“ང་དང་པོ་ལས་གནས་ལ་ཞུགས་དུས་ཚང་མ་ས་ལམ་རེད། ཁྱོས་ལྟོས་དང་ད་ལྟ་ཚང་མ་མྱུར་བགྲོད་གཞུང་ལམ་རེད། སྔོན་མ་སྦྲག་དངོས་ཉུང་ཉུང་ཡིན་ལ། ད་ལྟ་རླངས་འཁོར་ཆེན་པོ་ཚང་མ་གང་འདུག །སྐབས་འགར་ད་དུང་སྐྱེལ་འདྲེན་རླངས་འཁོར་ཁ་སྣོན་བྱེད་དགོས། སྔོན་མ་བསྐུར་ཡོང་བའི་ཅ་ལག་ཚང་མ་ཆུང་ཆུང་ཡིན། ད་ལྟ་ཅ་ལག་འདྲ་མིན་མང་པོ་འདུག །”ཅེས་དུས་རབས་ཀྱི་མིག་དཔེ་འཆི་མེད་རྡོ་རྗེས་དཀར་མཛེས་རྫོང་དུ་གསར་འགོད་པའི་བཅར་འདྲི་དང་ལེན་བྱེད་སྐབས་བཤད།
གངས་འཁྱགས་སྦྲག་ལམ་གྱི་ཕོ་ཉ་འཆི་མེད་རྡོ་རྗེས་རླངས་འཁོར་གསར་པའི་ལྡེ་མིག་བླངས་པ།
འཆི་མེད་རྡོ་རྗེས་ལོ་ངོ་སུམ་ཅུ་ལྷག་གི་རིང་། ཉིན་ལྟར་སྦྲག་སྐྱེལ་རླངས་འཁོར་གཏོང་ནས་མཚོ་འཕགས་ཆ་སྙོམས་སྨི་3500ཡོད་པའི་གངས་འཁྱགས་སྦྲག་ལམ་ཐོག་སྦྲག་སྐྱེལ་བྱས་ཤིང་། རིམ་རྩིས་བྱས་ན་ལམ་ཐག་སྤྱི་ལེ་ཁྲི་140ལྷག་ཙམ་བསྐྱོད་པ་དང་། འགན་འཁྲིའི་ལས་འཛོལ་གཅིག་ཀྱང་བྱུང་མེད། ཁོང་གི ་གཅུས་གཟེར་གྱི་སྙིང་སྟོབས་ཁྲོན་བོད་གཞུང་ལམ་དུ་དམ་པོར་འཛེར་ཏེ། ཏང་ཀྲུང་དབྱང་གི་གསུང་དབྱངས་དང་མེས་རྒྱལ་གྱི་ཕྱོགས་བཞི་མཚམས་བརྒྱད་ཀྱི་སྦྲག་དངོས་གངས་ལྗོངས་ཀྱི་ས་ཕྱོགས་གང་སར་བསྐྱལ་བ་དང་། ལྷག་བསམ་ཟོལ་མེད་ཀྱིས་ས་གནས་དེ་གའི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་སྐུལ་འདེད་གཏོང་ཆེད་ལེགས་སྐྱེས་ཧུར་ཐག་ཕུལ་བས། མང་ཚོགས་ཀྱིས“གངས་འཁྱགས་སྦྲག་ལམ་གྱི་བདེ་སྐྱིད་ཕོ་ཉ”ཞེས་པའི་མཚན་སྙན་གསོལ་བ་དང་། 2019ལོར“དུས་རབས་ཀྱི་མིག་དཔེ”ཞེས་པའི་མཚན་སྙན་ཐོབ་པ་རེད།
དཀར་མཛེས་ཁུལ་སློབ་འབྲིང་སློབ་མའི་ལུས་རྩལ་དུས་ཆེན། ཡིའུ་ཅན་ཀྲུང་གིས་པར་བླངས།
ད་ལྟ་ལས་འཁྱུར་ངལ་གསོ་བྱས་པའི་འཆི་མེད་རྡོ་རྗེས་ཁོང་གིས་མཐོང་བའི་ཁྲོན་བོད་ལམ་ཐིག་གི་འགྱུར་ལྡོག་ལ་སླར་ཡང་རྗེས་དྲན་བྱེད་སྐབས། སྔར་བཞིན་སེམས་འགུལ་ཚད་མེད་ཐེབས་ནས། མེས་རྒྱལ་འཕེལ་རྒྱས་ཐད་ཉིན་བཞིན་རྣམ་པ་གསར་པ་ཐོན་པ་དང་མི་སེར་གྱི་འཚོ་བའི་སྤུས་ཚད་འཕུར་མཆོང་ཆེན་པོ་བྱུང་བར་ཚོར་སྣང་ཟབ་མོ་བྱུང་།
བདེ་སྐྱིད་ཀྱི་འཚོ་བ། ཡིའུ་ཅན་ཀྲུང་གིས་པར་བླངས།
ས་ལམ་ནས་སྣུམ་ལམ་བར། ཁྲོ་ལ་བརྒྱུད་སྐབས་ཆུ་ཚོད་གཉིས་དགོས་པ་ནས་སྐར་མ་བདུན་བར།
འཆི་མེད་རྡོ་རྗེ་ཕར་འགྲོ་ཚུར་འོང་བྱེད་པའི་གངས་འཁྱགས་སྦྲག་ལམ་སྟེ་དཀར་མཛེས་ཁུལ་གྱི་སྲིད་གཞུང་གནས་ཡུལ་དར་མདོ་ནས་སྡེ་དགེ་རྫོང་བར་ཕར་འགྲོ་ཚུར་འོང་གི་བརྒྱུད་རིམ་ཧྲིལ་པོར་སྤྱི་ལེ་1208ཡོད་པ་དང་། མཚོ་འཕགས་སྨི་2500ནས་སྨི་5000བར་འཕར་ཞིང་། བརྒྱུད་ལམ་དུ་རྒྱུ་ལ་དང་ལྷས་ནག་ལ། ཁྲོ་ལ་སོགས་རི་བོ་ཆེན་པོ་བརྒལ་དགོས། “ཁྲོ་ལ་རི་བོར་འཛེག་པ་ན། རྟ་ལྕག་དགུང་ལ་རེག་པར་གྲགས”ཞེས་བརྗོད་ཅིང་། རླངས་འཁོར་བཏང་ནས་ཁྲོ་ལ་བརྒལ་དུས་དཀའ་ཚེགས་ག་འདྲ་ཡོད་པ་རྟོགས་སླ།
“སྔོན་ཆོད་ང་ཚོ་དཀར་མཛེས་ལ་ས་ལམ་ལས་སྣུམ་ལམ་མེད་པར་ཚང་མས་ཤེས་གསལ་ལྟར་རེད་ལ། རི་བོ་ལ་ཕུག་ལམ་དེ་བས་ཀྱང་མེད། ལོ་ངོ་སུམ་ཅུ་ལྷག་གི་རིང་། ངས་སྦྲག་ལམ་འདིའི་སྟེང་ནས་བདེན་དཔང་བྱེད་ཆོག་པའི་འགྱུར་ལྡོག་ཆེས་ཆེ་བ་ནི་འགྲིམ་འགྲུལ་གྱི་འགྱུར་ལྡོག་ཡིན། སྔོན་གྱི་རི་བོ་ལ་ད་ལྟ་ཕུག་ལམ་ཕུག་ཡོད་ཅིང་། ཁྲོ་ལ་ཁོ་ན་ལ་ཆ་མཚོན་ན། སྔར་ས་ལམ་ལས་ཕུག་ལམ་མེད་པའི་གནས་ཚུལ་འོག །རི་བོ་འདི་གཅིག་པོ་བརྒལ་དུས་ཀྱང་། རླངས་འཁོར་རྒྱུན་གཏན་གཏོང་ནའང་ཆུ་ཚོད་གཉིས་ཙམ་བསྐྱོད་དགོས་ཀྱི་ཡོད་ལ། ཐེངས་ཤིག་བུ་ཡུག་འཚུབ་པ་དང་འཕྲད་ནས་ཉིན་མཚན་གཉིས་ཙམ་བསྐྱོད་པ་ཡིན། ད་ལྟ་ཕུག་ལམ་བརྒྱུད་སྐབས་སྐར་མ་7ལས་འགོར་གྱི་མེད་ཅིང་། འདི་2017ལོར་ཁྲོ་ལ་ནས་ཕུག་ལམ་ཤར་གཏོང་མ་ཐུབ་པའི་ཡར་སྔོན་དུ་བསམ་ཡུལ་ལས་འདས་པ་ཞིག་རེད་ཅེས་བརྗོད་ཆོག”ཅེས་འཆི་མེད་རྡོ་རྗེས་འགྲིམ་འགྲུལ་འགྱུར་ལྡོག་ཐད་ཀྱི་གཏམ་རྒྱུད་བརྗོད་དུས། སྔར་བཞིན་སེམས་པ་སྤྲོ་བས་ཁེངས་བཞིན་འདུག
ཁྲོ་ལའི་ཕུག་ལམ་ནས་རླངས་འཁོར་ཤར་གཏོང་བྱེད་སྐབས། འཆི་མེད་རྡོ་རྗེ་ནི་སྤྱི་ཚོགས་རླངས་འཁོར་གྱི་འཐུས་ཚབ་བྱས་ནས་ཕུག་ལམ་བརྒྱུད་མཁན་དང་པོ་དེ་ཡིན་པས། ཁོང་གིས་ཆེད་དུ་དུས་ཚོད་ཟིན་ཐོ་བཀོད་པ་དང་སྐབས་དེའི་དགའ་བ་དང་སྤྲོ་བའང་སེམས་སུ་ཉར་ཡོད། ས་གནས་དེ་གའི་ལོ་བདུན་ཅུ་དང་བརྒྱད་ཅུ་ལ་སླེབས་པའི་ཡུལ་མི་སྤུན་ཟླ་རྒན་གྲས་ཁ་ཤས་མི་ཚེ་གཅིག་ལ་ཁྲོ་ལའི་རི་འདབས་སུ་འཚོ་གནས་བྱས་ཀྱང་། ཁྲོ་ལ་ཐེངས་གཅིག་ཀྱང་བརྒལ་མྱོང་མེད་པས། རླངས་འཁོར་ཤར་གཏོང་ཐུབ་པའི་ཉིན་དེར་ཁོང་ཚོ་ཚང་མ་ཡང་དུས་སྐབས་དེར་དཔང་པོ་བྱེད་དུ་སླེབས་ཡོད།
འཆི་མེད་རྡོ་རྗེས་བཤད་རྒྱུར། སྐབས་དེར་ཁོང་དང་སྐྱེལ་འདྲེན་རླངས་འཁོར་གྱི་ཁ་ལོ་པ། ད་དུང་ས་གནས་དེ་གའི་མི་སེར་ཚང་མར་མྱོང་ཚོར་ཟབ་མོ་ཞིག་ཡོད་དེ། ང་ཚོའི་ཏང་ཅི་འདྲའི་འཇོན་ཐང་ཆེ་བ་ལ་ཨང་། ང་ཚོའི་མེས་རྒྱལ་ཅི་འདྲའི་སྟོབས་ཆེ་བ་ལ་ཨང་། རི་བོ་ཆེན་པོ་འདི་འདྲ་ཞིག་ལ་ཕུག་ལམ་ཡག་པོ་འདི་འདྲ་ཞིག་ལས་འདུག །མི་སེར་རྣམས་སེམས་པ་ཤིན་ཏུ་སྤྲོ་ནས། རྗེས་ཕྱོགས་འགྲོ་སྐྱོད་བྱེད་སྐབས་དེ་བས་སྟབས་བདེ་བ་དང་འཚོ་བའི་དངོས་ཟོག་དེ་བས་སྐྱེལ་འདྲེན་བྱེད་བདེ་རྒྱུ་རེད། མ་འོངས་པར་ཁྱིམ་མི་རྣམས་ཁྲོ་ལ་བརྒལ་ནས་ཕྱི་ལ་འགྲོ་སྐབས། ཁོ་ཚོ་ཡང་གཉིད་སྐྱིད་པོ་ཞིག་འོང་ཐུབ་རྒྱུ་རེད་ཟེར།
བོད་དུ་ཡོང་བའི་འཕྲུལ་འཁོར་ནི་འཕྲུལ་རྟ་ནས་སྒེར་འཁོར་དུ་གྱུར་ཅིང་། སྐྱེལ་འདྲེན་དངོས་རྫས་སྔར་བས་ཕུན་སུམ་ཇེ་ཚོགས་སུ་ཕྱིན།
འཆི་མེད་རྡོ་རྗེས་རྒྱལ་ལམ་317ཐོག་རླངས་འཁོར་ལོ་ངོ་30ལྷག་བཏང་ཞིང་། ཁོང་གིས་ལམ་སྟེང་གི་རླངས་འཁོར་གྱི་འགྱུར་ལྡོག་ཆེན་པོ་ལ་དཔང་པོ་བྱས་ཡོད།
“མི་སེར་ཚོའི་སྔོན་གྱི་འགྲིམ་འགྲུལ་ཡོ་བྱད་ནི་རྟ་དང་ཟོག །དེ་ནས་འཕྲུལ་རྟ་གྱུར་ཅིང་། ད་ལྟ་ཕལ་ཆེར་རླངས་འཁོར་གཏོང་མཁན་ཤ་སྟག་ཡིན།”ཞེས་ཟེར་ཞིང་། འཆི་མེད་རྡོ་རྗེས་མཐོང་བའི་འགྲིམ་འགྲུལ་ཡོ་བྱད་ཀྱི་འཕོ་འགྱུར་དེའང་མཛེས་སྡུག་ལྡན་པའི་ལྗོངས་རྣམ་ཞིག་ག་ལ་མིན། ཁོང་གིས་གཏོང་བའི་སྦྲག་སྐྱེལ་རླངས་འཁོར་ལའང་འགྱུར་ལྡོག་ཆེན་པོ་བྱུང་ཡོད། “སྔོན་ཆད་ངས་རླངས་འཁོར་ཏུན་བཞི་ཆུད་མཁན་གཏོང་དུས་སྦྲག་དངོས་ཟུར་ཁུག་ཅིག་གང་བྱེད་ལས་མེད། དེའི་རྗེས་སུ་ཏུན་ལྔ་དང་ཏུན་བརྒྱད་ཆུད་མཁན་རླངས་འཁོར་ལ་བརྗེས་པ་དང་། ད་ལྟ་ཏུན་བཅུ་གཉིས་ཆུད་པའི་རླངས་འཁོར་གཏོང་ནའང་སྦྲག་དངོས་ཀྱིས་གང་འགྲོ་བཞིན་འདུག །ངས་སྦྲག་དངོས་བརྒྱུད་ནས་མི་སེར་གྱི་འཚོ་བ་ལ་གནམ་ས་བླ་འོག་བསྒྱུར་བའི་འགྱུར་ལྡོག་བྱུང་ཡོད་པ་ཚོར་བྱུང་”ཞེས་ཟེར།
འགྱུར་ལྡོག་བྱུང་བ་ནི་གྲངས་ཀ་ཁོ་ན་མིན་པར་ད་དུང་སྦྲག་དངོས་ཀྱི་རིགས་ཀྱང་འདུས་ཡོད།
འཆི་མེད་རྡོ་རྗེས་བཤད་དོན། དང་ཐོག་རླངས་འཁོར་ཏུན་བཞི་ཆུད་མཁན་གྱི་ཟུར་ཁུག་དེ་མང་ཤོས་ཚགས་པར་དང་དུས་དེབ་ཡིན་པ་དང་། དེ་རྗེས་རིམ་བཞིན་འཁྱགས་སྒམ་དང་གོས་འཁྲུད་འཕྲུལ་ཆས་སུ་གྱུར་པ་དང་། ད་ལྟ་ཞིང་ལས་ཐོན་རྫས་དང་འཚོ་བའི་རྒྱུན་སྤྱོད་མཁོ་ཆས་སྣ་ཚོགས་དྲ་ཐོག་ནས་ཉོ་ཐུབ་ཀྱི་འདུག
དེ་སྔོན་གྱི་ཞིང་ཞོར་ཐོན་རྫས་རྫོང་མཁར་དུ་འཁྱེར་ནས་བཙོང་བའམ་ཡང་ན་ངོ་ཤེས་བརྒྱུད་ནས་བཙོང་བཞིན་ཡོད་པ་དང་། ད་ལྟ་ཁྱིམ་ནས་ཐད་གཏོང་བྱས་ཏེ་བཙོང་ཚེ་ཞིང་ལས་ཐོན་རྫས་རྣམས་རྒྱལ་ཡོངས་ཀྱི་ས་གནས་སོ་སོ་རུ་བཙོང་ཐུབ་ཅིང་། སྒོ་ཐེམ་སྤོ་མི་དགོས་པར་སྒོར་མོ་བསྒྲུབ་ཐུབ་པར་མ་ཟད། ཡོང་འབབ་ཀྱང་ཆེས་ཆེར་འཕར་ཡོད།
སྔོན་ཆད་ཀྱི་སྦྲག་དངོས་རྫོང་མཁར་དུ་བསྐྱལ་རྗེས་མཇུག་རྫོགས་པ་དང་། ད་ལྟ་སྦྲག་དངོས་གྲོང་ཚོ་སོ་སོའི་གྲུ་ཁ་རེ་རེར་སྐྱེལ་ཐུབ། མི་སེར་ཚོའི་འབུད་རྒྱུའི་རྒྱུ་ཆ་དེ་ལྕི་བ་ནས་སོལ་རླངས་སུ་གྱུར་པ་དང་།
བུ་བཅོལ་ཁང་དེ་རྫོང་མཁར་ནས་ཤང་གྲོང་དུ་ཁྱབ་གདལ་བྱུང་། སྨན་བཅོས་བྱེད་སྐབས་ངེས་པར་དུ་རྫོང་མཁར་དུ་འགྲོ་དགོས་པ་ནས་ད་ལྟ་ཤང་གྲོང་གི་སྨན་བཅོས་སྒྲིག་ཆས་ཆ་ཚང་ཞིང་། ཁྱིམ་གྱི་སྒོ་འགྲམ་དུ་ནད་གཞི་ཡག་པོ་བཅོས་ཐུབ་ཀྱི་ཡོད།
སྔོན་ཆད་ཀྱི་གྲོང་ཚོར་སློབ་ཆེན་གྱི་སློབ་བསྡུའི་བརྡ་ཐོ་ཧ་ཅང་ཉུང་ཡང་ད་ལྟ་ལོ་ལྟར་གྲོང་ཚོ་ཚང་མར་སློབ་ཆེན་དུ་རྒྱུགས་འཕྲོད་མཁན་ཡོད།
འཆི་མེད་རྡོ་རྗེས་བཤད་དོན། འདི་ནི་ཁོང་གིས་ལོ་ངོ་སུམ་ཅུ་ལྷག་གི་རིང་སྦྲག་ལམ་འདིའི་ཐོག་ཏུ་མཐོང་བའི་འགྱུར་ལྡོག་རེད། །