“མི་རིགས་ཁག་སེ་འབྲུའི་འབྲུ་རྡོག་བཞིན་གོང་བུ་གཅིག་ཏུ་དམ་པོར་འགྲིལ་བ་བྱེད་དགོས།”

“ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོར་སྐྱེད་རྒྱུ་དེ་དུས་རབས་གསར་པའི་ཏང་གི་མི་རིགས་ལས་དོན་དང་མི་རིགས་ས་ཁུལ་གྱི་ལས་དོན་ཁག་གི་གཙོ་ཐིག་ཏུ་འཛིན་པ་ནི། ང་ཚོའི་ཏང་གིས་“ཟུང་འབྲེལ་གཉིས་”རྒྱུན་འཁྱོངས་དང་“སྤྱི་ཡོངས་གཉིས་”ལ་དམིགས་ཏེ། རྒྱལ་ཁབ་ཕྱི་ནང་གི་མི་རིགས་ལས་དོན་གྱི་ཉམས་མྱོང་དང་བསླབ་བྱ་ཕྱོགས་བསྡོམས་གཏིང་ཟབ་དང་། ཀྲུང་ཧྭ་མི་རིགས་གཅིག་མཐུན་ཚོགས་པའི་འཕེལ་ཕྱོགས་ཤེས་རྟོགས་གཏིང་ཟབ་བྱས་ཏེ་ཐོབ་པའི་རིགས་པའི་གཞུང་ལུགས་དང་ལག་ལེན་གྱི་གྲུབ་འབྲས་གལ་ཆེན་ཡིན།”

རང་རྒྱལ་ནི་གཅིག་གྱུར་གྱི་མི་རིགས་མང་བའི་རྒྱལ་ཁབ་ཅིག་ཡིན་ལ། མི་རིགས་མཐུན་སྒྲིལ་ནི་རང་རྒྱལ་མི་རིགས་ཁག་གི་མི་དམངས་ཀྱི་སྲོག་རྩ་ལྟ་བུ་ཡིན་པ་དང་། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་ནི་མི་རིགས་མཐུན་སྒྲིལ་གྱི་རྩ་བ་ཡིན། མི་རིགས་ལས་དོན་ཡག་པོ་སྒྲུབ་རྒྱུ་དེ་ནི་མེས་རྒྱལ་གཅིག་གྱུར་དང་མཐའ་མཚམས་སྲ་བརྟན་ཡོང་བ་དང་། མི་རིགས་མཐུན་སྒྲིལ་དང་སྤྱི་ཚོགས་བརྟན་བརླིང་ཡོང་བ། རྒྱལ་ཁབ་ཡུན་རིང་བདེ་འགོད་དང་ཀྲུང་ཧྭ་མི་རིགས་བསྐྱར་དར་རླབས་པོ་ཆེ་ཡོང་བ་བཅས་དང་འབྲེལ་བ་ཡོད། ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གིས་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་རྒྱུན་འཁྱོངས་དང་འཕེལ་རྒྱས་གཏོང་བ་དང་། ཀྲུང་ཧྭ་མི་རིགས་བསྐྱར་དར་རླབས་པོ་ཆེ་མངོན་འགྱུར་བྱེད་པའི་འཐབ་ཇུས་ཀྱི་མཐོ་ཚད་ཐོག་ནས། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོར་སྐྱེད་པ་ཞེས་པའི་གཙོ་ཐིག་འདིར་དམ་པོར་དམིགས་ཏེ། དུས་རབས་གསར་པའི་ཏང་གི་མི་རིགས་ལས་དོན་འཆར་འགོད་དང་བཀོད་སྒྲིག་བྱས་ནས། རང་རྒྱལ་གྱི་མི་རིགས་མཐུན་སྒྲིལ་ཡར་ཐོན་བྱ་གཞག་ལ་ལོ་རྒྱུས་རང་བཞིན་གྱི་གྲུབ་འབྲས་ཐོབ་པར་སྐུལ་འདེད་བཏང་ཡོད།

ཏང་གི་ཚོགས་ཆེན་ཉི་ཤུ་པས་ནན་བཤད་བྱས་དོན། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོར་སྐྱེད་རྒྱུ་དེ་གཙོ་ཐིག་ཏུ་བཟུང་སྟེ། མི་རིགས་མཐུན་སྒྲིལ་ཡར་ཐོན་བྱ་གཞག་ལ་ཕྱོགས་ཡོངས་ནས་སྐུལ་འདེད་གཏོང་དགོས། 2023ལོའི་ཟླ་10ཚེས་27ཉིན། སྐབས་ཉི་ཤུ་པའི་ཀྲུང་དབྱང་ཆབ་སྲིད་ཅུས་ཀྱི་ཐུན་མོང་སློབ་སྦྱོང་ཐེངས་དགུ་པའི་ནང་དུ་“ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོར་སྐྱེད་རྒྱུའི་སྐོར་”ལ་སློབ་སྦྱོང་བྱས་པ་དང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་སློབ་སྦྱོང་ལ་གཙོ་སྐྱོང་གནང་བ་མ་ཟད་གསུང་བཤད་གལ་ཆེན་གནང་། 《ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོར་བསྐྱེད་དེ། དུས་རབས་གསར་པའི་ཏང་གི་མི་རིགས་ལས་དོན་སྤུས་ཚད་མཐོ་བའི་འཕེལ་རྒྱས་ཡོང་བར་སྐུལ་འདེད་གཏོང་དགོས་》ཞེས་པའི་རྩོམ་ཡིག་འདི་ནི་སྤྱི་ཁྱབ་ཧྲུའུ་ཅིའི་གསུང་བཤད་གལ་ཆེན་དེའི་ཆ་ཤས་གཙོ་བོ་ཡིན། རྩོམ་ཡིག་གལ་ཆེན་དེའི་ནང་དུ། སྤྱི་ཁྱབ་ཧྲུའུ་ཅིས་ཀྲུང་གོ་གསར་པ་དབུ་བརྙེས་པ་དང་ལྷག་པར་དུ་དུས་རབས་གསར་པ་ནས་བཟུང་གི་མི་རིགས་ལས་དོན་གྱི་གྲུབ་འབྲས་གལ་ཆེན་ཕྱོགས་བསྡོམས་ཟབ་མོ་དང་། ད་ལྟའི་མི་རིགས་ལས་དོན་ལ་འཕྲད་པའི་གནས་བབ་གསར་པ་དང་འགྲན་སློང་གསར་པར་ཚན་རིག་དང་མཐུན་པར་དབྱེ་ཞིབ་མཛད་དེ། སྔར་ལས་ལྷག་པའི་སྒོ་ནས་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོར་སྐྱེད་པ་དང་། དུས་རབས་གསར་པའི་ཏང་གི་མི་རིགས་ལས་དོན་སྤུས་ཚད་མཐོ་བའི་འཕེལ་རྒྱས་ཡོང་བར་སྐུལ་འདེད་གཏོང་བའི་སྐོར་ལ་རྒྱས་བཤད་ཟབ་མོ་གནང་ཞིང་བླང་བྱ་གསལ་པོ་བཏོན་གནང་བས། དུས་རབས་གསར་པའི་ཏང་གི་མི་རིགས་ལས་དོན་དང་མི་རིགས་ས་ཁུལ་གྱི་ལས་དོན་ཁག་ཡག་པོ་སྒྲུབ་པར་རྩ་བའི་སྲུང་བྱ་འདོན་སྤྲོད་བྱས་ཡོད། སྤྱི་ཁྱབ་ཧྲུའུ་ཅིའི་རྩོམ་ཡིག་གལ་ཆེན་འདིའི་དགོངས་དོན་ལ་སློབ་སྦྱོང་དང་གོ་བ་གཏིང་ཟབ་ལེན་པ་དང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མི་རིགས་ལས་དོན་ལ་ཤུགས་སྣོན་དང་ལེགས་སྒྱུར་བྱ་རྒྱུའི་སྐོར་གྱི་དགོངས་པ་གལ་ཆེན་ཕྱོགས་ཡོངས་ནས་ལག་བསྟར་དོན་འཁྱོལ། དུས་རབས་གསར་པ་དང་འཐབ་ལམ་གསར་པའི་ཏང་གི་མི་རིགས་ལས་དོན་སྤུས་ཚད་མཐོ་བའི་འཕེལ་རྒྱས་ཡོང་བར་སྐུལ་འདེད་ཏན་ཏིག་བཅས་བྱས་ཏེ། མི་རིགས་ཁག་གི་མི་དམངས་ལ་རྒྱལ་ཁབ་སྟོབས་ལྡན་འཛུགས་སྐྲུན་དང་མི་རིགས་བསྐྱར་དར་གྱི་གཟི་བརྗིད་རླབས་པོ་ཆེ་མཉམ་རོལ་བྱེད་དུ་འཇུག་དགོས།

མར་ཁེ་སིའི་རིང་ལུགས་ཀྱི་མི་རིགས་རིགས་པའི་གཞུང་ལུགས་ཀྱི་ཀྲུང་གོ་ཅན་དང་དུས་རབས་ཅན་གྱི་ཡུལ་ཁམས་གསར་པ་བཏོད་པ།

“མི་རིགས་ཁག་གི་མང་ཚོགས་མཉམ་དུ་གླུ་གར་ལ་རོལ་བ་དང་། མཉམ་དུ་འཚོ་ཞིང་གནས་པ། མཉམ་དུ་ལས་དོན་ལ་གཞོལ་ཏེ། ཀྲུང་ཧྭ་མི་རིགས་སེ་འབྲུའི་འབྲུ་རྡོག་བཞིན་གོང་བུ་གཅིག་ཏུ་དམ་པོར་འགྲིལ་བ་བྱེད་དགོས།”

2023ལོའི་ཟླ་12ཚེས་14ཉིན་གྱི་སྔ་དྲོར་སྤྱི་ཁྱབ་ཧྲུའུ་ཅི་ཞི་ཅིན་ཕིང་ཀོང་ཞི་ནན་ཉིང་གྲོང་ཁྱེར་ལིའང་ཆིང་ཁུལ་གྱི་ཕན་ལུང་སྡེ་ཁུལ་དུ་ཕེབས། དེ་རུ་རྒྱུན་སྡོད་མི་འབོར་ཁྲི་2.7ཙམ་ཡོད་པ་དང་། ཁྱོན་བསྡོམས་མི་རིགས་10ལྷག་གི་ནང་མི་སྤུན་ཟླས་དེ་རུ་བདེ་སྡོད་ལས་བརྩོན་བྱེད་ཅིང་། གྲངས་ཉུང་མི་རིགས་ཀྱི་མི་འབོར་གྱིས་ཕལ་ཆེར་བརྒྱ་ཆའི་སུམ་ཅུ་ཟིན་ཡོད། སྤྱི་ཁྱབ་ཧྲུའུ་ཅིས་སྡེ་ཁུལ་གྱི་ཏང་དང་མང་ཚོགས་ཞབས་ཞུ་ལྟེ་གནས་སུ་སྡེ་ཁུལ་གྱིས་ཇི་ལྟར་མཉམ་སྡོད་མཉམ་སྦྱོང་དང་། མཉམ་སྐྲུན་མཉམ་སྤྱོད། མཉམ་སྒྲུབ་མཉམ་སྤྲོ་བཅས་“མཉམ་པོ་དྲུག་”གི་དམིགས་འབེན་གཞིར་བཟུང་ནས་མི་རིགས་མཐུན་སྒྲིལ་ཡར་ཐོན་གྱི་ལས་དོན་ཡག་པོ་སྒྲུབ་ཚུལ་ཞིབ་མོར་ཤེས་རྟོགས་གནང་།

མི་རིགས་མཐུན་སྒྲིལ་གྱི་མེ་ཏོག་གང་སར་ལྷུག་པོར་བཞད་པའི་ཀོང་ཞིའི་ས་གཞི་ཆེན་མོ་ནི་དུས་རབས་གསར་པའི་མི་རིགས་ལས་དོན་ལ་ཐོབ་པའི་ལོ་རྒྱུས་རང་བཞིན་གྱི་གྲུབ་འབྲས་ཀྱི་བྲིས་བརྙན་གསོན་པོ་ཞིག་ཡིན། གནའ་ནས་བཟུང་། རང་རྒྱལ་མི་རིགས་ཁག་གི་མི་དམངས་ཀྱིས་ཐུན་མོང་ཐོག་འོད་སྟོང་འབར་བའི་ཀྲུང་ཧྭའི་ཤེས་དཔལ་གསར་གཏོད་བྱས་ཡོད་ལ། རླབས་ཆེ་བའི་ཀྲུང་ཧྭ་མི་རིགས་བཞེངས་སྐྲུན་བྱས་ཡོད། ང་ཚོའི་ཏང་གིས་ཐོག་མཐའ་བར་གསུམ་དུ་མི་རིགས་གནད་དོན་དང་མི་རིགས་ལས་དོན་ལ་ཚད་མཐོའི་མཐོང་ཆེན་བྱེད་པ་དང་། མི་རིགས་འབྲེལ་བ་ཐག་གཅོད་ཡང་དག་བྱེད་ཀྱི་ཡོད། ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གིས་ཀྲུང་དབྱང་མི་རིགས་ལས་དོན་ཚོགས་འདུ་ཐེངས་གཉིས་དང་། ཀྲུང་དབྱང་ཞིན་ཅང་ལས་དོན་བཞུགས་མོལ་ཚོགས་འདུ་ཐེངས་གཉིས་པ་དང་གསུམ་པ། ཀྲུང་དབྱང་བོད་ལྗོངས་ལས་དོན་བཞུགས་མོལ་ཚོགས་འདུ་ཐེངས་དྲུག་པ་དང་བདུན་པ་སོགས་ཚོགས་འདུ་གལ་ཆེན་སྔ་གཞུག་ཏུ་འཚོགས་ཏེ། མི་རིགས་ལས་དོན་ལ་ཕྱོགས་ཡོངས་ནས་བཀོད་སྒྲིག་བྱས་པའི་ཤུགས་ཚད་ཆེ་བ་དང་། གྲངས་ཀ་མང་བ། ཁྱབ་རྒྱ་ཆེ་བ། འགྲེལ་བཤད་རྒྱས་པ་བཅས་ནི་སྔར་བྱུང་མ་མྱོང་བ་ཞིག་ཡིན།

སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་དུས་ནམ་ཡང་མི་རིགས་ལས་དོན་ཐུགས་ལ་བཟུང་སྟེ་སྐུ་ངལ་ཚད་མེད་མཛད། དེ་སྔོན་“གནམ་འོག་གི་དཀའ་སྡུག་ཆེ་བའི་ཡུལ་ཁམས་”ཀན་སུའུ་ཏིང་ཞི་རུ་སྤྱི་ཁྱབ་ཧྲུའུ་ཅི་ཆེད་དུ་ཝེ་ཡོན་རྫོང་དུ་ཕེབས་ཏེ་ཐའོ་ཆུ་འདྲེན་གཏོང་ལས་གྲྭར་རྟོག་ཞིབ་གནང་ཞིང་། མི་སེར་རྣམས་ལ་སྔ་ཙམ་ནས་ཐའོ་ཆུ་གཙང་མ་འཐུང་དུ་འཇུག་རྒྱུའི་བཅོལ་བཏམས་གནང་བ་དང་། ཧུའུ་ནན་ཞང་ཞི་ཐུའུ་ཅ་རིགས་མིའོ་རིགས་རང་སྐྱོང་ཁུལ་གྱི་ཧྲི་པ་ཏུང་གྲོང་ཚོ་རུ་“དབུལ་སྐྱོར་གནད་འཕིགས་”ཀྱི་འདུ་ཤེས་ཐོག་མར་བཏོན་གནང་བ། ཡུན་ནན་ཨར་ཧའེ་འགྲམ་དུ་“ཁོར་ཡུག་གཙང་ཞིང་གྲལ་དག་པ་དང་། གནའ་བོའི་བབས་ཆགས་ཀྱི་རྣམ་པ་ཉམས་མེད་དུ་གནས་པའི་ཁང་ཁྱིམ་འདི་ལྟ་བུ་ནི་ནུབ་ལུགས་ཀྱི་སྡོད་ཁང་ལས་ཡག་པོ་ཡོད་དེ། དེ་ལས་ཕ་ཡུལ་དྲན་ཐུབ་པ་ཞིག་རེད་”ཅེས་པའེ་རིགས་ཀྱི་སྲོལ་རྒྱུན་སྡོད་ཁང་ལ་བསྔགས་བརྗོད་གནང་བ། སི་ཁྲོན་ལིའང་ཧྲན་དུ་དབྱི་རིགས་ཀྱི་དབུལ་ཕོངས་ཁྱིམ་ཚང་དུ་ཕེབས་ཏེ། གྲོང་མིའི་འཐུས་ཚབ་དང་གྲོང་ཚོར་སྡོད་པའི་དབུལ་སྐྱོར་ལས་དོན་མི་སྣ་དང་མཉམ་དུ་མེ་ཐབ་བསྐོར་ནས་དབུལ་བྲལ་གནད་འཕིགས་ཀྱི་ཐབས་ཇུས་འདོན་གནང་བ། ནང་སོག་ཁྲི་ཧྥེང་གྲོང་ཁྱེར་ཧོ་ནན་སྲང་ལམ་མ་ཨན་ཧྲན་གྲོང་ཚོ་རུ་མི་རབས་བཞི་འཛོམས་ཀྱི་“མི་རིགས་མང་བའི་ཁྱིམ་ཚང་”དུ་ཕེབས་ནས་མི་རིགས་ཁག་སེ་འབྲུའི་འབྲུ་རྡོག་བཞིན་གོང་བུ་གཅིག་ཏུ་དམ་པོར་འགྲིལ་བ་བྱེད་དགོས་ཞེས་བཏོན་གནང་བ། ཉིང་ཞ་རུ་ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་སྟོབས་ལྡན་བསྐྲུན་ཚར་བར་བྱེད་པར་མི་རིགས་གཅིག་ཀྱང་ཆད་མི་རུང་ཞེས་བསླབ་བྱ་གནང་བ། ཀུའེ་ཀྲོའུ་རུ་“ཀྲུང་ཧྭ་མི་རིགས་ནི་ཁྱིམ་ཚང་ཆེན་པོ་ཞིག་ཡིན་ཞིང་། མི་རིགས་ང་དྲུག་པོ་ནི་མེ་ཏོག་ང་དྲུག་ལྟ་བུ་ཡིན་”ཞེས་ནན་གསུང་གནང་བ། མཚོ་སྔོན་དུ་“ཕྱོགས་ཡོངས་ནས་ཏང་གི་མི་རིགས་སྲིད་ཇུས་ལག་བསྟར་དང་། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོར་སྐྱེད་དགོས་”ཞེས་བླང་བྱ་བཏོན་གནང་བ། བོད་ལྗོངས་སུ་“ང་ཚོ་ནི་ཀྲུང་ཧྭ་མི་རིགས་གཅིག་མཐུན་ཚོགས་པ་ཡིན་པས། ཕྱར་བ་གྲུ་འདེགས་ཀྱིས་ལོ་བརྒྱ་གཉིས་པའི་འབད་འཐབ་དམིགས་འབེན་གྱི་ཕྱོགས་སུ་སྐྱོད་དགོས་”ཞེས་བསྟན་གནང་བ། ཞིན་ཅང་དུ་“རང་རྒྱལ་ནི་གཅིག་གྱུར་གྱི་མི་རིགས་མང་བའི་རྒྱལ་ཁབ་ཅིག་ཡིན་ཞིང་། ཀྲུང་ཧྭ་མི་རིགས་སྣེ་མང་གཞི་གཅིག་ཅན་ནི་རང་རྒྱལ་གྱི་ཁྱད་ཆོས་མངོན་གསལ་དོད་པོ་ཞིག་ཡིན། དེར་བརྟེན་ངས་‘སེ་འབྲུའི་འབྲུ་རྡོག་’དམིགས་བསལ་དུ་དཔེར་བཀོད་པ་ཡིན་”ཞེས་ནན་གསུང་གནང་བ་སོགས་འཛམ་གླིང་ཡང་རྩེ་ནས་ས་སེར་མཐོ་སྒང་གི་བར་དང་། ལྷོ་ནུབ་ཀྱི་རི་གྲོང་ནས་ཐེན་ཧྲན་རི་བོའི་ལྷོ་བྱང་གི་བར། བྱང་ཕྱོགས་ཀྱི་མཐའ་མཚམས་ནས་ལྷོ་རྒྱ་མཚོའི་བེ་ཏའི་ནགས་ཚལ་གྱི་བར་བཅས་ཏེ། སྤྱི་ཁྱབ་ཧྲུའུ་ཅི་མི་རིགས་ས་ཁུལ་དུ་ཐེངས་མང་རྟོག་ཞིབ་དང་ཟབ་ཞུགས་གནང་སྟེ། མང་ཚོགས་བདེ་སྡུག་ཤེས་རྟོགས་དང་། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་རྒྱུན་ཆད་མེད་པར་ཆེ་རུ་སྐྱེད་པར་སྐུལ་འདེད་གནང་།

གྲོས་ཚོགས་གལ་ཆེན་རེ་རེ་དང་། བརྟག་དཔྱད་ཞིབ་འཇུག་ཟབ་མོ་རེ་རེ། བརྩེ་བ་ཟབ་ཅིང་སྐུལ་འདེབས་ཀྱི་འཕྲིན་ལན་རེ་རེ། དཔྱིད་རླུང་ལྟ་བུའི་གླེང་མོལ་རེ་རེ། ཚན་རིག་དང་མཐུན་པའི་སྡོམ་ཚིག་རེ་རེ། བཀོད་སྒྲིག་གལ་ཆེན་རེ་རེ་ལ་སོགས་པ་སྟེ། དུས་རབས་གསར་པའི་ཏང་གི་མི་རིགས་ལས་དོན་ལ་ཁྲིད་སྟོན་བྱས་ཏེ་ལོ་རྒྱུས་རང་བཞིན་གྱི་གྲུབ་འབྲས་ཐོབ་པའི་ལག་ལེན་རླབས་པོ་ཆེའི་ནང་དུ། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མར་ཁེ་སིའི་རིང་ལུགས་ཀྱི་མི་རིགས་རིགས་པའི་གཞུང་ལུགས་དེ་ཀྲུང་གོའི་བྱེ་བྲག་གི་དོན་དངོས་དང་ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་དང་ཟུང་འབྲེལ་གནང་སྟེ། མི་རིགས་ལས་དོན་སྐོར་གྱི་འདུ་ཤེས་གསར་པ་དང་བསམ་བློ་གསར་པ་དང་འཐབ་ཇུས་གསར་པ་བཅས་རབ་དང་རིམ་པ་བཏོན་གནང་བ་དང་། མི་རིགས་ལས་དོན་ལ་ཤུགས་སྣོན་དང་ལེགས་སྒྱུར་བྱ་རྒྱུའི་སྐོར་གྱི་དགོངས་པ་གལ་ཆེན་གྲུབ་པ་རེད། 2021ལོར་འཚོགས་པའི་ཀྲུང་དབྱང་མི་རིགས་ལས་དོན་ཚོགས་འདུའི་ཐོག་དགོངས་པ་གལ་ཆེན་དེར་མ་ལག་ཚང་བའི་སྒོ་ནས་འགྲེལ་བཤད་བརྒྱབ་ཡོད་དེ། ངེས་པར་དུ་ཀྲུང་ཧྭ་མི་རིགས་བསྐྱར་དར་རླབས་པོ་ཆེ་ཡོང་བའི་འཐབ་ཇུས་ཀྱི་མཐོ་ཚད་ཐོག་ནས་དུས་རབས་གསར་པའི་ཏང་གི་མི་རིགས་ལས་དོན་གྱི་ལོ་རྒྱུས་ཀྱི་གནས་ཕྱོགས་ཟིན་དགོས་པ་དང་གཅིག །ངེས་པར་དུ་མི་རིགས་ཁག་ལ་སྐུལ་འདེད་བྱས་ཏེ་ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་འཛུགས་སྐྲུན་བྱེད་པར་ཐུན་མོང་ཐོག་འབད་བརྩོན་བྱ་རྒྱུ་དེ་དུས་རབས་གསར་པའི་ཏང་གི་མི་རིགས་ལས་དོན་གྱི་འགན་འཁྲི་གལ་ཆེན་ཞིག་ཏུ་བརྩི་དགོས་པ་དང་གཉིས། ངེས་པར་དུ་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོར་སྐྱེད་པ་དེ་དུས་རབས་གསར་པའི་ཏང་གི་མི་རིགས་ལས་དོན་གྱི་གཙོ་ཐིག་ཏུ་འཛིན་དགོས་པ་དང་གསུམ། ངེས་པར་དུ་ཡང་དག་པའི་ཀྲུང་ཧྭ་མི་རིགས་ཀྱི་ལོ་རྒྱུས་ལྟ་བ་རྒྱུན་འཁྱོངས་བྱེད་དགོས་པ་དང་བཞི། ངེས་པར་དུ་མི་རིགས་ཁག་ཚང་མ་འདྲ་མཉམ་ཡིན་པ་རྒྱུན་འཁྱོངས་བྱེད་དགོས་པ་དང་ལྔ། ངེས་པར་དུ་ཀྲུང་ཧྭ་མི་རིགས་མཐུན་སྒྲིལ་ཆེན་མོའི་དར་ཆ་མཐོན་པོར་སྒྲེང་དགོས་པ་དང་དྲུག །ངེས་པར་དུ་མི་རིགས་ས་ཁོངས་རང་སྐྱོང་ལམ་ལུགས་རྒྱུན་འཁྱོངས་དང་འཐུས་ཚང་གཏོང་དགོས་པ་དང་བདུན། ངེས་པར་དུ་ཀྲུང་ཧྭ་མི་རིགས་ཀྱི་ཐུན་མོང་གི་བསམ་པའི་ཁྱིམ་གཞིས་སྐྲུན་དགོས་པ་དང་བརྒྱད། ངེས་པར་དུ་མི་རིགས་ཁག་བར་འགྲོ་འོང་དང་སྤེལ་རེས་དང་མཉམ་འདྲེས་རྒྱ་ཁྱབ་ཏུ་ཡོང་བར་སྐུལ་འདེད་གཏོང་དགོས་པ་དང་དགུ། ངེས་པར་དུ་ཁྲིམས་ལྟར་མི་རིགས་ལས་དོན་བཅོས་སྐྱོང་བྱ་རྒྱུ་རྒྱུན་འཁྱོངས་བྱེད་དགོས་པ་དང་བཅུ། ངེས་པར་དུ་རྒྱལ་ཁབ་ཀྱི་བདག་དབང་དང་། བདེ་འཇགས། འཕེལ་རྒྱས་ཀྱི་ཁེ་ཕན་བཅས་མཐའ་གཅིག་ཏུ་སྲུང་སྐྱོང་བྱེད་དགོས་པ་དང་བཅུ་གཅིག །ངེས་པར་དུ་ཏང་གིས་མི་རིགས་ལས་དོན་ལ་འགོ་ཁྲིད་བྱ་རྒྱུ་རྒྱུན་འཁྱོངས་བྱེད་དགོས་པ་དང་བཅུ་གཉིས་བཅས་སོ། །

སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མི་རིགས་ལས་དོན་ལ་ཤུགས་སྣོན་དང་ལེགས་སྒྱུར་བྱ་རྒྱུའི་སྐོར་གྱི་དགོངས་པ་གལ་ཆེན་ནི། ཏང་གི་ལོ་ངོ་བརྒྱའི་རིང་གི་མི་རིགས་ལས་དོན་གྱི་འཕེལ་རིམ་དང་ལྷག་པར་དུ་དུས་རབས་གསར་པའི་མི་རིགས་ལས་དོན་གྱི་ལོ་རྒྱུས་རང་བཞིན་གྱི་གྲུབ་འབྲས་དང་ཉམས་མྱོང་རྩ་ཆེན་ལ་ཚན་རིག་དང་མཐུན་པར་ཕྱོགས་བསྡོམས་བྱས་པ་ཞིག་ཡིན་པ་དང་། “ཟུང་འབྲེལ་གཉིས་”རྒྱུན་འཁྱོངས་བྱས་ཏེ་མར་ཁེ་སིའི་རིང་ལུགས་ཀྱི་མི་རིགས་རིགས་པའི་གཞུང་ལུགས་ཀྲུང་གོ་ཅན་དང་དུས་རབས་ཅན་དུ་གྱུར་པའི་གྲུབ་འབྲས་གསར་ཤོས་ཡིན་ལ། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པའི་གྲུབ་ཆ་གལ་ཆེན་ཞིག་ཡིན་ཏེ། དེས་དུས་རབས་གསར་པའི་ཏང་གི་མི་རིགས་ལས་དོན་ཡག་པོ་སྒྲུབ་པར་མདུན་སྐྱོད་ཀྱི་ཁ་ཕྱོགས་གསལ་སྟོན་དང་རྩ་བའི་སྲུང་བྱ་འདོན་སྤྲོད་བྱས་ཡོད།

རྩོམ་ཡིག་གལ་ཆེན་དེའི་ནང་དུ། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་དུས་རབས་གསར་པའི་ཏང་གི་མི་རིགས་ལས་དོན་གྱི་ལོ་རྒྱུས་རང་བཞིན་གྱི་གྲུབ་འབྲས་ལ་ཚན་རིག་དང་མཐུན་པར་ཕྱོགས་བསྡོམས་མཛད་པ་དང་། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོར་སྐྱེད་པའི་ཕུན་སུམ་ཚོགས་པའི་ནང་དོན་དང་དོན་སྙིང་གལ་ཆེན་ལ་རྒྱས་བཤད་ཟབ་མོ་གནང་ལ། འཐབ་ལམ་གསར་པའི་མི་རིགས་ལས་དོན་ཡག་པོ་སྒྲུབ་པར་བླང་བྱ་གསར་པ་བཏོན་གནང་ཡོད།

——ལོ་རྒྱུས་རང་བཞིན་གྱི་གྲུབ་འབྲས་སྐོར་ལ། ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གིས་ཀྲུང་ཧྭ་མི་རིགས་ཀྱི་ཁྱིམ་གཞིས་ཆེན་མོ་དང་། ཀྲུང་ཧྭ་མི་རིགས་གཅིག་མཐུན་ཚོགས་པ། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོར་སྐྱེད་པ། ཀྲུང་ཧྭ་མི་རིགས་གཅིག་མཐུན་ཚོགས་པ་འཛུགས་སྐྲུན་ལ་སྐུལ་འདེད་གཏོང་བ་སོགས་ཀྱི་འདུ་ཤེས་ནན་བཤད་བྱས་པ་དང་། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོར་སྐྱེད་རྒྱུ་དེ་དུས་རབས་གསར་པའི་ཏང་གི་མི་རིགས་ལས་དོན་གྱི་གཙོ་ཐིག་དང་། མི་རིགས་ས་ཁུལ་གྱི་ལས་དོན་ཁག་གི་གཙོ་ཐིག་ཏུ་འཛིན་རྒྱུ་གསལ་པོར་བཏོན་ལ། ཀྲུང་གོའི་ཁྱད་ཆོས་ལྡན་པའི་མི་རིགས་གནད་དོན་ཐག་གཅོད་བྱེད་པའི་འགྲོ་ལམ་ཡང་དག་པ་དེ་སྔར་བས་རྒྱ་ཇེ་ཆེར་བསྐྱེད་དེ། ཏང་གི་མི་རིགས་ལས་དོན་ལ་ཤུགས་སྣོན་དང་ལེགས་སྒྱུར་བྱ་རྒྱུའི་སྐོར་གྱི་དགོངས་པ་གལ་ཆེན་གྲུབ་པ་དང་། མར་ཁེ་སིའི་རིང་ལུགས་ཀྱི་མི་རིགས་རིགས་པའི་གཞུང་ལུགས་ཀྱི་ཀྲུང་གོ་ཅན་དང་དུས་རབས་ཅན་གྱི་ཡུལ་ཁམས་གསར་པ་བཏོད་ལ། ཏང་གི་མི་རིགས་ལས་དོན་ལ་ལོ་རྒྱུས་རང་བཞིན་གྱི་གྲུབ་འབྲས་གསར་པ་ཐོབ་ཡོད།

——ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོར་སྐྱེད་རྒྱུའི་སྐོར་ལ། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ནན་གསུང་གནང་དོན། “ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོར་སྐྱེད་དགོས་ན། མི་རིགས་ཁག་གི་མི་དམངས་ལ་ཁྲིད་སྟོན་བྱས་ནས་བདེ་སྡུག་མཉམ་མྱོང་དང་། ཁྲེལ་གྲགས་མཉམ་འཁུར། ཤི་གསོན་མཉམ་གནས། ལས་དབང་གཅིག་འབྲེལ་བཅས་ཀྱི་གཅིག་མཐུན་ཚོགས་པའི་འདུ་ཤེས་བརྟན་པོར་སྐྱེད་དགོས།” ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོར་སྐྱེད་པ་ནི་མི་རིགས་ཁག་གི་རྩ་བའི་ཁེ་ཕན་སྲུང་སྐྱོང་བྱེད་པའི་ལྡོག་མེད་ཀྱི་བླང་བྱ་ཞིག་དང་། ཀྲུང་ཧྭ་མི་རིགས་བསྐྱར་དར་རླབས་པོ་ཆེ་མངོན་འགྱུར་བྱེད་པའི་ལྡོག་མེད་ཀྱི་བླང་བྱ་ཞིག །འདྲ་མཉམ་མཐུན་སྒྲིལ་རོགས་རེས་ཞི་མཐུན་བཅས་ཀྱི་སྤྱི་ཚོགས་རིང་ལུགས་ཀྱི་མི་རིགས་འབྲེལ་བ་སྲ་བརྟན་དང་འཕེལ་རྒྱས་གཏོང་བའི་ལྡོག་མེད་ཀྱི་བླང་བྱ་ཞིག །ཏང་གི་མི་རིགས་ལས་དོན་ལ་རྣམ་པ་གསར་པ་གཏོད་པའི་ལྡོག་མེད་ཀྱི་བླང་བྱ་ཞིག་བཅས་ཡིན། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོར་སྐྱེད་པ་དེ་དུས་རབས་གསར་པའི་ཏང་གི་མི་རིགས་ལས་དོན་གྱི་“རྩ་བ་”བྱེད་དགོས་པ་དང་། ལས་དོན་གང་བྱེད་ཚང་མས་དེར་རྩེ་གཅིག་ཏུ་དམིགས་དགོས།

——བླང་བྱ་གསར་པའི་སྐོར་ལ། རྒྱལ་ཁབ་སྟོབས་ལྡན་འཛུགས་སྐྲུན་དང་ཀྲུང་ཧྭ་མི་རིགས་བསྐྱར་དར་ཡོང་བའི་བྱ་གཞག་རླབས་པོ་ཆེའི་འཐབ་ལམ་གསར་པའི་སྟེང་ཏང་གི་མི་རིགས་ལས་དོན་ལ་གནས་བབ་དང་འགན་འཁྲི་གསར་པ་འཕྲད་ཡོད། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་བླང་བྱ་ཁ་གསལ་བཏོན་གནང་ཡོད་དེ། “མི་རིགས་ཁག་གིས་ཐུན་མོང་ཐོག་མཐུན་སྒྲིལ་འབད་འཐབ་བྱེད་པར་སྐུལ་འདེད་ཤུགས་ཆེན་བྱས་ཏེ། རྒྱལ་ཁབ་སྟོབས་ལྡན་འཛུགས་སྐྲུན་དང་མི་རིགས་བསྐྱར་དར་ཡོང་བར་སྟོབས་ཤུགས་ཆེན་པོ་གཅིག་སྒྲིལ་བྱེད་དགོས། མི་རིགས་ཁག་ཐུན་མོང་ཐོག་དར་རྒྱས་གོང་འཕེལ་ཡོང་རྒྱུ་ཕྱོགས་ཡོངས་ནས་མངོན་འགྱུར་བྱས་ཏེ། མི་རིགས་ཁག་གི་མི་དམངས་ལ་རྒྱལ་ཁབ་སྟོབས་ལྡན་འཛུགས་སྐྲུན་དང་མི་རིགས་བསྐྱར་དར་གྱི་གཟི་བརྗིད་རླབས་པོ་ཆེ་མཉམ་རོལ་བྱེད་དུ་འཇུག་དགོས།” “ཏང་གི་ཚོགས་ཆེན་ཉི་ཤུ་པའི་བཀོད་སྒྲིག་ཕྱོགས་ཡོངས་ནས་ལག་བསྟར་དང་། ཏང་གི་མི་རིགས་ལས་དོན་གྱི་དུས་རིམ་རང་བཞིན་གྱི་ཁྱད་ཆོས་གནད་ལ་འཁེལ་བར་ཤེས་རྟོགས། རྣམ་པ་ཡག་པོ་སྲ་བརྟན། མངོན་སུམ་གྱི་ལས་དོན་ནང་དུ་གནས་པའི་འགལ་བ་དང་གནད་དོན་ཐག་གཅོད། ཏང་གི་མི་རིགས་ལས་དོན་ལ་རྒྱུན་ཆད་མེད་པར་ཤུགས་སྣོན་དང་ལེགས་སྒྱུར། མི་རིགས་མཐུན་སྒྲིལ་ཡར་ཐོན་བྱ་གཞག་ལ་སྐུལ་འདེད་ཏན་ཏིག་བཅས་བྱེད་དགོས།”

ཀྲུང་ཧྭ་མི་རིགས་གཅིག་མཐུན་ཚོགས་པའི་རིགས་པའི་གཞུང་ལུགས་ཀྱི་མ་ལག་འཛུགས་སྐྲུན་ལ་ཤུགས་རྒྱག་དགོས།

“ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོར་སྐྱེད་དགོས་ན། ཚན་རིག་དང་མཐུན་ལ་ཆ་ཚང་བའི་ཀྲུང་ཧྭ་མི་རིགས་གཅིག་མཐུན་ཚོགས་པའི་རིགས་པའི་གཞུང་ལུགས་ཀྱི་མ་ལག་འཛུགས་དགོས།”

རིགས་པའི་གཞུང་ལུགས་ནི་འདུ་ཤེས་འཛིན་སྟངས་ཀྱི་རྨང་རྡོ་ལྟ་བུ་ཡིན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཟབ་མོར་བསྟན་གནང་དོན། “ཀྲུང་ཧྭ་མི་རིགས་ལ་རང་ཉིད་ཀྱི་ཐུན་མོང་མ་ཡིན་པའི་ལོ་རྒྱུས་ལྡན་པས། ཀྲུང་ཧྭ་མི་རིགས་ཀྱི་ལོ་རྒྱུས་བཀྲོལ་བཤད་བྱེད་པར་ནུབ་ཕྱོགས་ཀྱི་མི་རིགས་རིགས་པའི་གཞུང་ལུགས་ཀྱི་བཤད་སྟངས་དེ་རིགས་འདྲ་སྤོས་བྱེད་མི་རུང་།” ཀྲུང་ཧྭ་མི་རིགས་གཅིག་མཐུན་ཚོགས་པ་ཆགས་རྒྱུ་དེ་ཀྲུང་ཧྭ་མི་རིགས་ལོ་རྒྱུས་འཕེལ་རྒྱས་ཀྱི་མཇུག་འབྲས་ལྡོག་མེད་ཡིན། ལོ་ངོ་སྟོང་ཕྲག་འགའི་རིང་ཀྲུང་ཧྭ་མི་རིགས་ཀྱིས་གཅིག་གྱུར་ཆེན་པོ་ཡོང་རྒྱུ་དེ་དུས་ནམ་ཡང་“གནམ་ས་ཡུན་གཏན་གྱི་རྩ་དོན་དང་། གནའ་དེང་ཐུན་མོང་གི་གནས་ལུགས་”ཤིག་ཏུ་བརྩིས་པས། ལོ་རྒྱུས་ཐོག་མི་རིགས་ཁག་བར་འགྲོ་འོང་དང་སྤེལ་རེས་དང་མཉམ་འདྲེས་བཅས་བྱེད་མཚམས་གཏན་ནས་ཆད་མྱོང་མེད། ཀྲུང་ཧྭ་མི་རིགས་ཆགས་པར་ཐག་གཅོད་ཀྱི་ནུས་པ་ཐོན་པ་ནི་ཀྲུང་ཧྭ་མི་རིགས་གཅིག་མཐུན་ཚོགས་པར་ངོས་འཛིན་གཅིག་མཐུན་བྱེད་པ་དེ་ཡིན་པ་ལས་རིགས་རྒྱུད་དང་། ཁྲག་རྒྱུད། ས་ཁོངས། ཆོས་ལུགས་སོགས་ཀྱི་དབང་གིས་མིན་པ་དོན་དངོས་ལས་ར་འཕྲོད་བྱུང་ཡོད། ཀྲུང་ཧྭ་མི་རིགས་སྣེ་མང་གཞི་གཅིག་ཅན་ནི་མེས་པོ་ཚོས་ང་ཚོར་བཞག་པའི་ཤུལ་བཞག་གྱ་ནོམ་པ་ཞིག་ཡིན་ལ། རང་རྒྱལ་འཕེལ་རྒྱས་འགྲོ་བའི་དགེ་མཚན་ཆེན་པོ་ཞིག་ཀྱང་ཡིན། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོར་སྐྱེད་པ་ནི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་བཏོན་གནང་བའི་རང་གཏོད་རང་བཞིན་གྱི་སྡོམ་ཚིག་གལ་ཆེན་ཞིག་ཡིན་པ་དང་། “ཟུང་འབྲེལ་གཉིས་”དང་ལྷག་པར་དུ་“ཟུང་འབྲེལ་ཐེངས་གཉིས་པའི་”བྱེ་བྲག་གི་མཚོན་ཚུལ་ཞིག་ཡིན་ཏེ། དེས་མར་ཁེ་སིའི་རིང་ལུགས་ཀྱི་མི་རིགས་རིགས་པའི་གཞུང་ལུགས་གྲ་རྒྱས་དང་གོང་འཕེལ་བཏང་ཡོད་པ་དང་། ཀྲུང་གོའི་ཁྱད་ཆོས་ལྡན་པའི་མི་རིགས་གནད་དོན་ཐག་གཅོད་བྱེད་པའི་འགྲོ་ལམ་ཡང་དག་པ་དེ་སྲ་བརྟན་དང་རྒྱ་སྐྱེད་བཏང་ཡོད་ལ། ཏང་གི་མི་རིགས་ལས་དོན་གྱི་མདུན་སྐྱོད་ཁ་ཕྱོགས་གསལ་སྟོན་བྱས་ཡོད།

རིགས་པའི་གཞུང་ལུགས་ཀྱི་ཞིབ་འཇུག་ཇི་ལྟར་གཏིང་ཟབ་བྱས་ན། དེས་འདུ་ཤེས་འཛིན་སྟངས་ལ་འདེགས་སྐྱོར་བྱེད་པ་དེ་ཙམ་ཞུམ་མེད་སྟོབས་ལྡན་ཡོང་གི་རེད། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོར་སྐྱེད་དགོས་ན། ངེས་པར་དུ་ཀྲུང་ཧྭ་མི་རིགས་ཀྱི་དུས་ཡུན་རིང་པོའི་ལོ་རྒྱུས་ལ་གཞི་བཙུགས་ཏེ། ཀྲུང་ཧྭ་མི་རིགས་གཅིག་མཐུན་ཚོགས་པའི་རིགས་པའི་གཞུང་ལུགས་ཀྱི་མ་ལག་འཛུགས་སྐྲུན་ལ་ཤུགས་རྒྱག་དགོས། རྩོམ་ཡིག་གལ་ཆེན་དེའི་ནང་དུ། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་“ཀྲུང་ཧྭ་མི་རིགས་གཅིག་མཐུན་ཚོགས་པའི་རིགས་པའི་གཞུང་ལུགས་ཀྱི་མ་ལག་འཛུགས་སྐྲུན་ལ་ཤུགས་རྒྱག་པའི་”ཐད་བླང་བྱ་གསལ་པོ་བཏོན་གནང་ཡོད།

སྤྱི་ཁོག་གི་བླང་བྱའི་ཐོག་ནས་བལྟས་ན། “ཀྲུང་ཧྭ་མི་རིགས་གཅིག་མཐུན་ཚོགས་པའི་རིགས་པའི་གཞུང་ལུགས་ཀྱི་མ་ལག་སྐྲུན་དགོས་ན། ངེས་པར་དུ་ཀྲུང་ཧྭ་མི་རིགས་ཀྱི་དུས་ཡུན་རིང་པོའི་ལོ་རྒྱུས་ལ་གཞི་བཙུགས་ཏེ། མར་ཁེ་སིའི་རིང་ལུགས་ཀྱི་མི་རིགས་རིགས་པའི་གཞུང་ལུགས་དེ་ཀྲུང་གོའི་བྱེ་བྲག་གི་དོན་དངོས་དང་ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་དང་ཟུང་འབྲེལ་དང་། ཀྲུང་ཧྭ་མི་རིགས་འཕེལ་རྒྱས་ཡོང་བའི་ལོ་རྒྱུས་ཀྱི་གཏན་ཚིགས་དང་རིགས་པའི་གཞུང་ལུགས་ཀྱི་གཏན་ཚིགས་བརྩི་སྲུང་། ཀྲུང་ཧྭ་མི་རིགས་ཆགས་པ་དང་འཕེལ་རྒྱས་འགྲོ་བའི་གནས་ལུགས་དང་། རིགས་ལམ། མཚན་ཉིད་བཅས་ཚན་རིག་དང་མཐུན་པར་གསལ་སྟོན་བྱེད་དགོས་”ཞེས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་བསྟན་གནང་ཡོད།

རིགས་པའི་གཞུང་ལུགས་ཀྱི་ཐོག་ནས་བལྟས་ན། “ཀྲུང་གོའི་ཁྱད་ཆོས་ལྡན་པའི་མི་རིགས་གནད་དོན་ཐག་གཅོད་བྱེད་པའི་འགྲོ་ལམ་ཡང་དག་པ་དེ་ཐོག་མཐའ་བར་གསུམ་དུ་རྒྱུན་འཁྱོངས་བྱས་ནས། ཏང་གི་མི་རིགས་ལས་དོན་ལ་ཤུགས་སྣོན་དང་ལེགས་སྒྱུར་བྱ་རྒྱུའི་སྐོར་གྱི་དགོངས་པ་གལ་ཆེན་སྤྱད་དེ་ཀྲུང་ཧྭ་མི་རིགས་གཅིག་མཐུན་ཚོགས་པའི་རིགས་པའི་གཞུང་ལུགས་ཀྱི་མ་ལག་འཛུགས་སྐྲུན་ལ་གཅིག་འདོམས་དང་མཛུབ་སྟོན་བྱེད་དགོས་”ཞེས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ནན་གསུང་གནང་ཡོད།

བྱེ་བྲག་གི་བླང་བྱའི་ཐོག་ནས་བལྟས་ན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་བླང་བྱ་3བཏོན་གནང་ཡོད་དེ། གཅིག་ནི་རིག་ཚན་གྱི་བཀོད་སྒྲིག་ལེགས་སྒྱུར་དང་། རིག་ཚན་འཛུགས་སྐྲུན་ལ་ཤུགས་སྣོན། ཞིབ་འཇུག་གི་ཁ་ཕྱོགས་ཡང་དག་པར་ཟིན་པ། ཀྲུང་ཧྭ་མི་རིགས་གཅིག་མཐུན་ཚོགས་པའི་རྨང་གཞིའི་རང་བཞིན་གྱི་གནད་དོན་གལ་ཆེན་ལ་ཞིབ་འཇུག་གཏིང་ཟབ་བཅས་བྱས་ཏེ། རང་རྒྱལ་གྱི་མི་རིགས་རིག་པའི་ཞིབ་འཇུག་ཁྲོད་གནས་པའི་ནུབ་ཕྱོགས་ཀྱི་མི་རིགས་རིགས་པའི་གཞུང་ལུགས་དང་བསམ་བློ་དང་སྐད་ཆའི་མ་ལག་གིས་ཁ་ལོ་སྒྱུར་བའི་གནད་དོན་ཐག་གཅོད་བྱེད་པར་གཞོལ་བ་དང་། ཀྲུང་གོའི་རང་བདག་གི་ཀྲུང་ཧྭ་མི་རིགས་གཅིག་མཐུན་ཚོགས་པའི་ལོ་རྒྱུས་ཡིག་ཆའི་མ་ལག་དང་། སྐད་ཆའི་མ་ལག །རིགས་པའི་གཞུང་ལུགས་ཀྱི་མ་ལག་བཅས་མགྱོགས་པོར་ཆགས་པ་བྱེད་དགོས། གཉིས་ནི་ཀྲུང་ཧྭ་མི་རིགས་ཀྱི་དུས་རབས་རིམ་བྱུང་གི་ལོ་རྒྱུས་དང་། ཀྲུང་ཧྭ་མི་རིགས་ཀྱི་འགྲོ་འོང་དང་སྤེལ་རེས་དང་མཉམ་འདྲེས་བཅས་ཀྱི་ལོ་རྒྱུས་རྩོམ་སྒྲིག་ལས་ཀར་མུ་མཐུད་ནས་སྐུལ་འདེད་གཏོང་དགོས་པ་དང་། 《ཀྲུང་ཧྭ་མི་རིགས་གཅིག་མཐུན་ཚོགས་པའི་སྤྱི་བཤད་》ཅེས་པ་སོགས་སློབ་དེབ་རྩོམ་འབྲི་དང་བཀོལ་སྤྱོད་ཡག་པོ་བྱེད་དགོས་ལ། རིག་དངོས་དང་གནའ་དཔེ་སྔོག་འདོན་དང་། དག་སྒྲིག །བེད་སྤྱོད་བཅས་ཀྱི་ལས་ཀ་ཡག་པོ་སྒྲུབ་དགོས། གསུམ་ནི་རྒྱ་ཆེའི་ཆེད་མཁས་པ་དང་མཁས་དབང་དག་གི་ཧུར་བརྩོན་རང་བཞིན་དང་རང་འགུལ་རང་བཞིན་དང་གསར་སྐྲུན་རང་བཞིན་བཅས་སྐུལ་སློང་བྱ་རྒྱུར་དོ་སྣང་བྱེད་དགོས་པ་དང་། ན་གཞོན་ཆེད་མཁས་པ་དང་མཁས་དབང་གསོ་སྐྱོང་བྱེད་ཤུགས་ཆེ་རུ་བཏང་སྟེ། ཁོང་ཚོར་ཁ་ཕྱོགས་ཡང་དག་པ་སྟོན་པ་དང་ལས་སྟེགས་དང་གོ་སྐབས་སྐྲུན་དགོས་པ་དང་། ཁོང་ཚོས་བརྟག་དཔྱད་ལ་གཞོལ་ཞིང་མང་བསགས་སྒྲུབ་སླ་ཡོང་བར་སྐུལ་ལྕག་གཏོང་དགོས་ལ། ཀྲུང་གོའི་ལོ་རྒྱུས་ལ་གཞི་བཅོལ་བ་དང་། ཀྲུང་གོའི་ལག་ལེན་ལ་འགྲེལ་བཤད་རྒྱག་པ། ཀྲུང་གོའི་གནད་དོན་ལ་དྲིས་ལན་འདེབས་པ་བཅས་ཀྱི་གསར་རྩོམ་རང་བཞིན་གྱི་རིགས་པའི་གཞུང་ལུགས་ཀྱི་གྲུབ་འབྲས་འདོན་དགོས།

ཀྲུང་ཧྭ་མི་རིགས་ཐུན་མོང་གི་བསམ་པའི་ཁྱིམ་གཞིས་སྐྲུན་དགོས།

“འགོ་འཛུགས་ས་གསར་པའི་སྟེང་མུ་མཐུད་དེ་རིག་གནས་དར་རྒྱས་གཏོང་བ་དང་། རིག་གནས་རྒྱལ་ཁབ་སྟོབས་ལྡན་འཛུགས་སྐྲུན། ཀྲུང་ཧྭ་མི་རིགས་ཀྱི་དེང་རབས་ཤེས་དཔལ་འཛུགས་སྐྲུན་བཅས་བྱེད་པ་ནི་ང་ཚོའི་དུས་རབས་གསར་པའི་རིག་གནས་ཀྱི་འགན་འཁྲི་གསར་པ་ཡིན།” “ལོ་རྒྱུས་རྒྱུན་འཛིན་བྱེད་སྟངས་ཡག་ཤོས་ནི་ལོ་རྒྱུས་གསར་པ་སྐྲུན་རྒྱུ་དེ་ཡིན་པ་དང་། མིའི་རིགས་ཀྱི་ཤེས་དཔལ་ལ་བརྩི་བཀུར་བྱེད་སྟངས་ཡག་ཤོས་ནི་མིའི་རིགས་ཀྱི་ཤེས་དཔལ་གྱི་རྣམ་པ་གསར་པ་སྐྲུན་རྒྱུ་དེ་ཡིན།”

2023ལོའི་ཟླ་6ཚེས་2ཉིན་གྱི་ཕྱི་དྲོར། ཀྲུང་གོ་ལོ་རྒྱུས་ཞིབ་འཇུག་གླིང་དུ་སྤྱི་ཁྱབ་ཧྲུའུ་ཅི་ཞི་ཅིན་ཕིང་རིག་གནས་འཛིན་སྐྱོང་སྤེལ་གསུམ་སྐོར་གྱི་བཞུགས་མོལ་ཚོགས་འདུར་ཞུགས་པ་མ་ཟད་གསུང་བཤད་གལ་ཆེན་གནང་སྟེ། ཏང་དང་རྒྱལ་ཁབ་ཀྱི་བྱ་གཞག་འཕེལ་རྒྱས་ཀྱི་སྤྱི་ཡོངས་ཀྱི་འཐབ་ཇུས་ཀྱི་མཐོ་ཚད་ཐོག་ནས་ཀྲུང་ཧྭ་མི་རིགས་ཀྱི་དེང་རབས་ཤེས་དཔལ་འཛུགས་སྐྲུན་གྱི་གནད་དོན་ཆེན་པོ་འདིའི་སྐོར་ལ་རྒྱས་བཤད་ཟབ་མོ་གནང་བ་རེད།

ང་ཚོ་ལྟ་བུའི་ལོ་ངོ་ལྔ་སྟོང་ལྷག་གི་ཤེས་དཔལ་གྱི་ལོ་རྒྱུས་ལྡན་པའི་རྒྱལ་ཁབ་ཅིག་གི་རླབས་ཆེན་མཛད་འཕྲིན་ཡིན་ལ། ཀྲུང་ཧྭ་མི་རིགས་བསྐྱར་དར་རླབས་པོ་ཆེ་མངོན་འགྱུར་བྱེད་པའི་དགོས་དོན་ཡང་ཡིན། ཀྲུང་ཧྭ་མི་རིགས་ཀྱི་དེང་རབས་ཤེས་དཔལ་འཛུགས་སྐྲུན་བྱེད་པར། མི་རིགས་ལས་དོན་ཇི་ལྟར་སྒྲུབ་དགོས་སམ་ཞེ་ན། རྩོམ་ཡིག་གལ་ཆེན་དེའི་ནང་དུ། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཟབ་མོར་བསྟན་གནང་དོན། “ངེས་པར་དུ་ཀྲུང་ཧྭ་མི་རིགས་ཉིད་ལོ་རྒྱུས་ནས་མ་འོངས་པར་སྐྱོད་པ་དང་། སྲོལ་རྒྱུན་ནས་དེང་རབས་སུ་སྐྱོད་པ། སྣེ་མང་ནས་གཞི་གཅིག་ཏུ་གོང་བུ་འདྲིལ་བ་བཅས་བྱས་པའི་འཕེལ་ཕྱོགས་ཆེན་པོ་ཡིན་པས། ཀྲུང་ཧྭའི་ཤེས་དཔལ་གྱི་ཐུན་མོང་མ་ཡིན་པའི་ཁྱད་ཆོས་གཏིང་ཟབ་པོར་གོ་བ་ལེན་པ་དང་ཁོང་དུ་ཆུད་དགོས་པ་དང་། ལོ་རྒྱུས་ཀྱི་འགོ་འཛུགས་ས་གསར་པའི་ཐོག་ནས་ཀྲུང་ཧྭ་མི་རིགས་ཀྱི་ཐུན་མོང་གི་བསམ་པའི་ཁྱིམ་གཞིས་མུ་མཐུད་ནས་བསྐྲུན་ཏེ། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོར་སྐྱེད་ཆེད་བསམ་བློ་དང་རིག་གནས་ཀྱི་རྨང་གཞི་བརྟན་པོ་འདིང་དགོས།”

ཀྲུང་ཧྭ་མི་རིགས་ཀྱི་ཐུན་མོང་གི་བསམ་པའི་ཁྱིམ་གཞིས་སྐྲུན་དགོས་ན། གནད་འགག་ནི་རིག་གནས་ཀྱི་ངོས་འཛིན་གཅིག་མཐུན་ཆེ་རུ་སྐྱེད་རྒྱུ་དེ་ཡིན། རིག་གནས་ནི་མི་རིགས་ཤིག་གི་བླ་སྲོག་ལྟ་བུ་ཡིན་པ་དང་། རིག་གནས་ཀྱི་ངོས་འཛིན་གཅིག་མཐུན་ནི་གཏིང་རིམ་ཟབ་ཤོས་ཀྱི་ངོས་འཛིན་གཅིག་མཐུན་ཡིན་ཏེ། དེ་ནི་མི་རིགས་མཐུན་སྒྲིལ་ཡོང་བའི་རྩ་བ་དང་མི་རིགས་ཞི་མཐུན་ཡོང་བའི་བླ་སྲོག་ལྟ་བུ་ཡིན། ཀྲུང་ཧྭ་མི་རིགས་ཀྱི་མཐུན་སྒྲིལ་ཆེན་མོར་ཤུགས་རྒྱག་དགོས་ན། ཕུགས་རིང་དང་རྩ་བར་གྱུར་པ་ནི་རིག་གནས་ཀྱི་ངོས་འཛིན་གཅིག་མཐུན་ཆེ་རུ་བསྐྱེད་དེ། མི་རིགས་ཁག་ཐུན་མོང་གི་བསམ་པའི་ཁྱིམ་གཞིས་སྐྲུན་རྒྱུ་དེ་ཡིན། ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མི་རིགས་ཁག་ཐུན་མོང་གི་བསམ་པའི་ཁྱིམ་གཞིས་སྐྲུན་པར་ཚད་མཐོའི་མཐོང་ཆེན་གནང་ཞིང་། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་སྐྱེད་སྲིང་མཛད། 2014ལོའི་ཟླ་9ཚེས་28ཉིན། ཀྲུང་དབྱང་མི་རིགས་ལས་དོན་ཚོགས་འདུའི་ཐོག་ཏུ་“མི་རིགས་ཁག་ཐུན་མོང་གི་བསམ་པའི་ཁྱིམ་གཞིས་འཛུགས་སྐྲུན་བྱ་རྒྱུ་དེ་འཐབ་ཇུས་ཀྱི་འགན་འཁྲི་ཞིག་ཏུ་འཛིན་དགོས་”ཞེས་ནན་གསུང་གནང་། 2019ལོའི་ཟླ་9ཚེས་27ཉིན། རྒྱལ་ཡོངས་མི་རིགས་མཐུན་སྒྲིལ་ཡར་ཐོན་གྱི་གཟེངས་བསྟོད་ཚོགས་ཆེན་ཐོག་ཏུ་“སྤྱི་ཚོགས་རིང་ལུགས་ཀྱི་ལྟེ་བའི་རིན་ཐང་ལྟ་བས་ཁྲིད་སྟོན་བྱས་ཏེ། མི་རིགས་ཁག་ཐུན་མོང་གི་བསམ་པའི་ཁྱིམ་གཞིས་སྐྲུན་དགོས་”ཞེས་ནན་གསུང་གནང་། 2021ལོའི་ཟླ་8ཚེས་27ཉིན། ཀྲུང་དབྱང་མི་རིགས་ལས་དོན་ཚོགས་འདུའི་ཐོག་“ངེས་པར་དུ་ཀྲུང་ཧྭ་མི་རིགས་ཐུན་མོང་གི་བསམ་པའི་ཁྱིམ་གཞིས་སྐྲུན་རྒྱུ་”དེ་མི་རིགས་ལས་དོན་ཤུགས་སྣོན་དང་ལེགས་སྒྱུར་བྱ་རྒྱུའི་སྐོར་གྱི་དགོངས་པ་གལ་ཆེན་གྱི་ནང་དོན་གལ་ཆེན་དུ་བཀོད། 2022ལོའི་ཟླ་7ཚེས་29ཉིན། ཀྲུང་དབྱང་འཐབ་ཕྱོགས་གཅིག་གྱུར་ལས་དོན་ཚོགས་འདུའི་ཐོག་“མི་རིགས་ཁག་གིས་རླབས་ཆེན་མེས་རྒྱལ་དང་། ཀྲུང་ཧྭ་མི་རིགས། ཀྲུང་ཧྭའི་རིག་གནས། ཀྲུང་གོའི་གུང་ཁྲན་ཏང་། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་བཅས་ལ་ཚད་མཐོའི་ངོས་འཛིན་གཅིག་མཐུན་བརྟན་པོ་ཡོང་བར་སྐུལ་འདེད་གཏོང་དགོས་”ཞེས་ནན་གསུང་གནང་བ་ལ་སོགས་པ་སྟེ། རྒྱས་བཤད་གལ་ཆེན་འདི་དག་གིས་ཀྲུང་ཧྭ་མི་རིགས་ཐུན་མོང་གི་བསམ་པའི་ཁྱིམ་གཞིས་སྐྲུན་པའི་གལ་ཆེའི་དོན་སྙིང་དང་། གོ་གནས། བླང་བྱ་སོགས་རིགས་པའི་གཞུང་ལུགས་དང་ལག་ལེན་གྱི་གནད་དོན་ལ་འགྲེལ་བཤད་གསལ་པོ་བྱས་ཡོད་ཅིང་། དེར་རིགས་པའི་གཞུང་ལུགས་ཀྱི་དོན་སྙིང་དང་མངོན་སུམ་གྱི་དམིགས་གཏད་རང་བཞིན་གཏིང་ཟབ་ལྡན་ཡོད།

རྩོམ་ཡིག་གལ་ཆེན་དེའི་ནང་དུ། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་གོམ་གང་མདུན་སྤོས་ཀྱིས་“ཀྲུང་ཧྭ་མི་རིགས་ཐུན་མོང་གི་བསམ་པའི་ཁྱིམ་གཞིས་སྐྲུན་པའི་”ཕྱོགས་ལ་བླང་བྱ་4བཏོན་གནང་ཡོད་དེ། གཅིག་ནི་མི་རིགས་ཁག་གི་མང་ཚོགས་ལ་ཁ་ཕྱོགས་ནས་ཏང་གི་རིགས་པའི་གཞུང་ལུགས་དང་ལམ་ཕྱོགས་བྱེད་ཕྱོགས་སྲིད་ཇུས་བཅས་སྐོར་གྱི་སློབ་གསོར་ཤུགས་སྣོན་དང་། ཏང་གི་ལོ་རྒྱུས་དང་། ཀྲུང་གོ་གསར་པའི་ལོ་རྒྱུས། བསྒྱུར་བཅོས་སྒོ་འབྱེད་ཀྱི་ལོ་རྒྱུས། སྤྱི་ཚོགས་རིང་ལུགས་འཕེལ་རྒྱས་ཀྱི་ལོ་རྒྱུས། ཀྲུང་ཧྭ་མི་རིགས་འཕེལ་རྒྱས་ཀྱི་ལོ་རྒྱུས་བཅས་སྐོར་གྱི་དྲིལ་བསྒྲགས་དང་སློབ་གསོར་ཤུགས་སྣོན། ཐུན་མོང་གི་ཕུགས་བསམ་དང་དད་སེམས་སྤྱད་དེ་བློ་སྒྲིམ་སེམས་སྐྱེད། སྤྱི་ཚོགས་རིང་ལུགས་ཀྱི་ལྟེ་བའི་རིན་ཐང་ལྟ་བ་གསོ་སྐྱོང་དང་ལག་བསྟར་གཏིང་ཟབ་བཅས་བྱེད་དགོས། གཉིས་ནི་གཞི་རྒྱུ་དམར་པོ་རྒྱུན་འཛིན་གྱི་ལས་གྲྭ་ལག་བསྟར་གཏིང་ཟབ་དང་། རྒྱལ་གཅེས་རིང་ལུགས་སྲོག་ཤིང་དུ་གྱུར་པའི་མི་རིགས་ཀྱི་སྙིང་སྟོབས་དང་བསྒྱུར་བཅོས་གསར་གཏོད་སྲོག་ཤིང་དུ་གྱུར་པའི་དུས་རབས་ཀྱི་སྙིང་སྟོབས་དར་སྤེལ་ཤུགས་ཆེན་བྱས་ཏེ། ཀྲུང་ཧྭ་མི་རིགས་ལ་ངོས་འཛིན་གཅིག་མཐུན་བྱེད་སེམས་དང་སྤོབས་སེམས་མུ་མཐུད་ནས་ཆེ་རུ་གཏོང་དགོས་པ་དང་། མི་རིགས་ཁག་གི་མི་དམངས་ཀྱིས་འཐབ་ལམ་གསར་པའི་སྟེང་འབད་བརྩོན་དང་དུས་རབས་གསར་པར་བྱས་རྗེས་འཇོག་པའི་སྙིང་སྟོབས་ཆེ་རུ་སྐྱེད་དགོས། གསུམ་ནི་ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་འཛིན་སྐྱོང་སྤེལ་གསུམ་སྐོར་གྱི་ལས་གྲྭ་ལག་བསྟར་བྱས་ཏེ། ཀྲུང་ཧྭའི་སྲོལ་རྒྱུན་རིག་གནས་ཀྱི་གཞི་རྒྱུ་ཕུལ་བྱུང་དང་དུས་རབས་ཀྱི་རིན་ཐང་ལ་ཞིབ་འཇུག་དང་དེ་སྔོག་འདོན་དང་། ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་གསར་སྐྲུན་རང་བཞིན་གྱི་སྤོ་སྒྱུར་དང་གསར་གཏོད་རང་བཞིན་གྱི་གོང་སྤེལ་ལ་སྐུལ་འདེད། སྤྱི་ཚོགས་རིང་ལུགས་ཀྱི་སྔོན་ཐོན་རིག་གནས་དར་རྒྱས་གོང་སྤེལ། ཀྲུང་ཧྭའི་རིག་གནས་ཀྱི་ཁྱད་ཆོས་དང་། ཀྲུང་ཧྭ་མི་རིགས་ཀྱི་སྙིང་སྟོབས། ཀྲུང་གོའི་རྒྱལ་ཁབ་ཀྱི་སྣང་བརྙན་བཅས་ཀྱི་མཚོན་བྱེད་མ་ལག་འཛུགས་སྐྲུན་དང་བཀོལ་སྤྱོད་བཅས་བྱས་ནས་མི་རིགས་ཁག་གི་མི་དམངས་ཀྱིས་ཀྲུང་ཧྭའི་རིག་གནས་ལ་ངོས་འཛིན་གཅིག་མཐུན་བྱེད་སེམས་མུ་མཐུད་ནས་ཆེ་རུ་སྐྱེད་དགོས། བཞི་ནི་རྒྱལ་ཁབ་ཀྱི་སྤྱི་སྤྱོད་སྐད་ཡིག་ཕྱོགས་ཡོངས་ནས་ཁྱབ་གདལ་དང་། རྒྱལ་ཁབ་ཀྱི་གཅིག་གྱུར་རྩོམ་སྒྲིག་སློབ་དེབ་ཕྱོགས་ཡོངས་ནས་བཀོལ་སྤྱོད་བྱས་ཏེ། སྐད་ཡིག་གཅིག་མཐུན་དུ་གྱུར་པའི་ཐོག་ནས་སེམས་པ་གཅིག་མཐུན་དང་ལས་དབང་གཅིག་མཐུན་ཡོང་བ་བྱེད་དགོས།

མི་རིགས་ཁག་བར་འགྲོ་འོང་དང་སྤེལ་རེས་དང་མཉམ་འདྲེས་བཅས་རྒྱ་ཁྱབ་ཏུ་ཡོང་བར་བྱེད་དགོས།

  “ལོ་རྒྱུས་ཀྱི་གླེགས་བམ་རིང་མོར་བལྟས་པ་ན། རྒྱལ་པོ་ཀྲའོ་ཝུའུ་ལིང་གིས་ཧུའུ་ཆས་གྱོན་པ་དང་རྟ་རྒྱུག་མདའ་འཕེན་བསླབས་པ་ནས་ཝེ་བྱང་མའི་གོང་མ་ཞའོ་ཝུན་ཏིས་རྒྱ་ལུགས་ཅན་དུ་བསྒྱུར་བའི་གསར་བརྗེ་དང་། ‘ལུའོ་དབྱང་ཁྱིམ་ཚང་ཀུན་གྱིས་ཧུའུ་ཡི་རོལ་མོ་སྦྱོང་བ་’ནས་‘ཆའང་མི་ཚང་མས་རྒྱའི་གླུ་གཞས་གཏོང་བ།’ མཐའ་མཚམས་མི་རིགས་ཀྱིས་‘སྟོད་ལྭ་བ་དང་འོག་སྨད་ཤམ་’མམ་‘རྒྱའི་སྙན་ངག་དང་རྒྱའི་གྱོན་ཆས་’ལ་གོམས་པ་ནས། ཀྲུང་ཡོན་ས་ཁུལ་དུ་‘སྟོད་ལྭ་བ་དང་སྨད་དོར་མ་’འམ་ཧུའུ་ཡི་ལྭ་བ་དང་ཞྭ་མོ་དར་བ་དང་། དེ་བཞིན་དེང་སང་གང་སར་མཐོང་བའི་སེང་གེའི་རྩེད་མོ་དང་། ཧུའུ་ཆིན་རོལ་ཆས། མཚལ་ཕྱུ་མ་སོགས་ཀྱིས་མི་རིགས་ཁག་གི་རིག་གནས་ཕན་ཚུན་སྦྱོང་རེས་དང་མཉམ་འདྲེས་བྱེད་པ་མངོན་ཡོད།”

2019ལོའི་ཟླ་9ཚེས་27ཉིན། སྤྱི་ཁྱབ་ཧྲུའུ་ཅི་ཞི་ཅིན་ཕིང་རྒྱལ་ཡོངས་མི་རིགས་མཐུན་སྒྲིལ་ཡར་ཐོན་གྱི་གཟེངས་བསྟོད་ཚོགས་ཆེན་དུ་ཞུགས་པ་མ་ཟད་གསུང་བཤད་གལ་ཆེན་གནང་། ཀྲུང་ཧྭ་མི་རིགས་འགྲོ་འོང་དང་སྤེལ་རེས་དང་མཉམ་འདྲེས་བཅས་བྱེད་པའི་དཔེ་གཞི་གསོན་པོ་དེ་ཁྱིམ་གྱི་གཅེས་ནོར་བཞིན་ལྷུག་པོར་བརྗོད་ཅིང་། “ཀྲུང་གོའི་ལོ་རྒྱུས་ནི་མི་རིགས་ཁག་མཉམ་འདྲེས་བྱས་ནས་སྣེ་མང་གཞི་གཅིག་གི་ཀྲུང་ཧྭ་མི་རིགས་སུ་གྱུར་པའི་ལོ་རྒྱུས་ཡིན་པ་དང་། མི་རིགས་ཁག་གིས་ཐུན་མོང་ཐོག་གཅིག་གྱུར་གྱི་རླབས་ཆེན་མེས་རྒྱལ་གསར་སྐྲུན་དང་། གོང་འཕེལ། སྲ་བརྟན་བཅས་གཏོང་བའི་ལོ་རྒྱུས་ཡིན་”ཞེས་འགྲེལ་བཤད་ཟབ་མོ་གནང་།

འགྲོ་འོང་དང་སྤེལ་རེས་དང་མཉམ་འདྲེས་བཅས་ནི། མི་རིགས་མཐུན་སྒྲིལ་སྐུལ་སྤེལ་དང་། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོར་སྐྱེད་པ། ཀྲུང་ཧྭ་མི་རིགས་གཅིག་མཐུན་ཚོགས་པ་འཛུགས་པར་སྐུལ་འདེད་བཅས་བྱེད་པའི་ལྡོག་མེད་ཀྱི་འགྲོ་ལམ་ཡིན། ཀྲུང་ཧྭ་མི་རིགས་འཚོ་གནས་དང་འཕེལ་རྒྱས་བྱུང་བའི་ལོ་རྒྱུས་ཀྱི་ཆུ་རྒྱུན་རིང་མོའི་ནང་དུ། ཀྲུང་ཧྭའི་ས་གཞི་ཆེན་མོའི་སྟེང་དུ་མི་རིགས་ཁག་བར་འགྲོ་འོང་དང་སྤེལ་རེས་དང་མཉམ་འདྲེས་བཅས་བྱུང་བས། དུས་ནམ་ཡང་བདེ་སྡུག་མཉམ་མྱོང་བྱེད་པའི་ལས་དབང་གཅིག་མཐུན་ཚོགས་པ་ཆགས་ཡོད། ལོ་ངོ་1300ལྷག་རིང་གི་ལོ་རྒྱུས་ལྡན་པའི་བོད་ལྗོངས་བར་སྐོར་གྱི་ཉེ་འཁོར་དུ་མི་རིགས་མང་བའི་མང་ཚོགས་མཉམ་དུ་སྡོད་པའི་མི་རིགས་མཐུན་སྒྲིལ་གྱི་སྒོ་ར་100ལྷག་ཡོད་པ་དང་། གྲོང་མི་ཚོས་“མི་རིགས་ཕན་ཚུན་བྱམས་ཤིང་མཛའ་བ་ཇ་ལ་ཚྭ་འདེབས་བཞིན་འབྲལ་དུ་མེད་”ཅེས་དུས་རྒྱུན་གླེང་མོལ་བྱེད་ཀྱི་ཡོད། ཞིན་ཅང་ཝུའུ་རུམ་མུ་ཆི་ཐེན་ཧྲན་ཀུའུ་ཡོན་ཞང་སྡེ་ཁུལ་དུ་རྒྱ་རིགས་དང་། ཡུ་གུར་རིགས། ཧ་སག་རིགས། ཧུའེ་རིགས། ཐ་ཐར་རིགས་སོགས་མི་རིགས་མི་འདྲ་བའི་གྲོང་མི་ཚོས་དགའ་འཛོམས་སྐྱིད་འཛོམས་ཀྱིས་གླེང་མོལ་བྱེད་ཅིང་གླུ་དང་གར་ལ་རོལ་བཞིན་འཚོ་བ་“ཧ་ཅང་ཡག་པོ་འདུག་”ཅེས་པ་སོགས་སོ། །

ཀྲུང་ཧྭ་མི་རིགས་ནི་མི་རིགས་ཁག་བར་འགྲོ་འོང་དང་སྤེལ་རེས་དང་མཉམ་འདྲེས་བཅས་བྱས་པ་ལས་བྱུང་བ་ཡིན་ལ། ཀྲུང་ཧྭ་མི་རིགས་བསྐྱར་དར་རླབས་པོ་ཆེ་ཡོང་བ་དེའང་མི་རིགས་ཁག་བར་འགྲོ་འོང་དང་སྤེལ་རེས་དང་མཉམ་འདྲེས་བཅས་བྱེད་པ་ལས་མངོན་འགྱུར་འབྱུང་ངེས་ཡིན། རྩོམ་ཡིག་གལ་ཆེན་དེའི་ནང་དུ། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཟབ་མོར་བསྟན་གནང་དོན། “ཀྲུང་ཧྭ་མི་རིགས་ཀྱི་མཐུན་སྒྲིལ་ཆེན་མོ་ནི་ཀྲུང་གོའི་ལུགས་ཀྱི་དེང་རབས་ཅན་ལ་བརྟེན་ནས་ཀྲུང་ཧྭ་མི་རིགས་བསྐྱར་དར་རླབས་པོ་ཆེ་ཡོང་བར་ཕྱོགས་ཡོངས་ནས་སྐུལ་འདེད་གཏོང་བའི་སྔོན་འགྲོའི་ཆ་རྐྱེན་དང་རྨང་གཞི་ཡིན་པ་དང་། རྒྱལ་ཁབ་སྟོབས་ལྡན་འཛུགས་སྐྲུན་དང་མི་རིགས་བསྐྱར་དར་གྱི་འཕེལ་རིམ་ནི་མི་རིགས་ཁག་བར་འགྲོ་འོང་དང་སྤེལ་རེས་དང་མཉམ་འདྲེས་བཅས་རྒྱ་ཁྱབ་ཏུ་ཡོང་བར་བྱེད་པའི་གོ་རིམ་ཞིག་ཡིན་ངེས་པ་དང་། མི་རིགས་ཁག་གིས་ཐུན་མོང་ཐོག་མཐུན་སྒྲིལ་འབད་འཐབ་དང་ཐུན་མོང་ཐོག་དར་རྒྱས་གོང་འཕེལ་ཡོང་བར་བྱེད་པའི་གོ་རིམ་ཞིག་ཡིན་ངེས་རེད།” སྡོམ་ཚིག་གལ་ཆེན་འདིས་ལོ་རྒྱུས་ཀྱི་ཆོས་ཉིད་དང་བརྗིད་ཉམས་ལྡན་པའི་དམིགས་འབེན་ལ་ཤེས་རྟོགས་ཟབ་མོ་བྱས་ཏེ། ཀྲུང་ཧྭ་མི་རིགས་བསྐྱར་དར་རླབས་པོ་ཆེ་ཡོང་བ་དེ་མི་རིགས་ཁག་བར་འགྲོ་འོང་དང་སྤེལ་རེས་དང་མཉམ་འདྲེས་བཅས་བྱེད་པ་ལས་མངོན་དུ་འགྱུར་ངེས་པའི་འོད་སྟོང་ལྡན་པའི་མདུན་ལྗོངས་ཚན་རིག་དང་མཐུན་པར་གསལ་བཤད་གནང་ཡོད།

ཀྲུང་གོའི་ལུགས་ཀྱི་དེང་རབས་ཅན་ལ་བརྟེན་ནས་རྒྱལ་ཁབ་སྟོབས་ལྡན་འཛུགས་སྐྲུན་དང་མི་རིགས་བསྐྱར་དར་རླབས་པོ་ཆེ་ཡོང་བར་ཕྱོགས་ཡོངས་ནས་སྐུལ་འདེད་གཏོང་རྒྱུ་དེ་དུས་རབས་གསར་པ་དང་འཐབ་ལམ་གསར་པའི་ཏང་དང་རྒྱལ་ཁབ་ཀྱི་ལྟེ་བའི་ལས་འགན་ཡིན་ལ། དུས་རབས་གསར་པའི་ཆབ་སྲིད་ཆེ་ཤོས་ཀྱང་ཡིན། རྩོམ་ཡིག་གལ་ཆེན་དེའི་ནང་དུ། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་“ངེས་པར་དུ་ཀྲུང་ཧྭ་མི་རིགས་ཀྱི་མཐུན་སྒྲིལ་ཆེན་མོའི་དར་ཆ་མཐོན་པོར་བསྒྲེངས་ཏེ། མི་རིགས་ཁག་གིས་ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་འཛུགས་སྐྲུན་བྱེད་ཆེད་ཐུན་མོང་ཐོག་འབད་འཐབ་བྱེད་པར་སྐུལ་འདེད་གཏོང་རྒྱུ་དེ་འཐབ་ལམ་གསར་པའི་ཏང་གི་མི་རིགས་ལས་དོན་གྱི་འགན་འཁྲི་གལ་ཆེན་དུ་བརྩི་དགོས་”ཞེས་ནན་གསུང་གནང་བ་མ་ཟད། བཀོད་སྒྲིག་གལ་ཆེན་ཡང་གནང་ཡོད་དེ། གཅིག་ནི་མི་རིགས་ཁག་གི་མི་འབོར་འགྲོ་རྒྱུག་དང་འདྲེས་སྡོད་བྱེད་པར་སྐུལ་འདེད་དང་། ཕན་ཚུན་བསྒར་འཇུག་རྣམ་པའི་སྤྱི་ཚོགས་ཀྱི་གྲུབ་ཚུལ་དང་སྡེ་ཁུལ་གྱི་ཁོར་ཡུག་སྐྲུན་པ། མི་རིགས་ཁག་གི་མང་ཚོགས་ཀྱིས་མཉམ་སྡོད་མཉམ་སྦྱོང་དང་། མཉམ་སྐྲུན་མཉམ་སྤྱོད། མཉམ་སྒྲུབ་མཉམ་སྤྲོ་བཅས་བྱེད་པའི་སྤྱི་ཚོགས་ཀྱི་ཆ་རྐྱེན་སྐྲུན་པ་བཅས་བྱས་ཏེ། མི་རིགས་མཐུན་སྒྲིལ་ཡར་ཐོན་གསར་འཛུགས་ལས་ཀ་མུ་མཐུད་ནས་གཏིང་ཟབ་ཏུ་སྤེལ་དགོས། གཉིས་ནི་དམངས་འཚོ་ལེགས་བཅོས་དང་མི་སེམས་གཅིག་སྒྲིལ་བྱ་རྒྱུ་དེ་མི་རིགས་ས་ཁུལ་གྱི་དཔལ་འབྱོར་དང་སྤྱི་ཚོགས་འཕེལ་རྒྱས་གཏོང་བའི་ཀུན་སློང་དང་དམིགས་ཡུལ་བྱས་ཐོག །མི་རིགས་ས་ཁུལ་འཕེལ་རྒྱས་ཀྱི་བཀོད་པ་གསར་པའི་ནང་འདྲེས་པ་དང་སྤུས་ཚད་མཐོ་བའི་འཕེལ་རྒྱས་མངོན་འགྱུར་ཡོང་བར་སྐུལ་འདེད་དང་། སྤྱི་པའི་ཞབས་ཞུ་འགན་སྲུང་གི་ནུས་པ་དང་ཆུ་ཚད་མུ་མཐུད་ནས་མཐོར་འདེགས། འཕེལ་རྒྱས་ཀྱི་གྲུབ་འབྲས་དེ་དྲང་སྙོམས་ངང་མི་རིགས་ཁག་གི་མང་ཚོགས་ལ་ཕན་པའི་གསོས་སུ་སྒྲུབ་པར་སྐུལ་འདེད་བཅས་བྱེད་དགོས། གསུམ་ནི་མི་རིགས་ས་ཁོངས་རང་སྐྱོང་ལམ་ལུགས་རྒྱུན་འཁྱོངས་དང་འཐུས་ཚང་དུ་གཏོང་བ་དང་། མི་རིགས་སྲིད་ཇུས་དང་བཅའ་ཁྲིམས་ཁྲིམས་སྲོལ་མ་ལག་འཐུས་ཚང་དུ་བཏང་སྟེ། མི་རིགས་ལས་དོན་བཅོས་སྐྱོང་མ་ལག་དང་བཅོས་སྐྱོང་ནུས་པ་དེང་རབས་ཅན་དུ་འགྱུར་བར་སྐུལ་འདེད་གཏོང་དགོས།

ཀྲུང་ཧྭ་མི་རིགས་ཀྱི་གཏམ་རྒྱུད་ཡག་པོ་ཤོད་དགོས།

    2021ལོའི་ཟླ་3ཚེས་5ཉིན་གྱི་ཕྱི་དྲོར། སྤྱི་ཁྱབ་ཧྲུའུ་ཅི་ཞི་ཅིན་ཕིང་རྒྱལ་ཡོངས་མི་དམངས་འཐུས་ཚོགས་ཀྱི་གྲོས་ཚོགས་ཐེངས་བཞི་པའི་ཐོག་ནང་སོག་འཐུས་མི་ཚོགས་པའི་གྲོས་ཞིབ་ལ་ཞུགས་སྐབས་སུ་“སེམས་ཤུགས་གཅིག་སྒྲིལ་གྱིས་པའོ་ཐོའུ་ངར་ལྕགས་སྐྲུན་པ་”ཞེས་པ་དང་། “དྭ་ཕྲུག་སུམ་སྟོང་ནང་སོག་ལ་སྐྱོད་པ་”ཞེས་པའི་མི་སེམས་འགུག་པའི་གཏམ་རྒྱུད་ཁག་གཉིས་གླེང་གནང་བ་རེད། ངོ་མཚར་གཏམ་རྒྱུད་ཁག་གཉིས་པོ་དེས་བརྩེ་སེམས་ཟབ་ཅིང་གསོན་ཉམས་ལྡན་པའི་སྒོ་ནས་ཀྲུང་ཧྭ་མི་རིགས་ཁྱིམ་ཚང་ཆེན་མོའི་ནང་མི་རིགས་ཁག་བར་འགྲོ་རོགས་ལྟ་རོགས་དང་ཕྱར་བ་གྲུ་འདེགས་བྱེད་པའི་ནང་མི་སྤུན་ཟླ་ལྟ་བུའི་འབྲེལ་བ་ཡིན་པ་འགྲེལ་བཤད་བྱས་ཡོད།

གཏམ་རྒྱུད་འདི་གཉིས་ཙམ་དུ་མ་ཟད། ད་དུང་“ལེ་བར་སྟོང་ཕྲག་ཆོད་དེ་རྒྱལ་ཁབ་སྲུང་བ་”ཞེས་དང་། “ཧུའུ་ལུགས་ཁ་ཤས་རྒྱ་དང་དབྱེར་མེད་འདྲེས།” “ཞི་པོ་རིགས་ཀྱིས་ལེ་བར་ཁྲི་ཡི་མཐའ་མཚམས་སྲུང་བ།” “ཀྲའོ་ཅུན་མཐའ་མཚམས་ལ་བསྐྱོད་པས་ངོ་མཚར་བསྐྲུན།” “ལིང་ཇུའི་མཇལ་འཛོམས་ཀྱིས་གཅིག་གྱུར་སྐུལ་སྤེལ་གཏོང་བ།” “དབྱི་ཧའེ་མནའ་འབྲེལ་གྱིས་ལིའང་ཧྲན་ལ་དྲོད་སྐྱིད་སྟེར་བ།” “‘ཕོ་ཁེབས་ཕྱེད་ཀས་’དམངས་སེམས་བཀུག་པ།” “སྦྱོང་རེས་དང་མཉམ་འདྲེས་ལས་མིག་དཔེ་བཟང་པོ་བསྟན་པ་”ལ་སོགས་པ་ཡོད། ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཐེངས་མང་པོར་མི་སེམས་འགུག་པའི་མི་རིགས་མཐུན་སྒྲིལ་ཡར་ཐོན་གྱི་གཏམ་རྒྱུད་འཆད་གནང་སྟེ། གསོན་ཉམས་ལྡན་པའི་ངང་ནས་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོར་སྐྱེད་དགོས་པའི་གནས་ལུགས་ཟབ་མོ་གསལ་པོར་བསྟན་གནང་ཡོད།

“མི་རིགས་ལས་དོན་ནི་མི་སེམས་གཅིག་སྒྲིལ་དང་སྟོབས་ཤུགས་གཅིག་སྡུད་བྱེད་པའི་ལས་ཀ་ཡིན་ལ། མི་རིགས་དང་འབྲེལ་བའི་དྲིལ་བསྒྲགས་ཡག་པོ་བྱེད་ཐུབ་མིན་དེ་མི་སེམས་གཏད་ཕྱོགས་དང་ཏང་དང་རྒྱལ་ཁབ་ཀྱི་སྣང་བརྙན་དང་འབྲེལ་བ་ཡོད།” རྩོམ་ཡིག་གལ་ཆེན་དེའི་ནང་དུ། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མི་རིགས་དང་འབྲེལ་བའི་དྲིལ་བསྒྲགས་ལས་དོན་གྱི་གལ་ཆེན་རང་བཞིན་ལ་རྒྱས་བཤད་ཟབ་མོ་གནང་ཡོད་པ་དང་། ལས་དོན་འདི་ཡག་པོ་སྒྲུབ་པའི་ཕྱོགས་ལ་བླང་བྱ་གསལ་པོ་བཏོན་གནང་ཡོད།

——ངེས་པར་དུ་“གདེང་ཚོད་བཞི་”བརྟན་དུ་གཏོང་དགོས་པ་དང་། “དྲིལ་བསྒྲགས་ཤུགས་ཆེན་བཞི་”བྱེད་དགོས་པ་སྟེ། ཀྲུང་ཧྭ་མི་རིགས་ཀྱི་ལོ་རྒྱུས་དྲིལ་བསྒྲགས་ཤུགས་ཆེན་དང་། ཀྲུང་ཧྭ་མི་རིགས་གཅིག་མཐུན་ཚོགས་པའི་རིགས་པའི་གཞུང་ལུགས་དྲིལ་བསྒྲགས་ཤུགས་ཆེན། དུས་རབས་གསར་པའི་ཏང་གི་མི་རིགས་ལས་དོན་ལ་ཐོབ་པའི་ལོ་རྒྱུས་རང་བཞིན་གྱི་གྲུབ་འབྲས་དྲིལ་བསྒྲགས་ཤུགས་ཆེན། ཀྲུང་ཧྭ་མི་རིགས་ཀྱིས་འཛམ་གླིང་རྒྱལ་ཁབ་ཁག་གི་མི་དམངས་དང་མཉམ་དུ་ལག་གདང་སྦྲེལ་ནས་མིའི་རིགས་ཀྱི་ལས་དབང་གཅིག་མཐུན་ཚོགས་པ་སྐྲུན་པའི་མདུན་ལྗོངས་བཟང་པོ་དྲིལ་བསྒྲགས་ཤུགས་ཆེན་བཅས་བྱེད་ཐུབ་དགོས།

——དྲིལ་བསྒྲགས་བྱེད་སྟངས་གསར་གཏོད་བྱས་ཏེ། ཀྲུང་ཧྭ་མི་རིགས་གཅིག་མཐུན་ཚོགས་པའི་གཏམ་རྒྱུད་ཡག་པོ་ཤོད་པ་དང་། “གསལ་པོར་ཤོད་པ་གསུམ་”སྟེ། ཀྲུང་གོའི་གུང་ཁྲན་ཏང་གི་འགོ་ཁྲིད་དང་སྤྱི་ཚོགས་རིང་ལུགས་ཀྱི་ལམ་ལུགས་ནི་རང་རྒྱལ་མི་རིགས་ཁག་ཐུན་མོང་ཐོག་ཡར་རྒྱས་གོང་འཕེལ་ཡོང་བའི་བློས་འཁེལ་བའི་འགན་སྲུང་ཡིན་པ་གསལ་པོར་ཤོད་པ་དང་། ཀྲུང་ཧྭ་མི་རིགས་ནི་ངོས་འཛིན་གཅིག་མཐུན་དང་གོང་བུར་འགྲིལ་ཤུགས་ཆེན་པོ་ཡོད་པའི་ལས་དབང་གཅིག་མཐུན་ཚོགས་པ་ཡིན་པ་གསལ་པོར་ཤོད་པ། ཀྲུང་གོའི་ཁྱད་ཆོས་ལྡན་པའི་མི་རིགས་ཀྱི་གནད་དོན་ཐག་གཅོད་བྱེད་པའི་འགྲོ་ལམ་ཡང་དག་པར་མངའ་བའི་དགེ་མཚན་མངོན་གསལ་དོད་པོ་གསལ་པོར་ཤོད་པ་བཅས་བྱེད་ཐུབ་དགོས།

——“ནང་དུ་འདྲེན་པ་”དང་“ཕྱི་རུ་སྐྱོད་པ་”ཟུང་འབྲེལ་བྱ་རྒྱུ་རྒྱུན་འཁྱོངས་བྱས་ཏེ། ཀྲུང་ཕྱིའི་རིག་གཞུང་ལས་རིགས་དང་དམངས་ཁྲོད་ཀྱི་ཚོགས་པས་སྤེལ་རེས་དང་སྐུལ་རེས་བྱེད་པར་སྐུལ་འདེད་ཧུར་ཐག་བྱེད་དགོས།

མི་རིགས་ལས་དོན་ནི་ཕྱོགས་གང་ཅིར་འབྲེལ་ཡོད་པ་དང་། ཕྱོགས་གང་ཅིར་མི་རིགས་ལས་དོན་ཡོད། ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གིས་ཏང་གིས་མི་རིགས་ལས་དོན་ལ་ཕྱོགས་ཡོངས་ནས་འགོ་ཁྲིད་བྱ་རྒྱུར་རྒྱུན་ཆད་མེད་པར་ཤུགས་བརྒྱབ་པ་དང་དང་འཐུས་ཚང་དུ་བཏང་སྟེ། ཏང་ཨུས་གཅིག་གྱུར་གྱིས་འགོ་ཁྲིད་དང་། སྲིད་གཞུང་གིས་ཁྲིམས་ལྟར་དོ་དམ། འཐབ་ཕྱོགས་གཅིག་གྱུར་སྡེ་ཁག་གིས་སྣེ་ཁྲིད་དང་མཐུན་སྦྱོར། མི་རིགས་ལས་དོན་སྡེ་ཁག་གི་རང་འགན་ལྷུར་ལེན། སྡེ་ཁག་སོ་སོས་ཤུགས་བསྒྲིལ་མཉམ་ལས། སྤྱི་ཚོགས་ཡོངས་མཉམ་དུ་ཞུགས་པ་བཅས་ཀྱི་དུས་རབས་གསར་པའི་ཏང་གི་མི་རིགས་ལས་དོན་གྱི་བཀོད་པ་ཆགས་ཡོད། “ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོར་སྐྱེད་པ་དང་། དུས་རབས་གསར་པའི་ཏང་གི་མི་རིགས་ལས་དོན་སྤུས་ཚད་མཐོ་བའི་འཕེལ་རྒྱས་ཡོང་བར་སྐུལ་འདེད་གཏོང་རྒྱུ་དེ་ཏང་ཡོངས་དང་རྒྱལ་ཡོངས་མི་རིགས་ཁག་གི་མི་དམངས་ཀྱི་ཐུན་མོང་གི་འགན་འཁྲི་ཡིན།” རྩོམ་ཡིག་གལ་ཆེན་དེའི་ནང་དུ། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་གོམ་གང་མདུན་སྤོས་ཀྱིས་བླང་བྱ་བཏོན་གནང་ཡོད་དེ། རིམ་པ་ཁག་གི་ཏང་ཨུ་དང་སྲིད་གཞུང་གིས་“ཀྲུང་གོའི་ཁྱད་ཆོས་ལྡན་པའི་མི་རིགས་གནད་དོན་ཐག་གཅོད་བྱེད་པའི་འགྲོ་ལམ་ཡང་དག་པ་རྒྱུན་འཁྱོངས་དང་། ཏང་གི་མི་རིགས་ལས་དོན་གྱི་བྱེད་ཕྱོགས་དང་སྲིད་ཇུས་ཁག་ནན་ཏན་གྱིས་ལག་བསྟར་བྱས་ཏེ། རང་ས་ཁུལ་དང་རང་སྡེ་ཚན་གྱི་མི་རིགས་ལས་དོན་དང་འབྲེལ་བའི་གནད་དོན་གལ་ཆེན་དུས་ཐོག་ཏུ་ཞིབ་འཇུག་བྱས་ནས་ཐག་གཅོད་བྱེད་དགོས།” རིམ་པ་ཁག་གི་འགོ་ཁྲིད་ལས་བྱེད་པས་“ཏང་གི་མི་རིགས་ལས་དོན་ལ་ཤུགས་སྣོན་དང་ལེགས་སྒྱུར་བྱ་རྒྱུའི་སྐོར་གྱི་དགོངས་པ་གལ་ཆེན་སློབ་སྦྱོང་དང་ལག་བསྟར་གཏིང་ཟབ་བྱེད་དགོས་པ་དང་། མི་རིགས་ལས་དོན་ཡག་པོ་སྒྲུབ་པའི་འཇོན་ཐང་ཆེ་རུ་བཏང་ནས། མི་རིགས་མཐུན་སྒྲིལ་ཡར་ཐོན་བྱ་གཞག་ལ་སྐུལ་འདེད་གཏོང་ཆེད་བྱས་རྗེས་གང་ནུས་འཇོག་དགོས།”

“ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་སྟོབས་ལྡན་བསྐྲུན་ཚར་བར་བྱེད་པར་མི་རིགས་གཅིག་ཀྱང་ཆད་མི་རུང་།” རང་རྒྱལ་གྱི་མི་རིགས་མཐུན་སྒྲིལ་ཡར་ཐོན་བྱ་གཞག་ལ་ལོ་རྒྱུས་རང་བཞིན་གྱི་གྲུབ་འབྲས་ཐོབ་ཐུབ་པའི་རྩ་བ་ནི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཏང་ཀྲུང་དབྱང་དང་ཏང་ཡོངས་ཀྱི་སྲོག་ཤིང་གནང་སྟེ་ཕྱོགས་སྟོན་ལམ་ཁྲིད་མཛད་པར་ཐུག་ཡོད་པ་དང་། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པས་ཚན་རིག་དང་མཐུན་པར་མཛུབ་ཁྲིད་བྱེད་པར་ཐུག་ཡོད། འཐབ་ལམ་གསར་པའི་སྟེང་དུ། “གཏན་འཁེལ་གཉིས་”ཀྱི་ཐག་གཅོད་རང་བཞིན་གྱི་དོན་སྙིང་ལ་གོ་བ་ཟབ་མོ་ལེན་པ་དང་། “འདུ་ཤེས་བཞི་”ཆེ་རུ་སྐྱེད་པ་དང་། “གདེང་ཚོད་བཞི་”བརྟན་དུ་གཏོང་བ། “སྲུང་སྐྱོང་གཉིས་”བྱེད་ཐུབ་པ། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མི་རིགས་ལས་དོན་ལ་ཤུགས་སྣོན་དང་ལེགས་སྒྱུར་བྱ་རྒྱུའི་སྐོར་གྱི་དགོངས་པ་གལ་ཆེན་ལ་སློབ་སྦྱོང་དང་ལག་བསྟར་གཏིང་ཟབ། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོར་སྐྱེད་པ་དེ་གཙོ་ཐིག་ཏུ་འཛིན་པ་བཅས་བྱས་ཏེ། དུས་རབས་གསར་པའི་ཏང་གི་མི་རིགས་ལས་དོན་སྤུས་ཚད་མཐོ་བའི་འཕེལ་རྒྱས་ཡོང་བར་སྐུལ་འདེད་གཏོང་བ་དང་། རྒྱལ་ཁབ་སྟོབས་ལྡན་འཛུགས་སྐྲུན་དང་མི་རིགས་བསྐྱར་དར་ཡོང་བའི་དོན་དུ་ལེགས་སྐྱེས་འབུལ་དགོས།

བསོད་ནམས་མཚོས་བསྒྱུར།