སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས། རིག་གནས་ལ་བརྟེན་ནས་ཡུལ་སྐོར་གཏོད་པ་དང་། ཡུལ་སྐོར་ལ་བརྟེན་ནས་རིག་གནས་ངོམ་པ་རྒྱུན་འཁྱོངས་བྱས་ཏེ། རིག་གནས་དང་ཡུལ་སྐོར་མཉམ་འདྲེས་འཕེལ་རྒྱས་ལ་སྐུལ་འདེད་གཏོང་དགོས་ཞེས་ནན་གསུང་གནང་། 2023ལོར། སེར་ཤུལ་རྫོང་གིས་རིག་གནས་ཡུལ་སྐོར་མཉམ་འདྲེས་འཕེལ་རྒྱས་ཀྱི་འཐབ་ཇུས་ལག་ལེན་ནན་མོ་བསྟར་བ་དང་། ཁོངས་ཡོངས་ཡུལ་སྐོར་འཕེལ་རྒྱས་ཀྱི་རྣམ་པ་གསར་པ་བཏོད་དེ། རིག་གནས་ཡུལ་སྐོར་ཐོན་ལས་ཀྱི་སྤུས་ཚད་དང་ཕན་འབྲས་མཐོ་རུ་གཏོང་བའི་འཕེལ་རྒྱས་གསར་པར་ནུས་ཤུགས་ཡོད་རྒུས་སྐུལ་འདེད་བཏང་།
སེར་ཤུལ་རྫོང་ནི་རྒྱལ་ཁབ་ཀྱི་བརླན་སའི་སྐྱེ་ཁམས་ནུས་ཁུལ་གལ་ཆེན་ཞིག་ཡིན།
གཅིག །རིག་གནས་ཀྱིས་བླ་སྲོག་བསྐྲུན། དངོས་མིན་ཤུལ་བཞག་རིག་གནས་ཀྱིས་རམ་འདེགས་བྱེད།
དུས་ཡུན་རིང་པོའི་ནང་། སེར་ཤུལ་རྫོང་གིས་ས་གནས་རང་གི་རིག་གནས་ལ་གཞི་ཚུགས་རྒྱུ་མཐའ་འཁྱོངས་བྱས་ནས། "རིག་དངོས་བཤམས་སྟོན་ཁང་གི་རྫོང་"གཏོད་གང་ཐུབ་བྱས། དམག་སྡེ་བཅོ་བརྒྱད་པའི་བོད་བསྐྱོད་བཤམས་སྟོན་ཁང་དང་གྲུབ་འབྲས་འགྲེམས་སྟོན་ཁང་གཉིས་གཉེར་སྐྱོང་བྱས་ནས། ལོ་ཧྲིལ་པོར་མི་ཐེངས་ཁྲི་ཕྲག་ལྷག་ལ་སྣེ་ལེན་ཞུས་པ་དེ། དཀར་མཛེས་ཁུལ་རྟེན་རྫས་བཤམས་མཛོད་ཁང་གི་རྩེ་གྲར་གྱུར་ནས་ཡུལ་སྐོར་པ་ཁྲི་སྟོང་མང་པོའི་ཡིད་དབང་བཀུག །དངོས་མིན་ཤུལ་བཞག་རིག་གནས་རྣམ་གྲངས་དང་རྒྱུན་འཛིན་པའི་ཡིག་ཐོག་སྙན་ཞུ་ལས་དོན་ཚ་ཚ་འུར་འུར་ངང་སྤེལ་བཞིན་ཡོད་ལ། ཞིང་ཆེན་དང་ཁུལ་རིམ་པའི་དངོས་མིན་ཤུལ་བཞག་རིག་གནས་རྣམ་གྲངས་35དང་། ཁུལ་རིམ་པའི་དངོས་མིན་ཤུལ་བཞག་རིག་གནས་རྒྱུན་འཛིན་པ་47གསར་དུ་བསྣན། མ་ཎི་རྡོ་བརྐོས་ཚོགས་པས་འཛམ་གླིང་རིག་གནས་ཤུལ་བཞག་ལ་སྙན་ཞུ་བྱེད་པའི་ལས་དོན་རྒྱུན་མཐུད་དང་གོ་རིམ་ལྡན་པའི་ངང་སྤེལ་ནས། སེར་ཤུལ་གྱི་ས་གཞི་ཆེན་པོར་མཚར་སྡུག་རྣམ་པར་བཀྲ་བའི་དུས་རབས་ཀྱི་དངོས་མིན་ཤུལ་བཞག་རིག་གནས་ཀྱི་མེ་ཏོག་བཞད་ཡོད།
སེར་ཤུལ་རྫོང་གིས་བྱེད་ཐབས་སྣ་ཚོགས་སྤྱད་ནས་སྐྱེ་ཁམས་ཁོར་ཡུག་ཉམས་གསོ་བྱས་ཡོད། པར་འདི་ནི་རྩྭ་འབྲས་འདེབས་བཞིན་པའི་གནས་ཚུལ་རེད།
གཉིས། རིག་གནས་ལ་བརྟེན་ནས་ཡུལ་སྐོར་ལ་སྐུལ་འདེད་གཏོང་བར་གསོན་ཤུགས་རབ་ཏུ་སྣོན།
སེར་ཤུལ་རྫོང་གིས་སྔར་ནས་བཟུང་སྲུང་སྐྱོང་གི་སྔོན་འགྲོའི་ཆ་རྐྱེན་འོག་རིག་གནས་ཡུལ་སྐོར་གྱི་ཐོན་ཁུངས་གསར་སྤེལ་དང་། གཉེར་སྐྱོང་། ཁྱབ་སྤེལ་བཅས་བྱེད་པར་དོ་སྣང་ཆེན་པོ་བྱེད་པ་དང་། ཕྱོགས་ཀུན་ནས་རིག་གནས་ཡུལ་སྐོར་གྱི་གཟུགས་བརྙན་གསར་པ་བསྐྲུན་ཡོད། ཞིང་ཆེན་ཡོངས་ཀྱི་བྲག་རིས་སྐོར་གྱི་ཆེད་དོན་རང་བཞིན་གྱི་གནའ་རྫས་རྟོག་ཞིབ་སྙན་ཞུ་ཐོག་མ་ཡིན་པའི་ངོས་ནས། ཀུན་གྱིས་རེ་སྒུག་བྱས་པའི་《སེར་ཤུལ་བྲག་རིས།》བདེ་བླག་ངང་པར་སྐྲུན་འགྲེམས་སྤེལ་བྱས་ཏེ། རྒྱུན་རིང་གི་ལོ་རྒྱུས་ལྡན་པའི་སེར་ཤུལ་བྲག་བརྐོས་སྒྱུ་རྩལ་སླར་ཡང་གསོན་ཤུགས་རྒྱས་པས་སེར་ཤུལ་རྫོང་གི་རིག་གནས་ཡུལ་སྐོར་ཐོན་ཁུངས་གསར་སྤེལ་དང་ཁྱབ་བསྒྲགས་ལ་མཚོན་ན་ཕན་པ་ཆེན་པོ་བྱུང་ཡོད། སེར་ཤུལ་རྫོང་གིས་རིག་དངོས་སྲུང་སྐྱོང་དམིགས་སུ་བཟུང་ནས་བདེ་འཇགས་ཉེན་ཁ་གྲལ་བཤེར་ཐེངས་དྲུག་བྱས་ཏེ། ལོ་རྒྱུས་ཀྱི་ཕྱིར་དྲན་འདི་དག་བསྐལ་པའི་བར་གནས་ཐུབ་པར་ཁག་ཐེག་བྱས་ཡོད།
གསུམ། ཟོང་རྟགས་གིས་སྣེ་ཁྲིད་དེ་རིག་གནས་ཡུལ་སྐོར་ལ་ཚེ་སྲོག་གསར་པ་བསྐྲུན།
སེར་ཤུལ་རྫོང་གིས་ཟོང་རྟགས་གཏོད་པ་དང་རིག་གནས་ཡུལ་སྐོར་རྣམ་གྲངས་གསར་སྤེལ་བྱ་རྒྱུ་དམ་འཛིན་་བྱས་ཏེ། རིག་གནས་ཡུལ་སྐོར་ཐོན་ལས་འཕེལ་རྒྱས་ཀྱི་རྣམ་པ་གསར་པ་བསྐྲུན། ལོ་ཆུང་ཐང་བོད་ཀྱི་ཡུལ་སྲོལ་གོམས་གཤིས་གྲོང་རྡལ་ཆུང་ངུ་དང་བསང་གི་མ་ཎི་རྡོ་འབུམ་རིག་གནས་ཡུལ་སྐོར་མཉམ་འདྲེས་གྲོང་རྡལ་ཆུང་ངུ་སོགས་ཀྱི་རྣམ་གྲངས་འཛུགས་སྐྲུན་བྱས་པ་དེས། སེར་ཤུལ་རིག་གནས་ཡུལ་སྐོར་གྱི་རྣམ་པ་གསར་རྐྱང་དུ་གྱུར་ཡོད།
བཞི། དངོས་གཉེར་གསར་གཏོད་ཀྱིས་འཆར་གཞི་མཉམ་འགོད་བྱེད།
སེར་ཤུལ་རྫོང་གིས་གསར་གཏོད་ཀྱི་འཕེལ་རྒྱས་བསམ་ཕྱོགས་དང་དངོས་སྒྲུབ་ཀྱི་ལས་དོན་བྱེད་ཐབས་ལ་བརྟེན་ནས། དེང་རབས་རིག་གནས་ཡུལ་སྐོར་གྱི་ཞབས་ཞུའི་མ་ལག་རྒྱུན་ཆད་མེད་པར་འཐུས་སྒོ་ཚང་དུ་བཏང་སྟེ། རིག་གནས་འཛུགས་སྐྱོང་སྐས་རིམ་གསར་པ་ཞིག་ཏུ་བསླེབ་རྒྱུར་སྐུལ་འདེད་བཏང་། སེར་ཤུལ་རྫོང་གིས་སྣེ་ཁྲིད་དེ་བཙུགས་པའི་སི་ཁྲོན་དང་བོད་ལྗོངས། མཚོ་སྔོན་བཅས་ཁྱིམ་མཚེས་ས་ཁུལ་གྱི་རྫོང་དང་གྲོང་ཁྱེར་14ཡི་རིག་གནས་ཡུལ་སྐོར་མནའ་འབྲེལ་གྱིས་ས་གནས་ཁག་གི་རིག་གནས་ཡུལ་སྐོར་ཐོན་ཁུངས་དང་དམ་པོར་སྦྲེལ་ཡོད། སྒེར་འཁོར་བཏང་ནས་ཡུལ་སྐོར་བྱེད་པའི་ལམ་ཐིག་གསར་པ་བཏོད་དེ་ས་ཁོངས་ཡོངས་ཀྱི་རིག་གནས་ཡུལ་སྐོར་བྱ་གཞག་འཕེལ་རྒྱས་དང་། ས་ཁོངས་བར་གྱི་རིག་གནས་ཡུལ་སྐོར་མཉམ་ལས་སྤེལ་རེས་དམ་ཟབ་བྱས་ནས། ཐུན་མོང་ཐོག་སི་ཁྲོན་ནུབ་རྒྱུད་ཀྱི་རིག་གནས་ཡུལ་སྐོར་འཕེལ་རྒྱས་གཏོང་བའི་འཆར་གཞི་གསར་པ་བཀོད་ཡོད།