འབའ་ཐང་རྫོང་སློབ་གསོ་ཅུས་ཀྱི་ལས་དོན་མི་སྣ་ཝང་ཐའོ་ཡིས་བཤད་རྒྱུར། འབའ་ཐང་རྫོང་ཨུས་སློབ་གསོའི་བྱ་བཞག་ལ་མཐོང་ཆེན་བྱས་ཏེ། ས་མུའུ་200ཡས་མས་བསྡུས་ནས་འབའ་ཐང་རྫོང་སློབ་གསོ་གླིང་ཁུལ་འཛུགས་སྐྲུན་བྱས། 2013ལོའི་ཟླ་9པའི་ཚེས་3ཉིན་ལས་འགོ་ཚུགས་ནས་2016ལོའི་ཟླ་9པར་དངོས་སུ་སྤྱོད་འགོ་བརྩམས། སློབ་གསོ་གླིང་ཁུལ་དུ་འབའ་ཐང་སློབ་འབྲིང་དང་མི་དམངས་སློབ་ཆུང་། གསེར་གྱི་འབའ་གཞས་སློབ་ཆུང་བཅས་སློབ་གྲྭ་3བཙུགས་ཡོད། ད་སྐབས་སློབ་མ་4510ཡོད་པ་དང་སློབ་མ་7500ལྷག་བསྡུ་འཆར་ཡོད། འདི་ནི་དཀར་མཛེས་ཁུལ་གྱི་ལས་ཁུངས་འཛུགས་སྐྲུན་ཆེ་ཤོས་ཡིན་པ་དང་ས་ཁྱོན་སྨི་ངོས་གྲུ་20000ཟིན་ཡོད། གླིང་ཁུལ་གྱིས་སྤུས་ལེགས་ཐོན་ཁུངས་གཅིག་བསྡུས་གཉེར་སྒྲུབ་ལེགས་པོ་བྱས་ཡོད། ལྷག་པར་དུ་ད་ལོའི་སྡོམ་སྐར་850ཡིན་པའི་འབྲིང་རྒྱུགས་ཁྲོད་འབའ་ཐང་སློབ་འབྲིང་དུ་སྐར་མ་700ཡན་གྱི་སློབ་མ་79ཡོད། ལོ་རྒྱུས་ཐོག་བྱུང་མྱོང་མེད་པའི་རྒྱུགས་སྐར་800ཅན་གྱི་སློབ་མ་ཐོན་ཞེས་བཤད། ཁོས་གླིང་ཁུལ་གྱི་འཆར་འགོད་དང་འཛུགས་སྐྲུན། འཚར་ལོངས་བཅས་མཐོང་ལམ་དུ་མངོན་པས། འབའ་ཐང་རྫོང་གི་སློབ་གསོ་གླིང་ཁུལ་ཁྱིམ་ནོར་ཞིག་ཏུ་བརྩིས་ཡོད།
འབའ་ཐང་སློབ་གསོ་གླིང་ཁུལ།
འབའ་ཐང་སློབ་གསོའི་གླིང་ཁུལ་ནི་རི་ཀླུང་དུ་ཆགས་ཡོད། དེ་ནི་སློབ་གྲྭ་གསུམ་གཅིག་ཏུ་འདུས་པའི་རིག་གནས་ཀྱི་དག་ཞིང་ཞིག་ཡིན། གླིང་ཁུལ་བསྐྲུན་རྗེས་ཕན་འབྲས་མངོན་གསལ་དོད་པོ་ཐོན་ཡོད། ཝང་ཐའོ་ཡིས་འབའ་ཐང་སློབ་གསོའི་གླིང་ཁུལ་གྱི་སློབ་གསོའི་ཆུ་ཚད་དཀར་མཛེས་ཁུལ་གྱི་མདུན་གྲལ་དུ་སླེབས་ཡོད་བསམ། སློབ་གྲྭའི་མཐའ་འཁོར་དུ་ཁང་པ་ཉོ་བ་དང་ཁང་པ་གླས་པའི་ཁྱིམ་བདག་མང་པོ་འདུས་ཡོད་པ་དང་། ཁོ་ཚོས་རང་འགུལ་ངང་བྱིས་པ་སློབ་གསོའི་གླིང་ཁུལ་དུ་སློབ་སྦྱོང་བྱེད་པར་བསྐྱལ་ནས། བྱིས་པའི་སློབ་སྦྱོང་དང་འཚོ་བར་རྒྱབ་ཕྱོགས་མཁོ་སྒྲུབ་ཀྱི་འགན་ལེན་བྱས།
གུང་གསེང་གི་ལུས་རྩལ།
གླིང་ཁུལ་ལེགས་གྲུབ་བྱུང་རྗེས་ཁྲེང་ཏུའུ་ཧྲུང་ལུའུ་ཡིས་རོགས་སྐྲུན་འོག །མ་དངུལ་སྒོ་ཁྲི་2716བཏང་ནས་གློག་འཕྲུལ་ཁང་10དང་ཚོད་ལྟ་ཁང་30། ཡོ་བྱད་བསྡུ་ཚགས་ཁང་41། གྲངས་གཞི་ཅན་གྱི་ཚོད་ལྟ་ཁང་1བཅས་སློབ་ཁྲིད་སྒྲིག་ཆས་བཀོད་སྒྲིག་བྱས། གཞན་སློབ་གྲྭའི་དྲ་རྒྱ་3དང་གློག་རྡུལ་པང་ལེབ་དཀར་པོ་142། སྒྲོག་ཙེ་དང་རྐུབ་སྟེགས་5200དང་ཉལ་ཁྲི་2500། ཐབ་ཚང་སྒྲིག་ཆས་དང་ཕྱི་རོལ་གྱི་འཆར་ཤེལ་སོགས་འབྲེལ་ཡོད་སྒྲིག་ཆས་བཀོད་སྒྲིག་བྱས་ནས། སློབ་གྲྭ་གསུམ་གྱི་སློབ་མ་4510ཡི་སློབ་སྦྱོང་ལ་ས་གནས་སློབ་གསོ་ཡག་ཤོས་མཁོ་འདོན་བྱས།
སློབ་རའི་འབའ་གཞས།
འབའ་ཐང་རྫོང་སློབ་གསོའི་གླིང་ཁུལ་གྱི་དགེ་རྒན་རྣམས་ཀྱིས་དུས་བཅད་ལྟར་སློབ་མའི་ཁྱིམ་དུ་འཚམས་འདྲིའི་ལས་སྒོ་སྤེལ། ངོ་ཐུག་གདོང་འཕྲད་ཀྱིས་སློབ་མ་ཁྱིམ་དུ་གནས་པའི་རྣམ་འགྱུར་དང་ཁྱིམ་བདག་གི་སློབ་གསོ་རྒྱག་སྟངས། སློབ་མའི་སློབ་སྦྱོང་དང་སེམས་ཁམས་སོགས་ཀྱི་ཐད་ནས་འབྲེལ་འདྲིས་ཟབ་མོ་བྱས། དེ་སྔའི་དགེ་རྒན་གཅིག་པུར་བརྟེན་པའི་རྣམ་པར་འགྱུར་བ་བཏང་ནས་སློབ་མས་རང་འགུལ་ངང་སློབ་སྦྱོང་ལ་སྐུལ་ཁྲིད་བྱས། ཁྱིམ་ཚང་དང་སློབ་གྲྭ་ཕྱོགས་གཉིས་ནས་སློབ་གསོ་སྤེལ་བ་མངོན་འགྱུར་བྱུང་བས། ཁྱིམ་བདག་དང་སློབ་མ་ཚོའི་བསྔགས་བརྗོད་ཐོབ། གླིང་ཁུལ་གྱིས་ད་དུང་ཧྲུང་ལུའུ་ཡི་ཉམས་མྱོང་ལ་སློབ་སྦྱོང་བྱས་ཏེ། སེམས་ཁམས་ཟུར་ཁྲིད་དང་སློབ་གྲྭའི་སེམས་ཁམས་བློ་འདྲི་ཁང། ཚོགས་པ་འཛུགས་སྐྱོང་བཅས་ལོ་འཁོར་གྱི་ལག་བསྟར་རྣམ་གྲངས་ནང་བཅུག་སྟེ། སློབ་མའི་ཤེས་བྱའི་བྱང་ཚད་ཕྱོགས་ཡོངས་ནས་མཐོ་རུ་བཏང་ནས་སློབ་མའི་རང་སྦྱོང་ནུས་པ་གསོ་སྐྱོང་སྒོས་སློབ་མའི་སེམས་ཁམས་བདེ་ཐང་ཆུ་ཚད་མཐོ་རུ་བཏང་།
དམར་དམག་ཆུང་ཆུང་རྣམས་ཀྱིས་ཏང་ལ་གུས་འདུད་ཞུ།
ཝང་ཐའོ་ཡིས་བཤད་རྒྱུར། འབའ་ཐང་སློབ་གསོའི་གླིང་ཁུལ་གྱི་དམིགས་ཚད་ནི་སི་ཁྲོན་དང་ཡུན་ནན། བོད་ལྗོངས་འབྲེལ་མཚམས་ཀྱི་སློབ་གསོའི་མཐོ་ས་གཏོད་རྒྱུ་དེ་ཡིན་ལ། མིག་སྔའི་འཁོར་སྐྱོད་ཀྱི་ཕན་འབྲས་ལྟར་ན། ཁོ་དང་ས་གནས་སློབ་གསོའི་ལས་དོན་པར་ཡིད་ཆེས་བརྟན་པོ་ཡོད་ཅེས་བཤད།