ཁམས་མི་ཉག་ཡུལ་ནས་ལང་ཚོའི་ཁོ་ལག་རྫོགས་པའི་བོད་ཀྱི་བརྡ་སྤྲོད་སྨྲ་བ། སི་ཁྲོན་ཞིང་ཆེན་བོད་ཡིག་སློབ་གྲྭའི་དགེ་རྒན་ཀུན་དགའ་རྒྱལ་མཚན་ལགས་ལ་བཅར་འདྲི་ཞུས་པའི་གནས་ཚུལ་རགས་བཀོད།

སྔོན་འགྲོའི་ཞུ་མཆིད།

ངའི་སློབ་ཆུང་དང་དམའ་འབྲིང་གི་སློབ་གྲོགས་མང་པོ་ཞིག་སི་ཁྲོན་ཞིང་ཆེན་བོད་ཡིག་སློབ་གྲྭ་ནས་སློབ་མཐར་ཕྱིན་པ་དང་། དེང་དུས་སྤྱི་ཚོགས་ཀྱི་ལས་རིགས་སོ་སོ་རུ་ཞབས་ཞུ་སྒྲུབ་བཞིན་ཡོད་ཅིང་། སློབ་གྲོགས་ཕལ་མོ་ཆེ་ནི་སྤྱོད་ཡོན་གཉིས་དང་ལྡན་ལ། ལྷག་པར་དུ་སུམ་རྟགས་དག་གསུམ་དང་བྲིས་གཟུགས་སྒྱུ་རྩལ་སོགས་ལ་ཁྱད་ཆོས་འབུར་དུ་ཐོན། ད་ལོའི་སྤྱི་ཟླ་ལྔ་པའི་མཇུག་ཏུ་2024ལོའི་དཀར་མཛེས་ཁུལ་ནུས་རྩལ་སློབ་གསོའི་བྱ་འགུལ་དང་བསྟུན་ནས་སི་ཁྲོན་ཞིང་ཆེན་བོད་ཡིག་སློབ་གྲྭ་རུ་བཅར་འདྲི་ཕྱིན་ཏེ། སློབ་གྲྭའི་ཕུལ་བྱུང་དགེ་རྒན་དག་ལ་ཡང་བསྐྱར་རྒྱུས་ལོན་གཏིང་ཟབ་བྱ་རྒྱུའི་གོ་སྐབས་རྙེད་ཅིང་། སྤྱོད་ཡོན་གཉིས་ལྡན་གྱི་སློབ་བུའི་ཁྱུ་ཚོགས་བར་མེད་དུ་བདོལ་བའི་རྒྱུ་མཚན་ལ་ར་སྤྲོད་ཀྱང་བྱུང་བར་མ་ཟད། ལྷག་ཏུ་དཔེ་མཚོན་གྱི་དགེ་རྒན་མི་ཉག་ཀུན་དགའ་རྒྱལ་མཚན་ལ་རྒྱུས་ལོ་ཕྲན་བུ་བྱས་ཐོག །ད་ཐེངས་ཡང་བསྐྱར་ཁ་པར་དང་སྐད་འཕྲིན་བརྒྱུད་ནས་རྒྱུས་ལོན་གཏིང་ཟབ་བྱས་མཐར། ཁོང་གི་སློབ་སྦྱོང་གི་རྒྱུད་རིམ་དང་སློབ་གསོའི་ལྟ་བ་ལ་ཐུན་མིན་གྱི་ཁྱད་ཆོས་ལྡན་ཞིང་། དེང་རབས་ན་གཞོན་དག་ལ་གུས་རྟག་བརྩོན་པ་མི་གཏོང་བའི་སྐུལ་ལྕག་ཏུ་འདོད་ནས་གཤམ་དུ་བཅར་འདྲིའི་ནང་དོན་ཁ་ཚང་བཀོད་ཡོད།

བྲིས་པ་གྲགས་ཅན་རྣམས་དང་ལྷན་དུ་བྲིས་གཟུགས་དཔྱད་འདེམས་སྐོར་ལ་བགྲོ་གླེང་བྱེད་བཞིན་པ། 

དྲི་བ་དྲིས་ལན།

གསར་འགོད་པ། རྒན་ལགས་སྐུ་ཁམས་བཟང་། ང་ཚོ་གངས་ལྗོངས་ཉི་གཞོན་གྱི་བཅར་འདྲིར་དང་ལེན་གནང་བར་བཀའ་དྲིན་ཆེ། ཁྱེད་ཀྱིས་སློབ་མ་གསོ་སྐྱོང་དང་རིག་གཞུང་ཞིབ་འཇུག་ཐད་གྲུབ་འབྲས་བཟང་པོ་བཞག་དང་འཇོག་མུས་སུ་མཆིས་པས། སློབ་སྦྱོང་དང་ལས་ཀའི་གོ་རིམ་ཁྲོད་དམིགས་བསལ་གྱི་རྒྱུད་རིམ་མམ་ཐབས་ཤེས་གང་མང་ལྡན་ངེས། དེ་བས་ཁྱེད་ཀྱི་སློབ་སྦྱོང་དང་ལས་ཀའི་རྒྱུད་རིམ་རགས་བསྡུས་ཤིག་གསུང་རོགས།

སི་ཁྲོན་ཞིང་ཆེན་བོད་ཡིག་སློབ་གྲྭའི་སློབ་འཛུགས་བྲིས་གཟུགས་འགྲེམས་སྟོན་དུ་སྐུ་མགྲོན་རྣམས་ལ་བྲིས་གཟུགས་ཀྱི་སྟོན་མོ་འབུལ་བཞིན་པ། 

མི་ཉག་ཀུན་དགའ་རྒྱལ་མཚན། གསར་འགོད་པ་ཁམས་བཟང་། ང་རང་1990ལོར་སི་ཁྲོན་ཞིང་ཆེན་བོད་ཡིག་སློབ་གྲྭ་ནས་སློབ་མཐར་ཕྱིན་རྗེས། ཐོག་མར་རྟའུ་རྫོང་སྲིད་གྲོས་སུ་ལས་བགོས་བྱས་ཤིང་།ལོ་གསུམ་གྱི་རྗེས་ཏེ་1993ལོར་སི་ཁྲོན་ཞིང་ཆེན་བོད་ཡིག་སློབ་གྲྭ་རུ་ལས་གནས་སྤོས་ཏེ་དགེ་རྒན་བྱས་པ་ནས་ད་བར་བགྲང་བྱ་སུམ་ཅུ་ལྷག་ཙམ་འགོར་འདུག །དེའི་བར་དུ་སྔ་ཕྱིར་ལོ་ལྔའི་རིང་ལ་ལྷོ་ནུབ་མི་རིགས་སློབ་ཆེན་དུ་ཐོག་མར་ཆེད་ཚན་རིམ་པ་དང་དེ་རྗེས་རབ་འབྱམས་པའི་སློབ་ཚན་ལ་སྦྱངས་ཏེ་སློབ་མཐར་ཕྱིན་པ་ཡིན། སྔ་རྗེས་སུ་སློབ་མ་རྣམས་ལ་བརྡ་སྤྲོད་དང་ལོ་རྒྱུས། ཚད་མ། བྲིས། སྐད་བརྡ་རིག་པ། སྒྲ་རིག་པ། རྩོམ་རིག་སྐོར། ནང་དོན་རིག་པ་སོགས་སློབ་ཁྲིད་བྱེད་ཞོར། སློབ་གྲྭའི་སློབ་དོན་ལས་ཀ་ཐད་ལོ་མང་རིང་ཞབས་ཕྱི་ཞུས་པ་ཡིན། སྤྱིར་ཁོ་བོས་ལས་ཀའམ་སློབ་ཁྲིད་ཀྱི་རྒྱུད་རིམ་ནི་སློབ་སྦྱོང་གི་རྒྱུད་རིམ་མཆོག་ཏུ་གྱུར་པ་ཞིག་ལ་ངོས་འཛིན་གྱི་ཡོད་དེ། ལས་ཀའམ་སློབ་ཁྲིད་ཀྱི་ཁྲོད་ནས་ཉམས་མྱོང་དང་འཇོན་ནུས། གོ་རྟོགས་སོགས་ཆེས་ཆེར་མཐོ་འདེད་དུ་གཏོང་ཐུབ་ཅིང་། ལས་ཀ་དང་སློབ་སྦྱོང་གཉིས་ནི་གཅིག་ལ་གཅིག་བརྟེན་གྱི་འབྲེལ་བ་ཡིན་པར་འདོད།

གསར་འགོད་པ། གུས་པས་ད་ལོའི་མཐོ་རྒྱུགས་ཁྲོད་ཁྱེད་ཀྱི་བུ་ཕྲུག་ལ་རྒྱུག་འབྲས་གཡུར་དུ་ཟ་བ་ཐོབ་སྐད་ཐོས་པས། ཁྱེད་རང་སློབ་གྲྭའི་དགེ་རྒན་ཕུལ་བྱུང་ཞིག་ཡིན་པར་མ་ཟད། ཁྱིམ་ཚང་སློབ་གསོ་ལའང་ཐབས་ཤེས་དམིགས་བསལ་ཡོད་མཁན་ཞིག་ཡིན་པར་རྟོགས་སླ་བས། བོད་རིགས་ཀྱི་དགེ་རྒན་དང་སློབ་མའི་ཁྱིམ་བདག་ཅིག་གི་ངོས་ནས། སློབ་གྲྭའི་སློབ་གསོ་དང་ཁྱིམ་ཚང་སློབ་གསོའི་འབྲེལ་བ་དང་དང་དོད་བྱ་ཡུལ་གང་འདྲ་འདུག །དེའི་སྐོར་ཁྱེད་ཀྱི་དགོངས་ཚུལ་ཉུང་བསྡུས་ཤིག་གསུང་རོགས།

མི་ཉག་ཀུན་དགའ་རྒྱལ་མཚན་གྱིས་བྲིས་པའི་འབྲུ་མའི་ཡིག་གཟུགས་དུམ་བུ་གཅིག

མི་ཉག་ཀུན་དགའ་རྒྱལ་མཚན། ཁྱིམ་ཚང་སློབ་གསོ་ནི་ཧ་ཅང་གལ་ཆེ་སྟེ། ཕྲུ་གུ་ལ་ཆུང་དུས་ནས་འཆར་གཞི་ཡོད་པའི་སྒོ་ནས་སློབ་གསོ་ཡག་མོ་གཏང་རྒྱུ་དང་། ལྷག་པར་དུ་གཞི་རིམ་རོང་འབྲོག་མང་ཚོགས་ཀྱི་ཁྱིམ་བདག་ཚོས་རང་གི་ཕྲུ་གུའི་འགྲམ་དུ་བྱ་སྤྱོད་ངན་པ་སྤངས་ཅི་ཐུབ་བྱེད་དགོས་ཏེ། དཔེར་ན། རང་གིས་ཆང་རག་དང་དུ་བ་བར་མེད་དུ་བསྟེན་བཞིན་བུ་རྒྱུད་ལ་ཆང་རག་དང་དུ་བའི་ཉེས་དམིགས་དང་སྐྱོན་ཆ་བཤད་ཀྱང་། དེས་ཕྲུ་གུ་ལ་སློབ་གསོ་ཡག་མོ་ཐེབས་ཐབས་བྲལ་བ་ལྟ་བུ་སོགས། མདོར་ན་སྤྱོད་ལམ་སོགས་ཀྱི་ཐད་ནས་ཕྲུ་གུ་ལ་མིག་དཔེ་མཆོག་ཏུ་གྱུར་པ་ཞིག་བཏོན་དགོས། རང་རེ་བོད་པ་ཚོ་རྒྱུད་པ་ཡག་ཞེན་ལ་རྩོད་རྒྱུ་དགའ་ཡང་།

བོད་ལྗོངས་ལྷ་སར་མདོ་དབུས་ཁམས་གསུམ་ན་ཕེབས་པའི་བོད་ཀྱི་བརྡ་སྤྲོད་རིག་པའི་མཁས་དབང་འགའ་དང་ལྷན་དུ་བརྡ་སྤྲོད་རིག་པའི་སྐོར་ལ་བགྲོ་གླེང་བྱེད་བཞིན་པ།

ཁོ་བོའི་བསམ་པར་རྒྱུད་པ་ཡག་མིན་དེ་ཁྱིམ་ཚང་སློབ་གསོ་ལ་རག་ལས་ཡོད་པ་སྟེ། གང་ཞིག་དུག་གི་རི་ལ་གནས་བཅས་ན། །དེ་ཡི་འདབ་ཆགས་ཐམས་ཅད་དུག་ཏུ་འགྱུར། །གང་ཞིག་གསེར་གྱི་རི་ལ་གནས་བཅས་ན། །དེ་ཡི་འདབ་ཆགས་ཐམས་ཅད་གསེར་དུ་འགྱུར། །ཞེས་པའི་དཔེ་ལྟར། ཡ་རབས་ཀྱི་རྒྱུད་པ་ཡ་རབས་དང་མ་རབས་ཀྱི་རྒྱུད་པ་མ་རབས་ཐ་ཤལ་དུ་འགྱུར་སྲིད། ང་རང་སློབ་གྲྭའི་དགེ་རྒན་དང་ཁྱིམ་གྱི་ཕ་རྒན་ཞིག་གི་ངོས་ནས། དུས་རྒྱུན་སློབ་གྲྭའི་སློབ་གསོ་དང་ཁྱིམ་གྱི་སློབ་གསོ་གཉིས་ཀ་ལ་དོ་སྣང་ཆེན་པོ་བྱེད་ཀྱི་ཡོད་དེ། ཁྱིམ་ཚང་སློབ་གསོས་ཕྲུ་གུ་ཆུང་དུས་ནས་མི་གཞི་ཡ་རབས་དང་དྲང་བདེན་གྱི་བསམ་བློ་ཡོད་མཁན། ལས་རྒྱུ་འབྲས་ལ་བརྩི་མཁན། བྱམས་དང་སྙིང་རྗེ་ཡོད་མཁན། རིན་ཐང་ལྟ་བ་ཡང་དག་ཡོད་མཁན་ཞིག་ལ་གསོ་སྐྱོང་བྱ་རྒྱུ་དང་། སློབ་གྲྭའི་སློབ་གསོས་ཀུན་སྤྱོད་སློབ་གསོའི་རྨང་གཞིའི་ཐོག །

ཤེས་བྱ་རིག་གནས་བསླབས་ཏེ་སློབ་མ་དེ་ཉིད་སྤྱོད་པ་བཟང་ཞིང་ཤེས་ཡོན་ལྡན་པའི་ལམ་དུ་བསྐྱང་ཅི་ཐུབ་བྱ་དགོས་པ་ཡིན། གལ་ཏེ་ཤེས་ཡོན་ཡོད་ཀྱང་མི་གཞིའི་སློབ་གསོ་ཡག་པོ་མ་བྱས་ནས་ཀུན་སྤྱོད་ངན་པ་ཞིག་བྱུང་ན་དེས་སྤྱི་ཚོགས་ལ་ཕན་པ་ལས་གནོད་པ་ཆེ་སྟབས། མི་གཞི་ངན་པ་དག་ནི་ཤེས་ཡོན་མེད་ན་དགའ་ཚོད་རེད་བསམ་བཞིན་ཡོད། ཀླད་ཆུང་རང་བཞིན་ངན་པ་ལ། །ཡོན་ཏན་ཡོད་ཀྱང་ཕན་མི་ཐོགས། །རྩ་བ་དུག་ཏུ་གནས་པ་ཡི། །མེ་ཏོག་མཛེས་ཀྱང་སུ་ལ་ཕན། །ཞེས་པར་ལྟར་རོ། །

གསར་འགོད་པ། ད་ལྟའི་ན་གཞོན་ཚོའི་ཡིག་ནོར་མང་ཤོས་ནི་བྱ་ཚིག་བཀོལ་སྟངས་ཐད་བྱུང་ཞིང་།དེ་ལ་མགོ་རྨོངས་མཁན་ཤིན་ཏུ་མང་པོ་རེད། དེ་བས་བོད་ཡིག་གི་བྱ་ཚིག་ལ་ཐུན་མིན་གྱི་ཁྱད་ཆོས་གང་འདྲ་ཡོད་པ་དང་དེ་ཁོང་དུ་ཆུད་པ་ལ་དམིགས་བསལ་གྱི་མན་ངག་གམ་ཐབས་ཤེས་ཡོད་དམ།

དཀར་མཛེས་ཁུལ་སྡེ་རོང་རྫོང་དུ་བོད་ཡིག་བྲིས་གཟུགས་སྐོར་གྱི་འགྲེམས་སྟོན་དང་བགྲོ་གླེང་ལ་ཞུགས་སྐབས་ཀྱི་པར་རིས་ཤིག

མི་ཉག་ཀུན་དགའ་རྒྱལ་མཚན། དེང་སང་བོད་ཡིག་གི་བྱ་ཚིག་སྤྱོད་གཏོང་ཐད་ནོར་འཁྲུལ་ཤོར་མཁན་མང་པོ་ཡོད་པ་དང་། ཐ་ན་བརྡ་སྤྲོད་སྨྲ་བའི་ཁྲོད་དུའང་དེ་ལ་རྨོངས་མཁན་མཐོང་རྒྱུ་འདུག །ཁོ་བོས་བསམ་པར་དེའི་གནད་འགག་གཙོ་བོ་ནི་བྱ་ཚིག་ཅེས་བརྗོད་པ་ན་དུས་གསུམ་ཁོ་ནའི་རྒྱ་རུ་ཚུད་དེ། བརྡ་སྤྲོད་ཀྱི་གཞུང་སློབ་སྐབས་དངོས་པོ་བདག་གཞན་བསླབས་ཀྱང་ལག་ལེན་དུ་རྩྭ་ལྟར་དོར་བའི་རྐྱེན་གྱིས་གནས་ཚུལ་དེ་རིགས་བྱུང་བར་སེམས། སྤྱིར་རྒྱ་ཡིག་ལ་བྱ་བྱེད་ཐ་དད་མི་དད་དང་གཟུགས་འགྱུར་མི་འགྱུར་གྱི་དབྱེ་བ་མེད་པས། རྒྱ་ཡིག་གི་བརྡ་སྤྲོད་པའི་གོམས་གཤིས་ལྟར་བོད་ཡིག་གི་བརྡ་སྤྲོད་ལ་སྦྱོང་སྤྱོད་བྱས་ན་འཁྲུལ་བ་མང་པོ་འབྱུང་སླ། ནོར་འཁྲུལ་འབྱུང་ཁུངས་གཙོ་བོ་ནི་གཟུགས་འགྱུར་མིན་གཉིས་ལས་གཟུགས་འགྱུར་བའི་བྱ་ཚིག་ཏུ་བྱུང་ཞིང་།

གཟུགས་འགྱུར་བ་ལ་བསམ་མནོ་གཏོང་སྟངས་སྣ་ཁ་གཉིས་ཡོད་དེ། གཅིག་ནི་དུས་གསུམ་གྱི་དུས་ཚོད་ཁ་གསལ་པོ་ཡོད་ན་གང་ཞིག་ཡིན་པ་དེ་ཉིད་སྤྱོད་ཆོག་ལ། དུས་ཚོད་གསལ་པོ་མེད་པའི་བྱ་ཚིག་གི་རིགས་དང་བྱ་ཚིག་ཁ་ཤས་ཤིག་གཟུགས་བྱ་ཚིག་གིས་མཚོན་གྱི་ཡོད་ཀྱང་ངོ་བོ་བྱ་ཚིག་མིན་པར་བྱ་ལས་དང་འབྲེལ་བ་ཡོད་པ་ཙམ་རེད། དཔེར་ན། སྟོན་པ་དང་བསྟན་པ་ལྟ་བུར། སྟོན་ཞེས་པ་ད་ལྟ་བའི་གཟུགས་བཀོད་པ་དང་། བསྟན་པ་ཞེས་པའི་སྐབས་ཀྱི་བསྟན་ནི་མ་འོངས་པའི་གཟུགས་ཡིན་ཡང་། དོན་དངོས་སུ་དེ་དག་ནི་བྱ་བ་དེ་དང་འབྲེལ་བ་ཡོད་པའི་དངོས་པོ་ཙམ་ལས་བྱ་བ་མི་མཚོན། དེ་བས། དངོས་པོ་བདག་གཞན་ཐད་ནས་བསམ་མནོ་གཏོང་དགོས་ཏེ། སྟོན་པ་ཞེས་པ་བྱ་བ་དེའི་བྱེད་པ་པོ་སྟེ་ལམ་སྟོན་པ་པོ་དང་།བསྟན་པ་ཞེས་པ་སྟོན་པས་བསྟན་པའི་དངོས་པོ་ཡིན། དེ་བཞིན་དུ་ཤིང་གཅོད་པ་པོ་དང་གཅད་བྱའི་ཤིང་ལྟ་བུའང་དངོས་པོ་ལས་བྱ་བ་མ་ཡིན་པས། དུས་གང་ཞིག་ཡིན་པ་ལ་བསམ་བློ་གཏང་བར་མི་བྱའོ། །གནད་འགག་འདི་ཡག་མོ་ཤེས་ན་ཡིག་ནོར་མང་པོ་ཞིག་ཐག་གཅོད་ཐུབ་ཅིང་། ནོར་འཁྲུལ་མང་པོ་ཞིག་མི་འབྱུང་བའི་མན་ངག་ཏུ་ངོས་འཛིན་ཆོག་སྙམ།གཞན་ཡང་། ཡུལ་ལ་སྐོར་བར་བྱེད་པས་ཡུལ་སྐོར་དང་བསྐོར་བར་བྱ་བས་ཡུལ་བསྐོར། དཔེ་ཆ་ཀློག་པར་བྱེད་པས་དཔེ་ཀློག་དང་བཀླག་པར་བྱ་བས་དཔེ་བཀླག །ཡི་གེ་སྒྱུར་བར་བྱེད་པས་ཡིག་སྒྱུར་དང་བསྒྱུར་བར་བྱ་བས་ཡིག་བསྒྱུར། དཔེ་ཆ་སྐྲུན་པར་བྱེད་པས་དཔེ་སྐྲུན་དང་བསྐྲུན་པར་བྱ་བས་དཔེ་བསྐྲུན། ཞེས་བྱ་བྱེད་ཀྱི་ཚིག་གཉིས་པོ་གང་ཞིག་སྦྱར་རུང་མི་འགྲིག་པའི་རྒྱུ་མཚན་བཤད་རྒྱུ་མེད་པ་དག་ལ་ཡུལ་སྐོར། དཔེ་ཀློག །ཡིག་སྒྱུར། དཔེ་སྐྲུན། བདུད་འདུལ། སྐྱོན་སེལ་ལྟ་བུ་བྱེད་ཚིག་ད་ལྟ་བ་སྦྱར་ཏེ་གྲུབ་པའི་ཐ་སྙད་ཤིན་ཏུ་མང་ཞིང་། དེ་བཞིན་དུ་ནད་དཔྱད། ཁོག་དབུབ། མཚན་བརྗོད། ས་དཔྱད། བསྟན་བཤིག །གྲྭ་བསྐོར། ལྟ་བུ་སོགས་གྲུབ་ཆ་ཕྱི་མ་ལ་བྱེད་ཚིག་སྤྱོད་མི་རུང་བའི་རྒྱུ་མཚན་བཤད་དུ་མེད་པ་དག་ལ་བྱ་ཚིག་ལས་གྲུབ་པའང་མི་ཉུང་བ་སྣང་བ་དང་། ཡིག་བསྐུར་རྣམ་བཞག་དང་ཡིག་སྐུར་རྣམ་བཞག་ལྟ་བུ་གཉིས་ཆར་སྣང་བའང་མཐོང་རྒྱུ་ཡོད་པ་བཞིན། མདོར་ན་འདི་ཡི་ཐད་ལ་ཚད་གཞི་གཏན་འཁེལ་ཞིག་མ་མཛད་ན་མ་འོངས་པར་ཡང་ཐ་སྙད་གཅིག་གྱུར་ཡོང་བའི་གེགས་སུ་ཆེ་ཞིང་། འདི་ཡི་ཆ་ནི་ད་ཡོད་ཀྱི་རིག་གཞུང་གིས་ཐག་གཅོད་དཀའ་བའི་གནད་དོན་ཞིག་ཀྱང་རེད་འདུག །

གསར་འགོད་པ། བོད་ཀྱི་བརྡ་སྤྲོད་རིག་པ་དང་དེང་རབས་སྐད་བརྡ་རིག་པའི་བར་འབྲེལ་བ་དང་ཁྱད་པ་གང་འདྲ་ཡོད། དེའི་ཐད་རགས་ཙམ་གསུང་རོགས།

མི་ཉག་ཀུན་དགའ་རྒྱལ་མཚན། ཁྱབ་ཁོངས་ཀྱི་ཐད་ནས་སྐད་བརྡ་རིག་པ་ནི་སྐད་རིགས་སྤྱི་ལ་ཁ་ཕྱོགས་ནས་བཏོན་པའི་རིག་གཞུང་ཞིག་ཡིན་ཞིང་།

དེའི་ཁྱབ་རྒྱ་ཤིན་ཏུ་ཆེ། བོད་ཀྱི་བརྡ་སྤྲོད་རིག་པ་ནི་བོད་སྐད་ཡིག་ལ་ཁ་ཕྱོགས་ནས་གཏན་འབེབས་བྱས་པའི་བརྡ་སྤྲོད་ཀྱི་གཞུང་ལུགས་ཤིག་ཡིན་པས། དེ་ལ་ཞིབ་ཕྲ་དང་དམིགས་བསལ་གྱི་ཁྱད་ཆོས་ལྡན་པར་མ་ཟད། སྤྱིའི་སྐད་བརྡ་རིག་པའི་ཁོངས་སུ་འདུས། འཕེལ་རྒྱས་ཀྱི་རྒྱུད་རིམ་ཐད་ནས་བོད་ཀྱི་བརྡ་སྤྲོད་རིག་པ་ནི་བོད་རང་གི་སྐད་ལ་གཞི་བཞག་ནས་མ་མཐའ་ཡང་ལོ་ཆིག་སྟོང་སུམ་བརྒྱ་ལྷག་གི་ཉམས་མྱོང་ཕྱོགས་བསྡོམས་དང་འཐུས་སྒོ་ཇེ་ཚང་དུ་གཏོང་བའི་རིག་གཞུང་ཞིག་ཡིན་ལ། བོད་ཀྱི་སྤྱི་ཚོགས་འཚོ་བ་དང་ཐད་ཀར་འབྲེལ་ཅིང་། ལོ་རྒྱུས་ཀྱི་ཆུ་རྒྱུན་རིང་མོའི་ཁྲོད་བསྲེག་བརྡར་ཡང་ཡང་བྱས་ཡོད། དེང་རབས་སྐད་བརྡ་རིག་པ་ནི་ཉེ་བའི་ལོ་བརྒྱ་ལྷག་གི་གོང་ནས་ནུབ་ཕྱོགས་རྒྱལ་ཁབ་ཀྱི་མཁས་པ་ཚོས་མིའི་རིགས་སྤྱིའི་སྐད་ལ་ཞིབ་འཇུག་བྱས་ནས་བྱུང་བ་ཡིན་ལ། འཐུས་ཚང་རང་བཞིན་དང་ཚད་ལྡན་རང་བཞིན་ཆེས་ཆེར་ལྡན་པའི་སྐད་བརྡ་ལ་ཞིབ་འཇུག་བགྱི་བའི་རིག་གཞུང་ཞིག་ཡིན། ང་ཚོས་བོད་སྐད་ཡིག་བསླབས་པའི་རྨང་གཞིའི་ཐོག །དེང་རབས་སྐད་བརྡ་རིག་པའི་ཐབས་ཤེས་ལ་སྦྱོང་པ་བྱ་དགོས། །

གསར་འགོད་པ། དེང་དུས་མིས་བཟོས་རིག་སྟོབས་སོགས་ཀྱི་ལག་རྩལ་དབྱར་མཚོ་ལྟར་རྒྱས་བཞིན་པའི་བརྡ་འཕྲིན་གསར་པའི་དུས་སྐབས་སུ། ང་ཚོས་སྐད་ཡིག་གི་སྲོག་ཤིང་དུ་གྱུར་བའི་སུམ་རྟགས་དག་གསུམ་ལ་སློབ་སྦྱོང་དང་བཀོལ་སྤྱོད། དེ་བཞིན་དུས་རབས་དང་མཐུན་པའི་ཡར་རྒྱས་ཇི་ལྟར་གཏང་དགོས་སམ།

མི་ཉག་ཀུན་དགའ་རྒྱལ་མཚན། ཁྱེད་ཀྱི་དྲི་བ་འདི་གནད་འགག་ཆེན་པོ་ཞིག་རེད། ངས་དུས་རྒྱུན་འདིའི་ཐད་བསམ་བློ་མང་པོ་གཏོང་བཞིན་ཡོད། སེམས་ཁྲལ་བྱ་ཡུལ་གཙོ་བོ་ནི་དེང་སང་སློབ་ཆེན་གྱི་དགེ་རྒན་དང་བརྡ་སྤྲོད་ཀྱི་རིག་གཞུང་གསར་རྩོམ་གནང་མཁན་ཚོས་དེང་རབས་ནུབ་ཕྱོགས་ནས་དར་བའི་བརྡ་སྤྲོད་ཀྱི་མ་ལག་མང་པོ་ཞིག་ནང་འདྲེན་བྱེད་ཀྱི་འདུག་ཀྱང་། དེ་ཐད་ཀ་བོད་ཀྱི་བརྡ་སྤྲོད་པའི་གཞུང་དུ་སྤྱད་ན་འཁྲུལ་བ་མང་པོ་འབྱུང་སྲིད་ཅིང་། ནུབ་ཕྱོགས་ཀྱི་བརྡ་སྤྲོད་དང་བོད་ཀྱི་བརྡ་སྤྲོད་གཉིས་ནི་མ་ལག་དང་རིག་གཞུང་ཁ་ཁ་ཡིན་པས། མི་འདྲ་ས་མང་པོ་ཡོད་པ་སྨོས་མི་དགོས། བོད་ཀྱི་སུམ་རྟགས་ཀྱི་གཞུང་ལ་མ་མཐའ་ཡང་ལོ་བརྒྱད་བརྒྱ་ཡན་གྱི་ལོ་རྒྱུས་ལྡན་ཞིང་།

སྔོན་བྱོན་བརྡ་སྤྲོད་སྨྲ་བའི་དབང་པོ་གསེར་རིའི་ཕྲེང་བ་ལྟར་ཕེབས་ཏེ། བསྲེག་བཅད་བརྡར་བའི་གསེར་བཞིན་དུ་བརྡ་སྤྲོད་ཀྱི་རིག་གཞུང་འཐུས་སྒོ་ཚང་བར་གཏན་དུ་ཕབ་ཡོད། སྤྱིར་དུས་རབས་ཀྱི་འགྲོས་དང་བསྟུན་ནས་ཕྱིའི་སྔོན་ཐོན་གྱི་བརྡ་སྤྲོད་པའི་གཞུང་ལུགས་ཀྱི་ལེགས་ཆ་དང་ལེན་བྱེད་དགོས་པ་སྨོས་མི་དགོས་མོད། དང་ལེན་བྱེད་པ་ལ་བོད་ཀྱི་བརྡ་སྤྲོད་པའི་གཞུང་ལ་ནང་བྱན་ཆུབ་པའི་རྨང་གཞིའི་ཐོག་དེ་ལ་གཡུ་བྱུར་གྱིས་ཕྲ་རྒྱན་བཏབ་པ་ལྟར་ཇེ་ལེགས་སམ་ཇེ་མཛེས་གཏོང་བ་ལས། གང་བྱུང་དུ་ཉ་ཉུག་མཉམ་བསྲེ་བྱེད་མི་རུང་སྟེ་གོང་སྨྲས་བཞིན་རིག་གཞུང་གི་མ་ལག་སོ་སོར་ཐུན་མིན་གྱི་ཁྱད་ཆོས་ཡོད་པས། གཟབ་གཟབ་མ་མཛད་ན་བོད་ཀྱི་སྲོལ་རྒྱུན་བརྡ་སྤྲོད་རིག་གཞུང་གི་རིན་ཐང་ལ་གཏོར་བཤིག་ཏུ་འགྲོ་ཉེན་ཆེ་སྙམ། གཞན་ཡང་། ད་ལྟ་བོད་ཀྱི་སློབ་མ་ཚོའི་བསམ་བློ་རུ་བརྡ་སྤྲོད་ཀྱི་མ་ལག་གཉིས་ཆགས་འདུག་སྟེ། བོད་ཀྱི་བརྡ་སྤྲོད་པ་དང་དེང་རབས་བརྡ་སྤྲོད་པའི་མ་ལག་གཉིས་རེད། དཔེར་ན། འགའ་ཞིག་གིས་主谓宾ལ་ཐད་ཀ་བྱ་བྱེད་ལས་གསུམ་ཞེས་བསྒྱུར་འདུག་ཀྱང་། བོད་ཡིག་གི་བྱ་བྱེད་ལས་གསུམ་གྱི་རིག་གཞུང་དེ་སྐད་ཡིག་གཞན་པ་དག་གི་བཤད་ཚུལ་དང་མི་མཚུངས་ཤིང་ངོས་འཛིན་བྱེད་སྟངས་མི་འདྲ་བས། རྙོག་དྲ་ལུང་པ་གང་བཟོ་བཞིན་འདུག །ན་གཞོན་ཚོས་ངེས་པར་དུ་དེ་རིགས་ལ་གཟབ་གཟབ་དང་བསམ་མནོ་ཡང་ཡང་གཏོང་དགོས་འདུག་སྙམ།

གསར་འགོད་པ། ཁྱེད་ཀྱི་བོད་ཡིག་བྲིས་གཟུགས་ལ་ཐུན་མིན་གྱི་ཁྱད་ཆོས་ག་འདྲ་ཡོད། གཞན་ཡང་ཁ་པར་དང་གློག་ཀླད་ཀྱིས་སྨྱུ་གུའི་ཚབ་བྱེད་བཞིན་པའི་དུས་སྐབས་འདིར། བོད་ཡིག་བྲིས་གཟུགས་རྒྱུན་འཛིན་དར་སྤེལ་གཏོང་བའི་དགོས་པ་དང་ཐབས་ཤེས་གང་འདྲ་ཡོད།

མི་ཉག་ཀུན་དགའ་རྒྱལ་མཚན། ངའི་བྲིས་རྒྱུན་གཙོ་བོ་ཁམས་བྲིས་ཡིན། ཁམས་ཕྱོགས་སུ་དར་ཁྱབ་ཆེ་བའི་ཡིག་གཟུགས་ལ་སྣེ་ཁ་མང་པོ་ཡོད། ངས་སི་ཁྲོན་ཞིང་ཆེན་བོད་ཡིག་སློབ་གྲྭ་འགྲིམས་སྐབས་ནས་ཁམས་བྲིས་ཀྱི་དབུ་ཅན་དང་འབྲུ་ཚ། ཡིག་ཆུང་སོགས་ལ་བསླབས། དེ་ལས་ཁྱད་ཆོས་ཅུང་ཆེ་བ་ནི་དབུ་ཅན་ཡིན། སྤྱིར་ཀོང་སྤྲུལ་ཡོན་ཏན་རྒྱ་མཚོས་ཡིག་སྣ་མང་པོ་ཡོད་རུང་བསྡུས་ན་ཁག་དྲུག་ཏུ་འདུ་ཚུལ་གསུངས་པ་བཞིན། དེ་དག་ཀུན་ལ་སློབ་སྦྱོང་མི་དམན་པ་བྱས་ཐོག །

དུས་ཡུན་རིང་པོ་ནང་སློབ་ཁྲིད་ཀྱང་བྱས་དང་བྱེད་ཀྱི་ཡོད། གཞན་ཡང་། སྔོན་མ་བྲིས་གཟུགས་ཀྱི་བྱེད་ལས་གཙོ་བོ་ནི་ཟིན་ཐོ་སོགས་འགོད་བྱེད་ཀྱི་ལག་ཆ་ཞིག་ཡིན་ཀྱང་། དེང་སང་རྩིས་འཕྲུལ་སོགས་ཀྱི་འཕེལ་རྒྱས་ལས་སྔོན་དུས་ཀྱི་བྱེད་ལས་དེ་དེ་ཙམ་གལ་མི་ཆེ་བ་ཞིག་ཏུ་གྱུར་ཅིང་། གཙོ་བོ་ནི་བྲིས་གཟུགས་ཀྱི་སྒྱུ་རྩལ་གྱི་རང་བཞིན་དེའི་རིན་ཐང་དེ་མངོན་བཞིན་འདུག །རྒྱ་ཡིག་སོགས་ཡིག་རིགས་གཞན་པའི་བྲིས་གཟུགས་ལ་ཡང་དེ་ལས་མ་འདས་པར་སྒྱུ་རྩལ་གྱི་ཐད་ནས་རྒྱུན་འཛིན་དང་འཕེལ་རྒྱས་འགྲོ་བཞིན་ཡོད། ལོ་རྒྱུས་ཐོག་བོད་ཀྱི་བྲིས་གཟུགས་ལའང་འཕེལ་རྒྱས་ཆེན་མོ་ཕྱིན་ཅིང་། བྲིས་སྣ་སྣེ་གྲངས་ཉིས་བརྒྱ་ལ་ཟིན་ཡོད་ཚུལ་ཐོས་རྒྱུ་འདུག །དེ་ནི་སྤྱིར་བོད་ཡིག་གི་བྲིས་གཟུགས་ཀྱི་ལོ་རྒྱུས་རིང་བ་དང་། ཡང་སྒོས་གསང་སྔགས་ཀྱི་ཆོས་སྤེལ་བའི་ཐུན་མིན་གྱི་དགོས་མཁོ་ལས་གཏེར་ཡིག་དང་མཁའ་འགྲོའི་བརྡ་ཡིག་སོགས་ཧ་ཅང་མང་པོ་ཞིག་བྱུང་ཡོད་ཅིང་། དེ་དག་ནི་སྒྱུ་རྩལ་གྱི་ཉམས་ཕུན་སུམ་ཚོགས་པའི་ཐུན་མིན་གྱི་ཁྱད་ཆོས་གལ་ཆེན་ལྡན་པ་ཤ་སྟག་རེད། བྲིས་དང་རི་མོའི་ཐུན་མིན་གྱི་སྒྱུ་རྩལ་དེ་ཁ་པར་དང་གློག་ཀླད་ཐོག་ཏུ་གཏགས་པ་ཙམ་གྱིས་མཚོན་ཐབས་མེད་ཅིང་། དེང་དུས་བོད་ཡིག་གི་བྲིས་གཟུགས་སྦྱོང་མཁན་དབྱར་མཚོ་ལྟར་རྒྱས་ནས། དེ་འབྲེལ་གྱི་བྱ་འགུལ་ཡང་མང་པོ་སྤེལ་བཞིན་འདུག་པས། མིའི་མཛེས་སྤྱོད་ཀྱི་ལྟ་བ་དང་དགའ་ཞེན་ལ་བརྟེན་ནས་བྲིས་གཟུགས་འཕེལ་རྒྱས་འགྲོ་བཞིན་འདུག །

གསར་འགོད་པ། ཁྱེད་ཀྱིས་དེང་རབས་བོད་ཀྱི་ན་གཞོན་ཚོ་ལ་ཁ་ཕྱོགས་ནས་དཔེ་ཀློག་གི་ཐབས་ལམ་ཉུང་བསྡུས་ཤིག་གསུང་རོགས།

མི་ཉག་ཀུན་དགའ་རྒྱལ་མཚན། ང་ཚོའི་མི་ཚེ་ཐུང་ཐུང་རེད། དཔེ་ཀློག་དུས་ཚོད་ཉུང་ཉུང་རེད། ང་ཚོས་ངེས་པར་དུ་དཔེ་ཀློག་གི་དུས་ཚོད་དམ་འཛིན་བྱས་ཏེ་བཀླག་བྱའི་ནང་དོན་ཨང་དང་པོར་འཛིན་དགོས། ཁོ་བོས་བསམ་ན། གཅིག་ནས། དུས་རབས་མི་གཅིག་པའི་དཔེ་ཆ་བཀླག་དགོས་སྟེ། དུས་རབས་མི་འདྲ་བའི་མིས་བྲིས་པའི་དཔེ་ཆ་ལ་བལྟས་ཙ་ན། དུས་སྐབས་དེའི་སྤྱི་ཚོགས་ཀྱི་ཁོར་ཡུག་དང་ལོ་རྒྱུས་ཀྱི་རྒྱབ་ལྗོངས། མི་རྣམས་ཀྱི་ལྟ་བ་དང་གོ་བ་ལེན་སྟངས། ངོས་འཛིན་བྱེད་སྟངས་སོགས་ལ་ཐད་ཀ་རྒྱུས་ལོན་ཐུབ་ཅིང་། དེ་ནི་དུས་རབས་མི་འདྲ་བའི་མི་དང་ཁ་བརྡ་བྱེད་པ་དང་མཚུངས། དེ་ལྟ་བུའི་བསམ་བློ་བརྗེ་རེས་བྱས་ན། རང་ཉིད་ཀྱི་བློ་སྒོ་འབྱེད་པ་དང་ཤེས་རབ་འཕེལ་རྒྱས་གཏོང་བ་ལ་ཕན་ཐོགས་ཆེན་པོ་ཡོད། གཉིས་ནས། དཔེ་ཆ་སྐད་གྲགས་ཅན་བཀླག་དགོས་ཏེ། ལོ་རྒྱུས་ཀྱི་འཁོར་འགྲོས་འོག་བསྲེག་བཅད་བརྡར་གསུམ་བྱས་པའི་དཔེ་ཆ་སྐད་གྲགས་ཅན་གྱིས་རང་གི་འཇིག་རྟེན་ལྟ་བ་དང་རིན་ཐང་ལྟ་བ། མི་ཚེའི་ལྟ་བ་བཅས་ཡང་དག་གི་ལམ་དུ་འཁྲིད་ཐུབ་ཅིང་། དཔེ་ཀློག་གི་དུས་ཚོད་ཆུད་ཟོས་སུ་འགྲོ་མི་སྲིད།

གསར་འགོད་པ། མ་འོངས་པར་རིག་གཞུང་ཞིབ་འཇུག་དང་སློབ་མ་གསོ་སྐྱོང་ཐད་དགོངས་འཆར་ག་འདྲ་ཡོད།

མི་ཉག་ཀུན་དགའ་རྒྱལ་མཚན། ངས་ཐོག་མཐའ་བར་གསུམ་དུ་གཙོ་བོ་བོད་ཀྱི་སྲོལ་རྒྱུན་རིག་གནས་དང་སྲོལ་རྒྱུན་རིག་གཞུང་ལ་སློབ་སྦྱོང་དང་ཞིབ་འཇུག་བྱེད་བཞིན་ཡོད་ལ། སྲོལ་རྒྱུན་སློབ་གསོ་མྱོང་བའི་གོ་སྐབས་ཐོབ་ཅིང་། དེ་ལ་རྒྱུས་མངའ་གང་འཚམས་ཡོད་སྟབས། མ་འོངས་པ་ལའང་ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་ཀྱི་གྲུབ་ཆ་གལ་ཆེན་ཏེ་བོད་ཀྱི་སྲོལ་རྒྱུན་རིག་གནས་ལ་མུ་མཐུད་དུ་ཞིབ་འཇུག་ཅུང་ཙམ་ཨེ་ཐུབ་བསམ་པའི་རེ་བ་དང་། ཆ་རྒྱུས་ཡོད་པའི་སྒོ་ནས་འགྲེལ་བཤད་དང་ཞིབ་འཇུག་གི་གྲུབ་འབྲས་ཕྲན་བུ་འཇོག་ཐུབ་ན། རང་ངོས་ནས་བྱས་རྗེས་ཆེན་པོ་ཞིག་ཏུ་བརྩི་བཞིན་ཡོད། སློབ་མ་གསོ་སྐྱོང་ཐད་ནས་བྱང་ཚད་དང་མི་གཞིའི་སློབ་གསོ་གཙིགས་སུ་འཛིན་ནས། སློབ་མ་ཚོ་མི་གཞི་ཡག་མོ་ཞིག་ཡོང་ཐབས་དང་སྤྱི་ཚོགས་ལ་ཕན་ཐོགས་མཁན་ཞིག་གི་ལམ་དུ་འཁྲིད་ཨེ་ཐུབ་བལྟ་རྒྱུ་སོགས་མདོར་ན། བསམ་བློ་ཀུན་སྤྱོད་བཟང་ཞིང་། ལུས་སེམས་བདེ་ཐང་ཡིན་པ། ཤེས་རིག་ཡོན་ཏན་ལྡན་པའི་རྗེས་རབས་པ་གསོ་སྐྱོང་གི་ཆེད་དུ་མུ་མཐུད་ནས་ནུས་ཤུགས་ཡོད་རྒུ་བཏོན་དང་འདོན་ཁུལ་ཡིན་ལགས།

ངོ་སྤྲོད་རགས་བསྡུས།

མི་ཉག་ཀུན་དགའ་རྒྱལ་མཚན་ནི་1971ལོར་ཁམས་མི་ཉག་ས་ཁུལ་ཏེ་དཀར་མཛེས་ཁུལ་དར་མདོ་རྫོང་སྐྱ་གད་གྲོང་རྡལ་དུ་སྐྱེས་ཤིང་། 1993ལོར་རྟའུ་རྫོང་སྲིད་གྲོས་ནས་སི་ཁྲོན་ཞིང་ཆེན་བོད་ཡིག་སློབ་གྲྭ་རུ་ལས་གནས་སྤོས། སྔ་ཕྱིར་མི་ལོ་སུམ་ཅུ་ལ་ཉེ་བའི་རིང་སློབ་གསོ་དང་སློབ་ཁྲིད་ཀྱི་ལས་དོན་བསྒྲུབས། 2005ལོར་ལྷོ་ནུབ་མི་རིགས་སློབ་གྲྭ་ཆེན་མོ་ནས་རབ་འབྱམས་པའི་སློབ་མཐར་ཕྱིན།

དཔྱད་རྩོམ་སྐོར་ལ《བྱ་ཚིག་ལ་འཇུག་པའི་ལམ་བུ།》《ལ་དོན་གྱི་སྐོར་ལ་དཔྱད་པ།》《བོད་ཀྱི་བརྡ་སྤྲོད་རིག་པའི་འགྲོས་ཀྱི་འཕོ་འགྱུར་ལ་དཔྱད་པ།》《སུམ་རྟགས་སྐོར་གྱི་རྩོད་གླེང་ལས་འཕྲོས་པའི་བསམ་ཚུལ་ཁ་ཤས།》སོགས་དང་། དམངས་ཁྲོད་རིག་གནས་ཀྱི་སྐོར་ལ《རྒྱལ་རོང་སོག་པོ་ས་ཁུལ་གྱི་བག་སྟོན་དང་ཤིད་སྒྲུབ་ཀྱི་སྐོར།》《མི་ཉག་ས་ཁུལ་གྱི་རྡོ་རྩིག་ལག་རྩལ་སྐོར།》སོགས་དང་། སྒྱུར་རྩོམ་སྐོར་ལ《1990ལོ་ནས་1994ལོའི་བར་གྱི་རྟའུ་རྫོང་སྲིད་གྲོས་དང་ཆོས་ལུགས་ལས་ཁུངས་སོགས་ཀྱི་ཡིག་ཆ་སྣ་ཚོགས་ཀྱི་སྒྱུར་ཡིག》《དུས་རབས་ཉེར་གཅིག་པའི་ཀྲུང་གོའི་སློབ་གསོའི་འགན་འཁྲི》སོགས་སྔ་ཕྱིར་བསྡོམས་པས་རྩོམ་ཡིག་བཅུ་ཁ་ཞིག་བྲིས་ཏེ། 《བདེན་འཚོལ།》དང་《ལྷོ་ནུབ་མི་རིགས་སློབ་ཆེན་གྱི་རིག་གཞུང་དུས་དེབ།》《མི་རིགས།》《གངས་དཀར་རི་བོ།》《མདོ་སྟོད་ཞིབ་འཇུག》《ཀན་ལྷོ་མི་རིགས་རིག་གནས་ཞིབ་འཇུག》སོགས་དུས་དེབ་ཁག་ཏུ་འགྲེམས་སྤེལ་བྱས།

དེ་བཞིན་དཔེ་ཆའི་སྐོར་ལ། 《བརྡ་སྤྲོད་སློབ་དེབ་ཀྱི་བསམ་གཞིག་དང་སྦྱོང་གཞི་དག་གི་དཔྱད་གཞིའི་ལན་ཡིག》དང་《བོད་ཀྱི་ཡིག་གཟུགས་མེས་པོའི་མཛུབ་རིས་གསལ་བའི་མེ་ལོང་།》《ཡི་གེའི་བསྟན་བཅོས་སྟོང་ཐུན། 》བཅས་སྔ་ཕྱིར་མི་རིགས་དཔེ་སྐྲུན་ཁང་དང་སི་ཁྲོན་མི་རིགས་དཔེ་སྐྲུན་ཁང་ནས་དཔར་དུ་བསྐྲུན་ཏེ་འགྲེམས་སྤེལ་བྱས།

2009ལོ་ནས་2011ལོའི་བར་སི་ཁྲོན་ཞིང་ཆེན་བོད་ཡིག་སློབ་གྲྭའི་ལོ་རྒྱུས་རྩོམ་སྒྲིག་ཨུ་ཡོན་ལྷན་ཚོགས་ཀྱི་བོད་ཡིག་གི་དེབ་རྩོམ་སྒྲིག་པ་གཙོ་བོ་གཞོན་པའི་འགན་ཁུར་ནས། སློབ་གྲྭའི་ལོ་རྒྱུས་དང་སློབ་གྲྭའི་ལོ་རྒྱུས་ཀྱི་པར་རིས་སོགས་ཀྱི་རྩོམ་སྒྲིག་གི་བྱ་བར་ཞུགས། དེ་རྗེས་སྔ་ཕྱིར་སི་ཁྲོན་ཞིང་ཆེན་བོད་ཡིག་སློབ་གྲྭའི་བརྡ་སྤྲོད་སློབ་དེབ་ཀྱི་ལྷན་ཐབས་དང་། བོད་ཡིག་གི་བྲིས་གཟུགས་སློབ་དེབ་ཀྱི་རྩོམ་སྒྲིག །ད་དུང་བོད་རང་སྐྱོང་ལྗོངས་རྩོམ་སྒྱུར་ཅུས་ནས་རྩ་འཛུགས་བྱས་པའི་བོད་སྐད་ཀྱི་ཐ་སྙད་གསར་པ་གཅིག་གྱུར་བཟོ་བའི་བརྡ་སྤྲོད་ཀྱི་སྤྱིའི་རྩ་འཛིན་རྩོམ་སྒྲིག་སོགས་ཀྱི་བྱ་བའམ་ལས་གཞི་ལ་ཞུགས། དེ་མིན་དུས་རྒྱུན་དཀར་མཛེས་ཁུལ་བྲིས་གཟུགས་ཐུན་ཚོགས་ཀྱི་ལས་ཀ་ལ་ཞུགས་ཏེ་བོད་ཡིག་གི་བྲིས་གཟུགས་སྐོར་ལ་འགན་ཁུར་དང་འཁུར་བཞིན་ཡོད། །