སི་ཁྲོན་ཞིང་ཆེན་མི་རིགས་མཐུན་སྒྲིལ་ཡར་ཐོན་གྱི་སྲོལ་ཡིག

ལེའུ་དང་པོ། སྤྱི་དོན།

དོན་ཚན་དང་པོ། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོ་འཛུགས་པ་དང་། ཀྲུང་ཧྭ་མི་རིགས་ཀྱི་སྣ་མང་གཞི་གཅིག་ཏུ་འགྱུར་བའི་གནས་སྟངས་སྲ་བརྟན་དུ་གཏོང་བ། ཀྲུང་ཧྭ་མི་རིགས་གཅིག་མཐུན་ཚོགས་པ་འཛུགས་སྐྱོང་བྱེད་ཤུགས་ཆེ་རུ་གཏོང་བ། དུས་རབས་གསར་པའི་མི་རིགས་མཐུན་སྒྲིལ་ཡར་ཐོན་བྱ་གཞག་སྤུས་ཚད་མཐོ་བའི་འཕེལ་རྒྱས་ཡོང་བར་སྐུལ་འདེད་གཏོང་བ་བཅས་ཀྱི་ཆེད་དུ་རྩ་ཁྲིམས་དང་འབྲེལ་ཡོད་བཅའ་ཁྲིམས་དང་ཁྲིམས་སྲོལ་གཞིར་བཟུང་བ་དང་། སི་ཁྲོན་ཞིང་ཆེན་གྱི་དོན་དངོས་དང་ཟུང་འབྲེལ་བྱས་ནས་སྲོལ་ཡིག་འདི་བཟོས་པ་ཡིན།

དོན་ཚན་གཉིས་པ། སི་ཁྲོན་ཞིང་ཆེན་གྱི་སྲིད་འཛིན་ས་ཁོངས་ནང་གི་མི་རིགས་མཐུན་སྒྲིལ་ཡར་ཐོན་བྱ་གཞག་དང་འབྲེལ་བའི་ལས་དོན་དང་བྱེད་སྒོ་ཁག་ལ་སྲོལ་ཡིག་འདི་སྤྱད་འཐུས།

དོན་ཚན་གསུམ་པ། མི་རིགས་མཐུན་སྒྲིལ་ཡར་ཐོན་བྱ་གཞག་གིས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་མཛུབ་སྟོན་དུ་འཛིན་རྒྱུ་རྒྱུན་འཁྱོངས་དང་། མི་རིགས་ལས་དོན་ལ་ཤུགས་སྣོན་དང་ལེགས་བཅོས་བྱ་རྒྱུའི་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་དགོངས་པ་གལ་ཆེན་རྩ་བའི་གཞི་འཛིན་སར་བྱས་ཏེ། བློ་བརྟན་འགྱུར་མེད་ཀྱིས་ཀྲུང་གོའི་ཁྱད་ཆོས་ལྡན་པའི་མི་རིགས་གནད་དོན་ཐག་གཅོད་བྱེད་པའི་ཡང་དག་པའི་བགྲོད་ལམ་དུ་བསྐྱོད་པ། མི་རིགས་ཁག་གིས་རླབས་ཆེན་མེས་རྒྱལ་དང་། ཀྲུང་ཧྭ་མི་རིགས། ཀྲུང་ཧྭའི་རིག་གནས། ཀྲུང་གོའི་གུང་ཁྲན་ཏང་། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་བཅས་ལ་ཚད་མཐོའི་ངོས་འཛིན་གཅིག་མཐུན་ཡོང་བར་སྐུལ་འདེད་གཏོང་བ་དང་། ཀྲུང་ཧྭ་མི་རིགས་སྣ་མང་གཞི་གཅིག་ཏུ་འགྱུར་བའི་གནས་སྟངས་ཀྱི་འདུ་ཤེས་བརྟན་པོ་འཛུགས་པ། མི་རིགས་ཁག་ཐུན་མོང་ཐོག་མཐུན་སྒྲིལ་འབད་འཐབ་དང་ཐུན་མོང་ཐོག་དར་རྒྱས་གོང་འཕེལ་ཡོང་བར་སྐུལ་འདེད་གཏོང་བ། མི་རིགས་ཁག་ཐུན་མོང་ཐོག་སྤྱི་ཚོགས་རིང་ལུགས་ཀྱི་དེང་རབས་ཅན་དུ་འགྱུར་བའི་ཕྱོགས་སུ་སྐྱོད་པར་ནུས་ཤུགས་ཡོད་རྒུས་སྐུལ་འདེད་གཏོང་བ་བཅས་བྱ་དགོས།

དོན་ཚན་བཞི་པ། མི་རིགས་མཐུན་སྒྲིལ་ཡར་ཐོན་བྱ་གཞག་གིས་ཀྲུང་གོའི་གུང་ཁྲན་ཏང་གི་དབུ་ཁྲིད་རྒྱུན་འཁྱོངས་དང་། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་བགྲོད་ལམ་རྒྱུན་འཁྱོངས། མེས་རྒྱལ་གཅིག་གྱུར་སྲུང་སྐྱོང་རྒྱུན་འཁྱོངས། མི་རིགས་ཁག་ཚང་མ་འདྲ་མཉམ་ཡིན་པ་རྒྱུན་འཁྱོངས། མི་རིགས་ས་ཁོངས་རང་སྐྱོང་ལམ་ལུགས་རྒྱུན་འཁྱོངས་དང་འཐུས་ཚང་དུ་གཏོང་བ། རྒྱལ་ཁབ་ཀྱི་ཁྲིམས་སྐྱོང་གཅིག་གྱུར་རྒྱུན་འཁྱོངས་བཅས་བྱས་ཏེ། མི་རིགས་ཁ་བྲལ་ལ་ངོ་རྒོལ་མཐའ་གཅིག་ཏུ་བྱ་དགོས།

དོན་ཚན་ལྔ་པ། མི་རིགས་མཐུན་སྒྲིལ་ཡར་ཐོན་བྱ་གཞག་ལ་ཏང་ཨུས་གཅིག་གྱུར་འགོ་ཁྲིད་དང་།

སྲིད་གཞུང་གིས་ཁྲིམས་ལྟར་དོ་དམ། འཐབ་ཕྱོགས་གཅིག་གྱུར་སྡེ་ཁག་གིས་སྣེ་ཁྲིད་མཐུན་སྦྱོར། མི་རིགས་ལས་དོན་སྡེ་ཁག་གིས་རང་འགན་གཙང་སྒྲུབ། སྡེ་ཁག་ཁག་གིས་སྟོབས་ཤུགས་གཅིག་སྒྲིལ་གྱིས་མཉམ་ལས། སྤྱི་ཚོགས་ཡོངས་མཉམ་དུ་ཞུགས་པ་བཅས་ཀྱི་ལས་དོན་ལམ་སྲོལ་འཛུགས་པ་དང་འཐུས་ཚང་དུ་གཏོང་དགོས།

དོན་ཚན་དྲུག་པ། རྫོང་རིམ་པ་ཡན་གྱི་ས་གནས་མི་དམངས་སྲིད་གཞུང་གིས་མི་རིགས་མཐུན་སྒྲིལ་ཡར་ཐོན་གྱི་བྱ་གཞག་དེ་རྒྱལ་དམངས་དཔལ་འབྱོར་དང་སྤྱི་ཚོགས་གོང་འཕེལ་གྱི་སྤྱིའི་འཆར་འགོད་དང་ལོ་འཁོར་འཆར་གཞིའི་ནང་འཇུག་དགོས་པ་དང་། མི་རིགས་མཐུན་སྒྲིལ་ཡར་ཐོན་གྱི་བྱ་གཞག་ཡུན་ཕན་ལམ་སྲོལ་འཛུགས་པ་དང་འཐུས་ཚང་དུ་གཏོང་བ་དང་། དཔལ་འབྱོར་དང་སྤྱི་ཚོགས་གོང་འཕེལ་གྱི་ལས་དོན་དང་ཟུང་འབྲེལ་བྱས་ཏེ། རྒྱུན་ཆད་མེད་པར་དམངས་འཚོ་ལེགས་བཅོས་དང་བདེ་སྐྱིད་ཇེ་ཆེར་གཏོང་བ་དང་། བླ་སྲོག་སྐྲུན་པ་དང་མི་སེམས་གོང་བུར་སྒྲིལ་བ། མི་རིགས་མཐུན་སྒྲིལ་ཡར་ཐོན་བྱ་གཞག་གི་རྨང་གཞི་བརྟན་དུ་གཏོང་དགོས།

ས་གནས་མི་དམངས་སྲིད་གཞུང་རིམ་པ་ཁག་གིས་ཏང་གི་མི་རིགས་སྲིད་ཇུས་དང་རྒྱལ་ཁབ་ཀྱི་བཅའ་ཁྲིམས་དང་ཁྲིམས་སྲོལ་ཕྱོགས་ཡོངས་ནས་ལག་བསྟར་གནད་ལ་འཁེལ་བ་བྱས་ཏེ། མི་རིགས་མཐུན་སྒྲིལ་སྲུང་སྐྱོང་ལ་སྣེ་ཁྲིད་དང་། མི་རིགས་མཐུན་སྒྲིལ་ཡར་ཐོན་གྱི་དྲིལ་བསྒྲགས་སློབ་གསོར་ཤུགས་སྣོན་བརྒྱབ་ནས། མི་རིགས་ཁག་འགྲོ་འོང་སྤེལ་རེས་དང་མཉམ་འདྲེས་ཡོང་བར་སྐུལ་འདེད་གཏོང་དགོས།

དོན་ཚན་བདུན་པ། རྫོང་རིམ་པ་ཡན་གྱི་ས་གནས་མི་དམངས་སྲིད་གཞུང་གི་མི་རིགས་ལས་དོན་སྡེ་ཁག་ནི་སྲིད་འཛིན་ས་ཁོངས་དེ་གའི་ནང་གི་མི་རིགས་མཐུན་སྒྲིལ་ཡར་ཐོན་བྱ་གཞག་གི་སྲིད་འཛིན་གཙོ་སྐྱོང་སྡེ་ཁག་ཡིན་ཞིང་། ལས་དོན་བཀོད་སྒྲིག་དང་། ལས་སྒོའི་མཛུབ་སྟོན། དོན་འཁྱོལ་ལ་སྐུལ་འདེད་སོགས་ཞིབ་ཕྲའི་ལས་དོན་ཡག་པོ་སྒྲུབ་འགན་འཁུར་དགོས།

རྫོང་རིམ་པ་ཡན་གྱི་ས་གནས་མི་དམངས་སྲིད་གཞུང་གི་འབྲེལ་ཡོད་སྡེ་ཁག(སྡེ་ཚན)གཞན་དག་གིས་སོ་སོའི་འགན་འཁྲིའི་ཁྱབ་ཁོངས་ནང་མི་རིགས་མཐུན་སྒྲིལ་ཡར་ཐོན་བྱ་གཞག་དང་འབྲེལ་བའི་ལས་དོན་ཡག་པོ་བསྒྲུབ་དགོས།

ཤང་(གྲོང་རྡལ)མི་དམངས་སྲིད་གཞུང་དང་ཁྲོམ་གཞུང་དོན་གཅོད་ཁྲུའུ་ཡིས་ས་ཁོངས་དེ་གའི་ནང་གི་མི་རིགས་མཐུན་སྒྲིལ་ཡར་ཐོན་བྱ་གཞག་དང་འབྲེལ་བའི་ལས་དོན་ཡག་པོ་བསྒྲུབ་དགོས།

གྲོང་ཚོ(གྲོང་མི)ཨུ་ཡོན་ལྷན་ཁང་གིས་ཤང་(གྲོང་རྡལ)མི་དམངས་སྲིད་གཞུང་དང་ཁྲོམ་གཞུང་དོན་གཅོད་ཁྲུའུ་ལ་གཞོགས་འདེགས་བྱས་ནས་མི་རིགས་མཐུན་སྒྲིལ་ཡར་ཐོན་བྱ་གཞག་གི་འབྲེལ་ཡོད་ལས་དོན་སྤེལ་དགོས།

དོན་ཚན་བརྒྱད་པ། བཟོ་ཚོགས་དང་། གུང་གཞོན་ཚོགས་པ། བུད་མེད་མཉམ་འབྲེལ་ལྷན་ཚོགས། རྩོམ་རིག་སྒྱུ་རྩལ་མཉམ་འབྲེལ་ལྷན་ཚོགས། ཚན་རྩལ་མཐུན་ཚོགས། བཟོ་ཚོང་མཉམ་འབྲེལ་ལྷན་ཚོགས། དབང་པོ་སྐྱོན་ཅན་མཉམ་འབྲེལ་ལྷན་ཚོགས། སྤྱི་ཚོགས་ཚན་རིག་མཉམ་འབྲེལ་ལྷན་ཚོགས། རྒྱ་གྲམ་དམར་པོའི་ཚོགས་པ། ཕྱིར་སྡོད་རང་མིའི་མཉམ་འབྲེལ་ལྷན་ཚོགས་སོགས་ཚོགས་པས་རང་རང་གི་ཁྱད་ཆོས་དང་དགེ་མཚན་འདོན་སྤེལ་བྱས་ཏེ། མི་རིགས་མཐུན་སྒྲིལ་ཡར་ཐོན་ལ་སྐུལ་འདེད་གཏོང་བའི་འབྲེལ་ཡོད་ལས་དོན་སྤེལ་དགོས།

ཁེ་ལས་དང་བྱ་ལས་སྡེ་ཚན་དང་སྤྱི་ཚོགས་ཀྱི་རྩ་འཛུགས་གཞན་དག་གིས་སྤྱི་ཚོགས་ཀྱི་འགན་འཁྲི་སྒྲུབ་པ་དང་། སོ་སོའི་རྩ་འཛུགས་ཀྱི་ནུས་པ་དང་ཟུང་སྦྲེལ་བྱས་ཏེ་མི་རིགས་མཐུན་སྒྲིལ་ཡར་ཐོན་ཡོང་བར་སྐུལ་འདེད་གཏོང་བའི་འབྲེལ་ཡོད་ལས་དོན་སྤེལ་དགོས།

དོན་ཚན་དགུ་པ། མི་རིགས་ཁག་གི་སྤྱི་དམངས་ཀྱིས་མི་རིགས་མཐུན་སྒྲིལ་སྲུང་སྐྱོང་ཧུར་ཐག་བྱས་ཏེ། རང་རྟོགས་ཀྱིས་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོ་འཛུགས་རྒྱུ་དེ་ཁྱིམ་ཚང་དང་། ཁྱིམ་ཚང་སློབ་གསོ། ཁྱིམ་སྲོལ་བཅས་སུ་འཇུག་པ་དང་། རང་རྟོགས་ཀྱིས་མི་རིགས་ལ་མཐོང་ཆུང་དང་། མི་རིགས་ལ་བརྙས་བཅོས། མི་རིགས་ཁ་ཕྲལ་གཏོང་བ། རྒྱལ་ཁབ་གཅིག་གྱུར་ཡོང་བར་གནོད་འཚེ་གཏོང་བ་བཅས་ཀྱི་གཏམ་སྤྱོད་བཀག་འགོག་བྱ་དགོས། རྒྱལ་ཁབ་ལས་ཁུངས་ལ་རང་འགུལ་ངང་གཞོགས་འདེགས་བྱས་ནས་མི་རིགས་མཐུན་སྒྲིལ་ལ་གཏོར་བཤིག་གཏོང་བ་དང་། རྒྱལ་ཁབ་གཅིག་གྱུར་ལ་གནོད་འཚེ་གཏོང་བ། སྤྱི་ཚོགས་བརྟན་བརླིང་ལ་གཏོར་བཤིག་གཏོང་བ་བཅས་ཀྱི་ཁྲིམས་འགལ་ཉེས་གསོག་བྱ་སྤྱོད་ལ་རྡུང་རྡེག་བྱ་དགོས།

དོན་ཚན་བཅུ་པ། ལྟ་ཞིབ་ལས་ཁུངས་དང་།

འདྲི་གཅོད་ལས་ཁུངས། ཞིབ་དཔྱོད་ལས་ཁུངས། སྤྱི་བདེ་ལས་ཁུངས། རྒྱལ་ཁབ་བདེ་སྲུང་ལས་ཁུངས་བཅས་རིམ་པ་ཁག་གིས་རྒྱལ་ཁབ་ཀྱི་གཅིག་གྱུར་ལ་གནོད་འཚེ་གཏོང་བ་དང་། མི་རིགས་མཐུན་སྒྲིལ་ལ་གཏོར་བཤིག་གཏོང་བ། སྤྱི་ཚོགས་བརྟན་བརླིང་ལ་གཏོར་བཤིག་གཏོང་བ་བཅས་ཀྱི་ཁྲིམས་འགལ་ཉེས་གསོག་བྱ་སྤྱོད་ལ་ཁྲིམས་ལྟར་དོགས་ཟོན་དང་རྡུང་རྡེག་གཏོང་དགོས།

དོན་ཚན་བཅུ་གཅིག་པ། མཐོ་རིམ་སློབ་གྲྭ་དང་། ལས་བྱེད་པ་གསོ་སྐྱོང་སྦྱོང་བརྡར་ལས་ཁུངས། ཚན་རིག་ཞིབ་འཇུག་ཁང་། རིག་གཞུང་ཚོགས་པ་སོགས་ཀྱིས་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་མི་རིགས་སྐོར་གྱི་རིགས་པའི་གཞུང་ལུགས་དང་། མི་རིགས་སྲིད་ཇུས། ལག་ལེན་ཞིབ་འཇུག་བཅས་ལ་ཤུགས་སྣོན་བརྒྱབ་སྟེ་མི་རིགས་མཐུན་སྒྲིལ་ཡར་ཐོན་བྱ་གཞག་ལ་སྐུལ་འདེད་གཏོང་བར་ཚན་རིག་དང་མཐུན་པའི་རིགས་པའི་གཞུང་ལུགས་ཀྱི་འདེགས་སྐྱོར་དང་ལག་ལེན་གྱི་མཛུབ་སྟོན་མཁོ་འདོན་བྱ་དགོས།

དོན་ཚན་བཅུ་གཉིས་པ། རླུང་འཕྲིན་དང་། བརྙན་འཕྲིན། ཚགས་པར་དང་དུས་དེབ། འཕྲིན་སྦྲེལ་དྲ་བ་སོགས་ཀྱི་སྨྱན་སྦྱོར་གྱིས་གསར་འགྱུར་འགོད་སྤེལ་དང་། སྤྱི་ཕན་བརྡ་ཁྱབ། སྤྱི་པའི་འཕྲིན་སྟེགས། པོད་ཕྲན་སོགས་ཀྱི་རྣམ་པའི་ཐོག་ནས་དྲིལ་བསྒྲགས་བྱེད་སྒོ་སྤེལ་ཏེ་སྤྱི་ཚོགས་ཡོངས་ཀྱིས་ཐུན་མོང་ཐོག་མི་རིགས་མཐུན་སྒྲིལ་ཡར་ཐོན་ཡོང་བར་སྐུལ་འདེད་གཏོང་བའི་ཁོར་ཡུག་བཟང་པོ་བསྐྲུན་དགོས།

དོན་ཚན་བཅུ་གསུམ་པ། ལོ་རེའི་ཟླ་དགུ་པ་ནི་སི་ཁྲོན་ཞིང་ཆེན་གྱི་མི་རིགས་མཐུན་སྒྲིལ་ཡར་ཐོན་གྱི་དྲིལ་བསྒྲགས་ཟླ་བ་ཡིན་ཞིང་། ཞིང་ཆེན་ཡོངས་སུ་མི་རིགས་མཐུན་སྒྲིལ་ཡར་ཐོན་གྱི་དྲིལ་བསྒྲགས་སློབ་གསོའི་བྱེད་སྒོ་གཅིག་བསྡུས་ཀྱིས་སྤེལ་དགོས།

དོན་ཚན་བཅུ་བཞི་པ། མི་རིགས་མཐུན་སྒྲིལ་ཡར་ཐོན་གྱི་བྱ་གཞག་ལ་ཕྱི་རྒྱལ་གྱི་སྟོབས་ཤུགས་ཀྱིས་ཁ་ལོ་སྒྱུར་བ་དང་ཐེ་གཏོགས་བྱེད་མི་རུང་།

ཕྱི་ཕྱོགས་དང་མཉམ་ལས་སྤེལ་རེས་བྱེད་རིང་མི་རིགས་མཐུན་སྒྲིལ་ལ་གནོད་པའམ་གནོད་འཚེ་གཏོང་བའི་ཆ་རྐྱེན་དང་ནང་དོན་ཡོད་མི་ཆོག

རྩ་འཛུགས་གང་དང་སྐྱེ་བོ་སུ་ཞིག་ཡིན་རུང་ཕྱི་རྒྱལ་གྱི་སྟོབས་ཤུགས་ཀྱི་གླ་པ་དང་མངག་གཏོང་དང་ལེན་བྱས་ནས། མི་རིགས་མཐུན་སྒྲིལ་ལ་གཏོར་བཤིག་གཏོང་བ་དང་རྒྱལ་ཁབ་ཀྱི་གཅིག་གྱུར་ལ་གནོད་འཚེ་གཏོང་བའི་བྱ་སྤྱོད་སྤེལ་མི་ཆོག །