཀྱི་བརྡ་སྤྲོད་ཀུན་འདུས་ཆེན་མོ།》 《 བོད་ཀྱི་སྙན་ངག་ཀུན་འདུས་ཆེན་མོ།》 《 བོད་ཀྱི་མངོན་བརྗོད་ཀུན་འདུས་ཆེན་མོ།》 《 བོད་ཀྱི་སྡེབ་སྦྱོར་ཀུན་འདུས་ཆེན་མོ།》 《 བོད་ཀྱི་ཟློས་གར་ཀུན་འདུས་ཆེན་མོ།》 《 བོད་ཀྱི་རྩིས་རིག་ཀུན་འདུས་ཆེན་མོ།》 འཚོལ་སྡུད་གནང་རྗེས་པར་དུ་བསྐྲུན། ན་ནིང་ཡང་ཁྱོན་བསྡོམས་བསྟན་བཅོས་རྒྱས་བསྡུས་མི་འདྲ་བ་༣༠༢༢ ལྷག་དང་། ཡིག་གྲངས་དུང་ཕྱུར་༡.༢ ཤོག་གྲངས་ཆིག་འབུམ་བཞི་ཁྲི་ལྷག །པོད་ཆེན་༢༠༦ ཅན་གྱི《 བོད་ཀྱི་གསོ་རིག་ཀུན་འདུས་ཆེན་མོ།》པར་དུ་བསྐྲུན་པས་གསོ་རིག་ཆེད་མཁས་པ་དག་གི་བསྟོད་བསྔགས་དང་འདེང་འཇོག་ཆེན་པོ་གནང་ཡོད།
སེར་ཤུལ་རྫོང་གིས་དགོན་སྡེ་ཁག་གི་འགན་ཁུར་པ་སྒྲིག་འཛུགས་བྱས་ནས་ཧི་མ་ལ་ཡ་རིག་མཛོད་ཁང་དུ་ལྟ་སྐོར་ཕྱིན་པ།
དཔེ་ཚོགས་དེ་དག་ནི་རྒྱལ་ཁབ་མི་རིགས་དོན་གཅོད་ཨུ་ལྷན་གྱི“ལོ་ལྔ་ཚན་བཅུ་གཉིས་པའི”གལ་ཆེའི་དཔེ་སྐྲུན་འཆར་འགོད་ལས་གཞི་དང་། རྒྱལ་ཁབ་ཀྱི་གལ་ཆེའི་དཔེ་སྐྲུན་ལས་གཞི། རྒྱལ་ཡོངས་གྲངས་ཉུང་མི་རིགས་དཔེ་རྙིང་གི“ལོ་ལྔ་ཚན་བཅུ་བཞི་པའི”གཙོ་གནད་ཀྱི་དཔེ་སྐྲུན་ལས་གཞི་སོགས་ཡིན་པ་རེད། དཔེ་ཚོགས་དེ་དག་གི་མཚན་བྱང་ནི་པཎ་ཆེན་སྐུ་ཕྲེང་བཅུ་གཅིག་པ་མཆོག་གིས་རྒྱ་བོད་ཡིག་རིགས་གཉིས་ཀྱི་ལམ་ནས་ཕྱག་བྲིས་གནང་ཡོད་པ་དང་། དཔེ་ཚོགས་དེ་དག་ལ་རྒྱལ་ཡོངས་བོད་ཡིག་དཔེ་དེབ་ཨང་དང་པོ་དང་། ཀྲུང་གོ་སྲིད་གཞུང་པར་སྐྲུན་གཟེངས་རྟགས། སི་ཁྲོན་གྱི་དེབ་སྤུས་ལེགས་ཞེས་པའི་གཟེངས་རྟགས་སོགས་དཔེ་སྐྲུན་སྐོར་གྱི་བྱ་དགའ་མང་པོ་ཡང་ཐོབ་ཡོད། །
ཚེ་རིང་རྡོ་རྗེས་གཙོ་སྒྲིག་གནང་བའི་《གསོ་རིག་ཀུན་འདུས་ཆེན་མོ།》འགྲེམ་སྤེལ་ཚོགས་འདུ་ལྷ་སར་ཚོགས་པ།