“གཡག་དར་མྱུར་བགྲོད་གཞུང་ལམ་དུ་རླངས་འཁོར་ཤར་གཏོང་ཐུབ་པ་དེས་གཡག་རྔ་ནས་དར་རྩེ་མདོ་བར་དུ་བགྲོད་པའི་དུས་ཚོད་ཇེ་ཐུང་ཆེན་པོ་བཏང་ཡོད་དེ། སྔར་གྱི་ཆུ་ཚོད་4ནས་དེང་དུས་ཆུ་ཚོད་2མ་ཟིན་ཙམ་དུ་ཇེ་ཐུང་བཏང་ཡོད་པས། ང་ཚོའི་འགྲོ་སྐྱོད་དེ་བས་སྟབས་བདེ་རུ་ཕྱིན་སོང་། གཉེན་ཉེ་དུ་ལ་འཚམས་འདྲི་ཞུ་ས་འགྲོ་བ་དང་ཡུལ་སྐོར་ལྗོངས་རྒྱུ་འགྲོ་བ། ཡང་ན་ཚོང་དོན་ཕྱིར་སྐྱོད་སོགས་གང་ཞིག་ཡིན་རུང་ཚང་མ་དེ་བས་ལས་ཕྱོད་ཆེ་བ་དང་སྐྱིད་སྣང་དོད་པོར་གྱུར། གཡག་དར་མྱུར་བགྲོད་གཞུང་ལམ་བསྐྲུན་ནས་སྐྱེལ་འདྲེན་བྱས་རྗེས། ང་རང་ཁྱིམ་མི་དང་མཉམ་དུ་འདུག་པའི་དུས་ཚོད་དེ་བས་ཇེ་མང་དུ་ཕྱིན་པ་དང་། འཛུགས་སྐྲུན་བྱེད་སྐབས་ཁྱིམ་མི་ལ་འདུག་རོགས་བཟོ་མ་ཐུབ་བའི་བློ་ཕམ་ཁ་གསབ་བྱེད་ཐུབ་ཅིང་། བློ་ཕམ་སྐྱེས་མྱོང་རུང་འགྱོད་པ་ཤོར་མ་མྱོང་། ང་རང་དངོས་སུ་གཡག་དར་མྱུར་བགྲོད་གཞུང་ལམ་འཛུགས་སྐྲུན་བྱེད་པར་ཞུགས་ཐུབ་པས། ངས་དེ་ང་རྒྱལ་སྐྱེས་ཆོག་པ་ཞིག་ལ་ངོས་འཛིན་བཞིན་ཡོད།”ཅེས་གཡག་དར་མྱུར་བགྲོད་གཞུང་ལམ་སྐོར་གླེང་སྐབས། གཡག་དར་སྤྱི་གཉེར་ཁང་གི་ཏང་ཨུའི་ཨུ་ཡོན་དང་སྤྱི་ཁྱབ་འགན་འཛིན་གཞོན་པ་ལི་ཧྲི་ཅ་སྔར་བཞིན་སེམས་འགུལ་ཚད་མེད་ཐེབས་བཞིན་འདུག །ཁོང་གི་ལས་དོན་འགན་འཁྲི་དང་ལས་ཀའི་ཉམས་མྱོང་གིས་གཡག་དར་མྱུར་བགྲོད་གཞུང་ལམ་ལ་དམིགས་བསལ་གྱི་བརྩེ་དུང་གིས་ཁེངས་བཅུག་ཡོད་དེ། ཁོང་གི་ཉེ་འགྲམ་གྱི་གྲོགས་པོ་ཡང་གཡག་དར་མྱུར་བགྲོད་གཞུང་ལམ་ལ་བརྟེན་ནས་འཚོ་བར་འགྱུར་ལྡོག་བྱུང་བ་དང་། ལམ་ཐག་ཆུ་ཚོད་གཉིས་ལ་ཇེ་ཐུང་བཏང་བ་དེས་ཁྱིམ་ཚང་ཁག་ཅིག་གི་ཚེ་སྲོག་བསྐྱབས་པས། གཉེན་ཉེའི་བར་གྱི་འབྲེལ་བ་ཇེ་ཟབ་དང་གྲོགས་པོ་བར་གྱི་འགྲོ་འོང་ཇེ་མང་ཕྱིན་ནས། ཕར་འགྲོ་ཚུར་འོང་གི་རྩེ་དགའི་གཏམ་རྒྱུད་དེ་བས་མང་པོ་བྱུང་དང་འབྱུང་བཞིན་ཡོད།
རྒྱལ་རོང་རྒྱལ་མོ་རྔུལ་ཆུའི་ཐོག་གི་ཁམས་དར་ཟམ་ཆེན་ནི་གཡག་དར་མྱུར་བགྲོད་གཞུང་ལམ་གྱི་ལམ་ཐིག་ཧྲིལ་པོའི་ཚོད་འཛིན་རང་བཞིན་གྱི་གཙོ་གནད་ལས་གྲྭའི་གྲས་ཤིག་ཡིན་པ་དང་། ཚན་རྩལ་འདུས་ཚད་མཐོ་ཞིང་། མཚོ་འཕགས་མཐོ་བ་དང་ས་འགུལ་གཏོར་ཚད་མཐོ་བའི་ཁུལ། རླུང་ར་དང་དྲོད་ཚད་རྙོག་འཛིང་ཆེ་བའི་ཁོར་ཡུག་ཏུ་བསྐྲུན་པའི་ཚངས་བརྒལ་ལྕགས་གདུང་དཔྱང་ཟམ་ཆེན་པོ་ཞིག་ཡིན་པ་དང་། ཟམ་པ་ཧྲིལ་པོའི་རིང་ཚད་ལ་སྨི་1411དང་བརྒལ་ཚད་གཙོ་བོ་ལ་སྨི་1100ཡོད་པས། “ཁྲོན་བོད་ཟམ་ཆེན་དང་པོ”ཞེས་པའི་མཚན་སྙན་ལྡན། སི་ཁྲོན་ཞིང་ཆེན་ནང་ཁུལ་དུ་མི་མེད་གནམ་གྲུས་སྣེ་ཁྲིད་ཐག་པ་འཐེན་ནས་གཙང་པོ་ཐེངས་དང་པོ་བརྒལ་བ་དང་། རྒྱལ་ནང་དུ་མཚོ་འཕགས་མཐོ་བའི་གྲོག་རོང་ས་ཁུལ་དང་རྙོག་འཛིང་ཆེ་ཞིང་རླུང་ཤུགས་དྲག་པོའི་ཆ་རྐྱེན་འོག་འདྲེན་ཐག་དཔྱང་འཇུག་མ་ལག་སྤྱད་དེ་སྨི་སྟོང་རིམ་པའི་ལྕགས་གདུང་ཐེངས་དང་པོ་བཙུགས་པ། འཛམ་གླིང་ཐོག་སྒུར་འཁྱོག་འགོག་པའི་ངར་ལྕགས་འདེགས་སྐྱོར་གྱིས་དཔྱང་ཐག་ཟམ་པའི་དཀྱིལ་གྱི་སྒྲོག་གུ་ཐེངས་དང་པོ་བྱས་པ། འཛམ་གླིང་ཐོག་རླབས་དབྱིབས་ངར་ལྕགས་ཀྱི་གསུས་ལེབ་དང་ཨར་འདམ་གྱི་རྩེ་མཐིལ་པང་ལེབ་ཀྱི་སྡེབ་སྒྲིག་གིས་ཟམ་སྟེང་གཞུང་གདུང་ཐེངས་དང་པོ་བཟོས་པ་དེ་རེད། འཛུགས་སྐྲུན་བྱེད་སྐབས་ཁོར་ཡུག་སྲུང་སྐྱོང་གི་བླང་བྱ་མཐོ་བ་དང་སྐྱེ་ཁམས་ཁོར་ཡུག་ལ་ཤུགས་རྐྱེན་ཐེབས་ཚད་ཉུང་དུ་གཏོང་ཆེད། ཨར་ལས་སྡེ་ཚན་གྱིས་བྱེད་ཐབས་སྣ་ཚོགས་སྤྱད་དེ་སྦགས་བཙོག་དང་གཏོར་བཤིག་ཉུང་དུ་བཏང་ཡོད། རི་ལྡེབས་གོང་འོག་དང་ཕན་ཚུན་སྦྲེལ་མཐུད་བྱེད་ས། གད་སྙིགས་འདོར་ས་བཅས་ཚང་མར་སྐྱེ་ཁམས་སླར་གསོ་བྱས་ཡོད། རིམ་རྩིས་བྱས་ན་སྨི་གྲུ་བཞི་མ་ཁྲི་115ཡི་སྔོ་ལྗང་ལེགས་གྲུབ་ཟིན་ལ། སྡོང་རིང་སྡོང་རྐང་ཁྲི་3.8བཙུགས་པ་དང་སྡོང་ཐུང་སྡོང་རྐང་ཁྲི་13.9བཙུགས་ཡོད། ཞིང་ཆེན་ནང་ཁུལ་དུ་ཕན་ཚུན་སྤེལ་རེས་ཀྱི་ཕྱོགས་བསྡུས་གཟུགས་ཇུས་འགོད་ཐེངས་དང་པོ་མངོན་འགྱུར་བྱུང་བ་དང་། བེད་མེད་ནོར་བུར་བསྒྱུར་བ། དུང་ཆེན་ཆུ་བོ་ཕན་ཚུན་སྤེལ་རེས་ཀྱི་ཕྱོགས་བསྡུས་གཟུགས་སུ་ཇུས་འགོད་བྱས་པས། ཉེ་འགྲམ་གྱི་ཕུག་ལམ་དྲུག་གི་སྙིགས་རོ་རྒྱ་དཔངས་གྲུ་བཞི་མ་ཁྲི་100ཐག་གཅོད་ཐུབ་པ་དང་། སྙིགས་རོ་འདོར་བའི་དཀའ་གནད་ཐག་གཅོད་ནུས་ལྡན་ཐུབ་པར་མ་ཟད། སྙིགས་རོ་འདོར་བའི་ས་ཆ་གྲོན་ཆུང་དང་ཞབས་ཞུའི་ནུས་པ་མཐོར་འདེགས་ཀྱང་གཏོང་ཐུབ་ཡོད།
གཡག་དར་མྱུར་བགྲོད་གཞུང་ལམ་གྱི་ལ་པ་ཆུ་བོའི་ཕུག་ལམ་གྱི་མཚམས།
གཡག་དར་མྱུར་བགྲོད་གཞུང་ལམ་སྤྱི་གཉེར་ཁང་གིས“ལམ་གཉིས”སྙིང་སྟོབས་རྒྱུན་འཛིན་བྱ་རྒྱུར་གཞོལ་ནས། མྱུར་བགྲོད་གཞུང་ལམ་འཛུགས་སྐྲུན་དང་གཉེར་སྐྱོང་དོ་དམ་བྱེད་རིང་། ལག་རྩལ་གསར་གཏོད་དང་དོ་དམ་གསར་གཏོད་བྱ་རྒྱུར་སྐུལ་མ་གཏོང་བ་དང་། སྔོན་ཐོན་ལག་རྩལ་ནང་འདྲེན་དང་དོ་དམ་བརྒྱུད་རིམ་ཇེ་ལེགས་སུ་བཏང་བ་བརྒྱུད། རྣམ་གྲངས་ལག་བསྟར་གྱི་ལས་ཕྱོད་དང་ལས་གྲྭའི་སྤུས་ཚད་རྒྱུན་ཆད་མེད་པར་མཐོ་རུ་གཏོང་བ་རེད། མྱུར་བགྲོད་གཞུང་ལམ་ནི་དཔལ་འབྱོར་འཕེལ་རྒྱས་ཀྱི་སྲོག་རྩ་དང་དམངས་སེམས་སྦྲེལ་བའི་ཟམ་པ་ཡིན་སྟབས། ཞབས་ཞུའི་ཆུ་ཚད་མཐོ་རུ་གཏོང་བ་དང་ཤར་བགྲོད་ཁོར་ཡུག་ཇེ་ལེགས་གཏོང་བ་དང་། གྲགས་ཡས་སྤངས་ཏེ་ལེགས་སྐྱེས་ཕུལ་ནས། ས་གནས་ཀྱི་དཔལ་འབྱོར་འཕེལ་རྒྱས་དང་མི་དམངས་མང་ཚོགས་ཀྱི་འགྲོ་འདུག་སྟབས་བདེ། མི་རིགས་མཐུན་སྒྲིལ་ཡར་ཐོན་ལ་ནུས་ཤུགས་འདོན་བཞིན་ཡོད། །
གཡག་དར་མྱུར་བགྲོད་གཞུང་ལམ་གྱི་ཏུའེ་ཡན་འགག་རྩ་ཤར་གཏོང་བྱུང་བ།