རིག་གནས་ཤུལ་བཞག་སྲུང་སྐྱོབ་དང་རྒྱུན་འཛིན་བྱེད་པར་ཤུགས་རྒྱག་པ་དང་། ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་དར་སྤེལ་གཏོང་དགོས།

གཅིག།

ཀྲུང་གོའི་ཁྱད་ཆོས་དྲིལ་བསྒྲགས་དང་འགྲེལ་བརྗོད་བྱེད་པར། རྒྱལ་ཁབ་དང་མི་རིགས་ཁག་གི་ལོ་རྒྱུས་ཀྱི་སྲོལ་རྒྱུན་དང་། རིག་གནས་ཀྱི་བསགས་ནོར། གཞི་རྩའི་རྒྱལ་ཁབ་ཀྱི་གནས་ཚུལ་བཅས་མི་འདྲ་བས། དེ་དག་གི་འཕེལ་རྒྱས་འགྲོ་ལམ་ཡང་མི་འདྲ་བར་རང་རང་སོ་སོར་ཁྱད་ཆོས་ལྡན་ངེས་ཡིན་པ་གསལ་པོར་བཤད་དགོས་པ་དང་གཅིག། ཀྲུང་ཧྭའི་རིག་གནས་ལ་ཀྲུང་ཧྭ་མི་རིགས་ཀྱི་ཆེས་ཟབ་རྒྱས་ཆེ་བའི་བསམ་པའི་དོན་གཉེར་ཡོད་པ་དེ་ནི་ཀྲུང་ཧྭ་མི་རིགས་ཉིད་ཉམས་པ་མེད་པར་འཚོ་ཞིང་གནས་ལ་དར་ཞིང་རྒྱས་པའི་ཕུན་ཚོགས་གསོས་སུ་གྲུབ་ཡོད་པ་གསལ་པོར་བཤད་དགོས་པ་དང་གཉིས། ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་ནི་ཀྲུང་ཧྭ་མི་རིགས་ཀྱི་གཟེངས་སུ་ཐོན་པའི་དགེ་མཚན་ཡིན་ལ། ང་ཚོའི་ཆེས་ཟབ་རྒྱས་ཆེ་བའི་རིག་གནས་མཉེན་སྟོབས་ཡིན་པ་གསལ་པོར་བཤད་དགོས་པ་དང་གསུམ། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ནི་ཀྲུང་ཧྭའི་རིག་གནས་ཀྱི་ས་ཞིང་གཤིན་པོའི་ནང་དུ་རྩ་བ་ཟབ་མོར་ཚུགས་ཡོད་ལ། ཀྲུང་གོའི་མི་དམངས་ཀྱི་འདོད་བློ་མཚོན་པ་དང་། ཀྲུང་གོ་དང་དུས་རབས་འཕེལ་རྒྱས་ཡར་རྒྱས་ཡོང་བའི་བླང་བྱ་དང་མཐུན་པ། ལོ་རྒྱུས་ཀྱི་འབྱུང་ཁུངས་ཟབ་རྒྱས་དང་དངོས་ཡོད་ཀྱི་རྨང་གཞི་རྒྱ་ཆེན་པོ་ལྡན་པ་གསལ་པོར་བཤད་དགོས་པ་དང་བཞི་བཅས་ཡིན། ཀྲུང་ཧྭ་མི་རིགས་ཀྱིས་ལོ་རྒྱུས་ཡུན་རིང་ལྡན་པའི་ཀྲུང་ཧྭའི་རིག་གནས་ཀྱི་གཙུག་ལག་བསྐྲུན་ཡོད་ལ། ད་དུང་ཡང་ཀྲུང་ཧྭའི་རིག་གནས་ཀྱི་དཔལ་ཡོན་གསར་པ་བསྐྲུན་ཐུབ་ངེས་རེད། ཐུན་མོང་མ་ཡིན་པའི་རིག་གནས་ཀྱི་སྲོལ་རྒྱུན་དང་། ཐུན་མོང་མ་ཡིན་པའི་ལོ་རྒྱུས་ཀྱི་ལས་དབང་། ཐུན་མོང་མ་ཡིན་པའི་གཞི་རྩའི་རྒྱལ་ཁབ་ཀྱི་གནས་ཚུལ་བཅས་ཀྱིས་ང་ཚོ་ངེས་པར་དུ་རང་ཉིད་ཀྱི་ཁྱད་ཆོས་ལ་མཐུན་པའི་འཕེལ་རྒྱས་འགྲོ་ལམ་དུ་སྐྱོད་དགོས་པ་ཐག་བཅད་ཡོད། རང་རྒྱལ་གྱི་སྲོལ་རྒྱུན་རིག་གནས་དང་ཕྱི་རྒྱལ་གྱི་ཕྱི་ཆོས་ལ་ཆ་མཚོན་ན། གནའ་བཟང་དེང་སྤྱོད་དང་ཕྱི་བཟང་ཀྲུང་སྤྱོད་དང་། སྙིགས་དོར་བཅུད་ལེན་དང་ངན་སྤང་བདེན་ལེན་བཅས་ཀྱིས་ཚན་རིག་དང་མཐུན་པར་བླང་དོར་བྱས་ཏེ་བེད་སྤྱོད་བྱེད་དགོས།

(2013ལོའི་ཟླ་8ཚེས་19ཉིན་རྒྱལ་ཡོངས་ཀྱི་དྲིལ་བསྒྲགས་དང་བསམ་བློའི་ལས་དོན་ཚོགས་འདུའི་ཐོག་གནང་བའི་གསུང་བཤད།)

གཉིས།

ང་ཚོའི་གྲོང་ཁྱེར་ལ་ལོ་རྒྱུས་ཀྱི་དྲན་ཤེས་མང་པོ་ཡོད། ལྷག་པར་དུ་ལོ་རྒྱུས་ཡུན་རིང་ལྡན་པའི་གྲོང་ཁུལ་རྙིང་པ་ཁ་ཤས་ནི་ཆེས་རྩ་ཆེ་བའི་དངོས་པོ་ཡིན། ངང་ཐུང་དང་ཤེས་རྨོངས་ཀྱི་དབང་གིས་གཏོར་བཤིག་གཏོང་མི་རུང་། གྲོང་ཁྱེར་ལ་ལས་གནའ་རྫས་ངོ་མ་བཤིག་ནས་གནའ་ཤུལ་རྫུན་མ་བཟོས། ངས་ཡིག་ཆ་ཞིག་མཐོང་བ་དེའི་ནང་རྒྱལ་ཡོངས་སུ་གྲོང་ཁྱེར་སུམ་ཅུ་ལྷག་གིས་གནའ་གྲོང་བསྐྱར་སྐྲུན་བྱེད་པར་ཇུས་འགོད་བྱས་དང་བྱེད་བཞིན་ཡོད་ལ། ཕན་ཅིན་ལེན་གྱི་བཞུགས་གནས་རྙིང་པ་དང་ཨ་ཕང་ཕོ་བྲང་ཟེར་བ་སོགས་བསྐྱར་སྐྲུན་བྱེད་ཀྱི་ཡོད་ཅེས་བཀོད་འདུག། ད་དུང་ས་ཆ་ཁ་ཤས་སུ་ས་མིང་རྙིང་པ་བསྒྱུར་རྒྱུར་དགའ་པོ་ཡོད་པ་དང་། ཕྱི་ལུགས་ཀྱི་ཉམས་ལྡན་པའི་ས་མིང་འདོགས་རྒྱུར་དགའ་པོ་ཡོད་པ་སྟེ། དཔེར་ན་“མན་ཧ་ཏུན་”དང་“ཝེ་ཉི་སི།” “ཅ་ཀྲོའུ་1886” “མ་སི་ལན་ཏེ་”སོགས་རྣམ་པ་སྣ་ཚོགས་ཡོད་པས་དེ་དག་ཀྲུང་གོའི་ལོ་རྒྱུས་རིག་གནས་དང་མཐུན་འགྲིག་ཡོང་ཐུབ་བམ། མང་ཚོགས་ཀྱིས་བལྟས་ཚེ་མགོ་ཉོག་ཅིང་ཅི་ཡིན་ཆ་མི་འཚལ་བར་མ་ཟད། ད་དུང་ས་མིང་དང་རིག་གནས་ཀྱི་རྒྱུན་བཅད་ནས་ང་ཚོའི་མི་རིགས་ཀྱི་རིག་གནས་རྒྱུན་འཛིན་བྱེད་པར་ཡང་ཕན་པ་མེད། ལྷག་པར་དུ་གནས་ཚུལ་འགའ་ཞིག་ཁྲིམས་དང་ཡང་འགལ་ཏེ། རང་རྒྱལ་གྱི་ས་མིང་དོ་དམ་སྲོལ་ཡིག་གི་ལག་བསྟར་ཞིབ་སྲོལ་ནང་ཕྱི་རྒྱལ་གྱི་མིའི་མིང་དང་ས་མིང་སོགས་རང་རྒྱལ་གྱི་ས་མིང་དུ་འདོགས་མི་རུང་ཞེས་གཏན་འབེབས་གསལ་པོ་བྱས་ཡོད། རིག་གནས་རྒྱུན་འཛིན་བྱ་རྒྱུ་ནི་སྟབས་བདེའི་ངང་གནའ་ལུགས་སླར་གསོ་བྱ་རྒྱུ་མ་ཡིན་པར། གྲོང་ཁྱེར་འཛུགས་སྐྲུན་ནང་དེང་རབས་ཀྱི་གཞི་རྒྱུ་ཟམ་མི་འཆད་པར་འདྲེས་ཡོད་མོད། འོན་ཀྱང་ངེས་པར་དུ་མཉམ་དུ་སྲོལ་རྒྱུན་གྱི་ཕུལ་བྱུང་རིག་གནས་སྲུང་སྐྱོབ་དང་དར་སྤེལ་བཏང་ནས། གྲོང་ཁྱེར་གྱི་ལོ་རྒྱུས་རིག་གནས་ཀྱི་རྒྱུན་མུ་མཐུད་དུ་སྤེལ་དགོས།

(2013ལོའི་ཟླ་12ཚེས་12ཉིན་ཀྲུང་དབྱང་གི་གྲོང་ཁྱེར་དང་གྲོང་རྡལ་ཅན་གྱི་ལས་དོན་ཚོགས་འདུའི་ཐོག་གནང་བའི་གསུང་བཤད།)

གསུམ།

ཀྲུང་ཧྭའི་རིག་གནས་ནི་ང་ཚོས་རྒྱལ་ཁབ་ཀྱི་རིག་གནས་མཉེན་སྟོབས་ཆེ་རུ་གཏོང་བའི་འབྱུང་ཁུངས་བརྟན་ཤོས་ཡིན་ལ། ང་ཚོས་རྒྱལ་ཁབ་ཀྱི་རིག་གནས་མཉེན་སྟོབས་ཆེ་རུ་གཏོང་བའི་ཐབས་ལམ་གལ་ཆེན་ཞིག་ཡིན། ཀྲུང་ཧྭ་མི་རིགས་ཀྱི་ཆེས་གཞི་རྩར་གྱུར་པའི་རིག་གནས་ཀྱི་གཞི་རྒྱུ་དེ་དེང་རབས་ཀྱི་རིག་གནས་ལ་འཚམ་པ་དང་དེང་རབས་ཀྱི་སྤྱི་ཚོགས་དང་འཕྲོད་པར་བྱས་ཏེ། མི་རྣམས་ཐོས་དགའ་མཐོང་དགའ་ཡོད་པ་དང་ཁྱབ་ཆེན་པོའི་ཐེ་ཞུགས་བྱེད་པ་ཅན་གྱི་རྣམ་པའི་ཐོག་ནས་ཁྱབ་སྤེལ་བྱེད་དགོས་པ་དང་། ཡུལ་དུས་ལས་བརྒལ་བ་དང་། རྒྱལ་ཁོངས་ལས་བརྒལ་བ། དུས་གཏན་གྱི་དགེ་མཚན་ལྡན་པ། དེང་རབས་ཀྱི་རིན་ཐང་ལྡན་པ་བཅས་ཀྱི་རིག་གནས་སྙིང་སྟོབས་དར་སྤེལ་བཏང་སྟེ། སྲོལ་རྒྱུན་གྱི་ཕུལ་བྱུང་རིག་གནས་རྒྱུན་འཛིན་བྱེད་ལ་དུས་རབས་ཀྱི་སྙིང་སྟོབས་དར་སྤེལ་ཡང་གཏོང་བ་དང་། རང་ཉིད་རྒྱལ་ཁབ་ཏུ་གཞི་ཚུགས་ལ་འཛམ་གླིང་ལ་ཁ་ཡང་ཕྱོགས་པའི་དེང་རབས་ཀྲུང་གོའི་རིག་གནས་གསར་གཏོད་ཀྱི་གྲུབ་འབྲས་ཁྱབ་སྤེལ་བྱེད་དགོས། སྲོལ་རྒྱུན་རིག་གནས་ཀྱི་ཐོན་ཁུངས་མ་ལག་ཚང་བར་གསེད་བཀྲོལ་བྱས་ཏེ། བཙན་མཁར་ཕོ་བྲང་ནང་དུ་ཉར་བའི་རིག་དངོས་དང་། ས་གཞི་ཆེན་པོའི་སྟེང་དུ་བཤམས་པའི་ཤུལ་ནོར། གཙུག་ལག་དཔེ་ཆའི་ནང་གི་ཡི་གེ་བཅས་གསར་སྐྱེས་ཡོང་དུ་འཇུག་དགོས།

(2013ལོའི་ཟླ་12ཚེས་30ཉིན་སྐབས་བཅོ་བརྒྱད་པའི་ཀྲུང་དབྱང་ཆབ་སྲིད་ཅུས་ཀྱི་ཐུན་མོང་སློབ་སྦྱོང་ཐེངས་བཅུ་གཉིས་པའི་ཐོག་གནང་བའི་གསུང་བཤད།)

བཞི།

ཤེས་དཔལ་རེ་རེ་ཡིས་རྒྱལ་ཁབ་དང་མི་རིགས་ཤིག་གི་བསམ་པའི་ཁྲག་རྒྱུན་རྒྱུན་འཛིན་བྱས་ཡོད་པས། མི་རབས་ནས་མི་རབས་བར་རྒྱུན་འཛིན་དང་སྲུང་སྐྱོབ་བྱེད་དགོས་ལ། དུས་བསྟུན་འཕེལ་རྒྱས་དང་གསར་གཏོད་ཀྱང་བྱེད་ཕོད་དགོས། ཀྲུང་གོའི་མི་དམངས་ཀྱིས་ཀྲུང་གོའི་ཕུགས་འདུན་མངོན་འགྱུར་བྱེད་རིམ་ཁྲོད། དུས་རབས་ཀྱི་ཡར་ཐོན་གསར་པ་གཞིར་བཟུང་སྟེ་ཀྲུང་ཧྭའི་ཤེས་དཔལ་གསར་གཏོད་རང་བཞིན་གྱི་སྤོ་སྒྱུར་དང་གསར་གཏོད་རང་བཞིན་གྱི་འཕེལ་རྒྱས་ལ་སྐུལ་འདེད་གཏོང་བ་དང་དེའི་གསོན་ཤུགས་རྒྱས་སུ་བཅུག་ནས། ཡུལ་དུས་ལས་བརྒལ་བ་དང་། རྒྱལ་ཁབ་ལས་བརྒལ་བ། ཡུན་གཏན་གྱི་དགེ་མཚན་ལྡན་པ། དེང་རབས་ཀྱི་རིན་ཐང་ལྡན་པ་བཅས་ཀྱི་རིག་གནས་སྙིང་སྟོབས་དར་སྤེལ་བཏང་སྟེ། དངོས་མང་བཤམས་སྟོན་ཁང་ནང་ཉར་བའི་རིག་དངོས་དང་། ས་གཞི་ཆེན་པོའི་སྟེང་བཤམས་པའི་ཤུལ་ནོར། གཙུག་ལག་དཔེ་ཆའི་ནང་གི་ཡི་གེ་བཅས་ཚང་མ་གསར་སྐྱེས་ཡོང་དུ་བཅུག་ནས། ཀྲུང་ཧྭའི་ཤེས་དཔལ་དེ་འཛམ་གླིང་རྒྱལ་ཁབ་ཁག་གི་མི་དམངས་ཀྱིས་གསར་གཏོད་བྱས་པའི་སྣ་མང་ཕུན་སུམ་ཚོགས་པའི་ཤེས་དཔལ་དང་མཉམ་དུ་མིའི་རིགས་ལ་བསམ་པའི་ཁྲིད་སྟོན་ཡང་དག་པ་དང་བསམ་པའི་སྒུལ་ཤུགས་སྟོབས་ལྡན་འདོན་སྤྲོད་བྱེད་དུ་འཇུག་དགོས།

(2014ལོའི་ཟླ་3ཚེས་27ཉིན་ཧྥ་རན་སེའི་ཕ་རི་སིའི་མཉམ་འབྲེལ་རྒྱལ་ཚོགས་སློབ་གསོ་ཚན་རིག་རིག་གནས་རྩ་འཛུགས་སྤྱི་ཁྱབ་པུའུ་རུ་གནང་བའི་གསུང་བཤད།)

ལྔ།

ངས་གྲོང་ཁྱེར་འཛུགས་སྐྲུན་བྱེད་པར་གྲོང་མིས་“རི་ཆུ་ནགས་གསུམ་མཐོང་ཐུབ་ལ་ཡུལ་ཞེན་མི་བརྗེད་པར་བྱེད་དགོས་”ཞེས་བརྗོད་མྱོང་། “ཡུལ་ཞེན་མི་བརྗེད་པ་”བྱེད་པར། ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་སྲུང་སྐྱོབ་དང་དར་སྤེལ་གཏོང་བ་དང་། གྲོང་ཁྱེར་གྱི་ལོ་རྒྱུས་རིག་གནས་རྒྱུན་མཐུད་དང་ཀྲུང་ཧྭའི་རིག་གནས་ཀྱི་གཞི་རྒྱུ་སོར་འཇོག་བྱེད་དགོས། སྔོན་རབས་པས་བཞག་པའི་རིག་གནས་ཤུལ་བཞག་ལ་སྲུང་སྐྱོབ་ཡག་པོ་བྱེད་དགོས་ཏེ། དེའི་ནང་རིག་དངོས་གནའ་ཤུལ་དང་། ལོ་རྒྱུས་རིག་གནས་ཀྱི་གྲོང་ཁྱེར་གྲགས་ཅན། གྲོང་རྡལ་གྲགས་ཅན། གྲོང་ཚོ་གྲགས་ཅན། ལོ་རྒྱུས་ཀྱི་ཁྲོམ་ཁུལ། ལོ་རྒྱུས་ཀྱི་བཟོ་སྐྲུན། བཟོ་ལས་ཀྱི་ཤུལ་ནོར་བཅས་དང་། དེ་བཞིན་དངོས་མིན་རིག་གནས་ཤུལ་ནོར་བཅས་ཚུད་ཡོད་པས། “གནའ་ཤུལ་ངོ་མ་བཤིག་པ་དང་གནའ་རྫས་རྫུན་མ་བཟོ་བ་”ལྟ་བུའི་གླེན་རྟགས་སྟོན་མི་རུང་། གནའ་བོའི་བཟོ་སྐྲུན་ལ་སྲུང་སྐྱོབ་བྱེད་དགོས་ལ། ཉེ་རབས་ཀྱི་བཟོ་སྐྲུན་ལའང་སྲུང་སྐྱོབ་བྱེད་དགོས། བཟོ་སྐྲུན་རྐྱང་པ་སྲུང་སྐྱོབ་བྱེད་དགོས་ལ། སྲང་ལམ་དང་ཁྲོམ་གཞུང་། གྲོང་ཁྱེར་དང་གྲོང་རྡལ་གྱི་བཀོད་པ་ལའང་སྲུང་སྐྱོབ་བྱེད་དགོས། སྤུས་ལེགས་བཟོ་སྐྲུན་ལ་སྲུང་སྐྱོབ་བྱེད་དགོས་ལ། གྲོང་གསེབ་ཀྱི་ཉམས་འགྱུར་ཟབ་མོ་ལྡན་པའི་གྲོང་མིའི་སྡོད་ཁང་དང་དེ་བཞིན་ས་གནས་ཀྱི་ཁྱད་ཆོས་ལྡན་པའི་དམངས་སྲོལ་ལའང་སྲུང་སྐྱོབ་བྱེད་དགོས།

(2015ལོའི་ཟླ་12ཚེས་20ཉིན་ཀྲུང་དབྱང་གྲོང་ཁྱེར་ལས་དོན་ཚོགས་འདུའི་ཐོག་གནང་བའི་གསུང་བཤད།)

དྲུག།

རིག་དངོས་ཀྱིས་འོད་སྟོང་འཕྲོ་བའི་ཤེས་དཔལ་ཐེག་ཡོད་པ་དང་། ལོ་རྒྱུས་རིག་གནས་རྒྱུན་འཛིན་བྱས་ཤིང་། མི་རིགས་ཀྱི་སྙིང་སྟོབས་སྲུང་འཛིན་བྱས་ཡོད། དེ་ནི་མེས་པོས་ང་ཚོར་བཞག་པའི་ཤུལ་ནོར་རྩ་ཆེན་ཞིག་ཡིན་ལ། སྤྱི་ཚོགས་རིང་ལུགས་ཀྱི་བསམ་པའི་དཔལ་ཡོན་འཛུགས་སྐྲུན་བྱེད་ཤུགས་ཆེ་རུ་གཏོང་བའི་གསོ་བཅུད་ཟབ་མོ་ཡིན། རིག་དངོས་སྲུང་སྐྱོབ་བྱ་རྒྱུ་ནི་བྱས་རྗེས་དེང་འདིར་བཞག་ཅིང་ཕན་འབྲས་བསྐལ་བརྒྱར་ཐོན་པ་ཞིག་ཡིན།

(2016ལོའི་ཟླ་3ཚེས་23ཉིན་རིག་དངོས་ལས་དོན་ཡག་པོ་བསྒྲུབ་རྒྱུའི་སྐོར་གྱི་མཆན་བཀོད་མཛུབ་སྟོན།)

བདུན།

ཀྲུང་ཧྭ་མི་རིགས་ལ་ལོ་རྒྱུས་ཡུན་རིང་ལྡན་ཞིང་ཀྲུང་ཧྭའི་ཤེས་དཔལ་གྱི་དར་རྒྱུན་ཧ་ཅང་རིང་། ཀྲུང་ཧྭའི་རིག་གནས་རྒྱ་ཆེ་ཞིང་གཏིང་ཟབ་པ་དང་། དངོས་མང་བཤམས་སྟོན་ཁང་ཞིག་ནི་སློབ་གྲྭ་ཆེན་པོ་ཞིག་ཡིན། དངོས་མང་བཤམས་སྟོན་ཁང་འཛུགས་སྐྲུན་བྱེད་པར་ཁྱད་ཆོས་ལ་མཐོང་ཆེན་བྱེད་དགོས། རྒྱ་མཚོའི་ཕྱོགས་སུ་སྐྱོད་པའི་ལམ་བུ་ནི་རྒྱལ་ཁབ་ཅིག་འཕེལ་རྒྱས་གཏོང་བའི་ཐབས་ལམ་གལ་ཆེན་ཞིག་ཡིན་པ་དང་། དེ་གར་གནའ་བོའི་མཚོ་ཐོག་དར་གོས་ཚོང་ལམ་དམིགས་ནས་བཤམས་པའི་རིག་དངོས་ཚང་མ་ལོ་རྒྱུས་དང་རིག་གནས་རེད། རིག་དངོས་ལ་སྐད་ཆ་ཤོད་དུ་འཇུག་པ་དང་། ལོ་རྒྱུས་ལ་སྐད་ཆ་ཤོད་དུ་འཇུག་པ། རིག་གནས་ལ་སྐད་ཆ་ཤོད་དུ་འཇུག་དགོས། རིག་དངོས་སྲུང་སྐྱོབ་དང་བེད་སྤྱོད་ལ་ཤུགས་རྒྱག་པ་དང་། ལོ་རྒྱུས་ཞིབ་འཇུག་དང་རྒྱུན་འཛིན་ལ་ཤུགས་བརྒྱབ་ནས་ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་རྒྱུན་ཆད་མེད་པར་དར་རྒྱས་གོང་འཕེལ་གཏོང་དགོས། རིག་གནས་ཀྱི་གདེང་ཚོད་ཆེ་རུ་གཏོང་བ་དང་། ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་རྒྱུན་འཛིན་བྱེད་པའི་རྨང་གཞིའི་ཐོག་སྤྱི་ཚོགས་རིང་ལུགས་ཀྱི་སྔོན་ཐོན་རིག་གནས་འཕེལ་རྒྱས་གཏོང་བ་དང་སྤྱི་ཚོགས་རིང་ལུགས་ཀྱི་རིག་གནས་སྟོབས་ལྡན་རྒྱལ་ཁབ་འཛུགས་སྐྲུན་གང་མགྱོགས་བྱེད་དགོས།

(2017ལོའི་ཟླ་4ཚེས་19ཉིན་ཀོང་ཞི་རུ་རྟོག་ཞིབ་གནང་སྐབས་ཀྱི་གསུང་བཤད།)

བརྒྱད།

ང་ཚོས་ཕུལ་བྱུང་གི་སྲོལ་རྒྱུན་ཡུལ་སྲོལ་རིག་གནས་སྔོག་འདོན་གཏིང་ཟབ་དང་། རྒྱུན་འཛིན། གསར་གཏོད་བཅས་བྱེད་དགོས། གྲོང་གསེབ་ཀྱི་གཟུགས་ལྡན་རིག་གནས་གནས་ཐུབ་པར་བྱེད་དགོས་པ་དང་། ཞིང་རྨོའི་ཁྱད་ཆོས་དང་། མི་རིགས་ཀྱི་ཁྱད་ཆོས། ས་ཁོངས་ཀྱི་ཁྱད་ཆོས་བཅས་ལྡན་པའི་དངོས་པོའི་རིག་གནས་ཤུལ་བཞག་སྔོག་འདོན་གང་ལེགས་བྱེད་དགོས་པ་དང་། གནའ་གྲོང་དང་། གནའ་བོའི་གྲོང་སྡེ་དང་། གནའ་བོའི་བཟོ་སྐྲུན། མི་རིགས་གྲོང་ཚོ། རིག་གནས་དངོས་རྫས་དང་རྗེས་ཤུལ། ཞིང་ལས་རྗེས་ཤུལ་བཅས་སྲུང་སྐྱོབ་བྱེད་ཤུགས་ཆེ་རུ་གཏོང་དགོས། གསོན་ཉམས་ལྡན་པའི་ཡུལ་སྲོལ་རིག་གནས་རྒྱུན་འཛིན་བྱེད་དུ་འཇུག་དགོས་པ་དང་། དམངས་ཁྲོད་སྒྱུ་རྩལ་དང་། ཟློས་གར་དང་གཞས་གཏམ་སྒྱུ་རྩལ། ལག་ཤེས་བཟོ་རྩལ། མི་རིགས་ཀྱི་གྱོན་ཆས། དམངས་སྲོལ་བྱེད་སྒོ་སོགས་དངོས་མིན་རིག་གནས་ཤུལ་བཞག་སྔོག་འདོན་གཏིང་ཟབ་བྱེད་དགོས། སྲུང་སྐྱོབ་རྒྱུན་འཛིན་དང་གསར་སྤེལ་བེད་སྤྱོད་བྱ་རྒྱུ་ཟུང་འབྲེལ་དམ་ཚགས་བྱས་ཏེ། རང་རྒྱལ་གྱི་རྨོ་འདེབས་ཤེས་དཔལ་གྱི་ཕུལ་བྱུང་ཤུལ་ནོར་དང་དེང་རབས་ཀྱི་ཤེས་དཔལ་གྱི་བདག་རྐྱེན་ཟུང་འབྲེལ་བྱས་ཏེ། དུས་རབས་ཀྱི་ནང་དོན་གསར་པ་བསྣན་ནས། ཀྲུང་ཧྭའི་ཕུལ་བྱུང་གི་སྲོལ་རྒྱུན་རིག་གནས་མི་ཉམས་གོང་འཕེལ་གཏོང་བ་དང་། རང་རྒྱལ་གྱི་ལོ་རྒྱུས་ཡུན་རིང་ལྡན་པའི་རྨོ་འདེབས་ཤེས་དཔལ་དེས་དུས་རབས་གསར་པའི་ནང་བརྗིད་ཉམས་མངོན་པར་བྱེད་དགོས།

(2017ལོའི་ཟླ་12ཚེས་28ཉིན་ཀྲུང་དབྱང་གྲོང་གསེབ་ལས་དོན་ཚོགས་འདུའི་ཐོག་གནང་བའི་གསུང་བཤད།)

དགུ།

རང་རྒྱལ་ནི་གཅིག་གྱུར་གྱི་མི་རིགས་མང་བའི་རྒྱལ་ཁབ་ཅིག་ཡིན་པ་དང་། ཀྲུང་ཧྭ་མི་རིགས་ནི་མི་རིགས་མང་པོ་རྒྱུན་ཆད་མེད་པར་སྤེལ་རེས་དང་འགྲོ་འོང་དང་མཉམ་འདྲེས་བཅས་ལས་གྲུབ་པ་ཞིག་རེད། ཀྲུང་ཧྭའི་ཤེས་དཔལ་ནི་བསྟུན་མཁས་ཀྱང་གཞན་རྗེས་མི་འབྲང་བའི་མི་རིགས་མང་པོའི་རིག་གནས་ཀྱི་ས་ཞིང་གཤིན་པོར་རྩ་བ་ཚུགས་ཡོད་ལ། ལོ་རྒྱུས་ཡུན་རིང་ལྡན་ཞིང་འཛམ་གླིང་ཐོག་ད་བར་མཚམས་མ་ཆད་པར་འཕེལ་རྒྱས་འགྲོ་བའི་ཤེས་དཔལ་ཉག་ཅིག་རེད། གྲངས་ཉུང་མི་རིགས་ཀྱི་རིག་གནས་སྲུང་སྐྱོབ་དང་རྒྱུན་འཛིན་བྱེད་པར་མཐོང་ཆེན་བྱེད་དགོས། 《གེ་སར་》སོགས་མངོན་མིན་རིག་གནས་ཤུལ་བཞག་ལ་རྒྱབ་སྐྱོར་དང་འདེགས་སྐྱོར་བྱས་ནས་རྒྱུན་འཛིན་པ་གསོ་སྐྱོང་ཡག་པོ་བྱེད་དགོས་ལ། མི་རབས་ནས་མི་རབས་བར་བརྒྱུད་སྤེལ་བྱེད་དགོས། མི་རྣམས་ལ་ཡང་དག་པའི་ལོ་རྒྱུས་ཀྱི་ལྟ་བ་དང་། མི་རིགས་ཀྱི་ལྟ་བ། རྒྱལ་ཁབ་ཀྱི་ལྟ་བ། རིག་གནས་ཀྱི་ལྟ་བ་བཅས་སྐྱེད་པར་ཁྲིད་སྟོན་བྱེད་དགོས་ལ། མི་རིགས་ཁག་གི་མི་དམངས་ཀྱིས་རླབས་ཆེན་མེས་རྒྱལ་ལ་བཅངས་པའི་ངོས་འཛིན་གཅིག་མཐུན་དང་། ཀྲུང་ཧྭ་མི་རིགས་ལ་བཅངས་པའི་ངོས་འཛིན་གཅིག་མཐུན། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་འགྲོ་ལམ་ལ་བཅངས་པའི་ངོས་འཛིན་གཅིག་མཐུན་བཅས་རྒྱུན་ཆད་མེད་པར་སྲ་བརྟན་དུ་གཏོང་དགོས།

(2019ལོའི་ཟླ་7ཚེས་15ཉིན་ནང་སོག་ཏུ་རྟོག་ཞིབ་གནང་སྐབས་ཀྱི་གསུང་བཤད།)

བཅུ།

ཏུན་ཧོང་རིག་གནས་ཞིབ་འཇུག་དང་དར་སྤེལ་གཏོང་བར། ཏུན་ཧོང་རིག་གནས་དང་ལོ་རྒྱུས་ཤུལ་བཞག་གི་རྒྱབ་ཏུ་འདུས་པའི་མཚན་ཉིད་རིག་པའི་བསམ་བློ་དང་། མི་ཆོས་སྙིང་སྟོབས། རིན་ཐང་གི་འདུ་ཤེས། ཀུན་སྤྱོད་ཀྱི་ཚད་གཞི་སོགས་སྔོག་འདོན་གཏིང་ཟབ་བྱས་ནས་ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་ཀྱི་གསར་སྐྲུན་རང་བཞིན་གྱི་སྤོ་སྒྱུར་དང་གསར་གཏོད་རང་བཞིན་གྱི་འཕེལ་རྒྱས་ལ་སྐུལ་འདེད་གཏོང་དགོས་པ་མ་ཟད། དེའི་ནང་དུ་འདུས་པའི་ཀྲུང་ཧྭ་མི་རིགས་ཀྱི་རིག་གནས་ཀྱི་སྙིང་སྟོབས། རིག་གནས་ཀྱི་བློ་རྒྱ། རིག་གནས་ཀྱི་གདེང་ཚོད་བཅས་དེ་བས་ཀྱང་གསལ་སྟོན་བྱས་ཏེ། དུས་རབས་གསར་པར་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་རྒྱུན་འཁྱོངས་དང་འཕེལ་རྒྱས་གཏོང་བར་བསམ་པའི་འདེགས་སྐྱོར་འདོན་སྤྲོད་བྱེད་དགོས། རྒྱལ་ཁབ་ཀྱི་རིག་གནས་སྙིང་བཅུད་རྒྱུན་འཛིན་དང་དངོས་མིན་རིག་གནས་ཤུལ་བཞག་སྲུང་སྐྱོབ་བྱེད་པར་རྒྱབ་སྐྱོར་དང་རོགས་སྐྱོར་བྱེད་ཤུགས་ཆེ་རུ་གཏོང་དགོས་ལ། གྲངས་ཉུང་མི་རིགས་ཀྱི་ལོ་རྒྱུས་རིག་གནས་ལ་ཞིབ་འཇུག་བྱེད་ཤུགས་ཆེ་རུ་བཏང་ནས་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོར་སྐྱེད་དགོས།

(2019ལོའི་ཟླ་8ཚེས་19ཉིན་ཏུན་ཧོང་ཞིབ་འཇུག་ཁང་དུ་བཞུགས་མོལ་གནང་སྐབས་ཀྱི་གསུང་བཤད།)

བཅུ་གཅིག།

གནའ་རྫས་རྟོག་ཞིབ་ཀྱི་རྗེས་ཤུལ་དང་ལོ་རྒྱུས་ཀྱི་རིག་དངོས་ནི་ལོ་རྒྱུས་ཀྱི་དཔང་རྟགས་ཡིན་པས་ངེས་པར་དུ་སྲུང་སྐྱོབ་ཡག་པོ་དང་བེད་སྤྱོད་ཡག་པོ་བྱེད་དགོས། ལོ་རྒྱུས་རིག་གནས་ཤུལ་བཞག་གི་ཐོན་ཁུངས་དང་རྒྱུ་ནོར་དོ་དམ་ལམ་ལུགས་འཐུས་སྒོ་ཚང་བར་འཛུགས་པ་དང་། རྒྱལ་ཁབ་ཀྱི་རིག་དངོས་ཐོན་ཁུངས་ཀྱི་གཞི་གྲངས་ཆེན་མོའི་མཛོད་འཛུགས་པ། འབྲེལ་ཡོད་ཁྱབ་ཁོངས་ཀྱི་རིག་དངོས་ཐོན་ཁུངས་ཡོངས་བཤེར་དང་དཀར་ཆག་ཡོངས་བསྒྲགས་ལ་གཅིག་འདོམས་ཀྱིས་མཛུབ་སྟོན་བྱེད་པར་ཤུགས་རྒྱག་པ། ལག་རྩལ་གྱི་འདེགས་སྐྱོར་བྱེད་ཤུགས་ཆེ་རུ་གཏོང་བ། སྤྱི་ཚོགས་ཐེ་ཞུགས་བྱེད་པར་ཁྲིད་སྟོན་བཅས་བྱེད་དགོས། ལོ་རྒྱུས་རིག་གནས་ཤུལ་བཞག་སྲུང་སྐྱོབ་བྱ་རྒྱུ་དེ་ཨང་དང་པོར་འཇོག་དགོས་པ་དང་། དུས་མཚུངས་སུ་བེད་སྤྱོད་ལུགས་མཐུན་བྱས་ཏེ། དེར་སྤྱི་པའི་རིག་གནས་ཞབས་ཞུ་འདོན་སྤྲོད་དང་མི་དམངས་ཀྱི་བསམ་པའི་རིག་གནས་འཚོ་བའི་དགོས་མཁོ་སྐོང་བའི་ཐད་ནུས་པ་འདོན་སྤེལ་གང་ལེགས་བྱེད་དུ་འཇུག་དགོས། གནས་སྤོ་མི་ཐུབ་པའི་རིག་དངོས་ཀྱི་སྲུང་སྐྱོབ་ལམ་སྲོལ་ཆ་ཚང་དུ་བཏང་ནས་རིག་དངོས་ལ་སྲུང་སྐྱོབ་དང་དོ་དམ་བྱ་རྒྱུ་དེ་རྒྱལ་ཁབ་ཀྱི་མངའ་ཁོངས་བར་སྟོང་འཆར་འགོད་སྒྲིག་བཟོ་དང་ལག་བསྟར་གྱི་ཁོངས་སུ་འཇུག་དགོས། “སྔོན་ལ་གནའ་རྫས་རྟོག་ཞིབ་དང་རྗེས་ལ་ནང་བཤུག་གཏོང་བའི་”ལམ་ལུགས་ཇུས་འགོད་དང་ཆ་འགྲིག་སྲིད་ཇུས་གཏན་འབེབས་བྱེད་དགོས་པ་དང་། ལོ་རྒྱུས་རིག་གནས་ཤུལ་བཞག་ཡོད་སྲིད་པའི་ས་ཆ་ཡིན་ན་ཁྲིམས་ལྟར་གནའ་རྫས་རྟོག་ཞིབ་ཀྱི་བརྟག་དཔྱད་དང་རྩད་ཞིབ། སྔོག་འདོན་བཅས་མ་བྱས་གོང་བེད་སྤྱོད་བྱས་མི་ཆོག། རྒྱལ་ཁབ་ཕྱི་ནང་གི་རིག་དངོས་ཐད་ཀྱི་གནོད་འཚེའི་ལས་འཛོལ་ཚབས་ཆེན་གྱི་བསླབ་བྱ་དང་ལེན་གཏིང་ཟབ་བྱེད་པ་དང་། བྱེད་པོའི་འགན་འཁྲི་དོན་འཁྱོལ་བྱེད་པར་ལྟ་ཞིབ། བག་ཉལ་འགལ་རྐྱེན་བཅོས་སྒྲིག་བྱེད་ཤུགས་ཆེ་རུ་གཏོང་བ་བཅས་བྱས་ཏེ། ལོ་རྒྱུས་རིག་གནས་ཤུལ་བཞག་གི་ཉེན་འགོག་སྲུང་སྐྱོབ་བྱེད་པའི་ནུས་པ་ཆེ་རུ་གཏོང་དགོས། ཁྲིམས་བསྟར་ལྟ་ཞིབ་ལ་ཤུགས་བརྒྱབ་ནས་ཐེར་འདོན་བྱེད་པའི་ལས་རིམ་ཚད་ལྡན་དུ་གཏོང་བ་དང་། རིག་དངོས་ཐད་ཀྱི་ཉེས་གསོག་ལ་རྡུང་རྡེག་ཚ་ནན་གཏོང་དགོས།

(2020ལོའི་ཟླ་9ཚེས་28ཉིན་སྐབས་བཅུ་དགུ་པའི་ཀྲུང་དབྱང་ཆབ་སྲིད་ཅུས་ཀྱི་ཐུན་མོང་སློབ་སྦྱོང་ཐེངས་ཉེར་གསུམ་པའི་ཐོག་གནང་བའི་གསུང་བཤད།)

བཅུ་གཉིས།

གསར་བརྗེའི་རིག་དངོས་ཀྱིས་ཏང་དང་མི་དམངས་ཀྱིས་དཔའ་མཛངས་རྟུལ་ཕོད་ཀྱིས་འབད་འཐབ་བྱས་པའི་གཟི་བརྗིད་ལྡན་པའི་ལོ་རྒྱུས་ཐེག་ཡོད་ལ། ཀྲུང་གོའི་གསར་བརྗེའི་བརྒྱུད་རིམ་རླབས་པོ་ཆེ་དང་མི་སེམས་འགུགས་པའི་བྱས་རྗེས་བཀོད་ཡོད་པས་ཏང་དང་རྒྱལ་ཁབ་ཀྱི་གཅེས་ནོར་ཡིན། གསར་བརྗེའི་སྲོལ་རྒྱུན་དང་གསར་བརྗེའི་རིག་གནས་དར་སྤེལ་གཏོང་བ་དང་། སྤྱི་ཚོགས་རིང་ལུགས་ཀྱི་བསམ་པའི་དཔལ་ཡོན་འཛུགས་སྐྲུན་བྱེད་ཤུགས་ཆེ་རུ་གཏོང་བ། རྒྱལ་གཅེས་ཀྱི་སྤྲོ་སེམས་སྐུལ་སློང་བྱེད་པ། མི་རིགས་ཀྱི་སྙིང་སྟོབས་ཆེ་རུ་སྐྱེད་པ་བཅས་བྱེད་པའི་གསོན་ཉམས་ལྡན་པའི་སློབ་དེབ་ཡིན།

གསར་བརྗེའི་རིག་དངོས་སྲུང་སྐྱོབ་དང་བེད་སྤྱོད་བྱེད་ཤུགས་ཆེ་རུ་གཏོང་བ་དང་། གསར་བརྗེའི་རིག་གནས་དར་སྤེལ་གཏོང་བ། དམར་པོའི་གཞི་རྒྱུ་རྒྱུན་འཛིན་བྱ་རྒྱུ་བཅས་ནི་ཏང་ཡོངས་དང་སྤྱི་ཚོགས་ཡོངས་ཀྱི་ཐུན་མོང་གི་འགན་འཁྲི་ཡིན། ཏང་ཨུ་དང་སྲིད་གཞུང་རིམ་པ་ཁག་གིས་གསར་བརྗེའི་རིག་དངོས་སྲུང་སྐྱོབ་དང་བེད་སྤྱོད་བྱ་རྒྱུ་དེ་ཉིན་རེའི་གྲོས་རིམ་གལ་ཆེན་ནང་བཅུག་སྟེ། ལས་ཀ་བྱེད་ཤུགས་ཆེ་རུ་བཏང་ནས་གསར་བརྗེའི་རིག་དངོས་སྲུང་སྐྱོབ་ཡག་པོ་དང་། དོ་དམ་ཡག་པོ། བེད་སྤྱོད་ཡག་པོ་བཅས་ཏན་ཏིག་བྱེད་དགོས། ཏང་གི་ལོ་རྒྱུས་སློབ་སྦྱོང་དང་སློབ་གསོ། གསར་བརྗེའི་སྲོལ་རྒྱུན་སློབ་གསོ། རྒྱལ་གཅེས་རིང་ལུགས་ཀྱི་སློབ་གསོ་སོགས་ཐད་ཀྱི་གསར་བརྗེའི་རིག་དངོས་ཀྱི་ནུས་པ་གལ་ཆེན་འདོན་སྤེལ་ཡག་པོ་བྱས་ཏེ། རྒྱ་ཆེའི་ལས་བྱེད་པ་དང་མང་ཚོགས་ཀྱི་བསམ་པའི་སྟོབས་ཤུགས་སྐུལ་སློང་བྱས་ནས། ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་འཛུགས་སྐྲུན་བྱེད་པ་དང་། ཀྲུང་ཧྭ་མི་རིགས་བསྐྱར་དར་རླབས་པོ་ཆེ་ཡོང་བའི་ཀྲུང་གོའི་ཕུགས་འདུན་མངོན་འགྱུར་བྱེད་པར་ཡིད་ཆེས་བརྒྱ་འགྱུར་གྱིས་འབད་འཐབ་བྱེད་དགོས།

(2021ལོའི་ཟླ་3པར་གསར་བརྗེའི་རིག་དངོས་ལས་དོན་ཐད་གནང་བའི་མཛུབ་སྟོན།)

བཅུ་གསུམ།

དམར་པོའི་ཐོན་ཁུངས་ནི་ང་ཚོའི་ཏང་གི་དཀའ་ཚེགས་ཆེ་ཞིང་འོད་སྟོང་འབར་བའི་འབད་འཐབ་བརྒྱུད་རིམ་གྱི་དཔང་པོ་དང་ཆེས་རྩ་ཆེ་བའི་བསམ་པའི་རྒྱུ་ནོར་ཡིན་པས། ངེས་པར་དུ་བློ་གཅིག་སེམས་གཅིག་དང་ལྷག་བསམ་ཟོལ་མེད་དང་སེམས་ཤུགས་ཡོད་རྒུ་བཏོན་ནས་སྲུང་སྐྱོབ་ཡག་པོ་དང་། དོ་དམ་ཡག་པོ། བེད་སྤྱོད་ཡག་པོ་བཅས་བྱེད་དགོས། གཅིག་ནི་ཚན་རིག་དང་མཐུན་པའི་སྲུང་སྐྱོབ་བྱེད་ཤུགས་ཆེ་རུ་གཏོང་དགོས། དམར་པོའི་ཐོན་ཁུངས་ནི་བསྐྱར་སྐྱེ་མི་རུང་བ་དང་ཚབ་བྱེད་མི་ཐུབ་པའི་ཐོན་ཁུངས་རྩ་ཆེན་ཡིན་པས། སྲུང་སྐྱོབ་བྱ་རྒྱུ་ནི་ལས་འགན་ཨང་དང་པོ་ཡིན། ལོ་རྒྱུས་ལ་འགན་འཁུར་བ་དང་མི་དམངས་ལ་འགན་འཁུར་བའི་རྣམ་འགྱུར་བཟུང་ནས། དམར་པོའི་ཐོན་ཁུངས་ལ་ཆེད་དོན་བརྟག་དཔྱད་གཏིང་ཟབ་བྱེད་པ་དང་། དམར་པོའི་རྗེས་ཤུལ་དང་གསར་བརྗེའི་རིག་དངོས་སྲུང་སྐྱོབ་ལས་དོན་ལ་ཤུགས་རྒྱག་པ། མྱུར་སྐྱོབ་རང་བཞིན་གྱི་སྲུང་སྐྱོབ་དང་སྔོན་འགོག་རང་བཞིན་གྱི་སྲུང་སྐྱོབ། གཙོ་ཐིག་སྲུང་སྐྱོབ་དང་མཐའ་འཁོར་སྲུང་སྐྱོབ། གནས་རྐྱང་སྲུང་སྐྱོབ་དང་། ཁྱུ་འདུས་སྲུང་སྐྱོབ་བཅས་གཅིག་གྱུར་འཆར་འགོད་ཡག་པོ་བྱེད་དགོས། གཉིས་ནི་མ་ལག་ལྡན་པའི་ཞིབ་འཇུག་སྤེལ་དགོས། ཞིབ་འཇུག་ནུས་པ་གཅིག་འདོམས་དང་། ཞིབ་འཇུག་འཆར་འགོད་བྱེད་ཤུགས་ཆེ་རུ་བཏང་སྟེ། གསར་བརྗེའི་ལོ་རྒྱུས་ཡིག་རིགས་མྱུར་སྐྱོབ་དང་། འཚོལ་བསྡུ། ཞིབ་འཇུག་བཅས་ཀྱི་ལས་ཀ་ཧུར་ཐག་གིས་སྤེལ་དགོས། གསར་བརྗེའི་ལོ་རྒྱུས་ཞིབ་འཇུག་བྱེད་ཤུགས་ཆེ་རུ་གཏོང་བ་དང་། དམར་པོའི་ཐོན་ཁུངས་རྒྱབ་ཀྱི་བསམ་བློའི་ནང་དོན་སྔོག་འདོན་གཏིང་ཟབ་བྱས་ནས། ཏང་གི་ལོ་རྒྱུས་འཕེལ་རྒྱས་ཀྱི་བརྗོད་གཞི་དང་། གཙོ་རྐང་། གཙོ་རྒྱུག། ངོ་བོ་བཅས་ཁོང་དུ་ཡང་དག་ཆུད་པ་དང་། དར་ཆ་གསལ་སྒྲེང་གིས་ལོ་རྒྱུས་དོན་སྟོང་རིང་ལུགས་ལ་ངོ་རྒོལ་དང་བཀག་འགོག་བྱེད་དགོས། གསུམ་ནི་འགྲེམས་སྟོན་སྤུས་ལེགས་བཤམས་དགོས། ཆབ་སྲིད་ཀྱི་རང་བཞིན་དང་། བསམ་བློའི་རང་བཞིན། སྒྱུ་རྩལ་གྱི་རང་བཞིན་བཅས་ཕན་ཚུན་གཅིག་གྱུར་ཡོང་བ་རྒྱུན་འཁྱོངས་བྱེད་པ་དང་། ཁྲིད་ཕྱོགས་ཡག་པོར་འཛིན་པ། བརྗོད་དོན་གཙོ་བོར་དམིགས་པ། ལོ་རྒྱུས་ཀྱི་དོན་དངོས་ལ་བརྟེན་ནས་སྐད་ཆ་ཤོད་པ། སྤུས་ཚད་མཐོ་བའི་འགྲེམས་སྟོན་སྤུས་ལེགས་བཤམས་ཏེ་མཚོན་བྱེད་ནུས་པ་དང་ཁྱབ་སྤེལ་ནུས་པ། ཤུགས་རྐྱེན་ཐེབས་ནུས་བཅས་ཆེ་རུ་བཏང་ནས་དམར་པོའི་རིག་གནས་གསོན་ཉམས་ལྡན་པའི་ངང་ཁྱབ་སྤེལ་གཏོང་དགོས། བཞི་ནི་སློབ་གསོའི་བྱེད་ནུས་ཆེ་རུ་གཏོང་དགོས། གསར་བརྗེ་དང་། འཛུགས་སྐྲུན། བསྒྱུར་བཅོས་བཅས་ཀྱི་ལོ་རྒྱུས་དུས་སྐབས་མི་འདྲ་བའི་ནང་གཙོ་གནད་ཀྱི་དོན་ཆེན་དང་གཙོ་གནད་ཀྱི་སྦྲེལ་ཚིགས་ལ་དམིགས་ནས་མཚོན་ཡུལ་གལ་ཆེན་སྐོར་ཞིག་ཞིབ་འཇུག་ཐོག་གཏན་འཁེལ་བྱས་ནས། ཏང་གི་གཏམ་རྒྱུད་དང་། གསར་བརྗེའི་གཏམ་རྒྱུད། དཔའ་བོའི་གཏམ་རྒྱུད་བཅས་ཡག་པོ་བཤད་ནས་དུས་རབས་ཀྱི་ཁྱད་ཆོས་མངོན་པ་དང་། དེ་ཉིད་མིར་སློབ་གསོ་དང་མིར་སྐུལ་སློང་། མི་གསོ་སྐྱོང་བཅས་བྱེད་པའི་སློབ་གྲྭ་ཆེན་པོ་ཞིག་ཏུ་འགྱུར་བར་བྱེད་དགོས། གཞོན་ནུ་ལོ་ཆུང་གི་གོ་རྟོགས་ཁྱད་ཆོས་དང་མཐུན་པའི་སློབ་གསོའི་བྱེད་སྒོ་ཇུས་འགོད་བྱེད་པ་དང་། ཁྱད་ཆོས་ལྡན་པའི་གསར་བརྗེའི་སྲོལ་རྒྱུན་སློབ་གསོ་དང་། རྒྱལ་གཅེས་རིང་ལུགས་ཀྱི་སློབ་གསོ། གཞོན་ནུ་ལོ་ཆུང་གི་བསམ་བློ་དང་ཀུན་སྤྱོད་སློབ་གསོ་བཅས་ཀྱི་རྟེན་གཞི་བཙུགས་ནས་ཁོ་ཚོར་ཆུང་དུས་ནས་དམར་པོའི་ཕུགས་བསམ་ཡིད་ལ་འཆང་རྒྱུའི་ཁྲིད་སྟོན་བྱེད་དགོས།

(2021ལོའི་ཟླ་6ཚེས་25ཉིན་སྐབས་བཅུ་དགུ་པའི་ཀྲུང་དབྱང་ཆབ་སྲིད་ཅུས་ཀྱི་ཐུན་མོང་སློབ་སྦྱོང་ཐེངས་སོ་གཅིག་པའི་ཐོག་གནང་བའི་གསུང་བཤད།)

བཅུ་བཞི།

རིག་དངོས་སྲུང་སྐྱོབ་བེད་སྤྱོད་དང་རིག་གནས་ཤུལ་བཞག་སྲུང་སྐྱོབ་དང་རྒྱུན་འཛིན་བྱེད་ཤུགས་ཆེ་རུ་གཏོང་བ་དང་། རིག་དངོས་ཞིབ་འཇུག་དང་འཆད་འགྲེལ། འགྲེམས་སྟོན་དང་སྒྲོག་སྤེལ་བཅས་ཀྱི་ཆུ་ཚད་མཐོ་རུ་བཏང་སྟེ་རིག་དངོས་གསར་སྐྱེས་ངོ་མ་ཡོང་དུ་འཇུག་དགོས་ལ། དེ་ཉིད་སྤྱི་ཚོགས་རིང་ལུགས་ཀྱི་བསམ་པའི་དཔལ་ཡོན་འཛུགས་སྐྲུན་བྱེད་ཤུགས་ཆེ་རུ་གཏོང་བའི་གསོ་བཅུད་ཟབ་མོ་ཞིག་དང་། རྒྱལ་སྤྱིའི་ཐོག་ཀྲུང་ཧྭའི་རིག་གནས་ཀྱི་ཤུགས་རྐྱེན་རྒྱ་ཆེ་རུ་གཏོང་བའི་མིང་བྱང་གལ་ཆེན་ཞིག་ཏུ་འགྱུར་བར་བྱེད་དགོས།

(2021ལོའི་ཟླ་11ཚེས་24ཉིན་ཀྲུང་དབྱང་གི་ཕྱོགས་ཡོངས་ནས་བསྒྱུར་བཅོས་ཟབ་སྤེལ་ཨུ་ཡོན་ལྷན་ཁང་གི་གྲོས་ཚོགས་ཐེངས་ཉེར་གཉིས་པའི་ཐོག་གནང་བའི་གསུང་བཤད།)

བཅོ་ལྔ།

ལོ་རྒྱུས་རིག་གནས་ཤུལ་བཞག་ལས་ཀྲུང་ཧྭ་མི་རིགས་ཀྱི་གཞི་རྒྱུ་དང་ཁྲག་རྒྱུན་འདུས་ཡོད་པས། དེ་ནི་ང་ཚོའི་མི་རབས་འདིར་དབང་བ་མ་ཟད། ཕ་ཚ་བུ་རྒྱུད་ཡོངས་ལའང་དབང་བ་ཡིན། ལོ་རྒྱུས་ལ་གུས་ཞུམ་དང་། རིག་གནས་ལ་གུས་ཞུམ། སྐྱེ་ཁམས་ལ་གུས་ཞུམ་བཅས་བྱས་ཏེ། ཕྱོགས་ཡོངས་ནས་ལོ་རྒྱུས་རིག་གནས་ཤུལ་བཞག་སྲུང་སྐྱོབ་ཡག་པོ་བྱེད་པ་དང་། ཡུལ་སྐོར་འཕེལ་རྒྱས་དང་། ཁྱད་ཆོས་ལྡན་པའི་གཉེར་སྐྱོང་། གནའ་གྲོང་སྲུང་སྐྱོབ་བཅས་གཅིག་འདོམས་ཡག་པོ་བྱས་ཏེ། རིག་དངོས་བདེ་འཇགས་ཀྱི་མཐའ་ཚད་བརྟན་པོར་སྲུང་བ་དང་སྔོན་རབས་པས་ང་ཚོར་བཞག་པའི་རྩ་ཆེའི་རྒྱུ་ནོར་སྲུང་སྐྱོབ་ཡག་པོ་བྱེད་དགོས།

(2022ལོའི་ཟླ་1ཚེས་27ཉིན་ཧྲན་ཞིའི་ཅིན་ཀྲུང་དུ་རྟོག་ཞིབ་གནང་སྐབས་ཀྱི་གསུང་བཤད།)

བཅུ་དྲུག།

རིག་དངོས་དང་རིག་གནས་ཤུལ་བཞག་དེ་བས་མང་པོ་གསར་སྐྱེས་ཡོང་དུ་བཅུག་སྟེ་ཀྲུང་ཧྭའི་ཤེས་དཔལ་རྒྱུན་འཛིན་བྱེད་པའི་སྤྱི་ཚོགས་ཀྱི་ཁོར་ཡུག་ཡག་པོ་གཏོད་དགོས། རིག་དངོས་དང་རིག་གནས་ཤུལ་བཞག་གིས་ཀྲུང་ཧྭ་མི་རིགས་ཀྱི་གཞི་རྒྱུ་དང་ཁྲག་རྒྱུན་ཐེག་ཡོད་པས། བསྐྱར་སྐྱེ་མི་རུང་བ་དང་ཚབ་བྱེད་མི་ཐུབ་པའི་ཀྲུང་ཧྭའི་ཕུལ་བྱུང་ཤེས་དཔལ་ཐོན་ཁུངས་ཤིག་རེད། ང་ཚོས་རིག་དངོས་སྲུང་སྐྱོབ་བེད་སྤྱོད་དང་རིག་གནས་ཤུལ་བཞག་སྲུང་སྐྱོབ་རྒྱུན་འཛིན་ལ་སྐུལ་འདེད་ཧུར་ཐག་གཏོང་བ་དང་། རིག་དངོས་དང་རིག་གནས་ཤུལ་བཞག་གི་རིན་ཐང་སྣ་མང་སྔོག་འདོན་བྱས་ནས། ཀྲུང་ཧྭའི་རིག་གནས་དང་ཀྲུང་གོའི་སྙིང་སྟོབས་ཀྱི་རིན་ཐང་མཚོན་རྟགས་དང་རིག་གནས་ཐོན་རྫས་དེ་བས་མང་བ་ཁྱབ་སྤེལ་གཏོང་དགོས།

ཀྲུང་གོའི་གུང་ཁྲན་ཏང་མི་ནི་ལོ་རྒྱུས་དོན་སྟོང་རིང་ལུགས་པ་དང་རིག་གནས་དོན་སྟོང་རིང་ལུགས་པ་མིན་པས། རང་ཁུངས་བརྗེད་མི་རུང་ལ་རང་གཉའ་རང་གཅོག་ཀྱང་བྱེད་མི་རུང་། རིམ་པ་ཁག་གི་འགོ་ཁྲིད་ལས་བྱེད་པ་ཚང་མས་ལོ་རྒྱུས་ལ་གུས་ཞུམ་དང་། ཕུལ་བྱུང་གི་སྲོལ་རྒྱུན་རིག་གནས་ལ་གུས་ཞུམ་བྱེད་དགོས། རིག་དངོས་སྲུང་སྐྱོབ་བེད་སྤྱོད་དང་རིག་གནས་ཤུལ་བཞག་སྲུང་སྐྱོབ་རྒྱུན་འཛིན་ལས་དོན་ལ་མཐོང་ཆེན་བྱས་ཏེ་ལོ་རྒྱུས་དང་གནའ་རྫས་རྟོག་ཞིབ་ལས་དོན་པས་ཞིབ་འཇུག་དང་། སློབ་སྦྱོང་ཟབ་སྦྱོང་། ཞིབ་འཇུག་སྤེལ་རེས་བཅས་བྱེད་པར་སྲིད་ཇུས་ཀྱི་རྒྱབ་སྐྱོར་དེ་བས་མང་བ་འདོན་སྤྲོད་བྱེད་དགོས། ཀྲུང་ཧྭའི་ཤེས་དཔལ་རྒྱུན་འཛིན་བྱེད་པའི་སྤྱི་ཚོགས་ཀྱི་ཁོར་ཡུག་ཡག་པོ་ཞིག་བཏོད་དེ། ཀྲུང་ཧྭའི་ཤེས་དཔལ་འབྱུང་ཁུངས་འཚོལ་ཞིབ་ལས་གྲྭ་སོགས་ཀྱི་ཞིབ་འཇུག་གྲུབ་འབྲས་རྒྱ་ཁྱབ་ཏུ་དྲིལ་བསྒྲགས་དང་། མང་ཚོགས་སྤྱི་དང་ལྷག་པར་དུ་གཞོན་ནུ་ལོ་ཆུང་ལ་ཀྲུང་ཧྭའི་ཤེས་དཔལ་ལ་ངོས་འཛིན་དང་ཁས་ལེན་སྔར་ལས་ལེགས་པ་བྱ་རྒྱུའི་སློབ་གསོ་དང་ཁྲིད་སྟོན་བྱས་ཏེ། ཀྲུང་གོ་བའི་བློ་སྟོབས་དང་། སྙིང་སྟོབས། གདེང་ཚོད་བཅས་ཇེ་ཆེར་གཏོང་དགོས།

(2022ལོའི་ཟླ་5ཚེས་27ཉིན་སྐབས་བཅུ་དགུ་པའི་ཀྲུང་དབྱང་ཆབ་སྲིད་ཅུས་ཀྱི་ཐུན་མོང་སློབ་སྦྱོང་ཐེངས་སོ་དགུ་པའི་ཐོག་གནང་བའི་གསུང་བཤད།)

བཅུ་བདུན།

ཀྲུང་ཧྭའི་ཤེས་དཔལ་རྒྱ་ཆེ་ཞིང་གཏིང་ཟབ་ལ་ལོ་རྒྱུས་ཡུན་རིང་ལྡན། འདི་ནི་མི་རིགས་ཁག་གི་ཕུལ་དུ་བྱུང་བའི་རིག་གནས་གཅིག་ཏུ་འདུས་ནས་གྲུབ་པ་ཞིག་རེད། ཀྲུང་ཧྭ་མི་རིགས་གཅིག་མཐུན་ཚོགས་པའི་ལོ་རྒྱུས་དང་ཀྲུང་ཧྭ་མི་རིགས་སྣ་མང་གཞི་གཅིག་གི་བཀོད་པ་ལ་ཞིབ་འཇུག་བྱེད་ཤུགས་ཆེ་རུ་གཏོང་བ་དང་། ཞིན་ཅང་མི་རིགས་ཁག་བར་འགྲོ་འོང་བྱས་པའི་ལོ་རྒྱུས་ཀྱི་དོན་དངོས་དང་། གནའ་རྫས་རྟོག་ཞིབ་དངོས་རྫས། རིག་གནས་ཤུལ་བཞག་བཅས་སྔོག་འདོན་གང་ལེགས་དང་བཀོལ་སྤྱོད་ནུས་ལྡན་བྱས་ཏེ། ཞིན་ཅང་ནི་གནའ་སྔ་མོ་ནས་བཟུང་རང་རྒྱལ་གྱི་ཁ་འབྲལ་ཐབས་མེད་པའི་ཆ་ཤས་ཤིག་ཡིན་པ་དང་མི་རིགས་མང་པོ་འདུས་སྡོད་བྱེད་པའི་ས་ཁུལ་ཞིག་ཡིན་པ། ཞིན་ཅང་གི་མི་རིགས་ཁག་ནི་ཀྲུང་ཧྭ་མི་རིགས་ཁྱིམ་ཚང་ཆེན་མོའི་ཤ་རུས་གཅིག་འདྲེས་དང་ལས་དབང་གཅིག་མཐུན་གྱི་ཁོངས་མི་གལ་ཆེན་ཡིན་པ་བཅས་གསལ་པོར་བཤད་དགོས། དངོས་མིན་རིག་གནས་ཤུལ་བཞག་སྲུང་སྐྱོབ་དང་རྒྱུན་འཛིན་བྱེད་ཤུགས་ཆེ་རུ་བཏང་སྟེ། མི་རིགས་ཁག་གི་ཕུལ་དུ་བྱུང་བའི་སྲོལ་རྒྱུན་རིག་གནས་དར་རྒྱས་གོང་འཕེལ་གཏོང་དགོས།

(2022ལོའི་ཟླ་7ཚེས་13ཉིན་ཞིན་ཅང་དུ་རྟོག་ཞིབ་གནང་སྐབས་ཀྱི་གསུང་བཤད།)

བཅོ་བརྒྱད།

ཧྲང་རྒྱལ་རབས་ཀྱི་གནའ་ཤུལ་ནས་ཐོན་པའི་རུས་བརྐོས་ཡི་གེ་ལས་ང་ཚོའི་ལོ་ངོ་3000སྔོན་གྱི་ཡི་གེ་ཉར་ཚགས་བྱས་ཡོད། ཀྲུང་གོའི་ལོ་རྒྱུས་ཁུངས་མ་ལོ་ངོ་1000ལྷག་གི་གོང་ལ་སྐུལ་འདེད་བཏང་ཡོད། ཧྲང་རྒྱལ་རབས་ཀྱི་གནའ་ཤུལ་ལ་ང་ཡོང་འདོད་ནས་ཡུན་རིང་འགོར་སོང་། ཐེངས་འདིར་ཡོང་དོན་ནི་ཀྲུང་ཧྭའི་ཤེས་དཔལ་ལ་སློབ་སྦྱོང་དང་གོ་བ་སྔར་ལས་གཏིང་ཟབ་བླངས་ནས་གནའ་བཟང་དེང་སྤྱོད་དང་། ཀྲུང་ཧྭ་མི་རིགས་ཀྱི་དེང་རབས་དཔལ་ཡོན་སྔར་ལས་ཡག་པོ་འཛུགས་སྐྲུན་བྱེད་པར་དཔྱད་གཞི་འདོན་སྤྲོད་བྱེད་འདོད་པ་ཡིན། ཀྲུང་གོའི་རྒྱ་ཡིག་ནི་ཧ་ལས་དགོས་པ་ཞིག་ཡིན་པ་དང་། ཀྲུང་ཧྭ་མི་རིགས་ཀྱི་བྱུང་འཕེལ་ནི་རྒྱ་ཡིག་དང་འབྲལ་ཐབས་མེད། ཕྱོགས་འདིའི་ཐད་ནས་གནའ་རྫས་རྟོག་ཞིབ་བྱ་གཞག་གིས་བྱས་རྗེས་ཆེན་པོ་བཞག་ཡོད། གནའ་རྫས་རྟོག་ཞིབ་ལས་དོན་ལ་མུ་མཐུད་མཐོང་ཆེན་དང་ཤུགས་བརྒྱབ་ནས་ཀྲུང་ཧྭའི་ཤེས་དཔལ་འབྱུང་ཁུངས་འཚོལ་ཞིབ་ལས་གྲྭ་མུ་མཐུད་གཏིང་ཟབ་ཏུ་སྤེལ་དགོས། ཀྲུང་ཧྭའི་ཤེས་དཔལ་གྱི་ལོ་རྒྱུས་ཡུན་རིང་ཞིང་རྒྱུན་ཆད་མ་མྱོང་བར་ང་ཚོའི་མི་རིགས་རླབས་པོ་ཆེ་འདི་གྲུབ་ཡོད། མི་རིགས་འདི་ད་དུང་མུ་མཐུད་ནས་རླབས་པོ་ཆེ་ཡོང་ཐུབ་རྒྱུ་རེད། རིག་དངོས་སྔོག་འདོན་དང་ཞིབ་འཇུག་སྲུང་སྐྱོབ་ལས་དོན་བརྒྱུད། ཕུལ་བྱུང་གི་སྲོལ་རྒྱུན་རིག་གནས་དེ་བས་ལེགས་པའི་སྒོ་ནས་རྒྱུན་འཛིན་བྱེད་དགོས།

(2022ལོའི་ཟླ་10ཚེས་28ཉིན་ཧོ་ནན་ཨན་དབྱང་དུ་རྟོག་ཞིབ་གནང་སྐབས་ཀྱི་གསུང་བཤད།)

བཅུ་དགུ།

ཨེ་ཤ་ཡ་ནི་མིའི་རིགས་ཤེས་དཔལ་གྱི་འབྱུང་གནས་གལ་ཆེན་ཞིག་ཡིན་པ་དང་། རིག་གནས་ཤུལ་བཞག་ཕུན་སུམ་ཚོགས་པ་གསོ་སྐྱོང་དང་ཉར་ཚགས་བྱས་ཏེ་འཛམ་གླིང་གི་ཤེས་དཔལ་འཕེལ་རྒྱས་ལོ་རྒྱུས་ལ་ངོ་མཚར་ཆེ་བའི་ལེའུ་ཞིག་བརྩམས་ཡོད། 2019ལོར་ངས་ཨེ་ཤ་ཡའི་ཤེས་དཔལ་གླེང་མོལ་ཚོགས་ཆེན་ཐོག་ཨེ་ཤ་ཡའི་རིག་གནས་ཤུལ་བཞག་སྲུང་སྐྱོབ་བྱ་སྤྱོད་སྤེལ་རྒྱུའི་གྲོས་འགོ་བཏོན་པ་ཡིན། ལོ་4རིང་ཕྱོགས་སོ་སོས་དང་ལེན་ཧུར་ཐག་དང་ཐུན་མོང་ཐོག་འབད་བརྩོན་བྱས་ཐོག། གནའ་བོའི་ཤེས་དཔལ་ཞིབ་འཇུག་དང་། མཉམ་འབྲེལ་སྒོས་གནའ་རྫས་རྟོག་ཞིབ། གནའ་ཤུལ་ཉམས་གསོ། དངོས་མང་བཤམས་སྟོན་ཁང་སྤེལ་རེས་སོགས་ཀྱི་ཐད་དངོས་སྒྲུབ་མཉམ་ལས་བྱས་ཏེ། མིའི་རིགས་ཤེས་དཔལ་གྱི་སྙིང་བཅུད་སྲུང་སྐྱོབ་བྱ་ཆེད་ཨེ་ཤ་ཡའི་ལེགས་སྐྱེས་གསར་པ་ཕུལ་ཡོད།

ཨེ་ཤ་ཡའི་རིག་གནས་ཤུལ་བཞག་སྲུང་སྐྱོབ་མནའ་འབྲེལ་བཙུགས་པ་དེ་ཨེ་ཤ་ཡའི་རིག་གནས་ཤུལ་བཞག་སྲུང་སྐྱོབ་བྱེད་ཤུགས་ཆེ་རུ་གཏོང་བ་དང་། ཨེ་ཤ་ཡའི་ཤེས་དཔལ་སྤེལ་རེས་ཇེ་ཟབ་གཏོང་བ། འཛམ་གླིང་གི་ཤེས་དཔལ་ལྡུམ་ར་ཕུན་སུམ་ཚོགས་སུ་གཏོང་བ་བཅས་བྱས་ནས་མིའི་རིགས་ཀྱི་ཤེས་དཔལ་ཡར་ཐོན་ཡོང་ཆེད་སྟོབས་ཤུགས་ལེགས་སྐྱེས་འབུལ་བར་ཕན་ཐོགས་ཡོད། ཀྲུང་གོས་མནའ་འབྲེལ་གྱི་སྒྲོམ་གཞིའི་འོག། ཨེ་ཤ་ཡའི་རྒྱལ་ཁབ་ཁག་དང་ལག་གདང་སྦྲེལ་ནས་རིག་གནས་ཤུལ་བཞག་སྲུང་སྐྱོབ་ཀྱི་ཉམས་མྱོང་སྤེལ་རེས་ལ་ཤུགས་རྒྱག་པ་དང་། རིག་གནས་ཤུལ་བཞག་ཁྱབ་ཁོངས་ཀྱི་རྒྱལ་སྤྱིའི་མཉམ་ལས་ལ་སྐུལ་འདེད་ཧུར་ཐག་བཏང་སྟེ། གོ་ལ་ཧྲིལ་པོའི་ཤེས་དཔལ་གླེང་མོལ་དང་མཉམ་ལས་དྲ་རྒྱ་འཛུགས་པ་དང་། རྒྱལ་ཁབ་ཁག་གི་མི་དམངས་ཕན་ཚུན་རྒྱུས་མངའ་དང་མཐུན་པོ་ཡོང་བར་སྐུལ་འདེད་བཏང་སྟེ། ཐུན་མོང་ཐོག་མིའི་རིགས་ཀྱི་ཤེས་དཔལ་འཕེལ་རྒྱས་དང་ཡར་ཐོན་ཡོང་བར་སྐུལ་འདེད་གཏོང་འདོད་ཡོད།

(2023ལོའི་ཟླ་4ཚེས་25ཉིན་ཨེ་ཤ་ཡའི་རིག་གནས་ཤུལ་བཞག་སྲུང་སྐྱོབ་མནའ་འབྲེལ་ཚོགས་ཆེན་ལ་སྤྲིངས་པའི་རྟེན་འབྲེལ་འཕྲིན་ཡིག།)

ཉི་ཤུ།

དངོས་མང་བཤམས་སྟོན་ཁང་དུ་རྩ་ཆེའི་རིག་དངོས་མང་པོ་དང་ཐ་ན་“རྒྱལ་ཁབ་ཀྱི་གཅེས་ནོར་”ཡོད་པ་རེད། དེ་དག་གིས་རང་རྒྱལ་གྱི་ལོ་ངོ་ས་ཡ་ལྷག་གི་མིའི་རིགས་ཀྱི་ལོ་རྒྱུས་དང་། ལོ་ཆིག་ཁྲིའི་རིག་གནས་ལོ་རྒྱུས། ལོ་ངོ་ལྔ་སྟོང་ལྷག་གི་ཤེས་དཔལ་དར་བའི་ལོ་རྒྱུས་བཅས་ཀྱི་དཔང་པོ་དངོས་སུ་བྱས་ཡོད་པས། ཀྲུང་ཧྭའི་ཤེས་དཔལ་གྱི་འབྱུང་ཁུངས་འཚོལ་ཞིབ་ལས་གྲྭ་ལག་བསྟར་གཏིང་ཟབ་བྱས་ནས། ཀྲུང་གོའི་ཤེས་དཔལ་དར་བའི་ལོ་རྒྱུས་ལ་ཞིབ་འཇུག་བྱ་རྒྱུ་དེ་གཏིང་ཟབ་ཏུ་སྤེལ་དགོས། སྲུང་སྐྱོབ་ཨང་དང་པོར་འཛིན་རྒྱུ་རྒྱུན་འཁྱོངས་དང་། དོ་དམ་ལ་ཤུགས་སྣོན། རིན་ཐང་སྔོག་འདོན། བེད་སྤྱོད་ནུས་ལྡན། རིག་དངོས་གསར་སྐྱེས་ཡོང་བ་བཅས་བྱ་རྒྱུའི་སྐོར་གྱི་ཏང་ཀྲུང་དབྱང་གི་ལས་ཀའི་བླང་བྱ་ལག་བསྟར་དོན་འཁྱོལ་ཏན་ཏིག་བྱས་ཏེ། རིག་དངོས་སྲུང་སྐྱོབ་བེད་སྤྱོད་དང་རིག་གནས་ཤུལ་བཞག་སྲུང་སྐྱོབ་དང་རྒྱུན་འཛིན་བྱེད་པའི་ཆུ་ཚད་ཕྱོགས་ཡོངས་ནས་མཐོ་རུ་གཏོང་དགོས།

(2023ལོའི་ཟླ་5ཚེས་16ཉིན་ཧྲན་ཞིའི་ཡུན་ཁྲེང་དུ་རྟོག་ཞིབ་གནང་སྐབས་ཀྱི་གསུང་བཤད།)

ཉེར་གཅིག།

ཀྲུང་ཧྭ་མི་རིགས་ལ་ལོ་རྒྱུས་ཡུན་རིང་ལྡན་པའི་ཕུལ་བྱུང་གི་སྲོལ་རྒྱུན་རིག་གནས་ཡོད། གནའ་སྔ་མོ་ནས་བཟུང་སྒོ་འབྱེད་བསྟུན་མཁས་དང་མཉམ་སྡུད་མཉམ་གསོག་གི་རིག་གནས་ཀྱི་བློ་ཁོག་ལྡན་ལ། ཀྲུང་ཧྭའི་ཤེས་དཔལ་གྱིས་སྔར་ནས་བཟུང་ཤེས་དཔལ་མི་འདྲ་བའི་བར་ཕན་ཚུན་བསམ་ཤེས་དང་བརྩི་འཇོག་བྱ་རྒྱུར་བསྔགས་བརྗོད་བྱེད་ཀྱི་ཡོད། ལོ་རྒྱུས་ཡུན་རིང་བ་དང་རིག་གནས་དར་ཁྱབ་ཆེ་བའི་པེ་ཅིན་ནི་ཀྲུང་ཧྭའི་ཤེས་དཔལ་གྱི་རྒྱུན་མཐུད་རང་བཞིན་དང་། གསར་གཏོད་རང་བཞིན། གཅིག་གྱུར་རང་བཞིན། བསྟུན་མཁས་རང་བཞིན། ཞི་བདེའི་རང་བཞིན་བཅས་ཀྱི་དཔང་རྟགས་ནུས་ལྡན་ཞིག་རེད། ཀྲུང་གོས་ལོ་རྒྱུས་ཀྱི་གནས་རྙིང་དང་རྒྱལ་ཡོངས་ཀྱི་རིག་གནས་ལྟེ་གནས་ཡིན་པའི་པེ་ཅིན་གྱི་དགེ་མཚན་འདོན་སྤེལ་གང་ལེགས་བྱས་ནས་གོ་ལ་ཧྲིལ་པོའི་ས་གནས་ཁག་དང་རིག་གནས་སྤེལ་རེས་ལ་ཤུགས་རྒྱག་པ་དང་། རིག་གནས་དར་རྒྱས་གོང་འཕེལ་དང་། རིག་གནས་ཤུལ་བཞག་སྲུང་སྐྱོབ། ཤེས་དཔལ་སྤེལ་རེས་དང་ཕན་ཚུན་དཔྱད་གཞིར་འཛིན་པ་བཅས་ལ་ཐུན་མོང་ཐོག་སྐུལ་འདེད་གཏོང་བ་དང་། གོ་ལ་ཧྲིལ་པོའི་ཤེས་དཔལ་གྲོས་འགོ་ལག་ལེན་བསྟར་ནས་མིའི་རིགས་ཀྱི་ལས་དབང་གཅིག་མཐུན་ཚོགས་པ་གཏོད་རྒྱུར་སྐུལ་འདེད་གཏོང་ཆེད་གཏིང་ཟབ་ལ་རྒྱུན་རིང་བའི་རིག་གནས་ཀྱི་སྟོབས་ཤུགས་བསྣན་དགོས།

(2023ལོའི་ཟླ་9ཚེས་14ཉིན་པེ་ཅིན་རིག་གནས་གླེང་སྟེགས་ལ་སྤྲིངས་པའི་རྟེན་འབྲེལ་འཕྲིན་ཡིག།)

ཉེར་གཉིས།

འཛམ་གླིང་ནི་སྣ་མང་ཕུན་སུམ་ཚོགས་པའི་ཤེས་དཔལ་ལས་གྲུབ་པ་དང་། ཀྲུང་གོ་ནི་འཛམ་གླིང་ཐོག་ཆེས་གནའ་བོའི་ལོ་རྒྱུས་དང་རིག་གནས་ལྡན་པའི་རྒྱལ་ཁབ་ཀྱི་གྲས་ཤིག་ཡིན། ཀྲུང་གོས་མཉམ་འབྲེལ་རྒྱལ་ཚོགས་ཀྱི་སློབ་གསོ་ཚན་རིག་རིག་གནས་རྩ་འཛུགས་དང་སྔར་ལས་དམ་ཟབ་ཀྱི་མཉམ་ལས་སྤེལ་ཏེ་རིག་གནས་ཤུལ་བཞག་སྲུང་སྐྱོབ་ནུས་པ་དང་ཆུ་ཚད་མཐོར་འདེགས་ལ་མུ་མཐུད་སྐུལ་འདེད་གཏོང་བ་དང་། ཤེས་དཔལ་སྣ་མང་ཕན་ཚུན་བརྗེ་རེས་དང་ཕན་ཚུན་དཔྱད་གཞིར་འཛིན་པ་དང་ཁོང་ཡངས་མཉམ་ལས་ལ་སྐུལ་འདེད་བཏང་སྟེ། འཛམ་གླིང་གི་ཞི་བདེར་རོགས་འདེགས་བྱེད་པ་དང་མིའི་རིགས་ཀྱི་ལས་དབང་གཅིག་མཐུན་ཚོགས་པ་འཛུགས་པར་སྐུལ་འདེད་གཏོང་འདོད་ཡོད།

(2023ལོའི་ཟླ་9ཚེས་28ཉིན་མཉམ་འབྲེལ་རྒྱལ་ཚོགས་སློབ་གསོ་ཚན་རིག་རིག་གནས་རྩ་འཛུགས་ཀྱི་སྤྱི་ཁྱབ་ལས་འཛིན་ཨ་ཙུའུ་ལེ་ལ་མཇལ་འཕྲད་གནང་སྐབས་ཀྱི་གསུང་བཤད།)

སྒྲོལ་མ་སྐྱབས་ཀྱིས་བསྒྱུར།

※འདི་ནི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་2013ལོའི་ཟླ་8པ་ནས་2023ལོའི་ཟླ་9པའི་བར་གནང་བའི་རིག་གནས་ཤུལ་བཞག་སྲུང་སྐྱོབ་དང་རྒྱུན་འཛིན་བྱེད་པར་ཤུགས་རྒྱག་པ་དང་། ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་དར་སྤེལ་གཏོང་དགོས་པའི་སྐོར་གྱི་རྒྱས་བཤད་གལ་ཆེན་གྱི་ཚན་བཤུས་ཡིན།