ཆགས་སོགས་ཉོན་མོངས་དུག་ཅན་ཚེར་མའི་ཚལ། །
ཞི་བར་མ་གྱུར་དེ་སྲིད་སྡུག་བསྔལ་གྱི། །
ཟུག་རྔུར་བཅས་ཕྱིར་ཆོས་འདུལ་པདྨའི་མཚོར། །
ཞུགས་པའི་སྐྱེས་བུ་ངང་པའི་དེད་དཔོན་བཞིན། །
གསེར་མདོག་བཙོད་དང་གུར་གུམ་མདངས་འཛིན་སྟོན་པས་གནང་བའི་རྣམ་གསུམ་ངུར་སྨྲིག་རྒྱལ་མཚན་མཛེས་པས་ཡོངས་སྤྲས་ཤིང་། །
དྲན་དང་ཤེས་བཞིན་བག་ཡོད་དང་བཅས་སྤྱོད་ལམ་གཙང་ལྡན་འཁྲིལ་བག་ཆགས་པའི་གོམ་སྟབས་དལ་བུས་ས་ཆེན་གནོན། །
བཅུ་གཉིས་སྦྱང་བའི་ཡོན་ཏན་ལ་གནས་ཉིས་བརྒྱ་ལྔ་བཅུའི་ཁྲིམས་ལས་མི་འདའ་དམ་པའི་ཚུལ་དགུའི་བདག་ཉིད་ཅན། །
ཤཱཀྱའི་རྗེས་ཞུགས་ཐུབ་པའི་བསྟན་འཛིན་ས་གསུམ་འགྲོ་བའི་གཙུག་གིས་བཏུད་པའི་ཚོགས་གཉིས་དཔལ་གྱི་ཞིང་སར་བརྗིད། །
འཇིག་རྟེན་རིན་ཆེན་སྤུངས་པས་སྒྱུ་མའི་ལུས། །
བརྒྱན་པའི་བློ་ཆུང་བྱིས་པ་མང་མཐོང་ཡང་། །
བསླབ་གསུམ་ནོར་བུའི་རྒྱན་གྱིས་ཡོངས་སྤུད་པའི། །
ཕུལ་བྱུང་སྡེ་སྣོད་འཛིན་པ་བརྒྱ་ལམ་ཙམ། །
དཀར་གསལ་ཟླ་བ་ཀུན་ནས་རྒྱས་འདྲའི་ཞལ་གྱི་དཀྱིལ་འཁོར་གནག་སྣུམ་དབུ་སྐྲའི་ལན་ཚར་གཡོ་མིན་དབུ་ཟླུམ་མཛེས། །
ཁྲ་ཟིལ་ཐོ་རངས་སྐར་ཆེན་འཛུམ་ལྟའི་སྤྱན་ཟུང་འདོད་ཡོན་གཟུགས་ལ་གཡེང་མིན་དམའ་བའི་ས་ལ་མཉམ་པར་གཟིགས། །
ལྷ་ཡི་རྔར་མཚུངས་ཚངས་དབྱངས་གསུང་ནི་ཅ་ཅོའི་ངག་དང་ནམ་ཡང་མཛའ་མིན་དབྱངས་སྙན་དམ་པའི་ཆོས་སུ་སྒྲོག།
མཆོག་ཏུ་མི་གཡོ་མཁའ་འདྲའི་ཐུགས་ཀྱང་ཀུན་ཉོན་རླུང་གིས་རྟག་ཏུ་མི་རྫི་བྱང་ཆུབ་སེམས་དང་ཏིང་འཛིན་བརྟན། །
ཉི་ཟླ་བྱེ་བའི་དཔལ་གྱིས་མཚོན་མིན་ཞིང་། །
གཏེར་དང་ནོར་བུའི་མཛོད་ཀྱིས་བསྒྲུན་མིན་པའི། །
ཞི་དུལ་ལྟ་ན་སྡུག་པའི་གཟུགས་འཆང་བ། །
འཕགས་ནོར་བདུན་གྱིས་མཛེས་བྱས་སྲིད་འདིར་རྨད། །
ཟོག་པོ་ཁྲམ་རྐྱལ་གཡོ་སྒྱུའི་མཁན་པོ་འཇིག་རྟེན་བསླུ་བྱེད་གྲུབ་གཏེར་རྫུན་མའི་ལྟར་སྣང་མིག་གི་བསྐྱེད་རིམ་དང་། །
ཕྱོགས་རེར་ཞེན་པའི་ལྟ་གྲུབ་ཁ་འཛིན་ཆོས་བརྒྱད་ལྷུར་ལེན་ཆགས་སྡང་དྲག་པོའི་ཀུན་དཀྲིས་ཅན་གྱི་བཙུན་པའི་གཟུགས། །
གནས་སྐབས་གཞན་དང་མཐར་ཐུག་རང་བསླུའི་བསྟན་སེལ་ཆོམ་པོ་བདུད་ཀྱི་བཤེས་གཉེན་ལོག་འཚོས་བརྒྱགས་པའི་གཟི་མདངས་ཅན། །
སྙིགས་མའི་རང་མཚང་ཕྱི་རུ་ཤར་བའི་ལྟས་དག་མཐོང་ནས་དང་བའི་སེམས་པ་ཚངས་སྤྱོད་དུལ་བ་ཁྱེད་ལ་ཤོར། །
གང་གཱའི་ཀླུང་གི་རྡུལ་མཉམ་བསྐལ་པ་རུ། །
རྒྱལ་དང་སྲས་རྣམས་བསྙེན་པའི་དགེ་ལས་ཀྱང་། །
བདེ་གཤེགས་བསྟན་ལ་བསླབ་པ་གཅིག་འཛིན་པའི། །
བསོད་ནམས་དུས་འདིར་འཕགས་ཞེས་རྒྱལ་བས་གསུངས། །
དེ་སླད་ཐུབ་པ་མཆོག་གི་བསྟན་པ་ཕྱི་ཡི་མཁར་དང་མངའ་ཐང་གིས་མིན་འདུ་འཛིའི་འཁོར་གྱིས་དེ་བས་མིན། །
ནང་དུ་འདིར་སྣང་བདེ་ལ་ཞེན་པའི་སྟོབས་འབྱོར་གྱིས་མིན་ཆེ་དགུས་འདུད་པའི་སྙན་གྲགས་བཀུར་སྟིའི་ལ་རྒྱས་མིན། །
ཚུལ་གནས་ཐོས་དང་བསམ་སྒོམ་སྟོབས་ཀྱི་ཤེས་རབ་ཆེ་དང་གཞན་ཕན་དག་པས་དེ་ལ་རི་མོར་བགྱིད་པའི་ཕྱིར། །
ཚངས་སྤྱོད་དགེ་སྦྱོང་གཞོན་ནུའི་གཟུགས་བརྙན་ཡི་གེའི་ལམ་ནས་རི་མོར་བྲིས་འདིས་དེར་མོས་ཀུན་ཀྱང་དེ་འདྲར་ཤོག།