དཀར་མཛེས་རྫོང་ཤར་ཕྱོགས་ཡུལ་ཤོག་ལམ་གོང་ཉེན་རྟོག་ཞབས་ཞུ་ས་ཚིགས་ལ་མཚོན་ན་མཚོ་འཕགས་སྨི་3980ཡན་དུ་གནས་ཡོད་ལ། གནས་དེ་ནས་འགྲོ་སྐབས་རྩ་གཉིས་ཨང་རྟགས་བཤེར་ཚེ་ཉེན་རྟོག་པར་རོགས་སྐྱོར་གནང་རོགས་ཞུ་ཆོག་པས་ཁྲོན་བོད་ལམ་ཐིག་ཐོག་གི་ཁ་ལོ་བ་དང་ཡུལ་སྐོར་པ་རྣམས་ཀྱི་བདེ་སྲུང་ས་ཚིགས་སུ་གྱུར་ཡོད་པས། སི་ཁྲོན་ཞིང་ཆེན་སྤྱི་བདེ་ཐིང་གིས་ཞིང་ཆེན་ཡོངས་ཀྱི་སྤྱི་བདེའི་གཞི་རིམ་རྨང་གཞིའི་ལས་དོན་སྔོན་ཐོན་གཞི་རིམ་སུའོ་ཡི་རུ་ཁག་ཏུ་བདམས་ཡོད་པར་མ་ཟད། ཤར་ཕྱོགས་ཡུལ་ཤོག་མངག་གཏོང་ཁང་གི་འགོ་འཛིན་ལིའུ་ཕེང་སྔ་རྗེས་སུ་རྒྱལ་ཡོངས་སྤྱི་བདེ་ལས་ཁུངས་ཀྱི་གྲུབ་འབྲས་འབུར་ཐོན་གྱི་མི་སྒེར་དང་སི་ཁྲོན་ཞིང་ཆེན་གཞི་རིམ་ཡ་རབས་མི་དམངས་ཉེན་རྟོག་པ། སི་ཁྲོན་ཞིང་ཆེན་2023ལོའི་ཐེན་ཧྥུའུའི་དོན་གཉེར་མི་སྣ་ཆེ་གྲས་བཅུ་དང་། རྒྱལ་ཡོངས་དཔེ་བཟང་ཕྱིར་འཐེན་དམག་མི་བཅས་སུ་བདམས་ཡོད་ལ། ད་ལོའི་བདུན་པའི་ཚེས་གཅིག་ལ་སི་ཁྲོན་ཞིང་ཆེན་གྱི་ཕུལ་བྱུང་གུང་ཁྲན་ཏང་ཡོན་ལ་བདམས་པ་རེད།
ལིའུ་ཕེང་གིས་བཅར་འདྲི་དང་ལེན་བྱེད་བཞིན་པ།
དད་སེམས་བརྟན་པོས་བློ་ཁ་ཏང་ལ་ཕྱོགས།
ལིའུ་ཕེང་གིས་སྔ་རྗེས་སུ་དཀར་མཛེས་རྫོང་གི་འདན་མ་དང་ཟི་ཐང་མདའ། ཤར་ཕྱོགས་ཡུལ་ཤོག་མངག་གཏོང་ཁང་གི་འགོ་འཛིན་གྱི་འགན་འཁུར་རིང་། ལམ་གོང་ཉེན་རྟོག་ཞབས་ཞུ་ས་ཚིགས་སུ་ལས་དོན་གྱི་འགན་འཁུར་བ་རེད། ཁོང་གིས་མཚོ་འཕགས་སྨི་3980ཟིན་པའི་ཉེན་རྟོག་ཞབས་ཞུ་ས་ཚིགས་དེར་ས་རྒྱ་ཆེ་ལ་མི་འབོར་ཉུང་ཞིང་འབྲོག་པ་ཁ་ཐོར་ཡིན་པའི་ཁྱད་ཆོས་དང་འབྲེལ་ནས། ཏང་གི་གསར་གཏོད་ཀྱི་རིགས་པའི་གཞུང་ལུགས་སློབ་སྦྱོང་དང་དྲིལ་བསྒྲགས་ལ་ཤུགས་སྣོན་རྒྱག་རྒྱུར་མཐོང་ཆེན་བྱས་པ་དང་། ཁོང་གིས་ཉེན་རྟོག་རླངས་འཁོར་གཅིག་པུ་དེ་འབྲོག་ཁུལ་གྱི་སྐོར་སྐྱོད་ཉེན་རྟོག་ཞབས་ཞུའི་ས་ཚིགས་ལྟ་བུར་བརྩིས་ནས། ཉེན་རྟོག་མི་སྣའི་སྣེ་ཁྲིད་དེ་ཏང་གི་ཚོགས་ཆེན་ཉི་ཤུ་པའི་དགོངས་དོན་ཐག་རིང་ལུང་ཁུག་གི་འབྲོག་ཁུལ་དུ་ཧུར་ཐག་བསྐྱལ་ཏེ། ལོ་གཅིག་ནང་འགལ་བ་དང་རྩོད་གཞི་126ཐག་གཅོད་བྱས་པ་དང་། འབད་འཐབ་བྱེད་ཕོད་པ་དང་དགའ་ཞེན་ཡོད་པའི་སྒོ་ནས་ལམ་གོང་ཉེན་རྟོག་ཞབས་ཞུའི་ས་ཚིགས་དེ་རྒྱལ་ལམ་317ཐོག་གི་ཆེས་བདེ་འཇགས་ཀྱི་གནས་སུ་བསྒྱུར་བས་ཁས་ལེན་དང་བསྟོད་བསྔགས་ཆེན་པོ་ཐོབ་ཡོད།
མང་ཚོགས་ལ་ལམ་སྣེ་ཁྲིད་པ།
ལིའུ་ཕེང་གིས། ལྷག་བསམ་གྱི་ས་མཐོ་དམིགས་ཚད་དུ་བྱ་རྒྱུ་མཐའ་འཁྱོངས་ཀྱིས་རྒྱང་སྐྱོད་ཀྱི་སྙིང་སྟོབས་དང་ལམ་གཉིས་སྙིང་སྟོབས་ཁོངས་གཏོགས་ས་གནས་ཀྱི་སྤྱི་ཚོགས་བཅོས་སྐྱོང་ནང་མཉམ་འདྲེས་ཐུབ་པ་བྱས་ཏེ། "ཁྱིའུ"ཡི་ནུས་པར་བརྟེན་ནས"དུས་བདེའི་ས་ཚིགས"གསར་གཏོད་ལ་སྐུལ་འདེད་གཏོང་བ་དང་"འགྱོགས་ཤིང་"གི་སྟོབས་ཤུགས་འདོན་སྤེལ་བྱས་ནས་ཉེན་རྟོག་པ་དང་མང་ཚོགས་མཉམ་སྡེབ་མཉམ་བཅོས་ལ་སྐུལ་འདེད་བཏང་སྟེ། "གཟེར་མའི"སྙིང་སྟོབས་ལ་བརྟེན་ནས་ཁོངས་གཏོགས་ས་གནས་བཅོས་སྐྱོང་གི་འགག་རྩའི"མཚམས་ཚིགས"སུ་གཞི་ཚུགས་ཏེ་ཞིབ་ཕྲའི་གནད་དོན་ཐག་གཅོད་ནན་མོ་བྱས་ཡོད།
དབྱར་རྩྭ་བརྐོ་བའི་སྐུལ་སློང་བཀོད་འདོམས་ཚོགས་འདུ་འཚོག་བཞིན་པ།
དམངས་ལ་སྲི་ཞུ་སྒྲུབ་པའི་འགན་འཁྲི་ཕྲག་ཏུ་འཁུར།
དམག་སྐུལ་དང་ལེན་བྱེད་རིང་། ལིའུ་ཕེང་གིས་2001ལོར་ཙི་ཀུང་གྲོང་ཁྱེར་མ་ཧྥང་ཁྲོམ་གཞུང་གི་མེ་སྐྱོན་སོགས་ཀྱི་མེ་ཟོན་རོགས་སྐྱོབ་ལས་དོན་ཆེ་གྲས་ནང་ཞུགས་མྱོང་བ་དང་། མེ་ལྕེ་དྲག་པོའི་ཁྲོད་ནས་འབར་གས་བྱས་ཉེར་ཡོད་པའི་སོལ་རླངས་བླུགས་སྣོད་ཁུར་ཡོང་ཞིང་། དུ་བ་ལང་ལོང་ཁྲོད་ནས་བཀག་ལུས་ཐེབས་པའི་མི་སྣ་འཚོལ་སྐྱོབ་བྱས། ཐོག་བརྩེགས་20ཡི་ཐོག་ཁང་ནས་རང་སྲོག་གཅོད་པའི་མི་སྣ་སྐྱོབ་མྱོང་ཡོད། ལྷག་པར་དུ་ལམ་གོང་ཉེན་རྟོག་ཞབས་ཞུ་ས་ཚིགས་སུ་སླེབས་རྗེས། མི་དམངས་མང་ཚོགས་ཀྱི་ཚེ་སྲོག་དང་རྒྱུ་ནོར་གྱི་བདེ་འཇགས་དེ་རི་བོ་ཐའེ་ཧྲན་ལས་ལྕི་བའི་འགན་འཁྲི་དང་ལས་འགན་ཞིག་ཏུ་བརྩི་བཞིན་ཡོད།
ལིའུ་ཕེང་གིས་མང་ཚོགས་ལ་འཚམས་འདྲི་ཞུ་བཞིན་པ།
ལམ་གོང་ཉེན་རྟོག་ཞབས་ཞུ་ས་ཚིགས་ནི་རྒྱལ་ལམ་317གྱི་ལམ་མདོ་གལ་ཆེན་ཞིག་ཡིན་པ་དང་། ཉེ་འཁོར་གྱི་སྤྱི་ལེ་252ཀྱི་ས་རྒྱ་ཆེ་ལ་མི་འབོར་ཉུང་ཞིང་རླངས་འཁོར་ལ་སྐྱོན་ཤོར་བ་དང་རྐུན་ཅག་གི་དོན་རྐྱེན་ཡང་ཡང་ཐོན་གྱི་ཡོད། ལོ་8བརྟན་སྲུང་བྱས་ཚུན། ལིའུ་ཕེང་གིས་ཐོག་མཐའ་བར་གསུམ་དུ་གཞི་རིམ་དུ་རྐང་ཚུགས་ཤིང་རྒྱལ་ཁབ་ཀྱི་བདེ་འཇགས་དང་སྤྱི་ཚོགས་བརྟན་བརླིང་སྲུང་སྐྱོང་བྱེད་པའི་ལས་འགན་ལྕི་པོ་ཕྲག་ཏུ་འཁུར་ནས། ཉེན་ཡོད་གྲྭ་བཙུན་མང་ཚོགས་5ལ་སློབ་གསོ་རོགས་སྐྱོར་དང་བློ་འགུག་བྱས། ཁོངས་གཏོགས་ས་གནས་དང་ཉེ་འཁོར་ཤང་གྲོང་བར་གྱི་རྩྭ་སའི་རྩོད་གཞི་100ལྷག་ཙམ་བསལ་བ་རེད། གྱོད་གཞི་རྩད་ཆོད་པའི་ལག་རྩལ་ལ་ཆེད་མངགས་ཞིབ་འཇུག་བྱས་ནས་སྲོག་ཆགས་ཀྱི་རྨིག་རྗེས་བསྡུར་ཐབས་ཐོག་མར་གསར་གཏོད་བྱས་ཏེ། བ་གླང་དང་རྟ་བརྐུས་པའི་གྱོད་གཞི་80ལྷག་རྩད་ཆོད་ནས་མང་ཚོགས་ཀྱི་རྐུ་ཤོར་བ་དང་བོར་བརླག་སོང་བའི་སྒོ་ཟོག་800ལྷག་བཙལ་ནས་རྙེད་པ་རེད། ཞིང་འབྲོག་མང་ཚོགས་ལ་སྒོར་ཁྲི་600ལྷག་གི་དཔལ་འབྱོར་གྱོང་གུན་སེལ་ཐུབ་པར་མ་ཟད། ཞིང་ཆེན་བཞིའི་ལེ་བར་སྟོང་གསུམ་བརྒལ་ནས་རྒྱུགས་རྟ་བརྐུས་པ་ཕྱིར་བླངས། "དུས་བདེའི་གཉེར་པ"ཞེས་པའི་གྲོང་ཚོ་རེར་ཉེན་རྟོག་པ་རེའི་ལས་དོན་བྱ་ཐབས་གསར་གཏོད་བྱས་ཏེ། ཁོངས་གཏོགས་ས་གནས་ཀྱི་བརྟན་བརླིང་སྲུང་སྐྱོང་ལོ་8་ལ་བསྟུད་མར་"དོན་དག་གཅིག་ཀྱང་མ་བྱུང་པ་ལྔ"འགན་ལེན་བྱས་འདུག 2023ལོར། ཁོང་གིས་དཀར་མཛེས་ཁུལ་སྤྱི་བདེ་ཅུས་སུ"ལའེ་ཧྥུང་ལ་སློབ་སྦྱོང་བྱེད་པའི་དང་བླངས་ཞབས་ཞུའི་ཡན་ལག་རུ་ཆུང་"ཐོག་མར་བཙུགས་པ་དང་། ཙོ་ཟླ་ལའི་འདབས་སུ་ལའེ་ཧྥུང་ལ་སློབ་སྦྱོང་བྱེད་པའི་དང་བླངས་ཞབས་ཞུའི་བརྗོད་དོན་གཙོ་བོའི་བྱེད་སྒོ་སྤེལ་ནས། "ལའེ་ཧྥུང་རྣམ་པའི་ཉེན་རྟོག་རུ་ཁག"བཏོད་པར་བརྒྱུད། རིན་མེད་ངང་ཆུ་ཁོལ་དང་སྨན་རྫས། གསོ་རླུང་སོགས་མཁོ་འདོན་བྱས་པ་དང་། ཉེན་རྟོག་ཞབས་ཞུའི་ས་ཚིགས་ཀྱི་འཐབ་གྲོགས་དང་མཉམ་དུ་རླངས་འཁོར་སྐྱོན་ཤོར་བ་དང་ས་མཐོར་གསོ་རླུང་མི་འདང་བ་སོགས་ཀྱི་ཡུལ་སྐོར་པ་5000ལྷག་ལ་རོགས་སྐྱོབ་བྱས་ནས། ཕར་འགྲོ་ཚུར་འོང་བྱེད་པའི་ཡུལ་སྐོར་པ་དང་ཞིང་འབྲོག་མང་ཚོགས་ལ་དྲོད་སྐྱིད་གནང་པས། ཉེན་རྟོག་ཞབས་ཞུའི་ས་ཚིགས་ཀྱི་དམངས་གཅེས་བྱས་རྗེས་དང་བཅོས་སྐྱོང་ཉམས་མྱོང་དེ་ཡང་རྒྱལ་ལམ་317དང་318ལམ་རྒྱུད་ཀྱི་མངག་གཏོང་ཁང་དུ་ཁྱབ་གདལ་དང་སློབ་སྦྱོང་བྱེད་པའི་མིག་དཔེ་རུ་གྱུར་ཡོད།
ལིའུ་ཕེང་གིས་འགྲུལ་པའི་རླངས་འཁོར་ལ་ལྕགས་ཐག་སྒྲོག་རོགས་བྱེད་བཞིན་པ།
ལས་གནས་བརྟན་སྲུང་གི་ཐོག་མའི་སེམས་འདུན་བརྟན།
ལིའུ་ཕེང་དམག་ཁོངས་ནས་ཕྱིར་འཐེན་ནས་མི་ཚེའི་ལས་ཀ་གསར་པ་སྒྲུབ་སྐབས། དུས་དང་རྣམ་པ་ཀུན་ཏུ"དམག་མིའི"རང་གཤིས་མ་དོར་བར་མདུན་སྐྱོད་ལམ་བུའི་ཐོག་སྤྱིར་བཏང་གི་ལས་གནས་ཐོག་ཏང་གི་སེམས་ཁྲལ་སེལ་བ་དང་། རྒྱལ་ཁབ་ཀྱི་ཆེད་དུ་ལེགས་སྐྱེས་འབུལ་བ། དམངས་ལ་ཞབས་འདེགས་ཞུ་བ་བཅས་ཀྱི་འགྱུར་མེད་ཀྱི་ཐོག་མའི་སེམས་འདུན་བཅངས་ཡོད།
ཤར་ཕྱོགས་ཡུལ་ཤོག་གི་ས་ཁམས་གནས་ཡུལ་དམིགས་བསལ་ཡིན་པ་དང་། ཐག་རིང་ཤོས་ཀྱི་གྲོང་ཚོར་སྐོར་གཡེང་ཐེངས་གཅིག་བྱས་ན་ཕར་ཚུར་སྤྱི་ལེ་100ཙམ་ཡོད། ལིའུ་ཕེང་གིས"ཧྥེང་ཆའོ་ཡི་ཉམས་མྱོང་"རྒྱུན་འཛིན་ཧུར་ཐག་བྱས་ནས་དུས་བབ་གསར་པའི་འོག་འབྲོག་ཁུལ་གྱི་མངག་གཏོང་ཁང་འཛུགས་སྐྲུན་བྱེད་པའི་ཐབས་ལམ་གསར་པ་འཚོལ་ཞིབ་བྱས་ཏེ། འགན་འཁྲིའི་ཚོ་ཆུང་9ཡི་སྐོར་གཡེང་བདེ་འཇགས་མཉམ་སྲུང་རུ་ཁག་ལུགས་མཐུན་ངང་དབྱེ་འབྱེད་བྱས་ནས་ཆུ་ཚོད་24རིང་རྒྱུན་ཆད་མེད་པར་སྐོར་གཡེང་བྱེད་པའི་ལམ་སྲོལ་བཙུགས་པ་དང་། ཉེན་རྟོག་ལས་དོན་ཁང་དང་ཡོངས་བསྒྲགས་ཁྲུའུ་དང་ཁང་བཙུགས་ནས་གྲོང་ཚོ་ཨུ་ལྷན་ཚན་ཁག་གི་རང་འགུལ་ནུས་པ་འདོན་སྤེལ་གང་ལེགས་བྱས། ཉེན་རྟོག་པ་དང་འབྲོག་པ་ཟུང་འབྲེལ་གྱི་མཉམ་འགོག་ལམ་སྲོལ་གྱིས་ཁོངས་གཏོགས་ཁུལ་གྱི་བདེ་འཇགས་ཀྱི་རྣམ་པ་བཟང་པོ་ནུས་ལྡན་ཆགས་ཡོད། རྫོང་ཡོངས་ཀྱི་རྒྱ་ཆེ་ཤོས་དང་རྙོག་འཛིང་ཆེ་ཤོས། མངག་གཏོང་ཁང་དང་བར་ཐག་རིང་ཤོས་ཡིན་པའི་ངང་མཚོ་གྲོང་ཚོའི་ཉེན་རྟོག་པ་དང་མང་ཚོགས་མཉམ་འགུལ་ལས་དོན་ཚད་ལྡན་གྱི་ལམ་བུའི་ཐོག་བསྐྱོད་པས། གྲོང་ཚོ་དེར་ལོ་གསུམ་ལ་བསྟུད་མར་སྒོ་ཟོག་རྐུ་ལ་ཤོར་བའི་གྱོད་གཞི་གཅིག་ཀྱང་བྱུང་མེད།
ལིའུ་ཕེང་གིས་སྣེ་ཁྲིད་འོག །ལམ་གོང་ཉེན་རྟོག་པ་ཡོངས་ཀྱིས"བལྟོས་བཅས་ཀྱི་གསོ་རླུང་འདུས་ཚད་50%དང་ལྷག་བསམ་རྣལ་མའི་ཚད་100%"ཞེས་པའི་འབོད་ཚིག་བསྒྲགས་པར་མ་ཟད། གསོ་རླུང་ཉུང་རུང་ལྷག་བསམ་ལྡན"ཞེས་པའི་མངག་གཏོང་ཁང་གི་བསླབ་བྱ་ཆགས་ནས། དུས་རབས་གསར་པའི་ཕྱིར་འཐེན་དམག་མིའི་སྙིང་སྟོབས་དང་འོད་མདངས་ཕན་ཚུན་འཕྲོ་བ་བྱས་ཏེ། "ལྷག་བསམ་གྱི་ས་མཐོར"དམག་མིའི་རང་གཤིས་སླར་ཡང་མངོན་པར་བྱས།