བོད་ཀྱི་དམངས་ཁྲོད་གླུ་གཞས་ཀྱི་ཁྱད་ཆོས་དང་ཡིག་བསྒྱུར་བྱེད་སྟངས།

བོད་མི་རིགས་ཀྱི་ཕུན་སུམ་ཚོགས་པའི་གླུ་གར་རང་གི་ཁྱད་ཆོས་ལ་བརྟེན་ནས་འཛམ་གླིང་གི་ཤ་མདོག་མི་འདྲ་བའི་མི་རྣམས་ཀྱི་ཡིད་དབང་ཅིག་ཅར་འཕྲོག་ནས། དྲི་ལྡན་མེ་ཏོག་རྒྱང་རིང་ཡང་། བུང་བ་སྤྲིན་གྱིས་ཚོགས་བཞིན་འཁོར་ཞེས་པ་ལྟར་རོ། །འོན་ཀྱང་བོད་ཀྱི་གླུ་གཞས（དམངས་གཞས་དང་གསར་རྩོམ་གླུ་གཞས）བཅས་རྒྱ་ཡིག་ཏུ་བསྒྱུར་སྐབས་གནད་དོན་མི་ཉུང་བ་ཞིག་འདུག །དེར་བརྟེན་དམངས་གཞས་ལ་དུང་མཁན་ཞིག་ཡིན་པའི་ཆ་ནས་རིག་གནས་འགན་འཁྲིའི་བསམ་པ་ཡིད་ལ་བཅངས་ནས་བོད་ཀྱི་གླུ་གར་རིག་གནས་ཁྲོད་ཀྱི་བོད་རྒྱ་སྐད་ཡིག་གཉིས་ཡིག་སྒྱུར་བྱེད་པ་ནས་འགོ་བཙུགས་ཏེ་བོད་རྒྱ་རིག་གནས་ཡིག་སྒྱུར་གྱི་རིགས་པའི་གཞུང་ལུགས་དང་ལག་ལེན་ལ་གཞིགས་ནས་རང་ཉིད་ཀྱིས་ཞིབ་འཇུག་དང་དབྱེ་ཞིབ། བསམ་གཞིག་བཅས་རགས་ཙམ་བཏོན་པ་གཤམ་གསལ་ལྟར།

དང་པོ། བོད་གཞས་རྒྱ་ཡིག་ཏུ་སྒྱུར་སྐབས་རྩ་གནད་ཁོང་དུ་ཆུད་པར་བྱེད་དགོས། 

བོད་ཀྱི་དམངས་ཁྲོད་གླུ་གར་ལ་ཕུན་སུམ་ཚོགས་པའི་སྐད་ཆའི་མཛེས་རྩལ་དང་ཐུན་མོང་མ་ཡིན་པའི་ཁྱད་ཆོས། ཚགས་དམ་པའི་གྲུབ་ཆ། ད་དུང་བོད་མི་རིགས་ཀྱི་འཚོ་བ་དངོས་སྟོན་ཐུབ་པའི་ཁྱད་ཆོས་བཅས་ཡོད་པས་འདི་ནི་ཀྲུང་ཧྭ་མི་རིགས་ཀྱི་ངག་རིག་སྒྱུ་རྩལ་ངོ་མཚར་ཆེ་ལ་ཁྱད་དུ་འཕགས་པའི་ནོར་བུ་རྩ་ཆེན་ཞིག་ཡིན་ཞིང་། བོད་ཀྱི་གླུ་གཞས་བརྩམས་ཆོས་རྒྱ་ཡིག་ཏུ་བསྒྱུར་བ་ནི་རྩོམ་རིག་ཡིག་སྒྱུར་གྱི་དཔྱད་གཞི་གལ་ཆེན་ཞིག་ཡིན་པས་བྱེ་བྲག་གི་ལག་ལེན་ཁྲོད་དུ། གཤམ་གྱི་ཕྱོགས་གསུམ་ལ་དོ་སྣང་བྱེད་དགོས་བསམ།

（གཅིག）བོད་རྒྱ་ཡིག་སྒྱུར་རིགས་པའི་གཞུང་ལུགས་ཀྱི་གཞི་འཛིན་སར་དོ་སྣང་བྱེད་དགོས། 

བོད་གཞས་རྒྱ་ཡིག་ཏུ་བསྒྱུར་སྐབས་དེ་ལ་རྩོམ་རིག་བརྩམས་ཆོས་ཀྱི་ཐུན་མོང་མ་ཡིན་པའི་ཁྱད་ཆོས་ཡོད་པར་བསམ་གཞིགས་བྱེད་དགོས་པར་མ་ཟད། ད་དུང་བོད་ཀྱི་རིག་གནས་ཀྱི་ཁྱད་གཞི་དང་ཁྱད་ཆོས་ཟུང་འབྲེལ་བྱས་ནས། ཚིག་གི་སྡེབ་སྦྱོར་དང་རྒྱབ་ལྗོངས་ཀྱི་ལོ་རྒྱུས། སྐབས་དེའི་གནས་བབས་སོགས་ལ་རྒྱུས་ལོན་གཟབ་མོ་བྱས་ན། གཞི་ནས་དམངས་གླུའི་ཁྱད་ཆོས་མཚོན་ཐུབ་པར་མ་ཟད་གསར་གཏོད་ཀྱི་རྣམ་པའི་ཐོག་ནས་སྤུས་ཚད་མཐོ་བའི་ཡིག་སྒྱུར་གྱི་བརྩམ་ཆོས་ཞིག་ཆགས་ཐུབ། དེའི་ཕྱིར་བོད་གཞས་རྒྱ་ཡིག་ཏུ་བསྒྱུར་ན་ཡང་གཞི་རྩའི་གཞི་འཛིན་ས་དེ་ངེས་པར་དུ་བརྩི་སྲུང་ནན་པོ་བྱེད་དགོས། 

བོད་གཞས་བལྟས་ཚོད་ལ་གོ་བདེ་ཞིང་ཤེས་སླ་བ་ཞིག་ཏུ་སྣང་ཡང་དེར་བོད་མིའི་སྤྱི་ཚོགས་འཚོ་བའི་ཁྱབ་ཁོངས་ཁག་ཚུད་ཡོད་ཅིང་། ཡིག་ཐོག་གི་གོ་བ་ལས་ད་དུང་རིག་གནས་ཀྱི་དོན་སྙིང་ཟབ་མོ་ལྡན། 

སྤྱིར་ཡིག་སྒྱུར་མཁན་ལ་རྩོམ་རིག་གི་ཤེས་བྱ་ཡོན་ཏན་གཏིང་ཟབ་མོ་དང་ཐུན་མོང་མ་ཡིན་པའི་རིག་གནས་ཀྱི་བསམ་གཞིག་ནུས་པའང་ལྡན་དགོས་པར་མ་ཟད། ད་དུང་སྐད་ཡིག་གཉིས་ཀྱི་སྐད་ཆའི་སྒྱུ་རྩལ་དང་བྱང་ཆ་ལྡན་པའི་ཡིག་སྒྱུར་གྱི་ཐབས་ཤེས་བཅས་འཛོམས་ཡོད་ན་ད་གཟོད་ཚད་མཐོ་བའི་ཡིག་སྒྱུར་བརྩམས་ཆོས་ལེགས་པོ་ཞིག་གཞི་ནས་མངོན་འགྱུར་ཡོང་ཐུབ། སྐབས་འགར་མ་རྩོམ་ནང་གི་མི་དང་ས་མིང་། དེ་མིན་མི་རིགས་ཀྱི་ཁྱད་ཆོས་མང་པོ་ལྡན་པའི་ཆེད་ལས་ཀྱི་མིང་ཚིག་ལྡན་ཚེ་སྒྲ་བསྒྱུར་གཙོ་བོར་བྱེད་པའམ་དེ་ལ་མཆན་བཀོད་ནས་འགྲེལ་བཤད་རང་བཞིན་གྱིས་བསྒྱུར་ན་ལེགས་སྙམ།

（གཉིས།）ཡིག་སྒྱུར་གྱི་གཞི་རྩའི་ཚད་གཞི་སྐབས་བབ་དང་བསྟུན་ནས་བེད་སྤྱོད་གཏོང་དགོས།

བོད་རྒྱ་སྐད་ཡིག་གཉིས་ཀྱི་བརྡ་སྤྲོད་ལུགས་མི་འདྲ་བའི་དབང་གིས་སྒྲ་བསྒྱུར་དང་། དོན་སྒྱུར། ཐད་བསྒྱུར་བཅས་ཀྱི་ཡིག་སྒྱུར་སོགས་ཀྱི་གཞི་རྩའི་བྱ་ཐབས་ཁོང་དུ་ཆུད་དགོས་པ་དང་། གསལ་དག་སྙན་གསུམ་བཅས་ཀྱི་ཡིག་སྒྱུར་ཚད་གཞིའི་ཐོག་ནས་དམངས་གཞས་ཡིག་སྒྱུར་གྱི་ཚད་གཞི་ལེགས་ཤོས་འཚོལ་ཞིབ་ཐུབ་དགོས། དེང་སྐབས་ང་ཚོས་རྟག་ཏུ་མཐོང་རྒྱུ་ཡོད་པ་ནི་བོད་གཞས་རྒྱ་ཡིག་ཏུ་སྒྱུར་བའི་ཁྲོད་ཡོད་པའི་གནད་དོན་ཁག་ལ་སྣང་མེད་བྱེད་ཅིང་། ད་དུང་གློག་རྡུལ་ཚིག་མཛོད་སོགས་ལ་བརྟེན་ནས་བསྒྱུར་བའི་གཞས་ཚིག་དག་མ་ཡིག་གི་གཏན་ཚིགས་དང་མི་མཐུན་པར་ཆོས་ཉིད་དང་འགལ་བའི་གནས་ཚུལ་ཐོན་བཞིན་ཡོད།

བོད་ཀྱི་དམངས་གཞས་ནི་ཞིང་འབྲོག་མང་ཚོགས་ཀྱི་ཐོན་སྐྱེད་དང་འཚོ་བ་ལས་བྱུང་བ་ཞིག་ཡིན་པས། ལྷག་པར་དུ་གླུ་ཚིག་ལ་མི་རིགས་དེའི་ཁྱད་ཆོས་དང་དམངས་ཁྲོད་རིག་གནས་ཀྱི་སྲོག་དབུགས་ཟབ་མོ་ལྡན་ཡོད། དེའི་ཕྱིར་ལོ་ཙཱ་བྱེད་སྐབས་ཁྱད་ཆོས་འདི་ཁོང་དུ་ཆུད་པ་དང་གནད་དོན་ཐད་ལ་དོ་སྣང་བྱས་ཏེ། གསོན་ཉམས་ལྡན་ཞིང་ཚིག་གི་སྡེབ་སྦྱོར་སྙན་ཞིང་འཇེབས་པ་ཞིག་བྱེད་དགོས།

དཔེར་ན། ཁྱོད་སེམས་རྫ་མའི་བུམ་པ། །བུམ་རྫས་ཅི་ཡོད་མི་ཤེས། །ང་སེམས་ཤེལ་གྱི་བུམ་པ། །ཕྱི་གསལ་ནང་གསལ་ཞུས་ཡོད། །

举例：你心似瓦罐泥体，无法知晓内装什物，我心似玻璃瓶罐，内外通体晶莹透明。

（གསུམ།）བོད་གཞས་རྒྱ་ཡིག་དུ་བསྒྱུར་བའི་རྨང་གཞིའི་ཐབས་ཤེས་འཚོལ་བ།

བོད་ཀྱི་དམངས་གཞས་ནི་ལོ་རྒྱུས་ཡུན་རིང་ལྡན་པ་དང་གསོན་ཉམས་ལྡན་ལ་བབ་ཆགས་པ། གོ་སླ་བ་བཅས་ཀྱི་ཁྱད་ཆོས་ལྡན། དོན་སྙིང་ངེས་ཅན་ཞིག་གི་ཐོག་ནས་བཤད་ན། དམངས་གླུ་ལས་བོད་རིགས་མི་དམངས་ནི་རི་ཆུ་ནགས་གསུམ་དང་རང་བྱུང་ཁམས་ཆེན་མོའི་པང་ན་རང་དགར་འཚོ་བ་སྐྱེལ་སྟངས་མཚོན་ཡོད་ལ། དེའི་ཕྱི་སྣོད་ཀྱི་འཇིག་རྟེན་དང་ནང་བཅུད་ཀྱི་སེམས་ཅན་ལ་དྲིན་གཟོ་ཞུ་བ་ཡང་མཚོན་ཡོད། འདི་ནི་དམངས་གླུ་ཡི་ཆེས་ཡིད་དབང་འཕྲོག་པའི་ཐུན་མུན་གྱི་ཁྱད་ཆོས་ཡིན་ལ། ལྷག་པར་དུ་དམངས་གཞས་ཀྱི་གཞས་ཚིག་ལ་ཞིབ་ཚགས་ལྡན་ལ་ནང་དོན་ཕུན་སུམ་ཚོགས་པ། གཏམ་རྒྱུད་རང་བཞིན་སོགས་ཀྱི་ལོ་རྒྱུས་ཀྱི་རྒྱབ་ལྗོངས་མི་འདྲ་བ་མང་པོ་ཡོད་པས་གཞན་ལས་ངོ་མཚར་བ་ཞིག་ཡིན།

ཡིག་སྒྱུར་ནི་ཡི་གེའི་རྒྱུ་ཆ་ཞིག་འདྲ་མཉམ་གྱི་ཡི་གེའི་རྒྱུ་ཆ་གཞན་ཞིག་ལ་བརྗེ་རེས་བྱེད་པ་དེ་ཡིན་མོད། འོན་ཀྱང་གླུ་ཚིག་ཡིག་སྒྱུར་བྱེད་པ་དེ་དང་བརྩམས་ཆོས་གཞན་ཡིག་སྒྱུར་བྱེད་པ་དང་མི་འདྲ་བས། དཀའ་གནད་ཆེ་ཤོས་ནི་བསྒྱུར་རྩོམ་གྱི་ཚིག་འབྲེལ་ཆགས་ལ་གསལ་དག་སྙན་གསུམ་བཅས་ལྡན་དགོས་པའི་སྔོན་འགྲོའི་ཆ་རྐྱེན་འོག་ཞིབ་ཅིང་ཕྲ་བའི་སྒོ་ནས་དམངས་གཞས་ཀྱི་ནང་དོན་དང་གདངས་ཀྱི་འགྱུར་ཁུག་བཅས་ཀྱི་གོ་དོན་འབྲེལ་ཆགས་དགོས། ལྷག་པར་དུ་མཛའ་གཞས་དང་ཆང་གཞས། བསྟོད་གླུ། སྐྱོ་གླུ། མགུར་གླུ་བཅས་དམངས་ཁྲོད་ནས་དར་བའི་དམངས་གཞས་དག་གི་གླུ་ཚིག་ནི་ནང་དོན་གཏིང་ཟབ་ཅིང་ཤུགས་བསྟན་མང་ལ། ནང་དོན་ཕུན་སུམ་ཚོགས་ལ་བརྩེ་བས་ཁེངས་པ་བཅས་ཀྱི་རྣམ་པ་དང་ནང་དོན་བཅས་ཀྱི་ཐོག་ནས་མངོན་དགོས་པས། རྩོམ་རིག་གི་བསམ་གཞིག་དང་གསར་རྩོམ་ཐད་ལ་གཏིང་ཟབ་མོར་ཞུགས་ཡོད་དགོས།

དཔེར་ན། ང་ལ་དྲིན་ཆེན་མ་ལོས་ཟེར་རྒྱུ་དེ། །

རོགས་ཁྱོད་གཉིས་མཛའ་མཐུན་ཕྱེ་དགོས་ཟེར། །བདེན་བདེན་མ་ལོ་ཁྱོད་ལོས་བདེན། །ཁྱོད་རྣ་ཡི་རྣ་ལུང་ཆ་མ་དེ། །ཆ་རྭ་ཡ་མེད་ན་ཅི་འདྲ་རེད། །རོགས་ངེད་གཉིས་མཛའ་མཐུན་དེ་འདྲ་རེད། །

举例：慈祥母亲对我说，你和恋人要分开。母亲说的句句对，你的耳环成双对，一只分开怎么成？我和恋人是这样。

གླུ་ཚིག་འདི་བསྒྱུར་སྟངས་ལ་རང་གིས་བལྟས་ན་ཚིག་དོན་གསལ་པོ་མིན་ལ། མ་རྩོམ་ལྟ་བུའི་གསོན་ཉམས་དང་གཞན་སེམས་འགུག་བའི་ནུས་ཤུགས་དབེན། མཚམས་ལ་ལར་སྒྲོ་བཏགས་ཆེ་བས་མ་ཡིག་དང་གོ་བ་ལེན་སྟངས་ཐད་ཁྱད་པར་ཆེན་པོ་ཡོད་པར་སྙམ།

གཉིས་པ། བོད་གཞས་རྒྱ་ཡིག་དུ་བསྒྱུར་བའི་ཐབས་ཤེས་འཚོལ་ཞིབ་བྱེད་པ།

བོད་རྒྱ་གཉིས་ཀྱི་སྐད་རིགས་དང་རིག་གནས་རྒྱབ་ལྗོངས། བརྡ་སྤྲོད་སྟངས། ཚིག་གི་སྡེབ་སྦྱོར་སོགས་མི་འདྲ་བས། ཡིག་བསྒྱུར་ལག་ལེན་བྱེད་པའི་གོ་རིམ་ཁྲོད་ཕྱོགས་གཉིས་ཀྱི་སྐད་ལ་འབྲེལ་ཆགས་པོ་ཡོང་བའི་རྨང་གཞིའི་ཐོག །དམངས་གླུའི་ཁྱད་ཆོས་འབུར་དུ་ཐོན་ལ་ཡིག་བསྒྱུར་བྱེད་པའི་ཐབས་ཤེས་སྣ་ཚོགས་གཞིར་བཟུང་ནས་ཡིག་བསྒྱུར་བྱས་པའི་གླུ་ཚིག་དེ་མ་ཡིག་ལྟ་བུ་ཡོང་གང་ཐུབ་བྱེད་དགོས། བོད་གཞས་རྒྱ་ཡིག་དུ་བསྒྱུར་སྐབས་གཙོ་བོ་ངེས་དགོས་པའི་གཞི་རྩ་འགའ་ནི།

（གཅིག）བདེན་པ་ལ་བརྩི་སྲུང་བྱེད་པའི་རྩ་དོན་ལྡན་པ་དང་མ་ཡིག་དེ་རྩོམ་པ་པོའི་བསམ་བློའི་ནང་དོན་ཆ་ཚང་བར་རྒྱུན་འཁྱོངས་བྱེད་དགོས། དམངས་གླུ་ནི་དམངས་ཁྲོད་ངག་རིགས་སྒྱུ་རྩལ་གྱི་རྣམ་པ་མངོན་ཡོད་ལ་ལོ་རྒྱུས་རིག་གནས་ངེས་ཅན་ཞིག་ལྡན་པས་དེ་ལ་ཅི་དགར་སྣོན་འཕྲི་དང་བསྒྱུར་བཅོས་བྱེད་མི་རུང་། བསྒྱུར་རྩོམ་དེ་མ་རྩོམ་གྱི་གྲུབ་ཚུལ་དང་ནང་དོན། བརྡ་སྤྲོད་སྟངས་བཅས་གཅིག་མཐུན་ཡིན་དགོས།

དཔེར་ན། འགུ་ཡ་ཨ་ལོང་དངུལ་རེད། །ཕྲ་ཁུང་རིན་ཆེན་གསེར་རེད། །ལས་དབང་ཅན་གྱིས་བརྡུངས་ཡོད། །ལས་འབྲས་ཅན་གྱི་བཏགས་ཡོད། །

举例：钏身耀银白，钏扣嵌华金。錾自有缘人，悬与佳人颈。

བོད་རྒྱ་གཉིས་ཀྱི་སྐད་ཆ་གཞིར་བཟུང་ནས་ཐད་བསྒྱུར་བྱེད་སྐབས་ཐབས་གང་ཡོད་ཀྱི་མ་རྩོམ་སོར་འཇོག་བྱས་ན་གླུ་ཚིག་གོ་རིམ་ཆ་གསལ་ལ་རིག་ལམ་དེ་བས་གསལ་པོ་ཡོང་ཐུབ།

ཐད་བསྒྱུར་བྱས་ན་མ་ཡིག་གི་ནང་དོན་ངོ་མ་དེ་གསལ་པོ་སྟོན་མི་ཐུབ་པས་དོན་བསྒྱུར་བྱེད་པའི་ཐབས་ཤེས་སྤྱད་ནས་རྒྱ་སྐད་དང་བོད་སྐད་གཉིས་བརྡ་སྤྲོད་ལུགས་འོས་འཚམས་ཀྱིས་བསྒྱུར་བཀོད་ཐོག་གསར་རྩོམ་བྱས་ན་དེ་བས་ལེགས་སྙམ།

（གཉིས།）མ་རྩོམ་གྱི་ཁྱད་ཆོས་ཀྱི་རྩ་དོན་ལ་བརྩི་སྲུང་བྱས་ནས་བསྒྱུར་ཡིག་ཀློག་བདེ་ལ་བྱང་ཆ་ལྡན་དགོས། རྩོམ་རིག་གི་ཁྱད་ཆོས་ལ་དོ་སྣང་གང་ཐུབ་བྱས་ཏེ་སྟབས་བདེའི་སྒོ་ནས་སྐད་རིགས་ཤིག་སྐད་རིགས་གཞན་ཞིག་ཏུ་ཐད་སྒྱུར་བྱེད་རིགས་ལ་སྔོན་འགོག་བྱ་དགོས།

ལ་ལར་མིང་ཚིག་ཀློག་ནོར་བྱས་པ་དང་། ད་དུང་གོ་བ་ལེན་ནོར་དང་བརྡ་སྤྲོད་བཀོལ་སྤྱོད་ཀྱི་སྟེང་ན་ཡང་ཟོལ་སྐྱོན་ཡོད་པའི་གནས་ཚུལ་ཡང་འདུག

（གསུམ།）བོད་ཀྱི་འབྲོག་གླུ་ནི་མཚོ་བོད་མཐོ་སྒང་ན་དམིགས་བསལ་དུ་ཡོད་པའི་རོལ་དབྱངས་སྙན་མོ་ཞིག་ཡིན་པ་དང་དེས་རྩྭ་ཐང་གི་འབྲོག་མིའི་འཚོ་བའི་སྣང་བརྙན་དང་དཔེ་རིས་མཚོན་ཡོད།

འབྲོག་གླུའི་ནང་ཁྱེད་ཀྱིས་བར་སྣང་དུ་གཡོ་འགུལ་བྱེད་པའི་སྤྲིན་པ་དང་བརྗིད་ཉམས་ལྡན་པའི་རི་རྒྱུད་མཐོང་བ་དང་འདྲ་བར་ད་དུང་གུར་ཕུབ་ནས་ཟ་མ་གཡོ་སྐོལ་བྱེད་པ་དང་རྟ་རྫི་བས་གནམ་སྔོན་པོའི་འགེབས་སྲུང་འོག་སྔོ་ལྗང་རྩྭ་ཐང་ཐོག་ནོར་ལུག་འཚོ་བ་དང་རང་མོས་ངང་འཕུར་ལྡིང་བྱེད་པ་མཐོང་བྱུང་། གླུ་ཚིག་ཁྲོད་དུ་རང་བྱུང་གིས་ཁོར་ཡུག་དང་མཐུན་པའི་རྒྱས་བཤད་ཡོད།

དཔེར་ན། གསེར་ཕྱོགས་ལུང་པའི་ཕུག་ལ། །

གསེར་གྱི་མཚོ་མོ་འཁྱིལ་ཡོད། །གསེར་གྱི་མཚོ་མོའི་ཁ་ལ། །གསེར་བྱ་མ་བུ་བབས་ཡོད། །གསེར་བྱ་གནམ་ལ་འཕུར་དུས། །ནམ་མཁའ་འཇའ་ཡིས་གང་ཡོད། །གསེར་བྱ་ས་ལ་བབས་དུས། །ས་གཞི་འོད་ཀྱིས་གང་ཡོད། །

举例：金鸟金色山谷中，呈现金色海，金色海边上，金鸟降下来，金鸟飞上天，天空满彩虹，金鸟飞下地，地上满光芒。

གསུམ་པ། བསྡོམས་ཚིག

གོང་དུ་བཤད་པ་མདོར་བསྡུས་ན། བོད་ཀྱི་དམངས་གླུ་ནི་བོད་རིགས་མི་དམངས་ཀྱིས་ཐོན་སྐྱེད་དང་འཚོ་བའི་ལག་ལེན་ཁྲོད་གསར་གཏོད་བྱས་པ་ལས་བྱུང་བ་དང་། སྤྱི་ཚོགས་ཀྱི་འཚོ་བ་དང་སེམས་གཏིང་གི་མྱོང་ཚོར། དུས་རབས་ཀྱི་རྣམ་པ་བཅས་མངོན་ཡོད། བོད་གླུ་རྒྱ་ཡིག་དུ་སྒྱུར་བ་ནི་སྐད་རིགས་གཉིས་བར་གྱི་འགྱུར་ལྡོག་ཅིག་ཡིན་པར་མ་ཟད་རིག་གནས་གཉིས་དབར་གྱི་སྤེལ་རེས་ཤིག་དེ་བས་ཀྱང་ཡིན། དེའི་ཕྱིར་ཡིག་སྒྱུར་གྱི་ཁྱད་ཆོས་ཐོག་ནས་ལོ་ཙཱ་བས་བོད་ཀྱི་དམངས་གཞས་ཡི་སྙིང་བཅུད་ཇི་མ་ཇི་བཞིན་མྱོང་རོལ་ཐུབ་པ་བྱེད་དགོས་སོ། །