དཔལ་ལྡན་གྱི་ཉིན་གཅིག

ཞོགས་སྦྱོང་རྗེས་ཀྱི་སློབ་ཁྲིད་དང་པོ་ཚོགས་ནས་དུས་ཡུན་སྐར་མ་ཞེ་ལྔ་འགོར་རྗེས། གསལ་ཆ་དོད་པའི་ཅོང་བརྡ་དེ་དབྱངས་ཀྱི་འགྱུར་ཁུགས་དང་བསྟུན་ནས་ཏང་ཏང་ཞེས་གྲག་བྱུང་། སློབ་ཁང་གི་གྲུ་ཟུར་ཞིག་ཏུ་མགོ་བོ་མདུན་ཅོག་ལ་སྔས་ནས་རྨི་ལམ་གྱི་ཞིང་ཁམས་འགྲིམ་བཞིན་པའི་སློབ་བུ་དཔལ་ལྡན་གྱིས། ལྕི་རྒྱ་སྟོང་ཕྲག་གིས་བརྣན་པ་ལྟ་བུའི་མགོ་བོ་དེ་ཤུགས་ཀྱིས་ཡར་ལ་དགྱེ་ཞོར། མིག་ཟུང་ཕྱེ་མ་བཙུམ་གྱིས་འཁྲིད་སྟེགས་སྟེང་གི་དགེ་རྒན་ལ་ལྟ་ཙམ་བྱས་དུས། དགེ་རྒན་གྱིས་འཁྲིད་དེབ་ཀྱི་ཁ་བསུམས་ཏེ་མཆན་འོག་ཏུ་བཙུར་རྗེས་ཐད་ཀར་སྒོར་བུད་སོང་། དཔལ་ལྡན་གྱི་མགོ་བོ་ཡང་དབུགས་ཤོར་བའི་བར་སྣང་གི་ལྒང་ལི་ཞིག་ས་རུ་ལྷུང་བ་ལྟར་མདུན་ཅོག་སྟེང་དུ་ལྷུང་སོང་། ལྷུང་ཞེས་བཤད་ནའང་མི་འགྲིག་པ་འདྲ་སྟེ། གཉིད་ཅེས་པའི་ཐ་སྙད་འདིས་མར་འཐེན་སོང་བ་རེད།

གྲལ་མཚེས་དབང་མོས་ལག་གཡས་པས་དཔལ་ལྡན་གྱི་གོང་བ་ནས་འཐེན་ཙམ་བྱས་རྗེས།“ཁྱོད་འདི་ངོ་མ་མི་ཡ་མཚན་ཞིག་རེད་ཨང་། ལྟོས་དང་། ད་ནི་མཐོ་རྒྱུགས་ལྡོག་རྩིས་ཀྱི་ཉིན་གྲངས་གྱ་དགུ་མ་གཏོགས་ལྷག་མི་འདུག ང་དངོས་འབྲེལ་ཁྱོད་ལ་ཧ་ལས་སོང་།”ཞེས་ཕན་སེམས་དང་ཟུར་ཟ་འདྲེས་མའི་སྐད་ཆ་ཞིག་བཤད།

“སློབ་ཐུན་གཉིས་པ་ཅི་རེད།”

“དབྱིན་ཡིག་རེད།”

ཁོ་ལ་མཚོན་ན་རྨ་བྱས་འབྲུག་སྐད་ཐོས་པ་ལྟ་བུའི་སྐད་ཆ་དེ་ཐོས་མ་ཐག མགོ་བོ་སྔར་བཞིན་མདུན་ཅོག་སྟེང་དུ་ལྷུང་སོང་། སླར་ཡང་སྐར་མ་ཞེ་ལྔས་གྲུབ་པའི་སློབ་ཐུན་གཅིག་དེ་ལྟར་རྨི་ལམ་གྱི་ཞིང་ཁམས་འགྲིམ་ནས་ཡོངས་སུ་མཇུག་རྫོགས་སོང་།

མཐོ་རྒྱུགས་ཞེས་པའི་ཐ་སྙད་གཉིས་པོ་འདི་ལ་ལྐོག་གྱུར་གྱི་སྟོབས་ཤུགས་གཞན་ཞིག་ཡོད་པ་འདྲ། སྔོན་ཆད་དཔལ་ལྡན་དང་ལྷན་དུ་སློབ་ཁྲིད་སྐབས་གཉིད་དུ་ཡུར་ལ་སློབ་གསེང་ནས་རྩེད་ལ་གཡེང་བའི་སློབ་གྲོགས་སྙན་གྲགས་དང་ངག་དབང་སོགས་ཀྱང་། ད་ནི་སློབ་སྦྱོང་ལ་ཤི་འཐམ་རོ་འཐམ་བྱེད་བཞིན་འདུག་ཅེས་བརྗོད་ནའང་ཐལ་དྲགས་མོད། འོན་ཏེ། ད་ནི་སྔོན་ཆད་དང་བསྡུར་ཐབས་མེད་པ་མ་ཟད། སློབ་ཁྲིད་སྐབས་གཉིད་དུ་ཡུར་བའང་ཉིན་མོའི་སྐར་ལྟར་རེད།

འཇིག་རྟེན་འདིའི་དོན་དག་མང་པོ་ཞིག་ཆ་མི་མཚུངས་པ་ནི་ཆོས་ཉིད་ཡིན་པ་བཞིན། དཔལ་ལྡན་ལ་ཡང་སུས་ཀྱང་འགྲན་ཡ་མི་ནུས་པའི་ཁྱད་ཆོས་གཅིག་པུ་ཞིག་ཡོད་པ་ནི། བོད་སྐད་ཡིག་གི་ཕྱོགས་ནས་ཁོ་ནི་སུས་ཀྱང་འགྲན་ཟླ་བྲལ་བ་ཞིག་ཡིན་པར་མ་ཟད། ཆེས་ཐོག་མར་མཐོ་གཅིག་གི་སློབ་འགོ་བཙུགས་ནས་ད་རག་བར། དཀྱིལ་རྒྱུགས་དང་མཇུག་རྒྱུགས་སོགས་ཡིག་རྒྱུགས་ཆེ་ཆུང་གང་ཞིག་ཡིན་རུང་། འཛིན་གྲྭའི་ནང་གི་ཨང་དང་པོ་ནི་ནམ་ཡང་ཁོ་རང་གཅིག་པུ་རེད། འོན་ཀྱང་གནས་ཚུལ་འདི་ནི་འཛིན་བདག་དགེ་རྒན་གྱིས་ཁོ་ལ་གཅར་སྐབས། ཁ་གཡར་ས་ལྟ་བུ་ཞིག་ཏུ་གྱུར་ཡོད་དེ། རྣམ་ཀུན་སློབ་ཁང་གི་གྲུ་ཟུར་ག་གེ་མོ་དང་གཞུང་ལས་ཁང་སོགས་ནས་ཁོ་ལ་གཅར་སྐབས།“ཁྱོད་ཀྱི་བོད་ཡིག་སློབ་སྦྱོང་དེ་འདྲའི་བཟང་ཡང་། རྩིས་རིག་དང་སློབ་ཁྲིད་གཞན་དག་འདི་འདྲའི་ཞན་དོན་ཅི་ཡིན།”ཞེས་ཡང་ཡང་སྡིགས་དུས། ཁོ་ནི་སྨྲ་མི་ཤེས་པའི་བྱིས་པ་ཞིག་ལྟར་མགོ་བོ་དང་ཁར་སྨད་པ་ལས་ཅི་བྱ་གཏོལ་བྲལ་དུ་གྱུར་འགྲོ།

ཉིན་གུང་གི་ཟ་མ་ཟོས་རྗེས་ཁོ་རང་ཉལ་ཁང་དུ་ལོག་དུས། མགོ་ཐོག་གི་ནམ་མཁའ་ཧྲིལ་བོ་སྤྲིན་ནག་ལེབ་མོ་ཞིག་གིས་ཡོངས་སུ་གཡོགས་ཤིང་། ལོ་དེའི་ཆེས་ཐོག་མའི་ཁ་བའི་འདབ་མ་རེ་ཟུང་ལྷུང་མགོ་བརྩམས། ཁ་བ་འབབ་པ་ནི་སློབ་གྲོགས་མང་པོ་ཞིག་ལ་མཚོན་ན་སྤྱིར་བཏང་གི་གནམ་གཤིས་འགྱུར་ལྡོག་ཙམ་ལ་ངོས་འཛིན་པ་ལས། དེ་ལ་དོ་སྣང་ཆེན་པོ་བྱེད་མི་སྲིད་མོད། འོན་ཏེ་དཔལ་ལྡན་ལ་མཚོན་ན། དེ་ནི་དགོད་དགོད་ལ་ངུ་རྒྱུ་ཡོད་པའི་དོན་དག་ཅིག་གམ། སྐྱིད་སྐྱིད་ལ་སྡུག་རྒྱུ་ཡོད་པའི་དོན་དག་ཉག་གཅིག་རེད། རྒྱུ་མཚན་ནི། ཁ་བ་འབབ་ཐེངས་རེ་ལ། ཁོའི་ཡ་ཆུང་སེམས་པ་དེ་རྒྱང་རིང་རྒྱང་རིང་ཞིག་ལ་འཕུར་འགྲོ་བས་རེད།

དེ་རིང་ཡང་ཁོས་ཉལ་ཁང་གི་སྒེའུ་ཁུང་ལས་མེ་ཏོག་གི་འདབ་མ་ལྟ་བུའི་ཁ་བའི་ཟེགས་མ་དག་ལྷབ་ལྷུབ་ངང་འབབ་ཚུལ་ལ་བལྟས་ནས། དྲན་པ་རིལ་རིལ་དེ་སྔར་བཞིན་རྒྱང་རིང་གི་ཕ་ཡུལ་དང་། ཕ་ཡུལ་གྱི་ཨ་མ། ཨ་མའི་ངོ་གདོང་དུ་འཕུར་ནས། ཨ་མ་ཞེས་པའི་སེམས་ཀྱི་ལོག་མལ་དེས། དེ་རིང་ཡང་རྣམ་ཀུན་ནང་བཞིན་རྒྱགས་བྲོ་རྒྱབ་ཏུ་ཁུར་ཅིང་། འུར་ཆ་ལག་ཏུ་བཟུང་ནས། རྡོག་ཞབས་གངས་ཀྱི་ཐྲིག་ཐྲིག་གི་སྒྲ་དང་བསྟུན། མང་རྒྱུ་མེད་ལ་ཉུང་རྒྱུ་མེད་པའི་ནོར་ཁྱུའི་རྗེས་དེད་ནས་འགྲོ་བཞིན་ཡོད་སྲིད་ཨང་སྙམ་ཞིང་། དངན་པ་རིང་མོ་ཞིག་དང་བཅས་དམར་ཆུང་སེམས་པ་སྐྱོ་ལྷང་ལྷང་དུ་གྱུར།

ཕྱི་དྲོའི་སློབ་ཐུན་འཚོགས་ལ་ཉེ་ནས་ཁོ་རང་སློབ་ཁང་དུ་ཐོན་དུས། པྲ་ཆལ་ཆེ་བའི་སློབ་གྲོགས་དག་གིས་སྒེའུ་ཁུང་དང་ལམ་འགྲམ་གྱི་གྱང་སྟེང་དུ་བབས་བའི་ཁ་བ་དག་རྡོག་པོར་བཏུས་ནས་རྒྱག་རེས་བྱེད་ཀྱིན་འདུག རེད་དེ་ནམ་རྒྱུན་རྩེ་དགའ་ཆེ་བའི་དཔལ་ལྡན་ལ་དེ་རིང་རྩེད་མོ་རྩེ་བའི་སེམས་ཁམས་ཤིག་ཡེ་ནས་མེད་པ་འདྲ་བས། ལྟེབས་ཆག་ཤོར་བའི་ཤོག་ལྷེ་ཞིག་ཏུ་སྙན་ངག་ལྟ་བུའི་ཚིག་འགའ་བྲིས་ནས་ཚར་ལ་ཉེ་དུས། སླར་ཡང་ཕྱི་དྲོའི་སློབ་ཐུན་འཚོག་སོང་། སྟབས་ལེགས་པ་ཞིག་ལ། ཕྱི་དྲོའི་སློབ་ཐུན་དང་པོ་ཁོ་རང་ཆེས་དགའ་སའི་བོད་ཡིག་སློབ་ཐུན་རེད་འདུག་པས་བློ་རྩེ་གཅིག་སྒྲིམ་གྱིས་གཟབ་ནན་ངང་ཉན་རྗེས། སློབ་ཐུན་གཅིག་ནི་མིག་རྡེབ་ཡུན་ཙམ་གྱི་ཡུན་ལྟར་ཇི་ལྟར་འགོར་བའང་མ་ཤེས་པར་སློབ་ཐུན་གྲོལ་བའི་ཅོང་བརྡ་ངང་གིས་གྲག་བྱུང་།

ཕྱི་དྲོའི་སློབ་ཁྲིད་ཡོད་ཚད་རྫོགས་རྗེས་མལ་ཁང་དུ་ལོག ཉལ་ཁང་དུ་ཐོན་མ་ཐག ཨོ་ཕོ་ལག་འཕྲིན་གྱི་ཅོང་བརྡ་གསལ་ལ་མི་གསལ་བ་དེ་དབྱངས་ཀྱི་འདེགས་འཇོག་དང་བསྟུན་ནས་གྲག་བྱུང་།

“ཝེ། གོ་ཁི་ཨེ་འདུག འདི་ནས་བརྡ་རྟགས་ཀྱིས་དེ་ཙམ་འདང་གི་ཡོད་ས་མ་རེད།”

“གོ་གི་འདུག”

“དོ་ཞག་སློབ་སྦྱོང་ཅི་འདྲ་རེད། སྒོར་མོ་ཚར་ཨེ་སོང་།”

“སྔོན་ཆད་བཞིན་རེད།  གཟའ་འཁོར་སྔོན་མར་བསྐུར་བའི་སྒོར་དག་ཚར་ལ་ཉེ་སོང་།”

“ཡ་ཡ། སློབ་སྦྱོང་ལ་སྡུག་རུས་བྱོས། སྒོར་མོ་ཉིན་འགའི་རྗེས་སུ་རྫོང་ཐོག་ཏུ་འགྲོ་བ་དང་བསྟུན་ནས་བསྐུར་ཡོང་།”ཞེས་རླུང་འཚུབ་ཀྱི་འུར་སྒྲ་ཞིག་དང་བཅས་ཁ་པར་གྱི་སྒོ་གཏན་བྱུང་བས། ཡ་ཆུང་སེམས་སུ་ཕ་ཡུལ་གྱི་དབྱར་ཟླ་དྲུག་པའི་སྨུག་པ་ལྟ་བུ་ཞིག་འཐིབ་བཞིན་མལ་དུ་ཉལ།