ཉེ་བའི་ལོ་ཤས་རིང་། དཀར་མཛེས་ཁུལ་དང་རྫོང་གི་ཏང་ཨུ་དང་སྲིད་གཞུང་གིས་རྩ་ཆེའི་ཚད་ལྡན་ཡིག་ཆའི་ཤུལ་བཞག་སྲུང་སྐྱོང་བེད་སྤྱོད་དང་རྒྱུན་འཛིན་བྱ་རྒྱུར་ཚད་མཐོའི་མཐོང་ཆེན་བྱས་པ་དང་། སྡེ་དགེ་རྫོང་གིས་དེ་བས་ཕྱི་ནང་གཉིས་ཀར་ཉམས་གསོ་བྱས་ཏེ། དུས་བཀག་ལྟར་པར་ཁང་གི་གཙོ་གཟུགས་ཨར་སྐྲུན་ལ་ཞིབ་བཤེར་དང་ཉམས་གསོ་བརྟན་གཏོང་དང་། ལོ་རེ་བཞིན་འཆར་གཞི་ལྟར་པར་ཁང་དུ་ཉར་ཚགས་བྱས་པའི་གནའ་བོའི་པར་རྙིང་སྲུང་སྐྱོང་ཉམས་གསོ་བྱས། དེ་མིན་པར་ཁང་གི་ལྡེབས་རིས་གྲངས་གཞི་ཅན་དུ་བསྒྱུར་བའི་འཛུགས་སྐྲུན་དང་གནའ་དཔེ་ཉར་ཚགས་དང་སྲུང་སྐྱོང་བྱས་པས། པར་ཁང་གི་པར་གཞི་གྲངས་གཞི་ཅན་དུ་འགྱུར་རྒྱུར་དུས་མཚམས་རང་བཞིན་གྱི་གྲུབ་འབྲས་ཐོབ་ཡོད།
རིག་གནས་རྒྱུན་འཛིན་ནི་མི་རབས་ནས་མི་རབས་བར་རྒྱུན་མི་ཆད།
དུས་ཡུན་རིང་པོའི་པར་འདེབས་བེད་སྤྱོད་བྱས་པ་བརྒྱུད། སྡེ་དགེའི་པར་ཁང་གི་པར་གཞི་ལའང་ཡིག་འབྲུ་ཁག་ཅིག་ཟད་ནས་རབ་རིབ་ཆགས་པ་དང་མཐའ་འཁོར་དུ་ཡང་བརྡར་ཟད་ཐེབས་ཡོད། ཉེ་བའི་ལོ་བཅུ་ཕྲག་ཁ་ཤས་རིང་སྡེ་དགེའི་པར་ཁང་གིས་བོད་ཡིག་པར་གཞི་བརྒྱུད་རིམ་ལྡན་པའི་ལེགས་སྒྲིག་དང་པར་ཤིང་དཀར་ཆག་རྩོམ་འབྲི་བྱས་པ་དང་། ཆག་གྲུམ་ཤོར་བའི་པར་གཞི་དང་རྩ་ཆེའི་ཚད་ལྡན་ཡིག་ཆའི་ལག་བྲིས་དེབ་ཉམས་གསོ་དང་བརྟན་དུ་བཏང་བ་སོགས་ལས་དོན་ད་ལྟའི་བར་གཉེར་བས། སྡེ་དགེ་པར་ཁང་གིས་པར་ཤིང་སྣ་ཚོགས་ཀྱི་ཕྱི་ཚུལ་དང་ནང་དོན་སྤྱིའི་ཆ་ནས་ཉར་ཚགས་ཡག་པོ་བྱས་ཡོད་པ་དང་རང་ངོས་ཀྱི་རིན་ཐང་འདོན་སྤེལ་བྱེད་བཞིན་ཡོད།
ངོ་སྤྲོད་བྱས་པ་ལྟར་ན། 《ཤེས་རབ་ཀྱི་ཕ་རོལ་དུ་ཕྱིན་པ་བརྒྱད་སྟོང་པ།》ཞེས་པར་བརྡར་ཟད་ཐེབས་པའི་སྣང་ཚུལ་བྱུང་བར་དམིགས་ནས། སྡེ་དགེའི་པར་ཁང་གིས་ཚད་བཀག་པར་འདེབས་དང་། ཁ་སྦྱར་པར་གཞི། བསྐྱར་བརྐོས་སོགས་སྲུང་སྐྱོང་བྱེད་ཐབས་སྤྱད་པ་རེད། 2015ལོ་དང་2017ལོར་སྔ་རྗེས་སུ《བཀའ་བསྟན་འགྱུར》 《ཤེས་རབ་ཀྱི་ཕ་རོལ་དུ་ཕྱིན་པ་བརྒྱད་སྟོང་པ།》 《རྙིང་མ་རྒྱུད་འབུམ》སོགས་པར་གཞིའི་བསྐྱར་བརྐོས་ལས་ཀ་སྤེལ་འགོ་ཚུགས་པ་རེད། བསྐྱར་བརྐོས་པར་འདེབས་བཀོལ་སྤྱོད་བྱེད་པར་བཀོལ་བ་དང་། གནའ་བོའི་པར་གཞི་བཀག་ཉར་བྱེད་པ། ལོ་ལྟར་ལག་རྩལ་རྩེར་སོན་གྱི་ལག་རྩལ་པ་དྲུག་ཅུ་བདུན་ཅུ་ཙམ་གྱིས《བཀའ་བསྟན་འགྱུར།》གྱི་པར་གཞི་གཅིག་སྡུད་ཐོག་གསར་བརྐོ་བྱེད་བཞིན་ཡོད། ཉེ་བའི་ལོ་བཅུའི་རིང་པར་གཞི་ཁྲི་3ལྷག་བསྐྱར་བརྐོས་བྱས་ཟིན་པ་དང་། ལས་གྲྭའི་ཚད་ཀྱི་70%ཡས་མས་ལེགས་གྲུབ་ཟིན་ཡོད།
པར་ཤིང་རྙིང་པ་འབུམ་2ལྷག་ཉིན་རེ་ནས་ཉིན་རེ་དང་། ལོ་རེ་ནས་ལོ་རེ་བཞིན་པར་ཤིང་འཁྲུ་བ་དང་ཉི་མར་སྐམ་པ། སྣུམ་བྱུག་པ་སོགས་ལས་དོན་སྲུང་སྐྱོང་བྱེད་བཞིན་ཡོད། ད་ལོ་ལོ་69ལ་སླེབས་པའི་སྡེ་དགེ་པར་ཁང་གི་བོད་རིགས་པར་འདེབས་ལག་རྩལ་གྱི་རྒྱལ་ཁབ་རིམ་པའི་མངོན་མིན་རིག་གནས་ཤུལ་བཞག་གི་མཚོན་བྱེད་རྒྱུན་འཛིན་པ་ཕུན་ཚོགས་ཚེ་རིང་གིས་པར་ཤིང་ཉམས་གསོའི་ལས་དོན་འགན་འཁུར་གྱི་ཡོད། ར་སྐོར་ཁ་ཤས་ཀྱི་བོད་ཡིག་པར་གཞི་ལ་དག་བཅོས་གང་ལེགས་མ་བྱས་པའི་རྐྱེན་གྱིས། ཁོས་པར་གཞི་ཉམས་གསོ་མ་བྱས་པའི་སྔོན་ལ་ད་དུང་དག་བཅོས་བྱེད་པའི་འགན་ཁུར་དགོས། པར་གཞི་ཆ་ཚང་ཞིག་ལ་རྒྱུན་དུ་ཐེངས་ལྔ་དྲུག་ལ་སློབ་སྦྱོང་བྱས་ན་ད་གཟོད་བརྒྱ་ཆའི་དགུ་བཅུ་གོ་དགུ་ཡན་གྱི་ཡང་དག་རང་བཞིན་ཡོད། གལ་ཏེ་དཔར་ངོས་ཀྱི་ཡི་གེ་ལ་ཆད་ལུས་དང་ནོར་འཁྲུལ་ཡོད་པ་ཤེས་ན་གྲི་ཡིས་གཟབ་ནན་བྱས་ནས་མར་བླངས་པ་དང་། ཡང་བསྐྱར་ཤིང་གིས་ཡང་དག་པའི་ཡིག་རྟགས་བརྐོས་ནས་འཛེར་བཞིན་ཡོད། ལས་དོན་འདི་ཕུན་ཚོགས་ཚེ་རིང་གིས་ལས་ནས་ལོ་ངོ་བཞི་བཅུ་ལྷག་འགོར་སོང་། དགེ་རྒན་གྱིས་དགེ་ཕྲུག་ཁྲིད་པའི་རྣམ་པའི“བརྒྱུད་རོགས་ཁྲིད་གསུམ”འོག་ད་ཆ་སྡེ་དགེ་པར་ཁང་དུ་པར་གཞི་བརྐོས་རྒྱག་དང་པར་འདེབས་བྱེད་མཁན་ལག་ཤེས་པ་བདུན་ཅུ་བརྒྱད་ཅུ་ཡོད།
པར་འདེབས་ལས་རིགས་བྱ་འཕུར་བ་ལྟར་འཕེལ་རྒྱས་འགྲོ་བའི་དུས་འདིར་སྡེ་དགེ་པར་ཁང་གིས་སྔར་བཞིན་ལག་ཤེས་ཁོ་ནའི་ཐོག་ནས་བསྟན་བཅོས་ཁག་ཅིག་བརྐོ་རྒྱུ་རྒྱུན་འཁྱོངས་བྱེད་ཀྱི་ཡོད། ཁྲོམ་རའི་དགོས་མཁོ་སྐོང་ཐུབ་པར་མ་ཟད། དུས་མཚུངས་སུ་མིའི་རིགས་ཀྱི་རིག་གནས་ཤུལ་བཞག་འདི་མི་རབས་ནས་མི་རབས་བར་རྒྱུན་འཛིན་བྱེད་བཞིན་ཡོད།
སྡེ་དགེའི་པར་ཁང་གིས་ད་དུང་རིག་གནས་སློབ་གསོའི་བྱེད་སྒོ་ཧུར་ཐག་སྤེལ་ནས་གཞོན་ནུ་དེ་བས་མང་བ་རྒྱུན་འཛིན་དཔུང་ཁག་ནང་ཞུགས་རྒྱུའི་བརྩོན་ལེན་བྱས་པ་རེད། དུས་མཚུངས་སུ་སྡེ་དགེའི་པར་ཁང་གིས་ད་དུང་ཕྱི་ཕྱོགས་དང་སྤེལ་རེས་དང་མཉམ་ལས་ཧུར་ཐག་བྱས་ནས། མི་སྔར་ལས་མང་བར་འཛམ་གླིང་གི་རིག་གནས་བང་མཛོད་འདིའི་གཅེས་ནོར་ཤེས་སུ་འཇུག་པར་བརྩོན་ལེན་བྱེད་བཞིན་ཡོད།
གྲངས་གཞི་ཅན་གྱི་ལག་རྩལ་གྱིས་སྡེ་དགེ་པར་ཁང་གི་ལྡེབས་རིས་ཉར་ཚགས་བྱས།
གདྲེགས་དང་རྩི་ལྷུང་བ། ཆུ་ཤུལ་དང་སྣུམ་ཤུལ་སོགས་ཀྱིས་སྡེ་དགེའི་པར་ཁང་གི་ལྡེབས་རིས་རེ་རེ་ལ་སྐྱོན་ཆེན་པོ་ཐེབས་ཡོད་ལ། དེ་དག་གྲངས་གཞི་ཅན་གྱི་ལམ་ནས་ཚོན་མདངས་སྣ་ཚོགས་ཀྱི་རྟགས་བཀོད་ནས་གསལ་པོ་མཚོན་པར་བྱས་ཡོད།
ལས་དོན་རྣམ་གྲངས་དེ་སྤེལ་སྐབས། འཛུགས་སྐྲུན་ཕྱོགས་བསྡུས་རྩད་ཞིབ་ཞིབ་འཇུག་ཇུས་འགོད་ཁང་ཚད་ཡོད་ཀུང་སིའི་རིག་གནས་ཤུལ་བཞག་སྲུང་སྐྱོང་ལྟེ་གནས་ཀྱི་ཀྲུའུ་རེན་གཞོན་པ་ཀྲོའུ་ཐེན་ཧྥེ་ཡི་སེམས་སུ་ལྡེབས་རིས་དེ་དག་ལོ་བརྒྱའི་ཆར་རླུང་བརྒྱུད་ཀྱང་སྔར་བཞིན་གསོན་ཉམས་ལྡན་པས། ང་ཚོས་གྲངས་འཛིན་པར་ལེན་ལག་རྩལ་སྤྱད་དེ་ཞིབ་ཆ་དེ་དག་དབྱེ་འབྱེད་ཚད་མཐོ་བའི་གྲངས་འཛིན་པར་རིས་ཁྲོད་མངོན་པར་བྱས་ཏེ། ཡུན་རིང་གྲངས་འཛིན་ཉར་ཚགས་ཐུབ་པ་དང་དེ་ནས་ས་གནས་ས་ཐོག་ཏུ་རྩད་ཞིབ་བྱས་འབྲས་དང་ཟུང་འབྲེལ་བྱས་ནས། ལྡེབས་རིས་འཇིག་པའི་འགལ་རྐྱེན་སེལ་བ་གང་ཐུབ་བྱེད་པ་དེ་ལུས་ཕུང་བརྟག་དཔྱད་ཐེངས་ཤིག་བྱས་པ་དང་མཚུངས་ཞེས་བཤད།
2020ལོར་སྡེ་དགེའི་པར་ཁང་གིས་ལྡེབས་རིས་གྲངས་གཞི་ཅན་གྱི་རྩད་ཞིབ་ཐིག་ལེན་རིས་འབྲིའི་རྣམ་གྲངས་ལག་བསྟར་བྱེད་འགོ་བཙུགས་ཚུན། ཀྲོའུ་ཐེན་ཧྥེ་དང་དེའི་ཚོགས་པས་ཁྱོན་སྨི་ངོས་གྲུ་བཞི་མ་491ཟིན་པའི་ལྡེབས་རིས་གྲངས་གཞི་ཅན་གྱི་ཐིག་ལེན་རིས་འབྲི་དང་རང་གཟུགས་རྩད་ཞིབ་ལས་དོན་ལེགས་སྒྲུབ་བྱས་པ་ཕུད། ད་དུང་སྡེ་དགེའི་པར་ཁང་དང་དེ་བཞིན་མཐའ་འཁོར་གྱི་ཁོར་ཡུག་ལ་དཀྱུས་ཞེང་དཔངས་གསུམ་གྱི་བཤར་འབེབས་དང་དངོས་ལྗོངས་དཀྱུས་ཞེང་དཔངས་གསུམ་གྱི་དཔེ་དབྱིབས་བཟོས་ནས། ལྡེབས་རིས་དེ་དག་གནས་སའི་འཛུགས་སྐྲུན་བར་མཐོངས་ཀྱང་སྔར་རྒྱུན་བཞིན་སླར་གསོ་བྱས་པ་རེད། ཀྲོའུ་ཐེན་ཧྥེ་ཡིས། ང་ཚོས་ཨར་ལས་གྲུབ་ཆར་བརྟག་དཔྱད་དབྱེ་ཞིབ་དང་ལྡེབས་རིས་བཟོ་རྩལ་བརྟག་དཔྱད། ལྡེབས་རིས་རྒྱུ་ཆར་ཞིབ་དཔྱད་ཚད་ལེན། ལྡེབས་རིས་ཀྱི་ད་ལྟའི་གནས་ཚུལ་རྩད་ཞིབ་སོགས་རྣམ་གྲངས་ལས་དོན་ཕྱོགས་བསྡོམས་དང་དབྱེ་ཞིབ་ལག་རྩལ་ཐད་སྡེ་དགེ་པར་ཁང་གི་ལྡེབས་རིས་ཀྱི་ཉམས་ཉེན་འབྱུང་རྐྱེན་ལ་ཕྱོགས་བསྡུས་དབྱེ་ཞིབ་བྱེད་པ་དང་འབྲེལ། རྩད་ཞིབ་ཀྱི་བསྡོམས་ཚིག་དང་གྲོས་འགོ་འདོན་རྒྱུ་ཡིན་ཞེས་བཤད་པ་དང་། ལྡེབས་རིས་གྲངས་གཞི་ཅན་གྱི་རྩད་ཞིབ་ཐིག་ལེན་རིས་འབྲིའི་རྣམ་གྲངས་ཕུད། ཉེ་བའི་ལོ་ཤས་རིང་། སྡེ་དགེའི་པར་ཁང་གིས་ད་དུང་པར་འདེབས་གྲངས་གཞི་ཅན་དང་གྲངས་གཞིའི་སྟེགས་བུ་འཛུགས་སྐྲུན་སོགས་ཀྱི་ལས་དོན་སྤེལ། །