ངེས་པར་དུ་མི་དམངས་བླ་ན་མེད་པ་རྒྱུན་འཁྱོངས་བྱེད་དགོས།

གཅིག།

ང་ཚོའི་མི་དམངས་ནི་རླབས་ཆེ་བའི་མི་དམངས་ཡིན། ལོ་རྒྱུས་ཀྱི་འཕེལ་རྒྱུན་རིང་མོའི་ནང་དུ་ཀྲུང་གོའི་མི་དམངས་ཀྱིས་རང་ཉིད་ཀྱི་ལས་ལ་བརྩོན་ཞིང་དཔའ་ངར་ལྡན་པ་དང་བློ་གྲོས་ཆེན་པོར་བརྟེན་ནས་མི་རིགས་ཁག་ཞི་མཐུན་མཉམ་གནས་ཀྱི་ཁྱིམ་གཞིས་བཟང་པོ་བསྐྲུན་ཡོད་པ་དང་། ཉམས་པ་མེད་པའི་ཕུལ་བྱུང་གི་རིག་གནས་གསོས་ཡོད། ང་ཚོའི་མི་དམངས་འཚོ་བ་ལ་དགའ་ཞེན་ཆེ་བ་དང་། ཁོང་ཚོས་སྔར་ལས་ལྷག་པའི་སློབ་གསོ་དང་། སྔར་ལས་བརྟན་པའི་ལས་ཀ། སྔར་ལས་བློ་ཡིད་ཚིམ་པའི་ཡོང་འབབ། སྔར་ལས་ཡིད་རྟོན་རུང་བའི་སྤྱི་ཚོགས་འགན་སྲུང་། སྔར་ལས་ཆུ་ཚད་མཐོ་བའི་སྨན་བཅོས་འཕྲོད་བསྟེན་གྱི་ཞབས་ཞུ། སྔར་ལས་སྐྱིད་པའི་གནས་སྡོད་ཀྱི་ཆ་རྐྱེན། སྔར་ལས་མཛེས་པའི་ཁོར་ཡུག་བཅས་ལ་རེ་སྨོན་བྱེད་ཀྱི་ཡོད་པ་དང་། བུ་ཕྲུག་རྣམས་འཚར་ལོངས་དེ་བས་ལེགས་པ་དང་། ལས་ཀ་དེ་བས་ལེགས་པ། འཚོ་བ་དེ་བས་བཟང་བ་བཅས་ལ་རེ་སྨོན་བྱེད་ཀྱི་ཡོད། མི་དམངས་ཀྱིས་རེ་སྨོན་བྱེད་པའི་དགའ་སྐྱིད་ཀྱི་འཚོ་བ་ནི་ང་ཚོའི་འབད་འཐབ་ཀྱི་དམིགས་འབེན་ཡིན། མི་ཡུལ་གྱི་བདེ་སྐྱིད་འཚོ་བ་ཚང་མ་དཀའ་སྤྱད་ངལ་རྩོལ་ལས་བྱུང་བ་རེད། ང་ཚོའི་འགན་འཁྲི་ནི་ཏང་ཡོངས་དང་རྒྱལ་ཡོངས་མི་རིགས་ཁག་གི་མི་དམངས་ལ་མཐུན་སྒྲིལ་དང་སྣེ་ཁྲིད་བྱས་ཏེ་མུ་མཐུད་ནས་བསམ་བློ་བཅིངས་འགྲོལ་དང་། བསྒྱུར་བཅོས་སྒོ་འབྱེད་རྒྱུན་འཁྱོངས། སྤྱི་ཚོགས་ཐོན་སྐྱེད་ནུས་ཤུགས་རྒྱུན་ཆད་མེད་པར་བཅིངས་འགྲོལ་དང་གོང་སྤེལ། མང་ཚོགས་ཀྱི་ཐོན་སྐྱེད་དང་འཚོ་བའི་དཀའ་ངལ་ཐག་གཅོད་ཧུར་ཐག། ཐུན་མོང་ཐོག་ཕྱུག་འགྱུར་ཡོང་བའི་བགྲོད་ལམ་ཐོག་བློ་བརྟན་འགྱུར་མེད་ཀྱིས་མདུན་སྐྱོད་བཅས་བྱ་རྒྱུ་དེ་ཡིན།

（2012ལོའི་ཟླ་11ཚེས་15ཉིན་སྐབས་བཅོ་བརྒྱད་པའི་ཀྲུང་དབྱང་ཆབ་སྲིད་ཅུས་ཀྱི་རྒྱུན་ལས་ཨུ་ཡོན་རྣམས་ཀྱིས་ཀྲུང་ཕྱིའི་གསར་འགོད་པར་མཇལ་འཕྲད་གནང་སྐབས་ཀྱི་གསུང་བཤད།）

གཉིས།

མི་དམངས་ནི་ལོ་རྒྱུས་གསར་སྐྲུན་བྱེད་མཁན་ཡིན་པ་དང་། མང་ཚོགས་ནི་དཔའ་བོ་ངོ་མ་རེད། མི་དམངས་མང་ཚོགས་ནི་ང་ཚོའི་སྟོབས་ཤུགས་ཀྱི་འབྱུང་ཁུངས་ཡིན། ང་ཚོས་ཟབ་མོར་ཤེས་ཡོད་གསལ་ལ་མི་རེ་རེའི་སྟོབས་ཤུགས་ལ་ཚད་ཡོད་ཀྱང་། ང་རང་ཚོ་མི་བརྒྱ་བློ་གཅིག་དང་དཔུང་པ་མཉམ་གཤིབ་བྱས་པ་ཡིན་ཕྱིན། ཁྱད་གསོད་བྱེད་མི་ཐུབ་པའི་དཀའ་ངལ་གང་ཡང་མེད་པ་དང་། མི་རེ་རེའི་ལས་ཀའི་དུས་ཚོད་ལ་ཚད་ཡོད་ཀྱང་། བློ་གཅིག་སེམས་གཅིག་གིས་མི་དམངས་ལ་ཞབས་འདེགས་ཞུ་རྒྱུ་ནི་ཚད་མེད་པ་ཞིག་རེད། འགན་འཁྲི་རི་ལས་ལྕི་བ་དང་ལས་དོན་སྒྲུབ་ཡུན་རིང་བས། ང་ཚོས་ངེས་པར་ཐོག་མཐའ་བར་གསུམ་དུ་མི་དམངས་དང་གཅིག་སེམས་གཅིག་གཏད་དང་། མི་དམངས་དང་བདེ་སྡུག་མཉམ་མྱོང་། མི་དམངས་དང་མཐུན་སྒྲིལ་འབད་འཐབ་བཅས་བྱས་ཏེ། ཉིན་མཚན་ལྟོས་མེད་དུ་བསྒྲུབ་བྱའི་ལས་དོན་ལ་གཞོལ་ནས་ལོ་རྒྱུས་དང་མི་དམངས་ལ་ཚད་གཞི་ལོངས་པའི་རྒྱུགས་འབྲས་ཤིག་སྤྲོད་དགོས།

（2012ལོའི་ཟླ་11ཚེས་15ཉིན་སྐབས་བཅོ་བརྒྱད་པའི་ཀྲུང་དབྱང་ཆབ་སྲིད་ཅུས་ཀྱི་རྒྱུན་ལས་ཨུ་ཡོན་རྣམས་ཀྱིས་ཀྲུང་ཕྱིའི་གསར་འགོད་པར་མཇལ་འཕྲད་གནང་སྐབས་ཀྱི་གསུང་བཤད།）

གསུམ།

ང་ཚོས་དམིགས་ཡུལ་བཤད་དེ་སྐད་ཆ་མང་པོ་བཤད་ཡོད། གང་ལྟར་ཡང་མཐར་གཏུགས་ན་མི་དམངས་ལ་ཞབས་འདེགས་ཞུ་རྒྱུ་དེ་ཡིན། ང་ཚོའི་ཏང་ནི་མི་དམངས་ལ་ཞབས་འདེགས་ཞུ་མཁན་ཡིན། ཀྲུང་དབྱང་གིས་བསམ་བློ་གཏོང་རྒྱུ་ཡང་མི་དམངས་ཀྱི་ཆེད་དུ་བྱ་བ་བསྒྲུབ་རྒྱུ་དེ་ཡིན། རིམ་པ་ཁག་གི་ལས་བྱེད་པས་ག་དུས་ཡིན་ཡང་མིག་ཡར་ལྟ་རྒྱུ་མེད། དོན་དག་གང་ཞིག་ཡིན་ན་ཡང་གོང་འོག་གཉིས་ཀར་བལྟ་དགོས། དུས་རྒྱུན་དུ་རང་གིས་རང་ལ་འདི་ལྟར་འདྲི་དགོས་ཏེ། ང་ཚོས་ཏང་གི་རྩ་བའི་དམིགས་ཡུལ་དང་འབྲེལ་བ་གཏན་ནས་མེད་པའི་བྱ་བ་སྒྲུབ་བཞིན་ཡོད་པ་ཡིན་ནམ། བློ་གཅིག་སེམས་གཅིག་གིས་མི་སེར་གྱི་དོན་དུ་བྱ་བ་སྒྲུབ་བཞིན་ཡོད་པ་ཡིན་ནམ། ཏང་དང་རྒྱལ་ཁབ་ཀྱི་ལྟེ་བའི་ལས་འགན་ལ་དམིགས་ནས་ལས་ཀ་སྒྲུབ་བཞིན་ཡོད་པ་ཡིན་ནམ། གནའ་དུས་ནས་རྒྱལ་པོའི་ས་ནས་གླ་ཕོགས་ལེན་མཁན་གྱིས་རྒྱལ་པོའི་དོན་དུ་བྱ་བ་སྒྲུབ་ཅེས་བཤད་སྲོལ་ཡོད། ད་ལྟ་ནི་མི་དམངས་ལ་ཞབས་འདེགས་ཞུ་རྒྱུ་དེ་རེད།

（2012ལོའི་ཟླ་12ཚེས་29དང་ཚེས་30ཉིན་ཧོ་པེ་ཞིང་ཆེན་ཧྥུ་ཕིང་རྫོང་དུ་དབུལ་སྐྱོར་གསར་སྤེལ་ལས་ཀར་རྟོག་ཞིབ་གནང་སྐབས་ཀྱི་གསུང་བཤད།）

བཞི།

ང་ཚོའི་ཏང་ནི་མི་དམངས་ནང་ནས་ཡོང་བ་དང་། མི་དམངས་ནང་དུ་རྩ་བ་ཚུགས་པ། མི་དམངས་ལ་ཞབས་འདེགས་ཞུ་བ་བཅས་ཡིན་ལ། ཏང་གི་རྩ་བ་དང་ཁྲག་རྒྱུན་དང་སྟོབས་ཤུགས་བཅས་མི་དམངས་ནང་དུ་ཡོད། མི་དམངས་ཀྱི་རྒྱབ་སྐྱོར་དང་བརྩི་བཀུར་ཤོར་ཚེ། ཏང་གི་བྱ་གཞག་དང་ལས་དོན་གླེང་ཐབས་བྲལ། ཏང་གིས་མུ་མཐུད་དུ་སྲིད་སྐྱོང་གི་ཉམས་སད་དང་བསྒྱུར་བཅོས་སྒོ་འབྱེད་ཀྱི་ཉམས་སད། ཚོང་རའི་དཔལ་འབྱོར་གྱི་ཉམས་སད། ཕྱི་ཕྱོགས་ཁོར་ཡུག་གི་ཉམས་སད་བཅས་ཐེག་དགོས་ན་ཐོག་མཐའ་བར་གསུམ་དུ་ངེས་པར་དུ་མང་ཚོགས་དང་འབྲེལ་འདྲེས་ཟབ་མོ་བྱེད་དགོས། དུས་ཚོད་གང་འདྲ་ཞིག་དང་གནས་ཚུལ་གང་འདྲ་ཞིག་ཡིན་རུང་། མི་དམངས་དང་དབུགས་ལམ་གཅིག་གྱུར་དང་བདེ་སྡུག་མཉམ་མྱོང་གི་ལངས་ཕྱོགས་འགྱུར་མི་རུང་བ་དང་། བློ་གཅིག་སེམས་གཅིག་གིས་མི་དམངས་ལ་ཞབས་འདེགས་ཞུ་བའི་དམིགས་ཡུལ་བརྗེད་མི་རུང་བ། མང་ཚོགས་ནི་དོན་དངོས་ཀྱི་དཔའ་བོ་ཡིན་པའི་ལོ་རྒྱུས་དངོས་གཙོ་རིང་ལུགས་ཀྱི་ལྟ་བ་འདོར་མི་རུང་བར། ཐོག་མཐའ་བར་གསུམ་དུ་སྤྱི་དོན་དུ་ཏང་འཛུགས་པ་དང་། དམངས་དོན་དུ་སྲིད་སྐྱོང་བ་རྒྱུན་འཁྱོངས་བྱེད་དགོས།

（2013ལོའི་ཟླ་6ཚེས་18ཉིན་ཏང་གི་མང་ཚོགས་ལམ་ཕྱོགས་སྐོར་གྱི་སློབ་གསོ་དང་ལག་ལེན་གྱི་བྱེད་སྒོའི་ལས་དོན་ཚོགས་འདུའི་ཐོག་གནང་བའི་གསུང་བཤད།）

ལྔ།

མང་ཚོགས་ལམ་ཕྱོགས་ཀྱི་ངོ་བོའི་ཐོག་གི་མཚོན་བྱ་ནི་མི་དམངས་མང་ཚོགས་ནི་ལོ་རྒྱུས་གསར་སྐྲུན་བྱེད་མཁན་ཡིན་པའི་སྐོར་གྱི་མར་ཁེ་སིའི་རིང་ལུགས་ཀྱི་རྩ་བའི་རྩ་དོན་འདི་ཡིན། རྩ་བའི་རྩ་དོན་འདི་རྒྱུ་འཁྱོངས་བྱས་ན། ང་ཚོས་ད་གཟོད་ལོ་རྒྱུས་མདུན་སྐྱོད་ཀྱི་གཞི་རྩའི་ཆོས་ཉིད་སྟངས་འཛིན་བྱས་ཐུབ། ལོ་རྒྱུས་ཀྱི་ཆོས་ཉིད་ལྟར་དོན་དག་བསྒྲུབ་ན། ང་ཚོར་ད་གཟོད་རྒྱལ་ཁ་མི་ཐོབ་པ་གཅིག་ཀྱང་མེད་མེད། མི་དམངས་མང་ཚོགས་ནི་ལོ་རྒྱུས་འཕེལ་རྒྱས་དང་སྤྱི་ཚོགས་ཡར་ཐོན་གྱི་སྟོབས་ཤུགས་གཙོ་བོ་ཡིན་པ་ལོ་རྒྱུས་ཀྱིས་ཡང་དང་བསྐྱར་དུ་ར་སྤྲོད་བྱས་ཡོད། “ཀྲུང་གོའི་ལས་དབང་མི་དམངས་རང་ཉིད་ཀྱི་ལག་ཏུ་བཟུང་བ་ཡིན་ན། ཀྲུང་གོ་ནི་ཤར་ཕྱོགས་སུ་ཉི་མ་ཤར་བ་བཞིན་རང་ཉིད་ཀྱི་གཟི་འོད་ས་གཞི་ཆེན་པོར་འཕྲོ་ངེས་ཡིན་”ཞེས་བློ་མཐུན་མའོ་ཙེ་ཏུང་གིས་གསུངས་པ་ནང་བཞིན་ཡིན།

（2013ལོའི་ཟླ་12ཚེས་26ཉིན་བློ་མཐུན་མའོ་ཙེ་ཏུང་སྐུ་འཁྲུངས་ནས་ལོ་ངོ་120འཁོར་བར་རྗེས་དྲན་ཞུ་བའི་བཞུགས་མོལ་ཚོགས་འདུའི་ཐོག་གནང་བའི་གསུང་བཤད།）

དྲུག།

ཀྲུང་གོའི་གུང་ཁྲན་ཏང་གི་སྲིད་སྐྱོང་གི་བྱ་འགུལ་ཡོད་ཚད་དང་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་སྲིད་སྐྱོང་གི་བྱ་འགུལ་ཡོད་ཚད་ཀྱིས་མི་དམངས་ཀྱི་བྱེད་པོའི་གོ་གནས་ལ་བརྩི་བཀུར་ཞུ་བ་དང་མི་དམངས་ཀྱི་ཐོག་མའི་གསར་གཏོད་ཀྱི་སྙིང་སྟོབས་ལ་བརྩི་བཀུར་ཞུ་དགོས། མི་དམངས་དགེ་རྒན་དུ་བསྟེན་ནས། ཆབ་སྲིད་ཀྱི་བློ་གྲོས་འཕེལ་བ་དང་རྒྱལ་སྲིད་སྐྱོང་བའི་འཇོན་ཐང་ཆེ་རུ་སོང་བ་དེ་མི་དམངས་ཀྱི་གསར་གཏོད་རང་བཞིན་ལྡན་པའི་ལག་ལེན་གྱི་ཁྲོད་དུ་རྩ་བ་ཚུགས་ཏེ་ཕྱོགས་གང་ཐད་ནས་བཏོན་པའི་ལྟ་བ་ཡང་དག་པ་ཚང་མ་རྒྱལ་སྲིད་སྐྱོང་བར་སྤྱོད་ཐུབ་པ་བྱེད་དགོས།

（2014ལོའི་ཟླ་9ཚེས་21ཉིན་ཀྲུང་གོའི་མི་དམངས་ཆབ་སྲིད་གྲོས་མོལ་ཚོགས་འདུ་བཙུགས་ནས་ལོ་ངོ་65འཁོར་བའི་ཚོགས་ཆེན་ཐོག་གནང་བའི་གསུང་བཤད།）

བདུན།

འཕེལ་རྒྱས་ནི་མི་དམངས་ཀྱི་ཆེད་དུ་ཡིན། འདི་ནི་མར་ཁེ་སིའི་རིང་ལུགས་ཀྱི་ཆབ་སྲིད་དཔལ་འབྱོར་རིག་པའི་རྩ་བའི་ལངས་ཕྱོགས་ཡིན། མར་ཁེ་སི་དང་ཨིན་ཀི་སི་གཉིས་ཀྱིས་བསྟན་དོན། “འབྱོར་མེད་གྲལ་རིམ་གྱི་ལས་འགུལ་ནི་མི་མང་ཤོས་ཀྱི་ཡིན་པ་དང་མི་མང་ཤོས་ལ་ཁེ་ཕན་གཉེར་བའི་རང་རྐྱ་འཕེར་བའི་ལས་འགུལ་ཡིན།” མ་འོངས་པའི་སྤྱི་ཚོགས་སུ་“ཐོན་སྐྱེད་ཀྱིས་མི་ཚང་མ་ཕྱུག་པོ་ཡོང་རྒྱུ་དམིགས་ཡུལ་དུ་འཛིན་ངེས།” བློ་མཐུན་ཏེང་ཞའོ་ཕིན་གྱིས་བསྟན་དོན། སྤྱི་ཚོགས་རིང་ལུགས་ཀྱི་ངོ་བོ་ནི་ཐོན་སྐྱེད་ནུས་ཤུགས་བཅིངས་འགྲོལ་གཏོང་བ་དང་ཐོན་སྐྱེད་ནུས་ཤུགས་འཕེལ་རྒྱས་གཏོང་བ། བཤུ་གཞོག་རྩ་མེད་དང་སྣེ་གཉིས་སུ་གྱེས་པ་མེད་པར་གཏོང་བ་བཅས་མཐར་མཉམ་དུ་ཕྱུག་འགྱུར་ཡོང་བར་བྱ་རྒྱུ་དེ་ཡིན། ཏང་གི་སྐབས་བཅོ་བརྒྱད་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་ལྔ་པའི་ཐོག་མི་དམངས་ལྟེ་བར་འཛིན་པའི་འཕེལ་རྒྱས་ཀྱི་དགོངས་པ་གསལ་པོར་བཏོན་ཏེ། མི་དམངས་ལ་བདེ་སྐྱིད་སྐྲུན་པ་དང་མིའི་ཕྱོགས་ཡོངས་ཀྱི་འཕེལ་རྒྱས་ལ་སྐུལ་འདེད་གཏོང་ཞིང་། མཉམ་དུ་ཕྱུག་པོར་འགྱུར་བའི་ཕྱོགས་སུ་གོམ་སྟབས་བརྟན་པོས་མདུན་དུ་སྐྱོད་རྒྱུ་དེ་དཔལ་འབྱོར་འཕེལ་རྒྱས་ཀྱི་འགོ་རྩོམ་ས་དང་དོན་ལ་འབབ་སར་འཛིན་དགོས། གནད་འདི་ང་ཚོས་དུས་ནམ་ཡང་བརྗེད་མི་རུང་། དཔལ་འབྱོར་ལས་ཀ་བཀོད་སྒྲིག་དང་དཔལ་འབྱོར་སྲིད་ཇུས་གཏན་འཁེལ། དཔལ་འབྱོར་འཕེལ་རྒྱས་ལ་སྐུལ་འདེད་གཏོང་བ་བཅས་ཀྱི་སྐབས་སུ་རྩ་བའི་ལངས་ཕྱོགས་འདི་རྒྱུན་འཁྱོངས་བརྟན་པོ་བྱེད་དགོས།

（2015ལོའི་ཟླ་11ཚེས་23ཉིན་སྐབས་བཅོ་བརྒྱད་པའི་ཀྲུང་དབྱང་ཆབ་སྲིད་ཅུས་ཀྱི་ཐུན་མོང་སློབ་སྦྱོང་ཐེངས་ཉེར་བརྒྱད་པའི་ཐོག་གནང་བའི་གསུང་བཤད།）

བརྒྱད།

མི་དམངས་ཀྱི་ལངས་ཕྱོགས་ནི་ཀྲུང་གོའི་གུང་ཁྲན་ཏང་གི་རྩ་བའི་ཆབ་སྲིད་ལངས་ཕྱོགས་ཡིན་ལ། དེ་ནི་མར་ཁེ་སིའི་རིང་ལུགས་ཀྱི་སྲིད་ཏང་དང་སྲིད་ཏང་གཞན་དག་སོ་སོར་དབྱེ་བ་འབྱེད་པའི་རྟགས་མཚན་གསལ་པོ་ཞིག་ཡིན། ཏང་དང་མི་དམངས་སྐྱིད་སྡུག་མཉམ་མྱོང་དང་འཆི་གསོན་མཉམ་གནས་བྱས་ཏེ་ཐོག་མཐའ་བར་གསུམ་དུ་ཤ་ཁྲག་གི་འབྲེལ་བ་རྒྱུན་འཁྱོངས་བྱེད་པ་ནི་ཏང་ཉིད་དཀའ་ངལ་དང་ཉེན་ཁ་མཐའ་དག་ལས་རྒྱལ་བའི་རྩ་བའི་འགན་ལེན་ཡིན། “དམངས་ཀྱི་རྒྱབ་སྐྱོར་དང་བརྩི་བཀུར་ཐོབ་ན་རྒྱལ་ཁབ་ཐོབ་ཐུབ་པ་དང་དམངས་ཀྱི་རྒྱབ་སྐྱོར་དང་བརྩི་བཀུར་ཤོར་ན་རྒྱལ་ཁབ་ཤོར་བ་ཡིན་”ཞེས་པ་ལྟར་ཡིན།

（2016ལོའི་ཟླ་7ཚེས་1ཉིན་ཀྲུང་གོའི་གུང་ཁྲན་ཏང་དབུ་བརྙེས་ནས་ལོ་ངོ་95འཁོར་བར་རྟེན་འབྲེལ་ཞུ་བའི་ཚོགས་ཆེན་ཐོག་གནང་བའི་གསུང་བཤད།）

དགུ།

ཐོག་མའི་བསམ་འདུན་མ་བརྗེད་ན། ད་གཟོད་མགོ་མཇུག་འཁྱོངས་པར་ངེས། ཀྲུང་གོའི་གུང་ཁྲན་ཏང་མིའི་ཐོག་མའི་བསམ་འདུན་དང་འགན་འཁྲི་ནི་ཀྲུང་གོའི་མི་དམངས་ལ་བདེ་སྐྱིད་བརྩོན་ལེན་བྱ་རྒྱུ་དང་ཀྲུང་ཧྭ་མི་རིགས་ཀྱི་བསྐྱར་དར་བརྩོན་ལེན་བྱ་རྒྱུ་དེ་ཡིན། ཐོག་མའི་བསམ་འདུན་དང་འགན་འཁྲི་འདི་ནི་ཀྲུང་གོའི་གུང་ཁྲན་ཏང་མིར་སྐུལ་ལྕག་བཏང་ནས་རྒྱུན་ཆད་མེད་པར་མདུན་དུ་བསྐྱོད་པའི་རྩ་བའི་སྒུལ་ཤུགས་ཡིན། ཏང་ཡོངས་ཀྱི་བློ་མཐུན་ཚང་མས་ངེས་པར་དུ་ནམ་ཡང་མི་དམངས་དང་མཉམ་དུ་དབུགས་ལམ་གཅིག་གྱུར་དང་། བདེ་སྡུག་མཉམ་མྱོང་། གཅིག་སེམས་གཅིག་འབྲེལ་བྱས་ཏེ་མི་དམངས་ཀྱིས་དགའ་སྐྱིད་ལྡན་པའི་འཚོ་བ་ལ་བཅངས་པའི་རེ་སྨོན་དེ་ནམ་ཡང་འབད་འཐབ་ཀྱི་དམིགས་འབེན་དུ་འཛིན་དགོས། ནམ་ཡང་ལྷོད་བ་མེད་པའི་སྙིང་སྟོབས་དང་ཞུམ་མེད་མདུན་སྐྱོད་ཀྱི་འབད་འཐབ་རྣམ་འགྱུར་ཐོག་ནས་མུ་མཐུད་དུ་ཀྲུང་ཧྭ་མི་རིགས་བསྐྱར་དར་རླབས་པོ་ཆེ་ཡོང་བའི་བརྗིད་ཆེའི་དམིགས་འབེན་གྱི་ཕྱོགས་སུ་དཔའ་ངར་ཆེ་སྐྱེད་ཀྱིས་མདུན་དུ་སྐྱོད་དགོས།

（2017ལོའི་ཟླ་10ཚེས་18ཉིན་ཀྲུང་གོའི་གུང་ཁྲན་ཏང་གི་ཐེངས་བཅུ་དགུ་པའི་རྒྱལ་ཡོངས་འཐུས་མིའི་ཚོགས་ཆེན་ཐོག་གནང་བའི་སྙན་ཞུ།）

བཅུ།

དུས་རབས་ནི་རྒྱུགས་ལེན་མཁན་ཡིན་པ་དང་ང་ཚོ་ནི་རྒྱུགས་སྤྲོད་མཁན་ཡིན་ལ། མི་དམངས་ནི་རྒྱུགས་བཤེར་མཁན་ཡིན།

（2018ལོའི་ཟླ་1པོའི་ཚེས་5ཉིན་གསར་དུ་བཞུགས་པའི་ཀྲུང་དབྱང་ཨུ་ཡོན་ལྷན་ཁང་གི་ཨུ་ཡོན་དང་རྗེས་སྣོན་ཨུ་ཡོན། ཞིང་ཆེན་དང་པུའུ་རིམ་པའི་འགོ་ཁྲིད་ལས་བྱེད་པ་གཙོ་བོ་བཅས་ཀྱིས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་དང་ཏང་གི་ཚོགས་ཆེན་བཅུ་དགུ་པའི་དགོངས་དོན་སློབ་སྦྱོང་དང་ལག་ལེན་བྱེད་པའི་བགྲོ་གླེང་འཛིན་གྲྭའི་ཐོག་གནང་བའི་གསུང་བཤད།）

བཅུ་གཅིག།

མི་དམངས་ནི་ལོ་རྒྱུས་གསར་སྐྲུན་བྱེད་མཁན་ཡིན་ལ། མི་དམངས་ནི་དཔའ་བོ་ངོ་མ་ཡིན། བརྗིད་ཉམས་ཆེ་བའི་ཀྲུང་ཧྭ་མི་རིགས་ཀྱི་བྱུང་འཕེལ་ལོ་རྒྱུས་ནི་ཀྲུང་གོའི་མི་དམངས་ཀྱིས་བྲིས་པ་དང་རྒྱ་ཆེ་ལ་གཏིང་ཟབ་པའི་ཀྲུང་ཧྭའི་ཤེས་དཔལ་ནི་ཀྲུང་གོའི་མི་དམངས་ཀྱིས་གསར་གཏོད་བྱས་པ་རེད། ཉམས་པ་མེད་པའི་ཀྲུང་ཧྭ་མི་རིགས་ཀྱི་སྙིང་སྟོབས་ནི་ཀྲུང་གོའི་མི་དམངས་ཀྱིས་སྐྱེད་སྲིང་བྱས་པ་ཡིན་ལ། ཀྲུང་ཧྭ་མི་རིགས་ཀྱིས་ཡར་ལངས་པ་ནས་ཕྱུག་པོར་གྱུར་པ་དང་དེ་ནས་སྟོབས་ལྡན་དུ་གྱུར་པའི་འཕུར་མཆོང་རླབས་པོ་ཆེ་ཞིག་བསུས་ཡོང་བ་ནི་ཀྲུང་གོའི་མི་དམངས་ཀྱིས་འབད་འཐབ་བྱས་པ་ལས་བྱུང་བ་རེད།

（2018ལོའི་ཟླ་3ཚེས་20ཉིན་རྒྱལ་ཡོངས་མི་དམངས་འཐུས་མིའི་ཚོགས་ཆེན་སྐབས་བཅུ་གསུམ་པའི་གྲོས་ཚོགས་ཐེངས་དང་པོའི་ཐོག་གནང་བའི་གསུང་བཤད།）

བཅུ་གཉིས།

མར་ཁེ་སི་ལ་སློབ་སྦྱོང་བྱེད་ན། མི་དམངས་ཀྱི་ལངས་ཕྱོགས་བརྟན་པོར་སྲུང་བའི་སྐོར་གྱི་མར་ཁེའི་རིང་ལུགས་ཀྱི་དགོངས་པ་སློབ་སྦྱོང་དང་ལག་ལེན་བྱེད་དགོས། མི་དམངས་ཀྱི་རང་བཞིན་ནི་མར་ཁེ་སིའི་རིང་ལུགས་ཀྱི་ཆེས་མངོན་གསལ་དོད་པའི་ཀུན་སྤྱོད་ཡིན། “ལོ་རྒྱུས་ཀྱི་བྱ་འགུལ་ནི་མང་ཚོགས་ཀྱི་བྱ་འགུལ་ཡིན་”ཞེས་མར་ཁེ་སིས་གསུངས། མི་དམངས་ལ་བཅིངས་འགྲོལ་འཐོབ་ཏུ་འཇུག་རྒྱུ་ནི་མར་ཁེ་སིའི་མི་ཚེ་ཧྲིལ་པོའི་དོན་གཉེར་ཡིན། ང་ཚོས་དུས་ནམ་ཡང་མི་དམངས་ཀྱི་ལངས་ཕྱོགས་རྩ་བའི་ལངས་ཕྱོགས་སུ་འཛིན་དགོས་ཏེ། མི་དམངས་ཀྱི་ཆེད་དུ་བདེ་སྐྱིད་བརྩོན་ལེན་བྱ་རྒྱུ་དེ་རྩ་བའི་འགན་འཁྲི་རུ་བརྩི་བ་དང་། བློ་གཅིག་སེམས་གཅིག་གིས་མི་དམངས་ལ་ཞབས་འདེགས་ཞུ་བའི་རྩ་བའི་དགོངས་དོན་རྒྱུན་འཁྱོངས་བྱས་ཏེ། མང་ཚོགས་ལམ་ཕྱོགས་ལག་ལེན་མཐར་ཕྱིན་བྱེད་དགོས། མི་དམངས་ཀྱི་བྱེད་པོའི་གོ་གནས་དང་ཐོག་མའི་གསར་གཏོད་ཀྱི་སྙིང་སྟོབས་ལ་བརྩི་བཀུར་ཞུ་བ་དང་། ཐོག་མཐའ་བར་གསུམ་དུ་མི་དམངས་མང་ཚོགས་དང་ཤ་ཁྲག་གི་འབྲེལ་བ་རྒྱུན་འཁྱོངས་བྱེད་ཅིང་། མང་སེམས་གཅིག་མཐུན་གྱི་རྔམ་བརྗིད་ལྡན་པའི་སྟོབས་ཤུགས་གཅིག་སྡུད་བྱས་ཏེ་མི་དམངས་ལ་མཐུན་སྒྲིལ་དང་འགོ་ཁྲིད་དེ་ཐུན་མོང་ཐོག་ལོ་རྒྱུས་ཀྱི་བྱ་གཞག་རླབས་པོ་ཆེ་གཏོད་དགོས། འདི་ནི་ལོ་རྒྱུས་ཀྱི་ཆོས་ཉིད་ལ་བརྩི་འཇོག་བྱེད་པའི་ལྡོག་མེད་ཀྱི་གདམ་ག་ཡིན་ལ། གུང་ཁྲན་ཏང་མིས་ཐོག་མའི་བསམ་འདུན་མི་བརྗེད་པར་འགན་འཁྲི་ཡིད་ལ་བརྟན་པོར་འཆང་བའི་རང་འགུལ་གྱི་ཐེག་འཁུར་ཡིན།

（2018ལོའི་ཟླ་5ཚེས་4ཉིན་མར་ཁེ་སི་འཁྲུངས་ནས་ལོ་ངོ་200འཁོར་བར་རྗེས་དྲན་ཞུ་བའི་ཚོགས་ཆེན་ཐོག་གནང་བའི་གསུང་བཤད།）

བཅུ་གསུམ།

མི་དམངས་ནི་ང་ཚོའི་ཏང་གིས་སྲིད་སྐྱོང་བའི་གཏིང་ཤུགས་ཆེ་ཤོས་དང་ང་ཚོ་སྤྱི་མཐུན་རྒྱལ་ཁབ་ཀྱི་རྨང་གཞི་སྲ་བརྟན་ཡིན་ལ། ང་ཚོའི་ཏང་སྟོབས་ལྡན་དང་རྒྱལ་ཁབ་དར་རྒྱས་གཏོང་བའི་རྩ་བའང་ཡིན། ང་ཚོའི་ཏང་ནི་མི་དམངས་ནང་ནས་ཡོང་བ་དང་མི་དམངས་ཀྱི་དོན་དུ་འཁྲུངས་པ། མི་དམངས་ལ་བརྟེན་ནས་དར་བ་ཞིག་ཡིན་པས། དུས་ངེས་པར་དུ་ནམ་ཡང་མི་དམངས་དང་གཅིག་སེམས་གཅིག་འབྲེལ་དང་། མི་དམངས་དང་བདེ་སྡུག་མཉམ་མྱོང་། མི་དམངས་དང་མཐུན་སྒྲིལ་འབད་འཐབ་བཅས་བྱེད་དགོས། གུང་ཁྲན་ཏང་མི་རེ་རེས་ཤེས་དགོས་པ་ཞིག་ནི། ཏང་ལ་མི་དམངས་ཀྱི་ཁེ་ཕན་མ་གཏོགས་རང་ཉིད་ཀྱི་དམིགས་བསལ་གྱི་ཁེ་ཕན་ཅི་ཡང་མེད། ཏང་གི་ལས་དོན་ཡོད་ཚད་ནི་ཆེས་རྒྱ་ཆེ་བའི་མི་དམངས་ཀྱི་རྩ་བའི་ཁེ་ཕན་མངོན་འགྱུར་ཡག་པོ་དང་སྲུང་སྐྱོང་ཡག་པོ། འཕེལ་རྒྱས་ཡག་པོ་བཅས་གཏོང་བའི་ཆེད་དུ་ཡིན། མི་དམངས་ནི་ལོ་རྒྱུས་གསར་སྐྲུན་བྱེད་མཁན་དང་མི་དམངས་ནི་དཔའ་བོ་ངོ་མ་ཡིན། ངེས་པར་དུ་མི་དམངས་ལ་ཡིད་ཆེས་དང་མི་དམངས་ལ་བརྟེན་དགོས། ང་ཚོ་ནམ་ཡང་ངལ་རྩོལ་མི་དམངས་ཀྱི་ཁོངས་མི་སྤྱིར་བཏང་བ་ཞིག་ཡིན་པས་ངེས་པར་དུ་མི་དམངས་མང་ཚོགས་དང་ཤ་ཁྲག་གི་འབྲེལ་བ་རྒྱུན་འཁྱོངས་བྱེད་དགོས།

（2019ལོའི་ཟླ་5ཚེས་31ཉིན་“ཐོག་མའི་བསམ་འདུན་མི་བརྗེད་པར་འགན་འཁྲི་ཡིད་ལ་བརྟན་པོར་འཆང་བའི་”བརྗོད་དོན་གཙོ་བོའི་སློབ་གསོའི་ལས་དོན་ཚོགས་འདུའི་ཐོག་གནང་བའི་གསུང་བཤད།）

བཅུ་བཞི།

ཀྲུང་གོའི་གུང་ཁྲན་ཏང་གི་རྩ་བ་དང་ཁྲག་རྒྱུན་མི་དམངས་ཀྱི་ནང་དུ་ཡོད། མི་དམངས་ལྟེ་བར་འཛིན་པའི་འཕེལ་རྒྱས་ཀྱི་དགོངས་པ་རྒྱུན་འཁྱོངས་བྱས་པ་དེས་ཏང་གི་ཕུགས་བསམ་དང་དད་སེམས། ངོ་བོ་དང་དམིགས་ཡུལ། ཐོག་མའི་འགན་འཁྲི་བཅས་མཚོན་པ་མ་ཟད། ཏང་གི་འབད་འཐབ་ལམ་བུ་དང་ལག་ལེན་ཉམས་མྱོང་ལ་ཕྱོགས་བསྡོམས་ཟབ་མོ་བྱས་པ་ཞིག་ཀྱང་ཡིན། དབུ་བརྙེས་པ་ནས་བཟུང་། ང་ཚོའི་ཏང་གིས་མི་དམངས་ལ་མཐུན་སྒྲིལ་དང་སྣེ་ཁྲིད་བྱས་ཏེ་གསར་བརྗེ་དང་འཛུགས་སྐྲུན་དང་བསྒྱུར་བཅོས་བཅས་བྱས་པའི་རྩ་བའི་དམིགས་ཡུལ་ནི་མི་དམངས་ལ་འཚོ་བ་སྐྱིད་པོ་ཞིག་རོལ་དུ་འཇུག་རྒྱུའི་ཆེད་དུ་ཡིན། འགྲན་སློང་དང་གནོན་ཤུགས་ཇི་ལྟར་ཆེན་པོར་འཕྲད་ཀྱང་། བློས་གཏོང་དང་རིན་དོད་ཇི་ལྟར་ཆེན་པོ་གཏོང་དགོས་ཀྱང་། གནད་འདི་གཏན་ནས་འགྱུར་མི་སྲིད་ལ་གཡོ་འགུལ་སྤུ་ཙམ་ཡང་བྱུང་མ་མྱོང་། མི་དམངས་ལྟེ་བར་འཛིན་པའི་འཕེལ་རྒྱས་ཀྱི་དགོངས་པ་རྒྱུན་འཁྱོངས་བྱེད་པ་ནི་ཁ་འབོད་སྟོང་པ་ཙམ་ཞིག་མ་ཡིན་ཏེ། ངེས་པར་དུ་ཐབས་ཇུས་བཀོད་སྒྲིག་ཁག་དང་ལས་དོན་དངོས་ཀྱི་ནང་དུ་དོན་འཁྱོལ་བྱེད་དགོས།

（2020ལོའི་ཟླ་5ཚེས་22ཉིན་རྒྱལ་ཡོངས་མི་དམངས་འཐུས་མིའི་ཚོགས་ཆེན་སྐབས་བཅུ་གསུམ་པའི་གྲོས་ཚོགས་ཐེངས་གསུམ་པའི་ཐོག་ནང་སོག་འཐུས་མི་ཚོགས་པའི་གྲོས་ཞིབ་ལ་བཞུགས་སྐབས་ཀྱི་གསུང་བཤད།）

བཅོ་ལྔ།

དམངས་ལ་བདེ་སྐྱིད་སྐྲུན་རྒྱུ་དེ་སྲིད་འབྲས་གལ་ཆེ་ཤོས་སུ་བརྩི་དགོས། ཀྲུང་གོའི་གུང་ཁྲན་ཏང་གིས་དམངས་ཀྱི་དོན་དུ་བྱ་བ་སྒྲུབ་པ་དང་དམངས་ལ་བདེ་སྐྱིད་སྐྲུན་རྒྱུ་ནི་སྲིད་འབྲས་གལ་ཆེ་ཤོས་ཤིག་ཏུ་བརྩིས་ཏེ། མི་སེར་གྱི་དོན་དུ་བྱ་བ་ལེགས་པོ་ཅི་ཙམ་བསྒྲུབས་ཡོད་པའི་དོན་དངོས་དེ་སྲིད་འབྲས་ལ་ཞིབ་བཤེར་བྱེད་པའི་ཚད་གཞི་གལ་ཆེན་དུ་བརྩི་བ་ཡིན། ཏང་ཡོན་དང་ལས་བྱེད་པ་ལྷག་པར་དུ་འགོ་ཁྲིད་ལས་བྱེད་པས་གསལ་པོར་ཤེས་དགོས་པ་ཞིག་ལ། རང་གི་ལག་ཏུ་བཟུང་ཡོད་པའི་དབང་ཆ་དང་གནས་སའི་ལས་གནས་ནི་ཏང་དང་མི་དམངས་ཀྱིས་བསྩལ་བ་ཡིན་པས། ཏང་དང་མི་དམངས་ལ་བྱ་བ་སྒྲུབ་སྐབས་སྤྱོད་རྒྱུ་ཡིན་ལ། དམངས་ལ་ཁེ་ཕན་སྒྲུབ་སྐབས་མ་གཏོགས་སྤྱོད་རྒྱུ་མེད། རིམ་པ་ཁག་གི་འགོ་ཁྲིད་ལས་བྱེད་པས་ཡང་དག་པའི་དབང་ཆའི་ལྟ་བ་དང་སྲིད་འབྲས་ཀྱི་ལྟ་བ། ལས་དོན་གྱི་ལྟ་བ་བཅས་བཟུང་ནས་དབང་གྲགས་རྫུན་མར་མི་སྨོན་པ་དང་བྱས་རྗེས་བཅོས་མར་མི་གཉེར་བ། མིང་གྲགས་སྟོང་པར་མི་ཆགས་པ་བཅས་བྱས་ཏེ། གང་དུ་དཔོན་གནས་བཟུང་ན་དེ་གར་བདེ་སྐྱིད་སྐྲུན་པར་བརྩོན་དགོས།

（2020ལོའི་ཟླ་5ཚེས་22ཉིན་རྒྱལ་ཡོངས་མི་དམངས་འཐུས་མིའི་ཚོགས་ཆེན་སྐབས་བཅུ་གསུམ་པའི་གྲོས་ཚོགས་ཐེངས་གསུམ་པའི་ཐོག་ནང་སོག་འཐུས་མི་ཚོགས་པའི་གྲོས་ཞིབ་ལ་བཞུགས་སྐབས་ཀྱི་གསུང་བཤད།）

བཅུ་དྲུག།

ཀྲུང་གོའི་གུང་ཁྲན་ཏང་ནི་ཀྲུང་གོའི་བཟོ་པའི་གྲལ་རིམ་གྱི་གདོང་ལེན་རུ་ཁག་ཡིན་ལ། དུས་མཚུངས་སུ་ཀྲུང་གོའི་མི་དམངས་དང་ཀྲུང་ཧྭ་མི་རིགས་ཀྱི་གདོང་ལེན་རུ་ཁག་ཡིན། ཏང་གི་སྒྲིག་ཡིག་ལས་ཏང་གིས་བློ་གཅིག་སེམས་གཅིག་གིས་མི་དམངས་ལ་ཞབས་འདེགས་ཞུ་རྒྱུ་རྒྱུན་འཁྱོངས་དང་། དུས་ནམ་ཡང་མང་ཚོགས་ཀྱི་ཁེ་ཕན་ཨང་དང་པོར་བཞག་སྟེ། མང་ཚོགས་དང་སྐྱིད་སྡུག་མཉམ་མྱོང་བྱས་ནས་ཆེས་ཟབ་མོའི་འབྲེལ་བ་རྒྱུན་འཁྱོངས་བྱེད་དགོས་ཞེས་གཏན་འབེབས་གསལ་པོ་བྱས་ཡོད། འདིས་ང་ཚོར་སྤྱི་ཚོགས་འཕེལ་རྒྱས་ཀྱི་ཆོས་ཉིད་ལ་བརྩི་བཀུར་ཞུ་རྒྱུ་དང་མི་དམངས་ནི་ལོ་རྒྱུས་ཀྱི་བྱེད་པོ་ཡིན་པའི་གོ་གནས་ལ་བརྩི་བཀུར་ཞུ་རྒྱུ་གཉིས་གཅིག་མཐུན་ཡིན་པ་དང་། བླ་ན་མེད་པའི་ཕུགས་བསམ་གྱི་ཆེད་དུ་འབད་འཐབ་བྱ་རྒྱུ་དང་ཆེས་རྒྱ་ཆེ་བའི་མི་དམངས་ཀྱི་ཁེ་ཕན་མངོན་འགྱུར་བྱ་རྒྱུ་གཉིས་གཅིག་མཐུན་ཡིན་པ། ཏང་གི་ལས་དོན་ཁག་ལེགས་འགྲུབ་བྱ་རྒྱུ་དང་མི་དམངས་ཀྱི་ཁེ་ཕན་མངོན་འགྱུར་བྱ་རྒྱུ་གཉིས་གཅིག་མཐུན་ཡིན་པ་བཅས་ངེས་པར་དུ་རྒྱུན་འཁྱོངས་བྱས་ཏེ། ནམ་ཡང་མང་ཚོགས་དང་ཁ་མི་འབྲལ་བར་སྐྱིད་ན་མཉམ་སྐྱིད་དང་སྡུག་ན་མཉམ་སྡུག་བྱེད་དགོས་པའི་བླང་བྱ་བཏོན་ཡོད།

（2021ལོའི་ཟླ་2ཚེས་20ཉིན་ཏང་གི་ལོ་རྒྱུས་སློབ་སྦྱོང་དང་སློབ་གསོའི་སྐོར་གྱི་སྐུལ་སློང་ཚོགས་ཆེན་ཐོག་གནང་བའི་གསུང་བཤད།）

བཅུ་བདུན།

རྒྱལ་སྲིད་ནི་མི་དམངས་ཡིན་ལ། མི་དམངས་ནི་རྒྱལ་སྲིད་ཡིན། རྒྱལ་སྲིད་བཟུང་བ་དང་རྒྱལ་སྲིད་སྲུང་བ་ནི་མི་དམངས་ཀྱི་སེམས་སྲུང་བ་ཡིན། ཀྲུང་གོའི་གུང་ཁྲན་ཏང་གི་རྩ་བ་དང་ཁྲག་རྒྱུན་ནི་མི་དམངས་ཀྱི་ནང་དུ་ཡོད་ལ། སྟོབས་ཤུགས་ཀྱང་མི་དམངས་ཀྱི་ནང་དུ་ཡོད། ཀྲུང་གོའི་གུང་ཁྲན་ཏང་གིས་ཐོག་མཐའ་བར་གསུམ་དུ་ཆེས་རྒྱ་ཆེ་བའི་མི་དམངས་ཀྱི་རྩ་བའི་ཁེ་ཕན་མཚོན་པ་དང་། མི་དམངས་དང་ཁྲེལ་གྲགས་མཉམ་འཁུར་དང་ཤི་གསོན་མཉམ་གནས་བྱེད་པ་ལས་རང་ཉིད་ཀྱི་དམིགས་བསལ་གྱི་ཁེ་ཕན་ཅི་ཡང་མེད། ཁེ་ཕན་ཚོགས་པ་གང་རུང་དང་། དབང་ཆའི་རྩ་འཛུགས་གང་རུང་། ཁྱད་དབང་གྲལ་རིམ་གང་རུང་བཅས་ཀྱི་ཁེ་ཕན་མཚོན་གྱི་མིན།

（2021ལོའི་ཟླ་7ཚེས་1ཉིན་ཀྲུང་གོའི་གུང་ཁྲན་ཏང་དབུ་བརྙེས་ནས་ལོ་ངོ་100འཁོར་བར་རྟེན་འབྲེལ་ཞུ་བའི་ཚོགས་ཆེན་ཐོག་གནང་བའི་གསུང་བཤད།）

བཅོ་བརྒྱད།

ངེས་པར་དུ་མི་དམངས་བླ་ན་མེད་པ་རྒྱུན་འཁྱོངས་བྱེད་དགོས། མི་དམངས་ཀྱི་རང་བཞིན་ནི་མར་ཁེ་སིའི་རིང་ལུགས་ཀྱི་ངོ་བོའི་ཁྱད་ཆོས་ཡིན། ཏང་གི་གཞུང་ལུགས་ནི་མི་དམངས་ཀྱི་ནང་ནས་ཡོང་བ་དང་མི་དམངས་ཀྱི་ཆེད་དུ་ཡིན་ལ། མི་དམངས་ལ་བདེ་སྐྱིད་སྐྲུན་པའི་གཞུང་ལུགས་ཡིན། མི་དམངས་ཀྱི་གསར་སྐྲུན་རང་བཞིན་ལྡན་པའི་ལག་ལེན་ནི་གཞུང་ལུགས་གསར་གཏོད་ཀྱི་འབྱུང་ཁུངས་འཛད་མཐའ་མེད་པ་ཡིན། མི་དམངས་དང་བྲལ་བའི་གཞུང་ལུགས་མཐའ་དག་ནི་སྟོང་པ་ཙམ་ཡིན་པ་དང་། མི་དམངས་ཀྱི་བདེ་སྐྱིད་དོན་དུ་མི་གཉེར་བའི་གཞུང་ལུགས་མཐའ་དག་ནི་སྐྱེ་སྟོབས་མེད་པ་ཡིན། ང་ཚོ་མི་དམངས་ཀྱི་ལངས་ཕྱོགས་སུ་བརྟན་པོར་ལངས་ནས། མི་དམངས་ཀྱི་རེ་འདོད་རྒྱུས་ལོན་དང་། མི་དམངས་ཀྱི་གསར་གཏོད་ལ་བརྩི་བཀུར། མི་དམངས་ཀྱི་བློ་གྲོས་གཅིག་སྡུད་བཅས་བྱས་ཏེ་མི་དམངས་ཀྱི་དགའ་ཞེན་ཐོབ་པ་དང་། ཁས་ལེན་ཐོབ་པ། མི་དམངས་ལ་དབང་བ་བཅས་ཀྱི་གཞུང་ལུགས་ཤིག་ཏུ་ཆགས་ནས་མི་དམངས་ཀྱིས་འཇིག་རྟེན་ངོས་འཛིན་དང་བསྒྱུར་བཀོད་བྱེད་པར་མཛུབ་སྟོན་བྱེད་པའི་བསམ་བློའི་མཚོན་ཆ་སྟོབས་ལྡན་ཞིག་ཏུ་འགྱུར་བར་བྱེད་དགོས།

（2022ལོའི་ཟླ་10ཚེས་16ཉིན་ཀྲུང་གོའི་གུང་ཁྲན་ཏང་གི་རྒྱལ་ཡོངས་འཐུས་མིའི་ཚོགས་ཆེན་ཐེངས་ཉི་ཤུ་པའི་ཐོག་གནང་བའི་སྙན་ཞུ།）

བཅུ་དགུ།

འཐབ་ལམ་གསར་པའི་སྟེང་། ང་ཚོས་ཐོག་མཐའ་བར་གསུམ་དུ་ཡོད་ཚད་མི་དམངས་ཀྱི་ཆེད་དུ་ཡིན་པ་དང་ཡོད་ཚད་མི་དམངས་ལ་བརྟེན་པ་རྒྱུན་འཁྱོངས་བྱེད་དགོས། བཤུལ་ལམ་རིང་མོའི་སྟེང་། ང་ཚོས་མི་དམངས་ལ་བརྟེན་ནས་ལོ་རྒྱུས་དེབ་ཐེར་ཐོག་འགོད་རུང་བའི་རྒྱུགས་ཤོག་མང་པོ་སྤྲད་ཡོད། མ་འོངས་པར་ང་ཚོས་སྔར་བཞིན་མི་དམངས་ལ་བརྟེན་ནས་ལོ་རྒྱུས་ཀྱི་བྱ་གཞག་རླབས་པོ་ཆེ་གསར་དུ་གཏོད་དགོས།

ལམ་ཐག་རིང་ཞིང་བར་ཆད་ཆེ་ན་ཡང་ལམ་ལ་ཆས་ཚེ་སླེབས་པར་ངེས། མདུན་སྐྱོད་ཀྱི་ལམ་བུའི་ཐོག་རླུང་རླབས་དྲག་པོ་དང་རྦ་རླབས་འཇིགས་སུ་རུང་བ་གང་ཡིན་རུང་། མི་དམངས་ནི་ནམ་ཡང་ང་ཚོའི་ཆེས་སྲ་བརྟན་གྱི་སྐྱོར་མ་དང་ཆེས་སྟོབས་ལྡན་གྱི་གཏིང་ཤུགས་ཡིན། ང་ཚོས་ཐོག་མཐའ་བར་གསུམ་དུ་མི་དམངས་དང་སྐྱིད་སྡུག་མཉམ་མྱོང་དང་གཅིག་སེམས་གཅིག་འབྲེལ་བྱས་ནས་མི་དམངས་ཀྱིས་བསམ་བློ་གཏོང་སར་བསམ་བློ་གཏོང་བ་དང་། མི་དམངས་ཀྱིས་རེ་བ་བཅོལ་ས་དེ་འགྲུབ་པར་བྱས་ནས། མི་དམངས་ཀྱིས་དགའ་སྐྱིད་ལྡན་པའི་འཚོ་བ་ལ་བཅངས་པའི་རེ་སྨོན་རྒྱུན་ཆད་མེད་པར་མངོན་དུ་འགྱུར་བར་བྱེད་དགོས།

（2022ལོའི་ཟླ་10ཚེས་23ཉིན་སྐབས་ཉི་པའི་ཀྲུང་དབྱང་ཆབ་སྲིད་ཅུས་ཀྱི་རྒྱུན་ལས་ཨུ་ཡོན་རྣམས་ཀྱིས་རྒྱལ་ཕྱིའི་གསར་འགོད་པར་མཇལ་འཕྲད་གནང་སྐབས་ཀྱི་གསུང་བཤད།）

ཉི་ཤུ།

ང་ཚོའི་ཏང་གིས་ཀྲུང་གོའི་ལུགས་ཀྱི་དེང་རབས་ཅན་ནི་མི་དམངས་ཁྲི་སྟོང་མང་པོ་རང་ཉིད་ཀྱི་བྱ་གཞག་ཡིན་པ་ངོས་འཛིན་ཟབ་མོ་བྱུང་ཡོད། མི་དམངས་ནི་ཀྲུང་གོའི་ལུགས་ཀྱི་དེང་རབས་ཅན་གྱི་བྱེད་པོ་ཡིན་པས། ངེས་པར་དུ་མི་དམངས་ལ་བརྟེན་དགོས་པ་དང་མི་དམངས་ཀྱི་ཐོག་མའི་གསར་གཏོད་ཀྱི་སྙིང་སྟོབས་ལ་བརྩི་བཀུར་ཞུས་ཏེ་མི་དམངས་ཡོངས་རྫོགས་ཀྱི་བློ་གྲོས་དང་སྟོབས་ཤུགས་གཅིག་ཏུ་བསྡུས་ན། ད་གཟོད་ཀྲུང་གོའི་ལུགས་ཀྱི་དེང་རབས་ཅན་རྒྱུན་ཆད་མེད་པར་མདུན་དུ་འཕེལ་བར་སྐུལ་འདེད་གཏོང་ཐུབ། ང་ཚོས་ཏང་གི་མང་ཚོགས་ལམ་ཕྱོགས་རྒྱུན་འཁྱོངས་བྱས་ཏེ་གནད་དོན་ལ་བསམ་བློ་གཏོང་བ་དང་ཐབས་ཇུས་འདིང་བ། བྱ་བ་སྒྲུབ་པ་བཅས་ཀྱི་སྐབས་སུ་མི་དམངས་ཀྱི་རྩ་བརྟག་པར་མཐོང་ཆེན་དང་། མི་དམངས་ཀྱི་སེམས་ཁྲལ་ལ་ལན་སློག་པ། མི་དམངས་ཀྱི་རེ་འདུན་སྐོང་བ། མི་དམངས་ལ་བདེ་སྐྱིད་སྐྲུན་པ་བཅས་བྱས་ཏེ། ཏང་གི་གཞུང་ལུགས་དང་ལམ་ཕྱོགས་བྱེད་ཕྱོགས་སྲིད་ཇུས་ལ་མི་དམངས་མང་ཚོགས་ཀྱིས་སྙིང་ཐག་པ་ནས་བརྩི་བཀུར་ཐོབ་པར་བརྩོན་ལེན་བྱེད་དགོས། ང་ཚོས་མི་དམངས་ཀྱིས་དགའ་སྐྱིད་ལྡན་པའི་འཚོ་བ་ལ་བཅངས་པའི་རེ་སྨོན་དེ་འབད་འཐབ་དམིགས་འབེན་དུ་འཛིན་རྒྱུ་རྒྱུན་འཁྱོངས་དང་། མི་དམངས་ལྟེ་བར་འཛིན་པའི་འཕེལ་རྒྱས་ཀྱི་དགོངས་པ་རྒྱུན་འཁྱོངས་བྱས་ནས། དམངས་འཚོ་འགན་སྲུང་དང་ལེགས་བཅོས་ལ་ཤུགས་རྒྱག་པ་དང་། མི་དམངས་ཀྱི་བྲེལ་དཀའ་སྡུག་སྨོན་བཞིའི་གནད་དོན་ཐག་གཅོད་བྱེད་པར་ཤུགས་བརྒྱབ་སྟེ། ཀྲུང་གོའི་ལུགས་ཀྱི་དེང་རབས་ཅན་འཛུགས་སྐྲུན་གྱི་གྲུབ་འབྲས་དེ་སྔར་ལས་མང་ཞིང་སྔར་ལས་དྲང་སྙོམས་སྒོས་མི་དམངས་ཡོངས་ལ་ཕན་པའི་གསོས་སུ་སྒྲུབ་དགོས། ང་ཚོའི་ཏང་གིས་བརྒྱུད་རིམ་ཧྲིལ་པོའི་མི་དམངས་དམངས་གཙོ་འཕེལ་རྒྱས་གཏོང་བ་དང་། དམངས་གཙོའི་བགྲོད་ལམ་རྒྱ་ཆེར་གཏོང་བ། དམངས་གཙོའི་རྣམ་པ་ཕུན་སུམ་ཇེ་ཚོགས་སུ་གཏོང་བ་བཅས་ཀྱིས་མི་དམངས་གོ་རིམ་ལྡན་པའི་ངང་ཆབ་སྲིད་ནང་ཞུགས་རྒྱུ་རྒྱ་སྐྱེད་བཏང་སྟེ། མི་དམངས་ཀྱིས་ཁྲིམས་ལྟར་ཐབས་ལམ་དང་རྣམ་པ་སྣ་ཚོགས་བརྒྱུད་ནས་རྒྱལ་དོན་དོ་དམ་དང་། དཔལ་འབྱོར་དང་རིག་གནས་བྱ་གཞག་དོ་དམ། སྤྱི་ཚོགས་ལས་དོན་དོ་དམ་བཅས་བྱེད་པར་ཁག་ཐེག་བྱས་ཏེ། བདག་པོའི་སྙིང་སྟོབས་ལ་བརྟེན་ནས་སྤྲོ་བ་ཆེན་པོའི་ངང་དེང་རབས་ཅན་གྱི་འཛུགས་སྐྲུན་ནང་དུ་ཞུགས་པར་བྱེད་དགོས། ང་ཚོའི་ཏང་གིས་ཀྲུང་གོའི་ལུགས་ཀྱི་དེང་རབས་ཅན་གྱི་མཛེས་སྡུག་ལྡན་པའི་མདུན་ལྗོངས་བཟང་པོས་མི་ལ་སྐུལ་སློང་དང་མི་ལ་སྐུལ་ལྕག། མི་ལ་འབོད་སྐུལ་བཅས་བྱས་ནས། སྲིད་ཏང་བར་གྱི་འབྲེལ་བ་དང་མི་རིགས་བར་གྱི་འབྲེལ་བ། ཆོས་ལུགས་བར་གྱི་འབྲེལ་བ། གྲལ་རིམ་བར་གྱི་འབྲེལ་བ། རྒྱ་ཕྱི་ནང་གི་སྤུན་ཟླའི་བར་གྱི་འབྲེལ་བ་བཅས་མཛའ་མཐུན་ཡོང་བར་སྐུལ་འདེད་ནུས་ལྡན་གཏོང་བ་དང་། རྒྱལ་ཕྱི་ནང་གི་ཀྲུང་ཧྭའི་བུ་ཕྲུག་རྣམས་མཐུན་སྒྲིལ་བྱས་ནས་འབད་འཐབ་བྱེད་པར་སྐུལ་འདེད་བཏང་སྟེ། ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་འཛུགས་སྐྲུན་བྱེད་པའི་སྟོབས་ཤུགས་རླབས་པོ་ཆེ་གཅིག་ཏུ་བསྒྲིལ་བར་བྱས།

（2023ལོའི་ཟླ་2ཚེས་7ཉིན་གསར་དུ་བཞུགས་པའི་ཀྲུང་དབྱང་ཨུ་ཡོན་ལྷན་ཁང་གི་ཨུ་ཡོན་དང་རྗེས་སྣོན་ཨུ་ཡོན། ཞིང་ཆེན་དང་པུའུ་རིམ་པའི་འགོ་ཁྲིད་ལས་བྱེད་པ་གཙོ་བོ་བཅས་ཀྱིས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་དང་ཏང་གི་ཚོགས་ཆེན་ཉི་ཤུ་པའི་དགོངས་དོན་སློབ་སྦྱོང་དང་ལག་ལེན་བྱེད་པའི་བགྲོ་གླེང་འཛིན་གྲྭའི་ཐོག་གནང་བའི་གསུང་བཤད།）

ཉེར་གཅིག།

ང་ཚོས་ཐོག་མཐའ་བར་གསུམ་དུ་མི་དམངས་བླ་ན་མེད་པ་རྒྱུན་འཁྱོངས་བྱེད་དགོས། ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་སྟོབས་ལྡན་རྒྱལ་ཁབ་སྐྲུན་ཐུབ་པར་མི་དམངས་ནི་ཐག་གཅོད་རང་བཞིན་ལྡན་པའི་སྟོབས་ཤུགས་ཡིན། བརྒྱུད་རིམ་ཧྲིལ་པོའི་མི་དམངས་དམངས་གཙོ་འཕེལ་རྒྱས་ཤུགས་ཆེན་གཏོང་བ་དང་། ཏང་གི་འགོ་ཁྲིད་དང་མི་དམངས་ཀྱིས་རང་ཁྱིམ་རང་བདག་བྱེད་པ། ཁྲིམས་ལྟར་རྒྱལ་ཁབ་སྐྱོང་བ་བཅས་ཕན་ཚུན་གཅིག་གྱུར་ཡོང་བ་རྒྱུན་འཁྱོངས་བྱས་ནས། མི་དམངས་ཀྱིས་རང་ཁྱིམ་རང་བདག་བྱེད་པའི་ལམ་ལུགས་མ་ལག་འཐུས་ཚང་གཏོང་བ་དང་མི་དམངས་ཀྱི་འདོད་བློ་མངོན་འགྱུར་བྱེད་པ། མི་དམངས་ཀྱི་ཁེ་དབང་འགན་སྲུང་བྱེད་པ་བཅས་ཀྱིས་མི་དམངས་ཡོངས་རྫོགས་ཀྱི་ཧུར་བརྩོན་རང་བཞིན་དང་རང་འགུལ་རང་བཞིན་དང་གསར་སྐྲུན་རང་བཞིན་བཅས་སྐུལ་སློང་གང་ལེགས་བྱེད་དགོས། མི་དམངས་ལྟེ་བར་འཛིན་པའི་འཕེལ་རྒྱས་ཀྱི་དགོངས་པ་ལག་ལེན་མཐར་ཕྱིན་བསྟར་བ་དང་། བགོ་བཤའི་ལམ་ལུགས་འཐུས་ཚང་བཟོ་བ། སྤྱི་ཚོགས་ཀྱི་འགན་སྲུང་མ་ལག་འཐུས་ཚང་བཟོ་བ། གཞི་རྩའི་སྤྱི་པའི་ཞབས་ཞུར་ཤུགས་རྒྱག་པ། དམངས་འཚོའི་མཐའ་ཚད་བརྟན་པོར་སྲུང་བ་བཅས་ཀྱིས་མི་དམངས་མང་ཚོགས་ཀྱི་བྲེལ་དཀའ་སྡུག་སྨོན་བཞིའི་གནད་དོན་ཐག་གཅོད་ལེགས་པོ་བྱས་ཏེ། དེང་རབས་ཅན་འཛུགས་སྐྲུན་གྱི་གྲུབ་འབྲས་དེ་སྔར་ལས་མང་ཞིང་སྔར་ལས་དྲང་སྙོམས་སྒོས་མི་དམངས་ཡོངས་ལ་ཕན་པའི་གསོས་སུ་བསྒྲུབས་ཏེ། མི་དམངས་ཡོངས་རྫོགས་མཉམ་དུ་ཕྱུག་འགྱུར་ཡོང་བར་སྐུལ་འདེད་གཏོང་བའི་ཐད་སྔར་ལས་མངོན་གསལ་དོད་པའི་ངོ་བོའི་རང་བཞིན་ལྡན་པའི་ཡར་རྒྱས་ཡོང་དུ་འཇུག་དགོས། རྒྱལ་ཡོངས་མི་རིགས་ཁག་གི་མི་དམངས་ཚང་མ་མཐུན་སྒྲིལ་ཆེན་པོ་དང་རྒྱལ་ཕྱི་ནང་གི་ཀྲུང་ཧྭའི་བུ་ཕྲུག་ཚང་མ་མཐུན་སྒྲིལ་ཆེན་པོ་ཡོང་བར་རྒྱུན་ཆད་མེད་པར་ཤུགས་བརྒྱབ་སྟེ་མཐུན་རྐྱེན་ཡོད་ཚད་སྐུལ་སློང་གང་ལེགས་བྱས་ནས། རྒྱལ་ཁབ་སྟོབས་ལྡན་འཛུགས་སྐྲུན་བྱེད་པ་དང་མི་རིགས་བསྐྱར་དར་ཡོང་བའི་སྟོབས་ཤུགས་ཆེན་པོ་གཅིག་ཏུ་བསྒྲིལ་དགོས།

（2023ལོའི་ཟླ་3ཚེས་13ཉིན་རྒྱལ་ཡོངས་མི་དམངས་འཐུས་མིའི་ཚོགས་ཆེན་སྐབས་བཅུ་བཞི་པའི་གྲོས་ཚོགས་ཐེངས་དང་པོའི་ཐོག་གནང་བའི་གསུང་བཤད།）

ཉེར་གཉིས།

ང་ཚོས་མི་དམངས་བླ་ན་མེད་པའི་འདུ་ཤེས་བརྟན་པོར་སྲུང་བ་དང་དེང་རབས་ཅན་གྱི་ཁ་ཕྱོགས་ལྡན་པའི་མི་དམངས་རང་བཞིན་འབུར་དུ་ཐོན་པར་བྱེད་དགོས། མི་དམངས་ནི་ལོ་རྒྱུས་གསར་སྐྲུན་བྱེད་མཁན་ཡིན་ལ། དེང་རབས་ཅན་སྐུལ་སྤེལ་གཏོང་བའི་ཆེས་སྲ་བརྟན་གྱི་རྨང་གཞི་དང་ཆེས་ཟབ་རྒྱས་ཀྱི་སྟོབས་ཤུགས་ཡིན། དེང་རབས་ཅན་གྱི་ཆེས་མཐར་འཇུག་གི་དམིགས་ཡུལ་ནི་མི་ལ་རང་དབང་ལྡན་ཞིང་ཕྱོགས་ཡོངས་ནས་འཕེལ་རྒྱས་ཡོང་བ་མངོན་འགྱུར་བྱ་རྒྱུ་དེ་ཡིན། མཐར་འཇུག་དེང་རབས་ཅན་གྱི་ལམ་དུ་འགྲོ་ཐུབ་མིན་དང་བརྟན་པོར་འགྲོ་ཐུབ་མིན་གྱི་འགག་རྩ་ནི་མི་དམངས་ལྟེ་བར་འཛིན་རྒྱུ་རྒྱུན་འཁྱོངས་བྱེད་ཐུབ་མིན་ལ་རག་ལས་ཡོད། དེང་རབས་ཅན་ནི་ཤོག་ངོས་ཀྱི་དམིགས་ཚད་གཞི་གྲངས་ལ་བལྟ་དགོས་པར་མ་ཟད། དེ་བས་ཀྱང་མི་དམངས་ཀྱི་བདེ་སྐྱིད་ལ་བལྟ་དགོས། སྲིད་ཏང་གིས་མི་དམངས་ཀྱིས་དགའ་སྐྱིད་ལྡན་པའི་འཚོ་བ་ལ་བཅངས་པའི་རེ་སྨོན་ལ་དམིགས་པ་དང་། མི་དམངས་ཀྱིས་དཔལ་ཡོན་དང་ཡར་རྒྱས་ལ་བཟུང་བའི་རེ་བར་བསྟུན་ཏེ། དངོས་པོ་འབྱོར་ཕྱུག་དང་། ཆབ་སྲིད་དྭངས་གསལ། བསམ་པ་སྐྱིད་པོ། སྤྱི་ཚོགས་བདེ་འཇགས། སྐྱེ་ཁམས་འཕྲོད་པ་བཅས་ཧུར་ཐག་གིས་མངོན་འགྱུར་བྱས་ཏེ། དེང་རབས་ཅན་གྱིས་སྔར་ལས་ལེགས་པར་མི་དམངས་ཀྱི་ཕྱོགས་གང་ཐད་ཀྱི་རེ་འདུན་དང་རིམ་པ་མང་པོའི་དགོས་མཁོ་སྐོང་ཐུབ་པ་དང་། དེང་རབས་ཀྱི་མི་ལ་སྔར་ལས་བདེ་སྐྱིད་སྐྲུན་པ་མ་ཟད་ཕྱི་རབས་བུ་རྒྱུད་ཀྱི་ཁེ་དབང་ལ་ཡང་འགན་སྲུང་ཐུབ་པ་བཅས་ཀྱིས་མིའི་རིགས་སྤྱི་ཚོགས་རྒྱུན་མཐུད་ངང་འཕེལ་རྒྱས་འགྲོ་བར་སྐུལ་འདེད་གཏོང་དགོས།

（2023ལོའི་ཟླ་3ཚེས་15ཉིན་ཀྲུང་གོའི་གུང་ཁྲན་ཏང་དང་འཛམ་གླིང་སྲིད་ཏང་ཁག་གི་མཐོ་རིམ་བར་གྱི་བཀའ་མོལ་ཚོགས་འདུའི་ཐོག་གནང་བའི་བཞེད་དོན་གསུང་བཤད།）

ཉེར་གསུམ།

མར་ཁེ་སིའི་རིང་ལུགས་ཀྲུང་གོ་ཅན་དུ་འགྱུར་བ་དང་དེང་རབས་ཅན་དུ་འགྱུར་བའི་འབྲས་བུ་ཚང་མ་ནི་ཏང་དང་མི་དམངས་ཀྱི་ལག་ལེན་ཉམས་མྱོང་དང་ཐུན་མོང་གི་བློ་གྲོས་ཀྱི་ཉིང་བཅུད་ཡིན། མའོ་ཙེ་ཏུང་གི་དགོངས་པ་དང་། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་གཞུང་ལུགས་མ་ལག། དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་གང་ཡིན་རུང་ཚང་མ་མི་དམངས་ཀྱི་བློ་གྲོས་དང་། མི་དམངས་ཀྱི་འཚོལ་ཞིབ། མི་དམངས་ཀྱི་གསར་སྐྲུན་ལས་མ་བྱུང་བ་གཅིག་ཀྱང་མེད། མི་དམངས་མང་ཚོགས་ནི་ལག་ལེན་གྱི་ཆེས་མདུན་སར་གནས་པས་ལག་ལེན་གྱི་འགྱུར་ལྡོག་ལ་ཚོར་བ་ཆེས་རྣོན་པོ་དང་མྱོང་ཚོར་ཆེས་ཟབ་མོ་ལྡན་ལ། སྤྱང་གྲུང་ཡང་ཆེས་ལྡན་པ་ཡིན། བསམ་བློ་ཇི་ལྟར་བཏང་ཡང་གོ་བ་མི་ལེན་པ་རྣམས་མི་དམངས་མང་ཚོགས་ཀྱི་ནང་དུ་སོང་ན་གློ་བུར་དུ་བློ་སྒོ་ཕྱེ་ཞིང་ཧ་གོ་བར་འགྱུར། ང་ཚོའི་ལས་དོན་གྱི་ལག་ལེན་ཁག་མང་ཚོགས་ཀྱི་ལམ་ཕྱོགས་སུ་ཡག་པོ་འགྲོ་དགོས་ལ། ཏང་གི་གཞུང་ལུགས་གསར་གཏོད་ཀྱང་མང་ཚོགས་ཀྱི་ལམ་ཕྱོགས་སུ་ཡག་པོ་འགྲོ་དགོས་པ་ལས། རང་སྣང་ཁོ་ནར་བརྟེན་ནས་བྱ་བ་སྒྲུབ་པ་དང་རང་སར་བསྡད་ནས་གནས་ལུགས་བཤད་པ་ནི་སྟོང་བསམ་ཙམ་ཡིན་པས་གཏན་ནས་བྱས་མི་རུང་། ཐེངས་འདི་བརྗོད་དོན་གཙོ་བོའི་སློབ་གསོར་འཆར་འགོད་བྱེད་སྐབས་ངས་བརྟག་དཔྱད་ཞིབ་འཇུག་རྒྱ་ཆེར་སྤེལ་དགོས་ཞེས་བཏོན་པ་ནི། རིམ་པ་ཁག་གི་འགོ་ཁྲིད་ལས་བྱེད་པས་དངོས་གཙོ་རིང་ལུགས་ཀྱི་ལོ་རྒྱུས་ལྟ་བ་བརྟན་པོ་སྐྱེད་པ་དང་། མང་ཚོགས་ཀྱི་ལྟ་བ་དང་དམིགས་ཡུལ་གྱི་འདུ་ཤེས་ཆེ་རུ་སྐྱེད་པ། དམིགས་འབེན་ཁྲིད་ཕྱོགས་དང་གནད་དོན་ཁྲིད་ཕྱོགས་རྒྱུན་འཁྱོངས་བྱེད་པ། ལས་ཁུངས་ལས་བུད་དེ་གཞི་རིམ་གྱི་མདུན་སར་སྐྱོད་པ། མི་དམངས་མང་ཚོགས་ཀྱི་སྐད་ཆར་མང་དུ་ཉན་པ། རང་འགུལ་གྱིས་ཐབས་བཀོད་མི་དམངས་ལ་འདྲི་བ་དང་དགོས་མཁོ་མི་དམངས་ལ་འདྲི་བ་བཅས་བྱས་ཏེ། ཏང་གི་གསར་གཏོད་རིགས་པའི་གཞུང་ལུགས་ཀྱི་ཞིབ་འཇུག་སྤྱད་དེ་འཕེལ་རྒྱས་ཀྱི་དགོས་མཁོ་དང་བསྒྱུར་བཅོས་ཀྱི་བྲེལ་བ་ཆེ་ས། གཞི་རིམ་གྱིས་རེ་སྒུག་བྱེད་ས། མི་དམངས་ཀྱི་བློ་ཁ་གཏད་ཕྱོགས་བཅས་འབུར་དུ་ཐོན་པའི་གནད་དོན་ཐག་གཅོད་ཡག་པོ་བྱེད་དགོས་པ་དང་། དུས་མཚུངས་སུ་མི་དམངས་མང་ཚོགས་ཀྱི་ལྟ་བ་ཡང་དག་ལས་རིགས་པའི་གཞུང་ལུགས་ཀྱི་གསར་གཏོད་དང་ལག་ལེན་གྱི་གསར་གཏོད་རིག་པ་བསྡུ་ལེན་བྱེད་པ་སོགས་ལ་སྐུལ་འདེད་གཏོང་དགོས། མི་དམངས་ཀྱི་ཐོག་མའི་གསར་གཏོད་ཀྱི་སྙིང་སྟོབས་ལ་བརྩི་བཀུར་ཞུ་བ་དང་། མི་དམངས་ཀྱི་གསར་གཏོད་རང་བཞིན་ལྡན་པའི་ལག་ལེན་ཁྲོད་ཉམས་མྱོང་གསར་པ་ཕྱོགས་བསྡོམས་བྱེད་པར་མཐོང་ཆེན་བྱས་ཏེ་རྗེས་དཔག་གི་ཤེས་པར་གོང་འཕེལ་བཏང་བ་དང་། གཞུང་ལུགས་ཀྱི་གྲུབ་འབྲས་གསར་པ་བཏོན་ནས་ཏང་གི་གསར་གཏོད་གཞུང་ལུགས་མི་དམངས་དུང་ཕྱུར་མང་པོའི་སེམས་སུ་འཇགས་པར་བྱས་ཏེ། དམངས་དང་འབྲེལ་འདྲིས་ཆེ་བ་དང་དམངས་ཀྱི་བློ་གྲོས་འཛོམས་པ། དམངས་ཀྱི་འདོད་བློ་དང་བསྟུན་པ། དམངས་ཀྱི་སེམས་པ་འགུགས་པ་བཅས་ཀྱི་གཞུང་ལུགས་སུ་འགྱུར་བར་བྱེད་དགོས།

（2023ལོའི་ཟླ་6ཚེས་30ཉིན་སྐབས་ཉི་ཤུ་པའི་ཀྲུང་དབྱང་ཆབ་སྲིད་ཅུས་ཀྱི་ཐུན་མོང་སློབ་སྦྱོང་ཐེངས་དྲུག་པའི་ཐོག་གནང་བའི་གསུང་བཤད།）

ཉེར་བཞི།

མཐུན་སྒྲིལ་འབད་འཐབ་ནི་ཏང་གིས་མི་དམངས་ལ་འགོ་ཁྲིད་བྱས་ཏེ། ལོ་རྒྱུས་ཀྱི་བྱ་གཞག་རླབས་པོ་ཆ་གཏོད་པའི་ལྡོག་མེད་ཀྱི་ལམ་བུ་ཡིན། མཐུན་སྒྲིལ་འབད་འཐབ་ནི་དམིགས་འབེན་ལ་བརྟེན་ནས་སེམས་ཤུགས་གཅིག་སྒྲིལ་བྱེད་དགོས། འཐབ་ལམ་གསར་པའི་སྟེང་། ང་ཚོས་ཀྲུང་གོའི་ལུགས་ཀྱི་དེང་རབས་ཅན་ལ་བརྟེན་ནས་གོམ་གང་མདུན་སྤོས་ཀྱིས་སེམས་ཤུགས་གཅིག་སྒྲིལ་དང་མཐུན་སྒྲིལ་འབད་འཐབ་བྱེད་དགོས། ཀྲུང་གོའི་ལུགས་ཀྱི་དེང་རབས་ཅན་ནི་མི་དམངས་ཡོངས་རྫོགས་ཀྱི་ཐུན་མོང་གི་བྱ་གཞག་ཡིན་ལ། ཉེན་ཁ་དང་འགྲན་སློང་གིས་ཁེངས་ཤིང་དཀའ་སྤྱད་འབད་བརྩོན་བྱེད་དགོས་པའི་བྱ་གཞག་རླབས་པོ་ཆེ་ཞིག་ཀྱང་ཡིན་པས། མི་དམངས་ཡོངས་རྫོགས་ཐུན་མོང་དུ་ཞུགས་པ་དང་ཐུན་མོང་གིས་འཛུགས་སྐྲུན་བྱེད་པ། ཐུན་མོང་གིས་མྱོང་རོལ་བྱེད་པ་བཅས་ངེས་པར་དུ་རྒྱུན་འཁྱོངས་བྱས་ཏེ། མི་དམངས་ཡོངས་རྫོགས་ལ་ཚགས་དམ་པོར་བརྟེན་ནས་ཕྱར་བ་གྲུ་འདེགས་ཀྱིས་བྱ་གཞག་རླབས་པོ་ཆེ་གཏོད་དགོས།

（2023ལོའི་ཟླ་12ཚེས་21ཉིན་དང་22ཉིན་ཀྲུང་དབྱང་ཆབ་སྲིད་ཅུས་ཀྱིས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་སློབ་སྦྱོང་དང་ལག་བསྟར་བྱེད་པའི་བརྗོད་དོན་གཙོ་བོའི་སློབ་གསོ་ལས་དམངས་གཙོའི་འཚོ་བའི་ཆེད་དོན་ཚོགས་འདུའི་ཐོག་གནང་བའི་གསུང་བཤད།）

ཉེར་ལྔ།

མི་དམངས་ཡོངས་རྫོགས་ཀྱི་ལོ་རྒྱུས་ཀྱི་རང་དབང་སྙིང་སྟོབས་སྐུལ་སློང་གང་ལེགས་བྱེད་དགོས། མི་དམངས་དང་། མི་དམངས་ཁོ་ན་ནི། ད་གཟོད་འཛམ་གླིང་གི་ལོ་རྒྱུས་གསར་སྐྲུན་བྱེད་པའི་སྒུལ་ཤུགས་ཡིན། ཀྲུང་གོའི་ལུགས་ཀྱི་དེང་རབས་ཅན་ནི་མི་དམངས་ཡོངས་རྫོགས་ཀྱི་བྱ་གཞག་ཡིན་པས་ངེས་པར་དུ་མི་དམངས་ལ་ཚགས་དམ་པོར་བརྟེན་དགོས་པ་དང་། མི་དམངས་ཀྱི་ནང་དུ་གནས་པའི་འཛད་མཐའ་མེད་པའི་བློ་གྲོས་དང་སྟོབས་ཤུགས་གཅིག་ཏུ་བསྡུས་ན། ད་གཟོད་ལོ་རྒྱུས་ཀྱི་བྱ་གཞག་རླབས་ཆེ་པོ་གསར་པ་རྒྱུན་ཆད་མེད་པར་གཏོད་ཐུབ། ང་ཚོས་མི་དམངས་ནི་ལོ་རྒྱུས་གསར་སྐྲུན་བྱེད་པའི་རྩ་བའི་སྒུལ་ཤུགས་ཡིན་པའི་ལོ་རྒྱུས་དངོས་གཙོ་རིང་ལུགས་ཀྱི་གཞི་རྩའི་ལྟ་བ་རྒྱུན་འཁྱོངས་བྱས་ཏེ། མི་དམངས་ཀྱི་བྱེད་པོའི་གོ་གནས་རྒྱུན་འཁྱོངས་བྱེད་པ་དང་། མི་དམངས་ཀྱིས་མཚོན་པའི་འདོད་བློ་དང་གསར་སྐྲུན་བྱས་པའི་ཉམས་མྱོང་། ཐོབ་པའི་དབང་ཆ། བཏོན་པའི་ནུས་པ་བཅས་ལ་བརྩི་བཀུར་གང་ལེགས་བྱས་ཏེ། ཆེས་རྒྱ་ཆེའི་མི་དམངས་ཀྱི་རྩ་བའི་ཁེ་ཕན་སྲུང་སྐྱོང་ཡག་པོ་དང་མངོན་འགྱུར་ཡག་པོ། འཕེལ་རྒྱས་ཡག་པོ་བཅས་བྱ་རྒྱུ་དེ་ལས་དོན་ཡོད་ཚད་ཀྱི་འགོ་རྩོམ་ས་དང་དོན་ལ་འབབ་སར་བྱས་ཏེ། དེང་རབས་ཅན་འཛུགས་སྐྲུན་གྱི་གྲུབ་འབྲས་དེ་སྔར་ལས་མང་ཞིང་སྔར་ལས་དྲང་སྙོམས་སྒོས་མི་དམངས་ཡོངས་ལ་ཕན་པའི་གསོས་སུ་སྒྲུབ་དགོས།

（2023ལོའི་ཟླ་12ཚེས་26ཉིན་བློ་མཐུན་མའོ་ཙེ་ཏུང་སྐུ་འཁྲུངས་ནས་ལོ་ངོ་130འཁོར་བར་དྲན་གསོ་ཞུ་བའི་བཞུགས་མོལ་ཚོགས་འདུའི་ཐོག་གནང་བའི་གསུང་བཤད།）

སྒྲོལ་མ་འཚོས་བསྒྱུར།

※འདི་ནི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་2012ལོའི་ཟླ་11པ་ནས་2023ལོའི་ཟླ་12པའི་བར་གནང་བའི་ངེས་པར་དུ་མི་དམངས་བླ་ན་མེད་པ་རྒྱུན་འཁྱོངས་བྱེད་དགོས་པའི་སྐོར་གྱི་རྒྱས་བཤད་གལ་ཆེན་གྱི་ཚན་བཤུས་ཡིན།