༡
“ཁྱོད་ཀྱིས་ང་ལ་ཁ་ཡ་མི་བྱེད་དོན་ཅི་ཡིན།”
“ངས་ཁྱོད་ལ་ཁ་ཡ་བྱེད་འདོད་པས་ཡིན།”
“ཁ་ཡག་མ་བཤད། དྲང་མོར་ཤོད། འུ་གཉིས་ཀྱིས་ཁ་བརྡ་བྱས་ནས་ཡུན་རིང་འགོར་ཡོད་པ་མ་ཡིན་ནམ། ངོ་ཚ་དགོས་དོན་ཅི་ཡོད།”
“ངོ་ཚ་དགོས་དོན་མེད་ན་ཁྱོད་ཀྱིས་ཚུར་ལ་ཁ་མི་གྲག་དོན་ཅི་ཡིན།”
“ཁྱོད་སྐྱེས་པ་ཕོ་ཞིག་གིས་སྔོན་ལ་ཁ་མི་གྲག་ན། ང་བུ་མོ་ཞིག་ལ་ཅི་ཁག”
“རྗེས་མར་ཁ་ཡ་བྱེད་ཁོ་ཐག་ཡིན།”
“ད་ཅི་ཆ། སྔོན་མར་ཡང་ཁྱོད་ཀྱིས་འདི་ལྟར་བཤད་པ་མ་ཡིན་ནམ། ང་ལ་ཁ་ཡ་བྱེད་མི་ཐུབ་རྒྱུ་ཅི་འདུག ཁྱོད་ང་ལ་སྐྲག་གམ།ངའི་མགོ་ན་རྭ་མེད། ངའི་ངོ་ན་རྨ་མེད། ང་ལ་ངོ་གདོང་ཡག་པོ་ཞིག་མེད་ཀྱང་མ་མཐའང་གཟུགས་གཞི་ཡག་པོ་ཞིག་ཡོད། ཁྱོད་ང་ལ་སྐྲག་དགོས་དོན་ག་ལ་ཡོད། དེ་ཨེ་རེད།”
“དེ་ལོས་ཡིན། ཧེ་ཧེ།”
“དགོད་རྒྱུ་ཅི་ཡོད།”
“ཅང་མ་རེད། ཁྱོད་འདི་ངོ་མ་བུ་མོ་སྣང་ཡངས་འདྲིས་སླ་བ་ཞིག་རེད། ཁྱོད་ཀྱིས་ཚུར་ལ་འདི་ལྟར་མ་བཤད་ན། ངས་ཁྱོད་ཀྱི་གཟུགས་གཞི་ཚིགས་དྲུག་སྨྱུག་མ་རེད་ཅེས་བཤད་རྒྱུ་བརྗེད་འདུག”
“ང་སྣང་ཡངས་ཤིག་ག་ལ་ཡིན། འདྲིས་སླ་བ་ཞིག་ཀྱང་མིན་པས། ཁྱོད་ཀྱིས་ཐེངས་གཉིས་ལ་ཐུག་ཀྱང་ཁ་ཡ་བྱེད་མ་ཕོད་པ་མ་ཡིན་ནམ། སྐད་ཆ་ལ་ལ་ཞིག་ཁྱོད་ཀྱིས་མ་བཤད་ཀྱང་། ངས་གསལ་བོར་ཤེས་ཡོད་པས།ངས་ཁྱོད་ཀྱི་ཚབ་ཏུ་བཤད་ཀྱང་མི་ཆོག་པ་ཅི་ཡོད། དཔེར་ན་ངའི་གཟུགས་གཞིའི་ཐད་ཀྱི་སྐད་ཆ་དེ་ལྟར།”
“སྐད་ཆ་ལ་ལ་ཞིག་ངས་དུས་ལྟར་བཤད་མེད་ཚེ། ཁྱོད་ཀྱིས་འདི་ལྟར་ཚུར་ལ་སྔོན་བརྡ་བཏང་ནའང་ཡག་པོ་རེད།”
“ག་ལ་ག་ལ། ཀུ་རེ་ཡིན། ངས་ཁྱོད་ཀྱིས་ཅི་ཞིག་འདོད་ཀྱིན་པ་ག་ལ་ཤེས། དངོས་གནས་ཤེས་ཁག་པོ་རེད། ཁྱོད་ཀྱིས་ང་ལ་ཁ་ཡ་མི་བྱེད་དོན་ཅི་ཡིན། དྲང་མོར་ཤོད།”
“དྲང་མོར་བཤད་ན། རྒྱུ་རྐྱེན་ཅི་ཡིན་ངས་ཀྱང་བཤད་ཁག་པོ་རེད། མ་ཐུག་སྔོན་ལ་ཁ་ཡ་བྱེད་རྩིས་ཡིན་མོད། ཁྱོད་ཀྱི་གམ་ལ་ཐོན་དུས་ཅི་ཞིག་བཤད་དགོས་པའང་མི་ཤེས་པར་དབུགས་ཁེགས་ལ་བྱེད་པས་ཁ་ཡ་མ་བྱས་པར་བུད་སོང་བ་ཡིན། དགོངས་དག”
“འདི་ཐེངས་སྔོན་མའི་རྒྱུ་རྐྱེན་མ་ཡིན་ནམ། ཐེངས་སྔོན་མར་ཁྱོད་དངོས་གནས་འཚབ་ཀྱིན་འདུག ཅི་ཁག”
“ད་ཐེངས་འཚབ་ཀྱིན་པ་མ་ཤེས་སམ།”
“མ་ཤེས། ད་ཐེངས་ཁྱོད་ཀྱིས་ཁ་གྲག་རྩིས་རེད་བསམ་མོད། གམ་ལ་ཐོན་པ་ན་གློ་བུར་དུ་མགོ་སྒུར་ནས་བུད་ཐལ། ཁྱོད་ཀྱིས་ངའི་མཐའ་འཁོར་ནས་ངོ་ཤེས་ཤིག་མཐོང་བྱུང་ངམ། ངོ་ཚ་དགོས་དོན་ཅི་ཡིན། ལུས་རྩལ་ར་བའི་ནང་ན་མི་མང་བོ་ཡོད་པས་ཨེ་རེད།”
“མིན། དགོངས་པ་མ་ཚོམ། མི་མང་ནའང་ང་དེ་ཚོར་ངོ་ཚ་དོན་ཅི་ཡོད།”
“དེ་ངས་ག་ལ་ཤེས། ཡང་གཅིག་བཤད་ན་ཁྱོད་ཀྱི་ངོ་ཤེས་དང་གྲོགས་པོ། དགའ་རོགས་སོགས་ཡོད་པས། དེ་དག་གི་སྔུན་ནས་འུ་གཉིས་ཀྱི་འབྲེལ་བ་ཤེས་འགྲོ་བར་དོགས་པ་ཡིན་སྲིད།”
“ངའི་དགའ་རོགས་ཁྱོད་མ་ཡིན་ནམ།”
“ཕན་ཚུན་ལ་ཁ་མི་གྲག་པའི་དགའ་རོགས་ཤིག་ཡོད་དམ།”
“དུས་རྒྱུན་ཁྱོད་ལ་ཡི་གེ་བསྐུར་ནས་ཁ་བརྡ་བྱེད་པ་འདིའང་ཁ་གྲག་སྟངས་ཤིག་མ་ཡིན་ནམ།”
“ཡིན་སྲིད། འུ་གཉིས་རྒྱུས་ཡོད་དུ་གྱུར་ཡོད་པའང་རྒྱུ་རྐྱེན་འདིའི་དབང་གིས་ཡིན་སྲིད།”
“ངས་ཀྱང་ཁྱོད་ལ་ཁ་ཡ་བྱེད་མ་ཐུབ་པ་མ་གཏོགས་ཁྱོད་ངའི་སེམས་ཀྱི་དགའ་རོགས་ཡིན་པ་ལོས་ཤེས།”
“ཤེས་སམ། ངས་ལན་རེར་ཁྱོད་ཀྱིས་ཁྱོད་ཀྱི་དགའ་རོགས་བདེ་སྐྱིད་སྒྲོལ་མ་རེད་བསམ་བཞིན་འདུག་སྙམ།”
“དེའི་དོན་ཅི་རེད། གོ་བ་མ་ལོག”
“དེའི་དོན་དེ་རེད།”
“ཧ་གོ་མ་བྱུང་།”
“འུ་གཉིས་ཀྱིས་དང་ཐོག་སློབ་ཁང་གི་བར་ཁྱམས་ནས་ཁ་ཆད་བཏབ་དུས་ཁྱོད་ཀྱིས་བདེ་སྐྱིད་སྒྲོལ་མ་མ་མཐོང་ངམ།”
“མ་མཐོང་། བདེ་སྐྱིད་སྒྲོལ་མ་དང་ངེད་གཉི་ཀའི་དོན་དག་ནི་འདས་སོང་གི་གཏམ་རྒྱུད་ཙམ་རེད། ད་ནི་རྟ་བརྒྱུགས་ནས་རྡུལ་འཇགས་ཤུལ་རེད། ངེད་གཉིས་ལ་འབྲེལ་བ་ཅི་ཡང་མེད།”
“དངོས་གནས་མ་མཐོང་ངམ། ཁྱོད་ངའི་ཕྱོགས་སུ་ཡོང་དུས་བདེ་སྐྱིད་སྒྲོལ་མ་ཏག་ཏག་ངའི་སྔུན་ནས་ཁྱོད་ཀྱི་ཕྱོགས་སུ་བུད་ཐལ། བར་ཁྱམས་ཀྱི་མུན་པ་སྲབ་བུ་དེའི་ཀློང་ནས་མོས་ཡང་དང་ཡང་དུ་མགོ་བོ་རྒྱབ་ལ་འཁོར་ནས་ང་ལ་ལྟ་ཞོར་དང་སྔུན་ལ་དགྱེ་ནས་ཁྱོད་ལ་ལྟ་ཞོར་བུད་སོང་། འུ་གཉིས་ཀྱི་བར་ནས་ནག་ཡོར་ཡོར་རྒྱང་ལ་ཡལ་བའི་རྒྱབ་གཟུགས་དེ་ད་དུང་ངའི་མིག་ལ་ཞག་འདུག”
“འོད་འཕྲོ་ཕྱོགས་ཤིག་གིས་ཡིན་ནམ། ངས་དངོས་གནས་བདེ་སྐྱིད་སྒྲོལ་མ་མཐོང་མ་བྱུང་། ཁྱོད་ཀྱི་རྒྱབ་ཕྱོགས་ཀྱི་སྒེའུ་ཁུང་ཆུང་ཆུང་དེ་ལས་འོད་འཕྲོས་ཡོད་པས། སློབ་ཁང་གི་བར་ཁྱམས་ནས་ཁྱོད་ཀྱི་ངོ་གདོང་རབ་རིབ་ཏུ་སྣང་བྱུང་། ནན་ཏན་གྱིས་བལྟས་པ་མིན་ཚེ་ཁྱོད་ཀྱང་ངོས་ཟིན་ཁག་པོ་འདུག་པས། ངས་ཁྱོད་ཀྱི་གམ་ན་འགྲོ་བ་དེ་དག་སུ་ཡིན་ག་ལ་ཤེས།”
“དེ་ན་ཁ་ཡ་མི་བྱེད་དོན་ཅི་ཡིན།”
“ཁྱོད་ལ་ཐེངས་དང་པོར་ངོ་ཐུག་པ་ཡིན་པས་ངོ་ཚ་བྱུང་།”
“ཁྱོད་བུད་མེད་མང་བོར་འགྲོགས་མྱོང་བ་མ་ཡིན་ནམ། དེ་འདྲའི་ངོ་ཆུང་ཞིག་ག་ལ་ཡིན། ངོ་ཚ་དགོས་པ་ཁྱོད་མ་རེད། བདེ་སྐྱིད་སྒྲོལ་མས་འུ་གཉིས་ཀྱིས་ཁ་ཆད་བཏབ་ཡོད་པ་ཤེས་ཡོད་པ་འདྲ། ང་སློབ་ཁང་དུ་ཐོན་དུས། མོས་ང་ལ་ཡང་དུ་ཡང་དུ་བལྟས་ནས་ཁྲེལ་དགོད་བྱེད་ཀྱིན་འདུག སློབ་གྲོགས་ཁ་ཤས་ཀྱིས་ཀྱང་མོའི་རྣམ་འགྱུར་གྱི་ནང་དོན་གོ་ཡོད་པ་འདྲ་བས། ང་དངོས་གནས་ངོ་ཚ་བྱུང་།”
“བདེ་སྐྱིད་སྒྲོལ་མས་ཅི་བཤད་ན་བཤད་དུ་ཆུགས། ཁྱོད་ངོ་ཚ་དགོས་དོན་མེད།”
“ཁྱོད་ངོ་ཚ་བར་རྒྱུ་མཚན་འདྲེན་རྒྱུ་འདུགང་ངོ་ཚ་བར་རྒྱུ་རྐྱེན་མེད་དམ། ངོ་མ་སྐད་ཆ་གནས་ལུགས་མེད་ནི་རེད་ཡ།”
“ཀུ་རེ་ཡིན། སྤོ་མ་ལངས།”
“སྤོ་ལངས་མེད།”
“སྤོ་ལངས་འདུག”
“ངོ་མ་སྤོ་ལངས་མེད། ང་ཁྱོད་ཀྱི་སྟེང་ལ་སྤོ་ལངས་དགོས་པའི་ཚད་ལ་ཐོན་མེད།”
“དེ་འདྲ་ཡིན་སྲིད། ཕན་ཚུན་ལ་ཡིད་ཆེས་བྱས་ན་ཡག་པོ་རེད།”
“ངས་ཀྱང་དེ་ལྟར་བསམས་མོད། དོན་དངོས་ནི་ཅི་འདྲ་ཞིག་ཡིན་པ་སུས་ཤེས།”
“དོན་དངོས་ནི་ཅི་འདྲ་ཞིག་ཡིན་པ་སོ་སོའི་སེམས་ན་གསལ་བོ་ཡིན། ངས་ཁྱོད་ལ་ཐེངས་གཉིས་ལ་ཁ་ཆད་བཏབ་ནས་ཁ་ཡ་མ་བྱས་དོན་ཡང་ངའི་སེམས་ན་གསལ་བོ་ཡིན།”
“ཁྱོད་ཀྱི་སེམས་ན་གསལ་བོ་ཡིན་ནམ། དེ་ན་རང་གི་སྔུན་ན་འགྲོ་བའི་བདེ་སྐྱིད་སྒྲོལ་མའང་རིག་མེད་པ་ཅི་རེད། ཁྱོད་ཀྱིས་དངོས་གནས་བདེ་སྐྱིད་སྒྲོལ་མ་མ་མཐོང་ངམ།”
“ཁྱོད་འདི་དོན་དག་གཅིག་ཡང་ནས་བསྐྱར་དུ་འདྲི་རྒྱུར་དགའ་བོ་འདུག”
“ཁྱོད་ཀྱང་སྐད་ཆ་གཅིག་ཡང་ནས་བསྐྱར་དུ་བཤད་རྒྱུར་དགའ་བོ་འདུག འུ་གཉིས་ཀྱི་གཤིས་ཀ་འདྲ་བོ་འདུག་ཨང་།”
“ཡིན་ན་ཐང་། ངས་དངོས་གནས་བདེ་སྐྱིད་སྒྲོལ་མ་མཐོང་མ་བྱུང་།”
“དེ་འདྲ་ཡིན་སྲིད། བར་ཁྱམས་ཀྱི་འོད་མདངས་མག་མོག་དེ་ལས་མི་གཞན་ངོས་མ་ཟིན་ཟེར་ན་བདེན་མོད། ཉིན་མོའི་ཉི་འོད་འོག་གི་ལུས་རྩལ་ར་བ་ནས་ཀྱང་ངོས་མ་ཟིན་ཟེར་ན་སུ་ཡིད་ཆེས་སམ།”
“ཁྱོད་ཀྱིས་དེ་ཟེར་བ་ཡིན་ནམ། ལུས་རྩལ་ར་བའི་ནང་ནས་ཐུག་དུས་ཀྱང་ང་དངོས་གནས་ངོ་ཚ་བྱུང་། དེ་བས་ཡང་བསྐྱར་ཁ་ཡ་བྱེད་མ་ཐུབ་པ་རེད། ཁྱོད་ང་ལ་ཡིད་ཆེས་མེད་དམ།”
“ང་ཁྱོད་ལ་ཡིད་ཆེས་ཡོད་མེད་ངས་ཀྱང་མི་ཤེས། གང་ལྟར། ངས་ཁྱོད་ལ་ཁ་ཆད་ཐེངས་གཉིས་པ་བཏབ་དུས་ཀྱང་བདེ་སྐྱིད་སྒྲོལ་མའི་ཁྲེལ་དགོད་ཀྱི་མིག་མདངས་ཁྱེར་ནས་ལུས་རྩལ་ར་བར་ཁ་བྲལ་དགོས་བྱུང་། ཁྱོད་ཀྱིས་ཤེས་སམ། འུ་གཉིས་ཀྱི་ཁ་སྐྱེངས་པའི་རྣམ་པ་མོས་མཐོང་འདུག ཁྱོད་ཀྱིས་ང་ལ་ཁ་ཡ་བྱེད་རྩིས་ཀྱིས་གམ་ལ་བཅར་ནས་སྨྲ་བ་མེད་པར་རྒྱང་ལ་སོང་རྗེས། ང་སློབ་ཁང་དུ་འགྲོ་བའི་ལམ་བར་ནས་ཡང་བསྐྱར་མོ་ལ་ཐུག་བྱུང་། ཁྱོད་རང་མོ་ལ་ཐུག་མ་བྱུང་ངམ།”
“མ་ཐུག གལ་སྲིད་ཐུག་བྱུང་ནའང་། ངེད་གཉིས་ལ་འབྲེལ་བ་ཡོད་དམ། གལ་སྲིད་བཀྲ་ཤིས་དོན་འགྲུབ་ལ་ཐུག་ནའང་། ང་ལ་འབྲེལ་བ་ཡོད་མི་སྲིད།”
“དེའི་དོན་ཅི་རེད། ཡང་གཅིག་བཤད་ན་ཁྱོད་ཀྱིས་བཀྲ་ཤིས་དོན་འགྲུབ་རིག་ནས་ང་ལ་ཁ་ཡ་བྱེད་འདོད་མེད་སོང་བའང་ཡིན་སྲིད།”
“བཀྲ་ཤིས་དོན་འགྲུབ་ཀྱིས་ཁྱོད་ལ་དེ་འདྲའི་བག་ཆགས་ཟབ་མོ་དང་ཤུགས་རྐྱེན་ངན་པ་ཞིག་བཞག་ཡོད་དམ། ངས་དངོས་གནས་མ་ཤེས། ཡང་གཅིག་བཤད་ན། ཁྱོད་ཀྱང་བཀྲ་ཤིས་དོན་འགྲུབ་ཀྱི་བུད་མེད་ཡིན་པ་ལས་ང་ལ་འབྲེལ་བ་ཡོད་མི་སྲིད།”
“གླེང་འགེལ་མ་བྱེད། བཀྲ་ཤིས་དོན་འགྲུབ་དང་ངེད་གཉིས་ཀྱི་འབྲེལ་ཐག་སྔ་མོ་ནས་ཆད་ཟིན། རང་སེམས་ན་གནོང་ཡོད་ན། གཞན་སྐྱོན་ལ་ཁག་མ་བཙལ།”
“ཁག་ཅི་ཡང་བཙལ་གྱིན་མེད། འུ་གཉིས་ཀྱིས་ཁ་ཆད་བཏབ་དུས་དེ་གཉིས་ལ་ཁྱོད་ཀྱིས་དངོས་གནས་བཀྲ་ཤིས་དོན་འགྲུབ་མ་མཐོང་ངམ།”
“མ་མཐོང་། ཁྱོད་ཀྱིས་ཁོ་མཐོང་བས་ང་ལ་ཁ་ཡ་མ་བྱས་པ་ཡིན་ནམ།”
“ངས་ཁོ་མཐོང་བྱུང་། ཁོས་འུ་གཉིས་ཀྱིས་ཁ་ཆད་བཏབ་པ་ཤེས་ཡོད་པ་འདྲ། ང་སློབ་ཁང་བར་ཁྱམས་དང་རྩལ་སྦྱོང་ར་བར་མ་ཐོན་གོང་ལ་ཁོས་ངའི་རྗེས་དེད་ཡོད་པ་འདྲ།”
“ཁྱོད་ཀྱིས་ཁོ་མཐོང་བས་ང་ལ་ཁ་ཡ་མ་བྱས་པ་ཡིན་ནམ།”
“ཁྱོད་འདི་ངོ་མ་སྐད་ཆ་གཅིག་ཡང་དང་བསྐྱར་དུ་འདྲི་རྒྱུར་དགའ་ཨང་།”
“ངས་འུ་གཉིས་ཀྱི་བར་ལ་འབྲེལ་བ་ཡོད་ཀྱང་རུང་ལ་མེད་ཀྱང་ཆོག་མོད། ཕན་ཚུན་བར་ལ་གསལ་གསལ་དག་དག་ཅིག་ཡོང་ན་བཟང་སྙམ།”
“ཁྱོད་ཡིད་ཆེས་མེད་སོང་བ་མ་གཏོགས། ངས་ཁྱོད་ལ་རྫུན་གཏམ་ཚིག་གཅིག་ཀྱང་བཤད་མྱོང་མེད། ངས་ཁྱོད་ལ་ཁ་ཡ་མ་བྱས་དོན་ངོ་མ་ངོ་ཚ་བས་ཡིན། རྒྱུ་རྐྱེན་གཞན་པ་ཡོད་མེད་ངས་ཀྱང་མི་ཤེས། ཡིད་ཆེས་བྱེད་མིན་རང་འདོད་གྱིས།”
“ཐེངས་དང་པོར་ངོ་ཚ་བ་ཡིན་ཟེར་ན་རློམ་མོད། ཐེངས་གཉིས་པར་ཡང་ངོ་ཚ་བ་ཡིན་ཟེར་ན་རློམ་ཐབས་མི་འདུག ཁྱོད་རང་དང་ཐོག་བདེ་སྐྱིད་སྒྲོལ་མར་ཐུག་དུས་ཀྱང་ངོ་ཚ་བྱུང་ངམ།”
“བདེ་སྐྱིད་སྒྲོལ་མ་ངེད་གཉིས་ཀྱི་འབྲེལ་བ་སྟེས་དབང་གི་ཐུག་འཕྲད་ཅིག་ལས་ཁ་བརྡ་བྱས་ཏེ་མགོ་བརྩམས་པ་ཡིན་པས། འུ་གཉིས་ཀྱི་དཀའ་ཁག་འདི་འདྲ་བརྒྱུད་དགོས་བྱུང་མེད། འུ་གཉིས་ཐོག་མ་ནས་QQབརྒྱུད་ནས་ངོ་ཤེས་པ་ཡིན་པས། སྔར་བཞིན་འདི་ལྟར་དྲ་ལམ་ནས་ཁ་བརྡ་བྱས་ན་ཐག་ཉེ་ལ་འདྲིས་སླ་བའི་སྣང་བ་ཞིག་རེད།”
“ཨོ་ལེ། འུ་གཉིས་ཀྱི་ལས་སྐལ་དྲ་ལམ་ན་མ་གཏོགས་མེད་པ་འདྲ།”
“ངའི་ནང་དོན་དེ་མིན། གོ་བ་མ་ལོག འུ་གཉིས་ཀྱི་དོན་དག་བདེ་སྐྱིད་སྒྲོལ་མ་དང་བཀྲ་ཤིས་དོན་འགྲུབ་གཉིས་ཀྱིས་ཅི་ལྟར་ཤེས་པ་ཡིན་ནམ། ཁྱོད་ཀྱིས་དེར་འདང་ཨེ་བརྒྱབ། ང་དངོས་གནས་ཡ་མཚར་བོ་འདུག ངས་འུ་གཉིས་ཀྱིས་ཁ་བརྡ་བྱེད་བཞིན་པ་ཉལ་ཁང་ནང་གི་མི་གཅིག་ལའང་ཤེས་སུ་བཅུག་མེད། ཁྱོད་ཀྱིས་མི་གཞན་ལ་འུ་གཉིས་ཀྱིས་ཁ་བརྡ་བྱེད་བཞིན་པ་ཨེ་བཤད།”
“མ་བཤད། ཡུམ། ངའི་སྟེང་ལ་དོགས་པ་མ་ཟ། ང་བུད་མེད་དེ་འདྲ་ཞིག་མིན། ཡང་གཅིག་བཤད་ན་ངས་འུ་གཉིས་ཀྱི་འབྲེལ་བ་ཅི་ཞིག་ཡིན་པ་ངོས་ཟིན་གྱིན་མེད། གཞན་ལ་བཤད་རན་ཞིག་ཡོད་དམ།”
“ངས་ཁྱོད་ལ་དོགས་པ་ཟ་བ་མིན། ཁྱོད་ཀྱིས་ངའི་སྐད་ཆར་གོ་བ་ལོག་པར་ལེན་དོན་ག་རེ་ཡིན་ནམ། ང་ལ་ཡིད་ཆེས་མེད་དམ། ངས་འུ་གཉིས་ལ་འབྲེལ་བ་ཡོད་ཅེས་གཞན་ལ་བཤད་ཡོད་པར་འདོད་དམ།”
“ངས་ངོ་མ་མི་གཅིག་ལའང་མ་བཤད། ཐ་ན་ཉལ་ཁང་ནང་གི་མི་གཅིག་ལའང་ཁྱོད་དང་ཁ་བརྡ་བྱེད་པ་ཚོར་དུ་བཅུག་མེད་པ་ཁག་ཐག་བྱས་ཆོག་གཉི་ཀས་སུ་གཅིག་ལའང་བཤད་མེད་ན་མི་དག་ལ་འདྲེ་ཡིས་བཤད་པ་ཡིན་ནམ།”
“ཡིན་སྲིད། གང་ལྟར་ངས་མ་བཤད། ཁྱོད་ཀྱིས་ངས་གསང་མ་ཚུགས་པར་འདོད་དམ།”
“དྲང་མོར་བཤད་ན་ཁྱོད་ཀྱི་ཅི་བཤད་ལ་གན་འདི་མེད་པའི་བྱ་སྤྱོད་ཀྱིས་ང་ཡིད་ཆད་དུ་བཅུག་བྱུང་།”
“ཁྱོད་འདི་དངོས་གནས་བུ་མོ་རང་སྣང་ཅན་ཞིག་རེད། ངས་ཁྱོད་ལ་ཁ་ཡ་མ་བྱས་པ་འགྲིག་འདུག”
“འགྲིག་ན་བཟང་འདུག འུ་གཉིས་གྱི་བར་ལ་མི་འགྲིག་པ་ཅི་ཡང་མེད། འགྲིག་དང་མ་འགྲིག་མེད་པར་རང་རང་ས་ལ་ཕྱིན་ཆོག”
“ངས་ཀྱང་དོན་མེད་དུ་མི་ཆ་མེད་ཅིག་གི་ཆེད་དུ་འདི་ལྟར་རྩོད་པ་བྱེད་མི་འདོད། བདེ་མོ་བྱོས། འུ་གཉིས་ཀྱི་སྐུད་ལམ་མཚམས་འདི་ནས་བཅད་འཇོག”
༢
“དེ་ལྟར་བྱོས། ང་ལ་བློས་མི་ཐོངས་རྒྱུ་ཅི་ཡང་མེད།”
མཚོ་མོས་ཡི་གེ་འདི་དག་བསྐུར་མ་ཐག་ཏུ་ཁ་པར་གྱི་ངོས་ལ“ཁྱོད་རང་ཁོའི་འབྲེལ་ལམ་དུ་མི་འདུག”ཅེས་ཤར། བློས་མི་ཐོངས་རྒྱུ་ཅི་ཡང་མེད་ནའང་ཟླ་བས་རང་ཉིདQQའཕྲིན་ལམ་ནས་བསུབས་ཡོད་པ་ཤེས་རྗེས། མཚོ་མོའི་སེམས་པ་སྐྱོ་དུབ་བེར་གྱུར། མཚན་མོ་འདི་ནི་སྔར་བཞིན་སྐད་སྒྲ་མེད་པའི་མཚན་མོ་ཞིག་སྟེ། ཡི་གེ་གཏགས་པའི་ཐག་སྒྲ་གསལ་བོ་གཅིག་རྗེས་གཉིས་མཐུད་ངང་སེམས་ཀྱི་དབྱངས་རྟ་རིགས་ཤིག་ལྟར་དུས་ཚོད་གཅིག་ཙམ་གྱི་ཡུན་ལ་གྲག་གྲག་རྗེས། ཡོད་ཚད་གཉིད་ལ་ཡུར་བ་ལྟར་ཁུ་སིམ་མེར་གྱུར། ཁུ་སིམ་མེར་གྱུར་རྗེས་ཀྱི་སྐད་སྒྲ་མེད་པའི་མཚན་མོ་རེ་རེ་ནི་དུས་རྒྱུན་བག་ལྷོད་བདེ་ཡངས་ཀྱིས་ཁྱབ་པ་ཞིག་ཡིན་མོད། དོ་ནུབ་སྐད་སྒྲ་མེད་པའི་ངང་ཚུལ་འདིས་མཚོ་མོའི་སེམས་པ་འོན་དུ་བཅུག་པ་འདྲ། མོ་ཡུན་རིང་ཞིག་ལ་རང་གི་ཁང་བའི་ནང་ལ་ཅེར་ནས་བསྡད་རྗེས། ད་གཟོད་ཕྱོགས་བཞིའི་གྱང་ངོས་གློ་ཁ་ཡིན་པའི་རང་གི་མལ་ཁང་ཆུང་ཆུང་འདི་རུ་གོས་སྒྲོམ་གཅིག་དང་འབོལ་ཁྲི་གཅིག ཅོག་ཙེ་གཅིག ད་དུང་ཐོག་ཏུ་རང་ཉིད་ཉལ་ཡོད་པའི་མལ་ཁྲི་གཅིག་བཅས་ལས་ཅི་ཡང་མེད་པ་རྟོགས་སོང་བ་འདྲ་ལ། དེ་ལྟར་རྟོགས་པར་ཡང་སེམས་ཀྱི་རྩོལ་བ་དྲག་ཏུ་བཏོན་པ་ལྟར། མོ་གཞི་ནས་ཐང་ཆད་འདུག མོའི་ཁང་མིག་གི་མུན་ནག་ལ་འཁྱིལ་བའི་སྔས་འགྲམ་གྱི་གློག་འོད་གཉོམ་པོ་ཁེར་རྐྱང་གི་མཚེའུ་ཞིག་ལྟར་ཞི་ཞིང་འཇགས་ཨང་། མཚོ་མོའི་དྲན་པའང་གཉིད་ཀྱིས་གསབ་མ་ཐུབ་པའི་ཁེར་རྐྱང་གི་མཚེའུ་དེ་ལྟར་ཁང་མིག་འདིའི་ནང་རོལ་ལ་ལྷིང་འཇགས་ཀྱིས་འཁྱིལ་ཞིང་། ལྷིང་འཇགས་ཀྱིས་སྐྱོམ་གྱིན་འདས་སོང་གི་ཆུ་རིས་མང་བོ་གཅིག་རྗེས་གཉིས་མཐུད་ངང་མིག་ལ་བབས་བྱུང་། མོས་མགོ་བོ་རུམ་ལ་བཏུམས་ཤིང་ཡང་ཡང་ཕྱི་ལ་བུད་ནས། དངན་པ་རིང་མོ་ཤུར་ཤུར་ཁོག་ལ་རྔུབ་ཅིང་ཤུར་ཤུར་ཕྱི་ལ་འབྱིན་པ་ནི་ཡ་ཆུང་སྡུག་གི་རྐྱ་མ་བཅོ་བརྒྱད་ཡང་ཡང་བཤིགས་ནས་རྨ་ཁ་འཚེམ་པ་དང་འདྲ།
མོའི་སེམས་ཀྱི་རྨ་ཁ་ཐོག་མ་ནི་བཀྲ་ཤིས་དོན་འགྲུབ་ཀྱིས་བཞག་པ་ཡིན་ལ། མོའི་ལུས་ཀྱི་རྨ་ཁ་ཐོག་མའང་བཀྲ་ཤིས་དོན་འགྲུབ་ཀྱིས་བཏོད་པ་ཡིན། བཀྲ་ཤིས་དོན་འགྲུབ་ནི་མོའི་རྨ་ཁ་ཐམས་ཅད་ཀྱི་བདག་པོ་ཡིན་མོད། ཁོ་དང་བྲལ་ནས་ལོ་ཕྱེད་ཙམ་འགོར་དུས་འདིར། ཁོའི་བདག་དབང་ཡོད་ཚད་ཟླ་བར་དབང་ཡོད། ད་ནི་ཁོ་ལ་ཐོབ་མྱོང་བའི་བརྩེ་དུངས་ཟབ་མོའང་ཟླ་བའི་ཡིན་པས། མོའི་ལུས་ཀྱི་རྨ་ཤུལ་ལ་ཟླ་བས་རེག་མྱོང་མེད་ནའང་། མོའི་སེམས་ཀྱི་རྨ་ཤུལ་ཡལ་ལ་ཉེ་དུས། ལས་བསམ་སར་མི་འགྲོ་གསེག་སར་སོང་ནས་སྐྱིད་སྡུག་ཏུ་གྱུར་ནས་རྨ་ཁ་བཟོས་སོང་བ་ལས་དབང་གི་ཀུ་རེ་ཡིན་ནམ། མཚོ་མོས་ཡང་དང་བསྐྱར་དུ་ཁ་པར་ལག་ཏུ་བླངས་ནས་ཟླ་བའི་QQབསྐྱར་དུ་སྣོན་རྩིས་བྱས་མོད། འགྱོད་གདུང་དང་ཡི་ཆད་ཀྱི་འཕྲོག་རྩོད་བར་ནས་ལས་ཀྱི་བགྱི་བ་ཅི་ཡང་སྤེལ་མ་ནུས།
ཟླ་བ་དང་འགྲོགས་པ་ནས་བཟུང་། ཡང་ན་ཟླ་བ་ངོ་ཤེས་པ་ནས་བཟུང་། མཚོ་མོས་ཟླ་བས་བསྐུར་བའི་སྐད་ཆ་རེ་རེ་དང་ཟླ་བས་བསླངས་པའི་དགའ་སྤྲོ་རེ་རེས། བརྩེ་དུངས་ཀྱི་རྨ་ཁ་གསོས་ཤིང་གྱེས་བྲལ་གྱི་སྡུག་བསྔལ་སུབ་ནས་འགྲོ་བ་ཚོར་ལ། སུབ་ནས་འགྲོ་ཐེངས་རེ་རེར་མཚོ་མོའི་སེམས་ལ་བརྩེ་དུངས་ནི་མ་གཞི་ནས་བཀྲ་ཤིས་དོན་འགྲུབ་ཀྱི་སྤྱོད་པ་དེ་ལྟར་འཚབ་འཚུབ་གོ་རིམ་མེད་པ་ཞིག་མིན་པར་ཟླ་བའི་བག་ཡོད་ཀྱི་སྤྱོད་པ་འདི་ལྟར་འདྲིས་ཆེ་བ་ཞིག་ཡིན་པར་བསམས། ཟླ་བ་དང་འབྲེལ་འདྲིས་བྱེད་པའི་བརྒྱུད་རིམ་ཁྲོད་མཚོ་མོའི་ཡིད་ལ་བབས་ཤིང་བློ་ལ་རན་པའི་སྣང་ཚུལ་ཞིག་ཡོད་པ་ནི། ཟླ་བ་དང་རང་ཉིད་འབྲེལ་འདྲིས་བྱས་ནས་ཡུན་རིང་འགོར་ནའང་ངོ་ཐུག་མེད་པ་དེ་རེད་ལ། ཡང་ན་དུས་ཡུན་རིང་བོ་ཞིག་ལ་ཟླ་བ་དང་ངོ་མ་ཐུག་པ་དེ་ཡིན་མོད། ད་ནི་འབྲེལ་ལམ་ཡོངས་རྫོགས་རྩ་ནས་ཆད་དེ་གཏན་དུ་ངོ་ཐུག་མ་ཐུབ་གྱུར་བས། མོའི་བསམ་བློ་ལའང་འགྱུར་ལྡོག་བྱུང་སྟེ། སྔོན་ཞིག་ནས་ཟླ་བར་ངོ་ཐུག་ཡོད་ན་ཅི་མ་རུང་སྙམ། ཇ་ཁང་ནང་ནས་གོང་ཞོལ་བྱས་ནས་འདུག་དུས་དང་སློབ་ཁང་བར་ནས་སྔ་གཞུག་བྱས་ནས་འགྲོ་དུས་རང་འགུལ་གྱིས་ཁོ་ལ་ཁ་གྲགས་ཡོད་ན་ཅི་མ་རུང་སྙམ།ཡིན་ཡང་། དེ་དུས་དེ་ལྟར་ཁ་མ་གྲགས་པ་ནི་སྙིང་དུ་སྡུག་ཅིང་ཡིད་དུ་འོང་སྟེ། ཟླ་བས་མོའི་གར་འགྲོ་གར་འདུག་མིག་གིས་འཚོས་ནས། མོ་ལ་ལྭ་བའི་ཁ་དོག་མཛའ་མིན་དང་ཟས་ཀྱི་གདམ་གསེས་ཅི་ཡིན་སོགས་འདྲི་ལ། ད་དུང་ཟ་མ་ཟ་དུས་སུ“ཟ་མ་ཞིམ་པོ་ཞིག་ཟོ། དེ་རིང་གི་ནམ་ཟླ་ཧ་ཅང་དྲོ་བས་ཐུག་འཁྱག་ཅིག་བཟས་ན་ལྷག་ཏུ་ཞིམ་སྲིད”ཅེས་བསྐུར་མྱོང་། དཔེ་ཆ་ཀློག་དུས་སུ“ངས་ཀྱང་ཁྱོད་ཀྱིས་ཀློག་བཞིན་པའི་སྒྲུང་རིང་རོ་མེ་འོ་དང་ཀྲའུ་ལེས་ཡེ་ཀློག་བཞིན་ཡོད། ཧ་ཅང་ཡག་པོ་འདུག”ཅེས་བསྐུར་མྱོང་། སྲང་ལ་ཉུལ་དུས་སུ“དེ་རིང་ང་ཡང་ཁྱོད་ཀྱིས་བཤད་པའི་ཁོ་ཧྥེ་ཁང་དེར་ཕྱིན་པ་ཡིན། ནང་གི་བཀོད་པ་ལེགས་པས་བག་ཡངས་མོ་རང་བྱུང་། བཀའ་དྲིན་ཆེ།”ཞེས་བསྐུར་མྱོང་། བརྙན་ལ་ལྟ་དུས་སུ“ཁྱོད་ཀྱིས་ཀྱང་གློག་བརྙན་ཐེ་ཐན་ཉིའུ་ཁུ་ལ་ལྟོས་དང་། ཧ་ཅང་ཡག་པོ་འདུག”ཅེས་བསྐུར་མྱོང་། ཡུལ་དུས་གང་ཞིག་ཏུ་བྱ་བ་ཅི་ཞིག་སྒྲུབ་ནའང་ཟླ་བས་བསྐུར་བའི་ཡིག་འབྲུ་རེ་རེ་མོའི་དགའ་ཡ་སྐྱོ་རོགས་སུ་གྱུར་ཡོད། ཐ་ན་སློབ་ཁྲིད་ཀྱི་སྐབས་སུའང་མོས་ཟླ་བ་ལ་QQའཕྲིན་ལམ་བརྒྱུད་ནས་ཡི་གེ་སྐུར་རེས་བྱས་པ་ཐེངས་གཅིག་མིན། དེ་བས་ཟླ་བ་དང་འབྲེལ་འདྲིས་བྱེད་སྟངས་ནི་བལྟས་ན་ཉེ་ཉེ་འདྲ་བའི་སྣང་བ་ཞིག་ཤར་ཡང་། ད་ནི་བསམས་ན་ངོ་ཡང་མི་ཤེས་རྒྱུས་མེད་དུ་གྱུར་སོང་།
མཚོ་མོའིQQའཕྲིན་ལམ་ལ་ཟླ་བ་ཤར་བ་ནས་བཟུང་། མཚོ་མོའི་འཇིག་རྟེན་ནི་ཞི་འཇགས་བག་ཡངས་ཀྱི་མཚན་མོ་ཞིག་ཡིན་ཞེས་བཤད་ཆོག ཟླ་བ་དང་འབྲེལ་འདྲིས་བྱུང་བ་ནས་མོ་སླར་ཡང་སློབ་གྲྭའི་ཕྱི་རོལ་ན་གླས་པའི་ཁང་མིག་འདི་ལ་འདང་ཇེ་ཡོད་དང་རྩིས་ཇེ་ཆེ་རུ་གྱུར། ཁང་མིག་འདིས་ནི་རྨ་ཤུལ་ཞིག་ལྟར་མོ་ལ་ན་ཟུག་ཟབ་མོ་དང་འདས་དོན་མང་བོ་དྲན་པར་བྱེད་པས། བཀྲ་ཤིས་དོན་འགྲུབ་དང་ཁ་བྲལ་བ་ནས་བཟུང་། ཁང་མིག་འདི་ཟླ་ཕྱེད་ཙམ་ལ་སྟོང་བར་ལུས་ཤིང་། མཚོ་མོས་ནང་སེམས་ཀྱི་སྐྱོ་གདུང་མཐའ་དག་བརྗེད་དུ་མེད་ཀྱང་བརྗེད་པར་སྣང་ནས་ཟླ་བས་བསྐུར་བའི་ཡིག་འབྲུ་རེ་རེ་བརྩེ་བས་ཀློག་བཞིན་སླར་ཡང་ཁང་མིག་འདི་ལ་བག་ཆགས་གསར་བ་ཞིག་བསྒོས་ཤིང་། སླར་ཡང་ཁང་མིག་འདི་རང་འདུ་ཤེས་གསར་བ་ཡིས་གཡོགས་ནས། ཡང་དང་ཡང་དུ་སློབ་གྲྭའི་མལ་ཁང་དུ་མ་བསྡད་པར་ཕྱི་ལ་ཡོང་། ཕྱི་ཡི་ཁང་མིག་འདི་ལས་གཞས་ལ་ཉན་ནས་སྲང་ལ་གཡེང་ཞིང་། མལ་མ་འཛུལ་ནས་དེབ་ལ་ཉུལ་ཞོར་འཕྲིན་ལམ་གྱི་ཟླ་བའི་ཕྱོགས་ལ་སྙིང་གཏམ་གྱི་ཡི་གེ་མང་བོ་དང་སེམས་མཚོན་གྱི་པར་རིས་སྣ་མང་ཕར་བསྐུར་ཚུར་བསྐུར་བྱས། དེ་ལྟར་ཁང་མིག་འདི་ལ་བདེ་སྐྱིད་ཀྱི་དྲོད་སྣང་འཁྱིལ་ནས་ལོ་ཕྱེད་ལྷག་ལས་མ་འགོར་བའི་དེ་རིང་གི་དུས་ལ། མཚོ་མོའི་ལྷིང་འཇགས་ཀྱི་མཚན་མོ་འཇགས་ཐབས་བྲལ་བས། མོས་ཡང་དང་ཡང་དུ་ཟླ་བས་ཅིའི་ཕྱིར་ང་ལ་འབྲེལ་ཐག་བཅད་པ་ཡིན་ནམ་སྙམ། ཟླ་བ་ནི་ཞེ་སྡང་གི་སྤྲིན་གྱིས་བསྒྲིབས་པ་ལྟར་གནས་སྐབས་ཙམ་ལ་མི་སྣང་བར་གྱུར་ནའང་། ཉིན་གཅིག་གཉིས་ཤིག་གི་རྗེས་ནས་མཐོང་ལམ་གྱི་སྤྲིན་བར་ནས་འཛུམ་སྟེ་གཏམ་གྱི་འོད་སྣང་བསིལ་བསིལ་གཏོར་འོང་བ་ཁོ་ཐག་ཡིན་སྙམ་ཞིང་། དེ་ལྟར་བསམ་བཞིན་དེ་ལྟར་ཡང་མིན་པ་འདྲ་བས། མོས་སྐྱེས་པ་དག་ལ་དངོས་གནས་བློ་གཏད་མི་འདུག་བསམས། ཤིང་གི་མལ་ཁྲི་ལས་མགོ་བོ་རུམ་ལ་བཏུམས་ནས་ཕར་འཁོར་ཚུར་འཁོར་བྱེད་ཐེངས་རེར་མོས་ཟླ་བས་བཤད་པ་བདེན་ནམ། བཀྲ་ཤིས་དོན་འགྲུབ་ཀྱིས་ངེད་གཉིས་ཀྱིས་འབྲེལ་འདྲིས་བྱེད་ཀྱིན་པ་ཤེས་ཡོད་དམ། བདེ་སྐྱིད་སྒྲོལ་མས་ཀྱང་ཤེས་ཡོད་པ་ཁོ་ཐག་རེད། ཟླ་བས་ང་ལ་འབྲེལ་འདྲིས་བྱེད་ཀྱིན་པ་མི་གཅིག་ལའང་བཤད་མེད་པ་བདེན་ན། ངས་ཀྱང་མི་གཅིག་ལའང་ཤེས་སུ་བཅུག་མེད་པས། ཁོ་གཉིས་ཀྱིས་ཅི་ལྟར་ཤེས་པ་ཡིན་ནམ་ཞེས་ཡིད་གཉིས་ཐེ་ཚོམ་གྱི་དབང་དུ་གྱུར་ནས་ཡུན་རིང་འགོར་རྗེས། གློ་བུར་དུ་ཕྱིར་དྲན་འཐིབས་པའི་ཁང་མིག་འདི་ལས་གཉིད་ཐབས་བྲལ་ཞིང་སུན་སྣང་འགོག་པར་དཀའ་བ་ཞིག་སྐྱེས་པས་ཁ་པར་ལག་ཏུ་བླངས་ཏེ་བལྟས་པ་ན། ཏག་ཏག་ཆུ་ཚོད་དགུ་རེད། སློབ་གྲྭའི་མལ་ཁང་གི་སྒོ་བརྒྱག་པར་ད་དུང་ཆུ་ཚོད་ཕྱེད་ཙམ་འདུག མོ་མལ་ལས་ལངས་ནས་སློབ་གྲྭར་ལོག་རྩིས་བྱས།
སློབ་གྲྭ་ཆེན་མོའི་ནང་ནས་ལོ་ངོ་གསུམ་ལྷག་འགོར་ལ་ཉེ་དུས་འདིར། མོས་གྲོང་ཁྱེར་འདིའི་བོད་ཡིག་ཚགས་པར་ཁང་དུ་དངོས་སྦྱོང་བྱེད་བཞིན། ལན་རེར་ཕྱི་རུ་གླས་པའི་ཁང་མིག་ཏུ་བསྡད་ཅིང་། ལན་རེར་སློབ་གྲྭའི་མལ་ཁང་དུ་ལོག་བཞིན་ཡོད། མོའི་འཇིག་རྟེན་གྱི་འགྱུར་ལྡོག་ཡོད་ཚད་དངོས་སྦྱོང་བྱས་པ་ནས་མགོ་བརྩམས་པ་མ་ཡིན་པར་ཁང་བ་འདི་གླས་པ་ནས་མགོ་བརྩམས་པ་འདྲ་ལ། ཁང་བ་འདི་གླས་པ་ནས་བཟུང་། བཀྲ་ཤིས་དོན་འགྲུབ་དང་འབྲེལ་འདྲིས་ཇེ་ཟབ་ཏུ་གྱུར་ཞིང་། ཁོའི“ངས་ཁྱོད་ལ་ཅི་ཡང་མི་བྱེད། སྐྲག་མི་དགོས།”ཞེས་ཁང་མིག་འདིར་འཛུལ་ཐེངས་རེ་རེས་མངོན་མེད་ཀྱི་ཨུ་ཚུགས་རིགས་ཤིག་གིས་ཁོ་གཉིས་བཅུམས་ནས་ཡོང་བ་ལྟར། མོའི་བརྩེ་དུངས་ཀྱི་རང་ཚུགས་དབང་མེད་དུ་འཕྲོག་སོང་ལ། མོའི་ལང་ཚོ་ཡི་མེ་ཏོག་དབང་མེད་དུ་བཅོམས་སོང་། དེ་ལྟར་ན་ཟུག་དང་བརྩེ་བ་ནི་ཨུ་ཚུགས་དང་སྟེས་དབང་ལས་སྐྱེས་པས། མོས་འགྱུར་ལྡོག་སྐྱེན་པའི་དགའ་སྐྱོ་མང་བོ་དང་ལྷན་དུ་རང་ཉིད་བུད་མེད་ཅིག་ཡིན་པར་ངོས་འཛིན་ཐོབ། བྱ་དངོས་མང་བོ་ཞིག་ལ་བཟུང་བའི་རྣམ་འགྱུར་ཡོད་ཚད་བག་ཡངས་སུ་གྱུར། དེ་ནི་མོའི་ཚོར་བ་རྣོན་པོ་དང་དངངས་སྐྲག་འཚེར་པོ་གཞན་གྱི་ལག་ཏུ་ཤོར་བས་ཡིན་སྲིད། བཀྲ་ཤིས་དོན་འགྲུབ་ཀྱིས་བསླངས་པའི་བརྩེ་དུངས་ཀྱི་ན་ཟུག་ཟབ་མོས་མོ་ལ་བག་ཆགས་ཟབ་མོ་དང་རེ་བ་ཆེན་པོ་བྱིན་མོད། ཁོའི“ངས་ཁྱོད་ཐེངས་དང་པོ་ཡིན་པ་ཡིད་ལའང་མ་ཤར”ཞེས་པའི་སྐད་ཆ་དེ་ལས་རྨི་ལམ་གྱི་སྨུག་པས་གཡོགས་པའི་དངོས་ཡོད་ཀྱི་གཟུགས་བརྙན་ཇེ་གསལ་ཇེ་གསལ་ངང་བཀྲ་ཤིས་དོན་འགྲུབ་ཀྱི་དམིགས་ཡུལ་བསླངས་ལ་བུད་ཅིང་། བཀྲ་ཤིས་དོན་འགྲུབ་ཀྱིས་བསླངས་པའི་དགའ་སྐྱོ་ཐམས་ཅད་བཏང་སྙོམས་སུ་གྱུར་ནས། མཚམས་ཤིག་ལ་ཁོ་གཉིས་ཀྱི་འབྲེལ་བ་ཅི་ཞིག་ཡིན་པའང་མི་ཤེས་པར་གྱུར། སྐབས་ཤིག་ལ་ཁོ་གཉིས་ལ་གཞི་ནས་འབྲེལ་བ་ཅི་ཡང་མེད་པར་གྱུར།
སྤྱིར་བཏང་དུ་ཟླ་བར་འབྲེལ་འདྲིས་བྱས་པ་ནས་བཟུང་། མོས་བཀྲ་ཤིས་དོན་འགྲུབ་གཏན་བརྗེད་དུ་གྱུར་ཡོད་ཅེས་བཤད་ཆོག་མོད། ཟླ་བས་གློ་བུར་དུ་འབྲེལ་ཐག་བཅད་པ་འདིས་མོ་ལ་ཡང་དང་ཡང་དུ་སྐྱེས་པ་དག་ལ་བློ་གཏད་མི་འདུག་ཨང་འདོད་དུ་བཅུག དེ་ལྟར་འདོད་ཀྱིན་བཀྲ་ཤིས་དོན་འགྲུབ་དང་འབྲེལ་བའི་འདས་དོན་མང་བོ་ཡིད་ལ་ཡང་ཡང་ཤར། མོ་ནི་རང་གི་དྲན་པ་རྒོད་པོའི་འཚུབ་ཆས་འདེད་པ་ལྟར་གོམ་སྟབས་མགྱོགས་པོས་སློབ་གྲྭའི་ཕྱོགས་སུ་སོང་།
ཁང་མིག་ལས་ཕྱི་ལ་བུད་རྗེས། སྲང་ལམ་གྱི་འདུ་འཛི་དང་འཕྲུལ་ཆས་ཀྱི་འུར་ཟིང་གིས་རྒྱང་དུ་ཤོར་བའི་དྲན་པ་རྒོད་པོ་མཐོང་སྣང་གི་གཟུགས་བརྙན་དུ་སྡུད་པར་བྱེད་ལ། དེ་ནི་བར་སྣང་དུ་འཕུར་བའི་ཤོག་བྱ་ཞིག་རྟོད་ཐག་ཕྲ་མོས་དལ་བ་དལ་བུར་ཚུར་ལ་འཐེན་པ་དང་འདྲ། མོས་དྲན་པ་མཐའ་དག་ཚུར་ལ་བསྡུས་རྗེས། ལམ་འགྲམ་གྱི་ཚོང་ཁང་དག་ལ་མིག་གཡེང་བྱེད་ཞོར་སོང་། ཕྲེང་བར་བསྟར་བའི་ཚོང་ཁང་དང་མགྲོན་ཁང་། དྲ་ཁང་། ཁོ་ཧྥེ་ཁང་སོགས་ཀྱི་སྒོ་མོ་རེ་རེ་གློག་འོད་ཀྱིས་བརྒྱན་པའི་སྒོ་བྱང་རེ་རེའི་འོག་ཏུ་ཁྲ་ལམ་མེར། འུར་ཟིང་དང་འདུ་འཛི་ལ་གོམས་པའི་བབ་ཆགས་ཀྱི་རྣམ་པ་ཞིག་མངོན་འདུག སྒོ་བྱང་རེ་རེ་གྲལ་བསྒྲིགས་ནས་མོའི་སྔུན་ནས་རྒྱབ་ལ་ཡལ་ཐེངས་ཤིག་ལ། མིག་ལམ་དུ་སྒེག་ལྡན་མའི་སྐྲ་གཞར་ཁང་ཞེས་པ་མངོན་བྱུང་།
མོས་དེ་རིང་སྔ་དྲོར་ཟླ་བར་ཁ་ཆད་ཐེངས་གཉིས་པ་བཏབ་སྟེ། ཉིན་གུང་ཆུ་ཚོད་གཅིག་གི་ཐོག་ཏུ་སློབ་གྲྭའི་ལུས་རྩལ་ར་བ་ནས་ངོ་ཐུག་རྒྱུ་བྱས་རྗེས། དགའ་སྤྲོ་དཔག་མེད་ངང་མལ་གྲོགས་དག་ལ་ལྭ་བ་གང་ཞིག་མཛའ་མིན་ལྟ་རུ་བཅུག་ནས་ཚུགས་ཀ་འདྲ་མིན་དང་ཁ་དོག་སྣ་ཚོགས་ཀྱི་གོན་པ་མང་བོ་ཡང་ཡང་བརྗེས་མཐར། མོས་སྔོན་ཤིག་ལ་ཟླ་བས“ཁྱོད་ཀྱིས་དེ་རིང་གོན་ཡོད་པའི་མདོག་གློ་ཁ་ཅན་གྱི་ལྭ་བ་དེ་ཧ་ཅང་ཡག་པོ་འདུག དངོས་གནས་མཛེས་མ་རང་རེད”ཅེས་བསྐུར་བ་དྲན་པས་ལྭ་བ་གློ་ཁ་དེ་གོན་ནས་མེ་ལོང་མདུན་ནས་ཕར་འཁོར་ཚུར་འཁོར་དང་གཡས་ལྟ་གཡོན་ལྟ་བྱས་ཤིང་། སྐྲ་ཚུགས་བརྗེ་དགོས་བསམས་ཏེ་སྒེག་ལྡན་མའི་སྐྲ་གཞར་ཁང་ཞེས་པ་འདིར་ཡོང་བ་རེད། ད་ནི་སྐྲ་གཞར་ཁང་འདི་མཐོང་མ་ཐག མོ་ནི་རང་ཉིད་ལ་ངོ་གནོང་བ་ལྟར། དགོད་ཙམ་བྱས་སོང་། ཤ་སྐྱི་དང་སེམས་པ་འགུལ་ཙམ་བྱས་པ་ན་མིག་ཟུང་ལ་ཆུ་རིས་སྲབ་བུ་ཞིག་འཁོར་ཞིང་འཁོར་བས། མོས་གོམ་པ་སྔུན་ལ་སྤོ་ཞོར་དུ་མགོ་བོ་ཡར་ལ་དགྱེ་ནས་ནམ་མཁར་བལྟས། ནམ་མཁའ་ནི་ནག་རོག་གེར་མུན་པས་གཡོགས་ཤིང་། གྲོང་ཁྱེར་གྱི་འོད་སྣང་མོག་པོའི་ཕ་རོལ་ན་རྔམ་ཆེན་པོས་འཐིབས་འདུག་པས་ནི། ཚུར་ནས་ཚུར་ལ་བཅུམས་ནས་ཡོང་བ་དང་འདྲ། ཟླ་བ་དང་སྐར་མའི་ཤུལ་ཙམ་ཡང་མཐོང་རྒྱུ་མེད་པས། མཚོ་མོའི་སེམས་པ་སྔར་ལས་ལྷག་པར་སྐྱོ་དུབ་པར་གྱུར།
མོས་འགྲོ་ཞོར་དུ་མགོ་བོ་སྒུར་ནས་ཟླ་བའིQQདབུ་བརྙན་གྱི་སྟེང་ནས་དལ་བུར་མནན་པ་ན། དྲ་མིང་ལ་མཚོ་མོའི་ཟླ་བ་རུ་བཏགས་ཡོད་པའི་ཟླ་བའི་QQཡི་མིང་སྐད་ཅིག་ལ“མུན་པ་འཇམ་པོ”ཞེས་པའི་ཡིག་འབྲུ་བཞི་རུ་གྱུར་སོང་། ད་དུང་དྲ་མིང་འདིའི་གཤམ་ན“ང་ནི་ཁྱོད་ཀྱི་མཚོ་ལ་ལྷུང་བའི་ཟླ་བ་དེ་ཡིན།”ཞེས་པའི་ཚིག་ཐུང་དེའང་མུན་པར་ཡལ་བའི་སྐར་མ་ཞིག་ལྟར་གར་སོང་ཆ་མེད་དུ་གྱུར་ནས་ཤུལ་དུ“ང་ནི་ཁེར་རྐྱང་གི་མུན་པ་འཇམ་པོ་ཞིག་ཡིན”ཞེས་ཤར་འདུག
ཟླ་བས་དངོས་གནས་མོ་ལ་འབྲེལ་ཐག་བཅད་པ་འདྲ། ད་ནི་མཚན་མོ་འདི་ལྟར། ནམ་མཁའ་འདི་ལྟར། མཚོ་མོའི་མཐོང་ལམ་ནས་ཟླ་བ་ནི་རྒྱང་རིང་བ་ལ་ཨང་།
༣
“ངས་ཀྱང་དོན་མེད་དུ་མི་ཆ་མེད་ཅིག་གི་ཆེད་དུ་འདི་ལྟར་རྩོད་པ་བྱེད་མི་འདོད། བདེ་མོ་བྱོས། འུ་གཉིས་ཀྱི་སྐུད་ལམ་མཚམས་འདི་ནས་གཅད་འཇོག”
ཚིག་ཐུང་འདི་བསྐུར་མ་ཐག ཡ་ཆུང་ལ་སུན་སྣང་འགོག་ཏུ་མེད་པ་ཞིག་ཞེ་སྡང་གིས་དེད་དེ་ཡོང་བས། ཟླ་བས་འདང་རྒྱག་སྤུ་ཙམ་མེད་པར་མཚོ་མོའིQQཐད་ཀར་བསུབས་སོང་།
མཚོ་མོའི་ཡིད་མ་ཆེས་པའི་རྣམ་འགྱུར་རེ་རེས་ཁོ་ལ་བདེ་སྐྱིད་སྒྲོལ་མ་དྲན་དུ་བཅུག་ལ། བདེ་སྐྱིད་སྒྲོལ་མས“གོ་ཐོས་ལྟར་ན་ཁྱོད་ནི་སྐྱེས་པ་བློ་གཏད་མེད་པ་ཞིག་རེད་ཟེར”ཞེས་བཤད་པ་དྲན།
ཟླ་བ་མཚོ་མོའི་པང་ལ་ལྷུང་ནས་ལོ་ཕྱེད་ཅིག་འགོར་སོང་། ཡང་ན་མཚོ་མོས་བསྐུར་བའི་པར་རིས་དང་ཡི་གེ་ཁ་པར་དུ་ཉར་ནས་ལོ་ཕྱེད་ཅིག་འགོར་སོང་། ལོ་ཕྱེད་ཅིག་འགོར་ནའང་ཟླ་བས་མཚོ་མོའི་གཟུགས་བརྙན་ཙམ་ལས་མོའི་གཤིས་རྒྱུད་ཀྱི་ཞི་འཇམ་མྱོང་སྐལ་མ་བྱུང་ལ། ལོ་ཕྱེད་ཅིག་འགོར་ནའང་མཚོ་མོས་ཟླ་བའི་གཟུགས་བརྙན་ཙམ་ལས་ཁོའི་ངོ་གདོང་གི་བསིལ་ཟེར་མྱོང་ཐབས་མ་བྱུང་།
ཟླ་བ་ནི་ཡག་ཕོ་སྒོ་དང་གཟུགས་སྐྱེ་ལུས་ལྡན་པའི་གསར་བུ་སྙིང་རྗེ་ཞིག་སྟེ། ཁོའི་ཤ་མདངས་དཀར་ཚུལ་དང་ཁ་མིག་རན་ཚུལ་གྱིས་མོ་བརྒྱའི་སེམས་པ་འཕྲོག་ཅིང་ཕོ་བརྒྱར་སྙིང་རླུང་བསླངས་མྱོང་། ཁོའི་ལུས་དང་གཟུགས་གཞི་ཡག་པོ་དར་སྲོལ་གསར་མའི་གྱོས་གོས་རེ་རེས་བརྒྱན་ཐེངས་རེར་བརྙན་འཕྲིན་ནང་གི་སྐར་ཆེན་དེ་དག་ལྟར་སྙིང་དུ་སྡུག་པས། སློབ་ཆེན་འདིའི་སྒོ་ཐེམ་བརྒལ་བ་ནས་བཟུང་། བུ་མོ་གང་མང་ཞིག་གིས་ཁོ་ལ་འཕྲིན་ཡིག་བསྐུར་ཞིང་ཁ་པར་བཏང་ནས་འབྲེལ་འདྲིས་བྱས་མྱོང་། ཁོས་བུ་མོ་གང་མང་ཞིག་གིས་ཚུར་ལ་བསྟན་པའི་རྣམ་འགྱུར་རེ་རེ་སྣང་མེད་དུ་མ་བཞག་པར་བསྟུད་མར་བུ་མོ་བཞི་ལ་དགའ་རོགས་བསྒྲིགས་ཤིང་ལུས་འབྲེལ་བྱུང་བས། སློབ་རའི་བུ་མོ་དག་གི་ཁྲོད་དུ“ཟླ་བ་ལ་བློ་གཏད་མེད”ཅེས་གྲགས། དེ་ལྟར་གྲགས་པས། ཚུར་ལ་འབྲེལ་འདྲིས་བྱེད་པའི་བུ་མོ་གཅིག་ཀྱང་མ་བྱུང་། བདེ་སྐྱིད་སྒྲོལ་མ་དང་མཚོ་མོ་གཉིས་ནི་ཁོས་རང་ཉིད་ཀྱི་འདོད་པ་ལྟར་འབྲེལ་འདྲིས་བྱས་པའི་དགའ་རོགས་གཉིས་ཡིན། མྱི་ཁ་དེའི་དབང་གིས་ཁོ་དང་བདེ་སྐྱིད་སྒྲོལ་མའི་འབྲེལ་བ་ནི་མིང་ཙམ་དུ་གྱུར་ལ། ཁོ་དང་མཚོ་མོའི་འབྲེལ་བའང་ད་ནི་མིང་ཙམ་དུ་གྱུར་སོང་།
རང་གིས་བསམ་པ་རྣམ་དག་གིས་ཕར་ལ་འབྲེལ་འདྲིས་བྱེད་དུས། ཕ་རོལ་བོ་ཡིད་མི་ཆེས་པའི་རྣམ་འགྱུར་གྱིས་རྒྱང་ལ་འགྱེད་པ་ནི་སྙིང་ལངས་སྤྱད་ཅིག་རེད་ཨང་། ཟླ་བས་མཚོ་མོའིQQདང་མོས་བསྐུར་བའི་ཡི་གེ་མང་བོ་དང་ལྷན་དུ་མངོན་མེད་ཤུལ་མེད་དུ་བཟོས་རྗེས། བུད་མེད་ནི་མ་གཞི་ནས་རྩེད་ཆས་བྱེད་རྒྱུ་དག་དག་རེད་ཨང་སྙམ། མཚོ་མོའིQQབསུབས་ཚར་ནའང་། མཚོ་མོའི་ཟླ་བ་རུ་བཏགས་པའི་ཁོའི་QQདྲ་མིང་གི་ཡིག་འབྲུ་རེ་རེས་ཁོ་ལ་ཁོང་དགོད་ཅིག་ཤོར་དུ་བཅུག་ལ། དེ་ནི་ཡི་ཆད་པའི་དངན་པ་ཐུང་ངུ་ཞིག་དང་འདྲ་བྱུང་།
ཟླ་བའི་མལ་ཁང་དུ་ལ་ལས་གློག་བརྙན་ལ་ལྟ་བཞིན་འདུག་ལ། ལ་ལ་རོལ་རྩེད་ལ་གཡེང་འདུག ལ་ལ་མལ་ལ་ལོག་ནས་གཉིད་ལ་ཡུར་འདུག ཟླ་བའང་མལ་ལ་ལོག་ནས་གཡས་འཁོར་གཡོན་འཁོར་ངང་འདང་མང་བོ་ཞིག་བརྒྱབ་རྗེས། རང་གི་དྲ་མིང་མུན་པ་འཇམ་པོར་བརྗེས་ལ། དྲ་མིང་གཤམ་གྱི“ང་ནི་མཚོ་ལ་ལྷུང་བའི་ཟླ་བ་དེ་ཡིན”ཞེས་པའི་ཚིག་ཐུང་དེའང“ང་ནི་ཁེར་རྐྱང་གི་མུན་པ་འཇམ་པོ་ཞིག་ཡིན”ཞེས་པར་བརྗེས།ད་དུངQQབར་སྟོང་དུ“མཚོ་མོ་ཟླ་གཟུགས་རུམ་པའི་མཚོ་མོ་མ་རེད། ཟླ་བ་མཚོ་ལ་ལྷུང་བའི་ཟླ་བ་མ་རེད།”ཅེས་སྤེལ་མ་ཐག བདེ་སྐྱིད་སྒྲོལ་མས་དཔྱད་གླེང་གི་ཚུལ་དུ“དེ་ན་ཅི་རེད།”ཅེས་སྤེལ་བྱུང་། ཁོས་ཚིག་ཐུང་འདི་ལ་ལན་ཅི་ཡང་མ་སློག་པར། ཐད་ཀར་བདེ་སྐྱིད་སྒྲོལ་མའི་QQའཕྲིན་ལམ་དུ“མཚོ་མོ་ནི་སའི་གོ་ལའི་བརྩེ་དུངས་ཀྱི་མིག་ཆུ་རེད།”ཅེས་བསྐུར།
“ཁྱོད་ཀྱིས་རང་ཉིད་ཟླ་བ་ཡིན་པ་བརྗེད་པ་མ་ཡིན་ནམ།༼ཁོག་དགོད་ཀྱི་པར་རིས་ཤིག༽”
“ཁྱོད་ལ་མཚོ་མོ་དང་ངེད་གཉིད་ལ་འབྲེལ་བ་ཡོད་པ་སུས་བཤད་པ་ཡིན།”
“ཁྱོད་གཉིས་ཀྱིQQངས་སྦྲེལ་ཡོད་པས་དྲ་མིང་འདོགས་སྟངས་ལ་བལྟས་ཏེ་ཤེས་པ་ཡིན། མཚོ་མོའི་ཟླ་བ་གློ་བུར་དུ་མུན་པ་འཇམ་པོ་རུ་གྱུར་སོང་བ་ཅི་རེད།༼བགད་ནས་ཡོད་པའི་པར་རིས་ཤིག༽”
“ཅི་ཡང་མ་རེད། མཚོ་མོ་ལ་འབྲེལ་ཐག་བཅད་ཟིན།”
“ཁྱོད་འདི་དངོས་གནས་མགྱོགས་པ་ལ་ཨང་།”
“དེ་ཟེར་ན།”
“བུ་མོ་དག་དང་འབྲེལ་ཐག་བཅད་ན་མགྱོགས་པོ་ལ་ཟེར་བ་ཡིན།༼ཁོག་དགོད་ཀྱི་པར་རིས་ཤིག༽”
“ང་མགྱོགས་སོང་བ་མ་རེད། ཁྱོད་ཚོ་དལ་སོང་བ་རེད།”
“མཚོ་མོར་འབྲེལ་ཐག་གཅོད་དོན་ཅི་ཡིན།”
“ཁྱོད་དང་འདྲ་བར་མོས་ཀྱང་ང་བློ་གཏད་མེད་པ་ཞིག་ཏུ་བརྩིས་འདུག”
“བློ་གཏད་མེད་དུ་འཇུག་བྱེད་རང་གིས་བསྒྲུབས་པ་རེད། ང་ཚོ་ལ་ཁག་འགེལ་མ་བྱེད།”
“བློ་གཏད་མེད་དུ་འཇུག་བྱེད་ཁྱོད་ཚོ་རེད། བུད་མེད་དག་རེད། གལ་སྲིད་ངའི་འཇིག་རྟེན་ལ་བུད་མེད་ཁྱོད་ཚོ་མེད་ཚེ། ངའང་སྔར་བཞིན་བློ་གཏད་མེད་པ་ཞིག་ཏུ་ག་ལ་བརྩི། བརྩི་མི་སྲིད།”
“ཨོ། དེ་ན་བུད་མེད་དག་ལ་འབྲེལ་བ་མ་བྱ་རོགས། ངས་བལྟས་ན་ཁྱོད་བུད་མེད་མེད་ན་ཁེར་རྐྱང་ངང་འཚོ་ཐུབ་པའི་མི་མ་རེད།༼ཁོག་དགོད་ཀྱི་པར་རིས་ཤིག༽”
“འབྲེལ་བ་བྱེད་ཀྱིན་མེད། ངའི་QQནང་ན་ང་ལ་འབྲེལ་བ་བྱུང་ཟིན་པའི་བུད་མེད་གཅིག་གིQQཡང་མེད། གལ་སྲིད་གཅིག་ཡོད་ཚེ། ཁྱོད་ཡིན་སྲིད། ཁྱོད་ཅི་འདི་མེད་པར་ལུས་འདུག འུ་གཉིས་ཀྱི་བར་དུ་བྱུང་བའི་འབྲེལ་འདྲིས་ནི་དགའ་རོགས་ཀྱི་ཚུགས་ཀ་བཟུང་བའི་གྲོགས་པོའི་བར་གྱི་འབྲེལ་འདྲིས་དེ་ཙམ་ཡིན་པས་རེད།”
“བུད་མེད་དག་ལ་ཡིན་གཅིག་མིན་གཉིས་དགའ་རོགས་བསྒྲིགས་ནས་ལུས་འབྲེལ་བྱ་དགོས་དོན་ཅི་ལ་ཡོད། གྲོགས་པོ་བསྒྲིགས་ནའང་ལོས་ཆོག ངས་འུ་གཉིས་ཀྱི་བར་ལ་དོན་དག་ངན་པ་ཅི་ཡང་བྱུང་དུ་འཇུག་མི་འདོད་ལ། ཕན་ཚུན་ལ་སེམས་ཀྱི་རྨ་ཁ་ཅི་ཡང་བཟོ་མི་འདོད་པས། འབྲེལ་བ་འདི་བཟུང་བ་ཡིན།”
“ཡ་ཡ། སེམས་པ་སེམས་ཀྱིས་ཤེས་ཡོད། འུ་གཉིས་གྲོགས་པོ་བཟང་བོར་འགྱུར་བར་སྨོན།”
“ཡ་ཡ། མཚོ་མོ་ནི་བུ་མོ་བཟང་བོ་ཞིག་རེད། རྩོད་རྒྱུ་ཆེན་པོ་མེད་ན་འབྲེལ་ཐག་མ་བཅད་ན་བཟང་སྙམ།”
“ཡ་ཡ། ཤེས་སོང་། ང་ལ་གཉིད་འབབ་ཀྱིན་འདུག གནས་སྐབས་སུ་བདེ་མོ་བྱོས།སང་ཉིན་འཕྲད།”
“གཟིམ་ས་བདེ།”
ཟླ་བས་ཀྱང་གཟིམ་ས་བདེ་ཞེས་བསྐུར། བསྐུར་ནས་ཅང་མ་འགོར་བར། ཁོས་རང་གི་ཡིད་ན་ད་དུང་དྲི་བ་གཅིག་ལྷག་འདུག་པ་ཤེས་པས། མྱུར་དུ་བདེ་སྐྱིད་སྒྲོལ་མར་འདི་ལྟར་བསྐུར།
“སྐུད་ལམ་ན་ཨེ་ཡོད། ང་ལ་ད་དུང་འདྲི་རྒྱུ་ཞིག་འདུག ཁྱོད་ཀྱིས་མཚོ་མོ་དང་ངེད་གཉིས་ཀྱིས་སློབ་ཁང་གི་བར་ཁྱམས་ན་ཁ་ཆད་བཏབ་ཡོད་པ་ཅི་ལྟར་ཤེས་པ་ཡིན།”
“ངས་ཅི་ཡང་མ་ཤེས། ཉིན་མོ་དེར་ངས་ཁྱོད་སློབ་ཁང་གི་བར་ཁྱམས་ན་མཚོ་མོའི་ཕྱོགས་སུ་འགྲོ་བཞིན་པ་མཐོང་བྱུང་། མཚོ་མོས་འུ་གཉིས་ཀྱི་འབྲེལ་བ་ཤེས་ཡོད་པ་འདྲ། དོགས་མི་བདེ་བའི་ངང་ངའི་གདོང་ལ་བལྟས་པས། ངས་ཀྱང་འགྲོ་ཞོར་དུ་མོ་ལ་བལྟས་ནས་འཛུམ་ཙམ་བྱས་པ་ཡིན། ཅི་རེད། མཚོ་མོ་དང་འབྲེལ་ཐག་གཅོད་དོན་ང་ལ་འབྲེལ་བ་ཡོད་དམ། ཡོད་ན་ང་དངོས་སུ་སོང་ནས་མོ་ལ་འགྲེལ་བཤད་བྱས་ཆོག”
“མེད། མེད། དེ་འདྲ་ཞིག་མ་རེད། ངས་སྟེས་དབང་མ་རེད་བསམས་སོང་། རང་དགར་དྲིས་པ་ཡིན། དོན་དག་ཅི་ཡང་མེད། གཟིམ་ས་བདེ།”
ཟླ་བས་ཁྱོད་ཀྱིས་ངེད་གཉིས་ཀྱིས་ལུས་རྩལ་ར་བ་ན་ཁ་ཆད་བཏབ་ཡོད་པ་ཇི་ལྟར་ཤེས་པ་ཡིན་ཞེས་འདྲི་བསམས་མོད། དེ་ལྟར་མ་དྲིས་པར་སླར་ཡང་གཟིམ་བདེ་ཞུས་རྗེས། མཚོ་མོ་དེ་འདྲའི་དོགས་པ་ཞིག་ཟ་དོན་ཅི་ཡིན་ནམ། དངོས་གནས་སྙིང་བོ་མི་འདུག་སྙམ། མགོ་བོ་རུམ་ལ་བཏུམས་ནས་གཉིད་རྩིས་བྱས་མོད། གཉིད་ཀྱི་སྨུག་པ་རྒྱང་ལ་ཡལ་བས། ཁོས་མགོ་བོ་དགྱེ་ནས་དུ་རྐང་གཅིག་ལ་མེ་བསྒོས། དུ་བ་སྔོ་ལོག་གེར་འཐེན་ཞོར་གྱང་ངོས་ལ་ཅེར་ནས་བསྡད། གྱང་ངོས་ལ་སྦྱར་བའི་ཤོག་བུའི་སྟེང་ན་འདབ་མ་གྲོལ་བའི་མེ་ཏོག་གློ་ཁ་དག་ཚོན་མདངས་ཀྱིས་བཀྲག་ནས་མིག་ལ་འཚེར་ཡོང་།
ཁོས་མཚོ་མོ་ལ་ཁྱོད་མེ་ཏོག་ཡིན་ནམ་ཞེས་དྲིས་པ་དྲན་ཞིང་། མཚོ་མོས་ཡིན་ཞེས་ཨ་ལན་བྱིན་པ་དྲན་མ་ཐག་ཏུ་ཁེར་དགོད་ཅིག་བྱས་ཤིང་། བུད་མེད་འདི་དག་ལའང་དངོས་གནས་རློམ་རྒྱུ་ཞིག་མི་འདུག མོའི་མེ་ཏོག་ལེན་མཁན་བཀྲ་ཤིས་དོན་འགྲུབ་རེད་ཟེར་བ་མ་ཡིན་ནམ་སྙམ། དེ་ལྟར་ཡུད་ཙམ་ལ་བསམ་གཞིག་ཏུ་གཡེང་རྗེས་དུ་རྐང་གི་སྣེ་མོ་སྒོ་འགྲམ་གྱི་སྙིགས་སྒམ་ཕྱོགས་ལ་གཡུགས་རྗེས། མགོ་བོ་རུམ་ལ་བཏུམས་ནས་གཉིད་ལ་ཡུར་མགོ་བརྩམས།
ཟླ་བས་ཁེར་རྐྱང་གི་མཚན་མོ་འདི་རུམ་ནས་གཉིད་ལ་ཡུར་ཐུབ་བམ། ཕྱི་རོལ་གྱི་ནམ་མཁའ་སྔར་བཞིན་ནག་རོག་གེར་མུན་པས་བཟུང་འདུག
༤
མཚོ་མོ་མལ་ཁང་དུ་ལོག་རྗེས། དུས་རྒྱུན་གྱི་གོམས་སྲོལ་དུ་གྱུར་བའི་ཉལ་ཁར་ངོ་འཁྲུད་པའི་ལས་ལའང་སྤྲོ་བ་ཏིལ་ཙམ་མེད་པར་ཐད་ཀར་མལ་ཐུལ་དུ་འཛུལ་ནས་གཉིད་མགོ་བརྩམས། འདང་རྒྱག་ཡོད་ཚད་ཡལ་བར་གྱུར་ནས་མྱུར་དུ་གཉིད་སོང་ན་བསམས་མོད། གཉིད་ནི་ཅི་ལྟར་བསྒུགས་ཀྱང་ཡོང་ཐབས་བྲལ་བས། མོས་ཁ་པར་གྱི་མཉན་ཆས་རྣ་ནང་ལ་བཙུགས་ཏེ་གང་འདོད་དུ་གླུ་དབྱངས་ལ་ཉན་ཞོར།QQནང་ལ་མིག་གཡེང་བྱས། མོ་ཟླ་བའི་མཚོ་མོ་རུ་བཏགས་པའི་རང་གིQQདྲ་མིང་ལ་ཅེར་ནས་ཡུན་རིང་བསྡད་རྗེས། འདང་ཞིག་ཕོག་པ་ལྟར་ཟླ་བའི་མཚོ་མོ་ཞེས་པའི་ཟླ་བ་དང་འབྲེལ་སྒྲ་བསུབས་ནས་མཚོ་མོ་གཅིག་པུ་རུ་བརྗེས་ཤིང་། དྲ་མིང་གཤམ་གྱི“ང་ནི་ཟླ་བ་རུམ་པའི་མཚོ་མོ་དེ་ཡིན།”ཞེས་པའི་ཚིག་ཐུང་དེའང་བསུབས་སོང་། ཤུལ་དུ་ཅི་ཞིག་འབྲི་རྒྱུ་མ་ཤེས་པར་ཡུད་ཙམ་ལ་ཧད་དེ་བསྡད་ཅིང་། མཐར“བརྩེ་དུངས་ནི་རྨི་ལམ་ཐེངས་གཅིག”ཅེས་གཏགས།QQའཆར་ངོས་སུ་གཞན་གྱིས་ཚུར་ལ་སྦྲེལ་བའི་བརྡ་ཞིག་ཤར་བྱུང་། མོས་ཕོ་རོལ་བོའིQQ སྦྲེལ་ཐག་དང་ལེན་བྱས་མ་ཐག བདེ་མོ་ཞེས་པའི་ཡིག་འབྲུ་གཉིས་འཆར་ངོས་ལ་ཐག་སྒྲ་ཞིག་དང་ལྷན་དུ་ཤར་བྱུང་།
“བདེ་མོ་ཡིན། ཁྱོད་སུ་ཡིན།”
“QQབར་སྟོང་ལ་ལྟོས་དང་ཤེས།”
“ཨོ། ཁྱོད་ཡིན་ནམ།”
“ང་ཡིན། ལོ་ཕྱེད་ཙམ་ལ་མ་ཐུག་པར་བརྗེད་སོང་བ་ཨེ་རེད།”
“ང་ལ་ཁྱོད་བརྗེད་མི་ཆོག་པའི་རྒྱུ་མཚན་ཅི་ཡང་མེད།”
“ཡིན་ཡང་། བརྗེད་མི་སྲིད་པ་ངས་ཀྱང་ཤེས་ཡོད། ཁ་ལོ་བཏོད་པའི་དགའ་ལོ་མགོ་དཀར་པོར་གྱུར་རུང་མི་བརྗེད་ཟེར་སྲོལ་ཡོད་ཐལ།བདེན་ཞད་ལོས་ཡོད།”
“ང་ལ་མཚོན་ན་དེ་འདྲ་ཞིག་མིན།”
“ཨོ་དེ་ན་བཟང་གི”
“ང་ལ་འདྲི་རྒྱུ་ཞིག་འདུགདྲང་མོར་ལན་བཏབ་ན་ཆོག་གམ།”
“ལོས་ཆོག ཤོད་དང་།”
“ཁྱོད་ཀྱིས་ཟླ་བ་དང་ངེད་གཉིས་འབྲེལ་འདྲིས་བྱེད་ཀྱིན་པ་ཅི་ལྟར་ཤེས་པ་ཡིན།”
“སློབ་གྲོགས་ཤིག་གི་ཁ་ནས་གོ་བ་ཡིན། དེའི་རྗེས་སུ་ཁྱོད་ཀྱི་དྲ་མིང་འདོགས་སྟངས་ལ་བལྟས་ཏེ་བདེན་པ་ཡིན་པ་ཤེས་ཡོད།”
“སློབ་གྲོགས་སུ་རེད། ཁོས་ངེད་གཉིས་ལ་འབྲེལ་བ་ཡོད་པ་ཅི་ལྟར་ཤེས་པ་རེད། ངེད་གཉིས་མི་མང་གྲལ་ནས་མ་དགོས་གཅིག་པུར་ཡང་ངོ་ཐུག་མྱོང་མེད། ཁོས་ཅི་ལྟར་ཤེས་པ་རེད། དྲང་མོར་བཤད་རོགས།”
“ཁྱོད་སྤོ་མ་ལངས། ངས་དྲང་མོར་བཤད་ཆོག”
“ང་སྤོ་ལངས་ཀིན་མེད། ངོ་མ།”
“ང་ལ་སྤོ་མི་ལངས་པ་ཁག་ཐེག་བྱ་རོགས། ངས་ཀྱང་བསམ་གཟས་པ་མིན།”
“དོན་ངོ་མ་ཅི་རེད།”
“ཁྱོད་ཀྱིQQངའི་ཁ་པར་གྱི་སྟེང་ནས་ཁ་ཕྱེ་རྗེས་སུབ་རྒྱུ་བརྗེད་འདུག་པས། ང་རྒྱུན་པར་ཁྱོད་ཀྱིQQནང་ལ་གཡེང་བ་ཡིན་ལ། ཁྱོད་ཀྱིས་ཟླ་བ་ལ་འབྲེལ་འདྲིས་བྱེད་པ་དང་ཁ་ཆད་བཏབ་པའང་དེ་ལྟར་ཤེས་པ་ཡིན། ཁྱོད་ནི་ང་དང་ཁ་བྲལ་ནས་ཡུན་རིང་འགོར་ནའང་བརྗེད་པར་དཀའ་བས། ངས་ཁྱོད་ལ་སྣང་འཇོག་ཙམ་བྱས་པ་ལས་ཅི་ཡང་མིན། ཁྱོད་ཀྱི་མི་སྒེར་གྱི་གསང་བ་ལ་བརྩི་འཇོག་མ་བྱས་པས། འདིར་ཆེད་དུ་དགོངས་དག་ཞུས་པ་ཡིན། དགོངས་པ་མ་ཚོམ། ཁྱོད་གཉིས་ལ་བར་ཆད་བཟོས་སོང་།”
“ཨ་བ་ཨ་མ། དགོངས་དག་ཞུ་རྒྱུར་ངོ་མི་ཚའམ། ཁྱི་རྒན།”
“ངས་ཁྱོད་ལ་དྲང་མོར་བཤད་པ་ཡིན། ངས་ཁྱོད་ཀྱིQQགསང་གྲངས་བརྐུས་པ་མིན། ཁྱོད་རང་གིས་སུབ་རྒྱུ་བརྗེད་སོང་བ་རེད། དེ་ང་ལན་ནམ། འཇིགས་པོ་མ་བཅའ། ངོ་ཚ་རྒྱུ་སུ་ལ་ཡོད་མེད་རང་རང་ལ་གསལ་ནི་རེད། ང་མེ་ཏོག་ཡིན་ཞེས་ཤོབ་གཏམ་རྒྱུར་ངོ་མི་ཚའམ། ངོ་མ། བཟང་བྱས་ན་བཟང་ངོ་མི་འདུག བདེ་མོ་བྱོས།”
བཀྲ་ཤིས་དོན་འགྲུབ་ཀྱིས་བསྐུར་བའི་ཡི་གེ་འདི་དག་ནི་མདའ་མོ་རེ་རེ་ལྟར་འཕྲོ་རིམ་འཕྲོར་མཚོ་མོའི་སེམས་ལ་ཟུག་པར་གྱུར་བས། ངུ་སྒྲ་མེད་པའི་མིག་ཆུའི་རྒྱུན་ནི་རྨ་ཁའི་ནང་གི་ཁྲག་དྲོན་དང་འདྲ་བར་མཁུར་མགོ་བརྒྱུད་ནས་ཤམ་ཤམ་བཞུར་བྱུང་།
མུན་པ་འཁྱིལ་བའི་མལ་ཁང་ནི་སྔུར་སྒྲ་རེ་གཉིས་ཀྱི་འདེགས་འཇོག་ཁྲོད་ན་ཁུ་སིམ་མེར། ཡོད་ཚད་གཉིད་དུ་ཡུར་འདུག མཚོ་མོ་གཅིག་པུས་མལ་ཐུལ་གྱི་གོང་བ་ཁ་ནང་ལ་བརྫངས་ཏེ་ངུ་སྒྲ་རེ་རེ་དབུགས་རྒྱུན་ལ་བསྲེས་ནས་སད་ཡོད།
མཚོ་མོའི་ངུ་སྐད་གཉོམ་པོ་དལ་བ་དལ་བུར་རང་གི་དབུགས་རྒྱུན་ལ་འདྲེས། མལ་ཁང་གིས་སྔར་བཞིན་ཁུ་སིམ་མེར་མུན་པ་མཐུག་པོ་ཞིག་རུམ། ནམ་གུང་འདིར། མོ་གཉིད་དང་བྲལ་ནས་ཡར་འཕག་མར་འཕག་ལན་མང་བྱས་རྗེས། སྒེའུ་ཡོལ་འཐེན་ནས་ཕྱི་ལ་བལྟས་པ་ན། ཡོད་ཚད་གཉིད་དུ་ཡུར་ཞིང་། ཕྱི་རོལ་གྱི་འདུ་འཛི་དང་འུར་ཟིང་ཡང་ཞི་ཞིང་འཇགས། མཚན་མོ་འདིའི་ནམ་མཁའ་མུན་པས་གཡོགས་འདུག་པ་སྨན་ཤར་གྱི་སེམས་པ་སྡུག་གིས་བཟུང་བ་དང་འདྲ། མཚན་མོ་འདིའི་ནམ་མཁའ་སྨག་གིས་བསྡམས་པས། ས་ཆེན་གྱི་པང་ལ་འཁྱིལ་བའི་ཁེར་རྐྱང་གི་མཚོ་མོ་རེ་རེས་ཀྱང་རང་གི་རླབས་རྒྱུན་ལ་ཉན་ཡོད། སེམས་སྒྲ་ལ་ཉན་ཡོད། མོ་ཉལ་ཁང་སྒོ་ཡི་གློག་སྡོང་གི་འོད་སྣང་མོག་པོ་དེ་ལ་ཅེར་ཏེ་ལུས་ཤིང་། རྐུབ་སྟེགས་ཟད་པོ་དེ་ལ་འགོས་པའི་གློག་འོད་ཁེར་ཆད་དེ་ནི་ཟླ་འོད་འཇམ་པོ་ཞིག་ལྟར་སེམས་ལ་ལྷུང་།
མོའི་སེམས་ལ་ཅི་ཡང་མ་དྲན་མོད། མོ་སྔར་བཞིན་གློག་འོད་ཁེར་ཆད་དེ་ལ་ཅེར་ཏེ་ལུས། །
༡
“ཁྱོད་ཀྱིས་ང་ལ་ཁ་ཡ་མི་བྱེད་དོན་ཅི་ཡིན།”
“ངས་ཁྱོད་ལ་ཁ་ཡ་བྱེད་འདོད་པས་ཡིན།”
“ཁ་ཡག་མ་བཤད། དྲང་མོར་ཤོད། འུ་གཉིས་ཀྱིས་ཁ་བརྡ་བྱས་ནས་ཡུན་རིང་འགོར་ཡོད་པ་མ་ཡིན་ནམ། ངོ་ཚ་དགོས་དོན་ཅི་ཡོད།”
“ངོ་ཚ་དགོས་དོན་མེད་ན་ཁྱོད་ཀྱིས་ཚུར་ལ་ཁ་མི་གྲག་དོན་ཅི་ཡིན།”
“ཁྱོད་སྐྱེས་པ་ཕོ་ཞིག་གིས་སྔོན་ལ་ཁ་མི་གྲག་ན། ང་བུ་མོ་ཞིག་ལ་ཅི་ཁག”
“རྗེས་མར་ཁ་ཡ་བྱེད་ཁོ་ཐག་ཡིན།”
“ད་ཅི་ཆ། སྔོན་མར་ཡང་ཁྱོད་ཀྱིས་འདི་ལྟར་བཤད་པ་མ་ཡིན་ནམ། ང་ལ་ཁ་ཡ་བྱེད་མི་ཐུབ་རྒྱུ་ཅི་འདུག ཁྱོད་ང་ལ་སྐྲག་གམ།ངའི་མགོ་ན་རྭ་མེད། ངའི་ངོ་ན་རྨ་མེད། ང་ལ་ངོ་གདོང་ཡག་པོ་ཞིག་མེད་ཀྱང་མ་མཐའང་གཟུགས་གཞི་ཡག་པོ་ཞིག་ཡོད། ཁྱོད་ང་ལ་སྐྲག་དགོས་དོན་ག་ལ་ཡོད། དེ་ཨེ་རེད།”
“དེ་ལོས་ཡིན། ཧེ་ཧེ།”
“དགོད་རྒྱུ་ཅི་ཡོད།”
“ཅང་མ་རེད། ཁྱོད་འདི་ངོ་མ་བུ་མོ་སྣང་ཡངས་འདྲིས་སླ་བ་ཞིག་རེད། ཁྱོད་ཀྱིས་ཚུར་ལ་འདི་ལྟར་མ་བཤད་ན། ངས་ཁྱོད་ཀྱི་གཟུགས་གཞི་ཚིགས་དྲུག་སྨྱུག་མ་རེད་ཅེས་བཤད་རྒྱུ་བརྗེད་འདུག”
“ང་སྣང་ཡངས་ཤིག་ག་ལ་ཡིན། འདྲིས་སླ་བ་ཞིག་ཀྱང་མིན་པས། ཁྱོད་ཀྱིས་ཐེངས་གཉིས་ལ་ཐུག་ཀྱང་ཁ་ཡ་བྱེད་མ་ཕོད་པ་མ་ཡིན་ནམ། སྐད་ཆ་ལ་ལ་ཞིག་ཁྱོད་ཀྱིས་མ་བཤད་ཀྱང་། ངས་གསལ་བོར་ཤེས་ཡོད་པས།ངས་ཁྱོད་ཀྱི་ཚབ་ཏུ་བཤད་ཀྱང་མི་ཆོག་པ་ཅི་ཡོད། དཔེར་ན་ངའི་གཟུགས་གཞིའི་ཐད་ཀྱི་སྐད་ཆ་དེ་ལྟར།”
“སྐད་ཆ་ལ་ལ་ཞིག་ངས་དུས་ལྟར་བཤད་མེད་ཚེ། ཁྱོད་ཀྱིས་འདི་ལྟར་ཚུར་ལ་སྔོན་བརྡ་བཏང་ནའང་ཡག་པོ་རེད།”
“ག་ལ་ག་ལ། ཀུ་རེ་ཡིན། ངས་ཁྱོད་ཀྱིས་ཅི་ཞིག་འདོད་ཀྱིན་པ་ག་ལ་ཤེས། དངོས་གནས་ཤེས་ཁག་པོ་རེད། ཁྱོད་ཀྱིས་ང་ལ་ཁ་ཡ་མི་བྱེད་དོན་ཅི་ཡིན། དྲང་མོར་ཤོད།”
“དྲང་མོར་བཤད་ན། རྒྱུ་རྐྱེན་ཅི་ཡིན་ངས་ཀྱང་བཤད་ཁག་པོ་རེད། མ་ཐུག་སྔོན་ལ་ཁ་ཡ་བྱེད་རྩིས་ཡིན་མོད། ཁྱོད་ཀྱི་གམ་ལ་ཐོན་དུས་ཅི་ཞིག་བཤད་དགོས་པའང་མི་ཤེས་པར་དབུགས་ཁེགས་ལ་བྱེད་པས་ཁ་ཡ་མ་བྱས་པར་བུད་སོང་བ་ཡིན། དགོངས་དག”
“འདི་ཐེངས་སྔོན་མའི་རྒྱུ་རྐྱེན་མ་ཡིན་ནམ། ཐེངས་སྔོན་མར་ཁྱོད་དངོས་གནས་འཚབ་ཀྱིན་འདུག ཅི་ཁག”
“ད་ཐེངས་འཚབ་ཀྱིན་པ་མ་ཤེས་སམ།”
“མ་ཤེས། ད་ཐེངས་ཁྱོད་ཀྱིས་ཁ་གྲག་རྩིས་རེད་བསམ་མོད། གམ་ལ་ཐོན་པ་ན་གློ་བུར་དུ་མགོ་སྒུར་ནས་བུད་ཐལ། ཁྱོད་ཀྱིས་ངའི་མཐའ་འཁོར་ནས་ངོ་ཤེས་ཤིག་མཐོང་བྱུང་ངམ། ངོ་ཚ་དགོས་དོན་ཅི་ཡིན། ལུས་རྩལ་ར་བའི་ནང་ན་མི་མང་བོ་ཡོད་པས་ཨེ་རེད།”
“མིན། དགོངས་པ་མ་ཚོམ། མི་མང་ནའང་ང་དེ་ཚོར་ངོ་ཚ་དོན་ཅི་ཡོད།”
“དེ་ངས་ག་ལ་ཤེས། ཡང་གཅིག་བཤད་ན་ཁྱོད་ཀྱི་ངོ་ཤེས་དང་གྲོགས་པོ། དགའ་རོགས་སོགས་ཡོད་པས། དེ་དག་གི་སྔུན་ནས་འུ་གཉིས་ཀྱི་འབྲེལ་བ་ཤེས་འགྲོ་བར་དོགས་པ་ཡིན་སྲིད།”
“ངའི་དགའ་རོགས་ཁྱོད་མ་ཡིན་ནམ།”
“ཕན་ཚུན་ལ་ཁ་མི་གྲག་པའི་དགའ་རོགས་ཤིག་ཡོད་དམ།”
“དུས་རྒྱུན་ཁྱོད་ལ་ཡི་གེ་བསྐུར་ནས་ཁ་བརྡ་བྱེད་པ་འདིའང་ཁ་གྲག་སྟངས་ཤིག་མ་ཡིན་ནམ།”
“ཡིན་སྲིད། འུ་གཉིས་རྒྱུས་ཡོད་དུ་གྱུར་ཡོད་པའང་རྒྱུ་རྐྱེན་འདིའི་དབང་གིས་ཡིན་སྲིད།”
“ངས་ཀྱང་ཁྱོད་ལ་ཁ་ཡ་བྱེད་མ་ཐུབ་པ་མ་གཏོགས་ཁྱོད་ངའི་སེམས་ཀྱི་དགའ་རོགས་ཡིན་པ་ལོས་ཤེས།”
“ཤེས་སམ། ངས་ལན་རེར་ཁྱོད་ཀྱིས་ཁྱོད་ཀྱི་དགའ་རོགས་བདེ་སྐྱིད་སྒྲོལ་མ་རེད་བསམ་བཞིན་འདུག་སྙམ།”
“དེའི་དོན་ཅི་རེད། གོ་བ་མ་ལོག”
“དེའི་དོན་དེ་རེད།”
“ཧ་གོ་མ་བྱུང་།”
“འུ་གཉིས་ཀྱིས་དང་ཐོག་སློབ་ཁང་གི་བར་ཁྱམས་ནས་ཁ་ཆད་བཏབ་དུས་ཁྱོད་ཀྱིས་བདེ་སྐྱིད་སྒྲོལ་མ་མ་མཐོང་ངམ།”
“མ་མཐོང་། བདེ་སྐྱིད་སྒྲོལ་མ་དང་ངེད་གཉི་ཀའི་དོན་དག་ནི་འདས་སོང་གི་གཏམ་རྒྱུད་ཙམ་རེད། ད་ནི་རྟ་བརྒྱུགས་ནས་རྡུལ་འཇགས་ཤུལ་རེད། ངེད་གཉིས་ལ་འབྲེལ་བ་ཅི་ཡང་མེད།”
“དངོས་གནས་མ་མཐོང་ངམ། ཁྱོད་ངའི་ཕྱོགས་སུ་ཡོང་དུས་བདེ་སྐྱིད་སྒྲོལ་མ་ཏག་ཏག་ངའི་སྔུན་ནས་ཁྱོད་ཀྱི་ཕྱོགས་སུ་བུད་ཐལ། བར་ཁྱམས་ཀྱི་མུན་པ་སྲབ་བུ་དེའི་ཀློང་ནས་མོས་ཡང་དང་ཡང་དུ་མགོ་བོ་རྒྱབ་ལ་འཁོར་ནས་ང་ལ་ལྟ་ཞོར་དང་སྔུན་ལ་དགྱེ་ནས་ཁྱོད་ལ་ལྟ་ཞོར་བུད་སོང་། འུ་གཉིས་ཀྱི་བར་ནས་ནག་ཡོར་ཡོར་རྒྱང་ལ་ཡལ་བའི་རྒྱབ་གཟུགས་དེ་ད་དུང་ངའི་མིག་ལ་ཞག་འདུག”
“འོད་འཕྲོ་ཕྱོགས་ཤིག་གིས་ཡིན་ནམ། ངས་དངོས་གནས་བདེ་སྐྱིད་སྒྲོལ་མ་མཐོང་མ་བྱུང་། ཁྱོད་ཀྱི་རྒྱབ་ཕྱོགས་ཀྱི་སྒེའུ་ཁུང་ཆུང་ཆུང་དེ་ལས་འོད་འཕྲོས་ཡོད་པས། སློབ་ཁང་གི་བར་ཁྱམས་ནས་ཁྱོད་ཀྱི་ངོ་གདོང་རབ་རིབ་ཏུ་སྣང་བྱུང་། ནན་ཏན་གྱིས་བལྟས་པ་མིན་ཚེ་ཁྱོད་ཀྱང་ངོས་ཟིན་ཁག་པོ་འདུག་པས། ངས་ཁྱོད་ཀྱི་གམ་ན་འགྲོ་བ་དེ་དག་སུ་ཡིན་ག་ལ་ཤེས།”
“དེ་ན་ཁ་ཡ་མི་བྱེད་དོན་ཅི་ཡིན།”
“ཁྱོད་ལ་ཐེངས་དང་པོར་ངོ་ཐུག་པ་ཡིན་པས་ངོ་ཚ་བྱུང་།”
“ཁྱོད་བུད་མེད་མང་བོར་འགྲོགས་མྱོང་བ་མ་ཡིན་ནམ། དེ་འདྲའི་ངོ་ཆུང་ཞིག་ག་ལ་ཡིན། ངོ་ཚ་དགོས་པ་ཁྱོད་མ་རེད། བདེ་སྐྱིད་སྒྲོལ་མས་འུ་གཉིས་ཀྱིས་ཁ་ཆད་བཏབ་ཡོད་པ་ཤེས་ཡོད་པ་འདྲ། ང་སློབ་ཁང་དུ་ཐོན་དུས། མོས་ང་ལ་ཡང་དུ་ཡང་དུ་བལྟས་ནས་ཁྲེལ་དགོད་བྱེད་ཀྱིན་འདུག སློབ་གྲོགས་ཁ་ཤས་ཀྱིས་ཀྱང་མོའི་རྣམ་འགྱུར་གྱི་ནང་དོན་གོ་ཡོད་པ་འདྲ་བས། ང་དངོས་གནས་ངོ་ཚ་བྱུང་།”
“བདེ་སྐྱིད་སྒྲོལ་མས་ཅི་བཤད་ན་བཤད་དུ་ཆུགས། ཁྱོད་ངོ་ཚ་དགོས་དོན་མེད།”
“ཁྱོད་ངོ་ཚ་བར་རྒྱུ་མཚན་འདྲེན་རྒྱུ་འདུགང་ངོ་ཚ་བར་རྒྱུ་རྐྱེན་མེད་དམ། ངོ་མ་སྐད་ཆ་གནས་ལུགས་མེད་ནི་རེད་ཡ།”
“ཀུ་རེ་ཡིན། སྤོ་མ་ལངས།”
“སྤོ་ལངས་མེད།”
“སྤོ་ལངས་འདུག”
“ངོ་མ་སྤོ་ལངས་མེད། ང་ཁྱོད་ཀྱི་སྟེང་ལ་སྤོ་ལངས་དགོས་པའི་ཚད་ལ་ཐོན་མེད།”
“དེ་འདྲ་ཡིན་སྲིད། ཕན་ཚུན་ལ་ཡིད་ཆེས་བྱས་ན་ཡག་པོ་རེད།”
“ངས་ཀྱང་དེ་ལྟར་བསམས་མོད། དོན་དངོས་ནི་ཅི་འདྲ་ཞིག་ཡིན་པ་སུས་ཤེས།”
“དོན་དངོས་ནི་ཅི་འདྲ་ཞིག་ཡིན་པ་སོ་སོའི་སེམས་ན་གསལ་བོ་ཡིན། ངས་ཁྱོད་ལ་ཐེངས་གཉིས་ལ་ཁ་ཆད་བཏབ་ནས་ཁ་ཡ་མ་བྱས་དོན་ཡང་ངའི་སེམས་ན་གསལ་བོ་ཡིན།”
“ཁྱོད་ཀྱི་སེམས་ན་གསལ་བོ་ཡིན་ནམ། དེ་ན་རང་གི་སྔུན་ན་འགྲོ་བའི་བདེ་སྐྱིད་སྒྲོལ་མའང་རིག་མེད་པ་ཅི་རེད། ཁྱོད་ཀྱིས་དངོས་གནས་བདེ་སྐྱིད་སྒྲོལ་མ་མ་མཐོང་ངམ།”
“ཁྱོད་འདི་དོན་དག་གཅིག་ཡང་ནས་བསྐྱར་དུ་འདྲི་རྒྱུར་དགའ་བོ་འདུག”
“ཁྱོད་ཀྱང་སྐད་ཆ་གཅིག་ཡང་ནས་བསྐྱར་དུ་བཤད་རྒྱུར་དགའ་བོ་འདུག འུ་གཉིས་ཀྱི་གཤིས་ཀ་འདྲ་བོ་འདུག་ཨང་།”
“ཡིན་ན་ཐང་། ངས་དངོས་གནས་བདེ་སྐྱིད་སྒྲོལ་མ་མཐོང་མ་བྱུང་།”
“དེ་འདྲ་ཡིན་སྲིད། བར་ཁྱམས་ཀྱི་འོད་མདངས་མག་མོག་དེ་ལས་མི་གཞན་ངོས་མ་ཟིན་ཟེར་ན་བདེན་མོད། ཉིན་མོའི་ཉི་འོད་འོག་གི་ལུས་རྩལ་ར་བ་ནས་ཀྱང་ངོས་མ་ཟིན་ཟེར་ན་སུ་ཡིད་ཆེས་སམ།”
“ཁྱོད་ཀྱིས་དེ་ཟེར་བ་ཡིན་ནམ། ལུས་རྩལ་ར་བའི་ནང་ནས་ཐུག་དུས་ཀྱང་ང་དངོས་གནས་ངོ་ཚ་བྱུང་། དེ་བས་ཡང་བསྐྱར་ཁ་ཡ་བྱེད་མ་ཐུབ་པ་རེད། ཁྱོད་ང་ལ་ཡིད་ཆེས་མེད་དམ།”
“ང་ཁྱོད་ལ་ཡིད་ཆེས་ཡོད་མེད་ངས་ཀྱང་མི་ཤེས། གང་ལྟར། ངས་ཁྱོད་ལ་ཁ་ཆད་ཐེངས་གཉིས་པ་བཏབ་དུས་ཀྱང་བདེ་སྐྱིད་སྒྲོལ་མའི་ཁྲེལ་དགོད་ཀྱི་མིག་མདངས་ཁྱེར་ནས་ལུས་རྩལ་ར་བར་ཁ་བྲལ་དགོས་བྱུང་། ཁྱོད་ཀྱིས་ཤེས་སམ། འུ་གཉིས་ཀྱི་ཁ་སྐྱེངས་པའི་རྣམ་པ་མོས་མཐོང་འདུག ཁྱོད་ཀྱིས་ང་ལ་ཁ་ཡ་བྱེད་རྩིས་ཀྱིས་གམ་ལ་བཅར་ནས་སྨྲ་བ་མེད་པར་རྒྱང་ལ་སོང་རྗེས། ང་སློབ་ཁང་དུ་འགྲོ་བའི་ལམ་བར་ནས་ཡང་བསྐྱར་མོ་ལ་ཐུག་བྱུང་། ཁྱོད་རང་མོ་ལ་ཐུག་མ་བྱུང་ངམ།”
“མ་ཐུག གལ་སྲིད་ཐུག་བྱུང་ནའང་། ངེད་གཉིས་ལ་འབྲེལ་བ་ཡོད་དམ། གལ་སྲིད་བཀྲ་ཤིས་དོན་འགྲུབ་ལ་ཐུག་ནའང་། ང་ལ་འབྲེལ་བ་ཡོད་མི་སྲིད།”
“དེའི་དོན་ཅི་རེད། ཡང་གཅིག་བཤད་ན་ཁྱོད་ཀྱིས་བཀྲ་ཤིས་དོན་འགྲུབ་རིག་ནས་ང་ལ་ཁ་ཡ་བྱེད་འདོད་མེད་སོང་བའང་ཡིན་སྲིད།”
“བཀྲ་ཤིས་དོན་འགྲུབ་ཀྱིས་ཁྱོད་ལ་དེ་འདྲའི་བག་ཆགས་ཟབ་མོ་དང་ཤུགས་རྐྱེན་ངན་པ་ཞིག་བཞག་ཡོད་དམ། ངས་དངོས་གནས་མ་ཤེས། ཡང་གཅིག་བཤད་ན། ཁྱོད་ཀྱང་བཀྲ་ཤིས་དོན་འགྲུབ་ཀྱི་བུད་མེད་ཡིན་པ་ལས་ང་ལ་འབྲེལ་བ་ཡོད་མི་སྲིད།”
“གླེང་འགེལ་མ་བྱེད། བཀྲ་ཤིས་དོན་འགྲུབ་དང་ངེད་གཉིས་ཀྱི་འབྲེལ་ཐག་སྔ་མོ་ནས་ཆད་ཟིན། རང་སེམས་ན་གནོང་ཡོད་ན། གཞན་སྐྱོན་ལ་ཁག་མ་བཙལ།”
“ཁག་ཅི་ཡང་བཙལ་གྱིན་མེད། འུ་གཉིས་ཀྱིས་ཁ་ཆད་བཏབ་དུས་དེ་གཉིས་ལ་ཁྱོད་ཀྱིས་དངོས་གནས་བཀྲ་ཤིས་དོན་འགྲུབ་མ་མཐོང་ངམ།”
“མ་མཐོང་། ཁྱོད་ཀྱིས་ཁོ་མཐོང་བས་ང་ལ་ཁ་ཡ་མ་བྱས་པ་ཡིན་ནམ།”
“ངས་ཁོ་མཐོང་བྱུང་། ཁོས་འུ་གཉིས་ཀྱིས་ཁ་ཆད་བཏབ་པ་ཤེས་ཡོད་པ་འདྲ། ང་སློབ་ཁང་བར་ཁྱམས་དང་རྩལ་སྦྱོང་ར་བར་མ་ཐོན་གོང་ལ་ཁོས་ངའི་རྗེས་དེད་ཡོད་པ་འདྲ།”
“ཁྱོད་ཀྱིས་ཁོ་མཐོང་བས་ང་ལ་ཁ་ཡ་མ་བྱས་པ་ཡིན་ནམ།”
“ཁྱོད་འདི་ངོ་མ་སྐད་ཆ་གཅིག་ཡང་དང་བསྐྱར་དུ་འདྲི་རྒྱུར་དགའ་ཨང་།”
“ངས་འུ་གཉིས་ཀྱི་བར་ལ་འབྲེལ་བ་ཡོད་ཀྱང་རུང་ལ་མེད་ཀྱང་ཆོག་མོད། ཕན་ཚུན་བར་ལ་གསལ་གསལ་དག་དག་ཅིག་ཡོང་ན་བཟང་སྙམ།”
“ཁྱོད་ཡིད་ཆེས་མེད་སོང་བ་མ་གཏོགས། ངས་ཁྱོད་ལ་རྫུན་གཏམ་ཚིག་གཅིག་ཀྱང་བཤད་མྱོང་མེད། ངས་ཁྱོད་ལ་ཁ་ཡ་མ་བྱས་དོན་ངོ་མ་ངོ་ཚ་བས་ཡིན། རྒྱུ་རྐྱེན་གཞན་པ་ཡོད་མེད་ངས་ཀྱང་མི་ཤེས། ཡིད་ཆེས་བྱེད་མིན་རང་འདོད་གྱིས།”
“ཐེངས་དང་པོར་ངོ་ཚ་བ་ཡིན་ཟེར་ན་རློམ་མོད། ཐེངས་གཉིས་པར་ཡང་ངོ་ཚ་བ་ཡིན་ཟེར་ན་རློམ་ཐབས་མི་འདུག ཁྱོད་རང་དང་ཐོག་བདེ་སྐྱིད་སྒྲོལ་མར་ཐུག་དུས་ཀྱང་ངོ་ཚ་བྱུང་ངམ།”
“བདེ་སྐྱིད་སྒྲོལ་མ་ངེད་གཉིས་ཀྱི་འབྲེལ་བ་སྟེས་དབང་གི་ཐུག་འཕྲད་ཅིག་ལས་ཁ་བརྡ་བྱས་ཏེ་མགོ་བརྩམས་པ་ཡིན་པས། འུ་གཉིས་ཀྱི་དཀའ་ཁག་འདི་འདྲ་བརྒྱུད་དགོས་བྱུང་མེད། འུ་གཉིས་ཐོག་མ་ནས་QQབརྒྱུད་ནས་ངོ་ཤེས་པ་ཡིན་པས། སྔར་བཞིན་འདི་ལྟར་དྲ་ལམ་ནས་ཁ་བརྡ་བྱས་ན་ཐག་ཉེ་ལ་འདྲིས་སླ་བའི་སྣང་བ་ཞིག་རེད།”
“ཨོ་ལེ། འུ་གཉིས་ཀྱི་ལས་སྐལ་དྲ་ལམ་ན་མ་གཏོགས་མེད་པ་འདྲ།”
“ངའི་ནང་དོན་དེ་མིན། གོ་བ་མ་ལོག འུ་གཉིས་ཀྱི་དོན་དག་བདེ་སྐྱིད་སྒྲོལ་མ་དང་བཀྲ་ཤིས་དོན་འགྲུབ་གཉིས་ཀྱིས་ཅི་ལྟར་ཤེས་པ་ཡིན་ནམ། ཁྱོད་ཀྱིས་དེར་འདང་ཨེ་བརྒྱབ། ང་དངོས་གནས་ཡ་མཚར་བོ་འདུག ངས་འུ་གཉིས་ཀྱིས་ཁ་བརྡ་བྱེད་བཞིན་པ་ཉལ་ཁང་ནང་གི་མི་གཅིག་ལའང་ཤེས་སུ་བཅུག་མེད། ཁྱོད་ཀྱིས་མི་གཞན་ལ་འུ་གཉིས་ཀྱིས་ཁ་བརྡ་བྱེད་བཞིན་པ་ཨེ་བཤད།”
“མ་བཤད། ཡུམ། ངའི་སྟེང་ལ་དོགས་པ་མ་ཟ། ང་བུད་མེད་དེ་འདྲ་ཞིག་མིན། ཡང་གཅིག་བཤད་ན་ངས་འུ་གཉིས་ཀྱི་འབྲེལ་བ་ཅི་ཞིག་ཡིན་པ་ངོས་ཟིན་གྱིན་མེད། གཞན་ལ་བཤད་རན་ཞིག་ཡོད་དམ།”
“ངས་ཁྱོད་ལ་དོགས་པ་ཟ་བ་མིན། ཁྱོད་ཀྱིས་ངའི་སྐད་ཆར་གོ་བ་ལོག་པར་ལེན་དོན་ག་རེ་ཡིན་ནམ། ང་ལ་ཡིད་ཆེས་མེད་དམ། ངས་འུ་གཉིས་ལ་འབྲེལ་བ་ཡོད་ཅེས་གཞན་ལ་བཤད་ཡོད་པར་འདོད་དམ།”
“ངས་ངོ་མ་མི་གཅིག་ལའང་མ་བཤད། ཐ་ན་ཉལ་ཁང་ནང་གི་མི་གཅིག་ལའང་ཁྱོད་དང་ཁ་བརྡ་བྱེད་པ་ཚོར་དུ་བཅུག་མེད་པ་ཁག་ཐག་བྱས་ཆོག་གཉི་ཀས་སུ་གཅིག་ལའང་བཤད་མེད་ན་མི་དག་ལ་འདྲེ་ཡིས་བཤད་པ་ཡིན་ནམ།”
“ཡིན་སྲིད། གང་ལྟར་ངས་མ་བཤད། ཁྱོད་ཀྱིས་ངས་གསང་མ་ཚུགས་པར་འདོད་དམ།”
“དྲང་མོར་བཤད་ན་ཁྱོད་ཀྱི་ཅི་བཤད་ལ་གན་འདི་མེད་པའི་བྱ་སྤྱོད་ཀྱིས་ང་ཡིད་ཆད་དུ་བཅུག་བྱུང་།”
“ཁྱོད་འདི་དངོས་གནས་བུ་མོ་རང་སྣང་ཅན་ཞིག་རེད། ངས་ཁྱོད་ལ་ཁ་ཡ་མ་བྱས་པ་འགྲིག་འདུག”
“འགྲིག་ན་བཟང་འདུག འུ་གཉིས་གྱི་བར་ལ་མི་འགྲིག་པ་ཅི་ཡང་མེད། འགྲིག་དང་མ་འགྲིག་མེད་པར་རང་རང་ས་ལ་ཕྱིན་ཆོག”
“ངས་ཀྱང་དོན་མེད་དུ་མི་ཆ་མེད་ཅིག་གི་ཆེད་དུ་འདི་ལྟར་རྩོད་པ་བྱེད་མི་འདོད། བདེ་མོ་བྱོས། འུ་གཉིས་ཀྱི་སྐུད་ལམ་མཚམས་འདི་ནས་བཅད་འཇོག”
༢
“དེ་ལྟར་བྱོས། ང་ལ་བློས་མི་ཐོངས་རྒྱུ་ཅི་ཡང་མེད།”
མཚོ་མོས་ཡི་གེ་འདི་དག་བསྐུར་མ་ཐག་ཏུ་ཁ་པར་གྱི་ངོས་ལ“ཁྱོད་རང་ཁོའི་འབྲེལ་ལམ་དུ་མི་འདུག”ཅེས་ཤར། བློས་མི་ཐོངས་རྒྱུ་ཅི་ཡང་མེད་ནའང་ཟླ་བས་རང་ཉིདQQའཕྲིན་ལམ་ནས་བསུབས་ཡོད་པ་ཤེས་རྗེས། མཚོ་མོའི་སེམས་པ་སྐྱོ་དུབ་བེར་གྱུར། མཚན་མོ་འདི་ནི་སྔར་བཞིན་སྐད་སྒྲ་མེད་པའི་མཚན་མོ་ཞིག་སྟེ། ཡི་གེ་གཏགས་པའི་ཐག་སྒྲ་གསལ་བོ་གཅིག་རྗེས་གཉིས་མཐུད་ངང་སེམས་ཀྱི་དབྱངས་རྟ་རིགས་ཤིག་ལྟར་དུས་ཚོད་གཅིག་ཙམ་གྱི་ཡུན་ལ་གྲག་གྲག་རྗེས། ཡོད་ཚད་གཉིད་ལ་ཡུར་བ་ལྟར་ཁུ་སིམ་མེར་གྱུར། ཁུ་སིམ་མེར་གྱུར་རྗེས་ཀྱི་སྐད་སྒྲ་མེད་པའི་མཚན་མོ་རེ་རེ་ནི་དུས་རྒྱུན་བག་ལྷོད་བདེ་ཡངས་ཀྱིས་ཁྱབ་པ་ཞིག་ཡིན་མོད། དོ་ནུབ་སྐད་སྒྲ་མེད་པའི་ངང་ཚུལ་འདིས་མཚོ་མོའི་སེམས་པ་འོན་དུ་བཅུག་པ་འདྲ། མོ་ཡུན་རིང་ཞིག་ལ་རང་གི་ཁང་བའི་ནང་ལ་ཅེར་ནས་བསྡད་རྗེས། ད་གཟོད་ཕྱོགས་བཞིའི་གྱང་ངོས་གློ་ཁ་ཡིན་པའི་རང་གི་མལ་ཁང་ཆུང་ཆུང་འདི་རུ་གོས་སྒྲོམ་གཅིག་དང་འབོལ་ཁྲི་གཅིག ཅོག་ཙེ་གཅིག ད་དུང་ཐོག་ཏུ་རང་ཉིད་ཉལ་ཡོད་པའི་མལ་ཁྲི་གཅིག་བཅས་ལས་ཅི་ཡང་མེད་པ་རྟོགས་སོང་བ་འདྲ་ལ། དེ་ལྟར་རྟོགས་པར་ཡང་སེམས་ཀྱི་རྩོལ་བ་དྲག་ཏུ་བཏོན་པ་ལྟར། མོ་གཞི་ནས་ཐང་ཆད་འདུག མོའི་ཁང་མིག་གི་མུན་ནག་ལ་འཁྱིལ་བའི་སྔས་འགྲམ་གྱི་གློག་འོད་གཉོམ་པོ་ཁེར་རྐྱང་གི་མཚེའུ་ཞིག་ལྟར་ཞི་ཞིང་འཇགས་ཨང་། མཚོ་མོའི་དྲན་པའང་གཉིད་ཀྱིས་གསབ་མ་ཐུབ་པའི་ཁེར་རྐྱང་གི་མཚེའུ་དེ་ལྟར་ཁང་མིག་འདིའི་ནང་རོལ་ལ་ལྷིང་འཇགས་ཀྱིས་འཁྱིལ་ཞིང་། ལྷིང་འཇགས་ཀྱིས་སྐྱོམ་གྱིན་འདས་སོང་གི་ཆུ་རིས་མང་བོ་གཅིག་རྗེས་གཉིས་མཐུད་ངང་མིག་ལ་བབས་བྱུང་། མོས་མགོ་བོ་རུམ་ལ་བཏུམས་ཤིང་ཡང་ཡང་ཕྱི་ལ་བུད་ནས། དངན་པ་རིང་མོ་ཤུར་ཤུར་ཁོག་ལ་རྔུབ་ཅིང་ཤུར་ཤུར་ཕྱི་ལ་འབྱིན་པ་ནི་ཡ་ཆུང་སྡུག་གི་རྐྱ་མ་བཅོ་བརྒྱད་ཡང་ཡང་བཤིགས་ནས་རྨ་ཁ་འཚེམ་པ་དང་འདྲ།
མོའི་སེམས་ཀྱི་རྨ་ཁ་ཐོག་མ་ནི་བཀྲ་ཤིས་དོན་འགྲུབ་ཀྱིས་བཞག་པ་ཡིན་ལ། མོའི་ལུས་ཀྱི་རྨ་ཁ་ཐོག་མའང་བཀྲ་ཤིས་དོན་འགྲུབ་ཀྱིས་བཏོད་པ་ཡིན། བཀྲ་ཤིས་དོན་འགྲུབ་ནི་མོའི་རྨ་ཁ་ཐམས་ཅད་ཀྱི་བདག་པོ་ཡིན་མོད། ཁོ་དང་བྲལ་ནས་ལོ་ཕྱེད་ཙམ་འགོར་དུས་འདིར། ཁོའི་བདག་དབང་ཡོད་ཚད་ཟླ་བར་དབང་ཡོད། ད་ནི་ཁོ་ལ་ཐོབ་མྱོང་བའི་བརྩེ་དུངས་ཟབ་མོའང་ཟླ་བའི་ཡིན་པས། མོའི་ལུས་ཀྱི་རྨ་ཤུལ་ལ་ཟླ་བས་རེག་མྱོང་མེད་ནའང་། མོའི་སེམས་ཀྱི་རྨ་ཤུལ་ཡལ་ལ་ཉེ་དུས། ལས་བསམ་སར་མི་འགྲོ་གསེག་སར་སོང་ནས་སྐྱིད་སྡུག་ཏུ་གྱུར་ནས་རྨ་ཁ་བཟོས་སོང་བ་ལས་དབང་གི་ཀུ་རེ་ཡིན་ནམ། མཚོ་མོས་ཡང་དང་བསྐྱར་དུ་ཁ་པར་ལག་ཏུ་བླངས་ནས་ཟླ་བའི་QQབསྐྱར་དུ་སྣོན་རྩིས་བྱས་མོད། འགྱོད་གདུང་དང་ཡི་ཆད་ཀྱི་འཕྲོག་རྩོད་བར་ནས་ལས་ཀྱི་བགྱི་བ་ཅི་ཡང་སྤེལ་མ་ནུས།
ཟླ་བ་དང་འགྲོགས་པ་ནས་བཟུང་། ཡང་ན་ཟླ་བ་ངོ་ཤེས་པ་ནས་བཟུང་། མཚོ་མོས་ཟླ་བས་བསྐུར་བའི་སྐད་ཆ་རེ་རེ་དང་ཟླ་བས་བསླངས་པའི་དགའ་སྤྲོ་རེ་རེས། བརྩེ་དུངས་ཀྱི་རྨ་ཁ་གསོས་ཤིང་གྱེས་བྲལ་གྱི་སྡུག་བསྔལ་སུབ་ནས་འགྲོ་བ་ཚོར་ལ། སུབ་ནས་འགྲོ་ཐེངས་རེ་རེར་མཚོ་མོའི་སེམས་ལ་བརྩེ་དུངས་ནི་མ་གཞི་ནས་བཀྲ་ཤིས་དོན་འགྲུབ་ཀྱི་སྤྱོད་པ་དེ་ལྟར་འཚབ་འཚུབ་གོ་རིམ་མེད་པ་ཞིག་མིན་པར་ཟླ་བའི་བག་ཡོད་ཀྱི་སྤྱོད་པ་འདི་ལྟར་འདྲིས་ཆེ་བ་ཞིག་ཡིན་པར་བསམས། ཟླ་བ་དང་འབྲེལ་འདྲིས་བྱེད་པའི་བརྒྱུད་རིམ་ཁྲོད་མཚོ་མོའི་ཡིད་ལ་བབས་ཤིང་བློ་ལ་རན་པའི་སྣང་ཚུལ་ཞིག་ཡོད་པ་ནི། ཟླ་བ་དང་རང་ཉིད་འབྲེལ་འདྲིས་བྱས་ནས་ཡུན་རིང་འགོར་ནའང་ངོ་ཐུག་མེད་པ་དེ་རེད་ལ། ཡང་ན་དུས་ཡུན་རིང་བོ་ཞིག་ལ་ཟླ་བ་དང་ངོ་མ་ཐུག་པ་དེ་ཡིན་མོད། ད་ནི་འབྲེལ་ལམ་ཡོངས་རྫོགས་རྩ་ནས་ཆད་དེ་གཏན་དུ་ངོ་ཐུག་མ་ཐུབ་གྱུར་བས། མོའི་བསམ་བློ་ལའང་འགྱུར་ལྡོག་བྱུང་སྟེ། སྔོན་ཞིག་ནས་ཟླ་བར་ངོ་ཐུག་ཡོད་ན་ཅི་མ་རུང་སྙམ། ཇ་ཁང་ནང་ནས་གོང་ཞོལ་བྱས་ནས་འདུག་དུས་དང་སློབ་ཁང་བར་ནས་སྔ་གཞུག་བྱས་ནས་འགྲོ་དུས་རང་འགུལ་གྱིས་ཁོ་ལ་ཁ་གྲགས་ཡོད་ན་ཅི་མ་རུང་སྙམ།ཡིན་ཡང་། དེ་དུས་དེ་ལྟར་ཁ་མ་གྲགས་པ་ནི་སྙིང་དུ་སྡུག་ཅིང་ཡིད་དུ་འོང་སྟེ། ཟླ་བས་མོའི་གར་འགྲོ་གར་འདུག་མིག་གིས་འཚོས་ནས། མོ་ལ་ལྭ་བའི་ཁ་དོག་མཛའ་མིན་དང་ཟས་ཀྱི་གདམ་གསེས་ཅི་ཡིན་སོགས་འདྲི་ལ། ད་དུང་ཟ་མ་ཟ་དུས་སུ“ཟ་མ་ཞིམ་པོ་ཞིག་ཟོ། དེ་རིང་གི་ནམ་ཟླ་ཧ་ཅང་དྲོ་བས་ཐུག་འཁྱག་ཅིག་བཟས་ན་ལྷག་ཏུ་ཞིམ་སྲིད”ཅེས་བསྐུར་མྱོང་། དཔེ་ཆ་ཀློག་དུས་སུ“ངས་ཀྱང་ཁྱོད་ཀྱིས་ཀློག་བཞིན་པའི་སྒྲུང་རིང་རོ་མེ་འོ་དང་ཀྲའུ་ལེས་ཡེ་ཀློག་བཞིན་ཡོད། ཧ་ཅང་ཡག་པོ་འདུག”ཅེས་བསྐུར་མྱོང་། སྲང་ལ་ཉུལ་དུས་སུ“དེ་རིང་ང་ཡང་ཁྱོད་ཀྱིས་བཤད་པའི་ཁོ་ཧྥེ་ཁང་དེར་ཕྱིན་པ་ཡིན། ནང་གི་བཀོད་པ་ལེགས་པས་བག་ཡངས་མོ་རང་བྱུང་། བཀའ་དྲིན་ཆེ།”ཞེས་བསྐུར་མྱོང་། བརྙན་ལ་ལྟ་དུས་སུ“ཁྱོད་ཀྱིས་ཀྱང་གློག་བརྙན་ཐེ་ཐན་ཉིའུ་ཁུ་ལ་ལྟོས་དང་། ཧ་ཅང་ཡག་པོ་འདུག”ཅེས་བསྐུར་མྱོང་། ཡུལ་དུས་གང་ཞིག་ཏུ་བྱ་བ་ཅི་ཞིག་སྒྲུབ་ནའང་ཟླ་བས་བསྐུར་བའི་ཡིག་འབྲུ་རེ་རེ་མོའི་དགའ་ཡ་སྐྱོ་རོགས་སུ་གྱུར་ཡོད། ཐ་ན་སློབ་ཁྲིད་ཀྱི་སྐབས་སུའང་མོས་ཟླ་བ་ལ་QQའཕྲིན་ལམ་བརྒྱུད་ནས་ཡི་གེ་སྐུར་རེས་བྱས་པ་ཐེངས་གཅིག་མིན། དེ་བས་ཟླ་བ་དང་འབྲེལ་འདྲིས་བྱེད་སྟངས་ནི་བལྟས་ན་ཉེ་ཉེ་འདྲ་བའི་སྣང་བ་ཞིག་ཤར་ཡང་། ད་ནི་བསམས་ན་ངོ་ཡང་མི་ཤེས་རྒྱུས་མེད་དུ་གྱུར་སོང་།
མཚོ་མོའིQQའཕྲིན་ལམ་ལ་ཟླ་བ་ཤར་བ་ནས་བཟུང་། མཚོ་མོའི་འཇིག་རྟེན་ནི་ཞི་འཇགས་བག་ཡངས་ཀྱི་མཚན་མོ་ཞིག་ཡིན་ཞེས་བཤད་ཆོག ཟླ་བ་དང་འབྲེལ་འདྲིས་བྱུང་བ་ནས་མོ་སླར་ཡང་སློབ་གྲྭའི་ཕྱི་རོལ་ན་གླས་པའི་ཁང་མིག་འདི་ལ་འདང་ཇེ་ཡོད་དང་རྩིས་ཇེ་ཆེ་རུ་གྱུར། ཁང་མིག་འདིས་ནི་རྨ་ཤུལ་ཞིག་ལྟར་མོ་ལ་ན་ཟུག་ཟབ་མོ་དང་འདས་དོན་མང་བོ་དྲན་པར་བྱེད་པས། བཀྲ་ཤིས་དོན་འགྲུབ་དང་ཁ་བྲལ་བ་ནས་བཟུང་། ཁང་མིག་འདི་ཟླ་ཕྱེད་ཙམ་ལ་སྟོང་བར་ལུས་ཤིང་། མཚོ་མོས་ནང་སེམས་ཀྱི་སྐྱོ་གདུང་མཐའ་དག་བརྗེད་དུ་མེད་ཀྱང་བརྗེད་པར་སྣང་ནས་ཟླ་བས་བསྐུར་བའི་ཡིག་འབྲུ་རེ་རེ་བརྩེ་བས་ཀློག་བཞིན་སླར་ཡང་ཁང་མིག་འདི་ལ་བག་ཆགས་གསར་བ་ཞིག་བསྒོས་ཤིང་། སླར་ཡང་ཁང་མིག་འདི་རང་འདུ་ཤེས་གསར་བ་ཡིས་གཡོགས་ནས། ཡང་དང་ཡང་དུ་སློབ་གྲྭའི་མལ་ཁང་དུ་མ་བསྡད་པར་ཕྱི་ལ་ཡོང་། ཕྱི་ཡི་ཁང་མིག་འདི་ལས་གཞས་ལ་ཉན་ནས་སྲང་ལ་གཡེང་ཞིང་། མལ་མ་འཛུལ་ནས་དེབ་ལ་ཉུལ་ཞོར་འཕྲིན་ལམ་གྱི་ཟླ་བའི་ཕྱོགས་ལ་སྙིང་གཏམ་གྱི་ཡི་གེ་མང་བོ་དང་སེམས་མཚོན་གྱི་པར་རིས་སྣ་མང་ཕར་བསྐུར་ཚུར་བསྐུར་བྱས། དེ་ལྟར་ཁང་མིག་འདི་ལ་བདེ་སྐྱིད་ཀྱི་དྲོད་སྣང་འཁྱིལ་ནས་ལོ་ཕྱེད་ལྷག་ལས་མ་འགོར་བའི་དེ་རིང་གི་དུས་ལ། མཚོ་མོའི་ལྷིང་འཇགས་ཀྱི་མཚན་མོ་འཇགས་ཐབས་བྲལ་བས། མོས་ཡང་དང་ཡང་དུ་ཟླ་བས་ཅིའི་ཕྱིར་ང་ལ་འབྲེལ་ཐག་བཅད་པ་ཡིན་ནམ་སྙམ། ཟླ་བ་ནི་ཞེ་སྡང་གི་སྤྲིན་གྱིས་བསྒྲིབས་པ་ལྟར་གནས་སྐབས་ཙམ་ལ་མི་སྣང་བར་གྱུར་ནའང་། ཉིན་གཅིག་གཉིས་ཤིག་གི་རྗེས་ནས་མཐོང་ལམ་གྱི་སྤྲིན་བར་ནས་འཛུམ་སྟེ་གཏམ་གྱི་འོད་སྣང་བསིལ་བསིལ་གཏོར་འོང་བ་ཁོ་ཐག་ཡིན་སྙམ་ཞིང་། དེ་ལྟར་བསམ་བཞིན་དེ་ལྟར་ཡང་མིན་པ་འདྲ་བས། མོས་སྐྱེས་པ་དག་ལ་དངོས་གནས་བློ་གཏད་མི་འདུག་བསམས། ཤིང་གི་མལ་ཁྲི་ལས་མགོ་བོ་རུམ་ལ་བཏུམས་ནས་ཕར་འཁོར་ཚུར་འཁོར་བྱེད་ཐེངས་རེར་མོས་ཟླ་བས་བཤད་པ་བདེན་ནམ། བཀྲ་ཤིས་དོན་འགྲུབ་ཀྱིས་ངེད་གཉིས་ཀྱིས་འབྲེལ་འདྲིས་བྱེད་ཀྱིན་པ་ཤེས་ཡོད་དམ། བདེ་སྐྱིད་སྒྲོལ་མས་ཀྱང་ཤེས་ཡོད་པ་ཁོ་ཐག་རེད། ཟླ་བས་ང་ལ་འབྲེལ་འདྲིས་བྱེད་ཀྱིན་པ་མི་གཅིག་ལའང་བཤད་མེད་པ་བདེན་ན། ངས་ཀྱང་མི་གཅིག་ལའང་ཤེས་སུ་བཅུག་མེད་པས། ཁོ་གཉིས་ཀྱིས་ཅི་ལྟར་ཤེས་པ་ཡིན་ནམ་ཞེས་ཡིད་གཉིས་ཐེ་ཚོམ་གྱི་དབང་དུ་གྱུར་ནས་ཡུན་རིང་འགོར་རྗེས། གློ་བུར་དུ་ཕྱིར་དྲན་འཐིབས་པའི་ཁང་མིག་འདི་ལས་གཉིད་ཐབས་བྲལ་ཞིང་སུན་སྣང་འགོག་པར་དཀའ་བ་ཞིག་སྐྱེས་པས་ཁ་པར་ལག་ཏུ་བླངས་ཏེ་བལྟས་པ་ན། ཏག་ཏག་ཆུ་ཚོད་དགུ་རེད། སློབ་གྲྭའི་མལ་ཁང་གི་སྒོ་བརྒྱག་པར་ད་དུང་ཆུ་ཚོད་ཕྱེད་ཙམ་འདུག མོ་མལ་ལས་ལངས་ནས་སློབ་གྲྭར་ལོག་རྩིས་བྱས།
སློབ་གྲྭ་ཆེན་མོའི་ནང་ནས་ལོ་ངོ་གསུམ་ལྷག་འགོར་ལ་ཉེ་དུས་འདིར། མོས་གྲོང་ཁྱེར་འདིའི་བོད་ཡིག་ཚགས་པར་ཁང་དུ་དངོས་སྦྱོང་བྱེད་བཞིན། ལན་རེར་ཕྱི་རུ་གླས་པའི་ཁང་མིག་ཏུ་བསྡད་ཅིང་། ལན་རེར་སློབ་གྲྭའི་མལ་ཁང་དུ་ལོག་བཞིན་ཡོད། མོའི་འཇིག་རྟེན་གྱི་འགྱུར་ལྡོག་ཡོད་ཚད་དངོས་སྦྱོང་བྱས་པ་ནས་མགོ་བརྩམས་པ་མ་ཡིན་པར་ཁང་བ་འདི་གླས་པ་ནས་མགོ་བརྩམས་པ་འདྲ་ལ། ཁང་བ་འདི་གླས་པ་ནས་བཟུང་། བཀྲ་ཤིས་དོན་འགྲུབ་དང་འབྲེལ་འདྲིས་ཇེ་ཟབ་ཏུ་གྱུར་ཞིང་། ཁོའི“ངས་ཁྱོད་ལ་ཅི་ཡང་མི་བྱེད། སྐྲག་མི་དགོས།”ཞེས་ཁང་མིག་འདིར་འཛུལ་ཐེངས་རེ་རེས་མངོན་མེད་ཀྱི་ཨུ་ཚུགས་རིགས་ཤིག་གིས་ཁོ་གཉིས་བཅུམས་ནས་ཡོང་བ་ལྟར། མོའི་བརྩེ་དུངས་ཀྱི་རང་ཚུགས་དབང་མེད་དུ་འཕྲོག་སོང་ལ། མོའི་ལང་ཚོ་ཡི་མེ་ཏོག་དབང་མེད་དུ་བཅོམས་སོང་། དེ་ལྟར་ན་ཟུག་དང་བརྩེ་བ་ནི་ཨུ་ཚུགས་དང་སྟེས་དབང་ལས་སྐྱེས་པས། མོས་འགྱུར་ལྡོག་སྐྱེན་པའི་དགའ་སྐྱོ་མང་བོ་དང་ལྷན་དུ་རང་ཉིད་བུད་མེད་ཅིག་ཡིན་པར་ངོས་འཛིན་ཐོབ། བྱ་དངོས་མང་བོ་ཞིག་ལ་བཟུང་བའི་རྣམ་འགྱུར་ཡོད་ཚད་བག་ཡངས་སུ་གྱུར། དེ་ནི་མོའི་ཚོར་བ་རྣོན་པོ་དང་དངངས་སྐྲག་འཚེར་པོ་གཞན་གྱི་ལག་ཏུ་ཤོར་བས་ཡིན་སྲིད། བཀྲ་ཤིས་དོན་འགྲུབ་ཀྱིས་བསླངས་པའི་བརྩེ་དུངས་ཀྱི་ན་ཟུག་ཟབ་མོས་མོ་ལ་བག་ཆགས་ཟབ་མོ་དང་རེ་བ་ཆེན་པོ་བྱིན་མོད། ཁོའི“ངས་ཁྱོད་ཐེངས་དང་པོ་ཡིན་པ་ཡིད་ལའང་མ་ཤར”ཞེས་པའི་སྐད་ཆ་དེ་ལས་རྨི་ལམ་གྱི་སྨུག་པས་གཡོགས་པའི་དངོས་ཡོད་ཀྱི་གཟུགས་བརྙན་ཇེ་གསལ་ཇེ་གསལ་ངང་བཀྲ་ཤིས་དོན་འགྲུབ་ཀྱི་དམིགས་ཡུལ་བསླངས་ལ་བུད་ཅིང་། བཀྲ་ཤིས་དོན་འགྲུབ་ཀྱིས་བསླངས་པའི་དགའ་སྐྱོ་ཐམས་ཅད་བཏང་སྙོམས་སུ་གྱུར་ནས། མཚམས་ཤིག་ལ་ཁོ་གཉིས་ཀྱི་འབྲེལ་བ་ཅི་ཞིག་ཡིན་པའང་མི་ཤེས་པར་གྱུར། སྐབས་ཤིག་ལ་ཁོ་གཉིས་ལ་གཞི་ནས་འབྲེལ་བ་ཅི་ཡང་མེད་པར་གྱུར།
སྤྱིར་བཏང་དུ་ཟླ་བར་འབྲེལ་འདྲིས་བྱས་པ་ནས་བཟུང་། མོས་བཀྲ་ཤིས་དོན་འགྲུབ་གཏན་བརྗེད་དུ་གྱུར་ཡོད་ཅེས་བཤད་ཆོག་མོད། ཟླ་བས་གློ་བུར་དུ་འབྲེལ་ཐག་བཅད་པ་འདིས་མོ་ལ་ཡང་དང་ཡང་དུ་སྐྱེས་པ་དག་ལ་བློ་གཏད་མི་འདུག་ཨང་འདོད་དུ་བཅུག དེ་ལྟར་འདོད་ཀྱིན་བཀྲ་ཤིས་དོན་འགྲུབ་དང་འབྲེལ་བའི་འདས་དོན་མང་བོ་ཡིད་ལ་ཡང་ཡང་ཤར། མོ་ནི་རང་གི་དྲན་པ་རྒོད་པོའི་འཚུབ་ཆས་འདེད་པ་ལྟར་གོམ་སྟབས་མགྱོགས་པོས་སློབ་གྲྭའི་ཕྱོགས་སུ་སོང་།
ཁང་མིག་ལས་ཕྱི་ལ་བུད་རྗེས། སྲང་ལམ་གྱི་འདུ་འཛི་དང་འཕྲུལ་ཆས་ཀྱི་འུར་ཟིང་གིས་རྒྱང་དུ་ཤོར་བའི་དྲན་པ་རྒོད་པོ་མཐོང་སྣང་གི་གཟུགས་བརྙན་དུ་སྡུད་པར་བྱེད་ལ། དེ་ནི་བར་སྣང་དུ་འཕུར་བའི་ཤོག་བྱ་ཞིག་རྟོད་ཐག་ཕྲ་མོས་དལ་བ་དལ་བུར་ཚུར་ལ་འཐེན་པ་དང་འདྲ། མོས་དྲན་པ་མཐའ་དག་ཚུར་ལ་བསྡུས་རྗེས། ལམ་འགྲམ་གྱི་ཚོང་ཁང་དག་ལ་མིག་གཡེང་བྱེད་ཞོར་སོང་། ཕྲེང་བར་བསྟར་བའི་ཚོང་ཁང་དང་མགྲོན་ཁང་། དྲ་ཁང་། ཁོ་ཧྥེ་ཁང་སོགས་ཀྱི་སྒོ་མོ་རེ་རེ་གློག་འོད་ཀྱིས་བརྒྱན་པའི་སྒོ་བྱང་རེ་རེའི་འོག་ཏུ་ཁྲ་ལམ་མེར། འུར་ཟིང་དང་འདུ་འཛི་ལ་གོམས་པའི་བབ་ཆགས་ཀྱི་རྣམ་པ་ཞིག་མངོན་འདུག སྒོ་བྱང་རེ་རེ་གྲལ་བསྒྲིགས་ནས་མོའི་སྔུན་ནས་རྒྱབ་ལ་ཡལ་ཐེངས་ཤིག་ལ། མིག་ལམ་དུ་སྒེག་ལྡན་མའི་སྐྲ་གཞར་ཁང་ཞེས་པ་མངོན་བྱུང་།
མོས་དེ་རིང་སྔ་དྲོར་ཟླ་བར་ཁ་ཆད་ཐེངས་གཉིས་པ་བཏབ་སྟེ། ཉིན་གུང་ཆུ་ཚོད་གཅིག་གི་ཐོག་ཏུ་སློབ་གྲྭའི་ལུས་རྩལ་ར་བ་ནས་ངོ་ཐུག་རྒྱུ་བྱས་རྗེས། དགའ་སྤྲོ་དཔག་མེད་ངང་མལ་གྲོགས་དག་ལ་ལྭ་བ་གང་ཞིག་མཛའ་མིན་ལྟ་རུ་བཅུག་ནས་ཚུགས་ཀ་འདྲ་མིན་དང་ཁ་དོག་སྣ་ཚོགས་ཀྱི་གོན་པ་མང་བོ་ཡང་ཡང་བརྗེས་མཐར། མོས་སྔོན་ཤིག་ལ་ཟླ་བས“ཁྱོད་ཀྱིས་དེ་རིང་གོན་ཡོད་པའི་མདོག་གློ་ཁ་ཅན་གྱི་ལྭ་བ་དེ་ཧ་ཅང་ཡག་པོ་འདུག དངོས་གནས་མཛེས་མ་རང་རེད”ཅེས་བསྐུར་བ་དྲན་པས་ལྭ་བ་གློ་ཁ་དེ་གོན་ནས་མེ་ལོང་མདུན་ནས་ཕར་འཁོར་ཚུར་འཁོར་དང་གཡས་ལྟ་གཡོན་ལྟ་བྱས་ཤིང་། སྐྲ་ཚུགས་བརྗེ་དགོས་བསམས་ཏེ་སྒེག་ལྡན་མའི་སྐྲ་གཞར་ཁང་ཞེས་པ་འདིར་ཡོང་བ་རེད། ད་ནི་སྐྲ་གཞར་ཁང་འདི་མཐོང་མ་ཐག མོ་ནི་རང་ཉིད་ལ་ངོ་གནོང་བ་ལྟར། དགོད་ཙམ་བྱས་སོང་། ཤ་སྐྱི་དང་སེམས་པ་འགུལ་ཙམ་བྱས་པ་ན་མིག་ཟུང་ལ་ཆུ་རིས་སྲབ་བུ་ཞིག་འཁོར་ཞིང་འཁོར་བས། མོས་གོམ་པ་སྔུན་ལ་སྤོ་ཞོར་དུ་མགོ་བོ་ཡར་ལ་དགྱེ་ནས་ནམ་མཁར་བལྟས། ནམ་མཁའ་ནི་ནག་རོག་གེར་མུན་པས་གཡོགས་ཤིང་། གྲོང་ཁྱེར་གྱི་འོད་སྣང་མོག་པོའི་ཕ་རོལ་ན་རྔམ་ཆེན་པོས་འཐིབས་འདུག་པས་ནི། ཚུར་ནས་ཚུར་ལ་བཅུམས་ནས་ཡོང་བ་དང་འདྲ། ཟླ་བ་དང་སྐར་མའི་ཤུལ་ཙམ་ཡང་མཐོང་རྒྱུ་མེད་པས། མཚོ་མོའི་སེམས་པ་སྔར་ལས་ལྷག་པར་སྐྱོ་དུབ་པར་གྱུར།
མོས་འགྲོ་ཞོར་དུ་མགོ་བོ་སྒུར་ནས་ཟླ་བའིQQདབུ་བརྙན་གྱི་སྟེང་ནས་དལ་བུར་མནན་པ་ན། དྲ་མིང་ལ་མཚོ་མོའི་ཟླ་བ་རུ་བཏགས་ཡོད་པའི་ཟླ་བའི་QQཡི་མིང་སྐད་ཅིག་ལ“མུན་པ་འཇམ་པོ”ཞེས་པའི་ཡིག་འབྲུ་བཞི་རུ་གྱུར་སོང་། ད་དུང་དྲ་མིང་འདིའི་གཤམ་ན“ང་ནི་ཁྱོད་ཀྱི་མཚོ་ལ་ལྷུང་བའི་ཟླ་བ་དེ་ཡིན།”ཞེས་པའི་ཚིག་ཐུང་དེའང་མུན་པར་ཡལ་བའི་སྐར་མ་ཞིག་ལྟར་གར་སོང་ཆ་མེད་དུ་གྱུར་ནས་ཤུལ་དུ“ང་ནི་ཁེར་རྐྱང་གི་མུན་པ་འཇམ་པོ་ཞིག་ཡིན”ཞེས་ཤར་འདུག
ཟླ་བས་དངོས་གནས་མོ་ལ་འབྲེལ་ཐག་བཅད་པ་འདྲ། ད་ནི་མཚན་མོ་འདི་ལྟར། ནམ་མཁའ་འདི་ལྟར། མཚོ་མོའི་མཐོང་ལམ་ནས་ཟླ་བ་ནི་རྒྱང་རིང་བ་ལ་ཨང་།
༣
“ངས་ཀྱང་དོན་མེད་དུ་མི་ཆ་མེད་ཅིག་གི་ཆེད་དུ་འདི་ལྟར་རྩོད་པ་བྱེད་མི་འདོད། བདེ་མོ་བྱོས། འུ་གཉིས་ཀྱི་སྐུད་ལམ་མཚམས་འདི་ནས་གཅད་འཇོག”
ཚིག་ཐུང་འདི་བསྐུར་མ་ཐག ཡ་ཆུང་ལ་སུན་སྣང་འགོག་ཏུ་མེད་པ་ཞིག་ཞེ་སྡང་གིས་དེད་དེ་ཡོང་བས། ཟླ་བས་འདང་རྒྱག་སྤུ་ཙམ་མེད་པར་མཚོ་མོའིQQཐད་ཀར་བསུབས་སོང་།
མཚོ་མོའི་ཡིད་མ་ཆེས་པའི་རྣམ་འགྱུར་རེ་རེས་ཁོ་ལ་བདེ་སྐྱིད་སྒྲོལ་མ་དྲན་དུ་བཅུག་ལ། བདེ་སྐྱིད་སྒྲོལ་མས“གོ་ཐོས་ལྟར་ན་ཁྱོད་ནི་སྐྱེས་པ་བློ་གཏད་མེད་པ་ཞིག་རེད་ཟེར”ཞེས་བཤད་པ་དྲན།
ཟླ་བ་མཚོ་མོའི་པང་ལ་ལྷུང་ནས་ལོ་ཕྱེད་ཅིག་འགོར་སོང་། ཡང་ན་མཚོ་མོས་བསྐུར་བའི་པར་རིས་དང་ཡི་གེ་ཁ་པར་དུ་ཉར་ནས་ལོ་ཕྱེད་ཅིག་འགོར་སོང་། ལོ་ཕྱེད་ཅིག་འགོར་ནའང་ཟླ་བས་མཚོ་མོའི་གཟུགས་བརྙན་ཙམ་ལས་མོའི་གཤིས་རྒྱུད་ཀྱི་ཞི་འཇམ་མྱོང་སྐལ་མ་བྱུང་ལ། ལོ་ཕྱེད་ཅིག་འགོར་ནའང་མཚོ་མོས་ཟླ་བའི་གཟུགས་བརྙན་ཙམ་ལས་ཁོའི་ངོ་གདོང་གི་བསིལ་ཟེར་མྱོང་ཐབས་མ་བྱུང་།
ཟླ་བ་ནི་ཡག་ཕོ་སྒོ་དང་གཟུགས་སྐྱེ་ལུས་ལྡན་པའི་གསར་བུ་སྙིང་རྗེ་ཞིག་སྟེ། ཁོའི་ཤ་མདངས་དཀར་ཚུལ་དང་ཁ་མིག་རན་ཚུལ་གྱིས་མོ་བརྒྱའི་སེམས་པ་འཕྲོག་ཅིང་ཕོ་བརྒྱར་སྙིང་རླུང་བསླངས་མྱོང་། ཁོའི་ལུས་དང་གཟུགས་གཞི་ཡག་པོ་དར་སྲོལ་གསར་མའི་གྱོས་གོས་རེ་རེས་བརྒྱན་ཐེངས་རེར་བརྙན་འཕྲིན་ནང་གི་སྐར་ཆེན་དེ་དག་ལྟར་སྙིང་དུ་སྡུག་པས། སློབ་ཆེན་འདིའི་སྒོ་ཐེམ་བརྒལ་བ་ནས་བཟུང་། བུ་མོ་གང་མང་ཞིག་གིས་ཁོ་ལ་འཕྲིན་ཡིག་བསྐུར་ཞིང་ཁ་པར་བཏང་ནས་འབྲེལ་འདྲིས་བྱས་མྱོང་། ཁོས་བུ་མོ་གང་མང་ཞིག་གིས་ཚུར་ལ་བསྟན་པའི་རྣམ་འགྱུར་རེ་རེ་སྣང་མེད་དུ་མ་བཞག་པར་བསྟུད་མར་བུ་མོ་བཞི་ལ་དགའ་རོགས་བསྒྲིགས་ཤིང་ལུས་འབྲེལ་བྱུང་བས། སློབ་རའི་བུ་མོ་དག་གི་ཁྲོད་དུ“ཟླ་བ་ལ་བློ་གཏད་མེད”ཅེས་གྲགས། དེ་ལྟར་གྲགས་པས། ཚུར་ལ་འབྲེལ་འདྲིས་བྱེད་པའི་བུ་མོ་གཅིག་ཀྱང་མ་བྱུང་། བདེ་སྐྱིད་སྒྲོལ་མ་དང་མཚོ་མོ་གཉིས་ནི་ཁོས་རང་ཉིད་ཀྱི་འདོད་པ་ལྟར་འབྲེལ་འདྲིས་བྱས་པའི་དགའ་རོགས་གཉིས་ཡིན། མྱི་ཁ་དེའི་དབང་གིས་ཁོ་དང་བདེ་སྐྱིད་སྒྲོལ་མའི་འབྲེལ་བ་ནི་མིང་ཙམ་དུ་གྱུར་ལ། ཁོ་དང་མཚོ་མོའི་འབྲེལ་བའང་ད་ནི་མིང་ཙམ་དུ་གྱུར་སོང་།
རང་གིས་བསམ་པ་རྣམ་དག་གིས་ཕར་ལ་འབྲེལ་འདྲིས་བྱེད་དུས། ཕ་རོལ་བོ་ཡིད་མི་ཆེས་པའི་རྣམ་འགྱུར་གྱིས་རྒྱང་ལ་འགྱེད་པ་ནི་སྙིང་ལངས་སྤྱད་ཅིག་རེད་ཨང་། ཟླ་བས་མཚོ་མོའིQQདང་མོས་བསྐུར་བའི་ཡི་གེ་མང་བོ་དང་ལྷན་དུ་མངོན་མེད་ཤུལ་མེད་དུ་བཟོས་རྗེས། བུད་མེད་ནི་མ་གཞི་ནས་རྩེད་ཆས་བྱེད་རྒྱུ་དག་དག་རེད་ཨང་སྙམ། མཚོ་མོའིQQབསུབས་ཚར་ནའང་། མཚོ་མོའི་ཟླ་བ་རུ་བཏགས་པའི་ཁོའི་QQདྲ་མིང་གི་ཡིག་འབྲུ་རེ་རེས་ཁོ་ལ་ཁོང་དགོད་ཅིག་ཤོར་དུ་བཅུག་ལ། དེ་ནི་ཡི་ཆད་པའི་དངན་པ་ཐུང་ངུ་ཞིག་དང་འདྲ་བྱུང་།
ཟླ་བའི་མལ་ཁང་དུ་ལ་ལས་གློག་བརྙན་ལ་ལྟ་བཞིན་འདུག་ལ། ལ་ལ་རོལ་རྩེད་ལ་གཡེང་འདུག ལ་ལ་མལ་ལ་ལོག་ནས་གཉིད་ལ་ཡུར་འདུག ཟླ་བའང་མལ་ལ་ལོག་ནས་གཡས་འཁོར་གཡོན་འཁོར་ངང་འདང་མང་བོ་ཞིག་བརྒྱབ་རྗེས། རང་གི་དྲ་མིང་མུན་པ་འཇམ་པོར་བརྗེས་ལ། དྲ་མིང་གཤམ་གྱི“ང་ནི་མཚོ་ལ་ལྷུང་བའི་ཟླ་བ་དེ་ཡིན”ཞེས་པའི་ཚིག་ཐུང་དེའང“ང་ནི་ཁེར་རྐྱང་གི་མུན་པ་འཇམ་པོ་ཞིག་ཡིན”ཞེས་པར་བརྗེས།ད་དུངQQབར་སྟོང་དུ“མཚོ་མོ་ཟླ་གཟུགས་རུམ་པའི་མཚོ་མོ་མ་རེད། ཟླ་བ་མཚོ་ལ་ལྷུང་བའི་ཟླ་བ་མ་རེད།”ཅེས་སྤེལ་མ་ཐག བདེ་སྐྱིད་སྒྲོལ་མས་དཔྱད་གླེང་གི་ཚུལ་དུ“དེ་ན་ཅི་རེད།”ཅེས་སྤེལ་བྱུང་། ཁོས་ཚིག་ཐུང་འདི་ལ་ལན་ཅི་ཡང་མ་སློག་པར། ཐད་ཀར་བདེ་སྐྱིད་སྒྲོལ་མའི་QQའཕྲིན་ལམ་དུ“མཚོ་མོ་ནི་སའི་གོ་ལའི་བརྩེ་དུངས་ཀྱི་མིག་ཆུ་རེད།”ཅེས་བསྐུར།
“ཁྱོད་ཀྱིས་རང་ཉིད་ཟླ་བ་ཡིན་པ་བརྗེད་པ་མ་ཡིན་ནམ།༼ཁོག་དགོད་ཀྱི་པར་རིས་ཤིག༽”
“ཁྱོད་ལ་མཚོ་མོ་དང་ངེད་གཉིད་ལ་འབྲེལ་བ་ཡོད་པ་སུས་བཤད་པ་ཡིན།”
“ཁྱོད་གཉིས་ཀྱིQQངས་སྦྲེལ་ཡོད་པས་དྲ་མིང་འདོགས་སྟངས་ལ་བལྟས་ཏེ་ཤེས་པ་ཡིན། མཚོ་མོའི་ཟླ་བ་གློ་བུར་དུ་མུན་པ་འཇམ་པོ་རུ་གྱུར་སོང་བ་ཅི་རེད།༼བགད་ནས་ཡོད་པའི་པར་རིས་ཤིག༽”
“ཅི་ཡང་མ་རེད། མཚོ་མོ་ལ་འབྲེལ་ཐག་བཅད་ཟིན།”
“ཁྱོད་འདི་དངོས་གནས་མགྱོགས་པ་ལ་ཨང་།”
“དེ་ཟེར་ན།”
“བུ་མོ་དག་དང་འབྲེལ་ཐག་བཅད་ན་མགྱོགས་པོ་ལ་ཟེར་བ་ཡིན།༼ཁོག་དགོད་ཀྱི་པར་རིས་ཤིག༽”
“ང་མགྱོགས་སོང་བ་མ་རེད། ཁྱོད་ཚོ་དལ་སོང་བ་རེད།”
“མཚོ་མོར་འབྲེལ་ཐག་གཅོད་དོན་ཅི་ཡིན།”
“ཁྱོད་དང་འདྲ་བར་མོས་ཀྱང་ང་བློ་གཏད་མེད་པ་ཞིག་ཏུ་བརྩིས་འདུག”
“བློ་གཏད་མེད་དུ་འཇུག་བྱེད་རང་གིས་བསྒྲུབས་པ་རེད། ང་ཚོ་ལ་ཁག་འགེལ་མ་བྱེད།”
“བློ་གཏད་མེད་དུ་འཇུག་བྱེད་ཁྱོད་ཚོ་རེད། བུད་མེད་དག་རེད། གལ་སྲིད་ངའི་འཇིག་རྟེན་ལ་བུད་མེད་ཁྱོད་ཚོ་མེད་ཚེ། ངའང་སྔར་བཞིན་བློ་གཏད་མེད་པ་ཞིག་ཏུ་ག་ལ་བརྩི། བརྩི་མི་སྲིད།”
“ཨོ། དེ་ན་བུད་མེད་དག་ལ་འབྲེལ་བ་མ་བྱ་རོགས། ངས་བལྟས་ན་ཁྱོད་བུད་མེད་མེད་ན་ཁེར་རྐྱང་ངང་འཚོ་ཐུབ་པའི་མི་མ་རེད།༼ཁོག་དགོད་ཀྱི་པར་རིས་ཤིག༽”
“འབྲེལ་བ་བྱེད་ཀྱིན་མེད། ངའི་QQནང་ན་ང་ལ་འབྲེལ་བ་བྱུང་ཟིན་པའི་བུད་མེད་གཅིག་གིQQཡང་མེད། གལ་སྲིད་གཅིག་ཡོད་ཚེ། ཁྱོད་ཡིན་སྲིད། ཁྱོད་ཅི་འདི་མེད་པར་ལུས་འདུག འུ་གཉིས་ཀྱི་བར་དུ་བྱུང་བའི་འབྲེལ་འདྲིས་ནི་དགའ་རོགས་ཀྱི་ཚུགས་ཀ་བཟུང་བའི་གྲོགས་པོའི་བར་གྱི་འབྲེལ་འདྲིས་དེ་ཙམ་ཡིན་པས་རེད།”
“བུད་མེད་དག་ལ་ཡིན་གཅིག་མིན་གཉིས་དགའ་རོགས་བསྒྲིགས་ནས་ལུས་འབྲེལ་བྱ་དགོས་དོན་ཅི་ལ་ཡོད། གྲོགས་པོ་བསྒྲིགས་ནའང་ལོས་ཆོག ངས་འུ་གཉིས་ཀྱི་བར་ལ་དོན་དག་ངན་པ་ཅི་ཡང་བྱུང་དུ་འཇུག་མི་འདོད་ལ། ཕན་ཚུན་ལ་སེམས་ཀྱི་རྨ་ཁ་ཅི་ཡང་བཟོ་མི་འདོད་པས། འབྲེལ་བ་འདི་བཟུང་བ་ཡིན།”
“ཡ་ཡ། སེམས་པ་སེམས་ཀྱིས་ཤེས་ཡོད། འུ་གཉིས་གྲོགས་པོ་བཟང་བོར་འགྱུར་བར་སྨོན།”
“ཡ་ཡ། མཚོ་མོ་ནི་བུ་མོ་བཟང་བོ་ཞིག་རེད། རྩོད་རྒྱུ་ཆེན་པོ་མེད་ན་འབྲེལ་ཐག་མ་བཅད་ན་བཟང་སྙམ།”
“ཡ་ཡ། ཤེས་སོང་། ང་ལ་གཉིད་འབབ་ཀྱིན་འདུག གནས་སྐབས་སུ་བདེ་མོ་བྱོས།སང་ཉིན་འཕྲད།”
“གཟིམ་ས་བདེ།”
ཟླ་བས་ཀྱང་གཟིམ་ས་བདེ་ཞེས་བསྐུར། བསྐུར་ནས་ཅང་མ་འགོར་བར། ཁོས་རང་གི་ཡིད་ན་ད་དུང་དྲི་བ་གཅིག་ལྷག་འདུག་པ་ཤེས་པས། མྱུར་དུ་བདེ་སྐྱིད་སྒྲོལ་མར་འདི་ལྟར་བསྐུར།
“སྐུད་ལམ་ན་ཨེ་ཡོད། ང་ལ་ད་དུང་འདྲི་རྒྱུ་ཞིག་འདུག ཁྱོད་ཀྱིས་མཚོ་མོ་དང་ངེད་གཉིས་ཀྱིས་སློབ་ཁང་གི་བར་ཁྱམས་ན་ཁ་ཆད་བཏབ་ཡོད་པ་ཅི་ལྟར་ཤེས་པ་ཡིན།”
“ངས་ཅི་ཡང་མ་ཤེས། ཉིན་མོ་དེར་ངས་ཁྱོད་སློབ་ཁང་གི་བར་ཁྱམས་ན་མཚོ་མོའི་ཕྱོགས་སུ་འགྲོ་བཞིན་པ་མཐོང་བྱུང་། མཚོ་མོས་འུ་གཉིས་ཀྱི་འབྲེལ་བ་ཤེས་ཡོད་པ་འདྲ། དོགས་མི་བདེ་བའི་ངང་ངའི་གདོང་ལ་བལྟས་པས། ངས་ཀྱང་འགྲོ་ཞོར་དུ་མོ་ལ་བལྟས་ནས་འཛུམ་ཙམ་བྱས་པ་ཡིན། ཅི་རེད། མཚོ་མོ་དང་འབྲེལ་ཐག་གཅོད་དོན་ང་ལ་འབྲེལ་བ་ཡོད་དམ། ཡོད་ན་ང་དངོས་སུ་སོང་ནས་མོ་ལ་འགྲེལ་བཤད་བྱས་ཆོག”
“མེད། མེད། དེ་འདྲ་ཞིག་མ་རེད། ངས་སྟེས་དབང་མ་རེད་བསམས་སོང་། རང་དགར་དྲིས་པ་ཡིན། དོན་དག་ཅི་ཡང་མེད། གཟིམ་ས་བདེ།”
ཟླ་བས་ཁྱོད་ཀྱིས་ངེད་གཉིས་ཀྱིས་ལུས་རྩལ་ར་བ་ན་ཁ་ཆད་བཏབ་ཡོད་པ་ཇི་ལྟར་ཤེས་པ་ཡིན་ཞེས་འདྲི་བསམས་མོད། དེ་ལྟར་མ་དྲིས་པར་སླར་ཡང་གཟིམ་བདེ་ཞུས་རྗེས། མཚོ་མོ་དེ་འདྲའི་དོགས་པ་ཞིག་ཟ་དོན་ཅི་ཡིན་ནམ། དངོས་གནས་སྙིང་བོ་མི་འདུག་སྙམ། མགོ་བོ་རུམ་ལ་བཏུམས་ནས་གཉིད་རྩིས་བྱས་མོད། གཉིད་ཀྱི་སྨུག་པ་རྒྱང་ལ་ཡལ་བས། ཁོས་མགོ་བོ་དགྱེ་ནས་དུ་རྐང་གཅིག་ལ་མེ་བསྒོས། དུ་བ་སྔོ་ལོག་གེར་འཐེན་ཞོར་གྱང་ངོས་ལ་ཅེར་ནས་བསྡད། གྱང་ངོས་ལ་སྦྱར་བའི་ཤོག་བུའི་སྟེང་ན་འདབ་མ་གྲོལ་བའི་མེ་ཏོག་གློ་ཁ་དག་ཚོན་མདངས་ཀྱིས་བཀྲག་ནས་མིག་ལ་འཚེར་ཡོང་།
ཁོས་མཚོ་མོ་ལ་ཁྱོད་མེ་ཏོག་ཡིན་ནམ་ཞེས་དྲིས་པ་དྲན་ཞིང་། མཚོ་མོས་ཡིན་ཞེས་ཨ་ལན་བྱིན་པ་དྲན་མ་ཐག་ཏུ་ཁེར་དགོད་ཅིག་བྱས་ཤིང་། བུད་མེད་འདི་དག་ལའང་དངོས་གནས་རློམ་རྒྱུ་ཞིག་མི་འདུག མོའི་མེ་ཏོག་ལེན་མཁན་བཀྲ་ཤིས་དོན་འགྲུབ་རེད་ཟེར་བ་མ་ཡིན་ནམ་སྙམ། དེ་ལྟར་ཡུད་ཙམ་ལ་བསམ་གཞིག་ཏུ་གཡེང་རྗེས་དུ་རྐང་གི་སྣེ་མོ་སྒོ་འགྲམ་གྱི་སྙིགས་སྒམ་ཕྱོགས་ལ་གཡུགས་རྗེས། མགོ་བོ་རུམ་ལ་བཏུམས་ནས་གཉིད་ལ་ཡུར་མགོ་བརྩམས།
ཟླ་བས་ཁེར་རྐྱང་གི་མཚན་མོ་འདི་རུམ་ནས་གཉིད་ལ་ཡུར་ཐུབ་བམ། ཕྱི་རོལ་གྱི་ནམ་མཁའ་སྔར་བཞིན་ནག་རོག་གེར་མུན་པས་བཟུང་འདུག
༤
མཚོ་མོ་མལ་ཁང་དུ་ལོག་རྗེས། དུས་རྒྱུན་གྱི་གོམས་སྲོལ་དུ་གྱུར་བའི་ཉལ་ཁར་ངོ་འཁྲུད་པའི་ལས་ལའང་སྤྲོ་བ་ཏིལ་ཙམ་མེད་པར་ཐད་ཀར་མལ་ཐུལ་དུ་འཛུལ་ནས་གཉིད་མགོ་བརྩམས། འདང་རྒྱག་ཡོད་ཚད་ཡལ་བར་གྱུར་ནས་མྱུར་དུ་གཉིད་སོང་ན་བསམས་མོད། གཉིད་ནི་ཅི་ལྟར་བསྒུགས་ཀྱང་ཡོང་ཐབས་བྲལ་བས། མོས་ཁ་པར་གྱི་མཉན་ཆས་རྣ་ནང་ལ་བཙུགས་ཏེ་གང་འདོད་དུ་གླུ་དབྱངས་ལ་ཉན་ཞོར།QQནང་ལ་མིག་གཡེང་བྱས། མོ་ཟླ་བའི་མཚོ་མོ་རུ་བཏགས་པའི་རང་གིQQདྲ་མིང་ལ་ཅེར་ནས་ཡུན་རིང་བསྡད་རྗེས། འདང་ཞིག་ཕོག་པ་ལྟར་ཟླ་བའི་མཚོ་མོ་ཞེས་པའི་ཟླ་བ་དང་འབྲེལ་སྒྲ་བསུབས་ནས་མཚོ་མོ་གཅིག་པུ་རུ་བརྗེས་ཤིང་། དྲ་མིང་གཤམ་གྱི“ང་ནི་ཟླ་བ་རུམ་པའི་མཚོ་མོ་དེ་ཡིན།”ཞེས་པའི་ཚིག་ཐུང་དེའང་བསུབས་སོང་། ཤུལ་དུ་ཅི་ཞིག་འབྲི་རྒྱུ་མ་ཤེས་པར་ཡུད་ཙམ་ལ་ཧད་དེ་བསྡད་ཅིང་། མཐར“བརྩེ་དུངས་ནི་རྨི་ལམ་ཐེངས་གཅིག”ཅེས་གཏགས།QQའཆར་ངོས་སུ་གཞན་གྱིས་ཚུར་ལ་སྦྲེལ་བའི་བརྡ་ཞིག་ཤར་བྱུང་། མོས་ཕོ་རོལ་བོའིQQ སྦྲེལ་ཐག་དང་ལེན་བྱས་མ་ཐག བདེ་མོ་ཞེས་པའི་ཡིག་འབྲུ་གཉིས་འཆར་ངོས་ལ་ཐག་སྒྲ་ཞིག་དང་ལྷན་དུ་ཤར་བྱུང་།
“བདེ་མོ་ཡིན། ཁྱོད་སུ་ཡིན།”
“QQབར་སྟོང་ལ་ལྟོས་དང་ཤེས།”
“ཨོ། ཁྱོད་ཡིན་ནམ།”
“ང་ཡིན། ལོ་ཕྱེད་ཙམ་ལ་མ་ཐུག་པར་བརྗེད་སོང་བ་ཨེ་རེད།”
“ང་ལ་ཁྱོད་བརྗེད་མི་ཆོག་པའི་རྒྱུ་མཚན་ཅི་ཡང་མེད།”
“ཡིན་ཡང་། བརྗེད་མི་སྲིད་པ་ངས་ཀྱང་ཤེས་ཡོད། ཁ་ལོ་བཏོད་པའི་དགའ་ལོ་མགོ་དཀར་པོར་གྱུར་རུང་མི་བརྗེད་ཟེར་སྲོལ་ཡོད་ཐལ།བདེན་ཞད་ལོས་ཡོད།”
“ང་ལ་མཚོན་ན་དེ་འདྲ་ཞིག་མིན།”
“ཨོ་དེ་ན་བཟང་གི”
“ང་ལ་འདྲི་རྒྱུ་ཞིག་འདུགདྲང་མོར་ལན་བཏབ་ན་ཆོག་གམ།”
“ལོས་ཆོག ཤོད་དང་།”
“ཁྱོད་ཀྱིས་ཟླ་བ་དང་ངེད་གཉིས་འབྲེལ་འདྲིས་བྱེད་ཀྱིན་པ་ཅི་ལྟར་ཤེས་པ་ཡིན།”
“སློབ་གྲོགས་ཤིག་གི་ཁ་ནས་གོ་བ་ཡིན། དེའི་རྗེས་སུ་ཁྱོད་ཀྱི་དྲ་མིང་འདོགས་སྟངས་ལ་བལྟས་ཏེ་བདེན་པ་ཡིན་པ་ཤེས་ཡོད།”
“སློབ་གྲོགས་སུ་རེད། ཁོས་ངེད་གཉིས་ལ་འབྲེལ་བ་ཡོད་པ་ཅི་ལྟར་ཤེས་པ་རེད། ངེད་གཉིས་མི་མང་གྲལ་ནས་མ་དགོས་གཅིག་པུར་ཡང་ངོ་ཐུག་མྱོང་མེད། ཁོས་ཅི་ལྟར་ཤེས་པ་རེད། དྲང་མོར་བཤད་རོགས།”
“ཁྱོད་སྤོ་མ་ལངས། ངས་དྲང་མོར་བཤད་ཆོག”
“ང་སྤོ་ལངས་ཀིན་མེད། ངོ་མ།”
“ང་ལ་སྤོ་མི་ལངས་པ་ཁག་ཐེག་བྱ་རོགས། ངས་ཀྱང་བསམ་གཟས་པ་མིན།”
“དོན་ངོ་མ་ཅི་རེད།”
“ཁྱོད་ཀྱིQQངའི་ཁ་པར་གྱི་སྟེང་ནས་ཁ་ཕྱེ་རྗེས་སུབ་རྒྱུ་བརྗེད་འདུག་པས། ང་རྒྱུན་པར་ཁྱོད་ཀྱིQQནང་ལ་གཡེང་བ་ཡིན་ལ། ཁྱོད་ཀྱིས་ཟླ་བ་ལ་འབྲེལ་འདྲིས་བྱེད་པ་དང་ཁ་ཆད་བཏབ་པའང་དེ་ལྟར་ཤེས་པ་ཡིན། ཁྱོད་ནི་ང་དང་ཁ་བྲལ་ནས་ཡུན་རིང་འགོར་ནའང་བརྗེད་པར་དཀའ་བས། ངས་ཁྱོད་ལ་སྣང་འཇོག་ཙམ་བྱས་པ་ལས་ཅི་ཡང་མིན། ཁྱོད་ཀྱི་མི་སྒེར་གྱི་གསང་བ་ལ་བརྩི་འཇོག་མ་བྱས་པས། འདིར་ཆེད་དུ་དགོངས་དག་ཞུས་པ་ཡིན། དགོངས་པ་མ་ཚོམ། ཁྱོད་གཉིས་ལ་བར་ཆད་བཟོས་སོང་།”
“ཨ་བ་ཨ་མ། དགོངས་དག་ཞུ་རྒྱུར་ངོ་མི་ཚའམ། ཁྱི་རྒན།”
“ངས་ཁྱོད་ལ་དྲང་མོར་བཤད་པ་ཡིན། ངས་ཁྱོད་ཀྱིQQགསང་གྲངས་བརྐུས་པ་མིན། ཁྱོད་རང་གིས་སུབ་རྒྱུ་བརྗེད་སོང་བ་རེད། དེ་ང་ལན་ནམ། འཇིགས་པོ་མ་བཅའ། ངོ་ཚ་རྒྱུ་སུ་ལ་ཡོད་མེད་རང་རང་ལ་གསལ་ནི་རེད། ང་མེ་ཏོག་ཡིན་ཞེས་ཤོབ་གཏམ་རྒྱུར་ངོ་མི་ཚའམ། ངོ་མ། བཟང་བྱས་ན་བཟང་ངོ་མི་འདུག བདེ་མོ་བྱོས།”
བཀྲ་ཤིས་དོན་འགྲུབ་ཀྱིས་བསྐུར་བའི་ཡི་གེ་འདི་དག་ནི་མདའ་མོ་རེ་རེ་ལྟར་འཕྲོ་རིམ་འཕྲོར་མཚོ་མོའི་སེམས་ལ་ཟུག་པར་གྱུར་བས། ངུ་སྒྲ་མེད་པའི་མིག་ཆུའི་རྒྱུན་ནི་རྨ་ཁའི་ནང་གི་ཁྲག་དྲོན་དང་འདྲ་བར་མཁུར་མགོ་བརྒྱུད་ནས་ཤམ་ཤམ་བཞུར་བྱུང་།
མུན་པ་འཁྱིལ་བའི་མལ་ཁང་ནི་སྔུར་སྒྲ་རེ་གཉིས་ཀྱི་འདེགས་འཇོག་ཁྲོད་ན་ཁུ་སིམ་མེར། ཡོད་ཚད་གཉིད་དུ་ཡུར་འདུག མཚོ་མོ་གཅིག་པུས་མལ་ཐུལ་གྱི་གོང་བ་ཁ་ནང་ལ་བརྫངས་ཏེ་ངུ་སྒྲ་རེ་རེ་དབུགས་རྒྱུན་ལ་བསྲེས་ནས་སད་ཡོད།
མཚོ་མོའི་ངུ་སྐད་གཉོམ་པོ་དལ་བ་དལ་བུར་རང་གི་དབུགས་རྒྱུན་ལ་འདྲེས། མལ་ཁང་གིས་སྔར་བཞིན་ཁུ་སིམ་མེར་མུན་པ་མཐུག་པོ་ཞིག་རུམ། ནམ་གུང་འདིར། མོ་གཉིད་དང་བྲལ་ནས་ཡར་འཕག་མར་འཕག་ལན་མང་བྱས་རྗེས། སྒེའུ་ཡོལ་འཐེན་ནས་ཕྱི་ལ་བལྟས་པ་ན། ཡོད་ཚད་གཉིད་དུ་ཡུར་ཞིང་། ཕྱི་རོལ་གྱི་འདུ་འཛི་དང་འུར་ཟིང་ཡང་ཞི་ཞིང་འཇགས། མཚན་མོ་འདིའི་ནམ་མཁའ་མུན་པས་གཡོགས་འདུག་པ་སྨན་ཤར་གྱི་སེམས་པ་སྡུག་གིས་བཟུང་བ་དང་འདྲ། མཚན་མོ་འདིའི་ནམ་མཁའ་སྨག་གིས་བསྡམས་པས། ས་ཆེན་གྱི་པང་ལ་འཁྱིལ་བའི་ཁེར་རྐྱང་གི་མཚོ་མོ་རེ་རེས་ཀྱང་རང་གི་རླབས་རྒྱུན་ལ་ཉན་ཡོད། སེམས་སྒྲ་ལ་ཉན་ཡོད། མོ་ཉལ་ཁང་སྒོ་ཡི་གློག་སྡོང་གི་འོད་སྣང་མོག་པོ་དེ་ལ་ཅེར་ཏེ་ལུས་ཤིང་། རྐུབ་སྟེགས་ཟད་པོ་དེ་ལ་འགོས་པའི་གློག་འོད་ཁེར་ཆད་དེ་ནི་ཟླ་འོད་འཇམ་པོ་ཞིག་ལྟར་སེམས་ལ་ལྷུང་།
མོའི་སེམས་ལ་ཅི་ཡང་མ་དྲན་མོད། མོ་སྔར་བཞིན་གློག་འོད་ཁེར་ཆད་དེ་ལ་ཅེར་ཏེ་ལུས། །༡
“ཁྱོད་ཀྱིས་ང་ལ་ཁ་ཡ་མི་བྱེད་དོན་ཅི་ཡིན།”
“ངས་ཁྱོད་ལ་ཁ་ཡ་བྱེད་འདོད་པས་ཡིན།”
“ཁ་ཡག་མ་བཤད། དྲང་མོར་ཤོད། འུ་གཉིས་ཀྱིས་ཁ་བརྡ་བྱས་ནས་ཡུན་རིང་འགོར་ཡོད་པ་མ་ཡིན་ནམ། ངོ་ཚ་དགོས་དོན་ཅི་ཡོད།”
“ངོ་ཚ་དགོས་དོན་མེད་ན་ཁྱོད་ཀྱིས་ཚུར་ལ་ཁ་མི་གྲག་དོན་ཅི་ཡིན།”
“ཁྱོད་སྐྱེས་པ་ཕོ་ཞིག་གིས་སྔོན་ལ་ཁ་མི་གྲག་ན། ང་བུ་མོ་ཞིག་ལ་ཅི་ཁག”
“རྗེས་མར་ཁ་ཡ་བྱེད་ཁོ་ཐག་ཡིན།”
“ད་ཅི་ཆ། སྔོན་མར་ཡང་ཁྱོད་ཀྱིས་འདི་ལྟར་བཤད་པ་མ་ཡིན་ནམ། ང་ལ་ཁ་ཡ་བྱེད་མི་ཐུབ་རྒྱུ་ཅི་འདུག ཁྱོད་ང་ལ་སྐྲག་གམ།ངའི་མགོ་ན་རྭ་མེད། ངའི་ངོ་ན་རྨ་མེད། ང་ལ་ངོ་གདོང་ཡག་པོ་ཞིག་མེད་ཀྱང་མ་མཐའང་གཟུགས་གཞི་ཡག་པོ་ཞིག་ཡོད། ཁྱོད་ང་ལ་སྐྲག་དགོས་དོན་ག་ལ་ཡོད། དེ་ཨེ་རེད།”
“དེ་ལོས་ཡིན། ཧེ་ཧེ།”
“དགོད་རྒྱུ་ཅི་ཡོད།”
“ཅང་མ་རེད། ཁྱོད་འདི་ངོ་མ་བུ་མོ་སྣང་ཡངས་འདྲིས་སླ་བ་ཞིག་རེད། ཁྱོད་ཀྱིས་ཚུར་ལ་འདི་ལྟར་མ་བཤད་ན། ངས་ཁྱོད་ཀྱི་གཟུགས་གཞི་ཚིགས་དྲུག་སྨྱུག་མ་རེད་ཅེས་བཤད་རྒྱུ་བརྗེད་འདུག”
“ང་སྣང་ཡངས་ཤིག་ག་ལ་ཡིན། འདྲིས་སླ་བ་ཞིག་ཀྱང་མིན་པས། ཁྱོད་ཀྱིས་ཐེངས་གཉིས་ལ་ཐུག་ཀྱང་ཁ་ཡ་བྱེད་མ་ཕོད་པ་མ་ཡིན་ནམ། སྐད་ཆ་ལ་ལ་ཞིག་ཁྱོད་ཀྱིས་མ་བཤད་ཀྱང་། ངས་གསལ་བོར་ཤེས་ཡོད་པས།ངས་ཁྱོད་ཀྱི་ཚབ་ཏུ་བཤད་ཀྱང་མི་ཆོག་པ་ཅི་ཡོད། དཔེར་ན་ངའི་གཟུགས་གཞིའི་ཐད་ཀྱི་སྐད་ཆ་དེ་ལྟར།”
“སྐད་ཆ་ལ་ལ་ཞིག་ངས་དུས་ལྟར་བཤད་མེད་ཚེ། ཁྱོད་ཀྱིས་འདི་ལྟར་ཚུར་ལ་སྔོན་བརྡ་བཏང་ནའང་ཡག་པོ་རེད།”
“ག་ལ་ག་ལ། ཀུ་རེ་ཡིན། ངས་ཁྱོད་ཀྱིས་ཅི་ཞིག་འདོད་ཀྱིན་པ་ག་ལ་ཤེས། དངོས་གནས་ཤེས་ཁག་པོ་རེད། ཁྱོད་ཀྱིས་ང་ལ་ཁ་ཡ་མི་བྱེད་དོན་ཅི་ཡིན། དྲང་མོར་ཤོད།”
“དྲང་མོར་བཤད་ན། རྒྱུ་རྐྱེན་ཅི་ཡིན་ངས་ཀྱང་བཤད་ཁག་པོ་རེད། མ་ཐུག་སྔོན་ལ་ཁ་ཡ་བྱེད་རྩིས་ཡིན་མོད། ཁྱོད་ཀྱི་གམ་ལ་ཐོན་དུས་ཅི་ཞིག་བཤད་དགོས་པའང་མི་ཤེས་པར་དབུགས་ཁེགས་ལ་བྱེད་པས་ཁ་ཡ་མ་བྱས་པར་བུད་སོང་བ་ཡིན། དགོངས་དག”
“འདི་ཐེངས་སྔོན་མའི་རྒྱུ་རྐྱེན་མ་ཡིན་ནམ། ཐེངས་སྔོན་མར་ཁྱོད་དངོས་གནས་འཚབ་ཀྱིན་འདུག ཅི་ཁག”
“ད་ཐེངས་འཚབ་ཀྱིན་པ་མ་ཤེས་སམ།”
“མ་ཤེས། ད་ཐེངས་ཁྱོད་ཀྱིས་ཁ་གྲག་རྩིས་རེད་བསམ་མོད། གམ་ལ་ཐོན་པ་ན་གློ་བུར་དུ་མགོ་སྒུར་ནས་བུད་ཐལ། ཁྱོད་ཀྱིས་ངའི་མཐའ་འཁོར་ནས་ངོ་ཤེས་ཤིག་མཐོང་བྱུང་ངམ། ངོ་ཚ་དགོས་དོན་ཅི་ཡིན། ལུས་རྩལ་ར་བའི་ནང་ན་མི་མང་བོ་ཡོད་པས་ཨེ་རེད།”
“མིན། དགོངས་པ་མ་ཚོམ། མི་མང་ནའང་ང་དེ་ཚོར་ངོ་ཚ་དོན་ཅི་ཡོད།”
“དེ་ངས་ག་ལ་ཤེས། ཡང་གཅིག་བཤད་ན་ཁྱོད་ཀྱི་ངོ་ཤེས་དང་གྲོགས་པོ། དགའ་རོགས་སོགས་ཡོད་པས། དེ་དག་གི་སྔུན་ནས་འུ་གཉིས་ཀྱི་འབྲེལ་བ་ཤེས་འགྲོ་བར་དོགས་པ་ཡིན་སྲིད།”
“ངའི་དགའ་རོགས་ཁྱོད་མ་ཡིན་ནམ།”
“ཕན་ཚུན་ལ་ཁ་མི་གྲག་པའི་དགའ་རོགས་ཤིག་ཡོད་དམ།”
“དུས་རྒྱུན་ཁྱོད་ལ་ཡི་གེ་བསྐུར་ནས་ཁ་བརྡ་བྱེད་པ་འདིའང་ཁ་གྲག་སྟངས་ཤིག་མ་ཡིན་ནམ།”
“ཡིན་སྲིད། འུ་གཉིས་རྒྱུས་ཡོད་དུ་གྱུར་ཡོད་པའང་རྒྱུ་རྐྱེན་འདིའི་དབང་གིས་ཡིན་སྲིད།”
“ངས་ཀྱང་ཁྱོད་ལ་ཁ་ཡ་བྱེད་མ་ཐུབ་པ་མ་གཏོགས་ཁྱོད་ངའི་སེམས་ཀྱི་དགའ་རོགས་ཡིན་པ་ལོས་ཤེས།”
“ཤེས་སམ། ངས་ལན་རེར་ཁྱོད་ཀྱིས་ཁྱོད་ཀྱི་དགའ་རོགས་བདེ་སྐྱིད་སྒྲོལ་མ་རེད་བསམ་བཞིན་འདུག་སྙམ།”
“དེའི་དོན་ཅི་རེད། གོ་བ་མ་ལོག”
“དེའི་དོན་དེ་རེད།”
“ཧ་གོ་མ་བྱུང་།”
“འུ་གཉིས་ཀྱིས་དང་ཐོག་སློབ་ཁང་གི་བར་ཁྱམས་ནས་ཁ་ཆད་བཏབ་དུས་ཁྱོད་ཀྱིས་བདེ་སྐྱིད་སྒྲོལ་མ་མ་མཐོང་ངམ།”
“མ་མཐོང་། བདེ་སྐྱིད་སྒྲོལ་མ་དང་ངེད་གཉི་ཀའི་དོན་དག་ནི་འདས་སོང་གི་གཏམ་རྒྱུད་ཙམ་རེད། ད་ནི་རྟ་བརྒྱུགས་ནས་རྡུལ་འཇགས་ཤུལ་རེད། ངེད་གཉིས་ལ་འབྲེལ་བ་ཅི་ཡང་མེད།”
“དངོས་གནས་མ་མཐོང་ངམ། ཁྱོད་ངའི་ཕྱོགས་སུ་ཡོང་དུས་བདེ་སྐྱིད་སྒྲོལ་མ་ཏག་ཏག་ངའི་སྔུན་ནས་ཁྱོད་ཀྱི་ཕྱོགས་སུ་བུད་ཐལ། བར་ཁྱམས་ཀྱི་མུན་པ་སྲབ་བུ་དེའི་ཀློང་ནས་མོས་ཡང་དང་ཡང་དུ་མགོ་བོ་རྒྱབ་ལ་འཁོར་ནས་ང་ལ་ལྟ་ཞོར་དང་སྔུན་ལ་དགྱེ་ནས་ཁྱོད་ལ་ལྟ་ཞོར་བུད་སོང་། འུ་གཉིས་ཀྱི་བར་ནས་ནག་ཡོར་ཡོར་རྒྱང་ལ་ཡལ་བའི་རྒྱབ་གཟུགས་དེ་ད་དུང་ངའི་མིག་ལ་ཞག་འདུག”
“འོད་འཕྲོ་ཕྱོགས་ཤིག་གིས་ཡིན་ནམ། ངས་དངོས་གནས་བདེ་སྐྱིད་སྒྲོལ་མ་མཐོང་མ་བྱུང་། ཁྱོད་ཀྱི་རྒྱབ་ཕྱོགས་ཀྱི་སྒེའུ་ཁུང་ཆུང་ཆུང་དེ་ལས་འོད་འཕྲོས་ཡོད་པས། སློབ་ཁང་གི་བར་ཁྱམས་ནས་ཁྱོད་ཀྱི་ངོ་གདོང་རབ་རིབ་ཏུ་སྣང་བྱུང་། ནན་ཏན་གྱིས་བལྟས་པ་མིན་ཚེ་ཁྱོད་ཀྱང་ངོས་ཟིན་ཁག་པོ་འདུག་པས། ངས་ཁྱོད་ཀྱི་གམ་ན་འགྲོ་བ་དེ་དག་སུ་ཡིན་ག་ལ་ཤེས།”
“དེ་ན་ཁ་ཡ་མི་བྱེད་དོན་ཅི་ཡིན།”
“ཁྱོད་ལ་ཐེངས་དང་པོར་ངོ་ཐུག་པ་ཡིན་པས་ངོ་ཚ་བྱུང་།”
“ཁྱོད་བུད་མེད་མང་བོར་འགྲོགས་མྱོང་བ་མ་ཡིན་ནམ། དེ་འདྲའི་ངོ་ཆུང་ཞིག་ག་ལ་ཡིན། ངོ་ཚ་དགོས་པ་ཁྱོད་མ་རེད། བདེ་སྐྱིད་སྒྲོལ་མས་འུ་གཉིས་ཀྱིས་ཁ་ཆད་བཏབ་ཡོད་པ་ཤེས་ཡོད་པ་འདྲ། ང་སློབ་ཁང་དུ་ཐོན་དུས། མོས་ང་ལ་ཡང་དུ་ཡང་དུ་བལྟས་ནས་ཁྲེལ་དགོད་བྱེད་ཀྱིན་འདུག སློབ་གྲོགས་ཁ་ཤས་ཀྱིས་ཀྱང་མོའི་རྣམ་འགྱུར་གྱི་ནང་དོན་གོ་ཡོད་པ་འདྲ་བས། ང་དངོས་གནས་ངོ་ཚ་བྱུང་།”
“བདེ་སྐྱིད་སྒྲོལ་མས་ཅི་བཤད་ན་བཤད་དུ་ཆུགས། ཁྱོད་ངོ་ཚ་དགོས་དོན་མེད།”
“ཁྱོད་ངོ་ཚ་བར་རྒྱུ་མཚན་འདྲེན་རྒྱུ་འདུགང་ངོ་ཚ་བར་རྒྱུ་རྐྱེན་མེད་དམ། ངོ་མ་སྐད་ཆ་གནས་ལུགས་མེད་ནི་རེད་ཡ།”
“ཀུ་རེ་ཡིན། སྤོ་མ་ལངས།”
“སྤོ་ལངས་མེད།”
“སྤོ་ལངས་འདུག”
“ངོ་མ་སྤོ་ལངས་མེད། ང་ཁྱོད་ཀྱི་སྟེང་ལ་སྤོ་ལངས་དགོས་པའི་ཚད་ལ་ཐོན་མེད།”
“དེ་འདྲ་ཡིན་སྲིད། ཕན་ཚུན་ལ་ཡིད་ཆེས་བྱས་ན་ཡག་པོ་རེད།”
“ངས་ཀྱང་དེ་ལྟར་བསམས་མོད། དོན་དངོས་ནི་ཅི་འདྲ་ཞིག་ཡིན་པ་སུས་ཤེས།”
“དོན་དངོས་ནི་ཅི་འདྲ་ཞིག་ཡིན་པ་སོ་སོའི་སེམས་ན་གསལ་བོ་ཡིན། ངས་ཁྱོད་ལ་ཐེངས་གཉིས་ལ་ཁ་ཆད་བཏབ་ནས་ཁ་ཡ་མ་བྱས་དོན་ཡང་ངའི་སེམས་ན་གསལ་བོ་ཡིན།”
“ཁྱོད་ཀྱི་སེམས་ན་གསལ་བོ་ཡིན་ནམ། དེ་ན་རང་གི་སྔུན་ན་འགྲོ་བའི་བདེ་སྐྱིད་སྒྲོལ་མའང་རིག་མེད་པ་ཅི་རེད། ཁྱོད་ཀྱིས་དངོས་གནས་བདེ་སྐྱིད་སྒྲོལ་མ་མ་མཐོང་ངམ།”
“ཁྱོད་འདི་དོན་དག་གཅིག་ཡང་ནས་བསྐྱར་དུ་འདྲི་རྒྱུར་དགའ་བོ་འདུག”
“ཁྱོད་ཀྱང་སྐད་ཆ་གཅིག་ཡང་ནས་བསྐྱར་དུ་བཤད་རྒྱུར་དགའ་བོ་འདུག འུ་གཉིས་ཀྱི་གཤིས་ཀ་འདྲ་བོ་འདུག་ཨང་།”
“ཡིན་ན་ཐང་། ངས་དངོས་གནས་བདེ་སྐྱིད་སྒྲོལ་མ་མཐོང་མ་བྱུང་།”
“དེ་འདྲ་ཡིན་སྲིད། བར་ཁྱམས་ཀྱི་འོད་མདངས་མག་མོག་དེ་ལས་མི་གཞན་ངོས་མ་ཟིན་ཟེར་ན་བདེན་མོད། ཉིན་མོའི་ཉི་འོད་འོག་གི་ལུས་རྩལ་ར་བ་ནས་ཀྱང་ངོས་མ་ཟིན་ཟེར་ན་སུ་ཡིད་ཆེས་སམ།”
“ཁྱོད་ཀྱིས་དེ་ཟེར་བ་ཡིན་ནམ། ལུས་རྩལ་ར་བའི་ནང་ནས་ཐུག་དུས་ཀྱང་ང་དངོས་གནས་ངོ་ཚ་བྱུང་། དེ་བས་ཡང་བསྐྱར་ཁ་ཡ་བྱེད་མ་ཐུབ་པ་རེད། ཁྱོད་ང་ལ་ཡིད་ཆེས་མེད་དམ།”
“ང་ཁྱོད་ལ་ཡིད་ཆེས་ཡོད་མེད་ངས་ཀྱང་མི་ཤེས། གང་ལྟར། ངས་ཁྱོད་ལ་ཁ་ཆད་ཐེངས་གཉིས་པ་བཏབ་དུས་ཀྱང་བདེ་སྐྱིད་སྒྲོལ་མའི་ཁྲེལ་དགོད་ཀྱི་མིག་མདངས་ཁྱེར་ནས་ལུས་རྩལ་ར་བར་ཁ་བྲལ་དགོས་བྱུང་། ཁྱོད་ཀྱིས་ཤེས་སམ། འུ་གཉིས་ཀྱི་ཁ་སྐྱེངས་པའི་རྣམ་པ་མོས་མཐོང་འདུག ཁྱོད་ཀྱིས་ང་ལ་ཁ་ཡ་བྱེད་རྩིས་ཀྱིས་གམ་ལ་བཅར་ནས་སྨྲ་བ་མེད་པར་རྒྱང་ལ་སོང་རྗེས། ང་སློབ་ཁང་དུ་འགྲོ་བའི་ལམ་བར་ནས་ཡང་བསྐྱར་མོ་ལ་ཐུག་བྱུང་། ཁྱོད་རང་མོ་ལ་ཐུག་མ་བྱུང་ངམ།”
“མ་ཐུག གལ་སྲིད་ཐུག་བྱུང་ནའང་། ངེད་གཉིས་ལ་འབྲེལ་བ་ཡོད་དམ། གལ་སྲིད་བཀྲ་ཤིས་དོན་འགྲུབ་ལ་ཐུག་ནའང་། ང་ལ་འབྲེལ་བ་ཡོད་མི་སྲིད།”
“དེའི་དོན་ཅི་རེད། ཡང་གཅིག་བཤད་ན་ཁྱོད་ཀྱིས་བཀྲ་ཤིས་དོན་འགྲུབ་རིག་ནས་ང་ལ་ཁ་ཡ་བྱེད་འདོད་མེད་སོང་བའང་ཡིན་སྲིད།”
“བཀྲ་ཤིས་དོན་འགྲུབ་ཀྱིས་ཁྱོད་ལ་དེ་འདྲའི་བག་ཆགས་ཟབ་མོ་དང་ཤུགས་རྐྱེན་ངན་པ་ཞིག་བཞག་ཡོད་དམ། ངས་དངོས་གནས་མ་ཤེས། ཡང་གཅིག་བཤད་ན། ཁྱོད་ཀྱང་བཀྲ་ཤིས་དོན་འགྲུབ་ཀྱི་བུད་མེད་ཡིན་པ་ལས་ང་ལ་འབྲེལ་བ་ཡོད་མི་སྲིད།”
“གླེང་འགེལ་མ་བྱེད། བཀྲ་ཤིས་དོན་འགྲུབ་དང་ངེད་གཉིས་ཀྱི་འབྲེལ་ཐག་སྔ་མོ་ནས་ཆད་ཟིན། རང་སེམས་ན་གནོང་ཡོད་ན། གཞན་སྐྱོན་ལ་ཁག་མ་བཙལ།”
“ཁག་ཅི་ཡང་བཙལ་གྱིན་མེད། འུ་གཉིས་ཀྱིས་ཁ་ཆད་བཏབ་དུས་དེ་གཉིས་ལ་ཁྱོད་ཀྱིས་དངོས་གནས་བཀྲ་ཤིས་དོན་འགྲུབ་མ་མཐོང་ངམ།”
“མ་མཐོང་། ཁྱོད་ཀྱིས་ཁོ་མཐོང་བས་ང་ལ་ཁ་ཡ་མ་བྱས་པ་ཡིན་ནམ།”
“ངས་ཁོ་མཐོང་བྱུང་། ཁོས་འུ་གཉིས་ཀྱིས་ཁ་ཆད་བཏབ་པ་ཤེས་ཡོད་པ་འདྲ། ང་སློབ་ཁང་བར་ཁྱམས་དང་རྩལ་སྦྱོང་ར་བར་མ་ཐོན་གོང་ལ་ཁོས་ངའི་རྗེས་དེད་ཡོད་པ་འདྲ།”
“ཁྱོད་ཀྱིས་ཁོ་མཐོང་བས་ང་ལ་ཁ་ཡ་མ་བྱས་པ་ཡིན་ནམ།”
“ཁྱོད་འདི་ངོ་མ་སྐད་ཆ་གཅིག་ཡང་དང་བསྐྱར་དུ་འདྲི་རྒྱུར་དགའ་ཨང་།”
“ངས་འུ་གཉིས་ཀྱི་བར་ལ་འབྲེལ་བ་ཡོད་ཀྱང་རུང་ལ་མེད་ཀྱང་ཆོག་མོད། ཕན་ཚུན་བར་ལ་གསལ་གསལ་དག་དག་ཅིག་ཡོང་ན་བཟང་སྙམ།”
“ཁྱོད་ཡིད་ཆེས་མེད་སོང་བ་མ་གཏོགས། ངས་ཁྱོད་ལ་རྫུན་གཏམ་ཚིག་གཅིག་ཀྱང་བཤད་མྱོང་མེད། ངས་ཁྱོད་ལ་ཁ་ཡ་མ་བྱས་དོན་ངོ་མ་ངོ་ཚ་བས་ཡིན། རྒྱུ་རྐྱེན་གཞན་པ་ཡོད་མེད་ངས་ཀྱང་མི་ཤེས། ཡིད་ཆེས་བྱེད་མིན་རང་འདོད་གྱིས།”
“ཐེངས་དང་པོར་ངོ་ཚ་བ་ཡིན་ཟེར་ན་རློམ་མོད། ཐེངས་གཉིས་པར་ཡང་ངོ་ཚ་བ་ཡིན་ཟེར་ན་རློམ་ཐབས་མི་འདུག ཁྱོད་རང་དང་ཐོག་བདེ་སྐྱིད་སྒྲོལ་མར་ཐུག་དུས་ཀྱང་ངོ་ཚ་བྱུང་ངམ།”
“བདེ་སྐྱིད་སྒྲོལ་མ་ངེད་གཉིས་ཀྱི་འབྲེལ་བ་སྟེས་དབང་གི་ཐུག་འཕྲད་ཅིག་ལས་ཁ་བརྡ་བྱས་ཏེ་མགོ་བརྩམས་པ་ཡིན་པས། འུ་གཉིས་ཀྱི་དཀའ་ཁག་འདི་འདྲ་བརྒྱུད་དགོས་བྱུང་མེད། འུ་གཉིས་ཐོག་མ་ནས་QQབརྒྱུད་ནས་ངོ་ཤེས་པ་ཡིན་པས། སྔར་བཞིན་འདི་ལྟར་དྲ་ལམ་ནས་ཁ་བརྡ་བྱས་ན་ཐག་ཉེ་ལ་འདྲིས་སླ་བའི་སྣང་བ་ཞིག་རེད།”
“ཨོ་ལེ། འུ་གཉིས་ཀྱི་ལས་སྐལ་དྲ་ལམ་ན་མ་གཏོགས་མེད་པ་འདྲ།”
“ངའི་ནང་དོན་དེ་མིན། གོ་བ་མ་ལོག འུ་གཉིས་ཀྱི་དོན་དག་བདེ་སྐྱིད་སྒྲོལ་མ་དང་བཀྲ་ཤིས་དོན་འགྲུབ་གཉིས་ཀྱིས་ཅི་ལྟར་ཤེས་པ་ཡིན་ནམ། ཁྱོད་ཀྱིས་དེར་འདང་ཨེ་བརྒྱབ། ང་དངོས་གནས་ཡ་མཚར་བོ་འདུག ངས་འུ་གཉིས་ཀྱིས་ཁ་བརྡ་བྱེད་བཞིན་པ་ཉལ་ཁང་ནང་གི་མི་གཅིག་ལའང་ཤེས་སུ་བཅུག་མེད། ཁྱོད་ཀྱིས་མི་གཞན་ལ་འུ་གཉིས་ཀྱིས་ཁ་བརྡ་བྱེད་བཞིན་པ་ཨེ་བཤད།”
“མ་བཤད། ཡུམ། ངའི་སྟེང་ལ་དོགས་པ་མ་ཟ། ང་བུད་མེད་དེ་འདྲ་ཞིག་མིན། ཡང་གཅིག་བཤད་ན་ངས་འུ་གཉིས་ཀྱི་འབྲེལ་བ་ཅི་ཞིག་ཡིན་པ་ངོས་ཟིན་གྱིན་མེད། གཞན་ལ་བཤད་རན་ཞིག་ཡོད་དམ།”
“ངས་ཁྱོད་ལ་དོགས་པ་ཟ་བ་མིན། ཁྱོད་ཀྱིས་ངའི་སྐད་ཆར་གོ་བ་ལོག་པར་ལེན་དོན་ག་རེ་ཡིན་ནམ། ང་ལ་ཡིད་ཆེས་མེད་དམ། ངས་འུ་གཉིས་ལ་འབྲེལ་བ་ཡོད་ཅེས་གཞན་ལ་བཤད་ཡོད་པར་འདོད་དམ།”
“ངས་ངོ་མ་མི་གཅིག་ལའང་མ་བཤད། ཐ་ན་ཉལ་ཁང་ནང་གི་མི་གཅིག་ལའང་ཁྱོད་དང་ཁ་བརྡ་བྱེད་པ་ཚོར་དུ་བཅུག་མེད་པ་ཁག་ཐག་བྱས་ཆོག་གཉི་ཀས་སུ་གཅིག་ལའང་བཤད་མེད་ན་མི་དག་ལ་འདྲེ་ཡིས་བཤད་པ་ཡིན་ནམ།”
“ཡིན་སྲིད། གང་ལྟར་ངས་མ་བཤད། ཁྱོད་ཀྱིས་ངས་གསང་མ་ཚུགས་པར་འདོད་དམ།”
“དྲང་མོར་བཤད་ན་ཁྱོད་ཀྱི་ཅི་བཤད་ལ་གན་འདི་མེད་པའི་བྱ་སྤྱོད་ཀྱིས་ང་ཡིད་ཆད་དུ་བཅུག་བྱུང་།”
“ཁྱོད་འདི་དངོས་གནས་བུ་མོ་རང་སྣང་ཅན་ཞིག་རེད། ངས་ཁྱོད་ལ་ཁ་ཡ་མ་བྱས་པ་འགྲིག་འདུག”
“འགྲིག་ན་བཟང་འདུག འུ་གཉིས་གྱི་བར་ལ་མི་འགྲིག་པ་ཅི་ཡང་མེད། འགྲིག་དང་མ་འགྲིག་མེད་པར་རང་རང་ས་ལ་ཕྱིན་ཆོག”
“ངས་ཀྱང་དོན་མེད་དུ་མི་ཆ་མེད་ཅིག་གི་ཆེད་དུ་འདི་ལྟར་རྩོད་པ་བྱེད་མི་འདོད། བདེ་མོ་བྱོས། འུ་གཉིས་ཀྱི་སྐུད་ལམ་མཚམས་འདི་ནས་བཅད་འཇོག”
༢
“དེ་ལྟར་བྱོས། ང་ལ་བློས་མི་ཐོངས་རྒྱུ་ཅི་ཡང་མེད།”
མཚོ་མོས་ཡི་གེ་འདི་དག་བསྐུར་མ་ཐག་ཏུ་ཁ་པར་གྱི་ངོས་ལ“ཁྱོད་རང་ཁོའི་འབྲེལ་ལམ་དུ་མི་འདུག”ཅེས་ཤར། བློས་མི་ཐོངས་རྒྱུ་ཅི་ཡང་མེད་ནའང་ཟླ་བས་རང་ཉིདQQའཕྲིན་ལམ་ནས་བསུབས་ཡོད་པ་ཤེས་རྗེས། མཚོ་མོའི་སེམས་པ་སྐྱོ་དུབ་བེར་གྱུར། མཚན་མོ་འདི་ནི་སྔར་བཞིན་སྐད་སྒྲ་མེད་པའི་མཚན་མོ་ཞིག་སྟེ། ཡི་གེ་གཏགས་པའི་ཐག་སྒྲ་གསལ་བོ་གཅིག་རྗེས་གཉིས་མཐུད་ངང་སེམས་ཀྱི་དབྱངས་རྟ་རིགས་ཤིག་ལྟར་དུས་ཚོད་གཅིག་ཙམ་གྱི་ཡུན་ལ་གྲག་གྲག་རྗེས། ཡོད་ཚད་གཉིད་ལ་ཡུར་བ་ལྟར་ཁུ་སིམ་མེར་གྱུར། ཁུ་སིམ་མེར་གྱུར་རྗེས་ཀྱི་སྐད་སྒྲ་མེད་པའི་མཚན་མོ་རེ་རེ་ནི་དུས་རྒྱུན་བག་ལྷོད་བདེ་ཡངས་ཀྱིས་ཁྱབ་པ་ཞིག་ཡིན་མོད། དོ་ནུབ་སྐད་སྒྲ་མེད་པའི་ངང་ཚུལ་འདིས་མཚོ་མོའི་སེམས་པ་འོན་དུ་བཅུག་པ་འདྲ། མོ་ཡུན་རིང་ཞིག་ལ་རང་གི་ཁང་བའི་ནང་ལ་ཅེར་ནས་བསྡད་རྗེས། ད་གཟོད་ཕྱོགས་བཞིའི་གྱང་ངོས་གློ་ཁ་ཡིན་པའི་རང་གི་མལ་ཁང་ཆུང་ཆུང་འདི་རུ་གོས་སྒྲོམ་གཅིག་དང་འབོལ་ཁྲི་གཅིག ཅོག་ཙེ་གཅིག ད་དུང་ཐོག་ཏུ་རང་ཉིད་ཉལ་ཡོད་པའི་མལ་ཁྲི་གཅིག་བཅས་ལས་ཅི་ཡང་མེད་པ་རྟོགས་སོང་བ་འདྲ་ལ། དེ་ལྟར་རྟོགས་པར་ཡང་སེམས་ཀྱི་རྩོལ་བ་དྲག་ཏུ་བཏོན་པ་ལྟར། མོ་གཞི་ནས་ཐང་ཆད་འདུག མོའི་ཁང་མིག་གི་མུན་ནག་ལ་འཁྱིལ་བའི་སྔས་འགྲམ་གྱི་གློག་འོད་གཉོམ་པོ་ཁེར་རྐྱང་གི་མཚེའུ་ཞིག་ལྟར་ཞི་ཞིང་འཇགས་ཨང་། མཚོ་མོའི་དྲན་པའང་གཉིད་ཀྱིས་གསབ་མ་ཐུབ་པའི་ཁེར་རྐྱང་གི་མཚེའུ་དེ་ལྟར་ཁང་མིག་འདིའི་ནང་རོལ་ལ་ལྷིང་འཇགས་ཀྱིས་འཁྱིལ་ཞིང་། ལྷིང་འཇགས་ཀྱིས་སྐྱོམ་གྱིན་འདས་སོང་གི་ཆུ་རིས་མང་བོ་གཅིག་རྗེས་གཉིས་མཐུད་ངང་མིག་ལ་བབས་བྱུང་། མོས་མགོ་བོ་རུམ་ལ་བཏུམས་ཤིང་ཡང་ཡང་ཕྱི་ལ་བུད་ནས། དངན་པ་རིང་མོ་ཤུར་ཤུར་ཁོག་ལ་རྔུབ་ཅིང་ཤུར་ཤུར་ཕྱི་ལ་འབྱིན་པ་ནི་ཡ་ཆུང་སྡུག་གི་རྐྱ་མ་བཅོ་བརྒྱད་ཡང་ཡང་བཤིགས་ནས་རྨ་ཁ་འཚེམ་པ་དང་འདྲ།
མོའི་སེམས་ཀྱི་རྨ་ཁ་ཐོག་མ་ནི་བཀྲ་ཤིས་དོན་འགྲུབ་ཀྱིས་བཞག་པ་ཡིན་ལ། མོའི་ལུས་ཀྱི་རྨ་ཁ་ཐོག་མའང་བཀྲ་ཤིས་དོན་འགྲུབ་ཀྱིས་བཏོད་པ་ཡིན། བཀྲ་ཤིས་དོན་འགྲུབ་ནི་མོའི་རྨ་ཁ་ཐམས་ཅད་ཀྱི་བདག་པོ་ཡིན་མོད། ཁོ་དང་བྲལ་ནས་ལོ་ཕྱེད་ཙམ་འགོར་དུས་འདིར། ཁོའི་བདག་དབང་ཡོད་ཚད་ཟླ་བར་དབང་ཡོད། ད་ནི་ཁོ་ལ་ཐོབ་མྱོང་བའི་བརྩེ་དུངས་ཟབ་མོའང་ཟླ་བའི་ཡིན་པས། མོའི་ལུས་ཀྱི་རྨ་ཤུལ་ལ་ཟླ་བས་རེག་མྱོང་མེད་ནའང་། མོའི་སེམས་ཀྱི་རྨ་ཤུལ་ཡལ་ལ་ཉེ་དུས། ལས་བསམ་སར་མི་འགྲོ་གསེག་སར་སོང་ནས་སྐྱིད་སྡུག་ཏུ་གྱུར་ནས་རྨ་ཁ་བཟོས་སོང་བ་ལས་དབང་གི་ཀུ་རེ་ཡིན་ནམ། མཚོ་མོས་ཡང་དང་བསྐྱར་དུ་ཁ་པར་ལག་ཏུ་བླངས་ནས་ཟླ་བའི་QQབསྐྱར་དུ་སྣོན་རྩིས་བྱས་མོད། འགྱོད་གདུང་དང་ཡི་ཆད་ཀྱི་འཕྲོག་རྩོད་བར་ནས་ལས་ཀྱི་བགྱི་བ་ཅི་ཡང་སྤེལ་མ་ནུས།
ཟླ་བ་དང་འགྲོགས་པ་ནས་བཟུང་། ཡང་ན་ཟླ་བ་ངོ་ཤེས་པ་ནས་བཟུང་། མཚོ་མོས་ཟླ་བས་བསྐུར་བའི་སྐད་ཆ་རེ་རེ་དང་ཟླ་བས་བསླངས་པའི་དགའ་སྤྲོ་རེ་རེས། བརྩེ་དུངས་ཀྱི་རྨ་ཁ་གསོས་ཤིང་གྱེས་བྲལ་གྱི་སྡུག་བསྔལ་སུབ་ནས་འགྲོ་བ་ཚོར་ལ། སུབ་ནས་འགྲོ་ཐེངས་རེ་རེར་མཚོ་མོའི་སེམས་ལ་བརྩེ་དུངས་ནི་མ་གཞི་ནས་བཀྲ་ཤིས་དོན་འགྲུབ་ཀྱི་སྤྱོད་པ་དེ་ལྟར་འཚབ་འཚུབ་གོ་རིམ་མེད་པ་ཞིག་མིན་པར་ཟླ་བའི་བག་ཡོད་ཀྱི་སྤྱོད་པ་འདི་ལྟར་འདྲིས་ཆེ་བ་ཞིག་ཡིན་པར་བསམས། ཟླ་བ་དང་འབྲེལ་འདྲིས་བྱེད་པའི་བརྒྱུད་རིམ་ཁྲོད་མཚོ་མོའི་ཡིད་ལ་བབས་ཤིང་བློ་ལ་རན་པའི་སྣང་ཚུལ་ཞིག་ཡོད་པ་ནི། ཟླ་བ་དང་རང་ཉིད་འབྲེལ་འདྲིས་བྱས་ནས་ཡུན་རིང་འགོར་ནའང་ངོ་ཐུག་མེད་པ་དེ་རེད་ལ། ཡང་ན་དུས་ཡུན་རིང་བོ་ཞིག་ལ་ཟླ་བ་དང་ངོ་མ་ཐུག་པ་དེ་ཡིན་མོད། ད་ནི་འབྲེལ་ལམ་ཡོངས་རྫོགས་རྩ་ནས་ཆད་དེ་གཏན་དུ་ངོ་ཐུག་མ་ཐུབ་གྱུར་བས། མོའི་བསམ་བློ་ལའང་འགྱུར་ལྡོག་བྱུང་སྟེ། སྔོན་ཞིག་ནས་ཟླ་བར་ངོ་ཐུག་ཡོད་ན་ཅི་མ་རུང་སྙམ། ཇ་ཁང་ནང་ནས་གོང་ཞོལ་བྱས་ནས་འདུག་དུས་དང་སློབ་ཁང་བར་ནས་སྔ་གཞུག་བྱས་ནས་འགྲོ་དུས་རང་འགུལ་གྱིས་ཁོ་ལ་ཁ་གྲགས་ཡོད་ན་ཅི་མ་རུང་སྙམ།ཡིན་ཡང་། དེ་དུས་དེ་ལྟར་ཁ་མ་གྲགས་པ་ནི་སྙིང་དུ་སྡུག་ཅིང་ཡིད་དུ་འོང་སྟེ། ཟླ་བས་མོའི་གར་འགྲོ་གར་འདུག་མིག་གིས་འཚོས་ནས། མོ་ལ་ལྭ་བའི་ཁ་དོག་མཛའ་མིན་དང་ཟས་ཀྱི་གདམ་གསེས་ཅི་ཡིན་སོགས་འདྲི་ལ། ད་དུང་ཟ་མ་ཟ་དུས་སུ“ཟ་མ་ཞིམ་པོ་ཞིག་ཟོ། དེ་རིང་གི་ནམ་ཟླ་ཧ་ཅང་དྲོ་བས་ཐུག་འཁྱག་ཅིག་བཟས་ན་ལྷག་ཏུ་ཞིམ་སྲིད”ཅེས་བསྐུར་མྱོང་། དཔེ་ཆ་ཀློག་དུས་སུ“ངས་ཀྱང་ཁྱོད་ཀྱིས་ཀློག་བཞིན་པའི་སྒྲུང་རིང་རོ་མེ་འོ་དང་ཀྲའུ་ལེས་ཡེ་ཀློག་བཞིན་ཡོད། ཧ་ཅང་ཡག་པོ་འདུག”ཅེས་བསྐུར་མྱོང་། སྲང་ལ་ཉུལ་དུས་སུ“དེ་རིང་ང་ཡང་ཁྱོད་ཀྱིས་བཤད་པའི་ཁོ་ཧྥེ་ཁང་དེར་ཕྱིན་པ་ཡིན། ནང་གི་བཀོད་པ་ལེགས་པས་བག་ཡངས་མོ་རང་བྱུང་། བཀའ་དྲིན་ཆེ།”ཞེས་བསྐུར་མྱོང་། བརྙན་ལ་ལྟ་དུས་སུ“ཁྱོད་ཀྱིས་ཀྱང་གློག་བརྙན་ཐེ་ཐན་ཉིའུ་ཁུ་ལ་ལྟོས་དང་། ཧ་ཅང་ཡག་པོ་འདུག”ཅེས་བསྐུར་མྱོང་། ཡུལ་དུས་གང་ཞིག་ཏུ་བྱ་བ་ཅི་ཞིག་སྒྲུབ་ནའང་ཟླ་བས་བསྐུར་བའི་ཡིག་འབྲུ་རེ་རེ་མོའི་དགའ་ཡ་སྐྱོ་རོགས་སུ་གྱུར་ཡོད། ཐ་ན་སློབ་ཁྲིད་ཀྱི་སྐབས་སུའང་མོས་ཟླ་བ་ལ་QQའཕྲིན་ལམ་བརྒྱུད་ནས་ཡི་གེ་སྐུར་རེས་བྱས་པ་ཐེངས་གཅིག་མིན། དེ་བས་ཟླ་བ་དང་འབྲེལ་འདྲིས་བྱེད་སྟངས་ནི་བལྟས་ན་ཉེ་ཉེ་འདྲ་བའི་སྣང་བ་ཞིག་ཤར་ཡང་། ད་ནི་བསམས་ན་ངོ་ཡང་མི་ཤེས་རྒྱུས་མེད་དུ་གྱུར་སོང་།
མཚོ་མོའིQQའཕྲིན་ལམ་ལ་ཟླ་བ་ཤར་བ་ནས་བཟུང་། མཚོ་མོའི་འཇིག་རྟེན་ནི་ཞི་འཇགས་བག་ཡངས་ཀྱི་མཚན་མོ་ཞིག་ཡིན་ཞེས་བཤད་ཆོག ཟླ་བ་དང་འབྲེལ་འདྲིས་བྱུང་བ་ནས་མོ་སླར་ཡང་སློབ་གྲྭའི་ཕྱི་རོལ་ན་གླས་པའི་ཁང་མིག་འདི་ལ་འདང་ཇེ་ཡོད་དང་རྩིས་ཇེ་ཆེ་རུ་གྱུར། ཁང་མིག་འདིས་ནི་རྨ་ཤུལ་ཞིག་ལྟར་མོ་ལ་ན་ཟུག་ཟབ་མོ་དང་འདས་དོན་མང་བོ་དྲན་པར་བྱེད་པས། བཀྲ་ཤིས་དོན་འགྲུབ་དང་ཁ་བྲལ་བ་ནས་བཟུང་། ཁང་མིག་འདི་ཟླ་ཕྱེད་ཙམ་ལ་སྟོང་བར་ལུས་ཤིང་། མཚོ་མོས་ནང་སེམས་ཀྱི་སྐྱོ་གདུང་མཐའ་དག་བརྗེད་དུ་མེད་ཀྱང་བརྗེད་པར་སྣང་ནས་ཟླ་བས་བསྐུར་བའི་ཡིག་འབྲུ་རེ་རེ་བརྩེ་བས་ཀློག་བཞིན་སླར་ཡང་ཁང་མིག་འདི་ལ་བག་ཆགས་གསར་བ་ཞིག་བསྒོས་ཤིང་། སླར་ཡང་ཁང་མིག་འདི་རང་འདུ་ཤེས་གསར་བ་ཡིས་གཡོགས་ནས། ཡང་དང་ཡང་དུ་སློབ་གྲྭའི་མལ་ཁང་དུ་མ་བསྡད་པར་ཕྱི་ལ་ཡོང་། ཕྱི་ཡི་ཁང་མིག་འདི་ལས་གཞས་ལ་ཉན་ནས་སྲང་ལ་གཡེང་ཞིང་། མལ་མ་འཛུལ་ནས་དེབ་ལ་ཉུལ་ཞོར་འཕྲིན་ལམ་གྱི་ཟླ་བའི་ཕྱོགས་ལ་སྙིང་གཏམ་གྱི་ཡི་གེ་མང་བོ་དང་སེམས་མཚོན་གྱི་པར་རིས་སྣ་མང་ཕར་བསྐུར་ཚུར་བསྐུར་བྱས། དེ་ལྟར་ཁང་མིག་འདི་ལ་བདེ་སྐྱིད་ཀྱི་དྲོད་སྣང་འཁྱིལ་ནས་ལོ་ཕྱེད་ལྷག་ལས་མ་འགོར་བའི་དེ་རིང་གི་དུས་ལ། མཚོ་མོའི་ལྷིང་འཇགས་ཀྱི་མཚན་མོ་འཇགས་ཐབས་བྲལ་བས། མོས་ཡང་དང་ཡང་དུ་ཟླ་བས་ཅིའི་ཕྱིར་ང་ལ་འབྲེལ་ཐག་བཅད་པ་ཡིན་ནམ་སྙམ། ཟླ་བ་ནི་ཞེ་སྡང་གི་སྤྲིན་གྱིས་བསྒྲིབས་པ་ལྟར་གནས་སྐབས་ཙམ་ལ་མི་སྣང་བར་གྱུར་ནའང་། ཉིན་གཅིག་གཉིས་ཤིག་གི་རྗེས་ནས་མཐོང་ལམ་གྱི་སྤྲིན་བར་ནས་འཛུམ་སྟེ་གཏམ་གྱི་འོད་སྣང་བསིལ་བསིལ་གཏོར་འོང་བ་ཁོ་ཐག་ཡིན་སྙམ་ཞིང་། དེ་ལྟར་བསམ་བཞིན་དེ་ལྟར་ཡང་མིན་པ་འདྲ་བས། མོས་སྐྱེས་པ་དག་ལ་དངོས་གནས་བློ་གཏད་མི་འདུག་བསམས། ཤིང་གི་མལ་ཁྲི་ལས་མགོ་བོ་རུམ་ལ་བཏུམས་ནས་ཕར་འཁོར་ཚུར་འཁོར་བྱེད་ཐེངས་རེར་མོས་ཟླ་བས་བཤད་པ་བདེན་ནམ། བཀྲ་ཤིས་དོན་འགྲུབ་ཀྱིས་ངེད་གཉིས་ཀྱིས་འབྲེལ་འདྲིས་བྱེད་ཀྱིན་པ་ཤེས་ཡོད་དམ། བདེ་སྐྱིད་སྒྲོལ་མས་ཀྱང་ཤེས་ཡོད་པ་ཁོ་ཐག་རེད། ཟླ་བས་ང་ལ་འབྲེལ་འདྲིས་བྱེད་ཀྱིན་པ་མི་གཅིག་ལའང་བཤད་མེད་པ་བདེན་ན། ངས་ཀྱང་མི་གཅིག་ལའང་ཤེས་སུ་བཅུག་མེད་པས། ཁོ་གཉིས་ཀྱིས་ཅི་ལྟར་ཤེས་པ་ཡིན་ནམ་ཞེས་ཡིད་གཉིས་ཐེ་ཚོམ་གྱི་དབང་དུ་གྱུར་ནས་ཡུན་རིང་འགོར་རྗེས། གློ་བུར་དུ་ཕྱིར་དྲན་འཐིབས་པའི་ཁང་མིག་འདི་ལས་གཉིད་ཐབས་བྲལ་ཞིང་སུན་སྣང་འགོག་པར་དཀའ་བ་ཞིག་སྐྱེས་པས་ཁ་པར་ལག་ཏུ་བླངས་ཏེ་བལྟས་པ་ན། ཏག་ཏག་ཆུ་ཚོད་དགུ་རེད། སློབ་གྲྭའི་མལ་ཁང་གི་སྒོ་བརྒྱག་པར་ད་དུང་ཆུ་ཚོད་ཕྱེད་ཙམ་འདུག མོ་མལ་ལས་ལངས་ནས་སློབ་གྲྭར་ལོག་རྩིས་བྱས།
སློབ་གྲྭ་ཆེན་མོའི་ནང་ནས་ལོ་ངོ་གསུམ་ལྷག་འགོར་ལ་ཉེ་དུས་འདིར། མོས་གྲོང་ཁྱེར་འདིའི་བོད་ཡིག་ཚགས་པར་ཁང་དུ་དངོས་སྦྱོང་བྱེད་བཞིན། ལན་རེར་ཕྱི་རུ་གླས་པའི་ཁང་མིག་ཏུ་བསྡད་ཅིང་། ལན་རེར་སློབ་གྲྭའི་མལ་ཁང་དུ་ལོག་བཞིན་ཡོད། མོའི་འཇིག་རྟེན་གྱི་འགྱུར་ལྡོག་ཡོད་ཚད་དངོས་སྦྱོང་བྱས་པ་ནས་མགོ་བརྩམས་པ་མ་ཡིན་པར་ཁང་བ་འདི་གླས་པ་ནས་མགོ་བརྩམས་པ་འདྲ་ལ། ཁང་བ་འདི་གླས་པ་ནས་བཟུང་། བཀྲ་ཤིས་དོན་འགྲུབ་དང་འབྲེལ་འདྲིས་ཇེ་ཟབ་ཏུ་གྱུར་ཞིང་། ཁོའི“ངས་ཁྱོད་ལ་ཅི་ཡང་མི་བྱེད། སྐྲག་མི་དགོས།”ཞེས་ཁང་མིག་འདིར་འཛུལ་ཐེངས་རེ་རེས་མངོན་མེད་ཀྱི་ཨུ་ཚུགས་རིགས་ཤིག་གིས་ཁོ་གཉིས་བཅུམས་ནས་ཡོང་བ་ལྟར། མོའི་བརྩེ་དུངས་ཀྱི་རང་ཚུགས་དབང་མེད་དུ་འཕྲོག་སོང་ལ། མོའི་ལང་ཚོ་ཡི་མེ་ཏོག་དབང་མེད་དུ་བཅོམས་སོང་། དེ་ལྟར་ན་ཟུག་དང་བརྩེ་བ་ནི་ཨུ་ཚུགས་དང་སྟེས་དབང་ལས་སྐྱེས་པས། མོས་འགྱུར་ལྡོག་སྐྱེན་པའི་དགའ་སྐྱོ་མང་བོ་དང་ལྷན་དུ་རང་ཉིད་བུད་མེད་ཅིག་ཡིན་པར་ངོས་འཛིན་ཐོབ། བྱ་དངོས་མང་བོ་ཞིག་ལ་བཟུང་བའི་རྣམ་འགྱུར་ཡོད་ཚད་བག་ཡངས་སུ་གྱུར། དེ་ནི་མོའི་ཚོར་བ་རྣོན་པོ་དང་དངངས་སྐྲག་འཚེར་པོ་གཞན་གྱི་ལག་ཏུ་ཤོར་བས་ཡིན་སྲིད། བཀྲ་ཤིས་དོན་འགྲུབ་ཀྱིས་བསླངས་པའི་བརྩེ་དུངས་ཀྱི་ན་ཟུག་ཟབ་མོས་མོ་ལ་བག་ཆགས་ཟབ་མོ་དང་རེ་བ་ཆེན་པོ་བྱིན་མོད། ཁོའི“ངས་ཁྱོད་ཐེངས་དང་པོ་ཡིན་པ་ཡིད་ལའང་མ་ཤར”ཞེས་པའི་སྐད་ཆ་དེ་ལས་རྨི་ལམ་གྱི་སྨུག་པས་གཡོགས་པའི་དངོས་ཡོད་ཀྱི་གཟུགས་བརྙན་ཇེ་གསལ་ཇེ་གསལ་ངང་བཀྲ་ཤིས་དོན་འགྲུབ་ཀྱི་དམིགས་ཡུལ་བསླངས་ལ་བུད་ཅིང་། བཀྲ་ཤིས་དོན་འགྲུབ་ཀྱིས་བསླངས་པའི་དགའ་སྐྱོ་ཐམས་ཅད་བཏང་སྙོམས་སུ་གྱུར་ནས། མཚམས་ཤིག་ལ་ཁོ་གཉིས་ཀྱི་འབྲེལ་བ་ཅི་ཞིག་ཡིན་པའང་མི་ཤེས་པར་གྱུར། སྐབས་ཤིག་ལ་ཁོ་གཉིས་ལ་གཞི་ནས་འབྲེལ་བ་ཅི་ཡང་མེད་པར་གྱུར།
སྤྱིར་བཏང་དུ་ཟླ་བར་འབྲེལ་འདྲིས་བྱས་པ་ནས་བཟུང་། མོས་བཀྲ་ཤིས་དོན་འགྲུབ་གཏན་བརྗེད་དུ་གྱུར་ཡོད་ཅེས་བཤད་ཆོག་མོད། ཟླ་བས་གློ་བུར་དུ་འབྲེལ་ཐག་བཅད་པ་འདིས་མོ་ལ་ཡང་དང་ཡང་དུ་སྐྱེས་པ་དག་ལ་བློ་གཏད་མི་འདུག་ཨང་འདོད་དུ་བཅུག དེ་ལྟར་འདོད་ཀྱིན་བཀྲ་ཤིས་དོན་འགྲུབ་དང་འབྲེལ་བའི་འདས་དོན་མང་བོ་ཡིད་ལ་ཡང་ཡང་ཤར། མོ་ནི་རང་གི་དྲན་པ་རྒོད་པོའི་འཚུབ་ཆས་འདེད་པ་ལྟར་གོམ་སྟབས་མགྱོགས་པོས་སློབ་གྲྭའི་ཕྱོགས་སུ་སོང་།
ཁང་མིག་ལས་ཕྱི་ལ་བུད་རྗེས། སྲང་ལམ་གྱི་འདུ་འཛི་དང་འཕྲུལ་ཆས་ཀྱི་འུར་ཟིང་གིས་རྒྱང་དུ་ཤོར་བའི་དྲན་པ་རྒོད་པོ་མཐོང་སྣང་གི་གཟུགས་བརྙན་དུ་སྡུད་པར་བྱེད་ལ། དེ་ནི་བར་སྣང་དུ་འཕུར་བའི་ཤོག་བྱ་ཞིག་རྟོད་ཐག་ཕྲ་མོས་དལ་བ་དལ་བུར་ཚུར་ལ་འཐེན་པ་དང་འདྲ། མོས་དྲན་པ་མཐའ་དག་ཚུར་ལ་བསྡུས་རྗེས། ལམ་འགྲམ་གྱི་ཚོང་ཁང་དག་ལ་མིག་གཡེང་བྱེད་ཞོར་སོང་། ཕྲེང་བར་བསྟར་བའི་ཚོང་ཁང་དང་མགྲོན་ཁང་། དྲ་ཁང་། ཁོ་ཧྥེ་ཁང་སོགས་ཀྱི་སྒོ་མོ་རེ་རེ་གློག་འོད་ཀྱིས་བརྒྱན་པའི་སྒོ་བྱང་རེ་རེའི་འོག་ཏུ་ཁྲ་ལམ་མེར། འུར་ཟིང་དང་འདུ་འཛི་ལ་གོམས་པའི་བབ་ཆགས་ཀྱི་རྣམ་པ་ཞིག་མངོན་འདུག སྒོ་བྱང་རེ་རེ་གྲལ་བསྒྲིགས་ནས་མོའི་སྔུན་ནས་རྒྱབ་ལ་ཡལ་ཐེངས་ཤིག་ལ། མིག་ལམ་དུ་སྒེག་ལྡན་མའི་སྐྲ་གཞར་ཁང་ཞེས་པ་མངོན་བྱུང་།
མོས་དེ་རིང་སྔ་དྲོར་ཟླ་བར་ཁ་ཆད་ཐེངས་གཉིས་པ་བཏབ་སྟེ། ཉིན་གུང་ཆུ་ཚོད་གཅིག་གི་ཐོག་ཏུ་སློབ་གྲྭའི་ལུས་རྩལ་ར་བ་ནས་ངོ་ཐུག་རྒྱུ་བྱས་རྗེས། དགའ་སྤྲོ་དཔག་མེད་ངང་མལ་གྲོགས་དག་ལ་ལྭ་བ་གང་ཞིག་མཛའ་མིན་ལྟ་རུ་བཅུག་ནས་ཚུགས་ཀ་འདྲ་མིན་དང་ཁ་དོག་སྣ་ཚོགས་ཀྱི་གོན་པ་མང་བོ་ཡང་ཡང་བརྗེས་མཐར། མོས་སྔོན་ཤིག་ལ་ཟླ་བས“ཁྱོད་ཀྱིས་དེ་རིང་གོན་ཡོད་པའི་མདོག་གློ་ཁ་ཅན་གྱི་ལྭ་བ་དེ་ཧ་ཅང་ཡག་པོ་འདུག དངོས་གནས་མཛེས་མ་རང་རེད”ཅེས་བསྐུར་བ་དྲན་པས་ལྭ་བ་གློ་ཁ་དེ་གོན་ནས་མེ་ལོང་མདུན་ནས་ཕར་འཁོར་ཚུར་འཁོར་དང་གཡས་ལྟ་གཡོན་ལྟ་བྱས་ཤིང་། སྐྲ་ཚུགས་བརྗེ་དགོས་བསམས་ཏེ་སྒེག་ལྡན་མའི་སྐྲ་གཞར་ཁང་ཞེས་པ་འདིར་ཡོང་བ་རེད། ད་ནི་སྐྲ་གཞར་ཁང་འདི་མཐོང་མ་ཐག མོ་ནི་རང་ཉིད་ལ་ངོ་གནོང་བ་ལྟར། དགོད་ཙམ་བྱས་སོང་། ཤ་སྐྱི་དང་སེམས་པ་འགུལ་ཙམ་བྱས་པ་ན་མིག་ཟུང་ལ་ཆུ་རིས་སྲབ་བུ་ཞིག་འཁོར་ཞིང་འཁོར་བས། མོས་གོམ་པ་སྔུན་ལ་སྤོ་ཞོར་དུ་མགོ་བོ་ཡར་ལ་དགྱེ་ནས་ནམ་མཁར་བལྟས། ནམ་མཁའ་ནི་ནག་རོག་གེར་མུན་པས་གཡོགས་ཤིང་། གྲོང་ཁྱེར་གྱི་འོད་སྣང་མོག་པོའི་ཕ་རོལ་ན་རྔམ་ཆེན་པོས་འཐིབས་འདུག་པས་ནི། ཚུར་ནས་ཚུར་ལ་བཅུམས་ནས་ཡོང་བ་དང་འདྲ། ཟླ་བ་དང་སྐར་མའི་ཤུལ་ཙམ་ཡང་མཐོང་རྒྱུ་མེད་པས། མཚོ་མོའི་སེམས་པ་སྔར་ལས་ལྷག་པར་སྐྱོ་དུབ་པར་གྱུར།
མོས་འགྲོ་ཞོར་དུ་མགོ་བོ་སྒུར་ནས་ཟླ་བའིQQདབུ་བརྙན་གྱི་སྟེང་ནས་དལ་བུར་མནན་པ་ན། དྲ་མིང་ལ་མཚོ་མོའི་ཟླ་བ་རུ་བཏགས་ཡོད་པའི་ཟླ་བའི་QQཡི་མིང་སྐད་ཅིག་ལ“མུན་པ་འཇམ་པོ”ཞེས་པའི་ཡིག་འབྲུ་བཞི་རུ་གྱུར་སོང་། ད་དུང་དྲ་མིང་འདིའི་གཤམ་ན“ང་ནི་ཁྱོད་ཀྱི་མཚོ་ལ་ལྷུང་བའི་ཟླ་བ་དེ་ཡིན།”ཞེས་པའི་ཚིག་ཐུང་དེའང་མུན་པར་ཡལ་བའི་སྐར་མ་ཞིག་ལྟར་གར་སོང་ཆ་མེད་དུ་གྱུར་ནས་ཤུལ་དུ“ང་ནི་ཁེར་རྐྱང་གི་མུན་པ་འཇམ་པོ་ཞིག་ཡིན”ཞེས་ཤར་འདུག
ཟླ་བས་དངོས་གནས་མོ་ལ་འབྲེལ་ཐག་བཅད་པ་འདྲ། ད་ནི་མཚན་མོ་འདི་ལྟར། ནམ་མཁའ་འདི་ལྟར། མཚོ་མོའི་མཐོང་ལམ་ནས་ཟླ་བ་ནི་རྒྱང་རིང་བ་ལ་ཨང་།
༣
“ངས་ཀྱང་དོན་མེད་དུ་མི་ཆ་མེད་ཅིག་གི་ཆེད་དུ་འདི་ལྟར་རྩོད་པ་བྱེད་མི་འདོད། བདེ་མོ་བྱོས། འུ་གཉིས་ཀྱི་སྐུད་ལམ་མཚམས་འདི་ནས་གཅད་འཇོག”
ཚིག་ཐུང་འདི་བསྐུར་མ་ཐག ཡ་ཆུང་ལ་སུན་སྣང་འགོག་ཏུ་མེད་པ་ཞིག་ཞེ་སྡང་གིས་དེད་དེ་ཡོང་བས། ཟླ་བས་འདང་རྒྱག་སྤུ་ཙམ་མེད་པར་མཚོ་མོའིQQཐད་ཀར་བསུབས་སོང་།
མཚོ་མོའི་ཡིད་མ་ཆེས་པའི་རྣམ་འགྱུར་རེ་རེས་ཁོ་ལ་བདེ་སྐྱིད་སྒྲོལ་མ་དྲན་དུ་བཅུག་ལ། བདེ་སྐྱིད་སྒྲོལ་མས“གོ་ཐོས་ལྟར་ན་ཁྱོད་ནི་སྐྱེས་པ་བློ་གཏད་མེད་པ་ཞིག་རེད་ཟེར”ཞེས་བཤད་པ་དྲན།
ཟླ་བ་མཚོ་མོའི་པང་ལ་ལྷུང་ནས་ལོ་ཕྱེད་ཅིག་འགོར་སོང་། ཡང་ན་མཚོ་མོས་བསྐུར་བའི་པར་རིས་དང་ཡི་གེ་ཁ་པར་དུ་ཉར་ནས་ལོ་ཕྱེད་ཅིག་འགོར་སོང་། ལོ་ཕྱེད་ཅིག་འགོར་ནའང་ཟླ་བས་མཚོ་མོའི་གཟུགས་བརྙན་ཙམ་ལས་མོའི་གཤིས་རྒྱུད་ཀྱི་ཞི་འཇམ་མྱོང་སྐལ་མ་བྱུང་ལ། ལོ་ཕྱེད་ཅིག་འགོར་ནའང་མཚོ་མོས་ཟླ་བའི་གཟུགས་བརྙན་ཙམ་ལས་ཁོའི་ངོ་གདོང་གི་བསིལ་ཟེར་མྱོང་ཐབས་མ་བྱུང་།
ཟླ་བ་ནི་ཡག་ཕོ་སྒོ་དང་གཟུགས་སྐྱེ་ལུས་ལྡན་པའི་གསར་བུ་སྙིང་རྗེ་ཞིག་སྟེ། ཁོའི་ཤ་མདངས་དཀར་ཚུལ་དང་ཁ་མིག་རན་ཚུལ་གྱིས་མོ་བརྒྱའི་སེམས་པ་འཕྲོག་ཅིང་ཕོ་བརྒྱར་སྙིང་རླུང་བསླངས་མྱོང་། ཁོའི་ལུས་དང་གཟུགས་གཞི་ཡག་པོ་དར་སྲོལ་གསར་མའི་གྱོས་གོས་རེ་རེས་བརྒྱན་ཐེངས་རེར་བརྙན་འཕྲིན་ནང་གི་སྐར་ཆེན་དེ་དག་ལྟར་སྙིང་དུ་སྡུག་པས། སློབ་ཆེན་འདིའི་སྒོ་ཐེམ་བརྒལ་བ་ནས་བཟུང་། བུ་མོ་གང་མང་ཞིག་གིས་ཁོ་ལ་འཕྲིན་ཡིག་བསྐུར་ཞིང་ཁ་པར་བཏང་ནས་འབྲེལ་འདྲིས་བྱས་མྱོང་། ཁོས་བུ་མོ་གང་མང་ཞིག་གིས་ཚུར་ལ་བསྟན་པའི་རྣམ་འགྱུར་རེ་རེ་སྣང་མེད་དུ་མ་བཞག་པར་བསྟུད་མར་བུ་མོ་བཞི་ལ་དགའ་རོགས་བསྒྲིགས་ཤིང་ལུས་འབྲེལ་བྱུང་བས། སློབ་རའི་བུ་མོ་དག་གི་ཁྲོད་དུ“ཟླ་བ་ལ་བློ་གཏད་མེད”ཅེས་གྲགས། དེ་ལྟར་གྲགས་པས། ཚུར་ལ་འབྲེལ་འདྲིས་བྱེད་པའི་བུ་མོ་གཅིག་ཀྱང་མ་བྱུང་། བདེ་སྐྱིད་སྒྲོལ་མ་དང་མཚོ་མོ་གཉིས་ནི་ཁོས་རང་ཉིད་ཀྱི་འདོད་པ་ལྟར་འབྲེལ་འདྲིས་བྱས་པའི་དགའ་རོགས་གཉིས་ཡིན། མྱི་ཁ་དེའི་དབང་གིས་ཁོ་དང་བདེ་སྐྱིད་སྒྲོལ་མའི་འབྲེལ་བ་ནི་མིང་ཙམ་དུ་གྱུར་ལ། ཁོ་དང་མཚོ་མོའི་འབྲེལ་བའང་ད་ནི་མིང་ཙམ་དུ་གྱུར་སོང་།
རང་གིས་བསམ་པ་རྣམ་དག་གིས་ཕར་ལ་འབྲེལ་འདྲིས་བྱེད་དུས། ཕ་རོལ་བོ་ཡིད་མི་ཆེས་པའི་རྣམ་འགྱུར་གྱིས་རྒྱང་ལ་འགྱེད་པ་ནི་སྙིང་ལངས་སྤྱད་ཅིག་རེད་ཨང་། ཟླ་བས་མཚོ་མོའིQQདང་མོས་བསྐུར་བའི་ཡི་གེ་མང་བོ་དང་ལྷན་དུ་མངོན་མེད་ཤུལ་མེད་དུ་བཟོས་རྗེས། བུད་མེད་ནི་མ་གཞི་ནས་རྩེད་ཆས་བྱེད་རྒྱུ་དག་དག་རེད་ཨང་སྙམ། མཚོ་མོའིQQབསུབས་ཚར་ནའང་། མཚོ་མོའི་ཟླ་བ་རུ་བཏགས་པའི་ཁོའི་QQདྲ་མིང་གི་ཡིག་འབྲུ་རེ་རེས་ཁོ་ལ་ཁོང་དགོད་ཅིག་ཤོར་དུ་བཅུག་ལ། དེ་ནི་ཡི་ཆད་པའི་དངན་པ་ཐུང་ངུ་ཞིག་དང་འདྲ་བྱུང་།
ཟླ་བའི་མལ་ཁང་དུ་ལ་ལས་གློག་བརྙན་ལ་ལྟ་བཞིན་འདུག་ལ། ལ་ལ་རོལ་རྩེད་ལ་གཡེང་འདུག ལ་ལ་མལ་ལ་ལོག་ནས་གཉིད་ལ་ཡུར་འདུག ཟླ་བའང་མལ་ལ་ལོག་ནས་གཡས་འཁོར་གཡོན་འཁོར་ངང་འདང་མང་བོ་ཞིག་བརྒྱབ་རྗེས། རང་གི་དྲ་མིང་མུན་པ་འཇམ་པོར་བརྗེས་ལ། དྲ་མིང་གཤམ་གྱི“ང་ནི་མཚོ་ལ་ལྷུང་བའི་ཟླ་བ་དེ་ཡིན”ཞེས་པའི་ཚིག་ཐུང་དེའང“ང་ནི་ཁེར་རྐྱང་གི་མུན་པ་འཇམ་པོ་ཞིག་ཡིན”ཞེས་པར་བརྗེས།ད་དུངQQབར་སྟོང་དུ“མཚོ་མོ་ཟླ་གཟུགས་རུམ་པའི་མཚོ་མོ་མ་རེད། ཟླ་བ་མཚོ་ལ་ལྷུང་བའི་ཟླ་བ་མ་རེད།”ཅེས་སྤེལ་མ་ཐག བདེ་སྐྱིད་སྒྲོལ་མས་དཔྱད་གླེང་གི་ཚུལ་དུ“དེ་ན་ཅི་རེད།”ཅེས་སྤེལ་བྱུང་། ཁོས་ཚིག་ཐུང་འདི་ལ་ལན་ཅི་ཡང་མ་སློག་པར། ཐད་ཀར་བདེ་སྐྱིད་སྒྲོལ་མའི་QQའཕྲིན་ལམ་དུ“མཚོ་མོ་ནི་སའི་གོ་ལའི་བརྩེ་དུངས་ཀྱི་མིག་ཆུ་རེད།”ཅེས་བསྐུར།
“ཁྱོད་ཀྱིས་རང་ཉིད་ཟླ་བ་ཡིན་པ་བརྗེད་པ་མ་ཡིན་ནམ།༼ཁོག་དགོད་ཀྱི་པར་རིས་ཤིག༽”
“ཁྱོད་ལ་མཚོ་མོ་དང་ངེད་གཉིད་ལ་འབྲེལ་བ་ཡོད་པ་སུས་བཤད་པ་ཡིན།”
“ཁྱོད་གཉིས་ཀྱིQQངས་སྦྲེལ་ཡོད་པས་དྲ་མིང་འདོགས་སྟངས་ལ་བལྟས་ཏེ་ཤེས་པ་ཡིན། མཚོ་མོའི་ཟླ་བ་གློ་བུར་དུ་མུན་པ་འཇམ་པོ་རུ་གྱུར་སོང་བ་ཅི་རེད།༼བགད་ནས་ཡོད་པའི་པར་རིས་ཤིག༽”
“ཅི་ཡང་མ་རེད། མཚོ་མོ་ལ་འབྲེལ་ཐག་བཅད་ཟིན།”
“ཁྱོད་འདི་དངོས་གནས་མགྱོགས་པ་ལ་ཨང་།”
“དེ་ཟེར་ན།”
“བུ་མོ་དག་དང་འབྲེལ་ཐག་བཅད་ན་མགྱོགས་པོ་ལ་ཟེར་བ་ཡིན།༼ཁོག་དགོད་ཀྱི་པར་རིས་ཤིག༽”
“ང་མགྱོགས་སོང་བ་མ་རེད། ཁྱོད་ཚོ་དལ་སོང་བ་རེད།”
“མཚོ་མོར་འབྲེལ་ཐག་གཅོད་དོན་ཅི་ཡིན།”
“ཁྱོད་དང་འདྲ་བར་མོས་ཀྱང་ང་བློ་གཏད་མེད་པ་ཞིག་ཏུ་བརྩིས་འདུག”
“བློ་གཏད་མེད་དུ་འཇུག་བྱེད་རང་གིས་བསྒྲུབས་པ་རེད། ང་ཚོ་ལ་ཁག་འགེལ་མ་བྱེད།”
“བློ་གཏད་མེད་དུ་འཇུག་བྱེད་ཁྱོད་ཚོ་རེད། བུད་མེད་དག་རེད། གལ་སྲིད་ངའི་འཇིག་རྟེན་ལ་བུད་མེད་ཁྱོད་ཚོ་མེད་ཚེ། ངའང་སྔར་བཞིན་བློ་གཏད་མེད་པ་ཞིག་ཏུ་ག་ལ་བརྩི། བརྩི་མི་སྲིད།”
“ཨོ། དེ་ན་བུད་མེད་དག་ལ་འབྲེལ་བ་མ་བྱ་རོགས། ངས་བལྟས་ན་ཁྱོད་བུད་མེད་མེད་ན་ཁེར་རྐྱང་ངང་འཚོ་ཐུབ་པའི་མི་མ་རེད།༼ཁོག་དགོད་ཀྱི་པར་རིས་ཤིག༽”
“འབྲེལ་བ་བྱེད་ཀྱིན་མེད། ངའི་QQནང་ན་ང་ལ་འབྲེལ་བ་བྱུང་ཟིན་པའི་བུད་མེད་གཅིག་གིQQཡང་མེད། གལ་སྲིད་གཅིག་ཡོད་ཚེ། ཁྱོད་ཡིན་སྲིད། ཁྱོད་ཅི་འདི་མེད་པར་ལུས་འདུག འུ་གཉིས་ཀྱི་བར་དུ་བྱུང་བའི་འབྲེལ་འདྲིས་ནི་དགའ་རོགས་ཀྱི་ཚུགས་ཀ་བཟུང་བའི་གྲོགས་པོའི་བར་གྱི་འབྲེལ་འདྲིས་དེ་ཙམ་ཡིན་པས་རེད།”
“བུད་མེད་དག་ལ་ཡིན་གཅིག་མིན་གཉིས་དགའ་རོགས་བསྒྲིགས་ནས་ལུས་འབྲེལ་བྱ་དགོས་དོན་ཅི་ལ་ཡོད། གྲོགས་པོ་བསྒྲིགས་ནའང་ལོས་ཆོག ངས་འུ་གཉིས་ཀྱི་བར་ལ་དོན་དག་ངན་པ་ཅི་ཡང་བྱུང་དུ་འཇུག་མི་འདོད་ལ། ཕན་ཚུན་ལ་སེམས་ཀྱི་རྨ་ཁ་ཅི་ཡང་བཟོ་མི་འདོད་པས། འབྲེལ་བ་འདི་བཟུང་བ་ཡིན།”
“ཡ་ཡ། སེམས་པ་སེམས་ཀྱིས་ཤེས་ཡོད། འུ་གཉིས་གྲོགས་པོ་བཟང་བོར་འགྱུར་བར་སྨོན།”
“ཡ་ཡ། མཚོ་མོ་ནི་བུ་མོ་བཟང་བོ་ཞིག་རེད། རྩོད་རྒྱུ་ཆེན་པོ་མེད་ན་འབྲེལ་ཐག་མ་བཅད་ན་བཟང་སྙམ།”
“ཡ་ཡ། ཤེས་སོང་། ང་ལ་གཉིད་འབབ་ཀྱིན་འདུག གནས་སྐབས་སུ་བདེ་མོ་བྱོས།སང་ཉིན་འཕྲད།”
“གཟིམ་ས་བདེ།”
ཟླ་བས་ཀྱང་གཟིམ་ས་བདེ་ཞེས་བསྐུར། བསྐུར་ནས་ཅང་མ་འགོར་བར། ཁོས་རང་གི་ཡིད་ན་ད་དུང་དྲི་བ་གཅིག་ལྷག་འདུག་པ་ཤེས་པས། མྱུར་དུ་བདེ་སྐྱིད་སྒྲོལ་མར་འདི་ལྟར་བསྐུར།
“སྐུད་ལམ་ན་ཨེ་ཡོད། ང་ལ་ད་དུང་འདྲི་རྒྱུ་ཞིག་འདུག ཁྱོད་ཀྱིས་མཚོ་མོ་དང་ངེད་གཉིས་ཀྱིས་སློབ་ཁང་གི་བར་ཁྱམས་ན་ཁ་ཆད་བཏབ་ཡོད་པ་ཅི་ལྟར་ཤེས་པ་ཡིན།”
“ངས་ཅི་ཡང་མ་ཤེས། ཉིན་མོ་དེར་ངས་ཁྱོད་སློབ་ཁང་གི་བར་ཁྱམས་ན་མཚོ་མོའི་ཕྱོགས་སུ་འགྲོ་བཞིན་པ་མཐོང་བྱུང་། མཚོ་མོས་འུ་གཉིས་ཀྱི་འབྲེལ་བ་ཤེས་ཡོད་པ་འདྲ། དོགས་མི་བདེ་བའི་ངང་ངའི་གདོང་ལ་བལྟས་པས། ངས་ཀྱང་འགྲོ་ཞོར་དུ་མོ་ལ་བལྟས་ནས་འཛུམ་ཙམ་བྱས་པ་ཡིན། ཅི་རེད། མཚོ་མོ་དང་འབྲེལ་ཐག་གཅོད་དོན་ང་ལ་འབྲེལ་བ་ཡོད་དམ། ཡོད་ན་ང་དངོས་སུ་སོང་ནས་མོ་ལ་འགྲེལ་བཤད་བྱས་ཆོག”
“མེད། མེད། དེ་འདྲ་ཞིག་མ་རེད། ངས་སྟེས་དབང་མ་རེད་བསམས་སོང་། རང་དགར་དྲིས་པ་ཡིན། དོན་དག་ཅི་ཡང་མེད། གཟིམ་ས་བདེ།”
ཟླ་བས་ཁྱོད་ཀྱིས་ངེད་གཉིས་ཀྱིས་ལུས་རྩལ་ར་བ་ན་ཁ་ཆད་བཏབ་ཡོད་པ་ཇི་ལྟར་ཤེས་པ་ཡིན་ཞེས་འདྲི་བསམས་མོད། དེ་ལྟར་མ་དྲིས་པར་སླར་ཡང་གཟིམ་བདེ་ཞུས་རྗེས། མཚོ་མོ་དེ་འདྲའི་དོགས་པ་ཞིག་ཟ་དོན་ཅི་ཡིན་ནམ། དངོས་གནས་སྙིང་བོ་མི་འདུག་སྙམ། མགོ་བོ་རུམ་ལ་བཏུམས་ནས་གཉིད་རྩིས་བྱས་མོད། གཉིད་ཀྱི་སྨུག་པ་རྒྱང་ལ་ཡལ་བས། ཁོས་མགོ་བོ་དགྱེ་ནས་དུ་རྐང་གཅིག་ལ་མེ་བསྒོས། དུ་བ་སྔོ་ལོག་གེར་འཐེན་ཞོར་གྱང་ངོས་ལ་ཅེར་ནས་བསྡད། གྱང་ངོས་ལ་སྦྱར་བའི་ཤོག་བུའི་སྟེང་ན་འདབ་མ་གྲོལ་བའི་མེ་ཏོག་གློ་ཁ་དག་ཚོན་མདངས་ཀྱིས་བཀྲག་ནས་མིག་ལ་འཚེར་ཡོང་།
ཁོས་མཚོ་མོ་ལ་ཁྱོད་མེ་ཏོག་ཡིན་ནམ་ཞེས་དྲིས་པ་དྲན་ཞིང་། མཚོ་མོས་ཡིན་ཞེས་ཨ་ལན་བྱིན་པ་དྲན་མ་ཐག་ཏུ་ཁེར་དགོད་ཅིག་བྱས་ཤིང་། བུད་མེད་འདི་དག་ལའང་དངོས་གནས་རློམ་རྒྱུ་ཞིག་མི་འདུག མོའི་མེ་ཏོག་ལེན་མཁན་བཀྲ་ཤིས་དོན་འགྲུབ་རེད་ཟེར་བ་མ་ཡིན་ནམ་སྙམ། དེ་ལྟར་ཡུད་ཙམ་ལ་བསམ་གཞིག་ཏུ་གཡེང་རྗེས་དུ་རྐང་གི་སྣེ་མོ་སྒོ་འགྲམ་གྱི་སྙིགས་སྒམ་ཕྱོགས་ལ་གཡུགས་རྗེས། མགོ་བོ་རུམ་ལ་བཏུམས་ནས་གཉིད་ལ་ཡུར་མགོ་བརྩམས།
ཟླ་བས་ཁེར་རྐྱང་གི་མཚན་མོ་འདི་རུམ་ནས་གཉིད་ལ་ཡུར་ཐུབ་བམ། ཕྱི་རོལ་གྱི་ནམ་མཁའ་སྔར་བཞིན་ནག་རོག་གེར་མུན་པས་བཟུང་འདུག
༤
མཚོ་མོ་མལ་ཁང་དུ་ལོག་རྗེས། དུས་རྒྱུན་གྱི་གོམས་སྲོལ་དུ་གྱུར་བའི་ཉལ་ཁར་ངོ་འཁྲུད་པའི་ལས་ལའང་སྤྲོ་བ་ཏིལ་ཙམ་མེད་པར་ཐད་ཀར་མལ་ཐུལ་དུ་འཛུལ་ནས་གཉིད་མགོ་བརྩམས། འདང་རྒྱག་ཡོད་ཚད་ཡལ་བར་གྱུར་ནས་མྱུར་དུ་གཉིད་སོང་ན་བསམས་མོད། གཉིད་ནི་ཅི་ལྟར་བསྒུགས་ཀྱང་ཡོང་ཐབས་བྲལ་བས། མོས་ཁ་པར་གྱི་མཉན་ཆས་རྣ་ནང་ལ་བཙུགས་ཏེ་གང་འདོད་དུ་གླུ་དབྱངས་ལ་ཉན་ཞོར།QQནང་ལ་མིག་གཡེང་བྱས། མོ་ཟླ་བའི་མཚོ་མོ་རུ་བཏགས་པའི་རང་གིQQདྲ་མིང་ལ་ཅེར་ནས་ཡུན་རིང་བསྡད་རྗེས། འདང་ཞིག་ཕོག་པ་ལྟར་ཟླ་བའི་མཚོ་མོ་ཞེས་པའི་ཟླ་བ་དང་འབྲེལ་སྒྲ་བསུབས་ནས་མཚོ་མོ་གཅིག་པུ་རུ་བརྗེས་ཤིང་། དྲ་མིང་གཤམ་གྱི“ང་ནི་ཟླ་བ་རུམ་པའི་མཚོ་མོ་དེ་ཡིན།”ཞེས་པའི་ཚིག་ཐུང་དེའང་བསུབས་སོང་། ཤུལ་དུ་ཅི་ཞིག་འབྲི་རྒྱུ་མ་ཤེས་པར་ཡུད་ཙམ་ལ་ཧད་དེ་བསྡད་ཅིང་། མཐར“བརྩེ་དུངས་ནི་རྨི་ལམ་ཐེངས་གཅིག”ཅེས་གཏགས།QQའཆར་ངོས་སུ་གཞན་གྱིས་ཚུར་ལ་སྦྲེལ་བའི་བརྡ་ཞིག་ཤར་བྱུང་། མོས་ཕོ་རོལ་བོའིQQ སྦྲེལ་ཐག་དང་ལེན་བྱས་མ་ཐག བདེ་མོ་ཞེས་པའི་ཡིག་འབྲུ་གཉིས་འཆར་ངོས་ལ་ཐག་སྒྲ་ཞིག་དང་ལྷན་དུ་ཤར་བྱུང་།
“བདེ་མོ་ཡིན། ཁྱོད་སུ་ཡིན།”
“QQབར་སྟོང་ལ་ལྟོས་དང་ཤེས།”
“ཨོ། ཁྱོད་ཡིན་ནམ།”
“ང་ཡིན། ལོ་ཕྱེད་ཙམ་ལ་མ་ཐུག་པར་བརྗེད་སོང་བ་ཨེ་རེད།”
“ང་ལ་ཁྱོད་བརྗེད་མི་ཆོག་པའི་རྒྱུ་མཚན་ཅི་ཡང་མེད།”
“ཡིན་ཡང་། བརྗེད་མི་སྲིད་པ་ངས་ཀྱང་ཤེས་ཡོད། ཁ་ལོ་བཏོད་པའི་དགའ་ལོ་མགོ་དཀར་པོར་གྱུར་རུང་མི་བརྗེད་ཟེར་སྲོལ་ཡོད་ཐལ།བདེན་ཞད་ལོས་ཡོད།”
“ང་ལ་མཚོན་ན་དེ་འདྲ་ཞིག་མིན།”
“ཨོ་དེ་ན་བཟང་གི”
“ང་ལ་འདྲི་རྒྱུ་ཞིག་འདུགདྲང་མོར་ལན་བཏབ་ན་ཆོག་གམ།”
“ལོས་ཆོག ཤོད་དང་།”
“ཁྱོད་ཀྱིས་ཟླ་བ་དང་ངེད་གཉིས་འབྲེལ་འདྲིས་བྱེད་ཀྱིན་པ་ཅི་ལྟར་ཤེས་པ་ཡིན།”
“སློབ་གྲོགས་ཤིག་གི་ཁ་ནས་གོ་བ་ཡིན། དེའི་རྗེས་སུ་ཁྱོད་ཀྱི་དྲ་མིང་འདོགས་སྟངས་ལ་བལྟས་ཏེ་བདེན་པ་ཡིན་པ་ཤེས་ཡོད།”
“སློབ་གྲོགས་སུ་རེད། ཁོས་ངེད་གཉིས་ལ་འབྲེལ་བ་ཡོད་པ་ཅི་ལྟར་ཤེས་པ་རེད། ངེད་གཉིས་མི་མང་གྲལ་ནས་མ་དགོས་གཅིག་པུར་ཡང་ངོ་ཐུག་མྱོང་མེད། ཁོས་ཅི་ལྟར་ཤེས་པ་རེད། དྲང་མོར་བཤད་རོགས།”
“ཁྱོད་སྤོ་མ་ལངས། ངས་དྲང་མོར་བཤད་ཆོག”
“ང་སྤོ་ལངས་ཀིན་མེད། ངོ་མ།”
“ང་ལ་སྤོ་མི་ལངས་པ་ཁག་ཐེག་བྱ་རོགས། ངས་ཀྱང་བསམ་གཟས་པ་མིན།”
“དོན་ངོ་མ་ཅི་རེད།”
“ཁྱོད་ཀྱིQQངའི་ཁ་པར་གྱི་སྟེང་ནས་ཁ་ཕྱེ་རྗེས་སུབ་རྒྱུ་བརྗེད་འདུག་པས། ང་རྒྱུན་པར་ཁྱོད་ཀྱིQQནང་ལ་གཡེང་བ་ཡིན་ལ། ཁྱོད་ཀྱིས་ཟླ་བ་ལ་འབྲེལ་འདྲིས་བྱེད་པ་དང་ཁ་ཆད་བཏབ་པའང་དེ་ལྟར་ཤེས་པ་ཡིན། ཁྱོད་ནི་ང་དང་ཁ་བྲལ་ནས་ཡུན་རིང་འགོར་ནའང་བརྗེད་པར་དཀའ་བས། ངས་ཁྱོད་ལ་སྣང་འཇོག་ཙམ་བྱས་པ་ལས་ཅི་ཡང་མིན། ཁྱོད་ཀྱི་མི་སྒེར་གྱི་གསང་བ་ལ་བརྩི་འཇོག་མ་བྱས་པས། འདིར་ཆེད་དུ་དགོངས་དག་ཞུས་པ་ཡིན། དགོངས་པ་མ་ཚོམ། ཁྱོད་གཉིས་ལ་བར་ཆད་བཟོས་སོང་།”
“ཨ་བ་ཨ་མ། དགོངས་དག་ཞུ་རྒྱུར་ངོ་མི་ཚའམ། ཁྱི་རྒན།”
“ངས་ཁྱོད་ལ་དྲང་མོར་བཤད་པ་ཡིན། ངས་ཁྱོད་ཀྱིQQགསང་གྲངས་བརྐུས་པ་མིན། ཁྱོད་རང་གིས་སུབ་རྒྱུ་བརྗེད་སོང་བ་རེད། དེ་ང་ལན་ནམ། འཇིགས་པོ་མ་བཅའ། ངོ་ཚ་རྒྱུ་སུ་ལ་ཡོད་མེད་རང་རང་ལ་གསལ་ནི་རེད། ང་མེ་ཏོག་ཡིན་ཞེས་ཤོབ་གཏམ་རྒྱུར་ངོ་མི་ཚའམ། ངོ་མ། བཟང་བྱས་ན་བཟང་ངོ་མི་འདུག བདེ་མོ་བྱོས།”
བཀྲ་ཤིས་དོན་འགྲུབ་ཀྱིས་བསྐུར་བའི་ཡི་གེ་འདི་དག་ནི་མདའ་མོ་རེ་རེ་ལྟར་འཕྲོ་རིམ་འཕྲོར་མཚོ་མོའི་སེམས་ལ་ཟུག་པར་གྱུར་བས། ངུ་སྒྲ་མེད་པའི་མིག་ཆུའི་རྒྱུན་ནི་རྨ་ཁའི་ནང་གི་ཁྲག་དྲོན་དང་འདྲ་བར་མཁུར་མགོ་བརྒྱུད་ནས་ཤམ་ཤམ་བཞུར་བྱུང་།
མུན་པ་འཁྱིལ་བའི་མལ་ཁང་ནི་སྔུར་སྒྲ་རེ་གཉིས་ཀྱི་འདེགས་འཇོག་ཁྲོད་ན་ཁུ་སིམ་མེར། ཡོད་ཚད་གཉིད་དུ་ཡུར་འདུག མཚོ་མོ་གཅིག་པུས་མལ་ཐུལ་གྱི་གོང་བ་ཁ་ནང་ལ་བརྫངས་ཏེ་ངུ་སྒྲ་རེ་རེ་དབུགས་རྒྱུན་ལ་བསྲེས་ནས་སད་ཡོད།
མཚོ་མོའི་ངུ་སྐད་གཉོམ་པོ་དལ་བ་དལ་བུར་རང་གི་དབུགས་རྒྱུན་ལ་འདྲེས། མལ་ཁང་གིས་སྔར་བཞིན་ཁུ་སིམ་མེར་མུན་པ་མཐུག་པོ་ཞིག་རུམ། ནམ་གུང་འདིར། མོ་གཉིད་དང་བྲལ་ནས་ཡར་འཕག་མར་འཕག་ལན་མང་བྱས་རྗེས། སྒེའུ་ཡོལ་འཐེན་ནས་ཕྱི་ལ་བལྟས་པ་ན། ཡོད་ཚད་གཉིད་དུ་ཡུར་ཞིང་། ཕྱི་རོལ་གྱི་འདུ་འཛི་དང་འུར་ཟིང་ཡང་ཞི་ཞིང་འཇགས། མཚན་མོ་འདིའི་ནམ་མཁའ་མུན་པས་གཡོགས་འདུག་པ་སྨན་ཤར་གྱི་སེམས་པ་སྡུག་གིས་བཟུང་བ་དང་འདྲ། མཚན་མོ་འདིའི་ནམ་མཁའ་སྨག་གིས་བསྡམས་པས། ས་ཆེན་གྱི་པང་ལ་འཁྱིལ་བའི་ཁེར་རྐྱང་གི་མཚོ་མོ་རེ་རེས་ཀྱང་རང་གི་རླབས་རྒྱུན་ལ་ཉན་ཡོད། སེམས་སྒྲ་ལ་ཉན་ཡོད། མོ་ཉལ་ཁང་སྒོ་ཡི་གློག་སྡོང་གི་འོད་སྣང་མོག་པོ་དེ་ལ་ཅེར་ཏེ་ལུས་ཤིང་། རྐུབ་སྟེགས་ཟད་པོ་དེ་ལ་འགོས་པའི་གློག་འོད་ཁེར་ཆད་དེ་ནི་ཟླ་འོད་འཇམ་པོ་ཞིག་ལྟར་སེམས་ལ་ལྷུང་།
མོའི་སེམས་ལ་ཅི་ཡང་མ་དྲན་མོད། མོ་སྔར་བཞིན་གློག་འོད་ཁེར་ཆད་དེ་ལ་ཅེར་ཏེ་ལུས། །༡
“ཁྱོད་ཀྱིས་ང་ལ་ཁ་ཡ་མི་བྱེད་དོན་ཅི་ཡིན།”
“ངས་ཁྱོད་ལ་ཁ་ཡ་བྱེད་འདོད་པས་ཡིན།”
“ཁ་ཡག་མ་བཤད། དྲང་མོར་ཤོད། འུ་གཉིས་ཀྱིས་ཁ་བརྡ་བྱས་ནས་ཡུན་རིང་འགོར་ཡོད་པ་མ་ཡིན་ནམ། ངོ་ཚ་དགོས་དོན་ཅི་ཡོད།”
“ངོ་ཚ་དགོས་དོན་མེད་ན་ཁྱོད་ཀྱིས་ཚུར་ལ་ཁ་མི་གྲག་དོན་ཅི་ཡིན།”
“ཁྱོད་སྐྱེས་པ་ཕོ་ཞིག་གིས་སྔོན་ལ་ཁ་མི་གྲག་ན། ང་བུ་མོ་ཞིག་ལ་ཅི་ཁག”
“རྗེས་མར་ཁ་ཡ་བྱེད་ཁོ་ཐག་ཡིན།”
“ད་ཅི་ཆ། སྔོན་མར་ཡང་ཁྱོད་ཀྱིས་འདི་ལྟར་བཤད་པ་མ་ཡིན་ནམ། ང་ལ་ཁ་ཡ་བྱེད་མི་ཐུབ་རྒྱུ་ཅི་འདུག ཁྱོད་ང་ལ་སྐྲག་གམ།ངའི་མགོ་ན་རྭ་མེད། ངའི་ངོ་ན་རྨ་མེད། ང་ལ་ངོ་གདོང་ཡག་པོ་ཞིག་མེད་ཀྱང་མ་མཐའང་གཟུགས་གཞི་ཡག་པོ་ཞིག་ཡོད། ཁྱོད་ང་ལ་སྐྲག་དགོས་དོན་ག་ལ་ཡོད། དེ་ཨེ་རེད།”
“དེ་ལོས་ཡིན། ཧེ་ཧེ།”
“དགོད་རྒྱུ་ཅི་ཡོད།”
“ཅང་མ་རེད། ཁྱོད་འདི་ངོ་མ་བུ་མོ་སྣང་ཡངས་འདྲིས་སླ་བ་ཞིག་རེད། ཁྱོད་ཀྱིས་ཚུར་ལ་འདི་ལྟར་མ་བཤད་ན། ངས་ཁྱོད་ཀྱི་གཟུགས་གཞི་ཚིགས་དྲུག་སྨྱུག་མ་རེད་ཅེས་བཤད་རྒྱུ་བརྗེད་འདུག”
“ང་སྣང་ཡངས་ཤིག་ག་ལ་ཡིན། འདྲིས་སླ་བ་ཞིག་ཀྱང་མིན་པས། ཁྱོད་ཀྱིས་ཐེངས་གཉིས་ལ་ཐུག་ཀྱང་ཁ་ཡ་བྱེད་མ་ཕོད་པ་མ་ཡིན་ནམ། སྐད་ཆ་ལ་ལ་ཞིག་ཁྱོད་ཀྱིས་མ་བཤད་ཀྱང་། ངས་གསལ་བོར་ཤེས་ཡོད་པས།ངས་ཁྱོད་ཀྱི་ཚབ་ཏུ་བཤད་ཀྱང་མི་ཆོག་པ་ཅི་ཡོད། དཔེར་ན་ངའི་གཟུགས་གཞིའི་ཐད་ཀྱི་སྐད་ཆ་དེ་ལྟར།”
“སྐད་ཆ་ལ་ལ་ཞིག་ངས་དུས་ལྟར་བཤད་མེད་ཚེ། ཁྱོད་ཀྱིས་འདི་ལྟར་ཚུར་ལ་སྔོན་བརྡ་བཏང་ནའང་ཡག་པོ་རེད།”
“ག་ལ་ག་ལ། ཀུ་རེ་ཡིན། ངས་ཁྱོད་ཀྱིས་ཅི་ཞིག་འདོད་ཀྱིན་པ་ག་ལ་ཤེས། དངོས་གནས་ཤེས་ཁག་པོ་རེད། ཁྱོད་ཀྱིས་ང་ལ་ཁ་ཡ་མི་བྱེད་དོན་ཅི་ཡིན། དྲང་མོར་ཤོད།”
“དྲང་མོར་བཤད་ན། རྒྱུ་རྐྱེན་ཅི་ཡིན་ངས་ཀྱང་བཤད་ཁག་པོ་རེད། མ་ཐུག་སྔོན་ལ་ཁ་ཡ་བྱེད་རྩིས་ཡིན་མོད། ཁྱོད་ཀྱི་གམ་ལ་ཐོན་དུས་ཅི་ཞིག་བཤད་དགོས་པའང་མི་ཤེས་པར་དབུགས་ཁེགས་ལ་བྱེད་པས་ཁ་ཡ་མ་བྱས་པར་བུད་སོང་བ་ཡིན། དགོངས་དག”
“འདི་ཐེངས་སྔོན་མའི་རྒྱུ་རྐྱེན་མ་ཡིན་ནམ། ཐེངས་སྔོན་མར་ཁྱོད་དངོས་གནས་འཚབ་ཀྱིན་འདུག ཅི་ཁག”
“ད་ཐེངས་འཚབ་ཀྱིན་པ་མ་ཤེས་སམ།”
“མ་ཤེས། ད་ཐེངས་ཁྱོད་ཀྱིས་ཁ་གྲག་རྩིས་རེད་བསམ་མོད། གམ་ལ་ཐོན་པ་ན་གློ་བུར་དུ་མགོ་སྒུར་ནས་བུད་ཐལ། ཁྱོད་ཀྱིས་ངའི་མཐའ་འཁོར་ནས་ངོ་ཤེས་ཤིག་མཐོང་བྱུང་ངམ། ངོ་ཚ་དགོས་དོན་ཅི་ཡིན། ལུས་རྩལ་ར་བའི་ནང་ན་མི་མང་བོ་ཡོད་པས་ཨེ་རེད།”
“མིན། དགོངས་པ་མ་ཚོམ། མི་མང་ནའང་ང་དེ་ཚོར་ངོ་ཚ་དོན་ཅི་ཡོད།”
“དེ་ངས་ག་ལ་ཤེས། ཡང་གཅིག་བཤད་ན་ཁྱོད་ཀྱི་ངོ་ཤེས་དང་གྲོགས་པོ། དགའ་རོགས་སོགས་ཡོད་པས། དེ་དག་གི་སྔུན་ནས་འུ་གཉིས་ཀྱི་འབྲེལ་བ་ཤེས་འགྲོ་བར་དོགས་པ་ཡིན་སྲིད།”
“ངའི་དགའ་རོགས་ཁྱོད་མ་ཡིན་ནམ།”
“ཕན་ཚུན་ལ་ཁ་མི་གྲག་པའི་དགའ་རོགས་ཤིག་ཡོད་དམ།”
“དུས་རྒྱུན་ཁྱོད་ལ་ཡི་གེ་བསྐུར་ནས་ཁ་བརྡ་བྱེད་པ་འདིའང་ཁ་གྲག་སྟངས་ཤིག་མ་ཡིན་ནམ།”
“ཡིན་སྲིད། འུ་གཉིས་རྒྱུས་ཡོད་དུ་གྱུར་ཡོད་པའང་རྒྱུ་རྐྱེན་འདིའི་དབང་གིས་ཡིན་སྲིད།”
“ངས་ཀྱང་ཁྱོད་ལ་ཁ་ཡ་བྱེད་མ་ཐུབ་པ་མ་གཏོགས་ཁྱོད་ངའི་སེམས་ཀྱི་དགའ་རོགས་ཡིན་པ་ལོས་ཤེས།”
“ཤེས་སམ། ངས་ལན་རེར་ཁྱོད་ཀྱིས་ཁྱོད་ཀྱི་དགའ་རོགས་བདེ་སྐྱིད་སྒྲོལ་མ་རེད་བསམ་བཞིན་འདུག་སྙམ།”
“དེའི་དོན་ཅི་རེད། གོ་བ་མ་ལོག”
“དེའི་དོན་དེ་རེད།”
“ཧ་གོ་མ་བྱུང་།”
“འུ་གཉིས་ཀྱིས་དང་ཐོག་སློབ་ཁང་གི་བར་ཁྱམས་ནས་ཁ་ཆད་བཏབ་དུས་ཁྱོད་ཀྱིས་བདེ་སྐྱིད་སྒྲོལ་མ་མ་མཐོང་ངམ།”
“མ་མཐོང་། བདེ་སྐྱིད་སྒྲོལ་མ་དང་ངེད་གཉི་ཀའི་དོན་དག་ནི་འདས་སོང་གི་གཏམ་རྒྱུད་ཙམ་རེད། ད་ནི་རྟ་བརྒྱུགས་ནས་རྡུལ་འཇགས་ཤུལ་རེད། ངེད་གཉིས་ལ་འབྲེལ་བ་ཅི་ཡང་མེད།”
“དངོས་གནས་མ་མཐོང་ངམ། ཁྱོད་ངའི་ཕྱོགས་སུ་ཡོང་དུས་བདེ་སྐྱིད་སྒྲོལ་མ་ཏག་ཏག་ངའི་སྔུན་ནས་ཁྱོད་ཀྱི་ཕྱོགས་སུ་བུད་ཐལ། བར་ཁྱམས་ཀྱི་མུན་པ་སྲབ་བུ་དེའི་ཀློང་ནས་མོས་ཡང་དང་ཡང་དུ་མགོ་བོ་རྒྱབ་ལ་འཁོར་ནས་ང་ལ་ལྟ་ཞོར་དང་སྔུན་ལ་དགྱེ་ནས་ཁྱོད་ལ་ལྟ་ཞོར་བུད་སོང་། འུ་གཉིས་ཀྱི་བར་ནས་ནག་ཡོར་ཡོར་རྒྱང་ལ་ཡལ་བའི་རྒྱབ་གཟུགས་དེ་ད་དུང་ངའི་མིག་ལ་ཞག་འདུག”
“འོད་འཕྲོ་ཕྱོགས་ཤིག་གིས་ཡིན་ནམ། ངས་དངོས་གནས་བདེ་སྐྱིད་སྒྲོལ་མ་མཐོང་མ་བྱུང་། ཁྱོད་ཀྱི་རྒྱབ་ཕྱོགས་ཀྱི་སྒེའུ་ཁུང་ཆུང་ཆུང་དེ་ལས་འོད་འཕྲོས་ཡོད་པས། སློབ་ཁང་གི་བར་ཁྱམས་ནས་ཁྱོད་ཀྱི་ངོ་གདོང་རབ་རིབ་ཏུ་སྣང་བྱུང་། ནན་ཏན་གྱིས་བལྟས་པ་མིན་ཚེ་ཁྱོད་ཀྱང་ངོས་ཟིན་ཁག་པོ་འདུག་པས། ངས་ཁྱོད་ཀྱི་གམ་ན་འགྲོ་བ་དེ་དག་སུ་ཡིན་ག་ལ་ཤེས།”
“དེ་ན་ཁ་ཡ་མི་བྱེད་དོན་ཅི་ཡིན།”
“ཁྱོད་ལ་ཐེངས་དང་པོར་ངོ་ཐུག་པ་ཡིན་པས་ངོ་ཚ་བྱུང་།”
“ཁྱོད་བུད་མེད་མང་བོར་འགྲོགས་མྱོང་བ་མ་ཡིན་ནམ། དེ་འདྲའི་ངོ་ཆུང་ཞིག་ག་ལ་ཡིན། ངོ་ཚ་དགོས་པ་ཁྱོད་མ་རེད། བདེ་སྐྱིད་སྒྲོལ་མས་འུ་གཉིས་ཀྱིས་ཁ་ཆད་བཏབ་ཡོད་པ་ཤེས་ཡོད་པ་འདྲ། ང་སློབ་ཁང་དུ་ཐོན་དུས། མོས་ང་ལ་ཡང་དུ་ཡང་དུ་བལྟས་ནས་ཁྲེལ་དགོད་བྱེད་ཀྱིན་འདུག སློབ་གྲོགས་ཁ་ཤས་ཀྱིས་ཀྱང་མོའི་རྣམ་འགྱུར་གྱི་ནང་དོན་གོ་ཡོད་པ་འདྲ་བས། ང་དངོས་གནས་ངོ་ཚ་བྱུང་།”
“བདེ་སྐྱིད་སྒྲོལ་མས་ཅི་བཤད་ན་བཤད་དུ་ཆུགས། ཁྱོད་ངོ་ཚ་དགོས་དོན་མེད།”
“ཁྱོད་ངོ་ཚ་བར་རྒྱུ་མཚན་འདྲེན་རྒྱུ་འདུགང་ངོ་ཚ་བར་རྒྱུ་རྐྱེན་མེད་དམ། ངོ་མ་སྐད་ཆ་གནས་ལུགས་མེད་ནི་རེད་ཡ།”
“ཀུ་རེ་ཡིན། སྤོ་མ་ལངས།”
“སྤོ་ལངས་མེད།”
“སྤོ་ལངས་འདུག”
“ངོ་མ་སྤོ་ལངས་མེད། ང་ཁྱོད་ཀྱི་སྟེང་ལ་སྤོ་ལངས་དགོས་པའི་ཚད་ལ་ཐོན་མེད།”
“དེ་འདྲ་ཡིན་སྲིད། ཕན་ཚུན་ལ་ཡིད་ཆེས་བྱས་ན་ཡག་པོ་རེད།”
“ངས་ཀྱང་དེ་ལྟར་བསམས་མོད། དོན་དངོས་ནི་ཅི་འདྲ་ཞིག་ཡིན་པ་སུས་ཤེས།”
“དོན་དངོས་ནི་ཅི་འདྲ་ཞིག་ཡིན་པ་སོ་སོའི་སེམས་ན་གསལ་བོ་ཡིན། ངས་ཁྱོད་ལ་ཐེངས་གཉིས་ལ་ཁ་ཆད་བཏབ་ནས་ཁ་ཡ་མ་བྱས་དོན་ཡང་ངའི་སེམས་ན་གསལ་བོ་ཡིན།”
“ཁྱོད་ཀྱི་སེམས་ན་གསལ་བོ་ཡིན་ནམ། དེ་ན་རང་གི་སྔུན་ན་འགྲོ་བའི་བདེ་སྐྱིད་སྒྲོལ་མའང་རིག་མེད་པ་ཅི་རེད། ཁྱོད་ཀྱིས་དངོས་གནས་བདེ་སྐྱིད་སྒྲོལ་མ་མ་མཐོང་ངམ།”
“ཁྱོད་འདི་དོན་དག་གཅིག་ཡང་ནས་བསྐྱར་དུ་འདྲི་རྒྱུར་དགའ་བོ་འདུག”
“ཁྱོད་ཀྱང་སྐད་ཆ་གཅིག་ཡང་ནས་བསྐྱར་དུ་བཤད་རྒྱུར་དགའ་བོ་འདུག འུ་གཉིས་ཀྱི་གཤིས་ཀ་འདྲ་བོ་འདུག་ཨང་།”
“ཡིན་ན་ཐང་། ངས་དངོས་གནས་བདེ་སྐྱིད་སྒྲོལ་མ་མཐོང་མ་བྱུང་།”
“དེ་འདྲ་ཡིན་སྲིད། བར་ཁྱམས་ཀྱི་འོད་མདངས་མག་མོག་དེ་ལས་མི་གཞན་ངོས་མ་ཟིན་ཟེར་ན་བདེན་མོད། ཉིན་མོའི་ཉི་འོད་འོག་གི་ལུས་རྩལ་ར་བ་ནས་ཀྱང་ངོས་མ་ཟིན་ཟེར་ན་སུ་ཡིད་ཆེས་སམ།”
“ཁྱོད་ཀྱིས་དེ་ཟེར་བ་ཡིན་ནམ། ལུས་རྩལ་ར་བའི་ནང་ནས་ཐུག་དུས་ཀྱང་ང་དངོས་གནས་ངོ་ཚ་བྱུང་། དེ་བས་ཡང་བསྐྱར་ཁ་ཡ་བྱེད་མ་ཐུབ་པ་རེད། ཁྱོད་ང་ལ་ཡིད་ཆེས་མེད་དམ།”
“ང་ཁྱོད་ལ་ཡིད་ཆེས་ཡོད་མེད་ངས་ཀྱང་མི་ཤེས། གང་ལྟར། ངས་ཁྱོད་ལ་ཁ་ཆད་ཐེངས་གཉིས་པ་བཏབ་དུས་ཀྱང་བདེ་སྐྱིད་སྒྲོལ་མའི་ཁྲེལ་དགོད་ཀྱི་མིག་མདངས་ཁྱེར་ནས་ལུས་རྩལ་ར་བར་ཁ་བྲལ་དགོས་བྱུང་། ཁྱོད་ཀྱིས་ཤེས་སམ། འུ་གཉིས་ཀྱི་ཁ་སྐྱེངས་པའི་རྣམ་པ་མོས་མཐོང་འདུག ཁྱོད་ཀྱིས་ང་ལ་ཁ་ཡ་བྱེད་རྩིས་ཀྱིས་གམ་ལ་བཅར་ནས་སྨྲ་བ་མེད་པར་རྒྱང་ལ་སོང་རྗེས། ང་སློབ་ཁང་དུ་འགྲོ་བའི་ལམ་བར་ནས་ཡང་བསྐྱར་མོ་ལ་ཐུག་བྱུང་། ཁྱོད་རང་མོ་ལ་ཐུག་མ་བྱུང་ངམ།”
“མ་ཐུག གལ་སྲིད་ཐུག་བྱུང་ནའང་། ངེད་གཉིས་ལ་འབྲེལ་བ་ཡོད་དམ། གལ་སྲིད་བཀྲ་ཤིས་དོན་འགྲུབ་ལ་ཐུག་ནའང་། ང་ལ་འབྲེལ་བ་ཡོད་མི་སྲིད།”
“དེའི་དོན་ཅི་རེད། ཡང་གཅིག་བཤད་ན་ཁྱོད་ཀྱིས་བཀྲ་ཤིས་དོན་འགྲུབ་རིག་ནས་ང་ལ་ཁ་ཡ་བྱེད་འདོད་མེད་སོང་བའང་ཡིན་སྲིད།”
“བཀྲ་ཤིས་དོན་འགྲུབ་ཀྱིས་ཁྱོད་ལ་དེ་འདྲའི་བག་ཆགས་ཟབ་མོ་དང་ཤུགས་རྐྱེན་ངན་པ་ཞིག་བཞག་ཡོད་དམ། ངས་དངོས་གནས་མ་ཤེས། ཡང་གཅིག་བཤད་ན། ཁྱོད་ཀྱང་བཀྲ་ཤིས་དོན་འགྲུབ་ཀྱི་བུད་མེད་ཡིན་པ་ལས་ང་ལ་འབྲེལ་བ་ཡོད་མི་སྲིད།”
“གླེང་འགེལ་མ་བྱེད། བཀྲ་ཤིས་དོན་འགྲུབ་དང་ངེད་གཉིས་ཀྱི་འབྲེལ་ཐག་སྔ་མོ་ནས་ཆད་ཟིན། རང་སེམས་ན་གནོང་ཡོད་ན། གཞན་སྐྱོན་ལ་ཁག་མ་བཙལ།”
“ཁག་ཅི་ཡང་བཙལ་གྱིན་མེད། འུ་གཉིས་ཀྱིས་ཁ་ཆད་བཏབ་དུས་དེ་གཉིས་ལ་ཁྱོད་ཀྱིས་དངོས་གནས་བཀྲ་ཤིས་དོན་འགྲུབ་མ་མཐོང་ངམ།”
“མ་མཐོང་། ཁྱོད་ཀྱིས་ཁོ་མཐོང་བས་ང་ལ་ཁ་ཡ་མ་བྱས་པ་ཡིན་ནམ།”
“ངས་ཁོ་མཐོང་བྱུང་། ཁོས་འུ་གཉིས་ཀྱིས་ཁ་ཆད་བཏབ་པ་ཤེས་ཡོད་པ་འདྲ། ང་སློབ་ཁང་བར་ཁྱམས་དང་རྩལ་སྦྱོང་ར་བར་མ་ཐོན་གོང་ལ་ཁོས་ངའི་རྗེས་དེད་ཡོད་པ་འདྲ།”
“ཁྱོད་ཀྱིས་ཁོ་མཐོང་བས་ང་ལ་ཁ་ཡ་མ་བྱས་པ་ཡིན་ནམ།”
“ཁྱོད་འདི་ངོ་མ་སྐད་ཆ་གཅིག་ཡང་དང་བསྐྱར་དུ་འདྲི་རྒྱུར་དགའ་ཨང་།”
“ངས་འུ་གཉིས་ཀྱི་བར་ལ་འབྲེལ་བ་ཡོད་ཀྱང་རུང་ལ་མེད་ཀྱང་ཆོག་མོད། ཕན་ཚུན་བར་ལ་གསལ་གསལ་དག་དག་ཅིག་ཡོང་ན་བཟང་སྙམ།”
“ཁྱོད་ཡིད་ཆེས་མེད་སོང་བ་མ་གཏོགས། ངས་ཁྱོད་ལ་རྫུན་གཏམ་ཚིག་གཅིག་ཀྱང་བཤད་མྱོང་མེད། ངས་ཁྱོད་ལ་ཁ་ཡ་མ་བྱས་དོན་ངོ་མ་ངོ་ཚ་བས་ཡིན། རྒྱུ་རྐྱེན་གཞན་པ་ཡོད་མེད་ངས་ཀྱང་མི་ཤེས། ཡིད་ཆེས་བྱེད་མིན་རང་འདོད་གྱིས།”
“ཐེངས་དང་པོར་ངོ་ཚ་བ་ཡིན་ཟེར་ན་རློམ་མོད། ཐེངས་གཉིས་པར་ཡང་ངོ་ཚ་བ་ཡིན་ཟེར་ན་རློམ་ཐབས་མི་འདུག ཁྱོད་རང་དང་ཐོག་བདེ་སྐྱིད་སྒྲོལ་མར་ཐུག་དུས་ཀྱང་ངོ་ཚ་བྱུང་ངམ།”
“བདེ་སྐྱིད་སྒྲོལ་མ་ངེད་གཉིས་ཀྱི་འབྲེལ་བ་སྟེས་དབང་གི་ཐུག་འཕྲད་ཅིག་ལས་ཁ་བརྡ་བྱས་ཏེ་མགོ་བརྩམས་པ་ཡིན་པས། འུ་གཉིས་ཀྱི་དཀའ་ཁག་འདི་འདྲ་བརྒྱུད་དགོས་བྱུང་མེད། འུ་གཉིས་ཐོག་མ་ནས་QQབརྒྱུད་ནས་ངོ་ཤེས་པ་ཡིན་པས། སྔར་བཞིན་འདི་ལྟར་དྲ་ལམ་ནས་ཁ་བརྡ་བྱས་ན་ཐག་ཉེ་ལ་འདྲིས་སླ་བའི་སྣང་བ་ཞིག་རེད།”
“ཨོ་ལེ། འུ་གཉིས་ཀྱི་ལས་སྐལ་དྲ་ལམ་ན་མ་གཏོགས་མེད་པ་འདྲ།”
“ངའི་ནང་དོན་དེ་མིན། གོ་བ་མ་ལོག འུ་གཉིས་ཀྱི་དོན་དག་བདེ་སྐྱིད་སྒྲོལ་མ་དང་བཀྲ་ཤིས་དོན་འགྲུབ་གཉིས་ཀྱིས་ཅི་ལྟར་ཤེས་པ་ཡིན་ནམ། ཁྱོད་ཀྱིས་དེར་འདང་ཨེ་བརྒྱབ། ང་དངོས་གནས་ཡ་མཚར་བོ་འདུག ངས་འུ་གཉིས་ཀྱིས་ཁ་བརྡ་བྱེད་བཞིན་པ་ཉལ་ཁང་ནང་གི་མི་གཅིག་ལའང་ཤེས་སུ་བཅུག་མེད། ཁྱོད་ཀྱིས་མི་གཞན་ལ་འུ་གཉིས་ཀྱིས་ཁ་བརྡ་བྱེད་བཞིན་པ་ཨེ་བཤད།”
“མ་བཤད། ཡུམ། ངའི་སྟེང་ལ་དོགས་པ་མ་ཟ། ང་བུད་མེད་དེ་འདྲ་ཞིག་མིན། ཡང་གཅིག་བཤད་ན་ངས་འུ་གཉིས་ཀྱི་འབྲེལ་བ་ཅི་ཞིག་ཡིན་པ་ངོས་ཟིན་གྱིན་མེད། གཞན་ལ་བཤད་རན་ཞིག་ཡོད་དམ།”
“ངས་ཁྱོད་ལ་དོགས་པ་ཟ་བ་མིན། ཁྱོད་ཀྱིས་ངའི་སྐད་ཆར་གོ་བ་ལོག་པར་ལེན་དོན་ག་རེ་ཡིན་ནམ། ང་ལ་ཡིད་ཆེས་མེད་དམ། ངས་འུ་གཉིས་ལ་འབྲེལ་བ་ཡོད་ཅེས་གཞན་ལ་བཤད་ཡོད་པར་འདོད་དམ།”
“ངས་ངོ་མ་མི་གཅིག་ལའང་མ་བཤད། ཐ་ན་ཉལ་ཁང་ནང་གི་མི་གཅིག་ལའང་ཁྱོད་དང་ཁ་བརྡ་བྱེད་པ་ཚོར་དུ་བཅུག་མེད་པ་ཁག་ཐག་བྱས་ཆོག་གཉི་ཀས་སུ་གཅིག་ལའང་བཤད་མེད་ན་མི་དག་ལ་འདྲེ་ཡིས་བཤད་པ་ཡིན་ནམ།”
“ཡིན་སྲིད། གང་ལྟར་ངས་མ་བཤད། ཁྱོད་ཀྱིས་ངས་གསང་མ་ཚུགས་པར་འདོད་དམ།”
“དྲང་མོར་བཤད་ན་ཁྱོད་ཀྱི་ཅི་བཤད་ལ་གན་འདི་མེད་པའི་བྱ་སྤྱོད་ཀྱིས་ང་ཡིད་ཆད་དུ་བཅུག་བྱུང་།”
“ཁྱོད་འདི་དངོས་གནས་བུ་མོ་རང་སྣང་ཅན་ཞིག་རེད། ངས་ཁྱོད་ལ་ཁ་ཡ་མ་བྱས་པ་འགྲིག་འདུག”
“འགྲིག་ན་བཟང་འདུག འུ་གཉིས་གྱི་བར་ལ་མི་འགྲིག་པ་ཅི་ཡང་མེད། འགྲིག་དང་མ་འགྲིག་མེད་པར་རང་རང་ས་ལ་ཕྱིན་ཆོག”
“ངས་ཀྱང་དོན་མེད་དུ་མི་ཆ་མེད་ཅིག་གི་ཆེད་དུ་འདི་ལྟར་རྩོད་པ་བྱེད་མི་འདོད། བདེ་མོ་བྱོས། འུ་གཉིས་ཀྱི་སྐུད་ལམ་མཚམས་འདི་ནས་བཅད་འཇོག”
༢
“དེ་ལྟར་བྱོས། ང་ལ་བློས་མི་ཐོངས་རྒྱུ་ཅི་ཡང་མེད།”
མཚོ་མོས་ཡི་གེ་འདི་དག་བསྐུར་མ་ཐག་ཏུ་ཁ་པར་གྱི་ངོས་ལ“ཁྱོད་རང་ཁོའི་འབྲེལ་ལམ་དུ་མི་འདུག”ཅེས་ཤར། བློས་མི་ཐོངས་རྒྱུ་ཅི་ཡང་མེད་ནའང་ཟླ་བས་རང་ཉིདQQའཕྲིན་ལམ་ནས་བསུབས་ཡོད་པ་ཤེས་རྗེས། མཚོ་མོའི་སེམས་པ་སྐྱོ་དུབ་བེར་གྱུར། མཚན་མོ་འདི་ནི་སྔར་བཞིན་སྐད་སྒྲ་མེད་པའི་མཚན་མོ་ཞིག་སྟེ། ཡི་གེ་གཏགས་པའི་ཐག་སྒྲ་གསལ་བོ་གཅིག་རྗེས་གཉིས་མཐུད་ངང་སེམས་ཀྱི་དབྱངས་རྟ་རིགས་ཤིག་ལྟར་དུས་ཚོད་གཅིག་ཙམ་གྱི་ཡུན་ལ་གྲག་གྲག་རྗེས། ཡོད་ཚད་གཉིད་ལ་ཡུར་བ་ལྟར་ཁུ་སིམ་མེར་གྱུར། ཁུ་སིམ་མེར་གྱུར་རྗེས་ཀྱི་སྐད་སྒྲ་མེད་པའི་མཚན་མོ་རེ་རེ་ནི་དུས་རྒྱུན་བག་ལྷོད་བདེ་ཡངས་ཀྱིས་ཁྱབ་པ་ཞིག་ཡིན་མོད། དོ་ནུབ་སྐད་སྒྲ་མེད་པའི་ངང་ཚུལ་འདིས་མཚོ་མོའི་སེམས་པ་འོན་དུ་བཅུག་པ་འདྲ། མོ་ཡུན་རིང་ཞིག་ལ་རང་གི་ཁང་བའི་ནང་ལ་ཅེར་ནས་བསྡད་རྗེས། ད་གཟོད་ཕྱོགས་བཞིའི་གྱང་ངོས་གློ་ཁ་ཡིན་པའི་རང་གི་མལ་ཁང་ཆུང་ཆུང་འདི་རུ་གོས་སྒྲོམ་གཅིག་དང་འབོལ་ཁྲི་གཅིག ཅོག་ཙེ་གཅིག ད་དུང་ཐོག་ཏུ་རང་ཉིད་ཉལ་ཡོད་པའི་མལ་ཁྲི་གཅིག་བཅས་ལས་ཅི་ཡང་མེད་པ་རྟོགས་སོང་བ་འདྲ་ལ། དེ་ལྟར་རྟོགས་པར་ཡང་སེམས་ཀྱི་རྩོལ་བ་དྲག་ཏུ་བཏོན་པ་ལྟར། མོ་གཞི་ནས་ཐང་ཆད་འདུག མོའི་ཁང་མིག་གི་མུན་ནག་ལ་འཁྱིལ་བའི་སྔས་འགྲམ་གྱི་གློག་འོད་གཉོམ་པོ་ཁེར་རྐྱང་གི་མཚེའུ་ཞིག་ལྟར་ཞི་ཞིང་འཇགས་ཨང་། མཚོ་མོའི་དྲན་པའང་གཉིད་ཀྱིས་གསབ་མ་ཐུབ་པའི་ཁེར་རྐྱང་གི་མཚེའུ་དེ་ལྟར་ཁང་མིག་འདིའི་ནང་རོལ་ལ་ལྷིང་འཇགས་ཀྱིས་འཁྱིལ་ཞིང་། ལྷིང་འཇགས་ཀྱིས་སྐྱོམ་གྱིན་འདས་སོང་གི་ཆུ་རིས་མང་བོ་གཅིག་རྗེས་གཉིས་མཐུད་ངང་མིག་ལ་བབས་བྱུང་། མོས་མགོ་བོ་རུམ་ལ་བཏུམས་ཤིང་ཡང་ཡང་ཕྱི་ལ་བུད་ནས། དངན་པ་རིང་མོ་ཤུར་ཤུར་ཁོག་ལ་རྔུབ་ཅིང་ཤུར་ཤུར་ཕྱི་ལ་འབྱིན་པ་ནི་ཡ་ཆུང་སྡུག་གི་རྐྱ་མ་བཅོ་བརྒྱད་ཡང་ཡང་བཤིགས་ནས་རྨ་ཁ་འཚེམ་པ་དང་འདྲ།
མོའི་སེམས་ཀྱི་རྨ་ཁ་ཐོག་མ་ནི་བཀྲ་ཤིས་དོན་འགྲུབ་ཀྱིས་བཞག་པ་ཡིན་ལ། མོའི་ལུས་ཀྱི་རྨ་ཁ་ཐོག་མའང་བཀྲ་ཤིས་དོན་འགྲུབ་ཀྱིས་བཏོད་པ་ཡིན། བཀྲ་ཤིས་དོན་འགྲུབ་ནི་མོའི་རྨ་ཁ་ཐམས་ཅད་ཀྱི་བདག་པོ་ཡིན་མོད། ཁོ་དང་བྲལ་ནས་ལོ་ཕྱེད་ཙམ་འགོར་དུས་འདིར། ཁོའི་བདག་དབང་ཡོད་ཚད་ཟླ་བར་དབང་ཡོད། ད་ནི་ཁོ་ལ་ཐོབ་མྱོང་བའི་བརྩེ་དུངས་ཟབ་མོའང་ཟླ་བའི་ཡིན་པས། མོའི་ལུས་ཀྱི་རྨ་ཤུལ་ལ་ཟླ་བས་རེག་མྱོང་མེད་ནའང་། མོའི་སེམས་ཀྱི་རྨ་ཤུལ་ཡལ་ལ་ཉེ་དུས། ལས་བསམ་སར་མི་འགྲོ་གསེག་སར་སོང་ནས་སྐྱིད་སྡུག་ཏུ་གྱུར་ནས་རྨ་ཁ་བཟོས་སོང་བ་ལས་དབང་གི་ཀུ་རེ་ཡིན་ནམ། མཚོ་མོས་ཡང་དང་བསྐྱར་དུ་ཁ་པར་ལག་ཏུ་བླངས་ནས་ཟླ་བའི་QQབསྐྱར་དུ་སྣོན་རྩིས་བྱས་མོད། འགྱོད་གདུང་དང་ཡི་ཆད་ཀྱི་འཕྲོག་རྩོད་བར་ནས་ལས་ཀྱི་བགྱི་བ་ཅི་ཡང་སྤེལ་མ་ནུས།
ཟླ་བ་དང་འགྲོགས་པ་ནས་བཟུང་། ཡང་ན་ཟླ་བ་ངོ་ཤེས་པ་ནས་བཟུང་། མཚོ་མོས་ཟླ་བས་བསྐུར་བའི་སྐད་ཆ་རེ་རེ་དང་ཟླ་བས་བསླངས་པའི་དགའ་སྤྲོ་རེ་རེས། བརྩེ་དུངས་ཀྱི་རྨ་ཁ་གསོས་ཤིང་གྱེས་བྲལ་གྱི་སྡུག་བསྔལ་སུབ་ནས་འགྲོ་བ་ཚོར་ལ། སུབ་ནས་འགྲོ་ཐེངས་རེ་རེར་མཚོ་མོའི་སེམས་ལ་བརྩེ་དུངས་ནི་མ་གཞི་ནས་བཀྲ་ཤིས་དོན་འགྲུབ་ཀྱི་སྤྱོད་པ་དེ་ལྟར་འཚབ་འཚུབ་གོ་རིམ་མེད་པ་ཞིག་མིན་པར་ཟླ་བའི་བག་ཡོད་ཀྱི་སྤྱོད་པ་འདི་ལྟར་འདྲིས་ཆེ་བ་ཞིག་ཡིན་པར་བསམས། ཟླ་བ་དང་འབྲེལ་འདྲིས་བྱེད་པའི་བརྒྱུད་རིམ་ཁྲོད་མཚོ་མོའི་ཡིད་ལ་བབས་ཤིང་བློ་ལ་རན་པའི་སྣང་ཚུལ་ཞིག་ཡོད་པ་ནི། ཟླ་བ་དང་རང་ཉིད་འབྲེལ་འདྲིས་བྱས་ནས་ཡུན་རིང་འགོར་ནའང་ངོ་ཐུག་མེད་པ་དེ་རེད་ལ། ཡང་ན་དུས་ཡུན་རིང་བོ་ཞིག་ལ་ཟླ་བ་དང་ངོ་མ་ཐུག་པ་དེ་ཡིན་མོད། ད་ནི་འབྲེལ་ལམ་ཡོངས་རྫོགས་རྩ་ནས་ཆད་དེ་གཏན་དུ་ངོ་ཐུག་མ་ཐུབ་གྱུར་བས། མོའི་བསམ་བློ་ལའང་འགྱུར་ལྡོག་བྱུང་སྟེ། སྔོན་ཞིག་ནས་ཟླ་བར་ངོ་ཐུག་ཡོད་ན་ཅི་མ་རུང་སྙམ། ཇ་ཁང་ནང་ནས་གོང་ཞོལ་བྱས་ནས་འདུག་དུས་དང་སློབ་ཁང་བར་ནས་སྔ་གཞུག་བྱས་ནས་འགྲོ་དུས་རང་འགུལ་གྱིས་ཁོ་ལ་ཁ་གྲགས་ཡོད་ན་ཅི་མ་རུང་སྙམ།ཡིན་ཡང་། དེ་དུས་དེ་ལྟར་ཁ་མ་གྲགས་པ་ནི་སྙིང་དུ་སྡུག་ཅིང་ཡིད་དུ་འོང་སྟེ། ཟླ་བས་མོའི་གར་འགྲོ་གར་འདུག་མིག་གིས་འཚོས་ནས། མོ་ལ་ལྭ་བའི་ཁ་དོག་མཛའ་མིན་དང་ཟས་ཀྱི་གདམ་གསེས་ཅི་ཡིན་སོགས་འདྲི་ལ། ད་དུང་ཟ་མ་ཟ་དུས་སུ“ཟ་མ་ཞིམ་པོ་ཞིག་ཟོ། དེ་རིང་གི་ནམ་ཟླ་ཧ་ཅང་དྲོ་བས་ཐུག་འཁྱག་ཅིག་བཟས་ན་ལྷག་ཏུ་ཞིམ་སྲིད”ཅེས་བསྐུར་མྱོང་། དཔེ་ཆ་ཀློག་དུས་སུ“ངས་ཀྱང་ཁྱོད་ཀྱིས་ཀློག་བཞིན་པའི་སྒྲུང་རིང་རོ་མེ་འོ་དང་ཀྲའུ་ལེས་ཡེ་ཀློག་བཞིན་ཡོད། ཧ་ཅང་ཡག་པོ་འདུག”ཅེས་བསྐུར་མྱོང་། སྲང་ལ་ཉུལ་དུས་སུ“དེ་རིང་ང་ཡང་ཁྱོད་ཀྱིས་བཤད་པའི་ཁོ་ཧྥེ་ཁང་དེར་ཕྱིན་པ་ཡིན། ནང་གི་བཀོད་པ་ལེགས་པས་བག་ཡངས་མོ་རང་བྱུང་། བཀའ་དྲིན་ཆེ།”ཞེས་བསྐུར་མྱོང་། བརྙན་ལ་ལྟ་དུས་སུ“ཁྱོད་ཀྱིས་ཀྱང་གློག་བརྙན་ཐེ་ཐན་ཉིའུ་ཁུ་ལ་ལྟོས་དང་། ཧ་ཅང་ཡག་པོ་འདུག”ཅེས་བསྐུར་མྱོང་། ཡུལ་དུས་གང་ཞིག་ཏུ་བྱ་བ་ཅི་ཞིག་སྒྲུབ་ནའང་ཟླ་བས་བསྐུར་བའི་ཡིག་འབྲུ་རེ་རེ་མོའི་དགའ་ཡ་སྐྱོ་རོགས་སུ་གྱུར་ཡོད། ཐ་ན་སློབ་ཁྲིད་ཀྱི་སྐབས་སུའང་མོས་ཟླ་བ་ལ་QQའཕྲིན་ལམ་བརྒྱུད་ནས་ཡི་གེ་སྐུར་རེས་བྱས་པ་ཐེངས་གཅིག་མིན། དེ་བས་ཟླ་བ་དང་འབྲེལ་འདྲིས་བྱེད་སྟངས་ནི་བལྟས་ན་ཉེ་ཉེ་འདྲ་བའི་སྣང་བ་ཞིག་ཤར་ཡང་། ད་ནི་བསམས་ན་ངོ་ཡང་མི་ཤེས་རྒྱུས་མེད་དུ་གྱུར་སོང་།
མཚོ་མོའིQQའཕྲིན་ལམ་ལ་ཟླ་བ་ཤར་བ་ནས་བཟུང་། མཚོ་མོའི་འཇིག་རྟེན་ནི་ཞི་འཇགས་བག་ཡངས་ཀྱི་མཚན་མོ་ཞིག་ཡིན་ཞེས་བཤད་ཆོག ཟླ་བ་དང་འབྲེལ་འདྲིས་བྱུང་བ་ནས་མོ་སླར་ཡང་སློབ་གྲྭའི་ཕྱི་རོལ་ན་གླས་པའི་ཁང་མིག་འདི་ལ་འདང་ཇེ་ཡོད་དང་རྩིས་ཇེ་ཆེ་རུ་གྱུར། ཁང་མིག་འདིས་ནི་རྨ་ཤུལ་ཞིག་ལྟར་མོ་ལ་ན་ཟུག་ཟབ་མོ་དང་འདས་དོན་མང་བོ་དྲན་པར་བྱེད་པས། བཀྲ་ཤིས་དོན་འགྲུབ་དང་ཁ་བྲལ་བ་ནས་བཟུང་། ཁང་མིག་འདི་ཟླ་ཕྱེད་ཙམ་ལ་སྟོང་བར་ལུས་ཤིང་། མཚོ་མོས་ནང་སེམས་ཀྱི་སྐྱོ་གདུང་མཐའ་དག་བརྗེད་དུ་མེད་ཀྱང་བརྗེད་པར་སྣང་ནས་ཟླ་བས་བསྐུར་བའི་ཡིག་འབྲུ་རེ་རེ་བརྩེ་བས་ཀློག་བཞིན་སླར་ཡང་ཁང་མིག་འདི་ལ་བག་ཆགས་གསར་བ་ཞིག་བསྒོས་ཤིང་། སླར་ཡང་ཁང་མིག་འདི་རང་འདུ་ཤེས་གསར་བ་ཡིས་གཡོགས་ནས། ཡང་དང་ཡང་དུ་སློབ་གྲྭའི་མལ་ཁང་དུ་མ་བསྡད་པར་ཕྱི་ལ་ཡོང་། ཕྱི་ཡི་ཁང་མིག་འདི་ལས་གཞས་ལ་ཉན་ནས་སྲང་ལ་གཡེང་ཞིང་། མལ་མ་འཛུལ་ནས་དེབ་ལ་ཉུལ་ཞོར་འཕྲིན་ལམ་གྱི་ཟླ་བའི་ཕྱོགས་ལ་སྙིང་གཏམ་གྱི་ཡི་གེ་མང་བོ་དང་སེམས་མཚོན་གྱི་པར་རིས་སྣ་མང་ཕར་བསྐུར་ཚུར་བསྐུར་བྱས། དེ་ལྟར་ཁང་མིག་འདི་ལ་བདེ་སྐྱིད་ཀྱི་དྲོད་སྣང་འཁྱིལ་ནས་ལོ་ཕྱེད་ལྷག་ལས་མ་འགོར་བའི་དེ་རིང་གི་དུས་ལ། མཚོ་མོའི་ལྷིང་འཇགས་ཀྱི་མཚན་མོ་འཇགས་ཐབས་བྲལ་བས། མོས་ཡང་དང་ཡང་དུ་ཟླ་བས་ཅིའི་ཕྱིར་ང་ལ་འབྲེལ་ཐག་བཅད་པ་ཡིན་ནམ་སྙམ། ཟླ་བ་ནི་ཞེ་སྡང་གི་སྤྲིན་གྱིས་བསྒྲིབས་པ་ལྟར་གནས་སྐབས་ཙམ་ལ་མི་སྣང་བར་གྱུར་ནའང་། ཉིན་གཅིག་གཉིས་ཤིག་གི་རྗེས་ནས་མཐོང་ལམ་གྱི་སྤྲིན་བར་ནས་འཛུམ་སྟེ་གཏམ་གྱི་འོད་སྣང་བསིལ་བསིལ་གཏོར་འོང་བ་ཁོ་ཐག་ཡིན་སྙམ་ཞིང་། དེ་ལྟར་བསམ་བཞིན་དེ་ལྟར་ཡང་མིན་པ་འདྲ་བས། མོས་སྐྱེས་པ་དག་ལ་དངོས་གནས་བློ་གཏད་མི་འདུག་བསམས། ཤིང་གི་མལ་ཁྲི་ལས་མགོ་བོ་རུམ་ལ་བཏུམས་ནས་ཕར་འཁོར་ཚུར་འཁོར་བྱེད་ཐེངས་རེར་མོས་ཟླ་བས་བཤད་པ་བདེན་ནམ། བཀྲ་ཤིས་དོན་འགྲུབ་ཀྱིས་ངེད་གཉིས་ཀྱིས་འབྲེལ་འདྲིས་བྱེད་ཀྱིན་པ་ཤེས་ཡོད་དམ། བདེ་སྐྱིད་སྒྲོལ་མས་ཀྱང་ཤེས་ཡོད་པ་ཁོ་ཐག་རེད། ཟླ་བས་ང་ལ་འབྲེལ་འདྲིས་བྱེད་ཀྱིན་པ་མི་གཅིག་ལའང་བཤད་མེད་པ་བདེན་ན། ངས་ཀྱང་མི་གཅིག་ལའང་ཤེས་སུ་བཅུག་མེད་པས། ཁོ་གཉིས་ཀྱིས་ཅི་ལྟར་ཤེས་པ་ཡིན་ནམ་ཞེས་ཡིད་གཉིས་ཐེ་ཚོམ་གྱི་དབང་དུ་གྱུར་ནས་ཡུན་རིང་འགོར་རྗེས། གློ་བུར་དུ་ཕྱིར་དྲན་འཐིབས་པའི་ཁང་མིག་འདི་ལས་གཉིད་ཐབས་བྲལ་ཞིང་སུན་སྣང་འགོག་པར་དཀའ་བ་ཞིག་སྐྱེས་པས་ཁ་པར་ལག་ཏུ་བླངས་ཏེ་བལྟས་པ་ན། ཏག་ཏག་ཆུ་ཚོད་དགུ་རེད། སློབ་གྲྭའི་མལ་ཁང་གི་སྒོ་བརྒྱག་པར་ད་དུང་ཆུ་ཚོད་ཕྱེད་ཙམ་འདུག མོ་མལ་ལས་ལངས་ནས་སློབ་གྲྭར་ལོག་རྩིས་བྱས།
སློབ་གྲྭ་ཆེན་མོའི་ནང་ནས་ལོ་ངོ་གསུམ་ལྷག་འགོར་ལ་ཉེ་དུས་འདིར། མོས་གྲོང་ཁྱེར་འདིའི་བོད་ཡིག་ཚགས་པར་ཁང་དུ་དངོས་སྦྱོང་བྱེད་བཞིན། ལན་རེར་ཕྱི་རུ་གླས་པའི་ཁང་མིག་ཏུ་བསྡད་ཅིང་། ལན་རེར་སློབ་གྲྭའི་མལ་ཁང་དུ་ལོག་བཞིན་ཡོད། མོའི་འཇིག་རྟེན་གྱི་འགྱུར་ལྡོག་ཡོད་ཚད་དངོས་སྦྱོང་བྱས་པ་ནས་མགོ་བརྩམས་པ་མ་ཡིན་པར་ཁང་བ་འདི་གླས་པ་ནས་མགོ་བརྩམས་པ་འདྲ་ལ། ཁང་བ་འདི་གླས་པ་ནས་བཟུང་། བཀྲ་ཤིས་དོན་འགྲུབ་དང་འབྲེལ་འདྲིས་ཇེ་ཟབ་ཏུ་གྱུར་ཞིང་། ཁོའི“ངས་ཁྱོད་ལ་ཅི་ཡང་མི་བྱེད། སྐྲག་མི་དགོས།”ཞེས་ཁང་མིག་འདིར་འཛུལ་ཐེངས་རེ་རེས་མངོན་མེད་ཀྱི་ཨུ་ཚུགས་རིགས་ཤིག་གིས་ཁོ་གཉིས་བཅུམས་ནས་ཡོང་བ་ལྟར། མོའི་བརྩེ་དུངས་ཀྱི་རང་ཚུགས་དབང་མེད་དུ་འཕྲོག་སོང་ལ། མོའི་ལང་ཚོ་ཡི་མེ་ཏོག་དབང་མེད་དུ་བཅོམས་སོང་། དེ་ལྟར་ན་ཟུག་དང་བརྩེ་བ་ནི་ཨུ་ཚུགས་དང་སྟེས་དབང་ལས་སྐྱེས་པས། མོས་འགྱུར་ལྡོག་སྐྱེན་པའི་དགའ་སྐྱོ་མང་བོ་དང་ལྷན་དུ་རང་ཉིད་བུད་མེད་ཅིག་ཡིན་པར་ངོས་འཛིན་ཐོབ། བྱ་དངོས་མང་བོ་ཞིག་ལ་བཟུང་བའི་རྣམ་འགྱུར་ཡོད་ཚད་བག་ཡངས་སུ་གྱུར། དེ་ནི་མོའི་ཚོར་བ་རྣོན་པོ་དང་དངངས་སྐྲག་འཚེར་པོ་གཞན་གྱི་ལག་ཏུ་ཤོར་བས་ཡིན་སྲིད། བཀྲ་ཤིས་དོན་འགྲུབ་ཀྱིས་བསླངས་པའི་བརྩེ་དུངས་ཀྱི་ན་ཟུག་ཟབ་མོས་མོ་ལ་བག་ཆགས་ཟབ་མོ་དང་རེ་བ་ཆེན་པོ་བྱིན་མོད། ཁོའི“ངས་ཁྱོད་ཐེངས་དང་པོ་ཡིན་པ་ཡིད་ལའང་མ་ཤར”ཞེས་པའི་སྐད་ཆ་དེ་ལས་རྨི་ལམ་གྱི་སྨུག་པས་གཡོགས་པའི་དངོས་ཡོད་ཀྱི་གཟུགས་བརྙན་ཇེ་གསལ་ཇེ་གསལ་ངང་བཀྲ་ཤིས་དོན་འགྲུབ་ཀྱི་དམིགས་ཡུལ་བསླངས་ལ་བུད་ཅིང་། བཀྲ་ཤིས་དོན་འགྲུབ་ཀྱིས་བསླངས་པའི་དགའ་སྐྱོ་ཐམས་ཅད་བཏང་སྙོམས་སུ་གྱུར་ནས། མཚམས་ཤིག་ལ་ཁོ་གཉིས་ཀྱི་འབྲེལ་བ་ཅི་ཞིག་ཡིན་པའང་མི་ཤེས་པར་གྱུར། སྐབས་ཤིག་ལ་ཁོ་གཉིས་ལ་གཞི་ནས་འབྲེལ་བ་ཅི་ཡང་མེད་པར་གྱུར།
སྤྱིར་བཏང་དུ་ཟླ་བར་འབྲེལ་འདྲིས་བྱས་པ་ནས་བཟུང་། མོས་བཀྲ་ཤིས་དོན་འགྲུབ་གཏན་བརྗེད་དུ་གྱུར་ཡོད་ཅེས་བཤད་ཆོག་མོད། ཟླ་བས་གློ་བུར་དུ་འབྲེལ་ཐག་བཅད་པ་འདིས་མོ་ལ་ཡང་དང་ཡང་དུ་སྐྱེས་པ་དག་ལ་བློ་གཏད་མི་འདུག་ཨང་འདོད་དུ་བཅུག དེ་ལྟར་འདོད་ཀྱིན་བཀྲ་ཤིས་དོན་འགྲུབ་དང་འབྲེལ་བའི་འདས་དོན་མང་བོ་ཡིད་ལ་ཡང་ཡང་ཤར། མོ་ནི་རང་གི་དྲན་པ་རྒོད་པོའི་འཚུབ་ཆས་འདེད་པ་ལྟར་གོམ་སྟབས་མགྱོགས་པོས་སློབ་གྲྭའི་ཕྱོགས་སུ་སོང་།
ཁང་མིག་ལས་ཕྱི་ལ་བུད་རྗེས། སྲང་ལམ་གྱི་འདུ་འཛི་དང་འཕྲུལ་ཆས་ཀྱི་འུར་ཟིང་གིས་རྒྱང་དུ་ཤོར་བའི་དྲན་པ་རྒོད་པོ་མཐོང་སྣང་གི་གཟུགས་བརྙན་དུ་སྡུད་པར་བྱེད་ལ། དེ་ནི་བར་སྣང་དུ་འཕུར་བའི་ཤོག་བྱ་ཞིག་རྟོད་ཐག་ཕྲ་མོས་དལ་བ་དལ་བུར་ཚུར་ལ་འཐེན་པ་དང་འདྲ། མོས་དྲན་པ་མཐའ་དག་ཚུར་ལ་བསྡུས་རྗེས། ལམ་འགྲམ་གྱི་ཚོང་ཁང་དག་ལ་མིག་གཡེང་བྱེད་ཞོར་སོང་། ཕྲེང་བར་བསྟར་བའི་ཚོང་ཁང་དང་མགྲོན་ཁང་། དྲ་ཁང་། ཁོ་ཧྥེ་ཁང་སོགས་ཀྱི་སྒོ་མོ་རེ་རེ་གློག་འོད་ཀྱིས་བརྒྱན་པའི་སྒོ་བྱང་རེ་རེའི་འོག་ཏུ་ཁྲ་ལམ་མེར། འུར་ཟིང་དང་འདུ་འཛི་ལ་གོམས་པའི་བབ་ཆགས་ཀྱི་རྣམ་པ་ཞིག་མངོན་འདུག སྒོ་བྱང་རེ་རེ་གྲལ་བསྒྲིགས་ནས་མོའི་སྔུན་ནས་རྒྱབ་ལ་ཡལ་ཐེངས་ཤིག་ལ། མིག་ལམ་དུ་སྒེག་ལྡན་མའི་སྐྲ་གཞར་ཁང་ཞེས་པ་མངོན་བྱུང་།
མོས་དེ་རིང་སྔ་དྲོར་ཟླ་བར་ཁ་ཆད་ཐེངས་གཉིས་པ་བཏབ་སྟེ། ཉིན་གུང་ཆུ་ཚོད་གཅིག་གི་ཐོག་ཏུ་སློབ་གྲྭའི་ལུས་རྩལ་ར་བ་ནས་ངོ་ཐུག་རྒྱུ་བྱས་རྗེས། དགའ་སྤྲོ་དཔག་མེད་ངང་མལ་གྲོགས་དག་ལ་ལྭ་བ་གང་ཞིག་མཛའ་མིན་ལྟ་རུ་བཅུག་ནས་ཚུགས་ཀ་འདྲ་མིན་དང་ཁ་དོག་སྣ་ཚོགས་ཀྱི་གོན་པ་མང་བོ་ཡང་ཡང་བརྗེས་མཐར། མོས་སྔོན་ཤིག་ལ་ཟླ་བས“ཁྱོད་ཀྱིས་དེ་རིང་གོན་ཡོད་པའི་མདོག་གློ་ཁ་ཅན་གྱི་ལྭ་བ་དེ་ཧ་ཅང་ཡག་པོ་འདུག དངོས་གནས་མཛེས་མ་རང་རེད”ཅེས་བསྐུར་བ་དྲན་པས་ལྭ་བ་གློ་ཁ་དེ་གོན་ནས་མེ་ལོང་མདུན་ནས་ཕར་འཁོར་ཚུར་འཁོར་དང་གཡས་ལྟ་གཡོན་ལྟ་བྱས་ཤིང་། སྐྲ་ཚུགས་བརྗེ་དགོས་བསམས་ཏེ་སྒེག་ལྡན་མའི་སྐྲ་གཞར་ཁང་ཞེས་པ་འདིར་ཡོང་བ་རེད། ད་ནི་སྐྲ་གཞར་ཁང་འདི་མཐོང་མ་ཐག མོ་ནི་རང་ཉིད་ལ་ངོ་གནོང་བ་ལྟར། དགོད་ཙམ་བྱས་སོང་། ཤ་སྐྱི་དང་སེམས་པ་འགུལ་ཙམ་བྱས་པ་ན་མིག་ཟུང་ལ་ཆུ་རིས་སྲབ་བུ་ཞིག་འཁོར་ཞིང་འཁོར་བས། མོས་གོམ་པ་སྔུན་ལ་སྤོ་ཞོར་དུ་མགོ་བོ་ཡར་ལ་དགྱེ་ནས་ནམ་མཁར་བལྟས། ནམ་མཁའ་ནི་ནག་རོག་གེར་མུན་པས་གཡོགས་ཤིང་། གྲོང་ཁྱེར་གྱི་འོད་སྣང་མོག་པོའི་ཕ་རོལ་ན་རྔམ་ཆེན་པོས་འཐིབས་འདུག་པས་ནི། ཚུར་ནས་ཚུར་ལ་བཅུམས་ནས་ཡོང་བ་དང་འདྲ། ཟླ་བ་དང་སྐར་མའི་ཤུལ་ཙམ་ཡང་མཐོང་རྒྱུ་མེད་པས། མཚོ་མོའི་སེམས་པ་སྔར་ལས་ལྷག་པར་སྐྱོ་དུབ་པར་གྱུར།
མོས་འགྲོ་ཞོར་དུ་མགོ་བོ་སྒུར་ནས་ཟླ་བའིQQདབུ་བརྙན་གྱི་སྟེང་ནས་དལ་བུར་མནན་པ་ན། དྲ་མིང་ལ་མཚོ་མོའི་ཟླ་བ་རུ་བཏགས་ཡོད་པའི་ཟླ་བའི་QQཡི་མིང་སྐད་ཅིག་ལ“མུན་པ་འཇམ་པོ”ཞེས་པའི་ཡིག་འབྲུ་བཞི་རུ་གྱུར་སོང་། ད་དུང་དྲ་མིང་འདིའི་གཤམ་ན“ང་ནི་ཁྱོད་ཀྱི་མཚོ་ལ་ལྷུང་བའི་ཟླ་བ་དེ་ཡིན།”ཞེས་པའི་ཚིག་ཐུང་དེའང་མུན་པར་ཡལ་བའི་སྐར་མ་ཞིག་ལྟར་གར་སོང་ཆ་མེད་དུ་གྱུར་ནས་ཤུལ་དུ“ང་ནི་ཁེར་རྐྱང་གི་མུན་པ་འཇམ་པོ་ཞིག་ཡིན”ཞེས་ཤར་འདུག
ཟླ་བས་དངོས་གནས་མོ་ལ་འབྲེལ་ཐག་བཅད་པ་འདྲ། ད་ནི་མཚན་མོ་འདི་ལྟར། ནམ་མཁའ་འདི་ལྟར། མཚོ་མོའི་མཐོང་ལམ་ནས་ཟླ་བ་ནི་རྒྱང་རིང་བ་ལ་ཨང་།
༣
“ངས་ཀྱང་དོན་མེད་དུ་མི་ཆ་མེད་ཅིག་གི་ཆེད་དུ་འདི་ལྟར་རྩོད་པ་བྱེད་མི་འདོད། བདེ་མོ་བྱོས། འུ་གཉིས་ཀྱི་སྐུད་ལམ་མཚམས་འདི་ནས་གཅད་འཇོག”
ཚིག་ཐུང་འདི་བསྐུར་མ་ཐག ཡ་ཆུང་ལ་སུན་སྣང་འགོག་ཏུ་མེད་པ་ཞིག་ཞེ་སྡང་གིས་དེད་དེ་ཡོང་བས། ཟླ་བས་འདང་རྒྱག་སྤུ་ཙམ་མེད་པར་མཚོ་མོའིQQཐད་ཀར་བསུབས་སོང་།
མཚོ་མོའི་ཡིད་མ་ཆེས་པའི་རྣམ་འགྱུར་རེ་རེས་ཁོ་ལ་བདེ་སྐྱིད་སྒྲོལ་མ་དྲན་དུ་བཅུག་ལ། བདེ་སྐྱིད་སྒྲོལ་མས“གོ་ཐོས་ལྟར་ན་ཁྱོད་ནི་སྐྱེས་པ་བློ་གཏད་མེད་པ་ཞིག་རེད་ཟེར”ཞེས་བཤད་པ་དྲན།
ཟླ་བ་མཚོ་མོའི་པང་ལ་ལྷུང་ནས་ལོ་ཕྱེད་ཅིག་འགོར་སོང་། ཡང་ན་མཚོ་མོས་བསྐུར་བའི་པར་རིས་དང་ཡི་གེ་ཁ་པར་དུ་ཉར་ནས་ལོ་ཕྱེད་ཅིག་འགོར་སོང་། ལོ་ཕྱེད་ཅིག་འགོར་ནའང་ཟླ་བས་མཚོ་མོའི་གཟུགས་བརྙན་ཙམ་ལས་མོའི་གཤིས་རྒྱུད་ཀྱི་ཞི་འཇམ་མྱོང་སྐལ་མ་བྱུང་ལ། ལོ་ཕྱེད་ཅིག་འགོར་ནའང་མཚོ་མོས་ཟླ་བའི་གཟུགས་བརྙན་ཙམ་ལས་ཁོའི་ངོ་གདོང་གི་བསིལ་ཟེར་མྱོང་ཐབས་མ་བྱུང་།
ཟླ་བ་ནི་ཡག་ཕོ་སྒོ་དང་གཟུགས་སྐྱེ་ལུས་ལྡན་པའི་གསར་བུ་སྙིང་རྗེ་ཞིག་སྟེ། ཁོའི་ཤ་མདངས་དཀར་ཚུལ་དང་ཁ་མིག་རན་ཚུལ་གྱིས་མོ་བརྒྱའི་སེམས་པ་འཕྲོག་ཅིང་ཕོ་བརྒྱར་སྙིང་རླུང་བསླངས་མྱོང་། ཁོའི་ལུས་དང་གཟུགས་གཞི་ཡག་པོ་དར་སྲོལ་གསར་མའི་གྱོས་གོས་རེ་རེས་བརྒྱན་ཐེངས་རེར་བརྙན་འཕྲིན་ནང་གི་སྐར་ཆེན་དེ་དག་ལྟར་སྙིང་དུ་སྡུག་པས། སློབ་ཆེན་འདིའི་སྒོ་ཐེམ་བརྒལ་བ་ནས་བཟུང་། བུ་མོ་གང་མང་ཞིག་གིས་ཁོ་ལ་འཕྲིན་ཡིག་བསྐུར་ཞིང་ཁ་པར་བཏང་ནས་འབྲེལ་འདྲིས་བྱས་མྱོང་། ཁོས་བུ་མོ་གང་མང་ཞིག་གིས་ཚུར་ལ་བསྟན་པའི་རྣམ་འགྱུར་རེ་རེ་སྣང་མེད་དུ་མ་བཞག་པར་བསྟུད་མར་བུ་མོ་བཞི་ལ་དགའ་རོགས་བསྒྲིགས་ཤིང་ལུས་འབྲེལ་བྱུང་བས། སློབ་རའི་བུ་མོ་དག་གི་ཁྲོད་དུ“ཟླ་བ་ལ་བློ་གཏད་མེད”ཅེས་གྲགས། དེ་ལྟར་གྲགས་པས། ཚུར་ལ་འབྲེལ་འདྲིས་བྱེད་པའི་བུ་མོ་གཅིག་ཀྱང་མ་བྱུང་། བདེ་སྐྱིད་སྒྲོལ་མ་དང་མཚོ་མོ་གཉིས་ནི་ཁོས་རང་ཉིད་ཀྱི་འདོད་པ་ལྟར་འབྲེལ་འདྲིས་བྱས་པའི་དགའ་རོགས་གཉིས་ཡིན། མྱི་ཁ་དེའི་དབང་གིས་ཁོ་དང་བདེ་སྐྱིད་སྒྲོལ་མའི་འབྲེལ་བ་ནི་མིང་ཙམ་དུ་གྱུར་ལ། ཁོ་དང་མཚོ་མོའི་འབྲེལ་བའང་ད་ནི་མིང་ཙམ་དུ་གྱུར་སོང་།
རང་གིས་བསམ་པ་རྣམ་དག་གིས་ཕར་ལ་འབྲེལ་འདྲིས་བྱེད་དུས། ཕ་རོལ་བོ་ཡིད་མི་ཆེས་པའི་རྣམ་འགྱུར་གྱིས་རྒྱང་ལ་འགྱེད་པ་ནི་སྙིང་ལངས་སྤྱད་ཅིག་རེད་ཨང་། ཟླ་བས་མཚོ་མོའིQQདང་མོས་བསྐུར་བའི་ཡི་གེ་མང་བོ་དང་ལྷན་དུ་མངོན་མེད་ཤུལ་མེད་དུ་བཟོས་རྗེས། བུད་མེད་ནི་མ་གཞི་ནས་རྩེད་ཆས་བྱེད་རྒྱུ་དག་དག་རེད་ཨང་སྙམ། མཚོ་མོའིQQབསུབས་ཚར་ནའང་། མཚོ་མོའི་ཟླ་བ་རུ་བཏགས་པའི་ཁོའི་QQདྲ་མིང་གི་ཡིག་འབྲུ་རེ་རེས་ཁོ་ལ་ཁོང་དགོད་ཅིག་ཤོར་དུ་བཅུག་ལ། དེ་ནི་ཡི་ཆད་པའི་དངན་པ་ཐུང་ངུ་ཞིག་དང་འདྲ་བྱུང་།
ཟླ་བའི་མལ་ཁང་དུ་ལ་ལས་གློག་བརྙན་ལ་ལྟ་བཞིན་འདུག་ལ། ལ་ལ་རོལ་རྩེད་ལ་གཡེང་འདུག ལ་ལ་མལ་ལ་ལོག་ནས་གཉིད་ལ་ཡུར་འདུག ཟླ་བའང་མལ་ལ་ལོག་ནས་གཡས་འཁོར་གཡོན་འཁོར་ངང་འདང་མང་བོ་ཞིག་བརྒྱབ་རྗེས། རང་གི་དྲ་མིང་མུན་པ་འཇམ་པོར་བརྗེས་ལ། དྲ་མིང་གཤམ་གྱི“ང་ནི་མཚོ་ལ་ལྷུང་བའི་ཟླ་བ་དེ་ཡིན”ཞེས་པའི་ཚིག་ཐུང་དེའང“ང་ནི་ཁེར་རྐྱང་གི་མུན་པ་འཇམ་པོ་ཞིག་ཡིན”ཞེས་པར་བརྗེས།ད་དུངQQབར་སྟོང་དུ“མཚོ་མོ་ཟླ་གཟུགས་རུམ་པའི་མཚོ་མོ་མ་རེད། ཟླ་བ་མཚོ་ལ་ལྷུང་བའི་ཟླ་བ་མ་རེད།”ཅེས་སྤེལ་མ་ཐག བདེ་སྐྱིད་སྒྲོལ་མས་དཔྱད་གླེང་གི་ཚུལ་དུ“དེ་ན་ཅི་རེད།”ཅེས་སྤེལ་བྱུང་། ཁོས་ཚིག་ཐུང་འདི་ལ་ལན་ཅི་ཡང་མ་སློག་པར། ཐད་ཀར་བདེ་སྐྱིད་སྒྲོལ་མའི་QQའཕྲིན་ལམ་དུ“མཚོ་མོ་ནི་སའི་གོ་ལའི་བརྩེ་དུངས་ཀྱི་མིག་ཆུ་རེད།”ཅེས་བསྐུར།
“ཁྱོད་ཀྱིས་རང་ཉིད་ཟླ་བ་ཡིན་པ་བརྗེད་པ་མ་ཡིན་ནམ།༼ཁོག་དགོད་ཀྱི་པར་རིས་ཤིག༽”
“ཁྱོད་ལ་མཚོ་མོ་དང་ངེད་གཉིད་ལ་འབྲེལ་བ་ཡོད་པ་སུས་བཤད་པ་ཡིན།”
“ཁྱོད་གཉིས་ཀྱིQQངས་སྦྲེལ་ཡོད་པས་དྲ་མིང་འདོགས་སྟངས་ལ་བལྟས་ཏེ་ཤེས་པ་ཡིན། མཚོ་མོའི་ཟླ་བ་གློ་བུར་དུ་མུན་པ་འཇམ་པོ་རུ་གྱུར་སོང་བ་ཅི་རེད།༼བགད་ནས་ཡོད་པའི་པར་རིས་ཤིག༽”
“ཅི་ཡང་མ་རེད། མཚོ་མོ་ལ་འབྲེལ་ཐག་བཅད་ཟིན།”
“ཁྱོད་འདི་དངོས་གནས་མགྱོགས་པ་ལ་ཨང་།”
“དེ་ཟེར་ན།”
“བུ་མོ་དག་དང་འབྲེལ་ཐག་བཅད་ན་མགྱོགས་པོ་ལ་ཟེར་བ་ཡིན།༼ཁོག་དགོད་ཀྱི་པར་རིས་ཤིག༽”
“ང་མགྱོགས་སོང་བ་མ་རེད། ཁྱོད་ཚོ་དལ་སོང་བ་རེད།”
“མཚོ་མོར་འབྲེལ་ཐག་གཅོད་དོན་ཅི་ཡིན།”
“ཁྱོད་དང་འདྲ་བར་མོས་ཀྱང་ང་བློ་གཏད་མེད་པ་ཞིག་ཏུ་བརྩིས་འདུག”
“བློ་གཏད་མེད་དུ་འཇུག་བྱེད་རང་གིས་བསྒྲུབས་པ་རེད། ང་ཚོ་ལ་ཁག་འགེལ་མ་བྱེད།”
“བློ་གཏད་མེད་དུ་འཇུག་བྱེད་ཁྱོད་ཚོ་རེད། བུད་མེད་དག་རེད། གལ་སྲིད་ངའི་འཇིག་རྟེན་ལ་བུད་མེད་ཁྱོད་ཚོ་མེད་ཚེ། ངའང་སྔར་བཞིན་བློ་གཏད་མེད་པ་ཞིག་ཏུ་ག་ལ་བརྩི། བརྩི་མི་སྲིད།”
“ཨོ། དེ་ན་བུད་མེད་དག་ལ་འབྲེལ་བ་མ་བྱ་རོགས། ངས་བལྟས་ན་ཁྱོད་བུད་མེད་མེད་ན་ཁེར་རྐྱང་ངང་འཚོ་ཐུབ་པའི་མི་མ་རེད།༼ཁོག་དགོད་ཀྱི་པར་རིས་ཤིག༽”
“འབྲེལ་བ་བྱེད་ཀྱིན་མེད། ངའི་QQནང་ན་ང་ལ་འབྲེལ་བ་བྱུང་ཟིན་པའི་བུད་མེད་གཅིག་གིQQཡང་མེད། གལ་སྲིད་གཅིག་ཡོད་ཚེ། ཁྱོད་ཡིན་སྲིད། ཁྱོད་ཅི་འདི་མེད་པར་ལུས་འདུག འུ་གཉིས་ཀྱི་བར་དུ་བྱུང་བའི་འབྲེལ་འདྲིས་ནི་དགའ་རོགས་ཀྱི་ཚུགས་ཀ་བཟུང་བའི་གྲོགས་པོའི་བར་གྱི་འབྲེལ་འདྲིས་དེ་ཙམ་ཡིན་པས་རེད།”
“བུད་མེད་དག་ལ་ཡིན་གཅིག་མིན་གཉིས་དགའ་རོགས་བསྒྲིགས་ནས་ལུས་འབྲེལ་བྱ་དགོས་དོན་ཅི་ལ་ཡོད། གྲོགས་པོ་བསྒྲིགས་ནའང་ལོས་ཆོག ངས་འུ་གཉིས་ཀྱི་བར་ལ་དོན་དག་ངན་པ་ཅི་ཡང་བྱུང་དུ་འཇུག་མི་འདོད་ལ། ཕན་ཚུན་ལ་སེམས་ཀྱི་རྨ་ཁ་ཅི་ཡང་བཟོ་མི་འདོད་པས། འབྲེལ་བ་འདི་བཟུང་བ་ཡིན།”
“ཡ་ཡ། སེམས་པ་སེམས་ཀྱིས་ཤེས་ཡོད། འུ་གཉིས་གྲོགས་པོ་བཟང་བོར་འགྱུར་བར་སྨོན།”
“ཡ་ཡ། མཚོ་མོ་ནི་བུ་མོ་བཟང་བོ་ཞིག་རེད། རྩོད་རྒྱུ་ཆེན་པོ་མེད་ན་འབྲེལ་ཐག་མ་བཅད་ན་བཟང་སྙམ།”
“ཡ་ཡ། ཤེས་སོང་། ང་ལ་གཉིད་འབབ་ཀྱིན་འདུག གནས་སྐབས་སུ་བདེ་མོ་བྱོས།སང་ཉིན་འཕྲད།”
“གཟིམ་ས་བདེ།”
ཟླ་བས་ཀྱང་གཟིམ་ས་བདེ་ཞེས་བསྐུར། བསྐུར་ནས་ཅང་མ་འགོར་བར། ཁོས་རང་གི་ཡིད་ན་ད་དུང་དྲི་བ་གཅིག་ལྷག་འདུག་པ་ཤེས་པས། མྱུར་དུ་བདེ་སྐྱིད་སྒྲོལ་མར་འདི་ལྟར་བསྐུར།
“སྐུད་ལམ་ན་ཨེ་ཡོད། ང་ལ་ད་དུང་འདྲི་རྒྱུ་ཞིག་འདུག ཁྱོད་ཀྱིས་མཚོ་མོ་དང་ངེད་གཉིས་ཀྱིས་སློབ་ཁང་གི་བར་ཁྱམས་ན་ཁ་ཆད་བཏབ་ཡོད་པ་ཅི་ལྟར་ཤེས་པ་ཡིན།”
“ངས་ཅི་ཡང་མ་ཤེས། ཉིན་མོ་དེར་ངས་ཁྱོད་སློབ་ཁང་གི་བར་ཁྱམས་ན་མཚོ་མོའི་ཕྱོགས་སུ་འགྲོ་བཞིན་པ་མཐོང་བྱུང་། མཚོ་མོས་འུ་གཉིས་ཀྱི་འབྲེལ་བ་ཤེས་ཡོད་པ་འདྲ། དོགས་མི་བདེ་བའི་ངང་ངའི་གདོང་ལ་བལྟས་པས། ངས་ཀྱང་འགྲོ་ཞོར་དུ་མོ་ལ་བལྟས་ནས་འཛུམ་ཙམ་བྱས་པ་ཡིན། ཅི་རེད། མཚོ་མོ་དང་འབྲེལ་ཐག་གཅོད་དོན་ང་ལ་འབྲེལ་བ་ཡོད་དམ། ཡོད་ན་ང་དངོས་སུ་སོང་ནས་མོ་ལ་འགྲེལ་བཤད་བྱས་ཆོག”
“མེད། མེད། དེ་འདྲ་ཞིག་མ་རེད། ངས་སྟེས་དབང་མ་རེད་བསམས་སོང་། རང་དགར་དྲིས་པ་ཡིན། དོན་དག་ཅི་ཡང་མེད། གཟིམ་ས་བདེ།”
ཟླ་བས་ཁྱོད་ཀྱིས་ངེད་གཉིས་ཀྱིས་ལུས་རྩལ་ར་བ་ན་ཁ་ཆད་བཏབ་ཡོད་པ་ཇི་ལྟར་ཤེས་པ་ཡིན་ཞེས་འདྲི་བསམས་མོད། དེ་ལྟར་མ་དྲིས་པར་སླར་ཡང་གཟིམ་བདེ་ཞུས་རྗེས། མཚོ་མོ་དེ་འདྲའི་དོགས་པ་ཞིག་ཟ་དོན་ཅི་ཡིན་ནམ། དངོས་གནས་སྙིང་བོ་མི་འདུག་སྙམ། མགོ་བོ་རུམ་ལ་བཏུམས་ནས་གཉིད་རྩིས་བྱས་མོད། གཉིད་ཀྱི་སྨུག་པ་རྒྱང་ལ་ཡལ་བས། ཁོས་མགོ་བོ་དགྱེ་ནས་དུ་རྐང་གཅིག་ལ་མེ་བསྒོས། དུ་བ་སྔོ་ལོག་གེར་འཐེན་ཞོར་གྱང་ངོས་ལ་ཅེར་ནས་བསྡད། གྱང་ངོས་ལ་སྦྱར་བའི་ཤོག་བུའི་སྟེང་ན་འདབ་མ་གྲོལ་བའི་མེ་ཏོག་གློ་ཁ་དག་ཚོན་མདངས་ཀྱིས་བཀྲག་ནས་མིག་ལ་འཚེར་ཡོང་།
ཁོས་མཚོ་མོ་ལ་ཁྱོད་མེ་ཏོག་ཡིན་ནམ་ཞེས་དྲིས་པ་དྲན་ཞིང་། མཚོ་མོས་ཡིན་ཞེས་ཨ་ལན་བྱིན་པ་དྲན་མ་ཐག་ཏུ་ཁེར་དགོད་ཅིག་བྱས་ཤིང་། བུད་མེད་འདི་དག་ལའང་དངོས་གནས་རློམ་རྒྱུ་ཞིག་མི་འདུག མོའི་མེ་ཏོག་ལེན་མཁན་བཀྲ་ཤིས་དོན་འགྲུབ་རེད་ཟེར་བ་མ་ཡིན་ནམ་སྙམ། དེ་ལྟར་ཡུད་ཙམ་ལ་བསམ་གཞིག་ཏུ་གཡེང་རྗེས་དུ་རྐང་གི་སྣེ་མོ་སྒོ་འགྲམ་གྱི་སྙིགས་སྒམ་ཕྱོགས་ལ་གཡུགས་རྗེས། མགོ་བོ་རུམ་ལ་བཏུམས་ནས་གཉིད་ལ་ཡུར་མགོ་བརྩམས།
ཟླ་བས་ཁེར་རྐྱང་གི་མཚན་མོ་འདི་རུམ་ནས་གཉིད་ལ་ཡུར་ཐུབ་བམ། ཕྱི་རོལ་གྱི་ནམ་མཁའ་སྔར་བཞིན་ནག་རོག་གེར་མུན་པས་བཟུང་འདུག
༤
མཚོ་མོ་མལ་ཁང་དུ་ལོག་རྗེས། དུས་རྒྱུན་གྱི་གོམས་སྲོལ་དུ་གྱུར་བའི་ཉལ་ཁར་ངོ་འཁྲུད་པའི་ལས་ལའང་སྤྲོ་བ་ཏིལ་ཙམ་མེད་པར་ཐད་ཀར་མལ་ཐུལ་དུ་འཛུལ་ནས་གཉིད་མགོ་བརྩམས། འདང་རྒྱག་ཡོད་ཚད་ཡལ་བར་གྱུར་ནས་མྱུར་དུ་གཉིད་སོང་ན་བསམས་མོད། གཉིད་ནི་ཅི་ལྟར་བསྒུགས་ཀྱང་ཡོང་ཐབས་བྲལ་བས། མོས་ཁ་པར་གྱི་མཉན་ཆས་རྣ་ནང་ལ་བཙུགས་ཏེ་གང་འདོད་དུ་གླུ་དབྱངས་ལ་ཉན་ཞོར།QQནང་ལ་མིག་གཡེང་བྱས། མོ་ཟླ་བའི་མཚོ་མོ་རུ་བཏགས་པའི་རང་གིQQདྲ་མིང་ལ་ཅེར་ནས་ཡུན་རིང་བསྡད་རྗེས། འདང་ཞིག་ཕོག་པ་ལྟར་ཟླ་བའི་མཚོ་མོ་ཞེས་པའི་ཟླ་བ་དང་འབྲེལ་སྒྲ་བསུབས་ནས་མཚོ་མོ་གཅིག་པུ་རུ་བརྗེས་ཤིང་། དྲ་མིང་གཤམ་གྱི“ང་ནི་ཟླ་བ་རུམ་པའི་མཚོ་མོ་དེ་ཡིན།”ཞེས་པའི་ཚིག་ཐུང་དེའང་བསུབས་སོང་། ཤུལ་དུ་ཅི་ཞིག་འབྲི་རྒྱུ་མ་ཤེས་པར་ཡུད་ཙམ་ལ་ཧད་དེ་བསྡད་ཅིང་། མཐར“བརྩེ་དུངས་ནི་རྨི་ལམ་ཐེངས་གཅིག”ཅེས་གཏགས།QQའཆར་ངོས་སུ་གཞན་གྱིས་ཚུར་ལ་སྦྲེལ་བའི་བརྡ་ཞིག་ཤར་བྱུང་། མོས་ཕོ་རོལ་བོའིQQ སྦྲེལ་ཐག་དང་ལེན་བྱས་མ་ཐག བདེ་མོ་ཞེས་པའི་ཡིག་འབྲུ་གཉིས་འཆར་ངོས་ལ་ཐག་སྒྲ་ཞིག་དང་ལྷན་དུ་ཤར་བྱུང་།
“བདེ་མོ་ཡིན། ཁྱོད་སུ་ཡིན།”
“QQབར་སྟོང་ལ་ལྟོས་དང་ཤེས།”
“ཨོ། ཁྱོད་ཡིན་ནམ།”
“ང་ཡིན། ལོ་ཕྱེད་ཙམ་ལ་མ་ཐུག་པར་བརྗེད་སོང་བ་ཨེ་རེད།”
“ང་ལ་ཁྱོད་བརྗེད་མི་ཆོག་པའི་རྒྱུ་མཚན་ཅི་ཡང་མེད།”
“ཡིན་ཡང་། བརྗེད་མི་སྲིད་པ་ངས་ཀྱང་ཤེས་ཡོད། ཁ་ལོ་བཏོད་པའི་དགའ་ལོ་མགོ་དཀར་པོར་གྱུར་རུང་མི་བརྗེད་ཟེར་སྲོལ་ཡོད་ཐལ།བདེན་ཞད་ལོས་ཡོད།”
“ང་ལ་མཚོན་ན་དེ་འདྲ་ཞིག་མིན།”
“ཨོ་དེ་ན་བཟང་གི”
“ང་ལ་འདྲི་རྒྱུ་ཞིག་འདུགདྲང་མོར་ལན་བཏབ་ན་ཆོག་གམ།”
“ལོས་ཆོག ཤོད་དང་།”
“ཁྱོད་ཀྱིས་ཟླ་བ་དང་ངེད་གཉིས་འབྲེལ་འདྲིས་བྱེད་ཀྱིན་པ་ཅི་ལྟར་ཤེས་པ་ཡིན།”
“སློབ་གྲོགས་ཤིག་གི་ཁ་ནས་གོ་བ་ཡིན། དེའི་རྗེས་སུ་ཁྱོད་ཀྱི་དྲ་མིང་འདོགས་སྟངས་ལ་བལྟས་ཏེ་བདེན་པ་ཡིན་པ་ཤེས་ཡོད།”
“སློབ་གྲོགས་སུ་རེད། ཁོས་ངེད་གཉིས་ལ་འབྲེལ་བ་ཡོད་པ་ཅི་ལྟར་ཤེས་པ་རེད། ངེད་གཉིས་མི་མང་གྲལ་ནས་མ་དགོས་གཅིག་པུར་ཡང་ངོ་ཐུག་མྱོང་མེད། ཁོས་ཅི་ལྟར་ཤེས་པ་རེད། དྲང་མོར་བཤད་རོགས།”
“ཁྱོད་སྤོ་མ་ལངས། ངས་དྲང་མོར་བཤད་ཆོག”
“ང་སྤོ་ལངས་ཀིན་མེད། ངོ་མ།”
“ང་ལ་སྤོ་མི་ལངས་པ་ཁག་ཐེག་བྱ་རོགས། ངས་ཀྱང་བསམ་གཟས་པ་མིན།”
“དོན་ངོ་མ་ཅི་རེད།”
“ཁྱོད་ཀྱིQQངའི་ཁ་པར་གྱི་སྟེང་ནས་ཁ་ཕྱེ་རྗེས་སུབ་རྒྱུ་བརྗེད་འདུག་པས། ང་རྒྱུན་པར་ཁྱོད་ཀྱིQQནང་ལ་གཡེང་བ་ཡིན་ལ། ཁྱོད་ཀྱིས་ཟླ་བ་ལ་འབྲེལ་འདྲིས་བྱེད་པ་དང་ཁ་ཆད་བཏབ་པའང་དེ་ལྟར་ཤེས་པ་ཡིན། ཁྱོད་ནི་ང་དང་ཁ་བྲལ་ནས་ཡུན་རིང་འགོར་ནའང་བརྗེད་པར་དཀའ་བས། ངས་ཁྱོད་ལ་སྣང་འཇོག་ཙམ་བྱས་པ་ལས་ཅི་ཡང་མིན། ཁྱོད་ཀྱི་མི་སྒེར་གྱི་གསང་བ་ལ་བརྩི་འཇོག་མ་བྱས་པས། འདིར་ཆེད་དུ་དགོངས་དག་ཞུས་པ་ཡིན། དགོངས་པ་མ་ཚོམ། ཁྱོད་གཉིས་ལ་བར་ཆད་བཟོས་སོང་།”
“ཨ་བ་ཨ་མ། དགོངས་དག་ཞུ་རྒྱུར་ངོ་མི་ཚའམ། ཁྱི་རྒན།”
“ངས་ཁྱོད་ལ་དྲང་མོར་བཤད་པ་ཡིན། ངས་ཁྱོད་ཀྱིQQགསང་གྲངས་བརྐུས་པ་མིན། ཁྱོད་རང་གིས་སུབ་རྒྱུ་བརྗེད་སོང་བ་རེད། དེ་ང་ལན་ནམ། འཇིགས་པོ་མ་བཅའ། ངོ་ཚ་རྒྱུ་སུ་ལ་ཡོད་མེད་རང་རང་ལ་གསལ་ནི་རེད། ང་མེ་ཏོག་ཡིན་ཞེས་ཤོབ་གཏམ་རྒྱུར་ངོ་མི་ཚའམ། ངོ་མ། བཟང་བྱས་ན་བཟང་ངོ་མི་འདུག བདེ་མོ་བྱོས།”
བཀྲ་ཤིས་དོན་འགྲུབ་ཀྱིས་བསྐུར་བའི་ཡི་གེ་འདི་དག་ནི་མདའ་མོ་རེ་རེ་ལྟར་འཕྲོ་རིམ་འཕྲོར་མཚོ་མོའི་སེམས་ལ་ཟུག་པར་གྱུར་བས། ངུ་སྒྲ་མེད་པའི་མིག་ཆུའི་རྒྱུན་ནི་རྨ་ཁའི་ནང་གི་ཁྲག་དྲོན་དང་འདྲ་བར་མཁུར་མགོ་བརྒྱུད་ནས་ཤམ་ཤམ་བཞུར་བྱུང་།
མུན་པ་འཁྱིལ་བའི་མལ་ཁང་ནི་སྔུར་སྒྲ་རེ་གཉིས་ཀྱི་འདེགས་འཇོག་ཁྲོད་ན་ཁུ་སིམ་མེར། ཡོད་ཚད་གཉིད་དུ་ཡུར་འདུག མཚོ་མོ་གཅིག་པུས་མལ་ཐུལ་གྱི་གོང་བ་ཁ་ནང་ལ་བརྫངས་ཏེ་ངུ་སྒྲ་རེ་རེ་དབུགས་རྒྱུན་ལ་བསྲེས་ནས་སད་ཡོད།
མཚོ་མོའི་ངུ་སྐད་གཉོམ་པོ་དལ་བ་དལ་བུར་རང་གི་དབུགས་རྒྱུན་ལ་འདྲེས། མལ་ཁང་གིས་སྔར་བཞིན་ཁུ་སིམ་མེར་མུན་པ་མཐུག་པོ་ཞིག་རུམ། ནམ་གུང་འདིར། མོ་གཉིད་དང་བྲལ་ནས་ཡར་འཕག་མར་འཕག་ལན་མང་བྱས་རྗེས། སྒེའུ་ཡོལ་འཐེན་ནས་ཕྱི་ལ་བལྟས་པ་ན། ཡོད་ཚད་གཉིད་དུ་ཡུར་ཞིང་། ཕྱི་རོལ་གྱི་འདུ་འཛི་དང་འུར་ཟིང་ཡང་ཞི་ཞིང་འཇགས། མཚན་མོ་འདིའི་ནམ་མཁའ་མུན་པས་གཡོགས་འདུག་པ་སྨན་ཤར་གྱི་སེམས་པ་སྡུག་གིས་བཟུང་བ་དང་འདྲ། མཚན་མོ་འདིའི་ནམ་མཁའ་སྨག་གིས་བསྡམས་པས། ས་ཆེན་གྱི་པང་ལ་འཁྱིལ་བའི་ཁེར་རྐྱང་གི་མཚོ་མོ་རེ་རེས་ཀྱང་རང་གི་རླབས་རྒྱུན་ལ་ཉན་ཡོད། སེམས་སྒྲ་ལ་ཉན་ཡོད། མོ་ཉལ་ཁང་སྒོ་ཡི་གློག་སྡོང་གི་འོད་སྣང་མོག་པོ་དེ་ལ་ཅེར་ཏེ་ལུས་ཤིང་། རྐུབ་སྟེགས་ཟད་པོ་དེ་ལ་འགོས་པའི་གློག་འོད་ཁེར་ཆད་དེ་ནི་ཟླ་འོད་འཇམ་པོ་ཞིག་ལྟར་སེམས་ལ་ལྷུང་།
མོའི་སེམས་ལ་ཅི་ཡང་མ་དྲན་མོད། མོ་སྔར་བཞིན་གློག་འོད་ཁེར་ཆད་དེ་ལ་ཅེར་ཏེ་ལུས། །༡
“ཁྱོད་ཀྱིས་ང་ལ་ཁ་ཡ་མི་བྱེད་དོན་ཅི་ཡིན།”
“ངས་ཁྱོད་ལ་ཁ་ཡ་བྱེད་འདོད་པས་ཡིན།”
“ཁ་ཡག་མ་བཤད། དྲང་མོར་ཤོད། འུ་གཉིས་ཀྱིས་ཁ་བརྡ་བྱས་ནས་ཡུན་རིང་འགོར་ཡོད་པ་མ་ཡིན་ནམ། ངོ་ཚ་དགོས་དོན་ཅི་ཡོད།”
“ངོ་ཚ་དགོས་དོན་མེད་ན་ཁྱོད་ཀྱིས་ཚུར་ལ་ཁ་མི་གྲག་དོན་ཅི་ཡིན།”
“ཁྱོད་སྐྱེས་པ་ཕོ་ཞིག་གིས་སྔོན་ལ་ཁ་མི་གྲག་ན། ང་བུ་མོ་ཞིག་ལ་ཅི་ཁག”
“རྗེས་མར་ཁ་ཡ་བྱེད་ཁོ་ཐག་ཡིན།”
“ད་ཅི་ཆ། སྔོན་མར་ཡང་ཁྱོད་ཀྱིས་འདི་ལྟར་བཤད་པ་མ་ཡིན་ནམ། ང་ལ་ཁ་ཡ་བྱེད་མི་ཐུབ་རྒྱུ་ཅི་འདུག ཁྱོད་ང་ལ་སྐྲག་གམ།ངའི་མགོ་ན་རྭ་མེད། ངའི་ངོ་ན་རྨ་མེད། ང་ལ་ངོ་གདོང་ཡག་པོ་ཞིག་མེད་ཀྱང་མ་མཐའང་གཟུགས་གཞི་ཡག་པོ་ཞིག་ཡོད། ཁྱོད་ང་ལ་སྐྲག་དགོས་དོན་ག་ལ་ཡོད། དེ་ཨེ་རེད།”
“དེ་ལོས་ཡིན། ཧེ་ཧེ།”
“དགོད་རྒྱུ་ཅི་ཡོད།”
“ཅང་མ་རེད། ཁྱོད་འདི་ངོ་མ་བུ་མོ་སྣང་ཡངས་འདྲིས་སླ་བ་ཞིག་རེད། ཁྱོད་ཀྱིས་ཚུར་ལ་འདི་ལྟར་མ་བཤད་ན། ངས་ཁྱོད་ཀྱི་གཟུགས་གཞི་ཚིགས་དྲུག་སྨྱུག་མ་རེད་ཅེས་བཤད་རྒྱུ་བརྗེད་འདུག”
“ང་སྣང་ཡངས་ཤིག་ག་ལ་ཡིན། འདྲིས་སླ་བ་ཞིག་ཀྱང་མིན་པས། ཁྱོད་ཀྱིས་ཐེངས་གཉིས་ལ་ཐུག་ཀྱང་ཁ་ཡ་བྱེད་མ་ཕོད་པ་མ་ཡིན་ནམ། སྐད་ཆ་ལ་ལ་ཞིག་ཁྱོད་ཀྱིས་མ་བཤད་ཀྱང་། ངས་གསལ་བོར་ཤེས་ཡོད་པས།ངས་ཁྱོད་ཀྱི་ཚབ་ཏུ་བཤད་ཀྱང་མི་ཆོག་པ་ཅི་ཡོད། དཔེར་ན་ངའི་གཟུགས་གཞིའི་ཐད་ཀྱི་སྐད་ཆ་དེ་ལྟར།”
“སྐད་ཆ་ལ་ལ་ཞིག་ངས་དུས་ལྟར་བཤད་མེད་ཚེ། ཁྱོད་ཀྱིས་འདི་ལྟར་ཚུར་ལ་སྔོན་བརྡ་བཏང་ནའང་ཡག་པོ་རེད།”
“ག་ལ་ག་ལ། ཀུ་རེ་ཡིན། ངས་ཁྱོད་ཀྱིས་ཅི་ཞིག་འདོད་ཀྱིན་པ་ག་ལ་ཤེས། དངོས་གནས་ཤེས་ཁག་པོ་རེད། ཁྱོད་ཀྱིས་ང་ལ་ཁ་ཡ་མི་བྱེད་དོན་ཅི་ཡིན། དྲང་མོར་ཤོད།”
“དྲང་མོར་བཤད་ན། རྒྱུ་རྐྱེན་ཅི་ཡིན་ངས་ཀྱང་བཤད་ཁག་པོ་རེད། མ་ཐུག་སྔོན་ལ་ཁ་ཡ་བྱེད་རྩིས་ཡིན་མོད། ཁྱོད་ཀྱི་གམ་ལ་ཐོན་དུས་ཅི་ཞིག་བཤད་དགོས་པའང་མི་ཤེས་པར་དབུགས་ཁེགས་ལ་བྱེད་པས་ཁ་ཡ་མ་བྱས་པར་བུད་སོང་བ་ཡིན། དགོངས་དག”
“འདི་ཐེངས་སྔོན་མའི་རྒྱུ་རྐྱེན་མ་ཡིན་ནམ། ཐེངས་སྔོན་མར་ཁྱོད་དངོས་གནས་འཚབ་ཀྱིན་འདུག ཅི་ཁག”
“ད་ཐེངས་འཚབ་ཀྱིན་པ་མ་ཤེས་སམ།”
“མ་ཤེས། ད་ཐེངས་ཁྱོད་ཀྱིས་ཁ་གྲག་རྩིས་རེད་བསམ་མོད། གམ་ལ་ཐོན་པ་ན་གློ་བུར་དུ་མགོ་སྒུར་ནས་བུད་ཐལ། ཁྱོད་ཀྱིས་ངའི་མཐའ་འཁོར་ནས་ངོ་ཤེས་ཤིག་མཐོང་བྱུང་ངམ། ངོ་ཚ་དགོས་དོན་ཅི་ཡིན། ལུས་རྩལ་ར་བའི་ནང་ན་མི་མང་བོ་ཡོད་པས་ཨེ་རེད།”
“མིན། དགོངས་པ་མ་ཚོམ། མི་མང་ནའང་ང་དེ་ཚོར་ངོ་ཚ་དོན་ཅི་ཡོད།”
“དེ་ངས་ག་ལ་ཤེས། ཡང་གཅིག་བཤད་ན་ཁྱོད་ཀྱི་ངོ་ཤེས་དང་གྲོགས་པོ། དགའ་རོགས་སོགས་ཡོད་པས། དེ་དག་གི་སྔུན་ནས་འུ་གཉིས་ཀྱི་འབྲེལ་བ་ཤེས་འགྲོ་བར་དོགས་པ་ཡིན་སྲིད།”
“ངའི་དགའ་རོགས་ཁྱོད་མ་ཡིན་ནམ།”
“ཕན་ཚུན་ལ་ཁ་མི་གྲག་པའི་དགའ་རོགས་ཤིག་ཡོད་དམ།”
“དུས་རྒྱུན་ཁྱོད་ལ་ཡི་གེ་བསྐུར་ནས་ཁ་བརྡ་བྱེད་པ་འདིའང་ཁ་གྲག་སྟངས་ཤིག་མ་ཡིན་ནམ།”
“ཡིན་སྲིད། འུ་གཉིས་རྒྱུས་ཡོད་དུ་གྱུར་ཡོད་པའང་རྒྱུ་རྐྱེན་འདིའི་དབང་གིས་ཡིན་སྲིད།”
“ངས་ཀྱང་ཁྱོད་ལ་ཁ་ཡ་བྱེད་མ་ཐུབ་པ་མ་གཏོགས་ཁྱོད་ངའི་སེམས་ཀྱི་དགའ་རོགས་ཡིན་པ་ལོས་ཤེས།”
“ཤེས་སམ། ངས་ལན་རེར་ཁྱོད་ཀྱིས་ཁྱོད་ཀྱི་དགའ་རོགས་བདེ་སྐྱིད་སྒྲོལ་མ་རེད་བསམ་བཞིན་འདུག་སྙམ།”
“དེའི་དོན་ཅི་རེད། གོ་བ་མ་ལོག”
“དེའི་དོན་དེ་རེད།”
“ཧ་གོ་མ་བྱུང་།”
“འུ་གཉིས་ཀྱིས་དང་ཐོག་སློབ་ཁང་གི་བར་ཁྱམས་ནས་ཁ་ཆད་བཏབ་དུས་ཁྱོད་ཀྱིས་བདེ་སྐྱིད་སྒྲོལ་མ་མ་མཐོང་ངམ།”
“མ་མཐོང་། བདེ་སྐྱིད་སྒྲོལ་མ་དང་ངེད་གཉི་ཀའི་དོན་དག་ནི་འདས་སོང་གི་གཏམ་རྒྱུད་ཙམ་རེད། ད་ནི་རྟ་བརྒྱུགས་ནས་རྡུལ་འཇགས་ཤུལ་རེད། ངེད་གཉིས་ལ་འབྲེལ་བ་ཅི་ཡང་མེད།”
“དངོས་གནས་མ་མཐོང་ངམ། ཁྱོད་ངའི་ཕྱོགས་སུ་ཡོང་དུས་བདེ་སྐྱིད་སྒྲོལ་མ་ཏག་ཏག་ངའི་སྔུན་ནས་ཁྱོད་ཀྱི་ཕྱོགས་སུ་བུད་ཐལ། བར་ཁྱམས་ཀྱི་མུན་པ་སྲབ་བུ་དེའི་ཀློང་ནས་མོས་ཡང་དང་ཡང་དུ་མགོ་བོ་རྒྱབ་ལ་འཁོར་ནས་ང་ལ་ལྟ་ཞོར་དང་སྔུན་ལ་དགྱེ་ནས་ཁྱོད་ལ་ལྟ་ཞོར་བུད་སོང་། འུ་གཉིས་ཀྱི་བར་ནས་ནག་ཡོར་ཡོར་རྒྱང་ལ་ཡལ་བའི་རྒྱབ་གཟུགས་དེ་ད་དུང་ངའི་མིག་ལ་ཞག་འདུག”
“འོད་འཕྲོ་ཕྱོགས་ཤིག་གིས་ཡིན་ནམ། ངས་དངོས་གནས་བདེ་སྐྱིད་སྒྲོལ་མ་མཐོང་མ་བྱུང་། ཁྱོད་ཀྱི་རྒྱབ་ཕྱོགས་ཀྱི་སྒེའུ་ཁུང་ཆུང་ཆུང་དེ་ལས་འོད་འཕྲོས་ཡོད་པས། སློབ་ཁང་གི་བར་ཁྱམས་ནས་ཁྱོད་ཀྱི་ངོ་གདོང་རབ་རིབ་ཏུ་སྣང་བྱུང་། ནན་ཏན་གྱིས་བལྟས་པ་མིན་ཚེ་ཁྱོད་ཀྱང་ངོས་ཟིན་ཁག་པོ་འདུག་པས། ངས་ཁྱོད་ཀྱི་གམ་ན་འགྲོ་བ་དེ་དག་སུ་ཡིན་ག་ལ་ཤེས།”
“དེ་ན་ཁ་ཡ་མི་བྱེད་དོན་ཅི་ཡིན།”
“ཁྱོད་ལ་ཐེངས་དང་པོར་ངོ་ཐུག་པ་ཡིན་པས་ངོ་ཚ་བྱུང་།”
“ཁྱོད་བུད་མེད་མང་བོར་འགྲོགས་མྱོང་བ་མ་ཡིན་ནམ། དེ་འདྲའི་ངོ་ཆུང་ཞིག་ག་ལ་ཡིན། ངོ་ཚ་དགོས་པ་ཁྱོད་མ་རེད། བདེ་སྐྱིད་སྒྲོལ་མས་འུ་གཉིས་ཀྱིས་ཁ་ཆད་བཏབ་ཡོད་པ་ཤེས་ཡོད་པ་འདྲ། ང་སློབ་ཁང་དུ་ཐོན་དུས། མོས་ང་ལ་ཡང་དུ་ཡང་དུ་བལྟས་ནས་ཁྲེལ་དགོད་བྱེད་ཀྱིན་འདུག སློབ་གྲོགས་ཁ་ཤས་ཀྱིས་ཀྱང་མོའི་རྣམ་འགྱུར་གྱི་ནང་དོན་གོ་ཡོད་པ་འདྲ་བས། ང་དངོས་གནས་ངོ་ཚ་བྱུང་།”
“བདེ་སྐྱིད་སྒྲོལ་མས་ཅི་བཤད་ན་བཤད་དུ་ཆུགས། ཁྱོད་ངོ་ཚ་དགོས་དོན་མེད།”
“ཁྱོད་ངོ་ཚ་བར་རྒྱུ་མཚན་འདྲེན་རྒྱུ་འདུགང་ངོ་ཚ་བར་རྒྱུ་རྐྱེན་མེད་དམ། ངོ་མ་སྐད་ཆ་གནས་ལུགས་མེད་ནི་རེད་ཡ།”
“ཀུ་རེ་ཡིན། སྤོ་མ་ལངས།”
“སྤོ་ལངས་མེད།”
“སྤོ་ལངས་འདུག”
“ངོ་མ་སྤོ་ལངས་མེད། ང་ཁྱོད་ཀྱི་སྟེང་ལ་སྤོ་ལངས་དགོས་པའི་ཚད་ལ་ཐོན་མེད།”
“དེ་འདྲ་ཡིན་སྲིད། ཕན་ཚུན་ལ་ཡིད་ཆེས་བྱས་ན་ཡག་པོ་རེད།”
“ངས་ཀྱང་དེ་ལྟར་བསམས་མོད། དོན་དངོས་ནི་ཅི་འདྲ་ཞིག་ཡིན་པ་སུས་ཤེས།”
“དོན་དངོས་ནི་ཅི་འདྲ་ཞིག་ཡིན་པ་སོ་སོའི་སེམས་ན་གསལ་བོ་ཡིན། ངས་ཁྱོད་ལ་ཐེངས་གཉིས་ལ་ཁ་ཆད་བཏབ་ནས་ཁ་ཡ་མ་བྱས་དོན་ཡང་ངའི་སེམས་ན་གསལ་བོ་ཡིན།”
“ཁྱོད་ཀྱི་སེམས་ན་གསལ་བོ་ཡིན་ནམ། དེ་ན་རང་གི་སྔུན་ན་འགྲོ་བའི་བདེ་སྐྱིད་སྒྲོལ་མའང་རིག་མེད་པ་ཅི་རེད། ཁྱོད་ཀྱིས་དངོས་གནས་བདེ་སྐྱིད་སྒྲོལ་མ་མ་མཐོང་ངམ།”
“ཁྱོད་འདི་དོན་དག་གཅིག་ཡང་ནས་བསྐྱར་དུ་འདྲི་རྒྱུར་དགའ་བོ་འདུག”
“ཁྱོད་ཀྱང་སྐད་ཆ་གཅིག་ཡང་ནས་བསྐྱར་དུ་བཤད་རྒྱུར་དགའ་བོ་འདུག འུ་གཉིས་ཀྱི་གཤིས་ཀ་འདྲ་བོ་འདུག་ཨང་།”
“ཡིན་ན་ཐང་། ངས་དངོས་གནས་བདེ་སྐྱིད་སྒྲོལ་མ་མཐོང་མ་བྱུང་།”
“དེ་འདྲ་ཡིན་སྲིད། བར་ཁྱམས་ཀྱི་འོད་མདངས་མག་མོག་དེ་ལས་མི་གཞན་ངོས་མ་ཟིན་ཟེར་ན་བདེན་མོད། ཉིན་མོའི་ཉི་འོད་འོག་གི་ལུས་རྩལ་ར་བ་ནས་ཀྱང་ངོས་མ་ཟིན་ཟེར་ན་སུ་ཡིད་ཆེས་སམ།”
“ཁྱོད་ཀྱིས་དེ་ཟེར་བ་ཡིན་ནམ། ལུས་རྩལ་ར་བའི་ནང་ནས་ཐུག་དུས་ཀྱང་ང་དངོས་གནས་ངོ་ཚ་བྱུང་། དེ་བས་ཡང་བསྐྱར་ཁ་ཡ་བྱེད་མ་ཐུབ་པ་རེད། ཁྱོད་ང་ལ་ཡིད་ཆེས་མེད་དམ།”
“ང་ཁྱོད་ལ་ཡིད་ཆེས་ཡོད་མེད་ངས་ཀྱང་མི་ཤེས། གང་ལྟར། ངས་ཁྱོད་ལ་ཁ་ཆད་ཐེངས་གཉིས་པ་བཏབ་དུས་ཀྱང་བདེ་སྐྱིད་སྒྲོལ་མའི་ཁྲེལ་དགོད་ཀྱི་མིག་མདངས་ཁྱེར་ནས་ལུས་རྩལ་ར་བར་ཁ་བྲལ་དགོས་བྱུང་། ཁྱོད་ཀྱིས་ཤེས་སམ། འུ་གཉིས་ཀྱི་ཁ་སྐྱེངས་པའི་རྣམ་པ་མོས་མཐོང་འདུག ཁྱོད་ཀྱིས་ང་ལ་ཁ་ཡ་བྱེད་རྩིས་ཀྱིས་གམ་ལ་བཅར་ནས་སྨྲ་བ་མེད་པར་རྒྱང་ལ་སོང་རྗེས། ང་སློབ་ཁང་དུ་འགྲོ་བའི་ལམ་བར་ནས་ཡང་བསྐྱར་མོ་ལ་ཐུག་བྱུང་། ཁྱོད་རང་མོ་ལ་ཐུག་མ་བྱུང་ངམ།”
“མ་ཐུག གལ་སྲིད་ཐུག་བྱུང་ནའང་། ངེད་གཉིས་ལ་འབྲེལ་བ་ཡོད་དམ། གལ་སྲིད་བཀྲ་ཤིས་དོན་འགྲུབ་ལ་ཐུག་ནའང་། ང་ལ་འབྲེལ་བ་ཡོད་མི་སྲིད།”
“དེའི་དོན་ཅི་རེད། ཡང་གཅིག་བཤད་ན་ཁྱོད་ཀྱིས་བཀྲ་ཤིས་དོན་འགྲུབ་རིག་ནས་ང་ལ་ཁ་ཡ་བྱེད་འདོད་མེད་སོང་བའང་ཡིན་སྲིད།”
“བཀྲ་ཤིས་དོན་འགྲུབ་ཀྱིས་ཁྱོད་ལ་དེ་འདྲའི་བག་ཆགས་ཟབ་མོ་དང་ཤུགས་རྐྱེན་ངན་པ་ཞིག་བཞག་ཡོད་དམ། ངས་དངོས་གནས་མ་ཤེས། ཡང་གཅིག་བཤད་ན། ཁྱོད་ཀྱང་བཀྲ་ཤིས་དོན་འགྲུབ་ཀྱི་བུད་མེད་ཡིན་པ་ལས་ང་ལ་འབྲེལ་བ་ཡོད་མི་སྲིད།”
“གླེང་འགེལ་མ་བྱེད། བཀྲ་ཤིས་དོན་འགྲུབ་དང་ངེད་གཉིས་ཀྱི་འབྲེལ་ཐག་སྔ་མོ་ནས་ཆད་ཟིན། རང་སེམས་ན་གནོང་ཡོད་ན། གཞན་སྐྱོན་ལ་ཁག་མ་བཙལ།”
“ཁག་ཅི་ཡང་བཙལ་གྱིན་མེད། འུ་གཉིས་ཀྱིས་ཁ་ཆད་བཏབ་དུས་དེ་གཉིས་ལ་ཁྱོད་ཀྱིས་དངོས་གནས་བཀྲ་ཤིས་དོན་འགྲུབ་མ་མཐོང་ངམ།”
“མ་མཐོང་། ཁྱོད་ཀྱིས་ཁོ་མཐོང་བས་ང་ལ་ཁ་ཡ་མ་བྱས་པ་ཡིན་ནམ།”
“ངས་ཁོ་མཐོང་བྱུང་། ཁོས་འུ་གཉིས་ཀྱིས་ཁ་ཆད་བཏབ་པ་ཤེས་ཡོད་པ་འདྲ། ང་སློབ་ཁང་བར་ཁྱམས་དང་རྩལ་སྦྱོང་ར་བར་མ་ཐོན་གོང་ལ་ཁོས་ངའི་རྗེས་དེད་ཡོད་པ་འདྲ།”
“ཁྱོད་ཀྱིས་ཁོ་མཐོང་བས་ང་ལ་ཁ་ཡ་མ་བྱས་པ་ཡིན་ནམ།”
“ཁྱོད་འདི་ངོ་མ་སྐད་ཆ་གཅིག་ཡང་དང་བསྐྱར་དུ་འདྲི་རྒྱུར་དགའ་ཨང་།”
“ངས་འུ་གཉིས་ཀྱི་བར་ལ་འབྲེལ་བ་ཡོད་ཀྱང་རུང་ལ་མེད་ཀྱང་ཆོག་མོད། ཕན་ཚུན་བར་ལ་གསལ་གསལ་དག་དག་ཅིག་ཡོང་ན་བཟང་སྙམ།”
“ཁྱོད་ཡིད་ཆེས་མེད་སོང་བ་མ་གཏོགས། ངས་ཁྱོད་ལ་རྫུན་གཏམ་ཚིག་གཅིག་ཀྱང་བཤད་མྱོང་མེད། ངས་ཁྱོད་ལ་ཁ་ཡ་མ་བྱས་དོན་ངོ་མ་ངོ་ཚ་བས་ཡིན། རྒྱུ་རྐྱེན་གཞན་པ་ཡོད་མེད་ངས་ཀྱང་མི་ཤེས། ཡིད་ཆེས་བྱེད་མིན་རང་འདོད་གྱིས།”
“ཐེངས་དང་པོར་ངོ་ཚ་བ་ཡིན་ཟེར་ན་རློམ་མོད། ཐེངས་གཉིས་པར་ཡང་ངོ་ཚ་བ་ཡིན་ཟེར་ན་རློམ་ཐབས་མི་འདུག ཁྱོད་རང་དང་ཐོག་བདེ་སྐྱིད་སྒྲོལ་མར་ཐུག་དུས་ཀྱང་ངོ་ཚ་བྱུང་ངམ།”
“བདེ་སྐྱིད་སྒྲོལ་མ་ངེད་གཉིས་ཀྱི་འབྲེལ་བ་སྟེས་དབང་གི་ཐུག་འཕྲད་ཅིག་ལས་ཁ་བརྡ་བྱས་ཏེ་མགོ་བརྩམས་པ་ཡིན་པས། འུ་གཉིས་ཀྱི་དཀའ་ཁག་འདི་འདྲ་བརྒྱུད་དགོས་བྱུང་མེད། འུ་གཉིས་ཐོག་མ་ནས་QQབརྒྱུད་ནས་ངོ་ཤེས་པ་ཡིན་པས། སྔར་བཞིན་འདི་ལྟར་དྲ་ལམ་ནས་ཁ་བརྡ་བྱས་ན་ཐག་ཉེ་ལ་འདྲིས་སླ་བའི་སྣང་བ་ཞིག་རེད།”
“ཨོ་ལེ། འུ་གཉིས་ཀྱི་ལས་སྐལ་དྲ་ལམ་ན་མ་གཏོགས་མེད་པ་འདྲ།”
“ངའི་ནང་དོན་དེ་མིན། གོ་བ་མ་ལོག འུ་གཉིས་ཀྱི་དོན་དག་བདེ་སྐྱིད་སྒྲོལ་མ་དང་བཀྲ་ཤིས་དོན་འགྲུབ་གཉིས་ཀྱིས་ཅི་ལྟར་ཤེས་པ་ཡིན་ནམ། ཁྱོད་ཀྱིས་དེར་འདང་ཨེ་བརྒྱབ། ང་དངོས་གནས་ཡ་མཚར་བོ་འདུག ངས་འུ་གཉིས་ཀྱིས་ཁ་བརྡ་བྱེད་བཞིན་པ་ཉལ་ཁང་ནང་གི་མི་གཅིག་ལའང་ཤེས་སུ་བཅུག་མེད། ཁྱོད་ཀྱིས་མི་གཞན་ལ་འུ་གཉིས་ཀྱིས་ཁ་བརྡ་བྱེད་བཞིན་པ་ཨེ་བཤད།”
“མ་བཤད། ཡུམ། ངའི་སྟེང་ལ་དོགས་པ་མ་ཟ། ང་བུད་མེད་དེ་འདྲ་ཞིག་མིན། ཡང་གཅིག་བཤད་ན་ངས་འུ་གཉིས་ཀྱི་འབྲེལ་བ་ཅི་ཞིག་ཡིན་པ་ངོས་ཟིན་གྱིན་མེད། གཞན་ལ་བཤད་རན་ཞིག་ཡོད་དམ།”
“ངས་ཁྱོད་ལ་དོགས་པ་ཟ་བ་མིན། ཁྱོད་ཀྱིས་ངའི་སྐད་ཆར་གོ་བ་ལོག་པར་ལེན་དོན་ག་རེ་ཡིན་ནམ། ང་ལ་ཡིད་ཆེས་མེད་དམ། ངས་འུ་གཉིས་ལ་འབྲེལ་བ་ཡོད་ཅེས་གཞན་ལ་བཤད་ཡོད་པར་འདོད་དམ།”
“ངས་ངོ་མ་མི་གཅིག་ལའང་མ་བཤད། ཐ་ན་ཉལ་ཁང་ནང་གི་མི་གཅིག་ལའང་ཁྱོད་དང་ཁ་བརྡ་བྱེད་པ་ཚོར་དུ་བཅུག་མེད་པ་ཁག་ཐག་བྱས་ཆོག་གཉི་ཀས་སུ་གཅིག་ལའང་བཤད་མེད་ན་མི་དག་ལ་འདྲེ་ཡིས་བཤད་པ་ཡིན་ནམ།”
“ཡིན་སྲིད། གང་ལྟར་ངས་མ་བཤད། ཁྱོད་ཀྱིས་ངས་གསང་མ་ཚུགས་པར་འདོད་དམ།”
“དྲང་མོར་བཤད་ན་ཁྱོད་ཀྱི་ཅི་བཤད་ལ་གན་འདི་མེད་པའི་བྱ་སྤྱོད་ཀྱིས་ང་ཡིད་ཆད་དུ་བཅུག་བྱུང་།”
“ཁྱོད་འདི་དངོས་གནས་བུ་མོ་རང་སྣང་ཅན་ཞིག་རེད། ངས་ཁྱོད་ལ་ཁ་ཡ་མ་བྱས་པ་འགྲིག་འདུག”
“འགྲིག་ན་བཟང་འདུག འུ་གཉིས་གྱི་བར་ལ་མི་འགྲིག་པ་ཅི་ཡང་མེད། འགྲིག་དང་མ་འགྲིག་མེད་པར་རང་རང་ས་ལ་ཕྱིན་ཆོག”
“ངས་ཀྱང་དོན་མེད་དུ་མི་ཆ་མེད་ཅིག་གི་ཆེད་དུ་འདི་ལྟར་རྩོད་པ་བྱེད་མི་འདོད། བདེ་མོ་བྱོས། འུ་གཉིས་ཀྱི་སྐུད་ལམ་མཚམས་འདི་ནས་བཅད་འཇོག”
༢
“དེ་ལྟར་བྱོས། ང་ལ་བློས་མི་ཐོངས་རྒྱུ་ཅི་ཡང་མེད།”
མཚོ་མོས་ཡི་གེ་འདི་དག་བསྐུར་མ་ཐག་ཏུ་ཁ་པར་གྱི་ངོས་ལ“ཁྱོད་རང་ཁོའི་འབྲེལ་ལམ་དུ་མི་འདུག”ཅེས་ཤར། བློས་མི་ཐོངས་རྒྱུ་ཅི་ཡང་མེད་ནའང་ཟླ་བས་རང་ཉིདQQའཕྲིན་ལམ་ནས་བསུབས་ཡོད་པ་ཤེས་རྗེས། མཚོ་མོའི་སེམས་པ་སྐྱོ་དུབ་བེར་གྱུར། མཚན་མོ་འདི་ནི་སྔར་བཞིན་སྐད་སྒྲ་མེད་པའི་མཚན་མོ་ཞིག་སྟེ། ཡི་གེ་གཏགས་པའི་ཐག་སྒྲ་གསལ་བོ་གཅིག་རྗེས་གཉིས་མཐུད་ངང་སེམས་ཀྱི་དབྱངས་རྟ་རིགས་ཤིག་ལྟར་དུས་ཚོད་གཅིག་ཙམ་གྱི་ཡུན་ལ་གྲག་གྲག་རྗེས། ཡོད་ཚད་གཉིད་ལ་ཡུར་བ་ལྟར་ཁུ་སིམ་མེར་གྱུར། ཁུ་སིམ་མེར་གྱུར་རྗེས་ཀྱི་སྐད་སྒྲ་མེད་པའི་མཚན་མོ་རེ་རེ་ནི་དུས་རྒྱུན་བག་ལྷོད་བདེ་ཡངས་ཀྱིས་ཁྱབ་པ་ཞིག་ཡིན་མོད། དོ་ནུབ་སྐད་སྒྲ་མེད་པའི་ངང་ཚུལ་འདིས་མཚོ་མོའི་སེམས་པ་འོན་དུ་བཅུག་པ་འདྲ། མོ་ཡུན་རིང་ཞིག་ལ་རང་གི་ཁང་བའི་ནང་ལ་ཅེར་ནས་བསྡད་རྗེས། ད་གཟོད་ཕྱོགས་བཞིའི་གྱང་ངོས་གློ་ཁ་ཡིན་པའི་རང་གི་མལ་ཁང་ཆུང་ཆུང་འདི་རུ་གོས་སྒྲོམ་གཅིག་དང་འབོལ་ཁྲི་གཅིག ཅོག་ཙེ་གཅིག ད་དུང་ཐོག་ཏུ་རང་ཉིད་ཉལ་ཡོད་པའི་མལ་ཁྲི་གཅིག་བཅས་ལས་ཅི་ཡང་མེད་པ་རྟོགས་སོང་བ་འདྲ་ལ། དེ་ལྟར་རྟོགས་པར་ཡང་སེམས་ཀྱི་རྩོལ་བ་དྲག་ཏུ་བཏོན་པ་ལྟར། མོ་གཞི་ནས་ཐང་ཆད་འདུག མོའི་ཁང་མིག་གི་མུན་ནག་ལ་འཁྱིལ་བའི་སྔས་འགྲམ་གྱི་གློག་འོད་གཉོམ་པོ་ཁེར་རྐྱང་གི་མཚེའུ་ཞིག་ལྟར་ཞི་ཞིང་འཇགས་ཨང་། མཚོ་མོའི་དྲན་པའང་གཉིད་ཀྱིས་གསབ་མ་ཐུབ་པའི་ཁེར་རྐྱང་གི་མཚེའུ་དེ་ལྟར་ཁང་མིག་འདིའི་ནང་རོལ་ལ་ལྷིང་འཇགས་ཀྱིས་འཁྱིལ་ཞིང་། ལྷིང་འཇགས་ཀྱིས་སྐྱོམ་གྱིན་འདས་སོང་གི་ཆུ་རིས་མང་བོ་གཅིག་རྗེས་གཉིས་མཐུད་ངང་མིག་ལ་བབས་བྱུང་། མོས་མགོ་བོ་རུམ་ལ་བཏུམས་ཤིང་ཡང་ཡང་ཕྱི་ལ་བུད་ནས། དངན་པ་རིང་མོ་ཤུར་ཤུར་ཁོག་ལ་རྔུབ་ཅིང་ཤུར་ཤུར་ཕྱི་ལ་འབྱིན་པ་ནི་ཡ་ཆུང་སྡུག་གི་རྐྱ་མ་བཅོ་བརྒྱད་ཡང་ཡང་བཤིགས་ནས་རྨ་ཁ་འཚེམ་པ་དང་འདྲ།
མོའི་སེམས་ཀྱི་རྨ་ཁ་ཐོག་མ་ནི་བཀྲ་ཤིས་དོན་འགྲུབ་ཀྱིས་བཞག་པ་ཡིན་ལ། མོའི་ལུས་ཀྱི་རྨ་ཁ་ཐོག་མའང་བཀྲ་ཤིས་དོན་འགྲུབ་ཀྱིས་བཏོད་པ་ཡིན། བཀྲ་ཤིས་དོན་འགྲུབ་ནི་མོའི་རྨ་ཁ་ཐམས་ཅད་ཀྱི་བདག་པོ་ཡིན་མོད། ཁོ་དང་བྲལ་ནས་ལོ་ཕྱེད་ཙམ་འགོར་དུས་འདིར། ཁོའི་བདག་དབང་ཡོད་ཚད་ཟླ་བར་དབང་ཡོད། ད་ནི་ཁོ་ལ་ཐོབ་མྱོང་བའི་བརྩེ་དུངས་ཟབ་མོའང་ཟླ་བའི་ཡིན་པས། མོའི་ལུས་ཀྱི་རྨ་ཤུལ་ལ་ཟླ་བས་རེག་མྱོང་མེད་ནའང་། མོའི་སེམས་ཀྱི་རྨ་ཤུལ་ཡལ་ལ་ཉེ་དུས། ལས་བསམ་སར་མི་འགྲོ་གསེག་སར་སོང་ནས་སྐྱིད་སྡུག་ཏུ་གྱུར་ནས་རྨ་ཁ་བཟོས་སོང་བ་ལས་དབང་གི་ཀུ་རེ་ཡིན་ནམ། མཚོ་མོས་ཡང་དང་བསྐྱར་དུ་ཁ་པར་ལག་ཏུ་བླངས་ནས་ཟླ་བའི་QQབསྐྱར་དུ་སྣོན་རྩིས་བྱས་མོད། འགྱོད་གདུང་དང་ཡི་ཆད་ཀྱི་འཕྲོག་རྩོད་བར་ནས་ལས་ཀྱི་བགྱི་བ་ཅི་ཡང་སྤེལ་མ་ནུས།
ཟླ་བ་དང་འགྲོགས་པ་ནས་བཟུང་། ཡང་ན་ཟླ་བ་ངོ་ཤེས་པ་ནས་བཟུང་། མཚོ་མོས་ཟླ་བས་བསྐུར་བའི་སྐད་ཆ་རེ་རེ་དང་ཟླ་བས་བསླངས་པའི་དགའ་སྤྲོ་རེ་རེས། བརྩེ་དུངས་ཀྱི་རྨ་ཁ་གསོས་ཤིང་གྱེས་བྲལ་གྱི་སྡུག་བསྔལ་སུབ་ནས་འགྲོ་བ་ཚོར་ལ། སུབ་ནས་འགྲོ་ཐེངས་རེ་རེར་མཚོ་མོའི་སེམས་ལ་བརྩེ་དུངས་ནི་མ་གཞི་ནས་བཀྲ་ཤིས་དོན་འགྲུབ་ཀྱི་སྤྱོད་པ་དེ་ལྟར་འཚབ་འཚུབ་གོ་རིམ་མེད་པ་ཞིག་མིན་པར་ཟླ་བའི་བག་ཡོད་ཀྱི་སྤྱོད་པ་འདི་ལྟར་འདྲིས་ཆེ་བ་ཞིག་ཡིན་པར་བསམས། ཟླ་བ་དང་འབྲེལ་འདྲིས་བྱེད་པའི་བརྒྱུད་རིམ་ཁྲོད་མཚོ་མོའི་ཡིད་ལ་བབས་ཤིང་བློ་ལ་རན་པའི་སྣང་ཚུལ་ཞིག་ཡོད་པ་ནི། ཟླ་བ་དང་རང་ཉིད་འབྲེལ་འདྲིས་བྱས་ནས་ཡུན་རིང་འགོར་ནའང་ངོ་ཐུག་མེད་པ་དེ་རེད་ལ། ཡང་ན་དུས་ཡུན་རིང་བོ་ཞིག་ལ་ཟླ་བ་དང་ངོ་མ་ཐུག་པ་དེ་ཡིན་མོད། ད་ནི་འབྲེལ་ལམ་ཡོངས་རྫོགས་རྩ་ནས་ཆད་དེ་གཏན་དུ་ངོ་ཐུག་མ་ཐུབ་གྱུར་བས། མོའི་བསམ་བློ་ལའང་འགྱུར་ལྡོག་བྱུང་སྟེ། སྔོན་ཞིག་ནས་ཟླ་བར་ངོ་ཐུག་ཡོད་ན་ཅི་མ་རུང་སྙམ། ཇ་ཁང་ནང་ནས་གོང་ཞོལ་བྱས་ནས་འདུག་དུས་དང་སློབ་ཁང་བར་ནས་སྔ་གཞུག་བྱས་ནས་འགྲོ་དུས་རང་འགུལ་གྱིས་ཁོ་ལ་ཁ་གྲགས་ཡོད་ན་ཅི་མ་རུང་སྙམ།ཡིན་ཡང་། དེ་དུས་དེ་ལྟར་ཁ་མ་གྲགས་པ་ནི་སྙིང་དུ་སྡུག་ཅིང་ཡིད་དུ་འོང་སྟེ། ཟླ་བས་མོའི་གར་འགྲོ་གར་འདུག་མིག་གིས་འཚོས་ནས། མོ་ལ་ལྭ་བའི་ཁ་དོག་མཛའ་མིན་དང་ཟས་ཀྱི་གདམ་གསེས་ཅི་ཡིན་སོགས་འདྲི་ལ། ད་དུང་ཟ་མ་ཟ་དུས་སུ“ཟ་མ་ཞིམ་པོ་ཞིག་ཟོ། དེ་རིང་གི་ནམ་ཟླ་ཧ་ཅང་དྲོ་བས་ཐུག་འཁྱག་ཅིག་བཟས་ན་ལྷག་ཏུ་ཞིམ་སྲིད”ཅེས་བསྐུར་མྱོང་། དཔེ་ཆ་ཀློག་དུས་སུ“ངས་ཀྱང་ཁྱོད་ཀྱིས་ཀློག་བཞིན་པའི་སྒྲུང་རིང་རོ་མེ་འོ་དང་ཀྲའུ་ལེས་ཡེ་ཀློག་བཞིན་ཡོད། ཧ་ཅང་ཡག་པོ་འདུག”ཅེས་བསྐུར་མྱོང་། སྲང་ལ་ཉུལ་དུས་སུ“དེ་རིང་ང་ཡང་ཁྱོད་ཀྱིས་བཤད་པའི་ཁོ་ཧྥེ་ཁང་དེར་ཕྱིན་པ་ཡིན། ནང་གི་བཀོད་པ་ལེགས་པས་བག་ཡངས་མོ་རང་བྱུང་། བཀའ་དྲིན་ཆེ།”ཞེས་བསྐུར་མྱོང་། བརྙན་ལ་ལྟ་དུས་སུ“ཁྱོད་ཀྱིས་ཀྱང་གློག་བརྙན་ཐེ་ཐན་ཉིའུ་ཁུ་ལ་ལྟོས་དང་། ཧ་ཅང་ཡག་པོ་འདུག”ཅེས་བསྐུར་མྱོང་། ཡུལ་དུས་གང་ཞིག་ཏུ་བྱ་བ་ཅི་ཞིག་སྒྲུབ་ནའང་ཟླ་བས་བསྐུར་བའི་ཡིག་འབྲུ་རེ་རེ་མོའི་དགའ་ཡ་སྐྱོ་རོགས་སུ་གྱུར་ཡོད། ཐ་ན་སློབ་ཁྲིད་ཀྱི་སྐབས་སུའང་མོས་ཟླ་བ་ལ་QQའཕྲིན་ལམ་བརྒྱུད་ནས་ཡི་གེ་སྐུར་རེས་བྱས་པ་ཐེངས་གཅིག་མིན། དེ་བས་ཟླ་བ་དང་འབྲེལ་འདྲིས་བྱེད་སྟངས་ནི་བལྟས་ན་ཉེ་ཉེ་འདྲ་བའི་སྣང་བ་ཞིག་ཤར་ཡང་། ད་ནི་བསམས་ན་ངོ་ཡང་མི་ཤེས་རྒྱུས་མེད་དུ་གྱུར་སོང་།
མཚོ་མོའིQQའཕྲིན་ལམ་ལ་ཟླ་བ་ཤར་བ་ནས་བཟུང་། མཚོ་མོའི་འཇིག་རྟེན་ནི་ཞི་འཇགས་བག་ཡངས་ཀྱི་མཚན་མོ་ཞིག་ཡིན་ཞེས་བཤད་ཆོག ཟླ་བ་དང་འབྲེལ་འདྲིས་བྱུང་བ་ནས་མོ་སླར་ཡང་སློབ་གྲྭའི་ཕྱི་རོལ་ན་གླས་པའི་ཁང་མིག་འདི་ལ་འདང་ཇེ་ཡོད་དང་རྩིས་ཇེ་ཆེ་རུ་གྱུར། ཁང་མིག་འདིས་ནི་རྨ་ཤུལ་ཞིག་ལྟར་མོ་ལ་ན་ཟུག་ཟབ་མོ་དང་འདས་དོན་མང་བོ་དྲན་པར་བྱེད་པས། བཀྲ་ཤིས་དོན་འགྲུབ་དང་ཁ་བྲལ་བ་ནས་བཟུང་། ཁང་མིག་འདི་ཟླ་ཕྱེད་ཙམ་ལ་སྟོང་བར་ལུས་ཤིང་། མཚོ་མོས་ནང་སེམས་ཀྱི་སྐྱོ་གདུང་མཐའ་དག་བརྗེད་དུ་མེད་ཀྱང་བརྗེད་པར་སྣང་ནས་ཟླ་བས་བསྐུར་བའི་ཡིག་འབྲུ་རེ་རེ་བརྩེ་བས་ཀློག་བཞིན་སླར་ཡང་ཁང་མིག་འདི་ལ་བག་ཆགས་གསར་བ་ཞིག་བསྒོས་ཤིང་། སླར་ཡང་ཁང་མིག་འདི་རང་འདུ་ཤེས་གསར་བ་ཡིས་གཡོགས་ནས། ཡང་དང་ཡང་དུ་སློབ་གྲྭའི་མལ་ཁང་དུ་མ་བསྡད་པར་ཕྱི་ལ་ཡོང་། ཕྱི་ཡི་ཁང་མིག་འདི་ལས་གཞས་ལ་ཉན་ནས་སྲང་ལ་གཡེང་ཞིང་། མལ་མ་འཛུལ་ནས་དེབ་ལ་ཉུལ་ཞོར་འཕྲིན་ལམ་གྱི་ཟླ་བའི་ཕྱོགས་ལ་སྙིང་གཏམ་གྱི་ཡི་གེ་མང་བོ་དང་སེམས་མཚོན་གྱི་པར་རིས་སྣ་མང་ཕར་བསྐུར་ཚུར་བསྐུར་བྱས། དེ་ལྟར་ཁང་མིག་འདི་ལ་བདེ་སྐྱིད་ཀྱི་དྲོད་སྣང་འཁྱིལ་ནས་ལོ་ཕྱེད་ལྷག་ལས་མ་འགོར་བའི་དེ་རིང་གི་དུས་ལ། མཚོ་མོའི་ལྷིང་འཇགས་ཀྱི་མཚན་མོ་འཇགས་ཐབས་བྲལ་བས། མོས་ཡང་དང་ཡང་དུ་ཟླ་བས་ཅིའི་ཕྱིར་ང་ལ་འབྲེལ་ཐག་བཅད་པ་ཡིན་ནམ་སྙམ། ཟླ་བ་ནི་ཞེ་སྡང་གི་སྤྲིན་གྱིས་བསྒྲིབས་པ་ལྟར་གནས་སྐབས་ཙམ་ལ་མི་སྣང་བར་གྱུར་ནའང་། ཉིན་གཅིག་གཉིས་ཤིག་གི་རྗེས་ནས་མཐོང་ལམ་གྱི་སྤྲིན་བར་ནས་འཛུམ་སྟེ་གཏམ་གྱི་འོད་སྣང་བསིལ་བསིལ་གཏོར་འོང་བ་ཁོ་ཐག་ཡིན་སྙམ་ཞིང་། དེ་ལྟར་བསམ་བཞིན་དེ་ལྟར་ཡང་མིན་པ་འདྲ་བས། མོས་སྐྱེས་པ་དག་ལ་དངོས་གནས་བློ་གཏད་མི་འདུག་བསམས། ཤིང་གི་མལ་ཁྲི་ལས་མགོ་བོ་རུམ་ལ་བཏུམས་ནས་ཕར་འཁོར་ཚུར་འཁོར་བྱེད་ཐེངས་རེར་མོས་ཟླ་བས་བཤད་པ་བདེན་ནམ། བཀྲ་ཤིས་དོན་འགྲུབ་ཀྱིས་ངེད་གཉིས་ཀྱིས་འབྲེལ་འདྲིས་བྱེད་ཀྱིན་པ་ཤེས་ཡོད་དམ། བདེ་སྐྱིད་སྒྲོལ་མས་ཀྱང་ཤེས་ཡོད་པ་ཁོ་ཐག་རེད། ཟླ་བས་ང་ལ་འབྲེལ་འདྲིས་བྱེད་ཀྱིན་པ་མི་གཅིག་ལའང་བཤད་མེད་པ་བདེན་ན། ངས་ཀྱང་མི་གཅིག་ལའང་ཤེས་སུ་བཅུག་མེད་པས། ཁོ་གཉིས་ཀྱིས་ཅི་ལྟར་ཤེས་པ་ཡིན་ནམ་ཞེས་ཡིད་གཉིས་ཐེ་ཚོམ་གྱི་དབང་དུ་གྱུར་ནས་ཡུན་རིང་འགོར་རྗེས། གློ་བུར་དུ་ཕྱིར་དྲན་འཐིབས་པའི་ཁང་མིག་འདི་ལས་གཉིད་ཐབས་བྲལ་ཞིང་སུན་སྣང་འགོག་པར་དཀའ་བ་ཞིག་སྐྱེས་པས་ཁ་པར་ལག་ཏུ་བླངས་ཏེ་བལྟས་པ་ན། ཏག་ཏག་ཆུ་ཚོད་དགུ་རེད། སློབ་གྲྭའི་མལ་ཁང་གི་སྒོ་བརྒྱག་པར་ད་དུང་ཆུ་ཚོད་ཕྱེད་ཙམ་འདུག མོ་མལ་ལས་ལངས་ནས་སློབ་གྲྭར་ལོག་རྩིས་བྱས།
སློབ་གྲྭ་ཆེན་མོའི་ནང་ནས་ལོ་ངོ་གསུམ་ལྷག་འགོར་ལ་ཉེ་དུས་འདིར། མོས་གྲོང་ཁྱེར་འདིའི་བོད་ཡིག་ཚགས་པར་ཁང་དུ་དངོས་སྦྱོང་བྱེད་བཞིན། ལན་རེར་ཕྱི་རུ་གླས་པའི་ཁང་མིག་ཏུ་བསྡད་ཅིང་། ལན་རེར་སློབ་གྲྭའི་མལ་ཁང་དུ་ལོག་བཞིན་ཡོད། མོའི་འཇིག་རྟེན་གྱི་འགྱུར་ལྡོག་ཡོད་ཚད་དངོས་སྦྱོང་བྱས་པ་ནས་མགོ་བརྩམས་པ་མ་ཡིན་པར་ཁང་བ་འདི་གླས་པ་ནས་མགོ་བརྩམས་པ་འདྲ་ལ། ཁང་བ་འདི་གླས་པ་ནས་བཟུང་། བཀྲ་ཤིས་དོན་འགྲུབ་དང་འབྲེལ་འདྲིས་ཇེ་ཟབ་ཏུ་གྱུར་ཞིང་། ཁོའི“ངས་ཁྱོད་ལ་ཅི་ཡང་མི་བྱེད། སྐྲག་མི་དགོས།”ཞེས་ཁང་མིག་འདིར་འཛུལ་ཐེངས་རེ་རེས་མངོན་མེད་ཀྱི་ཨུ་ཚུགས་རིགས་ཤིག་གིས་ཁོ་གཉིས་བཅུམས་ནས་ཡོང་བ་ལྟར། མོའི་བརྩེ་དུངས་ཀྱི་རང་ཚུགས་དབང་མེད་དུ་འཕྲོག་སོང་ལ། མོའི་ལང་ཚོ་ཡི་མེ་ཏོག་དབང་མེད་དུ་བཅོམས་སོང་། དེ་ལྟར་ན་ཟུག་དང་བརྩེ་བ་ནི་ཨུ་ཚུགས་དང་སྟེས་དབང་ལས་སྐྱེས་པས། མོས་འགྱུར་ལྡོག་སྐྱེན་པའི་དགའ་སྐྱོ་མང་བོ་དང་ལྷན་དུ་རང་ཉིད་བུད་མེད་ཅིག་ཡིན་པར་ངོས་འཛིན་ཐོབ། བྱ་དངོས་མང་བོ་ཞིག་ལ་བཟུང་བའི་རྣམ་འགྱུར་ཡོད་ཚད་བག་ཡངས་སུ་གྱུར། དེ་ནི་མོའི་ཚོར་བ་རྣོན་པོ་དང་དངངས་སྐྲག་འཚེར་པོ་གཞན་གྱི་ལག་ཏུ་ཤོར་བས་ཡིན་སྲིད། བཀྲ་ཤིས་དོན་འགྲུབ་ཀྱིས་བསླངས་པའི་བརྩེ་དུངས་ཀྱི་ན་ཟུག་ཟབ་མོས་མོ་ལ་བག་ཆགས་ཟབ་མོ་དང་རེ་བ་ཆེན་པོ་བྱིན་མོད། ཁོའི“ངས་ཁྱོད་ཐེངས་དང་པོ་ཡིན་པ་ཡིད་ལའང་མ་ཤར”ཞེས་པའི་སྐད་ཆ་དེ་ལས་རྨི་ལམ་གྱི་སྨུག་པས་གཡོགས་པའི་དངོས་ཡོད་ཀྱི་གཟུགས་བརྙན་ཇེ་གསལ་ཇེ་གསལ་ངང་བཀྲ་ཤིས་དོན་འགྲུབ་ཀྱི་དམིགས་ཡུལ་བསླངས་ལ་བུད་ཅིང་། བཀྲ་ཤིས་དོན་འགྲུབ་ཀྱིས་བསླངས་པའི་དགའ་སྐྱོ་ཐམས་ཅད་བཏང་སྙོམས་སུ་གྱུར་ནས། མཚམས་ཤིག་ལ་ཁོ་གཉིས་ཀྱི་འབྲེལ་བ་ཅི་ཞིག་ཡིན་པའང་མི་ཤེས་པར་གྱུར། སྐབས་ཤིག་ལ་ཁོ་གཉིས་ལ་གཞི་ནས་འབྲེལ་བ་ཅི་ཡང་མེད་པར་གྱུར།
སྤྱིར་བཏང་དུ་ཟླ་བར་འབྲེལ་འདྲིས་བྱས་པ་ནས་བཟུང་། མོས་བཀྲ་ཤིས་དོན་འགྲུབ་གཏན་བརྗེད་དུ་གྱུར་ཡོད་ཅེས་བཤད་ཆོག་མོད། ཟླ་བས་གློ་བུར་དུ་འབྲེལ་ཐག་བཅད་པ་འདིས་མོ་ལ་ཡང་དང་ཡང་དུ་སྐྱེས་པ་དག་ལ་བློ་གཏད་མི་འདུག་ཨང་འདོད་དུ་བཅུག དེ་ལྟར་འདོད་ཀྱིན་བཀྲ་ཤིས་དོན་འགྲུབ་དང་འབྲེལ་བའི་འདས་དོན་མང་བོ་ཡིད་ལ་ཡང་ཡང་ཤར། མོ་ནི་རང་གི་དྲན་པ་རྒོད་པོའི་འཚུབ་ཆས་འདེད་པ་ལྟར་གོམ་སྟབས་མགྱོགས་པོས་སློབ་གྲྭའི་ཕྱོགས་སུ་སོང་།
ཁང་མིག་ལས་ཕྱི་ལ་བུད་རྗེས། སྲང་ལམ་གྱི་འདུ་འཛི་དང་འཕྲུལ་ཆས་ཀྱི་འུར་ཟིང་གིས་རྒྱང་དུ་ཤོར་བའི་དྲན་པ་རྒོད་པོ་མཐོང་སྣང་གི་གཟུགས་བརྙན་དུ་སྡུད་པར་བྱེད་ལ། དེ་ནི་བར་སྣང་དུ་འཕུར་བའི་ཤོག་བྱ་ཞིག་རྟོད་ཐག་ཕྲ་མོས་དལ་བ་དལ་བུར་ཚུར་ལ་འཐེན་པ་དང་འདྲ། མོས་དྲན་པ་མཐའ་དག་ཚུར་ལ་བསྡུས་རྗེས། ལམ་འགྲམ་གྱི་ཚོང་ཁང་དག་ལ་མིག་གཡེང་བྱེད་ཞོར་སོང་། ཕྲེང་བར་བསྟར་བའི་ཚོང་ཁང་དང་མགྲོན་ཁང་། དྲ་ཁང་། ཁོ་ཧྥེ་ཁང་སོགས་ཀྱི་སྒོ་མོ་རེ་རེ་གློག་འོད་ཀྱིས་བརྒྱན་པའི་སྒོ་བྱང་རེ་རེའི་འོག་ཏུ་ཁྲ་ལམ་མེར། འུར་ཟིང་དང་འདུ་འཛི་ལ་གོམས་པའི་བབ་ཆགས་ཀྱི་རྣམ་པ་ཞིག་མངོན་འདུག སྒོ་བྱང་རེ་རེ་གྲལ་བསྒྲིགས་ནས་མོའི་སྔུན་ནས་རྒྱབ་ལ་ཡལ་ཐེངས་ཤིག་ལ། མིག་ལམ་དུ་སྒེག་ལྡན་མའི་སྐྲ་གཞར་ཁང་ཞེས་པ་མངོན་བྱུང་།
མོས་དེ་རིང་སྔ་དྲོར་ཟླ་བར་ཁ་ཆད་ཐེངས་གཉིས་པ་བཏབ་སྟེ། ཉིན་གུང་ཆུ་ཚོད་གཅིག་གི་ཐོག་ཏུ་སློབ་གྲྭའི་ལུས་རྩལ་ར་བ་ནས་ངོ་ཐུག་རྒྱུ་བྱས་རྗེས། དགའ་སྤྲོ་དཔག་མེད་ངང་མལ་གྲོགས་དག་ལ་ལྭ་བ་གང་ཞིག་མཛའ་མིན་ལྟ་རུ་བཅུག་ནས་ཚུགས་ཀ་འདྲ་མིན་དང་ཁ་དོག་སྣ་ཚོགས་ཀྱི་གོན་པ་མང་བོ་ཡང་ཡང་བརྗེས་མཐར། མོས་སྔོན་ཤིག་ལ་ཟླ་བས“ཁྱོད་ཀྱིས་དེ་རིང་གོན་ཡོད་པའི་མདོག་གློ་ཁ་ཅན་གྱི་ལྭ་བ་དེ་ཧ་ཅང་ཡག་པོ་འདུག དངོས་གནས་མཛེས་མ་རང་རེད”ཅེས་བསྐུར་བ་དྲན་པས་ལྭ་བ་གློ་ཁ་དེ་གོན་ནས་མེ་ལོང་མདུན་ནས་ཕར་འཁོར་ཚུར་འཁོར་དང་གཡས་ལྟ་གཡོན་ལྟ་བྱས་ཤིང་། སྐྲ་ཚུགས་བརྗེ་དགོས་བསམས་ཏེ་སྒེག་ལྡན་མའི་སྐྲ་གཞར་ཁང་ཞེས་པ་འདིར་ཡོང་བ་རེད། ད་ནི་སྐྲ་གཞར་ཁང་འདི་མཐོང་མ་ཐག མོ་ནི་རང་ཉིད་ལ་ངོ་གནོང་བ་ལྟར། དགོད་ཙམ་བྱས་སོང་། ཤ་སྐྱི་དང་སེམས་པ་འགུལ་ཙམ་བྱས་པ་ན་མིག་ཟུང་ལ་ཆུ་རིས་སྲབ་བུ་ཞིག་འཁོར་ཞིང་འཁོར་བས། མོས་གོམ་པ་སྔུན་ལ་སྤོ་ཞོར་དུ་མགོ་བོ་ཡར་ལ་དགྱེ་ནས་ནམ་མཁར་བལྟས། ནམ་མཁའ་ནི་ནག་རོག་གེར་མུན་པས་གཡོགས་ཤིང་། གྲོང་ཁྱེར་གྱི་འོད་སྣང་མོག་པོའི་ཕ་རོལ་ན་རྔམ་ཆེན་པོས་འཐིབས་འདུག་པས་ནི། ཚུར་ནས་ཚུར་ལ་བཅུམས་ནས་ཡོང་བ་དང་འདྲ། ཟླ་བ་དང་སྐར་མའི་ཤུལ་ཙམ་ཡང་མཐོང་རྒྱུ་མེད་པས། མཚོ་མོའི་སེམས་པ་སྔར་ལས་ལྷག་པར་སྐྱོ་དུབ་པར་གྱུར།
མོས་འགྲོ་ཞོར་དུ་མགོ་བོ་སྒུར་ནས་ཟླ་བའིQQདབུ་བརྙན་གྱི་སྟེང་ནས་དལ་བུར་མནན་པ་ན། དྲ་མིང་ལ་མཚོ་མོའི་ཟླ་བ་རུ་བཏགས་ཡོད་པའི་ཟླ་བའི་QQཡི་མིང་སྐད་ཅིག་ལ“མུན་པ་འཇམ་པོ”ཞེས་པའི་ཡིག་འབྲུ་བཞི་རུ་གྱུར་སོང་། ད་དུང་དྲ་མིང་འདིའི་གཤམ་ན“ང་ནི་ཁྱོད་ཀྱི་མཚོ་ལ་ལྷུང་བའི་ཟླ་བ་དེ་ཡིན།”ཞེས་པའི་ཚིག་ཐུང་དེའང་མུན་པར་ཡལ་བའི་སྐར་མ་ཞིག་ལྟར་གར་སོང་ཆ་མེད་དུ་གྱུར་ནས་ཤུལ་དུ“ང་ནི་ཁེར་རྐྱང་གི་མུན་པ་འཇམ་པོ་ཞིག་ཡིན”ཞེས་ཤར་འདུག
ཟླ་བས་དངོས་གནས་མོ་ལ་འབྲེལ་ཐག་བཅད་པ་འདྲ། ད་ནི་མཚན་མོ་འདི་ལྟར། ནམ་མཁའ་འདི་ལྟར། མཚོ་མོའི་མཐོང་ལམ་ནས་ཟླ་བ་ནི་རྒྱང་རིང་བ་ལ་ཨང་།
༣
“ངས་ཀྱང་དོན་མེད་དུ་མི་ཆ་མེད་ཅིག་གི་ཆེད་དུ་འདི་ལྟར་རྩོད་པ་བྱེད་མི་འདོད། བདེ་མོ་བྱོས། འུ་གཉིས་ཀྱི་སྐུད་ལམ་མཚམས་འདི་ནས་གཅད་འཇོག”
ཚིག་ཐུང་འདི་བསྐུར་མ་ཐག ཡ་ཆུང་ལ་སུན་སྣང་འགོག་ཏུ་མེད་པ་ཞིག་ཞེ་སྡང་གིས་དེད་དེ་ཡོང་བས། ཟླ་བས་འདང་རྒྱག་སྤུ་ཙམ་མེད་པར་མཚོ་མོའིQQཐད་ཀར་བསུབས་སོང་།
མཚོ་མོའི་ཡིད་མ་ཆེས་པའི་རྣམ་འགྱུར་རེ་རེས་ཁོ་ལ་བདེ་སྐྱིད་སྒྲོལ་མ་དྲན་དུ་བཅུག་ལ། བདེ་སྐྱིད་སྒྲོལ་མས“གོ་ཐོས་ལྟར་ན་ཁྱོད་ནི་སྐྱེས་པ་བློ་གཏད་མེད་པ་ཞིག་རེད་ཟེར”ཞེས་བཤད་པ་དྲན།
ཟླ་བ་མཚོ་མོའི་པང་ལ་ལྷུང་ནས་ལོ་ཕྱེད་ཅིག་འགོར་སོང་། ཡང་ན་མཚོ་མོས་བསྐུར་བའི་པར་རིས་དང་ཡི་གེ་ཁ་པར་དུ་ཉར་ནས་ལོ་ཕྱེད་ཅིག་འགོར་སོང་། ལོ་ཕྱེད་ཅིག་འགོར་ནའང་ཟླ་བས་མཚོ་མོའི་གཟུགས་བརྙན་ཙམ་ལས་མོའི་གཤིས་རྒྱུད་ཀྱི་ཞི་འཇམ་མྱོང་སྐལ་མ་བྱུང་ལ། ལོ་ཕྱེད་ཅིག་འགོར་ནའང་མཚོ་མོས་ཟླ་བའི་གཟུགས་བརྙན་ཙམ་ལས་ཁོའི་ངོ་གདོང་གི་བསིལ་ཟེར་མྱོང་ཐབས་མ་བྱུང་།
ཟླ་བ་ནི་ཡག་ཕོ་སྒོ་དང་གཟུགས་སྐྱེ་ལུས་ལྡན་པའི་གསར་བུ་སྙིང་རྗེ་ཞིག་སྟེ། ཁོའི་ཤ་མདངས་དཀར་ཚུལ་དང་ཁ་མིག་རན་ཚུལ་གྱིས་མོ་བརྒྱའི་སེམས་པ་འཕྲོག་ཅིང་ཕོ་བརྒྱར་སྙིང་རླུང་བསླངས་མྱོང་། ཁོའི་ལུས་དང་གཟུགས་གཞི་ཡག་པོ་དར་སྲོལ་གསར་མའི་གྱོས་གོས་རེ་རེས་བརྒྱན་ཐེངས་རེར་བརྙན་འཕྲིན་ནང་གི་སྐར་ཆེན་དེ་དག་ལྟར་སྙིང་དུ་སྡུག་པས། སློབ་ཆེན་འདིའི་སྒོ་ཐེམ་བརྒལ་བ་ནས་བཟུང་། བུ་མོ་གང་མང་ཞིག་གིས་ཁོ་ལ་འཕྲིན་ཡིག་བསྐུར་ཞིང་ཁ་པར་བཏང་ནས་འབྲེལ་འདྲིས་བྱས་མྱོང་། ཁོས་བུ་མོ་གང་མང་ཞིག་གིས་ཚུར་ལ་བསྟན་པའི་རྣམ་འགྱུར་རེ་རེ་སྣང་མེད་དུ་མ་བཞག་པར་བསྟུད་མར་བུ་མོ་བཞི་ལ་དགའ་རོགས་བསྒྲིགས་ཤིང་ལུས་འབྲེལ་བྱུང་བས། སློབ་རའི་བུ་མོ་དག་གི་ཁྲོད་དུ“ཟླ་བ་ལ་བློ་གཏད་མེད”ཅེས་གྲགས། དེ་ལྟར་གྲགས་པས། ཚུར་ལ་འབྲེལ་འདྲིས་བྱེད་པའི་བུ་མོ་གཅིག་ཀྱང་མ་བྱུང་། བདེ་སྐྱིད་སྒྲོལ་མ་དང་མཚོ་མོ་གཉིས་ནི་ཁོས་རང་ཉིད་ཀྱི་འདོད་པ་ལྟར་འབྲེལ་འདྲིས་བྱས་པའི་དགའ་རོགས་གཉིས་ཡིན། མྱི་ཁ་དེའི་དབང་གིས་ཁོ་དང་བདེ་སྐྱིད་སྒྲོལ་མའི་འབྲེལ་བ་ནི་མིང་ཙམ་དུ་གྱུར་ལ། ཁོ་དང་མཚོ་མོའི་འབྲེལ་བའང་ད་ནི་མིང་ཙམ་དུ་གྱུར་སོང་།
རང་གིས་བསམ་པ་རྣམ་དག་གིས་ཕར་ལ་འབྲེལ་འདྲིས་བྱེད་དུས། ཕ་རོལ་བོ་ཡིད་མི་ཆེས་པའི་རྣམ་འགྱུར་གྱིས་རྒྱང་ལ་འགྱེད་པ་ནི་སྙིང་ལངས་སྤྱད་ཅིག་རེད་ཨང་། ཟླ་བས་མཚོ་མོའིQQདང་མོས་བསྐུར་བའི་ཡི་གེ་མང་བོ་དང་ལྷན་དུ་མངོན་མེད་ཤུལ་མེད་དུ་བཟོས་རྗེས། བུད་མེད་ནི་མ་གཞི་ནས་རྩེད་ཆས་བྱེད་རྒྱུ་དག་དག་རེད་ཨང་སྙམ། མཚོ་མོའིQQབསུབས་ཚར་ནའང་། མཚོ་མོའི་ཟླ་བ་རུ་བཏགས་པའི་ཁོའི་QQདྲ་མིང་གི་ཡིག་འབྲུ་རེ་རེས་ཁོ་ལ་ཁོང་དགོད་ཅིག་ཤོར་དུ་བཅུག་ལ། དེ་ནི་ཡི་ཆད་པའི་དངན་པ་ཐུང་ངུ་ཞིག་དང་འདྲ་བྱུང་།
ཟླ་བའི་མལ་ཁང་དུ་ལ་ལས་གློག་བརྙན་ལ་ལྟ་བཞིན་འདུག་ལ། ལ་ལ་རོལ་རྩེད་ལ་གཡེང་འདུག ལ་ལ་མལ་ལ་ལོག་ནས་གཉིད་ལ་ཡུར་འདུག ཟླ་བའང་མལ་ལ་ལོག་ནས་གཡས་འཁོར་གཡོན་འཁོར་ངང་འདང་མང་བོ་ཞིག་བརྒྱབ་རྗེས། རང་གི་དྲ་མིང་མུན་པ་འཇམ་པོར་བརྗེས་ལ། དྲ་མིང་གཤམ་གྱི“ང་ནི་མཚོ་ལ་ལྷུང་བའི་ཟླ་བ་དེ་ཡིན”ཞེས་པའི་ཚིག་ཐུང་དེའང“ང་ནི་ཁེར་རྐྱང་གི་མུན་པ་འཇམ་པོ་ཞིག་ཡིན”ཞེས་པར་བརྗེས།ད་དུངQQབར་སྟོང་དུ“མཚོ་མོ་ཟླ་གཟུགས་རུམ་པའི་མཚོ་མོ་མ་རེད། ཟླ་བ་མཚོ་ལ་ལྷུང་བའི་ཟླ་བ་མ་རེད།”ཅེས་སྤེལ་མ་ཐག བདེ་སྐྱིད་སྒྲོལ་མས་དཔྱད་གླེང་གི་ཚུལ་དུ“དེ་ན་ཅི་རེད།”ཅེས་སྤེལ་བྱུང་། ཁོས་ཚིག་ཐུང་འདི་ལ་ལན་ཅི་ཡང་མ་སློག་པར། ཐད་ཀར་བདེ་སྐྱིད་སྒྲོལ་མའི་QQའཕྲིན་ལམ་དུ“མཚོ་མོ་ནི་སའི་གོ་ལའི་བརྩེ་དུངས་ཀྱི་མིག་ཆུ་རེད།”ཅེས་བསྐུར།
“ཁྱོད་ཀྱིས་རང་ཉིད་ཟླ་བ་ཡིན་པ་བརྗེད་པ་མ་ཡིན་ནམ།༼ཁོག་དགོད་ཀྱི་པར་རིས་ཤིག༽”
“ཁྱོད་ལ་མཚོ་མོ་དང་ངེད་གཉིད་ལ་འབྲེལ་བ་ཡོད་པ་སུས་བཤད་པ་ཡིན།”
“ཁྱོད་གཉིས་ཀྱིQQངས་སྦྲེལ་ཡོད་པས་དྲ་མིང་འདོགས་སྟངས་ལ་བལྟས་ཏེ་ཤེས་པ་ཡིན། མཚོ་མོའི་ཟླ་བ་གློ་བུར་དུ་མུན་པ་འཇམ་པོ་རུ་གྱུར་སོང་བ་ཅི་རེད།༼བགད་ནས་ཡོད་པའི་པར་རིས་ཤིག༽”
“ཅི་ཡང་མ་རེད། མཚོ་མོ་ལ་འབྲེལ་ཐག་བཅད་ཟིན།”
“ཁྱོད་འདི་དངོས་གནས་མགྱོགས་པ་ལ་ཨང་།”
“དེ་ཟེར་ན།”
“བུ་མོ་དག་དང་འབྲེལ་ཐག་བཅད་ན་མགྱོགས་པོ་ལ་ཟེར་བ་ཡིན།༼ཁོག་དགོད་ཀྱི་པར་རིས་ཤིག༽”
“ང་མགྱོགས་སོང་བ་མ་རེད། ཁྱོད་ཚོ་དལ་སོང་བ་རེད།”
“མཚོ་མོར་འབྲེལ་ཐག་གཅོད་དོན་ཅི་ཡིན།”
“ཁྱོད་དང་འདྲ་བར་མོས་ཀྱང་ང་བློ་གཏད་མེད་པ་ཞིག་ཏུ་བརྩིས་འདུག”
“བློ་གཏད་མེད་དུ་འཇུག་བྱེད་རང་གིས་བསྒྲུབས་པ་རེད། ང་ཚོ་ལ་ཁག་འགེལ་མ་བྱེད།”
“བློ་གཏད་མེད་དུ་འཇུག་བྱེད་ཁྱོད་ཚོ་རེད། བུད་མེད་དག་རེད། གལ་སྲིད་ངའི་འཇིག་རྟེན་ལ་བུད་མེད་ཁྱོད་ཚོ་མེད་ཚེ། ངའང་སྔར་བཞིན་བློ་གཏད་མེད་པ་ཞིག་ཏུ་ག་ལ་བརྩི། བརྩི་མི་སྲིད།”
“ཨོ། དེ་ན་བུད་མེད་དག་ལ་འབྲེལ་བ་མ་བྱ་རོགས། ངས་བལྟས་ན་ཁྱོད་བུད་མེད་མེད་ན་ཁེར་རྐྱང་ངང་འཚོ་ཐུབ་པའི་མི་མ་རེད།༼ཁོག་དགོད་ཀྱི་པར་རིས་ཤིག༽”
“འབྲེལ་བ་བྱེད་ཀྱིན་མེད། ངའི་QQནང་ན་ང་ལ་འབྲེལ་བ་བྱུང་ཟིན་པའི་བུད་མེད་གཅིག་གིQQཡང་མེད། གལ་སྲིད་གཅིག་ཡོད་ཚེ། ཁྱོད་ཡིན་སྲིད། ཁྱོད་ཅི་འདི་མེད་པར་ལུས་འདུག འུ་གཉིས་ཀྱི་བར་དུ་བྱུང་བའི་འབྲེལ་འདྲིས་ནི་དགའ་རོགས་ཀྱི་ཚུགས་ཀ་བཟུང་བའི་གྲོགས་པོའི་བར་གྱི་འབྲེལ་འདྲིས་དེ་ཙམ་ཡིན་པས་རེད།”
“བུད་མེད་དག་ལ་ཡིན་གཅིག་མིན་གཉིས་དགའ་རོགས་བསྒྲིགས་ནས་ལུས་འབྲེལ་བྱ་དགོས་དོན་ཅི་ལ་ཡོད། གྲོགས་པོ་བསྒྲིགས་ནའང་ལོས་ཆོག ངས་འུ་གཉིས་ཀྱི་བར་ལ་དོན་དག་ངན་པ་ཅི་ཡང་བྱུང་དུ་འཇུག་མི་འདོད་ལ། ཕན་ཚུན་ལ་སེམས་ཀྱི་རྨ་ཁ་ཅི་ཡང་བཟོ་མི་འདོད་པས། འབྲེལ་བ་འདི་བཟུང་བ་ཡིན།”
“ཡ་ཡ། སེམས་པ་སེམས་ཀྱིས་ཤེས་ཡོད། འུ་གཉིས་གྲོགས་པོ་བཟང་བོར་འགྱུར་བར་སྨོན།”
“ཡ་ཡ། མཚོ་མོ་ནི་བུ་མོ་བཟང་བོ་ཞིག་རེད། རྩོད་རྒྱུ་ཆེན་པོ་མེད་ན་འབྲེལ་ཐག་མ་བཅད་ན་བཟང་སྙམ།”
“ཡ་ཡ། ཤེས་སོང་། ང་ལ་གཉིད་འབབ་ཀྱིན་འདུག གནས་སྐབས་སུ་བདེ་མོ་བྱོས།སང་ཉིན་འཕྲད།”
“གཟིམ་ས་བདེ།”
ཟླ་བས་ཀྱང་གཟིམ་ས་བདེ་ཞེས་བསྐུར། བསྐུར་ནས་ཅང་མ་འགོར་བར། ཁོས་རང་གི་ཡིད་ན་ད་དུང་དྲི་བ་གཅིག་ལྷག་འདུག་པ་ཤེས་པས། མྱུར་དུ་བདེ་སྐྱིད་སྒྲོལ་མར་འདི་ལྟར་བསྐུར།
“སྐུད་ལམ་ན་ཨེ་ཡོད། ང་ལ་ད་དུང་འདྲི་རྒྱུ་ཞིག་འདུག ཁྱོད་ཀྱིས་མཚོ་མོ་དང་ངེད་གཉིས་ཀྱིས་སློབ་ཁང་གི་བར་ཁྱམས་ན་ཁ་ཆད་བཏབ་ཡོད་པ་ཅི་ལྟར་ཤེས་པ་ཡིན།”
“ངས་ཅི་ཡང་མ་ཤེས། ཉིན་མོ་དེར་ངས་ཁྱོད་སློབ་ཁང་གི་བར་ཁྱམས་ན་མཚོ་མོའི་ཕྱོགས་སུ་འགྲོ་བཞིན་པ་མཐོང་བྱུང་། མཚོ་མོས་འུ་གཉིས་ཀྱི་འབྲེལ་བ་ཤེས་ཡོད་པ་འདྲ། དོགས་མི་བདེ་བའི་ངང་ངའི་གདོང་ལ་བལྟས་པས། ངས་ཀྱང་འགྲོ་ཞོར་དུ་མོ་ལ་བལྟས་ནས་འཛུམ་ཙམ་བྱས་པ་ཡིན། ཅི་རེད། མཚོ་མོ་དང་འབྲེལ་ཐག་གཅོད་དོན་ང་ལ་འབྲེལ་བ་ཡོད་དམ། ཡོད་ན་ང་དངོས་སུ་སོང་ནས་མོ་ལ་འགྲེལ་བཤད་བྱས་ཆོག”
“མེད། མེད། དེ་འདྲ་ཞིག་མ་རེད། ངས་སྟེས་དབང་མ་རེད་བསམས་སོང་། རང་དགར་དྲིས་པ་ཡིན། དོན་དག་ཅི་ཡང་མེད། གཟིམ་ས་བདེ།”
ཟླ་བས་ཁྱོད་ཀྱིས་ངེད་གཉིས་ཀྱིས་ལུས་རྩལ་ར་བ་ན་ཁ་ཆད་བཏབ་ཡོད་པ་ཇི་ལྟར་ཤེས་པ་ཡིན་ཞེས་འདྲི་བསམས་མོད། དེ་ལྟར་མ་དྲིས་པར་སླར་ཡང་གཟིམ་བདེ་ཞུས་རྗེས། མཚོ་མོ་དེ་འདྲའི་དོགས་པ་ཞིག་ཟ་དོན་ཅི་ཡིན་ནམ། དངོས་གནས་སྙིང་བོ་མི་འདུག་སྙམ། མགོ་བོ་རུམ་ལ་བཏུམས་ནས་གཉིད་རྩིས་བྱས་མོད། གཉིད་ཀྱི་སྨུག་པ་རྒྱང་ལ་ཡལ་བས། ཁོས་མགོ་བོ་དགྱེ་ནས་དུ་རྐང་གཅིག་ལ་མེ་བསྒོས། དུ་བ་སྔོ་ལོག་གེར་འཐེན་ཞོར་གྱང་ངོས་ལ་ཅེར་ནས་བསྡད། གྱང་ངོས་ལ་སྦྱར་བའི་ཤོག་བུའི་སྟེང་ན་འདབ་མ་གྲོལ་བའི་མེ་ཏོག་གློ་ཁ་དག་ཚོན་མདངས་ཀྱིས་བཀྲག་ནས་མིག་ལ་འཚེར་ཡོང་།
ཁོས་མཚོ་མོ་ལ་ཁྱོད་མེ་ཏོག་ཡིན་ནམ་ཞེས་དྲིས་པ་དྲན་ཞིང་། མཚོ་མོས་ཡིན་ཞེས་ཨ་ལན་བྱིན་པ་དྲན་མ་ཐག་ཏུ་ཁེར་དགོད་ཅིག་བྱས་ཤིང་། བུད་མེད་འདི་དག་ལའང་དངོས་གནས་རློམ་རྒྱུ་ཞིག་མི་འདུག མོའི་མེ་ཏོག་ལེན་མཁན་བཀྲ་ཤིས་དོན་འགྲུབ་རེད་ཟེར་བ་མ་ཡིན་ནམ་སྙམ། དེ་ལྟར་ཡུད་ཙམ་ལ་བསམ་གཞིག་ཏུ་གཡེང་རྗེས་དུ་རྐང་གི་སྣེ་མོ་སྒོ་འགྲམ་གྱི་སྙིགས་སྒམ་ཕྱོགས་ལ་གཡུགས་རྗེས། མགོ་བོ་རུམ་ལ་བཏུམས་ནས་གཉིད་ལ་ཡུར་མགོ་བརྩམས།
ཟླ་བས་ཁེར་རྐྱང་གི་མཚན་མོ་འདི་རུམ་ནས་གཉིད་ལ་ཡུར་ཐུབ་བམ། ཕྱི་རོལ་གྱི་ནམ་མཁའ་སྔར་བཞིན་ནག་རོག་གེར་མུན་པས་བཟུང་འདུག
༤
མཚོ་མོ་མལ་ཁང་དུ་ལོག་རྗེས། དུས་རྒྱུན་གྱི་གོམས་སྲོལ་དུ་གྱུར་བའི་ཉལ་ཁར་ངོ་འཁྲུད་པའི་ལས་ལའང་སྤྲོ་བ་ཏིལ་ཙམ་མེད་པར་ཐད་ཀར་མལ་ཐུལ་དུ་འཛུལ་ནས་གཉིད་མགོ་བརྩམས། འདང་རྒྱག་ཡོད་ཚད་ཡལ་བར་གྱུར་ནས་མྱུར་དུ་གཉིད་སོང་ན་བསམས་མོད། གཉིད་ནི་ཅི་ལྟར་བསྒུགས་ཀྱང་ཡོང་ཐབས་བྲལ་བས། མོས་ཁ་པར་གྱི་མཉན་ཆས་རྣ་ནང་ལ་བཙུགས་ཏེ་གང་འདོད་དུ་གླུ་དབྱངས་ལ་ཉན་ཞོར།QQནང་ལ་མིག་གཡེང་བྱས། མོ་ཟླ་བའི་མཚོ་མོ་རུ་བཏགས་པའི་རང་གིQQདྲ་མིང་ལ་ཅེར་ནས་ཡུན་རིང་བསྡད་རྗེས། འདང་ཞིག་ཕོག་པ་ལྟར་ཟླ་བའི་མཚོ་མོ་ཞེས་པའི་ཟླ་བ་དང་འབྲེལ་སྒྲ་བསུབས་ནས་མཚོ་མོ་གཅིག་པུ་རུ་བརྗེས་ཤིང་། དྲ་མིང་གཤམ་གྱི“ང་ནི་ཟླ་བ་རུམ་པའི་མཚོ་མོ་དེ་ཡིན།”ཞེས་པའི་ཚིག་ཐུང་དེའང་བསུབས་སོང་། ཤུལ་དུ་ཅི་ཞིག་འབྲི་རྒྱུ་མ་ཤེས་པར་ཡུད་ཙམ་ལ་ཧད་དེ་བསྡད་ཅིང་། མཐར“བརྩེ་དུངས་ནི་རྨི་ལམ་ཐེངས་གཅིག”ཅེས་གཏགས།QQའཆར་ངོས་སུ་གཞན་གྱིས་ཚུར་ལ་སྦྲེལ་བའི་བརྡ་ཞིག་ཤར་བྱུང་། མོས་ཕོ་རོལ་བོའིQQ སྦྲེལ་ཐག་དང་ལེན་བྱས་མ་ཐག བདེ་མོ་ཞེས་པའི་ཡིག་འབྲུ་གཉིས་འཆར་ངོས་ལ་ཐག་སྒྲ་ཞིག་དང་ལྷན་དུ་ཤར་བྱུང་།
“བདེ་མོ་ཡིན། ཁྱོད་སུ་ཡིན།”
“QQབར་སྟོང་ལ་ལྟོས་དང་ཤེས།”
“ཨོ། ཁྱོད་ཡིན་ནམ།”
“ང་ཡིན། ལོ་ཕྱེད་ཙམ་ལ་མ་ཐུག་པར་བརྗེད་སོང་བ་ཨེ་རེད།”
“ང་ལ་ཁྱོད་བརྗེད་མི་ཆོག་པའི་རྒྱུ་མཚན་ཅི་ཡང་མེད།”
“ཡིན་ཡང་། བརྗེད་མི་སྲིད་པ་ངས་ཀྱང་ཤེས་ཡོད། ཁ་ལོ་བཏོད་པའི་དགའ་ལོ་མགོ་དཀར་པོར་གྱུར་རུང་མི་བརྗེད་ཟེར་སྲོལ་ཡོད་ཐལ།བདེན་ཞད་ལོས་ཡོད།”
“ང་ལ་མཚོན་ན་དེ་འདྲ་ཞིག་མིན།”
“ཨོ་དེ་ན་བཟང་གི”
“ང་ལ་འདྲི་རྒྱུ་ཞིག་འདུགདྲང་མོར་ལན་བཏབ་ན་ཆོག་གམ།”
“ལོས་ཆོག ཤོད་དང་།”
“ཁྱོད་ཀྱིས་ཟླ་བ་དང་ངེད་གཉིས་འབྲེལ་འདྲིས་བྱེད་ཀྱིན་པ་ཅི་ལྟར་ཤེས་པ་ཡིན།”
“སློབ་གྲོགས་ཤིག་གི་ཁ་ནས་གོ་བ་ཡིན། དེའི་རྗེས་སུ་ཁྱོད་ཀྱི་དྲ་མིང་འདོགས་སྟངས་ལ་བལྟས་ཏེ་བདེན་པ་ཡིན་པ་ཤེས་ཡོད།”
“སློབ་གྲོགས་སུ་རེད། ཁོས་ངེད་གཉིས་ལ་འབྲེལ་བ་ཡོད་པ་ཅི་ལྟར་ཤེས་པ་རེད། ངེད་གཉིས་མི་མང་གྲལ་ནས་མ་དགོས་གཅིག་པུར་ཡང་ངོ་ཐུག་མྱོང་མེད། ཁོས་ཅི་ལྟར་ཤེས་པ་རེད། དྲང་མོར་བཤད་རོགས།”
“ཁྱོད་སྤོ་མ་ལངས། ངས་དྲང་མོར་བཤད་ཆོག”
“ང་སྤོ་ལངས་ཀིན་མེད། ངོ་མ།”
“ང་ལ་སྤོ་མི་ལངས་པ་ཁག་ཐེག་བྱ་རོགས། ངས་ཀྱང་བསམ་གཟས་པ་མིན།”
“དོན་ངོ་མ་ཅི་རེད།”
“ཁྱོད་ཀྱིQQངའི་ཁ་པར་གྱི་སྟེང་ནས་ཁ་ཕྱེ་རྗེས་སུབ་རྒྱུ་བརྗེད་འདུག་པས། ང་རྒྱུན་པར་ཁྱོད་ཀྱིQQནང་ལ་གཡེང་བ་ཡིན་ལ། ཁྱོད་ཀྱིས་ཟླ་བ་ལ་འབྲེལ་འདྲིས་བྱེད་པ་དང་ཁ་ཆད་བཏབ་པའང་དེ་ལྟར་ཤེས་པ་ཡིན། ཁྱོད་ནི་ང་དང་ཁ་བྲལ་ནས་ཡུན་རིང་འགོར་ནའང་བརྗེད་པར་དཀའ་བས། ངས་ཁྱོད་ལ་སྣང་འཇོག་ཙམ་བྱས་པ་ལས་ཅི་ཡང་མིན། ཁྱོད་ཀྱི་མི་སྒེར་གྱི་གསང་བ་ལ་བརྩི་འཇོག་མ་བྱས་པས། འདིར་ཆེད་དུ་དགོངས་དག་ཞུས་པ་ཡིན། དགོངས་པ་མ་ཚོམ། ཁྱོད་གཉིས་ལ་བར་ཆད་བཟོས་སོང་།”
“ཨ་བ་ཨ་མ། དགོངས་དག་ཞུ་རྒྱུར་ངོ་མི་ཚའམ། ཁྱི་རྒན།”
“ངས་ཁྱོད་ལ་དྲང་མོར་བཤད་པ་ཡིན། ངས་ཁྱོད་ཀྱིQQགསང་གྲངས་བརྐུས་པ་མིན། ཁྱོད་རང་གིས་སུབ་རྒྱུ་བརྗེད་སོང་བ་རེད། དེ་ང་ལན་ནམ། འཇིགས་པོ་མ་བཅའ། ངོ་ཚ་རྒྱུ་སུ་ལ་ཡོད་མེད་རང་རང་ལ་གསལ་ནི་རེད། ང་མེ་ཏོག་ཡིན་ཞེས་ཤོབ་གཏམ་རྒྱུར་ངོ་མི་ཚའམ། ངོ་མ། བཟང་བྱས་ན་བཟང་ངོ་མི་འདུག བདེ་མོ་བྱོས།”
བཀྲ་ཤིས་དོན་འགྲུབ་ཀྱིས་བསྐུར་བའི་ཡི་གེ་འདི་དག་ནི་མདའ་མོ་རེ་རེ་ལྟར་འཕྲོ་རིམ་འཕྲོར་མཚོ་མོའི་སེམས་ལ་ཟུག་པར་གྱུར་བས། ངུ་སྒྲ་མེད་པའི་མིག་ཆུའི་རྒྱུན་ནི་རྨ་ཁའི་ནང་གི་ཁྲག་དྲོན་དང་འདྲ་བར་མཁུར་མགོ་བརྒྱུད་ནས་ཤམ་ཤམ་བཞུར་བྱུང་།
མུན་པ་འཁྱིལ་བའི་མལ་ཁང་ནི་སྔུར་སྒྲ་རེ་གཉིས་ཀྱི་འདེགས་འཇོག་ཁྲོད་ན་ཁུ་སིམ་མེར། ཡོད་ཚད་གཉིད་དུ་ཡུར་འདུག མཚོ་མོ་གཅིག་པུས་མལ་ཐུལ་གྱི་གོང་བ་ཁ་ནང་ལ་བརྫངས་ཏེ་ངུ་སྒྲ་རེ་རེ་དབུགས་རྒྱུན་ལ་བསྲེས་ནས་སད་ཡོད།
མཚོ་མོའི་ངུ་སྐད་གཉོམ་པོ་དལ་བ་དལ་བུར་རང་གི་དབུགས་རྒྱུན་ལ་འདྲེས། མལ་ཁང་གིས་སྔར་བཞིན་ཁུ་སིམ་མེར་མུན་པ་མཐུག་པོ་ཞིག་རུམ། ནམ་གུང་འདིར། མོ་གཉིད་དང་བྲལ་ནས་ཡར་འཕག་མར་འཕག་ལན་མང་བྱས་རྗེས། སྒེའུ་ཡོལ་འཐེན་ནས་ཕྱི་ལ་བལྟས་པ་ན། ཡོད་ཚད་གཉིད་དུ་ཡུར་ཞིང་། ཕྱི་རོལ་གྱི་འདུ་འཛི་དང་འུར་ཟིང་ཡང་ཞི་ཞིང་འཇགས། མཚན་མོ་འདིའི་ནམ་མཁའ་མུན་པས་གཡོགས་འདུག་པ་སྨན་ཤར་གྱི་སེམས་པ་སྡུག་གིས་བཟུང་བ་དང་འདྲ། མཚན་མོ་འདིའི་ནམ་མཁའ་སྨག་གིས་བསྡམས་པས། ས་ཆེན་གྱི་པང་ལ་འཁྱིལ་བའི་ཁེར་རྐྱང་གི་མཚོ་མོ་རེ་རེས་ཀྱང་རང་གི་རླབས་རྒྱུན་ལ་ཉན་ཡོད། སེམས་སྒྲ་ལ་ཉན་ཡོད། མོ་ཉལ་ཁང་སྒོ་ཡི་གློག་སྡོང་གི་འོད་སྣང་མོག་པོ་དེ་ལ་ཅེར་ཏེ་ལུས་ཤིང་། རྐུབ་སྟེགས་ཟད་པོ་དེ་ལ་འགོས་པའི་གློག་འོད་ཁེར་ཆད་དེ་ནི་ཟླ་འོད་འཇམ་པོ་ཞིག་ལྟར་སེམས་ལ་ལྷུང་།
མོའི་སེམས་ལ་ཅི་ཡང་མ་དྲན་མོད། མོ་སྔར་བཞིན་གློག་འོད་ཁེར་ཆད་དེ་ལ་ཅེར་ཏེ་ལུས། །