སྔོ་ཞིང་དྭངས་པའི་ནམ་མཁའ་དང་མཐའ་ཡས་པའི་པད་ཁའི་མེ་ཏོག་གི་ཞིང་ཁ། གཞུང་ལམ་དང་ཁང་པ་བཅས་རི་མོར་བཀོད་པ་བཞིན་ལྟ་ན་སྡུག །མི་རྣམས་སྐོར་དང་སྐོར་བྱས་ནས་པད་ཁའི་མེ་ཏོག་ལ་ལྟ་བཞིན་ཡོད། ལ་ལས་རྟ་བཞོན་ནས་ལམ་འགྲམ་གྱི་མཛེས་ལྗོངས་ལ་ལྟ་སྐོར་བྱེད་བཞིན་ཡོད། ཡང་ལ་ལས་མི་རིགས་ཀྱི་རྒྱན་གོས་གྱོན་ནས་ལུས་ཀྱི་སྟངས་སྟབས་བསྒྱུར་བཞིན་རང་གི་མཛེས་ཉམས་པར་ལ་བཏབ། སྒེར་འཁོར་བསྐོར་བའི་ཡུལ་སྐོར་བས་ལམ་འགྲམ་གྱི་མཛེས་ལྗོངས་ལ་ལྟ་བཞིན་དལ་གྱིས་འགྲོ་མུས་རེད།
རྟའུ་རྫོང་སྤྱོད་བཟང་གླིང་ཁུལ།
རྟའུ་རྫོང་མགར་ཐར་གྲོང་རྡལ་གྱི་མུའུ་ཁྲི་ཅན་གྱི་པད་ཁའི་མེ་ཏོག་ཞིང་ཁས་རྒྱལ་ཡོངས་ས་གནས་ཁག་ནས་ཡོང་བའི་ཡུལ་སྐོར་བའི་ཡིད་དབང་བཀུག །
ཞིང་ལས་ལ་བརྟེན་ནས་ཡུལ་སྐོར་དར་སྤེལ་དང་ཡུལ་སྐོར་ལ་བརྟེན་ལས་ཞིང་ལས་དར་རྒྱས་གཏོང་བ། ཞིང་ལས་དང་ཡུལ་སྐོར་མཉམ་འགུལ་གྱི་འཕེལ་རྒྱས་བསམ་ཕྱོགས་ལྟར། རྟའུ་ཡིས་རྫོང་ཁོངས་ཀྱི་གཞུང་ལམ་གཙོ་བོའི་ལམ་རྒྱུད་ཀྱི་གྲོང་སྡེར་སྤུས་ལེགས་དམའ་གཉིས་པད་ཁའི་ཐོན་སྐྱེད་རྟེན་གཞི་བསྐྲུན། མུའུ་ཁྲི་ཅན་གྱི་པད་ཁའི་མེ་ཏོག་ཞིང་ཁར་ལྟ་སྐོར་ཁུལ་བསྐྲུན་ནས་ཡུལ་སྐོར་གསར་སྤེལ་བྱས་ཏེ། པད་ཁའི་ཐོན་ལས་བསྐྲུན་པ་དང་ཞིང་ལས་ཐོན་ལས་དེང་རབས་ཅན་དུ་འགྱུར་བའི་འཕེལ་རིམ་ཇེ་མགྱོགས་སུ་བཏང་། 2023ལོར་རྟའུ་རྫོང་གིས་པད་ཁའི་མེ་ཏོག་མུའུ་16803.5བཏབ་པ་དང་ཐོན་རྫས་རིན་ཐང་སྒོར་ཁྲི་2109.18བླངས། དུད་ཚང་1441ལ་ཡོང་འབབ་སྒོར་ཁྲི་193.58འཕར་བ་མངོན་འགྱུར་བྱུང་།
ཞོར་ལས་པས་དྲོད་ཁང་དུ་ལས་ཀ་ལས་བཞིན་པ
པད་ཁའི་མེ་ཏོག་གི་ཞིང་ཁའི་འགྲམ་དུ་རྟའུ་རྫོང་སྤྱོད་བཟང་གླིང་ཁུལ་ཡོད། གླིང་ཁུལ་དེ་2019ལོའི་ཟླ་9པར་བཙུགས་པ་དང་། 2020ལོར་དཀར་མཛེས་ཁུལ་རིམ་པའི་སྔོ་ཚལ་གླིང་ཁུལ་ལ་བདམས། 2022ལོར་དཀར་མཛེས་ཁུལ་གྱི་སྐར་བཞིའི་རིམ་པའི་འབྲུ་སྣུམ་གླིང་ལ་བདམས། 2023ལོར་སི་ཁྲོན་ཞིང་ཆེན་སྐར་གསུམ་རིམ་པའི་དེང་རབས་འབྲུ་སྣུམ་གླིང་ཁུལ་དང་དཀར་མཛེས་ཁུལ་སྐར་བཞིའི་རིམ་པའི་དེང་རབས་ཞིང་ལས་གླིང་ཁུལ་ལ་བདམས། མིག་སྔར་གླིང་ཁུལ་གྱི་འཆར་འགོད་ས་ཁྱོན་ལ་མུའུ་20000ཡོད་པ་དང་། གླིང་ཁུལ་གྱིས་སྔོ་ཚལ་གླང་རྔ་དང་པད་ཁ། སྔོ་ཚལ། ནས་སོགས་ས་གནས་ཀྱི་ཁྱད་ལྡན་ཞིང་ལས་ཐོན་རྫས་འདེབས་འཛུགས་བྱ་རྒྱུ་གཙོ་བོར་བཟུང་ནས། མགར་ཐར་གྲོང་རྡལ་ལྟེ་བར་བྱས་པའི་འབྲུ་སྣུམ་ཐོན་ལས་འདེབས་འཛུགས་ཁུལ་ཞིག་ཆགས་ཡོད། དེས་བ་སྨད་གྲོང་རྡལ་དང་ཁུག་ཆ་ཡུལ་ཤོག །རྒྱལ་ལམ་350ལམ་རྒྱུད་ཀྱི་ཡུལ་གྲོང་མང་པོར་སྐུལ་ཁྲིད་བྱེད་ཀྱི་ཡོད། 2023ལོར་མང་ཚོགས་650ལྷག་ཡུན་རིང་ས་གནས་དེ་གར་ལས་ཞུགས་ཐུབ་པས། རྟའུ་རྫོང་གི་ལས་ཞུགས་རོགས་སྐྱོར་རྟེན་གཞི་3གཏན་འཁེལ་བྱས། ཞིང་ཆེན་རིམ་པའི་སྣེ་འདྲེན་ཁེ་ལས་གཉིས་དང་ཁུལ་རིམ་པའི་སྣེ་འདྲེན་ཁེ་ལས་གཉིས་སྐྱེད་སྲིང་བྱས་ཏེ། ཞིང་འབྲོག་མང་ཚོགས་210ལ་ཐག་ཉེ་ས་ནས་ལས་ཞུགས་ཐུབ་པར་བྱས། སྤྱོད་བཟང་གླིང་ཁུལ་དོ་དམ་ཨུ་ལྷན་གྱི་ཀྲུའུ་རེན། མགར་ཐར་གྲོང་རྡལ་དམངས་ཆེན་ཀྲུའུ་ཞི་ཡུས་ཞའོ་པོ་ཡིས་མཚམས་སྦྱོར་བྱས་པ་ལྟར། གླིང་ཁུལ་གྱི་ལས་འགན་ནི་སྔོ་ཚལ་ཡག་པོ་འདེབས་པ་དང་ཁོར་ཡུག་ལེགས་པོ་གཏོད་ནས། མགར་ཐར་གྲོང་རྡལ་དུ་ཡུལ་སྐོར་བ་མང་པོ་བསུ་རྒྱུ་དེ་ཡིན་ཞེས་བཤད།
རྫོང་མཁར་གྱི་ཕྱོགས་གཞན་ན་གནས་པའི་མ་ཟུར་ཡུལ་ཚོ་སྐུན་བུ་གྲོང་སྡེའི་འགྱིག་ཁང་དུ་ཉི་འོད་ཆེམ་ཆེམ་འཕྲོ། འགྱིག་ཁང་དུ་བཏབ་པའི་ས་མཐོའི་ཀྲོ་མ་ཀྲུ་ཆུང་ཆུང་ལ་འབྲས་བུ་གཡུར་ཟ་སྨིན་ཡོད་པ་ལས་བཟོ་པ་རྣམས་ཀྱིས་འཐུ་བཞིན་ཡོད། འདི་ནི་མ་ཟུར་ཡུལ་ཚོས་གྲོང་སྡེ་ཁག་གི་གནས་ཚུལ་ལ་གཞིགས་ནས་ས་མཐོའི་ཁྱད་ལྡན་ཤིང་ཏོག་དང་སྔོ་ཚལ་ཐོན་ལས་འཕེལ་རྒྱས་གཏོང་བ་དང་། ཏང་འཛུགས་སྐྱོང་གི་སྣེ་ཁྲིད་ནུས་པ་འདོན་སྤེལ་གང་ལེགས་བྱས་ནས་ཁེ་ལས་འཛུགས་སྐྲུན་ནང་འདྲེན་བྱེད་པའི་རྟེན་གཞི་ཞིག་རེད། དཔེ་སྟོན་སྣེ་ཁྲིད་དང་འཇོན་མིས་སྐུལ་ཁྲིད། ཁྱད་ལྡན་ཐོན་ལས་གསར་སྤེལ། ཚན་རྩལ་རོགས་སྐྲུན་སོགས་ཀྱི་བྱེད་ཐབས་བརྒྱུད། ཀུང་སི་དང་མཉམ་ལས་ཁང་། ཞིང་དུད་བཅས་མཉམ་འབྲེལ་གྱི་རྣམ་པ་ལྟར། རྫོང་ཡོངས་ཀྱི་གྲོང་སྡེ་19ཐུན་མོང་ནས་བསྐྲུན་པའི་བརྔ་བསྡུ་དང་ལྟ་སྐོར་སྤྲོ་གསེང་། འགྲེམ་ཚོང་བཅས་གཞི་གཅིག་ཏུ་འདུས་པའི་ས་མཐོའི་ཀྲོ་མ་ཀྲུ་འདེབས་འཛུགས་རྟེན་གཞི་ཞིག་རེད། དེང་རབས་ཅན་དང་གཞི་ཁྱོན་ཅན། ཐོན་ལས་ཅན་བཅས་ཀྱི་ཕྱོགས་སྟོན་བྱས་ཏེ། ས་མཐོའི་ཐུན་མོང་མ་ཡིན་པའི་རང་བྱུང་ཆ་རྐྱེན་དང་གནམ་གཤིས་ལེགས་ཆ་གང་ལེགས་སྤྱད་དེ། ཀྲོ་མ་ཀྲུ་ཐོན་ལས་འཕེལ་རྒྱས་ཤུགས་ཆེན་བཏང་བར་གྲུབ་འབྲས་མངོན་གསལ་དོད་པོ་ཐོབ་ཡོད། ལོ་རེར་ཆ་སྙོམས་ཀྲོ་མ་ཀྲུ་ཏུན་50ཐོན་སྐྱེད་དང་ཕྱིར་ཚོང་བྱས་ནས། རྫོང་ཡོངས་ཀྱི་གྲོང་སྡེ་19ཡི་ཐུན་མོང་དཔལ་འབྱོར་གྱི་ཡོང་འབབ་རྒྱུན་མཐུད་འཕར་སྣོན་ལ་སྐུལ་ཁྲིད་བྱས།
འདི་ནི་རྟའུ་རྫོང་གིས་གྲོང་གསེབ་འཕེལ་རྒྱས་ལ་སྐུལ་འདེད་གཏོང་བའི་ཟུར་ཞིག་ཡིན། གྲོང་གསེབ་དར་རྒྱས་གང་ལ་བརྟེན་དགོས་སམ། རྟའུ་རྫོང་གིས་ཞིང་ལས་དང་ཡུལ་སྐོར་མཉམ་འདྲེས་དང་ཁྱད་ལྡན་ཐོན་ལས་ལ་བརྟེན་ནས་ལམ་བུ་གསར་པ་བཏོད་ཡོད། །